ஸங்கா⁴தி³ஸேஸகதா²

325. மோசேதுகாமதாசித்தம், வாயாமோ ஸுக்கமோசனம்;

அஞ்ஞத்ர ஸுபினந்தேன, ஹோதி ஸங்கா⁴தி³ஸேஸதா.

326. பரேனுபக்கமாபேத்வா, அங்க³ஜாதம் பனத்தனோ;

ஸுக்கம் யதி³ விமோசேதி, க³ருகம் தஸ்ஸ நித்³தி³ஸே.

327. ஸஞ்சிச்சுபக்கமந்தஸ்ஸ, அங்க³ஜாதம் பனத்தனோ;

து²ல்லச்சயம் ஸமுத்³தி³ட்ட²ம், ஸசே ஸுக்கம் ந முச்சதி.

328. ஸஞ்சிச்சுபக்கமந்தஸ்ஸ, ஆகாஸே கம்பனேனபி;

ஹோதி து²ல்லச்சயம் தஸ்ஸ, யதி³ ஸுக்கம் ந முச்சதி.

329. வத்தி²ம் கீளாய பூரேத்வா, பஸ்ஸாவேதும் ந வட்டதி;

நிமித்தம் பன ஹத்தே²ன, கீளாபேந்தஸ்ஸ து³க்கடம்.

330. திஸ்ஸன்னம் பன இத்தீ²னம், நிமித்தம் ரத்தசேதஸா;

புரதோ பச்ச²தோ வாபி, ஓலோகேந்தஸ்ஸ து³க்கடம்.

331. ஏகேனேகம் பயோகே³ன, தி³வஸம்பி ச பஸ்ஸதோ;

நாபத்தியா ப⁴வே அங்க³ம், உம்மீலனனிமீலனம்.

332. அமோசனாதி⁴ப்பாயஸ்ஸ, அனுபக்கமதோபி ச;

ஸுபினந்தேன முத்தஸ்மிம், அனாபத்தி பகாஸிதா.

ஸுக்கவிஸட்டி²கதா².

333. ஆமஸந்தோ மனுஸ்ஸித்தி²ம், காயஸம்ஸக்³க³ராக³தோ;

‘‘மனுஸ்ஸித்தீ²’’தி ஸஞ்ஞாய, ஹோதி ஸங்கா⁴தி³ஸேஸிகோ.

334. லோமேனந்தமஸோ லோமம், பு²ஸந்தஸ்ஸாபி இத்தி²யா;

காயஸம்ஸக்³க³ராகே³ன, ஹோதி ஆபத்தி பி⁴க்கு²னோ.

335. இத்தி²யா யதி³ ஸம்பு²ட்டோ², ப²ஸ்ஸம் ஸேவனசேதனோ;

வாயமித்வாதி⁴வாஸேதி, ஹோதி ஸங்கா⁴தி³ஸேஸதா.

336. ஏகேன பன ஹத்தே²ன, க³ஹேத்வா து³தியேன வா;

தத்த² தத்த² பு²ஸந்தஸ்ஸ, ஏகாவாபத்தி தீ³பிதா.

337. அக்³க³ஹேத்வா பு²ஸந்தஸ்ஸ, யாவ பாத³ஞ்ச ஸீஸதோ;

காயா ஹத்த²மமோசேத்வா, ஏகாவ தி³வஸம்பி ச.

338. அங்கு³லீனம் து பஞ்சன்னம், க³ஹணே ஏகதோ பன;

ஏகாயேவ ஸியாபத்தி, ந ஹி கோட்டா²ஸதோ ஸியா.

339. நானித்தீ²னம் ஸசே பஞ்ச, க³ண்ஹாத்யங்கு³லியோ பன;

ஏகதோ பஞ்ச ஸங்கா⁴தி³-ஸேஸா ஹோந்திஸ்ஸ பி⁴க்கு²னோ.

340. இத்தி²யா விமதிஸ்ஸாபி, பண்ட³காதி³கஸஞ்ஞினோ;

காயேன இத்தி²யா காய-ஸம்ப³த்³த⁴ம் பு²ஸதோபி வா.

341. பண்ட³கே யக்கி²பேதீஸு, தஸ்ஸ து²ல்லச்சயம் ஸியா;

து³க்கடம் காயஸம்ஸக்³கே³, திரச்சா²னக³தித்தி²யா.

342. பி⁴க்கு²னோ படிப³த்³தே⁴ன, காயேன பன இத்தி²யா;

காயேன படிப³த்³த⁴ஞ்ச, பு²ஸந்தஸ்ஸபி து³க்கடம்.

343. இத்தீ²னம் இத்தி²ரூபஞ்ச, தா³ருலோஹமயாதி³கம்;

தாஸம் வத்த²மலங்காரம், ஆமஸந்தஸ்ஸ து³க்கடம்.

344. தத்த²ஜாதப²லம் க²ஜ்ஜம், முக்³கா³தி³ம் தத்த²ஜாதகம்;

த⁴ஞ்ஞானி பன ஸப்³பா³னி, ஆமஸந்தஸ்ஸ து³க்கடம்.

345. ஸப்³ப³ம் த⁴மனஸங்கா²தி³ம், பஞ்சங்க³துரியம்பி ச;

ரதனானி ச ஸப்³பா³னி, ஆமஸந்தஸ்ஸ து³க்கடம்.

346. ஸப்³ப³மாவுத⁴ப⁴ண்ட³ஞ்ச, ஜியா ச த⁴னுத³ண்ட³கோ;

அனாமாஸமித³ம் ஸப்³ப³ம், ஜாலஞ்ச ஸரவாரணம்.

347. ஸுவண்ணபடிபி³ம்பா³தி³, சேதியம் ஆரகூடகம்;

அனாமாஸந்தி நித்³தி³ட்ட²ம், குருந்த³ட்ட²கதா²ய ஹி.

348. ஸப்³ப³ம் ஓனஹிதும் வாபி, ஓனஹாபேதுமேவ வா;

வாதா³பேதுஞ்ச வாதே³தும், வாதி³தம் ந ச வட்டதி.

349. ‘‘கரிஸ்ஸாமுபஹார’’ந்தி, வுத்தேன பன பி⁴க்கு²னா;

பூஜா பு³த்³த⁴ஸ்ஸ காதப்³பா³, வத்தப்³பா³தி ச விஞ்ஞுனா.

350. ஸயம் பு²ஸியமானஸ்ஸ, இத்தி²யா பன து⁴த்தியா;

அவாயமித்வா காயேன, ப²ஸ்ஸம் படிவிஜானதோ.

351. அனாபத்தி அஸஞ்சிச்ச, அஜானந்தஸ்ஸ பி⁴க்கு²னோ;

மோக்கா²தி⁴ப்பாயினோ சேவ, ததா² உம்மத்தகாதி³னோ.

352. பட²மேன ஸமானாவ, ஸமுட்டா²னாத³யோ பன;

காயஸம்ஸக்³க³ராக³ஸ்ஸ, ததா² ஸுக்கவிஸட்டி²யா.

காயஸம்ஸக்³க³கதா².

353. து³ட்டு²ல்லவாசஸ்ஸாதே³ன, இத்தி²யா இத்தி²ஸஞ்ஞினோ;

த்³வின்னஞ்ச பன மக்³கா³னம், வண்ணாவண்ணவஸேன ச.

354. மேது²னயாசனாதீ³ஹி, ஓபா⁴ஸந்தஸ்ஸ பி⁴க்கு²னோ;

விஞ்ஞும் அந்தமஸோ ஹத்த²-முத்³தா³யபி க³ரும் ஸியா.

355. ‘‘ஸிக²ரணீஸி, ஸம்பி⁴ன்னா, உப⁴தோப்³யஞ்ஜனா’’தி ச;

அக்கோஸவசனேனாபி, க³ருகம் து ஸுணந்தியா.

356. புனப்புனோபா⁴ஸந்தஸ்ஸ, ஏகவாசாய வா ப³ஹூ;

க³ணனாய ச வாசானம், இத்தீ²னம் க³ருகா ஸியும்.

357. ஸா சே நப்படிஜானாதி, தஸ்ஸ து²ல்லச்சயம் ஸியா;

ஆதி³ஸ்ஸ ப⁴ணனே சாபி, உப்³ப⁴ஜாணுமத⁴க்க²கம்.

358. உப்³ப⁴க்க²கமதோ⁴ஜாணு-மண்ட³லம் பன உத்³தி³ஸம்;

வண்ணாதி³ப⁴ணனே காய-படிப³த்³தே⁴ ச து³க்கடம்.

359. து²ல்லச்சயம் ப⁴வே தஸ்ஸ, பண்ட³கே யக்கி²பேதிஸு;

அத⁴க்க²கோப்³ப⁴ஜாணும்ஹி, து³க்கடம் பண்ட³காதி³ஸு.

360. உப்³ப⁴க்க²கமதோ⁴ஜாணு-மண்ட³லேபி அயம் நயோ;

ஸப்³ப³த்த² து³க்கடம் வுத்தம், திரச்சா²னக³தித்தி²யா.

361. அத்த²த⁴ம்மபுரேக்கா²ரம், கத்வா ஓபா⁴ஸதோபி ச;

வத³தோபி அனாபத்தி, புரக்க²த்வானுஸாஸனிம்.

362. ததா² உம்மத்தகாதீ³னம், ஸமுட்டா²னாத³யோ நயா;

அதி³ன்னாதா³னதுல்யாவ, வேத³னேத்த² த்³விதா⁴ மதா.

து³ட்டு²ல்லவாசாகதா².

363. வண்ணம் பனத்தனோ காம-பாரிசரியாய பா⁴ஸதோ;

தஸ்மிம்யேவ க²ணே ஸா சே, ஜானாதி க³ருகம் ஸியா.

364. நோ சே ஜானாதி ஸா யக்கி²-பேதிதே³வீஸு பண்ட³கே;

ஹோதி து²ல்லச்சயம் தஸ்ஸ, ஸேஸே ஆபத்தி து³க்கடம்.

365. சீவராதீ³ஹி அஞ்ஞேஹி, வத்து²காமேஹி அத்தனோ;

நத்தி² தோ³ஸோ ப⁴ணந்தஸ்ஸ, பாரிசரியாய வண்ணனம்.

366. இத்தி²ஸஞ்ஞா மனுஸ்ஸித்தீ², பாரிசரியாய ராகி³தா;

ஓபா⁴ஸோ தேன ராகே³ன, க²ணே தஸ்மிம் விஜானனம்.

367. பஞ்சங்கா³னி இமானேத்த², வேதி³தப்³பா³னி விஞ்ஞுனா;

ஸமுட்டா²னாத³யோப்யஸ்ஸ, அனந்தரஸமா மதா.

அத்தகாமபாரிசரியகதா².

368. படிக்³க³ண்ஹாதி ஸந்தே³ஸம், புரிஸஸ்ஸித்தி²யாபி வா;

வீமம்ஸதி க³ரு ஹோதி, பச்சாஹரதி சே பன.

369. ‘‘யஸ்ஸா ஹி ஸந்திகம் க³ந்த்வா, ஆரோசேஹீ’’தி பேஸிதோ;

தமதி³ஸ்வா தத³ஞ்ஞஸ்ஸ, அவஸ்ஸாரோசகஸ்ஸ ஸோ.

370. ‘‘ஆரோசேஹீ’’தி வத்வா தம், பச்சாஹரதி சே பன;

பி⁴க்கு² ஸங்கா⁴தி³ஸேஸம்ஹா, ஸஞ்சரித்தா ந முச்சதி.

371. ‘‘மாதரா ரக்கி²தம் இத்தி²ம், க³ச்ச² ப்³ரூஹீ’’தி பேஸிதோ;

பிதுரக்கி²தமஞ்ஞம் வா, விஸங்கேதோவ பா⁴ஸதோ.

372. படிக்³க³ண்ஹனதாதீ³ஹி, தீஹி அங்கே³ஹி ஸம்யுதே;

ஸஞ்சரித்தே ஸமாபன்னே, க³ருகாபத்திமாதி³ஸே.

373. த்³வீஹி து²ல்லச்சயம் வுத்தம், பண்ட³காதீ³ஸு தீஹிபி;

ஏகேனேவ ச ஸப்³ப³த்த², ஹோதி ஆபத்தி து³க்கடம்.

374. சேதியஸ்ஸ ச ஸங்க⁴ஸ்ஸ, கி³லானஸ்ஸ ச பி⁴க்கு²னோ;

க³ச்ச²தோ பன கிச்சேன, அனாபத்தி பகாஸிதா.

375. மனுஸ்ஸத்தம் ததா² தஸ்ஸா, நனாலம்வசனீயதா;

படிக்³க³ண்ஹனதாதீ³னம், வஸா பஞ்சங்கி³கம் மதம்.

376. இத³ஞ்ஹி ச²ஸமுட்டா²னம், அசித்தகமுதீ³ரிதம்;

அலம்வசனீயத்தம் வா, பண்ணத்திம் வா அஜானதோ.

377. க³ஹேத்வா ஸாஸனம் காய-விகாரேனூபக³ம்ம தம்;

வீமம்ஸித்வா ஹரந்தஸ்ஸ, க³ருகம் காயதோ ஸியா.

378. ஸுத்வா யதா²னிஸின்னோவ, வசனம் இத்தி²யா புன;

தம் தத்தே²வாக³தஸ்ஸேவ, ஆரோசேந்தஸ்ஸ வாசதோ.

379. அஜானந்தஸ்ஸ பண்ணத்திம், காயவாசாஹி தம் விதி⁴ம்;

கரோதோ ஹரதோ வாபி, க³ருகம் காயவாசதோ.

380. ஜானித்வாபி கரோந்தஸ்ஸ, க³ருகாபத்தியோ ததா²;

ஸசித்தகேஹி தீஹேவ, ஸமுட்டா²னேஹி ஜாயரே.

ஸஞ்சரித்தகதா².

381. ஸயம்யாசிதகேஹேவ, குடிகம் அப்பமாணிகம்;

அத்துத்³தே³ஸம் கரோந்தஸ்ஸ, ததா²தே³ஸிதவத்து²கம்.

382. ஹோந்தி ஸங்கா⁴தி³ஸேஸா த்³வே, ஸாரம்பா⁴தீ³ஸு து³க்கடம்;

ஸசே ஏகவிபன்னா ஸா, க³ருகம் ஏககம் ஸியா.

383. புரிஸம் யாசிதும் கம்ம-ஸஹாயத்தா²ய வட்டதி;

மூலச்சே²ஜ்ஜவஸேனேவ, யாசமானஸ்ஸ து³க்கடம்.

384. அவஜ்ஜம் ஹத்த²கம்மம்பி, யாசிதும் பன வட்டதி;

ஹத்த²கம்மம்பி நாமேதம், கிஞ்சி வத்து² ந ஹோதி ஹி.

385. கோ³ணமாயாசமானஸ்ஸ, ட²பேத்வா ஞாதகாதி³கே;

து³க்கடம் தஸ்ஸ நித்³தி³ட்ட²ம், மூலச்சே²ஜ்ஜேன தேஸுபி.

386. ‘‘கோ³ணம் தே³மா’’தி வுத்தேபி, க³ஹேதும் ந ச வட்டதி;

ஸகடம் தா³ருப⁴ண்ட³த்தா, க³ஹேதும் பன வட்டதி.

387. வாஸிப²ரஸுகுத்³தா³ல-குடா²ராதீ³ஸ்வயம் நயோ;

அனஜ்ஜா²வுத்த²கம் ஸப்³ப³ம், ஹராபேதும்பி வட்டதி.

388. வல்லிஆதி³ம்ஹி ஸப்³ப³ஸ்மிம், க³ருப⁴ண்ட³ப்பஹோனகே;

பரேஸம் ஸந்தகேயேவ, ஹோதி ஆபத்தி து³க்கடம்.

389. பச்சயேஸு ஹி தீஸ்வேவ, விஞ்ஞத்தி ந ச வட்டதி;

ததியே பரிகதோ²பா⁴ஸ-நிமித்தானி ச லப்³ப⁴ரே.

390. ‘‘அதே³ஸிதே ச வத்து²ஸ்மிம், பமாணேனாதி⁴கம் குடிம்;

கரிஸ்ஸாமீ’’தி சிந்தேத்வா, அரஞ்ஞம் க³ச்ச²தோபி ச.

391. ப²ரஸும் வாபி வாஸிம் வா, நிஸேந்தஸ்ஸாபி து³க்கடம்;

சி²ந்த³தோ து³க்கடம் ருக்க²ம், தஸ்ஸ பாசித்தியா ஸஹ.

392. ஏவம் புப்³ப³பயோக³ஸ்மிம், குடிகாரகபி⁴க்கு²னோ;

யதா²பயோக³மாபத்திம், வினயஞ்ஞூ வினித்³தி³ஸே.

393. யா பன த்³வீஹி பிண்டே³ஹி, நிட்டா²னம் து க³மிஸ்ஸதி;

ஹோதி து²ல்லச்சயம் தேஸு, பட²மே து³தியே க³ரு.

394. அனாபத்தி ஸசஞ்ஞஸ்ஸ, தே³தி விப்பகதம் குடிம்;

ததா² பூ⁴மிம் ஸமம் கத்வா, பி⁴ந்த³தோபி ச தம் குடிம்.

395. கு³ஹம் லேணம் கரோந்தஸ்ஸ, திணபண்ணச்ச²த³ம்பி வா;

வாஸாகா³ரம் ட²பேத்வான, அஞ்ஞஸ்ஸத்தா²ய வா ததா².

396. தே³ஸாபேத்வாவ பி⁴க்கூ²ஹி, வத்து²ம் பன ச பி⁴க்கு²னோ;

க்ரியதோவ ஸமுட்டா²தி, கரோதோ அப்பமாணிகம்.