லக்க²ணகதா²வண்ணனா

837. இதோதி ஸாதா⁴ரணாஸாதா⁴ரணகதா²ய பரம். ஸப்³ப³க³ந்தி ஸப்³ப³ஸிக்கா²பத³ஸாதா⁴ரணம். வத³தோ மேதி வத³தோ மம வசனம். நிபோ³த⁴தா²தி நிஸாமேத², ஏகக்³க³சித்தா ஹுத்வா ஸக்கச்சம் ஸுணாதா²தி அத்தோ².

838-9. ‘‘விபத்தி ஆபத்தி அனாபத்தீ’’தி பத³ச்சே²தோ³. ‘‘ஆணத்தி அங்க³’’ந்தி பத³ச்சே²தோ³. வஜ்ஜகம்மபபே⁴த³கந்தி வஜ்ஜபபே⁴த³கம் கம்மபபே⁴த³கம். திகத்³வயந்தி குஸலத்திகவேத³னாத்திகத்³வயம். ஸப்³ப³த்தா²தி இத³ம் பன ஸத்தரஸவித⁴ஸப்³ப³ஸாதா⁴ரணலக்க²ணம். ஸப்³ப³த்த² ஸப்³பே³ஸு ஸிக்கா²பதே³ஸு.

840. இத⁴ இமஸ்மிம் ஸத்தரஸவிதே⁴ யம் லக்க²ணம் புப்³பே³ வுத்தனயம், யஞ்ச உத்தானம், தம் ஸப்³ப³ம் வஜ்ஜேத்வா அத்த²ஜோதனம் அத்த²ப்பகாஸனம் கரிஸ்ஸாமீதி யோஜனா.

841. நிதா³னம் நாம ராஜக³ஹாதி³ஸிக்கா²பத³பஞ்ஞத்திட்டா²னபூ⁴தானி ஸத்த நக³ரானி, தம் புப்³பே³ த³ஸ்ஸிதந்தி அவஸிட்டா²னி த³ஸ்ஸேதுமாஹ ‘‘புக்³க³லோ’’திஆதி³. புக்³க³லோ நாம கதமோ? யம் யம் பி⁴க்கு²னிம், பி⁴க்கு²ஞ்ச ஆரப்³ப⁴ ஸிக்கா²பத³ம் பஞ்ஞத்தம், அயம் பி⁴க்கு²னீ ச பி⁴க்கு² ச ஸிக்கா²பத³பஞ்ஞத்தியா ஆதி³கம்மிகோ புக்³க³லோதி வுச்சதீதி யோஜனா.

842. த⁴னியாத³யோதி ஆதி³-ஸத்³தே³ன ஸம்ப³ஹுலா பி⁴க்கூ², வக்³கு³முதா³தீரியா பி⁴க்கூ², ஸேய்யஸகோ, உதா³யீ, ஆளவகா பி⁴க்கூ², ச²ன்னோ, மேத்தியபூ⁴மஜகா, தே³வத³த்தோ, அஸ்ஸஜிபுனப்³ப³ஸுகா பி⁴க்கூ², ச²ப்³ப³க்³கி³யா பி⁴க்கூ², உபனந்தோ³ ஸக்யபுத்தோ, அஞ்ஞதரோ பி⁴க்கு², ஹத்த²கோ ஸக்யபுத்தோ, அனுருத்³தோ⁴, ஸத்தரஸவக்³கி³யா பி⁴க்கூ², சூளபந்த²கோ, பே³லட்ட²ஸீஸோ, ஆயஸ்மா ஆனந்தோ³, ஸாக³தத்தே²ரோ, அரிட்டோ² பி⁴க்கு², ஆயஸ்மா ஆனந்தோ³தி இமே ஏகவீஸதி ஸங்க³ஹிதா.

843. து²ல்லனந்தா³த³யோதி ஆதி³-ஸத்³தே³ன ஸுந்த³ரீனந்தா³, ச²ப்³ப³க்³கி³யா பி⁴க்கு²னியோ, அஞ்ஞதரா பி⁴க்கு²னீ, சண்ட³காளீ, ஸம்ப³ஹுலா பி⁴க்கு²னியோ, த்³வே பி⁴க்கு²னியோதி ச²யிமே ஸங்க³ஹிதா. ஸப்³பே³தி உப⁴யபாதிமோக்கே² ஆதி³கம்மிகா ஸப்³பே³ புக்³க³லா.

844. வத்தூ²தி வத்து² நாம ஸுதி³ன்னாதி³னோ தஸ்ஸ தஸ்ஸேவ புக்³க³லஸ்ஸ மேது²னாதி³கஸ்ஸ ச வத்து²னோ ஸப்³ப³ப்பகாரேன அஜ்ஜா²சாரோ வீதிக்கமோ பவுச்சதீதி யோஜனா.

845-6. கேவலா மூலபூ⁴தா பஞ்ஞத்தி. அனு ச அனுப்பன்னோ ச ஸப்³ப³த்த² ச பதே³ஸோ ச அன்வனுப்பன்னஸப்³ப³த்த²பதே³ஸா, தேயேவ பதா³னி அன்வனுப்பன்னஸப்³ப³த்த²பதே³ஸபதா³னி, தானி புப்³ப³கானி யாஸம் பஞ்ஞத்தீனம் தா அன்வனுப்பன்னஸப்³ப³த்த²பதே³ஸபத³புப்³பி³கா. ததே²வ ஸா பஞ்ஞத்தீதி யோஜனா. அனுபஞ்ஞத்தி அனுப்பன்னபஞ்ஞத்தி ஸப்³ப³த்த²பஞ்ஞத்தி பதே³ஸபஞ்ஞத்தி ஹோதி. ஏகதோ உப⁴தோ புப்³பா³ கதே²வ ஸா பஞ்ஞத்தீதி யோஜனா. ஏகதோபத³ம் உப⁴தோபத³ஞ்ச புப்³ப³மஸ்ஸாதி ஏகதோஉப⁴தோபுப்³பா³, ஏகதோபஞ்ஞத்தி உப⁴தோபஞ்ஞத்தீதி வுத்தம் ஹோதி.

847. தத்த² நவதா⁴ஸு பஞ்ஞத்தீஸு. பஞ்ஞத்தி நாம கதமாதி ஆஹ ‘‘யோ மேது²ன’’ந்திஆதி³. ‘‘யோ பி⁴க்கு² மேது²னம் த⁴ம்மம் படிஸேவேய்யா’’தி ச ‘‘யோ பி⁴க்கு² அதி³ன்னம் ஆதி³யேய்யா’’தி ச ஏவமாதி³கா ஸிக்கா²பத³ஸ்ஸ மூலபூ⁴தா பஞ்ஞத்தி ஹோதீதி யோஜனா.

848. இச்சேவமாதி³காதி ஆதி³-ஸத்³தே³ன ‘‘ஸிக்க²ம் அபச்சக்கா²ய து³ப்³ப³ல்யம் அனாவிகத்வா’’தி ச ‘‘கா³மா வா அரஞ்ஞா வா’’தி ச ஏவமாதீ³னம் ஸங்க³ஹோ.

849. வஜ்ஜகே அனுப்பன்னேயேவ பஞ்ஞத்தா அனுப்பன்னபஞ்ஞத்தி, ஸா அனுப்பன்னபஞ்ஞத்தி.

850-1. கு³ணங்கு³ணுபாஹனஸிக்கா²பதே³ன ஸஹ சம்மத்த²ரணஸிக்கா²பத³ஞ்ச து⁴வன்ஹானம் து⁴வனஹானஸிக்கா²பத³ம், பஞ்சவக்³கே³ன உபஸம்பாத³னஸிக்கா²பத³ஞ்சாதி ஏஸா சதுப்³பி³தா⁴ பஞ்ஞத்தி பதே³ஸபஞ்ஞத்தி நாமாதி வுத்தாதி யோஜனா. மஜ்ஜி²மதே³ஸஸ்மிம்யேவ ஹோதீதி மஜ்ஜி²மதே³ஸஸ்மிம்யேவ ஆபத்திகரா ஹோதி. ந அஞ்ஞதோதி ந அஞ்ஞத்ர பச்சந்திமேஸு ஜனபதே³ஸு தே³ஸந்தரே டா²னே.

852. இதோதி சதுப்³பி³த⁴பதே³ஸபஞ்ஞத்திதோ. ஏத்தா²தி இமஸ்மிம் பஞ்ஞத்திபே⁴தே³. ஸாதா⁴ரணது³காதி³கந்தி ஸாதா⁴ரணபஞ்ஞத்தி அஸாதா⁴ரணபஞ்ஞத்தி, ஏகதோபஞ்ஞத்தி உப⁴தோபஞ்ஞத்தீதி து³கத்³வயம். அத்த²தோ ஏகமேவாதி அத்த²தோ அஞ்ஞமஞ்ஞஸமானமேவ. விபத்தாபத்தானாபத்திவினிச்ச²யோ வித்தா²ரிதோதி இத⁴ ந த³ஸ்ஸிதோ. அயம் பனேத்த² ஸங்கே²போ – விபத்தீதி ஸீலஆசாரதி³ட்டி²ஆஜீவவிபத்தீனம் அஞ்ஞதரா. ஆபத்தீதி புப்³ப³பயோகா³தி³வஸேன ஆபத்திபே⁴தோ³. அனாபத்தீதி அஜானனாதி³வஸேன அனாபத்தி.

853. ஆபத்தி பன ஸாணத்திகாபி ஹோதி, அனாணத்திகாபி ஹோதீதி யோஜனா. ‘‘ஆணத்தீதி ச நாமேஸா ஆணாபனா’’தி இமினா ஆணத்தி-ஸத்³த³ஸ்ஸ ஸபா⁴வஸாதா⁴ரணத்தாதி இதா⁴ஹ.

854. ஸப்³ப³ஸிக்கா²பதே³ஸுபி ஸப்³பா³ஸம் ஆபத்தீனம் ஸப்³போ³ பன அங்க³பே⁴தோ³பி விபா⁴வினா ஞாதப்³போ³தி யோஜனா.

856. ‘‘ஸா ச அக்ரியஸமுட்டா²னா’’தி பத³ச்சே²தோ³. காயேன, வாசாய வா த³ஸாஹப்³ப⁴ந்தரே அதிரேகசீவரஸ்ஸ அனதி⁴ட்டா²னேன நிஸ்ஸக்³கி³யபாசித்தியம் ஹோதீதி ‘‘பட²மே கதி²னே வியா’’தி உதா³ஹரணம் கதம்.

857. க்ரியாக்ரியதோ ஹோதீதி கிரியதோ ச அகிரியதோ ச ஹோதி. தத்த² உதா³ஹரணமாஹ ‘‘சீவரக்³க³ஹணே வியா’’தி. அஞ்ஞாதிகாய பி⁴க்கு²னியா ஹத்த²தோ சீவரக்³க³ஹணம் க்ரியா, பாரிவத்தகஸ்ஸ அதா³னம் அக்ரியாதி ஏவம் கிரியாய சேவ அகிரியாய ச இமம் ஆபஜ்ஜதி.

858. ஸியா பன கரோந்தஸ்ஸ அகரோந்தஸ்ஸாதி யா பன ஆபத்தி ஸியா கரோந்தஸ்ஸ, ஸியா அகரோந்தஸ்ஸ ஹோதி, அயம் ஸியா கிரியதோ, ஸியா அகிரியதோ ஸமுட்டா²தி. ஸியாதி ச கதா³சி-ஸத்³த³த்தே² நிபாதோ. அத்ரோதா³ஹரணமாஹ ‘‘ரூபியோக்³க³ஹணே வியா’’தி. ரூபியஸ்ஸ உக்³க³ஹணே, உக்³க³ண்ஹாபனே ஸியா கதா³சி கிரியதோ ஸமுட்டா²தி, உபனிக்கி²த்தஸ்ஸ ஸாதி³யனே காயவாசாஹி காதப்³ப³ஸ்ஸ அகரணேன கதா³சி அகரோந்தஸ்ஸ ஹோதீதி.

859. யா கரோதோ அகுப்³ப³தோ, கதா³சி கரோந்தஸ்ஸ ச ஹோதி, ஸா ஆபத்தி ஸியா கிரியாகிரியதோ, ஸியா கிரியதோபி ச ஹோதீதி யோஜனா. ‘‘குடிகாராபத்தி வியா’’தி வத்தப்³ப³ம். ஸா ஹி வத்து²ம் தே³ஸாபேத்வா பமாணாதிக்கந்தம் கரோதோ கிரியதோ ஸமுட்டா²தி, அதே³ஸாபேத்வா பமாணாதிக்கந்தம், பமாணயுத்தம் வா கரோதோ கிரியாகிரியதோ ஸமுட்டா²தி.

861. யதோ ஆபத்திதோ. அயம் ஆபத்தி. ஸஞ்ஞாய கரணபூ⁴தாய விமோக்கோ² ஏதாயாதி ஸஞ்ஞாவிமோக்கா². ஏத்த² ச வீதிக்கமஸஞ்ஞா அவிஜ்ஜமானாபி ஆபத்தியா விமுச்சனஸ்ஸ ஸாத⁴கதமட்டே²ன க³ஹிதா. யதா² வுட்டி²யா அபா⁴வேன ஜாதம் து³ப்³பி⁴க்க²ம் ‘‘வுட்டி²கத’’ந்தி வுச்சதி, ஏவம்ஸம்பத³மித³ம் வேதி³தப்³ப³ம். அயம் ஸசித்தகாபத்தி.

862-4. இதரா பன அசித்தகாபத்தி. வீதிக்கமஸஞ்ஞாய அபா⁴வேன நத்தி² விமோக்கோ² ஏதாயாதி நோஸஞ்ஞாவிமோக்கா². ஸுசித்தேன ஸவாஸனகிலேஸப்பஹானேன, ஸகலலோகியலோகுத்தரகுஸலஸம்பயோகே³ன ச ஸுந்த³ரசித்தேன ப⁴க³வதா பகாஸிதா ஸப்³பா³வ ஆபத்தி சித்தஸ்ஸ வஸேன து³விதா⁴ ஸியுந்தி யோஜனா. ஸசித்தகஸமுட்டா²னவஸேன பனாதி ஸசித்தகஸமுட்டா²னவஸேனேவ. ஸசித்தகமிஸ்ஸகவிவஜ்ஜனத்தா²ய பன-ஸத்³தோ³ ஏவகாரத்தோ² வுத்தோ.

யா ஸசித்தகேஹி வா அசித்தகமிஸ்ஸகஸமுட்டா²னவஸேன வா ஸமுட்டா²தி, அயம் அசித்தகா.

865. ஸுவிஜ்ஜேனாதி ஸோப⁴மானாஹி தீஹி விஜ்ஜாஹி வா அட்ட²ஹி வா விஜ்ஜாஹி ஸமன்னாக³தத்தா ஸுவிஜ்ஜேன. அனவஜ்ஜேனாதி ஸவாஸனகிலேஸாவஜ்ஜரஹிதத்தா அனவஜ்ஜேன ப⁴க³வதா. லோகபண்ணத்திவஜ்ஜதோ லோகபண்ணத்திவஜ்ஜவஸேன ஸப்³பா³வ ஆபத்தியோ வஜ்ஜவஸேன து³விதா⁴ து³கா வுத்தாதி யோஜனா.

866. யஸ்ஸா ஸசித்தகே பக்கே², சித்தம் அகுஸலம் ஸியாதி யஸ்ஸா ஸசித்தகாசித்தகஸமுட்டா²னாய அசித்தகாய ஸுராபானாதி³ஆபத்தியா ஸசித்தகஸமுட்டா²னபக்கே² சித்தம் அகுஸலமேவ ஹோதி, அயம் லோகவஜ்ஜா நாமாதி அத்தோ². யஸ்ஸா பன ஸசித்தகஸமுட்டா²னாய பட²மபாராஜிகாதி³ஆபத்தியா சித்தம் அகுஸலமேவ ஹோதி, தஸ்ஸா லோகவஜ்ஜதாய வத்தப்³ப³மேவ நத்தி². அசித்தகாபி வா ஆபத்தி ஸசித்தகபக்கே² குஸலசித்தே ஸதி லோகவஜ்ஜதாய ஸித்³தா⁴ய அசித்தகபக்கே²பி லோகவஜ்ஜோ ஹோதி, கிமங்க³ம் பன அகுஸலசித்தேனேவ ஆபஜ்ஜிதப்³பா³ய ஆபத்தியா லோகவஜ்ஜதாதி ஸா விஸும் ந வுத்தா.

யஸ்மா பன பண்ணத்திவஜ்ஜாய வத்து²வீதிக்கமவஜ்ஜா ஸியா குஸலம், ஸியா அப்³யாகதம், தஸ்மா தஸ்ஸா ஸசித்தகபக்கே² சித்தம் குஸலமேவாதி அயம் நியமோ நத்தீ²தி ஆஹ ‘‘ஸேஸா பண்ணத்திவஜ்ஜகா’’தி. ‘‘பண்ணத்திவஜ்ஜகா’’தி இமினா ச லக்க²ணேன வத்து²விஜானனசித்தேன ஸசித்தகபக்கே² சித்தம் ஸியா குஸலம், ஸியா அகுஸலம், ஸியா அப்³யாகதம், தஸ்மா தஸ்ஸா ஸசித்தகபக்கே² சித்தம் அகுஸலமேவாதி அயம் நியமோ நத்தீ²தி ஆஹ.

867. காயத்³வாரேன ஆபஜ்ஜிதப்³பா³ காயகம்மம். உப⁴யத்த² ஆபஜ்ஜிதப்³பா³ தது³ப⁴யம் காயகம்மம் வசீகம்மம். மனோத்³வாரே ஆபத்தி நாம நத்தீ²தி மனோகம்மம் ந வுத்தம். ‘‘மனோத்³வாரே ஆபத்தி நாம நத்தீ²தி ச இத³ம் யேபு⁴ய்யவஸேன வுத்தம் உபனிக்கி²த்தஸாதி³யனாதீ³ஸு மனோத்³வாரேபி ஆபத்திஸம்ப⁴வதோ’’தி ஆசரியா.

868-9. குஸலாதி³திகத்³வயந்தி குஸலத்திகஞ்சேவ வேத³னாத்திகஞ்ச. ஆபத்திம் ஆபஜ்ஜந்தோ குஸலாகுஸலசித்தோ, ததா² அப்³யாகதசித்தோ வா ஹுத்வா ஆபஜ்ஜதீதி யோஜனா.

து³க்கா²தி³ஸம்யுதோதி ஆதி³-ஸத்³தே³ன உபேக்கா²வேத³னாஸமங்கி³னோ ஸங்க³ஹோ. ஏவம் ஸந்தேபி ஸப்³ப³ஸிக்கா²பதே³ஸு அகுஸலசித்தவஸேன ஏகம் சித்தம், குஸலாப்³யாகதவஸேன த்³வே சித்தானி, ஸப்³பே³ஸம் வஸேன தீணி சித்தானி. து³க்க²வேத³னாவஸேன ஏகா வேத³னா, ஸுக²உபேக்கா²வஸேன த்³வே, ஸப்³பா³ஸம் வஸேன திஸ்ஸோ வேத³னாதி அயமேவ பே⁴தோ³ லப்³ப⁴தி, ந அஞ்ஞோ பே⁴தோ³.

குஸலத்திகம் ஸசேபி க³ஹிதம், ந பன ஸப்³பே³ஸமேவ சித்தானம் வஸேன லப்³ப⁴தி, அத² கோ² ஆபத்திஸமுட்டா²பகானம் பா³த்திம்ஸசித்தானமேவ வஸேன லப்³ப⁴தி. பா³த்திம்ஸேவ ஹி சித்தானி ஆபத்திஸமுட்டா²பகானி. த்³வாத³ஸ அகுஸலானி, அட்ட² காமாவசரகுஸலானி, த³ஸ காமாவசரகிரியசித்தானி, குஸலதோ, கிரியதோ ச த்³வே அபி⁴ஞ்ஞாசித்தானி சாதி ஏவம் பா³த்திம்ஸசித்தேஹி ஸமுட்டி²தாபி ஆபத்தி அகுஸலா வா ஹோதி அப்³யாகதா வா, நத்தி² ஆபத்தி குஸலம். யதா²ஹ ஸமத²க்க²ந்த⁴கே ‘‘ஆபத்தாதி⁴கரணம் ஸியா அகுஸலம் ஸியா அப்³யாகதம், நத்தி² ஆபத்தாதி⁴கரணம் குஸல’’ந்தி (சூளவ. 222; பரி. 303). அயம் பன பாடோ² பண்ணத்திவஜ்ஜம்யேவ ஸந்தா⁴ய வுத்தோ, ந லோகவஜ்ஜம். யஸ்மிஞ்ஹி பத²விக²ணனபூ⁴தகா³மபாதப்³யதாதி³கே ஆபத்தாதி⁴கரணே குஸலசித்தம் அங்க³ம் ஹோதி, தஸ்மிஞ்ச ஸதி ந ஸக்கா வத்தும் ‘‘நத்தி² ஆபத்தாதி⁴கரணம் குஸல’’ந்தி. தஸ்மா நயித³ம் அங்க³பஹோனகசித்தம் ஸந்தா⁴ய வுத்தம். யம் தாவ ஆபத்தாதி⁴கரணம் லோகவஜ்ஜம், தம் ஏகந்ததோ அகுஸலமேவ. தத்த² ‘‘ஸியா அகுஸல’’ந்தி விகப்போ நத்தி². யம் பன பண்ணத்திவஜ்ஜம், தம் யஸ்மா ஸஞ்சிச்ச ‘‘இமம் ஆபத்திம் வீதிக்கமாமீ’’தி வீதிக்கமந்தஸ்ஸேவ அகுஸலம் ஹோதி, அஸஞ்சிச்ச பன கிஞ்சி அஜானந்தஸ்ஸ ஸஹஸேய்யாதி³வஸேன ஆபஜ்ஜனதோ அப்³யாகதம் ஹோதி, தஸ்மா தத்த² ஸஞ்சிச்சாஸஞ்சிச்சவஸேன இமம் விகப்பபா⁴வம் ஸந்தா⁴ய இத³ம் வுத்தம் ‘‘ஆபத்தாதி⁴கரணம் ஸியா அகுஸலம் ஸியா அப்³யாகதம், நத்தி² ஆபத்தாதி⁴கரணம் குஸல’’ந்தி. ஸசே பன ‘‘யம் குஸலசித்தோ ஆபஜ்ஜதி, இத³ம் வுச்சதி ஆபத்தாதி⁴கரணம் குஸல’’ந்தி வதே³ய்ய, அசித்தகானம் ஏளகலோமபத³ஸோத⁴ம்மாதி³ஸமுட்டா²னானம்பி குஸலசித்தம் ஆபஜ்ஜேய்ய, ந ச தத்த² விஜ்ஜமானம்பி குஸலசித்தம் ஆபத்தியா அங்க³ம், காயவசீவிஞ்ஞத்திவஸேன பன சலிதபவத்தானம் காயவாசானம் அஞ்ஞதரமேவ அங்க³ம், தஞ்ச ரூபக்க²ந்த⁴பரியாபன்னத்தா அப்³யாகதந்தி.

870. இத³ம் து லக்க²ணந்தி இத³ம் நிதா³னாதி³ஸாதா⁴ரணவினிச்ச²யலக்க²ணம்.

871. ‘‘தரு’’ந்திஆதி³கா³தா² புப்³பே³ வுத்தத்தா²வ. அயம் பன விஸேஸோ – தத்த² ‘‘த்³வயங்குர’’ந்தி வுத்தம், இத⁴ ‘‘சதுஸ்ஸிக²’’ந்தி. தத்த² ‘‘த்³வயங்குர’’ந்தி லோகவஜ்ஜபண்ணத்திவஜ்ஜானம் க³ஹணம், இத⁴ சதுஸ்ஸிக²ந்தி சதுன்னம் விபத்தீனம். சத்தாரோ ஸீகா² அங்குரா ஏதஸ்ஸாதி விக்³க³ஹோ. தத்த² விபத்தி ‘‘ஸத்தப²ல’’ந்தி ஸத்தப²லேஸு அந்தோக³தா⁴, இத⁴ விபத்திட்டா²னே வஜ்ஜம் க³ஹேத்வா ஸத்தப²லானி.

872. அனுத்தரதம் க³தம் அத்தனா உத்தரஸ்ஸ உத்தமஸ்ஸ கஸ்ஸசி அவிஜ்ஜமானத்தா இமம் உத்தரம் உத்தரம் நாம பகரணம் யோ தே²ரனவமஜ்ஜி²மேஸு அஞ்ஞதரோ பரியாபுணாதி பாட²ஸ்ஸ பகு³ணவாசுக்³க³தகரணேன அதீ⁴யதி, பரிபுச்ச²தி அத்த²ஞ்ச அத்த²வண்ணனம் ஸுத்வா ஸக்கச்சம் உக்³க³ஹேத்வா மனஸா பேக்கி²த்வா பஞ்ஞாய ஸுப்படிவிஜ்ஜி²த்வா தா⁴ரேதி, ஸோ ச பி⁴க்கு² ச-ஸத்³தே³ன ஏவமேவ வினயவினிச்ச²யே யோ பி⁴க்கு² யுத்தோ, ஸோ ச காயவாசவினயே காயவாசாவீதிக்கமானம் வினயனே ஸம்வரணே வினயே வினயபிடகே அனுத்தரதம் உபயாதி அத்தனோ உத்தரிதரஸ்ஸ அவிஜ்ஜமானதம் உபக³ச்ச²தி. ஏத்த² காரணமாஹ ‘‘உத்தரதோ’’தி, பகு³ணவாசுக்³க³தகரணேன அதீ⁴தேன அத்த²வண்ணனம் ஸுத்வா தா⁴ரணேன ஸுட்டு² தா⁴ரிதேன இமினா உத்தரபகரணேன ஹேதுபூ⁴தேனாதி அத்தோ².

இதி உத்தரே லீனத்த²பகாஸனியா

லக்க²ணகதா²வண்ணனா நிட்டி²தா.