கு²த்³த³கவத்து²க்க²ந்த⁴ககதா²வண்ணனா

2783. குட்டேதி இட்ட²காஸிலாதா³ருகுட்டானம் அஞ்ஞதரஸ்மிம். அட்டானேதி ஏத்த² அட்டானம் நாம ருக்கே² ப²லகம் விய தச்சே²த்வா அட்ட²பதா³காரேன ராஜியோ சி²ந்தி³த்வா நஹானதித்தே² நிக²ணந்தி, தத்த² சுண்ணானி ஆகிரித்வா மனுஸ்ஸா காயம் க⁴ம்ஸந்தி.

2784. க³ந்த⁴ப்³ப³ஹத்தே²னாதி நஹானதித்தே² ட²பிதேன தா³ருமயஹத்தே²ன. தேன கிர சுண்ணானி க³ஹேத்வா மனுஸ்ஸா ஸரீரம் க⁴ம்ஸந்தி. குருவிந்த³கஸுத்தியாதி குருவிந்த³கபாஸாணசுண்ணானி லாகா²ய ப³ந்தி⁴த்வா கதகு³ளிககலாபகோ வுச்சதி, தம் உபோ⁴ஸு அந்தேஸு க³ஹேத்வா ஸரீரம் க⁴ம்ஸந்தி. மல்லகேனாதி மகரத³ந்தகம் சி²ந்தி³த்வா மல்லகமூலஸண்டா²னேன கதேன மல்லகேன, இத³ம் கி³லானஸ்ஸாபி ந வட்டதி. அஞ்ஞமஞ்ஞஞ்ச காயதோதி அஞ்ஞமஞ்ஞம் ஸரீரேன க⁴ம்ஸேய்ய.

2785. அகதம் மல்லகம் நாம மகரத³ந்தே அச்சி²ந்தி³த்வா கதம், இத³ம் அகி³லானஸ்ஸ ந வட்டதி.

2786. கபாலிட்ட²கக²ண்டா³னீதி கபாலக²ண்ட³இட்ட²கக²ண்டா³னி. ஸப்³ப³ஸ்ஸாதி கி³லானாகி³லானஸ்ஸ ஸரீரே க⁴ம்ஸித்வா உப்³ப³ட்டேதும் வட்டதி. ‘‘புது²பாணிக’’ந்தி ஹத்த²பரிகம்மம் வுச்சதி, தஸ்மா ஸப்³ப³ஸ்ஸ ஹத்தே²ன பிட்டி²பரிகம்மம் காதும் வட்டதி. ‘‘வத்த²வட்டீ’’தி இத³ம் பாளியம் வுத்தஉக்காஸிகஸ்ஸ பரியாயம், தஸ்மா நஹாயந்தஸ்ஸ யஸ்ஸ கஸ்ஸசி நஹானஸாடகவட்டியாபி க⁴ம்ஸிதும் வட்டதி.

2787. பே²ணகம் நாம ஸமுத்³த³பே²ணம். கத²லந்தி கபாலக²ண்ட³ம். பாத³க⁴ம்ஸனே வுத்தா அனுஞ்ஞாதா. கதகம் நாம பது³மகண்ணிகாகாரம் பாத³க⁴ம்ஸனத்த²ம் கண்டகே உட்டா²பேத்வா கதம், ஏதம் நேவ படிக்³க³ஹேதும், ந பரிபு⁴ஞ்ஜிதும் வட்டதி.

2788. யம் கிஞ்சிபி அலங்காரந்தி ஹத்தூ²பகா³தி³அலங்காரேஸு யம் கிஞ்சி அலங்காரம்.

2789. ஓஸண்டே²ய்யாதி அலங்காரத்த²ம் ஸங்க²ரோந்தோ நமேய்ய. ஹத்த²ப²ணகேனாதி ஹத்தே²னேவ ப²ணகிச்சம் கரோந்தா அங்கு³லீஹி ஓஸண்டே²ந்தி. ப²ணகேனாதி த³ந்தமயாதீ³ஸு யேன கேனசி. கோச்சே²னாதி உஸிரமயேன வா முஞ்ஜபப்³ப³ஜமயேன வா கோச்சே²ன.

2790. ஸித்த²தேலோத³தேலேஹீதி ஸித்த²தேலஞ்ச உத³கதேலஞ்சாதி விக்³க³ஹோ, தேஹி. தத்த² ஸித்த²தேலம் நாம மது⁴ஸித்த²கனிய்யாஸாதி³ யம் கிஞ்சி சிக்கணம். சிக்கணம் நாம நிய்யாஸம். உத³கதேலம் நாம உத³கமிஸ்ஸகம் தேலம். கத்த²சி போத்த²கேஸு ‘‘ஸிட்டா²’’தி பாடோ², ஸோயேவத்தோ². அனுலோமனிபாதத்த²ந்தி நலாடாபி⁴முக²ம் அனுலோமேன பாதனத்த²ம். உத்³த⁴லோமேனாதி உத்³த⁴க்³க³ம் ஹுத்வா டி²தலோமேன.

2791. ஹத்த²ம் தேலேன தேமேத்வாதி கரதலம் தேலேன மக்கே²த்வா. ஸிரோருஹா கேஸா. உண்ஹாபி⁴தத்தஸ்ஸாதி உண்ஹாபி⁴தத்தரஜஸிரஸ்ஸ. அல்லஹத்தே²ன ஸிரோருஹே புஞ்சி²தும் வட்டதீதி யோஜனா.

2792. ஆதா³ஸே உத³பத்தே வாதி ஏத்த² கம்ஸபத்தாதீ³னிபி, யேஸு முக²னிமித்தம் பஞ்ஞாயதி, ஸப்³பா³னி ஆதா³ஸஸங்க²மேவ க³ச்ச²ந்தி, கஞ்ஜியாதீ³னிபி ச உத³பத்தஸங்க²மேவ, தஸ்மா யத்த² கத்த²சி ஓலோகேந்தஸ்ஸ து³க்கடம்.

2793. யேன ஹேதுனா முக²ம் ஓலோகேந்தஸ்ஸ அனாபத்தி, தம் த³ஸ்ஸேதுமாஹ ‘‘ஸஞ்ச²வி’’ந்திஆதி³. ஆபா³த⁴பச்சயா ‘‘மே முகே² வணோ ஸஞ்ச²வி நு கோ², உதா³ஹு ந ஸஞ்ச²வீ’’தி முக²ம் த³ட்டு²ஞ்ச ‘‘அஹம் ஜிண்ணோ நு கோ², உதா³ஹு நோ’’தி அத்தனோ ஆயுஸங்கா²ரஜானனத்த²ஞ்ச முக²ம் த³ட்டு²ம் வட்டதீதி யோஜனா.

2794. நச்சம் வாதி யம் கிஞ்சி நச்சம் அந்தமஸோ மோரனச்சம்பி. கீ³தந்தி யம் கிஞ்சி நடகீ³தம் வா ஸாது⁴கீ³தம் வா அந்தமஸோ த³ந்தகீ³தம்பி, யம் ‘‘கா³யிஸ்ஸாமா’’தி புப்³ப³பா⁴கே³ ஓகூஜந்தா கரோந்தி, ஏதம்பி ந வட்டதி. வாதி³தந்தி யம் கிஞ்சி வாதி³தம். த³ட்டு²ம் வா பன ஸோதும் வாதி நச்சம் த³ட்டு²ம் வா கீ³தம் வாதி³தம் ஸோதும் வா.

2795. ஸயம் நச்சந்தஸ்ஸ வா நச்சாபேந்தஸ்ஸ வா கா³யந்தஸ்ஸ வா கா³யாபேந்தஸ்ஸ வா வாதே³ந்தஸ்ஸ வா வாதா³பேந்தஸ்ஸ வா து³க்கடமேவ அட்ட²கதா²ய (சூளவ. அட்ட². 248) வுத்தந்தி ததே³கதே³ஸம் த³ஸ்ஸேதுமாஹ ‘‘த³ட்டு²மந்தமஸோ’’திஆதி³.

2796. ஸுணாதீதி கீ³தம் வா வாதி³தம் வா. பஸ்ஸதீதி நச்சம் பஸ்ஸதி.

2797. பஸ்ஸிஸ்ஸாமீதி ஏத்த² ‘‘ஸுணிஸ்ஸாமீ’’தி ஸேஸோ. ‘‘நச்சம் பஸ்ஸிஸ்ஸாமி, கீ³தம், வாதி³தம் வா ஸுணிஸ்ஸாமீ’’தி விஹாரதோ விஹாரம் க³ச்ச²தோ வாபி து³க்கடம் ஹோதீதி யோஜனா.

2798. உட்ட²ஹித்வான க³ச்ச²தோதி ‘‘நச்சம் பஸ்ஸிஸ்ஸாமீ’’தி, ‘‘கீ³தம், வாதி³தம் வா ஸுணிஸ்ஸாமீ’’தி நிஸின்னட்டா²னதோ உட்ட²ஹித்வா அந்தோவிஹாரேபி தம் தம் தி³ஸம் க³ச்ச²தோ ஆபத்தி ஹோதீதி யோஜனா. வீதி²யம் ட²த்வா கீ³வம் பஸாரேத்வா பஸ்ஸதோபி ச ஆபத்தீதி யோஜனா.

2799. தீ³கா⁴தி த்³வங்கு³லதோ தீ³கா⁴. ந தா⁴ரேய்யாதி ந தா⁴ரேதப்³பா³. த்³வங்கு³லம் வா து³மாஸம் வாதி ஏத்த² த்³வே அங்கு³லானி பரிமாணம் ஏதஸ்ஸாதி த்³வங்கு³லோ, கேஸோ. த்³வே மாஸா உக்கட்ட²பரிச்சே²தோ³ அஸ்ஸாதி து³மாஸோ. கேஸம் தா⁴ரேந்தோ த்³வங்கு³லம் வா தா⁴ரேய்ய து³மாஸம் வா. ததோ உத்³த⁴ம் ந வட்டதீதி ததோ த்³வங்கு³லதோ வா து³மாஸதோ வா கேஸதோ உத்³த⁴ம் கேஸம் தா⁴ரேதும் ந வட்டதி.

அத² வா த்³வே அங்கு³லானி ஸமாஹடானி த்³வங்கு³லம், த்³வே மாஸா ஸமாஹடா து³மாஸம், உப⁴யத்த² அச்சந்தஸம்யோகே³ உபயோக³வசனம். கேஸே தா⁴ரேந்தோ த்³வங்கு³லமத்தம் வா தா⁴ரேய்ய து³மாஸமத்தம் வா, ததோ காலபரிமாணதோ உத்³த⁴ம் கேஸே தா⁴ரேதும் ந வட்டதீதி அத்தோ². ஸசே கேஸே அந்தோத்³வேமாஸே த்³வங்கு³லே பாபுணந்தி, அந்தோத்³வேமாஸேயேவ சி²ந்தி³தப்³பா³. த்³வங்கு³லே ஹி அதிக்கமேதும் ந வட்டதி. ஸசேபி ந தீ³கா⁴, த்³வேமாஸதோ ஏகதி³வஸம்பி அதிக்கமேதும் ந லப⁴தியேவ. ஏவமயம் உப⁴யேனபி உக்கட்ட²பரிச்சே²தே³னேவ வுத்தோ, ததோ ஓரம் பன நவட்டனபா⁴வோ நாம நத்தி².

2800. தீ³கே⁴ நகே², தீ³கா⁴னி நாஸிகலோமானி ச ந தா⁴ரயேதி யோஜனா, ந தா⁴ரேய்ய, சி²ந்தே³ய்யாதி அத்தோ². வீஸதிமட்ட²ந்தி வீஸதியா நகா²னம் மட்ட²ம் லிகி²தமட்ட²பா⁴வம் காதும் பி⁴க்கு²னோ ந வட்டதீதி யோஜனா. ஸத்த²கேன தச்சே²த்வா சுண்ணகேன பமஜ்ஜித்வா ப²லிகமணீனம் விய உஜ்ஜலகரணம் லிகி²தமட்ட²ம் நாம. ‘‘அனுஜானாமி, பி⁴க்க²வே, மலமத்தம் அபகட்³டி⁴து’’ந்தி (சூளவ. 274) அனுஞ்ஞாதத்தா முக்³க³ப²லதசாதீ³ஹி நக²மலம் அபனேதும் வட்டதி.

2801. கப்பாபேய்ய விஸும் மஸ்ஸுந்தி யோ கேஸச்சி²ன்னோ விஸும் மஸ்ஸும் கப்பாபேய்ய. தா³டி²கம் ட²பேய்யாதி கேஸே சி²ந்தா³பேத்வா மஸ்ஸும் அகப்பாபேத்வா விஸும் ட²பேய்ய. ஸம்பா³தே⁴தி உபகச்ச²கமுத்தகரணஸங்கா²தே ஸம்பா³த⁴ட்டா²னே. லோமம் ஸம்ஹராபேய்யவாதி ஸத்தே²ன வா ஸண்டா³ஸேன வா அஞ்ஞேன யேன கேனசி பரேன சி²ந்தா³பேய்ய, ஸயம் வா சி²ந்தே³ய்ய. ‘‘அனுஜானாமி, பி⁴க்க²வே, ஆபா³த⁴பச்சயா ஸம்பா³தே⁴ லோமம் ஸம்ஹராபேது’’ந்தி (சூளவ. 275) அனுஞ்ஞாதத்தா யதா²வுத்தஸம்பா³தே⁴ க³ண்ட³பிளகவணாதி³கே ஆபா³தே⁴ ஸதி லோமம் ஸம்ஹராபேதும் வட்டதி.

2802. அகி³லானஸ்ஸ சி²ந்த³தோ து³க்கடம் வுத்தம். அஞ்ஞேன வா புக்³க³லேன ததா² கத்தரியா சி²ந்தா³பேந்தஸ்ஸ து³க்கடம் வுத்தந்தி ஸம்ப³ந்தோ⁴.

2803. ஸேஸங்க³சே²த³னேதி அங்கு³லியாதி³அவஸேஸஸரீராவயவானம் சே²த³னே. அத்தவதே⁴தி அத்துபக்கமேன வா ஆணத்தியா உபக்கமேன வா அத்தனோ ஜீவிதனாஸே.

2804. அங்க³ந்தி அங்க³ஜாததோ அவஸேஸம் ஸரீராவயவம். அஹிகீடாதி³த³ட்ட²ஸ்ஸ தப்படிகாரவஸேன அங்க³ம் சி²ந்த³தோ ந தோ³ஸோ. தாதி³ஸாபா³த⁴பச்சயா தப்படிகாரவஸேன அங்க³ம் சி²ந்த³தோ ந தோ³ஸோ. லோஹிதம் மோசேந்தஸ்ஸாபி ந தோ³ஸோதி யோஜனா.

2805. அபரிஸ்ஸாவனோ பி⁴க்கு² ஸசே மக்³க³ம் க³ச்ச²தி, து³க்கடம். மக்³கே³ அத்³தா⁴னே தம் பரிஸ்ஸாவனம் யாசமானஸ்ஸ யோ ந த³தா³தி, தஸ்ஸ அத³த³தோ அதே³ந்தஸ்ஸாபி ததே²வ து³க்கடமேவாதி யோஜனா. யோ பன அத்தனோ ஹத்தே² பரிஸ்ஸாவனே விஜ்ஜமானேபி யாசதி, தஸ்ஸ ந அகாமா தா³தப்³ப³ம்.

2806. ‘‘நக்³கோ³’’தி பத³ம் ‘‘ந பு⁴ஞ்ஜே’’திஆதி³ கிரியாபதே³ஹி பச்சேகம் யோஜேதப்³ப³ம். ந பு⁴ஞ்ஜேதி ப⁴த்தாதி³ம் பு⁴ஞ்ஜிதப்³ப³ம் ந பு⁴ஞ்ஜேய்ய. ந பிவேதி யாகு³ஆதி³ம் பாதப்³ப³ம் ந பிவேய்ய. ந ச கா²தே³தி மூலகா²த³னீயாதி³கம் கா²த³னீயம் ந கா²தே³ய்ய. ந ஸாயயேதி பா²ணிதாதி³கம் ஸாயிதப்³ப³ஞ்ச ந ஸாயேய்ய ந லிஹேய்ய. ந த³தே³தி அஞ்ஞஸ்ஸ ப⁴த்தாதி³ம் கிஞ்சி ந த³தே³ய்ய. ந க³ண்ஹேய்யாதி ததா² ஸயம் நக்³கோ³ ஹுத்வா ந படிக்³க³ண்ஹேய்ய. அஞ்ஜஸம் மக்³க³ம்.

2807. பரிகம்மம் ந காதப்³ப³ந்தி பிட்டி²பரிகம்மாதி³பரிகம்மம் ந காதப்³ப³ம். காரயேதி ஸயம் நக்³கோ³ ஹுத்வா அஞ்ஞேன பிட்டி²பரிகம்மாதி³பரிகம்மம் ந காராபேய்யாதி அத்தோ².

2808. பிட்டி²கம்மாதி³கே பரிகம்மே ஜந்தாக⁴ராதி³கா திஸ்ஸோ படிச்சா²தீ³ வுத்தா ‘‘அனுஜானாமி, பி⁴க்க²வே, திஸ்ஸோ படிச்சா²தி³யோ ஜந்தாக⁴ரபடிச்சா²தி³ம் உத³கபடிச்சா²தி³ம் வத்த²படிச்சா²தி³’’ந்தி (சூளவ. 261) அனுஞ்ஞாதாதி யோஜனா. படிச்சா²தே³தி ஹிரிகோபினந்தி படிச்சா²தி³, ஜந்தாக⁴ரமேவ படிச்சா²தி³ ஜந்தாக⁴ரபடிச்சா²தி³. உத³கமேவ படிச்சா²தி³ உத³கபடிச்சா²தி³. வத்த²மேவ படிச்சா²தி³ வத்த²படிச்சா²தி³. ‘‘ஸப்³ப³த்த² பன வட்டதீ’’தி இமினா இதரபடிச்சா²தி³த்³வயம் பரிகம்மேயேவ வட்டதீதி தீ³பேதி. ஸப்³ப³த்தா²தி போ⁴ஜனாதி³ஸப்³ப³கிச்சேஸு.

2809. யத்த² கத்த²சி பேளாயந்தி தம்ப³லோஹவட்டலோஹகம்ஸலோஹகாளலோஹஸுவண்ணரஜதாதீ³ஹி கதாய வா தா³ருமயாய வா யாய காயசி பேளாய ஆஸித்தகூபதா⁴னே. பு⁴ஞ்ஜிதும் ந ச வட்டதீதி பா⁴ஜனம் ட²பேத்வா பு⁴ஞ்ஜிதும் ந வட்டதி. யதா²ஹ – ‘‘ஆஸித்தகூபதா⁴னம் நாம தம்ப³லோஹேன வா ரஜதேன வா கதாய பேளாய ஏதம் அதி⁴வசனம், ‘ந பி⁴க்க²வே ஆஸித்தகூபதா⁴னே பு⁴ஞ்ஜிதப்³ப³’ந்தி ஸாமஞ்ஞேன படிக்கி²த்தத்தா பன தா³ருமயாபி ந வட்டதீ’’தி (சூளவ. அட்ட². 264). ‘‘அனுஜானாமி பி⁴க்க²வே மளோரிக’’ந்தி (சூளவ. 264) அனுஞ்ஞாதத்தா மளோரிகாய ட²பேத்வா பு⁴ஞ்ஜிதும் வட்டதி. ‘‘மளோரிகா’’தி ச த³ண்டா³தா⁴ரகோ வுச்சதி, யம் தயோ, சத்தாரோ, ப³ஹூ வா த³ண்ட³கே உபரி ச ஹேட்டா² ச வித்த²தம் மஜ்ஜே² ஸங்குசிதம் கத்வா ப³ந்தி⁴த்வா ஆதா⁴ரகம் கரோந்தி. யட்டி²ஆதா⁴ரகபண்ணாதா⁴ரகபச்சி²கபிட்ட²க⁴டககவாடகாதி³பா⁴ஜனமுக²உது³க்க²லாதீ³னிபி ஏத்தே²வ ஸங்க³ஹம் க³ச்ச²ந்தி. யட்டி²ஆதா⁴ரகோதி யட்டி²ம்யேவ உஜுகம் ட²பேத்வா ப³ந்தீ⁴கதஆதா⁴ரகோ.

ஏகபா⁴ஜனே விஸும் விஸும் போ⁴ஜனஸ்ஸாபி ஸம்ப⁴வதோ ‘‘பு⁴ஞ்ஜதோ ஏகபா⁴ஜனே’’தி ஏத்தகேயேவ வுத்தே தஸ்ஸாபி பஸங்கோ³ ஸியாதி தன்னிவத்தனத்த²மாஹ ‘‘ஏகதோ’’தி. ‘‘பு⁴ஞ்ஜதோ’’தி இத³ம் உபலக்க²ணம். ஏகதோ ஏகபா⁴ஜனே யாகு³ஆதி³பானம்பி ந வட்டதி. யதா²ஹ – ‘‘ந, பி⁴க்க²வே, ஏகதா²லகே பாதப்³ப³’’ந்தி (சூளவ. 264). அத² வா பு⁴ஞ்ஜதோதி அஜ்ஜோ²ஹாரஸாமஞ்ஞேன பானம்பி ஸங்க³ஹிதந்தி வேதி³தப்³ப³ம். அயமேத்த² வினிச்ச²யோ – ஸசே ஏகோ பி⁴க்கு² பா⁴ஜனதோ ப²லம் வா பூவம் வா க³ஹேத்வா க³ச்ச²தி, தஸ்மிம் அபக³தே இதரஸ்ஸ ஸேஸகம் பு⁴ஞ்ஜிதும் வட்டதி. இதரஸ்ஸாபி தஸ்மிம் க²ணே புன க³ஹேதும் வட்டதீதி.

2810. யே த்³வே வா தயோ வா பி⁴க்கூ² ஏகபாவுரணா வா ஏகத்த²ரணா வா ஏகத்த²ரணபாவுரணா வா நிபஜ்ஜந்தி, தேஸஞ்ச, யே ஏகமஞ்சேபி ஏகதோ நிபஜ்ஜந்தி, தேஸஞ்ச ஆபத்தி து³க்கடம் ஹோதீதி யோஜனா.

2811. ஸங்கா⁴டிபல்லத்தி²கமுபாக³தோதி ஏத்த² ஸங்கா⁴டீதி ஸங்கா⁴டினாமேன அதி⁴ட்டி²தசீவரமாஹ. ஸங்கா⁴டிபல்லத்தி²கம் உபக³தேன யுத்தோ ஹுத்வாதி அத்தோ². ந நிஸீதே³ய்யாதி விஹாரே வா அந்தரக⁴ரே வா யத்த² கத்த²சி ந நிஸீதே³ய்ய. ‘‘ஸங்கா⁴டீதி நாமேன அதி⁴ட்டி²தசீவரவோஹாரப்பத்தமதி⁴ட்டி²தசீவரம் ‘ஸங்கா⁴டீ’தி வுத்த’’ந்தி நிஸ்ஸந்தே³ஹே, கு²த்³த³ஸிக்கா²வண்ணனாயம்பி ‘‘ஸங்கா⁴டியா ந பல்லத்தே²தி அதி⁴ட்டி²தசீவரேன விஹாரே வா அந்தரக⁴ரே வா பல்லத்தி²கோ ந காதப்³போ³’’தி வுத்தம். அட்ட²கதா²யம் பன ‘‘அந்தோகா³மே வாஸத்தா²ய உபக³தேன அதி⁴ட்டி²தம் ஸங்கா⁴டிம் வினா ஸேஸசீவரேஹி பல்லத்தி²காய நிஸீதி³தும் வட்டதீ’’தி வுத்தம்.

கிஞ்சி கீளம் ந கீளேய்யாதி ஜுதகீளாதி³கம் யம் கிஞ்சி காயிகவாசஸிககீளிகம் ந கீளேய்ய. ந ச கா³ஹயேதி ந ச கா³ஹாபேய்ய, ந ஹராபேய்யாதி அத்தோ².

2812. தா³டி²காயபீதி மஸ்ஸும்ஹி. உக்³க³தந்தி ஏத்த² ‘‘பீ³ப⁴ச்ச²’’ந்தி ஸேஸோ. அஞ்ஞந்தி அபலிதம். தாதி³ஸந்தி பீ³ப⁴ச்ச²ம்.

2813. ‘‘அகி³லானோ’’தி இமினா கி³லானஸ்ஸ அனாபத்திபா⁴வம் தீ³பேதி. ‘‘தா⁴ரேய்யா’’தி இமினா ஸுத்³த⁴கத்துனித்³தே³ஸேன அகி³லானஸ்ஸபி பரம் தா⁴ராபனே, பரஸ்ஸ தா⁴ரணஸாதி³யனே ச அனாபத்தீதி விஞ்ஞாயதீதி. அத்தனோ கு³த்தத்த²ம், சீவராதீ³னம் கு³த்தத்த²ஞ்ச வட்டதீதி யோஜனா. தத்ராயம் வினிச்ச²யோ (சூளவ. அட்ட². 270) – யஸ்ஸ காயதா³ஹோ வா பித்தகோபோ வா ஹோதி, சக்கு² வா து³ப்³ப³லம், அஞ்ஞோ வா கோசி ஆபா³தோ⁴ வினா ச²த்தேன உப்பஜ்ஜதி, தஸ்ஸ கா³மே வா அரஞ்ஞே வா ச²த்தம் வட்டதி. வாளமிக³சோரப⁴யேஸு அத்தகு³த்தத்த²ம், வஸ்ஸே பன சீவரகு³த்தத்த²ம்பி வட்டதி. ஏகபண்ணச்ச²த்தம் பன ஸப்³ப³த்தே²வ வட்டதி. ‘‘ஏகபண்ணச்ச²த்தம் நாம தாலபத்த’’ந்தி க³ண்டி²பதே³ஸு வுத்தந்தி.

2814. ஹத்தி²ஸோண்டா³காரோ அபே⁴தோ³பசாரேன ‘‘ஹத்தி²ஸோண்ட³’’ந்தி வுத்தோ. ஏவமுபரிபி. சீவரஸ்ஸ நாமதே⁴ய்யம் ‘‘வஸன’’ந்தி இத³ம். ‘‘நிவாஸேந்தஸ்ஸ து³க்கட’’ந்தி பத³த்³வயஞ்ச ‘‘ஹத்தி²ஸோண்ட³’’ந்திஆதீ³ஹி ஸப்³ப³பதே³ஹி பச்சேகம் யோஜேதப்³ப³ம். வேல்லியந்தி ஏத்த² கா³தா²ப³ந்த⁴வஸேன ஸம்-ஸத்³த³லோபோ, ஸம்வேல்லியந்தி அத்தோ².

ஏத்த² ஹத்தி²ஸோண்ட³ம் (சூளவ. அட்ட². 280) நாம நாபி⁴மூலதோ ஹத்தி²ஸோண்ட³ஸண்டா²னம் ஓலம்ப³கம் கத்வா நிவத்த²ம் சோளிகித்தீ²னம் நிவாஸனம் விய. சதுக்கண்ணம் நாம உபரிதோ த்³வே, ஹேட்ட²தோ த்³வேதி ஏவம் சத்தாரோ கண்ணே த³ஸ்ஸேத்வா நிவத்த²ம். மச்ச²வாளகம் நாம ஏகதோ த³ஸந்தம் ஏகதோ பாஸந்தம் ஓலம்பே³த்வா நிவத்த²ம். ஸம்வேல்லியந்தி மல்லகம்மகாராத³யோ விய கச்ச²ம் ப³ந்தி⁴த்வா நிவாஸனம். தாலவண்டகம் நாம தாலவண்டாகாரேன ஸாடகம் ஓலம்பே³த்வா நிவாஸனம். ச-ஸத்³தே³ன ஸதவலிகம் ஸங்க³ண்ஹாதி. ஸதவலிகம் நாம தீ³க⁴ஸாடகம் அனேகக்க²த்தும் ஓப⁴ஞ்ஜித்வா ஓவட்டிகம் கரோந்தேன நிவத்த²ம், வாமத³க்கி²ணபஸ்ஸேஸு வா நிரந்தரம் வலியோ த³ஸ்ஸேத்வா நிவத்த²ம். ஸசே பன ஜாணுதோ பட்டா²ய ஏகா வா த்³வே வா வலியோ பஞ்ஞாயந்தி, வட்டதி. ஏவம் நிவாஸேதும் கி³லானஸ்ஸபி மக்³க³படிபன்னஸ்ஸபி ந வட்டதி.

யம்பி மக்³க³ம் க³ச்ச²ந்தா ஏகம் வா த்³வே வா கோணே உக்கி²பித்வா அந்தரவாஸகஸ்ஸ உபரி லக்³கே³ந்தி, அந்தோ வா ஏகம் காஸாவம் ததா² நிவாஸேத்வா ப³ஹி அபரம் நிவாஸேந்தி, ஸப்³ப³ம் ந வட்டதி. கி³லானோ பன அந்தோகாஸாவஸ்ஸ ஓவட்டிகம் த³ஸ்ஸேத்வா அபரம் உபரி நிவாஸேதும் லப⁴தி. அகி³லானேன த்³வே நிவாஸேந்தேன ஸகு³ணம் கத்வா நிவாஸேதப்³பா³னி. இதி யஞ்ச இத⁴ படிக்கி²த்தம், யஞ்ச ஸேகி²யவண்ணனாயம், தம் ஸப்³ப³ம் வஜ்ஜேத்வா நிப்³பி³காரம் திமண்ட³லம் படிச்சா²தே³ந்தேன பரிமண்ட³லம் நிவாஸேதப்³ப³ம். யம் கிஞ்சி விகாரம் கரோந்தோ து³க்கடா ந முச்சதி.

2815. கி³ஹிபாருபனந்தி ‘‘ஸேதபடபாருதம் (சூளவ. அட்ட². 280) பரிப்³பா³ஜகபாருதம் ஏகஸாடகபாருதம் ஸோண்ட³பாருதம் அந்தேபுரிகபாருதம் மஹாஜேட்ட²கபாருதம் குடிபவேஸகபாருதம் ப்³ராஹ்மணபாருதம் பாளிகாரகபாருத’’ந்தி ஏவமாதி³பரிமண்ட³லலக்க²ணதோ அஞ்ஞதா² பாருதம், ஸப்³ப³மேதம் கி³ஹிபாருதம் நாம. தஸ்மா யதா² ஸேதபடா அட்³ட⁴பாலகனிக³ண்டா² பாருபந்தி, யதா² ச ஏகச்சே பரிப்³பா³ஜகா உரம் விவரித்வா த்³வீஸு அம்ஸகூடேஸு பாவுரணம் ட²பேந்தி, யதா² ச ஏகஸாடகா மனுஸ்ஸா நிவத்த²ஸாடகஸ்ஸ ஏகேனந்தேன பிட்டி²ம் பாருபித்வா உபோ⁴ கண்ணே உபோ⁴ஸு அம்ஸகூடேஸு ட²பேந்தி, யதா² ச ஸுராஸோண்டா³த³யோ ஸாடகேன கீ³வம் பரிக்கி²பந்தா உபோ⁴ அந்தே உத³ரே வா ஓலம்பே³ந்தி, பிட்டி²யம் வா கி²பந்தி, யதா² ச அந்தேபுரிகாயோ அக்கி²தாரகமத்தம் த³ஸ்ஸேத்வா ஓகு³ண்டி²கம் பாருபந்தி, யதா² ச மஹாஜேட்டா² தீ³க⁴ஸாடகம் நிவாஸேத்வா தஸ்ஸேவ ஏகேனந்தேன ஸகலஸரீரம் பாருபந்தி, யதா² ச கஸ்ஸகா கே²த்தகுடிம் பவிஸந்தா ஸாடகம் பலிவேடே²த்வா உபகச்ச²கே பக்கி²பித்வா தஸ்ஸேவ ஏகேனந்தேன ஸரீரம் பாருபந்தி, யதா² ச ப்³ராஹ்மணா உபி⁴ன்னம் உபகச்ச²கானம் அந்தரேன ஸாடகம் பவேஸேத்வா அம்ஸகூடேஸு பக்கி²பந்தி, யதா² ச பாளிகாரகோ பி⁴க்கு² ஏகம்ஸபாருபனேன பாருதம் வாமபா³ஹம் விவரித்வா சீவரம் அம்ஸகூடம் ஆரோபேதி, ஏவம் அபாருபித்வா ஸப்³பே³பி ஏதே, அஞ்ஞே ச ஏவரூபே பாருபனதோ³ஸே வஜ்ஜேத்வா நிப்³பி³காரம் பரிமண்ட³லம் பாருபிதப்³ப³ம். ததா² அபாருபித்வா ஆராமே வா அந்தரக⁴ரே வா அனாத³ரேன யம் கிஞ்சி விகாரம் கரோந்தஸ்ஸ து³க்கடம். பரிமண்ட³லதோ விமுத்தலக்க²ணனிவாஸனபாருபனதோ³ஸே வஜ்ஜேத்வா பரிமண்ட³லபா⁴வோயேவ வுத்தலக்க²ணோ அதி⁴ப்பேதோதி அத்தோ².

2816. லோகாயதம் ந வாசேய்யாதி ‘‘ஸப்³ப³ம் உச்சி²ட்ட²ம், ஸப்³ப³ம் அனுச்சி²ட்ட²ம், ஸேதோ காகோ, காளோ ப³கோ இமினா ச இமினா ச காரணேனா’’தி ஏவமாதி³னிரத்த²ககாரணபடிஸம்யுத்தம் தித்தி²யஸத்த²ம் அஞ்ஞேஸம் ந வாசேய்ய. ந ச தம் பரியாபுணேதி தம் லோகாயதம் ந ச பரியாபுணேய்ய ந உக்³க³ண்ஹேய்ய. திரச்சா²னவிஜ்ஜாதி ஹத்தி²ஸிப்பஅஸ்ஸஸிப்பத⁴னுஸிப்பாதி³கா பரோபகா⁴தகரா விஜ்ஜா ச. பி⁴க்கு²னா ந பரியாபுணிதப்³பா³, ந வாசேதப்³பா³தி யோஜனா.

2817. ஸப்³பா³சாமரிபீ³ஜனீதி ஸேதாதி³வண்ணேஹி ஸப்³பே³ஹி சமரவாலேஹி கதா பீ³ஜனீ. ந சாலிம்பேய்ய தா³யம் வாதி த³வடா³ஹாதி³உபத்³த³வனிவாரணாய அனுஞ்ஞாதம் படக்³கி³தா³னகாரணம் வினா அரஞ்ஞம் அக்³கி³னா ந ஆலிம்பேய்ய. த³வடா³ஹே பன ஆக³ச்ச²ந்தே அனுபஸம்பன்னே அஸதி படக்³கி³ம் தா³தும், அப்பஹரிதகரணேன வா பரிகா²க²ணனேன வா பரித்தாணம் காதும், ஸேனாஸனம் பத்தம் வா அப்பத்தம் வா அக்³கி³ம் அல்லஸாக²ம் ப⁴ஞ்ஜித்வா நிப்³பா³பேதுஞ்ச லப⁴தி. உத³கேன பன கப்பியேனேவ லப⁴தி, நேதரேன. அனுபஸம்பன்னே பன ஸதி தேனேவ கப்பியவோஹாரேன காராபேதப்³ப³ம். முக²ம் ந ச லஞ்ஜேதி மனோஸிலாதி³னா முக²ம் ந லிம்பேய்ய, திலகேன அங்க³ம் ந கரேய்யாதி அத்தோ².

2818. உப⁴தோகாஜந்தி உப⁴தோகோடியா பா⁴ரவஹனகோடிகாஜம். அந்தரகாஜகந்தி உப⁴யகோடியா டி²தவாஹகேஹி வஹிதப்³ப³ம் மஜ்ஜே²பா⁴ரயுத்தகாஜம். ஸீஸக்க²ந்த⁴கடிபா⁴ராத³யோ ஹேட்டா² வுத்தலக்க²ணாவ.

2819. யோ பி⁴க்கு² வட்³ட⁴கிஅங்கு³லேன அட்ட²ங்கு³லாதி⁴கம் வா தேனேவ அங்கு³லேன சதுரங்கு³லபச்சி²மம் வா த³ந்தகட்ட²ம் கா²த³தி, ஏவம் கா²த³தோ தஸ்ஸ ஆபத்தி து³க்கடம் ஹோதீதி யோஜனா.

2820. கிச்சே ஸதிபீதி ஸுக்க²கட்டா²தி³க்³க³ஹணகிச்சே பன ஸதி. போரிஸந்தி புரிஸப்பமாணம், ப்³யாமமத்தந்தி வுத்தம் ஹோதி. ஆபதா³ஸூதி வாளமிகா³த³யோ வா தி³ஸ்வா மக்³க³மூள்ஹோ வா தி³ஸா ஓலோகேதுகாமோ ஹுத்வா த³வடா³ஹம் வா உத³கோக⁴ம் வா ஆக³ச்ச²ந்தம் தி³ஸ்வா வா ஏவரூபாஸு ஆபதா³ஸு. வட்டதேவாபி⁴ரூஹிதுந்தி அதிஉச்சம்பி ருக்க²ம் ஆரோஹிதும் வட்டதி ஏவ.

2821. ஸசே அகல்லகோ கி³லானோ ந ஸியா, லஸுணம் மாக³த⁴ம் ஆமகம் ப⁴ண்டி³கலஸுணம் ந ச கா²தே³ய்ய நேவ பரிபு⁴ஞ்ஜேய்யாதி யோஜனா. ப⁴ண்டி³கலஸுணம் நாம சதுமிஞ்ஜதோ பட்டா²ய ப³ஹுமிஞ்ஜம். பலண்டு³கப⁴ஞ்ஜனகாதி³லஸுணே மக³தே⁴ஸு ஜாதத்தேபி ந தோ³ஸோ. லஸுணவிபா⁴கோ³ ஹேட்டா² த³ஸ்ஸிதோயேவ. கி³லானஸ்ஸ பன லஸுணம் கா²தி³தும் வட்டதி. யதா²ஹ – ‘‘அனுஜானாமி, பி⁴க்க²வே, ஆபா³த⁴பச்சயா லஸுணம் கா²தி³து’’ந்தி (சூளவ. 289). ஆபா³த⁴பச்சயாதி யஸ்ஸ ஆபா³த⁴ஸ்ஸ லஸுணம் பே⁴ஸஜ்ஜம் ஹோதி, தப்பச்சயாதி அத்தோ². பு³த்³த⁴வசனந்தி ஸங்கீ³தித்தயாருள்ஹா பிடகத்தயபாளி. அஞ்ஞதா²தி ஸக்கடாதி³க²லிதவசனமயம் வாசனாமக்³க³ம் ந ரோபேதப்³ப³ம், ததா² ந ட²பேதப்³ப³ந்தி வுத்தம் ஹோதி.

2822. கி²பிதேதி யேன கேனசி கி²பிதே. ‘‘ஜீவா’’தி ந வத்தப்³ப³ந்தி யோஜனா. பி⁴க்கு²னா கி²பிதே கி³ஹினா ‘‘ஜீவதா²’’தி வுத்தேன புன ‘‘சிரம் ஜீவா’’தி வத்தும் வட்டதீதி யோஜனா. ‘‘சிர’’ந்தி பதே³ ஸதிபி வட்டதி.

2823. ஆகோடேந்தஸ்ஸாதி காயேன வா காயபடிப³த்³தா⁴தீ³ஹி வா பஹரந்தஸ்ஸ. புப்ப²ஸம்கிண்ணேதி புப்ப²ஸந்த²தே.

2824. ந்ஹாபிதா புப்³ப³கா ஏதஸ்ஸாதி ந்ஹாபிதபுப்³ப³கோ, ந்ஹாபிதஜாதிகோதி அத்தோ². கு²ரப⁴ண்ட³ந்தி ந்ஹாபிதபரிக்கா²ரம். ந க³ண்ஹேய்யாதி ந பரிஹரேய்ய. ஸசே யோ ந்ஹாபிதஜாதிகோ ஹோதி, ஸோ கு²ரப⁴ண்ட³ம் க³ஹேத்வா ந ஹரேய்யாதி அத்தோ². அஞ்ஞஸ்ஸ ஹத்த²தோ க³ஹேத்வா கேஸச்சே²தா³தி³ காதும் வட்டதி. உண்ணீதி கேஸகம்ப³லம் வினா உண்ணமயா பாவுரணஜாதி. ‘‘கோ³னகம் குத்தகம் சித்தக’’மிச்சாதி³னா வுத்தபே⁴த³வந்ததாய ஆஹ ‘‘ஸப்³பா³’’தி. உண்ணமயம் அந்தோகரித்வா பாருபிதும் வட்டதீதி ஆஹ ‘‘பா³ஹிரலோமிகா’’தி. யதா²ஹ – ‘‘ந, பி⁴க்க²வே, பா³ஹிரலோமீ உண்ணீதா⁴ரேதப்³பா³’’தி (சூளவ. 249). ஸிக்கா²பத³ட்ட²கதா²யம் ‘‘உண்ணலோமானி ப³ஹி கத்வா உண்ணபாவாரம் பாருபந்தி, ததா² தா⁴ரேந்தஸ்ஸ து³க்கடம். லோமானி அந்தோ கத்வா பாருபிதும் வட்டதீ’’தி (சூளவ. அட்ட². 249).

2825. அங்க³ராக³ம் நாம குங்குமாதி³. கரோந்தஸ்ஸாதி அப்³ப⁴ஞ்ஜந்தஸ்ஸ. அகாயப³ந்த⁴னஸ்ஸ கா³மம் பவிஸதோபி து³க்கடம் ஸமுதீ³ரிதந்தி யோஜனா. ஏத்த² ச அஸதியா அப³ந்தி⁴த்வா நிக்க²ந்தேன யத்த² ஸரதி, தத்த² ப³ந்தி⁴தப்³ப³ம். ‘‘ஆஸனஸாலாய ப³ந்தி⁴ஸ்ஸாமீ’’தி க³ந்தும் வட்டதி. ஸரித்வா யாவ ந ப³ந்த⁴தி, ந தாவ பிண்டா³ய சரிதப்³ப³ம்.

2826. ஸப்³ப³ம் ஆயுத⁴ம் வினா ஸப்³ப³ம் லோஹஜம் லோஹமயப⁴ண்ட³ஞ்ச பத்தம், ஸங்கமனீயபாது³கம், யதா²வுத்தலக்க²ணம் பல்லங்கம், ஆஸந்தி³ஞ்ச வினா ஸப்³ப³ம் தா³ருஜம் தா³ருமயப⁴ண்ட³ஞ்ச வுத்தலக்க²ணமேவ கதகம், கும்ப⁴காரிகம் த⁴னியஸ்ஸேவ ஸப்³ப³மத்திகாமயம் குடிஞ்ச வினா ஸப்³ப³ம் மத்திகாமயம் ப⁴ண்ட³ஞ்ச கப்பியந்தி யோஜனா.

கு²த்³த³கவத்து²க்க²ந்த⁴ககதா²வண்ணனா.