சதுப்³பி³த⁴கம்மகதா²வண்ணனா

2983. அபலோகனஸஞ்ஞிதம் கம்மம், ஞத்திகம்மம், ஞத்திது³தியகம்மம், ஞத்திசதுத்த²கம்மந்தி இமானி சத்தாரி கம்மானீதி யோஜனா. தத்த² சத்தாரீதி க³ணனபரிச்சே²தோ³. இமானீதி அனந்தரமேவ வக்க²மானத்தா ஆஸன்னபச்சக்க²வசனம். கம்மானீதி பரிச்சி²ன்னகம்மனித³ஸ்ஸனம். ‘‘அபலோகனஸஅஞத’’ந்திஆதி³ தேஸம் ஸரூபத³ஸ்ஸனம்.

தத்ராயம் ஸங்கே²பதோ வினிச்ச²யோ (சூளவ. அட்ட². 215; பரி. அட்ட². 482) – அபலோகனகம்மம் நாம ஸீமட்ட²கஸங்க⁴ம் ஸோதே⁴த்வா ச²ந்தா³ரஹானம் ச²ந்த³ம் ஆஹரித்வா ஸமக்³க³ஸ்ஸ ஸங்க⁴ஸ்ஸ அனுமதியா தம் தம் வத்து²ம் கித்தேத்வா ‘‘ருச்சதி ஸங்க⁴ஸ்ஸா’’தி திக்க²த்தும் ஸாவேத்வா கத்தப்³ப³ம் கம்மம் வுச்சதி. ஞத்திகம்மம் நாம வுத்தனயேனேவ ஸமக்³க³ஸ்ஸ ஸங்க⁴ஸ்ஸ அனுமதியா ஏகாய ஞத்தியா கத்தப்³ப³ம் கம்மம். ஞத்திது³தியகம்மம் நாம வுத்தனயேனேவ ஸமக்³க³ஸ்ஸ ஸங்க⁴ஸ்ஸ அனுமதியா ஏகாய ஞத்தியா, ஏகாய ச அனுஸ்ஸாவனாயாதி ஏவம் ஞத்திது³தியாய அனுஸ்ஸாவனாய கத்தப்³ப³ம் கம்மம். ஞத்திசதுத்த²கம்மம் நாம வுத்தனயேனேவ ஸமக்³க³ஸ்ஸ ஸங்க⁴ஸ்ஸ அனுமதியா ஏகாய ஞத்தியா, தீஹி ச அனுஸ்ஸாவனாஹீதி ஏவம் ஞத்திசதுத்தா²ஹி தீஹி அனுஸ்ஸாவனாஹி கத்தப்³ப³ம் கம்மம். ஞத்தி து³தியா யஸ்ஸ அனுஸ்ஸாவனஸ்ஸ தம் ஞத்திது³தியம், தேன கத்தப்³ப³ம் கம்மம் ஞத்திது³தியகம்மம். ஞத்தி சதுத்தா² யஸ்ஸ அனுஸ்ஸாவனத்தயஸ்ஸ தம் ஞத்திசதுத்த²ம், தேன காதப்³ப³ம் கம்மம் ஞத்திசதுத்த²கம்மம்.

2984-7. தேஸம் டா²னவஸேன பே⁴த³ம் த³ஸ்ஸேதுமாஹ ‘‘அபலோகனகம்ம’’ந்திஆதி³. நவன்னம் டா²னானம் ஸமாஹாரோ நவட்டா²னம், ‘‘க³ச்ச²தீ’’தி இமினா ஸம்ப³ந்தோ⁴. ஞத்திகம்மந்தி க³மனகிரியாகத்துனித³ஸ்ஸனம். நவட்டா²னந்தி கம்மனித³ஸ்ஸனம். து³தியந்தி ஞத்திது³தியகம்மம். ஸத்த டா²னானி க³ச்ச²தீதி யோஜனா.

இதா³னி தம் டா²னபே⁴த³ம் ஸரூபதோ த³ஸ்ஸேதுமாஹ ‘‘நிஸ்ஸாரணஞ்சா’’திஆதி³. நிஸ்ஸாரணாதி³ கம்மவிஸேஸானம் ஸஞ்ஞா. அபலோகனகம்மஞ்ஹி நிஸ்ஸாரணம்…பே… பஞ்சமம் கம்மலக்க²ணந்தி இமானி பஞ்ச டா²னானி க³ச்ச²தீதி யோஜனா.

ஏவம் நாமவஸேன த³ஸ்ஸிதானி நிஸ்ஸாரணாதீ³னி அத்த²தோ விப⁴ஜித்வா த³ஸ்ஸேதுமாஹ ‘‘நிஸ்ஸாரணஞ்சா’’திஆதி³. ஸமணுத்³தே³ஸதோதி கண்டகஸாமணேரதோ நிஸ்ஸாரணஞ்ச ஓஸாரணஞ்ச வதே³தி யோஜனா. தத்த² கண்டகஸாமணேரஸ்ஸ நிஸ்ஸாரணா தாதி³ஸானம்யேவ ஸம்மாவத்தம் தி³ஸ்வா பவேஸனா ‘‘ஓஸாரணா’’தி வேதி³தப்³பா³.

பப்³ப³ஜந்தேன ஹேதுபூ⁴தேன ப⁴ண்டு³கம் ப⁴ண்டு³கம்மபுச்ச²னம் வதே³ய்யாதி அத்தோ². பப்³ப³ஜ்ஜாபேக்க²ஸ்ஸ கேஸச்சே²த³னபுச்ச²னம் ப⁴ண்டு³கம்மம் நாம. ச²ன்னேன ஹேதுபூ⁴தேன ப்³ரஹ்மத³ண்ட³கம் கம்மம் வதே³தி யோஜனா. ததா²ரூபஸ்ஸாதி ச²ன்னஸதி³ஸஸ்ஸ முக²ரஸ்ஸ பி⁴க்கூ² து³ருத்தவசனேன க⁴ட்டேந்தஸ்ஸ. காதப்³போ³தி ‘‘ப⁴ந்தே, இத்த²ன்னாமோ பி⁴க்கு² முக²ரோ பி⁴க்கூ² து³ருத்தவசனேஹி க⁴ட்டேந்தோ விஹரதி, ஸோ பி⁴க்கு² யம் இச்சே²ய்ய, தம் வதே³ய்ய. பி⁴க்கூ²ஹி இத்த²ன்னாமோ பி⁴க்கு² நேவ வத்தப்³போ³, ந ஓவதி³தப்³போ³, ந அனுஸாஸிதப்³போ³. ஸங்க⁴ம், ப⁴ந்தே, புச்சா²மி ‘இத்த²ன்னாமஸ்ஸ பி⁴க்கு²னோ ப்³ரஹ்மத³ண்ட³ஸ்ஸ தா³னம் ருச்சதி ஸங்க⁴ஸ்ஸா’தி. து³தியம்பி புச்சா²மி… ததியம்பி புச்சா²மி ‘இத்த²ன்னாமஸ்ஸ, ப⁴ந்தே, பி⁴க்கு²னோ ப்³ரஹ்மத³ண்ட³ஸ்ஸ தா³னம் ருச்சதி ஸங்க⁴ஸ்ஸா’’தி (பரி. அட்ட². 495-496) ஏவம் ப்³ரஹ்மத³ண்டோ³ காதப்³போ³.

2988-9. ‘‘ஆபுச்சி²த்வானா’’தி புப்³ப³கிரியாய ‘‘க³ஹிதாயா’’தி அபரகிரியா அஜ்ஜா²ஹரிதப்³பா³, ‘‘ருசியா’’தி ஏதஸ்ஸ விஸேஸனம். தே³தீதி ஏத்த² ‘‘அச்சி²ன்னசீவராதீ³ன’’ந்தி ஸேஸோ. ஸப்³போ³ ஸங்கோ⁴ ஸன்னிபதித்வான ஸப்³ப³ஸோ ஸப்³பே³ ஸீமட்டே² ஆக³தாக³தே பி⁴க்கூ² ஆபுச்சி²த்வான ‘‘இத்த²ன்னாமேன பரிக்கா²ரேன ப⁴விதப்³ப³ம், ருச்சதி தஸ்ஸ தா³ன’’ந்தி விஸும் புச்சி²த்வா க³ஹிதாய பி⁴க்கூ²னம் ருசியா திக்க²த்தும் அபலோகேத்வா சீவராதி³பரிக்கா²ரம் அச்சி²ன்னசீவராதீ³னம் தே³தி, யம் ஏவம்பூ⁴தம் ஸங்க⁴ஸ்ஸ தா³னம், தம் தஸ்ஸ அபலோகனகம்மஸ்ஸ கம்மலக்க²ணம் ஹோதீதி யோஜனா. லக்கீ²யதீதி லக்க²ணம், கம்மமேவ லக்க²ணம், ந நிஸ்ஸாரணாதீ³னீதி கம்மலக்க²ணம்.

2990-1. ஏவம் அபலோகனகம்மஸ்ஸ பஞ்ச டா²னானி உத்³தே³ஸனித்³தே³ஸவஸேன த³ஸ்ஸேத்வா இதா³னி ஞத்திகம்மஸ்ஸ கம்மலக்க²ணம் தாவ த³ஸ்ஸேதுமாஹ ‘‘நிஸ்ஸாரண’’ந்திஆதி³. இதி ‘‘ஞத்தியா நவ டா²னானீ’’தி அயமுத்³தே³ஸோ வக்க²மானேன ‘‘வினிச்ச²யே’’திஆதி³னித்³தே³ஸேனேவ விபா⁴வீயதி.

2992. வினிச்ச²யேதி உப்³பா³ஹிகவினிச்ச²யே. அஸம்பத்தேதி நிட்ட²ம் அக³தே. தே²ரஸ்ஸாதி த⁴ம்மகதி²கஸ்ஸ. தேனேவாஹ ‘‘அவினயஞ்ஞுனோ’’தி. தஸ்ஸ ‘‘ஸுணந்து மே ஆயஸ்மந்தா, அயம் இத்த²ன்னாமோ பி⁴க்கு² த⁴ம்மகதி²கோ, இமஸ்ஸ நேவ ஸுத்தம் ஆக³ச்ச²தி, நோ ஸுத்தவிப⁴ங்கோ³, ஸோ அத்த²ம் அஸல்லக்கே²த்வா ப்³யஞ்ஜனச்சா²யாய அத்த²ம் படிபா³ஹதி, யதா³யஸ்மந்தானம் பத்தகல்லம், இத்த²ன்னாமம் பி⁴க்கு²ம் வுட்டா²பேத்வா அவஸேஸா இமம் அதி⁴கரணம் வூபஸமேய்யாமா’’தி (சூளவ. 233) ஏவம் உப்³பா³ஹிகவினிச்ச²யே த⁴ம்மகதி²கஸ்ஸ பி⁴க்கு²னோ யா நிஸ்ஸரணா வுத்தா, ஸா ஞத்திகம்மே ‘‘நிஸ்ஸாரணா’’தி வுத்தாதி யோஜனா.

2993-4. உபஸம்பதா³பேக்க²ஸ்ஸ ‘‘ஸுணாது மே, ப⁴ந்தே ஸங்கோ⁴, இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ², அனுஸிட்டோ² ஸோ மயா, யதி³ ஸங்க⁴ஸ்ஸ பத்தகல்லம், இத்த²ன்னாமோ ஆக³ச்சே²ய்யாதி. ஆக³ச்சா²ஹீ’’தி (மஹாவ. 126) வசனபடிஸம்யுத்தஸ்ஸ ஸங்க⁴ஸ்ஸ ஸம்முகா²னயனம், ஸா ஓஸாரணா நாம. ‘‘ஆக³ச்ச² ஓஸாரணா’’தி பத³ச்சே²தோ³.

உபோஸத²வஸேனாபி, பவாரணாவஸேனாபி. ஞத்தியா ட²பிதத்தாதி ‘‘ஸுணாது மே, ப⁴ந்தே ஸங்கோ⁴, அஜ்ஜுபோஸதோ² பன்னரஸோ, யதி³ ஸங்க⁴ஸ்ஸ பத்தகல்லம், ஸங்கோ⁴ உபோஸத²ம் கரேய்ய’’ (மஹாவ. 134), ‘‘ஸுணாது மே, ப⁴ந்தே ஸங்கோ⁴, அஜ்ஜ பவாரணா பன்னரஸீ, யதி³ ஸங்க⁴ஸ்ஸ பத்தகல்லம், ஸங்கோ⁴ பவாரேய்யா’’தி (மஹாவ. 210) உபோஸத²பவாரணாவஸேன ஞத்தியா ட²பிதத்தா உபோஸதோ², பவாரணா வாதி இமானி த்³வே ஞத்திகம்மானி.

‘‘உபஸம்பதா³பேக்க²ஞ்ஹி, அனுஸாஸேய்யஹந்தி சா’’தி இமினா ‘‘ஸுணாது மே, ப⁴ந்தே ஸங்கோ⁴, இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ², யதி³ ஸங்க⁴ஸ்ஸ பத்தகல்லம், அஹம் இத்த²ன்னாமம் அனுஸாஸேய்ய’’ந்தி (மஹாவ. 126) அயம் ஏகா ஞத்தி க³ஹிதா.

2995. ‘‘இத்த²ன்னாமமஹம் பி⁴க்கு²ம், புச்சே²ய்யம் வினயந்தி சா’’தி இமினா ‘‘ஸுணாது மே, ப⁴ந்தே ஸங்கோ⁴, யதி³ ஸங்க⁴ஸ்ஸ பத்தகல்லம், அஹம் இத்த²ன்னாமம் வினயம் புச்சே²ய்ய’’ந்தி (மஹாவ. 151) அயம் ஏகா ஞத்தி க³ஹிதா. ஏவமாதீ³தி ஆதி³-ஸத்³தே³ன ‘‘யதி³ ஸங்க⁴ஸ்ஸ பத்தகல்லம், இத்த²ன்னாமோ இத்த²ன்னாமம் அனுஸாஸேய்யா’’தி, ‘‘யதி³ ஸங்க⁴ஸ்ஸ பத்தகல்லம், அஹம் இத்த²ன்னாமம் அந்தராயிகே த⁴ம்மே புச்சே²ய்ய’’ந்தி (மஹாவ. 126), ‘‘யதி³ ஸங்க⁴ஸ்ஸ பத்தகல்லம், இத்த²ன்னாமோ இத்த²ன்னாமம் அந்தராயிகே த⁴ம்மே புச்சே²ய்யா’’தி, ‘‘யதி³ ஸங்க⁴ஸ்ஸ பத்தகல்லம், இத்த²ன்னாமோ இத்த²ன்னாமம் வினயம் புச்சே²ய்யா’’தி (மஹாவ. 151), ‘‘யதி³ ஸங்க⁴ஸ்ஸ பத்தகல்லம், அஹம் இத்த²ன்னாமேன வினயம் புட்டோ² விஸ்ஸஜ்ஜேய்ய’’ந்தி (மஹாவ. 152), ‘‘யதி³ ஸங்க⁴ஸ்ஸ பத்தகல்லம், இத்த²ன்னாமோ இத்த²ன்னாமேன வினயம் புட்டோ² விஸ்ஸஜ்ஜேய்யா’’தி – (மஹாவ. 152) இமா ச² ஞத்தியோ க³ஹிதா. ஏவம் புரிமா த்³வே, இமா ச சா²தி ஏதி³ஸா இமா அட்ட² ஞத்தியோ ‘‘ஸம்முதீ’’தி வுத்தா.

2996. நிஸ்ஸட்ட²சீவராதீ³னம் தா³னந்தி ‘‘ஸுணாது மே, ப⁴ந்தே ஸங்கோ⁴, இத³ம் சீவரம் இத்த²ன்னாமஸ்ஸ பி⁴க்கு²னோ நிஸ்ஸக்³கி³யம் ஸங்க⁴ஸ்ஸ நிஸ்ஸட்ட²ம், யதி³ ஸங்க⁴ஸ்ஸ பத்தகல்லம், ஸங்கோ⁴ இமம் சீவரம் இத்த²ன்னாமஸ்ஸ பி⁴க்கு²னோ த³தே³ய்யா’’தி (பாரா. 464) ஏவம் நிஸ்ஸட்ட²சீவரபத்தாதீ³னம் தா³னம் ‘‘தா³ன’’ந்தி வுச்சதி. ஆபத்தீனம் படிக்³கா³ஹோதி ‘‘ஸுணாது மே, ப⁴ந்தே ஸங்கோ⁴, அயம் இத்த²ன்னாமோ பி⁴க்கு² ஆபத்திம் ஸரதி விவரதி உத்தானிம் கரோதி தே³ஸேதி, யதி³ ஸங்க⁴ஸ்ஸ பத்தகல்லம், அஹம் இத்த²ன்னாமஸ்ஸ பி⁴க்கு²னோ ஆபத்திம் படிக்³க³ண்ஹேய்ய’’ந்தி (சூளவ. 239), ‘‘யதா³யஸ்மந்தானம் பத்தகல்லம், அஹம் இத்த²ன்னாமஸ்ஸ பி⁴க்கு²னோ ஆபத்திம் படிக்³க³ண்ஹேய்ய’’ந்தி (சூளவ. 239). தேன வத்தப்³போ³ ‘‘பஸ்ஸஸீ’’தி. ‘‘ஆம பஸ்ஸாமீ’’தி. ‘‘ஆயதிம் ஸம்வரேய்யாஸீ’’தி. ஏவம் ஆபத்தீனம் படிக்³கா³ஹோ ‘‘படிக்³கா³ஹோ’’தி வுச்சதி.

2997. பவாருக்கட்³ட⁴னாதி பவாரணுக்கட்³ட⁴னா. கா³தா²ப³ந்த⁴வஸேன ண-காரலோபோ. அத² வா பவாரணம் பவாரோதி பவாரண-ஸத்³த³பரியாயோ பவார-ஸத்³தோ³. ‘‘இமம் உபோஸத²ம் கத்வா, காளே பவாரயாமீ’’தி இமினா ‘‘ஸுணந்து மே ஆயஸ்மந்தா ஆவாஸிகா, யதா³யஸ்மந்தானம் பத்தகல்லம், இதா³னி உபோஸத²ம் கரேய்யாம, பாதிமோக்க²ம் உத்³தி³ஸேய்யாம, ஆக³மே காளே பவாரேய்யாமா’’தி (மஹாவ. 240) அயம் ஞத்தி உபலக்க²ணதோ த³ஸ்ஸிதா. ஏவம் கதபவாரணா ‘‘பச்சுக்கட்³ட⁴னா’’தி மதா. ஏத்த² ச காளேதி புப்³ப³கத்திகமாஸஸ்ஸ காளபக்கு²போஸதே². இமினா ச ‘‘ஆக³மே ஜுண்ஹே பவாரேய்யாமா’’தி அயம் ஞத்தி ச உபலக்கி²தா. ஜுண்ஹேதி அபரகத்திகஜுண்ஹபக்க²உபோஸதே².

2998. திணவத்தா²ரகேதி திணவத்தா²ரகஸமதே². ஸப்³ப³பட²மா ஞத்தீதி ஸப்³ப³ஸங்கா³ஹிகா ஞத்தி வுச்சதி. இதரா சாதி உப⁴யபக்கே² பச்சேகம் ட²பிதா த்³வே ஞத்தியோ சாதி ஏவம் திதா⁴ பவத்தம் ஏதம் ஞத்திகம்மம் கம்மலக்க²ணம் இதி ஏவம் வுத்தனயேன ‘‘வினிச்ச²யே’’திஆதி³னா ஞத்தியா நவ டா²னானி வேதி³தப்³பா³னீதி யோஜனா.

2999-3000. ஏவம் ஞத்திகம்மே நவ டா²னானி த³ஸ்ஸேத்வா இதா³னி ஞத்திது³தியகம்மே ஸத்த டா²னானி த³ஸ்ஸேதுமாஹ ‘‘ஞத்திது³தியகம்மம்பீ’’திஆதி³. ‘‘ஞத்திது³தியகம்ம’’ந்திஆதி³கா உத்³தே³ஸகா³தா² உத்தானத்தா²வ.

நித்³தே³ஸே பத்தனிக்குஜ்ஜனாதீ³தி ஆதி³-ஸத்³தே³ன பத்துக்குஜ்ஜனம் க³ஹிதம். நிஸ்ஸாரோஸாரணா மதாதி ‘‘நிஸ்ஸாரணா, ஓஸாரணா’’தி ச மதா. தத்த² பி⁴க்கூ²னம் அலாபா⁴ய பரிஸக்கனாதி³கேஹி அட்ட²ஹி அங்கே³ஹி ஸமன்னாக³தஸ்ஸ உபாஸகஸ்ஸ ஸங்கே⁴ன அஸம்போ⁴க³கரணத்த²ம் பத்தனிக்குஜ்ஜனவஸேன நிஸ்ஸாரணா ச தஸ்ஸேவ ஸம்மா வத்தந்தஸ்ஸ பத்துக்குஜ்ஜனவஸேன ஓஸாரணா ச வேதி³தப்³பா³. ஸா கு²த்³த³கவத்து²க்க²ந்த⁴கே வட்³ட⁴லிச்ச²விவத்து²ஸ்மிம் (சூளவ. 265) வுத்தா.

3001. ஸீமாதி³ஸம்முதி ஸம்முதி நாம. ஸா பஞ்சத³ஸதா⁴ மதாதி ஸீமாஸம்முதி திசீவரேனஅவிப்பவாஸஸம்முதி ஸந்த²தஸம்முதி ப⁴த்துத்³தே³ஸக ஸேனாஸனக்³கா³ஹாபக ப⁴ண்டா³கா³ரிக சீவரபடிக்³கா³ஹக யாகு³பா⁴ஜக ப²லபா⁴ஜக க²ஜ்ஜபா⁴ஜக அப்பமத்தகவிஸ்ஸஜ்ஜக ஸாடியக்³கா³ஹாபக பத்தக்³கா³ஹாபக ஆராமிகபேஸக ஸாமணேரபேஸகஸம்முதீதி ஏவம் ஸா ஸம்முதி பஞ்சத³ஸவிதா⁴ மதாதி அத்தோ². கதி²னஸ்ஸ வத்த²ம், தஸ்ஸ. மதோயேவ மதகோ, மதகஸ்ஸ வாஸோ மதகவாஸோ, தஸ்ஸ மதகவாஸஸோ, மதகசீவரஸ்ஸ.

3002. ஆனிஸம்ஸகே²த்தபூ⁴தபஞ்சமாஸப்³ப⁴ந்தரேயேவ உப்³பா⁴ரோ அந்தருப்³பா⁴ரோ. குடிவத்து²ஸ்ஸ, விஹாரஸ்ஸ வத்து²னோ ச தே³ஸனா தே³ஸனா நாமாதி யோஜனா.

3003. திணவத்தா²ரகே த்³வின்னம் பக்கா²னம் ஸாதா⁴ரணவஸேன ட²பேதப்³ப³ஞத்தி ச பச்சா² பக்க²த்³வயே விஸும் விஸும் ட²பேதப்³பா³ த்³வே ஞத்தியோ சாதி திஸ்ஸோ ஞத்தியோ கம்மவாசாய அபா⁴வேன ஞத்திகம்மே ‘‘கம்மலக்க²ண’’ந்தி த³ஸ்ஸிதா, பச்சா² விஸும் விஸும் த்³வீஸு பக்கே²ஸு வத்தப்³பா³ த்³வே ஞத்திது³தியகம்மவாசா ஞத்திது³தியகம்மே ‘‘கம்மலக்க²ண’’ந்தி த³ஸ்ஸிதாதி தம் த³ஸ்ஸேதுமாஹ ‘‘திணவத்தா²ரகே கம்மே’’தி. ‘‘மோஹாரோபனதாதி³ஸூ’’தி இமினா பாசித்தியேஸு த³ஸ்ஸிதமோஹாரோபனகம்மஞ்ச அஞ்ஞவாத³கவிஹேஸகாரோபனகம்மாதி³ஞ்ச ஸங்க³ண்ஹாதி. ஏத்தா²தி இமஸ்மிம் ஞத்திது³தியகம்மே. கம்மலக்க²ணமேவ கம்மலக்க²ணதா.

3004-5. இதி ஏவம் யதா²வுத்தனயேன இமே ஸத்த டா²னபே⁴தா³ ஞத்திது³தியகம்மஸ்ஸ. ஏவம் ஞத்திது³தியகம்மே ஸத்த டா²னானி த³ஸ்ஸேத்வா ஞத்திசதுத்த²கம்மே டா²னபே⁴த³ம் த³ஸ்ஸேதுமாஹ ‘‘ததா²’’திஆதி³.

3006. தஜ்ஜனாதீ³னந்தி ஆதி³-ஸத்³தே³ன நியஸ்ஸாதீ³னம் க³ஹணம். தேஸம் ஸத்தன்னம் கம்மானம். பஸ்ஸத்³தி⁴ வூபஸமோ.

3007. ‘‘பி⁴க்கு²னீனம் ஓவாதோ³’’தி பி⁴க்கு²னோவாத³கஸம்முதி ப²லூபசாரேன வுத்தா.

3008-9. மூலபடிக்கஸ்ஸோ மூலாய படிகஸ்ஸனா, கா³தா²ப³ந்த⁴வஸேன க-காரஸ்ஸ த்³வேபா⁴வோ. உக்கி²த்தஸ்ஸானுவத்திகாதி உக்கி²த்தானுவத்திகா ஏகா யாவததியகா, அட்ட² ஸங்கா⁴தி³ஸேஸா, அரிட்டோ² சண்ட³காளீ ச த்³வே, இமே ஏகாத³ஸ யாவததியகா ப⁴வந்தி. இமேஸம் வஸாதி உக்கி²த்தானுவத்திகாதீ³னி புக்³க³லாதி⁴ட்டா²னேன வுத்தானி, இமேஸம் ஸமனுபா⁴ஸனகம்மானம் வஸேன. த³ஸேகாதி ஏகாத³ஸ.

3011. ஏவம் சதுன்னம்பி கம்மானம் டா²னபே⁴த³ம் த³ஸ்ஸேத்வா அன்வயதோ, ப்³யதிரேகதோ ச காதப்³ப³ப்பகாரம் த³ஸ்ஸேதுமாஹ ‘‘அபலோகனகம்மஞ்சா’’திஆதி³. ஞத்தியாபி ந காரயே, ஞத்திது³தியேனபி ந காரயேதி யோஜனா.

3012. அபலோகனகம்மே வுத்தலக்க²ணேன ஞத்திகம்மாதீ³னம்பி காதப்³ப³ப்பகாரோ ஸக்கா விஞ்ஞாதுந்தி தம் அத³ஸ்ஸேத்வா ஞத்திது³தியகம்மே லப்³ப⁴மானவிஸேஸம் த³ஸ்ஸேதுமாஹ ‘‘ஞத்திது³தியகம்மானீ’’திஆதி³. அபலோகேத்வா காதப்³பா³னி லஹுகானிபி ஞத்திது³தியகம்மானி அத்தீ²தி யோஜனா. தானி பன கதமானீதி ஆஹ ‘‘ஸப்³பா³ ஸம்முதியோ ஸியு’’ந்தி. ஏத்த² ஸீமாஸம்முதிம் வினா ஸேஸா திசீவரேனஅவிப்பவாஸஸம்முதிஆத³யோ ஸப்³பா³பி ஸம்முதியோதி அத்தோ².

3013. ஸேஸானீதி யதா²வுத்தேஹி ஸேஸானி ஸீமாஸம்முதிஆதீ³னி ச² கம்மானி. ந வட்டதீதி ந வட்டந்தி, கா³தா²ப³ந்த⁴வஸேன ந-காரலோபோ. யதா²ஹ ‘‘ஸீமாஸம்முதி, ஸீமாஸமூஹனனம், கதி²னதா³னம், கதி²னுத்³தா⁴ரோ, குடிவத்து²தே³ஸனா, விஹாரவத்து²தே³ஸனாதி இமானி ச² கம்மானி க³ருகானி அபலோகேத்வா காதும் ந வட்டந்தி, ஞத்திது³தியகம்மவாசம் ஸாவேத்வாவ காதப்³பா³னீ’’தி (பரி. அட்ட². 482). ‘‘அபலோகேத்வா காதும் பன ந வட்டதீ’’தி இத³ம் நித³ஸ்ஸனமத்தம், ஞத்திசதுத்த²கம்மவஸேனாபி காதும் ந வட்டந்தேவ. தேனேவாஹ ‘‘யதா²வுத்தனயேனேவ, தேன தேனேவ காரயே’’தி, யோ யோ நயோ தம் தம் கம்மம் காதும் வுத்தோ, தேனேவ தேனேவ நயேனாதி அத்தோ².

சதுப்³பி³த⁴கம்மகதா²வண்ணனா.