பி⁴க்கு²னிவிப⁴ங்கோ³

170. வினயஸ்ஸ வினிச்ச²யே பி⁴க்கூ²னம் பாடவத்தா²யாதி பி⁴க்கு²னீனம் பாடவஸ்ஸாபி தத³தீ⁴னத்தா பதா⁴னத³ஸ்ஸனவஸேன வுத்தம். அத² வா த³ஸ்ஸனலிங்க³ந்தரஸாதா⁴ரணத்தே இச்சி²தே புல்லிங்கே³ன, நபும்ஸகலிங்கே³ன வா நித்³தே³ஸோ ஸத்³த³ஸத்தா²னுயோக³தோதி ‘‘பி⁴க்கூ²ன’’ந்தி புல்லிங்கே³ன வுத்தம்.

171. நந்த³ந்தீ ஸாதி³யந்தீ.

172. திஸ்ஸோ ஆபத்தியோ பு²ஸேதி யோஜனா. ஜாணுஸ்ஸ உத்³த⁴ம், அக்க²கஸ்ஸ அதோ⁴ க³ஹணம் ஸாதி³யந்தியா தஸ்ஸா பாராஜிகந்தி யோஜனா.

173. காயபடிப³த்³தே⁴ வா க³ஹணம் ஸாதி³யந்தியா து³க்கடம்.

174. வஜ்ஜந்தி அஞ்ஞிஸ்ஸா பி⁴க்கு²னியா பாராஜிகாபத்திம்.

176. தம் லத்³தி⁴ந்தி உக்கி²த்தஸ்ஸ யம் லத்³தி⁴ம் அத்தனோ ரோசேஸி, தம் லத்³தி⁴ம் ந நிஸ்ஸஜ்ஜந்தீதி யோஜனா.

178. ‘‘இத⁴ ஆக³ச்சா²’’தி பத³ச்சே²தோ³. ‘‘வுத்தா ஆக³ச்ச²தீ’’தி பத³ச்சே²தோ³.

179. ஹத்த²பாஸப்பவேஸனேதி ஹத்த²பாஸூபக³மனே. ‘‘ஹத்த²க³தப்பவேஸனே’’தி வா பாடோ², ஸோயேவ அத்தோ².

இதி உத்தரே லீனத்த²பகாஸனியா பி⁴க்கு²னிவிப⁴ங்கே³

பாராஜிககதா²வண்ணனா நிட்டி²தா.

180. ஏகஸ்ஸாதி அத்தனோ அத்தனோ அட்டகாரஸ்ஸ வா. ஆரோசனேதி வத்தப்³ப³ஸ்ஸ வோஹாரிகானம் நிவேத³னே.

181. து³தியாரோசனேதி து³தியஸ்ஸ, து³தியம் ஏவம் ஆரோசனே.

182. த்³வீஹீதி த்³வீஹி கம்மவாசாஹி. கம்மவாசோஸானேதி கம்மவாசாஓஸானே.

183. பரிக்கே²பே அதிக்கந்தேதி அத்தனோ கா³மதோ க³ந்த்வா இதரம் கா³மம் பவிஸந்தியா பட²மேன பாதே³ன தஸ்ஸ கா³மஸ்ஸ பரிக்கே²பே அதிக்கந்தே, பட²மபாதே³ பரிக்கே²பம் அதிக்கமேத்வா அந்தோகா³மஸங்கே²பம் க³தேதி அத்தோ².

184. து³தியேனாதி கா³மபரிக்கே²பதோ ப³ஹி டி²தேன து³தியபாதே³ன. அதிக்கந்தேதி தஸ்மிம் கா³மபரிக்கே²பே அதிக்கந்தே, தஸ்மிம் பாதே³ அந்தோகா³மம் பவேஸிதேதி அத்தோ². ஸேஸம் உத்தானத்த²மேவ.

இதி உத்தரே லீனத்த²பகாஸனியா பி⁴க்கு²னிவிப⁴ங்கே³

ஸங்கா⁴தி³ஸேஸகதா²வண்ணனா நிட்டி²தா.

193. இஹ பி⁴க்கு²னீ பத்தஸன்னிசயம் கரோந்தீ ஹோதி, ஸா ஏகம் நிஸ்ஸக்³கி³யம் பாசித்தியம்யேவ பு²ஸேதி யோஜனா.

194. அகாலசீவரம் காலசீவரம் கத்வா பா⁴ஜாபேந்தியாதி யோஜனா. பயோகே³தி பா⁴ஜனபயோகே³.

195. சி²ன்னேதி அச்சி²ன்னே.

196. ததோ பரந்தி ததோ பட²மதோ அஞ்ஞம்.

இதி உத்தரே லீனத்த²பகாஸனியா பி⁴க்கு²னிவிப⁴ங்கே³

நிஸ்ஸக்³கி³யகதா²வண்ணனா நிட்டி²தா.

199. லஸுணம் கா²த³தி சே, த்³வே ஆபத்தியோ பு²டாதி யோஜனா.

200. பயோகே³தி ஸம்ஹாராபனபயோகே³. ஸம்ஹடேதி அத்தனா ஸம்ஹடே, பரேன ஸம்ஹராபிதே ச ஆபத்தி பாசித்தி ஹோதி.

201. கதேதி தலகா⁴தே கதே.

202. ஜதுனா மட்ட²கந்தி ஜதுனா கதம் மட்ட²த³ண்ட³கம். ‘‘து³க்கடம் ஆதி³ன்னே’’தி பத³ச்சே²தோ³.

204. பு⁴ஞ்ஜமானஸ்ஸ பி⁴க்கு²ஸ்ஸ ஹத்த²பாஸேதி யோஜனா. ஹித்வா ஹத்த²பாஸம்.

205. விஞ்ஞாபேத்வாதி அந்தமஸோ மாதரம்பி யாசித்வா. அஜ்ஜோ²ஹாரே பாசித்திம் தீ³பயேதி யோஜனா.

206. உச்சாராதி³ந்தி ஆதி³-ஸத்³தே³ன விகா⁴ஸஸங்காரமுத்தானம் க³ஹணம்.

லஸுணவக்³க³வண்ணனா பட²மா.

209. இத⁴ இமஸ்மிம் ரத்தந்த⁴காரவக்³கே³. பட²மே, து³தியே, ததியே, சதுத்தே²பி வினிச்ச²யோ லஸுணவக்³க³ஸ்ஸ ச²ட்டே²ன ஸிக்கா²பதே³ன துல்யோ ஸதி³ஸோதி யோஜனா.

210. ஆஸனேதி பல்லங்கே தஸ்ஸோகாஸபூ⁴தே. ஸாமிகே அனாபுச்சா²தி தஸ்மிம் குலே யம் கிஞ்சி விஞ்ஞுமனுஸ்ஸம் அனாபுச்சா².

211. அனோவஸ்ஸந்தி பி⁴த்தியா ப³ஹி நிப்³ப³கோஸப்³ப⁴ந்தரம். து³தியாதிக்கமேதி து³தியேன பாதே³ன நிப்³ப³கோஸஸ்ஸ உத³கபாதட்டா²னாதிக்கமே.

212. நிஸீதி³தேதி நிஸின்னே.

213. பயோகே³தி உஜ்ஜா²பனபயோகே³.

214. நிரயாதி³னா அத்தானம் வா பரம் வா அபி⁴ஸப்பேந்தீ ஸபத²ம் கரோந்தீ த்³வே பு²ஸேதி யோஜனா. அபி⁴ஸப்பிதேதி அபி⁴ஸபிதே.

215. வதி⁴த்வாதி ஹத்தா²தீ³ஹி பஹரித்வா. ‘‘கரோதி ஏக’’ந்தி பத³ச்சே²தோ³.

ரத்தந்த⁴காரவக்³க³வண்ணனா து³தியா.

216. நக்³கா³தி அனிவத்தா² வா அபாருதா வா. பயோகே³தி சுண்ணமத்திகாஅபி⁴ஸங்க²ரணாதி³பயோகே³.

217. பமாணாதிக்கந்தந்தி ‘‘தீ³க⁴ஸோசதஸ்ஸோ வித³த்தி²யோ ஸுக³தவித³த்தி²யா, திரியம் த்³வே வித³த்தி²யோ’’தி (பாசி. 888) வுத்தபமாணமதிக்கந்தம். பயோகே³தி காராபனபயோகே³.

218. விஸிப்³பே³த்வாதி து³ஸ்ஸிப்³பி³தம் புன ஸிப்³ப³னத்தா²ய விஸிப்³பே³த்வா.

219. பஞ்ச அஹானி பஞ்சாஹம், பஞ்சாஹமேவ பஞ்சாஹிகம். ஸங்கா⁴டீனம் சாரோ ஸங்கா⁴டிசாரோ, பரிபோ⁴க³வஸேன வா ஓதாபனவஸேன வா ஸங்க⁴டிதட்டே²ன ‘‘ஸங்கா⁴டீ’’தி லத்³த⁴னாமானம் ‘‘திசீவரம், உத³கஸாடிகா, ஸம்கச்சிகா’’தி இமேஸம் பஞ்சன்னம் சீவரானம் பரிவத்தனம். அதிக்கமேதி பி⁴க்கு²னீ அதிக்கமேய்ய. அஸ்ஸா பன ஏகாவ பாசித்தி பரிதீ³பிதாதி யோஜனா.

220. ஸங்கமனீயந்தி ஸங்கமேதப்³ப³ம். அஞ்ஞிஸ்ஸா ஸந்தகம் அனாபுச்சா² க³ஹிதம் புன தா³தப்³ப³ம் பஞ்சன்னம் அஞ்ஞதரம்.

221. க³ணசீவரலாப⁴ஸ்ஸாதி பி⁴க்கு²னிஸங்கே⁴ன லபி⁴தப்³ப³சீவரஸ்ஸ. அந்தராயம் கரோதீதி யதா² தே தா³துகாமா ந தே³ந்தி, ஏவம் பரக்கமதி.

222. த⁴ம்மிகந்தி ஸமக்³கே³ன ஸங்கே⁴ன ஸன்னிபதித்வா கரியமானம். படிபா³ஹந்தீதி படிஸேதே⁴ந்தீ. படிபா³ஹிதே படிஸேதி⁴தே.

223. அகா³ரிகாதி³னோதி ஆதி³-ஸத்³தே³ன ‘‘பரிப்³பா³ஜகஸ்ஸ வா பரிப்³பா³ஜிகாய வா’’தி (பாரா. 917) வுத்தே ஸங்க³ண்ஹாதி. ஸமணசீவரந்தி கப்பகதம் நிவாஸனபாருபனுபக³ம். பயோகே³தி தா³னபயோகே³.

224. சீவரே து³ப்³ப³லாஸாயாதி து³ப்³ப³லசீவரபச்சாஸாய ‘‘ஸசே ஸக்கோம, த³ஸ்ஸாமா’’தி ஏத்தகமத்தம் ஸுத்வா உப்பாதி³தாய ஆஸாயாதி அத்தோ². காலந்தி சீவரகாலஸமயம். ஸமதிக்கமேதி பி⁴க்கு²னீஹி காலசீவரே பா⁴ஜியமானே ‘‘ஆக³மேத², அய்யே, அத்தி² ஸங்க⁴ஸ்ஸ சீவரபச்சாஸா’’தி வத்வா தம் சீவரவிப⁴ங்க³ம் ஸமதிக்கமேய்ய.

225. த⁴ம்மிகம் கதி²னுத்³தா⁴ரந்தி ஸமக்³கே³ன ஸங்கே⁴ன கரியமானம் கதி²னஸ்ஸ அந்தருப்³பா⁴ரம். படிபா³ஹந்தியாதி நிவாரேந்தியா.

ந்ஹானவக்³க³வண்ணனா ததியா.

226. துவட்டேய்யுந்தி நிபஜ்ஜேய்யும். இதரம் பாசித்தியம்.

227. பயோகே³தி பி⁴க்கு²னியா அபா²ஸுககரணபயோகே³ கரியமானே.

228. து³க்கி²தந்தி கி³லானம். நுபட்டா²பேந்தியா வாபீதி தஸ்ஸா உபட்டா²னம் பரேஹி அகாராபேந்தியா, ஸயம் வா அகரோந்தியா.

229. உபஸ்ஸயம் த³த்வாதி கவாடப³ந்த⁴ம் அத்தனோ புக்³க³லிகவிஹாரம் த³த்வா. கட்³டி⁴தேதி நிக்கட்³டி⁴தே.

230. ஸம்ஸட்டா²தி க³ஹபதினா வா க³ஹபதிபுத்தேன வா ஸம்ஸட்ட²விஹாரீ பி⁴க்கு²னீ ஸங்கே⁴ன ஸம்ஸட்ட²விஹாரதோ நிவத்தியமானா. ஞத்தியா து³க்கடம் பு²ஸேதி ஸமனுபா⁴ஸனகம்மஞத்தியா து³க்கடம் ஆபஜ்ஜேய்ய.

231. அந்தோரட்டே²தி யஸ்ஸ விஜிதே விஹரதி, தஸ்ஸ ரட்டே². படிபன்னாயாதி சாரிகம் கப்பேந்தியா. ஸேஸகந்தி பாசித்தியம்.

துவட்டவக்³க³வண்ணனா சதுத்தா².

233. ராஜாகா³ராதி³கந்தி ஆதி³-ஸத்³தே³ன சித்தாகா³ராதீ³னம் க³ஹணம்.

235. பயோகே³தி கப்பாஸவிசாரணம் ஆதி³ம் கத்வா ஸப்³ப³பயோகே³. உஜ்ஜவுஜ்ஜவனேதி யத்தகம் ஹத்தே²ன அஞ்சி²தம் ஹோதி, தஸ்மிம் தக்கம்ஹி வேடி²தே.

237. பயோகே³தி அகா³ரிகஸ்ஸ வா பரிப்³பா³ஜகஸ்ஸ வா பரிப்³பா³ஜிகாய வா ஸஹத்தா² கா²த³னீயாதீ³னம் தா³னபயோகே³.

238. ‘‘ஸமம் ஆபத்திபபே⁴த³தோ’’தி பத³ச்சே²தோ³.

239. திரச்சா²னக³தம் விஜ்ஜந்தி யம் கிஞ்சி பா³ஹிரகம் அனத்த²ஸம்ஹிதம் பரூபகா⁴தகரம் ஹத்தி²ஸிக்கா²தி³ஸிப்பம். பட²ந்தியாதி ஸிக்க²ந்தியா. பயோகே³தி து³ருபஸங்கமனாதி³பயோகே³. பதே³ பதே³தி பதா³தி³வஸேன பரியாபுணந்தியா பதே³ பதே³ அக்க²ரபதா³னம் வஸேன.

240. நவமே ‘‘பரியாபுணாதீ’’தி பத³ம், த³ஸமே ‘‘வாசேதீ’’தி பத³ந்தி ஏவம் பத³மத்தமேவ உபி⁴ன்னம் விஸேஸகம் பே⁴த³கம்.

சித்தாகா³ரவக்³க³வண்ணனா பஞ்சமா.

241. தமாராமந்தி யத்த² பி⁴க்கூ² ருக்க²மூலேபி வஸந்தி, தம் ஸபி⁴க்கு²கம் பதே³ஸம்.

243. அக்கோஸதீதி த³ஸன்னம் அக்கோஸவத்தூ²னம் அஞ்ஞதரேன ஸம்முகா² வா பரம்முகா² வா அக்கோஸதி. பரிபா⁴ஸதீதி ப⁴யத³ஸ்ஸனேன தஜ்ஜேதி. ‘‘பாசித்தி அக்கோஸிதே’’தி பத³ச்சே²தோ³.

244. சண்டி³கபா⁴வேனாதி கோதே⁴ன. க³ணந்தி பி⁴க்கு²னிஸங்க⁴ம். பரிபா⁴ஸதீதி ‘‘பா³லா ஏதா’’திஆதீ³ஹி வசனேஹி அக்கோஸதி. பயோகே³தி பரிபா⁴ஸனபயோகே³. பரிப⁴ட்டே²தி அக்கோஸிதே. இதரம் பாசித்தியம்.

245. நிமந்திதாதி க³ணபோ⁴ஜனே வுத்தனயேன நிமந்திதா. பவாரிதாதி பவாரணஸிக்கா²பதே³ வுத்தனயேன வாரிதா. கா²த³னம் போ⁴ஜனம்பி வாதி யாகு³பூவக²ஜ்ஜகம், யாவகாலிகம் மூலகா²த³னீயாதி³கா²த³னீயம், ஓத³னாதி³போ⁴ஜனம்பி வா யா பி⁴க்கு²னீ பு⁴ஞ்ஜந்தீ ஹோதி, ஸா பன த்³வேயேவ ஆபத்தியோ பு²ஸேதி யோஜனா.

247. மச்ச²ராயந்தீதி மச்ச²ரம் கரோந்தீ, அத்தனோ பச்சயதா³யககுலஸ்ஸ அஞ்ஞேஹி ஸாதா⁴ரணபா⁴வம் அஸஹந்தீதி அத்தோ². பயோகே³தி தத³னுரூபே காயவசீபயோகே³. மச்ச²ரிதேதி மச்ச²ரவஸேன கதபயோகே³ நிப்ப²ன்னே.

248. அபி⁴க்கு²கே பனாவாஸேதி யதோ பி⁴க்கு²னுபஸ்ஸயதோ அத்³த⁴யோஜனப்³ப⁴ந்தரே ஓவாத³தா³யகா பி⁴க்கூ² ந வஸந்தி, மக்³கோ³ வா அகே²மோ ஹோதி, ந ஸக்கா அனந்தராயேன க³ந்தும், ஏவரூபே ஆவாஸே. புப்³ப³கிச்சேஸூதி ‘‘வஸ்ஸம் வஸிஸ்ஸாமீ’’தி ஸேனாஸனபஞ்ஞாபனபானீயஉபட்டா²பனாதி³புப்³ப³கிச்சே பன கரியமானே து³க்கடம் ப⁴வேதி யோஜனா.

249. வஸ்ஸம்வுத்தா²தி புரிமம் வா பச்சி²மம் வா தேமாஸம் வுத்தா². உப⁴தோஸங்கே⁴தி பி⁴க்கு²னிஸங்கே⁴, பி⁴க்கு²ஸங்கே⁴ ச. தீஹிபி டா²னேஹீதி ‘‘தி³ட்டே²ன வா’’திஆதி³னா வுத்தேஹி தீஹி காரணேஹி.

250. ஓவாத³த்தா²யாதி க³ருத⁴ம்மோவாத³னத்தா²ய. ஸம்வாஸத்தா²யாதி உபோஸத²புச்ச²னத்தா²ய சேவ பவாரணத்தா²ய ச. ந க³ச்ச²தீதி பி⁴க்கு²ம் ந உபக³ச்ச²தி.

251. ஓவாத³ம்பி ந யாசந்தீதி உபோஸதா²தி³வஸேன ஓவாதூ³பஸங்கமனம் பி⁴க்கு²ம் ந யாசந்தீ ந புச்ச²ந்தீ. உபோஸத²ந்தி உபோஸத²தி³வஸதோ புரிமதி³வஸே தேரஸியம் வா சாதுத்³த³ஸியம் வா உபோஸத²ம் ந புச்ச²ந்தீ.

252. அபுச்சி²த்வாவ ஸங்க⁴ம் வாதி ஸங்க⁴ம் வா க³ணம் வா அனபலோகேத்வாவ. ‘‘பே⁴தா³பேதீ’’தி இத³ம் நித³ஸ்ஸனமத்தம் ‘‘பா²லாபேய்ய வா தோ⁴வாபேய்ய வா ஆலிம்பாபேய்ய வா ப³ந்தா⁴பேய்ய வா மோசாபேய்ய வா’’தி இமேஸம்பி கிரியாவிகப்பானம் ஸங்க³ஹேதப்³ப³த்தா. பஸாக²ஜந்தி நாபி⁴யா ஹேட்டா², ஜாணுமண்ட³லானம் உபரி பதே³ஸே ஜாதம் க³ண்ட³ம் வா ருதி⁴தம் வா. பயோகே³தி பே⁴தா³பனாதி³பயோகே³.

ஆராமவக்³க³வண்ணனா ச²ட்டா².

253. க³ப்³பி⁴னிந்தி ஆபன்னஸத்தம் ஸிக்க²மானம். வுட்டா²பேந்தீதி உபஜ்ஜா²யா ஹுத்வா உபஸம்பாதே³ந்தீ. பயோகே³தி க³ணபரியேஸனாதி³பயோகே³. வுட்டா²பிதேதி உபஸம்பாதி³தே, கம்மவாசாபரியோஸானேதி அத்தோ².

255. ஸஹஜீவினிந்தி ஸத்³தி⁴விஹாரினிம். நானுக்³க³ண்ஹந்தீதி உத்³தே³ஸதா³னாதீ³ஹி ந ஸங்க³ண்ஹந்தீ.

க³ப்³பி⁴னிவக்³க³வண்ணனா ஸத்தமா.

258. ‘‘அலம் வுட்டா²பிதேனா’’தி வுச்சமானா பி⁴க்கு²னீஹி நிவாரியமானா. கீ²யதீதி அஞ்ஞாஸம் ப்³யத்தானம் லஜ்ஜீனம் வுட்டா²னஸம்முதிம் தீ³யமானம் தி³ஸ்வா ‘‘அஹமேவ நூன பா³லா’’திஆதி³னா ப⁴ணமானா கீ²யதி. பயோகே³தி கீ²யமானபயோகே³. கீ²யிதேதி கீ²யனபயோகே³ நிட்டி²தே.

குமாரிபூ⁴தவக்³க³வண்ணனா அட்ட²மா.

260. ச²த்துபாஹனந்தி வுத்தலக்க²ணம் ச²த்தஞ்ச உபாஹனாயோ ச. பயோகே³தி தா⁴ரணபயோகே³.

261. யானேனாதி வய்ஹாதி³னா. யாயந்தீதி ஸசே யானேன க³தா ஹோதி.

262. ஸங்கா⁴ணிந்தி யம் கிஞ்சி கடூபக³ம். தா⁴ரேந்தியாதி கடியம் படிமுச்சந்தியா.

263. க³ந்த⁴வண்ணேனாதி யேன கேனசி வண்ணேன ச யேன கேனசி க³ந்தே⁴ன ச. க³ந்தோ⁴ நாம சந்த³னாலேபாதி³. வண்ணோ நாம குங்குமஹலித்³தா³தி³. பயோகே³தி க³ந்தா⁴தி³பயோகே³ ரசனதோ பட்டா²ய புப்³ப³பயோகே³.

266. அனாபுச்சா²தி ‘‘நிஸீதா³மி, அய்யா’’தி அனாபுச்சி²த்வா. நிஸீதி³தே பி⁴க்கு²ஸ்ஸ உபசாரே அந்தமஸோ ச²மாய நிஸின்னே.

267. அனோகாஸகதந்தி ‘‘அஸுகஸ்மிம் நாம டா²னே புச்சி²ஸ்ஸாமீ’’தி ஏவம் அகதஓகாஸம்.

268. பவிஸந்தியாதி வினிச்ச²யம் ஆராமவக்³க³ஸ்ஸ பட²மேனேவ ஸிக்கா²பதே³ன ஸதி³ஸம் கத்வா வதே³ய்யாதி யோஜனா.

ச²த்துபாஹனவக்³க³வண்ணனா நவமா.

இதி உத்தரே லீனத்த²பகாஸனியா பி⁴க்கு²னிவிப⁴ங்கே³

பாசித்தியகதா²வண்ணனா நிட்டி²தா.

269-70. அட்ட²ஸு பாடிதே³ஸனீயஸிக்கா²பதே³ஸுபி த்³விதா⁴ ஆபத்தி ஹோதீதி யோஜனா. ததோதி க³ஹணஹேது. ஸப்³பே³ஸூதி பாடிதே³ஸனீயஸிக்கா²பதே³ஸு.

பாடிதே³ஸனீயகதா²வண்ணனா.

271-2. இமம் பரமம் உத்தமம் நிருத்தரம் கேனசி வா வத்தப்³பே³ன உத்தரேன ரஹிதம் நித்³தோ³ஸம் உத்தரம் ஏவம்னாமகம் தீ⁴ரோ பஞ்ஞவா பி⁴க்கு² அத்த²வஸேன விதி³த்வா து³ருத்தரம் கிச்சே²ன உத்தரிதப்³ப³ம் பஞ்ஞத்தமஹாஸமுத்³த³ம் வினயமஹாஸாக³ரம் ஸுகே²னேவ யஸ்மா உத்தரதி, தஸ்மா கங்க²ச்சே²தே³ வினயவிசிகிச்சா²ய சி²ந்த³னே ஸத்தே² ஸத்த²ஸதி³ஸே அஸ்மிம் ஸத்தே² இமஸ்மிம் உத்தரபகரணே உஸ்மாயுத்தோ கம்மஜதேஜோதா⁴துயா ஸமன்னாக³தோ ஜீவமானோ பி⁴க்கு² நிச்சம் நிரந்தரம் ஸத்தோ அபி⁴ரதோ நிச்சம் யோக³ம் ஸததாபி⁴யோக³ம் காதும் யுத்தோ அனுரூபோதி யோஜனா.

பி⁴க்கு²னிவிப⁴ங்கோ³ நிட்டி²தோதி ஏத்தா²பி உப்பத்தி வுத்தனயேனேவ வேதி³தப்³பா³.

இதி உத்தரே லீனத்த²பகாஸனியா

பி⁴க்கு²னிவிப⁴ங்க³வண்ணனா நிட்டி²தா.