பி⁴க்கு²னிக்க²ந்த⁴ககதா²வண்ணனா

2952. விவரித்வான சீவரம் அபனேத்வா.

2953. யம் கிஞ்சி ஸம்பயோஜேந்தியாதி யம் கிஞ்சி அனாசாரம் கரோந்தியா. ததோதி தேன அனாசாரஸங்கா²தேன அஸத்³த⁴ம்மேன. பா⁴ஸந்தியாதி வாசாய பா⁴ஸந்தியா.

2954-6. தீ³க⁴ந்தி ஏகபரிக்கே²பதோ தீ³க⁴ம். விலீவேன ச பட்டேனாதி ஸண்ஹேஹிபி விலீவேஹி கதபட்டேன. சம்மபட்டேனாதி சம்மமயபட்டேன. து³ஸ்ஸபட்டேனாதி ஸேதவத்தே²ன. து³ஸ்ஸவேணியாதி து³ஸ்ஸேன க³ண்டி²தவேணியா. து³ஸ்ஸவட்டியாதி து³ஸ்ஸேன கதவட்டியா. ந பா²ஸுகா நமேதப்³பா³தி மஜ்ஜி²மஸ்ஸ தனுபா⁴வத்தா²ய கா³மதா³ரிகா விய பா²ஸுலிகா ந நாமேதப்³பா³. ஜக⁴னந்தி முத்தகரணப்பதே³ஸம். அட்டி²காதி³னாதி கோ³ஜாணுட்டி²காதி³னா. ந க⁴ம்ஸாபேய்யாதி ந க⁴ட்டாபேய்ய. ‘‘அட்டி²காதி³னா’’தி இத³ம் ‘‘ந க⁴ம்ஸாபேய்யா’’தி இமினா ச ‘‘கோட்டாபேதீ’’தி இமினா கிரியாபதே³ன ச ஸம்ப³ந்தி⁴தப்³ப³ம்.

2957. ‘‘கோட்டாபேதீ’’தி இத³ம் ‘‘ஹத்த²ம் வா’’திஆதீ³ஹி உபயோக³ந்தபதே³ஹி பச்சேகம் யோஜேதப்³ப³ம். ஹத்த²ந்தி அக்³க³பா³ஹம். ஹத்த²கோச்ச²ந்தி பிட்டி²ஹத்த²ம். பாத³ந்தி ஜங்க⁴ம்.

2958. ந முக²ம் லிம்பிதப்³ப³ந்தி ச²விபஸாத³கரேன திலஸாஸபகக்காதி³னா அனேகவிதே⁴ன லிம்பனேன ந லிம்பிதப்³ப³ம். ந சுண்ணேதப்³ப³ந்தி முக²சுண்ணலேபனம் ந காதப்³ப³ம். மனோஸிலாய முக²ம் லஞ்ஜந்தியா ஆபத்தி ஸியாதி யோஜனா.

2959. அங்க³ராகோ³ ந காதப்³போ³தி ஹலித்³தி³குங்குமாதீ³ஹி ஸரீரச்ச²விராகோ³ ந காதப்³போ³. அவங்க³ம் ந ச காதப்³ப³ந்தி அஞ்ஜனம் ப³ஹி அக்கி²கோடியா லேக²ம் ட²பேத்வா ந அஞ்ஜிதப்³ப³ம். ந காதப்³ப³ம் விஸேஸகந்தி க³ண்ட³பதே³ஸே விசித்ரஸண்டா²னம் விஸேஸகம் வத்தப⁴ங்க³ம் ந காதப்³ப³ம்.

2960. ஓலோகனகதோதி வாதபானதோ. ராகா³தி காமராகே³ன. ஓலோகேதுந்தி அந்தரவீதி²ம் விலோகேதும், ஸாலோகே ந ச டா²தப்³ப³ந்தி யோஜனா. ஸாலோகே த்³வாரம் விவரித்வா உபட்³ட⁴காயம் த³ஸ்ஸேந்தீஹி ந டா²தப்³ப³ம். ஸனச்சந்தி நடஸமஜ்ஜம்.

2961. க³ணிகம் வுட்டா²பேந்தியா வேஸிம் வுட்டா²பேந்தியா. ‘‘விக்கிணந்தியா’’தி இத³ம் ‘‘ஸுர’’ந்திஆதீ³ஹி உபயோக³ந்தபதே³ஹி பச்சேகம் யோஜேதப்³ப³ம்.

2963. ந சேவுபட்டா²பேதப்³போ³தி அத்தனோ வேய்யாவச்சம் நேவ காராபேதப்³போ³. திரச்சா²னக³தோபி தா³ஸோ வா தா³ஸீ வா திரச்சா²னக³தோபி கம்மகரோ வா ந சேவ உபட்டா²பேதப்³போ³ நேவ அத்தனோ வேய்யாவச்சம் காராபேதப்³போ³. அபி-ஸத்³தே³ன பகே³வ மனுஸ்ஸபூ⁴தோதி தீ³பேதி.

2964. ‘‘ஸப்³ப³னீலாதி³’’ந்தி இமினா –

‘‘ஸப்³ப³னீலகமஞ்ஜேட்ட²-கண்ஹலோஹிதபீதகே;

மஹானாமமஹாரங்க³-ரத்தேஸூ’’தி. (வி. வி. 598) –

வுத்தானி அகப்பியசீவரானி ஸங்க³ஹிதானி. ‘‘நமதகம் நாம ஏளகலோமேஹி கதம் அவாயிமம் சம்மக²ண்ட³பரிபோ⁴கே³ன பரிபு⁴ஞ்ஜிதப்³ப³’’ந்தி (சூளவ. அட்ட². 264) அட்ட²கதா²ய வுத்தத்தா, க³ண்டி²பதே³ ச ‘‘ஸந்த²ரணஸதி³ஸோ பிலோதிகாஹி கதோ பரிக்கா²ரவிஸேஸோ’’தி வுத்தத்தா ச நிபஜ்ஜாய பரிபு⁴ஞ்ஜிதப்³போ³ பரிக்கா²ரவிஸேஸோ நமதகம் நாம.

2965. ச²ன்னம்பி புரிஸப்³யஞ்ஜனம் ‘‘ஏத்தா²’’தி சிந்தேத்வா ராக³சித்தேன ஓலோகேந்தியா து³க்கடம் ஹோதி. ஸப்³ப³ந்தி வுத்தப்பகாரம் ஸப்³ப³ம்.

2966. பி⁴க்கு²ம் தூ³ரதோவ பஸ்ஸித்வா தஸ்ஸ பி⁴க்கு²னோ தூ³ரதோ ஓக்கமித்வான மக்³கோ³ தா³தப்³போ³தி யோஜனா.

2967. பி⁴க்க²ம் சரந்தியா பி⁴க்கு²னியா பி⁴க்கு²ம் பஸ்ஸித்வா பன யேன பி⁴க்கா²ய சரதி, தம் பத்தம் நீஹரித்வா உபரி சா²தே³த்வா டி²தம் ஸங்கா⁴டிசீவரம் அபனேத்வா உக்குஜ்ஜம் உத்³த⁴ம்முக²ம் கத்வா பி⁴க்கு²னோ த³ஸ்ஸேதப்³ப³ந்தி யோஜனா.

2968. உதுனீனம் பி⁴க்கு²னீனம் உதுகாலே ஸஞ்ஜாதபுப்பே² காலே ஸம்வேல்லிகம் காதும் கச்ச²ம் ப³ந்தி⁴தும் மஹேஸினா கடிஸுத்தகம் அனுஞ்ஞாதந்தி யோஜனா, இமினா அஞ்ஞஸ்மிம் காலே கடிஸுத்தகம் ப³ந்தி⁴தும் ந வட்டதீதி தீ³பேதி. யதா²ஹ – ‘‘ந, பி⁴க்க²வே, பி⁴க்கு²னியா ஸப்³ப³காலம் கடிஸுத்தகம் தா⁴ரேதப்³ப³ம், யா தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, உதுனியா கடிஸுத்தக’’ந்தி (சூளவ. 422).

2969. இத்தி²போஸயுதந்தி இத்தீ²ஹி வா புரிஸேஹி வா இத்தி²புரிஸேஹி வா யுத்தம். இத்தி²போஸயுத்தம் ஹத்த²வட்டகமேவ வா. பாடங்கீதி படபோட்டலிகம்.

2970. க³ருத⁴ம்மேதி ஸங்கா⁴தி³ஸேஸே. மானத்தந்தி பக்க²மானத்தம். ஸம்மன்னித்வாதி ஞத்திது³தியாய கம்மவாசாய ஸம்மன்னித்வா.

2971. யஸ்ஸா இத்தி²யா பப்³ப³ஜிதகாலே க³ப்³போ⁴ வுட்டா²தி விஜாயதி யதி³, புத்தோ சே, தஸ்ஸாபி தா³ரகமாது யாவ ஸோ தா³ரகோ விஞ்ஞுதம் பாபுணாதி, யாவ கா²தி³தும், பு⁴ஞ்ஜிதும், நஹாயிதுஞ்ச அத்தனோ த⁴ம்மதாய ஸக்கோதி, தாவ து³தியா பி⁴க்கு²னீ ததா² ஸம்மன்னித்வா தா³தப்³பா³தி யோஜனா.

2972. ஸா பன மாதா பி⁴க்கு²னீ அத்தனோ புத்தம் பாயேதும், போ⁴ஜேதும், மண்டே³தும், உரே கத்வா ஸயிதுஞ்ச லப⁴தீதி யோஜனா.

2973. து³தியிகாய பி⁴க்கு²னியா தா³ரகேன ஸஹஸேய்யம் ட²பேத்வா யதா² அஞ்ஞேஸு புரிஸேஸு வத்திதப்³ப³ம் படிபஜ்ஜிதப்³ப³ம், ததா² ஏவ தஸ்மிம் தா³ரகே வத்திதப்³ப³ந்தி யோஜனா.

2974. விப்³ப⁴மேனேவாதி அத்தனோ ருசியா ஸேதவத்தா²னம் க³ஹணேனேவ. யதா²ஹ – ‘‘யஸ்மா ஸா விப்³ப⁴ந்தா அத்தனோ ருசியா க²ந்தியா ஓதா³தானி வத்தா²னி நிவத்தா², தஸ்மாயேவ ஸா அபி⁴க்கு²னீ, ந ஸிக்கா²பச்சக்கா²னேனா’’தி (சூளவ. அட்ட². 434). இதா⁴தி இமஸ்மிம் ஸாஸனே.

2975. க³தாயாதி ஏத்த² ‘‘ஸகாவாஸா’’தி ஸேஸோ. யதா²ஹ – ‘‘யா ஸா, பி⁴க்க²வே, பி⁴க்கு²னீ ஸகாவாஸா தித்தா²யதனம் ஸங்கந்தா, ஸா ஆக³தா ந உபஸம்பாதே³தப்³பா³’’தி. ந கேவலம் ந உபஸம்பாதே³தப்³பா³, பப்³ப³ஜ்ஜம்பி ந லப⁴தி. ஓதா³தானி க³ஹேத்வா விப்³ப⁴ந்தா பன பப்³ப³ஜ்ஜாமத்தம் லப⁴தி.

2976. வந்த³னந்தி பாதே³ ஸம்பா³ஹேத்வா வந்த³னம். ஸாதி³தும் வட்டதீதி ‘‘அனுஜானாமி, பி⁴க்க²வே, ஸாதி³து’’ந்தி (சூளவ. 434) அனுஞ்ஞாதத்தா வட்டதி. தத்ரேகே ஆசரியா ‘‘ஸசே ஏகதோ வா உப⁴தோ வா அவஸ்ஸுதா ஹோந்தி ஸாரத்தா, யதா²வத்து²கமேவா’’தி வத³ந்தி. ஏகே ஆசரியா ‘‘நத்தி² ஏத்த² ஆபத்தீ’’தி வத³ந்தீதி ஏவம் ஆசரியவாத³ம் த³ஸ்ஸேத்வா ‘‘இத³ம் ஓதி³ஸ்ஸ அனுஞ்ஞாதம் வட்டதீ’’தி அட்ட²கதா²ஸு வுத்தம், தம் பமாணம். ‘‘அனுஜானாமி, பி⁴க்க²வே, ஸாதி³து’’ந்தி (சூளவ. 434) ஹி வசனேனேவ கப்பியம்.

2977. யாய காயசி வச்சகுடியா வச்சோ ந காதப்³போ³, ஹேட்டா² விவடே உத்³த⁴ம் படிச்ச²ன்னே பன வச்சம் காதும் வட்டதி. ஹேட்டா² விவடே உபரி படிச்ச²ன்னேதி அட்ட²கதா²யம் ‘‘ஸசே கூபோ க²தோ ஹோதி, உபரி பன பத³ரமத்தமேவ ஸப்³ப³தி³ஸாஸு பஞ்ஞாயதி, ஏவரூபேபி வட்டதீ’’தி (சூளவ. அட்ட². 435) வுத்தம்.

2978. ஸப்³ப³த்தா²தி பி⁴க்கு²னிஉபஸ்ஸயஅந்தரக⁴ராதி³ஸப்³ப³ட்டா²னேஸு. கி³லானாயாதி யஸ்ஸா வினா பல்லங்கம் ந பா²ஸு ஹோதி. அட்³ட⁴பல்லங்கந்தி ஏகபாத³ம் ஆபு⁴ஜித்வா கதபல்லங்கம். ஸோ ஏகம் பண்ஹிம் ஊருமூலாஸன்னம் கத்வா இதரம் தூ³ரே கத்வா ஆபு⁴ஜிதபல்லங்கோ நாம.

2979. நரதித்தே²தி புரிஸானம் நஹானதித்தே². யதா²ஹ – ‘‘ந, பி⁴க்க²வே, பி⁴க்கு²னியா புரிஸதித்தே² நஹாயிதப்³ப³ம், யா நஹாயேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, மஹிலாதித்தே² நஹாயிது’’ந்தி (சூளவ. 436).

2980. யா ஸமணீ க³ந்த⁴சுண்ணேன வா வாஸிதமத்தியா வாஸிதகாய மத்திகாய வா படிஸோதே வா ந்ஹாயேய்ய, தஸ்ஸா ஆபத்தி து³க்கடந்தி யோஜனா. வாஸிதவிஸேஸனேன அவாஸிதா வட்டதீதி தீ³பேதி. யதா²ஹ – ‘‘அனுஜானாமி, பி⁴க்க²வே, பகதிமத்திக’’ந்தி (சூளவ. 436).

2981. அபு⁴த்வாதி ஏத்த² ஆமிஸஅக்³க³ம் க³ஹணமத்தம்பி அகத்வா, பத்தசீவரம் கதிபயதி³வஸானிபி அபரிபு⁴ஞ்ஜித்வாதி அத்தோ². ஸசே அஸப்பாயம், ஸப்³ப³ம்பி அபனேதும் வட்டதி.

2982. அனுபஸம்பன்னே அஸந்தே ஸப்³ப³ம் பி⁴க்கூ²ஹி படிக்³க³ஹிதம் வா அப்படிக்³க³ஹிதம் வா ஸன்னிதி⁴கதம் வா ஸப்³ப³ம் அஜ்ஜோ²ஹரணீயம் பி⁴க்கூ²ஹி படிக்³க³ஹாபேத்வா பரிபு⁴ஞ்ஜிதும் பி⁴க்கு²னீனம் வட்டதீதி யோஜனா. ‘‘பி⁴க்கு²னீனம் வட்டதீ’’தி இத³ம் பகரணவஸேன வுத்தம். பி⁴க்கு²னீஹிபி படிக்³க³ஹாபேத்வா பி⁴க்கூ²னம்பி ததா²வித⁴ம் பரிபு⁴ஞ்ஜிதும் வட்டதி. யதா²ஹ – ‘‘அனுஜானாமி, பி⁴க்க²வே, பி⁴க்கூ²னம் ஸன்னிதி⁴ம் பி⁴க்கு²னீஹி படிக்³கா³ஹாபேத்வா பரிபு⁴ஞ்ஜிது’’ந்தி (சூளவ. 421).

பி⁴க்கு²னிக்க²ந்த⁴ககதா²வண்ணனா.

இதி வினயத்த²ஸாரஸந்தீ³பனியா வினயவினிச்ச²யவண்ணனாய

க²ந்த⁴ககதா²வண்ணனா நிட்டி²தா.