சம்மக்க²ந்த⁴ககதா²வண்ணனா

2650. ஏளகா ச அஜா ச மிகா³ சாதி விக்³க³ஹோ. பஸூனம் த்³வந்தே³ ஏகத்தனபும்ஸகத்தஸ்ஸ விபா⁴ஸிதத்தா ப³ஹுவசனனித்³தே³ஸோ. ஏளகானஞ்ச அஜானஞ்ச மிகா³னம் ரோஹிதேணிகுருங்கா³னஞ்ச. பஸதா³ ச மிக³மாதா ச பஸத³மிக³மாதா, ‘‘பஸத³மிக³மாதுயா’’தி வத்தப்³பே³ கா³தா²ப³ந்த⁴வஸேன ‘‘பஸத³’’ந்தி நிக்³க³ஹிதாக³மோ. பஸத³மிக³மாதுயா ச சம்மம் பி⁴க்கு²னோ வட்டதீதி யோஜனா. ‘‘மிகா³ன’’ந்தி இமினா க³ஹிதானமேவேத்த² விபா⁴க³த³ஸ்ஸனம் ‘‘ரோஹிதேணீ’’திஆதி³. ரோஹிதாத³யோ மிக³விபா⁴க³விஸேஸா.

2651. ஏதேஸம் யதா²வுத்தஸத்தானம் சம்மம் ட²பேத்வா அஞ்ஞம் சம்மம் து³க்கடாபத்தியா வத்து²பூ⁴தந்தி அத்தோ². அஞ்ஞந்தி ச –

‘‘மக்கடோ காளஸீஹோ ச, ஸரபோ⁴ கத³லீமிகோ³;

யே ச வாளமிகா³ ஹோந்தி, தேஸம் சம்மம் ந வட்டதீ’’தி. (மஹாவ. அட்ட². 259) –

அட்ட²கதா²ய படிக்கி²த்தம் சம்மமாஹ. மக்கடோ நாம ஸாக²மிகோ³. காளஸீஹோ நாம மஹாமுக²வானரஜாதிகோ. வாளமிகா³ நாம ஸீஹப்³யக்³கா⁴த³யோ. யதா²ஹ – ‘‘தத்த² வாளமிகா³தி ஸீஹப்³யக்³க⁴அச்ச²தரச்சா², ந கேவலஞ்ச ஏதேயேவ, யேஸம் பன சம்மம் வட்டதீதி வுத்தம், தே ட²பேத்வா அவஸேஸா அந்தமஸோ கோ³மஹிம்ஸஸ்ஸமிளாராத³யோபி ஸப்³பே³ இமஸ்மிம் அத்தே² ‘வாளமிகா³’த்வேவ வேதி³தப்³பா³’’தி.

த²விகா ச உபாஹனா ச த²விகோபாஹனம். அமானுஸம் மனுஸ்ஸசம்மரஹிதம் ஸப்³ப³ம் சம்மம் த²விகோபாஹனே வட்டதீதி யோஜனா. ஏத்த² த²விகாதி உபாஹனாதி³கோஸகஸ்ஸ க³ஹணம். யதா²ஹ ‘‘மனுஸ்ஸசம்மம் ட²பேத்வா யேன கேனசி சம்மேன உபாஹனா வட்டதி. உபாஹனாகோஸகஸத்த²ககோஸககுஞ்ஜிகாகோஸகேஸுபி ஏஸேவ நயோ’’தி (மஹாவ. அட்ட². 259).

2652. ‘‘அனுஜானாமி, பி⁴க்க²வே, ஸப்³ப³பச்சந்திமேஸு ஜனபதே³ஸு கு³ணங்கு³ணூபாஹன’’ந்தி (மஹாவ. 259) வசனதோ ‘‘வட்டந்தி மஜ்ஜி²மே தே³ஸே, ந கு³ணங்கு³ணூபாஹனா’’தி வுத்தம். மஜ்ஜி²மே தே³ஸேதி ‘‘புரத்தி²மாய தி³ஸாய க³ஜங்க³லம் நாம நிக³மோ’’திஆதி³னா (மஹாவ. 259) வுத்தஸீமாபரிச்சே²தே³ மஜ்ஜி²மதே³ஸே. கு³ணங்கு³ணூபாஹனாதி சதுபடலதோ பட்டா²ய ப³ஹுபடலா உபாஹனா. யதா²ஹ – ‘‘கு³ணங்கு³ணூபாஹனாதி சதுபடலதோ பட்டா²ய வுச்சதீ’’தி (மஹாவ. அட்ட². 245). மஜ்ஜி²மதே³ஸே கு³ணங்கு³ணூபாஹனா ந வட்டந்தீதி யோஜனா. அந்தோஆராமேதி ஏத்த² பகரணதோ ‘‘ஸப்³பே³ஸ’’ந்தி லப்³ப⁴தி, கி³லானானமிதரேஸஞ்ச ஸப்³பே³ஸந்தி அத்தோ². ஸப்³ப³த்தா²பி சாதி அந்தோஆராமே, ப³ஹி சாதி ஸப்³ப³த்தா²பி. ரோகி³னோதி கி³லானஸ்ஸ வட்டந்தீதி யோஜனா.

2653. புடப³த்³தா⁴ க²ல்லகப³த்³தா⁴சாதி பச்சேகம் யோஜேதப்³ப³ம். விஸேஸோ பனேதாஸம் அட்ட²கதா²யமேவ வுத்தோ ‘‘புடப³த்³தா⁴தி யோனகஉபாஹனா வுச்சதி, யா யாவஜங்க⁴தோ ஸப்³ப³பாத³ம் படிச்சா²தே³தி. க²ல்லகப³த்³தா⁴தி பண்ஹிபிதா⁴னத்த²ம் தலே க²ல்லகம் ப³ந்தி⁴த்வா கதா’’தி. பாலிகு³ண்டி²மா ச ‘‘பலிகு³ண்டி²த்வா கதா, யா உபரி பாத³மத்தமேவ படிச்சா²தே³தி, ந ஜங்க⁴’’ந்தி அட்ட²கதா²யம் த³ஸ்ஸிதாவ. தூலபுண்ணாதி தூலபிசுனா பூரேத்வா கதா.

ஸப்³பா³வ நீலா ஸப்³ப³னீலா, ஸா ஆதி³ யாஸம் தா ஸப்³ப³னீலாத³யோ. ஆதி³-ஸத்³தே³ன மஹானாமரத்தபரியந்தானம் க³ஹணம். ஏதாஸம் ஸரூபம் அட்ட²கதா²யமேவ வுத்தம் ‘‘நீலிகா உமாபுப்ப²வண்ணா ஹோதி, பீதிகா கணிகாரபுப்ப²வண்ணா, லோஹிதிகா ஜயஸுமனபுப்ப²வண்ணா, மஞ்ஜிட்டி²கா மஞ்ஜிட்ட²வண்ணா ஏவ, கண்ஹா அத்³தா³ரிட்ட²கவண்ணா, மஹாரங்க³ரத்தா ஸதபதி³பிட்டி²வண்ணா, மஹானாமரத்தா ஸம்பி⁴ன்னவண்ணா ஹோதி பண்டு³பலாஸவண்ணா. குருந்தி³யம் பன ‘பது³மபுப்ப²வண்ணா’தி வுத்த’’ந்தி (மஹாவ. அட்ட². 246). ஸப்³ப³னீலாத³யோபி சாதி அபி-ஸத்³தே³ன நீலாதி³வத்³தி⁴கானம் க³ஹணம்.

2654. சித்ராதி விசித்ரா. மேண்ட³விஸாணூபமவத்³தி⁴காதி மேண்டா³னம் விஸாணஸதி³ஸவத்³தி⁴கா, கண்ணிகட்டா²னே மேண்ட³ஸிங்க³ஸண்டா²னே வத்³தே⁴ யோஜேத்வா கதாதி அத்தோ². ‘‘மேண்ட³விஸாணூபமவத்³தி⁴கா’’தி இத³ம் அஜவிஸாணூபமவத்³தி⁴கானம் உபலக்க²ணம். மோரஸ்ஸ பிஞ்சே²ன பரிஸிப்³பி³தாதி தலேஸு வா வத்³தே⁴ஸு வா மோரபிஞ்சே²ஹி ஸுத்தகஸதி³ஸேஹி பரிஸிப்³பி³தா. உபாஹனா ந ச வட்டந்தீதி யோஜனா.

2655. மஜ்ஜாராதி பி³ளாரா. காளகா ருக்க²கண்டகா. ஊலூகா பக்கி²பி³ளாலா. ஸீஹாதி கேஸரஸீஹாத³யோ ஸீஹா. உத்³தா³தி சதுப்பத³ஜாதிகா. தீ³பீ ஸத்³த³லா. அஜினஸ்ஸாதி ஏவம்னாமிகஸ்ஸ. பரிக்க²டாதி உபாஹனபரியந்தே சீவரே அனுவாதம் விய வுத்தப்பகாரம் சம்மம் யோஜேத்வா கதா.

2656. ஸசே ஈதி³ஸா உபாஹனா லப⁴ந்தி, தாஸம் வளஞ்ஜனப்பகாரம் த³ஸ்ஸேதுமாஹ ‘‘புடாதி³ம் அபனேத்வா’’திஆதி³. புடாதி³ம் ஸப்³ப³ஸோ சி²ந்தி³த்வா வா அபனேத்வா வா உபாஹனா தா⁴ரேதப்³பா³தி யோஜனா. ஏவமகத்வா லத்³த⁴னீஹாரேனேவ தா⁴ரேந்தஸ்ஸ து³க்கடம். யதா²ஹ – ‘‘ஏதாஸு யம் கிஞ்சி லபி⁴த்வா ஸசே தானி க²ல்லகாதீ³னி அபனேத்வா ஸக்கா ஹோந்தி வளஞ்ஜிதும், வளஞ்ஜேதப்³பா³, தேஸு பன ஸதி வளஞ்ஜந்தஸ்ஸ து³க்கட’’ந்தி (மஹாவ. அட்ட². 246).

வண்ணபே⁴த³ம் ததா² கத்வாதி ஏத்த² ‘‘ஏகதே³ஸேனா’’தி ஸேஸோ. ‘‘ஸப்³ப³ஸோ வா’’தி ஆஹரித்வா ஸப்³ப³ஸோ வா ஏகதே³ஸேன வா வண்ணபே⁴த³ம் கத்வா ஸப்³ப³னீலாத³யோ உபாஹனா தா⁴ரேதப்³பா³தி யோஜனா. ததா² அகத்வா தா⁴ரேந்தஸ்ஸ து³க்கடம். யதா²ஹ ‘‘ஏதாஸு யம் கிஞ்சி லபி⁴த்வா ரஜனம் சோளகேன புஞ்சி²த்வா வண்ணம் பி⁴ந்தி³த்வா தா⁴ரேதும் வட்டதி. அப்பமத்தகேபி பி⁴ன்னே வட்டதியேவா’’தி. நீலவத்³தி⁴காத³யோபி வண்ணபே⁴த³ம் கத்வா தா⁴ரேதப்³பா³.

2657. தத்த² டா²னே பஸ்ஸாவபாது³கா, வச்சபாது³கா, ஆசமனபாது³காதி திஸ்ஸோ பாது³காயோ ட²பேத்வா ஸப்³பா³பி பாது³கா தாலபத்திகாதி³பே⁴தா³ ஸப்³பா³பி ஸங்கமனீயா பாது³கா தா⁴ரேதும் ந வட்டந்தீதி யோஜனா.

2658. அதிக்கந்தபமாணம் உச்சாஸயனஸஞ்ஞிதம் ஆஸந்தி³ஞ்சேவ பல்லங்கஞ்ச ஸேவமானஸ்ஸ து³க்கடந்தி யோஜனா. ஆஸந்தீ³ வுத்தலக்க²ணாவ. பல்லங்கோதி பாதே³ஸு ஆஹரிமானி வாளரூபானி ட²பேத்வா கதோ, ஏகஸ்மிம்யேவ தா³ரும்ஹி கட்ட²கம்மவஸேன சி²ந்தி³த்வா கதானி அஸம்ஹாரிமானி தத்ரட்டா²னேவ வாளரூபானி யஸ்ஸ பாதே³ஸு ஸந்தி, ஏவரூபோ பல்லங்கோ கப்பதீதி ‘‘ஆஹரிமேனா’’தி இமினாவ தீ³பிதம். ‘‘அகப்பியரூபகதோ அகப்பியமஞ்சோ பல்லங்கோ’’தி ஹி ஸாரஸமாஸே வுத்தம்.

2659. கோ³னகந்தி தீ³க⁴லோமகமஹாகோஜவம். சதுரங்கு³லாதி⁴கானி கிர தஸ்ஸ லோமானி, காளவண்ணஞ்ச ஹோதி. ‘‘சதுரங்கு³லதோ ஊனகப்பமாணலோமோ கோஜவோ வட்டதீ’’தி வத³ந்தி. குத்தகந்தி ஸோளஸன்னம் நாடகித்தீ²னம் ட²த்வா நச்சனயோக்³க³ம் உண்ணாமயத்த²ரணம். சித்தந்தி பி⁴த்திச்சி²த்³தா³தி³கவிசித்ரம் உண்ணாமயத்த²ரணம். படிகந்தி உண்ணாமயம் ஸேதத்த²ரணம். படலிகந்தி க⁴னபுப்ப²கம் உண்ணாமயம் லோஹிதத்த²ரணம், யோ ‘‘ஆமலகபத்தோ’’திபி வுச்சதி.

ஏகந்தலோமிந்தி உப⁴தோ உக்³க³தலோமம் உண்ணாமயத்த²ரணம். விகதிந்தி ஸீஹப்³யக்³கா⁴தி³ரூபவிசித்ரம் உண்ணாமயத்த²ரணம். ‘‘ஏகந்தலோமீதி ஏகதோத³ஸம் உண்ணாமயத்த²ரண’’ந்தி தீ³க⁴னிகா. தூலிகந்தி ருக்க²தூலலதாதூலபோடகிதூலஸங்கா²தானம் திண்ணம் தூலானம் அஞ்ஞதரபுண்ணம் பகதிதூலிகம். உத்³த³லோமிகந்தி ஏகதோ உக்³க³தலோமம் உண்ணாமயத்த²ரணம். ‘‘உத்³த³லோமீதி உப⁴தோத³ஸம் உண்ணாமயத்த²ரணம். ஏகந்தலோமீதி ஏகதோத³ஸம் உண்ணாமயத்த²ரண’’ந்தி (தீ³. நி. அட்ட². 1.15) தீ³க⁴னிகாயட்ட²கதா²யம் வுத்தம். ஸாரஸமாஸே பன ‘‘உத்³த³லோமீதி ஏகதோ உக்³க³தபுப்ப²ம். ஏகந்தலோமீதி உப⁴தோ உக்³க³தபுப்ப²’’ந்தி வுத்தம்.

2660. கட்டிஸ்ஸந்தி ரதனபரிஸிப்³பி³தம் கோஸேய்யகட்டிஸ்ஸமயம் பச்சத்த²ரணம். ‘‘கோஸேய்யகட்டிஸ்ஸமயந்தி கோஸேய்யகஸடமய’’ந்தி (தீ³. நி. டீ. 1.15) ஆசரியத⁴ம்மபாலத்தே²ரேன வுத்தம், கந்திதகோஸேய்யபுடமயந்தி அத்தோ². கோஸேய்யந்தி ரதனபரிஸிப்³பி³தம் கோஸியஸுத்தமயம் பச்சத்த²ரணம். ரதனபரிஸிப்³ப³னரஹிதம் ஸுத்³த⁴கோஸேய்யம் பன வட்டதி.

தீ³க⁴னிகாயட்ட²கதா²யம் பனேத்த² ‘‘ட²பேத்வா தூலிகம் ஸப்³பா³னேவ கோ³னகாதீ³னி ரதனபரிஸிப்³பி³தானி ந வட்டந்தீ’’தி (தீ³. நி. அட்ட². 1.15) வுத்தம். தத்த² ‘‘ட²பேத்வா தூலிக’’ந்தி ஏதேன ரதனபரிஸிப்³ப³னரஹிதாபி தூலிகா ந வட்டதீதி தீ³பேதி. ‘‘ரதனபரிஸிப்³பி³தானி ந வட்டந்தீ’’தி இமினா பன யானி ரதனபரிஸிப்³பி³தானி, தானி பூ⁴மத்த²ரணவஸேன யதா²னுரூபம் மஞ்சாதீ³ஸு ச உபனேதும் வட்டதீதி தீ³பிதந்தி வேதி³தப்³ப³ம். ஏத்த² ச வினயபரியாயம் பத்வா க³ருகே டா²தப்³ப³த்தா இத⁴ வுத்தனயேனேவேத்த² வினிச்ச²யோ வேதி³தப்³போ³. ஸுத்தந்திகதே³ஸனாயம் பன க³ஹட்டா²னம்பி வஸேன வுத்தத்தா நேஸம் ஸங்க³ண்ஹனத்த²ம் ‘‘ட²பேத்வா தூலிகம்…பே… வட்டந்தீதி வுத்த’’ந்தி (தீ³. நி. அட்ட². 1.15) அபரே.

ஹத்தி²அஸ்ஸரத²த்த²ரந்தி ஹத்தி²பிட்டே² அத்த²ரிதம் அத்த²ரணம் ஹத்த²த்த²ரணம் நாம. அஸ்ஸரத²த்த²ரேபி ஏஸேவ நயோ. கத³லிமிக³பவர-பச்சத்த²ரணகம்பி சாதி கத³லிமிக³சம்மம் நாம அத்தி², தேன கதம் பவரபச்சத்த²ரணந்தி அத்தோ². தம் கிர ஸேதவத்த²ஸ்ஸ உபரி கத³லிமிக³சம்மம் பத்த²ரித்வா ஸிப்³பே³த்வா கரோந்தி. பி-ஸத்³தே³ன அஜினப்பவேணீ க³ஹிதா. அஜினப்பவேணீ நாம அஜினசம்மேஹி மஞ்சபமாணேன ஸிப்³பே³த்வா கதா பவேணீ. தானி கிர சம்மானி ஸுகு²மதரானி, தஸ்மா து³பட்டதிபட்டானி கத்வா ஸிப்³ப³ந்தி. தேன வுத்தம் ‘‘அஜினப்பவேணீ’’தி.

2661. ரத்தவிதானஸ்ஸ ஹேட்டா²தி குஸும்பா⁴தி³ரத்தஸ்ஸ லோஹிதவிதானஸ்ஸ ஹேட்டா² கப்பியபச்சத்த²ரணேஹி அத்த²தம் ஸயனாஸனஞ்ச. கஸாவரத்தவிதானஸ்ஸ பன ஹேட்டா² கப்பியபச்சத்த²ரணேன அத்த²தம் வட்டதி. தேனேவ வக்க²தி ‘‘ஹேட்டா² அகப்பியே’’திஆதி³.

த்³விதா⁴ ரத்தூபதா⁴னகந்தி ஸீஸபஸ்ஸே, பாத³பஸ்ஸே சாதி உப⁴தோபஸ்ஸே பஞ்ஞத்தரத்தபி³ப்³போ³ஹனவந்தஞ்ச ஸயனாஸனம். இத³ம் ஸப்³ப³ம் அகப்பியம் பரிபு⁴ஞ்ஜதோ து³க்கடம் ஹோதி. ‘‘யம் பன ஏகமேவ உபதா⁴னம் உபோ⁴ஸு பஸ்ஸேஸு ரத்தம் வா ஹோதி பது³மவண்ணம் வா விசித்ரம் வா, ஸசே பமாணயுத்தம், வட்டதீ’’தி (மஹாவ. அட்ட². 254) அட்ட²கதா²வினிச்ச²யோ ஏதேனேவ ப்³யதிரேகதோ வுத்தோ ஹோதி. ‘‘யேபு⁴ய்யரத்தானிபி த்³வே பி³ப்³போ³ஹனானி ந வட்டந்தீ’’தி க³ண்டி²பதே³ வுத்தம். தேனேவ யேபு⁴ய்யேன ரத்தவிதானம்பி ந வட்டதீதி விஞ்ஞாயதி.

ஏத்த² ச கிஞ்சாபி தீ³க⁴னிகாயட்ட²கதா²யம் ‘‘அலோஹிதகானி த்³வேபி வட்டந்தியேவ, ததோ உத்தரி லபி⁴த்வா அஞ்ஞேஸம் தா³தப்³பா³னி, தா³தும் அஸக்கோந்தோ மஞ்சே திரியம் அத்த²ரித்வா உபரி பச்சத்த²ரணம் த³த்வா நிபஜ்ஜிதும்பி லப⁴தீ’’தி (தீ³. நி. அட்ட². 1.15) அவிஸேஸேன வுத்தம். ஸேனாஸனக்க²ந்த⁴கஸம்வண்ணனாயம் பன ‘‘அகி³லானஸ்ஸ ஸீஸூபதா⁴னஞ்ச பாதூ³பதா⁴னஞ்சாதி த்³வயமேவ வட்டதி, கி³லானஸ்ஸ பி³ப்³போ³ஹனானி ஸந்த²ரித்வா உபரி பச்சத்த²ரணம் த³த்வா நிபஜ்ஜிதும்பி வட்டதீ’’தி (சூளவ. அட்ட². 297) வுத்தத்தா கி³லானோயேவ மஞ்சே திரியம் அத்த²ரித்வா நிபஜ்ஜிதும் லப⁴தீதி வேதி³தப்³ப³ம்.

2662. உத்³த⁴ம் ஸேதவிதானம்பி ஹேட்டா² அகப்பியே பச்சத்த²ரணே ஸதி ந வட்டதீதி யோஜனா. தஸ்மிந்தி அகப்பியபச்சத்த²ரணே.

2663. ‘‘ட²பேத்வா’’தி இமினா ஆஸந்தா³தி³த்தயஸ்ஸ வட்டனாகாரோ நத்தீ²தி தீ³பேதி. ஸேஸம் ஸப்³ப³ந்தி கோ³னகாதி³ த்³விதா⁴ரத்தூபதா⁴னகபரியந்தம் ஸப்³ப³ம். கி³ஹிஸந்தகந்தி கி³ஹீனம் ஸந்தகம் தேஹியேவ பஞ்ஞத்தம், இமினா பஞ்சஸு ஸஹத⁴ம்மிகேஸு அஞ்ஞதரேன வா தேஸம் ஆணத்தியா வா பஞ்ஞத்தம் ந வட்டதீதி தீ³பேதி. லப⁴தேதி நிஸீதி³தும் லப⁴தி.

2664. தம் கத்த² லப⁴தீதி பதே³ஸனியமம் த³ஸ்ஸேதுமாஹ ‘‘த⁴ம்மாஸனே’’திஆதி³. த⁴ம்மாஸனேதி ஏத்த² அட்ட²கதா²யம் ‘‘யதி³ த⁴ம்மாஸனே ஸங்கி⁴கம்பி கோ³னகாதி³ம் பி⁴க்கூ²ஹி அனாணத்தா ஆராமிகாத³யோ ஸயமேவ பஞ்ஞாபேந்தி சேவ நீஹரந்தி ச, ஏதம் கி³ஹிவிகதனீஹாரம் நாம. இமினா கி³ஹிவிகதனீஹாரேன வட்டதீ’’தி (சூளவ. அட்ட². 320; வி. ஸங்க³. அட்ட². பகிண்ணகவினிச்ச²யகதா² 56 அத்த²தோ ஸமானம்) வுத்தம். ப⁴த்தக்³கே³ வாதி விஹாரே நிஸீதா³பேத்வா பரிவேஸனட்டா²னே வா போ⁴ஜனஸாலாயம் வா. அபிஸத்³தே³ன கி³ஹீனம் கே³ஹேபி தேஹி பஞ்ஞத்தே கோ³னகாதி³ம்ஹி நிஸீதி³தும் அனாபத்தீதி தீ³பேதி. த⁴ம்மாஸனாதி³பதே³ஸனியமனேன ததோ அஞ்ஞத்த² கி³ஹிபஞ்ஞத்தேபி தத்த² நிஸீதி³தும் ந வட்டதீதி ப்³யதிரேகதோ விஞ்ஞாயதி.

பூ⁴மத்த²ரணகேதி ஏத்த² ‘‘கதே’’தி ஸேஸோ. தத்தா²தி ஸங்கி⁴கே வா கி³ஹிஸந்தகே வா கோ³னகாதி³ம்ஹி ஸஹத⁴ம்மிகேஹி அனாணத்தேஹி கி³ஹீஹி ஏவ பூ⁴மத்த²ரணே கதே. ஸயிதுந்தி உபரி அத்தனோ பச்சத்த²ரணம் த³த்வா நிபஜ்ஜிதும் வட்டதி. அபி-ஸத்³தே³ன நிஸீதி³தும்பி வாதி ஸமுச்சினோதி. ‘‘பூ⁴மத்த²ரணகே’’தி இமினா கி³ஹீஹி ஏவ மஞ்சாதீ³ஸு ஸயனத்த²ம் அத்த²தே உபரி அத்தனோ பச்சத்த²ரணம் த³த்வா ஸயிதும் வா நிஸீதி³தும் வா ந வட்டதீதி தீ³பேதி.

சம்மக்க²ந்த⁴ககதா²வண்ணனா.