பாரிவாஸிகக்க²ந்த⁴ககதா²வண்ணனா

2748. ஏவம் மஹாவக்³க³வினிச்ச²யம் ஸங்கே²பேன த³ஸ்ஸேத்வா சூளவக்³கா³க³தவினிச்ச²யம் த³ஸ்ஸேதுமாஹ ‘‘தஜ்ஜனீய’’ந்திஆதி³. தஜ்ஜனீயந்தி கலஹகாரகானம் பி⁴க்கூ²னம் ததோ விரமனத்தா²ய நிக்³க³ஹவஸேன அனுஞ்ஞாதம் ஞத்திசதுத்த²ம் தஜ்ஜனீயகம்மஞ்ச. நியஸ்ஸந்தி பா³லஸ்ஸ அப்³யத்தஸ்ஸ ஆபத்திப³ஹுலஸ்ஸ அனபதா³னஸ்ஸ அனனுலோமிகேஹி கி³ஹிஸம்ஸக்³கே³ஹி ஸம்ஸட்ட²ஸ்ஸ விஹரதோ பி⁴க்கு²னோ நிக்³க³ஹவஸேன நிஸ்ஸாய வஸனத்தா²ய காதும் அனுஞ்ஞாதம் ஞத்திசதுத்த²ம் நியஸ்ஸகம்மஞ்ச.

பப்³பா³ஜந்தி குலதூ³ஸகஸ்ஸ பி⁴க்கு²னோ யத்த² தேன குலதூ³ஸனம் கதம், தத்த² ந லபி⁴தப்³ப³ஆவாஸத்தா²ய நிக்³க³ஹவஸேன அனுஞ்ஞாதம் ஞத்திசதுத்த²ம் பப்³பா³ஜனீயகம்மஞ்ச. படிஸாரணந்தி ஸத்³த⁴ஸ்ஸ உபாஸகஸ்ஸ தா³யகஸ்ஸ காரகஸ்ஸ ஸங்கு⁴பட்டா²கஸ்ஸ ஜாதிஆதீ³ஹி அக்கோஸவத்தூ²ஹி அக்கோஸகஸ்ஸ பி⁴க்கு²னோ தம்க²மாபனத்தா²ய நிக்³க³ஹவஸேன அனுஞ்ஞாதம் ஞத்திசதுத்த²ம் படிஸாரணீயகம்மஞ்ச.

திவிது⁴க்கே²பனந்தி ஆபத்தியா அத³ஸ்ஸனே, ஆபத்தியா அப்படிகம்மே, பாபிகாய தி³ட்டி²யா அப்படினிஸ்ஸக்³கே³ ச ததோ ஓரமிதும் நிக்³க³ஹவஸேன அனுஞ்ஞாதம் ஞத்திசதுத்த²ம் திவித⁴ம் உக்கே²பனீயகம்மஞ்சாதி. தீ³பயேதி பாளியா, அட்ட²கதா²ய ச வுத்தனயேன பகாஸேய்யாதி அத்தோ².

தஜ்ஜனீயாதி³கம்மானம் ஓஸாரணனிஸ்ஸாரணவஸேன பச்சேகம் து³வித⁴த்தேபி தம் பே⁴த³ம் அனாமஸித்வா கேவலம் ஜாதிவஸேன ‘‘ஸத்த கம்மானீ’’தி வுத்தந்தி வேதி³தப்³ப³ம். யதா² த³ஸ்ஸிதோ பனேதேஸம் விஸேஸோ அத்து²ப்பத்திவஸேனாதி த³ட்ட²ப்³போ³. வித்தா²ரோ பனேஸம் கம்மக்க²ந்த⁴கதோ வேதி³தப்³போ³.

2749. க²ந்த⁴கே கம்மஸங்கா²தே க²ந்த⁴கே ஆக³தானி தேசத்தாலீஸ வத்தானி. தத³னந்தரேதி தஸ்ஸ கம்மக்க²ந்த⁴கஸ்ஸ அனந்தரே. க²ந்த⁴கேதி பாரிவாஸிகக்க²ந்த⁴கே. நவ அதி⁴கானி யேஸம் தே நவாதி⁴கானி திம்ஸேவ வத்தானி, ஏகூனசத்தாலீஸ வத்தானீதி வுத்தம் ஹோதி.

கம்மக்க²ந்த⁴கே தாவ –

‘‘ஆபத்தியா அத³ஸ்ஸனே உக்கே²பனீயகம்மகதேன, பி⁴க்க²வே, பி⁴க்கு²னா ஸம்மா வத்திதப்³ப³ம். தத்ராயம் ஸம்மாவத்தனா – ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேனாபி பி⁴க்கு²னியோ ந ஓவதி³தப்³பா³, யாய ஆபத்தியா ஸங்கே⁴ன ஆபத்தியா அத³ஸ்ஸனே உக்கே²பனீயகம்மம் கதம் ஹோதி, ஸா ஆபத்தி ந ஆபஜ்ஜிதப்³பா³, அஞ்ஞா வா தாதி³ஸிகா, ததோ வா பாபிட்ட²தரா, கம்மம் ந க³ரஹிதப்³ப³ம், கம்மிகா ந க³ரஹிதப்³பா³, ந பகதத்தஸ்ஸ பி⁴க்கு²னோ அபி⁴வாத³னம் பச்சுட்டா²னம் அஞ்ஜலிகம்மம் ஸாமீசிகம்மம் ஆஸனாபி⁴ஹாரோ ஸேய்யாபி⁴ஹாரோ பாதோ³த³கம் பாத³பீட²ம் பாத³கத²லிகம் பத்தசீவரபடிக்³க³ஹணம் நஹானே பிட்டி²பரிகம்மம் ஸாதி³தப்³ப³ம், ந பகதத்தோ பி⁴க்கு² ஸீலவிபத்தியா அனுத்³த⁴ம்ஸேதப்³போ³, ந ஆசாரவிபத்தியா அனுத்³த⁴ம்ஸேதப்³போ³, ந தி³ட்டி²விபத்தியா அனுத்³த⁴ம்ஸேதப்³போ³, ந ஆஜீவவிபத்தியா அனுத்³த⁴ம்ஸேதப்³போ³, ந பி⁴க்கு² பி⁴க்கூ²ஹி பே⁴தே³தப்³போ³, ந கி³ஹித்³த⁴ஜோ தா⁴ரேதப்³போ³, ந தித்தி²யத்³த⁴ஜோ தா⁴ரேதப்³போ³, ந தித்தி²யா ஸேவிதப்³பா³, பி⁴க்கூ² ஸேவிதப்³பா³, பி⁴க்கு²ஸிக்கா²ய ஸிக்கி²தப்³ப³ம், ந பகதத்தேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³ம், ந ஏகச்ச²ன்னே அனாவாஸே வத்த²ப்³ப³ம், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ம், பகதத்தம் பி⁴க்கு²ம் தி³ஸ்வா ஆஸனா வுட்டா²தப்³ப³ம், ந பகதத்தோ பி⁴க்கு² ஆஸாதே³தப்³போ³ அந்தோ வா ப³ஹி வா, ந பகதத்தஸ்ஸ பி⁴க்கு²னோ உபோஸதோ² ட²பேதப்³போ³, ந பவாரணா ட²பேதப்³பா³, ந ஸவசனீயம் காதப்³ப³ம், ந அனுவாதோ³ பட்ட²பேதப்³போ³, ந ஓகாஸோ காரேதப்³போ³, ந சோதே³தப்³போ³, ந ஸாரேதப்³போ³, ந பி⁴க்கூ²ஹி ஸம்பயோஜேதப்³ப³’’ந்தி (சூளவ. 51) –

ஏவம் சேதானி தேசத்தாலீஸ வத்தானி ஸந்தா⁴ய வுத்தம் ‘‘தேசத்தாலீஸ வத்தானி, க²ந்த⁴கே கம்மஸஞ்ஞிதே’’தி.

பாரிவாஸிகக்க²ந்த⁴கே (சூளவ. 76-82) –

‘‘பாரிவாஸிகேன, பி⁴க்க²வே, பி⁴க்கு²னா ஸம்மா வத்திதப்³ப³ம். தத்ராயம் ஸம்மாவத்தனா – ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேனபி பி⁴க்கு²னியோ ந ஓவதி³தப்³பா³, யாய ஆபத்தியா ஸங்கே⁴ன பரிவாஸோ தி³ன்னோ ஹோதி, ஸா ஆபத்தி ந ஆபஜ்ஜிதப்³பா³, அஞ்ஞா வா தாதி³ஸிகா, ததோ வா பாபிட்ட²தரா, கம்மம் ந க³ரஹிதப்³ப³ம், கம்மிகா ந க³ரஹிதப்³பா³, ந பகதத்தஸ்ஸ பி⁴க்கு²னோ உபோஸதோ² ட²பேதப்³போ³, ந பவாரணா ட²பேதப்³பா³, ந ஸவசனீயம் காதப்³ப³ம், ந அனுவாதோ³ பட்ட²பேதப்³போ³, ந ஓகாஸோ காரேதப்³போ³, ந சோதே³தப்³போ³, ந ஸாரேதப்³போ³, ந பி⁴க்கூ²ஹி ஸம்பயோஜேதப்³ப³ம்.

‘‘ந, பி⁴க்க²வே, பாரிவாஸிகேன பி⁴க்கு²னா பகதத்தஸ்ஸ பி⁴க்கு²னோ புரதோ க³ந்தப்³ப³ம், ந புரதோ நிஸீதி³தப்³ப³ம், யோ ஹோதி ஸங்க⁴ஸ்ஸ ஆஸனபரியந்தோ ஸேய்யாபரியந்தோ விஹாரபரியந்தோ, ஸோ தஸ்ஸ பதா³தப்³போ³, தேன ச ஸோ ஸாதி³தப்³போ³.

‘‘ந, பி⁴க்க²வே, பாரிவாஸிகேன பி⁴க்கு²னா பகதத்தஸ்ஸ பி⁴க்கு²னோ புரேஸமணேன வா பச்சா²ஸமணேன வா குலானி உபஸங்கமிதப்³பா³னி, ந ஆரஞ்ஞிகங்க³ம் ஸமாதா³தப்³ப³ம், ந பிண்ட³பாதிகங்க³ம் ஸமாதா³தப்³ப³ம், ந ச தப்பச்சயா பிண்ட³பாதோ நீஹராபேதப்³போ³ ‘மா மம் ஜானிம்ஸூ’தி.

‘‘பாரிவாஸிகேன, பி⁴க்க²வே, பி⁴க்கு²னா ஆக³ந்துகேன ஆரோசேதப்³ப³ம், ஆக³ந்துகஸ்ஸ ஆரோசேதப்³ப³ம், உபோஸதே² ஆரோசேதப்³ப³ம், பவாரணாய ஆரோசேதப்³ப³ம், ஸசே கி³லானோ ஹோதி, தூ³தேனபி ஆரோசேதப்³ப³ம்.

‘‘ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ ஆவாஸோ க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா.

‘‘ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ அனாவாஸோ க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ ஆவாஸோ வா அனாவாஸோ வா க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா.

‘‘ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா அனாவாஸா அபி⁴க்கு²கோ ஆவாஸோ க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா அனாவாஸா அபி⁴க்கு²கோ அனாவாஸோ க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா அனாவாஸா அபி⁴க்கு²கோ ஆவாஸோ வா அனாவாஸோ வா க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா.

‘‘ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா அபி⁴க்கு²கோ ஆவாஸோ க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா அபி⁴க்கு²கோ அனாவாஸோ க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா அபி⁴க்கு²கோ ஆவாஸோ வா அனாவாஸோ வா க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா.

‘‘ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா ஸபி⁴க்கு²கோ ஆவாஸோ க³ந்தப்³போ³ யத்த²ஸ்ஸு பி⁴க்கூ² நானாஸம்வாஸகா அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா ஸபி⁴க்கு²கோ அனாவாஸோ க³ந்தப்³போ³ யத்த²ஸ்ஸு பி⁴க்கூ² நானாஸம்வாஸகா அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா ஸபி⁴க்கு²கோ ஆவாஸோ வா அனாவாஸோ வா க³ந்தப்³போ³ யத்த²ஸ்ஸு பி⁴க்கூ² நானாஸம்வாஸகா அஞ்ஞத்ர பகதத்தேன அஞ்ஞத்ர அந்தராயா.

‘‘ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா அனாவாஸா ஸபி⁴க்கு²கோ ஆவாஸோ க³ந்தப்³போ³ யத்த²ஸ்ஸு பி⁴க்கூ² நானாஸம்வாஸகா அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா அனாவாஸா ஸபி⁴க்கு²கோ அனாவாஸோ க³ந்தப்³போ³ யத்த²ஸ்ஸு பி⁴க்கூ² நானாஸம்வாஸகா அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா அனாவாஸா ஸபி⁴க்கு²கோ ஆவாஸோ வா அனாவாஸோ வா க³ந்தப்³போ³ யத்த²ஸ்ஸு பி⁴க்கூ² நானாஸம்வாஸகா அஞ்ஞத்ர பகதத்தேன அஞ்ஞத்ர அந்தராயா.

‘‘ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா ஸபி⁴க்கு²கோ ஆவாஸோ க³ந்தப்³போ³ யத்த²ஸ்ஸு பி⁴க்கூ² நானாஸம்வாஸகா அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா ஸபி⁴க்கு²கோ அனாவாஸோ க³ந்தப்³போ³ யத்த²ஸ்ஸு பி⁴க்கூ² நானாஸம்வாஸகா அஞ்ஞத்ர பகதத்தேன அஞ்ஞத்ர அந்தராயா. ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா ஸபி⁴க்கு²கோ ஆவாஸோ வா அனாவாஸோ வா க³ந்தப்³போ³ யத்த²ஸ்ஸு பி⁴க்கூ² நானாஸம்வாஸகா அஞ்ஞத்ர பகதத்தேன அஞ்ஞத்ர அந்தராயா.

‘‘க³ந்தப்³போ³, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா ஸபி⁴க்கு²கோ ஆவாஸோ யத்த²ஸ்ஸு பி⁴க்கூ² ஸமானஸம்வாஸகா யம் ஜஞ்ஞா ‘ஸக்கோமி அஜ்ஜேவ க³ந்து’ந்தி.

‘‘க³ந்தப்³போ³, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா ஸபி⁴க்கு²கோ அனாவாஸோ யத்த²ஸ்ஸு பி⁴க்கூ² ஸமானஸம்வாஸகா யம் ஜஞ்ஞா ‘ஸக்கோமி அஜ்ஜேவ க³ந்து’ந்தி.

‘‘க³ந்தப்³போ³, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா ஸபி⁴க்கு²கோ ஆவாஸோ வா அனாவாஸோ வா யத்த²ஸ்ஸு பி⁴க்கூ² ஸமானஸம்வாஸகா யம் ஜஞ்ஞா ‘ஸக்கோமி அஜ்ஜேவ க³ந்து’ந்தி.

‘‘க³ந்தப்³போ³, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா அனாவாஸா ஸபி⁴க்கு²கோ ஆவாஸோ யத்த²ஸ்ஸு பி⁴க்கூ² ஸமானஸம்வாஸகா யம் ஜஞ்ஞா ‘ஸக்கோமி அஜ்ஜேவ க³ந்து’ந்தி.

‘‘க³ந்தப்³போ³, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா அனாவாஸா ஸபி⁴க்கு²கோ அனாவாஸோ யத்த²ஸ்ஸு பி⁴க்கூ² ஸமானஸம்வாஸகா யம் ஜஞ்ஞா ‘ஸக்கோமி அஜ்ஜேவ க³ந்து’ந்தி.

‘‘க³ந்தப்³போ³, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா அனாவாஸா ஸபி⁴க்கு²கோ ஆவாஸோ வா அனாவாஸோ வா யத்த²ஸ்ஸு பி⁴க்கூ² ஸமானஸம்வாஸகா யம் ஜஞ்ஞா ‘ஸக்கோமி அஜ்ஜேவ க³ந்து’ந்தி.

‘‘க³ந்தப்³போ³, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா ஸபி⁴க்கு²கோ ஆவாஸோ யத்த²ஸ்ஸு பி⁴க்கூ² ஸமானஸம்வாஸகா யம் ஜஞ்ஞா ‘ஸக்கோமி அஜ்ஜேவ க³ந்து’ந்தி.

‘‘க³ந்தப்³போ³, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா ஸபி⁴க்கு²கோ அனாவாஸோ யத்த²ஸ்ஸு பி⁴க்கூ² ஸமானஸம்வாஸகா யம் ஜஞ்ஞா ‘ஸக்கோமி அஜ்ஜேவ க³ந்து’ந்தி.

‘‘க³ந்தப்³போ³, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா வா அனாவாஸா வா ஸபி⁴க்கு²கோ ஆவாஸோ வா அனாவாஸோ வா யத்த²ஸ்ஸு பி⁴க்கூ² ஸமானஸம்வாஸகா யம் ஜஞ்ஞா ‘ஸக்கோமி அஜ்ஜேவ க³ந்து’ந்தி.

‘‘ந, பி⁴க்க²வே, பாரிவாஸிகேன பி⁴க்கு²னா பகதத்தேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³ம், ந ஏகச்ச²ன்னே அனாவாஸே வத்த²ப்³ப³ம், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ம், பகதத்தம் பி⁴க்கு²ம் தி³ஸ்வா ஆஸனா வுட்டா²தப்³ப³ம், பகதத்தோ பி⁴க்கு² ஆஸனேன நிமந்தேதப்³போ³, ந பகதத்தேன பி⁴க்கு²னா ஸத்³தி⁴ம் ஏகாஸனே நிஸீதி³தப்³ப³ம், ந நீசே ஆஸனே நிஸின்னே உச்சே ஆஸனே நிஸீதி³தப்³ப³ம், ந ச²மாயம் நிஸின்னே ஆஸனே நிஸீதி³தப்³ப³ம், ந ஏகசங்கமே சங்கமிதப்³ப³ம், ந நீசே சங்கமே சங்கமந்தே உச்சே சங்கமே சங்கமிதப்³ப³ம், ந ச²மாயம் சங்கமந்தே சங்கமே சங்கமிதப்³ப³ம்.

‘‘ந, பி⁴க்க²வே, பாரிவாஸிகேன பி⁴க்கு²னா பாரிவாஸிகேன வுட்³ட⁴தரேன பி⁴க்கு²னா ஸத்³தி⁴ம்…பே… மூலாயபடிகஸ்ஸனாரஹேன பி⁴க்கு²னா ஸத்³தி⁴ம்…பே… மானத்தாரஹேன பி⁴க்கு²னா ஸத்³தி⁴ம்…பே… மானத்தசாரிகேன பி⁴க்கு²னா ஸத்³தி⁴ம்…பே… அப்³பா⁴னாரஹேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³ம், ந ஏகச்ச²ன்னே அனாவாஸே வத்த²ப்³ப³ம், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ம், ந ஏகாஸனே நிஸீதி³தப்³ப³ம், ந நீசே ஆஸனே நிஸின்னே உச்சே ஆஸனே நிஸீதி³தப்³ப³ம், ந ச²மாயம் நிஸின்னே ஆஸனே நிஸீதி³தப்³ப³ம், ந ஏகசங்கமே சங்கமிதப்³ப³ம், ந நீசே சங்கமே சங்கமந்தே உச்சே சங்கமே சங்கமிதப்³ப³ம், ந ச²மாயம் சங்கமந்தே சங்கமே சங்கமிதப்³ப³ம்.

‘‘பாரிவாஸிகசதுத்தோ² சே, பி⁴க்க²வே, பரிவாஸம் த³தே³ய்ய, மூலாய படிகஸ்ஸேய்ய, மானத்தம் த³தே³ய்ய, தம்வீஸோ அப்³பே⁴ய்ய, அகம்மம் ந ச கரணீய’’ந்தி (சூளவ. 76-82) –

ஏவம் பாரிவாஸிகானம் சதுனவுதி வத்தானி.

ஸா ச நேஸம் சதுனவுதிஸங்கா² ஏவம் வேதி³தப்³பா³ – நஉபஸம்பாத³னாதி³னகம்மிகக³ரஹபரியோஸானானி நவ வத்தானி, ததோ பகதத்தஸ்ஸ உபோஸத²ட்ட²பனாதி³பி⁴க்கூ²ஹிஸம்பயோஜனபரியோஸானானி அட்ட², ததோ நபுரதோக³மனாதீ³ பஞ்ச, நபுரேக³மனாதீ³ சத்தாரி, ஆக³ந்துகேன ஆரோசனாதீ³ சத்தாரீதி திம்ஸ, ஸபி⁴க்கு²காவாஸாதி³தோ அபி⁴க்கு²காவாஸாதி³க³மனபஅஸம்யுத்தானி தீணி நவகானி சாதி ஸத்தபஞ்ஞாஸ, ததோ நபகதத்தேன ஸத்³தி⁴ம் ஏகச்ச²ன்னவாஸாதி³படிஸம்யுத்தானி ஏகாத³ஸ, ததோ நபாரிவாஸிகவுட்³ட⁴தரமூலாயபடிகஸ்ஸனாரஹமானத்தாரஹமானத்தசாரிகஅப்³பா⁴னாரஹேஹி ஸத்³தி⁴ம் ஏகச்ச²ன்னவாஸாதி³படிஸம்யுத்தானி பச்சேகம் ஏகாத³ஸ கத்வா பஞ்சபஞ்ஞாஸாய வத்தேஸு பாரிவாஸிகவுட்³ட⁴தரமூலாயபடிகஸ்ஸனாரஹமானத்தாரஹானம் திண்ணம் ஸமானத்தா தேஸு ஏகம் ஏகாத³ஸகம், மானத்தசாரிகஅப்³பா⁴னாரஹானம் த்³வின்னம் ஸமானத்தா தேஸு ஏகம் ஏகாத³ஸகந்தி து³வே ஏகாத³ஸகானி, அந்தே பாரிவாஸிகசதுத்த²ஸ்ஸ ஸங்க⁴ஸ்ஸ பரிவாஸாதி³தா³னசதுக்கே க³ணபூரணத்த²தோ³ஸதோ நிவத்திவஸேன சத்தாரி சத்தாரீதி சதுனவுதி வத்தானி. தானி அக்³க³ஹிதக்³க³ஹணேன ஏகூனசத்தாலீஸவத்தானி நாம. ஆதி³தோ நவ, உபோஸத²ட்ட²பனாதீ³னி அட்ட², பகதத்தேன ஏகச்ச²ன்னவாஸாதீ³ சத்தாரி சாதி ஏகவீஸதி வத்தானி கம்மக்க²ந்த⁴கே க³ஹிதத்தா இத⁴ க³ணனாய அக்³க³ஹேத்வா ததோ ஸேஸேஸு தேஸத்ததியா வத்தேஸு பாரிவாஸிகவுட்³ட⁴தராதீ³ஹி ஏகச்ச²ன்னே வாஸாதி³படிஸம்யுத்தானி த்³வாவீஸதி வத்தானி பகதத்தேஹி ஸமானத்தா தானி ச ‘‘க³ந்தப்³போ³ பி⁴க்க²வே’’திஆதி³கம் நவகம் ததா² க³ச்ச²ந்தஸ்ஸ அனாபத்தித³ஸ்ஸனபரம், ந ஆவாஸதோ க³ச்ச²ந்தஸ்ஸ ஆபத்தித³ஸ்ஸனபரந்தி தஞ்ச அக்³க³ஹேத்வா அவஸேஸேஸு த்³வாசத்தாலீஸவத்தேஸு பாரிவாஸிகசதஉத்தா²தி³கம்மசதுக்கம் க³ருகாபத்திவுட்டா²னாய க³ணபூரணத்த²ஸாமஞ்ஞேன ஏகம் கத்வா தயோ அபனேத்வா க³ணிதானி ஏகூனசத்தாலீஸானி ஹோந்தீதி வுத்தம் ‘‘நவாதி⁴கானி திம்ஸேவ, க²ந்த⁴கே தத³னந்தரே’’தி.

2750. இமானி ஏகூனசத்தாலீஸ வத்தானி புரிமேஹி தேசத்தாலீஸவத்தேஹி ஸத்³தி⁴ம் த்³வாஸீதி ஹோந்தீதி ஆஹ ‘‘ஏவம் ஸப்³பா³னி…பே… க³ஹிதாக³ஹணேன தூ’’தி.

ஏவம் கம்மக்க²ந்த⁴கபாரிவாஸிகக்க²ந்த⁴கேஸு மஹேஸினா வுத்தானி க²ந்த⁴கவத்தானி க³ஹிதாக³ஹணேன த்³வாஸீதி ஏவ ஹோந்தீதி யோஜனா. ஏவமேத்த² த்³வாஸீதிக்க²ந்த⁴கவத்தானி த³ஸ்ஸிதானி.

ஆக³மட்ட²கதா²வண்ணனாயம் பன –

‘‘பாரிவாஸிகானம் பி⁴க்கூ²னம் வத்தம் பஞ்ஞபேஸ்ஸாமீதி (சூளவ. 75) ஆரபி⁴த்வா ‘ந உபஸம்பாதே³தப்³ப³ம்…பே… ந ச²மாயம் சங்கமந்தே சங்கமே சங்கமிதப்³ப³’ந்தி (சூளவ. 76-81) வுத்தாவஸானானி ச²ஸட்டி², ததோ பரம் ‘ந, பி⁴க்க²வே, பாரிவாஸிகேன பி⁴க்கு²னா பாரிவாஸிகேன வுட்³ட⁴தரேன பி⁴க்கு²னா ஸத்³தி⁴ம், மூலாயபடிகஸ்ஸனாரஹேன, மானத்தாரஹேன, மானத்தசாரிகேன, அப்³பா⁴னாரஹேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³’ந்திஆதீ³னம் (சூளவ. 82) பகதத்தே சரிதப்³பே³ஹி அனஞ்ஞத்தா விஸும் தே அக³ணேத்வா பாரிவாஸிகவுட்³ட⁴தராதீ³ஸு புக்³க³லந்தரேஸு சரிதப்³ப³த்தா தேஸம் வஸேன ஸம்பிண்டே³த்வா ஏகேகம் கத்வா க³ணிதானி பஞ்சாதி ஏகஸத்ததி வத்தானி, உக்கே²பனீயகம்மகதவத்தேஸு வத்தபஞ்ஞாபனவஸேன வுத்தம் ‘ந பகதத்தஸ்ஸ பி⁴க்கு²னோ அபி⁴வாத³னம் …பே… நஹானே பிட்டி²பரிகம்மம் ஸாதி³தப்³ப³’ந்தி (சூளவ. 51) இத³ம் அபி⁴வாத³னாதீ³னம் அஸாதி³யனம் ஏகம், ‘ந பகதத்தோ பி⁴க்கு² ஸீலவிபத்தியா அனுத்³த⁴ம்ஸேதப்³போ³’திஆதீ³னி ச த³ஸாதி ஏவமேதானி த்³வாஸீதி ஹோந்தி. ஏதேஸ்வேவ கானிசி தஜ்ஜனீயகம்மாதி³வத்தானி, கானிசி பாரிவாஸிகாதி³வத்தானீதி அக்³க³ஹிதக்³க³ஹணேன த்³வாஸீதி ஏவா’’தி (ம. நி. டீ. 2.25; ஸாரத்த². டீ. 2.39; வி. வி. டீ. 1.39) –

வுத்தம். ஏதானி பன வத்தானி கதா³சி தஜ்ஜனீயகம்மகதாதி³காலே, பாரிவாஸிகாதி³காலே ச சரிதப்³பா³னி கு²த்³த³கவத்தானீதி க³ஹேதப்³பா³னி ஆக³ந்துகவத்தாதீ³னம் சுத்³த³ஸமஹாவத்தானம் வக்க²மானத்தா.

2751. இதா³னி பாரிவாஸிகஸ்ஸ பி⁴க்கு²னோ ரத்திச்சே²த³ம், வத்தபே⁴த³ஞ்ச த³ஸ்ஸேதுமாஹ ‘‘பரிவாஸஞ்ச வத்தஞ்சா’’திஆதி³. பரிவாஸஞ்ச வத்தஞ்ச ஸமாதி³ன்னஸ்ஸாதி ‘‘பரிவாஸம் ஸமாதி³யாமீ’’தி பரிவாஸஞ்ச ‘‘வத்தம் ஸமாதி³யாமீ’’தி வத்தஞ்ச பகதத்தஸ்ஸ பி⁴க்கு²னோ ஸந்திகே உக்குடிகம் நிஸீதி³த்வா அஞ்ஜலிம் பக்³க³ஹேத்வா வசீபே⁴த³ம் கத்வா ஸமாதி³ன்னஸ்ஸ. பி⁴க்கு²னோதி பாரிவாஸிகஸ்ஸ பி⁴க்கு²னோ.

2752. ஸஹவாஸாத³யோ ‘‘ஏகச்ச²ன்னே’’திஆதி³னா ஸயமேவ வக்க²தி. ஸஹவாஸோ, வினாவாஸோ, அனாரோசனமேவ சாதி இமேஹி தீஹி பாரிவாஸிகபி⁴க்கு²ஸ்ஸ ரத்திச்சே²தோ³ ச து³க்கடஞ்ச ஹோதீதி யோஜனா.

2753. உத³கபாதேன ஸமந்தா நிப்³ப³கோஸஸ்ஸ உத³கபாதட்டா²னேன. ஏகச்ச²ன்னேதி ஏகச்ச²ன்னே பரிச்ச²ன்னே வா அபரிச்ச²ன்னே வா ஆவாஸே. பகதத்தேன பி⁴க்கு²னா ஸஹ உக்கி²த்தஸ்ஸ நிவாஸோ நிவாரிதோதி யோஜனா. ‘‘நிவாரிதோ’’தி இமினா து³க்கடம் ஹோதீதி தீ³பேதி.

2754. அந்தோயேவாதி ஏகச்ச²ன்னஸ்ஸ ஆவாஸபரிச்சே²த³ஸ்ஸ அந்தோயேவ. ‘‘ந லப்³ப⁴தீ’’தி இமினா ரத்திச்சே²தோ³ ச து³க்கடஞ்ச ஹோதீதி தீ³பேதி.

2755. மஹாஅட்ட²கதா²தி³ஸூதி ஆதி³-ஸத்³தே³ன குருந்த³ட்ட²கதா²தி³ம் ஸங்க³ண்ஹாதி. உபி⁴ன்னந்தி உக்கி²த்தகபாரிவாஸிகானம். இதி அவிஸேஸேன நித்³தி³ட்ட²ந்தி யோஜனா.

2756. இமினா ஸஹவாஸேன ரத்திச்சே²த³ஞ்ச து³க்கடஞ்ச த³ஸ்ஸேத்வா வினாவாஸேன த³ஸ்ஸேதுமாஹ ‘‘அபி⁴க்கு²கே பனாவாஸே’’தி. ஆவாஸேதி வஸனத்தா²ய கதஸேனாஸனே. அனாவாஸேதி வாஸத்தா²ய அகதே சேதியக⁴ரே வா போ³தி⁴க⁴ரே வா ஸம்மஜ்ஜனிஅட்டகே வா தா³ருஅட்டகே வா பானீயமாளே வா வச்சகுடியம் வா த்³வாரகோட்ட²கே வா அஞ்ஞத்ர வா யத்த² கத்த²சி ஏவரூபே டா²னே. விப்பவாஸம் வஸந்தஸ்ஸாதி பகதத்தேன வினா வாஸம் கப்பேந்தஸ்ஸ. ரத்திச்சே²தோ³ ச து³க்கடந்தி ரத்திச்சே²தோ³ சேவ வத்தபே⁴த³து³க்கடஞ்ச ஹோதி.

2757. ஏவம் விப்பவாஸேன ரத்திச்சே²த³து³க்கடானி த³ஸ்ஸேத்வா அனாரோசனேன த³ஸ்ஸேதுமாஹ ‘‘பாரிவாஸிகபி⁴க்கு²ஸ்ஸா’’திஆதி³. பி⁴க்கு²ம் தி³ஸ்வானாதி ஆகாஸேனாபி க³ச்ச²ந்தம் ஸமானஸம்வாஸகம் ஆக³ந்துகம் பி⁴க்கு²ம் தி³ஸ்வா. தங்க²ணேதி தஸ்மிம் தி³ட்ட²க்க²ணேயேவ. ‘‘அனாரோசேந்தஸ்ஸ ஏவ ஏதஸ்ஸா’’தி பத³ச்சே²தோ³. ஏவகாரேன ரத்திச்சே²தோ³ ச து³க்கடஞ்சாதி உப⁴யம் ஏதஸ்ஸ ஹோதீதி தீ³பேந்தேன அதி³ட்டோ² சே, ரத்திச்சே²தோ³வ ஹோதீதி ஞாபேதி. யதா²ஹ – ‘‘ஸோபிஸ்ஸ ரத்திச்சே²த³ம் கரோதி, அஞ்ஞாதத்தா பன வத்தபே⁴த³து³க்கடம் நத்தீ²’’தி (சூளவ. அட்ட². 75). நானாஸம்வாஸகேன ஸஹ வினயகம்மம் காதும் ந வட்டதி, தஸ்ஸ அனாரோசனேபி ரத்திச்சே²தோ³ ந ஹோதி.

2758-9. பாரிவாஸிகோ பி⁴க்கு² யத்த² ஸங்க⁴னவகட்டா²னே டி²தோ, தத்தே²வ தஸ்மிம்யேவ டா²னே ட²த்வா யதா²வுட்³ட⁴ம் பகதத்தேஹிபி ஸத்³தி⁴ம் வுட்³ட⁴படிபாடியா பஞ்ச கிச்சானி காதும் வட்டதீதி யோஜனா.

தானி ஸரூபதோ த³ஸ்ஸேதுமாஹ ‘‘உபோஸத²பவாரண’’ந்திஆதி³. உபோஸத²பவாரணம் யதா²வுட்³ட⁴ம் காதும் லப⁴தீதி யோஜனா. தே³ந்தீதி ஏத்த² ‘‘க⁴ண்டிம் பஹரித்வா’’தி ஸேஸோ. ஸங்க⁴தா³யகாதி கம்மதா⁴ரயஸமாஸோ. ஸங்க⁴ஸ்ஸ ஏகத்தேபி க³ரூஸு ப³ஹுவசனனித்³தே³ஸோ. ‘‘தே³தி சே ஸங்க⁴தா³யகோ’’திபி பாடோ². தத்த² க⁴ண்டிம் பஹரித்வா பா⁴ஜேத்வா தே³ந்தோ ஸங்கோ⁴ வஸ்ஸிகஸாடிகம் தே³தி சே, பாரிவாஸிகோ யதா²வுட்³ட⁴ம் அத்தனோ பத்தட்டா²னே லப⁴தீதி யோஜனா.

ஓணோஜனந்தி விஸ்ஸஜ்ஜனம், ஸங்க⁴தோ அத்தனோ பத்தானம் த்³வின்னம், திண்ணம் வா உத்³தே³ஸப⁴த்தாதீ³னம் அத்தனோ புக்³க³லிகப⁴த்தபச்சாஸாய படிக்³க³ஹேத்வா ‘‘மய்ஹம் அஜ்ஜ ப⁴த்தபச்சாஸா அத்தி², ஸ்வே க³ண்ஹிஸ்ஸாமீ’’தி வத்வா ஸங்க⁴விஸ்ஸஜ்ஜனம் லப⁴தீதி வுத்தம் ஹோதி. ப⁴த்தந்தி ஆக³தாக³தேஹி வுட்³ட⁴படிபாடியா க³ஹேத்வா க³ந்தப்³ப³ம் விஹாரே ஸங்க⁴ஸ்ஸ சதுஸ்ஸாலப⁴த்தம். ததா² பாரிவாஸிகோ யதா²வுட்³ட⁴ம் லப⁴தீதி யோஜனா. இமே பஞ்சாதி வுத்தமேவத்த²ம் நிக³மயதி.

தத்ராயம் வினிச்ச²யோ (சூளவ. அட்ட². 75) – உபோஸத²பவாரணே தாவ பாதிமோக்கே² உத்³தி³ஸ்ஸமானே ஹத்த²பாஸே நிஸீதி³தும் வட்டதி. மஹாபச்சரியம் பன ‘‘பாளியா அனிஸீதி³த்வா பாளிம் விஹாய ஹத்த²பாஸம் அமுஞ்சந்தேன நிஸீதி³தப்³ப³’’ந்தி வுத்தம். பாரிஸுத்³தி⁴உபோஸதே² கரியமானே ஸங்க⁴னவகட்டா²னே நிஸீதி³த்வா தத்தே²வ நிஸின்னேன அத்தனோ பாளியா பாரிஸுத்³தி⁴உபோஸதோ² காதப்³போ³வ. பவாரணாயபி ஸங்க⁴னவகட்டா²னே நிஸீதி³த்வா தத்தே²வ நிஸின்னேன அத்தனோ பாளியா பவாரேதப்³ப³ம். ஸங்கே⁴ன க⁴ண்டிம் பஹரித்வா பா⁴ஜியமானம் வஸ்ஸிகஸாடிகம்பி அத்தனோ பத்தட்டா²னே க³ஹேதும் வட்டதி.

ஓணோஜனே ஸசே பாரிவாஸிகஸ்ஸ த்³வே தீணி உத்³தே³ஸப⁴த்தாதீ³னி பாபுணந்தி, அஞ்ஞா சஸ்ஸ புக்³க³லிகப⁴த்தபச்சாஸா ஹோதி, தானி படிபாடியா க³ஹேத்வா ‘‘ப⁴ந்தே, ஹேட்டா² கா³ஹேத², அஜ்ஜ மய்ஹம் ப⁴த்தபச்சாஸா அத்தி², ஸ்வேவ க³ண்ஹிஸ்ஸாமீ’’தி வத்வா விஸ்ஸஜ்ஜேதப்³பா³னி, ஏவம் தானி புனதி³வஸேஸு க³ண்ஹிதும் லப⁴தி. ‘‘புனதி³வஸே ஸப்³ப³பட²மம் ஏதஸ்ஸ தா³தப்³ப³’’ந்தி குருந்தி³யம் வுத்தம். யதி³ பன ந க³ண்ஹாதி ந விஸ்ஸஜ்ஜேதி, புனதி³வஸே ந லப⁴தி. இத³ம் ஓணோஜனம் நாம பாரிவாஸிகஸ்ஸேவ ஓதி³ஸ்ஸ அனுஞ்ஞாதம். கஸ்மா? தஸ்ஸ ஹி ஸங்க⁴னவகட்டா²னே நிஸின்னஸ்ஸ ப⁴த்தக்³கே³ யாகு³க²ஜ்ஜகாதீ³னி பாபுணந்தி வா ந வா, தஸ்மா ‘‘ஸோ பி⁴க்கா²ஹாரேன மா கிலமித்தா²’’தி இத³மஸ்ஸ ஸங்க³ஹகரணத்தா²ய ஓதி³ஸ்ஸ அனுஞ்ஞாதம்.

ப⁴த்தே சதுஸ்ஸாலப⁴த்தம் யதா²வுட்³ட⁴ம் லப⁴தி, பாளியா பன க³ந்தும் வா டா²தும் வா ந லப⁴தி. தஸ்மா பாளிதோ ஓஸக்கித்வா ஹத்த²பாஸே டி²தேன ஹத்த²ம் பஸாரேத்வா யதா² ஸேனோ நிபதித்வா க³ண்ஹாதி, ஏவம் க³ண்ஹிதப்³ப³ம். ஆராமிகஸமணுத்³தே³ஸேஹி ஆஹராபேதும் ந லப⁴தி. ஸசே ஸயமேவ ஆஹரந்தி, வட்டதி. ரஞ்ஞோ மஹாபேளப⁴த்தேபி ஏஸேவ நயோ. சதுஸ்ஸாலப⁴த்தே பன ஸசே ஓணோஜனம் கத்துகாமோ ஹோதி, அத்தனோ அத்தா²ய உக்கி²த்தே பிண்டே³ ‘‘அஜ்ஜ மே ப⁴த்தம் அத்தி², ஸ்வேவ க³ண்ஹிஸ்ஸாமீ’’தி வத்தப்³ப³ம். ‘‘புனதி³வஸே த்³வே பிண்டே³ லப⁴தீ’’தி (சூளவ. அட்ட². 75) மஹாபச்சரியம் வுத்தம். உத்³தே³ஸப⁴த்தாதீ³னிபி பாளிதோ ஓஸக்கித்வாவ க³ஹேதப்³பா³னி. யத்த² பன நிஸீதா³பேத்வா பரிவிஸந்தி, தத்த² ஸாமணேரானம் ஜேட்ட²கேன பி⁴க்கூ²னம் ஸங்க⁴னவகேன ஹுத்வா நிஸீதி³தப்³ப³ந்தி.

பாரிவாஸிகக்க²ந்த⁴ககதா²வண்ணனா.