வத்தக்க²ந்த⁴ககதா²வண்ணனா

2914-5. ஆக³ந்துகோ ச ஆவாஸிகோ ச பிண்ட³சாரிகோ ச ஸேனாஸனஞ்ச ஆரஞ்ஞகோ ச அனுமோத³னா சாதி விக்³க³ஹோ, தாஸு வத்தானி, இதரீதரயோக³த்³வந்த³ஸமாஸஸ்ஸ உத்தரபத³லிங்க³த்தா இத்தி² லிங்க³னித்³தே³ஸோ. ப⁴த்தே ப⁴த்தக்³கே³, உத்தரபத³லோபோ. ‘‘ப⁴த்தே’’திஆதீ³ஹி பதே³ஹி ‘‘வத்தானீ’’தி பச்சேகம் யோஜேதப்³ப³ம்.

ஆசரியோ ச உபஜ்ஜா²யகோ ச ஸிஸ்ஸோ ச ஸத்³தி⁴விஹாரிகோ ச, தேஸம் வத்தானீதி விக்³க³ஹோ. ஸப்³ப³ஸோதி ஸப்³பா³வயவபே⁴தே³ஹி. சதுத்³த³ஸேவாதி அவயவபே⁴தே³ஹி ப³ஹுவிதா⁴னிபி வத்தானி விஸயபே⁴தே³ன சுத்³த³ஸ ஏவ வுத்தானி. விஸுத்³த⁴சித்தேனாதி ஸவாஸனஸகலஸம்கிலேஸப்பஹானதோ அச்சந்தபரிஸுத்³த⁴சித்தஸந்தானேன. வினாயகேனாதி ஸத்தே வினேதீதி வினாயகோ, அனுத்தரபுரிஸத³ம்மஸாரதி²பா⁴வேன த³ம்மதே³வப்³ரஹ்மனாகா³தி³கே ஸத்தே நானாவிதே⁴ன வினயனுபாயேன த³மேதீதி அத்தோ². அத² வா விக³தோ நாயகோ அஸ்ஸாதி வினாயகோ, தேன.

2916. ஆராமந்தி ஏத்த² தம்ஸமீபே தப்³போ³ஹாரோ. யதா²ஹ ‘‘இதா³னி ‘ஆராமம் பவிஸிஸ்ஸாமீ’தி இமினா உபசாரஸீமஸமீபம் த³ஸ்ஸேதி, தஸ்மா உபசாரஸீமம் பத்வா உபாஹனாஓமுஞ்சனாதி³ ஸப்³ப³ம் காதப்³ப³’’ந்தி (சூளவ. அட்ட². 357). ‘‘பன அபனேதப்³ப³’’ந்தி பத³ச்சே²தோ³. முஞ்சிதப்³பா³தி உபாஹனா பாத³தோ அபனேதப்³பா³.

2917. ஓகு³ண்ட²னந்தி ஸஸீஸபாருபனம். ஸீஸே சீவரமேவ வா ந காதப்³ப³ந்தி ஸம்ப³ந்தோ⁴. தேனாதி ஆக³ந்துகேன. பானீயவாரினாதி பாதப்³ப³ஜலேன.

2918. புச்சி²த்வாதி வஸ்ஸக³ணனம் புச்சி²த்வா. விஹாரே வுட்³ட⁴பி⁴க்கு²னோ ஆக³ந்துகேன பி⁴க்கு²னா வந்தி³தப்³பா³வ. காலேதி காலஸ்ஸேவ. தேன ஆக³ந்துகேன பி⁴க்கு²னா ஸேனாஸனம் ‘‘மய்ஹம் கதரம் ஸேனாஸனம் பாபுணாதீ’’தி புச்சி²தப்³ப³ஞ்சாதி யோஜனா.

2919. ‘‘புச்சி²தப்³ப³’’ந்தி இத³ம் ‘‘வச்சட்டா²ன’’ந்திஆதி³கேஹி ஸப்³பே³ஹி உபயோக³ந்தபதே³ஹி பச்சேகம் யோஜேதப்³ப³ம். பானீயமேவ சாதி ‘‘கிம் இமிஸ்ஸா போக்க²ரணியா பானீயமேவ பிவந்தி, உதா³ஹு நஹானாதி³பரிபோ⁴க³ம்பி கரோந்தீ’’தி (சூளவ. அட்ட². 357) அட்ட²கதா²க³தனயேன பானீயஞ்ச. ததா² பரிபோ⁴ஜனீயஞ்ச. ஸங்க⁴கதிகந்தி ‘‘கேஸுசி டா²னேஸு வாளமிகா³ வா அமனுஸ்ஸா வா ஹோந்தி, தஸ்மா கம் காலம் பவிஸிதப்³ப³ம், கம் காலம் நிக்க²மிதப்³ப³’’ந்தி அட்ட²கதா²க³தனயேன ஸங்க⁴ஸ்ஸ கதிகஸண்டா²னஞ்ச. கோ³சராதி³கந்தி ஏத்த² ச ‘‘கோ³சரோ புச்சி²தப்³போ³தி ‘கோ³சரகா³மோ ஆஸன்னே, உதா³ஹு தூ³ரே, காலஸ்ஸேவ ச பிண்டா³ய சரிதப்³ப³ம், உதா³ஹு நோ’தி ஏவம் பி⁴க்கா²சாரோ புச்சி²தப்³போ³’’தி (சூளவ. அட்ட². 357) வுத்தனயேன கோ³சரஞ்ச. ஆதி³-ஸத்³தே³ன அகோ³சரம் க³ஹிதம். ‘‘அகோ³சரோ நாம மிச்சா²தி³ட்டி²கானம் வா கா³மோ பரிச்சி²ன்னபி⁴க்கோ² வா கா³மோ, யத்த² ஏகஸ்ஸ வா த்³வின்னம் வா பி⁴க்கா² தி³ய்யதி, ஸோபி புச்சி²தப்³போ³’’தி (சூளவ. அட்ட². 357) வுத்தனயேன அகோ³சரஞ்ச.

2920. ஏவம் ஆக³ந்துகவத்தம் த³ஸ்ஸேத்வா இதா³னி ஆவாஸிகவத்தம் த³ஸ்ஸேதுமாஹ ‘‘வுட்³ட⁴’’ந்திஆதி³. பச்சுக்³க³ந்த்வா பத்தஞ்ச சீவரஞ்ச படிக்³க³ஹேதப்³ப³ந்தி யோஜனா. ச-ஸத்³தோ³ லுத்தனித்³தி³ட்டோ².

2921. தஸ்ஸாதி ஆக³ந்துகஸ்ஸ. பாதோ³த³கஞ்சாதி ச-ஸத்³தே³ன தோ⁴தாதோ⁴தபாதா³ யத்த² ட²பீயந்தி, தம் பாத³பீட²ம், பாத³கத²லிகஞ்ச உபனிக்கி²பிதப்³ப³ந்தி ஏதம் க³ஹிதம். புச்சி²தப்³ப³ஞ்ச வாரினாதி ‘‘பானீயேன புச்ச²ந்தேன ஸசே ஸகிம் ஆனீதம் பானீயம் ஸப்³ப³ம் பிவதி, ‘புன ஆனேமீ’தி புச்சி²தப்³போ³யேவா’’தி வுத்தனயேன பானீயேன புச்சி²தப்³போ³. இத⁴ ச-ஸத்³தே³ன –

‘‘அபிச பீ³ஜனேனபி பீ³ஜிதப்³போ³, பீ³ஜந்தேன ஸகிம் பாத³பிட்டி²யம் பீ³ஜித்வா ஸகிம் மஜ்ஜே², ஸகிம் ஸீஸே பீ³ஜிதப்³ப³ம், ‘அலம் ஹோதூ’தி வுத்தேன ததோ மந்த³தரம் பீ³ஜிதப்³ப³ம். புன ‘அல’ந்தி வுத்தேன ததோ மந்த³தரம் பீ³ஜிதப்³ப³ம். ததியவாரம் வுத்தேன பீ³ஜனீ ட²பேதப்³பா³. பாதா³பிஸ்ஸ தோ⁴விதப்³பா³, தோ⁴வித்வா ஸசே அத்தனோ தேலம் அத்தி², தேன மக்கே²தப்³பா³. நோ சே அத்தி², தஸ்ஸ ஸந்தகேன மக்கே²தப்³பா³’’தி (சூளவ. அட்ட². 359) –

வுத்தவத்தானி ஸங்க³ண்ஹாதி.

2922-3. வந்தே³ய்யோதி வுட்³டா⁴க³ந்துகோ வந்தி³தப்³போ³. பஞ்ஞபேதப்³ப³ந்தி ‘‘கத்த² மய்ஹம் ஸேனாஸனம் பாபுணாதீ’’தி புச்சி²தேன ஸேனாஸனம் பஞ்ஞபேதப்³ப³ம், ‘‘ஏதம் ஸேனாஸனம் தும்ஹாகம் பாபுணாதீ’’தி ஏவம் ஆசிக்கி²தப்³ப³ந்தி அத்தோ². ‘‘வத்தப்³போ³’’தி இத³ம் ‘‘அஜ்ஜா²வுத்த²மவுத்த²’’ந்திஆதீ³ஹி பதே³ஹி தம்தம்லிங்க³வசனானுரூபேன பரிவத்தேத்வா பச்சேகம் யோஜேதப்³ப³ம். அஜ்ஜா²வுத்த²ந்தி பஞ்ஞத்தஸேனாஸனஸ்ஸ பி⁴க்கூ²ஹி பட²மம் வுத்த²பா⁴வம். அவுத்த²ம் வாதி சீவரகாலம் தஸ்மிம் பி⁴க்கூ²ஹி அனஜ்ஜா²வுத்த²பா⁴வம் வா. கோ³சராகோ³சரம் வுத்தமேவ.

ஸேக்க²குலானி சாதி லத்³த⁴ஸேக்க²ஸம்முதிகானி குலானி ச வத்தப்³பா³னி. ‘‘பவேஸே நிக்க²மே காலோ’’தி இத³ம் ‘‘ஸங்க⁴கதிக’’ந்தி ஏத்த² வுத்தத்த²மேவ. பானீயாதி³கந்தி ஆதி³-ஸத்³தே³ன பரிபோ⁴ஜனீயகத்தரயட்டீ²னம் ஆசிக்க²னம் ஸங்க³ண்ஹாதி.

2924. யதா²னிஸின்னேனேவாதி அத்தனா நிஸின்னட்டா²னேயேவ நிஸின்னேன. அஸ்ஸாதி நவகஸ்ஸ.

2925. ‘‘அத்ர பத்தம் ட²பேஹி, இத³மாஸனம் நிஸீதா³ஹீ’’தி இச்சேவம் இமினா பகாரேன ஸப்³ப³ம் வத்தப்³ப³ந்தி யோஜனா. தே³ய்யம் ஸேனாஸனம்பி சாதி ஸேனாஸனஞ்ச தா³தப்³ப³ம். ச-ஸத்³தே³ன ‘‘அவுத்த²ம் வா அஜ்ஜா²வுத்த²ம் வா ஆசிக்கி²தப்³ப³’’ந்திஆதி³னா வுத்தம் ஸம்பிண்டே³தி. மஹாஆவாஸேபி அத்தனோ ஸந்திகம் ஸம்பத்தஸ்ஸ ஆக³ந்துகஸ்ஸ வத்தம் அகாதும் ந லப்³ப⁴தி.

2926. ‘‘மாதிகாய நித்³தி³ட்ட²க்கமேனேவ வத்தானி காதப்³பா³னி, உதா³ஹு யதா²னுப்பத்திவஸேனா’’தி கோசி மஞ்ஞேய்யாதி மாதிகாக்கமேனேவ காதப்³ப³ந்தி நியமோ நத்தி², யதா²னுப்பத்தவஸேனேவ காதப்³ப³ந்தி விஞ்ஞாபேதும் மாதிகாக்கமமனாதி³யித்வா க³மிகவத்தம் ஆரத்³த⁴ம். அத² வா வத்திச்சா²னுபுப்³ப³கத்தா ஸத்³த³பயோக³ஸ்ஸ மாதிகாக்கமமனாதி³யித்வா யதி²ச்ச²ம் நித்³தே³ஸோ கதோதி வேதி³தப்³போ³தி. தா³ருமத்திகப⁴ண்டா³னீதி மஞ்சபீடா²தீ³னி சேவ ரஜனபா⁴ஜனானி ச. படிஸாமேத்வாதி கு³த்தட்டா²னே ட²பேத்வா. ஆவஸத²ம்பி த²கேத்வாதி ஆவஸதே² த்³வாரகவாடாதீ³னி ச த²கேத்வா.

2927. ஆபுச்சி²த்வாபீதி பி⁴க்கு²ஸ்ஸ வா ஸாமணேரஸ்ஸ வா ஆராமிகஸ்ஸ வா ‘‘இமம் படிஜக்³கா³ஹீ’’தி நிய்யாதே³த்வா வா. புச்சி²தப்³பே³ அஸந்தேபீதி ஏத்த² பி-ஸத்³தோ³ பன-ஸத்³த³த்தோ². கோ³பேத்வா வாபி ஸாது⁴கந்தி ‘‘சதூஸு பாஸாணேஸு மஞ்சம் பஞ்ஞபேத்வா மஞ்சே மஞ்சம் ஆரோபேத்வா’’திஆதி³னா (சூளவ. 360) வுத்தனயேன ஸம்மா படிஸாமேத்வா க³ந்தப்³ப³ந்தி யோஜனா.

2928. பிண்ட³சாரிகவத்தம் த³ஸ்ஸேதுமாஹ ‘‘ஸஹஸா’’திஆதி³. பிண்ட³சாரிகோ பி⁴க்கு² அந்தரக⁴ரம் பவிஸந்தோ ஸஹஸா ந பவிஸே ஸீக⁴ம் ந பவிஸேய்ய, நிக்க²மந்தோ ஸஹஸா ந நிக்க²மே ஸீக⁴ம் ந நிக்க²மேய்ய, பி⁴க்கு²ஸாருப்பேன பவிஸேய்ய, நிக்க²மேய்ய ச. பிண்ட³சாரினா பி⁴க்கு²னா கே³ஹத்³வாரம் ஸம்பத்தேன அதிதூ³ரே ந டா²தப்³ப³ம் நிப்³ப³கோஸதோ அதிதூ³ரட்டா²னே ந டா²தப்³ப³ம். அச்சாஸன்னே ந டா²தப்³ப³ம் நிப்³ப³கோஸதோ ஆஸன்னதரே டா²னே ந டா²தப்³ப³ம்.

2929. உச்சாரேத்வாதி உபனாமேத்வா. பா⁴ஜனந்தி பத்தம். த³க்கி²ணேன பணாமேத்வாதி த³க்கி²ணேன ஹத்தே²ன உபனாமேத்வா. பி⁴க்க²ம் க³ண்ஹேய்யாதி ஏத்த² ‘‘உபோ⁴ஹி ஹத்தே²ஹி படிக்³க³ஹேத்வா’’தி ஸேஸோ. யதா²ஹ – ‘‘உபோ⁴ஹி ஹத்தே²ஹி பத்தம் படிக்³க³ஹேத்வா பி⁴க்கா² க³ஹேதப்³பா³’’தி (சூளவ. 366).

2930. ஸூபம் தா³துகாமா வா அதா³துகாமா வா இதி முஹுத்தகம் ஸல்லக்கே²ய்ய திட்டே²ய்ய. அந்தராதி பி⁴க்கா²தா³னஸமயே. ந பி⁴க்கா²தா³யிகாதி இத்தீ² வா ஹோது புரிஸோ வா, பி⁴க்கா²தா³னஸமயே முக²ம் ந ஓலோகேதப்³ப³ந்தி.

2931. பிண்ட³சாரிகவத்தம் த³ஸ்ஸேத்வா ஆரஞ்ஞிகவத்தம் த³ஸ்ஸேதுமாஹ ‘‘பானீயாதீ³’’திஆதி³. பானீயாதீ³தி ஆதி³-ஸத்³தே³ன பரிபோ⁴ஜனீயஅக்³கி³அரணிஸஹிதகத்தரயட்டீ²னம் க³ஹணம். தத்ராயம் வினிச்ச²யோ – பானீயம் உபட்டா²பேதப்³ப³ந்தி ஸசே பா⁴ஜனானி நப்பஹோந்தி, பானீயமேவ பரிபோ⁴ஜனீயம்பி கத்வா உபட்டா²பேதப்³ப³ம். பா⁴ஜனம் அலப⁴ந்தேன வேளுனாளிகாயபி உபட்டா²பேதப்³ப³ம். தம்பி அலப⁴ந்தஸ்ஸ யதா² ஸமீபே கு²த்³த³கஆவாடோ ஹோதி, ஏவம் காதப்³ப³ம். அரணிஸஹிதே அஸதி அக்³கி³ம் அகாதும்பி ச வட்டதி. யதா² ச ஆரஞ்ஞிகஸ்ஸ, ஏவம் கந்தாரபடிபன்னஸ்ஸாபி அரணிஸஹிதம் இச்சி²தப்³ப³ம். க³ணவாஸினோ பன தேன வினாபி வட்டதீதி.

நக்க²த்தந்தி அஸ்ஸயுஜாதி³ஸத்தவீஸதிவித⁴ம் நக்க²த்தம் ஜானிதப்³ப³ந்தி ஸம்ப³ந்தோ⁴. கத²ம் ஜானிதப்³ப³ந்தி ஆஹ ‘‘தேன யோகோ³ சா’’தி, தேன நக்க²த்தேன சந்த³ஸ்ஸ யோகோ³ ஞாதப்³போ³தி அத்தோ². ஜானிதப்³பா³ தி³ஸாபி சாதி அரஞ்ஞே விஹரந்தேன அட்ட²பி தி³ஸா அஸம்மோஹதோ ஜானிதப்³பா³.

2932. அஞ்ஞவத்தம் த³ஸ்ஸேதுமாஹ ‘‘வச்சபஸ்ஸாவதித்தா²னீ’’திஆதி³. படிபாடியா ப⁴வந்தீதி க³தானுக்கமேன ஸேவிதப்³பா³ ப⁴வந்தி. யதா²ஹ – ‘‘வச்சகுடியம், பஸ்ஸாவட்டா²னே, ந்ஹானதித்தே²தி தீஸுபி ஆக³தபடிபாடியேவ பமாண’’ந்தி (சூளவ. அட்ட². 373). யதா²வுட்³ட⁴ம் கரோந்தஸ்ஸாதி க³தபடிபாடிம் வினா வுட்³ட⁴படிபாடியா கரோந்தஸ்ஸ.

2933. வச்சகுடிம் பவிஸந்தோ ஸஹஸா ந பவிஸேய்ய. உப்³ப⁴ஜித்வாதி சீவரம் உக்கி²பித்வா.

2934. நித்து²னந்தேன பி⁴க்கு²னா வச்சம் ந காதப்³ப³ந்தி யோஜனா. ‘‘வச்சஸ்ஸ து³ன்னிக்³க³மனேன உபஹதோ ஹுத்வா நித்து²னதி சே, ந தோ³ஸோ’’தி ஸிக்கா²பா⁴ஜனவினிச்ச²யே வுத்தம். த³ண்ட³கட்ட²ம் கா²த³தோ வச்சம் கரோதோ பி⁴க்கு²னோ து³க்கடம் ஹோதீதி யோஜனா.

2936. க²ரேனாதி ப²ருஸேன வா பா²லிதகட்டே²ன வா க³ண்டி²கேன வா கண்டகேன வா ஸுஸிரேன வா பூதினா வா த³ண்டே³ன ந அவலேகே²ய்ய ந புஞ்சே²ய்ய. ந கட்ட²ம் வச்சகூபகே ச²ட்³டே³ய்யாதி தம் கட்ட²ம் வச்சகூபே ந ச²ட்³டே³ய்ய. பஸ்ஸாவதோ³ணியா கே²ளம் ந பாதேய்யாதி யோஜனா.

2937. பாது³காஸூதி வச்சபஸ்ஸாவபாது³காஸு. நிக்க²மனே நிக்க²மனகாலே. தத்தே²வாதி வச்சபஸ்ஸாவபாது³காஸ்வேவ. படிச்சா²தே³ய்யாதி உக்கி²த்தம் சீவரம் ஓதாரேத்வா ஸரீரம் படிச்சா²தே³ய்ய.

2938. யோ வச்சம் கத்வா ஸலிலே ஸதி ஸசே நாசமேய்ய உத³ககிச்சம் ந கரேய்ய, தஸ்ஸ து³க்கடம் உத்³தி³ட்ட²ந்தி யோஜனா. மோஹனாஸினாதி ஸவாஸனஸ்ஸ மோஹஸ்ஸ, தேன ஸஹஜேகட்ட²பஹானேகட்டா²னம் ஸகலஸம்கிலேஸானஞ்ச பஹாயினா ஆஸவக்க²யஞாணேன ஸமுச்சி²ந்த³தா முனினா ஸப்³ப³ஞ்ஞுனா ஸம்மாஸம்பு³த்³தே⁴ன. ‘‘ஸலிலே ஸதீ’’தி இமினா அஸதி நித்³தோ³ஸதம் தீ³பேதி. யதா²ஹ –

‘‘ஸதி உத³கேதி ஏத்த² ஸசே உத³கம் அத்தி², படிச்ச²ன்னட்டா²னம் பன நத்தி², பா⁴ஜனேன நீஹரித்வா ஆசமிதப்³ப³ம். பா⁴ஜனே அஸதி பத்தேன நீஹரிதப்³ப³ம். பத்தேபி அஸதி அஸந்தம் நாம ஹோதி. ‘இத³ம் அதிவிவடம், புரதோ அஞ்ஞம் உத³கம் ப⁴விஸ்ஸதீ’தி க³தஸ்ஸ உத³கம் அலப⁴ந்தஸ்ஸேவ பி⁴க்கா²சாரவேலா ஹோதி, கட்டே²ன வா கேனசி வா புஞ்சி²த்வா க³ந்தப்³ப³ம், பு⁴ஞ்ஜிதும்பி அனுமோத³னம்பி காதும் வட்டதீ’’தி (சூளவ. அட்ட². 373).

2939. ஸஸத்³த³ந்தி உத³கஸத்³த³ம் கத்வா. ‘‘பாஸாணாதி³ட்டா²னே பஹரித்வா உத³கம் ஸத்³தா³யதி சே, ந தோ³ஸோ’’தி ஸிக்கா²பா⁴ஜனவினிச்ச²யே வுத்தம். சபு சபூதி சாதி தாதி³ஸம் அனுகரணம் கத்வா நாசமேதப்³ப³ந்தி யோஜனா. ஆசமித்வாதி உத³ககிச்சம் கத்வா. ஸராவே ஆசமனபா⁴ஜனே உத³கம் ந ஸேஸேதப்³ப³ந்தி யோஜனா, இத³ம் பன ஸப்³ப³ஸாதா⁴ரணட்டா²னம் ஸந்தா⁴ய வுத்தம். யதா²ஹ அட்ட²கதா²யம் –

‘‘ஆசமனஸராவகேதி ஸப்³ப³ஸாதா⁴ரணட்டா²னம் ஸந்தா⁴யேதம் வுத்தம். தத்ர ஹி அஞ்ஞே அஞ்ஞே ஆக³ச்ச²ந்தி, தஸ்மா உத³கம் ந ஸேஸேதப்³ப³ம். யம் பன ஸங்கி⁴கேபி விஹாரே ஏகதே³ஸே நிப³த்³த⁴க³மனத்தா²ய கதம் டா²னம் ஹோதி புக்³க³லிகட்டா²னம் வா, தஸ்மிம் வட்டதி. விரேசனம் பிவித்வா புனப்புனம் பவிஸந்தஸ்ஸாபி வட்டதியேவா’’தி (சூளவ. அட்ட². 374).

2940. ஊஹதம்பீதி அஞ்ஞேன வா அத்தனா வா அஸஞ்சிச்ச ஊஹதம் மலேன தூ³ஸிதட்டா²னம். அதோ⁴வித்வாதி ஜலே ஸதி அஸோதே⁴த்வா ஜலே அஸதி கட்டே²ன வா கேனசி வா புஞ்சி²த்வா க³ந்தப்³ப³ம். யதா²ஹ – ‘‘உத³கம் அத்தி² பா⁴ஜனம் நத்தி², அஸந்தம் நாம ஹோதி, பா⁴ஜனம் அத்தி² உத³கம் நத்தி², ஏதம்பி அஸந்தம், உப⁴யே பன அஸதி அஸந்தமேவ, கட்டே²ன வா கேனசி வா புஞ்சி²த்வா க³ந்தப்³ப³’’ந்தி (சூளவ. அட்ட². 374). உக்லாபாபி ஸசே ஹோந்தீதி வச்சபஸ்ஸாவட்டா²னானி ஸசே கசவராகிண்ணானி ஹோந்தி. ‘‘அஸேஸதோ ஸோதே⁴தப்³ப³’’ந்தி இமினா ததோ கஸ்ஸசி கசவரஸ்ஸ அபனயனம் ஸோத⁴னம் நாம ந ஹோதி, நிஸ்ஸேஸகசவராபனயனமேவ ஸோத⁴னந்தி தீ³பேதி.

2941. பிட²ரோதி அவலேக²னகட்ட²னிக்கே²பனபா⁴ஜனம். கும்பீ⁴ சே ரித்தாதி ஆசமனகும்பீ⁴ ஸசே துச்சா².

2942. ஏவம் வச்சகுடிவத்தம் த³ஸ்ஸேத்வா ஸேனாஸனவத்தம் த³ஸ்ஸேதுமாஹ ‘‘அனஜ்ஜி²ட்டோ²’’திஆதி³. அனஜ்ஜி²ட்டோ²தி அனனுஞ்ஞாதோ.

2943. வுட்³ட⁴ம் ஆபுச்சி²த்வா கதே²ந்தஸ்ஸாதி யோஜனா. வுட்³ட⁴தராக³மேதி யம் ஆபுச்சி²த்வா கதே²துமாரத்³தோ⁴, ததோபி வுட்³ட⁴தரஸ்ஸ பி⁴க்கு²னோ ஆக³மே ஸதி.

2944. ஏகவிஹாரஸ்மிந்தி ஏகஸ்மிம் கே³ஹே. ‘‘அனாபுச்சா²’’தி இத³ம் வக்க²மானேஹி யதா²ரஹம் யோஜேதப்³ப³ம்.

2945. பட²மம் யத்த² கத்த²சி வுட்³டா⁴னம் ஸன்னிதா⁴னே கத்தப்³ப³வத்தம் நித்³தி³ட்ட²ந்தி இதா³னி ஏகவிஹாரே வஸந்தேனாபி தஸ்ஸ காதப்³ப³தம் த³ஸ்ஸேதும் புனபி ‘‘ந ச த⁴ம்மோ கதே²தப்³போ³’’தி ஆஹ. த⁴ம்மசக்கு²னாதி த⁴ம்மலோசனேன த⁴ம்மக³ருகேன, இமினா அதாதி³ஸஸ்ஸ கதோ வாரோ நிரத்த²கோதி தீ³பேதி.

2946. காதப்³போ³தி ஜாலேதப்³போ³. ஸோதி தீ³போ. ‘‘த்³வாரம் நாம யஸ்மா மஹாவளஞ்ஜம், தஸ்மா தத்த² ஆபுச்ச²னகிச்சம் நத்தீ²’’தி (சூளவ. அட்ட². 369) வசனதோ தம் அவத்வா ஆபத்திக்கே²த்தமேவ த³ஸ்ஸேதுமாஹ ‘‘வாதபானகவாடானி, த²கேய்ய விவரேய்ய நோ’’தி.

2947. வுட்³ட⁴தோ பரிவத்தயேதி யேன வுட்³டோ⁴, ததோ பரிவத்தயே, பிட்டி²ம் அத³ஸ்ஸேத்வா வுட்³டா⁴பி⁴முகோ² தேன பரிவத்தயேதி அத்தோ². சீவரகண்ணேன வா காயேன வா தம் வுட்³ட⁴ம் ந ச க⁴ட்டயே.

2948. ஏவம் ஸேனாஸனவத்தம் த³ஸ்ஸேத்வா ஜந்தாக⁴ரவத்தம் த³ஸ்ஸேதுமாஹ ‘‘புரதோ’’திஆதி³. தே²ரானம் புரதோ நேவ ந்ஹாயேய்ய, உபரி படிஸோதே ந ச ந்ஹாயேய்ய, ஓதரந்தானம் வுட்³டா⁴னம் உத்தரம் உத்தரந்தோ மக்³க³ம் த³தே³ய்ய, ந க⁴ட்டயே காயேன வா சீவரேன வா ந க⁴ட்டயேய்யாதி யோஜனா.

‘‘திமண்ட³லம் படிச்சா²தே³ந்தேன பரிமண்ட³லம் நிவாஸேத்வா காயப³ந்த⁴னம் ப³ந்தி⁴த்வா’’திஆதி³னா (சூளவ. 364) நயேன வுத்தானம் ப⁴த்தக்³க³வத்தானம் ஸேகி²யகதா²ய வுத்தத்தா ச உபஜ்ஜா²யவத்தாதீ³னம் மஹாக²ந்த⁴ககதா²ய வுத்தத்தா ச அனுமோத³னவத்தானம் ‘‘அனுஜானாமி, பி⁴க்க²வே, ப⁴த்தக்³கே³ சதூஹி பஞ்சஹி தே²ரானுதே²ரேஹி பி⁴க்கூ²ஹி ஆக³மேது’’ந்திஆதி³னா (சூளவ. 362) நயேன ப⁴த்தக்³க³வத்தேயேவ அந்தோக³த⁴பா⁴வேன வுத்தத்தா ச நித்³தே³ஸே தானி ந வுத்தானி, ததா²பி தேஸு அனுமோத³னவத்தம் ஏவம் வேதி³தப்³ப³ம் (சூளவ. அட்ட². 362) – ஸங்க⁴த்தே²ரே அனுமோத³னத்தா²ய நிஸின்னே ஹேட்டா² படிபாடியா சதூஹி நிஸீதி³தப்³ப³ம். அனுதே²ரே நிஸின்னே மஹாதே²ரேன ச ஹேட்டா² ச தீஹி நிஸீதி³தப்³ப³ம். பஞ்சமே நிஸின்னே உபரி சதூஹி நிஸீதி³தப்³ப³ம். ஸங்க⁴த்தே²ரேன ஹேட்டா² த³ஹரபி⁴க்கு²ஸ்மிம் அஜ்ஜி²ட்டே²பி ஸங்க⁴த்தே²ரதோ பட்டா²ய சதூஹி நிஸீதி³தப்³ப³மேவ. ஸசே பன அனுமோத³கோ பி⁴க்கு² ‘‘க³ச்ச²த², ப⁴ந்தே, ஆக³மேதப்³ப³கிச்சம் நத்தீ²’’தி வத³தி, க³ந்தும் வட்டதி. மஹாதே²ரேன ‘‘க³ச்சா²ம, ஆவுஸோ’’தி வுத்தே ‘‘க³ச்ச²தா²’’தி வத³தி, ஏவம்பி வட்டதி. ‘‘ப³ஹிகா³மே ஆக³மேஸ்ஸாமா’’தி ஆபோ⁴க³ம் கத்வாபி ப³ஹிகா³மம் க³ந்த்வா அத்தனோ நிஸ்ஸிதகே ‘‘தும்ஹே தஸ்ஸ ஆக³மனம் ஆக³மேதா²’’தி வத்வாபி க³ந்தும் வட்டதியேவ. ஸசே பன மனுஸ்ஸா அத்தனோ ருசிதேன ஏகேன அனுமோத³னம் காரேந்தி, நேவ தஸ்ஸ அனுமோத³தோ ஆபத்தி, ந ச மஹாதே²ரஸ்ஸ பா⁴ரோ ஹோதி. உபனிஸின்னகதா²யமேவ ஹி மனுஸ்ஸேஸு கதா²பேந்தேஸு மஹாதே²ரோ ஆபுச்சி²தப்³போ³, மஹாதே²ரேன ச அனுமோத³னாய அஜ்ஜி²ட்டோ²வ ஆக³மேதப்³போ³தி இத³மேத்த² லக்க²ணந்தி.

2949. வத்தந்தி யதா²வுத்தம் ஆபி⁴ஸமாசாரிகவத்தம். யதா²ஹ – ‘‘ஆபி⁴ஸமாசாரிகம் அபரிபூரேத்வா ஸீலம் பரிபூரேஸ்ஸதீதி நேதம் டா²னம் விஜ்ஜதீ’’தி. ந விந்த³தீதி ந லப⁴தி.

2950. அனேகக்³கோ³தி விக்கி²த்தத்தாயேவ அஸமாஹிதசித்தோ. ந ச பஸ்ஸதீதி ஞாணசக்கு²னா ந பஸ்ஸதி, த³ட்டு²ம் ஸமத்தோ² ந ஹோதீதி அத்தோ². து³க்கா²தி ஜாதிது³க்கா²தி³து³க்க²தோ.

2951. தஸ்மாதி யஸ்மா து³க்கா² ந பரிமுச்சதி, தஸ்மா. ஓவாத³ம் கத்வா கிம் விஸேஸம் பாபுணாதீதி ஆஹ ‘‘ஓவாத³ம் பு³த்³த⁴ஸேட்ட²ஸ்ஸ, கத்வா நிப்³பா³னமேஹிதீ’’தி. ஏஹிதி பாபுணிஸ்ஸதி.

வத்தக்க²ந்த⁴ககதா²வண்ணனா.