வினயவினிச்ச²ய-டீகா (து³தியோ பா⁴கோ³)

பாடிதே³ஸனீயகதா²வண்ணனா

1830-1. ஏவம் நாதிஸங்கே²பவித்தா²ரனயேன த்³வேனவுதி பாசித்தியானி த³ஸ்ஸேத்வா தத³னந்தரம் நித்³தி³ட்டே² பாடிதே³ஸனீயே த³ஸ்ஸேதுமாஹ ‘‘யோ சந்தரக⁴ர’’ந்திஆதி³. தத்த² அந்தரக⁴ரந்தி ரதி²காதி³மாஹ. யதா²ஹ ‘‘அந்தரக⁴ரம் நாம ரதி²கா ப்³யூஹம் ஸிங்கா⁴டகம் க⁴ர’’ந்தி.

யோ பன பி⁴க்கு² அந்தரக⁴ரம் பவிட்டா²ய அஞ்ஞாதிகாய பி⁴க்கு²னியா ஹத்த²தோ யம் கிஞ்சி கா²த³னம், போ⁴ஜனம்பி வா ஸஹத்தா² படிக்³க³ண்ஹேய்ய, தஸ்ஸ பி⁴க்கு²னோ க³ஹணே து³க்கடம், போ⁴கே³ அஜ்ஜோ²ஹாரே பாடிதே³ஸனீயம் ஸியாதி யோஜனா.

இதோ பட்டா²ய சதஸ்ஸோ கா³தா² உப்படிபாடியா போத்த²கேஸு லிகி²தா, தாஸம் அயம் படிபாடி – ‘‘ஏத்த²ந்தரக⁴ர’’ந்தி ததியா, ‘‘தஸ்மா பி⁴க்கு²னியா’’தி சதுத்தீ², ‘‘ரதி²காதீ³ஸூ’’தி பஞ்சமீ, ‘‘ரதி²காயபி வா’’தி ச²ட்டீ². படிபாடி பனாயம் மாதிகட்ட²கத²க்கமேன வேதி³தப்³பா³. இமாய படிபாடியா தாஸம் அத்த²வண்ணனா ஹோதி –

1832-3. புரிமகா³தா²த்³வயேன பத³பா⁴ஜனாக³தஸாமஞ்ஞவினிச்ச²யம் த³ஸ்ஸேத்வா இதா³னி அட்ட²கதா²க³தம் விஸேஸம் த³ஸ்ஸேதுமாஹ ‘‘ஏத்தா²’’திஆதி³. தத்த² ஏத்தா²தி இமஸ்மிம் பட²மபாடிதே³ஸனீயஸிக்கா²பதே³. தஸ்ஸாதி அஞ்ஞாதிகபி⁴க்கு²னியா. வாக்யதோதி ‘‘அந்தரக⁴ரம் பவிட்டா²யா’’தி வசனதோ. ஹி-ஸத்³தோ³ ஹேதும்ஹி. யஸ்மா பி⁴க்கு²ஸ்ஸ டி²தட்டா²னம் நப்பமாணந்தி அட்ட²கதா²ய (பாசி. அட்ட². 553) வண்ணிதம், தஸ்மா ஆராமாதீ³ஸு ட²த்வா தே³ந்தியா பி⁴க்கு²னியா ஹத்த²தோ வீதி²ஆதீ³ஸு ட²த்வா யோ படிக்³க³ண்ஹேய்ய சே, ஏவம் படிக்³க³ண்ஹதோ தஸ்ஸ பி⁴க்கு²னோ ந தோ³ஸோதி யோஜனா. பரிபோ⁴க³ஸ்ஸ படிக்³க³ஹணமூலகத்தா ந தோ³ஸோ. ‘‘படிக்³க³ண்ஹதோ’’தி இமினா பரிபோ⁴கே³ பாடிதே³ஸனீயாபா⁴வோ ச தீ³பிதோ ஹோதி.

1834. ஸசே பி⁴க்கு²னீ ரதி²காதீ³ஸு ட²த்வா போ⁴ஜனம் தே³தி, பி⁴க்கு² அந்தராராமே ட²த்வா படிக்³க³ண்ஹாதி சே, தஸ்ஸ ஆபத்தீதி யோஜனா. கா³தா²ப³ந்த⁴வஸேன ‘‘பி⁴க்கு²னி போ⁴ஜன’’ந்தி ரஸ்ஸத்தம். ஆபத்தீதி ச படிக்³க³ஹணபரிபோ⁴கே³ஸு து³க்கடபாடிதே³ஸனீயாபத்தியோ ஸந்தா⁴ய வுத்தம்.

1835. ரதி²காதீ³ஸு ட²த்வா பி⁴க்கு²னீ போ⁴ஜனம் தே³தி சே, தம் ரதி²காயபி வா…பே… அயம் நயோதி யோஜனா. தத்த² ரதி²காதி ரச்சா². ப்³யூஹந்தி அனிப்³பி³ஜ்ஜி²த்வா டி²தா க³தபச்சாக³தரச்சா². ஸந்தி⁴ நாம க⁴ரஸந்தி⁴. ஸிங்கா⁴டகந்தி சதுக்கோணம் வா திகோணம் வா மக்³க³ஸமோதா⁴னட்டா²னம். அயம் நயோதி ‘‘ஆபத்தீ’’தி அனந்தரகா³தா²ய வுத்தனயோ.

1837. ஆமிஸேன அஸம்பி⁴ன்னரஸம் ஸந்தா⁴ய இத³ம் து³க்கடம் பா⁴ஸிதம். ஆமிஸேன ஸம்பி⁴ன்னே ஏகரஸே யாமகாலிகாதி³ம்ஹி படிக்³க³ஹேத்வா அஜ்ஜோ²ஹாரே பாடிதே³ஸனீயாபத்தி ஸியாதி யோஜனா.

1838. ஏகதோஉபஸம்பன்னஹத்த²தோதி பி⁴க்கு²னீனம் ஸந்திகே உபஸம்பன்னாய ஹத்த²தோ. யதா²ஹ ‘‘ஏகதோஉபஸம்பன்னாயாதி பி⁴க்கு²னீனம் ஸந்திகே உபஸம்பன்னாயா’’தி (பாசி. அட்ட². 553). பி⁴க்கூ²னம் ஸந்திகே உபஸம்பன்னாய பன யதா²வத்து²கமேவாதி.

1839. அஞ்ஞாதிகாய ஞாதிகஸஞ்ஞிஸ்ஸ, ததே²வ விமதிஸ்ஸ ச து³க்கடந்தி யோஜனா.

1840. அஞ்ஞாதிகாய தா³பேந்தியா பூ⁴மியா நிக்கி²பித்வா த³த³மானாய வா அந்தராராமாதீ³ஸு ட²த்வா தே³ந்தியா படிக்³க³ண்ஹதோ பி⁴க்கு²ஸ்ஸ அனாபத்தீதி யோஜனா. அந்தராராமாதீ³ஸூதி ஏத்த² ஆதி³-ஸத்³தே³ன பி⁴க்கு²னுபஸ்ஸயதித்தி²யஸேய்யாபடிக்கமனாதி³ம் ஸங்க³ண்ஹாதி. படிக்கமனம் நாம போ⁴ஜனஸாலா.

1841. கா³மதோ ப³ஹி நீஹரித்வா தே³தீதி யோஜனா.

1842. ஹத்த²தோதி ஏத்த² ‘‘க³ஹணே’’தி ஸேஸோ. ததா²தி அனாபத்தி. ஸமுட்டா²னம் இத³ம் ஸிக்கா²பத³ம் ஏளகலோமேன ஸமம் மதந்தி யோஜனா.

பட²மபாடிதே³ஸனீயகதா²வண்ணனா.

1843-4. அவுத்தேதி வக்க²மானனயேன அவுத்தே. ஏகேனபி ச பி⁴க்கு²னாதி ஸம்ப³ந்தோ⁴. அபஸக்காதி அபக³ச்ச². ஆதி³-அத்த²வாசினா இதி-ஸத்³தே³ன ‘‘அபஸக்க தாவ, ப⁴கி³னி, யாவ பி⁴க்கூ² பு⁴ஞ்ஜந்தீ’’தி வாக்யஸேஸோ ஸங்க³ஹிதோதி த³ட்ட²ப்³போ³. இமினா அபஸாத³னாகாரோ ஸந்த³ஸ்ஸிதோ. ‘‘ஏகேனபி ச பி⁴க்கு²னா’’தி இமினா அவகம்ஸோ த³ஸ்ஸிதோ. உக்கம்ஸோ பன ‘‘தேஹி பி⁴க்கூ²ஹி ஸா பி⁴க்கு²னீ அபஸாதே³தப்³பா³’’தி பாளிதோபி த³ட்ட²ப்³போ³. ‘‘ஆமிஸ’’ந்தி ஸாமஞ்ஞவசனேபி பஞ்சன்னம் போ⁴ஜனானம் அஞ்ஞதரஸ்ஸேவ க³ஹணம். யதா²ஹ ‘‘பஞ்சன்னம் போ⁴ஜனானம் அஞ்ஞதரேனா’’தி. போ⁴கே³தி ச ஏகதோஉபஸம்பன்னந்தி ச வுத்தத்த²மேவ.

1845. ததே²வாதி து³க்கடம். தத்தா²தி அனுபஸம்பன்னாய.

1846. அத்தனோ ப⁴த்தே தி³ன்னேபி இமினா ஸிக்கா²பதே³ன அனாபத்தி, புரிமஸிக்கா²பதே³ன பன ஆபத்திஸம்ப⁴வா ‘‘ந தே³தீ’’தி வுத்தம். யதா²ஹ ‘‘அத்தனோ ப⁴த்தம் தா³பேதி, ந தே³தீதி ஏத்த² ஸசேபி அத்தனோ ப⁴த்தம் தே³தி, இமினா ஸிக்கா²பதே³ன அனாபத்தியேவ, புரிமஸிக்கா²பதே³ன ஆபத்தீ’’தி (பாசி. அட்ட². 558). ததா²தி அனாபத்தி. உப⁴யஸிக்கா²பதே³ஹிபி அனாபத்திம் த³ஸ்ஸேதுமாஹ ‘‘பதே³தி சே’’தி. யதா²ஹ ‘‘அஞ்ஞேஸம் ப⁴த்தம் தே³தி, ந தா³பேதீதி ஏத்த² பன ஸசேபி தா³பேய்ய, இமினா ஸிக்கா²பதே³ன ஆபத்தி ப⁴வேய்ய, தே³ந்தியா பன நேவ இமினா, ந புரிமேன ஆபத்தீ’’தி.

1847. பி⁴க்கு²னீ யம் ந தி³ன்னம், தம் தா³பேதி, யத்த² வா ந தி³ன்னம், தத்த² தா³பேதி, தம்பி ஸப்³பே³ஸம் மித்தாமித்தானம் ஸமம் தா³பேதி, தத்தா²பி அனாபத்தி.

1848. ஸிக்க²மானா வா ஸாமணேரிகா வா ‘‘இத⁴ ஸூபம் தே³த², ஓத³னம் தே³தா²’’தி வோஸாஸந்தீ விதா⁴னம் கரோந்தீ டி²தா, தம் அனபஸாதே³ந்தஸ்ஸ அனாபத்தி. பஞ்சேவ போ⁴ஜனானி வினா அஞ்ஞம் வோஸாஸந்திம் பி⁴க்கு²னிம் அனபஸாதே³ந்தஸ்ஸ அனாபத்தி. அனபஸாதே³ந்தஸ்ஸ உம்மத்தகாதி³னோபி அனாபத்தீதி யோஜனா.

1849. ஸமுட்டா²னந்தி ஏத்த² ‘‘இமஸ்ஸா’’தி ஸேஸோ. போ⁴ஜனம் கிரியம், வோஸாஸந்தியா அனிவாரணம் அகிரியந்தி ஏவமித³ம் க்ரியாக்ரியம்.

து³தியபாடிதே³ஸனீயகதா²வண்ணனா.

1850-1. ஸேக்க²ந்தி ஸம்மதேதி ‘‘ஸேக்க²ஸம்மதம் நாம குலம் யம் குலம் ஸத்³தா⁴ய வட்³ட⁴தி, போ⁴கே³ன ஹாயதி, ஏவரூபஸ்ஸ குலஸ்ஸ ஞத்திது³தியேன கம்மேன ஸேக்க²ஸம்முதி தி³ன்னா ஹோதீ’’தி (பாசி. 567) வுத்தம் இத³ம் குலம் ஸேக்க²ஸம்மதம் நாம. தேனாஹ ‘‘லத்³த⁴ஸம்முதிகே குலே’’தி. லத்³தா⁴ ஸம்முதி யேனாதி விக்³க³ஹோ. க⁴ரூபசாரம் ஓக்கந்தே நிமந்திதோபி அனிமந்திதோவ ஹோதீதி ஆஹ ‘‘க⁴ரூபசாரோக்கமனா புப்³பே³வா’’தி. யதா²ஹ ‘‘அனிமந்திதோ நாம அஜ்ஜதனாய வா ஸ்வாதனாய வா அனிமந்திதோ, க⁴ரூபசாரம் ஓக்கமந்தே நிமந்தேதி, ஏஸோ அனிமந்திதோ நாமா’’தி (பாசி. 567).

‘‘அகி³லானோ நாம யோ ஸக்கோதி பிண்டா³ய சரிது’’ந்தி வுத்தத்தா பி⁴க்கா²ய சரிதும் ஸமத்தோ² அகி³லானோ நாம. க³ஹேத்வாதி ஸஹத்தா² படிக்³க³ஹேத்வா. ‘‘ஆமிஸ’’ந்தி இமினா ஸம்ப³ந்தோ⁴. யதா²ஹ ‘‘கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா’’தி (பாசி. 567). க³ஹணேதி ஏத்த² ‘‘ஆஹாரத்தா²யா’’தி ஸேஸோ.

1853. தத்தா²தி அஸேக்க²ஸம்மதே குலே. ததே²வ பரிதீ³பிதந்தி து³க்கடம் பரிதீ³பிதம்.

1854. நிமந்திதஸ்ஸ வாதி ஏத்த² வா-ஸத்³தே³ன நிமந்திதஸ்ஸ அவஸேஸம் க³ண்ஹாதி. யதா²ஹ ‘‘நிமந்திதஸ்ஸ வா கி³லானஸ்ஸ வா ஸேஸகம் பு⁴ஞ்ஜதீ’’தி. அஞ்ஞேஸம் பி⁴க்கா² தத்த² தீ³யதீதி யோஜனா. தத்தா²தி தஸ்மிம் ஸேக்க²ஸம்மதே குலே.

1855. யத்த² கத்த²சீதி ஆஸனஸாலாதீ³ஸு யத்த² கத்த²சி. நிச்சப⁴த்தாதி³கே வாபீதி ஏத்த² ஆதி³-ஸத்³தே³ன ஸலாகப⁴த்தபக்கி²கஉபோஸதி²கபாடிபதி³கப⁴த்தானம் க³ஹணம்.

1856. த்³வாரேதி ஏத்த² ‘‘ட²பேத்வா’’தி ஸேஸோ. ஸம்பத்தேதி ஏத்த² ‘‘பச்சா²’’தி ஸேஸோ. யதா²ஹ ‘‘ஸசேபி அனாக³தே பி⁴க்கு²ம்ஹி பட²மம்யேவ நீஹரித்வா த்³வாரே ட²பேத்வா பச்சா² ஸம்பத்தஸ்ஸ தே³ந்தி, வட்டதீ’’தி (பாசி. அட்ட². 569).

1857. மஹாபச்சரியா(பஆசி. அட்ட². 569) க³தவினிச்ச²யம் த³ஸ்ஸேதுமாஹ ‘‘பி⁴க்கு²’’ந்திஆதி³. ஸமுட்டா²னேளகூபமந்தி ஸமுட்டா²னதோ ஏளகலோமஸிக்கா²பத³ஸதி³ஸந்தி அத்தோ².

ததியபாடிதே³ஸனீயகதா²வண்ணனா.

1858-9. ‘‘பஞ்சன்னம் படிஸம்விதி³தம், ஏதம் அப்படிஸம்விதி³தம் நாமா’’தி வசனதோ ச இதா⁴பி ‘‘ஸஹத⁴ம்மிகஞாபித’’ந்தி வக்க²மானத்தா ச அக³ஹட்ட²-ஸத்³தே³ன பரிப்³பா³ஜகானம் க³ஹணம். வுத்தமேவ நயம் வோஹாரந்தரேன த³ஸ்ஸேதுமாஹ ‘‘இத்தி²யா புரிஸேன வா’’தி. ‘‘யானி கோ² பன தானி ஆரஞ்ஞகானி ஸேனாஸனானீ’’தி (பாசி. 573) வசனதோ ஆராமந்தி ஆரஞ்ஞகாராமமாஹ. ஸசே ஏவமாரோசிதம் படிஸம்விதி³தந்தி ஹி வுத்தம் பத³பா⁴ஜனேதி (பாசி. 573) யோஜனா. படிஸம்விதி³தந்தி பகே³வ நிவேதி³தம்.

1860. பச்சா² யதா²ரோசிதம் தமேவ வா தஸ்ஸ ச பரிவாரம் கத்வா அஞ்ஞம் ப³ஹும் வா ஆஹரீயது, தம்பி படிஸம்வேதி³தம் நாமாதி யோஜனா.

1861. யாகு³யா விதி³தம் கத்வாதி ஏத்த² ‘‘தம் ட²பேத்வா’’தி இத³ம் ஸாமத்தி²யா லப்³ப⁴தி. இத³ம்பி விதி³தம் குருந்தி³யம் வட்டதீதி வுத்தந்தி யோஜனா.

1862. பனாதி அபி-ஸத்³த³த்தோ². அஞ்ஞானிபி குலானீதி யோஜனா. ஏத்த² ‘‘அஸுகம் நாம குலம் படிஸம்வேதி³தம் கத்வா கா²த³னீயாதீ³னி க³ஹேத்வா க³ச்ச²தீதி ஸுத்வா’’தி (பாசி. அட்ட². 573) அட்ட²கதா²ஸேஸோ. தேனாதி கதபடிஸம்வேதி³தேன. தம்பி ச ஸப்³ப³ம் வட்டதீதி யோஜனா.

1863. ஏவம் யம் அனாரோசிதந்தி ‘‘ஆராமம் வா உபசாரம் வா பவிஸித்வா’’திஆதி³னா நயேன யம் பட²மம் அனிவேதி³தம். ‘‘ஏவ’’ந்தி இத³ம் ‘‘யம் ஆராமமனாப⁴த’’ந்தி இமினாபி யோஜேதப்³ப³ம். ஏவந்தி ‘‘தஸ்ஸ பரிவாரம் கத்வா’’திஆதி³னா பகாரேன. ‘‘தம் அஸம்விதி³தம் நாமா’’தி இத³ம் ‘‘ஸஹத⁴ம்மிகஞாபித’’ந்தி இமினாபி யோஜேதப்³ப³ம். யதா²ஹ ‘‘பஞ்சன்னம் படிஸம்விதி³தம், ஏதம் அப்படிஸம்விதி³தம் நாமா’’தி (பாசி. 573). அட்ட²கதா²யஞ்ச ‘‘பஞ்சன்னம் படிஸம்விதி³தந்தி பஞ்சஸு ஸஹத⁴ம்மிகேஸு யம் கிஞ்சி பேஸேத்வா ‘கா²த³னீயம் வா போ⁴ஜனீயம் வா ஆஹரிஸ்ஸாமா’தி படிஸம்விதி³தம் கதம்பி அப்படிஸம்விதி³தமேவாதி அத்தோ²’’தி (பாசி. அட்ட². 573) வுத்தம்.

1864. காராபேத்வாதி ஏத்த² ‘‘படிஸம்விதி³த’’ந்தி ஸேஸோ.

1865. பி⁴க்கு²னா வா க³ந்த்வா அந்தராமக்³கே³ க³ஹேதப்³ப³ந்தி யோஜனா. ஏவமகத்வாதி ‘‘ப³ஹிஆராமம் பேஸேத்வா’’திஆதி³னா வுத்தவிதா⁴னம் அகத்வா. உபசாரதோதி ஏத்த² பு⁴ம்மத்தே² தோ-பச்சயோ வேதி³தப்³போ³.

1868. ‘‘படிஸம்விதி³தே’’திஆதீ³னம் பதா³னம் ‘‘அனாபத்தே வா’’தி இமினா ஸம்ப³ந்தோ⁴. படிஸம்விதி³தேதி ஏத்த² ‘‘கி³லானஸ்ஸா’’தி ஸேஸோ. படிஸம்விதி³தே அனாபத்தி, கி³லானஸ்ஸாபி அனாபத்தி, அப்படிஸம்விதி³தேபி தஸ்ஸ படிஸம்விதி³தஸ்ஸ அவஸேஸகே வா கி³லானஸ்ஸ அவஸேஸகே வா அனாபத்தி ஏவாதி ஸம்ப³ந்தோ⁴. யதா²ஹ அனாபத்திவாரே ‘‘படிஸம்விதி³தஸ்ஸ வா கி³லானஸ்ஸ வா ஸேஸகம் பு⁴ஞ்ஜதீ’’தி (பாசி. 575). ப³ஹாராமே படிக்³க³ஹேத்வா அந்தோயேவ பு⁴ஞ்ஜதோ அஸ்ஸ அனாபத்தீதி யோஜனா. க³ஹேத்வா வாதி ஏத்த² வா-ஸத்³தோ³ ‘‘தஸ்ஸா’’திஆதீ³ஸுபி யோஜேதப்³போ³.

1869. தத்தா²தி தஸ்மிம் ஆரஞ்ஞகாராமே. கா²த³தோ அனாபத்தி ஏவாதி யோஜனா, தத்த² ‘‘அஞ்ஞேன கப்பியம் கத்வா தி³ன்னானீ’’தி ஸேஸோ.

சதுத்த²பாடிதே³ஸனீயகதா²வண்ணனா.

இதி வினயத்த²ஸாரஸந்தீ³பனியா வினயவினிச்ச²யவண்ணனாய

பாடிதே³ஸனீயகதா²வண்ணனா நிட்டி²தா.

ஸேகி²யகதா²வண்ணனா

1870. ஏவம் பாடிதே³ஸனீயவினிச்ச²யம் த³ஸ்ஸேத்வா தத³னந்தரம் உத்³தி³ட்டா²னம் ஸேகி²யானம் வினிச்ச²யம் த³ஸ்ஸேதுமாஹ ‘‘யோ அனாத³ரியேனேவா’’திஆதி³. யோதி தே²ரோ வா நவோ வா மஜ்ஜி²மோ வா. ஏத்த² அனாத³ரியம் நாம ஸஞ்சிச்ச ஆபத்திஆபஜ்ஜனம், நிவாஸனாதி³வத்த²ஸ்ஸ உக்³க³ஹணே நிருஸ்ஸாஹஞ்ச. பச்ச²தோபி வாதி ஏத்த² வா-ஸத்³தே³ன ‘‘பஸ்ஸதோபி வா’’தி இத³ம் ஸங்க³ண்ஹாதி. தஸ்ஸ சாதி ஏத்த² ச-ஸத்³தோ³ வக்க²மானஸமுச்சயோ.

1871. ந கேவலம் வுத்தனயேன நிவாஸேந்தஸ்ஸேவ ஹோதி, க²ந்த⁴காக³தஹத்தி²ஸோண்டா³தி³ஆகாரேனாபி நிவாஸேந்தஸ்ஸ து³க்கடம் ஹோதீதி ஆஹ ‘‘ஹத்தி²ஸோண்டா³தீ³’’திஆதி³. ஹத்தி²ஸோண்டா³தி³னிவாஸனம் பரதோ கு²த்³த³கவத்து²க்க²ந்த⁴கே (சூளவ. 280) ஆவி ப⁴விஸ்ஸதி. பரிமண்ட³லந்தி ஸமந்ததோ மண்ட³லம் கத்வா. வத்த²ப்³ப³ந்தி நிவத்த²ப்³ப³ம் நிவாஸேதப்³ப³ந்தி அத்தோ².

1872. ஜாணுமண்ட³லதோ ஹேட்டா²தி ஏத்த² ‘‘ஜங்க⁴ட்டி²ஸீஸதோ பட்டா²யா’’தி ஸேஸோ. அட்ட²ங்கு³லப்பமாணகந்தி வட்³ட⁴கிஅங்கு³லேன அட்ட²ங்கு³லமத்தந்தி ஆசரியா. ‘‘யோ பன ஸுக்க²ஜங்கோ⁴ வா மஹாபிண்டி³கமம்ஸோ வா ஹோதி, தஸ்ஸ ஸாருப்பத்தா²ய ஜாணுமண்ட³லதோ அட்ட²ங்கு³லாதி⁴கம்பி ஓதாரேத்வா நிவாஸேதும் வட்டதீ’’தி (பாசி. அட்ட². 576) அட்ட²கத²ம் ஸங்க³ண்ஹிதுமாஹ ‘‘ததோ ஊனம் ந வட்டதீ’’தி.

1873. அஸஞ்சிச்ச அபரிமண்ட³லம் நிவாஸேந்தஸ்ஸ அனாபத்தீதி யோஜனா. ஏவமுபரிபி. அஸஞ்சிச்சாதி ‘‘அபரிமண்ட³லம் நிவாஸேஸ்ஸாமீ’’தி ஏவம் அஸஞ்சிச்ச, அத² கோ² ‘‘பரிமண்ட³லம்யேவ நிவாஸேஸ்ஸாமீ’’தி விரஜ்ஜி²த்வா அபரிமண்ட³லம் நிவாஸேந்தஸ்ஸ அனாபத்தி. அஸதிஸ்ஸாபீதி அஞ்ஞவிஹிதஸ்ஸாபி ததா² நிவாஸேந்தஸ்ஸ அனாபத்தி. அஜானந்தஸ்ஸாதி கேவலம் பரிமண்ட³லம் நிவாஸேதும் அஜானந்தஸ்ஸ அனாபத்தி. அபிச நிவாஸனவத்தம் உக்³க³ஹேதப்³ப³ம். உக்³க³ஹிதவத்தோபி ஸசே ‘‘ஆருள்ஹ’’ந்தி வா ‘‘ஓருள்ஹ’’ந்தி வா ந ஜானாதி, தஸ்ஸாபி அனாபத்தியேவ. கி³லானஸ்ஸாதி யஸ்ஸ ஜங்கா⁴ய வா பாதே³ வா வணோ ஹோதி, தஸ்ஸ உக்கி²பித்வா வா ஓதாரேத்வா வா நிவாஸேந்தஸ்ஸ அனாபத்தி. பாதோ³தி சேத்த² பாத³ஸமீபம் அதி⁴ப்பேதம். ஆபதா³ஸூதி வாளா வா சோரா வா அனுப³ந்த⁴ந்தி, ஏவரூபாஸு ஆபதா³ஸு அனாபத்தி.

பரிமண்ட³லகதா²வண்ணனா.

1874. உபோ⁴ கோணே ஸமம் கத்வாதி பாருபனஸ்ஸ ஏகம்ஸே கதஸ்ஸ பிட்டி²பஸ்ஸே, உத³ரபஸ்ஸே ச ஓலம்ப³மானே உபோ⁴ கண்ணே ஹத்தி²பிட்டே² க³ண்டா³ விய ஸமம் கத்வா. பரிமண்ட³லம் கத்வாதி ஏதஸ்ஸேவ அத்த²பத³ம். ஸாத³ரந்தி பா⁴வனபும்ஸகனித்³தே³ஸோ. ஸாத³ரம் வா பாருபிதப்³ப³ந்தி யோஜனா, ஸாத³ரம் பாருபனம் கத்தப்³ப³ந்தி அத்தோ². ஏவம் அகரோந்தஸ்ஸாதி பாருபனவத்தே ஆத³ரம் ஜனேத்வா ஏவம் அபாருபந்தஸ்ஸ.

1875. ‘‘பரிமண்ட³லம் நிவாஸேஸ்ஸாமீதி ஸிக்கா² கரணீயா’’தி (பாசி. 576) வா ‘‘பரிமண்ட³லம் பாருபிஸ்ஸாமீதி ஸிக்கா² கரணீயா’’தி (பாசி. 577) வா ‘‘அந்தரக⁴ரே’’தி அவிஸேஸேத்வா வுத்தத்தா ஆஹ ‘‘அவிஸேஸேன வுத்த’’ந்தி. இத³ம் ஸிக்கா²பத³த்³வயம் யஸ்மா அவிஸேஸேன வுத்தம், தஸ்மா க⁴ரே, விஹாரே வா காதப்³ப³ம் பரிமண்ட³லந்தி யோஜனா. க⁴ரேதி அந்தரக⁴ரே. விஹாரே வாதி பு³த்³து⁴பட்டா²னாதி³காலம் ஸந்தா⁴ய வுத்தம். பரிமண்ட³லம் கத்தப்³ப³ந்தி பரிமண்ட³லமேவ நிவாஸேதப்³ப³ம் பாருபிதப்³ப³ந்தி அத்தோ².

து³தியம்.

1876. உபோ⁴ கோணே ஸமம் கத்வாதி ஸம்ப³ந்தோ⁴. கீ³வமேவ ச அனுவாதேன சா²தே³த்வாதி யோஜனா.

1877. ததா² அகத்வாதி யதா²வுத்தவிதா⁴னம் அகத்வா. ஜத்தூனிபீதி உபோ⁴ அம்ஸகூடானிபி. உரம்பி சாதி ஹத³யம்பி. விவரித்வாதி அப்படிச்சா²தே³த்வா. யதா²காமந்தி இச்சா²னுரூபம். க³ச்ச²தோதி ஏத்த² ‘‘அந்தரக⁴ரே’’தி ஸேஸோ. அந்தரக⁴ரம் நாம கா³மே வா ஹோது விஹாரே வா, பசித்வா பு⁴ஞ்ஜித்வா கி³ஹீனம் வஸனட்டா²னம்.

ததியம்.

1878-9. ‘‘மணிப³ந்த⁴தோ’’தி இமினாபி ‘‘ஹேட்டா²’’தி யோஜேதப்³ப³ம். வாஸூபக³ஸ்ஸாதி ஏத்த² ‘‘காயம் விவரித்வா நிஸீத³தோ’’தி ஸேஸோ. வாஸூபகோ³ நாம ரத்திவாஸத்தா²ய உபக³தோ, ஏதேன வாஸத்தா²ய அந்தரக⁴ரம் உபக³ச்ச²ந்தேன ஸுப்படிச்ச²ன்னேனேவ உபக³ந்தப்³ப³ந்தி தீ³பிதம் ஹோதி, ஏதேனேவ வாஸூபக³தஸ்ஸ ஸந்திகம் உபக³தஸ்ஸ யதா²காமம் க³மனே ந தோ³ஸோதி ச வுத்தமேவ ஹோதி. தேனாஹ க³ண்டி²பதே³ ‘‘ஏகதி³வஸம்பி வாஸூபக³தஸ்ஸ ஸந்திகம் யதா²ஸுக²ம் க³ந்தும் வட்டதி, கோ பன வாதோ³ சதுபஞ்சாஹம் வாஸமதி⁴ட்டா²ய வஸிதபி⁴க்கூ²னம் ஸந்திக’’ந்தி.

சதுத்த²ம்.

1880. ஸுவினீதேனாதி ஹத்த²பாதா³னம் அகீளாபனேனேவ ஸுட்டு² வினீதேன.

பஞ்சமம்.

1881. கா³தா²ப³ந்த⁴வஸேன ‘‘ஸதீமதா’’தி தீ³கோ⁴ கதோ. அவிகாரேனாதி தம்தத³வலோகாஸஹிதேன. யுக³ம் மத்தா பமாணம் ஏதஸ்ஸாதி யுக³மத்தம், ரத²யுக³ம் சதுஹத்த²ப்பமாணம், தத்தகம் பதே³ஸம். பேக்கி²னாதி ஓலோகேந்தேன. ‘‘பி⁴க்கு²னா ஓக்கி²த்தசக்கு²னா’’தி பத³ச்சே²தோ³.

1882. அந்தரக⁴ரே யத்த² கத்த²சிபி ஏகஸ்மிம்பி டா²னே ட²த்வாதி யோஜனா. ஏவம் வுத்தேபி ததா²ரூபே அந்தராயே ஸதி க³ச்ச²தோபி ஓலோகேதும் லப்³ப⁴தி. ஏகஸ்மிம் பன டா²னே ட²த்வாதி ஏத்த² க³ச்ச²ந்தோபி பரிஸ்ஸயாபா⁴வம் ஓலோகேதும் லப்³ப⁴தியேவ. ‘‘ததா² கா³மே பூஜ’’ந்தி க³ண்டி²பதே³ஸு வுத்தம். பி-ஸத்³தோ³ பன-ஸத்³த³த்தோ², ஓலோகேதும் பன வட்டதீதி வுத்தம் ஹோதி.

1883. ஓலோகேந்தோ தஹம் தஹந்தி யோ அனாத³ரியம் படிச்ச தம் தம் தி³ஸாபா⁴க³ம் பாஸாத³ம் கூடாகா³ரம் வீதி²ம் ஓலோகேந்தோ.

ஸத்தமம்.

1884. ஏகதோ வாபீதி ஏகஅம்ஸகூடதோ வா. உப⁴தோ வாபீதி உப⁴யம்ஸகூடதோ வா. இந்த³கீ²லகதோ அந்தோதி கா³மத்³வாரிந்த³கீ²லதோ அந்தோ, க⁴ரேதி வுத்தம் ஹோதி.

நவமம்.

1885. ததா² நிஸின்னகாலேபீதி இந்த³கீ²லஸ்ஸ அந்தோ நிஸின்னகாலேபி. குண்டி³கம் நீஹரந்தேன ச சீவரம் அனுக்கி²பித்வா தா³தப்³பா³ குண்டி³காதி யோஜனா. குண்டி³கந்தி ச உபலக்க²ணமத்தம். த⁴ம்மகரணாதீ³ஸுபி ஏஸேவ நயோ.

த³ஸமம்.

பட²மோ வக்³கோ³.

1886. க³ந்துஞ்சேவ நிஸீதி³துஞ்ச ந வட்டதீதி யோஜனா. ச-ஸத்³தோ³ கிரியாஸமுச்சயோ. ஹஸனீயஸ்மிம் வத்து²ஸ்மிந்தி ஹாஸஜனகே காரணே. ஸிதமத்தந்தி மந்த³ஹாஸம்.

பட²மது³தியானி.

1887. அப்பஸத்³தே³னாதி ‘‘கித்தாவதா அப்பஸத்³தோ³ ஹோதி? த்³வாத³ஸஹத்தே² கே³ஹே ஆதி³ம்ஹி ஸங்க⁴த்தே²ரோ, மஜ்ஜே² து³தியத்தே²ரோ, அந்தே ததியத்தே²ரோதி ஏவம் நிஸின்னேஸுயம் ஸங்க⁴த்தே²ரோ து³தியத்தே²ரேன ஸத்³தி⁴ம் மந்தேதி, து³தியத்தே²ரோ தஸ்ஸ ஸத்³த³ஞ்சேவ ஸுணாதி, கத²ஞ்ச வவத்த²பேதி. ததியத்தே²ரோ பன ஸத்³த³மேவ ஸுணாதி, கத²ம் ந வவத்த²பேதி. ஏத்தாவதா அப்பஸத்³தோ³ ஹோதீ’’தி (பாசி. 588) வுத்தஅப்பஸத்³த³யுத்தேன. ஸசே பன ததியத்தே²ரோ கத²ஞ்ச வவத்த²பேதி, மஹாஸத்³தோ³ நாம ஹோதீதி.

ததியம்.

1888. காயப்பசாலகம் கத்வாதி காயம் சாலேத்வா சாலேத்வா. உபரிபி ஏஸேவ நயோ. ஹத்த²ஸ்ஸ வுத்தலக்க²ணத்தா ‘‘பா³ஹூ’’தி மணிப³ந்த⁴தோ யாவ அம்ஸகூடா க³ஹேதப்³பா³.

1889. உஜும் பக்³க³ஹேத்வாதி உஜும் ட²பேத்வா. ஆஸிதப்³ப³ந்தி நிஸீதி³தப்³ப³ம். ‘‘ஸமேன இரியாபதே²ன தூ’’தி பத³ச்சே²தோ³.

1890. இத்த²ம்பூ⁴தே கரணவசனம். க³மனபடிஸம்யுத்தேஸு ஸிக்கா²பதே³ஸு க³மனஸ்ஸ அஸம்ப⁴வோதி ஆஹ ‘‘நிஸீத³னேன யுத்தேஸூ’’தி.

பஞ்சமச²ட்ட²ஸத்தமட்ட²மனவமானி.

து³தியோ வக்³கோ³.

1891. க²ம்ப⁴ம் கத்வாதி கடியா ஏகபஸ்ஸே வா த்³வீஸு வா பஸ்ஸேஸு கப்பரஸந்தி⁴தோ ஆபு⁴ஜித்வா ஹத்த²ம் ட²பேத்வா. யதா²ஹ – ‘‘க²ம்ப⁴கதோ நாம கடியம் ஹத்த²ம் ட²பேத்வா கதக²ம்போ⁴’’தி (பாசி. அட்ட². 596). உக்குடிகாய வா க³ச்ச²தோதி யோஜனா. உக்குடிகா வுச்சதி பண்ஹியோ உக்கி²பித்வா அக்³க³பாதே³ஹி வா அக்³க³பாதே³ உக்கி²பித்வா பண்ஹீஹி ஏவ வா பூ⁴மிம் பு²ஸந்தஸ்ஸ க³மனம்.

1892. து³ஸ்ஸபல்லத்தி²காயாதி ஆயோக³பல்லத்தி²காய. அந்தரக⁴ரே நிஸீத³ந்தஸ்ஸ தஸ்ஸ து³க்கடம் ஹோதீதி யோஜனா.

1893. து³தியே சாதி ‘‘ந க²ம்ப⁴கதோ அந்தரக⁴ரே நிஸீதி³ஸ்ஸாமீ’’தி (பாசி. 597) ஸிக்கா²பதே³ ச. சதுத்தே² சாதி ‘‘ந ஓகு³ண்டி²தோ அந்தரக⁴ரே நிஸீதி³ஸ்ஸாமீ’’தி (பாசி. 599) ஸிக்கா²பதே³ ச. ச²ட்டே²தி ‘‘ந பல்லத்தி²காய அந்தரக⁴ரே’’இச்சாதி³ (பாசி. 601) ஸிக்கா²பதே³ ச. இதி ஏவம் ஸாருப்பா ஸமணாசாரானுச்ச²விகா ச²ப்³பீ³ஸதி ஸிக்கா²பதா³னி பகாஸிதானி.

பட²மது³தியததியசதுத்த²பஞ்சமச²ட்டா²னி.

1894. விஞ்ஞுனா பி⁴க்கு²னா ஸக்கச்சம் ஸதியுத்தேன, பத்தஸஞ்ஞினா ச ஹுத்வா ஸமஸூபோவ பிண்ட³பாதோ க³ஹேதப்³போ³தி யோஜனா. ஏவம் ஏதாய கா³தா²ய ஸிக்கா²பத³த்தயம் ஸங்க³ஹிதம். ஸக்கச்சந்தி ஸதிம் உபட்ட²பேத்வா. ‘‘ஸதியுத்தேனா’’தி இத³ம் ‘‘ஸக்கச்ச’’ந்தி ஏதஸ்ஸ அத்த²பத³ம். ‘‘ஸதிம் உபட்ட²பேத்வா’’தி (பாசி. அட்ட². 602) ஹி அட்ட²கதா²யம் வுத்தம். பத்தே ஸஞ்ஞா பத்தஸஞ்ஞா, ஸா அஸ்ஸ அத்தீ²தி பத்தஸஞ்ஞீ, அனஞ்ஞவிஹிதேன அத்தனோ பா⁴ஜனேயேவ உபனிப³த்³த⁴ஸஞ்ஞினாதி அத்தோ².

1895. ப⁴த்தசதுப்³பா⁴கோ³தி ப⁴த்தஸ்ஸ சதுப்³பா⁴க³ப்பமாணோ. ததோ அதி⁴கம் க³ண்ஹதோ து³க்கடம்.

1896. ‘‘ரஸரஸே’’தி வத்தப்³பே³ ‘‘ரஸேரஸே’’தி கா³தா²ப³ந்த⁴வஸேன வுத்தம். த்³வே ஸூபே ட²பேத்வா அவஸேஸானி ஓலோணிஸாகஸூபேய்யமச்ச²ரஸமம்ஸரஸாதீ³னி ரஸரஸாதி வேதி³தப்³பா³னி. ஏத்த² ச ‘‘ஓலோணீதி த³தி⁴கதம் கோ³ரஸ’’ந்தி கேசி. ‘‘ஏகா ப்³யஞ்ஜனவிகதீ’’தி அபரே. ‘‘யோ கோசி ஸுத்³தோ⁴ கஞ்ஜிகதக்காதி³ரஸோ’’தி அஞ்ஞே. ஸாகஸூபேய்யக்³க³ஹணேன யா காசி ஸூபேய்யஸாகேஹி கதா ப்³யஞ்ஜனவிகதி வுத்தா. மம்ஸரஸாதீ³னீதி ஆதி³-ஸத்³தே³ன அவஸேஸா ஸப்³பா³பி ப்³யஞ்ஜனவிகதி ஸங்க³ஹிதாதி த³ட்ட²ப்³ப³ம். ஞாதகாதீ³னந்தி ஏத்த² ‘‘ஸந்தகம் க³ண்ஹந்தஸ்ஸா’’தி ஸேஸோ. அஞ்ஞத்தா²யாதி ஏத்த² ‘‘கதம் க³ண்ஹந்தஸ்ஸா’’தி ஸேஸோ. த⁴னேனாதி ஏத்த² ‘‘அத்தனோ’’தி ச ‘‘கீத’’ந்தி ச ‘‘க³ண்ஹந்தஸ்ஸா’’தி ச ஸேஸோ. ஞாதகாதீ³னம் ஸந்தகம் க³ண்ஹந்தஸ்ஸ, அஞ்ஞத்தா²ய கதம் க³ண்ஹந்தஸ்ஸ, அத்தனோ த⁴னேன கீதம் க³ண்ஹந்தஸ்ஸ அனாபத்தீதி அத்தோ².

ஸத்தமட்ட²மனவமானி.

1897. அதி⁴ட்டா²னூபக³ஸ்ஸ பத்தஸ்ஸ முக²வட்டியா அந்தோலேகா²பமாணேன பூரிதோவ க³ஹேதப்³போ³தி யோஜனா.

1898. அனாபத்திவிஸயம் த³ஸ்ஸேத்வா ஆபத்திவிஸயம் த³ஸ்ஸேதுமாஹ ‘‘தத்தா²’’திஆதி³. தத்தா²தி அதி⁴ட்டா²னூபகே³ பத்தே. தூ²பீகதம் கத்வாதி ஏத்த² ‘‘தி³ய்யமான’’ந்தி ஸேஸோ. யதா²வுத்தலேகா²திக்கமோ யதா² ஹோதி, ஏவம் தூ²பீகதம் தி³ய்யமானம் க³ண்ஹதோ ஆபத்தி து³க்கடந்தி ஸம்ப³ந்தோ⁴. இமினா பட²மம் தூ²பீகதஸ்ஸ அதி⁴ட்டா²னூபக³பத்தஸ்ஸ பச்சா² படிக்³க³ஹணஞ்ச பட²மபடிக்³க³ஹிதபத்தே பச்சா² போ⁴ஜனஸ்ஸ தூ²பீகதஸ்ஸ படிக்³க³ஹணஞ்ச நிவாரிதந்தி வேதி³தப்³ப³ம்.

1899. காலிகத்தயமேவ ச தூ²பீகதம் வட்டதேவாதி யோஜனா. ஸேஸேதி அனதி⁴ட்டா²னூபகே³ பத்தே. ஸப்³ப³ந்தி சதுப்³பி³த⁴ம் காலிகம் தூ²பீகதம் வட்டதீதி யோஜனா.

1900. பேஸேதீதி ஏத்த² ‘‘பி⁴க்கூ²’’தி ஸேஸோ. பி⁴க்கு² பி⁴க்கூ²னம் யதி³ பேஸேதீதி யோஜனா. ‘‘விஹாரம் பேஸேதும் வட்டதீ’’தி (பாசி. அட்ட². 605) அட்ட²கதா²ய அதி⁴ப்பாயம் த³ஸ்ஸேதும் ‘‘பி⁴க்கூ²ன’’ந்தி வசனேன படிக்³க³ஹணம் அவிஜஹித்வா பி⁴க்கு²னா ஏவ பேஸிதம் க³ண்ஹந்தானம் பி⁴க்கூ²னம் அனாபத்தீதி தீ³பிதம் ஹோதி. அஞ்ஞதா² ‘‘பூரேதும் வட்டதீ’’தி ஏத்தகமேவ வத்தப்³ப³ந்தி விஞ்ஞாயதி.

1901. பக்கி²ப்பமானந்தி முக²வட்டிதோ உச்சம் கத்வா மஜ்ஜே² பக்கி²பியமானம். ப²லாதி³கந்தி ஆதி³-ஸத்³தே³ன ஓத³னாதி³ம்பி ஸங்க³ண்ஹாதி. ஹேட்டா² ஓரோஹதீதி ஸமந்தா ஓகாஸஸம்ப⁴வதோ சாலியமானம் முக²வட்டிப்பமாணதோ ஹேட்டா² ப⁴ஸ்ஸதி.

1902. தக்கோலகாதீ³னந்தி ஏத்த² ஆதி³-ஸத்³தே³ன பூக³ப²லாதீ³னம் ஸங்க³ஹோ. ட²பேத்வாதி ப⁴த்தமத்த²கே நிக்கி²பித்வா. வடம்ஸகந்தி அவடம்ஸகம்.

1903. பூவஸ்ஸாதி விகாரஸம்ப³ந்தே⁴ ஸாமிவசனம், பூவவடம்ஸகந்தி வுத்தம் ஹோதி. பூவஸ்ஸ யாவகாலிகத்தா ஆஹ ‘‘இத³ம் தூ²பீகதம் ஸியா’’தி.

1904. பண்ணானம் விஸும் பா⁴ஜனத்தா ஆஹ ‘‘வட்டதீ’’தி.

1905. அஸ்ஸாதி பி⁴க்கு²ஸ்ஸ. தம் து ஸப்³ப³ந்தி ‘‘தூ²பீகதத்தா ந வட்டதீ’’தி வுத்தம் தம் பன ஸப்³ப³ம். க³ஹிதம் ஸுக³ஹிதந்தி விராதே⁴த்வா படிக்³க³ஹிதம் சே, ஸுப்படிக்³க³ஹிதம்.

த³ஸமம்.

ததியோ வக்³கோ³.

1906. ‘‘உபரி ஓதி⁴’’ந்தி பத³ச்சே²தோ³. உபரீதி ப⁴த்தஸ்ஸ உபரி. ஓதி⁴ந்தி பரிச்சே²த³ம். படிபாடியாதி அத்தனோ தி³ஸாய பரியந்ததோ பட்டா²ய அனுக்கமேன.

1907. அஞ்ஞேஸந்தி ஏத்த² ‘‘தே³ந்தோ’’தி ஸேஸோ. அத்தனோ ப⁴த்தம் அஞ்ஞேஸம் தே³ந்தோ அஞ்ஞஸ்ஸ பா⁴ஜனே ஆகிரம் ஆகிரந்தோ பன படிபாடிம் வினாபி தஹிம் தஹிம் ஓமஸதி சே, நத்தி² தோ³ஸோதி யோஜனா. உத்தரிப⁴ங்க³கம் ததா² ஆகிரந்தோ தத்த² தத்த² ஓமஸதி, நத்தி² தோ³ஸோதி யோஜனா. பு⁴ஞ்ஜனத்தா²ய க³ண்ஹந்தோபி சேத்த² வத்தப்³போ³. உத்தரிப⁴ங்க³ம் நாம ப்³யஞ்ஜனம்.

ததியம்.

1908. மத்த²கம் ஓமத்³தி³த்வா பரிபு⁴ஞ்ஜதோ தோ³ஸோதி யோஜனா. ‘‘தூ²பகதோதி மத்த²கதோ, வேமஜ்ஜ²தோ’’தி (பாசி. அட்ட². 610) அட்ட²கதா²வசனதோ மத்த²கந்தி ஏத்த² ப⁴த்தமத்த²கமாஹ. ஓமத்³தி³த்வாதி ஹத்தே²ன ப⁴த்தம் அவமத்³தி³த்வா.

1909. ஸேஸகே பரித்தேபி சாதி அவஸிட்டே² அப்பகேபி ச. ஸம்கட்³டி⁴த்வானாதி தஸ்மிம் தஸ்மிம் டா²னே டி²தம் ஸம்ஹரித்வா. ஏகதோ பன மத்³தி³த்வா பு⁴ஞ்ஜதோ அனாபத்தீதி யோஜனா.

பஞ்சமம்.

1910. பி⁴ய்யோகம்யதாஹேதூதி புன க³ண்ஹிதுகாமதாஹேது. ஸூபம் வாதி முக்³கா³தி³ஸூபம் வா. ப்³யஞ்ஜனம் வாதி உத்தரிப⁴ங்க³ம் வா.

ச²ட்ட²ம்.

1911. விஞ்ஞத்தியந்தி ஸூபோத³னவிஞ்ஞத்தியம். ‘‘ஞாதகானம் வா பவாரிதானம் வா அஞ்ஞஸ்ஸ அத்தா²ய வா அத்தனோ த⁴னேன வா’’தி இத³ம் அனாபத்தியம் அதி⁴கம். கி³லானோபி ஹுத்வா பரேஸம் பத்தம் உஜ்ஜா²னஸஞ்ஞாய ஓலோகேந்தஸ்ஸ ஆபத்தி ஹோதீதி ஆஹ ‘‘உஜ்ஜா²னே கி³லானோபி ந முச்சதீ’’தி. உஜ்ஜா²னேதி நிமித்தத்தே² பு⁴ம்மம்.

1912. த³ஸ்ஸாமீதி இமஸ்ஸ ப⁴த்தம் ஓலோகேத்வா ‘‘யம் தத்த² நத்தி², தம் த³ஸ்ஸாமீ’’தி வா ‘‘தா³பேஸ்ஸாமீ’’தி வா. அவமஞ்ஞித்வா உஜ்ஜா²யனசித்தம் உஜ்ஜா²னம், உஜ்ஜா²னே ஸஞ்ஞா உஜ்ஜா²னஸஞ்ஞா, ஸா அஸ்ஸ அத்தீ²தி விக்³க³ஹோ. நஉஜ்ஜா²னஸஞ்ஞினோ ச அனாபத்தீதி ஞாதப்³ப³ந்தி யோஜனா.

ஸத்தமட்ட²மானி.

1913. ‘‘தேஸம் மஜ்ஜ²ப்பமாணேனா’’தி இமினா அஸாருப்பவஸேன கு²த்³த³கபடிக்கே²போ கதோதி வேதி³தப்³போ³. ‘‘நாதிமஹந்த’’ந்தி ச அதிமஹந்தஸ்ஸேவ படிக்கி²த்தத்தா கு²த்³த³கே ஆபத்தி ந தி³ஸ்ஸதீதி. கப³ளோதி ஆலோபோ.

1914. மூலகா²த³னீயாதி³கே ஸப்³ப³த்த² க²ஜ்ஜகே பனாதி யோஜனா. ப²லாப²லேதி கு²த்³த³கே, மஹந்தே ச ப²லே.

நவமம்.

1915. த³ஸமே நத்தி² கிஞ்சி வத்தப்³ப³ம்.

த³ஸமம்.

சதுத்தோ² வக்³கோ³.

1916. ‘‘அனாஹடே’’தி ஏதஸ்ஸ அத்த²பத³ம் ‘‘முக²த்³வாரம் அப்பத்தே’’தி. யதா²ஹ ‘‘அனாஹடேதி அனாஹரிதே, முக²த்³வாரம் அஸம்பாபிதேதி அத்தோ²’’தி (பாசி. அட்ட². 617). ‘‘முக²த்³வாரம் விவரந்தஸ்ஸா’’தி ஏத்தகே வுத்தே முக²த்³வார-ஸத்³த³ஸ்ஸ ஸம்ப³ந்தி⁴ஸத்³த³த்தா கஸ்ஸாதி அபேக்கா²ய ‘‘முக²த்³வாரம் விவரிஸ்ஸாமீ’’தி அத்தனோபதே³கவசனேன ப்³யஞ்ஜிதமேவத்த²ம் பகாஸேதும் அத்தனோ-க³ஹணம் கதந்தி வேதி³தப்³ப³ம். ச-ஸத்³தோ³ ஏவகாரத்தோ², அப்பத்தே வாதி யோஜேதப்³போ³, அஸம்பத்தேயேவாதி அத்தோ².

பட²மம்.

1917. ஸகலம் ஹத்த²ந்தி ஏத்த² ஹத்த²-ஸத்³தோ³ ததே³கதே³ஸேஸு அங்கு³லீஸு த³ட்ட²ப்³போ³. ‘‘ஹத்த²முத்³தா³’’திஆதீ³ஸு விய ஸமுதா³யே பவத்தவோஹாரஸ்ஸ அவயவேபி பவத்தனதோ ஏகங்கு³லிம்பி முகே² பக்கி²பிதும் ந வட்டதி.

1918. அஸ்ஸாதி பி⁴க்கு²னோ. ப்³யாஹரந்தஸ்ஸாதி கதே²ந்தஸ்ஸ.

து³தியததியானி.

1920. பிண்டு³க்கே²பகந்தி பிண்ட³ம் உக்கி²பித்வா உக்கி²பித்வா. இதா⁴பி க²ஜ்ஜகப²லாப²லேஸு அனாபத்தி. கப³ளச்சே²த³கம்பி வாதி கப³ளம் சி²ந்தி³த்வா. இத⁴ க²ஜ்ஜகப²லாப²லேஹி ஸத்³தி⁴ம் உத்தரிப⁴ங்கே³பி அனாபத்தி. க³ண்டே³ கத்வாதி ஏத்த² ப²லாப²லமத்தேயேவ அனாபத்தி.

சதுத்த²பஞ்சமச²ட்டா²னி.

1921-2. ஹத்த²ம் நித்³து⁴னித்வானாதி ஹத்த²ம் நித்³து⁴னித்வா ப⁴த்தம் பு⁴ஞ்ஜதோதி ச ஸம்ப³ந்தோ⁴. ஸித்தா²வகாரகந்தி ஸித்தா²னி அவகிரித்வா அவகிரித்வா. ஜிவ்ஹானிச்சா²ரகம் வாபீதி ஜிவ்ஹம் நிச்சா²ரேத்வா நிச்சா²ரேத்வா. சபு சபூதி வாதி ‘‘சபு சபூ’’தி ஏவம் ஸத்³த³ம் கத்வா. ஸத்தமேதி ‘‘ந ஹத்த²னித்³து⁴னக’’ந்தி ஸிக்கா²பதே³. அட்ட²மேதி ‘‘ந ஸித்தா²வகாரக’’ந்தி ஸிக்கா²பதே³. கசவருஜ்ஜ²னேதி கசவராபனயனே.

ஸத்தமட்ட²மனவமத³ஸமானி.

பஞ்சமோ வக்³கோ³.

1923. ‘‘ஸுரு ஸுரூ’’தி ஏவம் ஸத்³த³ம் கத்வா ந போ⁴த்தப்³ப³ந்தி யோஜனா. ஹத்த²னில்லேஹகம் வாபீதி ஹத்த²ம் நில்லேஹித்வா நில்லேஹித்வா.

1924. பா²ணிதம், க⁴னயாகு³ம் வா அங்கு³லீஹி க³ஹேத்வா அங்கு³லியோ முகே² பவேஸேத்வாபி தம் போ⁴த்தும் வட்டதீதி யோஜனா.

1925. ஏகாய அங்கு³லிகாயபி பத்தோ ந லேஹிதப்³போ³வ. ஜிவ்ஹாய ஏகஓட்டோ²பி ந நில்லேஹிதப்³ப³கோதி யோஜனா. ப³ஹி ஓட்ட²ஞ்ச ஜிவ்ஹாய ந லேஹிதப்³ப³ம். ஓட்டே² லக்³க³ம் ஸித்தா²தி³ம் யம் கிஞ்சி உபோ⁴ஹி ஓட்ட²மம்ஸேஹியேவ க³ஹேத்வா அந்தோ காதும் வட்டதி.

பட²மது³தியததியசதுத்தா²னி.

1926-8. ந ச க³ஹேதப்³ப³ம், படிக்கூலவஸேன படிக்கி²த்தந்தி யோஜனா. ஹி-இதி ‘‘யஸ்மா’’தி ஏதஸ்ஸ அத்தே², தேனேவ வக்க²தி ‘‘தஸ்மா’’தி. ‘‘பானீயதா²லக’’ந்தி இத³ம் உபலக்க²ணமத்தம் ஸங்கா²தீ³னம்பி ததா² நக³ஹேதப்³ப³த்தா. ஸராவம் வாதி தட்டகம் வா.

அனாமிஸேன ஹத்தே²னாதி ஆமிஸரஹிதேன ஹத்தே²கதே³ஸேன. யதா²ஹ ‘‘ஸசே பன ஹத்த²ஸ்ஸ

ஏகதே³ஸோ ஆமிஸமக்கி²தோ ந ஹோதி, தேன பதே³ஸேன க³ஹேதும் வட்டதீ’’தி (பாசி. அட்ட². 631). ஆமிஸமக்கி²தேனேவ ஹத்தே²ன ‘‘தோ⁴விஸ்ஸாமீ’’தி வா ‘‘தோ⁴வாபேஸ்ஸாமீ’’தி வா க³ண்ஹந்தஸ்ஸ பன அனாபத்தி.

பஞ்சமம்.

1929. உத்³த⁴ரித்வாதி ஸஸித்த²கா பத்ததோ⁴வனா ஸித்த²கானி உத்³த⁴ரித்வா தம் பத்ததோ⁴வனோத³கம் க⁴ரா ப³ஹி அந்தரக⁴ரே ச²ட்³டே³ந்தஸ்ஸ அனாபத்தி. பி⁴ந்தி³த்வாதி ஸஸித்த²கே பத்ததோ⁴வனே ஸித்த²கானி மத்³தி³த்வா உத³கேன ஸம்பி⁴ந்தி³த்வா உத³கக³திகானேவ கத்வா தம் உத³கம் க⁴ரா ப³ஹி அந்தரக⁴ரே ச²ட்³டே³ந்தஸ்ஸ அனாபத்தி. க³ஹேத்வாதி ஸஸித்த²கம் பத்ததோ⁴வனோத³கம் க³ஹேத்வா படிக்³க³ஹே ச²ட்³டே³ந்தஸ்ஸ அனாபத்தி. ஸஸித்த²கம் பத்ததோ⁴வனோத³கம் க⁴ரா ப³ஹி நீஹரித்வா அந்தரக⁴ரே ச²ட்³டே³ந்தஸ்ஸ அனாபத்தீதி அஜ்ஜா²ஹாரயோஜனா வேதி³தப்³பா³. ஏத்த² படிக்³க³ஹோ நாம கே²ளமல்லாதி³கோ உச்சி²ட்ட²ஹத்த²தோ⁴வனபா⁴ஜனவிஸேஸோ.

ச²ட்ட²ம்.

1930. ச²த்தம் யம் கிஞ்சீதி ‘‘ச²த்தம் நாம தீணி ச²த்தானி ஸேதச்ச²த்தம் கிலஞ்ஜச்ச²த்தம் பண்ணச்ச²த்தம் மண்ட³லப³த்³த⁴ம் ஸலாகப³த்³த⁴’’ந்தி (பாசி. 634) வுத்தேஸு தீஸு ச²த்தேஸு அஞ்ஞதரம். ஏத்த² ச ஸேதச்ச²த்தந்தி வத்த²பலிகு³ண்டி²தம் பண்ட³ரச்ச²த்தம். கிலஞ்ஜச்ச²த்தந்தி விலீவச்ச²த்தம். பண்ணச்ச²த்தந்தி தாலபண்ணாதீ³ஹி யேஹி கேஹிசி கதம். ‘‘மண்ட³லப³த்³த⁴ம் ஸலாகப³த்³த⁴’’ந்தி இத³ம் பன திண்ணம்பி ச²த்தானம் பஞ்ஜரத³ஸ்ஸனத்த²ம் வுத்தம். தானி ஹி மண்ட³லப³த்³தா⁴னி சேவ ஹோந்தி ஸலாகப³த்³தா⁴னி ச. ‘‘யம் கிஞ்சீ’’தி அனவஸேஸபரிக்³க³ஹவசனேன ‘‘யம்பி ச தத்த²ஜாதத³ண்டே³ன கதம் ஏகபண்ணச்ச²த்தம் ஹோதி, தம்பி ச²த்தமேவா’’தி (பாசி. அட்ட². 634) அட்ட²கதா²ய வுத்தம் ச²த்தவிஸேஸம் க³ண்ஹாதி. ஹத்தே²னாதி ஏத்த² ‘‘அமுஞ்சித்வா’’தி ஸேஸோ. ஸரீராவயவேனாதி ஏத்த² ‘‘க³ஹேத்வா’’தி ஸேஸோ. வா-ஸத்³தோ³ அபி-ஸத்³த³த்தோ². அம்ஸகூடாதி³ஸரீராவயவேன க³ஹேத்வாபி ஹத்தே²ன அமுஞ்சித்வா தா⁴ரேந்தஸ்ஸாதி அத்தோ².

ஸசே பனஸ்ஸ அஞ்ஞோ ச²த்தம் தா⁴ரேதி, ச²த்தபாது³காய வா டி²தம் ஹோதி, பஸ்ஸே வா டி²தம் ஹோதி,

ஹத்த²தோ அபக³தமத்தே ச²த்தபாணி நாம ந ஹோதி, தஸ்ஸ த⁴ம்மம் தே³ஸேதும் வட்டதி. ‘‘ந ச²த்தபாணிஸ்ஸ அகி³லானஸ்ஸா’’தி வசனதோ, இத⁴ ‘‘ஸப்³ப³த்த² அகி³லானஸ்ஸா’’தி வக்க²மானத்தா ச ஏத்த² ‘‘அகி³லானஸ்ஸா’’தி லப்³ப⁴தி. த⁴ம்மபரிச்சே²தோ³ சேத்த² பத³ஸோத⁴ம்மே வுத்தனயேனேவ வேதி³தப்³போ³. ஏவமுபரிபி.

ஸத்தமம்.

1931. த³ண்ட³பாணிம்ஹீதி ஏத்த² த³ண்டோ³ பாணிம்ஹி அஸ்ஸாதி விக்³க³ஹோ. கித்தகப்பமாணோ த³ண்டோ³தி ஆஹ ‘‘சதுஹத்த²ப்பமாணோ’’திஆதி³. மஜ்ஜி²மஹத்த²தோதி பமாணமஜ்ஜி²மஸ்ஸ புரிஸஸ்ஸ ஹத்த²தோ, யோ ‘‘வட்³ட⁴கிஹத்தோ²’’தி வுச்சதி.

அட்ட²மம்.

1932. ஸத்த²பாணிஸ்ஸாதி ஏத்தா²பி விக்³க³ஹோ வுத்தனயோவ. வக்க²மானம் ஸகலம் த⁴னுவிகதிம், ஸரவிகதிஞ்ச ட²பேத்வா அவஸேஸம் க²க்³கா³தி³ ஸத்த²ம் நாம. க²க்³க³ம் ஸன்னஹித்வா டி²தோபி ஸத்த²பாணி நு கோ²தி ஆஸங்காய நிவத்தனத்த²மாஹ ‘‘ஸத்த²பாணீ’’திஆதி³. ‘‘ந ஹோதி அஸி’’ந்தி பத³ச்சே²தோ³.

நவமம்.

1933-5. ஸரேன ஸத்³தி⁴ம் த⁴னும் வா ஸுத்³த⁴த⁴னும் வா ஸுத்³த⁴ஸரம் வா ஸஜியம் த⁴னுத³ண்ட³ம் வா நிஜியம் த⁴னுத³ண்ட³ம் வா க³ஹேத்வா டி²தஸ்ஸாபி வா நிஸின்னஸ்ஸாபி வா நிபன்னஸ்ஸாபி வா ஸசே யோ ததா² பத³ஸோத⁴ம்மே வுத்தலக்க²ணம் ஸத்³த⁴ம்மம் தே³ஸேதி, தஸ்ஸ ஆபத்தி து³க்கடம் ஹோதீதி யோஜனா. ஸசே பனஸ்ஸ த⁴னு க²ந்தே⁴ படிமுக்கம் ஹோதி, யாவ ந க³ண்ஹாதி, தாவ வட்டதி. ஜியாய ஸஹ வத்ததீதி ஸஜியம்.

த³ஸமம்.

ச²ட்டோ² வக்³கோ³.

1936. பாது³காருள்ஹகஸ்ஸாதி பாது³கம் ஆருள்ஹோ பாது³காருள்ஹோ, ஸோயேவ பாது³காருள்ஹகோ, தஸ்ஸ. கத²ம் ஆருள்ஹஸ்ஸாதி ஆஹ ‘‘அக்கமித்வா’’திஆதி³. அக்கமித்வா டி²தஸ்ஸாதி ச²த்தத³ண்ட³கே அங்கு³லந்தரம் அப்பவேஸேத்வா கேவலம் பாது³கம் அக்கமித்வா டி²தஸ்ஸ. படிமுக்கஸ்ஸ வாதி படிமுஞ்சித்வா டி²தஸ்ஸ. ஏதம் த்³வயம்பி ‘‘பாது³காருள்ஹகஸ்ஸா’’தி ஏதஸ்ஸ அத்த²பத³ம். யதா²ஹ ‘‘ந பாது³காருள்ஹஸ்ஸ அகி³லானஸ்ஸ த⁴ம்மோ தே³ஸேதப்³போ³. யோ அனாத³ரியம் படிச்ச அக்கந்தஸ்ஸ வா படிமுக்கஸ்ஸ வா ஓமுக்கஸ்ஸ வா அகி³லானஸ்ஸ த⁴ம்மம் தே³ஸேதி, ஆபத்தி து³க்கடஸ்ஸா’’தி (பாசி. 638).

பட²மம்.

1937-40. உபாஹனக³தஸ்ஸாபீதி அக்கந்தாதி³ஆகாரேன உபாஹனாருள்ஹஸ்ஸ ச. யதா²ஹ ‘‘அக்கந்தஸ்ஸ வா படிமுக்கஸ்ஸ வா’’தி. ஸப்³ப³த்தா²தி ச²த்தபாணிஆதீ³ஸு ஸப்³ப³ஸிக்கா²பதே³ஸு. அகி³லானஸ்ஸாதி இத³ம் யோஜேதப்³ப³ந்தி ஸேஸோ. யானே வா க³தஸ்ஸ அகி³லானஸ்ஸ த⁴ம்மம் தே³ஸேதி, து³க்கடந்தி யோஜனா. தத்த² யானே வா க³தஸ்ஸாதி ஸசே த்³வீஹி ஜனேஹி ஹத்த²ஸங்கா⁴தேன க³ஹிதோ, ஸாடகே வா ட²பேத்வா வம்ஸேன வய்ஹதி, அயுத்தே வா வய்ஹாதி³கே யானே, விஸங்க²ரித்வா வா ட²பிதே சக்கமத்தேபி நிஸின்னோ ஹோதி, யானக³தோத்வேவ ஸங்க்²யம் க³ச்ச²தி.

ஸயனேபி வா அந்தமஸோ கடஸாரகே வா ச²மாய வா நிபன்னஸ்ஸாபி அகி³லானஸ்ஸாதி யோஜனா. யதா²ஹ ‘‘ஸயனக³தஸ்ஸாதி அந்தமஸோ கடஸாரகேபி பகதிபூ⁴மியம்பி நிபன்னஸ்ஸா’’தி (பாசி. அட்ட². 641). உச்சே பீடே² வா உச்சே மஞ்சேபி வா நிஸின்னேன, டி²தேன வா நிபன்னஸ்ஸ தே³ஸேதும் ந வட்டதீதி யோஜனா. ‘‘ட²த்வா’’தி இமினா ‘‘நிஸீதி³த்வா’’தி இத³ஞ்ச ஸங்க³ஹிதமேவ. ஸயனேஸு க³தஸ்ஸ ச தே³ஸேந்தேன ஸயனேஸு க³தேனாபி ஸமானே வாபி உச்சே வா நிபன்னேனேவ வட்டதீதி யோஜனா.

1941. ‘‘ததே²வ சா’’தி இமினா ‘‘வட்டதீ’’தி இத³ம் க³ஹிதம்.

து³தியததியசதுத்தா²னி.

1942. ‘‘பல்லத்தி²காய நிஸின்னஸ்ஸா’’தி வத்தப்³பே³ கா³தா²ப³ந்த⁴வஸேன யகாரஸ்ஸ லோபம் கத்வா ‘‘பல்லத்தி²கா நிஸின்னஸ்ஸா’’தி வுத்தம், ஆயோக³பல்லத்தி²காய வா ஹத்த²பல்லத்தி²காய வா து³ஸ்ஸபல்லத்தி²காய வா யாய காயசி பல்லத்தி²காய நிஸின்னஸ்ஸாதி அத்தோ². வேடி²தஸீஸஸ்ஸாதி து³ஸ்ஸவேட²னேன வா மோலிஆதீ³ஹி வா யதா² கேஸந்தோ ந தி³ஸ்ஸதி, ஏவம் வேடி²தஸீஸஸ்ஸ.