அனியதகதா²

542. ரஹோ நிஸஜ்ஜஸ்ஸாதே³ன, மாதுகா³மஸ்ஸ ஸந்திகம்;

க³ந்துகாமோ நிவாஸேதி, அக்கி²ம் அஞ்ஜேதி பு⁴ஞ்ஜதி.

543. பயோகே³ ச பயோகே³ ச, ஹோதி ஸப்³ப³த்த² து³க்கடம்;

க³ச்ச²தோ பத³வாரேன, க³ந்த்வா சஸ்ஸ நிஸீத³தோ.

544. நிஸஜ்ஜாய உபி⁴ன்னம்பி, பயோக³க³ணனாய ச;

ஹோதி பாசித்தியம் தஸ்ஸ, ப³ஹுகானி ப³ஹூஸ்வபி.

545. ஸமீபேபி டி²தோ அந்தோ⁴, அந்தோத்³வாத³ஸஹத்த²கே;

ந கரோதி அனாபத்திம், இத்தீ²னம் து ஸதம்பி ச.

546. சக்கு²மாபி நிபஜ்ஜித்வா, நித்³தா³யந்தோபி கேவலம்;

த்³வாரே பிஹிதக³ப்³ப⁴ஸ்ஸ, நிஸின்னோபி ந ரக்க²தி.

547. அனந்தே⁴ ஸதி விஞ்ஞுஸ்மிம், டி²தஸ்ஸாரஹஸஞ்ஞினோ;

நிஸஜ்ஜபச்சயா தோ³ஸோ, நத்தி² விக்கி²த்தசேதஸோ.

548. ந தோ³ஸும்மத்தகாதீ³னம், ஆபத்தீஹிபி தீஹிபி;

ஸமுட்டா²னாத³யோ துல்யா, பட²மந்திமவத்து²னா.

பட²மானியதகதா².

549. அனந்தா⁴ப³தி⁴ரோ விஞ்ஞூ, இத்தீ² வா புரிஸோபி வா;

அந்தோத்³வாத³ஸஹத்த²ட்டோ², அனாபத்திகரோ ஸியா.

550. அந்தோ⁴ அப³தி⁴ரோ வாபி, ப³தி⁴ரோ வாபி சக்கு²மா;

ந கரோதி அனாபத்திம், திஸமுட்டா²னமேவித³ம்.

து³தியானியதகதா².

இதி வினயவினிச்ச²யே அனியதகதா² நிட்டி²தா.