சதுவிபத்திகதா²வண்ணனா

273. இதா³னி உப⁴யஸாதா⁴ரணம் கத்வா விபத்திவாராதீ³னம் விஸிட்ட²வாரானம் ஸங்க³ஹம் காதுமாஹ ‘‘கதி ஆபத்தியோ’’திஆதி³.

274. பி⁴க்கு²னீ ஸசே சா²தே³தி, சுதா ஹோதி. ஸசே வேமதிகா சா²தே³தி, து²ல்லச்சயம் ஸியாதி யோஜனா.

275. ஸங்கா⁴தி³ஸேஸந்தி பரஸ்ஸ ஸங்கா⁴தி³ஸேஸம்.

276. ‘‘கதி ஆசாரவிபத்திபச்சயா’’தி பத³ச்சே²தோ³.

277. ஆசாரவிபத்திந்தி அத்தனோ வா பரஸ்ஸ வா ஆசாரவிபத்திம்.

279. பாபிகம் தி³ட்டி²ந்தி அஹேதுகஅகிரியனத்தி²கதி³ட்டி²ஆதி³ம் லாமிகம் தி³ட்டி²ம்.

281. மனுஸ்ஸுத்தரித⁴ம்மந்தி உத்தரிமனுஸ்ஸத⁴ம்மம்.

282. ஆஜீவஹேது ஸஞ்சரித்தம் ஸமாபன்னோதி யோஜனா. பரியாயவசனேதி ‘‘யோ தே விஹாரே வஸதி, ஸோ பி⁴க்கு² அரஹா’’திஆதி³கே லேஸவசனே. ஞாதேதி யம் உத்³தி³ஸ்ஸ வத³தி, தஸ்மிம் மனுஸ்ஸஜாதிகே வசனஸமனந்தரமேவ ஞாதே.

283. வத்வாதி அகி³லானோ அத்தனோ அத்தா²ய விஞ்ஞாபேத்வா. பி⁴க்கு²னீ பன ஸசே ஏவம் ஹோதி, பி⁴க்கு²னீ அகி³லானா அத்தனோ அத்தா²ய பணீதபோ⁴ஜனம் விஞ்ஞாபேத்வா பு⁴த்தாவினீ ஸசே ஹோதீதி அதி⁴ப்பாயோ. தஸ்ஸா பாடிதே³ஸனீயம் ஸியாதி யோஜனா.

284. ‘‘அத்தனோ அத்தா²ய விஞ்ஞாபேத்வானா’’தி இமினா பரஸ்ஸ ஞாதகபவாரிதே தஸ்ஸேவத்தா²ய விஞ்ஞாபேத்வா தேன தி³ன்னம் வா தஸ்ஸ விஸ்ஸாஸேன வா பரிபு⁴ஞ்ஜந்தஸ்ஸ தேஸம் அத்தனோ அஞ்ஞாதகஅப்பவாரிதே ஸுத்³த⁴சித்ததாய அனாபத்தீதி தீ³பேதி.

இதி உத்தரே லீனத்த²பகாஸனியா

சதுவிபத்திகதா²வண்ணனா நிட்டி²தா.