பகிண்ணகவினிச்ச²யகதா²வண்ணனா

3029. ச²த்தம் பண்ணமயம் கிஞ்சீதி தாலபண்ணாதி³பண்ணச்ச²த³னம் யம் கிஞ்சி ச²த்தம். ப³ஹீதி உபரி. அந்தோதி ஹேட்டா². ஸிப்³பி³துந்தி ரூபம் த³ஸ்ஸேத்வா ஸூசிகம்மம் காதும்.

3030. பண்ணேதி ச²த³னபண்ணே. அட்³ட⁴சந்த³ந்தி அட்³ட⁴சந்தா³காரம். மகரத³ந்தகந்தி மகரத³ந்தாகாரம், யம் ‘‘கி³ரிகூட’’ந்தி வுச்சதி. சி²ந்தி³தும் ந வட்டதீதி ஸம்ப³ந்தோ⁴. முக²வட்டியா நாமேத்வா ப³த்³த⁴பண்ணகோடியா வா மத்த²கிமண்ட³லகோடியா வா கி³ரிகூடாதி³ம் கரோந்தி, இமினா தம் படிக்கி²த்தம். த³ண்டே³தி ச²த்தத³ண்டே³. க⁴டகந்தி க⁴டாகாரோ. வாளரூபம் வாதி ப்³யக்³கா⁴தி³வாளானம் ரூபகம் வா. லேகா²தி உக்கிரித்வா வா சி²ந்தி³த்வா வா சித்தகம்மவஸேன வா கதராஜி.

3031. பஞ்சவண்ணானம் ஸுத்தானம் அந்தரே நீலாதி³ஏகவண்ணேன ஸுத்தேன தி²ரத்த²ம் ச²த்தம் அந்தோ ச ப³ஹி ச ஸிப்³பி³தும் வா ச²த்தத³ண்ட³க்³கா³ஹகஸலாகபஞ்ஜரம் தி²ரத்த²ம் வினந்தி⁴தும் வா வட்டதீதி யோஜனா. ‘‘பஞ்சவண்ணானம் ஏகவண்ணேன தி²ரத்த²’’ந்தி இமினா அனேகவண்ணேஹி ஸுத்தேஹி வண்ணமட்ட²த்தா²ய ஸிப்³பி³துஞ்ச வினந்தி⁴துஞ்ச ந வட்டதீதி தீ³பேதி.

போத்த²கேஸு பன ‘‘பஞ்சவண்ணேனா’’தி பாடோ² தி³ஸ்ஸதி, தஸ்ஸ ஏகவண்ணேன, பஞ்சவண்ணேன வா ஸுத்தேன தி²ரத்த²ம் ஸிப்³பி³தும், வினந்தி⁴தும் வா வட்டதீதி யோஜனா காதப்³பா³ ஹோதி, ஸோ ஏத்தே²வ ஹேட்டா² வுத்தேன –

‘‘பஞ்சவண்ணேன ஸுத்தேன, ஸிப்³பி³தும் ந ச வட்டதீ’’தி –

பாடே²ன ச ‘‘கேசி தாலபண்ணச்ச²த்தம் அந்தோ வா ப³ஹி வா பஞ்சவண்ணேன ஸுத்தேன ஸிப்³ப³ந்தா வண்ணமட்ட²ம் கரோந்தி, தம் ந வட்டதி. ஏகவண்ணேன பன நீலேன வா பீதகேன வா யேன கேனசி ஸுத்தேன அந்தோ வா ப³ஹி வா ஸிப்³பி³தும் ச²த்தத³ண்ட³க்³கா³ஹகம் ஸலாகபஞ்ஜரம் வா வினந்தி⁴தும் வட்டதி, தஞ்ச கோ² தி²ரகரணத்த²ம், ந வண்ணமட்ட²த்தா²யா’’தி (பாரா. அட்ட². 1.85 பாளிமுத்தகவினிச்ச²ய) அட்ட²கதா²பாடே²ன ச விருஜ்ஜ²தி, தஸ்மா ஸோ ந க³ஹேதப்³போ³.

3032. லேகா² வா பன கேவலாதி யதா²வுத்தப்பகாரா ஸலாகலேகா² வா. சி²ந்தி³த்வாதி உக்கிரித்வா கதம் சி²ந்தி³த்வா. க⁴ம்ஸித்வாதி சித்தகம்மாதி³வஸேன கதம் க⁴ம்ஸித்வா.

3033. த³ண்ட³பு³ந்த³ம்ஹீதி ச²த்தத³ண்ட³ஸ்ஸ பஞ்ஜரே கா³ஹணத்தா²ய பா²லிதபு³ந்த³ம்ஹி, மூலேதி அத்தோ². அயமேத்த² நிஸ்ஸந்தே³ஹே வுத்தனயோ. கு²த்³த³ஸிக்கா²க³ண்டி²பதே³ பன ‘‘ச²த்தபிண்டி³யா மூலே’’தி வுத்தம். அஹிச²த்தகஸண்டா²னந்தி பு²ல்லஅஹிச²த்தாகாரம். ரஜ்ஜுகேஹி கா³ஹாபேத்வா த³ண்டே³ ப³ந்த⁴ந்தி, தஸ்மிம் ப³ந்த⁴ட்டா²னே வலயமிவ உக்கிரித்வா உட்டா²பேத்வா. ப³ந்த⁴னத்தா²யாதி வாதேன யதா² ந சலதி, ஏவம் ரஜ்ஜூஹி த³ண்டே³ பஞ்ஜரஸ்ஸ ப³ந்த⁴னத்தா²ய. உக்கிரித்வா கதா லேகா² வட்டதீதி யோஜனா. யதா²ஹ – ‘‘வாதப்பஹாரேன அசலனத்த²ம் ச²த்தமண்ட³லிகம் ரஜ்ஜுகேஹி கா³ஹாபேத்வா த³ண்டே³ ப³ந்த⁴ந்தி, தஸ்மிம் ப³ந்த⁴னட்டா²னே வலயமிவ உக்கிரித்வா லேக²ம் ட²பேந்தி, ஸா வட்டதீ’’தி. ‘‘ஸசேபி ந ப³ந்த⁴ந்தி, ப³ந்த⁴னாரஹட்டா²னத்தா வலயம் உக்கிரிதும் வட்டதீ’’தி க³ண்டி²பதே³ வுத்தம்.

3034. ஸமம் ஸதபதா³தீ³னந்தி ஸதபதா³தீ³ஹி ஸதி³ஸம், துல்யத்தே² கரணவசனப்பஸங்கே³ ஸாமிவசனம்.

3035. பத்தஸ்ஸ பரியந்தே வாதி அனுவாதஸ்ஸ உப⁴யபரியந்தே வா. பத்தமுகே²பி வாதி த்³வின்னம் ஆராமவித்தா²ரபத்தானம் ஸங்க⁴டிதட்டா²னே கண்ணேபி வா, ஏகஸ்ஸேவ வா பத்தஸ்ஸ ஊனபூரணத்த²ம் ஸங்க⁴டிதட்டா²னேபி வா. வேணிந்தி குத்³ரூஸஸீஸாகாரேன ஸிப்³ப³னம். கேசி ‘‘வரகஸீஸாகாரேனா’’தி வத³ந்தி. ஸங்க²லிகந்தி பி³ளாலதா³மஸதி³ஸம் ஸிப்³ப³னம். கேசி ‘‘ஸதபதி³ஸம’’ந்தி வத³ந்தி.

3036. பட்டந்தி பட்டம்பி. அட்ட²கோணாதி³கோ விதி⁴ பகாரோ ஏதஸ்ஸாதி அட்ட²கோணாதி³கவிதி⁴, தம். ‘‘அட்ட²கோணாதி³க’’ந்தி கா³தா²ப³ந்த⁴வஸேன நிக்³க³ஹிதாக³மோ. ‘‘அட்ட²கோணாதி³கம் விதி⁴’’ந்தி ஏதம் ‘‘பட்ட’’ந்தி ஏதஸ்ஸ ஸமானாதி⁴கரணவிஸேஸனம், கிரியாவிஸேஸனம் வா, ‘‘கரோந்தீ’’தி இமினா ஸம்ப³ந்தோ⁴. அத² வா பட்டந்தி ஏத்த² பு⁴ம்மத்தே² உபயோக³வசனம், பட்டேதி அத்தோ². இமஸ்மிம் பக்கே² ‘‘அட்ட²கோணாதி³க’’ந்தி உபயோக³வசனம். ‘‘விதி⁴’’ந்தி ஏதஸ்ஸ விஸேஸனம். இத⁴ வக்க²மானசதுகோணஸண்டா²னதோ அஞ்ஞம் அட்ட²கோணாதி³கம் நாமம். தத்தா²தி தஸ்மிம் பட்டத்³வயே. அக்³கி⁴யக³தா³ரூபந்தி அக்³கி⁴யஸண்டா²னஞ்சேவ க³தா³ஸண்டா²னஞ்ச ஸிப்³ப³னம். முக்³க³ரந்தி லகு³ளஸண்டா²னஸிப்³ப³னம். ஆதி³-ஸத்³தே³ன சேதியாதி³ஸண்டா²னானம் க³ஹணம்.

3037. தத்தா²தி பட்டத்³வயே தஸ்மிம் டா²னே. கக்கடகக்கீ²னீதி குளீரஅச்சி²ஸதி³ஸானி ஸிப்³ப³னவிகாரானி. உட்டா²பேந்தீதி கரோந்தி. தத்தா²தி தஸ்மிம் க³ண்டி²கபாஸகபட்டகே. ஸுத்தாதி கோணதோ கோணம் ஸிப்³பி³தஸுத்தா சேவ சதுரஸ்ஸே ஸிப்³பி³தஸுத்தா ச. பிளகாதி தேஸமேவ ஸுத்தானம் நிவத்தேத்வா ஸிப்³பி³தகோடியோ ச. து³விஞ்ஞேய்யாவாதி ரஜனகாலே து³விஞ்ஞேய்யரூபா அனோளாரிகா தீ³பிதா வட்டந்தீதி. யதா²ஹ – ‘‘கோணஸுத்தபிளகா ச சீவரே ரத்தே து³விஞ்ஞேய்யரூபா வட்டந்தீ’’தி.

3038. க³ண்டி²பாஸகபட்டகாதி க³ண்டி²கபட்டகபாஸகபட்டகாதி யோஜனா. கண்ணகோணேஸு ஸுத்தானீதி சீவரகண்ணேஸு ஸுத்தானி சேவ க³ண்டி²கபாஸகபட்டானம் கோணேஸு ஸுத்தானி ச சி²ந்தே³ய்ய. ஏத்த² ச சீவரே ஆயாமதோ, வித்தா²ரதோ ச ஸிப்³பி³த்வா அனுவாததோ ப³ஹி நிக்க²ந்தஸுத்தம் சீவரம் ரஜித்வா ஸுக்கா²பனகாலே ரஜ்ஜுயா வா சீவரவம்ஸே வா ப³ந்தி⁴த்வா ஓலம்பி³தும் அனுவாதே ப³த்³த⁴ஸுத்தானி ச கண்ணஸுத்தானி நாம. யதா²ஹ – ‘‘சீவரஸ்ஸ கண்ணஸுத்தகம் ந வட்டதி, ரஜிதகாலே சி²ந்தி³தப்³ப³ம். யம் பன ‘அனுஜானாமி, பி⁴க்க²வே, கண்ணஸுத்தக’ந்தி (மஹாவ. 344) ஏவம் அனுஞ்ஞாதம், தம் அனுவாதே பாஸகம் கத்வா ப³ந்தி⁴தப்³ப³ம், ரஜனகாலே லக்³க³னத்தா²யா’’தி (பாரா. அட்ட². 1.85 பாளிமுத்தகவினிச்ச²ய).

3039. ஸூசிகம்மவிகாரம் வாதி சீவரமண்ட³னத்தா²ய நானாஸுத்தகேஹி ஸதபதி³ஸதி³ஸம் ஸிப்³ப³ந்தா ஆக³ந்துகபட்டம் ட²பேந்தி, ஏவரூபம் ஸூசிகம்மவிகாரம் வா. அஞ்ஞம் வா பன கிஞ்சிபீதி அஞ்ஞம்பி யம் கிஞ்சி மாலாகம்மமிக³பக்கி²பாதா³தி³கம் ஸிப்³ப³னவிகாரம். காதுந்தி ஸயம் காதும். காராபேதுந்தி அஞ்ஞேன வா காராபேதும்.

3040. யோ பி⁴க்கு² பரம் உத்தமம் வண்ணமட்ட²ம் அபி⁴பத்த²யம் பத்த²யந்தோ கஞ்ஜிபிட்ட²க²லிஅல்லிகாதீ³ஸு சீவரம் பக்கி²பதி, தஸ்ஸ பன பி⁴க்கு²னோ து³க்கடா மோக்கோ² ந விஜ்ஜதீதி யோஜனா. கஞ்ஜீதி வாயனதந்தமக்க²னகஞ்ஜிஸதி³ஸா தூ²லாகஞ்ஜி. பிட்ட²ந்தி தண்டு³லபிட்ட²ம். தண்டு³லபிட்டே²ஹி பக்கா க²லி. அல்லிகாதி நிய்யாஸோ. ஆதி³-ஸத்³தே³ன லாகா²தீ³னம் க³ஹணம்.

3041. சீவரஸ்ஸ கரணே கரணகாலே ஸமுட்டி²தானம் ஸூசிஹத்த²மலாதீ³னம் தோ⁴வனத்த²ம், கிலிட்ட²காலே ச தோ⁴வனத்த²ம் கஞ்ஜிபிட்டி²க²லிஅல்லிகாதீ³ஸு பக்கி²பதி, வட்டதீதி யோஜனா.

3042. தத்தா²தி யேன கஸாவேன சீவரம் ரஜதி, தஸ்மிம் ரஜனே சீவரஸ்ஸ ஸுக³ந்த⁴பா⁴வத்தா²ய க³ந்த⁴ம் வா உஜ்ஜலபா⁴வத்தா²ய தேலம் வா வண்ணத்தா²ய லாக²ம் வா. கிஞ்சீதி ஏவரூபம் யம் கிஞ்சி.

3043. மணினாதி பாஸாணேன. அஞ்ஞேனபி ச கேனசீதி யேன உஜ்ஜலம் ஹோதி, ஏவரூபேன முக்³க³ராதி³னா அஞ்ஞேனாபி கேனசி வத்து²னா. தோ³ணியாதி ரஜனம்ப³ணே. ந க⁴ம்ஸிதப்³ப³ம் ஹத்தே²ன கா³ஹேத்வா ந க⁴ட்டேதப்³ப³ம்.

3044. ரத்தம் சீவரம் ஹத்தே²ஹி கிஞ்சி தோ²கம் பஹரிதும் வட்டதீதி யோஜனா. ‘‘யத்த² பக்கரஜனம் பக்கி²பந்தி, ஸா ரஜனதோ³ணி, தத்த² அம்ஸப³த்³த⁴ககாயப³ந்த⁴னாதி³ம் க⁴ட்டேதும் வட்டதீ’’தி க³ண்டி²பதே³ வுத்தம்.

3045. க³ண்டி²கேதி வேளுத³ந்தவிஸாணாதி³மயக³ண்டி²கே. லேகா² வாதி வட்டாதி³பே⁴தா³ லேகா² வா. பிளகா வாதி ஸாஸபபீ³ஜஸதி³ஸா கு²த்³த³கபுப்³பு³ளா வா. பாளிகண்ணிகபே⁴த³கோதி மணிகாவளிரூபபுப்ப²கண்ணிகரூபபே⁴த³கோ. கப்பபி³ந்து³விகாரோ வா ந வட்டதீதி யோஜனா.

3046. ஆரக்³கே³னாதி ஆரகண்டகக்³கே³ன, ஸூசிமுகே²ன வா. காசிபி லேகா²தி வட்டககோ³முத்தாதி³ஸண்டா²னா யா காசிபி ராஜி.

3047. ப⁴மம் ஆரோபேத்வாதி ப⁴மே அல்லியாபேத்வா.

3048. பத்தமண்ட³லகேதி பத்தே ச²விரக்க²னத்தா²ய திபுஸீஸாதீ³ஹி கதே பத்தஸ்ஸ ஹேட்டா² ஆதா⁴ராதீ³னம் உபரி காதப்³பே³ பத்தமண்ட³லகே. பி⁴த்திகம்மந்தி விப⁴த்தம் கத்வா நானாகாரரூபககம்மசித்தம். யதா²ஹ ‘‘ந பி⁴க்க²வே சித்ரானி பத்தமண்ட³லானி தா⁴ரேதப்³பா³னி ரூபகாகிண்ணானி பி⁴த்திகம்மகதானீ’’தி (சூளவ. 253). தத்தா²தி தஸ்மிம் பத்தமண்ட³லே. அஸ்ஸாதி பி⁴க்கு²ஸ்ஸ. மகரத³ந்தகந்தி கி³ரிகூடாகாரம்.

3049. முக²வட்டியம் யா லேகா² பரிஸ்ஸாவனப³ந்த⁴னத்தா²ய அனுஞ்ஞாதா, தம் லேக²ம் ட²பேத்வா த⁴ம்மகரணச்ச²த்தே வா குச்சி²யம் வா காசிபி லேகா² ந வட்டதீதி யோஜனா.

3050. தஹிம் தஹிந்தி மத்திகாய தத்த² தத்த². தந்தி ததா²கோட்டிததி³கு³ணஸுத்தகாயப³ந்த⁴னம்.

3051. அந்தேஸு த³ள்ஹத்தா²ய த³ஸாமுகே² தி³கு³ணம் கத்வா கோட்டேந்தி, வட்டதீதி யோஜனா. சித்திகம்பீதி மாலாகம்மலதாகம்மசித்தயுத்தம்பி காயப³ந்த⁴னம்.

3052. அக்கீ²னீதி குஞ்ஜரக்கீ²னி. தத்தா²தி காயப³ந்த⁴னே வட்டதீதி கா கதா². உட்டா²பேதுந்தி உக்கிரிதும்.

3053. க⁴டந்தி க⁴டஸண்டா²னம். தே³ட்³டு³ப⁴ஸீஸம் வாதி உத³கஸப்பஸீஸமுக²ஸண்டா²னம் வா. யம் கிஞ்சி விகாரரூபம் த³ஸாமுகே² ந வட்டதீதி யோஜனா.

3054. மச்ச²கண்டந்தி மச்ச²கண்டகாகாரம். க²ஜ்ஜூரிபத்தகாகாரந்தி க²ஜ்ஜூரிபத்தஸண்டா²னம். மச்ச²கண்டம் வா மட்ட²ம் பட்டிகம் வா க²ஜ்ஜூரிபத்தகாகாரம் வா உஜுகம் கத்வா கோட்டிதம் வட்டதீதி யோஜனா. ஏத்த² ச உப⁴யபஸ்ஸேஸு மச்ச²கண்டகயுத்தம் மச்ச²ஸ்ஸ பிட்டி²கண்டகம் விய யஸ்ஸ பட்டிகாய வாயனம் ஹோதி, இத³ம் காயப³ந்த⁴னம் மச்ச²கண்டகம் நாம. யஸ்ஸ க²ஜ்ஜூரிபத்தஸண்டா²னமிவ வாயனம் ஹோதி, தம் க²ஜ்ஜூரிபத்தகாகாரம் நாம.

3055. பகதிவீதா பட்டிகா. ஸூகரந்தம்நாம குஞ்சிகாகோஸகஸண்டா²னம். தஸ்ஸ து³வித⁴ஸ்ஸ காயப³ந்த⁴னஸ்ஸ. தத்த² ரஜ்ஜுகா ஸூகரந்தானுலோமிகா, து³ஸ்ஸபட்டம் பட்டிகானுலோமிகம். ஆதி³-ஸத்³தே³ன முத்³தி³ககாயப³ந்த⁴னம் க³ஹிதம், தஞ்ச ஸூகரந்தானுலோமிகம். யதா²ஹ – ‘‘ஏகரஜ்ஜுகம், பன முத்³தி³ககாயப³ந்த⁴னஞ்ச ஸூகரந்தகம் அனுலோமேதீ’’தி (சூளவ. அட்ட². 278). தத்த² ஏகரஜ்ஜுகா நாம ஏகவட்டா. ப³ஹுரஜ்ஜுகஸ்ஸ அகப்பியபா⁴வம் வக்க²தி. ‘‘முத்³தி³ககாயப³ந்த⁴னம் நாம சதுரஸ்ஸம் அகத்வா ஸஜ்ஜித’’ந்தி க³ண்டி²பதே³ வுத்தம்.

3056. முரஜம் நாம முரஜவட்டிஸண்டா²னம் வேடே²த்வா கதம். வேடே²த்வாதி நானாஸுத்தேஹி வேடே²த்வா. ஸிக்கா²பா⁴ஜனவினிச்ச²யே பன ‘‘ப³ஹுகா ரஜ்ஜுயோ ஏகதோ கத்வா ஏகாய ரஜ்ஜுயா வேடி²தம் முரஜம் நாமா’’தி வுத்தம். மத்³த³வீணம் நாம பாமங்க³ஸண்டா²னம். தே³ட்³டு³ப⁴கம் நாம உத³கஸப்பஸீஸஸதி³ஸம். கலாபு³கம் நாம ப³ஹுரஜ்ஜுகம். ரஜ்ஜுயோதி உப⁴யகோடியம் ஏகதோ அப³த்³தா⁴ ப³ஹூ ரஜ்ஜுயோ, ததா² ப³த்³தா⁴ கலாபு³கம் நாம ஹோதீதி. ந வட்டந்தீதி முரஜாதீ³னி இமானி ஸப்³பா³னி காயப³ந்த⁴னானி ந வட்டந்தி. புரிமா த்³வேதி முரஜம், மத்³த³வீணஞ்சாதி த்³வே. ‘‘த³ஸாஸு ஸியு’’ந்தி வத்தப்³பே³ கா³தா²ப³ந்த⁴வஸேன வண்ணலோபேன ‘‘த³ஸா ஸியு’’ந்தி வுத்தம். யதா²ஹ – ‘‘முரஜம் மத்³த³வீண’ந்தி இத³ம் த³ஸாஸுயேவ அனுஞ்ஞாத’’ந்தி (சூளவ. அட்ட². 278).

3057. பாமங்க³ஸண்டா²னாதி பாமங்க³தா³மம் விய சதுரஸ்ஸஸண்டா²னா.

3058. ஏகரஜ்ஜுமயந்தி நானாவட்டே ஏகதோ வட்டேத்வா கதரஜ்ஜுமயம் காயப³ந்த⁴னம். வட்டம் வட்டதீதி ‘‘ரஜ்ஜுகா து³ஸ்ஸபட்டாதீ³’’தி ஏத்த² ஏகவட்டரஜ்ஜுகா க³ஹிதா, இத⁴ பன நானாவட்டே ஏகதோ வட்டேத்வா கதாவ ஏகரஜ்ஜுகா க³ஹிதா. தஞ்சாதி தம்பி ஏகரஜ்ஜுககாயப³ந்த⁴னம். பாமங்க³ஸண்டா²னம் ஏகம்பி ந ச வட்டதீதி கேவலம்பி ந வட்டதி.

3059. ப³ஹூ ரஜ்ஜுகே ஏகதோ கத்வாதி யோஜனா. வட்டதி ப³ந்தி⁴துந்தி முரஜம், கலாபு³கம் வா ந ஹோதி, ரஜ்ஜுககாயப³ந்த⁴னமேவ ஹோதீதி அதி⁴ப்பாயோ. அயம் பன வினிச்ச²யோ ‘‘ப³ஹூ ரஜ்ஜுகே ஏகதோ கத்வா ஏகேன நிரந்தரம் வேடே²த்வா கதம் ‘ப³ஹுரஜ்ஜுக’ந்தி ந வத்தப்³ப³ம், தம் வட்டதீ’’தி (பாரா. அட்ட². 1.85 பாளிமுத்தகவினிச்ச²ய) அட்ட²கதா²க³தோவ இத⁴ வுத்தோ. ஸிக்கா²பா⁴ஜனவினிச்ச²யே ‘‘ப³ஹுகா ரஜ்ஜுயோ ஏகதோ கத்வா ஏகாய ரஜ்ஜுயா வேடி²தம் முரஜம் நாமா’’தி யம் வுத்தம், தம் இமினா விருஜ்ஜ²னதோ ந க³ஹேதப்³ப³ம்.

3060. த³ந்த-ஸத்³தே³ன ஹத்தி²த³ந்தா வுத்தா. ஜதூதி லாகா². ஸங்க²மயந்தி ஸங்க²னாபி⁴மயம். வித⁴கா மதாதி ஏத்த² ‘‘வேட²கா’’திபி பாடோ² வித⁴பரியாயோ.

3061. காயப³ந்த⁴னவிதே⁴தி காயப³ந்த⁴னஸ்ஸ த³ஸாய தி²ரபா⁴வத்த²ம் கட்ட²த³ந்தாதீ³ஹி கதே விதே⁴. விகாரோ அட்ட²மங்க³லாதி³கோ. தத்த² தத்தா²தி தஸ்மிம் தஸ்மிம் டா²னே, உப⁴யகோடியந்தி அத்தோ². து-ஸத்³தே³ன க⁴டாகாரோபி வட்டதீதி தீ³பேதி.

3062. மாலா …பே… விசித்திதாதி மாலாகம்மலதாகம்மேஹி ச மிக³பக்கி²ரூபாதி³னானாரூபேஹி ச விசித்திதா. ஜனரஞ்ஜனீதி பா³லஜனபலோபி⁴னீ.

3064. அட்ட²ம்ஸா வாபீதி ஏத்த² அபி-ஸத்³தே³ன ஸோளஸம்ஸாதீ³னம் க³ஹணம். வண்ணமட்டா²தி மாலாகம்மாதி³வண்ணமட்டா².

3065. அஞ்ஜனிஸலாகாபி ததா² வண்ணமட்டா² ந வட்டதீதி யோஜனா. ‘‘அஞ்ஜனித்த²விகாய ச, நானாவண்ணேஹி ஸுத்தேஹி, சித்தகம்மம் ந வட்டதீ’’தி பாடோ² யுஜ்ஜதி. ‘‘த²விகாபி சா’’தி பாடோ² தி³ஸ்ஸதி, ஸோ ந க³ஹேதப்³போ³.

3066. ரத்தாதி³னா யேன கேனசி ஏகவண்ணேன ஸுத்தேன பிலோதிகாதி³மயம் யம் கிஞ்சி ஸிபாடிகம் ஸிப்³பே³த்வா வளஞ்ஜந்தஸ்ஸ வட்டதீதி யோஜனா.

3067. மணிகந்தி தூ²லபுப்³பு³ளம். பிளகந்தி ஸுகு²மபுப்³பு³ளம். பிப்ப²லேதி வத்த²ச்சே²த³னஸத்தே². ஆரகண்டகேதி பத்தாதா⁴ரவலயானம் விஜ்ஜ²னகண்டகே. ட²பேதுந்தி உட்டா²பேதும். யம் கிஞ்சீதி ஸேஸம் வண்ணமட்ட²ம்பி ச.

3068. த³ண்ட³கேதி பிப்ப²லத³ண்ட³கே. யதா²ஹ – ‘‘பிப்ப²லகேபி மணிகம் வா பிளகம் வா யம் கிஞ்சி உட்டா²பேதும் ந வட்டதி, த³ண்ட³கே பன பரிச்சே²த³லேகா² வட்டதீ’’தி. பரிச்சே²த³லேகா²மத்தந்தி ஆணிப³ந்த⁴னட்டா²னம் பத்வா பரிச்சி²ந்த³னத்த²ம் ஏகாவ லேகா² வட்டதி. வலித்வாதி உப⁴யகோடியா முக²ம் கத்வா மஜ்ஜே² வலியோ கா³ஹேத்வா. நக²ச்சே²த³னம் யஸ்மா கரோந்தி, தஸ்மா வட்டதீதி யோஜனா.

3069. அரணிஸஹிதே கந்தகிச்சகரோ த³ண்டோ³ உத்தராரணீ நாம. வாபீதி பி-ஸத்³தே³ன அத⁴ராரணிம் ஸங்க³ண்ஹாதி, உது³க்க²லத³ண்ட³ஸ்ஸேதம் அதி⁴வசனம். அஞ்ச²னகயந்தத⁴னு த⁴னுகம் நாம. முஸலமத்த²கபீளனத³ண்ட³கோ பேல்லத³ண்ட³கோ நாம.

3070. ஸண்டா³ஸேதி அக்³கி³ஸண்டா³ஸம் வத³ந்தி. கட்ட²ச்சே²த³னவாஸியா ததா² யம் கிஞ்சி வண்ணமட்ட²ம் ந வட்டதீதி ஸம்ப³ந்தோ⁴. த்³வீஸு பஸ்ஸேஸூதி வாஸியா உபோ⁴ஸு பஸ்ஸேஸு. லோஹேனாதி கப்பியலோஹேன. ப³ந்தி⁴தும் வட்டதீதி உஜுகமேவ சதுரஸ்ஸம் வா அட்ட²ம்ஸம் வா ப³ந்தி⁴தும் வட்டதி. ‘‘ஸண்டா³ஸேதி அக்³கி³ஸண்டா³ஸே’’தி நிஸ்ஸந்தே³ஹே வுத்தம். அட்ட²கதா²யம் பனேத்த² ஸூசிஸண்டா³ஸோ த³ஸ்ஸிதோ.

3071. ஹேட்ட²தோதி ஹேட்டா² அயோபட்டவலயஸ்ஸ. ‘‘உபரி அஹிச்ச²த்தமகுலமத்த’’ந்தி அட்ட²கதா²யம் வுத்தம்.

3072. விஸாணேதி தேலாஸிஞ்சனகக³வயமஹிம்ஸாதி³ஸிங்கே³. நாளியம் வாபீதி வேளுனாளிகாதி³னாளியம். அபி-ஸத்³தே³ன அலாபு³ம் ஸங்க³ண்ஹாதி. ஆமண்ட³ஸாரகேதி ஆமலகசுண்ணமயதேலக⁴டே. தேலபா⁴ஜனகேதி வுத்தப்பகாரேயேவ தேலபா⁴ஜனே. ஸப்³ப³ம் வண்ணமட்ட²ம் வட்டதீதி புமித்தி²ரூபரஹிதம் மாலாகம்மாதி³ ஸப்³ப³ம் வண்ணமட்ட²ம் வட்டதி.

3073-5. பானீயஸ்ஸ உளுங்கேதி பானீயஉளுங்கே. தோ³ணியம் ரஜனஸ்ஸபீதி ரஜனதோ³ணியம்பி. ப²லகபீடே²தி ப²லகமயே பீடே². வலயாதா⁴ரகாதி³கேதி த³ந்தவலயாதி³ஆதா⁴ரகே. ஆதி³-ஸத்³தே³ன த³ண்டா³தா⁴ரகோ ஸங்க³ஹிதோ. பாத³புஞ்ச²னியந்தி சோளாதி³மயபாத³புஞ்ச²னியம். பீடே²தி பாத³பீடே². ஸஹசரியேன பாத³கத²லிகாயஞ்ச. சித்தம் ஸப்³ப³மேவ ச வட்டதீதி யதா²வுத்தே பி⁴க்கு²பரிக்கா²ரே மாதுகா³மரூபரஹிதம், பி⁴க்கு²னிபரிக்கா²ரே புரிஸரூபரஹிதம் அவஸேஸம் ஸப்³ப³ம் சித்தகம்மம்.

3076. நானா ச தே மணயோ சாதி நானாமணீ, இந்த³னீலாத³யோ, நானாமணீஹி கதா நானாமணிமயா, த²ம்பா⁴ ச கவாடா ச த்³வாரா ச பி⁴த்தியோ ச த²ம்ப⁴கவாடத்³வாரபி⁴த்தியோ, நானாமணிமயா த²ம்ப⁴கவாடத்³வாரபி⁴த்தியோ யஸ்மிம் தம் ததா² வுத்தம். கா கதா² வண்ணமட்ட²கேதி மாலாகம்மலதாகம்மசித்தகம்மாதி³வண்ணமட்ட²கே வத்தப்³ப³மேவ நத்தீ²தி அத்தோ².

3077. தா²வரஸ்ஸ ரதனமயபாஸாத³ஸ்ஸ கப்பியபா⁴வம் த³ஸ்ஸேத்வா ஸுவண்ணாதி³மயஸ்ஸாபி ஸப்³ப³பாஸாத³பரிபோ⁴க³ஸ்ஸ கப்பியபா⁴வம் த³ஸ்ஸேதுமாஹ ‘‘ஸோவண்ணய’’ந்திஆதி³. ஸோவண்ணயந்தி ஸுவண்ணமயம். த்³வாரகவாடானம் அனந்தரகா³தா²ய த³ஸ்ஸிதத்தா ‘‘த்³வாரகவாடப³ந்த⁴’’ந்தி இமினா த்³வாரகவாடபா³ஹாஸங்கா²தம் பிட்ட²ஸங்கா⁴டம் க³ஹிதம். த்³வாரஞ்ச கவாடஞ்ச த்³வாரகவாடானி, த்³வாரகவாடானம் ப³ந்த⁴ம் த்³வாரகவாடப³ந்த⁴ம், உத்தரபாஸகும்மாரஸங்கா²தம் பிட்ட²ஸங்கா⁴டந்தி அத்தோ². நானா ச தே மணயோ சாதி நானாமணீ, ஸுவண்ணஞ்ச நானாமணீ ச ஸுவண்ணனானாமணீ, பி⁴த்தி ச பூ⁴மி ச பி⁴த்திபூ⁴மி ஸுவண்ணனானாமணீஹி கதா பி⁴த்திபூ⁴மி ஸுவண்ணனானாமணிபி⁴த்திபூ⁴மி. இதி இமேஸு ஸேனாஸனாவயவேஸு. ந கிஞ்சி ஏகம்பி நிஸேத⁴னீயந்தி ஏகம்பி ஸேனாஸனபரிக்கா²ரம் கிஞ்சி ந நிஸேத⁴னீயம், ஸேனாஸனம்பி ந படிக்கி²பிதப்³ப³ந்தி அத்தோ². ஸேனாஸனம் வட்டதி ஸப்³ப³மேவாதி ஸப்³ப³மேவ ஸேனாஸனபரிபோ⁴க³ம் வட்டதி. யதா²ஹ –

‘‘ஸப்³ப³ம் பாஸாத³பரிபோ⁴க³ந்தி ஸுவண்ணரஜதாதி³விசித்ரானி கவாடானி மஞ்சபீடா²னி தாலவண்டானி ஸுவண்ணரஜதமயானி பானீயக⁴டபானீயஸராவானி யம் கிஞ்சி சித்தகம்மகதம், ஸப்³ப³ம் வட்டதி. ‘பாஸாத³ஸ்ஸ தா³ஸிதா³ஸம் கே²த்தவத்து²ம் கோ³மஹிம்ஸம் தே³மா’தி வத³ந்தி, பாடேக்கம் க³ஹணகிச்சம் நத்தி², பாஸாதே³ படிக்³க³ஹிதே படிக்³க³ஹிதமேவ ஹோதி. கோ³னகாதீ³னி ஸங்கி⁴கவிஹாரே வா புக்³க³லிகவிஹாரே வா மஞ்சபீட²கேஸு அத்த²ரித்வா பரிபு⁴ஞ்ஜிதும் ந வட்டந்தி. த⁴ம்மாஸனே பன கி³ஹிவிகதனீஹாரேன லப்³ப⁴ந்தி, தத்ராபி நிபஜ்ஜிதும் ந வட்டதீ’’தி (சூளவ. அட்ட². 320).

‘‘ஸோவண்ணத்³வாரகவாடப³ந்த⁴’’ந்தி வா பாடோ², ப³ஹுப்³பீ³ஹிஸமாஸோ. இமினா ச து³தியபதே³ன ச ஸேனாஸனம் விஸேஸீயதி.

3078. ந த³வம் கரேதி ‘‘கிம் பு³த்³தோ⁴ ஸிலகபு³த்³தோ⁴? கிம் த⁴ம்மோ கோ³த⁴ம்மோ அஜத⁴ம்மோ? கிம் ஸங்கோ⁴ கோ³ஸங்கோ⁴ அஜஸங்கோ⁴ மிக³ஸங்கோ⁴’’தி பரிஹாஸம் ந கரேய்ய. தித்தி²யப்³ப³தம் மூக³ப்³ப³தாதி³கம் நேவ க³ண்ஹேய்யாதி யோஜனா.

3079. தா பி⁴க்கு²னியோ உத³காதி³னா வாபி ந ஸிஞ்சேய்யாதி யோஜனா.

3080. அஞ்ஞத்த² அஞ்ஞஸ்மிம் விஹாரே வஸ்ஸம்வுத்தோ² அஞ்ஞத்த² அஞ்ஞஸ்மிம் விஹாரே பா⁴க³ம் வஸ்ஸாவாஸிகபா⁴க³ம் க³ண்ஹாதி சே, து³க்கடம். தஸ்மிம் சீவரே நட்டே² வா ஜஜ்ஜரே ஜிண்ணே வா கீ³வா புன தா³தப்³ப³ந்தி யோஜனா.

3081. ஸோதி அஞ்ஞத்த² பா⁴க³ம் க³ண்ஹனகோ பி⁴க்கு². தேஹீதி சீவரஸாமிகேஹி. தந்தி ததா² க³ஹிதம் வஸ்ஸாவாஸிகபா⁴க³ம். தேஸந்தி சீவரஸாமிகானம்.

3082. கரோதோதி காராபயதோ. த³வா ஸிலம் பவிஜ்ஜ²ந்தோதி பந்திகீளாய கீளத்தி²கானம் ஸிப்பத³ஸ்ஸனவஸேன ஸக்க²ரம் வா நின்னட்டா²னம் பவட்டனவஸேன பாஸாணம் வா பவிஜ்ஜ²ந்தோ. ந கேவலஞ்ச பாஸாணம், அஞ்ஞம்பி யம் கிஞ்சி தா³ருக²ண்ட³ம் வா இட்ட²கக²ண்ட³ம் வா ஹத்தே²ன வா யந்தேன வா பவிஜ்ஜி²தும் ந வட்டதி. சேதியாதீ³னம் அத்தா²ய பாஸாணாத³யோ ஹஸந்தா ஹஸந்தா பவட்டேந்திபி கி²பந்திபி உக்கி²பந்திபி, கம்மஸமயோதி வட்டதி.

3083. கி³ஹிகோ³பகதா³னஸ்மிந்தி கி³ஹீனம் உய்யானகோ³பகாதீ³ஹி அத்தனா கோ³பிதஉய்யானாதி³தோ ப²லாதீ³னம் தா³னே யாவத³த்த²ம் தி³ய்யமானேபி. ந தோ³ஸோ கோசி க³ண்ஹதோதி படிக்³க³ண்ஹதோ பி⁴க்கு²னோ கோசி தோ³ஸோ நத்தி². ஸங்க⁴சேதியஸந்தகே தாலப²லாதி³ம்ஹி உய்யானகோ³பகாதீ³ஹி தி³ய்யமானே பரிச்சே²த³னயோ தேஸம் வேதனவஸேன பரிச்சி²ன்னானம்யேவ க³ஹணே அனாபத்தினயோ வுத்தோதி யோஜனா.

3084. புரிஸஸம்யுத்தந்தி பரிவிஸகேஹி புரிஸேஹி வுய்ஹமானம். ஹத்த²வட்டகந்தி ஹத்தே²னேவ பவட்டேதப்³ப³ஸகடம்.

3085. பி⁴க்கு²னியா ஸத்³தி⁴ம் கிஞ்சிபி அனாசாரம் ந ஸம்பயோஜேய்ய ந காரேய்யாதி யோஜனா. ‘‘கிஞ்சீ’’திபி பாடோ², க³ஹட்ட²ம் வா பப்³ப³ஜிதம் வா கிஞ்சி பி⁴க்கு²னியா ஸத்³தி⁴ம் அனாசாரவஸேன ந ஸம்பயோஜேய்யாதி அத்தோ². ஓபா⁴ஸேந்தஸ்ஸாதி காமாதி⁴ப்பாயம் பகாஸேந்தஸ்ஸ.

3086. ஹவேதி ஏகம்ஸத்தே² நிபாதோ.

3087. அத்தனோ பரிபோ⁴க³த்த²ம் தி³ன்னந்தி ‘‘தும்ஹேயேவ பரிபு⁴ஞ்ஜதா²’’தி வத்வா தி³ன்னம் திசீவராதி³ம்.

3088. அஸப்பாயந்தி பித்தாதி³தோ³ஸானம் கோபனவஸேன அபா²ஸுகாரணம். அபனேதும்பி ஜஹிதும்பி, பகே³வ தா³துந்தி அதி⁴ப்பாயோ. அக்³க³ம் க³ஹேத்வா தா³தும் வாதி ததா² க³ஹணாரஹம் அன்னாதி³ம் ஸந்தா⁴ய வுத்தம். ‘‘கதிபாஹம் பு⁴த்வா’’தி ஸேஸோ. பிண்ட³பாதாதி³தோ அக்³க³ம் க³ஹேத்வா பத்தாதி³ம் கதிபாஹம் பு⁴த்வா தா³தும் வட்டதீதி அத்தோ².

3089. பஞ்சவக்³கூ³பஸம்பதா³தி வினயத⁴ரபஞ்சமேன ஸங்கே⁴ன காதப்³ப³உபஸம்பதா³. நவாதி அஞ்ஞேஹி ஏகவாரம்பி அபரிபு⁴த்தா. கு³ணங்கு³ணஉபாஹனா சதுபடலதோ பட்டா²ய ப³ஹுபடலஉபாஹனா. சம்மத்தா²ரோதி கப்பியசம்மத்த²ரணஞ்ச. து⁴வன்ஹானந்தி பகதினஹானம்.

3090. ஸம்பா³த⁴ஸ்ஸாதி வச்சமக்³க³பஸ்ஸாவமக்³க³த்³வயஸ்ஸ ஸாமந்தா த்³வங்கு³லா அந்தோ ஸத்த²வத்தி²கம்மம் வாரிதந்தி யோஜனா. ஸத்தே²ன அந்தமஸோ நகே²னாபி சே²த³னபா²லனாதி³வஸேன ஸத்த²கம்மஞ்ச வத்தீ²ஹி பே⁴ஸஜ்ஜதேலஸ்ஸ அந்தோ பவிஸனவஸேன காதப்³ப³ம் வத்தி²கம்மஞ்ச து²ல்லச்சயாபத்திவிதா⁴னேன வாரிதந்தி அத்தோ². பஸ்ஸாவமக்³க³ஸ்ஸ ஸாமந்தா த்³வங்கு³லம் அங்க³ஜாதஸ்ஸ அக்³க³தோ பட்டா²ய க³ஹேதப்³ப³ம்.

3091. ‘‘பாகத்த²’’ந்தி இமினா நிப்³பா³பேதும் சலனே நித்³தோ³ஸபா⁴வம் தீ³பேதி.

3092. உபளாலேதீதி ‘‘பத்தசீவராதி³பரிக்கா²ரம் தே த³ம்மீ’’தி வத்வா பலோபே⁴த்வா க³ண்ஹாதி. தத்தா²தி தஸ்மிம் புக்³க³லே. ஆதீ³னவந்தி அலஜ்ஜிதாதி³பா⁴வம் த³ஸ்ஸேத்வா தேன ஸஹ ஸம்போ⁴கா³தி³கரணே அலஜ்ஜிபா⁴வாபஜ்ஜனாதி³ஆதீ³னவம். தஸ்ஸாதி ததோ வியோஜேதப்³ப³ஸ்ஸ தஸ்ஸ.

3093. ஆதீ³னவத³ஸ்ஸனப்பகாரம் த³ஸ்ஸேதுமாஹ ‘‘மக்க²ன’’ந்திஆதி³. ‘‘நஹாயிதும் க³தேன கூ³த²முத்தேஹி மக்க²னம் விய து³ஸ்ஸீலம் நிஸ்ஸாய விஹரதா தயா கத’’ந்தி ஏவம் தத்த² ஆதீ³னவம் வத்தும் வட்டதீதி யோஜனா.

3094-5. ப⁴த்தக்³கே³ போ⁴ஜனஸாலாய பு⁴ஞ்ஜமானோ. யாகு³பானேதி யாகு³ம் பிவனகாலே. அந்தோகா³மேதி அந்தரக⁴ரே. வீதி²யந்தி நிக³மனக³ரகா³மாதீ³னம் ரதி²காய. அந்த⁴காரேதி அந்த⁴காரே வத்தமானே, அந்த⁴காரக³தோதி அத்தோ². தஞ்ஹி வந்த³ந்தஸ்ஸ மஞ்சபாதா³தீ³ஸுபி நலாடம் படிஹஞ்ஞேய்ய. அனாவஜ்ஜோதி கிச்சபஸுதத்தா வந்த³னம் அஸமன்னாஹரந்தோ. ஏகாவத்தோதி ஏகதோ ஆவத்தோ ஸபத்தபக்கே² டி²தோ வேரீ விஸபா⁴க³புக்³க³லோ. அயஞ்ஹி வந்தி³யமானோ பாதே³னபி பஹரேய்ய. வாவடோதி ஸிப்³ப³னகம்மாதி³கிச்சந்தரபஸுதோ.

ஸுத்தோதி நித்³த³ம் ஓக்கந்தோ. கா²த³ந்தி பிட்ட²கக²ஜ்ஜகாதீ³னி கா²த³ந்தோ. பு⁴ஞ்ஜந்தோதி ஓத³னாதீ³னி பு⁴ஞ்ஜந்தோ. வச்சம் முத்தம்பி வா கரந்தி உச்சாரம் வா பஸ்ஸாவம் வா கரோந்தோ இதி இமேஸம் தேரஸன்னம் வந்த³னா அயுத்தத்தே²ன வாரிதாதி ஸம்ப³ந்தோ⁴.

3096-7. கம்மலத்³தி⁴ஸீமாவஸேன தீஸு நானாஸம்வாஸகேஸு கம்மனானாஸம்வாஸகஸ்ஸ உக்கி²த்தக்³க³ஹணேன க³ஹிதத்தா, ஸீமானானாஸம்வாஸகவுட்³ட⁴தரபகதத்தஸ்ஸ வந்தி³யத்தா, பாரிஸேஸஞாயேன ‘‘நானாஸம்வாஸகோ வுட்³ட⁴தரோ அத⁴ம்மவாதீ³ அவந்தி³யோ’’தி (பரி. 467) வசனதோ ச லத்³தி⁴னானாஸம்வாஸகோ இத⁴ ‘‘நானாஸம்வாஸகோ’’தி க³ஹிதோதி வேதி³தப்³போ³. உக்கி²த்தோதி திவிதே⁴னாபி உக்கே²பனீயகம்மேன உக்கி²த்தகோ. க³ருகட்டா² ச பஞ்சாதி பாரிவாஸிகமூலாயபடிகஸ்ஸனாரஹமானத்தாரஹமானத்தசாரிகஅப்³பா⁴னாரஹஸங்கா²தா பஞ்ச க³ருகட்டா² ச. இமே பன அஞ்ஞமஞ்ஞஸ்ஸ யதா²வுட்³ட⁴ம் வந்த³னாதீ³னி லப⁴ந்தி, பகதத்தேன அவந்தி³யத்தாவ அவந்தி³யேஸு க³ஹிதா. இமே பா³வீஸதி புக்³க³லேதி நக்³கா³த³யோ யதா²வுத்தே.

3098. ‘‘த⁴ம்மவாதீ³’’தி இத³ம் ‘‘நானாஸம்வாஸவுட்³ட⁴கோ’’தி ஏதஸ்ஸ விஸேஸனம். யதா²ஹ ‘‘தயோமே, பி⁴க்க²வே, வந்தி³யா. பச்சா² உபஸம்பன்னேன புரேஉபஸம்பன்னோ வந்தி³யோ, நானாஸம்வாஸகோ வுட்³ட⁴தரோ த⁴ம்மவாதீ³ வந்தி³யோ, ஸதே³வகே லோகே, பி⁴க்க²வே, ஸமாரகே…பே… ததா²க³தோ அரஹம் ஸம்மாஸம்பு³த்³தோ⁴ வந்தி³யோ’’தி (சூளவ. 312).

3099. ‘‘ஏதேயேவ வந்தி³யா, ந அஞ்ஞே’’தி நியாமஸ்ஸ அகதத்தா அஞ்ஞேஸம்பி வந்தி³யானம் ஸப்³பா⁴வம் த³ஸ்ஸேதுமாஹ ‘‘தஜ்ஜனாதீ³’’திஆதி³. ஏத்த² ஆதி³-ஸத்³தே³ன நியஸ்ஸபப்³பா³ஜனீயபஅஸாரணீயகம்மே ஸங்க³ண்ஹாதி. ஏத்தா²தி ஏதஸ்மிம் வந்த³னீயாதி⁴காரே. கம்மந்தி அபலோகனாதி³ சதுப்³பி³த⁴ம் கம்மம்.

3100. ஸங்கே⁴ன அத⁴ம்மகம்மே கரியமானே தம் வாரேதும் அஸக்கோந்தேன, அஸக்கோந்தேஹி ச படிபஜ்ஜிதப்³ப³விதி⁴ம் த³ஸ்ஸேதுமாஹ ‘‘அதி⁴ட்டா²ன’’ந்திஆதி³. அதி⁴ட்டா²னம் பனேகஸ்ஸ உத்³தி³ட்ட²ந்தி யோஜனா, அத⁴ம்மகம்மம் கரோந்தானம் பி⁴க்கூ²னமந்தரே நிஸீதி³த்வா தம் ‘‘அத⁴ம்ம’’ந்தி ஜானித்வாபி தம் வாரேதும் அஸக்கோந்தஸ்ஸ ஏகஸ்ஸ ‘‘ந மேதம் க²மதீ’’தி சித்தேன அதி⁴ட்டா²னமுத்³தி³ட்ட²ந்தி வுத்தம் ஹோதி. த்³வின்னம் வா திண்ணமேவ சாதி தமேவ வாரேதும் அஸக்கோந்தானம் த்³வின்னம் வா திண்ணம் வா பி⁴க்கூ²னம் அஞ்ஞமஞ்ஞம் ‘‘ந மேதம் க²மதீ’’தி தி³ட்டா²விகம்மம் ஸகஸகதி³ட்டி²யா பகாஸனம் உத்³தி³ட்ட²ந்தி அத்தோ². ததோ உத்³த⁴ம் தீஹி உத்³த⁴ம் சதுன்னம் கம்மஸ்ஸ படிக்கோஸனம் ‘‘இத³ம் அத⁴ம்மகம்மம் மா கரோதா²’’தி படிக்கி²பனம் உத்³தி³ட்ட²ந்தி அத்தோ².

3101. விஸ்ஸாஸக்³கா³ஹலக்க²ணம் அக்³க³ஹிதக்³க³ஹணேன பஞ்சவித⁴ந்தி த³ஸ்ஸேதுமாஹ ‘‘ஸந்தி³ட்டோ²’’திஆதி³. யோஜனா பனேத்த² ஏவம் வேதி³தப்³பா³ – ஸந்தி³ட்டோ² ச ஹோதி, ஜீவதி ச, க³ஹிதே ச அத்தமனோ ஹோதி, ஸம்ப⁴த்தோ ச ஹோதி, ஜீவதி ச, க³ஹிதே ச அத்தமனோ ஹோதி, ஆலபிதோ ச ஹோதி, ஜீவதி ச, க³ஹிதே ச அத்தமனோ ஹோதீதி ஏவம் ஸந்தி³ட்ட²ஸம்ப⁴த்தஆலபிதானம் திண்ணமேகேகஸ்ஸ தீணி தீணி விஸ்ஸாஸக்³கா³ஹலக்க²ணானி கத்வா நவவித⁴ம் ஹோதீதி வேதி³தப்³ப³ம். வசனத்தோ², பனேத்த² வினிச்ச²யோ ச ஹேட்டா² வுத்தோவ.

3102. ஸீலவிபத்தி, தி³ட்டி²விபத்தி ச ஆசாராஜீவஸம்ப⁴வா த்³வே விபத்தியோ சாதி யோஜனா, ஆசாரவிபத்தி, ஆஜீவவிபத்தி சாதி வுத்தம் ஹோதி.

3103. தத்தா²தி தேஸு சதூஸு விபத்தீஸு. அப்படிகம்மா பாராஜிகா வுட்டா²னகா³மினீ ஸங்கா⁴தி³ஸேஸாபத்திகா து³வே ஆபத்தியோ ஸீலவிபத்தீதி பகாஸிதாதி யோஜனா.

3104. யா ச அந்தக்³கா³ஹிகா தி³ட்டி², யா த³ஸவத்து²கா தி³ட்டி², அயம் து³விதா⁴ தி³ட்டி² தி³ட்டி²விபத்தீதி தீ³பிதாதி யோஜனா. தத்த² அந்தக்³கா³ஹிகதி³ட்டி² நாம உச்சே²த³ந்தஸஸ்ஸதந்தகா³ஹவஸேன பவத்தா தி³ட்டி². ‘‘நத்தி² தி³ன்ன’’ந்திஆதி³னயப்பவத்தா த³ஸவத்து²கா தி³ட்டி².

3105. து²ல்லச்சயாதி³கா தே³ஸனாகா³மினிகா யா பஞ்ச ஆபத்தியோ, ஆசாரகுஸலேன ப⁴க³வதா ஸா ஆசாரவிபத்தீதி வுத்தாதி யோஜனா. ஆதி³-ஸத்³தே³ன பாசித்தியபாடிதே³ஸனீயது³க்கடது³ப்³பா⁴ஸிதானம் க³ஹணம். யாதி பஞ்சாபத்தியோ அபேக்கி²த்வா ப³ஹுத்தம். ஸாதி ஆசாரவிபத்தி ஸாமஞ்ஞமபேக்கி²த்வா ஏகத்தம்.

3106. குஹனாதீ³தி ஆதி³-ஸத்³தே³ன லபனா நேமித்திகதா நிப்பேஸிகதா லாபே⁴ன லாப⁴ம் நிஜிகீ³ஸனதா க³ஹிதா, குஹனாதீ³னம் வித்தா²ரோ விஸுத்³தி⁴மக்³கே³ (விஸுத்³தி⁴. 1.16) வுத்தனயேன வேதி³தப்³போ³. ஆஜீவோ பச்சயோ ஹேது யஸ்ஸா ஆபத்தியாதி விக்³க³ஹோ. ச²ப்³பி³தா⁴தி சதுத்த²பாராஜிகஸஞ்சரித்தது²ல்லச்சயபாசித்தியபாடிதே³ஸனீயது³க்கடாபத்தீனம் வஸேன ச²ப்³பி³தா⁴. பகாஸிதா –

‘‘ஆஜீவஹேது ஆஜீவகாரணா பாபிச்சோ² இச்சா²பகதோ அஸந்தம் அபூ⁴தம் உத்தரிமனுஸ்ஸத⁴ம்மம் உல்லபதி, ஆபத்தி பாராஜிகஸ்ஸ. ஆஜீவஹேது…பே… ஸஞ்சரித்தம் ஸமாபஜ்ஜதி, ஆபத்தி ஸங்கா⁴தி³ஸேஸஸ்ஸ. ஆஜீவஹேது…பே… ‘யோ தே விஹாரே வஸதி, ஸோ பி⁴க்கு² அரஹா’தி ப⁴ணதி, படிஜானந்தஸ்ஸ ஆபத்தி து²ல்லச்சயஸ்ஸ. ஆஜீவஹேது…பே… பி⁴க்கு² பணீதபோ⁴ஜனானி அகி³லானோ அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி பாசித்தியஸ்ஸ. ஆஜீவஹேது…பே… பி⁴க்கு²னீ பணீதபோ⁴ஜனானி அகி³லானா அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. ஆஜீவஹேது ஆஜீவகாரணா ஸூபம் வா ஓத³னம் வா அகி³லானோ அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி து³க்கடஸ்ஸா’’தி (பரி. 287) –

தே³ஸிதா. இமினா ஆஜீவவிபத்தி தீ³பிதா.

3107. ‘‘உக்கி²த்தோ’’திஆதி³ யதா²க்கமேன தேஸம் திண்ணம் நானாஸம்வாஸகானம் ஸரூபத³ஸ்ஸனம். தத்த² தயோ உக்கி²த்தகா வுத்தாயேவ.

3108-9. ‘‘யோ ஸங்கே⁴ன உக்கே²பனீயகம்மகதானம் அத⁴ம்மவாதீ³னம் பக்கே² நிஸின்னோ ‘தும்ஹே கிம் ப⁴ணதா²’தி தேஸஞ்ச இதரேஸஞ்ச லத்³தி⁴ம் ஸுத்வா ‘இமே அத⁴ம்மவாதி³னோ, இதரே த⁴ம்மவாதி³னோ’தி சித்தம் உப்பாதே³தி, அயம் தேஸம் மஜ்ஜே² நிஸின்னோவ தேஸம் நானாஸம்வாஸகோ ஹோதி, கம்மம் கோபேதி. இதரேஸம்பி ஹத்த²பாஸம் அனாக³தத்தா கோபேதீ’’தி (மஹாவ. அட்ட². 455) ஆக³த அட்ட²கதா²வினிச்ச²யம் த³ஸ்ஸேதுமாஹ ‘‘அத⁴ம்மவாதி³பக்க²ஸ்மி’’ந்திஆதி³.

அத⁴ம்மவாதி³பக்க²ஸ்மிந்தி உக்கே²பனீயகம்மேன நிஸ்ஸாரிதானம் அத⁴ம்மவாதீ³னம் பக்க²ஸ்மிம். நிஸின்னோவாதி ஹத்த²பாஸம் அவிஜஹித்வா க³ணபூரகோ ஹுத்வா நிஸின்னோவ. விசிந்தயந்தி ‘‘இமே நு கோ² த⁴ம்மவாதி³னோ, உதா³ஹு ஏதே’’தி விவிதே⁴னாகாரேன சிந்தயந்தோ. ‘‘ஏதே பன த⁴ம்மவாதீ³’’தி மானஸம் உப்பாதே³தி, ஏவம் உப்பன்னே பன மானஸே. அத⁴ம்மவாதி³பக்க²ஸ்மிம் நிஸின்னோவ ஏவம் மானஸம் உப்பாதே³ந்தோ அயம் பி⁴க்கு². லத்³தி⁴யாதி ஏவம் உப்பாதி³தமானஸஸங்கா²தாய லத்³தி⁴யா. தேஸம் அத⁴ம்மவாதீ³னம் நானாஸம்வாஸகோ நாம ஹோதீதி பகாஸிதோ.

தத்ரட்டோ² பன ஸோதி தஸ்மிம் அத⁴ம்மவாதி³பக்க²ஸ்மிம் நிஸின்னோவ ஸோ. ஸத³-தா⁴துயா க³தினிவாரணத்த²த்தா தத்ர நிஸின்னோ ‘‘தத்ரட்டோ²’’தி வுச்சதி. த்³வின்னந்தி த⁴ம்மவாதி³அத⁴ம்மவாதி³பக்கா²னம் த்³வின்னம் ஸங்கா⁴னம். கம்மந்தி சதுவக்³கா³தி³ஸங்கே⁴ன கரணீயகம்மம். கோபேதீதி அத⁴ம்மவாதீ³னம் அஸம்வாஸபா⁴வம் க³ந்த்வா தேஸம் க³ணபூரணத்தா, இதரேஸம் ஏகஸீமாயம் ட²த்வா ஹத்த²பாஸம் அனுபக³தத்தா, ச²ந்த³ஸ்ஸ ச அதி³ன்னத்தா கம்மம் கோபேதி. யோ பன அத⁴ம்மவாதீ³னம் பக்கே² நிஸின்னோ ‘‘அத⁴ம்மவாதி³னோ இமே, இதரே த⁴ம்மவாதி³னோ’’தி தேஸம் மஜ்ஜே² பவிஸதி, யத்த² வா தத்த² வா பக்கே² நிஸின்னோ ‘‘இமே த⁴ம்மவாதி³னோ’’தி க³ண்ஹாதி, அயம் அத்தனாவ அத்தானம் ஸமானஸம்வாஸகம் கரோதீதி வேதி³தப்³போ³.

3110. ப³ஹிஸீமாக³தோ பகதத்தோ பி⁴க்கு² ஸசே ஹத்த²பாஸே டி²தோ ஹோதி, ஸோ ஸீமாய நானாஸம்வாஸகோ மதோதி யோஜனா. தம் க³ணபூரணம் கத்வா கதகம்மம்பி குப்பதி. ஏவம் யதா²வுத்தனியாமேன தயோ நானாஸம்வாஸகா மஹேஸினா வுத்தாதி யோஜனா.

3111. சுதோதி பாராஜிகாபன்னோ ஸாஸனதோ சுதத்தா ‘‘சுதோ’’தி க³ஹிதோ. ‘‘பி⁴க்கு²னீ ஏகாத³ஸ அப⁴ப்³பா³’’தி பத³ச்சே²தோ³. இமேதி பே⁴த³மனபேக்கி²த்வா ஸாமஞ்ஞேன ஸத்தரஸ ஜனா. அஸம்வாஸாதி ந ஸம்வஸிதப்³பா³, நத்தி² வா ஏதேஹி பகதத்தானம் ஏககம்மாதி³கோ ஸம்வாஸோதி அஸம்வாஸா நாம ஸியும்.

3112. அஸம்வாஸஸ்ஸ ஸப்³ப³ஸ்ஸாதி யதா²வுத்தஸ்ஸ ஸத்தரஸவித⁴ஸ்ஸ ஸப்³ப³ஸ்ஸ அஸம்வாஸஸ்ஸ. ததா² கம்மாரஹஸ்ஸ சாதி ‘‘யஸ்ஸ ஸங்கோ⁴ கம்மம் கரோதி, ஸோ நேவ கம்மபத்தோ, நாபி ச²ந்தா³ரஹோ, அபிச கம்மாரஹோ’’தி (பரி. 488) ஏவம் பரிவாரே வுத்தகம்மாரஹஸ்ஸ ச. உம்மத்தகாதீ³னந்தி ஆதி³-ஸத்³தே³ன கி²த்தசித்தாதீ³னம் க³ஹணம். ஸங்கே⁴ தஜ்ஜனீயாதீ³னி கரோந்தே. படிக்கே²போதி படிக்கோஸனா. ந ரூஹதீதி படிக்கோஸட்டா²னே ந திட்ட²தி, கம்மம் ந கோபேதீதி அதி⁴ப்பாயோ.

3113. ஸஸம்வாஸேக…பே… பி⁴க்கு²னோதி வுத்தனயேன கம்மேன வா லத்³தி⁴யா வா அஸம்வாஸிகபா⁴வம் அனுபக³தத்தா ஸமானஸம்வாஸகஸ்ஸ ஸீமாய அஸம்வாஸிகபா⁴வம் அனுபக³ந்த்வா ஏகஸீமாய டி²தஸ்ஸ அந்திமவத்து²ம் அனஜ்ஜா²பன்னத்தா பகதத்தஸ்ஸ பி⁴க்கு²னோ. அனந்தரஸ்ஸபி ஹத்த²பாஸே வசனேன வசீபே⁴த³கரணேன படிக்கே²போ படிக்கோஸோ ருஹதி படிக்கோஸனட்டா²னேயேவ திட்ட²தி, கம்மம் கோபேதீதி அதி⁴ப்பாயோ.

3114. ச²ஹி ஆகாரேஹீதி (பாசி. அட்ட². 438; கங்கா². அட்ட². நிதா³னவண்ணனா) லஜ்ஜிதாய, அஞ்ஞாணதாய, குக்குச்சபகததாய, ஸதிஸம்மோஸாய, அகப்பியேகப்பியஸஞ்ஞிதாய, கப்பியேஅகப்பியஸஞ்ஞிதாயாதி இமேஹி ச²ஹி ஆகாரேஹி. பஞ்ச ஸமணகப்பா ச வுத்தா, பஞ்ச விஸுத்³தி⁴யோ ச வுத்தாதி யோஜனா.

‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லம் பரிபு⁴ஞ்ஜிதும், அக்³கி³பரிஜிதம் ஸத்த²பரிஜிதம் நக²பரிஜிதம் அபீ³ஜம் நிப்³ப³ட்டபீ³ஜஞ்ஞேவ பஞ்சம’’ந்தி (சூளவ. 250) கு²த்³த³கவத்து²கே அனுஞ்ஞாதா பஞ்ச ஸமணகப்பா நாம. பஞ்ச விஸுத்³தி⁴யோதி பரிவாரே ஏகுத்தரே ‘‘பஞ்ச விஸுத்³தி⁴யோ’’தி இமஸ்ஸ நித்³தே³ஸே ‘‘நிதா³னம் உத்³தி³ஸித்வா அவஸேஸம் ஸுதேன ஸாவேதப்³ப³ம், அயம் பட²மா விஸுத்³தீ⁴’’திஆதி³னா (பரி. 325) நயேன த³ஸ்ஸிதா பஞ்ச பாதிமோக்கு²த்³தே³ஸஸங்கா²தா பஞ்ச விஸுத்³தி⁴யோ ச ‘‘ஸுத்துத்³தே³ஸோ பாரிஸுத்³தி⁴உபோஸதோ² அதி⁴ட்டா²னுபோஸதோ² பவாரணா ஸாமக்³கி³உபோஸதோ²யேவ பஞ்சமோ’’தி (பரி. 325) ஏவம் வுத்தா பஞ்ச விஸுத்³தி⁴யோ சாதி த்³வேபஞ்சவிஸுத்³தி⁴யோ ‘‘த்³விபஞ்சவிஞ்ஞாணானீ’’திஆதீ³ஸு விய ஸாமஞ்ஞவசனேன ஸங்க³ஹிதா.

3115-7. நிஸ்ஸேஸேன தீ³யதி பஞ்ஞபீயதி ஏத்த² ஸிக்கா²பத³ந்தி நிதா³னம், தேஸம் தேஸம் ஸிக்கா²பதா³னம் பஞ்ஞத்தியா டா²னபூ⁴தம் வேஸாலீஆதி³. பும் வுச்சதி நிரயோ, தம் க³லதி மத்³த³தி நேரயிகது³க்க²ம் அனுப⁴வதீதி புக்³க³லோ, ஸத்தோ. அரியபுக்³க³லா தம்ஸதி³ஸத்தா, பூ⁴தபுப்³ப³க³தியா வா ‘‘புக்³க³லா’’தி வேதி³தப்³பா³. இத⁴ பனேதே ஸிக்கா²பத³வீதிக்கமஸ்ஸ ஆதி³கம்மிகா அதி⁴ப்பேதா. இதா³னி புக்³க³லனித்³தே³ஸம் வக்க²தி. வஸதி ஏத்த² ப⁴க³வதோ ஆணாஸங்கா²தா ஸிக்கா²பத³பஞ்ஞத்தி தம் படிச்ச பவத்ததீதி வத்து², தஸ்ஸ தஸ்ஸ புக்³க³லஸ்ஸ ஸிக்கா²பத³பஞ்ஞத்திஹேதுபூ⁴தோ அஜ்ஜா²சாரோ.

விதா⁴னம் விப⁴ஜனம் விதி⁴, பபே⁴தோ³. பஞ்ஞாபீயதி ப⁴க³வதோ ஆணா பகாரேன ஞாபீயதி ஏதாயாதி பஞ்ஞத்தி, பஞ்ஞத்தியா விதி⁴ பபே⁴தோ³ ‘‘பஞ்ஞத்திவிதி⁴’’ந்தி வத்தப்³பே³ ‘‘விதி⁴ம் பஞ்ஞத்தியா’’தி கா³தா²ப³ந்த⁴வஸேன அஸமத்த²னித்³தே³ஸோ. ஸா பன பஞ்ஞத்திவிதி⁴ பஞ்ஞத்திஅனுபஞ்ஞத்தி அனுப்பன்னபஞ்ஞத்தி ஸப்³ப³த்த²பஞ்ஞத்தி பதே³ஸபஞ்ஞத்தி ஸாதா⁴ரணபஞ்ஞத்தி அஸாதா⁴ரணபஞ்ஞத்தி ஏகதோபஞ்ஞத்தி உப⁴தோபஞ்ஞத்திவஸேன நவவிதா⁴ ஹோதி.

‘‘விபத்தி ஆபத்தி அனாபத்தீ’’தி பத³ச்சே²தோ³, விபஜ்ஜந்தி ஏதாய ஸீலாத³யோதி விபத்தி. ஸா பன ஸீலஆசாரதி³ட்டி²ஆஜீவானம் வஸேன சதுப்³பி³தா⁴. ஸா பன உத்³தே³ஸவஸேன ஹேட்டா² த³ஸ்ஸிதாவ. ஆபஜ்ஜந்தி ஏதாய அகுஸலாப்³யாகதபூ⁴தாய ப⁴க³வதோ ஆணாவீதிக்கமந்தி ஆபத்தி. ஸா புப்³ப³பயோகா³தி³வஸேன அனேகப்பபே⁴தா³ ஆபத்தி. அனாபத்தி அஜானனாதி³வஸேன ஆணாய அனதிக்கமனம். ஸமுட்டா²தி ஏதேஹி ஆபத்தீதி ஸமுட்டா²னானி, காயாதி³வஸேன ச²ப்³பி³தா⁴னி ஆபத்திகாரணானி. ஸமுட்டா²னானம் நயோ ஸமுட்டா²னனயோ, தம்.

வஜ்ஜஞ்ச கம்மஞ்ச கிரியா ச ஸஞ்ஞா ச சித்தஞ்ச ஆணத்தி ச வஜ்ஜகம்மக்ரியாஸஞ்ஞாசித்தாணத்தியோ, தாஸம் விதி⁴ ததா² வுச்சதி, தம். வஜ்ஜவிதி⁴ந்தி ‘‘யஸ்ஸா ஸசித்தகபக்கே² சித்தம் அகுஸலமேவ ஹோதி, அயம் லோகவஜ்ஜா, ஸேஸா பண்ணத்திவஜ்ஜா’’தி (கங்கா². அட்ட². பட²மபாராஜிகவண்ணனா) வுத்தம் வஜ்ஜவிதி⁴ம். கம்மவிதி⁴ந்தி ‘‘ஸப்³பா³ ச காயகம்மவசீகம்மதது³ப⁴யவஸேன திவிதா⁴ ஹோந்தீ’’தி (கங்கா². அட்ட². பட²மபாராஜிகவண்ணனா) த³ஸ்ஸிதம் கம்மவிதி⁴ம். க்ரியாவிதி⁴ந்தி ‘‘அத்தா²பத்தி கிரியதோ ஸமுட்டா²தி, அத்தி² அகிரியதோ, அத்தி² கிரியாகிரியதோ, அத்தி² ஸியா கிரியதோ ஸியா அகிரியதோ’’திஆதி³னா (கங்கா². அட்ட². பட²மபாராஜிகவண்ணனா) நயேன த³ஸ்ஸிதம் கிரியாவிதி⁴ம். ஸஞ்ஞாவிதி⁴ந்தி ‘‘ஸஞ்ஞாவிமோக்கா²’’திஆதி³னா (கங்கா². அட்ட². பட²மபாராஜிகவண்ணனா) நயேன த³ஸ்ஸிதம் ஸஞ்ஞாவிதி⁴ம்.

சித்தவிதி⁴ந்தி ‘‘ஸப்³பா³பி சித்தவஸேன து³விதா⁴ ஹோந்தி ஸசித்தகா, அசித்தகா சா’’தி (கங்கா². அட்ட². பட²மபாராஜிகவண்ணனா) வுத்தம் சித்தவிதி⁴ம். ஆணத்திவிதி⁴ந்தி ‘‘ஸாணத்திகம் அனாணத்திக’’ந்தி வுத்தம் ஆணத்திவிதி⁴ம். அங்க³விதா⁴னந்தி ஸப்³ப³ஸிக்கா²பதே³ஸு ஆபத்தீனம் வுத்தம் அங்க³விதா⁴னஞ்ச. வேத³னாத்திகம், குஸலத்திகஞ்சாதி யோஜனா. தம் பன ‘‘அகுஸலசித்தம், த்³விசித்தம், திசித்தம், து³க்க²வேத³னம், த்³விவேத³னம், திவேத³ன’’ந்தி தத்த² தத்த² த³ஸ்ஸிதமேவ.

ஸத்தரஸவித⁴ம் ஏதம் லக்க²ணந்தி யதா²வுத்தனிதா³னாதி³ஸத்தரஸப்பபே⁴த³ம் ஸப்³ப³ஸிக்கா²பதா³னம் ஸாதா⁴ரணலக்க²ணம். த³ஸ்ஸேத்வாதி பகாஸேத்வா. பு³தோ⁴ வினயகுஸலோ. தத்த² தத்த² ஸிக்கா²பதே³ஸு யதா²ரஹம் யோஜேய்யாதி ஸம்ப³ந்தோ⁴.

3118. இமேஸு ஸத்தரஸஸு லக்க²ணேஸு நிதா³னபுக்³க³லே தாவ நித்³தி³ஸிதுமாஹ ‘‘நிதா³ன’’ந்திஆதி³. தத்தா²தி தேஸு ஸத்தரஸஸு ஸாதா⁴ரணலக்க²ணேஸு, நித்³தா⁴ரணே சேதம் பு⁴ம்மம். நிதா³னந்தி நித்³தா⁴ரிதப்³ப³த³ஸ்ஸனம். ‘‘புர’’ந்தி இத³ம் ‘‘வேஸாலீ’’திஆதி³பதே³ஹி பச்சேகம் யோஜேதப்³ப³ம். ஸக்கப⁴க்³கா³தி ஏதேஹி ஜனபத³வாசீஹி ஸத்³தே³ஹி டா²னனிஸ்ஸிதா நாக³ராவ க³ஹேதப்³பா³. தானி ச ‘‘ஸக்கேஸு விஹரதி கபிலவத்து²ஸ்மிம், ப⁴க்³கே³ஸு விஹரதி ஸுஸுமாரகி³ரே’’தி தத்த² தத்த² ஸிக்கா²பத³னிதா³னே நித³ஸ்ஸிதானேவ.

3119. ‘‘த³ஸ வேஸாலியா’’திஆதீ³னம் அத்த²வினிச்ச²யோ உத்தரே ஆவி ப⁴விஸ்ஸதி. கி³ரிப்³ப³ஜேதி ராஜக³ஹனக³ரே. தஞ்ஹி ஸமந்தா டி²தேஹி இஸிகி³லிஆதீ³ஹி பஞ்சஹி பப்³ப³தேஹி வஜஸதி³ஸந்தி ‘‘கி³ரிப்³ப³ஜ’’ந்தி வுச்சதி.

3121. பி⁴க்கூ²னம் பாதிமோக்க²ஸ்மிம் ஸுதி³ன்னத⁴னியாத³யோ தேவீஸதிவிதா⁴ ஆதி³கம்மிகபுக்³க³லா வுத்தாதி யோஜனா.

3122. உப⁴யபாதிமோக்கே² ஆக³தா தே ஸப்³பே³ ஆதி³கம்மிகபுக்³க³லா பரிபிண்டி³தா திம்ஸ ப⁴வந்தீதி யோஜனா. வத்து²ஆதீ³னம் வினிச்ச²யோ உத்தரே வக்க²மானத்தா இத⁴ ந வுத்தோ. நனு ச நிதா³னபுக்³க³லவினிச்ச²யம்பி தத்த² வக்க²தீதி ஸோ இத⁴ கஸ்மா வுத்தோதி? நாயம் தோ³ஸோ, இமஸ்ஸ பகரணத்தா இதா⁴பி வத்தப்³போ³தி. யதி³ ஏவம் வத்து²ஆதி³வினிச்ச²யோபி இத⁴ வத்தப்³போ³ ஸியா, ஸோ கஸ்மா ந வுத்தோதி? ஏகயோக³னித்³தி³ட்ட²ஸ்ஸ இமஸ்ஸ வசனேன ஸோபி வுத்தோயேவ ஹோதீதி ஏகதே³ஸத³ஸ்ஸனவஸேன ஸம்கி²த்தோதி த³ட்ட²ப்³போ³.

3123. யோ ஏனம் தரும் ஜானாதி, ஸோ பஞ்ஞத்திம் அஸேஸதோ ஜானாதீதி ஸம்ப³ந்தோ⁴. ஏத்த² ‘‘ஏனம் தரு’’ந்தி இமினா நிதா³னாதி³ஸத்தரஸப்பகாரம் ஸப்³ப³ஸிக்கா²பத³ஸாதா⁴ரணலக்க²ணஸமுதா³யம் ரூபகேன த³ஸ்ஸேதி. கிம் விஸிட்ட²ம் தருந்தி ஆஹ ‘‘திமூல’’ந்திஆதி³.

தத்த² திமூலந்தி நிதா³னபுக்³க³லவத்து²ஸங்கா²தானி தீணி மூலானி ஏதஸ்ஸாதி திமூலம். நவபத்தந்தி நவவித⁴பண்ணத்திஸங்கா²தானி பத்தானி ஏதஸ்ஸாதி நவபத்தம். த்³வயங்குரந்தி லோகவஜ்ஜபண்ணத்திவஜ்ஜஸங்கா²தா த்³வே அங்குரா ஏதஸ்ஸாதி த்³வயங்குரம். ‘‘த்³விஅங்குர’’ந்தி வத்தப்³பே³ இ-காரஸ்ஸ அயாதே³ஸம் கத்வா ‘‘த்³வயங்குர’’ந்தி வுத்தம். ஸத்தப²லந்தி ஆணத்திஆபத்திஅனாபத்திவிபத்திஸஞ்ஞாவேத³னாகுஸலத்திகஸங்கா²தானி ஸத்த ப²லானி ஏதஸ்ஸாதி ஸத்தப²லம். ச²புப்ப²ந்தி ச²ஸமுட்டா²னஸங்கா²தானி புப்பா²னி ஏதஸ்ஸாதி ச²புப்ப²ம். த்³விப்பப⁴வந்தி சித்தகம்மஸங்கா²தா த்³வே பப⁴வா ஏதஸ்ஸாதி த்³விப்பப⁴வம். த்³விஸாக²ந்தி கிரியஅங்க³ஸங்கா²தா த்³வே ஸாகா² ஏதஸ்ஸாதி த்³விஸாக²ம். ஏனம் தரும் யோ ஜானாதீதி யோ வுத்தோ பி⁴க்கு² வுத்தஸரூபஸாதா⁴ரணஸத்தரஸலக்க²ணராஸிவினிச்ச²யஸங்கா²ததரும் ஜானாதி. ஸோதி ஸோ பி⁴க்கு². பஞ்ஞத்திந்தி வினயபிடகம். அஸேஸதோதி ஸப்³ப³ஸோ.

3124. இதி ஏவம் மது⁴ரபத³த்த²ம் அனாகுலம் பரமம் உத்தமம் இமம் வினிச்ச²யம் யோ பட²தி வாசுக்³க³தம் கரோந்தோ பரியாபுணாதி, க³ருஸந்திகே ஸாது⁴கம் ஸுணாதி, பரிபுச்ச²தே ச அத்த²ம் பரிபுச்ச²தி ச, ஸோ பி⁴க்கு² வினய வினிச்ச²யே உபாலிஸமோ ப⁴வதி வினயத⁴ரானம் ஏதத³க்³க³ட்டா²னே நிக்கி²த்தேன உபாலிமஹாதே²ரேன ஸதி³ஸோ ப⁴வதீதி யோஜனா.

இதி வினயத்த²ஸாரஸந்தீ³பனியா வினயவினிச்ச²யவண்ணனாய

பகிண்ணகவினிச்ச²யகதா²வண்ணனா நிட்டி²தா.