பவாரணக்க²ந்த⁴ககதா²வண்ணனா

2633. ‘‘பவாரணா’’தி இத³ம் ‘‘சாதுத்³த³ஸீ’’திஆதீ³ஹி பச்சேகம் யோஜேதப்³ப³ம். தஸ்மிம் தஸ்மிம் தி³னே காதப்³பா³ பவாரணா அபே⁴தோ³பசாரேன ததா² வுத்தா. ஸாமக்³கீ³ உபோஸத²க்க²ந்த⁴ககதா²வண்ணனாய வுத்தஸரூபாவ. ஸாமக்³கி³பவாரணம் கரோந்தேஹி ச பட²மம் பவாரணம் ட²பேத்வா பாடிபத³தோ பட்டா²ய யாவ கத்திகசாதுமாஸிபுண்ணமா ஏத்த²ந்தரே காதப்³பா³, ததோ பச்சா² வா புரே வா ந வட்டதி. தேவாசீ த்³வேகவாசீதி ‘‘ஸுணாது மே, ப⁴ந்தே…பே… தேவாசிகம் பவாரேய்ய, த்³வேவாசிகம் பவாரேய்ய, ஏகவாசிகம் பவாரேய்யா’’தி தம் தம் ஞத்திம் ட²பேத்வா காதப்³பா³ பவாரணா வுச்சதி.

2634. தீணி கம்மானி முஞ்சித்வா, அந்தேனேவ பவாரயேதி ‘‘சத்தாரிமானி, பி⁴க்க²வே, பவாரணகம்மானி, அத⁴ம்மேன வக்³க³ம் பவாரணகம்மம்…பே… த⁴ம்மேன ஸமக்³க³ம் பவாரணகம்ம’’ந்தி (மஹாவ. 212) வத்வா ‘‘தத்ர, பி⁴க்க²வே, யதி³த³ம் அத⁴ம்மேன வக்³க³ம் பவாரணகம்மம், ந, பி⁴க்க²வே, ஏவரூபம் பவாரணகம்மம் காதப்³ப³ம்…பே… தத்ர, பி⁴க்க²வே, யதி³த³ம் த⁴ம்மேன ஸமக்³க³ம் பவாரணகம்மம், ஏவரூபம், பி⁴க்க²வே, பவாரணகம்மம் காதப்³ப³’’ந்திஆதி³வசனதோ (மஹாவ. 212) தீணி அகத்தப்³பா³னி பவாரணகம்மானி முஞ்சித்வா காதும் அனுஞ்ஞாதேன சதுத்தே²ன பவாரணகம்மேன பவாரேய்யாதி அத்தோ². தஸ்ஸ விபா⁴கே³கதே³ஸம் ‘‘பஞ்ச யஸ்மிம் பனாவாஸே’’திஆதி³னா வக்க²தி.

2635. புப்³ப³கிச்சம் ஸமாபேத்வாதி –

‘‘ஸம்மஜ்ஜனீ பதீ³போ ச, உத³கம் ஆஸனேன ச;

பவாரணாய ஏதானி, ‘புப்³ப³கரண’ந்தி வுச்சதி.

‘‘ச²ந்த³பாரிஸுத்³தி⁴உதுக்கா²னம், பி⁴க்கு²க³ணனா ச ஓவாதோ³;

பவாரணாய ஏதானி, ‘புப்³ப³கிச்ச’ந்தி வுச்சதீ’’தி. –

வுத்தம் நவவித⁴ம் புப்³ப³கிச்சம் நிட்டா²பேத்வா.

பத்தகல்லே ஸமானிதேதி –

‘‘பவாரணா யாவதிகா ச பி⁴க்கூ² கம்மப்பத்தா,

ஸபா⁴கா³பத்தியோ ச ந விஜ்ஜந்தி;

வஜ்ஜனீயா ச புக்³க³லா தஸ்மிம் ந ஹோந்தி,

‘பத்தகல்ல’ந்தி வுச்சதீ’’தி. –

வுத்தே சதுப்³பி³தே⁴ பத்தகல்லே ஸமோதா⁴னிதே பரிஸமாபிதே.

ஞத்திம் ட²பேத்வாதி ‘‘ஸுணாது மே, ப⁴ந்தே ஸங்கோ⁴, அஜ்ஜ பவாரணா, யதி³ ஸங்க⁴ஸ்ஸ பத்தகல்லம், ஸங்கோ⁴ பவாரேய்யா’’தி (மஹாவ. 210) ஏவம் ஸப்³ப³ஸங்கா³ஹிகவஸேன ச ‘‘தேவாசிகம் பவாரேய்யா’’தி ச தா³னாதி³கரணேன யேபு⁴ய்யேன ரத்தியா கே²பிதாய ச ராஜாதி³அந்தராயே ஸதி ச தத³னுரூபதோ ‘‘த்³வேவாசிகம், ஏகவாசிகம், ஸமானவஸ்ஸிகம் பவாரேய்யா’’தி ச ஞத்திம் ட²பேத்வா, தாஸம் விஸேஸோ அட்ட²கதா²யம் த³ஸ்ஸிதோயேவ. யதா²ஹ –

‘‘ஏவஞ்ஹி வுத்தே தேவாசிகஞ்ச த்³வேவாசிகஞ்ச ஏகவாசிகஞ்ச பவாரேதும் வட்டதி, ஸமானவஸ்ஸிகம் ந வட்டதி. ‘தேவாசிகம் பவாரேய்யா’தி வுத்தே பன தேவாசிகமேவ வட்டதி, அஞ்ஞம் ந வட்டதி, ‘த்³வேவாசிகம் பவாரேய்யா’தி வுத்தே த்³வேவாசிகஞ்ச தேவாசிகஞ்ச வட்டதி, ஏகவாசிகஞ்ச ஸமானவஸ்ஸிகஞ்ச ந வட்டதி. ‘ஏகவாசிகம் பவாரேய்யா’தி வுத்தே பன ஏகவாசிகத்³வேவாசிகதேவாசிகானி வட்டந்தி, ஸமானவஸ்ஸிகமேவ ந வட்டதி. ‘ஸமானவஸ்ஸிக’ந்தி வுத்தே ஸப்³ப³ம் வட்டதீ’’தி (மஹாவ. அட்ட². 210).

காதப்³பா³தி தே²ரேன பி⁴க்கு²னா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ ‘‘ஸங்க⁴ம், ஆவுஸோ, பவாரேமி தி³ட்டே²ன வா…பே… ததியம்பி ஆவுஸோ, ஸங்க⁴ம் பவாரேமி தி³ட்டே²ன வா…பே… பஸ்ஸந்தோ படிகரிஸ்ஸாமீ’’தி (மஹாவ. 210) வுத்தனயேன காதப்³பா³. நவகேன பி⁴க்கு²னா ஏகம்ஸம் உத்தராஸங்க³ம் கரித்வா…பே… ததியம்பி, ப⁴ந்தே, ஸங்க⁴ம் பவாரேமி தி³ட்டே²ன வா…பே… பஸ்ஸந்தோ படிகரிஸ்ஸாமீதி (மஹாவ. 210) வுத்தனயேன காதப்³பா³.

2636. தே²ரேஸு பவாரேந்தேஸு யோ பன நவோ, ஸோ ஸயம் யாவ பவாரேதி, தாவ உக்குடிகம் நிஸீதே³ய்யாதி யோஜனா.

2637. சத்தாரோ வா தயோபி வா ஏகாவாஸே ஏகஸீமாயம் வஸந்தி சே, ஞத்திம் வத்வா ‘‘ஸுணந்து மே, ஆயஸ்மந்தோ, அஜ்ஜ பவாரணா, யதா³யஸ்மந்தானம் பத்தகல்லம், மயம் அஞ்ஞமஞ்ஞம் பவாரேய்யாமா’’தி (மஹாவ. 216) க³ணஞத்திம் ட²பேத்வா பவாரேய்யுந்தி யோஜனா.

பவாரேய்யுந்தி ஏத்த² தே²ரேன பி⁴க்கு²னா ஏகம்ஸம் உத்தராஸங்க³ம் கத்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா தே தயோ வா த்³வே வா பி⁴க்கூ² ஏவமஸ்ஸு வசனீயா ‘‘அஹம், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தோ அனுகம்பம் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தோ அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி (மஹாவ. 216) பவாரேதப்³ப³ம். நவேனபி ‘‘அஹம், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தோ அனுகம்பம் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தோ அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி பவாரேதப்³ப³ம்.

2638. அஞ்ஞமஞ்ஞம் பவாரேய்யும், வினா ஞத்திம் து³வே ஜனா. தேஸு தே²ரேன ‘‘அஹம், ஆவுஸோ, ஆயஸ்மந்தம் பவாரேமி தி³ட்டே²ன வா ஸுதேன வா பரிஸங்காய வா, வத³து மம் ஆயஸ்மா அனுகம்பம் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ஆவுஸோ, ஆயஸ்மந்தம் பவாரேமி…பே… படிகரிஸ்ஸாமீ’’தி (மஹாவ. 217) பவாரேதப்³ப³ம். நவேனபி ‘‘அஹம், ப⁴ந்தே, ஆயஸ்மந்தம் பவாரேமி…பே… வத³து மம் ஆயஸ்மா அனுகம்பம் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ப⁴ந்தே, ஆயஸ்மந்தம் பவாரேமி…பே… படிகரிஸ்ஸாமீ’’தி பவாரேதப்³ப³ம்.

அதி⁴ட்டே²ய்யாதி புப்³ப³கிச்சம் ஸமாபேத்வா ‘‘அஜ்ஜ மே பவாரணா சாதுத்³த³ஸீ’’தி வா ‘‘பன்னரஸீ’’தி வா வத்வா ‘‘அதி⁴ட்டா²மீ’’தி அதி⁴ட்டே²ய்ய. யதா²ஹ ‘‘அஜ்ஜ மே பவாரணாதி ஏத்த² ஸசே சாதுத்³த³ஸிகா ஹோதி, ‘அஜ்ஜ மே பவாரணா சாதுத்³த³ஸீ’தி, ஸசே பன்னரஸிகா, ‘அஜ்ஜ மே பவாரணா பன்னரஸீ’தி ஏவம் அதி⁴ட்டா²தப்³ப³’’ந்தி (மஹாவ. அட்ட². 218), இமினா ஸப்³ப³ஸங்கா³ஹாதி³ஞத்தீஸு ச தஸ்மிம் தஸ்மிம் தி³வஸே ஸோ ஸோ வோஹாரோ காதப்³போ³தி தீ³பிதமேவ.

ஸேஸா ஸங்க⁴பவாரணாதி பஞ்சஹி, அதிரேகேஹி வா பி⁴க்கூ²ஹி கத்தப்³பா³ பவாரணா ஸங்க⁴பவாரணா.

2639. பவாரிதேதி பட²மபவாரணாய பவாரிதே. அனாக³தோதி கேனசி அந்தராயேன புரிமிகாய ச பச்சி²மிகாய ச வஸ்ஸூபனாயிகாய வஸ்ஸம் அனுபக³தோ. அவுத்தோ²தி பச்சி²மிகாய உபக³தோ. வுத்தஞ்ஹி கு²த்³த³ஸிக்கா²வண்ணனாய ‘‘அவுத்தோ²தி பச்சி²மிகாய உபக³தோ அபரினிட்டி²தத்தா ‘அவுத்தோ²’தி வுச்சதீ’’தி. பாரிஸுத்³தி⁴உபோஸத²ம் கரேய்யாதி யோஜனா. ஏத்த² ‘‘தேஸம் ஸந்திகே’’தி ஸேஸோ.

2640-1. யஸ்மிம் பனாவாஸே பஞ்ச வா சத்தாரோ வா தயோ வா ஸமணா வஸந்தி, தே தத்த² ஏகேகஸ்ஸ பவாரணம் ஹரித்வான ஸசே அஞ்ஞமஞ்ஞம் பவாரேந்தி, ஆபத்தி து³க்கடந்தி யோஜனா.

ஸேஸந்தி ‘‘அத⁴ம்மேன ஸமக்³க³’’ந்திஆதி³கம் வினிச்ச²யம். இதா⁴தி இமஸ்மிம் பவாரணாதி⁴காரே. பு³தோ⁴தி வினயத⁴ரோ. உபோஸதே² வுத்தனயேனாதி உபோஸத²வினிச்ச²யே வுத்தக்கமேன. நயேதி ஜானேய்ய.

2642. ஸம்பாதே³தத்தனோ ஸுசிந்தி அத்தனோ உபோஸத²ம் ஸம்பாதே³தி. ஸப்³ப³ம் ஸாதே⁴தீதி உபோஸதா²தி³ஸப்³ப³ம் கம்மம் நிப்பா²தே³தி. நத்தனோதி அத்தனோ உபோஸத²ம் ந நிப்பா²தே³தி.

2643. தஸ்மாதி யஸ்மா அத்தனோ ஸுசிம் ந ஸாதே⁴தி, தஸ்மா. உபி⁴ன்னந்தி அத்தனோ ச ஸங்க⁴ஸ்ஸ ச. கிச்சஸித்³த⁴த்த²மேவிதா⁴தி உபோஸதா²தி³கம்மனிப்பஜ்ஜனத்த²ம் இத⁴ இமஸ்மிம் உபோஸத²கம்மாதி³பகரணே. பாரிஸுத்³தி⁴பீதி ஏத்த² பி-ஸத்³தே³ன பவாரணா ஸங்க³ஹிதா. தேனேவ வக்க²தி ‘‘ச²ந்த³ம் வா பாரிஸுத்³தி⁴ம் வா, க³ஹேத்வா வா பவாரண’’ந்தி.

ச²ந்த³பாரிஸுத்³தி⁴பவாரணம் தே³ந்தேன ஸசே ஸாபத்திகோ ஹோதி, ஆபத்திம் தே³ஸேத்வா ஏகம்ஸம் உத்தராஸங்க³ம் கத்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ச²ந்தா³தி³ஹாரகோ பி⁴க்கு² வத்தப்³போ³ ‘‘ச²ந்த³ம் த³ம்மி, ச²ந்த³ம் மே ஹர, ச²ந்த³ம் மே ஆரோசேஹீ’’தி (மஹாவ. 165), ‘‘பாரிஸுத்³தி⁴ம் த³ம்மி, பாரிஸுத்³தி⁴ம் மே ஹர, பாரிஸுத்³தி⁴ம் மே ஆரோசேஹீ’’தி (மஹாவ. 164), ‘‘பவாரணம் த³ம்மி, பவாரணம் மே ஹர, பவாரணம் மே ஆரோசேஹி, மமத்தா²ய பவாரேஹீ’’தி (மஹாவ. 213).

2644. ‘‘ச²ந்தோ³ ஏகேனா’’தி பத³ச்சே²தோ³. ஏகேன ப³ஹூனம்பி ச²ந்தோ³ ஹாதப்³போ³, ததா² பாரிஸுத்³தி⁴ ஹாதப்³பா³. பி-ஸத்³தே³ன பவாரணா ஹாதப்³பா³தி யோஜனா. பரம்பராஹடோ ச²ந்தோ³தி ப³ஹூனம் வா ஏகஸ்ஸ வா ச²ந்தா³தி³ஹாரகஸ்ஸ ஹத்த²தோ அந்தரா அஞ்ஞேன க³ஹிதா ச²ந்த³பாரிஸுத்³தி⁴பவாரணா. விஸுத்³தி⁴யா ந க³ச்ச²தி அனவஜ்ஜபா⁴வாய ந பாபுணாதி பி³ளாலஸங்க²லிகச²ந்தா³தீ³னம் ஸங்க⁴மஜ்ஜ²ம் அக³மனேன வக்³க³பா⁴வகரணதோ.

ஏத்த² ச யதா² பி³ளாலஸங்க²லிகாய பட²மவலயம் து³தியவலயம் பாபுணாதி, ந ததியம், ஏவமிமேபி ச²ந்தா³த³யோ தா³யகேன யஸ்ஸ தி³ன்னா, ததோ அஞ்ஞத்த² ந க³ச்ச²தீதி பி³ளாலஸங்க²லிகாஸதி³ஸத்தா ‘‘பி³ளாலஸங்க²லிகா’’தி வுத்தா. பி³ளாலஸங்க²லிகாக்³க³ஹணஞ்சேத்த² யாஸம் காஸஞ்சி ஸங்க²லிகானம் உபலக்க²ணமத்தந்தி த³ட்ட²ப்³ப³ம்.

2645-6. ச²ந்த³ம் வா பாரிஸுத்³தி⁴ம் வா பவாரணம் வா க³ஹேத்வா ச²ந்தா³தி³ஹாரகோ ஸங்க⁴மப்பத்வா ஸசே ஸாமணேராதி³பா⁴வம் படிஜானேய்ய வா விப்³ப⁴மேய்ய வா மரேய்ய வா, தம் ஸப்³ப³ம் ச²ந்தா³தி³பா⁴வம் நாஹடம் ஹோதி, ஸங்க⁴ம் பத்வா ஏவம் ஸியா ஸாமணேராதி³பா⁴வம் படிஜானந்தோ, விப்³ப⁴ந்தோ, காலகதோ வா ப⁴வேய்ய, தம் ஸப்³ப³ம் ஹடம் ஆனீதம் ஹோதீதி யோஜனா.

தத்த² ஸாமணேராதி³பா⁴வம் வா படிஜானேய்யாதி ‘‘அஹம் ஸாமணேரோ’’திஆதி³னா பூ⁴தம் ஸாமணேராதி³பா⁴வம் கதே²ய்ய, பச்சா² ஸாமணேரபூ⁴மியம் பதிட்ட²ஹேய்யாதி அத்தோ². ஆதி³-ஸத்³தே³ன அந்திமவத்து²ம் அஜ்ஜா²பன்னோ க³ஹிதோ.

2647. ஸங்க⁴ம் பத்வாதி அந்தமஸோ தம்தம்கம்மப்பத்தஸ்ஸ சதுவக்³கா³தி³ஸங்க⁴ஸ்ஸ ஹத்த²பாஸம் பத்வாதி அத்தோ². பமத்தோதி பமாத³ம் ஸதிஸம்மோஸம் பத்தோ. ஸுத்தோதி நித்³தூ³பக³தோ. கி²த்தசித்தகோதி யக்கா²தீ³ஹி விக்கே²பமாபாதி³தசித்தோ. நாரோசேதீதி அத்தனோ ச²ந்தா³தீ³னம் ஆஹடபா⁴வம் ஏகஸ்ஸாபி பி⁴க்கு²னோ ந கதே²தி. ஸஞ்சிச்சாதி ஸஞ்சேதேத்வா ஜானந்தோயேவ அனாத³ரியோ நாரோசேதி, து³க்கடம் ஹோதி.

2648. யே தேதி யே தே பி⁴க்கூ² தே²ரா வா நவா வா மஜ்ஜி²மா வா. விபஸ்ஸனாதி ஸஹசரியேன ஸமதோ²பி க³ய்ஹதி. ஸமத²விபஸ்ஸனா ச இத⁴ தருணாயேவ அதி⁴ப்பேதா, தஸ்மா விபஸ்ஸனாயுத்தாதி ஏத்த² தருணாஹி ஸமத²விபஸ்ஸனாஹி ஸமன்னாக³தாதி அத்தோ². ரத்திந்தி³வந்தி அச்சந்தஸம்யோகே³ உபயோக³வசனம். அதந்தி³தாதி அனலஸா.

‘‘ரத்திந்தி³வ’’ந்தி ஏத்த² ரத்தி-ஸத்³தே³ன ரத்தியாயேவ க³ஹணம், உதா³ஹு ஏகதே³ஸஸ்ஸாதி ஆஹ ‘‘புப்³ப³ரத்தாபரரத்த’’ந்தி. புப்³பா³ ச ஸா ரத்தி சாதி புப்³ப³ரத்தி, பட²மயாமோ, அபரா ச ஸா ரத்தி சாதி அபரரத்தி, பச்சி²மயாமோ, புப்³ப³ரத்தி ச அபரரத்தி சாதி ஸமாஹாரத்³வந்தே³ ஸமாஸந்தே அ-காரபச்சயம் கத்வா ‘‘புப்³ப³ரத்தாபரரத்த’’ந்தி வுத்தம். இதா⁴பி அச்சந்தஸம்யோகே³ உபயோக³வசனம். மஜ்ஜி²மயாமே காயத³ரத²வூபஸமனத்தா²ய ஸுபனம் அனுஞ்ஞாதந்தி தம் வஜ்ஜேத்வா புரிமபச்சி²மயாமேஸு நிரந்தரபா⁴வனானுயோகோ³ காதப்³போ³தி த³ஸ்ஸனத்த²மேவ வுத்தம். விபஸ்ஸனா பராயனா ஸமத²விபஸ்ஸனாவ பரம் அயனம் பதிட்டா² ஏதேஸந்தி விபஸ்ஸனாபராயனா, ஸமத²விபஸ்ஸனாய யுத்தபயுத்தா ஹோந்தீதி வுத்தம் ஹோதி.

2649. லத்³தோ⁴ பா²ஸுவிஹாரோ யேஹி தே லத்³த⁴பா²ஸுவிஹாரா, தேஸம். பா²ஸுவிஹாரோதி ச ஸுக²விஹாரஸ்ஸ மூலகாரணத்தா தருணா ஸமத²விபஸ்ஸனா அதி⁴ப்பேதா, படிலத்³த⁴தருணஸமத²விபஸ்ஸனானந்தி அத்தோ². ஸியா ந பரிஹானிதி பரிஹானி நாம ஏவம் கதே ந ப⁴வேய்ய.

கத்திகமாஸகேதி சீவரமாஸஸங்கா²தே கத்திகமாஸே பவாரணாய ஸங்க³ஹோ வுத்தோதி யோஜனா. கா³தா²ப³ந்த⁴வஸேன ‘‘ஸங்கா³ஹோ’’தி தீ³கோ⁴ கதோ, பவாரணாஸங்க³ஹோ வுத்தோதி அத்தோ². யதா²ஹ –

‘‘பவாரணாஸங்க³ஹோ ச நாமாயம் விஸ்ஸட்ட²கம்மட்டா²னானம் தா²மக³தஸமத²விபஸ்ஸனானம் ஸோதாபன்னாதீ³னஞ்ச ந தா³தப்³போ³. தருணஸமத²விபஸ்ஸனாலாபி⁴னோ பன ஸப்³பே³ வா ஹோந்து, உபட்³டா⁴ வா, ஏகபுக்³க³லோ வா, ஏகஸ்ஸபி வஸேன தா³தப்³போ³யேவ. தி³ன்னே பவாரணாஸங்க³ஹே அந்தோவஸ்ஸே பரிஹாரோவ ஹோதி, ஆக³ந்துகா தேஸம் ஸேனாஸனம் க³ஹேதும் ந லப⁴ந்தி. தேஹிபி சி²ன்னவஸ்ஸேஹி ந ப⁴விதப்³ப³ம், பவாரேத்வா பன அந்தராபி சாரிகம் பக்கமிதும் லப⁴ந்தீ’’தி (மஹாவ. அட்ட². 241).

பவாரணாஸங்க³ஹஸ்ஸ தா³னப்பகாரோ பன பாளிதோ க³ஹேதப்³போ³.

பவாரணக்க²ந்த⁴ககதா²வண்ணனா.