கதி²னக்க²ந்த⁴ககதா²வண்ணனா

2697. வுத்த²வஸ்ஸானம் புரிமிகாய வஸ்ஸம் உபக³ந்த்வா யாவ மஹாபவாரணா, தாவ ரத்திச்சே²த³ம் அகத்வா வுத்த²வஸ்ஸானம் பி⁴க்கூ²னம் ஏகஸ்ஸ வா த்³வின்னம் திண்ணம் சதுன்னம் பஞ்சன்னம் அதிரேகானம் வா பி⁴க்கூ²னம் பஞ்சன்னம் ஆனிஸம்ஸானம் வக்க²மானானம் அனாமந்தசாராதீ³னம் பஞ்சன்னம் ஆனிஸம்ஸானம் படிலாப⁴காரணா முனிபுங்க³வோ ஸப்³பே³ஸம் அகா³ரிகாதி³முனீனம் ஸகலகு³ணக³ணேஹி உத்தமோ ப⁴க³வா கதி²னத்தா²ரம் ‘‘அனுஜானாமி, பி⁴க்க²வே, வஸ்ஸம்வுத்தா²னம் பி⁴க்கூ²னம் கதி²னம் அத்த²ரிது’’ந்தி (மஹாவ. 306) அப்³ர்வி கதே²ஸீதி யோஜனா.

ஏத்தா²யம் வினிச்ச²யோ – ‘‘கதி²னத்தா²ரம் கே லப⁴ந்தி, கே ந லப⁴ந்தீதி? க³ணனவஸேன தாவ பச்சி²மகோடியா பஞ்ச ஜனா லப⁴ந்தி, உத்³த⁴ம் ஸதஸஹஸ்ஸம்பி, பஞ்சன்னம் ஹேட்டா² ந லப⁴ந்தீ’’தி (மஹாவ. அட்ட². 306) இத³ம் அட்ட²கதா²ய அத்தா²ரகஸ்ஸ பி⁴க்கு²னோ ஸங்க⁴ஸ்ஸ கதி²னது³ஸ்ஸதா³னகம்மம் ஸந்தா⁴ய வுத்தம். ‘‘வுத்த²வஸ்ஸவஸேன புரிமிகாய வஸ்ஸம் உபக³ந்த்வா பட²மபவாரணாய பவாரிதா லப⁴ந்தி, சி²ன்னவஸ்ஸா வா பச்சி²மிகாய உபக³தா வா ந லப⁴ந்தி. அஞ்ஞஸ்மிம் விஹாரே வுத்த²வஸ்ஸாபி ந லப⁴ந்தீதி மஹாபச்சரியம் வுத்த’’ந்தி (மஹாவ. அட்ட². 306) இத³ம் அட்ட²கதா²ய ஆனிஸம்ஸலாப⁴ம் ஸந்தா⁴ய வுத்தம், ந கம்மம்.

இதா³னி தது³ப⁴யம் விப⁴ஜித்வா த³ஸ்ஸேதி –

‘‘புரிமிகாய உபக³தானம் பன ஸப்³பே³ க³ணபூரகா ஹோந்தி, ஆனிஸம்ஸம் ந லப⁴ந்தி, ஆனிஸம்ஸோ இதரேஸம்யேவ ஹோதி. ஸசே புரிமிகாய உபக³தா சத்தாரோ வா ஹோந்தி, தயோ வா த்³வே வா ஏகோ வா, இதரே க³ணபூரகே கத்வா கதி²னம் அத்த²ரிதப்³ப³ம். அத² சத்தாரோ பி⁴க்கூ² உபக³தா, ஏகோ பரிபுண்ணவஸ்ஸோ ஸாமணேரோ, ஸோ சே பச்சி²மிகாய உபஸம்பஜ்ஜதி, க³ணபூரகோ சேவ ஹோதி, ஆனிஸம்ஸஞ்ச லப⁴தி. தயோ பி⁴க்கூ² த்³வே ஸாமணேரா, த்³வே பி⁴க்கூ² தயோ ஸாமணேரா, ஏகோ பி⁴க்கு² சத்தாரோ ஸாமணேராதி ஏத்தா²பி ஏஸேவ நயோ. ஸசே புரிமிகாய உபக³தா கதி²னத்தா²ரகுஸலா ந ஹோந்தி, அத்தா²ரகுஸலா க²ந்த⁴கபா⁴ணகத்தே²ரா பரியேஸித்வா ஆனேதப்³பா³, கம்மவாசம் ஸாவேத்வா கதி²னம் அத்த²ராபேத்வா தா³னஞ்ச பு⁴ஞ்ஜித்வா க³மிஸ்ஸந்தி, ஆனிஸம்ஸோ பன இதரேஸம்யேவ ஹோதீ’’தி (மஹாவ. அட்ட². 306).

கதி²னம் கேன தி³ன்னம் வட்டதீதி? யேன கேனசி தே³வேன வா மனுஸ்ஸேன வா பஞ்சன்னம் வா ஸஹத⁴ம்மிகானம் அஞ்ஞதரேன தி³ன்னம் வட்டதி. கதி²னதா³யகஸ்ஸ வத்தம் அத்தி², ஸசே ஸோ தம் அஜானந்தோ புச்ச²தி ‘‘ப⁴ந்தே, கத²ம் கதி²னம் தா³தப்³ப³’’ந்தி, தஸ்ஸ ஏவம் ஆசிக்கி²தப்³ப³ம் ‘‘திண்ணம் சீவரானம் அஞ்ஞதரப்பஹோனகம் ஸூரியுக்³க³மனஸமயே வத்த²ம் ‘கதி²னசீவரம் தே³மா’தி தா³தும் வட்டதி, தஸ்ஸ பரிகம்மத்த²ம் ஏத்தகா நாம ஸூசியோ, ஏத்தகம் ஸுத்தம், ஏத்தகம் ரஜனம், பரிகம்மம் கரோந்தானம் ஏத்தகானம் பி⁴க்கூ²னம் யாகு³ப⁴த்தஞ்ச தா³தும் வட்டதீ’’தி.

கதி²னத்தா²ரகேனாபி த⁴ம்மேன ஸமேன உப்பன்னம் கதி²னம் அத்த²ரந்தேன வத்தம் ஜானிதப்³ப³ம். தந்தவாயகே³ஹதோ ஹி ஆப⁴தஸந்தானேனேவ க²லிமக்கி²தஸாடகோபி ந வட்டதி, மலீனஸாடகோபி ந வட்டதி, தஸ்மா கதி²னத்தா²ரஸாடகம் லபி⁴த்வா ஸுத்³த⁴ம் தோ⁴வித்வா ஸூசிஆதீ³னி சீவரகம்மூபகரணானி ஸஜ்ஜேத்வா ப³ஹூஹி பி⁴க்கூ²ஹி ஸத்³தி⁴ம் தத³ஹேவ ஸிப்³பி³த்வா நிட்டி²தஸூசிகம்மம் ரஜித்வா கப்பபி³ந்து³ம் த³த்வா கதி²னம் அத்த²ரிதப்³ப³ம். ஸசே தஸ்மிம் அனத்த²தேயேவ அஞ்ஞோ கதி²னஸாடகம் அத்த²ரிதப்³ப³கம் ஆஹரதி, அஞ்ஞானி ச ப³ஹூனி கதி²னானிஸம்ஸவத்தா²னி தே³தி, யோ ஆனிஸம்ஸம் ப³ஹும் தே³தி, தஸ்ஸ ஸந்தகேனேவ அத்த²ரிதப்³ப³ம். இதரோ யதா² ததா² ஓவதி³த்வா ஸஞ்ஞாபேதப்³போ³.

கதி²னம் பன கேன அத்த²ரிதப்³ப³ம்? யஸ்ஸ ஸங்கோ⁴ கதி²னசீவரம் தே³தி. ஸங்கே⁴ன பன கஸ்ஸ தா³தப்³ப³ம்? யோ ஜிண்ணசீவரோ ஹோதி. ஸசே ப³ஹூ ஜிண்ணசீவரா ஹோந்தி, வுட்³ட⁴ஸ்ஸ தா³தப்³ப³ம். வுட்³டே⁴ஸுபி யோ மஹாபரிவாரோ தத³ஹேவ சீவரம் கத்வா அத்த²ரிதும் ஸக்கோதி, தஸ்ஸ தா³தப்³ப³ம். ஸசே வுட்³டோ⁴ ந ஸக்கோதி, நவகதரோ ஸக்கோதி, தஸ்ஸ தா³தப்³ப³ம். அபி ச ஸங்கே⁴ன மஹாதே²ரஸ்ஸ ஸங்க³ஹம் காதும் வட்டதி, தஸ்மா ‘‘தும்ஹே, ப⁴ந்தே, க³ண்ஹத², மயம் கத்வா த³ஸ்ஸாமா’’தி வத்தப்³ப³ம்.

தீஸு சீவரேஸு யம் ஜிண்ணம் ஹோதி, தத³த்தா²ய தா³தப்³ப³ம். பகதியா து³பட்டசீவரஸ்ஸ து³பட்டத்தா²யேவ தா³தப்³ப³ம். ஸசேபிஸ்ஸ ஏகபட்டசீவரம் க⁴னம் ஹோதி, கதி²னஸாடகோ ச பேலவோ, ஸாருப்பத்தா²ய து³பட்டப்பஹோனகமேவ தா³தப்³ப³ம். ‘‘அஹம் அலப⁴ந்தோ ஏகபட்டம் பாருபாமீ’’தி வத³ந்தஸ்ஸாபி து³பட்டம் தா³தும் வட்டதி. யோ பன லோப⁴பகதிகோ ஹோதி, தஸ்ஸ ந தா³தப்³ப³ம். தேனாபி கதி²னம் அத்த²ரித்வா ‘‘பச்சா² விஸிப்³பி³த்வா த்³வே சீவரானி கரிஸ்ஸாமீ’’தி ந க³ஹேதப்³ப³ம்.

யஸ்ஸ பன தி³ய்யதி, தஸ்ஸ –

‘‘ஸுணாது மே, ப⁴ந்தே ஸங்கோ⁴, இத³ம் ஸங்க⁴ஸ்ஸ கதி²னது³ஸ்ஸம் உப்பன்னம், யதி³ ஸங்க⁴ஸ்ஸ பத்தகல்லம், ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ த³தே³ய்ய கதி²னம் அத்த²ரிதும், ஏஸா ஞத்தி.

‘‘ஸுணாது மே, ப⁴ந்தே ஸங்கோ⁴, இத³ம் ஸங்க⁴ஸ்ஸ கதி²னது³ஸ்ஸம் உப்பன்னம், ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ தே³தி கதி²னம் அத்த²ரிதும், யஸ்ஸாயஸ்மதோ க²மதி இமஸ்ஸ கதி²னது³ஸ்ஸஸ்ஸ இத்த²ன்னாமஸ்ஸ பி⁴க்கு²னோ தா³னம் கதி²னம் அத்த²ரிதும், ஸோ துண்ஹஸ்ஸ, யஸ்ஸ நக்க²மதி, ஸோ பா⁴ஸேய்ய.

‘‘தி³ன்னம் இத³ம் ஸங்கே⁴ன கதி²னது³ஸ்ஸம் இத்த²ன்னாமஸ்ஸ பி⁴க்கு²னோ கதி²னம் அத்த²ரிதும், க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி (மஹாவ. 307) –

ஏவம் ஞத்திது³தியாய கம்மவாசாய தா³தப்³ப³ந்தி ஏவம் தி³ன்னம்.

2698-9. ந உல்லிகி²தமத்தாதி³-சதுவீஸதிவஜ்ஜிதந்தி பாளியம் ஆக³தேஹி ‘‘ந உல்லிகி²தமத்தேன அத்த²தம் ஹோதி கதி²ன’’ந்தி (மஹாவ. 308) உல்லிகி²தமத்தாதீ³ஹி சதுவீஸதியா ஆகாரேஹி வஜ்ஜிதம். சீவரந்தி ‘‘அஹதேன அத்த²தம் ஹோதி கதி²ன’’ந்தி (மஹாவ. 309) பாளியம் ஆக³தானம் ஸோளஸன்னம் ஆகாரானம் அஞ்ஞதரேன யுத்தம் கதபரியோஸிதம் தி³ன்னம் கப்பபி³ந்து³ம் திண்ணம் சீவரானம் அஞ்ஞதரசீவரம். தே பன சதுவீஸதி ஆகாரா, ஸோளஸாகாரா ச பாளிதோ (மஹாவ. 308), அட்ட²கதா²தோ (மஹாவ. அட்ட². 308) ச க³ஹேதப்³பா³. க³ந்த²கா³ரவபரிஹாரத்த²மித⁴ ந வுத்தா.

பி⁴க்கு²னா வக்க²மானே அட்ட²த⁴ம்மே ஜானந்தேன அத்த²ரகேன ஆதா³ய க³ஹேத்வா புராணகம் அத்தனா பரிபு⁴ஞ்ஜியமானம் அத்த²ரிதப்³ப³சீவரேன ஏகனாமகம் புராணசீவரம் உத்³த⁴ரித்வா பச்சுத்³த⁴ரித்வா நவம் அத்த²ரிதப்³ப³ம் சீவரம் அதி⁴ட்ட²ஹித்வா புராணபச்சுத்³த⁴டசீவரஸ்ஸ நாமேன அதி⁴ட்ட²ஹித்வாவ தம் அந்தரவாஸகம் சே, ‘‘இமினா அந்தரவாஸகேன கதி²னம் அத்த²ராமி’’இதி வசஸா வத்தப்³ப³ந்தி யோஜனா. ஸசே உத்தராஸங்கோ³ ஹோதி, ‘‘இமினா உத்தராஸங்கே³ன கதி²னம் அத்த²ராமி’’, ஸசே ஸங்கா⁴டி ஹோதி, ‘‘இமாய ஸங்கா⁴டியா கதி²னம் அத்த²ராமீ’’தி வத்தப்³ப³ம்.

2700-1. இச்சேவம் திக்க²த்தும் வுத்தே கதி²னம் அத்த²தம் ஹோதீதி யோஜனா. தேன பன பி⁴க்கு²னா நவகேன கதி²னசீவரம் ஆதா³ய ஸங்க⁴ம் உபஸங்கம்ம ‘‘அத்த²தம், ப⁴ந்தே, ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோத³த²’’இதி வத்தப்³ப³ந்தி யோஜனா.

2702. அனுமோத³கேஸு ச தே²ரேஹி ‘‘அத்த²தம், ஆவுஸோ, ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோதா³மா’’தி வத்தப்³ப³ம், நவேன பன ‘‘அத்த²தம், ப⁴ந்தே, ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோதா³மீ’’தி இதி புன ஈரயே கதே²ய்யாதி யோஜனா. கா³தா²ய பன அனுமோத³னபாட²ஸ்ஸ அத்த²த³ஸ்ஸனமுகே²ன ‘‘ஸுஅத்த²தம் தயா ப⁴ந்தே’’தி வுத்தம், ந பாட²க்கமத³ஸ்ஸனவஸேனாதி வேதி³தப்³ப³ம்.

அத்தா²ரகேஸு ச அனுமோத³கேஸு ச நவேஹி வுட்³டா⁴னம் வசனக்கமோ வுத்தோ, வுட்³டே⁴ஹி நவானம் வசனக்கமோ பன தத³னுஸாரேன யதா²ரஹம் யோஜேத்வா வத்தப்³போ³தி கா³தா²ஸு ந வுத்தோதி வேதி³தப்³போ³. அத்தா²ரகேன தே²ரேன வா நவேன வா க³ணபுக்³க³லானம் வசனக்கமோ ச க³ணபுக்³க³லேஹி அத்தா²ரகஸ்ஸ வசனக்கமோ ச வுத்தனயேன யதா²ரஹம் யோஜேதும் ஸக்காதி ந வுத்தோ.

ஏவம் அத்த²தே பன கதி²னே ஸசே கதி²னசீவரேன ஸத்³தி⁴ம் ஆப⁴தம் ஆனிஸம்ஸம் தா³யகா ‘‘யேன அம்ஹாகம் கதி²னம் க³ஹிதம், தஸ்ஸேவ ச தே³மா’’தி தே³ந்தி, பி⁴க்கு²ஸங்கோ⁴ அனிஸ்ஸரோ. அத² அவிசாரேத்வாவ த³த்வா க³ச்ச²ந்தி, பி⁴க்கு²ஸங்கோ⁴ இஸ்ஸரோ. தஸ்மா ஸசே கதி²னத்தா²ரகஸ்ஸ ஸேஸசீவரானிபி து³ப்³ப³லானி ஹோந்தி, ஸங்கே⁴ன அபலோகேத்வா தேஸம்பி அத்தா²ய வத்தா²னி தா³தப்³பா³னி, கம்மவாசாய பன ஏகாயேவ வட்டதி. அவஸேஸே கதி²னானிஸம்ஸே ப³லவவத்தா²னி வஸ்ஸாவாஸிகடி²திகாய தா³தப்³பா³னி, டி²திகாய அபா⁴வே தே²ராஸனதோ பட்டா²ய தா³தப்³பா³னி, க³ருப⁴ண்ட³ம் ந பா⁴ஜேதப்³ப³ம். ஸசே பன ஏகஸீமாய ப³ஹூ விஹாரா ஹோந்தி, ஸப்³பே³ பி⁴க்கூ² ஸன்னிபாதேத்வா ஏகத்த² கதி²னம் அத்த²ரிதப்³ப³ம், விஸும் விஸும் அத்த²ரிதும் ந வட்டதி.

2703. ‘‘கதி²னஸ்ஸ ச கிம் மூல’’ந்திஆதீ³னி ஸயமேவ விவரிஸ்ஸதி.

2706. அட்ட²த⁴ம்முத்³தே³ஸகா³தா²ய புப்³ப³கிச்சம் புப்³ப³-வசனேனேவ உத்தரபத³லோபேன வுத்தம். தேனேவ வக்க²தி ‘‘புப்³ப³கிச்சந்தி வுச்சதீ’’தி. ‘‘பச்சுத்³தா⁴ர’’இதி வத்தப்³பே³ ‘‘பச்சுத்³த⁴ர’’இதி கா³தா²ப³ந்த⁴வஸேன ரஸ்ஸோ. தேனேவ வக்க²தி ‘‘பச்சுத்³தா⁴ரோ’’தி. அதி⁴ட்ட²ஹனம் அதி⁴ட்டா²னம். பச்சுத்³தா⁴ரோ ச அதி⁴ட்டா²னஞ்ச பச்சுத்³த⁴ராதி⁴ட்டா²னா. இதரீதரயோகே³ன த்³வந்த³ஸமாஸோ. அத்தா²ரோதி ஏத்த² ‘‘கதி²னத்தா²ரோ’’தி பகரணதோ லப்³ப⁴தி.

‘‘மாதிகா’’தி இமினா ‘‘அட்ட² கதி²னுப்³பா⁴ரமாதிகா’’தி பகரணதோ விஞ்ஞாயதி. யதா²ஹ – ‘‘அட்டி²மா, பி⁴க்க²வே, மாதிகா கதி²னஸ்ஸ உப்³பா⁴ராயா’’தி (மஹாவ. 310). மாதிகாதி மாதரோ ஜனேத்தியோ, கதி²னுப்³பா⁴ரம் ஏதா அட்ட² ஜனேந்தீதி அத்தோ². உத்³தா⁴ரோதி கதி²னஸ்ஸ உத்³தா⁴ரோ. ஆனிஸம்ஸாதி ஏத்த² ‘‘கதி²னஸ்ஸா’’தி பகரணதோ லப்³ப⁴தி. கதி²னஸ்ஸ ஆனிஸம்ஸாதி இமே அட்ட² த⁴ம்மாதி யோஜனா. யதா²ஹ ‘‘அத்த²தகதி²னானம் வோ, பி⁴க்க²வே, பஞ்ச கப்பிஸ்ஸந்தீ’’திஆதி³ (மஹாவ. 306). ‘‘ஆனிஸம்ஸேனா’’திபி பாடோ². ஆனிஸம்ஸேன ஸஹ இமே அட்ட² த⁴ம்மாதி யோஜனா.

2707. ‘‘ந உல்லிகி²தமத்தாதி³-சதுவீஸதிவஜ்ஜித’’ந்திஆதி³னா கதி²னம் அத்த²ரிதும் கதபரியோஸிதம் சீவரம் சே லத்³த⁴ம், தத்த² படிபஜ்ஜனவிதி⁴ம் த³ஸ்ஸேத்வா ஸசே அகதஸிப்³ப³னாதி³கம்மம் வத்த²மேவ லத்³த⁴ம், தத்த² படிபஜ்ஜனவிதி⁴ம் புப்³ப³கிச்சவஸேன த³ஸ்ஸேதுமாஹ ‘‘தோ⁴வன’’ந்திஆதி³. தத்த² தோ⁴வனந்தி கதி²னது³ஸ்ஸஸ்ஸ ஸேதபா⁴வகரணம். விசாரோதி ‘‘பஞ்சகம் வா ஸத்தகம் வா நவகம் வா ஏகாத³ஸகம் வா ஹோதூ’’தி விசாரணம். சே²த³னந்தி யதா²விசாரிதஸ்ஸ வத்த²ஸ்ஸ சே²த³னம். ப³ந்த⁴னந்தி மோக⁴ஸுத்தகாரோபனம். ஸிப்³ப³னந்தி ஸப்³ப³ஸூசிகம்மம். ரஜனந்தி ரஜனகம்மம். கப்பந்தி கப்பபி³ந்து³தா³னம். ‘‘புப்³ப³கிச்ச’’ந்தி வுச்சதி இத³ம் ஸப்³ப³ம் கதி²னத்தா²ரஸ்ஸ பட²மமேவ கத்தப்³ப³த்தா.

2708. அந்தரவாஸகோதி ஏத்த² இதி-ஸத்³தோ³ லுத்தனித்³தி³ட்டோ². ஸங்கா⁴டி, உத்தராஸங்கோ³, அதோ² அந்தரவாஸகோதி ஏஸமேவ து பச்சுத்³தா⁴ரோபி அதி⁴ட்டா²னம்பி அத்தா²ரோபி வுத்தோதி யோஜனா.

2709. அட்ட²மாதிகா (மஹாவ. 310-311; பரி. 415; மஹாவ. அட்ட². 310-311) த³ஸ்ஸேதுமாஹ ‘‘பக்கமனஞ்சா’’திஆதி³. பக்கமனம் அந்தோ ஏதஸ்ஸாதி பக்கமனந்திகாதி வத்தப்³பே³ உத்தரபத³லோபேன ‘‘பக்கமன’’ந்தி வுத்தம். ஏஸ நயோ ஸப்³ப³த்த². அட்டி²மாதி ஏத்த² ‘‘மாதிகா’’தி பகரணதோ லப்³ப⁴தி. இமா அட்ட² மாதிகாதி யோஜனா.

2710. உத்³தே³ஸானுக்கமேன நித்³தி³ஸிதுமாஹ ‘‘கதசீவரமாதா³யா’’திஆதி³. ‘‘கதசீவரமாதா³யா’’தி இமினா சீவரபலிபோ³து⁴பச்சே²தோ³ த³ஸ்ஸிதோ. ‘‘ஆவாஸே நிரபேக்க²கோ’’தி இமினா து³தியோ ஆவாஸபலிபோ³து⁴பச்சே²தோ³ த³ஸ்ஸிதோ. ஏத்த² ஸப்³ப³வாக்யேஸு ‘‘அத்த²தகதி²னோ யோ பி⁴க்கு² ஸசே பக்கமதீ’’தி ஸேஸோ. அதிக்கந்தாய ஸீமாயாதி விஹாரஸீமாய அதிக்கந்தாய. ஹோதி பக்கமனந்திகாதி ஏத்த² ‘‘தஸ்ஸ பி⁴க்கு²னோ’’தி ஸேஸோ, தஸ்ஸ பி⁴க்கு²னோ பக்கமனந்திகா நாம மாதிகா ஹோதீதி அத்தோ².

2711-2. ஆனிஸம்ஸம் நாம வுத்த²வஸ்ஸேன லத்³த⁴ம் அகதஸூசிகம்மவத்த²ம். தேனேவ வக்க²தி ‘‘கரோதீ’’திஆதி³. ‘‘விஹாரே அனபேக்க²கோ’’தி இமினா ஏத்த² பட²மம் ஆவாஸபலிபோ³து⁴பச்சே²தோ³ த³ஸ்ஸிதோ. ஸுக²விஹரணம் பயோஜனமஸ்ஸாதி ஸுக²விஹாரிகோ, விஹாரோதி. தத்த² தஸ்மிம் விஹாரே விஹரந்தோவ தம் சீவரம் யதி³ கரோதி, தஸ்மிம் சீவரே நிட்டி²தே நிட்டா²னந்தா நிட்டா²னந்திகாதி வுச்சதீதி யோஜனா. ‘‘நிட்டி²தேசீவரே’’தி இமினா சீவரபலிபோ³து⁴பச்சே²தோ³ த³ஸ்ஸிதோ.

2713. தமஸ்ஸமந்தி தம் வுத்த²வஸ்ஸாவாஸம். து⁴ரனிக்கே²பேதி உப⁴யது⁴ரனிக்கே²பவஸேன சித்தப்பவத்தக்க²ணே. ஸன்னிட்டா²னம் நாம து⁴ரனிக்கே²போ. ஏத்த² பலிபோ³த⁴த்³வயஸ்ஸ ஏகக்க²ணேயேவ உபச்சே²தோ³ அட்ட²கதா²யம் வுத்தோ ‘‘ஸன்னிட்டா²னந்திகே த்³வேபி பலிபோ³தா⁴ ‘நேவிமம் சீவரம் காரேஸ்ஸம், ந பச்சேஸ்ஸ’ந்தி சிந்திதமத்தேயேவ ஏகதோ சி²ஜ்ஜந்தீ’’தி (மஹாவ. அட்ட². 311).

2714. கதி²னச்சா²த³னந்தி கதி²னானிஸம்ஸம் சீவரவத்து²ம். ந பச்சேஸ்ஸந்தி ந பச்சாக³மிஸ்ஸாமி. கரோந்தஸ்ஸேவாதி ஏத்த² ‘‘சீவர’’ந்தி பகரணதோ லப்³ப⁴தி. ‘‘கதி²னச்சா²த³ன’’ந்தி இத³ம் வா ஸம்ப³ந்த⁴னீயம். கரோந்தஸ்ஸாதி அனாத³ரே ஸாமிவசனம். நட்ட²ந்தி சோரேஹி ஹடத்தா வா உபசிகாதீ³ஹி கா²தி³தத்தா வா நட்ட²ம். த³ட்³ட⁴ம் வாதி அக்³கி³னா த³ட்³ட⁴ம் வா. நாஸனந்திகாதி ஏவம் சீவரஸ்ஸ நாஸனந்தே லப்³ப⁴மானா அயம் மாதிகா நாஸனந்திகா நாமாதி அத்தோ². ஏத்த² ‘‘ந பச்சேஸ்ஸ’’ந்தி இமினா பட²மம் ஆவாஸபலிபோ³து⁴பச்சே²தோ³ த³ஸ்ஸிதோ. ‘‘கரோந்தஸ்ஸேவா’’தி இமினா து³தியம் சீவரபலிபோ³து⁴பச்சே²தோ³ த³ஸ்ஸிதோ.

2715. லத்³தா⁴னிஸம்ஸோதி லத்³த⁴கதி²னானிஸம்ஸசீவரோ. ஆனிஸம்ஸே சீவரே ஸாபேக்கோ² அபேக்க²வா ப³ஹிஸீமக³தோ வஸ்ஸம்வுத்த²ஸீமாய ப³ஹிஸீமக³தோ தம் சீவரம் கரோதி, ஸோ கதசீவரோ அந்தருப்³பா⁴ரம் அந்தரா உப்³பா⁴ரம் ஸுணாதி சே, ஸவனந்திகா நாம ஹோதீதி யோஜனா. ‘‘ப³ஹிஸீமக³தோ’’திஆதி³னா து³தியபலிபோ³து⁴பச்சே²தோ³ த³ஸ்ஸிதோ. ஏத்த² ‘‘கதசீவரோ’’தி வுத்தத்தா சீவரபலிபோ³து⁴பச்சே²தோ³ பட²மம் ஹோதி, இதரோ பன ‘‘ஸஹ ஸவனேன ஆவாஸபலிபோ³தோ⁴ சி²ஜ்ஜதீ’’தி (மஹாவ. அட்ட². 311) அட்ட²கதா²ய வுத்தத்தா பச்சா² ஹோதி.

2716-7. சீவராஸாய வஸ்ஸம்வுத்தோ² ஆவாஸதோ பக்கந்தோ ‘‘துய்ஹம் சீவரம் த³ஸ்ஸாமீ’’தி கேனசி வுத்தோ ப³ஹிஸீமக³தோ பன ஸவதி, புன ‘‘தவ சீவரம் தா³தும் ந ஸக்கோமீ’’தி வுத்தோ ஆஸாய சி²ன்னமத்தாய சீவரே பச்சாஸாய உபச்சி²ன்னமத்தாய ஆஸாவச்சே²தி³கா நாம மாதிகாதி மதா ஞாதாதி யோஜனா. ஆஸாவச்சா²தி³கே கதி²னுப்³பா⁴ரே ஆவாஸபலிபோ³தோ⁴ பட²மம் சி²ஜ்ஜதி, சீவராஸாய உபச்சி²ன்னாய சீவரபலிபோ³தோ⁴ சி²ஜ்ஜதி.

2718-20. யோ வஸ்ஸம்வுத்த²விஹாரம்ஹா அஞ்ஞம் விஹாரம் க³தோ ஹோதி, ஸோ ஆக³ச்ச²ம் ஆக³ச்ச²ந்தோ அந்தராமக்³கே³ கதி²னுத்³தா⁴ரம் அதிக்கமேய்ய, தஸ்ஸ ஸோ கதி²னுத்³தா⁴ரோ ஸீமாதிக்கந்திகோ மதோதி யோஜனா. தத்த² ஸீமாதிக்கந்திகே கதி²னுப்³பா⁴ரே சீவரபலிபோ³தோ⁴ பட²மம் சி²ஜ்ஜதி, தஸ்ஸ ப³ஹிஸீமே ஆவாஸபலிபோ³தோ⁴ சி²ஜ்ஜதி.

ஏத்த² ச ‘‘ஸீமாதிக்கந்திகோ நாம சீவரகாலஸீமாதிக்கந்திகோ’’தி கேனசி வுத்தம். ‘‘ப³ஹிஸீமாயம் சீவரகாலஸமயஸ்ஸ அதிக்கந்தத்தா ஸீமாதிக்கந்திகோ’’தி (ஸாரத்த². டீ. மஹாவ. 311) ஸாரத்த²தீ³பனியம் வுத்தம். ‘‘ஆக³ச்ச²ம் அந்தராமக்³கே³, தது³த்³தா⁴ரமதிக்கமே’’தி வுத்தத்தா பன ஸங்கே⁴ன கரியமானம் அந்தருப்³பா⁴ரம் ஆக³ச்ச²ந்தோ விஹாரஸீமம் அஸம்பத்தேயேவ கதி²னுப்³பா⁴ரஸ்ஸ ஜாதத்தா தம் ந ஸம்பு⁴ணேய்ய, தஸ்ஸேவம் ஸீமமதிக்கந்தஸ்ஸேவ ஸதோ புன ஆக³ச்ச²தோ அந்தராமக்³கே³ ஜாதோ கதி²னுப்³பா⁴ரோ ஸீமாதிக்கந்திகோதி அம்ஹாகம் க²ந்தி.

கதி²னானிஸம்ஸசீவரம் ஆதா³ய ஸசே ஆவாஸே ஸாபேக்கோ²வ க³தோ ஹோதி, புன ஆக³ந்த்வா கதி²னுத்³தா⁴ரம் கதி²னஸ்ஸ அந்தருப்³பா⁴ரமேவ ஸம்பு⁴ணாதி சே யதி³ பாபுணேய்ய, தஸ்ஸ ஸோ கதி²னுத்³தா⁴ரோ ஹோதி, ஸோ ‘‘ஸஹுப்³பா⁴ரோ’’தி வுச்சதீதி யோஜனா. ஸஹுப்³பா⁴ரே த்³வே பலிபோ³தா⁴ அபுப்³ப³ம் அசரிமம் சி²ஜ்ஜந்தி.

2721. ‘‘ஸீமாதிக்கந்திகேனா’’தி வத்தப்³பே³ உத்தரபத³லோபேன ‘‘ஸீமதோ’’தி வுத்தம். பக்கமனஞ்ச நிட்டா²னஞ்ச ஸன்னிட்டா²னஞ்ச ஸீமதோ ஸீமாதிக்கந்திகேன ஸஹ இமே சத்தாரோ கதி²னுப்³பா⁴ரா புக்³க³லாதீ⁴னா புக்³க³லாயத்தா ஸஹுப்³பா⁴ரஸங்கா²தோ அந்தருப்³பா⁴ரோ ஸங்கா⁴தீ⁴னோதி யோஜனா. ‘‘அந்தருப்³ப⁴ரோ’’தி கா³தா²ப³ந்த⁴வஸேன ரஸ்ஸத்தம்.

2722. நாஸனந்தி நாஸனந்திகோ. ஸவனந்தி ஸவனந்திகோ. ஆஸாவச்சே²தி³காபி சாதி தயோபி கதி²னுப்³பா⁴ரா. ந து ஸங்கா⁴ ந பி⁴க்கு²தோதி ஸங்க⁴தோபி ந ஹோந்தி, புக்³க³லதோபி ந ஹோந்தீதி அத்தோ². சீவரஸ்ஸ வினாஸோ ஸங்க⁴ஸ்ஸ வா சீவரஸாமிகஸ்ஸ வா பயோகே³ன ந ஜாதோதி நாஸனகோ தாவ கதி²னுப்³பா⁴ரோ உப⁴தோபி ந ஹோதீதி வுத்தோ. ஸவனஞ்ச உப⁴யேஸம் பயோக³தோ ந ஜாதந்தி ததா² வுத்தம். ததா² ஆஸாவச்சே²தி³காபி.

2723. ஆவாஸோயேவ பலிபோ³தோ⁴தி விக்³க³ஹோ. பலிபோ³தோ⁴ ச சீவரேதி ஏத்த² சீவரேதி பே⁴த³வசனிச்சா²ய நிமித்தத்தே² பு⁴ம்மம், சீவரனிமித்தபலிபோ³தோ⁴தி அத்தோ², சீவரஸங்கா²தோ பலிபோ³தோ⁴தி வுத்தம் ஹோதி. ஸச்சாதி³கு³ணயுத்தம் முஸாவாதா³தி³தோ³ஸவிமுத்தம் அத்த²ம் வத³தி ஸீலேனாதி யுத்தமுத்தத்த²வாதீ³, தேன.

2724. அட்ட²ன்னம் மாதிகானந்தி ப³ஹிஸீமக³தானம் வஸேன வுத்தா பக்கமனந்திகாத³யோ ஸத்த மாதிகா, ப³ஹிஸீமம் க³ந்த்வா அந்தருப்³பா⁴ரம் ஸம்பு⁴ணந்தஸ்ஸ வஸேன வுத்தோ ஸஹுப்³பா⁴ரோதி இமாஸம் அட்ட²ன்னம் மாதிகானம் வஸேன ச. அந்தருப்³பா⁴ரதோபி வாதி ப³ஹிஸீமம் அக³ந்த்வா தத்தே²வ வஸித்வா கதி²னுப்³பா⁴ரகம்மேன உப்³பா⁴ரகதி²னானம் வஸேன லப்³ப⁴னதோ அந்தருப்³பா⁴ரதோ சாதி மஹேஸினா கதி²னஸ்ஸ து³வே உப்³பா⁴ராபி வுத்தாதி யோஜனா. ப³ஹிஸீமம் க³ந்த்வா ஆக³தஸ்ஸ வஸேன ஸஹுப்³பா⁴ரோ, ப³ஹிஸீமம் ஆக³தானம் வஸேன அந்தருப்³பா⁴ரோதி ஏகோயேவ உப்³பா⁴ரோ த்³விதா⁴ வுத்தோ, தஸ்மா அந்தருப்³பா⁴ரம் விஸும் அக்³க³ஹேத்வா அட்டே²வ மாதிகா பாளியம் (மஹாவ. 310) விப⁴த்தாதி வேதி³தப்³பா³.

2725. அனாமந்தசாரோ உத்தரபத³லோபவஸேன ‘‘அனாமந்தா’’ இதி வுத்தோ. யாவ கதி²னம் ந உத்³த⁴ரீயதி, தாவ அனாமந்தேத்வா சரணம் கப்பிஸ்ஸதி, சாரித்தஸிக்கா²பதே³ன அனாபத்தி ப⁴விஸ்ஸதீதி அத்தோ².

அஸமாதா³னசாரோ ‘‘அஸமாதா³ன’’ந்தி உத்தரபத³லோபேன வுத்தோ. அஸமாதா³னசாரோதி திசீவரம் அஸமாதா³ய சரணம், சீவரவிப்பவாஸோ கப்பிஸ்ஸதீதி அத்தோ².

‘‘க³ணதோ’’தி இமினா உத்தரபத³லோபேன க³ணபோ⁴ஜனம் த³ஸ்ஸிதம். க³ணபோ⁴ஜனம்பி கப்பிஸ்ஸதி, தம் ஸரூபதோ பாசித்தியகண்டே³ வுத்தம்.

‘‘யாவத³த்தி²க’’ந்தி இமினா யாவத³த்த²சீவரம் வுத்தம். யாவத³த்த²சீவரந்தி யாவதகேன சீவரேன அத்தோ², தாவதகம் அனதி⁴ட்டி²தம் அவிகப்பிதம் கப்பிஸ்ஸதீதி அத்தோ².

‘‘தத்த² யோ சீவருப்பாதோ³’’தி இமினா ‘‘யோ ச தத்த² சீவருப்பாதோ³’’தி (மஹாவ. 306) வுத்தோ ஆனிஸம்ஸோ த³ஸ்ஸிதோ. யோ ச தத்த² சீவருப்பாதோ³தி தத்த² கதி²னத்த²தஸீமாயம் மதகசீவரம் வா ஹோது ஸங்க⁴ஸ்ஸ உத்³தி³ஸ்ஸ தி³ன்னம் வா ஸங்கி⁴கேன தத்ருப்பாதே³ன ஆப⁴தம் வா, யேன கேனசி ஆகாரேன யம் ஸங்கி⁴கம் சீவரம் உப்பஜ்ஜதி, தம் தேஸம் ப⁴விஸ்ஸதீதி அத்தோ². இமே பஞ்ச கதி²னானிஸம்ஸா ச வுத்தாதி ஸம்ப³ந்தோ⁴.

கதி²னக்க²ந்த⁴ககதா²வண்ணனா.