ஸாதா⁴ரணாஸாதா⁴ரணகதா²வண்ணனா

779-80. ஸப்³ப³ஸிக்கா²பதா³னந்தி உப⁴தோவிப⁴ங்கா³க³தானம் ஸப்³ப³ஸிக்கா²பதா³னம். பி⁴க்கூ²ஹி பி⁴க்கு²னீஹீதி உப⁴யத்த² ஸஹத்தே² கரணவசனம். பி⁴க்கூ²ஹி பி⁴க்கு²னீனஞ்ச, பி⁴க்கு²னீஹி பி⁴க்கூ²னஞ்சாதி உப⁴யத்த² அஸாதா⁴ரணபஞ்ஞத்தஞ்ச, ததா² பி⁴க்கூ²ஹி பி⁴க்கு²னீனஞ்ச, பி⁴க்கு²னீஹி பி⁴க்கூ²னஞ்சாதி உப⁴யத்த² ஸாதா⁴ரணஸிக்கா²பத³ஞ்ச அஹம் வக்கா²மீதி யோஜனா. ஸமாஹிதாதி ஏகக்³க³சித்தா. தம் மயா வுச்சமானம் நிதா³னாதி³னயம். ஸுணாதா²தி ஸோதுஜனம் ஸக்கச்சஸவனே நியோஜேதி.

781. ‘‘நிதா³ன’’ந்திஆதி³கா³தா² வுத்தத்தா²வ.

782-3. ‘‘கதி வேஸாலியா’’திஆதி³ புச்சா²கா³தா² உத்தானத்தா²யேவ.

786. ‘‘த³ஸ வேஸாலியா’’திஆதி³விஸ்ஸஜ்ஜனகா³தா²னம் ‘‘மேது²ன’’ந்திஆத³யோ நித்³தே³ஸவஸேன வுத்தா. விக்³க³ஹோதி மனுஸ்ஸவிக்³க³ஹம் பாராஜிகம். சதுத்த²ந்திமவத்து²கந்தி உத்தரிமனுஸ்ஸத⁴ம்மபாராஜிகம். அதிரேகசீவரந்தி பட²மகதி²னம். ஸுத்³த⁴காளகேளகலோமகந்தி ஏளகலோமவக்³கே³ து³தியம்.

787. பூ⁴தந்தி பட²மே முஸாவாத³வக்³கே³ அட்ட²மம். பரம்பரஞ்சேவாதி பரம்பரபோ⁴ஜனஸிக்கா²பத³ம். முக²த்³வாரந்தி சதுத்தே² போ⁴ஜனவக்³கே³ த³ஸமம். பி⁴க்கு²னீஸு ச அக்கோஸோதி பி⁴க்கு²னிபாதிமோக்கே² ச²ட்டே² ஆராமவக்³கே³ து³தியம்.

788. த்³வே அனுத்³த⁴ம்ஸனானீதி அட்ட²மனவமஸங்கா⁴தி³ஸேஸா. சீவரஸ்ஸ படிக்³க³ஹோதி சீவரவக்³கே³ பஞ்சமம்.

789. ரூபியந்தி ஏளகலோமவக்³கே³ அட்ட²மம். ஸுத்தவிஞ்ஞத்தீதி பத்தவக்³கே³ ச²ட்ட²ம். உஜ்ஜா²பனந்தி து³தியே பூ⁴தகா³மவக்³கே³ ததியம். பரிபாசிதபிண்டோ³தி ததியே ஓவாத³வக்³கே³ நவமம். ததே²வ க³ணபோ⁴ஜனந்தி சதுத்தே² போ⁴ஜனவக்³கே³ து³தியம்.

790. விகாலே போ⁴ஜனஞ்சேவாதி தத்தே²வ ஸத்தமம். சாரித்தந்தி அசேலகவக்³கே³ பஞ்சமே ச²ட்ட²ம். ந்ஹானந்தி ஸுராபானவக்³கே³ ச²ட்டே² ஸத்தமம். ஊனவீஸதிவஸ்ஸந்தி ஸத்தமே ஸப்பாணகவக்³கே³ பஞ்சமம். த³த்வா ஸங்கே⁴ன சீவரந்தி அட்ட²மே ஸஹத⁴ம்மிகவக்³கே³ நவமம்.

791. வோஸாஸந்தீதி து³தியம் பி⁴க்கு²பாடிதே³ஸனீயம். நச்சம் வா கீ³தம் வாதி பட²மே லஸுணவக்³கே³ த³ஸமம். சாரிகத்³வயந்தி சதுத்தே² துவட்டவக்³கே³ ஸத்தமட்ட²மானி. ச²ந்த³தா³னேனாதி அட்ட²மே குமாரிபூ⁴தவக்³கே³ ஏகாத³ஸமம். ‘‘ச²ந்த³தா³னேதீ’’தி வா பாடோ². ‘‘ச²ந்த³தா³னம் இதி இமே’’தி பத³ச்சே²தோ³.

792. குடீதி ச²ட்டோ² ஸங்கா⁴தி³ஸேஸோ. கோஸியந்தி நிஸ்ஸக்³கி³யேஸு து³தியே ஏளகலோமவக்³கே³ பட²மம். ஸேய்யந்தி முஸாவாத³வக்³கே³ பஞ்சமம். பத²வீதி முஸாவாத³வக்³கே³ த³ஸமம். பூ⁴தகா³மகந்தி பூ⁴தகா³மவக்³கே³ து³தியே பட²மம். ஸப்பாணகஞ்ச ஸிஞ்சந்தீதி பூ⁴தகா³மவக்³கே³ த³ஸமம்.

800. ச²ஊனானி தீணேவ ஸதானீதி ச²ஹி ஊனானி தீணேவ ஸதானி, சதுனவுதாதி⁴கானி த்³விஸதானீதி அத்தோ². ஸமசேதஸாதி –

‘‘வத⁴கே தே³வத³த்தம்ஹி, சோரே அங்கு³லிமாலகே;

த⁴னபாலே ராஹுலே ச, ஸப்³ப³த்த² ஸமமானஸோ’’தி. (மி. ப. 6.6.5; த⁴. ப. அட்ட². 1.16 தே³வத³த்தவத்து²; இதிவு. அட்ட². 100) –

வசனதோ ஸப்³பே³ஸு ஹிதாஹிதேஸு, லாபா⁴லாபா⁴தீ³ஸு ச அட்ட²ஸு லோகத⁴ம்மேஸு நிப்³பி³காரதாய ச ஸமானசித்தேன ததா²க³தேன.

வுத்தாவஸேஸாதி வேஸாலியாதீ³ஸு ச²ஸு நக³ரேஸு வுத்தேஹி அவஸிட்டா²னி. இமே ஸப்³பே³ இமானி ஸப்³பா³னி ஸிக்கா²பதா³னி ஸாவத்தி²யம் கதானி ப⁴வந்தி, பஞ்ஞத்தானி ஹோந்தீதி அத்தோ².

801. பாராஜிகானி சத்தாரீதி வேஸாலியம் வுத்தம் மேது²னமனுஸ்ஸவிக்³க³ஹஉத்தரிமனுஸ்ஸத⁴ம்மம், ராஜக³ஹே அதி³ன்னாதா³னந்தி சத்தாரி. ஸத்த ஸங்கா⁴தி³ஸேஸகாதி ராஜக³ஹே வுத்தா த்³வே அனுத்³த⁴ம்ஸனா, த்³வே ச பே⁴தா³, ஆளவியம் குடிகாரோ, கோஸம்பி³யம் மஹல்லகவிஹாரோ, தோ³வசஸ்ஸந்தி ஸத்த. நிஸ்ஸக்³கி³யானி அட்டே²வாதி வேஸாலியம் அதிரேகசீவரம், காளகஏளகலோமம், ராஜக³ஹே சீவரபடிக்³க³ஹணம், ரூபியபடிக்³க³ஹணம், ஸுத்தவிஞ்ஞத்தி, ஆளவியம் கோஸியமிஸ்ஸகம், கபிலவத்து²ம்ஹி ஏளகலோமதோ⁴வனம், ஊனபஞ்சப³ந்த⁴னந்தி அட்ட².

த்³வத்திம்ஸேவ ச கு²த்³த³காதி வேஸாலியம் பூ⁴தாரோசனம், பரம்பரபோ⁴ஜனம், அப்படிக்³க³ஹணம், அசேலகம், ‘‘யா பன பி⁴க்கு²னீ பி⁴க்கு²ம் அக்கோஸேய்யா’’தி பஞ்ச, ராஜக³ஹே உஜ்ஜா²பனகம், பி⁴க்கு²னிபரிபாசிதபிண்டோ³, க³ணபோ⁴ஜனம், விகாலபோ⁴ஜனம், ‘‘யோ பன பி⁴க்கு² நிமந்திதோ’’திஆதி³ ச, ‘‘ஓரேனட்³ட⁴மாஸம் நஹாயேய்யா’’தி, ஊனவீஸதிவஸ்ஸம், ‘‘ஸமக்³கே³ன ஸங்கே⁴ன சீவரம் த³த்வா’’தி பி⁴க்கூ²னம் அட்ட², பி⁴க்கு²னீனம் பன ‘‘நச்சம் வா கீ³தம் வா’’திஆதி³ ச, ‘‘யா பன பி⁴க்கு²னீ அந்தோவஸ்ஸ’’ந்திஆதி³ ச, ‘‘யா பன பி⁴க்கு²னீ வஸ்ஸம்வுத்தா²’’திஆதி³ சாதி த்³வயம், ‘‘யா பன பி⁴க்கு²னீ பாரிவாஸிகச²ந்த³தா³னேனா’’திஆதி³ சாதி சத்தாரி, ஆளவியம் அனுபஸம்பன்னேன உத்தரி தி³ரத்ததிரத்தம், ‘‘பத²விம் க²ணேய்ய வா’’திஆதி³, பூ⁴தகா³மபாதப்³யதாய, ‘‘ஜானம் ஸப்பாணகம் உத³க’’ந்தி சத்தாரி, கோஸம்பி³யம் அஞ்ஞவாத³கே விஹேஸகே, யாவத்³வாரகோஸா அக்³க³ளட்ட²பனாய, ஸுராமேரயபானே, அனாத³ரியே, ‘‘யோ பன பி⁴க்கு² பி⁴க்கூ²ஹி ஸஹத⁴ம்மிக’’ந்திஆதி³ சாதி பஞ்ச, கபிலவத்து²ம்ஹி ‘‘பி⁴க்கு²னுபஸ்ஸயம் க³ந்த்வா’’திஆதி³, ‘‘அகி³லானேன பி⁴க்கு²னா சாதுமாஸ’’ந்திஆதி³, ‘‘அட்டி²மயம் வா த³ந்தமயம் வா’’திஆதி³ தீணி பி⁴க்கூ²னம், பி⁴க்கு²னீனம் பன ‘‘உத³கஸுத்³தி⁴கம் பனா’’திஆதி³, ‘‘ஓவாதா³ய வா’’திஆதீ³தி த்³வே, ப⁴க்³கே³ஸு ‘‘அகி³லானோ விஸிப்³ப³னாபேக்கோ²’’திஆதி³ ஏகந்தி ஏதானி பா³த்திம்ஸேவ பாசித்தியானி.

802. த்³வே கா³ரய்ஹாதி ‘‘பி⁴க்கு² பனேவ குலேஸூ’’திஆதி³, ‘‘யானி கோ² பன தானி ஆரஞ்ஞகானீ’’திஆதி³ சாதி த்³வே பாடிதே³ஸனீயா. தயோ ஸேகா²தி கோஸம்பி³யம் ந ஸுருஸுருகாரகம், ப⁴க்³கே³ஸு ந ஸாமிஸேன ஹத்தே²ன பானீயதா²லகம், ந ஸஸித்த²கம் பத்ததோ⁴வனந்தி தீணி ஸேகி²யானி. ச²ப்பஞ்ஞாஸேவ ஸிக்கா²பதா³னி பிண்டி³தானி வேஸாலியாதீ³ஸு ச²ஸு நக³ரேஸு பஞ்ஞத்தானி ப⁴வந்தீதி யோஜனா.

803. ஸத்தஸு நக³ரேஸு பஞ்ஞத்தானி ஏதானி ஸப்³பா³னேவ ஸிக்கா²பதா³னி பன அட்³டு⁴ட்³டா⁴னி ஸதானேவ ப⁴வந்தி. ஸாவத்தி²யம் பஞ்ஞத்தேஹி சதுனவுதாதி⁴கத்³விஸதஸிக்கா²பதே³ஹி ஸத்³தி⁴ம் ச²ஸு நக³ரேஸு பஞ்ஞத்தானி ச²பஞ்ஞாஸ ஸிக்கா²பதா³னி பஞ்ஞாஸாதி⁴கானி தீணி ஸதானி ப⁴வந்தீதி அத்தோ². அட்³டே⁴ன சதுத்த²ம் யேஸம் தானி அட்³டு⁴ட்³டா⁴னி.

804-10. ஏவம் நிதா³னவஸேன நக³ரம் த³ஸ்ஸேத்வா இதா³னி நிதா³னமஞ்ஞமஸேஸேத்வா உப⁴தோவிப⁴ங்கா³க³தானம் ஸப்³பே³ஸம் ஸிக்கா²பதா³னம் கேவலம் பிண்ட³வஸேன க³ணனம் த³ஸ்ஸேதுமாஹ ‘‘ஸிக்கா²பதா³னி பி⁴க்கூ²ன’’ந்திஆதி³.

811. ஏவம் ஸப்³ப³ஸிக்கா²பதா³னம் நிதா³னஞ்ச க³ணனஞ்ச த³ஸ்ஸேத்வா இதா³னி அஸாதா⁴ரணானி த³ஸ்ஸேதுமாஹ ‘‘ச²சத்தாலீஸா’’திஆதி³. பி⁴க்கூ²னம் பி⁴க்கு²னீஹி அஸாதா⁴ரணபா⁴வம் மஹேஸினா க³மிதானி ஸிக்கா²பதா³னி ச²சத்தாலீஸேவ ஹோந்தீதி யோஜனா. இமினா உத்³தே³ஸமாஹ.

814. ‘‘ச² ச ஸங்கா⁴தி³ஸேஸா’’திஆதீ³ஹி த்³வீஹி கா³தா²ஹி நித்³தே³ஸம் த³ஸ்ஸேத்வா ‘‘விஸ்ஸட்டீ²’’திஆதி³னா படினித்³தே³ஸமாஹ.

815. ‘‘நிஸ்ஸக்³கி³யே ஆதி³வக்³க³ஸ்மி’’ந்தி பத³ச்சே²தோ³. தோ⁴வனந்தி அஞ்ஞாதிகாய பி⁴க்கு²னியா சீவரதோ⁴வனம். படிக்³க³ஹோதி தஸ்ஸாயேவ ஹத்த²தோ சீவரபடிக்³க³ஹணம்.

816. ஆரஞ்ஞந்தி ஏகூனதிம்ஸதிமம் ஸிக்கா²பத³ம்.

817. பி⁴க்கூ²னம், பி⁴க்கு²னீனஞ்ச வுத்தானி ஸப்³பா³னி பாசித்தியானி க³ணனாவஸா அட்டா²ஸீதிஸதம் ப⁴வந்தீதி யோஜனா. அட்டா²ஸீதிஸதந்தி பி⁴க்கு²னிபாதிமோக்கா²க³தம் ச²ஸட்டி²ஸதபாசித்தியம் வக்க²மானேஹி பி⁴க்கு²னியதேஹி பா³வீஸதிபாசித்தியேஹி ஸத்³தி⁴ம் அட்டா²ஸீதிஸதம் ஹோதி. ததோதி அட்டா²ஸீதாதி⁴கஸதபாசித்தியதோ நித்³தா⁴ரிதானி ஏதானி த்³வாவீஸதி கு²த்³த³கானி பி⁴க்கூ²னம் பாதிமோக்க²கே ப⁴வந்தீதி யோஜனா.

818. பி⁴க்கு²னிவக்³கோ³தி பி⁴க்கு²னீனம் ஓவாத³வக்³கோ³. பரம்பரபோ⁴ஜனே பஞ்ஞத்தம் ஸிக்கா²பத³ம் பரம்பரபோ⁴ஜனம், பரம்பரபோ⁴ஜனேன ஸஹ வத்ததீதி ஸபரம்பரபோ⁴ஜனோ.

822. ‘‘ஏகதோ பன பஞ்ஞத்தா’’திஆதி³ நிக³மனம். பி⁴க்கு²னீஹி அஸாதா⁴ரணதம் க³தா ஏகதோவ பஞ்ஞத்தா இமே இமானி ஸிக்கா²பதா³னி பிண்டி³தானி ச²சத்தாலீஸ ஹோந்தீதி யோஜனா.

823. மஹேஸினா பி⁴க்கூ²ஹி அஸாதா⁴ரணபா⁴வம் க³மிதானி பி⁴க்கு²னீனம் ஸிக்கா²பதா³னி பரிபிண்டி³தானி ஸதம், திம்ஸ ச ப⁴வந்தீதி யோஜனா.

824. ஏவம் உத்³தி³ட்டா²னம் நித்³தே³ஸமாஹ ‘‘பாராஜிகானீ’’திஆதி³னா. பாராஜிகானி சத்தாரீதி உப்³ப⁴ஜாணுமண்ட³லிகவஜ்ஜபடிச்சா²தி³கஉக்கி²த்தானுவத்திகஅட்ட²வத்து²கஸங்கா²தானி சத்தாரி பாராஜிகானி.

826. த்³வீஹி கா³தா²ஹி நித்³தி³ட்டா²னம் படினித்³தே³ஸோ ‘‘பி⁴க்கு²னீனம் து ஸங்கா⁴தி³ஸேஸேஹீ’’திஆதி³. சதுன்னம் பாராஜிகானம் உத்³தே³ஸவஸேனேவ பாகடத்தா படினித்³தே³ஸே அக்³க³ஹணம். ஆதி³தோ சா²தி உஸ்ஸயவாதி³காத³யோ ச² ஸங்கா⁴தி³ஸேஸா. ‘‘ஆதி³தோ’’தி இத³ம் ‘‘யாவததியகா’’தி இமினாபி யோஜேதப்³ப³ம், அட்ட²ஸு யாவததியகேஸு புரிமானி சத்தாரி ஸிக்கா²பதா³னீதி வுத்தம் ஹோதி.

827. ஸத்தஞ்ஞத³த்தி²காதீ³னீதி ஆதி³-ஸத்³தே³ன அஞ்ஞத³த்தி²கஸிக்கா²பத³தோ பச்சி²மானி சத்தாரி, புரிமானி ‘‘அஞ்ஞம் விஞ்ஞாபேய்ய, அஞ்ஞம் சேதாபேய்யா’’தி த்³வே ச க³ஹிதானி. பத்தோ சேவாதி பட²மம் பத்தஸன்னிசயஸிக்கா²பத³மாஹ. து³தியவக்³கே³ புரிமஸிக்கா²பத³த்³வயம் ‘‘க³ரும் லஹு’’ந்தி இமினா க³ஹிதம்.

828. இத⁴ பி⁴க்கு²னிபாதிமோக்கே² ஏதானி பன த்³வாத³ஸேவ நிஸ்ஸக்³கி³யானி ஸத்தா²ரா பி⁴க்கு²னீனம் வஸேன ஏகதோ பஞ்ஞத்தானீதி யோஜனா.

829-30. ‘‘ஸப்³பே³வ க³ணனாவஸா’’திஆதி³ நிக³மனம். பி⁴க்கூ²ஹி அஸாதா⁴ரணதம் க³தா பி⁴க்கு²னீனம் ஏகதோ பஞ்ஞத்தா ஸதம், திம்ஸ ப⁴வந்தீதி யோஜனா.

831-3. ‘‘அஸாதா⁴ரணா உபி⁴ன்ன’’ந்தி பத³ச்சே²தோ³. உபி⁴ன்னம் அஸாதா⁴ரணஸிக்கா²பதா³னி ஸதஞ்ச ஸத்ததி ச ச² ச ப⁴வந்தி. ஏவமுத்³தி³ட்டா²னம் நித்³தே³ஸோ ‘‘பாராஜிகானி சத்தாரீ’’திஆதி³. பி⁴க்கூ²ஹி அஸாதா⁴ரணானி பி⁴க்கு²னீனம் சத்தாரி பாராஜிகானி. த³ஸச்ச² சாதி பி⁴க்கூ²ஹி அஸாதா⁴ரணானி பி⁴க்கு²னீனம் ஸங்கா⁴தி³ஸேஸா த³ஸ, பி⁴க்கு²னீஹி அஸாதா⁴ரணானி பி⁴க்கூ²னம் விஸ்ஸட்டி²ஆதி³கா ஸங்கா⁴தி³ஸேஸா ச² சாதி ஸங்கா⁴தி³ஸேஸா ஸோளஸ.

அனியதா து³வே சேவாதி பி⁴க்கு²னீஹி அஸாதா⁴ரணானி பி⁴க்கூ²னம் அனியதா த்³வே ச. நிஸ்ஸக்³கா³ சதுவீஸதீதி பி⁴க்கு²னீஹி அஸாதா⁴ரணானி பி⁴க்கூ²னம் த்³வாத³ஸ, பி⁴க்கூ²ஹி அஸாதா⁴ரணானி பி⁴க்கு²னீனம் த்³வாத³ஸாதி ஏவம் நிஸ்ஸக்³கி³யா சதுவீஸதி ச. ஸதம் அட்டா²ரஸ கு²த்³த³காதி பி⁴க்கு²னீஹி அஸாதா⁴ரணானி பி⁴க்கூ²னம் பா³வீஸதி, பி⁴க்கூ²ஹி அஸாதா⁴ரணானி பி⁴க்கு²னீனம் ச²ன்னவுதீதி அட்டா²ரஸாதி⁴கஸதம் கு²த்³த³கானி ச. ஏத்தா²தி இமஸ்மிம் அஸாதா⁴ரணஸங்க³ஹே.

த்³வாத³ஸேவ ச கா³ரய்ஹாதி பி⁴க்கு²னீஹி அஸாதா⁴ரணானி பி⁴க்கூ²னம் சத்தாரி, பி⁴க்கூ²ஹி அஸாதா⁴ரணானி பி⁴க்கு²னீனம் அட்டா²தி ஏதே பாடிதே³ஸனீயா சாதி இமே ச²ஸத்ததிஅதி⁴கானி ஸதஸிக்கா²பதா³னி உபி⁴ன்னம்பி அஸாதா⁴ரணானீதி யோஜனா.

834. உபி⁴ன்னம்பி ஸாதா⁴ரணானி ஸத்து²னா பஞ்ஞத்தானி ஸிக்கா²பதா³னி ஸதஞ்ச ஸத்ததி ச சத்தாரி ச ப⁴வந்தீதி பகாஸிதாதி யோஜனா.

835-6. பாராஜிகானி சத்தாரீதி மேது²னஅதி³ன்னாதா³னமனுஸ்ஸவிக்³க³ஹஉத்தரிமனுஸ்ஸத⁴ம்மபாராஜிகானி சத்தாரி ச. ஸத்த ஸங்கா⁴தி³ஸேஸகாதி ஸஞ்சரித்தஅமூலகஅஞ்ஞபா⁴கி³யா, சத்தாரோ யாவததியகா சாதி ஸங்கா⁴தி³ஸேஸா ஸத்த ச. அட்டா²ரஸ ச நிஸ்ஸக்³கா³தி நிஸ்ஸக்³கி³யேஸு பட²மே சீவரவக்³கே³ தோ⁴வனபடிக்³க³ஹணஸிக்கா²பத³த்³வயவஜ்ஜிதானி அட்ட², ஏளகலோமவக்³கே³ அட்ட²மனவமத³ஸமானீதி தயோ, பத்தவக்³கே³ பட²மபத்தவஸ்ஸிகஸாடிகஆரஞ்ஞகஸிக்கா²பத³த்தயஸ்ஸ வஜ்ஜிதானி ஸத்த சாதி இமானி அட்டா²ரஸ நிஸ்ஸக்³கி³யஸிக்கா²பதா³னி ச. ஸமஸத்ததி கு²த்³த³காதி –

‘‘ஸப்³போ³ பி⁴க்கு²னிவக்³கோ³பி…பே… த்³வாவீஸதி ப⁴வந்தி ஹீ’’தி. (உ. வி. 818-821) –

வுத்தா பி⁴க்கூ²னம் பி⁴க்கு²னீஹி அஸாதா⁴ரணாதி இமேஹி பா³வீஸதிபாசித்தியேஹி வஜ்ஜிதானி அவஸேஸானி ஸத்ததி பாசித்தியானி ச உப⁴யஸாதா⁴ரணவஸேன பஞ்ஞத்தானி. பஞ்சஸத்ததி ஸேகி²யாபி சாதி உபி⁴ன்னம் பி⁴க்கு²பி⁴க்கு²னீனம் ஸமஸிக்க²தா ஸாதா⁴ரணஸிக்கா²பதா³னி ஸப்³ப³ஸோ ஸதம், ஸத்ததி, சத்தாரி ச ஹோந்தீதி யோஜனா.

இதி உத்தரே லீனத்த²பகாஸனியா

ஸாதா⁴ரணாஸாதா⁴ரணகதா²வண்ணனா நிட்டி²தா.