பே⁴ஸஜ்ஜக்க²ந்த⁴ககதா²வண்ணனா

2665. க³ஹபதிஸ்ஸ பூ⁴மி, ஸம்முதிபூ⁴மி, உஸ்ஸாவனந்திகாபூ⁴மி, கோ³னிஸாதி³பூ⁴மீதி கப்பியபூ⁴மியோ சதஸ்ஸோ ஹோந்தீதி வுத்தா ப⁴க³வதாதி யோஜனா.

2666. கத²ம் கப்பியம் கத்தப்³ப³ந்தி ‘‘அனுஜானாமி, பி⁴க்க²வே, சதஸ்ஸோ கப்பியபூ⁴மியோ உஸ்ஸாவனந்திகம் கோ³னிஸாதி³கம் க³ஹபதிம் ஸம்முதி’’ந்தி (மஹாவ. 295) ஏவம் சதஸ்ஸோ பூ⁴மியோ உத்³த⁴ரித்வா தாஸம் ஸாமஞ்ஞலக்க²ணம் த³ஸ்ஸேதுமாஹ ‘‘ஸங்க⁴ஸ்ஸா’’திஆதி³. ஸங்க⁴ஸ்ஸ ஸந்தகம் வாஸத்தா²ய கதம் கே³ஹம் வா பி⁴க்கு²னோ ஸந்தகம் வாஸத்தா²ய கதம் கே³ஹம் வாதி யோஜனா. கப்பியம் கத்தப்³ப³ந்தி கப்பியட்டா²னம் கத்தப்³ப³ம். ஸஹஸேய்யப்பஹோனகந்தி ஸப்³ப³ச்ச²ன்னபரிச்ச²ன்னாதி³லக்க²ணேன ஸஹஸேய்யாரஹம்.

2667. இதா³னி சதஸ்ஸோபி பூ⁴மியோ ஸரூபதோ த³ஸ்ஸேதுமாஹ ‘‘ட²பேத்வா’’திஆதி³. பி⁴க்கு²ம் ட²பேத்வா அஞ்ஞேஹி கப்பியபூ⁴மியா அத்தா²ய தி³ன்னம் வா தேஸம் ஸந்தகம் வா யம் கே³ஹம், இத³ம் ஏவ க³ஹபதிபூ⁴மி நாமாதி யோஜனா.

2668. யா பன குடி ஸங்கே⁴ன ஸம்மதா ஞத்திது³தியாய கம்மவாசாய, ஸா ஸம்முதிகா நாம. தஸ்ஸா ஸம்மன்னனகாலே கம்மவாசம் அவத்வா அபலோகனம் வா காதும் வட்டதேவாதி யோஜனா.

2669-70. பட²மஇட்ட²காய வா பட²மபாஸாணஸ்ஸ வா பட²மத்த²ம்ப⁴ஸ்ஸ வா ஆதி³-க்³க³ஹணேன பட²மபி⁴த்திபாத³ஸ்ஸ வா ட²பனே பரேஸு மனுஸ்ஸேஸு உக்கி²பித்வா ட²பேந்தேஸு ஸமந்ததோ பரிவாரேத்வா ‘‘கப்பியகுடிம் கரோம, கப்பியகுடிம் கரோமா’’தி அபி⁴க்க²ணம் வத³ந்தேஹி ஆமஸித்வா வா ஸயமேவ உக்கி²பித்வா வா இட்ட²கா ட²பேய்ய பாஸாணோ வா த²ம்போ⁴ வா பி⁴த்திபாதோ³ வா ட²பேய்ய ட²பேதப்³போ³, அயம் உஸ்ஸாவனந்திகா குடீதி யோஜனா.

2671. இட்ட²காதி³பதிட்டா²னந்தி பட²மிட்ட²காதீ³னம் பூ⁴மியம் பதிட்டா²னம். வத³தந்தி ‘‘கப்பியகுடிம் கரோம, கப்பியகுடிம் கரோமா’’தி வத³ந்தானம். ஸமகாலம் து வட்டதீதி ஏககாலம் வட்டதி, இமினா ‘‘ஸசே ஹி அனிட்டி²தே வசனே த²ம்போ⁴ பதிட்டா²தி, அப்பதிட்டி²தே வா தஸ்மிம் வசனம் நிட்டா²தி, அகதா ஹோதி கப்பியகுடீ’’தி (மஹாவ. அட்ட². 295) அட்ட²கதா²வினிச்ச²யோ ஸூசிதோ.

2672. ஆராமோ ஸகலோ அபரிக்கி²த்தோ வா யேபு⁴ய்யதோ அபரிக்கி²த்தோ வாதி து³விதோ⁴பி விஞ்ஞூஹி வினயத⁴ரேஹி ‘‘கோ³னிஸாதீ³’’தி வுச்சதி. பவேஸனிவாரணாபா⁴வேன பவிட்டா²னம் கு³ன்னம் நிஸஜ்ஜாயோக³தோ ததா² வுச்சதீதி யோஜனா.

2673. பயோஜனம் த³ஸ்ஸேதுமாஹ ‘‘ஏத்த² பக்கஞ்சா’’திஆதி³. ஆமிஸந்தி புரிமகாலிகத்³வயம். ‘‘ஆமிஸ’’ந்தி இமினா நிராமிஸம் இதரகாலிகத்³வயம் அகப்பியகுடியம் வுத்த²ம்பி பக்கம்பி கப்பதீதி தீ³பேதி.

2674-5. இமா கப்பியகுடியோ கதா³ ஜஹிதவத்து²கா ஹோந்தீதி ஆஹ ‘‘உஸ்ஸாவனந்திகா யா ஸா’’திஆதி³. யா உஸ்ஸாவனந்திகா யேஸு த²ம்பா⁴தீ³ஸு அதி⁴ட்டி²தா, ஸா தேஸு த²ம்பா⁴தீ³ஸு அபனீதேஸு தத³ஞ்ஞேஸுபி த²ம்பா⁴தீ³ஸு திட்ட²தீதி யோஜனா.

ஸப்³பே³ஸு த²ம்பா⁴தீ³ஸு அபனீதேஸு ஸா ஜஹிதவத்து²கா ஸியாதி யோஜனா. கோ³னிஸாதி³குடி பரிக்கி²த்தா வதிஆதீ³ஹி ஜஹிதவத்து²கா ஸியா. பரிக்கி²த்தாதி ச ‘‘ஆராமோ பன உபட்³ட⁴பரிக்கி²த்தோபி ப³ஹுதரம் பரிக்கி²த்தோபி பரிக்கி²த்தோயேவ நாமா’’தி (மஹாவ. அட்ட². 295) குருந்தி³மஹாபச்சரியாதீ³ஸு வுத்தத்தா ந கேவலம் ஸப்³ப³பரிக்கி²த்தாவ, உபட்³ட⁴பரிக்கி²த்தாபி யேபு⁴ய்யபரிக்கி²த்தாபி க³ஹேதப்³பா³.

ஸேஸாதி க³ஹபதிஸம்முதிகுடியோ. ச²த³னனாஸதோ ஜஹிதவத்து²கா ஸியுந்தி யோஜனா. ச²த³னனாஸதோதி ஏத்த² ‘‘கோ³பானஸிமத்தம் ட²பேத்வா’’தி ஸேஸோ. ஸசே கோ³பானஸீனம் உபரி ஏகம்பி பக்க²பாஸமண்ட³லம் அத்தி², ரக்க²தி. யத்ர பனிமா சதஸ்ஸோபி கப்பியபூ⁴மியோ நத்தி², தத்த² கிம் காதப்³ப³ம்? அனுபஸம்பன்னஸ்ஸ த³த்வா தஸ்ஸ ஸந்தகம் கத்வா பரிபு⁴ஞ்ஜிதப்³ப³ம்.

2676. பி⁴க்கு²ம் ட²பேத்வா அஞ்ஞேஸம் ஹத்த²தோ படிக்³க³ஹோ ச தேஸம் ஸன்னிதி⁴ ச தேஸம் அந்தோவுத்த²ஞ்ச பி⁴க்கு²ஸ்ஸ வட்டதீதி யோஜனா.

2677. பி⁴க்கு²ஸ்ஸ ஸந்தகம் ஸங்கி⁴கம்பி வா அகப்பியபூ⁴மியம் ஸஹஸேய்யப்பஹோனகே கே³ஹே அந்தோவுத்த²ஞ்ச அந்தோபக்கஞ்ச பி⁴க்கு²ஸ்ஸ ந வட்டதி. பி⁴க்கு²னியா ஸந்தகம் ஸங்கி⁴கம்பி வா அகப்பியபூ⁴மியம் ஸஹஸேய்யப்பஹோனகே கே³ஹே அந்தோவுத்த²ஞ்ச அந்தோபக்கஞ்ச பி⁴க்கு²னியா ந வட்டதீதி ஏவம் உபி⁴ன்னம் பி⁴க்கு²பி⁴க்கு²னீனம் ந வட்டதீதி யோஜனா.

2678. அகப்பகுடியாதி அகப்பியகுடியா, ‘‘அகப்பியபூ⁴மியம் ஸஹஸேய்யப்பஹோனகே கே³ஹே’’தி அட்ட²கதா²யம் வுத்தாய அகப்பியபூ⁴மியாதி அத்தோ². ஆதி³-ஸத்³தே³ன நவனீததேலமது⁴பா²ணிதானம் க³ஹணம்.

2679. தேஹேவ அந்தோவுத்தே²ஹி ஸப்பிஆதீ³ஹி ஸத்தாஹகாலிகேஹி ஸஹ பி⁴க்கு²னா பக்கம் தம் யாவஜீவிகம் நிராமிஸம் ஸத்தாஹம் பரிபு⁴ஞ்ஜிதும் வட்டதேவாதி யோஜனா.

2680. பக்கம் ஸாமம்பக்கம் தம் யாவஜீவிகம் ஸசே ஆமிஸஸம்ஸட்ட²ம் பரிபு⁴ஞ்ஜதி, அந்தோவுத்த²ஞ்ச பு⁴ஞ்ஜதி, கிஞ்ச பி⁴ய்யோ ஸாமம்பக்கஞ்ச பு⁴ஞ்ஜதீதி யோஜனா. யாவஜீவிகஸ்ஸ ஆமிஸஸம்ஸட்ட²ஸ்ஸ ஆமிஸக³திகத்தா ‘‘அந்தோவுத்த²’’ந்தி வுத்தம்.

2682. உத³கம் ந ஹோதி காலிகம் சதூஸு காலிகேஸு அஸங்க³ஹிதத்தா.

2683. திகாலிகா யாவகாலிகா யாமகாலிகா ஸத்தாஹகாலிகாதி தயோ காலிகா படிக்³க³ஹவஸேனேவ அத்தனோ அத்தனோ காலம் அதிக்கமித்வா பு⁴த்தா தோ³ஸகரா ஹோந்தி, ததியம் ஸத்தாஹாதிக்கமே நிஸ்ஸக்³கி³யபாசித்தியவத்து²த்தா அபு⁴த்தம்பி தோ³ஸகரந்தி யோஜனா.

‘‘பு⁴த்தா தோ³ஸகரா’’தி இமினா புரிமகாலிகத்³வயம் படிக்³க³ஹேத்வா காலாதிக்கமனமத்தேன ஆபத்தியா காரணம் ந ஹோதி, பு⁴த்தமேவ ஹோதி. ஸத்தாஹகாலிகம் காலாதிக்கமேன அபரிபு⁴த்தம்பி ஆபத்தியா காரணம் ஹோதீதி தீ³பேதி. தேஸு ஸத்தாஹகாலிகேயேவ விஸேஸம் த³ஸ்ஸேதுமாஹ ‘‘அபு⁴த்தம் ததியம்பி சா’’தி. ச-ஸத்³தோ³ து-ஸத்³த³த்தே². யாவஜீவிகம் பன படிக்³க³ஹேத்வா யாவஜீவம் பரிபு⁴ஞ்ஜியமானம் இதரகாலிகஸம்ஸக்³க³ம் வினா தோ³ஸகரம் ந ஹோதீதி ந க³ஹிதம்.

2684. அம்பா³த³யோ ஸத்³தா³ ருக்கா²னம் நாமபூ⁴தா தம்தம்ப²லேபி வத்தமானா இத⁴ உபசாரவஸேன தஜ்ஜே பானகே வுத்தா, தேனேவாஹ ‘‘பானகம் மத’’ந்தி. சோசம் அட்டி²ககத³லிபானம். மோசம் இதரகத³லிபானம். மதூ⁴தி முத்³தி³கப²லானம் ரஸம். முத்³தி³காதி ஸீதோத³கே மத்³தி³தானம் முத்³தி³கப²லானம் பானம். ‘‘ஸாலூகபானந்தி ரத்துப்பலனீலுப்பலாதீ³னம் ஸாலூகே மத்³தி³த்வா கதபான’’ந்தி பாளியம், அட்ட²கதா²ய (மஹாவ. அட்ட². 300) ச ஸாலூக-ஸத்³த³ஸ்ஸ தீ³க⁴வஸேன ஸம்யோக³த³ஸ்ஸனதோ ‘‘ஸாலு பா²ருஸகஞ்சா’’தி கா³தா²ப³ந்த⁴வஸேன ரஸ்ஸோ கதோ.

ஸாலூகம் குமுது³ப்பலானம் ப²லரஸம். கு²த்³த³ஸிக்கா²வண்ணனாயம் பன ‘‘ஸாலூகபானம் நாம ரத்துப்பலனீலுப்பலாதீ³னம் கிஞ்ஜக்க²ரேணூஹி கதபான’’ந்தி வுத்தம். ‘‘பா²ருஸக’ந்திஆதீ³ஸு ஏகோ ருக்கோ²’’தி க³ண்டி²பதே³ வுத்தம். தஸ்ஸ ப²லரஸோ பா²ருஸகம் நாம. ஏதேஸம் அட்ட²ன்னம் ப²லானம் ரஸோ உத³கஸம்பி⁴ன்னோ வட்டதி, ஸீதுத³கே மத்³தி³தோ பஸன்னோ நிக்கஸடோவ வட்டதி, உத³கேன பன அஸம்பி⁴ன்னோ ரஸோ யாவகாலிகோ.

2685. ப²லந்தி அம்பா³தி³ப²லம். ஸவத்து²கபடிக்³க³ஹோதி பானவத்து²கானம் ப²லானம் படிக்³க³ஹோ. வஸதி ஏத்த² பானந்தி வத்து², ப²லம், வத்து²னா ஸஹ வட்டதீதி ஸவத்து²கம், பானம், ஸவத்து²கஸ்ஸ படிக்³க³ஹோ ஸவத்து²கபடிக்³க³ஹோ. ஸவத்து²கஸ்ஸ படிக்³க³ஹம் நாம வத்து²படிக்³க³ஹணமேவாதி கத்வா வுத்தம் ‘‘பானவத்து²கானம் ப²லானம் படிக்³க³ஹோ’’தி.

2686. ‘‘ஸுகோட்டேத்வா’’தி வுச்சமானத்தா ‘‘அம்ப³பக்க’’ந்தி ஆமகமேவ அம்ப³ப²லம் வுச்சதி. உத³கேதி ஸீதோத³கே. பரிஸ்ஸவம் பரிஸ்ஸாவிதம். கத்வாதி மது⁴ஆதீ³ஹி அபி⁴ஸங்க²ரித்வா. யதா²ஹ – ‘‘தத³ஹுபடிக்³க³ஹிதேஹி மது⁴ஸக்கரகப்பூராதீ³ஹி யோஜேத்வா காதப்³ப³’’ந்தி (மஹாவ. அட்ட². 300). பாதும் வட்டதீதி ஏத்த² வினிச்ச²யோ ‘‘ஏவம் கதம் புரேப⁴த்தமேவ கப்பதி, அனுபஸம்பன்னேஹி கதம் லபி⁴த்வா பன புரேப⁴த்தம் படிக்³க³ஹிதம் புரேப⁴த்தம் ஸாமிஸபரிபோ⁴கே³னாபி வட்டதி, பச்சா²ப⁴த்தம் நிராமிஸபரிபோ⁴கே³ன யாவ அருணுக்³க³மனா வட்டதியேவ. ஏஸ நயோ ஸப்³ப³பானேஸூ’’தி அட்ட²கதா²யம் வுத்தோ.

2687. ஸேஸபானகேஸுபீதி ஜம்பு³பானகாதீ³ஸுபி.

2688. உச்சு²ரஸோ அந்தோக³த⁴த்தா இத⁴ வுத்தோ, ந பன யாமகாலிகத்தா, ஸோ பன ஸத்தாஹகாலிகோயேவ.

2689. மது⁴கஸ்ஸ ரஸந்தி மது⁴கபுப்ப²ஸ்ஸ ரஸம். ஏத்த² மது⁴கபுப்ப²ரஸோ அக்³கி³பாகோ வா ஹோது ஆதி³ச்சபாகோ வா, பச்சா²ப⁴த்தம் ந வட்டதி. புரேப⁴த்தம்பி யம் பானம் க³ஹேத்வா மஜ்ஜம் கரோந்தி, ஸோ ஆதி³தோ பட்டா²ய ந வட்டதி. மது⁴கபுப்ப²ம் பன அல்லம் வா ஸுக்க²ம் வா ப⁴ஜ்ஜிதம் வா தேன கதபா²ணிதம் வா யதோ பட்டா²ய மஜ்ஜம் ந கரோந்தி, தம் ஸப்³ப³ம் புரேப⁴த்தம் வட்டதி.

பக்கடா³கரஸந்தி பக்கஸ்ஸ யாவகாலிகஸ்ஸ ரஸம். ஸப்³போ³ பத்தரஸோ யாமகாலிகோ வுத்தோதி யோஜனா. அட்ட²கதா²யம் ‘‘யாவகாலிகபத்தானஞ்ஹி புரேப⁴த்தம்யேவ ரஸோ கப்பதீ’’தி (மஹாவ. அட்ட². 300) இமமேவ ஸந்தா⁴ய வுத்தம்.

2690. ஸானுலோமானம் ஸத்தன்னம் த⁴ஞ்ஞானம் ப²லஜம் ரஸம் ட²பேத்வா ஸப்³போ³ ப²லஜோ ரஸோ விகாலே யாமஸஞ்ஞிதே அனுலோமதோ பரிபு⁴ஞ்ஜிதும் அனுஞ்ஞாதோதி யோஜனா.

2691. யாவகாலிகபத்தானம் ஸீதுத³கே மத்³தி³த்வா கதோ ரஸோபி அபக்கோ, ஆதி³ச்சபாகோபி விகாலே பன வட்டதீதி யோஜனா.

2692-3. ஸத்தத⁴ஞ்ஞானுலோமானி ஸரூபதோ த³ஸ்ஸேதுமாஹ ‘‘தாலஞ்சனாளிகேரஞ்சா’’திஆதி³. அபரண்ணம் முக்³கா³தி³. ‘‘ஸத்தத⁴ஞ்ஞானுலோமிக’’ந்தி இமினா ஏதேஸம் ரஸோ யாவகாலிகோ யாமகாலஸங்கா²தே விகாலே பரிபு⁴ஞ்ஜிதும் ந வட்டதீதி த³ஸ்ஸேதி.

2695. ஏவமாதீ³னம் கு²த்³த³கானம் ப²லானம் ரஸோ பன அட்ட²பானானுலோமத்தா அனுலோமிகே யாமகாலிகானுலோமிகே நித்³தி³ட்டோ² கதி²தோதி யோஜனா.

2696. இத⁴ இமஸ்மிம் லோகே ஸானுலோமஸ்ஸ த⁴ஞ்ஞஸ்ஸ ப²லஜம் ரஸம் ட²பேத்வா அயாமகாலிகோ அஞ்ஞோ ப²லரஸோ நத்தீ²தி யோஜனா, ஸப்³போ³ யாமகாலிகோயேவாதி தீ³பேதி.

பே⁴ஸஜ்ஜக்க²ந்த⁴ககதா²வண்ணனா.