நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

வினயபிடகே

பாசித்யாதி³யோஜனா

பாசித்தியயோஜனா

மஹாகாருணிகம் நாத²ம், அபி⁴னத்வா ஸமாஸதோ;

பாசித்யாதி³வண்ணனாய, கரிஸ்ஸாமத்த²யோஜனம்.

5. பாசித்தியகண்ட³ம்

1. முஸாவாத³ஸிக்கா²பத³-அத்த²யோஜனா

கு²த்³த³கானந்தி ஸுகு²மாபத்திபகாஸகத்தா அப்பகானம், க³ணனதோ வா பசுரத்தா ப³ஹுகானம். யேஸம் ஸிக்கா²பதா³னந்தி ஸம்ப³ந்தோ⁴. ‘‘யேஸ’’ந்தி பத³ம் ‘‘ஸங்க³ஹோ’’தி பதே³ ஸாம்யத்த²ச²ட்டீ². ஸங்க³ஹீயதே ஸங்க³ஹோ. ‘‘நவஹி வக்³கே³ஹீ’’திபத³ம் ‘‘ஸங்க³ஹோ, ஸுப்பதிட்டி²தோ’’தி பத³த்³வயே கரணம். தா³னீதி காலவாசகோ ஸத்தம்யந்தனிபாதோ இதா³னி-பரியாயோ, இமஸ்மிம் காலேதி அத்தோ². தேஸந்தி கு²த்³த³கானம், அயம் வண்ணனாதி ஸம்ப³ந்தோ⁴. ப⁴வதீதி ஏத்த² தி-ஸத்³தோ³ ஏகம்ஸத்தே² அனாக³தகாலிகோ ஹோதி ‘‘நிரயம் நூன க³ச்சா²மி, ஏத்த² மே நத்தி² ஸம்ஸயோ’’திஆதீ³ஸு (ஜா. 2.22.331) விய. கிஞ்சாபேத்த² ஹி யதா² ஏகம்ஸவாசகோ நூனஸத்³தோ³ அத்தி², ந ஏவம் ‘‘ப⁴வதீ’’தி பதே³, அத்த²தோ பன அயம் வண்ணனா நூன ப⁴விஸ்ஸதீதி அத்தோ² க³ஹேதப்³போ³. அத² வா அவஸ்ஸம்பா⁴வியத்தே² அனாக³தகாலவாசகோ ஹோதி ‘‘து⁴வம் பு³த்³தோ⁴ ப⁴வாமஹ’’ந்திஆதீ³ஸு (பு³. வம். 2.109-114) விய. காமஞ்ஹேத்த² யதா² அவஸ்ஸம்பா⁴வியத்த²வாசகோ து⁴வஸத்³தோ³ அத்தி², ந ஏவம் ‘‘ப⁴வதீ’’தி பதே³, அத்த²தோ பன து⁴வம் ப⁴விஸ்ஸதி அயம் வண்ணனாதி அத்தோ² க³ஹேதப்³போ³தி த³ட்ட²ப்³ப³ம்.

1. ‘‘தத்தா²’’தி பத³ம் ‘‘முஸாவாத³வக்³க³ஸ்ஸா’’தி பதே³ நித்³தா⁴ரணஸமுதா³யோ, தேஸு நவஸு வக்³கே³ஸூதி அத்தோ². பட²மஸிக்கா²பதே³தி வா, தேஸு கு²த்³த³கேஸு ஸிக்கா²பதே³ஸூதி அத்தோ². ஸக்யானம் புத்தோதி ப⁴கி³னீஹி ஸம்வாஸகரணதோ லோகமரியாத³ம் சி²ந்தி³தும், ஜாதிஸம்பே⁴த³தோ வா ரக்கி²தும் ஸக்குணந்தீதி ஸக்யா. ஸாகவனஸண்டே³ நக³ரம் மாபேந்தீதி வா ஸக்யா, புப்³ப³ராஜானோ. தேஸம் வம்ஸே பூ⁴தத்தா ஏதரஹிபி ராஜானோ ஸக்யா நாம, தேஸம் புத்தோதி அத்தோ². ‘‘பு³த்³த⁴காலே’’தி பத³ம் ‘‘பப்³ப³ஜிம்ஸூ’’தி பதே³ ஆதா⁴ரோ. ஸக்யகுலதோ நிக்க²மித்வாதி ஸம்ப³ந்தோ⁴. ‘‘வாத³க்கி²த்தோ’’த்யாதி³னா வாதே³ன கி²த்தோ, வாத³ம்ஹி வாதி அத்த²ம் த³ஸ்ஸேதி. யத்ர யத்ராதி யஸ்ஸம் யஸ்ஸம் தி³ட்டி²யம் பவத்ததீதி ஸம்ப³ந்தோ⁴. அவஜானித்வாதி படிஸ்ஸவேன வியோக³ம் கத்வா. அவஸத்³தோ³ ஹி வியோக³த்த²வாசகோ. ‘‘அபஜானித்வா’’திபி பாடோ², படிஞ்ஞாதம் அபனீதம் கத்வாதி அத்தோ². தோ³ஸந்தி அயுத்திதோ³ஸம், ஸல்லக்கே²ந்தோ ஹுத்வாதி ஸம்ப³ந்தோ⁴. கதே²ந்தோ கதே²ந்தோதி அந்தஸத்³தோ³ மானஸத்³த³காரியோ. கதி²யமானோ கதி²யமானோதி ஹி அத்தோ². படிஜானித்வாதி படிஞ்ஞாதம் கத்வா. ஆனிஸம்ஸந்தி நித்³தோ³ஸம் கு³ணம். படிபுப்³போ³ சரஸத்³தோ³ படிச்சா²த³னத்தோ²தி ஆஹ ‘‘படிசரதி படிச்சா²தே³தீ’’தி. ‘‘கிம் பன ரூபம் நிச்சம் வா அனிச்சம் வா’’தி வுத்தே ‘‘அனிச்ச’’ந்தி வத³தி. கஸ்மாதி வுத்தே ‘‘ஜானிதப்³ப³தோ’’தி வத³தி. யதி³ ஏவம் நிப்³பா³னம்பி ஜானிதப்³ப³த்தா அனிச்சம் நாம ஸியாதி வுத்தே அத்தனோ ஹேதும்ஹி தோ³ஸம் தி³ஸ்வா அஹம் ‘‘ஜானிதப்³ப³தோ’’தி ஹேதும் ந வதா³மி, ‘‘ஜாதித⁴ம்மதோ’’தி பன வதா³மி. தயா பன து³ஸ்ஸுதத்தா ஏவம் வுத்தந்தி வத்வா அஞ்ஞேனஞ்ஞம் படிசரதி. ‘‘குருந்தி³ய’’ந்தி பத³ம் ‘‘வுத்த’’ந்தி பதே³ ஆதா⁴ரோ. ஏதஸ்ஸாதி ‘‘ரூபம் அனிச்சம் ஜானிதப்³ப³தோ’’தி வசனஸ்ஸ. தத்ராதி குருந்தி³யம். தஸ்ஸாதி படிஜானனாவஜானனஸ்ஸ. ‘‘படிச்சா²த³னத்த²’’ந்தி பத³ம் ‘‘பா⁴ஸதீ’’திபதே³ ஸம்பதா³னம். ‘‘மஹாஅட்ட²கதா²ய’’ந்திபத³ம் ‘‘வுத்த’’ந்தி பதே³ ஆதா⁴ரோ. ‘‘தி³வாட்டா²னாதீ³ஸூ’’தி பத³ம் உபனேதப்³ப³ம். இத³ம் ‘‘அஸுகஸ்மிம் நாமபதே³ஸே’’தி பதே³ நித்³தா⁴ரணஸமுதா³யோ.

3. ஸம்மா வத³தி அனேனாதி ஸம்வாத³னம், உஜுஜாதிகசித்தம், ந ஸம்வாத³னம் விஸம்வாத³னம், வஞ்சனாதி⁴ப்பாயவஸப்பவத்தம் சித்தந்தி த³ஸ்ஸேந்தோ ஆஹ ‘‘விஸம்வாத³னசித்த’’ந்தி. ‘‘வாசா’’த்யாதி³னா வசதி ஏதாயாதி வாசாதி அத்த²ம் த³ஸ்ஸேதி. ஹீதி த³ள்ஹீகரணஜோதகம், தத³மினா ஸச்சந்தி அத்தோ². ‘‘வாசாயேவா’’தி பத³ம் ‘‘ப்³யப்பதோ²’’தி பதே³ துல்யத்த²ம், ‘‘வுச்சதீ’’தி பதே³ கம்மம். பத²ஸத்³த³பரத்தா வாசாஸத்³த³ஸ்ஸ ப்³யாதே³ஸோ கதோ. ஸுத்³த⁴சேதனா கதி²தாதி ஸம்ப³ந்தோ⁴. தம்ஸமுட்டி²தஸத்³த³ஸஹிதாதி தாய சேதனாய ஸமுட்டி²தேன ஸத்³தே³ன ஸஹ பவத்தா சேதனா கதி²தாதி யோஜனா.

‘‘ஏவ’’ந்தி பத³ம் ‘‘த³ஸ்ஸேத்வா’’தி பதே³ நித³ஸ்ஸனம், கரணம் வா. ‘‘த³ஸ்ஸேத்வா’’தி பத³ம் ‘‘த³ஸ்ஸேந்தோ ஆஹா’’தி பத³த்³வயே புப்³ப³காலகிரியா. அந்தேதி ‘‘வாசா’’திஆதீ³னம் பஞ்சன்னம் பதா³னம் அவஸானே. ‘‘ஆஹா’’தி ஏத்த² வத்தமான-திவசனஸ்ஸ அகாரோ பச்சுப்பன்னகாலவாசகேன ‘‘இதா³னீ’’தி பதே³ன யோஜிதத்தா. ‘‘தத்தா²’’தி பத³ம் ‘‘அத்தோ² வேதி³தப்³போ³’’தி பதே³ ஆதா⁴ரோ. ஏத்தா²தி ‘‘அதி³ட்ட²ம் தி³ட்ட²ம் மே’’திஆதீ³ஸு. ‘‘பாளிய’’ந்தி பத³ம் ‘‘தே³ஸனா கதா’’தி பதே³ ஆதா⁴ரோ. நிஸ்ஸிதவிஞ்ஞாணவஸேன அவத்வா நிஸ்ஸயபஸாத³வஸேன ‘‘சக்கு²னா தி³ட்ட²’’ந்தி வுத்தந்தி ஆஹ ‘‘ஓளாரிகேனேவா’’தி.

4. தஸ்ஸாதி ‘‘தீஹாகாரேஹீ’’திஆதி³வசனஸ்ஸ. ‘‘அத்தோ²’’தி பத³ம் ‘‘வேதி³தப்³போ³’’தி பதே³ கம்மம். ஹீதி விஸேஸஜோதகம், விஸேஸம் கத²யிஸ்ஸாமீதி அத்தோ². தத்தா²தி சதுத்த²பாராஜிகே. இதா⁴தி இமஸ்மிம் ஸிக்கா²பதே³.

9. ஆதீ³னம்பீதி பிஸத்³தோ³ ஸம்பிண்ட³னத்தோ².

11. மந்த³ஸத்³தோ³ ஜளத்த²வாசகோதி ஆஹ ‘‘மந்த³த்தா ஜளத்தா’’தி. யோ பன அஞ்ஞம் ப⁴ணதீதி ஸம்ப³ந்தோ⁴. ‘‘ஸாமணேரேனா’’தி பத³ம் ‘‘வுத்தோ’’தி பதே³ கத்தா. அபிஸத்³தோ³ புச்சா²வாசகோ, ‘‘பஸ்ஸித்தா²’’தி பதே³ன யோஜேதப்³போ³, அபி பஸ்ஸித்தா²தி அத்தோ². ‘‘அதி³ட்ட²ம் தி³ட்ட²ம் மே’’திஆதி³வசனதோ அஞ்ஞா பூரணகதா²பி தாவ அத்தீ²தி த³ஸ்ஸேந்தோ ஆஹ ‘‘அஞ்ஞா பூரணகதா² நாம ஹோதீ’’தி. அப்பதாய ஊனஸ்ஸ அத்த²ஸ்ஸ பூரணவஸேன பவத்தா கதா² பூரணகதா². ஏஸா பூரணகதா² நாம காதி ஆஹ ‘‘ஏகோ’’திஆதி³. ஏஸா ஹி கா³மே அப்பகம்பி தேலம் வா பூவக²ண்ட³ம் வா பஸ்ஸித்வா வா லபி⁴த்வா வா ப³ஹுகம் கத்வா பூரணவஸேன கதி²தத்தா பூரணகதா² நாம. ப³ஹுகானி தேலானி வா பூவே வா பஸ்ஸந்தோபி லப⁴ந்தோபி அப்பகம் கத்வா ஊனவஸேன கதி²தத்தா ஊனகதா²பி அத்தீ²தி ஸக்கா வத்தும். அட்ட²கதா²ஸு பன அவுத்தத்தா வீமம்ஸித்வா க³ஹேதப்³ப³ம். ப³ஹுகாய பூரணஸ்ஸ அத்த²ஸ்ஸ ஊனவஸேன பவத்தா கதா² ஊனகதா²தி விக்³க³ஹோ காதப்³போ³தி. பட²மம்.

2. ஓமஸவாத³ ஸிக்கா²பத³ம்

12. து³தியே மஸதா⁴து விஜ்ஜ²னத்தே² பவத்ததி ‘‘ஓமட்ட²ம் உம்மட்ட²’’ந்திஆதீ³ஸு (ஸம். நி. அட்ட². 1.1.21) வியாதி த³ஸ்ஸேந்தோ ஆஹ ‘‘ஓமஸந்தீதி ஓவிஜ்ஜ²ந்தீ’’தி.

13. ‘‘இத³ம் வத்து²’’ந்தி பத³ம் ‘‘ஆஹரீ’’தி பதே³ கம்மம். நந்தி³தப்³போ³தி நந்தோ³ வண்ணப³லாதி³, ஸோ ஏதஸ்ஸத்தீ²தி நந்தீ³. விஸாலானி மஹந்தானி விஸாணானி ஏதஸ்ஸத்தீ²தி விஸாலோ, நந்தீ³ ச ஸோ விஸாலோ சேதி நந்தி³விஸாலோதி வசனத்த²ம் த³ஸ்ஸேதி ‘‘நந்தி³விஸாலோ நாமா’’திஆதி³னா. ஸோதி நந்தி³விஸாலோ, ‘‘ஆஹா’’தி பதே³ கத்தா. தத்தே²வாதி யுஞ்ஜிதட்டா²னேயேவ. அஹேதுகபடிஸந்தி⁴காலேபீதி பி-ஸத்³தோ³ அனுக்³க³ஹத்த²வாசகோ, பகே³வ த்³விஹேதுக திஹேதுக படிஸந்தி⁴காலேதி அத்தோ². ‘‘தேன சா’’தி சகாரஸ்ஸ அவுத்தஸம்பிண்ட³னத்த²த்தா ‘‘அத்தனோ கம்மேன சா’’தி அத்த²ம் ஸம்பிண்டே³தீதி ஆஹ ‘‘அத்தனோ கம்மேன சா’’தி. அத்தனோதி நந்தி³விஸாலஸ்ஸ.

15. ஏத்தா²தி ஏதிஸ்ஸம் பத³பா⁴ஜனியம், ‘‘ஆஹா’’தி பதே³ ஆதா⁴ரோ. ‘‘யஸ்மா’’தி பத³ம் விப⁴ஜிதுகாமோ’’தி பதே³ ஹேது. அட்டு²ப்பத்தியம்யேவ ‘‘ஹீனேனாபீ’’தி வத்வா பத³பா⁴ஜனியம் அவுத்தத்தா இத³ம் வுத்தந்தி த³ட்ட²ப்³ப³ம். வேணுகாரஜாதீதி விலீவகாரஜாதி. நேஸாத³ஜாதீதி ஏத்த² கேவட்டஜாதிபி ஸங்க³ஹிதா.

பு வுச்சதி கரீஸம், தம் குஸதி அபனேதீதி புக்குஸோ. புப்ப²ம் வுச்சதி கரீஸம், குஸுமம் வா, தம் ச²ட்³டே³தீதி புப்ப²ச²ட்³ட³கோ.

குடதி சி²ந்த³தீதி கோட்டோ², ஸோயேவ கோட்ட²கோ. யகாரப⁴காரே ஏகதோ யோஜேத்வா ‘‘யபா⁴’’தி யோ அக்கோஸோ அத்தி², ஏஸோ ஹீனோ நாம அக்கோஸோதி யோஜனா.

16. ஸப்³ப³பதே³ஸூதி நாமாதீ³ஸு ஸப்³ப³பதே³ஸு. ஏத்தா²தி இமஸ்மிம் ஸிக்கா²பதே³. அலிகந்தி அஸச்சம், மிச்சா²வாசந்தி ஸம்ப³ந்தோ⁴. யோபி வத³தீதி யோஜனா.

26. பரிஹரித்வாதி பரிமுக²ம் கத²னம் அபனேத்வா. த³வம் பரிஹாஸம் காமேதீதி த³வகாமோ, தஸ்ஸ பா⁴வோ த³வகம்யம், தம்யேவ த³வகம்யதா. அனுபஸம்பன்னந்தி ஏத்த² அகாரஸ்ஸ ஸதி³ஸத்த²மக்³க³ஹேத்வா அஞ்ஞத்தோ²வ க³ஹேதப்³போ³தி ஆஹ ‘‘ட²பேத்வா பி⁴க்கு²’’ந்திஆதி³. யதி³ ஹி ஸதி³ஸத்தோ² ப⁴வேய்ய, ஸாமணேரோவ அனுபஸம்பன்னோ நாம ஸியா ஸண்டா²னேன ச புரிஸபா⁴வேன ச ஸதி³ஸத்தா, தஸ்மா அஞ்ஞத்தோ²வ க³ஹேதப்³போ³தி த³ட்ட²ப்³ப³ம். ஸப்³ப³ஸத்தாதி ஏத்த² ஸப்³ப³ஸத்³தோ³ அனவஸேஸத்தோ² மனுஸ்ஸே உபாதா³ய வசனத்த²ஜானனாஜானனபகதிகானம் ஸப்³ப³ஸத்தானம்பி க³ஹிதத்தா.

35. அத்த²புரேக்கா²ரோ நாமாதி வேதி³தப்³போ³தி ஸம்ப³ந்தோ⁴. ஸிக்கா²பத³மபேக்கி²ய நபும்ஸகலிங்க³வஸேன ‘‘கிரிய’’ந்திஆதி³ வுத்தம். ஆபத்திமபேக்கி²ய இத்தி²லிங்க³வஸேன ‘‘கிரியா’’திஆதி³ வுத்தம். வஜ்ஜகம்மஸத்³தா³ ஸிக்கா²பத³மபேக்க²ந்தாபி ஆபத்தி, மபேக்க²ந்தாபி நியதனபும்ஸகலிங்க³த்தா நபும்ஸகாயேவ, தஸ்மா தே த்³வே ஆபத்திட்டா²னே ந வுத்தாதி த³ட்ட²ப்³ப³ந்தி. து³தியம்.

3. பேஸுஞ்ஞஸிக்கா²பத³ம்

36. ததியே ‘‘ஜாதப⁴ண்ட³னான’’ந்தி வத்தப்³பே³ அக்³யாஹிதோதிஆதீ³ஸு விய விஸேஸனபரனிபாதவஸேன ‘‘ப⁴ண்ட³னஜாதான’’ந்தி வுத்தந்தி ஆஹ ‘‘ஸஞ்ஜாதப⁴ண்ட³னான’’ந்தி. ‘‘புப்³ப³பா⁴கோ³’’தி வத்வா தஸ்ஸ ஸரூபம் த³ஸ்ஸேதி ‘‘இமினா ச இமினா சா’’திஆதி³னா. விருத்³த⁴ம் வத³தி ஏதேனாதி விவாதோ³, விக்³கா³ஹிககதா², தம் ஆபன்னாதி விவாதா³பன்னா, தேஸம். பிஸதி ஸஞ்சுண்ணேதீதி பிஸுணோ, புக்³க³லோ, தஸ்ஸ இத³ந்தி பேஸுஞ்ஞம், வசனந்தி அத்த²ம் த³ஸ்ஸேந்தோ ஆஹ ‘‘பேஸுஞ்ஞந்தி பிஸுணவாச’’ந்தி.

37. பி⁴க்கு²பேஸுஞ்ஞேதி பி⁴க்கூ²னம் ஸந்திகம் உபஸம்ஹடே பேஸுஞ்ஞவசனேதி ச²ட்டீ²ஸமாஸோ.

38. ‘‘தி³ஸ்வா’’தி பத³ம் ‘‘ப⁴ணந்தஸ்ஸா’’தி பதே³ புப்³ப³காலகிரியா, த³ஸ்ஸனம் ஹுத்வாதி அத்தோ². ததியம்.

4. பத³ஸோத⁴ம்மஸிக்கா²பத³ம்

44. சதுத்தே² படிமுக²ம் ஆத³ரேன ஸுணந்தீதி பதிஸ்ஸா, ந பதிஸ்ஸா அப்பதிஸ்ஸாதி த³ஸ்ஸேந்தோ ஆஹ ‘‘அப்பதிஸ்ஸவா’’தி.

45. ‘‘பத³ஸோ’’தி ஏத்த² ஸோ-பச்சயோ விச்ச²த்த²வாசகோதி ஆஹ ‘‘பத³ம் பத³’’ந்தி. தத்தா²தி தேஸு சதுப்³பி³தே⁴ஸு. பத³ம் நாம இத⁴ அத்த²ஜோதகம் வா விப⁴த்யந்தம் வா ந ஹோதி, அத² கோ² லோகியேஹி லக்கி²தோ கா³தா²ய சதுத்த²ம்ஸோ பாதோ³வ அதி⁴ப்பேதோதி ஆஹ ‘‘பத³ந்தி ஏகோ கா³தா²பாதோ³’’தி. அனு பச்சா² வுத்தபத³த்தா து³தியபாதோ³ அனுபத³ம் நாம. அனு ஸதி³ஸம் ப்³யஞ்ஜனம் அனுப்³யஞ்ஜனந்தி அத்த²ம் த³ஸ்ஸேதி ‘‘அனுப்³யஞ்ஜன’’ந்திஆதி³னா. ப்³யஞ்ஜனஸத்³தோ³ பத³-பரியாயோ. யம்கிஞ்சி பத³ம் அனுப்³யஞ்ஜனம் நாம ந ஹோதி, புரிமபதே³ன பன ஸதி³ஸம் பச்சி²மபத³மேவ அனுப்³யஞ்ஜனம் நாம.

வாசேந்தோ ஹுத்வா நிட்டா²பேதீதி யோஜனா. ‘‘ஏகமேகம் பத³’’ந்தி பத³ம் ‘‘நிட்டா²பேதீ’’தி பதே³ காரிதகம்மம். ‘‘தே²ரேனா’’தி பத³ம் ‘‘வுத்தே’’தி பதே³ கத்தா, ‘‘ஏகதோ’’தி பதே³ ஸஹத்தோ². ஸாமணேரோ அபாபுணித்வா ப⁴ணதீதி ஸம்ப³ந்தோ⁴. மத்தமேவாதி ஏத்த² ஏவஸத்³தோ³ மத்தஸத்³த³ஸ்ஸ அவதா⁴ரணத்த²ம் த³ஸ்ஸேதி, தேன பகாரம் படிக்கி²பதி. ‘‘அனிச்ச’’ந்தி ச ‘‘அனிச்சா’’தி ச த்³வின்னம் பதா³னம் ஸதிபி லிங்க³விஸேஸத்தே அனுப்³யஞ்ஜனத்தா ஆபத்திமோக்கோ² நத்தீ²தி ஆஹ ‘‘அனுப்³யஞ்ஜனக³ணனாய பாசித்தியா’’தி.

ப்³ரஹ்மஜாலாதீ³னீதி ஏத்த² ஆதி³ஸத்³தே³ன ஸாமஞ்ஞப²லஸுத்தாதீ³னி தீ³க⁴ஸுத்தானி (தீ³. நி. 1.150 ஆத³யோ) ஸங்க³ஹிதானி. சஸத்³தே³ன ஓக⁴தரணஸுத்தாதீ³னி ஸம்யுத்தஸுத்தானி (ஸம். நி. 1.1) ச சித்தபரியாதா³னஸுத்தாதீ³னி அங்கு³த்தரஸுத்தானி (அ. நி. 1.2 ஆத³யோ) ச ஸங்க³ஹிதானி. ஸோதி தே³வதாபா⁴ஸிதோ வேதி³தப்³போ³தி யோஜனா.

கிஞ்சாபி வத³தீதி ஸம்ப³ந்தோ⁴. ஏத்த² ச கிஞ்சாபிஸத்³தோ³ க³ரஹத்த²வாசகோ, பனஸத்³தோ³ அனுக்³க³ஹத்த²வாசகோ. மேண்ட³கமிலிந்த³பஞ்ஹேஸூதி மேண்ட³கபஞ்ஹே ச மிலிந்த³பஞ்ஹே ச. யந்தி ஸுத்தம் வுத்தந்தி ஸம்ப³ந்தோ⁴. ஆரம்மணகதா² பு³த்³தி⁴ககதா² த³ண்ட³ககதா² ஞாணவத்து²கதா²தி யோஜேதப்³ப³ம் பேய்யாலவஸேன வுத்தத்தா. இமாயோ பகரணானி நாமாதி வத³ந்தி. மஹாபச்சரியாதீ³ஸு வத்வா பரிக்³க³ஹிதோதி யோஜனா. யந்தி ஸுத்தம்.

48. தத்ராதி ‘‘ஏகதோ உத்³தி³ஸாபேந்தோ’’தி வசனே. உத்³தி³ஸாபேந்தீதி ஆசரியம் தே³ஸாபேந்தி ப³ஹுகத்தாரமபேக்கி²ய ப³ஹுவசனவஸேன வுத்தம். தேஹீதி உபஸம்பன்னானுபஸம்பன்னேஹி. த்³வேபீதி உபஸம்பன்னோ ச அனுபஸம்பன்னோ ச.

உபசாரந்தி த்³வாத³ஸஹத்தூ²பசாரம். யேஸந்தி பி⁴க்கூ²னம். பலாயனகக³ந்த²ந்தி பரிவஜ்ஜேத்வா க³ச்ச²ந்தம் பகரணம். ஸாமணேரோ க³ண்ஹாதீதி யோஜனா.

ஓபாதேதீதி அவபாதேதி, க³ளிதாபேதீதி அத்தோ². ஸுத்தேபீதி வேய்யாகரணஸுத்தேபி. தந்தி யேபு⁴ய்யேன பகு³ணக³ந்த²ம். பரிஸங்கமானந்தி ஸாரஜ்ஜமானம். யம் பன வசனம் வுத்தந்தி ஸம்ப³ந்தோ⁴. கிரியஸமுட்டா²னத்தாதி இமஸ்ஸ ஸிக்கா²பத³ஸ்ஸ கிரியஸமுட்டா²னத்தாதி. சதுத்த²ம்.

5. ஸஹஸேய்யஸிக்கா²பத³ம்

49. பஞ்சமே முட்டா² ஸதி ஏதேஸந்தி முட்ட²ஸ்ஸதீ. நத்தி² ஸம்பஜானம் ஏதேஸந்தி அஸம்பஜானா. ப⁴வங்கோ³திண்ணகாலேதி நித்³தோ³க்கமனகாலே.

50. ‘‘பகதியா’’தி பத³ம் ‘‘தே³ந்தீ’’தி பதே³ விஸேஸனம். தே பி⁴க்கூ² தே³ந்தீதி ஸம்ப³ந்தோ⁴. ‘‘கா³ரவேனா’’தி பத³ஞ்ச ‘‘ஸிக்கா²காமதாயா’’தி பத³ஞ்ச ‘‘தே³ந்தீ’’தி பதே³ ஹேது. ஸீஸஸ்ஸ உபதா⁴னம் உஸ்ஸீஸம், தஸ்ஸ கரீயதே உஸ்ஸீஸகரணம், தம்யேவ அத்தோ² பயோஜனம் உஸ்ஸீஸகரணத்தோ², தத³த்தா²ய. தத்ராதி புரிமவசனாபேக்க²ம், ‘‘ஸிக்கா²காமதாயா’’தி வசனேதி அத்தோ². நித³ஸ்ஸனந்தி ஸேஸோ. அத² வா ஸிக்கா²காமதாயாதி பச்சத்தே பு⁴ம்மவசனம். ‘‘இத³ம்பிஸ்ஸ ஹோதி ஸீலஸ்மி’’ந்திஆதீ³ஸு (தீ³. நி. 1.195 ஆத³யோ) விய. இத³ம்பி ஸிக்கா²காமதாய அயம் ஸிக்கா²காமதா ஸிக்கா²காமபா⁴வோ ஹோதீதி யோஜனா. ஏஸ நயோ ‘‘தத்ரித³ம் ஸமந்தபாஸாதி³காய ஸமந்தபாஸாதி³கத்தஸ்மி’’ந்திஆதீ³ஸுபி. பி⁴க்கூ² கி²பந்தீதி யோஜனா. தந்தி ஆயஸ்மந்தம் ராஹுலம். அதா²தி கி²பனதோ பச்சா². இத³ந்தி வத்து². ஸம்முஞ்சனிகசவரச²ட்³ட³னகானி ஸந்தா⁴ய வுத்தம். தேனாயஸ்மதா ராஹுலேன பாதிதம் நு கோ²தி யோஜனா. ஸோ பனாயஸ்மா க³ச்ச²தீதி ஸம்ப³ந்தோ⁴. அபரிபோ⁴கா³ அஞ்ஞேஸந்தி அஞ்ஞேஹி ந பரிபு⁴ஞ்ஜிதப்³பா³.

51. ஹீதி ஸச்சம், யஸ்மா வா. ஸயனம் ஸேய்யா, காயபஸாரணகிரியா, ஸயந்தி ஏத்தா²தி ஸேய்யா, மஞ்சபீடா²தி³. தது³ப⁴யம்பி ஏகஸேஸேன வா ஸாமஞ்ஞனித்³தே³ஸேன வா ஏகதோ கத்வா ‘‘ஸஹஸேய்ய’’ந்தி வுத்தந்தி த³ஸ்ஸேந்தோ ஆஹ ‘‘ஸேய்யா’’திஆதி³. தத்தா²தி த்³வீஸு ஸேய்யாஸு. தஸ்மாதி யஸ்மா த்³வே ஸேய்யா த³ஸ்ஸிதா, தஸ்மா. ‘‘ஸப்³ப³ச்ச²ன்னா’’திஆதி³னா லக்க²ணம் வுத்தந்தி யோஜனா. பாகடவோஹாரந்தி லோகே விதி³தம் வசனம். து³ஸ்ஸகுடியந்தி து³ஸ்ஸேன சா²தி³தகுடியம். அட்ட²கதா²ஸு யதா²வுத்தே பஞ்சவித⁴ச்ச²த³னேயேவ க³ய்ஹமானே கோ தோ³ஸோதி ஆஹ ‘‘பஞ்சவித⁴ச்ச²த³னேயேவா’’திஆதி³. யம் பன ஸேனாஸனம் பரிக்கி²த்தந்தி ஸம்ப³ந்தோ⁴. பாகாரேன வாதி இட்ட²கஸிலாதா³ருனா வா. அஞ்ஞேன வாதி கிலஞ்ஜாதி³னா வா. வத்தே²னபீதி பிஸத்³தோ³ பகே³வ இட்ட²காதி³னாதி த³ஸ்ஸேதி. யஸ்ஸாதி ஸேனாஸனஸங்கா²தாய ஸேய்யாய. உபரீதி வா ஸமந்ததோதி வா யோஜனா. ஏகேன த்³வாரேன பவிஸித்வா ஸப்³ப³பாஸாத³ஸ்ஸ வளஞ்ஜிதப்³ப³தம் ஸந்தா⁴ய வுத்தம் ‘‘ஏகூபசாரோ’’தி. ஸதக³ப்³ப⁴ம் வா சதுஸ்ஸாலம் ஏகூபசாரம் ஹோதீதி ஸம்ப³ந்தோ⁴. தந்தி ஸேனாஸனஸங்கா²தம் ஸேய்யம்.

தத்தா²தி ஸேனாஸனஸங்கா²தாயம் ஸேய்யாயம். ஸம்ப³ஹுலா ஸாமணேரா ஸசே ஹோந்தி, ஏகோ பி⁴க்கு² ஸசே ஹோதீதி யோஜனா. ‘‘ஸாமணேரா’’தி இத³ம் பச்சாஸன்னவஸேன வுத்தம், உபலக்க²ணவஸேன வா அஞ்ஞேஹிபி ஸஹஸேய்யானம் ஆபத்திஸம்ப⁴வதோ. தேதி ஸாமணேரா. ஸப்³பே³ஸந்தி பி⁴க்கூ²னம். தஸ்ஸாதி ஸாமணேரஸ்ஸ. ஏஸேவ நயோதி ஏஸோ ஏவ நயோ, ந அஞ்ஞோ நயோதி அத்தோ². அத² வா ஏஸேவ நயோதி ஏஸோ இவ நயோ, ஏஸோ ஏதாதி³ஸோ நயோ இவ அயம் நயோ த³ட்ட²ப்³போ³தி அத்தோ².

அபி சாதி ஏகம்ஸேன. ஏத்தா²தி இமஸ்மிம் ஸிக்கா²பதே³. சதுக்கந்தி ஏகாவாஸஏகானுபஸம்பன்னம், ஏகாவாஸனானுபஸம்பன்னம், நானாவாஸஏகானுபஸம்பன்னம், நானாவாஸனானுபஸம்பன்னந்தி சதுஸமூஹம், சதுபரிமாணம் வா. யோதி பி⁴க்கு². ஹிஸத்³தோ³ வித்தா²ரஜோதகோ, தம் வசனம் வித்தா²ரயிஸ்ஸாமீதி அத்தோ², வித்தா²ரோ மயா வுச்சதேதி வா. தே³வஸிகந்தி தி³வஸே தி³வஸே. ணிகபச்சயோ ஹி விச்ச²த்த²வாசகோ. யோபி ஸஹஸேய்யம் கப்பேதி, தஸ்ஸாபி ஆபத்தீதி யோஜேதப்³போ³. தத்ராதி ‘‘திரச்சா²னக³தேனாபீ’’தி வசனே.

‘‘அபதா³னம் அஹிமச்சா², த்³விபதா³னஞ்ச குக்குடீ;

சதுப்பதா³னம் மஜ்ஜாரீ, வத்து² பாராஜிகஸ்ஸிமா’’தி. (பாரா. அட்ட². 1.55);

இமம் கா³த²ம் ஸந்தா⁴ய வுத்தம் ‘‘வுத்தனயேனேவா’’தி. தஸ்மாதி யஸ்மா வேதி³தப்³போ³, தஸ்மா. கோ³தா⁴தி குண்டோ³. பி³ளாலோதி ஆகு²பு⁴ஜோ. மங்கு³ஸோதி நகுலோ.

அஸம்ப³த்³த⁴பி⁴த்திகஸ்ஸ கதபாஸாத³ஸ்ஸாதி யோஜனா. துலாதி ஏத்த² துலா நாம த²ம்பா⁴ன, முபரி த³க்கி²ணுத்தரவித்தா²ரவஸேன ட²பிதோ தா³ருவிஸேஸோ த²லதி த²ம்பே⁴ஸு பதிட்டா²தீதி கத்வா. தா பன ஹேட்டி²மபரிச்சே²த³தோ திஸ்ஸோ, உக்கட்ட²பரிச்சே²தே³ன பன பஞ்சஸத்தனவாத³யோ. நானூபசாரே பாஸாதே³தி ஸம்ப³ந்தோ⁴.

வாளஸங்கா⁴டாதீ³ஸூதி வாளரூபம் த³ஸ்ஸேத்வா கதேஸு ஸங்கா⁴டாதீ³ஸு. ஆதி³ஸத்³தே³ன துலம் ஸங்க³ண்ஹாதி. ஏத்த² ச ஸங்கா⁴டோ நாம துலான, முபரி புப்³ப³பச்சி²மாயாமவஸேன ட²பிதோ கட்ட²விஸேஸோ ஸம்மா க⁴டேந்தி ஏத்த² கோ³பானஸ்யாத³யோதி கத்வா. தே பன தயோ ஹோந்தி. நிப்³ப³கோஸப்³ப⁴ந்தரேதி ச²த³னகோடிஅப்³ப⁴ந்தரே. பரிமண்ட³லம் வா சதுரஸ்ஸம் வா ஸேனாஸனம் ஹோதீதி ஸம்ப³ந்தோ⁴. தத்ராதி தஸ்மிம் ஸேனாஸனே. அபரிச்சி²ன்னோ க³ப்³ப⁴ஸ்ஸ உபசாரோ ஏதேஸந்தி அபரிச்சி²ன்னக³ப்³பூ⁴பசாரா ஸப்³ப³க³ப்³பா⁴, தே பவிஸந்தீதி அத்தோ². நிபன்னானம் பி⁴க்கூ²னந்தி யோஜனா. தத்ராதி தஸ்மிம் பமுகே². பமுக²ஸ்ஸ ஸப்³ப³ச்ச²ன்னத்தா, ஸப்³ப³பரிச்ச²ன்னத்தா ச ஆபத்திம் கரோதீதி யோஜனா. நனு பமுகே² ச²ன்னமேவ அத்தி², நோ பரிச்ச²ன்னந்தி ஆஹ ‘‘க³ப்³ப⁴பரிக்கே²போ’’திஆதி³. ஹீதி ஸச்சம்.

யம் பன அந்த⁴கட்ட²கதா²யம் வுத்தந்தி ஸம்ப³ந்தோ⁴. ஜக³தீதி பத²வியா ச மந்தி³ராலிந்த³வத்து²ஸ்ஸ ச நாமமேதம். இத⁴ பன மந்தி³ராலிந்த³வத்து²ஸங்கா²தா பூ⁴பே⁴தா³ க³ஹிதா. தத்தா²தி அந்த⁴கட்ட²கதா²யம். கஸ்மா பாளியா ந ஸமேதீதி ஆஹ ‘‘த³ஸஹத்து²ப்³பே³தா⁴பீ’’திஆதி³. ஹீதி யஸ்மா. தத்தா²தி அந்த⁴கட்ட²கதா²யம். யேபி மஹாபாஸாதா³ ஹோந்தீதி யோஜனா. தேஸுபீதி மஹாபாஸாதே³ஸுபி.

ஸுதா⁴ச²த³னமண்ட³பஸ்ஸாதி ஏத்த² ‘‘ஸுதா⁴’’தி இத³ம் உபலக்க²ணவஸேன வுத்தம் யேன கேனசி ச²த³னமண்ட³பஸ்ஸாபி அதி⁴ப்பேதத்தா. மண்ட³ம் வுச்சதி ஸூரியரஸ்மி, தம் பாதி ரக்க²தி, ததோ வா ஜனந்தி மண்ட³பம். நனு ஏகூபசாரம் ஹோதி பாகாரஸ்ஸ சி²த்³த³த்தாதி ஆஹ ‘‘ந ஹீ’’திஆதி³. ஹீதி ஸச்சம், யஸ்மா வா. வளஞ்ஜனத்தா²ய ஏவாதி ஏவகாரோ யோஜேதப்³போ³. தேனாஹ ‘‘ந வளஞ்ஜனூபச்சே²த³னத்தா²யா’’தி. அத² வா ‘‘ஸத்³த³ந்தரத்தா²போஹனேன ஸத்³தோ³ அத்த²ம் வத³தீ’’தி (உதா³. அட்ட². 1; தீ³. நி. டி. 1.1; ம. நி. டீ. 1.மூலபரியாயஸுத்தவண்ணனா; ஸம். நி. டீ. 1.1.ஓக⁴தரணஸுத்தவண்ணனா; அ. நி. டீ. 1.1.ருபாதி³வக்³க³வண்ணனா) வுத்தத்தா ‘‘ந வளஞ்ஜனூபச்சே²த³னத்தா²யா’’தி வுத்தம். கவாடந்தி ஏத்த² த்³வாரமேவ அதி⁴ப்பேதம் பரியாயேன வுத்தத்தா, அஸதி ச த்³வாரே கவாடஸ்ஸாபா⁴வதோ. ஸம்வரணவிவரணகாலே கவதி ஸத்³த³ம் கரோதீதி கவாடம்.

தத்ராதி ‘‘ஏகூபசாரத்தா’’தி வசனே. யஸ்ஸாதி பரவாதி³னோ. அனுயோகோ³ ஸியாதி யோஜனா. இதா⁴தி இமஸ்மிம் ஸஹஸேய்யஸிக்கா²பதே³, வுத்தந்தி ஸம்ப³ந்தோ⁴. தத்தா²தி பிஹிதத்³வாரே க³ப்³பே⁴. ஸோதி பரவாதீ³. ஸப்³ப³ச்ச²ன்னத்தா ஆபத்தி இதி வுத்தேதி யோஜனா. ஏஸேவ நயோ ‘‘ஸப்³ப³பரிச்ச²ன்னதா ந ஹோதீ’’தி ஏத்தா²பி. பச்சாக³மிஸ்ஸதீதி பதி ஆக³மிஸ்ஸதி, புன ஆக³மிஸ்ஸதீதி அத்தோ².

ப்³யஞ்ஜனமத்தேனேவாதி ‘‘ஸப்³ப³ச்ச²ன்னா’’திஆதி³அக்க²ரபத³மத்தேனேவ, ந அத்த²வஸேன. ‘‘ஏவஞ்ச ஸதீ’’தி இமினா அப்³யாபிததோ³ஸம் த³ஸ்ஸேதி. ததோதி அனாபத்திதோ, பரிஹாயேய்யாதி ஸம்ப³ந்தோ⁴. தஸ்மாதி யஸ்மா அனியதேஸு வுத்தம், தஸ்மா. தத்தா²தி அனியதேஸு. இதா⁴பீதி இமஸ்மிம் ஸிக்கா²பதே³பி. யம் யந்தி ஸேனாஸனம். ஸப்³ப³த்தா²தி ஸப்³பே³ஸு ஸேனாஸனேஸு, ஸஹஸேய்யாபத்தி ஹோதீதி ஸம்ப³ந்தோ⁴.

53. த்³வீஸு அட்ட²கதா²வாதே³ஸு மஹாஅட்ட²கதா²வாதோ³வ யுத்தோதி ஸோ பச்சா² வுத்தோ.

இமினாபீதி ஸேனம்ப³மண்ட³பேனாபி. ஏதந்தி ஜக³தியா அபரிக்கி²த்ததம். யதா²தி யம்ஸத்³த³த்தோ² ததியந்தனிபாதோ, யேன ஸேனம்ப³மண்ட³பேனாதி அத்தோ²தி. பஞ்சமம்.

6. து³தியஸஹஸேய்யஸிக்கா²பத³ம்

55. ச²ட்டே² ஆக³ந்துகா வஸந்தி ஏத்தா²தி ஆவஸதோ², ஆவஸதோ² ச ஸோ அகா³ரஞ்சேதி ஆவஸதா²கா³ரந்தி த³ஸ்ஸேந்தோ ஆஹ ‘‘ஆக³ந்துகானம் வஸனாகா³ர’’ந்தி. மனுஸ்ஸானம் ஸந்திகா வசனம் ஸுத்வாதி வசனஸேஸோ யோஜேதப்³போ³. ஸாடகந்தி உத்தரஸாடகம், நிவத்த²வத்த²ந்திபி வத³ந்தி. அச்சாக³ம்மாதி த்வாபச்சயந்தபத³ஸ்ஸ ஸம்ப³ந்த⁴ம் த³ஸ்ஸேதுமாஹ ‘‘பவத்தோ’’தி. யதா² ஓமஸவாத³ஸிக்கா²பதே³ அக்கோஸேதுகாமதாய க²த்தியம் ‘‘சண்டா³லோ’’தி வத³தோ அலிகம் ப⁴ணதோபி முஸாவாத³ஸிக்கா²பதே³ன அனாபத்தி, ஓமஸவாத³ஸிக்கா²பதே³னேவ ஆபத்தி, ஏவமிதா⁴பி மாதுகா³மேன ஸஹ ஸயதோ பட²மஸஹஸேய்யஸிக்கா²பதே³ன அனாபத்தி, இமினாவ ஆபத்தீதி த³ட்ட²ப்³ப³ந்தி. ச²ட்ட²ம்.

7. த⁴ம்மதே³ஸனாஸிக்கா²பத³ம்

60. ஸத்தமே மஹாத்³வாரேதி ப³ஹி டி²தே மஹாத்³வாரே. ஆக³ம்ம, பவிஸித்வா வா வஸனட்டா²னத்தா ஓவரகோ ஆவஸதோ² நாமாதி ஆஹ ‘‘ஓவரகத்³வாரே’’தி. ஸுனிக்³க³தேனாதி ஸுட்டு² ப³ஹி நிக்க²மித்வா க³தேன ஸத்³தே³ன. ‘‘அஞ்ஞாது’’ந்தி பத³ஸ்ஸ ‘‘ந ஞாது’’ந்தி அத்த²ம் படிக்கி²பந்தோ ஆஹ ‘‘ஆஜானிது’’ந்தி. இமினா நகாரவிகாரோ அஇதி நிபாதோ ந ஹோதி, ஆஇதி உபஸக்³கோ³தி பன த³ஸ்ஸேதி. ‘‘விஞ்ஞுனா புரிஸேனா’’தி ஏத்தகமேவ அவத்வா ‘‘புரிஸவிக்³க³ஹேனா’’தி வத³ந்தோ மனுஸ்ஸபுரிஸவிக்³க³ஹம் க³ஹேத்வா டி²தேன யக்கே²ன பேதேன திரச்சா²னக³தேன ஸத்³தி⁴ம் டி²தாய மாதுகா³மஸ்ஸ தே³ஸேதும் ந வட்டதீதி த³ஸ்ஸேதி. ந யக்கே²னாதி யக்கே²ன ஸத்³தி⁴ம் டி²தாய மாதுகா³மஸ்ஸ தே³ஸேதும் ந வட்டதீதி யோஜனா. ஏஸ நயோ ‘‘ந பேதேன, ந திரச்சா²னக³தேனா’’தி ஏத்தா²பி.

66. ச²ப்பஞ்சவாசாஹீதி ஏத்த² ‘‘பஞ்சா’’தி வாசாஸிலிட்ட²வஸேன வுத்தம் கஸ்ஸசி பயோஜனஸ்ஸாபா⁴வா. தத்தா²தி ‘‘ச²ப்பஞ்சவாசாஹீ’’தி பதே³. ஏகோ கா³தா²பாதோ³ ஏகா வாசாதி வத³ந்தோ சுண்ணியே விப⁴த்யந்தம் ஏகம் பத³ம் ஏகா வாசா நாமாதி த³ஸ்ஸேதி, அத்த²ஜோதகபத³ம் வா வாக்யபத³ம் வா ந க³ஹேதப்³ப³ம். ‘‘ஏகம் பத³ம் பாளிதோ, பஞ்ச அட்ட²கதா²தோ’’தி இமினா ‘‘த்³வே பதா³னி பாளிதோ, சத்தாரி அட்ட²கதா²தோ’’திஆதி³னயோபி க³ஹேதப்³போ³. ச²பதா³னதிக்கமோயேவ ஹி பமாணம். தஸ்மிந்தி ஏத்த² ஸதி விப⁴த்திவிபல்லாஸே லிங்க³ஸ்ஸாபி விபல்லாஸோ ஹோதி ‘‘தஸ்மி’’ந்தி புல்லிங்கே³ன வுத்தத்தா. ஸதி ச விப⁴த்திவிபல்லாஸே ‘‘தஸ்ஸா’’தி இத்தி²லிங்க³பா⁴வேன பவத்தா. ‘‘மாதுகா³மஸ்ஸா’’தி நியதபுல்லிங்கா³பேக்க²னஸ்ஸ அஸம்ப⁴வதோ அத்த²வஸேன ‘‘ஏகிஸ்ஸா’’தி இத்தி²லிங்க³பா⁴வேன வுத்தம். இமினா பே⁴த³லிங்க³னிஸ்ஸிதோ விஸேஸனவிஸேஸ்யோபி அத்தீ²தி த³ஸ்ஸேதி. தும்ஹாகந்தி நித்³தா⁴ரணஸமுதா³யோ. ‘‘ஸுணாதா²’’தி அவத்வா ஆபோ⁴கோ³பி வட்டதீதி ஆஹ ‘‘பட²ம’’ந்திஆதி³. பட²மந்தி ச பட²மமேவ. தேன வுத்தம் ‘‘ந பச்சா²’’தி. புட்டோ² ஹுத்வா பி⁴க்கு² கதே²தீதி யோஜனாதி. ஸத்தமம்.

8. பூ⁴தாரோசனஸிக்கா²பத³ம்

67. அட்ட²மே தத்தா²தி சதுத்த²பாராஜிகஸிக்கா²பதே³. இதா⁴தி பூ⁴தாரோசனஸிக்கா²பதே³. ஹீதி ஸச்சம், யஸ்மா வா. பயுத்தவாசாதி பச்சயேஹி யுத்தா வாசா. ததா²தி ததோ கு³ணாரோசனகாரணா, அரியா ஸாதி³யிம்ஸூதி யோஜனா.

யதஸத்³தா³னம் நிச்சஸம்ப³ந்த⁴த்தா வுத்தம் ‘‘யே’’திஆதி³. ஸப்³பே³பீதி புது²ஜ்ஜனாரியாபி. பூ⁴தந்தி விஜ்ஜமானம். கஸ்மா ஸப்³பே³பி படிஜானிம்ஸு, நனு அரியேஹி அத்தனோ கு³ணானம் அனாரோசிதத்தா ந படிஜானிதப்³ப³ந்தி ஆஹ ‘‘அரியானம்பீ’’திஆதி³. ஹீதி ஸச்சம், யஸ்மா வா. அரியானம்பி அப்³ப⁴ந்தரே உத்தரிமனுஸ்ஸத⁴ம்மோ யஸ்மா பூ⁴தோ ஹோதி, தஸ்மா ஸப்³பே³பி ‘‘பூ⁴தம் ப⁴க³வா’’தி படிஜானிம்ஸூதி யோஜனா. யஸ்மா பா⁴ஸிதோ விய ஹோதி, தஸ்மாதி யோஜனா. அரியா படிஜானிம்ஸூதி ஸம்ப³ந்தோ⁴. அனாதீ³னவத³ஸ்ஸினோதி தோ³ஸஸ்ஸ அத³ஸ்ஸனத⁴ம்மா. தேஹீதி அரியேஹி, பா⁴ஸிதோதி ஸம்ப³ந்தோ⁴. யம் பிண்ட³பாதம் உப்பாதே³ஸுந்தி யோஜனா. அஞ்ஞேதி புது²ஜ்ஜனா. ஸப்³ப³ஸங்கா³ஹிகேனேவாதி ஸப்³பே³ஸம் புது²ஜ்ஜனாரியானம் ஸங்க³ஹணே பவத்தேனேவ. ஸிக்கா²பத³விப⁴ங்கே³பீதி ஸிக்கா²பத³ஸ்ஸ பத³பா⁴ஜனியேபி. தத்தா²தி சதுத்த²பாராஜிகே. இதா⁴தி இமஸ்மிம் ஸிக்கா²பதே³.

77. உத்தரிமனுஸ்ஸத⁴ம்மமேவ ஸந்தா⁴ய வுத்தம், ந ஸுதாதி³கு³ணந்தி அத்தோ². அந்தரா வாதி பரினிப்³பா³னகாலதோ அஞ்ஞஸ்மிம் காலே வா. அதிகட்³டி⁴யமானேனாதி அதினிப்பீளியமானேன. உம்மத்தகஸ்ஸாதி இத³ம் பனாதி ஏத்த² இதி-ஸத்³தோ³ ஆத்³யத்தோ². தேன ‘‘கி²த்தசித்தஸ்ஸா’’திஆதி³ம் ஸங்க³ண்ஹாதி. தி³ட்டி²ஸம்பன்னானந்தி மக்³க³பஞ்ஞாய, ப²லபஞ்ஞாய ச ஸம்பன்னானம். அனாபத்தீதி பாசித்தியாபத்தியா அனாபத்தி ந வத்தப்³பா³, ஆபத்தியேவ ஹோதி, தஸ்மா ‘‘உம்மத்தகஸ்ஸ அனாபத்தீ’’தி ந வத்தப்³ப³ந்தி அதி⁴ப்பாயோதி. அட்ட²மம்.

9. து³ட்டு²ல்லாரோசனஸிக்கா²பத³ம்

78. நவமே தத்ராதி தஸ்ஸம் ‘‘து³ட்டு²ல்லா நாமா’’திஆதி³பாளியம், தாஸு வா பாளிஅட்ட²கதா²ஸு. விசாரணாதி வீமம்ஸனா. உபஸம்பன்னஸத்³தே³தி உபஸம்பன்னஸத்³த³த்த²பா⁴வே. ஏத்த² ஹி ஸத்³தே³ வுச்சமானே அவினாபா⁴வதோ ஸத்³தே³ன அத்தோ²பி வுத்தோ, வினாபி பா⁴வபச்சயேன பா⁴வத்த²ஸ்ஸ ஞாதப்³ப³த்தா பா⁴வோபி க³ஹேதப்³போ³, தஸ்மா வுத்தம் ‘‘உபஸம்பன்னஸத்³த³த்த²பா⁴வே’’தி. ஏஸேவ நயோ ‘‘து³ட்டு²ல்லஸத்³தே³’’தி ஏத்தா²பி. ஏதம் பரிமாணம் யஸ்ஸாதி ஏதம், ‘‘தேரஸ ஸங்கா⁴தி³ஸேஸா’’தி வசனம். ஏதம் ஏவ வத்தப்³ப³ம், ந ‘‘சத்தாரி ச பாராஜிகானீ’’தி இத³ந்தி அத்தோ². தத்தா²தி பாளியம். கஸ்ஸசி விமதி ப⁴வேய்ய, கிம் ப⁴வேய்யாதி யோஜனா. ஆபத்திம் ஆரோசேந்தேன அக்கோஸந்தஸ்ஸ ஸமானத்தா வுத்தம் ‘‘ஏவம் ஸதீ’’திஆதி³. பாசித்தியமேவ சாதி சஸத்³தோ³ ப்³யதிரேகத்தோ², ந து³க்கடம் ஆபஜ்ஜதீதி அத்தோ². ஹீதி ஸச்சம். ஏதந்தி பாசித்தியாபஜ்ஜனதம், ‘‘அஸுத்³தோ⁴ ஹோதி…பே… ஓமஸவாத³ஸ்ஸா’’தி வசனம் வா, வுத்தந்தி ஸம்ப³ந்தோ⁴. ஏத்தா²தி பாளியம். அட்ட²கதா²சரியாவேதி ஏத்த² ஏவகாரோ அட்டா²னயோகோ³, பமாணந்தி ஏத்த² யோஜேதப்³போ³, காரணமேவாதி அத்தோ². தேன வுத்தம் ‘‘ந அஞ்ஞா விசாரணா’’தி. அத² வா அஞ்ஞாதி ஸாம்யத்தே² பச்சத்தவசனமேதம், ந அஞ்ஞேஸம் விசாரணா பமாணந்தி அத்தோ². ஏவஞ்ஹி ஸதி ஏவகாரோ டா²னயோகோ³வ. புப்³பே³பி சாதி க³ந்தா²ரம்ப⁴காலேபி ச.

ஏதந்தி அட்ட²கதா²சரியானம் பமாணதம். ஸம்வரத்தா²ய ஏவ, அனாபஜ்ஜனத்தா²ய ஏவ ச அனுஞ்ஞாதந்தி யோஜனா. தேனாஹ ‘‘ந தஸ்ஸ’’த்யாதி³. தஸ்மாதி யஸ்மா பி⁴க்கு²பா⁴வோ நாம ந அத்தி², தஸ்மா ஸுவுத்தமேவாதி ஸம்ப³ந்தோ⁴.

80. ஸாதி பி⁴க்கு²ஸம்முதி, ஸங்கே⁴ன காதப்³பா³தி யோஜனா. கத்த²சீதி கிஸ்மிஞ்சி டா²னே. இதா⁴தி இமஸ்மிம் ஸிக்கா²பதே³. ‘‘வுத்தத்தா’’தி பத³ம் ‘‘காதப்³பா³’’தி பதே³ ஹேது. ஏஸாதி ஏஸோ பி⁴க்கு². ஹிதேஸிதாயாதி ஹிதஸ்ஸ ஏஸிதாய, அத்த²ஸ்ஸ இச்ச²தாயாதி அத்தோ².

82. ஸேஸானீதி ஆதி³ம்ஹி பஞ்சஸிக்கா²பத³தோ ஸேஸானி உபரி பஞ்ச ஸிக்கா²பதா³னி. அஸ்ஸாதி அனுபஸம்பன்னஸ்ஸ. க⁴டேத்வாதி ஸம்ப³ந்த⁴ம் கத்வாதி. நவமம்.

10. பத²வீக²ணனஸிக்கா²பத³ம்

86. த³ஸமே ப⁴க³வா த³ஸ்ஸேதீதி யோஜனா. ஏத்தா²தி பத²வியம். தத்தா²தி தேஸு பாஸாணாதீ³ஸு. முட்டி²ப்பமாணதோதி க²டகபமாணதோ. ஸாதி அத³ட்³ட⁴பத²வீ. ஹத்தி²குச்சி²யந்தி ஏவம்னாமகே டா²னே. ஏகபச்சி²பூரம் பத²விந்தி ஸம்ப³ந்தோ⁴. தேஸம்யேவாதி அப்பபம்ஸுஅப்பமத்திகாபதா³னம் ஏவ. ஹீதி ஸச்சம், யஸ்மா வா. ஏதந்தி யேபு⁴ய்யேனபாஸாணாதி³பஞ்சகம். தந்தி குஸீதம். ஆணாபேத்வாதி ஏத்த² ‘‘ஆண பேஸனே’’தி தா⁴துபாடே²ஸு வுத்தத்தா ஆணதா⁴துயேவ பேஸனஸங்கா²தம் ஹேத்வத்த²ம் வத³தி, ந ணாபேபச்சயோ, ஸோ பன தா⁴த்வத்தே²யேவ வத்ததி. ந ஹி தஸ்ஸ விஸும் வுத்தோ அபி⁴தே⁴ய்யோ அத்தி² தா⁴த்வத்த²தோ அஞ்ஞஸ்ஸ அபி⁴தே⁴ய்யஸ்ஸாபா⁴வா. தாவாதி பட²மம் பாளிமுத்தகவினிச்ச²யஸ்ஸ, ததோ வா.

போக்க²ரம் பது³மம் நேதீதி போக்க²ரணீ. ‘‘ஸோதே⁴ந்தேஹீ’’தி பத³ம் ‘‘உஸ்ஸிஞ்சிதும் அபனேது’’ந்தி பதே³ஸு பா⁴வகத்தா. யோதி ‘‘தனுகத்³த³மோ’’தி பதே³ன யோஜேதப்³போ³. யோ தனுகத்³த³மோதி ஹி அத்தோ². குடேஹீதி க⁴டேஹி. உஸ்ஸிஞ்சிதுந்தி உக்கி²பித்வா, உத்³த⁴ரித்வா வா ஸிஞ்சிதும். தத்ராதி ஸுக்க²கத்³த³மே, ‘‘யோ’’தி பதே³ அவயவீஆதா⁴ரோ. யோதி ஸுக்க²கத்³த³மோ.

தடந்தி கூலம். உத³கஸாமந்தாதி உத³கஸ்ஸ ஸமீபே. ஓமகசதுமாஸந்தி சதுமாஸதோ ஊனகம். ஓவட்ட²ந்தி தே³வேன ஓவஸ்ஸிதம் ஹோதி ஸசேதி யோஜனா. பததீதி தடம் பததி. உத³கேயேவாதி பகதிஉத³கேயேவ. உத³கஸ்ஸாதி வஸ்ஸோத³கஸ்ஸ. தத்தா²தி பாஸாணபிட்டி²யம். பட²மமேவாதி ஸோண்டி³க²ணனதோ பட²மம் ஏவ. உத³கே பரியாதி³ண்ணேதி உத³கே ஸுக்கே². பச்சா²தி உத³கபூரதோ பச்சா². தத்தா²தி ஸோண்டி³யம். உத³கேயேவாதி மூலஉத³கேயேவ. உத³கந்தி ஆக³ந்துகஉத³கம். அல்லீயதீதி பிட்டி²பாஸாணே லக்³க³தி. தம்பீதி ஸுகு²மரஜம்பி. அகதபப்³பா⁴ரேதி வளஞ்ஜேன அகதே பப்³பா⁴ரே. உபசிகாஹி வமீயதி, க⁴ரகோ³ளிகாத³யோ வா ஸத்தே வமதீதி வம்மிகோ.

கா³வீனம் கு²ரோ கண்டகஸதி³ஸத்தா கோ³கண்டகோ நாம, தேன சி²ன்னோ கத்³த³மோ ‘‘கோ³கண்டகோ’’தி வுச்சதி. அச்ச²த³னம் வா வினட்ட²ச்ச²த³னம் வா புராணஸேனாஸனம் ஹோதீதி யோஜனா. ததோதி புராணஸேனாஸனதோ, க³ண்ஹிதும் வட்டதீதி ஸம்ப³ந்தோ⁴. அவஸேஸந்தி வினட்ட²ச்ச²த³னதோ. அவஸேஸம் இட்ட²கம் க³ண்ஹாமி இதி ஸஞ்ஞாயாதி யோஜேதப்³போ³. தேனாதி இட்ட²காதி³னா. யா யாதி மத்திகா. அதிந்தாதி அனல்லா, அகிலின்னாதி அத்தோ².

தஸ்மிந்தி மத்திகாபுஞ்ஜே. ஸப்³போ³தி ஸகலோ மத்திகாபுஞ்ஜோ. அஸ்ஸாதி மத்திகாபுஞ்ஜஸ்ஸ. ‘‘கப்பியகாரகேஹீ’’தி பத³ம் ‘‘அபனாமேத்வா’’தி பதே³ காரிதகம்மம். கஸ்மா வட்டதீதி ஆஹ ‘‘உத³கேனா’’திஆதி³. ஹீதி ஸச்சம், யஸ்மா வா.

தத்தா²தி மத்திகாபாகாரே. அஞ்ஞம்பீதி மண்ட³பத²ம்ப⁴தோ அஞ்ஞம்பி. தேன அபதே³ஸேனாதி தேன பாஸாணாதி³பவட்டனலேஸேன.

பஸ்ஸாவதா⁴ராயாதி முத்தஸோதாய. கத்தரயட்டி²யாதி கத்தரத³ண்டே³ன. ஏத்த² ஹி கத்தரயதி அங்க³பச்சங்கா³னம் ஸிதி²லபா⁴வேன ஸிதி²லோ ஹுத்வா ப⁴வதீதி கத்வா கத்தரோ வுச்சதி ஜிண்ணமனுஸ்ஸோ, தேன ஏகந்ததோ க³ஹேதப்³ப³த்தா கத்தரேன க³ஹிதா யட்டி², கத்தரஸ்ஸ யட்டீ²தி வா கத்வா கத்தரயட்டி² வுச்சதி கத்தரத³ண்டோ³. த³ந்தஜபட²மக்க²ரேன ஸஜ்ஜா²யிதப்³போ³. வீரியஸம்பக்³க³ஹணத்த²ந்தி வீரியஸ்ஸ ஸுட்டு² பக்³க³ண்ஹனத்த²ம், வீரியஸ்ஸ உக்கி²பனத்த²ந்தி அத்தோ². கேசி பி⁴க்கூ²தி யோஜனா.

87. தத்ராபீதி இட்ட²ககபாலாதீ³ஸுபி. ஹீதி ஸச்சம். தேஸம் அனுபாதா³னத்தாதி தேஸம் இட்ட²காதீ³னம் அக்³கி³ஸ்ஸ அனிந்த⁴னத்தா. ஹீதி ஸச்சம், யஸ்மாவா. தானீதி இட்ட²காதீ³னி. அவிஸயத்தாதி ஆபத்தியா அனோகாஸத்தா. திணுக்கந்தி திணமயம் உக்கம். தத்தே²வாதி மஹாபச்சரியம் ஏவ. அரீயதி அக்³கி³னிப்பா²த³னத்த²ம் க⁴ம்ஸீயதி ஏத்தா²தி அரணீ, ஹேட்டா² நிமந்த²னீயதா³ரு. ஸஹ த⁴னுனா ஏதி பவத்ததீதி ஸஹிதோ, உபரி நிமந்த²னதா³ரு. அரணீ ச ஸஹிதோ ச அரணீஸஹிதோ, தேன அக்³கி³ம் நிப்³ப³த்தேத்வாதி யோஜனா. யதா² கரியமானே ந ட³ய்ஹதி, ததா² கரோஹீதி ஸம்ப³ந்தோ⁴.

88. ஆவாடம் ஜானாதி ஆவாடம் காதும், க²ணிதும் வா ஜானாஹீதி அத்தோ². ‘‘ஏவம் மஹாமத்திகம் ஜான, து²ஸமத்திகம் ஜானா’’தி ஏத்தா²பி யதா²லாப⁴ம் ஸம்பதா³னவாசகபத³ம் அஜ்ஜா²ஹரித்வா யோஜனா காதப்³பா³. ஸாதி பத²வீ. தேனாதி பவட்டனாதி³னாதி. த³ஸமம்.

முஸாவாத³வக்³கோ³ பட²மோ.

2. பூ⁴தகா³மவக்³கோ³

1. பூ⁴தகா³மஸிக்கா²பத³-அத்த²யோஜனா

89. து³தியவக்³க³ஸ்ஸ பட²மே தஸ்ஸாதி தே³வதாய. உக்கி²த்தம் ப²ரஸுந்தி உத்³த⁴ம் கி²த்தம் குடா²ரிம். நிக்³க³ஹேதுந்தி ஸண்டா²தும், நிவத்தேதும் வா. சக்கு²விஸயாதீதேதி பஸாத³சக்கு²ஸ்ஸ கோ³சராதிக்கந்தே. மஹாராஜஸந்திகாதி வேஸ்ஸவணமஹாராஜஸ்ஸ ஸந்திகா. த²னமூலேயேவாதி த²னஸமீபேயேவ. ஹிமவந்தேதி ஹிமஉக்³கி³ரணே வனே, ஹிமயுத்தே வா. தத்தா²தி ஹிமவந்தே, தே³வதாஸன்னிபாதே வா. ருக்க²த⁴ம்மோதி ருக்க²ஸபா⁴வோ. ருக்க²த⁴ம்மோ ச நாம சே²த³னபே⁴த³னாதீ³ஸு ருக்கா²னம் அசேதனத்தா கோபஸ்ஸ அகரணம், தஸ்மிம் ருக்க²த⁴ம்மே டி²தா தே³வதா ருக்க²த⁴ம்மே டி²தா நாம, சே²த³னபே⁴த³னாதீ³ஸு ருக்க²ஸ்ஸ விய ருக்க²ட்ட²கதே³வதாய அகோபனம் ருக்க²த⁴ம்மே டி²தா நாமாதி அதி⁴ப்பாயோ. தத்தா²தி தாஸு ஸன்னிபாததே³வதாஸு. இதீதி இமஸ்ஸ அலப⁴னஸ்ஸ, இமஸ்மிம் அலப⁴னே வா, ஆதீ³னவந்தி ஸம்ப³ந்தோ⁴. ப⁴க³வதோ சாதி ச-ஸத்³தோ³ ‘‘புப்³ப³சரித’’ந்தி ஏத்த² யோஜேதப்³போ³. இமஞ்ச ஆதீ³னவம் அத்³த³ஸ, ப⁴க³வதோ புப்³ப³சரிதஞ்ச அனுஸ்ஸரீதி வாக்யஸம்பிண்ட³னவஸேன யோஜனா காதப்³பா³. தேனாதி த³ஸ்ஸனானுஸ்ஸரணகாரணேன. அஸ்ஸாதி தே³வதாய. ஸம்விஜ்ஜதி பிதா அஸ்ஸாதி ஸபிதிகோ, புத்தோ. (தாவாதி அதிவிய, படிஸஞ்சிக்க²ந்தியாதி ஸம்ப³ந்தோ⁴) ‘‘மரியாத³ம் ப³ந்தி⁴ஸ்ஸதீ’’தி வத்வா தஸ்ஸ அத்த²ம் த³ஸ்ஸேந்தோ ஆஹ ‘‘ஸிக்கா²பத³ம் பஞ்ஞபேஸ்ஸதீ’’தி. இதி படிஸஞ்சிக்க²ந்தியா அஸ்ஸா தே³வதாய ஏதத³ஹோஸீதி யோஜனா.

யோதி யோ கோசி ஜனோ. வேதி ஏகந்தேன. உப்பதிதந்தி உப்பஜ்ஜனவஸேன அத்தனோ உபரி பதிதம். ப⁴ந்தந்தி ப⁴மந்தம் தா⁴வந்தம், வாரயேதி நிவாரேய்ய நிக்³க³ண்ஹேய்யாதி அத்தோ². தந்தி ஜனம். அயம் பனேத்த² யோஜனா – ஸாரதி² ப⁴ந்தம் ரத²ம் வாரயே இவ, ததா² யோ வே உப்பதிதம் கோத⁴ம் வாரயே, தம் அஹம் ஸாரதி²ம் இதி ப்³ரூமி. இதரோ கோத⁴னிவாரகதோ அஞ்ஞோ ராஜஉபராஜாதீ³னம் ஸாரதி²பூ⁴தோ ஜனோ ரஸ்மிக்³கா³ஹோ ரஜ்ஜுக்³கா³ஹோ நாமாதி.

து³தியகா³தா²ய வேஜ்ஜோ விஸடம் வித்த²தம் ஸப்பவிஸம் ஸப்பஸ்ஸ ஆஸீவிஸஸ்ஸ விஸம் க³ரளம் ஓஸதே⁴ஹி பே⁴ஸஜ்ஜேன, மந்தேன ச வினேதி இவ, ததா² யோ பி⁴க்க²வே உப்பதிதம் கோத⁴ம் மேத்தாய வினேதி, ஸோ பி⁴க்கு² உரகோ³ பு⁴ஜகோ³ புராணம் புரே ப⁴வம் ஜிண்ணம் புராணத்தா ஜிண்ணம் தசம் ஜஹாதி இவ, ததா² ஓரபாரம் அபாரஸங்கா²தம் பஞ்சோரம்பா⁴கி³யஸம்யோஜனம் ஜஹாதீதி யோஜனா காதப்³பா³.

தத்ராதி த்³வீஸு கா³தா²ஸு. வத்து² பன வினயே ஆரூள்ஹந்தி யோஜனா. அதா²தி பச்சா². யஸ்ஸ தே³வபுத்தஸ்ஸாதி யேன தே³வபுத்தேன. பரிக்³க³ஹோதி பரிச்சி²ந்தி³த்வா க³ஹிதோ. ஸோதி தே³வபுத்தோ. ததோதி உபக³மனதோ. யதா³ ஹோதி, ததா³தி யோஜனா. மஹேஸக்க²தே³வதாஸூதி மஹாபரிவாராஸு தே³வதாஸு, மஹாதேஜாஸு வா. படிக்கமந்தீதி அபேந்தி. தே³வதா யம்பி பஞ்ஹம் புச்ச²ந்தீதி யோஜனா. தத்தே²வாதி அத்தனோ வஸனட்டா²னேயேவ. உபட்டா²னந்தி உபட்டா²னத்தா²ய, ஸம்பதா³னத்தே² சேதம் உபயோக³வசனம். அத² வா உபக³ந்த்வா திட்ட²தி ஏத்தா²தி உபட்டா²னம், ப⁴க³வதோ ஸமீபட்டா²னம், தம் ஆக³ந்த்வாதி அத்தோ². நந்தி தம், அயமேவ வா பாடோ².

90. ‘‘ப⁴வந்தீ’’தி இமினா விரூள்ஹே மூலே நீலபா⁴வம் ஆபஜ்ஜித்வா வட்³ட⁴மானகே தருணருக்க²க³ச்சா²தி³கே த³ஸ்ஸேதி. ‘‘அஹுவத்து²’’ந்தி இமினா பன வட்³டி⁴த்வா டி²தே மஹந்தருக்க²க³ச்சா²தி³கே த³ஸ்ஸேதி. ‘‘அஹுவத்து²’’ந்தி ச ஹிய்யத்தனிஸங்கா²தாய த்து²ம்-விப⁴த்தியா ஹூ-தா⁴துஸ்ஸ ஊகாரஸ்ஸ உவாதே³ஸோ ஹோதி. போத்த²கேஸு பன ‘‘அஹுவதீ’’தி பாடோ² தி³ஸ்ஸதி, ஸோ அபாடோ²தி த³ட்ட²ப்³போ³. ‘‘ஜாயந்தீ’’தி இமினா பூ⁴-தா⁴துஸ்ஸ ஸத்தத்த²பா⁴வம் த³ஸ்ஸேதி, ‘‘வட்³ட⁴ந்தீ’’தி இமினா வட்³ட⁴னத்த²பா⁴வம். ஏதந்தி ‘‘பூ⁴தகா³மோ’’தி நாமம். பீயதே யதா²காமம் பரிபு⁴ஞ்ஜீயதே, பாதப்³ப³ம் பரிபு⁴ஞ்ஜிதப்³ப³ந்தி வா பாதப்³யம், பாஸத்³தோ³ யதா²காமபரிபு⁴ஞ்ஜனத்தோ². தேனாஹ – ‘‘சே²த³னபே⁴த³னாதீ³ஹி யதா²ருசி பரிபு⁴ஞ்ஜிதப்³ப³தாதி அத்தோ²’’தி.

91. ‘‘இதா³னீ’’தி பத³ம் ‘‘ஆஹா’’தி பதே³ காலஸத்தமீ. யஸ்மிந்தி பீ³ஜே. தந்தி பீ³ஜம். பஞ்ச பீ³ஜஜாதானீதி ஏத்த² ஜாதஸத்³த³ஸ்ஸ தப்³பா⁴வத்த²தம் ஸந்தா⁴ய அட்ட²கதா²ஸு ஏவம் வுத்தம். தப்³பா⁴வத்த²ஸ்ஸ ‘‘மூலே ஜாயந்தீ’’தி இமாய பாளியா அஸம்ஸந்த³னதம் ஸந்தா⁴ய வுத்தம் ஸங்க³ஹகாரேன ‘‘ந ஸமேந்தீ’’தி. அட்ட²கதா²சரியானம் மதேன ஸதி ஜாதஸத்³த³ஸ்ஸ தப்³பா⁴வத்த²பா⁴வே ‘‘மூலே ஜாயந்தீ’’திஆதீ³ஸு மூலே மூலானி ஜாயந்தீதி தோ³ஸோ ப⁴வேய்யாதி மனஸி கத்வா ஆஹ ‘‘ந ஹீ’’திஆதி³. ஹீதி ஸச்சம், யஸ்மா வா. தானீதி ருக்கா²தீ³னி. தஸ்ஸாதி ‘‘பூ⁴தகா³மோ நாம பஞ்ச பீ³ஜஜாதானீ’’தி பத³ஸ்ஸ. ஏதந்தி ‘‘பீ³ஜஜாதானீ’’தி நாமம். பீ³ஜேஸு ஜாதானி பீ³ஜஜாதானீதி வுத்தே ‘‘மூலே ஜாயந்தீ’’திஆதி³னா ஸமேதி. ஏதேனாதி ‘‘பீ³ஜதோ’’திஆதி³னா ஸங்க³ஹோதி ஸம்ப³ந்தோ⁴.

‘‘யேஹீ’’தி பத³ம் ‘‘ஜாதத்தா’’தி பதே³ அபாதா³னம், ஹேது வா ‘‘வுத்தானீ’’தி பதே³ கரணம், கத்தா வா. தேஸந்தி பீ³ஜானம். ருக்கா²தீ³னம் விருஹனம் ஜனேதீதி பீ³ஜம். ‘‘பீ³ஜதோ’’திஆதி³னா காரியோபசாரேன காரணஸ்ஸ த³ஸ்ஸிதத்தா காரணூபசாரம் பதீ³பேதி. அஞ்ஞானிபி யானி வா பன க³ச்ச²வல்லிருக்கா²தீ³னி அத்தி² ஸம்விஜ்ஜந்தி, தானி க³ச்ச²வல்லிருக்கா²தீ³னி ஜாயந்தி ஸஞ்ஜாயந்தீதி யோஜனா. தானீதி க³ச்ச²வல்லிருக்கா²தீ³னி. தஞ்ச மூலம், பாளியம் வுத்தஹலித்³தா³தி³ ச அத்தி², ஸப்³ப³ம்பி ஏதம் மூலபீ³ஜம் நாமாதி ஸம்ப³ந்தோ⁴. ஏத்தா²தி பீ³ஜேஸு, க²ந்த⁴பீ³ஜேஸு வா.

92. ஸஞ்ஞாவஸேனாதி ‘‘பீ³ஜ’’ந்தி ஸஞ்ஞாவஸேன. ‘‘தத்தா²’’தி பத³ம் ‘‘வேதி³தப்³போ³’’தி பதே³ ஆதா⁴ரோ. ‘‘யதா²’’திஆதி³னா காரணோபசாரேன காரியஸ்ஸ வுத்தத்தா ப²லூபசாரம் த³ஸ்ஸேதி. யம் பீ³ஜம் வுத்தம், தம் து³க்கடவத்தூ²தி யோஜனா. யதே³தம் ஆதி³பத³ந்தி யோஜேதப்³ப³ம். தேனாதி ஆதி³பதே³ன. ரவீயதி ப⁴க³வதா கதீ²யதீதி ருதம், பாளி, தஸ்ஸ அனுரூபம் யதா²ருதம், பாளிஅனதிக்கந்தந்தி அத்தோ².

ஏத்தா²தி ‘‘பீ³ஜே பீ³ஜஸஞ்ஞீ’’திஆதி³பதே³, இமஸ்மிம் ஸிக்கா²பதே³ வா. உத³கே டா²தி பவத்ததீதி உத³கட்டோ², ஏவம் த²லட்டோ²பி. தத்தா²தி உத³கட்ட²த²லட்டே²ஸு. ஸாஸபஸ்ஸ மத்தம் பமாணம் அஸ்ஸ ஸேவாலஸ்ஸாதி ஸாஸபமத்திகோ. திலஸ்ஸ பீ³ஜபமாணம் அஸ்ஸ ஸேவாலஸ்ஸாதி திலபீ³ஜகோ. பமாணத்தே² கோ. ஆதி³ஸத்³தே³ன ஸங்க²பணகாத³யோ ஸேவாலே ஸங்க³ண்ஹாதி. தத்த² திலபீ³ஜபமாணோ ஜலஸண்டி²தோ நீலாதி³வண்ணயுத்தோ ஸேவாலோ திலபீ³ஜம் நாம, ஸபத்தோ அப்பகண்டோ³ உக்க²லிபிதா⁴னாதி³பமாணோ ஸமூலோ ஏகோ ஸேவாலவிஸேஸோ ஸங்கோ² நாம, ப⁴மரஸண்டா²னோ நீலவண்ணோ ஏகோ ஸேவாலவிஸேஸோ பணகோ நாம. உத³கம் ஸேவதீதி ஸேவாலோ. தத்தா²தி ஸேவாலேஸு. யோதி ஸேவாலோ. பதிட்டி²தம் ஸேவாலந்தி ஸம்ப³ந்தோ⁴. யத்த² கத்த²சீதி மூலே வா நளே வா பத்தே வா. உத்³த⁴ரித்வாதி உப்பாடேத்வா. ‘‘ஹத்தே²ஹீ’’தி பத³ம் ‘‘வியூஹித்வா’’தி பதே³ கரணம். ஹீதி ஸச்சம், யஸ்மா வா. தஸ்ஸாதி ஸேவாலஸ்ஸ. ஏத்தாவதாதி இதோ சிதோ ச வியூஹனமத்தேன. யோ ஸேவாலோ நிக்க²மதி, தம் ஸேவாலந்தி யோஜனா. பரிஸ்ஸாவனந்தரேனாதி பரிஸ்ஸாவனசி²த்³தே³ன. உப்பலானி அஸ்மிம் க³ச்சே²தி உப்பலினீ. பது³மானி அஸ்மிம் க³ச்சே²தி பது³மினீ, இனோ, இத்தி²லிங்க³ஜோதகோ ஈ. தத்தே²வாதி உத³கேயேவ. தானீதி வல்லீதிணானி. ஹீதி ஸச்சம், யஸ்மா வா. அனந்தகோதி ஸாஸபமத்திகோ ஸேவாலோ. ஸோ ஹி நத்தி² அத்ததோ அந்தோ லாமகோ ஸேவாலோ ஏதஸ்ஸாதி கத்வா ‘‘அனந்தகோ’’தி வுச்சதி. அத்தனாயேவ ஹி ஸுகு²மோ, ததோ ஸுகு²மோ ஸேவாலோ நத்தீ²தி அதி⁴ப்பாயோ. தத்தா²தி து³க்கடவத்து²பா⁴வே. தம்பீதி ‘‘ஸம்புண்ணபூ⁴தகா³மம் ந ஹோதீ’’தி வசனம்பி. பிஸத்³தோ³ மஹாபச்சரிஆதி³அட்ட²கதா²சரியானம் வசனாபேக்கோ². ஹீதி ஸச்சம், யஸ்மா வா. ந ஆக³தோ, தஸ்மா ந ஸமேதீதி யோஜனா. அதா²தி தஸ்மிம் அனாக³தே. ஏதந்தி அனந்தகஸேவாலாதி³ம். க³ச்சி²ஸ்ஸதீதி வதே³ய்யாதி ஸம்ப³ந்தோ⁴. தம்பீதி ‘‘க³ச்சி²ஸ்ஸதீ’’தி வசனம்பி. பிஸத்³தோ³ புரிமட்ட²கதா²சரியானம் வசனாபேக்கோ².

அபூ⁴தகா³மமூலத்தா தாதி³ஸஸ்ஸ பீ³ஜகா³மஸ்ஸாதி ஏத்த² பீ³ஜகா³மோ திவிதோ⁴ ஹோதி – யோ ஸயம் பூ⁴தகா³மதோ ஹுத்வா அஞ்ஞம்பி பூ⁴தகா³மம் ஜனேதி, அம்ப³ட்டி²ஆதி³கோ. யோ பன ஸயம் பூ⁴தகா³மதோ ஹுத்வா அஞ்ஞம் பன பூ⁴தகா³மம் ந ஜனேதி, தாலனாளிகேராதி³கா²ணு. யோ பன ஸயம்பி பூ⁴தகா³மதோ அஹுத்வா அஞ்ஞம்பி பூ⁴தகா³மம் ந ஜனேதி. பானீயக⁴டாதீ³னம் ப³ஹி ஸேவாலோதி. பூ⁴தகா³மோ பன சதுப்³பி³தோ⁴ ஹோதி – யோ ஸயம் பீ³ஜகா³மதோ ஹுத்வா அஞ்ஞம்பி பீ³ஜகா³மம் ஜனேதி, ஏதரஹி அம்ப³ருக்கா²தி³கோ. யோ பன ஸயம் பீ³ஜகா³மதோ அஹுத்வாவ அஞ்ஞம் பீ³ஜகா³மம் ஜனேதி, ஆதி³கப்பகாலே அம்ப³ருக்கா²தி³கோ. யோ பன ஸயம் பீ³ஜகா³மதோ ஹுத்வா அஞ்ஞம் பன பீ³ஜகா³மம் ந ஜனேதி, நீலவண்ணோ ப²லிதகத³லீருக்கா²தி³கோ. யோ பன ஸயம்பி பீ³ஜகா³மதோ அஹுத்வா அஞ்ஞம்பி பீ³ஜகா³மம் ந ஜனேதி, இத⁴ வுத்தோ அனந்தகஸேவாலாதி³கோதி. தத்த² சதுத்த²ம் பூ⁴தகா³மம் ஸந்தா⁴ய வுத்தம் ‘‘அபூ⁴தகா³மமூலகத்தா தாதி³ஸஸ்ஸ பீ³ஜஸ்ஸா’’தி. அயம் பன ததியபீ³ஜகா³மஸ்ஸ ச சதுத்த²பூ⁴தகா³மஸ்ஸ ச விஸேஸோ – ததியபீ³ஜகா³மே மூலபண்ணானி ந பஞ்ஞாயந்தி, சதுத்த²பூ⁴தகா³மே தானி பஞ்ஞாயந்தீதி. மூலபண்ணானம் அபஞ்ஞாயனத்தா பீ³ஜகா³மோதி வுத்தோ, தேஸம் பஞ்ஞாயனத்தா பூ⁴தகா³மோதி வுத்தோ. இதரதா² ஹி விரோதோ⁴ ப⁴வேய்யாதி. அத்தனோ வாதே³ பாசித்தியபா⁴வதோ க³ருகம், மஹாபச்சரிஆதீ³னம் வாதே³ து³க்கடமத்தபா⁴வதோ லஹுகம். ஏதந்தி டா²னம்.

ஏவம் உத³கட்ட²ம் த³ஸ்ஸேத்வா த²லட்ட²ம் த³ஸ்ஸேந்தோ ஆஹ ‘‘த²லட்டே²’’திஆதி³. த²லட்டே² வினிச்ச²யோ ஏவம் வேதி³தப்³போ³தி யோஜனா. தத்தா²தி ஹரிதகா²ணூஸு. உத்³த⁴ம் வட்³ட⁴தீதி நவஸாகா²னிக்³க³மனேன சி²ன்னதோ உபரி வட்³ட⁴தி. ஸோதி கா²ணு. ப²லிதாய கத³லியா கா²ணு பீ³ஜகா³மேன ஸங்க³ஹிதோதி யோஜனா. ப²லம் ஸஞ்ஜாதம் ஏதிஸ்ஸாதி ப²லிதா. ததா²தி ‘‘பூ⁴தகா³மேனேவ ஸங்க³ஹிதா’’தி பதா³னி ஆகட்³ட⁴தி. யதா³தி யஸ்மிம் காலே. ரதனப்பமாணாபீதி ஹத்த²ப்பமாணாபி. அதா²தி அபாதா³னத்தோ², ததோ ராஸிகரணதோ அஞ்ஞந்தி அத்தோ². பூ⁴மியம் நிக²ணந்தீதி ஸம்ப³ந்தோ⁴. ‘‘மூலேஸு சேவ பண்ணேஸு சா’’தி ஏத்த² சஸத்³தோ³ ஸமுச்சயத்தோ²வ, ந விகப்பத்தோ²தி ஆஹ ‘‘மூலமத்தேஸு பனா’’திஆதி³.

பீ³ஜானீதி மூலாதி³பீ³ஜானி. ட²பிதானி ஹோந்தீதி ஸம்ப³ந்தோ⁴. ‘‘உபரீ’’தி பதே³ன ஹேட்டா² மூலானி சாதி அத்த²ம் நயேன ஞாபேதி. ந அங்குரே நிக்³க³தமத்தேயேவ, அத² கோ² ஹரிதே நீலபண்ணவண்ணே ஜாதேயேவ பூ⁴தகா³மஸங்க³ஹோ காதப்³போ³தி ஆஹ ‘‘ஹரிதே’’திஆதி³. தாலட்டீ²னம் மூலந்தி ஸம்ப³ந்தோ⁴. த³ந்தஸூசி வியாதி ஹத்தி²த³ந்தஸூசி விய. யதா² அஸம்புண்ணபூ⁴தகா³மோ ததியோ கோட்டா²ஸோ ந ஆக³தோ, ந ஏவம் அமூலகபூ⁴தகா³மோ. ஸோ பன ஆக³தோயேவாதி ஆஹ ‘‘அமூலகபூ⁴தகா³மே’’தி. அமூலிகலதா விய அமூலகபூ⁴தகா³மே ஸங்க³ஹம் க³ச்ச²தீதி அத்தோ².

வந்தா³காதி ருக்கா²த³னீ. ஸா ஹி ஸயம் ருக்க²ம் நிஸ்ஸாய ஜாயந்தீபி அத்தனோ நிஸ்ஸயானம் ருக்கா²னம் அத³னத்தா ப⁴க்க²னத்தா வதீ³யதி து²தீயதீதி ‘‘வந்தா³கா’’தி வுச்சதி. அஞ்ஞா வாதி வந்தா³காய அஞ்ஞா வா. தந்தி வந்தா³காதி³ம். ததோதி ருக்க²தோ. வனந்தி கு²த்³த³கோ க³ச்சோ². பகு³ம்போ³தி மஹாக³ச்சோ². த³ண்ட³கோதி ருக்கோ² த³ண்ட³யோக³தோ. தஸ்ஸாபீதி அமூலிகலதாயபி. அயமேவ வினிச்ச²யோதி வந்தா³காதி³கஸ்ஸ வினிச்ச²யோ விய அயம் வினிச்ச²யோ த³ட்ட²ப்³போ³தி யோஜனா. ‘‘த்³வே தீணி பத்தானீ’’தி வுத்தத்தா ஏகபத்தோ ஸஞ்ஜாயந்தோபி அக்³க³பீ³ஜஸங்க³ஹம் க³ச்ச²தீதி அத்தோ². ‘‘அனுபஸம்பன்னேனா’’தி பத³ம் ‘‘லித்தஸ்ஸா’’தி பதே³ கத்தா. நிதா³க⁴ஸமயேதி கி³ம்ஹகாலே. அப்³போ³ஹாரிகோதி ஆபத்தியா அங்க³ந்தி ந வோஹரிதப்³போ³. வோஹரிதும் ந அரஹதீதி அத்தோ². ஏதந்தி அப்³போ³ஹாரிகதம், ‘‘ஸசே…பே… பமஜ்ஜிதப்³பா³’’தி வசனம் வா.

அஹிம் ஸப்பம் சா²தே³தீதி அஹிச்ச²த்தம், தம்யேவ அஹிச்ச²த்தகம். யதா²கத²ஞ்சி ஹி ப்³யுப்பத்தி, ருள்ஹியா அத்த²வினிச்ச²யோ. தஸ்மாதி ததோ விகோபனதோ. தத்தா²தி அஹிச்ச²த்தகே. ஹேட்டா² ‘‘உத³கபப்படகோ’’தி வத்வா இத⁴ ‘‘ருக்க²பப்படிகாயபீ’’தி வுத்தத்தா பப்படகஸத்³தோ³ த்³விலிங்கோ³தி த³ட்ட²ப்³போ³. தந்தி பப்படிகம். டி²தம் நிய்யாஸந்தி ஸம்ப³ந்தோ⁴. ஏவம் ‘‘லக்³க³’’ந்தி ஏத்தா²பி. ஹத்த²குக்குச்சேனாதி ஹத்த²லோலேன. ‘‘சி²ந்த³ந்தஸ்ஸாபீ’’தி பதே³ ஹேது.

வாஸத்தி²கேனாதி வாஸம் இச்ச²ந்தேன. ‘‘ஓசினாபேதப்³பா³’’தி பதே³ கத்தா. உப்பாடேந்தேஹீதி உத்³த⁴ரந்தேஹி. தேஸந்தி ஸாமணேரானம். ஸாக²ம் க³ஹிதந்தி ஸம்ப³ந்தோ⁴. ட²பிதஸ்ஸ ஸிங்கீ³வேரஸ்ஸாதி யோஜனா.

சி²ஜ்ஜனகந்தி சி²ஜ்ஜனயுத்தம், சி²ஜ்ஜனாரஹந்தி அத்தோ². ‘‘சங்கமிதட்டா²னம் த³ஸ்ஸேஸ்ஸாமீ’’தி இமினா வத்தஸீஸேன சங்கமனம் வட்டதீதி த³ஸ்ஸேதி. ‘‘பி⁴ஜ்ஜதீ’’தி இமினா அபி⁴ஜ்ஜமானே க³ண்டி²பி காதப்³போ³தி த³ஸ்ஸேதி. தா³ருமக்கடகந்தி மக்கடஸ்ஸ ஹத்தோ² மக்கடோ உபசாரேன, மக்கடோ வியாதி மக்கடகோ, ஸதி³ஸத்தே² கோ. தா³ருஸங்கா²தோ மக்கடகோ தா³ருமக்கடகோ. தம் ஆகோடேந்தீதி ஸம்ப³ந்தோ⁴. அனியாமிதத்தாதி இமந்தி அனியாமிதத்தா வசனஸ்ஸ. இத³ம் மஹாஸாமஞ்ஞம், விஸேஸஸாமஞ்ஞம்பி வட்டதீதி ஆஹ ‘‘நாமம் க³ஹேத்வாபீ’’திஆதி³. ஸப்³ப³ந்தி ஸப்³ப³ம் வசனம்.

‘‘இமம் ஜானாதிஆதீ³ஸூ’’தி பத³ம் ‘‘ஏவமத்தோ² த³ட்ட²ப்³போ³’’தி பதே³ ஆதா⁴ரோ. இமம் மூலபே⁴ஸஜ்ஜம் ஜானாதி இமம் மூலபே⁴ஸஜ்ஜம் யோஜிதும் ஜானாதி யோஜனா. ஏத்தாவதாதி ‘‘இமம் ஜானா’’திஆதி³வசனமத்தேன. கப்பியந்தி ஸமணவோஹாரேன, வோஹாரஸ்ஸ வா யுத்தம் அனுரூபம். ஏத்தா²தி ‘‘கப்பியம் காதப்³ப³’’ந்தி வசனே. நிப்³ப³ட்டபீ³ஜமேவாதி ப²லதோ நிப்³ப³ட்டேத்வா விஸும் கதம் பீ³ஜம் ஏவ. தத்தா²தி ஸுத்தே. கரோந்தேன பி⁴க்கு²னா காதப்³ப³ந்தி யோஜனா. ‘‘கப்பியந்தி வத்வாவா’’தி இமினா பட²மம் கத்வா அக்³கி³ஸத்த²னகா²னி உத்³த⁴ரித்வா பச்சா² வத்தும் ந வட்டதீதி த³ஸ்ஸேதி. லோஹமயஸத்த²ஸ்ஸாதி அயதம்பா³தி³லோஹமயஸ்ஸ ஸத்த²ஸ்ஸ. தேஹீதி மனுஸ்ஸாதீ³னம் நகே²ஹி. தேஹீதி அஸ்ஸாதீ³னம் கு²ரேஹி. தேஹீதி ஹத்தி²னகே²ஹி. யேஹீதி நகே²ஹி. தத்த²ஜாதகேஹிபீதி தஸ்மிம் ஸத்தே² ஜாதகேஹிபி, நகே²ஹீதி ஸம்ப³ந்தோ⁴.

தத்தா²தி புரிமவசனாபேக்க²ம். ‘‘கப்பியம் கரோந்தேனா’’திஆதி³வசனமபேக்க²தி. ‘‘உச்சு²ம் கப்பியம் கரிஸ்ஸாமீ’’தி உச்சு²மேவ விஜ்ஜ²தி, பகே³வ. ‘‘தா³ரும் கப்பியம் கரிஸ்ஸாமீ’’தி உச்சு²ம் விஜ்ஜ²தி, ‘‘தா³ரும் கப்பியம் கரிஸ்ஸாமீ’’தி தா³ருமேவ வா விஜ்ஜ²தி, வட்டதி ஏகாப³த்³த⁴த்தாதி வத³ந்தி. தந்தி ரஜ்ஜும் வா வல்லிம் வா. ஸப்³ப³ம் க²ண்ட³ந்தி ஸம்ப³ந்தோ⁴. தத்தா²தி மரிசபக்கேஸு. கடாஹந்தி ஏகாய பா⁴ஜனவிகதியா நாமமேதம். இத⁴ பன பீ³ஜானம் பா⁴ஜனபா⁴வேன தம்ஸதி³ஸத்தா ப²லபே²க்³கு³பி ‘‘கடாஹ’’ந்தி வுச்சதி. ஏகாப³த்³த⁴ந்தி கடாஹேன ஏகதோ ஆப³த்³த⁴ம்.

தானீதி திணானி. தேனாதி ருக்க²பவட்டனாதி³னா. தத்ராதி தஸ்மிம் ட²பனபாதனட்டா²னே. ‘‘மனுஸ்ஸவிக்³க³ஹபாராஜிகவண்ணனாய’’ந்தி பத³ம் ‘‘வுத்த’’ந்தி பதே³ ஸாமஞ்ஞாதா⁴ரோ. பி⁴க்கு² அஜ்ஜோ²த்த²டோ ஹோதீதி ஸம்ப³ந்தோ⁴. ஓபாதேதி ஆவாடே. ஸோ ஹி அவபதனட்டா²னத்தா ‘‘ஓபாதோ’’தி வுச்சதி. ருக்க²ந்தி அஜ்ஜோ²த்த²டருக்க²ம். பூ⁴மிந்தி ஓபாததி²ரபூ⁴மிம். ஜீவிதஹேதூதி நிமித்தத்தே² பச்சத்தவசனம், ஜீவிதகாரணாதி அத்தோ². ‘‘பி⁴க்கு²னா’’தி பத³ம் ‘‘நிக்கா²மேது’’ந்தி பதே³ பா⁴வகத்தா, காரிதகத்தா வா. ‘‘அஜ்ஜோ²த்த²டபி⁴க்கு²’’ந்தி வா ‘‘ஓபாதபி⁴க்கு²’’ந்தி வா காரிதகம்மம் அஜ்ஜா²ஹரிதப்³ப³ம். தத்தா²தி அனாபத்திபா⁴வே, அனாபத்திபா⁴வஸ்ஸ வா. ஏதஸ்ஸாதி ஸுத்தஸ்ஸ. பரோ பன காருஞ்ஞேன கரோதீதி ஸம்ப³ந்தோ⁴. ஏதம்பீதி காருஞ்ஞம்பி. ஹீதி ஸச்சம், யஸ்மா வாதி. பட²மம்.

2. அஞ்ஞவாத³கஸிக்கா²பத³ம்

94. து³தியே அனாசாரந்தி அசரிதப்³ப³ம் காயவசீத்³வாரவீதிக்கமம். ஸப்³ப³னாமஸ்ஸ அனியமத்த²த்தா இத⁴ வசனந்தி ஆஹ ‘‘அஞ்ஞேன வசனேன அஞ்ஞம் வசன’’ந்தி. ஸோதி பி⁴க்கு², வத³தீதி ஸம்ப³ந்தோ⁴. கோதி கோ புக்³க³லோ. கிந்தி கிம் ஆபத்திம். கிஸ்மிந்தி கிஸ்மிம் வத்து²ஸ்மிம். கிந்தி கிம் கம்மம். கந்தி கம் புக்³க³லம். கிந்தி கிம் வசனம்.

ஏத்தா²தி ‘‘கோ ஆபன்னோ’’திஆதி³பாளியம். ‘‘பி⁴க்கூ²ஹீ’’தி பத³ம் ‘‘வுத்தோ’’தி பதே³ கத்தா. அஸாருப்பந்தி பி⁴க்கூ²னம் அஸாருப்பம். ஏஸோதி ஏஸோ அத்தோ², விப⁴வோதி அத்தோ². ஏதந்தி வத்து². ப⁴ணந்தோ வா ஹுத்வா அஞ்ஞேனஞ்ஞம் படிசரதீதி ஸம்ப³ந்தோ⁴. ஏத்தா²தி படிச்ச²ன்னாஸனே. ஸோதந்தி ஸோதத்³வாரம். சக்கு²ந்தி சக்கு²த்³வாரம்.

98. அஞ்ஞந்தி புச்சி²தத்த²தோ அஞ்ஞம் அபுச்சி²தமத்த²ம். பா⁴வப்பதா⁴னோயம் கத்துனித்³தே³ஸோதி ஆஹ ‘‘அஞ்ஞேனஞ்ஞம் படிசரணஸ்ஸேதம் நாம’’ந்தி. துண்ஹீபா⁴வஸ்ஸாதி அபா⁴ஸனஸ்ஸ. ஆத்யூபஸக்³கோ³ லுத்தனித்³தி³ட்டோ²தி ஆஹ ‘‘ஆரோபேதூ’’தி. ஏவம் ‘‘அரோபிதே’’தி ஏத்த²பி. தேனாஹ ‘‘அனாரோபிதே’’தி.

101. தந்தி அஞ்ஞவாத³கவிஹேஸகரோபனகம்மம். அஸ்ஸாதி ப⁴வேய்ய, ஹோதி வா.

102. கிந்தி கிம் வசனம். யேனாதி யேன ப்³யாதி⁴னா கதே²தும் ந ஸக்கோதி, தாதி³ஸோ ப்³யாதி⁴ முகே² ஹோதீதி யோஜனா. தப்பச்சயாதி ததோ கதி²தகாரணாதி. து³தியம்.

3. உஜ்ஜா²பனகஸிக்கா²பத³ம்

103. ததியே பி⁴க்கூ² உஜ்ஜா²பேந்தீதி ஏத்த² ‘‘பி⁴க்கூ²’’தி காரிதகம்மத்தா கரணத்தே² உபயோக³வசனந்தி ஆஹ ‘‘தேஹி பி⁴க்கூ²ஹீ’’தி. ஓகாரவிபரீதோ உகாரோதி ச ஜே²ஸத்³தோ³ ஞாணத்தோ²தி ச த³ஸ்ஸேந்தோ ஆஹ ‘‘அவஜானாபேந்தீ’’தி. ‘‘தம் ஆயஸ்மந்த’’ந்தி பத³ம் ‘‘அவஜானாபேந்தீ’’தி பதே³ தா⁴துகம்மம். அனேகத்த²த்தா தா⁴தூனம் ஜே²ஸத்³தோ³ ஓலோகனத்தோ² ச சிந்தனத்தோ² ச ஹோதி, தேனாஹ ‘‘ஓலோகாபேந்தீ’’திஆதி³. ஏத்தா²தி ‘‘பி⁴க்கூ² உஜ்ஜா²பேந்தீ’’தி பதே³. ச²ந்தா³யாதி ச²ந்த³த்த²ம். யேஸம் ஸேனாஸனானி ச பஞ்ஞபேதி, ப⁴த்தானி ச உத்³தி³ஸதி, தேஸம் அத்தனி பேமத்த²ந்தி அத்தோ². அட்ட²கதா²யம் பன ‘‘ச²ந்தா³யாதி ச²ந்தே³னா’’தி வுத்தம். இமினா லிங்க³விபல்லாஸனயோ வுத்தோ. பரேஸம் அத்தனோ பேமேனாதி அத்தோ². பக்க²பாதேனாதி அத்தனோ பக்கே² பாதாபனேன.

105. உஜ்ஜா²பேந்தி அனேனாதி உஜ்ஜா²பனகம். கி²ய்யந்தி அனேனாதி கி²ய்யனகந்தி த³ஸ்ஸேந்தோ ஆஹ ‘‘யேன வசனேனா’’திஆதி³.

106. உபஸம்பன்னம் ஸங்கே⁴ன ஸம்மதம் மங்குகத்துகாமோதி ஸம்ப³ந்த⁴ம் த³ஸ்ஸேந்தோ ஆஹ ‘‘உபஸம்பன்னம் ஸங்கே⁴ன ஸம்மத’’ந்திஆதி³. ஸம்ப³ஜ்ஜ²னம் ஸம்ப³ந்தோ⁴, காதப்³போ³தி யோஜனா. உபஸம்பன்னஸ்ஸ ஸங்கே⁴ன ஸம்மதஸ்ஸ அவண்ணம் கத்துகாமோ அயஸம் கத்துகாமோதி விப⁴த்திவிபரிணாமேன ஸம்ப³ந்த⁴ம் த³ஸ்ஸேந்தோ ஆஹ ‘‘விப⁴த்திவிபரிணாமோ காதப்³போ³’’தி. ‘‘வஸேனா’’தி பத³ம் விப⁴த்திவிபரிணாமோ காதப்³போ³’’தி பதே³ விஸேஸனம். யஸ்மா விஸேஸோ நத்தி², தஸ்மா கதந்தி யோஜனா. தந்தி ‘‘கி²ய்யனக’’ந்தி பத³ம். ஸோ ச பி⁴க்கூ²தி உஜ்ஜா²பனகோ ச கி²ய்யனகோ ச ஸோ ச பி⁴க்கு². அதா²தி தஸ்மா உஜ்ஜா²பனககி²ய்யனககரத்தா. அஸ்ஸாதி பி⁴க்கு²னோ. அஸ்ஸாதி ப⁴வேய்ய.

‘‘உபஸம்பன்ன’’ந்தி பத³ம் ‘‘உஜ்ஜா²பேதீ’’தி பதே³ தா⁴துகம்மம் ‘‘அனுபஸம்பன்ன’’ந்தி பத³ம் காரிதகம்மம், ‘‘அனுபஸம்பன்ன’’ந்தி பத³ம் ‘‘உஜ்ஜா²பேதீ’’தி காரிதகிரியம் அபேக்கி²த்வா கம்மம் ஹோதி. ‘‘கி²ய்யதீ’’தி ஸுத்³த⁴கிரியாய அபேக்கா²ய விப⁴த்திவிபல்லாஸோ ஹோதீதி ஆஹ ‘‘தஸ்ஸ வா’’திஆதி³. தஸ்ஸாதி அனுபஸம்பன்னஸ்ஸ ஸந்திகேதி ஸம்ப³ந்தோ⁴. தந்தி ஸங்கே⁴ன ஸம்மதம் உபஸம்பன்னம். ‘‘ஸங்கே⁴ன அஸம்மத’’ந்தி ஏத்த² ந அபலோகனகம்மேன அஸம்மதம், கம்மவாசாய பன அஸம்மதந்தி ஆஹ ‘‘கம்மவாசாயா’’திஆதி³. த்³வே தயோ ஹுத்வா கம்மவாசாய ஸம்மனிதுமஸக்குணேய்யத்தா அஸம்மதந்தி ச த³ஸ்ஸேந்தோ ஆஹ ‘‘யத்ரா’’திஆதி³. யத்ராதி யஸ்மிம் விஹாரே. ‘‘அனுபஸம்பன்னம் ஸங்கே⁴ன ஸம்மத’’ந்தி ஏத்த² அனுபஸம்பன்னஸ்ஸ ஸம்முதியோ தா³துமஸக்குணேய்யத்தா புப்³ப³வோஹாரவஸேன ஸம்மதந்தி வுத்தந்தி த³ஸ்ஸேந்தோ ஆஹ ‘‘கிஞ்சாபீ’’திஆதி³. தந்தி அனுபஸம்பன்னபா⁴வே டி²தம். ப்³யத்தஸ்ஸாதி வியத்தஸ்ஸ. ஸங்கே⁴ன வா கதோதி யோஜனாதி. ததியம்.

4. பட²மஸேனாஸனஸிக்கா²பத³ம்

108. சதுத்தே² ஹிமமேவ ஹிமந்தோ, ஹிமந்தே நியுத்தோ ஹேமந்திகோ, காலோதி ஆஹ ‘‘ஹேமந்தகாலே’’தி. ஓதாபேந்தா பக்கமிம்ஸூதி ஸம்ப³ந்தோ⁴. காலஸத்³த³ஸ்ஸ ஸம்ப³ந்தி⁴ஸத்³த³த்தா ஸம்ப³ந்தா⁴பேக்கோ²தி ஆஹ ‘‘யஸ்ஸ கஸ்ஸசீ’’தி. ஹிமவஸ்ஸேனாதி ஹிமேன ச வஸ்ஸேன ச.

110. ‘‘வஸ்ஸிகோ’’தி ந ஸங்கேதாதி அவஸ்ஸிகஸங்கேதா. ‘‘அட்ட² மாஸே’’தி ஸாமஞ்ஞதோ வுத்தேபி ‘‘அவஸ்ஸிகஸங்கேதே’’தி விஸேஸிதத்தா ஹேமந்திககி³ம்ஹிகமாஸாயேவ க³ஹேதப்³பா³தி ஆஹ ‘‘சத்தாரோ ஹேமந்திகே’’திஆதி³. யத்தா²தி யஸ்மிம் ருக்கே². ந ஊஹத³ந்தீதி ஸம்ப³ந்தோ⁴. ‘‘காகா வா’’தி ஏத்த² வாஸத்³தோ³ ஸம்பிண்ட³னத்தோ². தேனாஹ ‘‘அஞ்ஞே வா ஸகுந்தா’’தி. தஸ்மாதி யஸ்மா அனுஜானாதி, தஸ்மா. யத்தா²தி யஸ்மிம் ருக்கே², விஸ்ஸமித்வா க³ச்ச²ந்தீதி யோஜனா. யஸ்மிந்தி ருக்கே², கத்வா வஸந்தீதி யோஜனா. அட்ட² மாஸே ஏவாதி ஸம்ப⁴வதோ ஆஹ ‘‘யேஸு ஜனபதே³ஸூ’’திஆதி³. தேஸுபீதி ஜனபதே³ஸுபி. அவஸ்ஸிகஸங்கேதே ஏவாதி ஸம்ப⁴வதோ ஆஹ ‘‘யத்தா²’’திஆதி³. யத்தா²தி யேஸு ஜனபதே³ஸு. ‘‘விக³தவலாஹகம் விஸுத்³த⁴ம் நப⁴ம் ஹோதீ’’தி இமினா ஸசே அவிக³தவலாஹகம் அவிஸுத்³த⁴ம் நப⁴ம் ஹோதி, நிக்கி²பிதும் ந வட்டதீதி தீ³பேதி. ‘‘ஏவரூபே காலே’’தி பத³ம் ‘‘நிக்கி²பிதும் வட்டதீ’’தி பதே³ ஆதா⁴ரோ.

அப்³போ⁴காஸிகேனாபீதி அப்³போ⁴காஸது⁴தங்க³யுத்தேனாபி. பிஸத்³தோ³ ருக்க²மூலிகஸ்ஸ அபேக்க²கோ. வத்தம் வித்தா²ரேந்தோ ஆஹ ‘‘தஸ்ஸ ஹீ’’திஆதி³. தஸ்ஸாதி அப்³போ⁴காஸிகஸ்ஸ. ஹிஸத்³தோ³ வித்தா²ரஜோதகோ. தத்தே²வாதி புக்³க³லிகமஞ்சகேயேவ. ஸங்கி⁴கம் மஞ்சந்தி ஸம்ப³ந்தோ⁴. வீதமஞ்சகோதி வாயிதமஞ்சகோ. தஸ்மிந்தி வீதமஞ்சகே. புராணமஞ்சகோ நஸ்ஸந்தோபி அனக்³கோ⁴தி ஆஹ ‘‘புராணமஞ்சகோ க³ஹேதப்³போ³’’தி. சம்மேன அவனஹிதப்³போ³தி ஓனத்³தோ⁴, ஸோ ஏவ ஓனத்³த⁴கோ. க³ஹேத்வா ச பன பஞ்ஞபேத்வா நிபஜ்ஜிதும் ந வட்டதீதி யோஜனா. அஸமயேதி வஸ்ஸிகஸங்கா²தே அகாலே. சதுக்³கு³ணேனாபீதி சதுபடலேனபி. வட்டந்தி வலாஹகா ஆவட்டந்தி அஸ்மிம் ஸமயேதி வட்டுலோ, ஸோ ஏவ வட்டலிகோ, ஸத்தாஹம் வட்டலிகோ, ஸத்தாஹோ வா வட்டலிகோ ஸத்தாஹவட்டலிகோ, ஸோ ஆதி³ யேஸம் தானீதி ஸத்தாஹவட்டலிகாதீ³னி. ஆதி³ஸத்³தே³ன ஸத்தாஹதோ ஊனாதி⁴கானி க³ஹேதப்³பா³னி. காயானுக³திகத்தாதி காயம் அனுக³மகத்தா காயஸதி³ஸத்தாதி அத்தோ².

பண்ணகுடீஸூதி பண்ணேன சா²தி³தகுடீஸு. ஸபா⁴க³பி⁴க்கூ²னந்தி அத்தனா ஸபா⁴க³பி⁴க்கூ²னம், ஸந்திகந்தி ஸம்ப³ந்தோ⁴. அனோவஸ்ஸகே டா²னேதி யோஜனா. லக்³கே³த்வாதி லம்பே³த்வா, அயமேவ வா பாடோ². ‘‘ஸம்மஜ்ஜனி’’ந்தி பத³ம் ‘‘க³ஹேத்வா’’தி பதே³ அவுத்தகம்மம், ‘‘ட²பேதப்³பா³’’தி பதே³ வுத்தகம்மம். தோ⁴வித்வாதி ஸம்மஜ்ஜனிம் ஸுத்³த⁴ம் கத்வா. உபோஸதா²கா³ராதீ³ஸூதிஆதி³ஸத்³தே³ன பரிவேணாதீ³னி க³ஹேதப்³பா³னி.

யோ பன பி⁴க்கு² க³ந்துகாமோ ஹோதி, தேனாதி யோஜனா. தத்தா²தி ஸாலாயம். யத்த² கத்த²சீதி யஸ்மிம் கிஸ்மிஞ்சி டா²னே. பாகதிகட்டா²னேதி பகதியா க³ஹிதட்டா²னே. தத்ர தத்ரேவாதி தேஸு தேஸு சேதியங்க³ணாதீ³ஸுயேவ. அஸனஸாலந்தி அஸந்தி ப⁴க்க²ந்தி அஸ்ஸம் ஸாலாயந்தி அஸனா, அஸனா ச ஸா ஸாலா சேதி அஸனஸாலா, போ⁴ஜனஸாலாதி அத்தோ². தத்ராதி தஸ்ஸ ஸம்மஜ்ஜந்தஸ்ஸ, தஸ்மிம் ‘‘வத்தம் ஜானிதப்³ப³’’ந்தி பாடே² வா. மஜ்ஜ²தோதி பவித்ததோ, ஸுத்³த⁴ட்டா²னதோதி அத்தோ². பாத³ட்டா²னாபி⁴முகா²தி ஸம்மஜ்ஜந்தஸ்ஸ பாத³ட்டா²னம் அபி⁴முகா². வாலிகா ஹரிதப்³பா³தி பம்ஸு ச வாலிகா ச அபனேதப்³பா³. ஸம்முஞ்சனீஸலாகாய பரம் பேல்லேதப்³பா³தி அதி⁴ப்பாயோ. ப³ஹீதி ஸம்மஜ்ஜிதப்³ப³தலதோ ப³ஹி.

111. மஸாரகோதீதி ஏத்த² இதிஸத்³தோ³ நாமபரியாயோ, மஸாரகோ நாமாதி அத்தோ². ஏவம் பு³ந்தி³காப³த்³தோ⁴தீதிஆதீ³ஸுபி. பாதே³ மஸித்வா விஜ்ஜி²த்வா தத்த² அடனியோ பவேஸேதப்³பா³ ஏத்தா²தி மஸாரகோ. பு³ந்தோ³ ஏவ பு³ந்தி³கோ, பாதோ³, தஸ்மிம் ஆப³த்³தா⁴ ப³ந்தி⁴தா அடனீ யஸ்ஸாதி பு³ந்தி³காப³த்³தோ⁴. குளீரஸ்ஸ பாதோ³ விய பாதோ³ யஸ்ஸாதி குளீரபாத³கோ, யதா² குளீரோ வங்கபாதோ³ ஹோதி, ஏவம் வங்கபாதோ³தி வுத்தம் ஹோதி. ஆஹச்ச அங்கே³ விஜ்ஜி²த்வா தத்த² பவேஸிதோ பாதோ³ யஸ்ஸாதி ஆஹச்சபாத³கோ. ஆணிந்தி அக்³க³கி²லம். மஞ்சதி புக்³க³லம் தா⁴ரேதீதி மஞ்சோ. பீட²தி விஸமது³க்க²ம் ஹிம்ஸதீதி பீட²ம். பணவோதி ஏகோ தூரியவிஸேஸோ, தஸ்ஸ ஸண்டா²னம் கத்வாதி அத்தோ². தஞ்ஹி ஏதரஹி பு³த்³த⁴படிமஸ்ஸ பல்லங்கஸண்டா²னம் ஹோதி. தந்தி கோச்ச²ம். கரோந்தி கிராதி ஸம்ப³ந்தோ⁴. ஏத்தா²தி ஸேனாஸனபரிபோ⁴கே³. ஹீதி ஸச்சம். தந்தி கோச்ச²ம் மஹக்³க⁴ம் ஹோதி, மஹக்³க⁴த்தா ப⁴த்³த³பீட²ந்திபி வுச்சதி. யேனாதி யேன பி⁴க்கு²னா. ‘‘தா²மமஜ்ஜி²மஸ்ஸா’’தி பதே³ன பமாணமஜ்ஜி²மம் நிவத்தேதி.

ஏத்தா²தி ‘‘அனாபுச்ச²ம் வா க³ச்சே²ய்யா’’தி பதே³. தே²ரோ ஆணாபேதீதி யோஜனா. ஆணாபேதீதி ச ஆண-தா⁴துயா ஏவ பேஸனஸங்கா²தஸ்ஸ ஹேத்வத்த²ஸ்ஸ வாசகத்தா ணாபேஸத்³தோ³ ஸ்வத்தோ²வ. ஸோதி த³ஹரோ. ததா²தி யதா² தே²ரேன வுத்தோ, ததா² கத்வாதி அத்தோ². தத்தா²தி தி³வாட்டா²னே, மஞ்சபீடே² வா. ததோதி ட²பனகாலதோ. பரிபு³ந்தே⁴தி ஹிம் ஸேதீதி பலிபோ³தோ⁴, பரிஸத்³தோ³ உபஸக்³கோ³, ஸோ விகாரவஸேன அஞ்ஞதா² ஜாதோ. ஸோ பலிபோ³தோ⁴ அஞ்ஞத்த² ஆவாஸாதி³கோ, இத⁴ பன ஸந்த²ராபிதமஞ்சாதி³கோ. ஸாயந்தி ஸாயன்ஹே, பு⁴ம்மத்தே² சேதம் உபயோக³வசனம். தே²ரோ ப⁴ணதீதி ஸம்ப³ந்தோ⁴. தத்தா²தி மஞ்சபீடே². ‘‘பா³லோ ஹோதீ’’தி வத்வா தஸ்ஸ அத்த²ம் த³ஸ்ஸேந்தோ ஆஹ ‘‘அனுக்³க³ஹிதவத்தோ’’தி. அனுக்³க³ஹிதம் வத்தம் யேனாதி அனுக்³க³ஹிதவத்தோ, தே²ரோ. தஜ்ஜேதீதி உப்³பே³ஜேதி. தஸ்மிந்தி த³ஹரே. அஸ்ஸாதி தே²ரஸ்ஸ.

ஆணத்திக்க²ணேயேவாதி தே²ரஸ்ஸ பேஸனக்க²ணேயேவ. த³ஹரோ வத³தீதி யோஜனா. ‘‘தே²ரோ’’தி பத³ம் ‘‘வத்வா க³ச்ச²தீ’’தி பத³த்³வயே கத்தா, ‘‘காரேதப்³போ³’’தி பதே³ கம்மம். நந்தி மஞ்சபீட²ம், ‘‘பஞ்ஞபேத்வா’’திபத³மபேக்கி²ய ஏவம் வுத்தம். நந்தி த³ஹரம் வா. ‘‘வத்வா’’தி பத³மபேக்கி²ய ஏவம் வுத்தம். தத்தே²வாதி மஞ்சபீடே²யேவ. அஸ்ஸாதி தே²ரஸ்ஸ. தத்தா²தி தி³வாட்டா²னே. போ⁴ஜனஸாலதோ அஞ்ஞத்த² க³ச்ச²ந்தோதி போ⁴ஜனஸாலதோ நிக்க²மித்வா மஞ்சபீட²பஞ்ஞாபனட்டா²னதோ அஞ்ஞம் டா²னம் க³ச்ச²ந்தோ, தே²ரோதி யோஜனா. தத்தே²வாதி தி³வாட்டா²னேயேவ. யத்ரிச்ச²தீதி யம் டா²னம் க³ந்துமிச்ச²தீதி அத்தோ². அந்தரஸன்னிபாதேதி ஸகலம் அஹோரத்தம் அஸன்னிபாதேத்வா அந்தரே ஸன்னிபாதே ஸதீதி யோஜனா.

தத்தா²தி தஸ்மிம் டா²னே. ஆக³ந்துகா க³ண்ஹந்தீதி ஸம்ப³ந்தோ⁴. ததோதி க³ண்ஹனதோ. தேஸந்தி ஆக³ந்துகானம். யேஹீதி ஆவாஸிகோ வா ஹோது, ஆக³ந்துகோ வா, யேஹி பி⁴க்கூ²ஹி. தேதி நிஸின்னகபி⁴க்கூ². உத்³த⁴ம் பாளிபாட²ம் ஸாரேதி பவத்தேதீதி உஸ்ஸாரகோ. த⁴ம்மகதா²யம் ஸாதூ⁴தி த⁴ம்மகதி²கோ. தஸ்மிந்தி உஸ்ஸாரகே வா த⁴ம்மகதி²கே வா. அஹோரத்தந்தி அஹோ ச ரத்தி ச அஹோரத்தம், அச்சந்தஸம்யோக³பத³ம். இதரஸ்மிந்தி பட²மம் நிஸின்னபி⁴க்கு²தோ அஞ்ஞஸ்மிம் பி⁴க்கு²ம்ஹீதி யோஜனா. அந்தோஉபசாரட்டே²யேவாதி லேட்³டு³பாதஸங்கா²தஸ்ஸ உபசாரஸ்ஸ அந்தோ டி²தேயேவ, அனாத³ரே சேதம் பு⁴ம்மம். ஸப்³ப³த்தா²தி ஆபத்திவாரஅனாபத்திவாரேஸு.

112. சிமிலிகம் வாதிஆதீ³ஸு வினிச்ச²யோ ஏவம் வேதி³தப்³போ³தி யோஜனா. தந்தி சிமிலிகத்த²ரணம். உத்தரி அத்த²ரிதப்³ப³ந்தி உத்தரத்த²ரணந்தி த³ஸ்ஸேந்தோ ஆஹ ‘‘உத்தரத்த²ரணம் நாமா’’திஆதி³. பூ⁴மியந்தி ஸுதா⁴தி³பரிகம்மேன அகதாயம் பகதிபூ⁴மியம். சம்மக²ண்டோ³தி ஏத்த² சம்மம்யேவ அந்தே க²ண்ட³த்தா சி²ன்னத்தா சம்மக²ண்டோ³தி வுச்சதி. நனு ஸீஹசம்மாதீ³னி ந கப்பந்தீதி ஆஹ ‘‘அட்ட²கதா²ஸு ஹீ’’திஆதி³. ஹீதி ஸச்சம். தஸ்மாதி யஸ்மா ந தி³ஸ்ஸதி, தஸ்மா. பரிஹரணேயேவாதி அத்தனோ ஸந்தகந்தி பரிச்சி²ந்தி³த்வா, புக்³க³லிகந்தி வா பரிக்³க³ஹேத்வா தம் தம் டா²னம் ஹரணேயேவ. பாதோ³ புஞ்சீ²யதி ஸோதீ⁴யதி ஏதாயாதி பாத³புஞ்ச²னீதி கத்வா ரஜ்ஜுபிலோதிகாயோ பாத³புஞ்ச²னீதி வுச்சதீதி ஆஹ ‘‘பாத³புஞ்ச²னீ நாமா’’திஆதி³. மயஸத்³த³லோபம் கத்வா ப²லகபீட²ந்தி வுத்தந்தி ஆஹ ‘‘ப²லகபீட²ம் நாம ப²லகமயம் பீட²’’ந்தி. ப²லகஞ்ச பீட²ஞ்ச ப²லகபீட²ந்தி வா த³ஸ்ஸேதும் வுத்தம் ‘‘அத² வா’’தி. ஏதேனாதி ‘‘ப²லகபீட²’’ந்தி பதே³ன. ‘‘ஸங்க³ஹித’’ந்தி பதே³ கரணம், கத்தா வா. பீ³ஜனிபத்தகந்தி சதுரஸ்ஸபீ³ஜனீயேவ ஸகுணபத்தஸதி³ஸத்தா பீ³ஜனிபத்தகம், ஸதி³ஸத்தே² கோ. ‘‘அஜ்ஜோ²காஸே’’தி பத³ம் ‘‘பசித்வா’’தி பதே³ ஆதா⁴ரோ. அக்³கி³ஸாலாயந்தி அக்³கி³னா பசனஸாலாயம். பப்³பா⁴ரேதி லேணஸதி³ஸே பப்³பா⁴ரே. யத்தா²தி யஸ்மிம் டா²னே.

யஸ்மிந்தி புக்³க³லே. ‘‘அத்தனோ புக்³க³லிகமிவ ஹோதீ’’தி இமினா அனாபத்தீதி த³ஸ்ஸேதி.

113. யோ பி⁴க்கு² வா லஜ்ஜீ ஹோதி, ததா²ரூபம் பி⁴க்கு²ம் வா தி யோஜனா. ‘‘லஜ்ஜீ ஹோதீ’’தி வத்வா தஸ்ஸ அத்த²ம் த³ஸ்ஸேந்தோ ஆஹ ‘‘அத்தனோ பலிபோ³த⁴ம் விய மஞ்ஞதீ’’தி. யோதி ஆபுச்ச²கோ பி⁴க்கு². ‘‘கேனசி உபத்³து³தம் ஹோதீ’’தி ஸங்கே²பேன வுத்தமத்த²ம் வித்தா²ரேந்தோ ஆஹ ‘‘ஸசேபி ஹீ’’திஆதி³. ஹிஸத்³தோ³ வித்தா²ரஜோதகோ. வுட்³ட⁴தரோ பி⁴க்கு² க³ண்ஹாதீதி ஸம்ப³ந்தோ⁴. தம் பதே³ஸந்தி ஸேனாஸனட்ட²பிதட்டா²னம். ஆபதா³ஸூதி விபத்தீஸூதி. சதுத்த²ம்.

5. து³தியஸேனாஸனஸிக்கா²பத³ம்

116. பஞ்சமே மஞ்சகபி⁴ஸீதி மஞ்சே அத்த²ரிதப்³போ³ மஞ்சகோ, ஸோயேவ பி⁴ஸீதி மஞ்சகபி⁴ஸி. ஏவம் பீட²கபி⁴ஸிபி. பாவாரோ கோஜவோதி த்³வேயேவ பச்சத்த²ரணந்தி வுத்தாதி ஆஹ ‘‘பாவாரோ’’திஆதி³. வுத்தந்தி அட்ட²கதா²ஸு வுத்தம். து³தியாதிக்கமேதி து³தியபாதா³திக்கமே. ஸேனாஸனதோதி ஸசே ஏகம் ஸேனாஸனம் ஹோதி, ததோ. அத² ப³ஹூனி ஸேனாஸனானி ஹோந்தி, ஸப்³ப³பச்சி²மஸேனாஸனதோ. ஏகோ லேட்³டு³பாதோ ஸேனாஸனஸ்ஸ உபசாரோ ஹோதி, ஏகோ பரிக்கே²பாரஹோதி ஆஹ ‘‘த்³வே லேட்³டு³பாதா’’தி.

ஸசே பி⁴க்கு², ஸாமணேரோ, ஆராமிகோ சாதி தயோ ஹோந்தி, பி⁴க்கு²ம் அனாபுச்சி²த்வா ஸாமணேரோ வா ஆராமிகோ வா ந ஆபுச்சி²தப்³போ³. அத² ஸாமணேரோ, ஆராமிகோ சாதி த்³வே ஹோந்தி, ஸாமணேரம் அனாபுச்சி²த்வா ஆராமிகோவ ந ஆபுச்சி²தப்³போ³தி த³ஸ்ஸேந்தோ ஆஹ ‘‘பி⁴க்கு²ம்ஹி ஸதீ’’திஆதி³. தீஸுபி அஸந்தேஸு ஆபுச்சி²தப்³ப³விதி⁴ம் த³ஸ்ஸேதும் வுத்தம் ‘‘தஸ்மிம்பி அஸதீ’’திஆதி³. யேனாதி உபாஸகேன, ‘‘காரிதோ’’தி பதே³ கத்தா. தஸ்ஸாதி விஹாரஸாமிகஸ்ஸ. தஸ்மிம்பி அஸதி க³ந்தப்³ப³ந்தி யோஜனா. பாஸாணேஸூதி பாஸாணப²லகேஸு. ஸசே உஸ்ஸஹதீதி ஸசே ஸக்கோதி. உஸ்ஸஹந்தேன பி⁴க்கு²னா ட²பேதப்³ப³ந்தி யோஜனா. தேபீதி உபாஸகாபி, ந ஸம்படிச்ச²ந்தீதி ஸம்ப³ந்தோ⁴. தத்தா²தி தா³ருப⁴ண்டா³தீ³ஸு.

பரிச்சே²தா³காரேன வேணீயதி தி³ஸ்ஸதீதி பரிவேணம். ‘‘அத² கோ²’’தி பத³ம் ‘‘வேதி³தப்³ப³’’ந்தி பதே³ அருசிலக்க²ணம். ‘‘ஆஸன்னே’’தி இமினா உபசாரஸத்³த³ஸ்ஸ உபட்டா²னத்த²அஞ்ஞரோபனத்தே² நிவத்தேதி. யஸ்மா வம்மிகராஸியேவ ஹோதி, தஸ்மாதி யோஜனா. உபசினந்தீதி உபசிகா, தாஹி நிமித்தபூ⁴தாஹி பலுஜ்ஜதி நஸ்ஸதீதி அத்தோ². ஸேனாஸனந்தி விஹாரம். கா²யிதுந்தி கா²தி³தும், அயமேவ வா பாடோ². தந்தி மஞ்சபீட²ம். மஞ்சபீட²ம் விஹாரே அபஞ்ஞபேத்வா விஹாரூபசாரே பஞ்ஞாபனஸ்ஸ விஸேஸப²லம் த³ஸ்ஸேதும் ஆஹ ‘‘விஹாரூபசாரே பனா’’திஆதி³. விஹாரூபசாரே பஞ்ஞபிதந்தி ஸம்ப³ந்தோ⁴.

118. ‘‘க³ச்ச²ந்தேனா’’தி பத³ம் ‘‘க³ந்தப்³ப³’’ந்தி பதே³ கத்தா. ததே²வாதி யதா² புரிமபி⁴க்கு² கரோதி, ததே²வ. வஸந்தேன பி⁴க்கு²னா படிஸாமேதப்³ப³ந்தி யோஜனா. ரத்திட்டா²னந்தி ரத்திம் வஸனட்டா²னம்.

யா தீ³க⁴ஸாலா வா யா பண்ணஸாலா வா உபசிகானம் உட்டா²னட்டா²னம் ஹோதி, ததோதி யோஜனா. தஸ்மிந்தி தீ³க⁴ஸாலாதி³கே. ஹீதி ஸச்சம், யஸ்மா வா, ஸந்திட்ட²ந்தீதி ஸம்ப³ந்தோ⁴. ஸிலுச்சயோதி பப்³ப³தோ, தஸ்மிம் லேணம் ஸிலுச்சயலேணம், பப்³ப³தகு³ஹாதி அத்தோ². உபசிகாஸங்காதி உபசிகானம் உட்டா²னட்டா²னந்தி ஆஸங்கா. ததோதி பாஸாணபிட்டி²யம் வா பாஸாணத²ம்பே⁴ஸு வா கதஸேனாஸனாதி³தோ. ஆக³ந்துகோ யோ பி⁴க்கு² அனுவத்தந்தோ வஸதீதி ஸம்ப³ந்தோ⁴. ஸோதி ஆக³ந்துகோ பி⁴க்கு². புன ஸோதி ஆக³ந்துகோ பி⁴க்கு²யேவ. ததோதி க³ஹேத்வா இஸ்ஸரியேன வஸனதோ. உபோ⁴பீதி ஆவாஸிகோபி ஆக³ந்துகோபி த்³வே பி⁴க்கூ². தேஸூதி த்³வீஸு தீஸு. பச்சி²மஸ்ஸாதி ஸப்³ப³பச்சி²மஸ்ஸ. ஆபோ⁴கே³னாதி ஆபோ⁴க³மத்தேன முத்தி நத்தி², ஆபுச்சி²தப்³ப³மேவாதி அதி⁴ப்பாயோ. அஞ்ஞதோதி அஞ்ஞாவாஸதோ. அஞ்ஞத்ராதி அஞ்ஞஸ்மிம் ஆவாஸே. தத்தே²வாதி ஆனீதாவாஸேயேவ. தேனாதி வுட்³ட⁴தரேன, ‘‘ஸம்படிச்சி²தே’’தி பதே³ கத்தா. ஸம்படிச்சி²தேதி வுட்³ட⁴தரேன ஸம்படிச்சி²தேபி இதரஸ்ஸ க³ந்தும் வட்டதி ஆபுச்சி²தத்தாதி வத³ந்தி. நட்ட²ம் வாதி நட்டே² வா ஸேனாஸனே ஸதி கீ³வா ந ஹோதீதி யோஜனா. அஞ்ஞஸ்ஸாதி அவிஸ்ஸாஸிகபுக்³க³லஸ்ஸ. நட்டா²னீதி நட்டே²ஸு மஞ்சபீடே²ஸு ஸந்தேஸு.

வுட்³ட⁴தரோ பி⁴க்கு² ச இஸ்ஸரியோ ச யக்கோ² ச ஸீஹோ ச வாளமிகோ³ ச கண்ஹஸப்போ ச வுட்³ட⁴…பே… கண்ஹஸப்பா, தே ஆத³யோ யேஸம் தேதி வுட்³ட⁴…பே… கண்ஹஸப்பாத³யோ, தேஸு. ஆதி³ஸத்³தே³ன பேதாத³யோ ஸங்க³ண்ஹாதி. யத்தா²தி யஸ்மிம் டா²னே. அஸ்ஸாதி பி⁴க்கு²னோ. ‘‘பலிபு³த்³தோ⁴’’தி பத³ஸ்ஸ அத்த²ம் த³ஸ்ஸேதும் வுத்தம் ‘‘உபத்³து³தோ’’தி. பஞ்சமம்.

6. அனுபக²ஜ்ஜஸிக்கா²பத³ம்

119. ச²ட்டே² ரூம்பி⁴த்வாதி நிவாரேத்வா, ஆவரணம் கத்வாதி அத்தோ². வஸ்ஸக்³கே³னாதி வஸ்ஸக³ணனாய. அனுபக²ஜ்ஜாதி ஏத்த² க²த³ ஹிம்ஸாயந்தி தா⁴துபாடே²ஸு (ஸத்³த³னீதிதா⁴துமாலாயம் 15 த³காரந்ததா⁴து) வுத்தத்தா க²த³ஸத்³தோ³ ஹிம்ஸத்தோ² ஹோதி. அனுஸமீபம் உபக³ந்த்வா க²த³னம் ஹிம் ஸனம் நாம அனுஸமீபம் பவிஸனமேவாதி த³ஸ்ஸேந்தோ ஆஹ ‘‘அனுபவிஸித்வா’’தி.

120. ‘‘ஜான’’ந்தி ஏத்த² ஜானனாகாரம் த³ஸ்ஸேதும் வுத்தம் ‘‘அனுட்டா²பனீயோ அய’’ந்தி. தேனேவாதி ஜானனஹேதுனா ஏவ. அஸ்ஸாதி ‘‘ஜான’’ந்திபத³ஸ்ஸ. ஹீதி வித்தா²ரஜோதகோ. ஸங்கோ⁴ பன தே³தீதி ஸம்ப³ந்தோ⁴. யஸ்ஸாதி வுட்³டா⁴தீ³ஸு அஞ்ஞதரஸ்ஸ. ஏத்தா²தி வுட்³ட⁴கி³லானாதீ³ஸு. கி³லானஸ்ஸபி தே³தீதி யோஜனா. ‘‘கி³லானோ’’தி பத³ம் ‘‘ந பீளேதப்³போ³, அனுகம்பிதப்³போ³’’திபத³த்³வயே வுத்தகம்மம். ‘‘காமஞ்சா’’தி பத³ஸ்ஸ அனுக்³க³ஹத்த²ஜோதகத்தா பனஸத்³தோ³ க³ரஹத்த²ஜோதகோ.

121. மஞ்சபீடா²னம் உபசாரோ நாமாதி ஸம்ப³ந்தோ⁴. யதோதி யதோ குதோசி டா²னதோ. யாவ மஞ்சபீட²ம் அத்தி², தாவ உபசாரோ நாமாதி யோஜனா. தஸ்மிம் உபசாரே டி²தஸ்ஸ பி⁴க்கு²னோ உபசாரேதி ஸம்ப³ந்தோ⁴.

‘‘அபி⁴னிஸீத³தி வா அபி⁴னிபஜ்ஜதி வா’’தி ஏத்த² வாஸத்³த³ஸ்ஸ அனியமவிகப்பத்த²ம் த³ஸ்ஸேதும் வுத்தம் ‘‘அபி⁴னிஸீத³னமத்தேனா’’திஆதி³.

122. இதோதி வாரதோ. இதா⁴தி இமஸ்மிம் பாசித்தியவாரே. யதா² வுத்தோ, ஏவந்தி ஸம்ப³ந்தோ⁴. ஸப்³ப³த்தே²வாதி ஸப்³பே³ஸு ஏவ விஹாரபரிவேணேஸு. அஸ்ஸாதி விஸபா⁴க³புக்³க³லஸ்ஸ. இதா⁴பீதி இமஸ்மிம்பி ஸிக்கா²பதே³. தத்தா²தி விஸ்ஸாஸிகபுக்³க³லே.

123. பாளியம் ‘‘ஆபதா³ஸூ’’திபத³ம் ‘‘பவிஸதீ’’தி அஜ்ஜா²ஹாரபதே³ன ஸம்ப³ந்தி⁴தப்³ப³ந்தி ஆஹ ‘‘ஆபதா³ஸூதிஆதீ³’’தி. ச²ட்ட²ம்.

7. நிக்கட்³ட⁴னஸிக்கா²பத³ம்

126. ஸத்தமே யே பாஸாதா³ வா யானி வா சதுஸ்ஸாலானீதி யோஜனா. சதஸ்ஸோ பூ⁴மியோ ஏதேஸந்தி சதுபூ⁴மகா. ஏவம் பஞ்சபூ⁴மகா. கோட்ட²கானீதி த்³வாரகோட்ட²கானி. ‘‘பாஸாதா³’’திபத³மபேக்கி²ய வுத்தம் ‘‘யே’’திபத³ம், ‘‘சதுஸ்ஸாலானீ’’திபதே³ அபேக்கி²தே ‘‘யானீ’’தி லிங்க³விபல்லாஸோ ஹோதி. ஸேனாஸனேஸு ஏகேன பயோகே³ன ப³ஹுகே த்³வாரே பி⁴க்கு²ம் அதிக்காமேதீதி ஸம்ப³ந்தோ⁴. நானாபயோகே³ஹி நானாத்³வாரே பி⁴க்கு²ம் அதிக்காமேந்தஸ்ஸாதி யோஜனா. ‘‘த்³வாரக³ணனாயா’’திஇமினா பயோக³க³ணனாயாதிபி அத்த²ம் ஞாபேதி அத்த²தோ பாகடத்தா. அனாமஸித்வாதி அசு²பித்வா.

ஏத்தகானீதி ஏதபமாணானி. தஸ்ஸாதி நிக்கட்³டி⁴யமானஸ்ஸ பி⁴க்கு²ஸ்ஸ. கா³ள்ஹந்தி த³ள்ஹம்.

127. இதா⁴பீதி இமஸ்மிம்பி ஸிக்கா²பதே³. பிஸத்³தோ³ புரிமஸிக்கா²பதா³பேக்கோ². ஸப்³ப³த்தா²தி ஸப்³பே³ஸு ஸிக்கா²பதே³ஸு. யத்ராதி யஸ்மிம் ஸிக்கா²பதே³.

128. ஸோதி ப⁴ண்ட³னகாரககலஹகாரகோ பி⁴க்கு². ஹீதி ஸச்சம், யஸ்மா வா. பக்க²ந்தி அத்தனோ பக்க²ம். நிக்கட்³டி⁴யமானபுக்³க³லபக்கே² உம்மத்தகஸ்ஸ நிக்கட்³ட⁴தி வா நிக்கட்³டா⁴பேதி வாதி ஸம்ப³ந்தி⁴தப்³ப³ம். நிக்கட்³ட⁴கபுக்³க³லபக்கே² உம்மத்தகஸ்ஸ அனாபத்தீதி ஸம்ப³ந்தி⁴தப்³ப³ந்தி. ஸத்தமம்.

8. வேஹாஸகுடிஸிக்கா²பத³ம்

129. அட்ட²மே அச்ச²ன்னதலத்தா உபரி வேஹாஸோ ஏதிஸ்ஸாதி உபரிவேஹாஸா, ஸா ச ஸா குடி சேதி உபரிவேஹாஸகுடீதி த³ஸ்ஸேந்தோ ஆஹ ‘‘உபரிஅச்ச²ன்னதலாயா’’தி. தஸ்ஸா குடியா ஸரூபம் த³ஸ்ஸேதும் வுத்தம் ‘‘த்³விபூ⁴மிககுடியா வா’’திஆதி³. ‘‘மஞ்ச’’ந்தி பத³ம் ‘‘அபீ⁴’’திஉபஸக்³கே³ன ஸம்ப³ந்தி⁴தப்³ப³ந்தி ஆஹ ‘‘அபி⁴ப⁴வித்வா’’தி. ‘‘நிஸீத³தீ’’தி கிரியாபதே³ன வா யோஜேதப்³போ³தி ஆஹ ‘‘பு⁴ம்மத்தே² வா’’திஆதி³. ஏதந்தி ‘‘மஞ்ச’’ந்திபதே³ ஏதம் வசனம் உபயோக³வசனம். அத² வா ஏதந்தி ‘‘மஞ்ச’’ந்திபத³ம் உபயோக³வசனவந்தம். ஏத்த² ச பச்சி²மஸம்ப³ந்தே⁴ அபீ⁴த்யூபஸக்³கோ³ பதா³லங்காரமத்தோ பத³விபூ⁴ஸனமத்தோதி ஆஹ ‘‘அபீ⁴தி இத³ம் பனா’’திஆதி³. பத³ஸோப⁴ணத்த²ந்தி பத³ஸ்ஸ அலங்காரத்த²ம் விபூ⁴ஸனத்த²ம் பத³ஸ்ஸ பு²ல்லிதத்த²ந்தி அதி⁴ப்பாயோ. நிபதித்வாதி ஏத்த² நீத்யூபஸக்³கோ³ தா⁴த்வத்தா²னுவத்தகோதி ஆஹ ‘‘பதித்வா’’தி. அத² வா நிக்க²ந்தத்த²வாசகோதி ஆஹ ‘‘நிக்க²மித்வா வா’’தி. இமினா நீத்யூபஸக்³க³ஸ்ஸ தா⁴த்வத்த²விஸேஸகதம் தீ³பேதி, நிக்க²ந்தோ ஹுத்வா பதித்வாதி அத்தோ². ஹீதி யஸ்மா. ஆணீதி அக்³க³கீ²லா.

131. யா குடி ஸீஸம் ந க⁴ட்டேதி, ஸா அஸீஸக⁴ட்டா நாமாதி யோஜனா. ‘‘பமாணமஜ்ஜி²மஸ்ஸா’’திஇமினா தா²மமஜ்ஜி²மம் நிவத்தேதி. ஸப்³ப³ஹேட்டி²மாஹீதி ஸப்³பே³ஸம் த³ப்³ப³ஸம்பா⁴ரானம் ஹேட்டா² டி²தாஹி. துலாஹீதி கே³ஹத²ம்பா⁴னமுபரி வித்தா²ரவஸேன டி²தேஹி கட்ட²விஸேஸேஹி. இமினா அட்ட²கதா²வசனேன ச துலாய ஸரூபம் பாகடம். கேசி பன துலாய ஸரூபம் அஞ்ஞதா² வத³ந்தி. ஏதேனாதி ‘‘மஜ்ஜி²மஸ்ஸ புரிஸஸ்ஸ அஸீஸக⁴ட்டா’’திவசனேன த³ஸ்ஸிதா ஹோதீதி ஸம்ப³ந்தோ⁴. ஹீதி ஸச்சம். யா காசி குடி வுச்சதீதி யோஜனா. உபரீதி த்³விபூ⁴மிககுடியம் பூ⁴மிதோ உபரி பூ⁴மியம். அச்ச²ன்னதலாதி அனுல்லோசதலா, அவிதானதலாதி அத்தோ². இத⁴ பனாதி இமஸ்மிம் பன ஸிக்கா²பதே³.

133. ஹீதி ஸச்சம், யஸ்மா வா. யாயந்தி யா அயம் குடி. தத்தா²தி தஸ்ஸம் ஸீஸக⁴ட்டகுடியம். அனோணதேன பி⁴க்கு²னாதி யோஜனா. யஸ்ஸாதி குடியா. அபரிபோ⁴க³ந்தி ந பரிபு⁴ஞ்ஜிதப்³ப³ம், ந பரிபு⁴ஞ்ஜனாரஹந்தி அத்தோ². பதாணீதி பதனஸ்ஸ நிவாரணா ஆணி அக்³க³கீ²லா. ஸா ஹி ஆப³ந்த⁴ம் நயதி பவத்தேதீதி ஆணீதி வுச்சதி. யத்தா²தி யஸ்மிம் மஞ்சபீடே². ந நிப்பதந்தீதி நிக்க²ந்தோ ஹுத்வா ந பதந்தி. ஆஹச்சபாத³கேதி அங்கே³ ஆஹனித்வா விஜ்ஜி²த்வா தத்த² பவேஸிதபாத³கே. நாக³த³ந்தகாதீ³ஸூதி நாக³ஸ்ஸ த³ந்தோ வியாதி நாக³த³ந்தகோ, ஸதி³ஸத்தே² கோ, ஸோ ஆதி³ யேஸம் தேதி நாக³த³ந்தகாத³யோ, தேஸு. ஆதி³ஸத்³தே³ன பி⁴த்திகீ²லாத³யோ ஸங்க³ண்ஹாதீதி. அட்ட²மம்.

9. மஹல்லகவிஹாரஸிக்கா²பத³ம்

135. நவமே பிட்ட²ஸங்கா⁴டஸ்ஸாதி த்³வாரபா³ஹாய. ஸா ஹி பிட்டே² த்³வின்னம் கவாடானம் ஸம் ஏகதோ கா⁴டோ க⁴டனம் ஸமாக³மோ ஏதஸ்ஸத்தீ²தி பிட்ட²ஸங்கா⁴டோதி வுச்சதி. குருந்தி³யம் வுத்தந்தி ஸம்ப³ந்தோ⁴. மஹாஅட்ட²கதா²யம் வுத்தந்தி யோஜனா. தந்தி மஹாஅட்ட²கதா²ய வுத்தவசனம். ஏவம் ‘‘ததே³வா’’தி ஏத்தா²பி. ஹீதி ஸச்சம், யஸ்மா வா. ப⁴க³வதாபீதி ந மஹாஅட்ட²கதா²சரியேஹி ஏவ வுத்தம், அத² கோ² ப⁴க³வதாபி கதோதி யோஜனா. த்³வாரப³ந்தே⁴ன அக்³க³ளஸ்ஸ அவினாபா⁴வதோ ‘‘அக்³க³ளட்ட²பனாயா’’தி வுத்தேபி அக்³க³ளேன ஸஹ த்³வாரப³ந்த⁴ட்ட²பனாயாதி அத்தோ²வ க³ஹேதப்³போ³தி ஆஹ ‘‘ஸகவாடகத்³வாரப³ந்த⁴ட்ட²பனாயா’’தி. அக்³க³ளோதி கவாடப²லகோ. இமமேவத்த²ந்தி மயா வுத்தம் இமம் ஏவ அத்த²ம் ஸந்தா⁴யாதி ஸம்ப³ந்தோ⁴. ஏத்தா²தி ‘‘அக்³க³ளட்ட²பனாயா’’திவசனே. அதி⁴ப்பாயோதி ப⁴க³வதோ அபி⁴ஸந்தி⁴. ஹி-ஸத்³தோ³ வித்தா²ரஜோதகோ. கம்பதீதி பு⁴ஸம் கம்பதி. சலதீதி ஈஸம் சலதி. தேனாதி தேன ஸிதி²லபதனஹேதுனா. மாதிகாயம், பத³பா⁴ஜனீயஞ்ச ‘‘அக்³க³ளட்ட²பனாயா’’திபத³ஸ்ஸ ஸம்ப³ந்தா⁴பா⁴வதோ தஸ்ஸ ஸம்ப³ந்த⁴ம் த³ஸ்ஸேதும் வுத்தம் ‘‘தத்தா²’’திஆதி³. தத்த² தத்தா²தி ‘‘அக்³க³ளட்ட²பனாயா’’திவசனே ந வுத்தந்தி ஸம்ப³ந்தோ⁴. அத்த²ஸ்ஸ காரணஸ்ஸ உப்பத்தி அத்து²ப்பத்தி, ஸாயேவ அட்டு²ப்பத்தீதி வுச்சதி த்த²காரஸ்ஸ ட்ட²காரம் கத்வா. அதி⁴காரதோ த³ட்ட²ப்³போ³தி யோஜனா.

யம் பன வசனம் வுத்தந்தி ஸம்ப³ந்தோ⁴. யஸ்ஸாதி மஹாவிஹாரஸ்ஸ. உபரீதி த்³வாரதோ உபரி. தீஸு தி³ஸாஸூதி உபோ⁴ஸு பஸ்ஸேஸு, உபரீதி தீஸு தி³ஸாஸு. தத்ராபீதி கு²த்³த³கே விஹாரேபி. ஸாதி பி⁴த்தி. அபரிபூரஉபசாராபீதி ஸமந்தா கவாடபமாணேன அபரிபூரஉபசாராபி. உக்கட்ட²பரிச்சே²தே³னாதி உக்கம்ஸபமாணேன. ஹத்த²பாஸதோ அதிரேகம் ந லிம்பிதப்³போ³தி அதி⁴ப்பாயோ. தீஸு தி³ஸாஸு ஏவ லிம்பிதப்³போ³ ந ஹோதி, லேபோகாஸே ஸதி அதோ⁴பா⁴கே³பி லிம்பிதப்³போ³தி ஆஹ ‘‘ஸசே பனஸ்ஸா’’திஆதி³. அஸ்ஸாதி விஹாரஸ்ஸ. ஆலோகம் ஸந்தே⁴ந்தி பித³ஹந்தீதி ‘‘ஆலோகஸந்தீ⁴’’தி வுத்தே வாதபானகவாடகாயேவாதி த³ஸ்ஸேந்தோ ஆஹ ‘‘வாதபானகவாடகா வுச்சந்தீ’’தி. வாதம் பிவதீதி வாதபானம், த்³வாரம், தஸ்மிம் டி²தா கவாடகா வாதபானகவாடகா. தேதி வாதபானகவாடகா பஹரந்தீதி ஸம்ப³ந்தோ⁴. ஏத்தா²தி ஆலோகஸந்தி⁴ம்ஹி. ஸப்³ப³தி³ஸாஸூதி உபோ⁴ஸு பஸ்ஸேஸு, ஹேட்டா², உபரீதி சதூஸு தி³ஸாஸு. ‘‘தஸ்மா’’திபத³ம் ‘‘லிம்பிதப்³போ³ வா லேபாபேதப்³போ³ வா’’திபத³த்³வயே ஹேது. ஏத்தா²தி ‘‘ஆலோகஸந்தி⁴பரிகம்மாயா’’திபதே³.