மஹாவிப⁴ங்க³ஸங்க³ஹகதா²வண்ணனா

4. ஏவம் ஸோதுஜனம் ஸவனே நியோஜேத்வா யதா²படிஞ்ஞாதம் உத்தரவினிச்ச²யம் த³ஸ்ஸேதுமாஹ ‘‘மேது²ன’’ந்திஆதி³. ‘‘கதி ஆபத்தியோ’’தி அயம் தி³ட்ட²ஸம்ஸந்த³னா, அதி³ட்ட²ஜோதனா, விமதிச்சே²த³னா, அனுமதி, கதே²துகம்யதாபுச்சா²தி பஞ்சன்னம் புச்சா²னம் கதே²துகம்யதாபுச்சா². திஸ்ஸோ ஆபத்தியோ பு²ஸேதி தஸ்ஸா ஸங்கே²பதோ விஸ்ஸஜ்ஜனம்.

5. ஏவம் க³ணனாவஸேன த³ஸ்ஸிதானம் ‘‘ப⁴வே’’திஆதி³ ஸரூபதோ த³ஸ்ஸனம். கே²த்தேதி திண்ணம் மக்³கா³னம் அஞ்ஞதரஸ்மிம் அல்லோகாஸே திலபீ³ஜமத்தேபி பதே³ஸே. மேது²னம் படிஸேவந்தஸ்ஸ பாராஜிகம் ப⁴வேதி ஸம்ப³ந்தோ⁴. ‘‘து²ல்லச்சய’’ந்தி வுத்தந்தி யோஜனா. ‘‘யேபு⁴ய்யக்கா²யிதே’’தி இத³ம் நித³ஸ்ஸனமத்தம், உபட்³ட⁴க்கா²யிதேபி து²ல்லச்சயஸ்ஸ ஹேட்டா² வுத்தத்தா. வட்டகதே முகே² அபு²ஸந்தம் அங்க³ஜாதம் பவேஸேந்தஸ்ஸ து³க்கடம் வுத்தந்தி யோஜனா.

6. ‘‘அதி³ன்னம் ஆதி³யந்தோ’’திஆத³யோபி வுத்தனயாயேவ.

7. பஞ்சமாஸக்³க⁴னே வாபீதி போராணகஸ்ஸ நீலகஹாபணஸ்ஸ சதுத்த²பா⁴க³ஸங்கா²தே பஞ்சமாஸே, தத³க்³க⁴னகே வா. அதி⁴கே வாதி அதிரேகபஞ்சமாஸகே வா தத³க்³க⁴னகே வா. அதி³ன்னே பஞ்சவீஸதியா அவஹாரானம் அஞ்ஞதரேன அவஹடே பராஜயோ ஹோதீதி அத்தோ². மாஸே வா ஊனமாஸே வா தத³க்³க⁴னகே வா து³க்கடம். ததோ மஜ்ஜே²தி பஞ்சமாஸகதோ மஜ்ஜே². பஞ்ச மாஸா ஸமாஹடா, பஞ்சன்னம் மாஸானம் ஸமாஹாரோதி வா பஞ்சமாஸம், பஞ்சமாஸம் அக்³க⁴தீதி பஞ்சமாஸக்³க⁴னம், பஞ்சமாஸஞ்ச பஞ்சமாஸக்³க⁴னஞ்ச பஞ்சமாஸக்³க⁴னம், ஏகதே³ஸஸரூபேகஸேஸோயம், தஸ்மிம். மாஸே வாதி ஏத்தா²பி மாஸோ ச மாஸக்³க⁴னகஞ்ச மாஸமாஸக்³க⁴னகோதி வத்தப்³பே³ ‘‘மாஸே’’தி ஏகதே³ஸஸரூபேகஸேஸோ, உத்தரபத³லோபோ ச த³ட்ட²ப்³போ³.

‘‘பஞ்சமாஸக்³க⁴னே’’தி ஸாமஞ்ஞேன வுத்தேபி போராணகஸ்ஸ நீலகஹாபணஸ்ஸேவ சதுத்த²பா⁴க³வஸேன பஞ்சமாஸனியமோ காதப்³போ³. ததா² ஹி ப⁴க³வதா து³தியபாராஜிகம் பஞ்ஞாபேந்தேன பி⁴க்கூ²ஸு பப்³ப³ஜிதம் புராணவோஹாரிகமஹாமத்தம் பி⁴க்கு²ம் ‘‘கித்தகேன வத்து²னா ராஜா மாக³தோ⁴ ஸேனியோ பி³ம்பி³ஸாரோ சோரம் க³ஹேத்வா ஹனதி வா ப³ந்த⁴தி வா பப்³பா³ஜேதி வா’’தி புச்சி²த்வா தேன ‘‘பாதே³ன வா பாதா³ரஹேன வா’’தி வுத்தே தேனேவ பமாணேன அதி³ன்னம் ஆதி³யந்தஸ்ஸ பஞ்ஞத்தம். அட்ட²கதா²யஞ்ச –

‘‘பஞ்சமாஸகோ பாதோ³தி பாளிம் உல்லிங்கி³த்வா ‘ததா³ ராஜக³ஹே வீஸதிமாஸகோ கஹாபணோ ஹோதி, தஸ்மா பஞ்சமாஸகோ பாதோ³’. ஏதேன லக்க²ணேன ஸப்³ப³ஜனபதே³ஸு கஹாபணஸ்ஸ சதுத்தோ² பா⁴கோ³ ‘பாதோ³’தி வேதி³தப்³போ³. ஸோ ச கோ² போராணகஸ்ஸ நீலகஹாபணஸ்ஸ வஸேன, ந இதரேஸம் து³த்³ரதா³மகாதீ³னம். தேன ஹி பாதே³ன அதீதா பு³த்³தா⁴பி பாராஜிகம் பஞ்ஞபேஸும், அனாக³தாபி பஞ்ஞபேஸ்ஸந்தி. ஸப்³ப³பு³த்³தா⁴னஞ்ஹி பாராஜிகவத்து²ம்ஹி வா பாராஜிகே வா நானத்தம் நத்தி², இமானேவ சத்தாரி பாராஜிகவத்தூ²னி, இமானேவ சத்தாரி பாராஜிகானி, இதோ ஊனம் வா அதிரேகம் வா நத்தி². தஸ்மா ப⁴க³வாபி த⁴னியம் விக³ரஹித்வா பாதே³னேவ து³தியபாராஜிகம் பஞ்ஞபேந்தோ ‘யோ பன பி⁴க்கு² அதி³ன்னம் தே²ய்யஸங்கா²த’ந்திஆதி³மாஹா’’தி (பாரா. அட்ட². 1.88) வுத்தம்.

ஸாரத்த²தீ³பனியஞ்ச –

‘‘சதுத்தோ² பா⁴கோ³ பாதோ³தி வேதி³தப்³போ³தி இமினாவ ஸப்³ப³ஜனபதே³ஸு கஹாபணஸ்ஸேவ வீஸதிமோ பா⁴கோ³மாஸகோதி இத³ஞ்ச வுத்தமேவ ஹோதீதி த³ட்ட²ப்³ப³ம். போராணஸத்தா²னுரூபம் லக்க²ணஸம்பன்னா உப்பாதி³தா நீலகஹாபணாதி வேதி³தப்³பா³. து³த்³ரதா³மேன உப்பாதி³தோ து³த்³ரதா³மகோ. ஸோ கிர நீலகஹாபணஸ்ஸ திபா⁴க³ம் அக்³க⁴தீ’தி வத்வா ‘யஸ்மிம் பதே³ஸே நீலகஹாபணா ந ஸந்தி, தத்தா²பி நீலகஹாபணவஸேனேவ பரிச்சே²தோ³ காதப்³போ³. கத²ம்? நீலகஹாபணானம் வளஞ்ஜனட்டா²னே ச அவளஞ்ஜனட்டா²னே ச ஸமானஅக்³க⁴வஸேன பவத்தமானம் ப⁴ண்ட³ம் நீலகஹாபணேன ஸமானக்³க⁴ம் க³ஹேத்வா தஸ்ஸ சதுத்த²பா⁴க³க்³க⁴னகம் நீலகஹாபணஸ்ஸ பாத³க்³க⁴னகந்தி பரிச்சி²ந்தி³த்வா வினிச்ச²யோ காதப்³போ³’’தி (ஸாரத்த². டீ. 2.88) அயமத்தோ²வ வுத்தோ.

ஏத்த² கஹாபணம் நாம கரோந்தா ஸுவண்ணேனபி கரோந்தி ரஜதேனபி தம்பே³னபி ஸுவண்ணரஜததம்ப³மிஸ்ஸகேனபி. தேஸு கதரம் கஹாபணம் நீலகஹாபணந்தி? கேசி தாவ ‘‘ஸுவண்ணகஹாபண’’ந்தி. கேசி ‘‘மிஸ்ஸககஹாபண’’ந்தி. தத்த² ‘‘ஸுவண்ணகஹாபண’’ந்தி வத³ந்தானம் அயமதி⁴ப்பாயோ – பாராஜிகவத்து²னா பாதே³ன ஸப்³ப³த்த² ஏகலக்க²ணேன ப⁴விதப்³ப³ம், காலதே³ஸபரிபோ⁴கா³தி³வஸேன அக்³க⁴னானத்தம் பாத³ஸ்ஸேவ ப⁴விதப்³ப³ம். ப⁴க³வதா ஹி த⁴ம்மிகராஜூஹி ஹனனப³ந்த⁴னபப்³பா³ஜனானுரூபேனேவ அதி³ன்னாதா³னே பாராஜிகம் பஞ்ஞத்தம், ந இதரதா². தஸ்மா ஏஸா ஸப்³ப³தா³ ஸப்³ப³த்த² அப்³யபி⁴சாரீதி ஸுவண்ணமயஸ்ஸ கஹாபணஸ்ஸ சதுத்தே²ன பாதே³ன ப⁴விதப்³ப³ந்தி.

‘‘மிஸ்ஸககஹாபண’’ந்தி வத³ந்தானம் பன அயமதி⁴ப்பாயோ –

அட்ட²கதா²யம் –

‘‘ததா³ ராஜக³ஹே வீஸதிமாஸகோ கஹாபணோ ஹோதி, தஸ்மா பஞ்சமாஸகோ பாதோ³. ஏதேன லக்க²ணேன ஸப்³ப³ஜனபதே³ஸு கஹாபணஸ்ஸ சதுத்தோ² பா⁴கோ³ ‘பாதோ³’தி வேதி³தப்³போ³. ஸோ ச கோ² போராணகஸ்ஸ நீலகஹாபணஸ்ஸ வஸேன, ந இதரேஸம் து³த்³ரதா³மகாதீ³ன’’ந்தி (பாரா. அட்ட². 1.88) –

வுத்தத்தா, ஸாரத்த²தீ³பனியஞ்ச –

‘‘போராணஸத்தா²னுரூபம் லக்க²ணஸம்பன்னா உப்பாதி³தா நீலகஹாபணாதி வேதி³தப்³பா³’’தி (ஸாரத்த². டீ. 2.88) –

வுத்தத்தா ச ‘‘வினயவினிச்ச²யம் பத்வா க³ருகே டா²தப்³ப³’’ந்தி வசனதோ ச மிஸ்ஸககஹாபணோயேவ நீலகஹாபணோ. தத்தே²வ ஹி போராணஸத்த²விஹிதம் லக்க²ணம் தி³ஸ்ஸதி. கத²ம்? பஞ்ச மாஸா ஸுவண்ணஸ்ஸ, ததா² ரஜதஸ்ஸ, த³ஸ மாஸா தம்ப³ஸ்ஸாதி ஏதே வீஸதி மாஸே மிஸ்ஸேத்வா ப³ந்த⁴னத்தா²ய வீஹிமத்தம் லோஹம் பக்கி²பித்வா அக்க²ரானி ச ஹத்தி²ஆதீ³னமஞ்ஞதரஞ்ச ரூபம் த³ஸ்ஸேத்வா கதோ நித்³தோ³ஸத்தா நீலகஹாபணோ நாம ஹோதீதி.

ஸிக்கா²பா⁴ஜனவினிச்ச²யே ச கேஸுசி போத்த²கேஸு ‘‘பாதோ³ நாம பஞ்ச மாஸா ஸுவண்ணஸ்ஸா’’தி புரிமபக்க²வாதீ³னம் மதேன பாடோ² லிகி²தோ. கேஸுசி போத்த²கேஸு து³தியபக்க²வாதீ³னம் மதேன ‘‘பஞ்ச மாஸா ஹிரஞ்ஞஸ்ஸா’’தி பாடோ² லிகி²தோ. ஸீஹளபா⁴ஸாய போராணகேஹி லிகி²தாய ஸாமணேரஸிக்கா²ய பன –

‘‘போராணகஸ்ஸ நீலகஹாபணஸ்ஸாதி வுத்தஅட்ட²கதா²வசனஸ்ஸ, போராணகே ரதனஸுத்தாபி⁴தா⁴னகஸுத்தே வுத்தகஹாபணலக்க²ணஸ்ஸ ச அனுரூபதோ ‘ஸுவண்ணரஜததம்பா³னி மிஸ்ஸேத்வா உட்டா²பேத்வா கதகஹாபணம் கஹாபணம் நாமா’தி ச ‘ஸாமணேரானமுபஸம்பன்னானஞ்ச அதி³ன்னாதா³னபாராஜிகவத்து²ம்ஹி கோ விஸேஸோ’தி புச்ச²ம் கத்வா ‘ஸாமணேரானம் த³ஸிகஸுத்தேனாபி பாராஜிகோ ஹோதி, உபஸம்பன்னானம் பன ஸுவண்ணஸ்ஸ வீஸதிவீஹிமத்தேனா’’தி –

ச விஸேஸோ த³ஸ்ஸிதோ.

தம் பன ஸுவண்ணமாஸகவஸேன அட்³ட⁴தியமாஸகம் ஹோதி, பஞ்சமாஸகேன ச ப⁴க³வதா பாராஜிகம் பஞ்ஞத்தம். தஸ்மா தஸ்ஸ யதா²வுத்தலக்க²ணஸ்ஸ கஹாபணஸ்ஸ ஸப்³ப³தே³ஸேஸு அலப்³ப⁴மானத்தா ஸப்³ப³தே³ஸஸாதா⁴ரணேன தஸ்ஸ மிஸ்ஸககஹாபணஸ்ஸ பஞ்சமாஸபாத³க்³க⁴னகேன ஸுவண்ணேனேவ பாராஜிகவத்து²ம்ஹி நியமிதே ஸப்³ப³தே³ஸவாஸீனம் உபகாராய ஹோதீதி ஏவம் ஸுவண்ணேனேவ பாராஜிகவத்து²பரிச்சே²தோ³ கதோ. அயமேவ நியமோ ஸீஹளாசரியவாதே³ஹி ஸாரோதி க³ஹிதோ. தஸ்மா ஸிக்கா²க³ருகேஹி ஸப்³ப³த்த² பேஸலேஹி வினயத⁴ரேஹி அயமேவ வினிச்ச²யோ ஸாரதோ பச்சேதப்³போ³. ஹோந்தி சேத்த² –

‘‘ஹேமரஜததம்பே³ஹி, ஸத்தே² நித்³தி³ட்ட²லக்க²ணம்;

அஹாபேத்வா கதோ வீஸ-மாஸோ நீலகஹாபணோ.

ஹேமபாத³ம் ஸஜ்ஜு²பாத³ம், தம்ப³பாத³த்³வயஞ்ஹி ஸோ;

மிஸ்ஸேத்வா ரூபமப்பேத்வா, காதும் ஸத்தே²ஸு த³ஸ்ஸிதோ.

‘ஏலா’தி வுச்சதே தோ³ஸோ, நித்³தோ³ஸத்தா ததீ²ரிதோ;

தஸ்ஸ பாதோ³ ஸுவண்ணஸ்ஸ, வீஸவீஹக்³க⁴னோ மதோ.

யஸ்மிம் பன பதே³ஸே ஸோ, ந வத்ததி கஹாபணோ;

வீஸஸோவண்ணவீஹக்³க⁴ம், தப்பாத³க்³க⁴ந்தி வேதி³யம்.

வீஸஸோவண்ணவீஹக்³க⁴ம், தே²னேந்தா பி⁴க்க²வோ ததோ;

சவந்தி ஸாமஞ்ஞகு³ணா, இச்சாஹு வினயஞ்ஞுனோ’’தி.

9. ஓபாதந்தி ஆவாடம். து³க்கே² ஜாதேதி யோஜனா.

10. உத்தரிம் த⁴ம்மந்தி ஏத்த² ‘‘உத்தரிமனுஸ்ஸத⁴ம்ம’’ந்தி வத்தப்³பே³ நிருத்தினயேன மஜ்ஜ²பத³லோபம், நிக்³க³ஹீதாக³மஞ்ச கத்வா ‘‘உத்தரிம் த⁴ம்ம’’ந்தி வுத்தம். உத்தரிமனுஸ்ஸானம் ஜா²யீனஞ்சேவ அரியானஞ்ச த⁴ம்மம் உத்தரிமனுஸ்ஸத⁴ம்மம். அத்துபனாயிகந்தி அத்தனி தம் உபனேதி ‘‘மயி அத்தீ²’’தி ஸமுதா³சரந்தோ, அத்தானம் வா தத்த² உபனேதி ‘‘அஹம் ஏத்த² ஸந்தி³ஸ்ஸாமீ’’தி ஸமுதா³சரந்தோதி அத்துபனாயிகோ, தம் அத்துபனாயிகம், ஏவம் கத்வா வத³ந்தோதி ஸம்ப³ந்தோ⁴.

11. பரியாயேதி ‘‘யோ தே விஹாரே வஸதி, ஸோ பி⁴க்கு² அரஹா’’திஆதி³னா (பரி. 287) பரியாயப⁴ணனே. ஞாதேதி யம் உத்³தி³ஸ்ஸ ப⁴ணதி, தஸ்மிம் விஞ்ஞும்ஹி மனுஸ்ஸஜாதிகே அசிரேன ஞாதே. நோ சேதி நோ சே ஜானாதி.

இதி உத்தரே லீனத்த²பகாஸனியா

பாராஜிககதா²வண்ணனா நிட்டி²தா.

13. சேதேதி, உபக்கமதி, முச்சதி, ஏவம் அங்க³த்தயே புண்ணே க³ருகம் வுத்தம். த்³வங்கே³ சேதேதி, உபக்கமதி யதி³ ந முச்சதி, ஏவம் அங்க³த்³வயே து²ல்லச்சயந்தி யோஜனா. பயோகே³தி பயோஜேத்வா உபக்கமிதும் அங்க³ஜாதாமஸனம், பரஸ்ஸ ஆணாபனந்தி ஏவரூபே ஸாஹத்தி²காணத்திகபயோகே³.

14. வுத்தனயேனேவ உபரூபரி பஞ்ஹாபுச்ச²னம் ஞாதும் ஸக்காதி தம் அவத்துகாமோ ஆஹ ‘‘இதோ பட்டா²யா’’திஆதி³. மயம்பி யதே³த்த² புப்³பே³ அவுத்தமனுத்தானத்த²ஞ்ச, ததே³வ வண்ணயிஸ்ஸாம.

15. காயேனாதி அத்தனோ காயேன. காயந்தி இத்தி²யா காயம். ஏஸ நயோ ‘‘காயப³த்³த⁴’’ந்தி ஏத்தா²பி.

16. அத்தனோ காயேன படிப³த்³தே⁴ன இத்தி²யா காயபடிப³த்³தே⁴ பு²ட்டே² து து³க்கடந்தி யோஜனா.

17. திஸ்ஸோ ஆபத்தியோ ஸியுந்தி யோஜனா. த்³வின்னம் மக்³கா³னந்தி வச்சமக்³க³பஸ்ஸாவமக்³கா³னம்.

18. வண்ணாதி³ப⁴ஞ்ஞேதி வண்ணாதி³னா ப⁴ணனே. காயபடிப³த்³தே⁴ வண்ணாதி³னா ப⁴ஞ்ஞே து³க்கடந்தி யோஜனா.

19. அத்தகாமசரியாயாதி அத்தகாமபாரிசரியாய.

20. பண்ட³கஸ்ஸ ஸந்திகேபி அத்தகாமபாரிசரியாய வண்ணம் வத³தோ தஸ்ஸ பி⁴க்கு²னோதி யோஜனா. திரச்சா²னக³தஸ்ஸாபி ஸந்திகேதி ஏத்தா²பி ஏஸேவ நயோ.

21. இத்தி²புரிஸானமந்தரே ஸஞ்சரித்தம் ஸஞ்சரணபா⁴வம் ஸமாபன்னே பி⁴க்கு²ம்ஹி படிக்³க³ண்ஹனவீமம்ஸாபச்சாஹரணகத்திகே ஸம்பன்னே தஸ்ஸ பு³தோ⁴ க³ருகம் நித்³தி³ஸேதி யோஜனா.

22. த்³வங்க³ஸமாயோகே³தி தீஸ்வேதேஸு த்³வின்னம் அங்கா³னம் யதா²கத²ஞ்சி ஸமாயோகே³. அங்கே³ ஸதி பனேகஸ்மிந்தி திண்ணமேகஸ்மிம் பன அங்கே³ ஸதி.

24. பயோகே³தி ‘‘அதே³ஸிதவத்து²கம் பமாணாதிக்கந்தம் குடிம், அதே³ஸிதவத்து²கம் மஹல்லகவிஹாரஞ்ச காரேஸ்ஸாமீ’’தி உபகரணத்த²ம் அரஞ்ஞக³மனதோ பட்டா²ய ஸப்³ப³பயோகே³. ஏகபிண்டே³ அனாக³தேதி ஸப்³ப³பரியந்திமம் பிண்ட³ம் ஸந்தா⁴ய வுத்தம்.

25. இத⁴ யோ பி⁴க்கு² அமூலகேன பாராஜிகேன த⁴ம்மேன அனுத்³த⁴ம்ஸேதீதி யோஜனா.

26. ஓகாஸம் ந ச காரேத்வாதி ‘‘கரோது மே, ஆயஸ்மா, ஓகாஸம், அஹம் தே வத்துகாமோ’’தி ஏவம் தேன பி⁴க்கு²னா ஓகாஸம் அகாராபேத்வா.

28. அஞ்ஞபா⁴கி³யேதி அஞ்ஞபா⁴கி³யபதே³ன உபலக்கி²தஸிக்கா²பதே³. ஏவம் அஞ்ஞத்ரபி ஈதி³ஸேஸு டா²னேஸு அத்தோ² வேதி³தப்³போ³.

29. ‘‘ஸமனுபா⁴ஸனாய ஏவா’’தி பத³ச்சே²தோ³. ந படினிஸ்ஸஜந்தி அப்படினிஸ்ஸஜந்தோ.

30. ஞத்தியா து³க்கடம் ஆபன்னோ ஸியா, த்³வீஹி கம்மவாசாஹி து²ல்லதம் ஆபன்னோ ஸியா, கம்மவாசாய ஓஸானே க³ருகம் ஆபன்னோ ஸியாதி யோஜனா. ‘‘து²ல்லத’’ந்தி இத³ம் து²ல்லச்சயாபத்திஉபலக்க²ணவசனம்.

31. சதூஸு யாவததியகேஸு பட²மே ஆபத்திபரிச்சே²த³ம் த³ஸ்ஸேத்வா இதரேஸம் திண்ணம் தேனபி ஏகபரிச்சே²த³த்தா தத்த² வுத்தனயமேவ தேஸு அதிதி³ஸந்தோ ஆஹ ‘‘பே⁴தா³னுவத்தகே’’திஆதி³.

இதி உத்தரே லீனத்த²பகாஸனியா

ஸங்கா⁴தி³ஸேஸகதா²வண்ணனா நிட்டி²தா.

32. அதிரேகசீவரந்தி அனதி⁴ட்டி²தம், அவிகப்பிதம் விகப்பனுபக³பமாணம் சீவரம் லத்³தா⁴ த³ஸாஹம் அதிக்கமந்தோ ஏகமேவ நிஸ்ஸக்³கி³யம் பாசித்தியம் ஆபஜ்ஜதி. திசீவரேன ஏகரத்திம்பி வினா வஸந்தோ ஏகமேவ நிஸ்ஸக்³கி³யம் பாசித்தியம் ஆபஜ்ஜதி. இத³ஞ்ச ஜாதிவஸேன ஏகத்தம் ஸந்தா⁴ய வுத்தம் வத்து²க³ணனாய ஆபத்தீனம் பரிச்சி²ந்தி³தப்³ப³த்தா.

33. க³ஹேத்வாகாலசீவரந்தி அகாலசீவரம் படிக்³க³ஹேத்வா. மாஸந்தி ஸதியா பச்சாஸாய நிக்கி²பிதும் அனுஞ்ஞாதம் மாஸம். அதிக்கமந்தோதி ஸதியாபி பச்சாஸாய வீதிக்கமந்தோ அந்தோமாஸே அனதி⁴ட்ட²ஹித்வா, அவிகப்பேத்வா வா திம்ஸதி³வஸானி அதிக்கமந்தோ, சீவருப்பாத³தி³வஸம் அருணம் ஆதி³ம் கத்வா ஏகதிம்ஸமம் அருணம் உட்டா²பேந்தோதி அத்தோ². ஏகம் நிஸ்ஸக்³கி³யம் ஆபத்திம் ஆபஜ்ஜதீதி உதீ³ரிதந்தி யோஜனா.

34. அஞ்ஞாதிகாய பி⁴க்கு²னியா. யம்கிஞ்சி புராணசீவரந்தி ஏகவாரம்பி பரிபு⁴த்தம் ஸங்கா⁴டிஆதீ³னமஞ்ஞதரம் சீவரம்.

35. பயோக³ஸ்மிந்தி ‘‘தோ⁴வா’’திஆதி³கே பி⁴க்கு²னோ ஆணத்திகபயோகே³, ஏவம் ஆணத்தாய ச பி⁴க்கு²னியா உத்³த⁴னாதி³கே ஸப்³ப³ஸ்மிம் பயோகே³ ச. ‘‘நிஸ்ஸக்³கி³யாவ பாசித்தி ஹோதீதி நிஸ்ஸக்³கி³யா பாசித்தி ச ஹோதீதி யோஜனா.

36. படிக³ண்ஹதோதி ஏத்த² ‘‘அஞ்ஞத்ர பாரிவத்தகா’’தி யோஜனா.

38. பயோக³ஸ்மிந்தி விஞ்ஞாபனபயோகே³. விஞ்ஞாபிதேதி விஞ்ஞாபிதசீவரே படிலத்³தே⁴.

39. பி⁴க்கூ²தி அச்சி²ன்னசீவரோ வா நட்ட²சீவரோ வா பி⁴க்கு². தது³த்தரிந்தி ஸந்தருத்தரபரமதோ உத்தரிம்.

41. பயோகே³தி விகப்பனாபஜ்ஜனபயோகே³.

42. து³வேதி து³க்கடபாசித்தியவஸேன து³வே ஆபத்தியோ பு²ஸேதி யோஜேதப்³ப³ம்.

44. பயோகே³தி அனுஞ்ஞாதபயோக³தோ அதிரேகாபி⁴னிப்பா²த³னபயோகே³. லாபே⁴தி சீவரஸ்ஸ படிலாபே⁴.

கதி²னவக்³க³வண்ணனா பட²மா.

45. கோஸியவக்³க³ஸ்ஸ ஆதீ³ஸு பஞ்சஸு ஸிக்கா²பதே³ஸு த்³வே த்³வே ஆபத்தியோதி யோஜனா. பயோகே³தி கரணகாராபனபயோகே³. லாபே⁴தி கத்வா வா காரேத்வா வா பரினிட்டா²பனே.

46. ‘‘க³ஹேத்வா ஏளகலோமானீ’’தி பத³ச்சே²தோ³. அதிக்கமந்தி அதிக்கமந்தோ.

47. அஞ்ஞாயாதி அஞ்ஞாதிகாய பி⁴க்கு²னியா. ‘‘தோ⁴வாபேதி ஏளலோமக’’ந்தி பத³ச்சே²தோ³. ஏளலோமகந்தி ஏளகலோமானி. நிருத்தினயேன க-காரஸ்ஸ விபரியாயோ. பயோகே³தி தோ⁴வாபனபயோகே³.

48. பயோகே³தி படிக்³க³ண்ஹனபயோகே³.

49. நானாகாரந்தி நானப்பகாரம். ஸமாபஜ்ஜந்தி ஸமாபஜ்ஜந்தோ பி⁴க்கு². ஸமாபன்னேதி ஸம்வோஹாரே ஸமாபன்னே ஸதி. பயோகே³தி ஸமாபஜ்ஜனபயோகே³.

50. பயோகே³தி கயவிக்கயாபஜ்ஜனபயோகே³. தஸ்மிம் கதேதி தஸ்மிம் ப⁴ண்டே³ அத்தனோ ஸந்தகபா⁴வம் நீதே.

கோஸியவக்³க³வண்ணனா து³தியா.

51. அதிரேககந்தி அனதி⁴ட்டி²தம், அவிகப்பிதம் வா பத்தம். த³ஸாஹம் அதிக்கமேந்தஸ்ஸ தஸ்ஸ பி⁴க்கு²னோ ஏகாவ நிஸ்ஸக்³கி³யாபத்தி ஹோதீதி யோஜனா.

52-3. நத்தி² ஏதஸ்ஸ பஞ்ச ப³ந்த⁴னானீதி அபஞ்சப³ந்த⁴னோ, தஸ்மிம், ஊனபஞ்சப³ந்த⁴னே பத்தேதி அத்தோ². பயோகே³தி விஞ்ஞாபனபயோகே³. தஸ்ஸ பத்தஸ்ஸ லாபே⁴ படிலாபே⁴.

54. பே⁴ஸஜ்ஜந்தி ஸப்பிஆதி³கம்.

55. பயோகே³தி பரியேஸனபயோகே³.

56. பயோகே³தி அச்சி²ந்த³னஅச்சி²ந்தா³பனபயோகே³. ஹடேதி அச்சி²ந்தி³த்வா க³ஹிதே.

57. த்³வே பனாபத்தியோ பு²ஸேதி வாயாபனபயோகே³ து³க்கடம், விகப்பனுபக³பச்சி²மசீவரபமாணேன வீதே நிஸ்ஸக்³கி³யந்தி த்³வே ஆபத்தியோ ஆபஜ்ஜதீதி அத்தோ².

58-9. யோ பன பி⁴க்கு² அப்பவாரிதோ அஞ்ஞாதகஸ்ஸேவ தந்தவாயே ஸமேச்ச உபஸங்கமித்வா சீவரே விகப்பம் ஆபஜ்ஜந்தோ ஹோதி. ஸோதி ஸோ பி⁴க்கு². த்³வே ஆபத்தியோ ஆபஜ்ஜதி, ந ஸம்ஸயோதி யோஜனா. பயோகே³தி விகப்பாபஜ்ஜனபயோகே³.

60. அச்சேகஸஞ்ஞிதம் சீவரம் படிக்³க³ஹேத்வாதி யோஜனா. காலந்தி சீவரகாலம்.

61. திண்ணமஞ்ஞதரம் வத்த²ந்தி திண்ணம் சீவரானம் அஞ்ஞதரம் சீவரம். க⁴ரேதி அந்தரக⁴ரே. நித³ஹித்வாதி நிக்கி²பித்வா. தேன சீவரேன வினா சா²ரத்ததோ அதி⁴கம் தி³வஸம் யஸ்ஸ ஆரஞ்ஞகஸ்ஸ விஹாரஸ்ஸ கோ³சரகா³மே தம் சீவரம் நிக்கி²த்தம், தம்ஹா விஹாரா அஞ்ஞத்ர வஸந்தோ நிஸ்ஸக்³கி³யம் பு²ஸேதி யோஜனா.

62. ஸங்கி⁴கம் லாப⁴ம் பரிணதம் ஜானம் ஜானந்தோ.

63. பயோகே³தி பரிணாமனபயோகே³. ஸப்³ப³த்தா²தி பாராஜிகாதீ³ஸு ஸப்³ப³ஸிக்கா²பதே³ஸு. அப்பனாவாரபரிஹானீதி பரிவாரே பட²மம் வுத்தகத்த²பஞ்ஞத்திவாரஸ்ஸ பரிஹாபனம், இத⁴ அவசனந்தி அத்தோ², தஸ்ஸ வாரஸ்ஸ பரிவாரே ஸப்³ப³பட²மத்தா பட²மம் வத்தப்³ப³பா⁴வேபி தத்த² வத்தப்³ப³ம் பச்சா² க³ண்ஹிதுகாமேன மயா தம் ட²பேத்வா பட²மம் ஆபத்தித³ஸ்ஸனத்த²ம் தத³னந்தரோ கதாபத்திவாரோ பட²மம் வுத்தோதி அதி⁴ப்பாயோ.

பத்தவக்³க³வண்ணனா ததியா.

இதி உத்தரே லீனத்த²பகாஸனியா

திம்ஸனிஸ்ஸக்³கி³யகதா²வண்ணனா நிட்டி²தா.

64. மனுஸ்ஸுத்தரித⁴ம்மேதி உத்தரிமனுஸ்ஸத⁴ம்மே. அபூ⁴தஸ்மிம் உத்தரிமனுஸ்ஸத⁴ம்மே ஸமுல்லபிதே பராஜயோ பாராஜிகாபத்தி.

65. அமூலந்திமவத்து²னா அமூலகேன பாராஜிகேன த⁴ம்மேன பி⁴க்கு²ம் சோத³னாய க³ரு ஸங்கா⁴தி³ஸேஸோ ஹோதீதி யோஜனா. பரியாயவசனேதி ‘‘யோ தே விஹாரே வஸதீ’’திஆதி³னா (பரி. 287) பரியாயேன கத²னே. ஞாதேதி யஸ்ஸ கதே²தி, தஸ்மிம் வசனானந்தரமேவ ஞாதே.

66. நோ சே பன விஜானாதீதி அத² தம் பரியாயேன வுத்தம் வசனானந்தரமேவ ஸசே ந ஜானாதி. ஸமுதா³ஹடந்தி கதி²தம்.

67. ஓமஸதோ பி⁴க்கு²ஸ்ஸ து³வே ஆபத்தியோ வுத்தா. உபஸம்பன்னம் ஓமஸதோ பாசித்தி ஸியா. இதரம் அனுபஸம்பன்னம் ஓமஸதோ து³க்கடம் ஸியாதி யோஜனா.

68. பேஸுஞ்ஞஹரணேபி த்³வே ஆபத்தியோ ஹோந்தி.

69. பயோகே³தி பத³ஸோ த⁴ம்மம் வாசேந்தஸ்ஸ வசனகிரியாரம்ப⁴தோ பட்டா²ய யாவ பதா³தீ³னம் பரிஸமாபனம், ஏத்த²ந்தரே அக்க²ருச்சாரணபயோகே³ து³க்கடம். பதா³னம் பரிஸமத்தியம் பாசித்தியம்.

70. ‘‘திரத்தா அனுபஸம்பன்னஸஹஸேய்யாயா’’தி பத³ச்சே²தோ³. அனுபஸம்பன்னேன ஸஹஸேய்யா அனுபஸம்பன்னஸஹஸேய்யா, தாய. திரத்தா உத்தரிம் அனுபஸம்பன்னஸஹஸேய்யாயாதி யோஜனா. பயோகே³தி ஸயனத்தா²ய ஸேய்யாபஞ்ஞாபனகாயாவஜ்ஜனாதி³புப்³ப³பயோகே³. பன்னேதி காயபஸாரணலக்க²ணேன ஸயனேன நிபன்னே.

71. யோ பன பி⁴க்கு² ஏகரத்தியம் மாதுகா³மேன ஸஹஸேய்யம் கப்பேதி. து³க்கடாத³யோதி ‘‘பயோகே³ து³க்கடம், நிபன்னே பாசித்திய’’ந்தி யதா²வுத்தத்³வேஆபத்தியோ ஆபஜ்ஜதீதி யோஜனா.

72. பயோகே³தி யதா²வுத்தலக்க²ணபயோகே³.

73. அனுபஸம்பன்னேதி ஸமீபத்தே² சேதம் பு⁴ம்மம். அனுபஸம்பன்னஸ்ஸ ஸந்திகே பூ⁴தம் உத்தரிமனுஸ்ஸத⁴ம்மம் யோ ஸசே ஆரோசேதீதி யோஜனா. து³க்கடாத³யோதி யஸ்ஸ ஆரோசேதி, ஸோ நப்படிவிஜானாதி, து³க்கடம், படிவிஜானாதி, பாசித்தியந்தி ஏவம் த்³வே ஆபத்தியோ தஸ்ஸ ஹோந்தி.

74. அஞ்ஞதோ அஞ்ஞஸ்ஸ உபஸம்பன்னஸ்ஸ து³ட்டு²ல்லஸ்ஸ ஆபத்திம் அனுபஸம்பன்னே அனுபஸம்பன்னஸ்ஸ ஸந்திகே வத³ம் வத³ந்தோதி யோஜனா. பயோகே³தி ஆரம்ப⁴தோ பட்டா²ய புப்³ப³பயோகே³ து³க்கடம் ஆக³ச்ச²தி து³க்கடம் ஆபஜ்ஜதி. ஆரோசிதே பாசித்தி ஸியாதி யோஜனா.

75. பயோகே³தி ‘‘அகப்பியபத²விம் க²ணிஸ்ஸாமீ’’தி குதா³ல பரியேஸனாதி³ஸப்³ப³பயோகே³தி.

முஸாவாத³வக்³க³வண்ணனா பட²மா.

76. பாதேந்தோதி விகோபேந்தோ. தஸ்ஸாதி பூ⁴தகா³மஸ்ஸ. பாதேதி விகோபனே.

77. அஞ்ஞவாத³கவிஹேஸகானம் ஏகயோக³னித்³தி³ட்ட²த்தா தத்த² வுத்தனயேனேவ விஹேஸகே ச ஞாதும் ஸக்காதி தத்த² விஸும் ஆபத்திபே⁴தோ³ ந வுத்தோ.

78. பரந்தி அஞ்ஞம் ஸங்கே⁴ன ஸம்மதஸேனாஸனபஞ்ஞாபகாதி³கம் உபஸம்பன்னம். உஜ்ஜா²பேந்தோதி தஸ்ஸ அயஸம் உப்பாதே³துகாமதாய பி⁴க்கூ²ஹி அவஜானாபேதும் ‘‘ச²ந்தா³ய இத்த²ன்னாமோ இத³ம் நாம கரோதீ’’திஆதீ³னி வத்வா அவஞ்ஞாய ஓலோகாபேந்தோ, லாமகதோ வா சிந்தாபேந்தோ. பயோகே³தி உஜ்ஜா²பனத்தா²ய தஸ்ஸ அவண்ணப⁴ணனாதி³கே புப்³ப³பயோகே³.

83. ஸங்கி⁴கே விஹாரே புப்³பூ³பக³தம் பி⁴க்கு²ம் ஜானம் ஜானந்தோ அனுபக²ஜ்ஜ ஸேய்யம் கப்பேதி, தஸ்ஸேவம் ஸேய்யம் கப்பயதோதி யோஜனா. பயோகே³து³க்கடாத³யோதி ஏத்த² அலுத்தஸமாஸோ. ஆதி³-ஸத்³தே³ன ஸேய்யாகப்பனே பாசித்தியம் ஸங்க³ண்ஹாதி.

84. பயோகே³தி ‘‘நிக்கட்³ட⁴த² இம’’ந்திஆதி³கே ஆணத்திகே வா ‘‘யாஹி யாஹீ’’திஆதி³கே வாசஸிகே வா ஹத்தே²ன தஸ்ஸ அங்க³பராமஸனாதி³வஸேன கதே காயிகே வா நிக்கட்³ட⁴னபயோகே³. ஸேஸந்தி பாசித்தியம்.

85. ‘‘வேஹாஸகுடியா உபரீ’’தி பத³ச்சே²தோ³. ஆஹச்சபாத³கேதி ஏத்த² ‘‘மஞ்சே வா பீடே² வா’’தி ஸேஸோ. ஸீத³ந்தி நிஸீத³ந்தோ. து³க்கடாத³யோதி பயோகே³ து³க்கடம், நிபஜ்ஜாய பாசித்தியந்தி இமா ஆபத்தியோ பு²ஸேதி அத்தோ².

86. அஸ்ஸ பஜ்ஜஸ்ஸ பட²மபாத³ம் த³ஸக்க²ரபாத³கம் ச²ந்தோ³விசிதியம் வுத்தகா³தா², ‘‘கா³தா²ச²ந்தோ³ அதீதத்³வய’’ந்தி இமினா ச²ந்தோ³விசிதிலக்க²ணேன கா³தா²ச²ந்த³த்தா அதி⁴ட்டி²த்வா த்³வத்திபரியாயேதி ஏத்த² அக்க²ரத்³வயம் அதி⁴கம் வுத்தந்தி த³ட்ட²ப்³ப³ம். பயோகே³தி அதி⁴ட்டா²னபயோகே³. அதி⁴ட்டி²தேதி த்³வத்திபரியாயானம் உபரி அதி⁴ட்டா²னே கதே.

87. பயோகே³தி ஸிஞ்சனஸிஞ்சாபனபயோகே³. ஸித்தேதி ஸிஞ்சனகிரியபரியோஸானே.

பூ⁴தகா³மவக்³க³வண்ணனா து³தியா.

88. து³க்கடம் பு²ஸேதி யோஜனா. ஓவதி³தே பாசித்தி ஸியாதி யோஜனா.

89. விபா⁴கோ³யேவ விபா⁴க³தா.

90. அஞ்ஞாதிகாய பி⁴க்கு²னியா அஞ்ஞத்ர பாரிவத்தகா சீவரம் தே³ந்தோ பி⁴க்கு² து³வே ஆபத்தியோ பு²ஸேதி யோஜனா. பயோகே³தி தா³னபயோகே³.

93. ‘‘நாவம் ஏக’’ந்தி பத³ச்சே²தோ³. பயோகே³தி அபி⁴ருஹணபயோகே³. து³க்கடாத³யோதி ஆதி³-ஸத்³தே³ன அபி⁴ருள்ஹே பாசித்தியம் ஸங்க³ண்ஹாதி.

94. ‘‘து³வித⁴ம் ஆபத்தி’’ந்தி பத³ச்சே²தோ³.

96. பி⁴க்கு²னியா ஸத்³தி⁴ம் ரஹோ நிஸஜ்ஜம் கப்பேந்தோ பி⁴க்கு² பயோகே³து³க்கடாத³யோ த்³வேபி ஆபத்தியோ பு²ஸேதி யோஜனா.

ஓவாத³வக்³க³வண்ணனா ததியா.

97. தது³த்தரிந்தி ததோ பு⁴ஞ்ஜிதும் அனுஞ்ஞாதஏகதி³வஸதோ உத்தரிம் து³தியதி³வஸதோ பட்டா²ய. அனந்தரஸ்ஸ வக்³க³ஸ்ஸாதி ஓவாத³வக்³க³ஸ்ஸ. நவமேனாதி பி⁴க்கு²னியா பரிபாசிதபிண்ட³பாதஸிக்கா²பதே³ன.

99. த்³வத்திபத்தேதி த்³வத்திபத்தபூரே. தது³த்தரிந்தி த்³வத்திபத்தபூரதோ உத்தரிம். பயோகே³தி படிக்³க³ஹணபயோகே³.

101. அபி⁴ஹட்டு²ந்தி அபி⁴ஹரித்வா.

102. தஸ்ஸாதி அபி⁴ஹரந்தஸ்ஸ. பிடகேதி வினயபிடகே.

103. த³ஸமேபீதி ஏத்த² ‘‘த³ஸமே அபீ’’தி பத³ச்சே²தோ³.

போ⁴ஜனவக்³க³வண்ணனா சதுத்தா².

104. அசேலகாதி³னோதி ஆதி³-ஸத்³தே³ன ‘‘பரிப்³பா³ஜகஸ்ஸ வா பரிப்³பா³ஜிகாய வா’’தி (பாசி. 270) வுத்தே ஸங்க³ண்ஹாதி. போ⁴ஜனாதி³கந்தி ஆதி³-ஸத்³தே³ன கா²த³னீயம் ஸங்க³ண்ஹாதி. பயோகே³தி ஸஹத்தா² தா³னபயோகே³.

105. தா³பேத்வா வா அதா³பேத்வா வா கிஞ்சி ஆமிஸம். பயோகே³தி உய்யோஜனபயோகே³. தஸ்மிந்தி தஸ்மிம் பி⁴க்கு²ம்ஹி. உய்யோஜிதே பாசித்தி ஸியாதி யோஜனா.

109. உம்மாராதிக்கமேதி இந்த³கீ²லாதிக்கமே.

110. தது³த்தரிந்தி ததோ பரிச்சி²ன்னரத்திபரியந்ததோ வா பரிச்சி²ன்னபே⁴ஸஜ்ஜபரியந்ததோ வா உத்தரிம்.

111. உய்யுத்தம் த³ஸ்ஸனத்தா²ய க³ச்ச²ந்தோ த்³வே ஆபத்தியோ பு²ஸேதி யோஜனா.

அசேலகவக்³க³வண்ணனா பஞ்சமா.

114. மேரேய்யந்தி மேரயம். நிருத்தினயேன அ-காரஸ்ஸ ஏ-காரோ, ய-காரஸ்ஸ ச த்³வித்தம். மேரய-ஸத்³த³பரியாயோ வா மேரேய்ய-ஸத்³தோ³. முனீதி பி⁴க்கு².

115. ‘‘பி⁴க்கு² அங்கு³லிபதோதே³னா’’தி பத³ச்சே²தோ³. பயோகே³தி ஹாஸாபனபயோகே³. தஸ்ஸாதி ஹாஸாபேந்தஸ்ஸ.

116. கோ³ப்ப²கா ஹேட்டா² உத³கே து³க்கடம். கோ³ப்ப²கதோ உபரி உபரிகோ³ப்ப²கம், உத³கம், தஸ்மிம், கோ³ப்ப²கதோ அதி⁴கப்பமாணே உத³கேதி அத்தோ².

117. அனாத³ரியந்தி புக்³க³லானாத³ரியம், த⁴ம்மானாத³ரியம் வா. பயோகே³தி அனாத³ரியவஸேன பவத்தே காயபயோகே³ வா வசீபயோகே³ வா. கதே அனாத³ரியே.

118. பயோகே³தி பி⁴ம்ஸாபனபயோகே³.

119. ஜோதிந்தி அக்³கி³ம். ஸமாத³ஹித்வானாதி ஜாலேத்வா. ‘‘விஸிப்³பே³ந்தோ’’தி இமினா ப²லூபசாரேன காரணம் வுத்தம். விஸிப்³ப³னகிரியா ஹி ஸமாத³ஹனகிரியாய ப²லந்தி விஸிப்³ப³னகிரியாவோஹாரேன ஸமாத³ஹனகிரியாவ. தஸ்மா விஸிப்³பே³ந்தோதி ஏத்த² ஸமாத³ஹந்தோதி அத்தோ². பயோகே³தி ஸமாத³ஹனஸமாத³ஹாபனபயோகே³. விஸீவிதேதி வுத்தனயேன ஸமாத³ஹிதேதி அத்தோ².

120. பயோகே³தி சுண்ணமத்திகாபி⁴ஸங்க²ரணாதி³ஸப்³ப³பயோகே³. இதரந்தி பாசித்தியம்.

121. திண்ணம் து³ப்³ப³ண்ணகரணானந்தி கம்ஸனீலபத்தனீலகத்³த³மஸங்கா²தானம் திண்ணம் து³ப்³ப³ண்ணகரணானம். ஏகம் அஞ்ஞதரம் அனாதி³ய அத³த்வா. சீவரந்தி நவசீவரம்.

122. நத்தி² ஏதஸ்ஸ உத்³தா⁴ரந்தி அனுத்³தா⁴ரோ, தம் அனுத்³தா⁴ரந்தி வத்தப்³பே³ கா³தா²ப³ந்த⁴வஸேன ரஸ்ஸத்தம், அகதபச்சுத்³தா⁴ரந்தி அத்தோ².

123. அபனிதே⁴ந்தோதி அபனேத்வா நிதே⁴ந்தோ நிக்கி²பேந்தோ. பத்தாதி³கந்தி ஆதி³-ஸத்³தே³ன சீவரனிஸீத³னஸூசிக⁴ரகாயப³ந்த⁴னானம் க³ஹணம். பயோகே³தி அபனிதா⁴னபயோகே³. தஸ்மிம் பத்தாதி³கே பஞ்சவிதே⁴ பரிக்கா²ரே. அபனிஹிதே ஸேஸா பாசித்தியாபத்தி ஸியாதி யோஜனா.

ஸுராபானவக்³க³வண்ணனா ச²ட்டா².

124. தபோத⁴னோதி பாதிமோக்க²ஸம்வரஸீலஸங்கா²தம் தபோத⁴னமஸ்ஸாதி தபோத⁴னோ, பி⁴க்கு².

125. தஸ்மிம் ஓபாதே.

126. மனுஸ்ஸவிக்³க³ஹோ மனுஸ்ஸஸரீரோ. திரச்சா²னக³தோ நாகோ³ வா ஸுபண்ணோ வா. தஸ்ஸ ஓபாதக²ணகஸ்ஸ.

127. படுபு³த்³தி⁴னாதி ஸப்³பே³ஸு ஞேய்யத⁴ம்மேஸு நிபுனஞாணேன ப⁴க³வதா.

128. பயோகே³தி பரிபோ⁴க³த்தா²ய க³ஹணாதி³கே பயோகே³. தஸ்ஸாதி பி⁴க்கு²ஸ்ஸ.

129. உக்கோடேந்தோதி உச்சாலேந்தோ யதா²டா²னே டா²தும் அதே³ந்தோ. பயோகே³தி உக்கோடனபயோகே³. உக்கோடிதே பாசித்தியம் ஸியாதி யோஜனா.

130. து³ட்டு²ல்லம் வஜ்ஜகந்தி ஸங்கா⁴தி³ஸேஸாதி³கே. ஏகம் பாசித்தியம் ஆபத்திம் ஆபஜ்ஜதி இதி தீ³பிதந்தி யோஜனா.

131. பயோகே³தி க³ணபரியேஸனாதி³பயோகே³. து³க்கடம் பத்தோ ஸியா து³க்கடாபத்திம் ஆபன்னோ ப⁴வேய்யாதி அத்தோ². ஸேஸாதி பாசித்தியாபத்தி உபஸம்பாதி³தே ஸியா. கா³தா²ப³ந்த⁴வஸேன உபஸக்³க³லோபோ.

132-3. ஜானம் தே²ய்யஸத்தே²ன ஸஹ ஸம்விதா⁴ய மக்³க³ம் படிபஜ்ஜதோ ச ததே²வ மாதுகா³மேன ஸஹ ஸம்விதா⁴ய மக்³க³ம் படிபஜ்ஜதோ சாதி யோஜனா. பயோகே³தி ஸம்விதா⁴ய க³ந்தும் படிபுச்சா²தி³கரணபயோகே³. படிபன்னேதி மக்³க³படிபன்னே. அனந்தரந்தி அத்³த⁴யோஜனகா³மந்தராதிக்கமனானந்தரம்.

134. ஞத்தியா ஓஸானே து³க்கடம் பு²ஸேதி யோஜனா.

135. அகதானுத⁴ம்மேனாதி அனுத⁴ம்மோ வுச்சதி ஆபத்தியா அத³ஸ்ஸனே வா அப்படிகம்மே வா பாபிகாய தி³ட்டி²யா அப்படினிஸ்ஸக்³கே³ வா த⁴ம்மேன வினயேன ஸத்து²ஸாஸனேன உக்கி²த்தகஸ்ஸ அனுலோமவத்தம் தி³ஸ்வா கத்வா ஓஸாரணா, ஸோ ஓஸாரணஸங்கா²தோ அனுத⁴ம்மோ யஸ்ஸ ந கதோ, அயம் அகதானுத⁴ம்மோ நாம, தாதி³ஸேன பி⁴க்கு²னா ஸத்³தி⁴ந்தி அத்தோ². ஸம்பு⁴ஞ்ஜந்தோதி ஆமிஸஸம்போ⁴க³ம் கரோந்தோ பி⁴க்கு². பயோகே³தி பு⁴ஞ்ஜிதும் ஆமிஸபடிக்³க³ஹணாதி³பயோகே³. பு⁴த்தேதி ஸம்பு⁴த்தே, உப⁴யஸம்போ⁴கே³, தத³ஞ்ஞதரே வா கதேதி அத்தோ².

136. உபலாபேந்தோதி பத்தசீவரஉத்³தே³ஸபரிபுச்ச²னாதி³வஸேன ஸங்க³ண்ஹந்தோ. பயோகே³தி உபலாபனபயோகே³.