34. பகிண்ணகவினிச்ச²யகதா²

1. இதா³னி பகிண்ணககதா² ச வேதி³தப்³பா³. ‘‘க³ணபோ⁴ஜனே அஞ்ஞத்ர ஸமயா பாசித்திய’’ந்தி (பாசி. 217) வுத்தம் க³ணபோ⁴ஜனம் (பாசி. அட்ட². 217-218) த்³வீஹி ஆகாரேஹி பஸவதி விஞ்ஞத்திதோ வா நிமந்தனதோ வா. கத²ம் விஞ்ஞத்திதோ பஸவதி? சத்தாரோ பி⁴க்கூ² ஏகதோ டி²தா வா நிஸின்னா வா உபாஸகம் தி³ஸ்வா ‘‘அம்ஹாகம் சதுன்னம்பி ப⁴த்தம் தே³ஹீ’’தி வா விஞ்ஞாபேய்யும், பாடேக்கம் வா பஸ்ஸித்வா ‘‘மய்ஹம் தே³ஹி, மய்ஹம் தே³ஹீ’’தி ஏவம் ஏகதோ வா நானாதோ வா விஞ்ஞாபேத்வா ஏகதோ வா க³ச்ச²ந்து நானாதோ வா, ப⁴த்தம் க³ஹேத்வாபி ஏகதோ வா பு⁴ஞ்ஜந்து நானாதோ வா. ஸசே ஏகதோ க³ண்ஹந்தி, க³ணபோ⁴ஜனம் ஹோதி, ஸப்³பே³ஸம் ஆபத்தி. படிக்³க³ஹணமேவ ஹேத்த² பமாணம். ஏவம் விஞ்ஞத்திதோ பஸவதி.

கத²ம் நிமந்தனதோ பஸவதி? சத்தாரோ பி⁴க்கூ² உபஸங்கமித்வா ‘‘தும்ஹே, ப⁴ந்தே, ஓத³னேன நிமந்தேமி, ஓத³னம் மே க³ண்ஹத² ஆகங்க²த² ஓலோகேத² அதி⁴வாஸேத² படிமானேதா²’’தி ஏவம் யேன கேனசி வேவசனேன வா பா⁴ஸந்தரேன வா பஞ்சன்னம் போ⁴ஜனானம் நாமம் க³ஹேத்வா நிமந்தேதி. ஏவம் ஏகதோ நிமந்திதா பரிச்சி²ன்னகாலவஸேன அஜ்ஜதனாய வா ஸ்வாதனாய வா ஏகதோ க³ச்ச²ந்தி, ஏகதோ க³ண்ஹந்தி, ஏகதோ பு⁴ஞ்ஜந்தி, க³ணபோ⁴ஜனம் ஹோதி, ஸப்³பே³ஸம் ஆபத்தி. ஏகதோ நிமந்திதா ஏகதோ வா நானாதோ வா க³ச்ச²ந்தி, ஏகதோ க³ண்ஹந்தி, ஏகதோ வா நானாதோ வா பு⁴ஞ்ஜந்தி, ஆபத்தியேவ. ஏகதோ நிமந்திதா ஏகதோ வா நானாதோ வா க³ச்ச²ந்தி, நானாதோ க³ண்ஹந்தி, ஏகதோ வா நானாதோ வா பு⁴ஞ்ஜந்தி, அனாபத்தி. சத்தாரி பரிவேணானி வா விஹாரே வா க³ந்த்வா நானாதோ நிமந்திதா, ஏகட்டா²னே டி²தேஸுயேவ வா ஏகோ புத்தேன ஏகோ பிதராதி ஏவம்பி நானாதோ நிமந்திதா ஏகதோ வா நானாதோ வா க³ச்ச²ந்து, ஏகதோ வா நானாதோ வா பு⁴ஞ்ஜந்து, ஸசே ஏகதோ க³ண்ஹந்தி, க³ணபோ⁴ஜனம் ஹோதி, ஸப்³பே³ஸம் ஆபத்தி. ஏவம் தாவ நிமந்தனதோ பஸவதி.

தஸ்மா ஸசே கோசி ஸங்க⁴ப⁴த்தம் கத்துகாமேன நிமந்தனத்தா²ய பேஸிதோ விஹாரம் ஆக³ம்ம ‘‘ப⁴ந்தே, ஸ்வே அம்ஹாகம் க⁴ரே பி⁴க்க²ம் க³ண்ஹதா²’’தி அவத்வா ‘‘ப⁴த்தம் க³ண்ஹதா²’’தி வா ‘‘ஸங்க⁴ப⁴த்தம் க³ண்ஹதா²’’தி வா ‘‘ஸங்கோ⁴ ப⁴த்தம் க³ண்ஹதூ’’தி வா வத³தி, ப⁴த்துத்³தே³ஸகேன பண்டி³தேன ப⁴விதப்³ப³ம். நிமந்தனிகா க³ணபோ⁴ஜனதோ, பிண்ட³பாதிகா ச து⁴தங்க³பே⁴த³தோ மோசேதப்³பா³. கத²ம்? ஏவம் தாவ வத்தப்³ப³ம் ‘‘ஸ்வே ந ஸக்கா உபாஸகா’’தி. புனதி³வஸே, ப⁴ந்தேதி. புனதி³வஸேபி ந ஸக்காதி. ஏவம் யாவ அட்³ட⁴மாஸம்பி ஹரித்வா புன வத்தப்³போ³ ‘‘கிம் த்வம் அவசா’’தி. ஸசே புனபி ‘‘ஸங்க⁴ப⁴த்தம் க³ண்ஹதா²’’தி வத³தி, ததோ ‘‘இமம் தாவ உபாஸக புப்ப²ம் கப்பியம் கரோஹி, இமம் திண’’ந்தி ஏவம் விக்கே²பம் கத்வா புன ‘‘த்வம் கிம் கத²யித்தா²’’தி புச்சி²தப்³போ³. ஸசே புனபி ததே²வ வத³தி, ‘‘ஆவுஸோ, த்வம் பிண்ட³பாதிகே வா மஹல்லகத்தே²ரே வா ந லச்ச²ஸி, ஸாமணேரே லச்ச²ஸீ’’தி வத்தப்³போ³. ‘‘நனு, ப⁴ந்தே, அஸுகஸ்மிம் அஸுகஸ்மிஞ்ச கா³மே ப⁴த³ந்தே போ⁴ஜேஸும், அஹம் கஸ்மா ந லபா⁴மீ’’தி ச வுத்தே தே நிமந்திதும் ஜானந்தி, த்வம் ந ஜானாஸீதி. தே கத²ம் நிமந்தேஸும், ப⁴ந்தேதி? தே ஏவமாஹம்ஸு ‘‘அம்ஹாகம், ப⁴ந்தே, பி⁴க்க²ம் க³ண்ஹதா²’’தி. ஸசே ஸோபி ததே²வ வத³தி, வட்டதி.

அத² புனபி ‘‘ப⁴த்தம் க³ண்ஹதா²’’தி வத³தி, ‘‘ந தா³னி த்வம், ஆவுஸோ, ப³ஹூ பி⁴க்கூ² லச்ச²ஸி, தயோ ஏவ, ஆவுஸோ, லச்ச²ஸீ’’தி வத்தப்³போ³. ‘‘நனு, ப⁴ந்தே, அமுகஸ்மிஞ்ச அமுகஸ்மிஞ்ச கா³மே ஸகலம் பி⁴க்கு²ஸங்க⁴ம் போ⁴ஜேஸும், அஹம் கஸ்மா ந லபா⁴மீ’’தி. ‘‘த்வம் நிமந்திதும் ந ஜானாஸீ’’தி. தே கத²ம் நிமந்தேஸும், ப⁴ந்தேதி? தே ஏவமாஹம்ஸு ‘‘அம்ஹாகம், ப⁴ந்தே, பி⁴க்க²ம் க³ண்ஹதா²’’தி. ஸசே ஸோபி ததே²வ ‘‘பி⁴க்க²ம் க³ண்ஹதா²’’தி வத³தி, வட்டதி. அத² புனபி ‘‘ப⁴த்தமேவா’’தி வத³தி, ததோ வத்தப்³போ³ – ‘‘க³ச்ச² த்வம், நத்த²ம்ஹாகம் தவ ப⁴த்தேனத்தோ², நிப³த்³த⁴கோ³சரோ ஏஸ அம்ஹாகம், மயமேத்த² பிண்டா³ய சரிஸ்ஸாமா’’தி. தம் ‘‘சரத², ப⁴ந்தே’’தி வத்வா ஆக³தம் புச்ச²ந்தி ‘‘கிம் போ⁴ லத்³தா⁴ பி⁴க்கூ²’’தி? கிம் ஏதேன, ப³ஹு ஏத்த² வத்தப்³ப³ம், தே²ரா ‘‘ஸ்வே பிண்டா³ய சரிஸ்ஸாமா’’தி ஆஹம்ஸு, மா தா³னி தும்ஹே பமஜ்ஜித்தா²தி. து³தியதி³வஸே சேதியவத்தம் கத்வா டி²தபி⁴க்கூ² ஸங்க⁴த்தே²ரேன வத்தப்³பா³ ‘‘ஆவுஸோ, து⁴ரகா³மே ஸங்க⁴ப⁴த்தம், அபண்டி³தமனுஸ்ஸோ பன அக³மாஸி, க³ச்சா²ம, து⁴ரகா³மே பிண்டா³ய சரிஸ்ஸாமா’’தி. பி⁴க்கூ²ஹி தே²ரஸ்ஸ வசனம் காதப்³ப³ம், ந து³ப்³ப³சேஹி ப⁴விதப்³ப³ம், கா³மத்³வாரே அட்ட²த்வாவ பிண்டா³ய சரிதப்³ப³ம், தேஸு பத்தானி க³ஹேத்வா நிஸீதா³பேத்வா போ⁴ஜேந்தேஸு பு⁴ஞ்ஜிதப்³ப³ம்.

ஸசே ஆஸனஸாலாய ப⁴த்தம் ட²பேத்வா ரதி²காஸு ஆஹிண்ட³ந்தா ஆரோசேந்தி ‘‘ஆஸனஸாலாயம், ப⁴ந்தே, ப⁴த்தம் க³ண்ஹதா²’’தி, ந வட்டதி. அத² பன ‘‘ப⁴த்தம் ஆதா³ய தத்த² தத்த² க³ந்த்வா ப⁴த்தம் க³ண்ஹதா²’’தி வத³ந்தி, படிகச்சேவ வா விஹாரம் அதிஹரித்வா பதிரூபே டா²னே ட²பேத்வா ஆக³தாக³தானம் தே³ந்தி, அயம் அபி⁴ஹடபி⁴க்கா² நாம வட்டதி. ஸசே பன ப⁴த்தஸாலாய தா³னம் ஸஜ்ஜேத்வா தம் தம் பரிவேணம் பஹிணந்தி ‘‘ப⁴த்தஸாலாய ப⁴த்தம் க³ண்ஹதா²’’தி, வட்டதி. யே பன மனுஸ்ஸா பிண்ட³சாரிகே பி⁴க்கூ² தி³ஸ்வா ஆஸனஸாலம் ஸம்மஜ்ஜித்வா தத்த² நிஸீதா³பேத்வா போ⁴ஜேந்தி, ந தே படிக்கி²பிதப்³பா³. யே பன கா³மே பி⁴க்க²ம் அலபி⁴த்வா கா³மதோ நிக்க²மந்தே பி⁴க்கூ² தி³ஸ்வா ‘‘ப⁴ந்தே, ப⁴த்தம் க³ண்ஹதா²’’தி வத³ந்தி, தே படிக்கி²பிதப்³பா³, ந நிவத்திதப்³ப³ம். ஸசே ‘‘நிவத்தத², ப⁴ந்தே, ப⁴த்தம் க³ண்ஹதா²’’தி வத³ந்தி, ‘‘நிவத்ததா²’’தி வுத்தபதே³ நிவத்திதும் வட்டதி. ‘‘நிவத்தத², ப⁴ந்தே, க⁴ரே ப⁴த்தம் கதம், கா³மே ப⁴த்தம் கத’’ந்தி வத³ந்தி, கே³ஹே ச கா³மே ச ப⁴த்தம் நாம யஸ்ஸ கஸ்ஸசி ஹோதி, நிவத்திதும் வட்டதி. ‘‘நிவத்தத² ப⁴த்தம் க³ண்ஹதா²’’தி ஸம்ப³ந்த⁴ம் கத்வா வத³ந்தி, நிவத்திதும் ந வட்டதி. ஆஸனஸாலாதோ பிண்டா³ய சரிதும் நிக்க²மந்தே தி³ஸ்வா ‘‘நிஸீத³த², ப⁴ந்தே, ப⁴த்தம் க³ண்ஹதா²’’தி வுத்தேபி ஏஸேவ நயோ.

‘‘அஞ்ஞத்ர ஸமயா’’தி வசனதோ கி³லானஸமயோ சீவரதா³னஸமயோ சீவரகாரஸமயோ அத்³தா⁴னக³மனஸமயோ நாவாபி⁴ருஹனஸமயோ மஹாஸமயோ ஸமணப⁴த்தஸமயோதி ஏதேஸு ஸத்தஸு ஸமயேஸு அஞ்ஞதரஸ்மிம் அனாபத்தி. தஸ்மா யதா² மஹாசம்மஸ்ஸ பரதோ மம்ஸம் தி³ஸ்ஸதி, ஏவம் அந்தமஸோ பாதா³பி பா²லிதா ஹோந்தி, வாலிகாய வா ஸக்க²ராய வா பஹடமத்தே து³க்க²ம் உப்பாதே³ந்தி, ந ஸக்கா ச ஹோதி அந்தோகா³மே பிண்டா³ய சரிதும், ஈதி³ஸே கே³லஞ்ஞே கி³லானஸமயோதி பு⁴ஞ்ஜிதப்³ப³ம், ந லேஸகப்பியம் காதப்³ப³ம்.

சீவரதா³னஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்சமாஸா. ஏத்த²ந்தரே ‘‘சீவரதா³னஸமயோ’’தி பு⁴ஞ்ஜிதப்³ப³ம். சீவரே கரியமானே சீவரகாரஸமயோதி பு⁴ஞ்ஜிதப்³ப³ம். யதா³ ஹி ஸாடகஞ்ச ஸுத்தஞ்ச லபி⁴த்வா சீவரம் கரோந்தி, அயம் சீவரகாரஸமயோ நாம, விஸும் சீவரகாரஸமயோ நாம நத்தி², தஸ்மா யோ தத்த² சீவரே கத்தப்³ப³ம் யம் கிஞ்சி கம்மம் கரோதி, மஹாபச்சரியஞ்ஹி ‘‘அந்தமஸோ ஸூசிவேத⁴கோ’’திபி வுத்தம். தேன ‘‘சீவரகாரஸமயோ’’தி பு⁴ஞ்ஜிதப்³ப³ம். குருந்தி³யம் பன வித்தா²ரேனேவ வுத்தம் ‘‘யோ சீவரம் விசாரேதி சி²ந்த³தி, மோக⁴ஸுத்தகம் ட²பேதி, ஆக³ந்துகபத்தம் ட²பேதி, பச்சாக³தம் ஸிப்³பே³தி, ஆக³ந்துகபத்தம் ப³ந்த⁴தி, அனுவாதம் சி²ந்த³தி க⁴டேதி ஆரோபேதி, தத்த² பச்சாக³தம் ஸிப்³பே³தி, ஸுத்தம் கரோதி வலேதி, பிப்ப²லிகம் நிஸேதி, பரிவத்தனம் கரோதி, ஸப்³போ³பி சீவரம் கரோதியேவாதி வுச்சதி. யோ பன ஸமீபே நிஸின்னோ ஜாதகம் வா த⁴ம்மபத³ம் வா கதே²தி, அயம் ந சீவரகாரகோ, ஏதம் ட²பேத்வா ஸேஸானம் க³ணபோ⁴ஜனே அனாபத்தீ’’தி.

அத்³தா⁴னக³மனஸமயே அந்தமஸோ அட்³ட⁴யோஜனம் க³ந்துகாமேனபி ‘‘அட்³ட⁴யோஜனம் க³ச்சி²ஸ்ஸாமீ’’தி பு⁴ஞ்ஜிதப்³ப³ம், க³ச்ச²ந்தேன பு⁴ஞ்ஜிதப்³ப³ம், க³தேன ஏகதி³வஸம் பு⁴ஞ்ஜிதப்³ப³ம்.

நாவாபி⁴ருஹனஸமயே ‘‘நாவம் அபி⁴ருஹிஸ்ஸாமீ’’தி பு⁴ஞ்ஜிதப்³ப³ம், ஆருள்ஹேன இச்சி²தட்டா²னம் க³ந்த்வாபி யாவ ந ஓரோஹதி, தாவ பு⁴ஞ்ஜிதப்³ப³ம், ஓருள்ஹேன ஏகதி³வஸம் பு⁴ஞ்ஜிதப்³ப³ம்.

மஹாஸமயோ நாம யத்த² த்³வே தயோ பி⁴க்கூ² பிண்டா³ய சரித்வா யாபேந்தி, அந்தமஸோ சதுத்தே²பி ஆக³தே ந யாபேந்தி, அயம் மஹாஸமயோ. யத்த² பன ஸதம் வா ஸஹஸ்ஸம் வா ஸன்னிபதந்தி, தத்த² வத்தப்³ப³மேவ நத்தி², தஸ்மா தாதி³ஸே காலே ‘‘மஹாஸமயோ’’தி அதி⁴ட்ட²ஹித்வா பு⁴ஞ்ஜிதப்³ப³ம்.

ஸமணப⁴த்தஸமயோ நாம யோ கோசி பரிப்³பா³ஜகஸமாபன்னோ ப⁴த்தம் கரோதி, அயம் ஸமணப⁴த்தஸமயோவ. தஸ்மா ஸஹத⁴ம்மிகேஸு வா தித்தி²யேஸு வா அஞ்ஞதரேன யேன கேனசி கதே ப⁴த்தே ‘‘ஸமணப⁴த்தஸமயோ’’தி பு⁴ஞ்ஜிதப்³ப³ம். ‘‘அனாபத்தி ஸமயே, த்³வே தயோ ஏகதோ பு⁴ஞ்ஜந்தி, பிண்டா³ய சரித்வா ஏகதோ ஸன்னிபதித்வா பு⁴ஞ்ஜந்தி, நிச்சப⁴த்தம், ஸலாகப⁴த்தம், பக்கி²கம், உபோஸதி²கம், பாடிபதி³கம், பஞ்ச போ⁴ஜனானி ட²பேத்வா ஸப்³ப³த்த² அனாபத்தீ’’தி (பாசி. 220) வசனதோ யேபி அகப்பியனிமந்தனம் ஸாதி³யித்வா த்³வே வா தயோ வா ஏகதோ க³ஹேத்வா பு⁴ஞ்ஜந்தி, தேஸம்பி அனாபத்தி.

தத்த² அனிமந்திதசதுத்த²ம் பிண்ட³பாதிகசதுத்த²ம் அனுபஸம்பன்னசதுத்த²ம் பத்தசதுத்த²ம் கி³லானசதுத்த²ந்தி பஞ்சன்னம் சதுத்தா²னம் வஸேன வினிச்ச²யோ வேதி³தப்³போ³. கத²ம்? இதே⁴கச்சோ சத்தாரோ பி⁴க்கூ² ‘‘ப⁴த்தம் க³ண்ஹதா²’’தி நிமந்தேதி. தேஸு தயோ க³தா, ஏகோ ந க³தோ. உபாஸகோ ‘‘ஏகோ, ப⁴ந்தே, தே²ரோ குஹி’’ந்தி புச்ச²தி. நாக³தோ உபாஸகாதி. ஸோ அஞ்ஞம் தம்க²ணப்பத்தம் கஞ்சி ‘‘ஏஹி, ப⁴ந்தே’’தி க⁴ரம் பவேஸேத்வா சதுன்னம்பி ப⁴த்தம் தே³தி, ஸப்³பே³ஸம் அனாபத்தி. கஸ்மா? க³ணபூரகஸ்ஸ அனிமந்திதத்தா. தயோ ஏவ ஹி தத்த² நிமந்திதா க³ண்ஹிம்ஸு, தேஹி க³ணோ ந பூரதி, க³ணபூரகோ ச அனிமந்திதோ, தேன க³ணோ பி⁴ஜ்ஜதீதி. ஏதம் அனிமந்திதசதுத்த²ம்.

பிண்ட³பாதிகசதுத்தே² நிமந்தனகாலே ஏகோ பிண்ட³பாதிகோ ஹோதி, ஸோ நாதி⁴வாஸேதி, க³மனவேலாயம் பன ‘‘ஏஹி ப⁴ந்தே’’தி வுத்தே அனதி⁴வாஸிதத்தா அனாக³ச்ச²ந்தம்பி ‘‘ஏத² பி⁴க்க²ம் லச்ச²தா²’’தி க³ஹேத்வா க³ச்ச²ந்தி, ஸோ தம் க³ணம் பி⁴ந்த³தி, தஸ்மா ஸப்³பே³ஸம் அனாபத்தி.

அனுபஸம்பன்னசதுத்தே² ஸாமணேரேன ஸத்³தி⁴ம் நிமந்திதா ஹோந்தி, ஸோபி க³ணம் பி⁴ந்த³தி.

பத்தசதுத்தே² ஏகோ ஸயம் ஆக³ந்த்வா பத்தம் பேஸேதி, ஏவம்பி க³ணோ பி⁴ஜ்ஜதி, தஸ்மா ஸப்³பே³ஸம் அனாபத்தி.

கி³லானசதுத்தே² கி³லானேன ஸத்³தி⁴ம் நிமந்திதா ஹோந்தி, தத்த² கி³லானஸ்ஸேவ அனாபத்தி, இதரேஸம் பன க³ணபூரகோ ஹோதி. ந ஹி கி³லானேன க³ணோ பி⁴ஜ்ஜதி, தஸ்மா தேஸம் ஆபத்தி. மஹாபச்சரியம் பன அவிஸேஸேன வுத்தம் ‘‘ஸமயலத்³த⁴கோ ஸயமேவ முச்சதி, ஸேஸானம் க³ணபூரகத்தா ஆபத்திகரோ ஹோதீ’’தி. தஸ்மா சீவரதா³னஸமயலத்³த⁴காதீ³னம்பி வஸேன சதுக்கானி வேதி³தப்³பா³னி.

ஸசே பன அதி⁴வாஸேத்வா க³தேஸுபி சதூஸு ஜனேஸு ஏகோ பண்டி³தோ பி⁴க்கு² ‘‘அஹம் தும்ஹாகம் க³ணம் பி⁴ந்தி³ஸ்ஸாமி, நிமந்தனம் ஸாதி³யதா²’’தி வத்வா யாகு³க²ஜ்ஜகாவஸானே ப⁴த்தத்தா²ய பத்தம் க³ண்ஹந்தானம் அத³த்வா ‘‘இமே தாவ பி⁴க்கூ² போ⁴ஜேத்வா விஸ்ஸஜ்ஜேத², அஹம் பச்சா² அனுமோத³னம் கத்வா க³மிஸ்ஸாமீ’’தி நிஸின்னோ, தேஸு பு⁴த்வா க³தேஸு ‘‘தே³த², ப⁴ந்தே, பத்த’’ந்தி உபாஸகேன பத்தம் க³ஹேத்வா ப⁴த்தே தி³ன்னே பு⁴ஞ்ஜித்வா அனுமோத³னம் கத்வா க³ச்ச²தி, ஸப்³பே³ஸம் அனாபத்தி. பஞ்சன்னஞ்ஹி போ⁴ஜனானம்யேவ வஸேன க³ணபோ⁴ஜனே விஸங்கேதம் நத்தி², ஓத³னேன நிமந்தேத்வா கும்மாஸம் க³ண்ஹந்தாபி ஆபஜ்ஜந்தி, தானி ச தேஹி ஏகதோ ந க³ஹிதானி, யாகு³ஆதீ³ஹி பன விஸங்கேதம் ஹோதி, தானி தேஹி ஏகதோ க³ஹிதானீதி ஏவம் ஏகோ பண்டி³தோ அஞ்ஞேஸம்பி அனாபத்திம் கரோதி. நிச்சப⁴த்தந்தி து⁴வப⁴த்தம் வுச்சதி, ‘‘நிச்சப⁴த்தம் க³ண்ஹதா²’’தி வத³ந்தி, ப³ஹூனம் ஏகதோ க³ஹேதும் வட்டதி. ஸலாகப⁴த்தாதீ³ஸுபி ஏஸேவ நயோ.

2. ‘‘பரம்பரபோ⁴ஜனே அஞ்ஞத்ர ஸமயா பாசித்திய’’ந்தி (பாசி. 222-223, 225) வுத்தம் பரம்பரபோ⁴ஜனம் பன நிமந்தனதோயேவ பஸவதி. யோ ஹி ‘‘பஞ்சன்னம் போ⁴ஜனானம் அஞ்ஞதரேன போ⁴ஜனேன ப⁴த்தம் க³ண்ஹதா²’’திஆதி³னா நிமந்திதோ தம் ட²பேத்வா அஞ்ஞம் பஞ்சன்னம் போ⁴ஜனானம் அஞ்ஞதரபோ⁴ஜனம் பு⁴ஞ்ஜதி, தஸ்ஸேதம் போ⁴ஜனம் ‘‘பரம்பரபோ⁴ஜன’’ந்தி வுச்சதி. ஏவம் பு⁴ஞ்ஜந்தஸ்ஸ ட²பேத்வா கி³லானஸமயம் சீவரதா³னஸமயம் சீவரகாரஸமயஞ்ச அஞ்ஞஸ்மிம் ஸமயே பாசித்தியம் வுத்தம், தஸ்மா நிமந்தனபடிபாடியாவ பு⁴ஞ்ஜிதப்³ப³ம், ந உப்படிபாடியா.

‘‘அனுஜானாமி, பி⁴க்க²வே, விகப்பேத்வா பரம்பரபோ⁴ஜனம் பு⁴ஞ்ஜிது’’ந்தி (பாசி. 226) வசனதோ பட²மனிமந்தனம் அஞ்ஞஸ்ஸ விகப்பேத்வாபி பரிபு⁴ஞ்ஜிதும் வட்டதி. அயம் (பாசி. அட்ட². 226 ஆத³யோ) விகப்பனா நாம ஸம்முகா²பி பரம்முகா²பி வட்டதி. ஸம்முகா² தி³ஸ்வா ‘‘மய்ஹம் ப⁴த்தபச்சாஸம் துய்ஹம் விகப்பேமீ’’தி வா ‘‘த³ம்மீ’’தி வா வத்வா பு⁴ஞ்ஜிதப்³ப³ம், அதி³ஸ்வா பஞ்சஸு ஸஹத⁴ம்மிகேஸு யஸ்ஸ கஸ்ஸசி நாமம் க³ஹேத்வா ‘‘மய்ஹம் ப⁴த்தபச்சாஸம் இத்த²ன்னாமஸ்ஸ விகப்பேமீ’’தி வா ‘‘த³ம்மீ’’தி வா வத்வா பு⁴ஞ்ஜிதப்³ப³ம். த்³வே தீணி நிமந்தனானி பன ஏகஸ்மிம் பத்தே பக்கி²பித்வா மிஸ்ஸேத்வா ஏகம் கத்வா பு⁴ஞ்ஜிதும் வட்டதி. ‘‘அனாபத்தி த்³வே தயோ நிமந்தனே ஏகதோ பு⁴ஞ்ஜதீ’’தி (பாசி. 229) ஹி வுத்தம். ஸசே த்³வே தீணி குலானி நிமந்தேத்வா ஏகஸ்மிம் டா²னே நிஸீதா³பேத்வா இதோ சிதோ ச ஆஹரித்வா ப⁴த்தம் ஆகிரந்தி, ஸூபப்³யஞ்ஜனம் ஆகிரந்தி, ஏகமிஸ்ஸகம் ஹோதி, ஏத்தா²பி அனாபத்தி.

ஸசே பன மூலனிமந்தனம் ஹேட்டா² ஹோதி, பச்சி²மம் பச்சி²மம் உபரி, தம் உபரிதோ பட்டா²ய பு⁴ஞ்ஜந்தஸ்ஸ ஆபத்தி, ஹத்த²ம் பன அந்தோ பவேஸேத்வா பட²மனிமந்தனதோ ஏகம்பி கப³ளம் உத்³த⁴ரித்வா பு⁴த்தகாலதோ பட்டா²ய யதா² ததா² வா பு⁴ஞ்ஜந்தஸ்ஸ அனாபத்தி. ‘‘ஸசேபி தத்த² கீ²ரம் வா ரஸம் வா ஆகிரந்தி, யேன அஜ்ஜோ²த்த²தம் ப⁴த்தம் ஏகரஸம் ஹோதி, கோடிதோ பட்டா²ய பு⁴ஞ்ஜந்தஸ்ஸ அனாபத்தீ’’தி மஹாபச்சரியம் வுத்தம். மஹாஅட்ட²கதா²யம் பன வுத்தம் ‘‘கீ²ரப⁴த்தம் வா ரஸப⁴த்தம் வா லபி⁴த்வா நிஸின்னஸ்ஸ தத்தே²வ அஞ்ஞேபி கீ²ரப⁴த்தம் வா ரஸப⁴த்தம் வா ஆகிரந்தி, கீ²ரம் வா ரஸம் வா பிவதோ அனாபத்தி, பு⁴ஞ்ஜந்தேன பட²மம் லத்³த⁴மம்ஸக²ண்ட³ம் வா ப⁴த்தபிண்ட³ம் வா முகே² பக்கி²பித்வா கோடிதோ பட்டா²ய பு⁴ஞ்ஜிதும் வட்டதி. ஸப்பிபாயாஸேபி ஏஸேவ நயோ’’தி.

மஹாஉபாஸகோ பி⁴க்கு²ம் நிமந்தேதி, தஸ்ஸ குலம் உபக³தஸ்ஸ உபாஸகோபி தஸ்ஸ புத்ததா³ரபா⁴துப⁴கி³னிஆத³யோபி அத்தனோ அத்தனோ கோட்டா²ஸம் ஆஹரித்வா பத்தே பக்கி²பந்தி, ‘‘உபாஸகேன பட²மம் தி³ன்னம் அபு⁴ஞ்ஜித்வா பச்சா² லத்³த⁴ம் பு⁴ஞ்ஜந்தஸ்ஸ ஆபத்தீ’’தி மஹாஅட்ட²கதா²யம் வுத்தம். குருந்த³ட்ட²கதா²யம் ‘‘வட்டதீ’’தி வுத்தம். மஹாபச்சரியம் ‘‘ஸசே பாடேக்கம் பசந்தி, அத்தனோ அத்தனோ பக்கப⁴த்ததோ ஆஹரித்வா தே³ந்தி, தத்த² பச்சா² ஆஹடம் பட²மம் பு⁴ஞ்ஜந்தஸ்ஸ பாசித்தியம். யதி³ பன ஸப்³பே³ஸம் ஏகோவ பாகோ ஹோதி, பரம்பரபோ⁴ஜனம் ந ஹோதீ’’தி வுத்தம். மஹாஉபாஸகோ நிமந்தேத்வா நிஸீதா³பேதி, அஞ்ஞோ மனுஸ்ஸோ பத்தம் க³ண்ஹாதி, ந தா³தப்³ப³ம். கிம், ப⁴ந்தே, ந தே³தா²தி. நனு உபாஸக தயா நிமந்திதம்ஹாதி. ‘‘ஹோது, ப⁴ந்தே, லத்³த⁴ம் லத்³த⁴ம் பு⁴ஞ்ஜதா²’’தி வத³தி, பு⁴ஞ்ஜிதும் வட்டதி. ‘‘அஞ்ஞேன ஆஹரித்வா ப⁴த்தே தி³ன்னே ஆபுச்சி²த்வாபி பு⁴ஞ்ஜிதும் வட்டதீ’’தி குருந்தி³யம் வுத்தம்.

அனுமோத³னம் கத்வா க³ச்ச²ந்தம் த⁴ம்மம் ஸோதுகாமா ‘‘ஸ்வேபி, ப⁴ந்தே, ஆக³ச்சே²ய்யாதா²’’தி ஸப்³பே³ நிமந்தேந்தி, புனதி³வஸே ஆக³ந்த்வா லத்³த⁴ம் லத்³த⁴ம் பு⁴ஞ்ஜிதும் வட்டதி. கஸ்மா? ஸப்³பே³ஹி நிமந்திதத்தா. ஏகோபி பி⁴க்கு² பிண்டா³ய சரந்தோ ப⁴த்தம் லப⁴தி, தமஞ்ஞோ உபாஸகோ நிமந்தேத்வா க⁴ரே நிஸீதா³பேதி, ந ச தாவ ப⁴த்தம் ஸம்பஜ்ஜதி, ஸசே ஸோ பி⁴க்கு² பிண்டா³ய சரித்வா லத்³த⁴ப⁴த்தம் பு⁴ஞ்ஜதி, ஆபத்தி. அபு⁴ஞ்ஜித்வா நிஸின்னே ‘‘கிம், ப⁴ந்தே, ந பு⁴ஞ்ஜஸீ’’தி வுத்தே ‘‘தயா நிமந்திதத்தா’’தி வத்வா ‘‘லத்³த⁴ம் லத்³த⁴ம் பு⁴ஞ்ஜத², ப⁴ந்தே’’தி வுத்தே பு⁴ஞ்ஜிதும் வட்டதி. ஸகலேன கா³மேன ஏகதோ ஹுத்வா நிமந்திதஸ்ஸ யத்த² கத்த²சி பு⁴ஞ்ஜதோ அனாபத்தி. பூகே³பி ஏஸேவ நயோ. ‘‘அனாபத்தி ஸகலேன கா³மேன நிமந்திதோ தஸ்மிம் கா³மே யத்த² கத்த²சி பு⁴ஞ்ஜதி, ஸகலேன பூகே³ன நிமந்திதோ தஸ்மிம் பூகே³ யத்த² கத்த²சி பு⁴ஞ்ஜதி, நிமந்தியமானோ ‘பி⁴க்க²ம் க³ஹேஸ்ஸாமீ’தி ப⁴ணதி, நிச்சப⁴த்தே ஸலாகப⁴த்தே பக்கி²கே உபோஸதி²கே பாடிபதி³கே பஞ்ச போ⁴ஜனானி ட²பேத்வா ஸப்³ப³த்த² அனாபத்தீ’’தி (பாசி. 229) வுத்தம்.

தத்த² நிமந்தியமானோ பி⁴க்க²ம் க³ஹேஸ்ஸாமீதி ப⁴ணதீதி ஏத்த² ‘‘ப⁴த்தம் க³ண்ஹா’’தி நிமந்தியமானோ ‘‘ந மய்ஹம் தவ ப⁴த்தேனத்தோ², பி⁴க்க²ம் க³ண்ஹிஸ்ஸாமீ’’தி வத³தி, அனாபத்தீதி அத்தோ². ஏத்த² பன மஹாபது³மத்தே²ரோ ஆஹ ‘‘ஏவம் வத³ந்தோ இமஸ்மிம் ஸிக்கா²பதே³ அனிமந்தனம் காதும் ஸக்கோதி, பு⁴ஞ்ஜனத்தா²ய பன ஓகாஸோ கதோ ஹோதீதி நேவ க³ணபோ⁴ஜனதோ, ந சாரித்ததோ முச்சதீ’’தி. மஹாஸுமத்தே²ரோ ஆஹ ‘‘யத³க்³கே³ன அனிமந்தனம் காதும் ஸக்கோதி, தத³க்³கே³ன நேவ க³ணபோ⁴ஜனம், ந சாரித்தம் ஹோதீ’’தி.

தத்த² சாரித்தந்தி –

‘‘யோ பன பி⁴க்கு² நிமந்திதோ ஸப⁴த்தோ ஸமானோ ஸந்தம் பி⁴க்கு²ம் அனாபுச்சா² புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜேய்ய அஞ்ஞத்ர ஸமயா பாசித்தியம். தத்தா²யம் ஸமயோ சீவரதா³னஸமயோ சீவரகாரஸமயோ. அயம் தத்த² ஸமயோ’’தி (பாசி. 299) –

ஏவமாக³தம் சாரித்தஸிக்கா²பத³ம் வுத்தம். இமினா ஹி ஸிக்கா²பதே³ன யோ பஞ்சன்னம் போ⁴ஜனானம் அஞ்ஞதரேன ‘‘ப⁴த்தம் க³ண்ஹதா²’’திஆதி³னா அகப்பியனிமந்தனேன நிமந்திதோ, தேனேவ நிமந்தனப⁴த்தேன ஸப⁴த்தோ ஸமானோ ஸந்தம் பி⁴க்கு²ம் ‘‘அஹம் இத்த²ன்னாமஸ்ஸ க⁴ரம் க³ச்சா²மீ’’தி வா ‘‘சாரித்தம் ஆபஜ்ஜாமீ’’தி வா ஈதி³ஸேன வசனேன அனாபுச்சி²த்வா யேன ப⁴த்தேன நிமந்திதோ, தம் பு⁴த்வா வா அபு⁴த்வா வா அவீதிவத்தேயேவ மஜ்ஜ²ன்ஹிகே யஸ்மிம் குலே நிமந்திதோ, ததோ அஞ்ஞானி குலானி பவிஸேய்ய, தஸ்ஸ வுத்தலக்க²ணம் து³வித⁴ம்பி ஸமயம் ட²பேத்வா அஞ்ஞத்த² பாசித்தியம் வுத்தம். தஸ்மா அகப்பியனிமந்தனேன நிமந்தியமானோ ஸசே ‘‘பி⁴க்க²ம் க³ண்ஹிஸ்ஸாமீ’’தி வத³தி, இமினாபி ஸிக்கா²பதே³ன அனாபத்தி.

3. ஸந்தம் பி⁴க்கு²ம் அனாபுச்சா²தி ஏத்த² (பாசி. அட்ட². 298) பன கித்தாவதா ஸந்தோ ஹோதி, கித்தாவதா அஸந்தோ? அந்தோவிஹாரே யத்த² டி²தஸ்ஸ குலானி பயிருபாஸனசித்தம் உப்பன்னம், ததோ பட்டா²ய யம் பஸ்ஸே வா அபி⁴முகே² வா பஸ்ஸதி, யஸ்ஸ ஸக்கா ஹோதி பகதிவசனேன ஆரோசேதும், அயம் ஸந்தோ நாம, இதோ சிதோ ச பரியேஸித்வா ஆரோசனகிச்சம் பன நத்தி². யோ ஹி ஏவம் பரியேஸிதப்³போ³, ஸோ அஸந்தோயேவ. அபிச அந்தோஉபசாரஸீமாய பி⁴க்கு²ம் தி³ஸ்வா ‘‘ஆபுச்சி²ஸ்ஸாமீ’’தி க³ச்ச²தி. தத்த² யம் பஸ்ஸதி, ஸோ ஆபுச்சி²தப்³போ³. நோ சே பஸ்ஸதி, அஸந்தம் பி⁴க்கு²ம் அனாபுச்சா² பவிட்டோ² நாம ஹோதி. விகாலகா³மப்பவேஸனேபி அயமேவ நயோ.

ஸசே (பாசி. அட்ட². 512) பன ஸம்ப³ஹுலா கேனசி கம்மேன கா³மம் பவிஸந்தி, ‘‘விகாலே கா³மப்பவேஸனம் ஆபுச்சா²மீ’’தி ஸப்³பே³ஹி அஞ்ஞமஞ்ஞம் ஆபுச்சி²தப்³ப³ம். தஸ்மிம் கா³மே தம் கம்மம் ந ஸம்பஜ்ஜதீதி அஞ்ஞம் கா³மம் க³ச்ச²ந்தி, கா³மஸதம்பி ஹோது, புன ஆபுச்ச²னகிச்சம் நத்தி². ஸசே பன உஸ்ஸாஹம் படிப்பஸ்ஸம்பே⁴த்வா விஹாரம் க³ச்ச²ந்தா அந்தரா அஞ்ஞம் கா³மம் பவிஸிதுகாமா ஹோந்தி, புன ஆபுச்சி²தப்³ப³மேவ. குலக⁴ரே வா ஆஸனஸாலாய வா ப⁴த்தகிச்சம் கத்வா தேலபி⁴க்கா²ய வா ஸப்பிபி⁴க்கா²ய வா சரிதுகாமோ ஹோதி, ஸசே பஸ்ஸே பி⁴க்கு² அத்தி², ஆபுச்சி²த்வா க³ந்தப்³ப³ம். அஸந்தே பி⁴க்கு²ம்ஹி ‘‘நத்தீ²’’தி க³ந்தப்³ப³ம், வீதி²ம் ஓதரித்வா பி⁴க்கு²ம் பஸ்ஸதி, ஆபுச்ச²னகிச்சம் நத்தி², அனாபுச்சி²த்வாபி சரிதப்³ப³மேவ. கா³மமஜ்ஜே²ன மக்³கோ³ ஹோதி, தேன க³ச்ச²ந்தஸ்ஸ ‘‘தேலாதி³பி⁴க்கா²ய சரிஸ்ஸாமீ’’தி சித்தே உப்பன்னே ஸசே பஸ்ஸே பி⁴க்கு² அத்தி², ஆபுச்சி²த்வா சரிதப்³ப³ம். மக்³கா³ அனோக்கம்ம பி⁴க்கா²ய சரந்தஸ்ஸ பன ஆபுச்ச²னகிச்சம் நத்தி². ஸசே ஸீஹோ வா ப்³யக்³கோ⁴ வா ஆக³ச்ச²தி, மேகோ⁴ வா உட்டே²தி, அஞ்ஞோ வா கோசி உபத்³த³வோ உப்பஜ்ஜதி, ஏவரூபாஸு ஆபதா³ஸு அனாபுச்சா²பி ப³ஹிகா³மதோ அந்தோகா³மம் பவிஸிதும் வட்டதி.

4. ‘‘ந ச, பி⁴க்க²வே, அபி⁴ன்னே ஸரீரே பம்ஸுகூலம் க³ஹேதப்³ப³ம், யோ க³ண்ஹேய்ய, ஆபத்தி து³க்கடஸ்ஸா’’தி (பாரா. 137) வசனதோ அப்³பு⁴ண்ஹே அல்லஸரீரே பம்ஸுகூலம் ந க³ஹேதப்³ப³ம், க³ண்ஹந்தோ து³க்கடம் ஆபஜ்ஜதி. உபத்³த³வா ச தஸ்ஸ ஹோந்தி, பி⁴ன்னே பன க³ஹேதும் வட்டதி.

கித்தாவதா பன பி⁴ன்னம் ஹோதி? காககுலலஸோணஸிங்கா³லாதீ³ஹி முக²துண்ட³கேன வா தா³டா²ய வா ஈஸகம் பா²லிதமத்தேனபி. யஸ்ஸ பன பததோ க⁴ம்ஸனேன ச²விமத்தம் சி²ன்னம் ஹோதி, சம்மம் அச்சி²ன்னம், ஏதம் அபி⁴ன்னமேவ, சம்மே பன சி²ன்னே பி⁴ன்னம். யஸ்ஸபி ஸஜீவகாலேயேவ பபி⁴ன்னா க³ண்ட³குட்ட²பீளகா வா வணோ வா ஹோதி, இத³ம்பி பி⁴ன்னம், ததியதி³வஸதோ பபு⁴தி உத்³து⁴மாதகாதி³பா⁴வேன குணபபா⁴வம் உபக³தம்பி பி⁴ன்னமேவ. ஸப்³பே³ன ஸப்³ப³ம் பன அபி⁴ன்னேபி ஸுஸானகோ³பகேஹி வா அஞ்ஞேஹி வா மனுஸ்ஸேஹி கா³ஹாபேதும் வட்டதி. நோ சே அஞ்ஞம் லப⁴தி, ஸத்த²கேன வா கேனசி வா வணம் கத்வா க³ஹேதப்³ப³ம். விஸபா⁴க³ஸரீரே பன ஸதிம் உபட்ட²பேத்வா ஸமணஸஞ்ஞம் உப்பாதே³த்வா ஸீஸே வா ஹத்த²பாத³பிட்டி²யம் வா வணம் கத்வா க³ஹேதும் வட்டதி.

5. அச்சி²ன்னசீவரகேன பி⁴க்கு²னா கத²ம் படிபஜ்ஜிதப்³ப³ந்தி? ‘‘அனுஜானாமி, பி⁴க்க²வே, அச்சி²ன்னசீவரஸ்ஸ வா நட்ட²சீவரஸ்ஸ வா அஞ்ஞாதகம் க³ஹபதிம் வா க³ஹபதானிம் வா சீவரம் விஞ்ஞாபேதும். யம் ஆவாஸம் பட²மம் உபக³ச்ச²தி, ஸசே தத்த² ஹோதி ஸங்க⁴ஸ்ஸ விஹாரசீவரம் வா உத்தரத்த²ரணம் வா பூ⁴மத்த²ரணம் வா பி⁴ஸிச்ச²வி வா, தம் க³ஹேத்வா பாருபிதும் ‘லபி⁴த்வா ஓத³ஹிஸ்ஸாமீ’தி. நோ சே ஹோதி ஸங்க⁴ஸ்ஸ விஹாரசீவரம் வா உத்தரத்த²ரணம் வா பூ⁴மத்த²ரணம் வா பி⁴ஸிச்ச²வி வா, திணேன வா பண்ணேன வா படிச்சா²தே³த்வா ஆக³ந்தப்³ப³ம், ந த்வேவ நக்³கே³ன ஆக³ந்தப்³ப³ம், யோ ஆக³ச்சே²ய்ய, ஆபத்தி து³க்கடஸ்ஸா’’தி (பாரா. 517) வசனதோ இத⁴ வுத்தனயேன படிபஜ்ஜிதப்³ப³ம்.

அயம் பனேத்த² அனுபுப்³ப³கதா² (பாரா. அட்ட². 2.517). ஸசே ஹி சோரே பஸ்ஸித்வா த³ஹரா பத்தசீவரானி க³ஹேத்வா பலாதா, சோரா தே²ரானம் நிவாஸனபாருபனமத்தம்யேவ ஹரித்வா க³ச்ச²ந்தி, தே²ரேஹி நேவ தாவ சீவரம் விஞ்ஞாபேதப்³ப³ம், ந ஸாகா²பலாஸம் ப⁴ஞ்ஜிதப்³ப³ம். அத² த³ஹரா ஸப்³ப³ம் ப⁴ண்ட³கம் ச²ட்³டே³த்வா பலாதா, சோரா தே²ரானஞ்ச நிவாஸனபாருபனம் தஞ்ச ப⁴ண்ட³கம் ஹரித்வா க³ச்ச²ந்தி, த³ஹரேஹி ஆக³ந்த்வா அத்தனோ நிவாஸனபாருபனானி ந தாவ தே²ரானம் தா³தப்³பா³னி. ந ஹி தே அனச்சி²ன்னசீவரா அத்தனோ அத்தா²ய ஸாகா²பலாஸம் ப⁴ஞ்ஜிதும் லப⁴ந்தி, அச்சி²ன்னசீவரானம் பன அத்தா²ய லப⁴ந்தி. அச்சி²ன்னசீவராவ அத்தனோபி பரேஸம்பி அத்தா²ய லப⁴ந்தி, தஸ்மா தே²ரேஹி வா ஸாகா²பலாஸம் ப⁴ஞ்ஜித்வா வாகாதீ³ஹி க³ந்தே²த்வா த³ஹரானம் தா³தப்³ப³ம், த³ஹரேஹி வா தே²ரானம் அத்தா²ய ப⁴ஞ்ஜித்வா க³ந்தே²த்வா தேஸம் ஹத்தே² த³த்வா வா அத³த்வா வா அத்தனா நிவாஸேத்வா அத்தனோ நிவாஸனபாருபனானி தே²ரானம் தா³தப்³பா³னி, நேவ பூ⁴தகா³மபாதப்³யதாய பாசித்தியம் ஹோதி, ந தேஸம் தா⁴ரணே து³க்கடம்.

ஸசே அந்தராமக்³கே³ ரஜகத்த²ரணம் வா ஹோதி, அஞ்ஞே வா தாதி³ஸே மனுஸ்ஸே பஸ்ஸந்தி, சீவரம் விஞ்ஞாபேதப்³ப³ம். யானி ச நேஸம் தே வா விஞ்ஞத்தமனுஸ்ஸா அஞ்ஞே வா ஸாகா²பலாஸனிவாஸனே பி⁴க்கூ² தி³ஸ்வா உஸ்ஸாஹஜாதா வத்தா²னி தே³ந்தி, தானி ஸத³ஸானி வா ஹோந்து அத³ஸானி வா நீலாதி³னானாவண்ணானி வா, கப்பியானிபி அகப்பியானிபி ஸப்³பா³னிபி அச்சி²ன்னசீவரட்டா²னே டி²தத்தா தேஸம் நிவாஸேதுஞ்ச பாருபிதுஞ்ச வட்டந்தி.

வுத்தம்பிஹேதம் பரிவாரே –

‘‘அகப்பகதம் நாபி ரஜனாய ரத்தம்,

தேன நிவத்தோ² யேனகாமம் வஜேய்ய;

ந சஸ்ஸ ஹோதி ஆபத்தி,

ஸோ ச த⁴ம்மோ ஸுக³தேன தே³ஸிதோ;

பஞ்ஹாமேஸா குஸலேஹி சிந்திதா’’தி. (பரி. 481);

அயஞ்ஹி பஞ்ஹோ அச்சி²ன்னசீவரகபி⁴க்கு²ம் ஸந்தா⁴ய வுத்தோ. அத² பன தித்தி²யேஹி ஸமாக³ச்ச²ந்தி, தே ச நேஸம் குஸசீரவாகசீரப²லகசீரானி தே³ந்தி, தானிபி லத்³தி⁴ம் அக்³க³ஹேத்வா நிவாஸேதும் வட்டந்தி, நிவாஸேத்வாபி லத்³தி⁴ ந க³ஹேதப்³பா³.

யம் ஆவாஸம் பட²மம் உபக³ச்ச²ந்தி, தத்த² விஹாரசீவராதீ³ஸு யம் அத்தி², தம் அனாபுச்சா²பி க³ஹேத்வா நிவாஸேதும் வா பாருபிதும் வா லப⁴தி. தஞ்ச கோ² ‘‘லபி⁴த்வா ஓத³ஹிஸ்ஸாமி, புன ட²பேஸ்ஸாமீ’’தி அதி⁴ப்பாயேன, ந மூலச்சே²ஜ்ஜாய. லபி⁴த்வா ச பன ஞாதிதோ வா உபட்டா²கதோ வா அஞ்ஞதோ வா குதோசி பாகதிகமேவ காதப்³ப³ம். விதே³ஸக³தேன பன ஏகஸ்மிம் ஸங்கி⁴கே ஆவாஸே ஸங்கி⁴கபரிபோ⁴கே³ன பு⁴ஞ்ஜனத்தா²ய ட²பேதப்³ப³ம். ஸசஸ்ஸ பரிபோ⁴கே³னேவ தம் ஜீரதி வா நஸ்ஸதி வா, கீ³வா ந ஹோதி. ஸசே பன ஏதேஸம் வுத்தப்பகாரானம் கி³ஹிவத்தா²தீ³னம் பி⁴ஸிச்ச²விபரியந்தானம் கிஞ்சி ந லப⁴தி, தேன திணேன வா பண்ணேன வா படிச்சா²தே³த்வா ஆக³ந்தப்³ப³ந்தி.

6. ‘‘ந, பி⁴க்க²வே, படிபா⁴னசித்தம் காராபேதப்³ப³ம் இத்தி²ரூபகம் புரிஸரூபகம், யோ காராபேய்ய, ஆபத்தி து³க்கடஸ்ஸா’’தி (சூளவ. 299) வசனதோ இத்தி²புரிஸரூபம் காதும் வா காராபேதும் வா பி⁴க்கு²னோ ந வட்டதி. ந கேவலம் (சூளவ. அட்ட². 299) இத்தி²புரிஸரூபமேவ, திரச்சா²னரூபம்பி அந்தமஸோ க³ண்டு³ப்பாத³ரூபம் பி⁴க்கு²னோ ஸயம் காதும் வா ‘‘கரோஹீ’’தி வத்தும் வா ந வட்டதி, ‘‘உபாஸக த்³வாரபாலம் கரோஹீ’’தி வத்தும்பி ந லப⁴தி. ஜாதகபகரணஅஸதி³ஸதா³னாதீ³னி பன பஸாத³னீயானி நிப்³பி³தா³படிஸம்யுத்தானி வா வத்தூ²னி பரேஹி காராபேதும் லப⁴தி, மாலாகம்மாதீ³னி ஸயம்பி காதும் லப⁴தி.

7. ‘‘ந, பி⁴க்க²வே, விப்பகதபோ⁴ஜனோ பி⁴க்கு² வுட்டா²பேதப்³போ³, யோ வுட்டா²பேய்ய, ஆபத்தி து³க்கடஸ்ஸா’’தி (சூளவ. 316) வசனதோ அந்தரக⁴ரே (சூளவ. அட்ட². 316) வா விஹாரே வா அரஞ்ஞே வா யத்த² கத்த²சி பு⁴ஞ்ஜமானோ பி⁴க்கு² அனிட்டி²தே போ⁴ஜனே ந வுட்டா²பேதப்³போ³, அந்தரக⁴ரே பச்சா² ஆக³தேன பி⁴க்க²ம் க³ஹேத்வா க³ந்தப்³ப³ம். ஸசே மனுஸ்ஸா வா பி⁴க்கூ² வா ‘‘பவிஸதா²’’தி வத³ந்தி, ‘‘மயி பவிஸந்தே பி⁴க்கூ² உட்ட²ஹிஸ்ஸந்தீ’’தி வத்தப்³ப³ம். ‘‘ஏத², ப⁴ந்தே, ஆஸனம் அத்தீ²’’தி வுத்தே பன பவிஸிதப்³ப³ம். ஸசே கோசி கிஞ்சி ந வத³தி, ஆஸனஸாலம் க³ந்த்வா அதிஸமீபம் அக³ந்த்வா ஸபா⁴க³ட்டா²னே டா²தப்³ப³ம். ஓகாஸே கதே ‘‘பவிஸதா²’’தி வுத்தேன பவிஸிதப்³ப³ம். ஸசே பன யம் ஆஸனம் தஸ்ஸ பாபுணாதி, தத்த² அபு⁴ஞ்ஜந்தோ பி⁴க்கு² நிஸின்னோ ஹோதி, தம் உட்டா²பேதும் வட்டதி. யாகு³க²ஜ்ஜகாதீ³ஸு பன யம் கிஞ்சி பிவித்வா கா²தி³த்வா வா யாவ அஞ்ஞோ ஆக³ச்ச²தி, தாவ நிஸின்னம் ரித்தஹத்த²ம்பி உட்டா²பேதும் ந வட்டதி. விப்பகதபோ⁴ஜனோயேவ ஹி ஸோ ஹோதி.

ஸசே பன ஆபத்திம் அதிக்கமித்வாபி வுட்டா²பேதியேவ, யம் ஸோ வுட்டா²பேதி, அயஞ்ச பி⁴க்கு² பவாரிதோ ஹோதி, தேன வத்தப்³போ³ ‘‘க³ச்ச² உத³கம் ஆஹராஹீ’’தி. வுட்³ட⁴தரம் பி⁴க்கு²ம் ஆணாபேதும் இத³மேவ ஏகட்டா²னம். ஸசே ஸோ உத³கம்பி ந ஆஹரதி, ஸாது⁴கம் ஸித்தா²னி கி³லித்வா வுட்³ட⁴ஸ்ஸ ஆஸனம் தா³தப்³ப³ம். வுத்தம்பி சேதம் –

‘‘ஸசே வுட்டா²பேதி, பவாரிதோ ச ஹோதி, ‘க³ச்ச² உத³கம் ஆஹரா’தி வத்தப்³போ³. ஏவஞ்சேதம் லபே⁴த², இச்சேதம் குஸலம். நோ சே லபே⁴த², ஸாது⁴கம் ஸித்தா²னி கி³லித்வா வுட்³ட⁴ஸ்ஸ ஆஸனம் தா³தப்³ப³ம். நத்வேவாஹம், பி⁴க்க²வே, ‘கேனசி பரியாயேன வுட்³ட⁴தரஸ்ஸ பி⁴க்கு²னோ ஆஸனம் படிபா³ஹிதப்³ப³’ந்தி வதா³மி, யோ படிபா³ஹேய்ய, ஆபத்தி து³க்கடஸ்ஸா’’தி (சூளவ. 316).

8. ‘‘அனுஜானாமி, பி⁴க்க²வே, நவகேன பி⁴க்கு²னா உத்³தி³ஸந்தேன ஸமகே வா ஆஸனே நிஸீதி³தும் உச்சதரே வா த⁴ம்மகா³ரவேன, தே²ரேன பி⁴க்கு²னா உத்³தி³ஸாபேந்தேன ஸமகே வா ஆஸனே நிஸீதி³தும் நீசதரே வா த⁴ம்மகா³ரவேனா’’தி (சூளவ. 320) வசனதோ நவகதரேன பி⁴க்கு²னா உத்³தி³ஸந்தேன உச்சதரேபி ஆஸனே நிஸீதி³தும், வுட்³ட⁴தரேன பி⁴க்கு²னா உத்³தி³ஸாபேந்தேன நீசதரேபி ஆஸனே நிஸீதி³தும் வட்டதி.

9. ‘‘அனுஜானாமி, பி⁴க்க²வே, திவஸ்ஸந்தரேன ஸஹ நிஸீதி³து’’ந்தி (சூளவ. 320) வசனதோ திவஸ்ஸந்தரேன பி⁴க்கு²னா ஸத்³தி⁴ம் ஏகாஸனே நிஸீதி³தும் வட்டதி. திவஸ்ஸந்தரோ (சூளவ. அட்ட². 320) நாம யோ த்³வீஹி வஸ்ஸேஹி மஹந்ததரோ வா த³ஹரதரோ வா ஹோதி, யோ பன ஏகேன வஸ்ஸேன மஹந்ததரோ வா த³ஹரதரோ வா, யோ வா ஸமானவஸ்ஸோ, தத்த² வத்தப்³ப³மேவ நத்தி², இமே ஸப்³பே³ ஏகஸ்மிம் மஞ்சே வா பீடே² வா த்³வே த்³வே ஹுத்வா நிஸீதி³தும் லப⁴ந்தி. ‘‘அனுஜானாமி, பி⁴க்க²வே, து³வக்³க³ஸ்ஸ மஞ்சம் து³வக்³க³ஸ்ஸ பீட²’’ந்தி (சூளவ. 320) ஹி வுத்தம்.

10. யம் பன திண்ணம் பஹோதி, தம் ஸம்ஹாரிமம் வா ஹோது அஸம்ஹாரிமம் வா, ததா²ரூபே அபி ப²லகக²ண்டே³ அனுபஸம்பன்னேனபி ஸத்³தி⁴ம் நிஸீதி³தும் வட்டதி. ‘‘அனுஜானாமி, பி⁴க்க²வே, யம் திண்ணம் பஹோதி, ஏத்தகம் பச்சி²மம் தீ³கா⁴ஸன’’ந்தி (சூளவ. 320) ஹி வுத்தம். ‘‘அனுஜானாமி, பி⁴க்க²வே, ட²பேத்வா பண்ட³கம் மாதுகா³மம் உப⁴தோப்³யஞ்ஜனகம் அஸமானாஸனிகேஹி ஸஹ தீ³கா⁴ஸனே நிஸீதி³து’’ந்தி (சூளவ. 320) வசனதோ பன தீ³கா⁴ஸனேபி பண்ட³காதீ³ஹி ஸஹ நிஸீதி³தும் ந வட்டதி.

11. கி³லானம் உபட்ட²ஹந்தேன ‘‘நத்தி² வோ, பி⁴க்க²வே, மாதா, நத்தி² பிதா, யே வோ உபட்ட²ஹேய்யும், தும்ஹே சே, பி⁴க்க²வே, அஞ்ஞமஞ்ஞம் ந உபட்ட²ஹிஸ்ஸத², அத² கோ சரஹி உபட்ட²ஹிஸ்ஸதி. யோ, பி⁴க்க²வே, மம் உபட்ட²ஹேய்ய, ஸோ கி³லானம் உபட்ட²ஹேய்யா’’தி (மஹாவ. 365) இமம் ப⁴க³வதோ அனுஸாஸனிம் அனுஸ்ஸரந்தேன ஸக்கச்சம் உபட்டா²தப்³போ³.

ஸசே உபஜ்ஜா²யோ ஹோதி, உபஜ்ஜா²யேன யாவஜீவம் உபட்டா²தப்³போ³, வுட்டா²னமஸ்ஸ ஆக³மேதப்³ப³ம். ஸசே ஆசரியோ ஹோதி, ஆசரியேன யாவஜீவம் உபட்டா²தப்³போ³, வுட்டா²னமஸ்ஸ ஆக³மேதப்³ப³ம். ஸசே ஸத்³தி⁴விஹாரிகோ ஹோதி, ஸத்³தி⁴விஹாரிகேன யாவஜீவம் உபட்டா²தப்³போ³, வுட்டா²னமஸ்ஸ ஆக³மேதப்³ப³ம். ஸசே அந்தேவாஸிகோ ஹோதி, அந்தேவாஸிகேன யாவஜீவம் உபட்டா²தப்³போ³, வுட்டா²னமஸ்ஸ ஆக³மேதப்³ப³ம். ஸசே ஸமானுபஜ்ஜா²யகோ ஹோதி, ஸமானுபஜ்ஜா²யகேன யாவஜீவம் உபட்டா²தப்³போ³, வுட்டா²னமஸ்ஸ ஆக³மேதப்³ப³ம். ஸசே ஸமானாசரியகோ ஹோதி, ஸமானாசரியகேன யாவஜீவம் உபட்டா²தப்³போ³, வுட்டா²னமஸ்ஸ ஆக³மேதப்³ப³ம். ஸசே ந ஹோதி உபஜ்ஜா²யோ வா ஆசரியோ வா ஸத்³தி⁴விஹாரிகோ வா அந்தேவாஸிகோ வா ஸமானுபஜ்ஜா²யகோ வா ஸமானாசரியகோ வா, ஸங்கே⁴ன உபட்டா²தப்³போ³. நோ சே உபட்ட²ஹேய்ய, ஆபத்தி து³க்கடஸ்ஸா’’தி (மஹாவ. 365) –

வசனதோ யஸ்ஸ (மஹாவ. அட்ட². 365) தே உபஜ்ஜா²யாத³யோ தஸ்மிம் விஹாரே நத்தி², ஆக³ந்துகோ ஹோதி ஏகசாரிகபி⁴க்கு², ஸங்க⁴ஸ்ஸ பா⁴ரோ, தஸ்மா ஸங்கே⁴ன உபட்டா²தப்³போ³. நோ சே உபட்ட²ஹேய்ய, ஸகலஸ்ஸ ஸங்க⁴ஸ்ஸ ஆபத்தி. வாரம் ட²பேத்வா ஜக்³க³ந்தேஸு பன யோ அத்தனோ வாரே ந ஜக்³க³தி, தஸ்ஸேவ ஆபத்தி, ஸங்க⁴த்தே²ரோபி வாரதோ ந முச்சதி. ஸசே ஸகலோ ஸங்கோ⁴ ஏகஸ்ஸ பா⁴ரம் கரோதி, ஏகோ வா வத்தஸம்பன்னோ பி⁴க்கு² ‘‘அஹமேவ ஜக்³கி³ஸ்ஸாமீ’’தி ஜக்³க³தி, ஸங்கோ⁴ ஆபத்திதோ முச்சதி.

கி³லானேன பன –

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானோ தூ³பட்டோ² ஹோதி. அஸப்பாயகாரீ ஹோதி, ஸப்பாயே மத்தம் ந ஜானாதி, பே⁴ஸஜ்ஜம் ந படிஸேவிதா ஹோதி, அத்த²காமஸ்ஸ கி³லானுபட்டா²கஸ்ஸ யதா²பூ⁴தம் ஆபா³த⁴ம் நாவிகத்தா ஹோதி ‘அபி⁴க்கமந்தம் வா அபி⁴க்கமதீதி, படிக்கமந்தம் வா படிக்கமதீதி, டி²தம் வா டி²தோ’தி, உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அனதி⁴வாஸகஜாதிகோ ஹோதீ’’தி (மஹாவ. 366) –

ஏவம் வுத்தானி பஞ்ச அயுத்தங்கா³னி ஆரகா பரிவஜ்ஜேத்வா –

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானோ ஸூபட்டோ² ஹோதி. ஸப்பாயகாரீ ஹோதி, ஸப்பாயே மத்தம் ஜானாதி, பே⁴ஸஜ்ஜம் படிஸேவிதா ஹோதி, அத்த²காமஸ்ஸ கி³லானுபட்டா²கஸ்ஸ யதா²பூ⁴தம் ஆபா³த⁴ம் ஆவிகத்தா ஹோதி ‘அபி⁴க்கமந்தம் வா அபி⁴க்கமதீதி, படிக்கமந்தம் வா படிக்கமதீதி, டி²தம் வா டி²தோ’தி, உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அதி⁴வாஸகஜாதிகோ ஹோதீ’’தி (மஹாவ. 366) –

ஏவம் வுத்தபஞ்சங்க³ஸமன்னாக³தேன ப⁴விதப்³ப³ம்.

கி³லானுபட்டா²கேன ச –

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானுபட்டா²கோ நாலம் கி³லானம் உபட்டா²தும். ந படிப³லோ ஹோதி பே⁴ஸஜ்ஜம் ஸம்விதா⁴தும், ஸப்பாயாஸப்பாயம் ந ஜானாதி, அஸப்பாயம் உபனாமேதி, ஸப்பாயம் அபனாமேதி, ஆமிஸந்தரோ கி³லானம் உபட்டா²தி, நோ மேத்தசித்தோ, ஜேகு³ச்சீ² ஹோதி உச்சாரம் வா பஸ்ஸாவம் வா கே²ளம் வா வந்தம் வா நீஹாதும், ந படிப³லோ ஹோதி கி³லானம் காலேன காலம் த⁴ம்மியா கதா²ய ஸந்த³ஸ்ஸேதும் ஸமாத³பேதும் ஸமுத்தேஜேதும் ஸம்பஹம்ஸேது’’ந்தி (மஹாவ. 366) –

ஏவம் வுத்தானி பஞ்ச அயுத்தங்கா³னி ஆரகா பரிவஜ்ஜேத்வா –

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானுபட்டா²கோ அலம் கி³லானம் உபட்டா²தும். படிப³லோ ஹோதி பே⁴ஸஜ்ஜம் ஸம்விதா⁴தும், ஸப்பாயாஸப்பாயம் ஜானாதி, அஸப்பாயம் அபனாமேதி, ஸப்பாயம் உபனாமேதி, மேத்தசித்தோ கி³லானம் உபட்டா²தி, நோ ஆமிஸந்தரோ, அஜேகு³ச்சீ² ஹோதி உச்சாரம் வா பஸ்ஸாவம் வா கே²ளம் வா வந்தம் வா நீஹாதும், படிப³லோ ஹோதி கி³லானம் காலேன காலம் த⁴ம்மியா கதா²ய ஸந்த³ஸ்ஸேதும் ஸமாத³பேதும் ஸமுத்தேஜேதும் ஸம்பஹம்ஸேது’’ந்தி (மஹாவ. 366) –

ஏவம் வுத்தபஞ்சங்க³ஸமன்னாக³தேன ப⁴விதப்³ப³ம்.

12. த⁴ம்மிம் கத²ம் கரோந்தேன (மஹாவ. அட்ட². 2.180) ச ‘‘ஸீலவா ஹி த்வம் கதகுஸலோ, கஸ்மா மீயமானோ பா⁴யஸி, நனு ஸீலவதோ ஸக்³கோ³ நாம மரணமத்தபடிப³த்³தோ⁴யேவா’’தி ஏவம் கி³லானஸ்ஸ பி⁴க்கு²னோ மரணவண்ணோ ந ஸம்வண்ணேதப்³போ³. ஸசே ஹி தஸ்ஸ ஸம்வண்ணனம் ஸுத்வா ஆஹாருபச்சே²தா³தி³னா உபக்கமேன ஏகஜவனவாராவஸேஸேபி ஆயுஸ்மிம் அந்தரா காலம் கரோதி, இமினாவ மாரிதோ ஹோதி. பண்டி³தேன பன பி⁴க்கு²னா இமினா நயேன அனுஸிட்டி² தா³தப்³பா³ ‘‘ஸீலவதோ நாம அனச்ச²ரியா மக்³க³ப²லுப்பத்தி, தஸ்மா விஹாராதீ³ஸு ஆஸத்திம் அகத்வா பு³த்³த⁴க³தம் த⁴ம்மக³தம் ஸங்க⁴க³தம் காயக³தஞ்ச ஸதிம் உபட்ட²பேத்வா மனஸிகாரே அப்பமாதோ³ காதப்³போ³’’தி. மரணவண்ணேபி ஸம்வண்ணிதே ஸோ தாய ஸம்வண்ணனாய கஞ்சி உபக்கமம் அகத்வா அத்தனோ த⁴ம்மதாய யதா²யுனா யதா²னுஸந்தி⁴னாவ மரதி, தப்பச்சயா ஸம்வண்ணகோ ஆபத்தியா ந காரேதப்³போ³.

13. ‘‘ந ச, பி⁴க்க²வே, அத்தானம் பாதேதப்³ப³ம், யோ பாதேய்ய, ஆபத்தி து³க்கடஸ்ஸா’’தி (பாரா. 183) வசனதோ கி³லானேன (பாரா. அட்ட². 2.182-183) பி⁴க்கு²னாபி யேன கேனசி உபக்கமேன அந்தமஸோ ஆஹாருபச்சே²த³னேனபி அத்தா ந மாரேதப்³போ³. யோபி கி³லானோ விஜ்ஜமானே பே⁴ஸஜ்ஜே ச உபட்டா²கேஸு ச மரிதுகாமோ ஆஹாரம் உபச்சி²ந்த³தி, து³க்கடமேவ. யஸ்ஸ பன மஹாஆபா³தோ⁴ சிரானுப³ந்தோ⁴, பி⁴க்கூ² உபட்ட²ஹந்தா கிலமந்தி ஜிகு³ச்ச²ந்தி, ‘‘கதா³ நு கோ² கி³லானதோ முச்சிஸ்ஸாமா’’தி அட்டீயந்தி. ஸசே ஸோ ‘‘அயம் அத்தபா⁴வோ படிஜக்³கி³யமானோபி ந திட்ட²தி, பி⁴க்கூ² ச கிலமந்தீ’’தி ஆஹாரம் உபச்சி²ந்த³தி, பே⁴ஸஜ்ஜம் ந ஸேவதி, வட்டதி. யோ பன ‘‘அயம் ரோகோ³ க²ரோ, ஆயுஸங்கா²ரா ந திட்ட²ந்தி, அயஞ்ச மே விஸேஸாதி⁴க³மோ ஹத்த²ப்பத்தோ விய தி³ஸ்ஸதீ’’தி உபச்சி²ந்த³தி, வட்டதியேவ. அகி³லானஸ்ஸபி உப்பன்னஸம்வேக³ஸ்ஸ ‘‘ஆஹாரபரியேஸனம் நாம பபஞ்சோ, கம்மட்டா²னமேவ அனுயுஞ்ஜிஸ்ஸாமீ’’தி கம்மட்டா²னஸீஸேன உபச்சி²ந்த³ந்தஸ்ஸ வட்டதி. விஸேஸாதி⁴க³மம் ப்³யாகரித்வா ஆஹாரம் உபச்சி²ந்த³தி, ந வட்டதி. ஸபா⁴கா³னஞ்ஹி லஜ்ஜீபி⁴க்கூ²னம் கதே²தும் வட்டதி.

14. ‘‘ந ச, பி⁴க்க²வே, அப்படிவேக்கி²த்வா ஆஸனே நிஸீதி³தப்³ப³ம், யோ நிஸீதே³ய்ய, ஆபத்தி து³க்கடஸ்ஸா’’தி (பாரா. 180) வசனதோ ஆஸனம் அனுபபரிக்கி²த்வா ந நிஸீதி³தப்³ப³ம். கீதி³ஸம் (பாரா. அட்ட². 2.180) பன ஆஸனம் உபபரிக்கி²தப்³ப³ம், கீதி³ஸம் ந உபபரிக்கி²தப்³ப³ம்? யம் ஸுத்³த⁴ம் ஆஸனமேவ ஹோதி அபச்சத்த²ரணகம், யஞ்ச ஆக³ந்த்வா டி²தானம் பஸ்ஸதம்யேவ அத்த²ரீயதி, தம் ந பச்சவேக்கி²தப்³ப³ம், நிஸீதி³தும் வட்டதி. யம்பி மனுஸ்ஸா ஸயம் ஹத்தே²ன அக்கமித்வா ‘‘இத⁴ ப⁴ந்தே நிஸீத³தா²’’தி தே³ந்தி, தஸ்மிம்பி வட்டதி. ஸசேபி பட²மமேவ ஆக³ந்த்வாபி நிஸின்னா பச்சா² உத்³த⁴ம் வா அதோ⁴ வா ஸங்கமந்தி, படிவேக்க²ணகிச்சம் நத்தி². யம்பி தனுகேன வத்தே²ன யதா² தலம் தி³ஸ்ஸதி, ஏவம் படிச்ச²ன்னம் ஹோதி, தஸ்மிம்பி படிவேக்க²ணகிச்சம் நத்தி². யம் பன படிகச்சேவ பாவாரகோஜவாதீ³ஹி அத்த²தம் ஹோதி, தம் ஹத்தே²ன பராமஸித்வா ஸல்லக்கே²த்வா நிஸீதி³தப்³ப³ம். மஹாபச்சரியம் பன ‘‘க⁴னஸாடகேனபி அத்த²தே யஸ்மிம் வலி ந பஞ்ஞாயதி, தம் ந படிவேக்கி²தப்³ப³’’ந்தி வுத்தம்.

15. ‘‘ந, பி⁴க்க²வே, த³வாய ஸிலா படிவிஜ்ஜி²தப்³பா³, யோ படிவிஜ்ஜே²ய்ய, ஆபத்தி து³க்கடஸ்ஸா’’தி (பாரா. 183) வசனதோ ஹஸாதி⁴ப்பாயேன பாஸாணோ ந பவட்டேதப்³போ³. ந கேவலஞ்ச (பாரா. அட்ட². 2.182-183) பாஸாணோ, அஞ்ஞம்பி யம் கிஞ்சி தா³ருக²ண்ட³ம் வா இட்ட²கக²ண்ட³ம் வா ஹத்தே²ன வா யந்தேன வா படிவிஜ்ஜி²தும் ந வட்டதி. சேதியாதீ³னம் அத்தா²ய பாஸாணாத³யோ ஹஸந்தா ஹஸந்தா பவட்டேந்திபி கி²பந்திபி உக்கி²பந்திபி, ‘‘கம்மஸமயோ’’தி வட்டதி, அஞ்ஞம்பி ஈதி³ஸம் நவகம்மம் வா கரோந்தா ப⁴ண்ட³கம் வா தோ⁴வந்தா ருக்க²ம் வா தோ⁴வனத³ண்ட³கம் வா உக்கி²பித்வா படிவிஜ்ஜ²ந்தி, வட்டதி, ப⁴த்தவிஸ்ஸக்³க³காலாதீ³ஸு காகே வா ஸோணே வா கட்ட²ம் வா கத²லம் வா கி²பித்வா பலாபேந்தி, வட்டதி.

16. ‘‘ந, பி⁴க்க²வே, தா³யோ ஆலிம்பிதப்³போ³, யோ ஆலிம்பேய்ய, ஆபத்தி து³க்கடஸ்ஸா’’தி (சூளவ. 283) வசனதோ வனே அக்³கி³ ந தா³தப்³போ³. ஸசே (பாரா. அட்ட². 2.190) பன ‘‘ஏத்த²ந்தரே யோ கோசி ஸத்தோ மரதூ’’தி அக்³கி³ம் தே³தி, பாராஜிகானந்தரியது²ல்லச்சயபாசித்தியவத்தூ²னம் அனுரூபதோ பாராஜிகாதீ³னி அகுஸலராஸி ச ஹோதி. ‘‘அல்லதிணவனப்பதயோ ட³ய்ஹந்தூ’’தி அக்³கி³ம் தே³ந்தஸ்ஸ பாசித்தியம், ‘‘த³ப்³பூ³பகரணானி வினஸ்ஸந்தூ’’தி அக்³கி³ம் தே³ந்தஸ்ஸ து³க்கடம். ‘‘கி²ட்³டா³தி⁴ப்பாயேனபி து³க்கட’’ந்தி ஸங்கே²பட்ட²கதா²யம் வுத்தம். ‘‘யம் கிஞ்சி அல்லஸுக்க²ம் ஸஇந்த்³ரியானிந்த்³ரியம் ட³ய்ஹதூ’’தி அக்³கி³ம் தே³ந்தஸ்ஸ வத்து²வஸேன பாராஜிகது²ல்லச்சயபாசித்தியது³க்கடானி வேதி³தப்³பா³னி.

படக்³கி³தா³னம் பன பரித்தகரணஞ்ச ப⁴க³வதா அனுஞ்ஞாதம், தஸ்மா அரஞ்ஞே வனகம்மிகேஹி வா தி³ன்னம் ஸயம் வா உட்டி²தம் அக்³கி³ம் ஆக³ச்ச²ந்தம் தி³ஸ்வா ‘‘திணகுடியோ மா வினஸ்ஸந்தூ’’தி தஸ்ஸ அக்³கி³னோ படிஅக்³கி³ம் தா³தும் வட்டதி, யேன ஸத்³தி⁴ம் ஆக³ச்ச²ந்தோ அக்³கி³ ஏகதோ ஹுத்வா நிருபாதா³னோ நிப்³பா³தி. ‘‘பரித்தம்பி காதும் வட்டதீ’’தி திணகுடிகானம் ஸமந்தா பூ⁴மிதச்ச²னம் பரிகா²க²ணனம் வா, யதா² ஆக³தோ அக்³கி³ உபாதா³னம் அலபி⁴த்வா நிப்³பா³தி, ஏதஞ்ச ஸப்³ப³ம் உட்டி²தேயேவ அக்³கி³ஸ்மிம் அஸதி அனுபஸம்பன்னே ஸயம்பி காதும் வட்டதி. அனுட்டி²தே பன அனுபஸம்பன்னேஹி கப்பியவோஹாரேன காரேதப்³ப³ம், உத³கேன பன நிப்³பா³பேந்தேஹி அப்பாணகமேவ உத³கம் ஆஸிஞ்சிதப்³ப³ம்.

17. அஸ்ஸத்³தே⁴ஸு (பாரா. அட்ட². 2.181) மிச்சா²தி³ட்டி²குலேஸு ஸக்கச்சம் பணீதபோ⁴ஜனம் லபி⁴த்வா அனுபபரிக்கி²த்வா நேவ அத்தனா பரிபு⁴ஞ்ஜிதப்³ப³ம், ந பரேஸம் தா³தப்³ப³ம். விஸமிஸ்ஸம்பி ஹி தானி குலானி பிண்ட³பாதம் தே³ந்தி. யம்பி ஆபி⁴தோ³ஸிகம் ப⁴த்தம் வா க²ஜ்ஜகம் வா ததோ லப⁴தி, தம்பி ந பரிபு⁴ஞ்ஜிதப்³ப³ம். அபிஹிதவத்து²ம்பி ஹி ஸப்பவிச்சி²காதீ³ஹி அதி⁴ஸயிதம் ச²ட்³ட³னீயத⁴ம்மம் தானி குலானி தே³ந்தி. க³ந்த⁴ஹலித்³தா³தி³மக்கி²தோபி ததோ பிண்ட³பாதோ ந க³ஹேதப்³போ³. ஸரீரே ரோக³ட்டா²னானி புஞ்சி²த்வா ட²பிதப⁴த்தம்பி ஹி தானி தா³தப்³ப³ம் மஞ்ஞந்தீதி.

18. ‘‘அனாபத்தி, பி⁴க்க²வே, கோ³பகஸ்ஸ தா³னே’’தி (பாரா. 156) வுத்தம். தத்த² (பாரா. அட்ட². 1.156) கதரம் கோ³பகதா³னம் வட்டதி, கதரம் ந வட்டதி? மஹாஸுமத்தே²ரோ தாவ ஆஹ ‘‘யம் கோ³பகஸ்ஸ பரிச்சி²ந்தி³த்வா தி³ன்னம் ஹோதி ‘ஏத்தகம் தி³வஸே தி³வஸே க³ண்ஹா’தி, ததே³வ வட்டதி, ததோ உத்தரி ந வட்டதீ’’தி. மஹாபது³மத்தே²ரோ பனாஹ ‘‘கிம் கோ³பகானம் பண்ணம் ஆரோபேத்வா நிமித்தஸஞ்ஞம் வா கத்வா தி³ன்னம் அத்தி², ஏதேஸம் ஹத்தே² விஸ்ஸட்ட²கஸ்ஸ ஏதே இஸ்ஸரா, தஸ்மா யம் தே³ந்தி, தம் ப³ஹுகம்பி வட்டதீ’’தி. குருந்த³ட்ட²கதா²யம் பன வுத்தம் ‘‘மனுஸ்ஸானம் ஆராமம் வா அஞ்ஞம் வா ப²லாப²லம் தா³ரகா ரக்க²ந்தி, தேஹி தி³ன்னம் வட்டதி, ஆஹராபேத்வா பன ந க³ஹேதப்³ப³ம். ஸங்கி⁴கே பன சேதியஸ்ஸ ஸந்தகே ச கேணியா க³ஹேத்வா ரக்க²ந்தஸ்ஸேவ தா³னம் வட்டதி, வேதனேன ரக்க²ந்தஸ்ஸ அத்தனோ பா⁴க³மத்தம் வட்டதீ’’தி. மஹாபச்சரியம் பன ‘‘யம் கி³ஹீனம் ஆராமரக்க²கா பி⁴க்கூ²னம் தே³ந்தி, ஏதம்பி வட்டதி. பி⁴க்கு²ஸங்க⁴ஸ்ஸ ஆராமகோ³பகா யம் அத்தனோ ப⁴தியா க²ண்டி³த்வா தே³ந்தி, ஏதம் வட்டதி. யோபி உபட்³டா⁴ராமம் வா கேசிதே³வ ருக்கே² வா ப⁴திம் லபி⁴த்வா ரக்க²தி, தஸ்ஸபி அத்தனோ ஸம்பத்தருக்க²தோயேவ தா³தும் வட்டதி, கேணியா க³ஹேத்வா ரக்க²ந்தஸ்ஸ பன ஸப்³ப³ம்பி வட்டதீ’’தி வுத்தம். ஏதம் பன ஸப்³ப³ம் ப்³யஞ்ஜனதோ நானம், அத்த²தோ ஏகமேவ, தஸ்மா அதி⁴ப்பாயம் ஞத்வா க³ஹேதப்³ப³ம்.

அபிசேத்த² அயம்பி வினிச்ச²யோ வேதி³தப்³போ³ (பாரா. அட்ட². 1.156) – யத்த² ஆவாஸிகா ஆக³ந்துகானம் ந தே³ந்தி, ப²லவாரே ச ஸம்பத்தே அஞ்ஞேஸம் அபா⁴வம் தி³ஸ்வா சோரிகாய அத்தனாவ கா²த³ந்தி, தத்த² ஆக³ந்துகேஹி க⁴ண்டிம் பஹரித்வா பா⁴ஜேத்வா பரிபு⁴ஞ்ஜிதும் வட்டதி. யத்த² பன ஆவாஸிகா ருக்கே² ரக்கி²த்வா ப²லவாரே ஸம்பத்தே பா⁴ஜேத்வா கா²த³ந்தி, சதூஸு பச்சயேஸு ஸம்மா உபனேந்தி, அனிஸ்ஸரா தத்த² ஆக³ந்துகா. யேபி ருக்கா² சீவரத்தா²ய நியமேத்வா தி³ன்னா, தேஸுபி ஆக³ந்துகா அனிஸ்ஸரா. ஏஸ நயோ ஸேஸபச்சயத்தா²ய நியமேத்வா தி³ன்னேபி. யே பன ததா² அனியமேத்வா ஆவாஸிகா ச தே ரக்கி²த்வா கோ³பேத்வா சோரிகாய பரிபு⁴ஞ்ஜந்தி, ந தேஸு ஆவாஸிகானம் கதிகாய டா²தப்³ப³ம். யே ப²லபரிபோ⁴க³த்தா²ய தி³ன்னா, ஆவாஸிகா ச நே ரக்கி²த்வா கோ³பேத்வா ஸம்மா உபனேந்தி, தேஸுயேவ தேஸம் கதிகாய டா²தப்³ப³ம். மஹாபச்சரியம் பன வுத்தம் ‘‘சதுன்னம் பச்சயானம் நியமேத்வா தி³ன்னம் தே²ய்யசித்தேன பரிபு⁴ஞ்ஜந்தோ ப⁴ண்ட³ம் அக்³கா⁴பேத்வா காரேதப்³போ³, பரிபோ⁴க³வஸேன பா⁴ஜேத்வா பரிபு⁴ஞ்ஜந்தஸ்ஸ ப⁴ண்ட³தே³ய்யம். யம் பனேத்த² ஸேனாஸனத்தா²ய நியமிதம், தம் பரிபோ⁴க³வஸேனேவ பா⁴ஜேத்வா பரிபு⁴ஞ்ஜந்தஸ்ஸ து²ல்லச்சயஞ்ச ப⁴ண்ட³தே³ய்யஞ்சா’’தி.

ஓதி³ஸ்ஸ சீவரத்தா²ய தி³ன்னம் சீவரேயேவ உபனேதப்³ப³ம். ஸசே து³ப்³பி⁴க்க²ம் ஹோதி, பி⁴க்கூ² பிண்ட³பாதேன கிலமந்தி, சீவரம் பன ஸுலப⁴ம், ஸங்க⁴ஸுட்டு²தாய அபலோகனகம்மம் கத்வா பிண்ட³பாதேபி உபனேதும் வட்டதி. ஸேனாஸனேன கி³லானபச்சயேன வா கிலமந்தேஸு ஸங்க⁴ஸுட்டு²தாய அபலோகனகம்மம் கத்வா தத³த்தா²யபி உபனேதும் வட்டதி. ஓதி³ஸ்ஸ பிண்ட³பாதத்தா²ய ச கி³லானபச்சயத்தா²ய ச தி³ன்னேபி ஏஸேவ நயோ. ஓதி³ஸ்ஸ ஸேனாஸனத்தா²ய தி³ன்னம் பன க³ருப⁴ண்ட³ம் ஹோதி, தம் ரக்கி²த்வா கோ³பேத்வா தத³த்த²மேவ உபனேதப்³ப³ம். ஸசே பன து³ப்³பி⁴க்க²ம் ஹோதி, பி⁴க்கூ² பிண்ட³பாதேன ந யாபேந்தி, ஏத்த² ராஜரோக³சோரப⁴யாதீ³ஹி அஞ்ஞத்த² க³ச்ச²ந்தானம் விஹாரா பலுஜ்ஜந்தி, தாலனாளிகேராதி³கே வினாஸேந்தி, ஸேனாஸனபச்சயம் பன நிஸ்ஸாய யாபேதும் ஸக்கா ஹோதி, ஏவரூபே காலே ஸேனாஸனம் விஸ்ஸஜ்ஜேத்வாபி ஸேனாஸனஜக்³க³னத்தா²ய பரிபோ⁴கோ³ ப⁴க³வதா அனுஞ்ஞாதோ. தஸ்மா ஏகம் வா த்³வே வா வரஸேனாஸனானி ட²பேத்வா இதரானி லாமககோடியா பிண்ட³பாதத்தா²ய விஸ்ஸஜ்ஜேதும் வட்டந்தி, மூலவத்து²ச்சே²த³ம் பன கத்வா ந உபனேதப்³ப³ம்.

யோ பன ஆராமோ சதுபச்சயத்தா²ய நியமேத்வா தி³ன்னோ, தத்த² அபலோகனகம்மம் ந காதப்³ப³ம். யேன பச்சயேன பன ஊனம், தத³த்த²ம் உபனேதும் வட்டதி, ஆராமோ படிஜக்³கி³தப்³போ³, வேதனம் த³த்வாபி ஜக்³கா³பேதும் வட்டதி. யே பன வேதனம் லபி⁴த்வா ஆராமேயேவ கே³ஹம் கத்வா வஸந்தா ரக்க²ந்தி, தே சே ஆக³தானம் பி⁴க்கூ²னம் நாளிகேரம் வா தாலபக்கம் வா தே³ந்தி, யம் தேஸம் ஸங்கே⁴ன அனுஞ்ஞாதம் ஹோதி ‘‘தி³வஸே தி³வஸே ஏத்தகம் நாம கா²த³தா²’’தி, ததே³வ தே தா³தும் லப⁴ந்தி, ததோ உத்தரி தேஸம் தே³ந்தானம்பி க³ஹேதும் ந வட்டந்தி. யோ பன ஆராமம் கேணியா க³ஹேத்வா ஸங்க⁴ஸ்ஸ சதுபச்சயத்தா²ய கப்பியப⁴ண்ட³மேவ தே³தி, அயம் ப³ஹுகம்பி தா³தும் லப⁴தி. சேதியஸ்ஸ பதீ³பத்தா²ய வா க²ண்ட³பு²ல்லபடிஸங்க²ரணத்தா²ய வா தி³ன்னஆராமோபி ஜக்³கி³தப்³போ³, வேதனம் த³த்வாபி ஜக்³கா³பேதப்³போ³. வேதனஞ்ச பனேத்த² சேதியஸந்தகம்பி ஸங்க⁴ஸந்தகம்பி தா³தும் வட்டதி. ஏதம்பி ஆராமம் வேதனேன தத்தே²வ வஸித்வா ரக்க²ந்தானஞ்ச கேணியா க³ஹேத்வா கப்பியப⁴ண்ட³தா³யகானஞ்ச தத்த²ஜாதகப²லதா³னம் வுத்தனயேனேவ வேதி³தப்³ப³ம்.

19. த⁴ம்மிகரக்க²ம் (பாசி. அட்ட². 679) யாசந்தேன அதீதம் அனாக³தம் வா ஆரப்³ப⁴ ஓதி³ஸ்ஸ ஆசிக்கி²தும் ந வட்டதி. அதீதஞ்ஹி ஆரப்³ப⁴ அத்தி² ஓதி³ஸ்ஸ ஆசிக்க²னா, அத்தி² அனோதி³ஸ்ஸ ஆசிக்க²னா, அனாக³தம் ஆரப்³ப⁴பி அத்தி² ஓதி³ஸ்ஸ ஆசிக்க²னா, அத்தி² அனோதி³ஸ்ஸ ஆசிக்க²னா. கத²ம் அதீதம் ஆரப்³ப⁴ ஓதி³ஸ்ஸ ஆசிக்க²னா ஹோதி? பி⁴க்கூ²னம் விஹாரே கா³மதா³ரகா வா து⁴த்தாத³யோ வா யே கேசி அனாசாரம் ஆசரந்தி, ருக்க²ம் வா சி²ந்த³ந்தி, ப²லாப²லம் வா ஹரந்தி, பரிக்கா²ரே வா அச்சி²ந்த³ந்தி, பி⁴க்கு² வோஹாரிகே உபஸங்கமித்வா ‘‘அம்ஹாகம் விஹாரே இத³ம் நாம கத’’ந்தி வத³தி. ‘‘கேனா’’தி வுத்தே ‘‘அஸுகேன ச அஸுகேன சா’’தி ஆசிக்க²தி. ஏவம் அதீதம் ஆரப்³ப⁴ ஓதி³ஸ்ஸ ஆசிக்க²னா ஹோதி, ஸா ந வட்டதி. தஞ்சே ஸுத்வா தே வோஹாரிகா தேஸம் த³ண்ட³ம் கரோந்தி, ஸப்³ப³ம் பி⁴க்கு²ஸ்ஸ கீ³வா ஹோதி, ‘‘த³ண்ட³ம் க³ண்ஹிஸ்ஸந்தீ’’தி அதி⁴ப்பாயேபி ஸதி கீ³வாயேவ ஹோதி. ஸசே பன ‘‘தஸ்ஸ த³ண்ட³ம் க³ண்ஹதா²’’தி வத³தி, பஞ்சமாஸகமத்தே க³ஹிதே பாராஜிகம் ஹோதி. ‘‘கேனா’’தி வுத்தே பன ‘‘அஸுகேனாதி வத்தும் அம்ஹாகம் ந வட்டதி, தும்ஹேயேவ ஜானிஸ்ஸத². கேவலஞ்ஹி மயம் ரக்க²ம் யாசாம, தம் நோ தே³த², அவஹடப⁴ண்ட³ஞ்ச ஆஹராபேதா²’’தி வத்தப்³ப³ம். ஏவம் அனோதி³ஸ்ஸ ஆசிக்க²னா ஹோதி, ஸா வட்டதி. ஏவம் வுத்தே ஸசேபி தே வோஹாரிகா காரகே க³வேஸித்வா தேஸம் த³ண்ட³ம் கரோந்தி, ஸப்³ப³ஸாபதேய்யேபி க³ஹிதே பி⁴க்கு²னோ நேவ கீ³வா, ந ஆபத்தி. பரிக்கா²ரம் ஹரந்தே தி³ஸ்வா தேஸம் அனத்த²காமதாய ‘‘சோரோ சோரோ’’தி வத்தும்பி ந வட்டதி. ஏவம் வுத்தேபி ஹி யம் தேஸம் த³ண்ட³ம் கரோந்தி, ஸப்³ப³ம் பி⁴க்கு²னோ கீ³வா ஹோதி. அத்தனோ வசனகரம் பன ‘‘இமினா மே பரிக்கா²ரோ க³ஹிதோ, தம் ஆஹராபேஹி, மா சஸ்ஸ த³ண்ட³ம் கரோஹீ’’தி வத்தும் வட்டதி. தா³ஸதா³ஸீவாபிஆதீ³னம்பி அத்தா²ய அட்³ட³ம் கரோந்தி அயம் அகப்பியஅட்³டோ³ நாம, ந வட்டதி.

கத²ம் அனாக³தம் ஆரப்³ப⁴ ஓதி³ஸ்ஸ ஆசிக்க²னா ஹோதி? வுத்தனயேனேவ பரேஹி அனாசாராதீ³ஸு கதேஸு பி⁴க்கு² வோஹாரிகே ஏவம் வத³தி ‘‘அம்ஹாகம் விஹாரே இத³ஞ்சித³ஞ்ச கரோந்தி, ரக்க²ம் நோ தே³த² ஆயதிம் அகரணத்தா²யா’’தி. ‘‘கேன ஏவம் கத’’ந்தி வுத்தே ச ‘‘அஸுகேன ச அஸுகேன சா’’தி ஆசிக்க²தி. ஏவம் அனாக³தம் ஆரப்³ப⁴ ஓதி³ஸ்ஸ ஆசிக்க²னா ஹோதி, ஸாபி ந வட்டதி. தேஸஞ்ஹி த³ண்டே³ கதே புரிமனயேனேவ ஸப்³ப³ம் பி⁴க்கு²ஸ்ஸ கீ³வா, ஸேஸம் புரிமஸதி³ஸமேவ. ஸசே வோஹாரிகா ‘‘பி⁴க்கூ²னம் விஹாரே ஏவரூபம் அனாசாரம் கரோந்தானம் இமம் நாம த³ண்ட³ம் கரோமா’’தி பே⁴ரிம் சராபேத்வா ஆணாய அதிட்ட²மானே பரியேஸித்வா த³ண்ட³ம் கரோந்தி, பி⁴க்கு²னோ நேவ கீ³வா, ந ஆபத்தி. விஹாரஸீமாய ருக்கா²தீ³னி சி²ந்த³ந்தானம் வாஸிப²ரஸுஆதீ³னி க³ஹேத்வா பாஸாணேஹி கோட்டேந்தி, ந வட்டதி. ஸசே தா⁴ரா பி⁴ஜ்ஜதி, காராபேத்வா தா³தப்³பா³. உபதா⁴வித்வா தேஸம் பரிக்கா²ரே க³ண்ஹந்தி, தம்பி ந காதப்³ப³ம். லஹுபரிவத்தஞ்ஹி சித்தம், தே²ய்யசேதனாய உப்பன்னாய மூலச்சே²ஜ்ஜம்பி க³ச்சே²ய்ய.

20. உச்சாரம் வா பஸ்ஸாவம் வா ஸங்காரம் வா விகா⁴ஸம் வா திரோகுட்டே வா திரோபாகாரே வா ச²ட்³டே³தும் வா ச²ட்³டா³பேதும் வா ந வட்டதி. சத்தாரிபி (பாசி. அட்ட². 826) வத்தூ²னி ஏகபயோகே³ன ச²ட்³டே³ந்தஸ்ஸ ஏகமேவ து³க்கடம், பாடேக்கம் ச²ட்³டே³ந்தஸ்ஸ வத்து²க³ணனாய து³க்கடானி. ஆணத்தியம்பி ஏஸேவ நயோ. த³ந்தகட்ட²ச²ட்³ட³னேபி து³க்கடமேவ. ஓலோகேத்வா வா அவலஞ்ஜே வா உச்சாராதீ³னி ச²ட்³டே³ந்தஸ்ஸ அனாபத்தி. யம்பி மனுஸ்ஸானம் உபபோ⁴க³பரிபோ⁴க³ம் ரோபிமம் கே²த்தம் ஹோது நாளிகேராதி³ஆராமோ வா, தத்தா²பி யத்த² கத்த²சி ரோபிமஹரிதட்டா²னே ஏதானி வத்தூ²னி ச²ட்³டே³தும் ந வட்டதி. ச²ட்³டே³ந்தஸ்ஸ புரிமனயேனேவ ஆபத்திபே⁴தோ³ வேதி³தப்³போ³. கே²த்தே வா ஆராமே வா நிஸீதி³த்வா பு⁴ஞ்ஜமானோ உச்சு²ஆதீ³னி வா கா²த³மானோ க³ச்ச²ந்தோ உச்சி²ட்டோ²த³கசலகாதீ³னி ஹரிதட்டா²னே ச²ட்³டே³தி, அந்தமஸோ உத³கம் பிவித்வா மத்த²கச்சி²ன்னனாளிகேரம்பி ச²ட்³டே³தி, து³க்கடம். கஸிதட்டா²னே நிக்கி²த்தபீ³ஜே அங்குரே உட்டி²தேபி அவுட்டி²தேபி து³க்கடமேவ. அனிக்கி²த்தபீ³ஜேஸு பன கே²த்தகோணாதீ³ஸு வா அஸஞ்ஜாதரோபிமேஸு கே²த்தமரியாதா³தீ³ஸு வா ச²ட்³டே³தும் வட்டதி, மனுஸ்ஸானம் கசவரச²ட்³ட³னட்டா²னேபி வட்டதி. மனுஸ்ஸேஸு ஸஸ்ஸம் உத்³த⁴ரித்வா க³தேஸு ச²ட்³டி³தகே²த்தம் நாம ஹோதி, தத்த² வட்டதி. யத்த² பன ‘‘லாயிதம்பி புப்³ப³ண்ணாதி³ புன உட்ட²ஹிஸ்ஸதீ’’தி ரக்க²ந்தி, தத்த² ந வட்டதி.

21. ‘‘ந, பி⁴க்க²வே, நஹாயமானேன பி⁴க்கு²னா ருக்கே² காயோ உக்³க⁴ம்ஸேதப்³போ³, யோ உக்³க⁴ம்ஸேய்ய, ஆபத்தி து³க்கடஸ்ஸா’’தி (சூளவ. 243) வசனதோ நஹாயந்தேன (சூளவ. அட்ட². 243 ஆத³யோ) ருக்கே² வா நஹானதித்தே² நிக²னித்வா ட²பிதத்த²ம்பே⁴ வா இட்ட²கஸிலாதா³ருகுட்டானம் அஞ்ஞதரஸ்மிம் குட்டே வா காயோ ந க⁴ம்ஸேதப்³போ³.

‘‘ந, பி⁴க்க²வே, அட்டானே நஹாயிதப்³ப³ம், யோ நஹாயேய்ய, ஆபத்தி து³க்கடஸ்ஸா’’தி (சூளவ. 243) வசனதோ அட்டானேபி நஹாயிதும் ந வட்டதி. அட்டானம் நாம ருக்க²ம் ப²லகம் விய தச்சே²த்வா அட்ட²பதா³காரேன ராஜியோ சி²ந்தி³த்வா நஹானதித்தே² நிக²னந்தி, தத்த² சுண்ணானி ஆகிரித்வா மனுஸ்ஸா காயம் க⁴ம்ஸந்தி.

‘‘ந, பி⁴க்க²வே, க³ந்த⁴ப்³ப³ஹத்த²கேன நஹாயிதப்³ப³ம், யோ நஹாயேய்ய, ஆபத்தி து³க்கடஸ்ஸா’’தி (சூள்வ. 243) வசனதோ நஹானதித்தே² ட²பிதேன தா³ருமயஹத்தே²ன சுண்ணானி க³ஹேத்வா மனுஸ்ஸா ஸரீரம் க⁴ம்ஸந்தி, தேன நஹாயிதும் ந வட்டதி.

‘‘ந, பி⁴க்க²வே, குருவிந்த³கஸுத்தியா நஹாயிதப்³ப³ம், யோ நஹாயேய்ய, ஆபத்தி து³க்கடஸ்ஸா’’தி (சூளவ. 243) வசனதோ குருவிந்த³கஸுத்தியாபி நஹாயிதும் ந வட்டதி. குருவிந்த³கஸுத்தி நாம குருவிந்த³கபாஸாணசுண்ணானி லாகா²ய ப³ந்தி⁴த்வா கதகு³ளிககலாபகோ வுச்சதி, யம் உபோ⁴ஸு அந்தேஸு க³ஹேத்வா ஸரீரம் க⁴ம்ஸந்தி.

‘‘ந, பி⁴க்க²வே, விக்³க³ய்ஹ பரிகம்மம் காராபேதப்³ப³ம், யோ காராபேய்ய, ஆபத்தி து³க்கடஸ்ஸா’’தி (சூளவ. 243) வசனதோ அஞ்ஞமஞ்ஞம் ஸரீரேன க⁴ம்ஸிதும் ந வட்டதி.

‘‘ந, பி⁴க்க²வே, மல்லகேன நஹாயிதப்³ப³ம், யோ நஹாயேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, கி³லானஸ்ஸ அகதமல்லக’’ந்தி (சூளவ. 243-244) வசனதோ மகரத³ண்ட³கே சி²ந்தி³த்வா மல்லகமூலஸண்டா²னேன கதம் ‘‘மல்லக’’ந்தி வுச்சதி, இத³ம் கி³லானஸ்ஸபி ந வட்டதி. அகதமல்லகம் நாம த³ந்தே அச்சி²ந்தி³த்வா கதம், இத³ம் அகி³லானஸ்ஸ ந வட்டதி, இட்ட²கக²ண்ட³ம் பன கபாலக²ண்ட³ம் வா வட்டதி.

‘‘அனுஜானாமி, பி⁴க்க²வே, உக்காஸிகம் புது²பாணிக’’ந்தி (சூளவ. 244) வசனதோ உக்காஸிகம் புது²பாணிகஞ்ச வட்டதி. உக்காஸிகம் நாம வத்த²வட்டி, தஸ்மா நஹாயந்தஸ்ஸ யஸ்ஸ கஸ்ஸசி நஹானஸாடகவட்டியா பிட்டி²ம் க⁴ம்ஸிதும் வட்டதி. புது²பாணிகந்தி ஹத்த²பரிகம்மம் வுச்சதி, தஸ்மா ஸப்³பே³ஸம் ஹத்தே²ன பிட்டி²பரிகம்மம் காதும் வட்டதி.

இத³ம் பனேத்த² நஹானவத்தம் – உத³கதித்த²ம் க³ந்த்வா யத்த² வா தத்த² வா சீவரம் நிக்கி²பித்வா வேகே³ன டி²தகேனேவ ந ஓதரிதப்³ப³ம், ஸப்³ப³தி³ஸா பன ஓலோகேத்வா விவித்தபா⁴வம் ஞத்வா கா²ணுகு³ம்ப³லதாதீ³னி வவத்த²பேத்வா திக்க²த்தும் உக்காஸித்வா அவகுஜ்ஜ டி²தேன உத்தராஸங்க³சீவரம் அபனேத்வா பஸாரேதப்³ப³ம், காயப³ந்த⁴னம் மோசேத்வா சீவரபிட்டே²யேவ ட²பேதப்³ப³ம். ஸசே உத³கஸாடிகா நத்தி², உத³கந்தே உக்குடிகம் நிஸீதி³த்வா நிவாஸனம் மோசேத்வா ஸசே நின்னட்டா²னம் அத்தி², ஆதபே பஸாரேதப்³ப³ம். நோ சே அத்தி², ஸம்ஹரித்வா ட²பேதப்³ப³ம். ஓதரந்தேன ஸணிகம் நாபி⁴ப்பமாணமத்தம் ஓதரித்வா வீசிம் அனுட்ட²பேந்தேன ஸத்³த³ம் அகரோந்தேன நிவத்தித்வா ஆக³ததி³ஸாபி⁴முகே²ன நிமுஜ்ஜிதப்³ப³ம், ஏவம் சீவரம் ரக்கி²தம் ஹோதி. உம்முஜ்ஜந்தேனபி ஸத்³த³ம் அகரோந்தேன ஸணிகம் உம்முஜ்ஜித்வா நஹானபரியோஸானே உத³கந்தே உக்குடிகேன நிஸீதி³த்வா நிவாஸனம் பரிக்கி²பித்வா உட்டா²ய ஸுபரிமண்ட³லம் நிவாஸேத்வா காயப³ந்த⁴னம் ப³ந்தி⁴த்வா சீவரம் பாருபித்வாவ டா²தப்³ப³ம்.

22. ‘‘ந, பி⁴க்க²வே, வல்லிகா தா⁴ரேதப்³பா³… ந பாமங்கோ³ தா⁴ரேதப்³போ³… ந கண்ட²ஸுத்தகம் தா⁴ரேதப்³ப³ம்… ந கடிஸுத்தகம் தா⁴ரேதப்³ப³ம்… ந ஓவட்டிகம் தா⁴ரேதப்³ப³ம்… ந காயூரம் தா⁴ரேதப்³ப³ம்… ந ஹத்தா²ப⁴ரணம் தா⁴ரேதப்³ப³ம்… ந அங்கு³லிமுத்³தி³கா தா⁴ரேதப்³பா³, யோ தா⁴ரேய்ய, ஆபத்தி து³க்கடஸ்ஸா’’தி (சூளவ. 245) வசனதோ கண்ணபிளந்த⁴னாதி³ யம் கிஞ்சி ஆப⁴ரணம் ந வட்டதி. தத்த² (சூளவ. அட்ட². 245) வல்லிகாதி கண்ணதோ நிக்க²ந்தமுத்தோலம்ப³காதீ³னம் ஏதம் அதி⁴வசனம். ந கேவலஞ்ச வல்லிகா ஏவ, யம் கிஞ்சி கண்ணபிளந்த⁴னம் அந்தமஸோ தாலபண்ணம்பி ந வட்டதி. பாமங்க³ந்தி யம் கிஞ்சி பலம்ப³கஸுத்தம். கண்ட²ஸுத்தகந்தி யம் கிஞ்சி கீ³வூபக³ம் ஆப⁴ரணம். கடிஸுத்தகந்தி யம் கிஞ்சி கடிபிளந்த⁴னம், அந்தமஸோ ஸுத்ததந்துமத்தம்பி. ஓவட்டிகந்தி வலயம். காயூராதீ³னி பாகடானேவ.

23. ‘‘ந, பி⁴க்க²வே, தீ³கா⁴ கேஸா தா⁴ரேதப்³பா³, யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, த்³வேமாஸிகம் வா து³வங்கு³லம் வா’’தி (சூளவ. 246) வசனதோ ஸசே கேஸா அந்தோத்³வேமாஸே த்³வங்கு³லம் பாபுணந்தி, அந்தோத்³வேமாஸேயேவ சி²ந்தி³தப்³பா³, த்³வங்கு³லேஹி அதிக்காமேதும் ந வட்டதி. ஸசேபி ந தீ³கா⁴, த்³வேமாஸதோ ஏகதி³வஸம்பி அதிக்காமேதும் ந லப⁴தியேவ. உப⁴யதா²பி உக்கட்ட²பரிச்சே²தோ³வ வுத்தோ, ததோ ஓரம் பன ந வட்டனபா⁴வோ நாம நத்தி².

‘‘ந, பி⁴க்க²வே, கத்தரிகாய கேஸா சே²தா³பேதப்³பா³, யோ சே²தா³பேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஆபா³த⁴பச்சயா கத்தரிகாய கேஸே சே²தா³பேது’’ந்தி (சூளவ. 275) வசனதோ ஆபா³த⁴ம் வினா கத்தரிகாய கேஸே சே²தா³பேதும் ந வட்டதி.

‘‘ந, பி⁴க்க²வே, கோச்சே²ன கேஸா ஓஸண்டே²தப்³பா³… ந ப²ணகேன கேஸா ஓஸண்டே²தப்³பா³… ந ஹத்த²ப²ணகேன கேஸா ஓஸண்டே²தப்³பா³… ந ஸித்த²தேலகேன கேஸா ஓஸண்டே²தப்³பா³… ந உத³கதேலகேன கேஸா ஓஸண்டே²தப்³பா³, யோ ஓஸண்டே²ய்ய, ஆபத்தி து³க்கடஸ்ஸா’’தி (சூளவ. 246) வசனதோ மண்ட³னத்தா²ய கோச்சா²தீ³ஹி கேஸா ந ஓஸண்டே²தப்³பா³, உத்³த⁴லோமேன பன அனுலோமனிபாதனத்த²ம் ஹத்த²ம் தேமேத்வா ஸீஸம் புஞ்சி²தப்³ப³ம், உண்ஹாபி⁴தத்தரஜஸிரானம்பி அல்லஹத்தே²ன புஞ்சி²தும் வட்டதி.

24. ‘‘ந, பி⁴க்க²வே, ஆதா³ஸே வா உத³கபத்தே வா முக²னிமித்தம் ஓலோகேதப்³ப³ம், யோ ஓலோகேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஆபா³த⁴பச்சயா ஆதா³ஸே வா உத³கபத்தே வா முக²னிமித்தம் ஓலோகேது’’ந்தி (சூளவ. 247) வசனதோ ஆபா³த⁴ம் வினா ஆதா³ஸே வா உத³கபத்தே வா முக²ம் ந ஓலோகேதப்³ப³ம். ஏத்த² ச கம்ஸபத்தாதீ³னிபி யேஸு முக²னிமித்தம் பஞ்ஞாயதி, ஸப்³பா³னி ஆதா³ஸஸங்க²மேவ க³ச்ச²ந்தி, கஞ்ஜியாதீ³னிபி ச உத³கபத்தஸங்க²மேவ. தஸ்மா யத்த² கத்த²சி ஓலோகேந்தஸ்ஸ து³க்கடம். ஆபா³த⁴பச்சயா பன ‘‘ஸஞ்ச²வி நு கோ² மே வணோ, உதா³ஹு ந தாவா’’தி ஜானனத்த²ம் வட்டதி, ‘‘ஜிண்ணோ நு கோ²ம்ஹி, நோ’’தி ஏவம் ஆயுஸங்கா²ரம் ஓலோகனத்த²ம்பி வட்டதீதி வுத்தம்.

‘‘ந, பி⁴க்க²வே, முக²ம் ஆலிம்பிதப்³ப³ம்… ந முக²ம் உம்மத்³தி³தப்³ப³ம்… ந முக²ம் சுண்ணேதப்³ப³ம்… ந மனோஸிலிகாய முக²ம் லஞ்சே²தப்³ப³ம்… ந அங்க³ராகோ³ காதப்³போ³… ந முக²ராகோ³ காதப்³போ³… ந அங்க³ராக³முக²ராகோ³ காதப்³போ³, யோ கரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஆபா³த⁴பச்சயா முக²ம் ஆலிம்பிது’’ந்தி (சூளவ. 247) வசனதோ ஆபா³த⁴ம் வினா முக²விலிம்பனாதி³ ந காதப்³ப³ம்.

25. ‘‘ந, பி⁴க்க²வே, நச்சம் வா கீ³தம் வா வாதி³தம் வா த³ஸ்ஸனாய க³ந்தப்³ப³ம், யோ க³ச்சே²ய்ய, ஆபத்தி து³க்கடஸ்ஸா’’தி (சூளவ. 248) வசனதோ நச்சாதி³ம் த³ஸ்ஸனாய ந க³ந்தப்³ப³ம். ஏத்த² (பாசி. அட்ட². 835) ச நச்சந்தி நடாத³யோ வா நச்சந்து ஸோண்டா³ வா அந்தமஸோ மோரஸூவமக்கடாத³யோபி, ஸப்³ப³மேதம் நச்சமேவ, தஸ்மா அந்தமஸோ மோரனச்சம்பி த³ஸ்ஸனாய க³ச்ச²ந்தஸ்ஸ து³க்கடம். ஸயம்பி நச்சந்தஸ்ஸ வா நச்சாபேந்தஸ்ஸ வா து³க்கடமேவ. கீ³தந்தி நடாதீ³னம் வா கீ³தம் ஹோது அரியானம் பரினிப்³பா³னகாலே ரதனத்தயகு³ணூபஸஞ்ஹிதம் ஸாது⁴கீளிதகீ³தம் வா அஸஞ்ஞதபி⁴க்கூ²னம் த⁴ம்மபா⁴ணககீ³தம் வா அந்தமஸோ த³ந்தகீ³தம்பி, ‘‘யம் கா³யிஸ்ஸாமா’’தி புப்³ப³பா⁴கே³ ஓகூஜந்தா கரோந்தி, ஸப்³ப³மேதம் கீ³தமேவ, ஸயம் கா³யந்தஸ்ஸபி கா³யாபேந்தஸ்ஸபி து³க்கடமேவ.

‘‘பஞ்சிமே, பி⁴க்க²வே, ஆதீ³னவா ஆயதகேன கீ³தஸ்ஸரேன த⁴ம்மம் கா³யந்தஸ்ஸ. அத்தனாபி தஸ்மிம் ஸரே ஸாரஜ்ஜதி, பரேபி தஸ்மிம் ஸரே ஸாரஜ்ஜந்தி, க³ஹபதிகாபி உஜ்ஜா²யந்தி, ஸரகுத்திம்பி நிகாமயமானஸ்ஸ ஸமாதி⁴ஸ்ஸ ப⁴ங்கோ³ ஹோதி, பச்சி²மா ஜனதா தி³ட்டா²னுக³திம் ஆபஜ்ஜதி. இமே கோ², பி⁴க்க²வே, பஞ்ச ஆதீ³னவா ஆயதகேன கீ³தஸ்ஸரேன த⁴ம்மம் கா³யந்தஸ்ஸ. ந, பி⁴க்க²வே, ஆயதகேன கீ³தஸ்ஸரேன த⁴ம்மோ கா³யிதப்³போ³, யோ கா³யேய்ய, ஆபத்தி து³க்கடஸ்ஸா’’தி (சூளவ. 249) –

வசனதோ ஆயதகேன கீ³தஸ்ஸரேன த⁴ம்மோபி ந கா³யிதப்³போ³.

ஆயதகோ (சூளவ. அட்ட². 249) நாம கீ³தஸ்ஸரோ தம் தம் வத்தம் பி⁴ந்தி³த்வா அக்க²ரானி வினாஸேத்வா பவத்தோ. த⁴ம்மே பன ஸுத்தந்தவத்தம் நாம அத்தி², ஜாதகவத்தம் நாம அத்தி², கா³தா²வத்தம் நாம அத்தி², தம் வினாஸேத்வா அதிதீ³க⁴ம் காதும் ந வட்டதி, சதுரஸ்ஸேன வத்தேன பரிமண்ட³லானி பத³ப்³யஞ்ஜனானி த³ஸ்ஸேதப்³பா³னி. ‘‘அனுஜானாமி, பி⁴க்க²வே, ஸரப⁴ஞ்ஞ’’ந்தி (சூளவ. 249) வசனதோ பன ஸரேன த⁴ம்மம் ப⁴ணிதும் வட்டதி. ஸரப⁴ஞ்ஞே கிர தரங்க³வத்ததோ⁴தகவத்தக³லிதவத்தாதீ³னி த்³வத்திம்ஸ வத்தானி அத்தி², தேஸு யம் இச்ச²தி, தம் காதும் லப⁴தி. ஸப்³பே³ஸம் பத³ப்³யஞ்ஜனம் அவினாஸேத்வா விகாரம் அகத்வா ஸமணஸாருப்பேன சதுரஸ்ஸேன நயேன பவத்தனம்யேவ லக்க²ணம்.

வாதி³தம் நாம தந்திப³த்³தா⁴தி³வாத³னீயப⁴ண்ட³ம் வாதி³தம் வா ஹோது குடபே⁴ரிவாதி³தம் வா அந்தமஸோ உத³கபே⁴ரிவாதி³தம்பி, ஸப்³ப³மேதம் ந வட்டதி. யம் பன நிட்டு²ப⁴ந்தோ வா ஸாஸங்கே வா டி²தோ அச்ச²ரிகம் வா போ²டேதி, பாணிம் வா பஹரதி, தத்த² அனாபத்தி, ஸப்³ப³ம் அந்தராராமே டி²தஸ்ஸ பஸ்ஸதோ அனாபத்தி, பஸ்ஸிஸ்ஸாமீதி விஹாரதோ விஹாரம் க³ச்ச²ந்தஸ்ஸ ஆபத்தியேவ. ஆஸனஸாலாயம் நிஸின்னோ பஸ்ஸதி, அனாபத்தி. பஸ்ஸிஸ்ஸாமீதி உட்ட²ஹித்வா க³ச்ச²தோ ஆபத்தி, வீதி²யம் ட²த்வா கீ³வம் பரிவத்தேத்வா பஸ்ஸதோபி ஆபத்தியேவ. ஸலாகப⁴த்தாதீ³னம் வா அத்தா²ய அஞ்ஞேன வா கேனசி கரணீயேன க³ந்த்வா க³தட்டா²னே பஸ்ஸதி வா ஸுணாதி வா, அனாபத்தி. ஆபதா³ஸு தாதி³ஸேன உபத்³த³வேன உபத்³து³தோ ஸமஜ்ஜட்டா²னம் பவிஸதி, ஏவம் பவிஸித்வா பஸ்ஸந்தஸ்ஸ ஸுணந்தஸ்ஸ வா அனாபத்தி. ‘‘சேதியஸ்ஸ உபஹாரம் தே³த² உபாஸகா’’தி வத்தும்பி, ‘‘தும்ஹாகம் சேதியஸ்ஸ உபஹாரம் கரோமா’’தி வுத்தே ஸம்படிச்சி²தும்பி ந லப⁴தி. ‘‘தும்ஹாகம் சேதியஸ்ஸ உபட்டா²னம் கரோமா’’தி வுத்தே பன ‘‘உபட்டா²னகரணம் நாம ஸுந்த³ர’’ந்தி வத்தும் வட்டதி.

26. ‘‘ந, பி⁴க்க²வே, அத்தனோ அங்க³ஜாதம் சே²தப்³ப³ம், யோ சி²ந்தே³ய்ய, ஆபத்தி து²ல்லச்சயஸ்ஸா’’தி (சூளவ. 251) வசனதோ அங்க³ஜாதம் (சூளவ. 251) சி²ந்த³ந்தஸ்ஸ து²ல்லச்சயம், அஞ்ஞம் பன கண்ணனாஸாஅங்கு³லிஆதி³ம் யம் கிஞ்சி சி²ந்த³ந்தஸ்ஸ தாதி³ஸம் வா து³க்க²ம் உப்பாதே³ந்தஸ்ஸ து³க்கடம். அஹிகீடத³ட்டா²தீ³ஸு பன அஞ்ஞாபா³த⁴பச்சயா வா லோஹிதம் வா மோசேந்தஸ்ஸ சி²ந்த³ந்தஸ்ஸ வா அனாபத்தி.

27. ‘‘ந, பி⁴க்க²வே, கி³ஹீனம் உத்தரிமனுஸ்ஸத⁴ம்மம் இத்³தி⁴பாடிஹாரியம் த³ஸ்ஸேதப்³ப³ம், யோ த³ஸ்ஸேய்ய, ஆபத்தி து³க்கடஸ்ஸா’’தி (சூளவ. 252) வசனதோ கி³ஹீனம் விகுப்³ப³னித்³தி⁴ம் த³ஸ்ஸேதும் ந வட்டதி, அதி⁴ட்டா²னித்³தி⁴ பன அப்படிக்கி²த்தா.

28. ‘‘ந, பி⁴க்க²வே, ஸோவண்ணமயோ பத்தோ தா⁴ரேதப்³போ³…பே… ந ரூபியமயோ…பே… ந மணிமயோ…பே… ந வேளுரியமயோ…பே… ந ப²லிகமயோ…பே… ந கம்ஸமயோ…பே… ந காசமயோ…பே… ந திபுமயோ …பே… ந ஸீஸமயோ…பே… ந தம்ப³லோஹமயோ பத்தோ தா⁴ரேதப்³போ³, யோ தா⁴ரேய்ய, ஆபத்தி து³க்கடஸ்ஸா’’தி (சூளவ. 252) வசனதோ ஸுவண்ணமயாதி³பத்தோ ந வட்டதி. ஸசேபி கி³ஹீ ப⁴த்தக்³கே³ ஸுவண்ணதட்டிகாதீ³ஸு ப்³யஞ்ஜனம் கத்வா உபனாமேந்தி, ஆமஸிதும்பி ந வட்டதி. ப²லிகமயகாசமயகம்ஸமயானி பன தட்டிகாதீ³னி பா⁴ஜனானி புக்³க³லிகபரிபோ⁴கே³னேவ ந வட்டந்தி, ஸங்கி⁴கபரிபோ⁴கே³ன வா கி³ஹிவிகடானி வா வட்டந்தி. தம்ப³லோஹமயோபி பத்தோயேவ ந வட்டதி, தா²லகம் பன வட்டதி. ‘‘அனுஜானாமி, பி⁴க்க²வே, த்³வே பத்தே அயோபத்தம் மத்திகாபத்த’’ந்தி (சூளவ. 252) த்³வேயேவ ச பத்தா அனுஞ்ஞாதா.

‘‘ந, பி⁴க்க²வே, தும்ப³கடாஹே பிண்டா³ய சரிதப்³ப³ம், யோ சரேய்ய, ஆபத்தி து³க்கடஸ்ஸா’’தி (சூளவ. 255) வசனதோ லாபு³கடாஹம் பரிஹரிதும் ந வட்டதி, தம் லபி⁴த்வா பன தாவகாலிகம் பரிபு⁴ஞ்ஜிதும் வட்டதி. க⁴டிகடாஹேபி ஏஸேவ நயோ.

‘‘ந, பி⁴க்க²வே, ச²வஸீஸபத்தோ தா⁴ரேதப்³போ³, யோ தா⁴ரேய்ய, ஆபத்தி து³க்கடஸ்ஸா’’தி (சூளவ. 255) வசனதோ ச²வஸீஸமயோபி பத்தோ ந வட்டதி.

‘‘அனுஜானாமி, பி⁴க்க²வே, பத்தாதா⁴ரக’’ந்தி (சூளவ. 254) வசனதோ பூ⁴மிதா³ருத³ண்ட³வஅலவேத்தாதீ³ஹி கதே பூ⁴மிஆதா⁴ரகே தா³ருத³ண்ட³ஆதா⁴ரகே ச பத்தம் ட²பேதும் வட்டதி. ஏத்த² ச ‘‘பூ⁴மிஆதா⁴ரகே தயோ த³ண்டா³தா⁴ரகே த்³வே பத்தே உபரூபரி ட²பேதும் வட்டதீ’’தி குருந்தி³யம் வுத்தம். மஹாஅட்ட²கதா²யம் பன வுத்தம் ‘‘பூ⁴மிஆதா⁴ரகே திண்ணம் பத்தானம் அனோகாஸோ, த்³வே ட²பேதும் வட்டதி. தா³ருஆதா⁴ரகத³ண்டா³தா⁴ரகேஸுபி ஸுஸஜ்ஜிதேஸு ஏஸேவ நயோ. ப⁴மகோடிஸதி³ஸோ பன தா³ருஆதா⁴ரகோ தீஹி த³ண்ட³கேஹி ப³த்³தோ⁴, த³ண்டா³தா⁴ரகோ ச ஏகஸ்ஸபி பத்தஸ்ஸ அனோகாஸோ, தத்த² ட²பேத்வாபி ஹத்தே²ன க³ஹேத்வாவ நிஸீதி³தப்³ப³ம், பூ⁴மியம் பன நிக்குஜ்ஜித்வா ஏகமேவ ட²பேதப்³ப³’’ந்தி.

‘‘ந, பி⁴க்க²வே, மிட்³ட⁴ந்தே பத்தோ நிக்கி²பிதப்³போ³, யோ நிக்கி²பேய்ய, ஆபத்தி து³க்கடஸ்ஸா’’தி (சூளவ. 254) வசனதோ ஆலிந்த³கமிட்³டி⁴காதீ³னம் அந்தே ட²பேதும் ந வட்டதி. ஸசே பன பரிவத்தேத்வா தத்தே²வ பதிட்டா²தி, ஏவரூபாய வித்தி²ண்ணாய மிட்³டி⁴காய ட²பேதும் வட்டதி.

‘‘ந, பி⁴க்க²வே, பரிப⁴ண்ட³ந்தே பத்தோ நிக்கி²பிதப்³போ³, யோ நிக்கி²பேய்ய, ஆபத்தி து³க்கடஸ்ஸா’’தி (சூளவ. 254) வசனதோ பா³ஹிரபஸ்ஸே கதாய தனுகமிட்³டி⁴காய அந்தேபி ஏஸேவ நயோ. ‘‘அனுஜானாமி, பி⁴க்க²வே, சோளக’’ந்தி (சூளவ. 254) வசனதோ சோளகம் பத்த²ரித்வா தத்த² ட²பேதும் வட்டதி. தஸ்மிம் பன அஸதி கடஸாரகே வா தட்டிகாய வா மத்திகாய வா பரிப⁴ண்ட³கதாய பூ⁴மியா யத்த² ந து³ஸ்ஸதி, ததா²ரூபாய வாலிகாய வா ட²பேதும் வட்டதி. பம்ஸுரஜாதீ³ஸு பன க²ரபூ⁴மியம் வா ட²பேந்தஸ்ஸ து³க்கடம்.

‘‘ந, பி⁴க்க²வே, பத்தோ லக்³கே³தப்³போ³, யோ லக்³கே³ய்ய, ஆபத்தி து³க்கடஸ்ஸா’’தி (சூளவ. 254) வசனதோ நாக³த³ந்தாதீ³ஸு யத்த² கத்த²சி லக்³கே³தும் ந வட்டதி, சீவரவம்ஸேபி ப³ந்தி⁴த்வா ட²பேதும் ந வட்டதி.

‘‘ந, பி⁴க்க²வே, மஞ்சே பத்தோ நிக்கி²பிதப்³போ³, யோ நிக்கி²பேய்ய, ஆபத்தி து³க்கடஸ்ஸா’’தி (சூளவ. 254) வசனதோ ப⁴ண்ட³கட்ட²பனத்த²மேவ வா கதம் ஹோது நிஸீத³னஸயனத்த²ம் வா, யத்த² கத்த²சி மஞ்சே வா பீடே² வா ட²பேந்தஸ்ஸ து³க்கடம், அஞ்ஞேன பன ப⁴ண்ட³கேன ஸத்³தி⁴ம் ப³ந்தி⁴த்வா ட²பேதும், அடனியம் ப³ந்தி⁴த்வா ஓலம்பி³தும் வா வட்டதி, ப³ந்தி⁴த்வாபி உபரி ட²பேதும் ந வட்டதியேவ. ஸசே பன மஞ்சோ வா பீட²ம் வா உக்கி²பித்வா சீவரவம்ஸாதீ³ஸு அட்டகச்ச²ன்னேன ட²பிதம் ஹோதி, தத்த² ட²பேதும் வட்டதி. அம்ஸவட்டனகேன அம்ஸகூடே லக்³கே³த்வா அங்கே ட²பேதும் வட்டதி, ச²த்தே ப⁴த்தபூரோபி அம்ஸகூடே லக்³கி³தபத்தோபி ட²பேதும் ந வட்டதி. ப⁴ண்ட³கேன பன ஸத்³தி⁴ம் ப³ந்தி⁴த்வா அட்டகம் கத்வா வா ட²பிதே யோ கோசி ட²பேதும் வட்டதி.

‘‘ந, பி⁴க்க²வே, பத்தஹத்தே²ன கவாடம் பணாமேதப்³ப³ம், யோ பணாமேய்ய, ஆபத்தி து³க்கடஸ்ஸா’’தி (சூளவ. 255) வசனதோ பத்தஹத்தே²ன கவாடம் ந பணாமேதப்³ப³ம். ஏத்த² ச ந கேவலம் யஸ்ஸ பத்தோ ஹத்தே², ஸோ ஏவ பத்தஹத்தோ². ந கேவலஞ்ச கவாடமேவ பணாமேதும் ந லப⁴தி, அபிச கோ² பன ஹத்தே² வா பிட்டி²பாதே³ வா யத்த² யத்த²சி ஸரீராவயவே பத்தஸ்மிம் ஸதி ஹத்தே²ன வா பாதே³ன வா ஸீஸேன வா யேன கேனசி ஸரீராவயவேன கவாடம் வா பணாமேதும் க⁴டிகம் வா உக்கி²பிதும் ஸூசிம் வா குஞ்சிகாய அவாபுரிதும் ந லப⁴தி, அம்ஸகூடே பன பத்தம் லக்³கே³த்வா யதா²ஸுக²ம் அவாபுரிதும் லப⁴தி.

‘‘ந, பி⁴க்க²வே, சலகானி வா அட்டி²கானி வா உச்சி²ட்டோ²த³கம் வா பத்தேன நீஹரிதப்³ப³ம், யோ நீஹரேய்ய, ஆபத்தி து³க்கடஸ்ஸா’’தி (சூளவ. 255) வசனதோ சலகாதீ³னி பத்தேன நீஹரிதும் ந வட்டதி. ஏத்த² ச சலகானீதி சப்³பே³த்வா அபவித்³தா⁴மிஸானி. அட்டி²கானீதி மச்ச²மம்ஸஅஅகானி. உச்சி²ட்டோ²த³கந்தி முக²விக்கா²லிதோத³கம். ஏதேஸு யம் கிஞ்சி பத்தேன நீஹரந்தஸ்ஸ து³க்கடம். பத்தம் படிக்³க³ஹம் கத்வா ஹத்த²ம் தோ⁴விதும்பி ந லப⁴தி. ஹத்த²தோ⁴தபாத³தோ⁴தஉத³கம்பி பத்தே ஆகிரித்வா நீஹரிதும் ந வட்டதி, அனுச்சி²ட்ட²ம் ஸுத்³த⁴பத்தம் உச்சி²ட்ட²ஹத்தே²ன க³ண்ஹிதும் ந வட்டதி, வாமஹத்தே²ன பனேத்த² உத³கம் ஆஸிஞ்சித்வா ஏகம் உத³கக³ண்டு³ஸம் க³ஹேத்வா உச்சி²ட்ட²ஹத்தே²ன க³ண்ஹிதும் வட்டதி. ஏத்தாவதாபி ஹி ஸோ உச்சி²ட்ட²பத்தோ ஹோதி, ஹத்த²ம் பன ப³ஹிஉத³கேன விக்கா²லேத்வா க³ஹேதும் வட்டதி. மச்ச²மம்ஸப²லாப²லாதீ³னி ச கா²த³ந்தோ யம் தத்த² அட்டி²ம் வா சலகம் வா ச²ட்³டே³துகாமோ ஹோதி, தம் பத்தே ட²பேதும் ந லப⁴தி. யம் பன படிகா²தி³துகாமோ ஹோதி, தம் பத்தே ட²பேதும் லப⁴தி. அட்டி²ககண்டகாதீ³னி தத்தே²வ கத்வா ஹத்தே²ன லுஞ்சித்வா கா²தி³தும் வட்டதி. முக²தோ நீஹடம் பன யம் கிஞ்சி புன கா²தி³துகாமோ பத்தே ட²பேதும் ந லப⁴தி, ஸிங்கி³வேரனாளிகேரக²ண்டா³தீ³னி ட³ம்ஸித்வா புன ட²பேதும் லப⁴தி.

29. ‘‘ந ச, பி⁴க்க²வே, ஸப்³ப³பம்ஸுகூலிகேன ப⁴விதப்³ப³ம், யோ ப⁴வேய்ய, ஆபத்தி து³க்கடஸ்ஸா’’தி (சூளவ. 255) வசனதோ ஸப்³ப³பம்ஸுகூலிகேன ந ப⁴விதப்³ப³ம். ஏத்த² பன சீவரஞ்ச மஞ்சபீட²ஞ்ச பம்ஸுகூலம் வட்டதி, அஜ்ஜோ²ஹரணீயம் பன தி³ன்னமேவ க³ஹேதப்³ப³ம்.

30. ‘‘ந, பி⁴க்க²வே, அத்³தா⁴னமக்³க³ப்படிபன்னேன பி⁴க்கு²னா பரிஸ்ஸாவனம் யாசியமானேன ந தா³தப்³ப³ம், யோ ந த³தே³ய்ய, ஆபத்தி து³க்கடஸ்ஸா’’தி (சூளவ. 259) வசனதோ அபரிஸ்ஸாவனகஸ்ஸ (சூளவ. அட்ட². 259) யாசமானஸ்ஸ பரிஸ்ஸாவனம் அதா³தும் ந வட்டதி. யோ பன அத்தனோ ஹத்தே² பரிஸ்ஸாவனே விஜ்ஜமானேபி யாசதி, தஸ்ஸ ந அகாமா தா³தப்³ப³ம்.

‘‘ந ச, பி⁴க்க²வே, அபரிஸ்ஸாவனகேன பி⁴க்கு²னா அத்³தா⁴னமக்³கோ³ படிபஜ்ஜிதப்³போ³, யோ படிபஜ்ஜேய்ய, ஆபத்தி து³க்கடஸ்ஸா’’தி (சூளவ. 259) வசனதோ அபரிஸ்ஸாவனகேன மக்³கோ³ ந க³ந்தப்³போ³. ஸசேபி ந ஹோதி பரிஸ்ஸாவனம் வா த⁴ம்மகரணம் வா, ஸங்கா⁴டிகண்ணோ அதி⁴ட்டா²தப்³போ³ ‘‘இமினா பரிஸ்ஸாவேத்வா பிவிஸ்ஸாமீ’’தி.

‘‘அனுஜானாமி, பி⁴க்க²வே, த³ண்ட³பரிஸ்ஸாவன’’ந்தி (சூளவ. 259) வசனதோ த³ண்ட³பரிஸ்ஸாவனம்பி வட்டதி. த³ண்ட³பரிஸ்ஸாவனம் நாம யத்த² ரஜகானம் கா²ரபரிஸ்ஸாவனம் விய சதூஸு பாதே³ஸு ப³த்³த⁴னிஸ்ஸேணிகாய ஸாடகம் ப³ந்தி⁴த்வா மஜ்ஜே² த³ண்ட³கே உத³கம் ஆஸிஞ்சந்தி, தம் உபோ⁴பி கோட்டா²ஸே பூரேத்வா பரிஸ்ஸாவதி.

‘‘அனுஜானாமி, பி⁴க்க²வே, ஓத்த²ரக’’ந்தி (சூளவ. 259) வசனதோ ஓத்த²ரகம் பரிஸ்ஸாவனம்பி வட்டதி. ஓத்த²ரகம் நாம யம் உத³கே ஓத்த²ரித்வா க⁴டகேன உத³கம் க³ண்ஹந்தி, தஞ்ஹி சதூஸு த³ண்ட³கேஸு வத்த²ம் ப³ந்தி⁴த்வா உத³கே சத்தாரோ கா²ணுகே நிக²னித்வா தேஸு ப³ந்தி⁴த்வா ஸப்³ப³பரியந்தே உத³கதோ மோசேத்வா மஜ்ஜே² ஓத்த²ரித்வா க⁴டேன உத³கம் க³ண்ஹந்தி.

31. ‘‘ந, பி⁴க்க²வே, நக்³கே³ன நக்³கோ³ அபி⁴வாதே³தப்³போ³, யோ அபி⁴வாதே³ய்ய, ஆபத்தி து³க்கடஸ்ஸா’’திஆதி³வசனதோ (சூளவ. 261) ந நக்³கே³ன நக்³கோ³ அபி⁴வாதே³தப்³போ³, ந நக்³கே³ன அபி⁴வாதே³தப்³ப³ம், ந நக்³கே³ன நக்³கோ³ அபி⁴வாதா³பேதப்³போ³, ந நக்³கே³ன அபி⁴வாதா³பேதப்³ப³ம், ந நக்³கே³ன நக்³க³ஸ்ஸ பரிகம்மம் காதப்³ப³ம், ந நக்³கே³ன நக்³க³ஸ்ஸ தா³தப்³ப³ம், ந நக்³கே³ன படிக்³க³ஹேதப்³ப³ம், ந நக்³கே³ன கா²தி³தப்³ப³ம், ந நக்³கே³ன பு⁴ஞ்ஜிதப்³ப³ம், ந நக்³கே³ன ஸாயிதப்³ப³ம், ந நக்³கே³ன பாதப்³ப³ம்.

‘‘அனுஜானாமி, பி⁴க்க²வே, திஸ்ஸோ படிச்சா²தி³யோ ஜந்தாக⁴ரபடிச்சா²தி³ம் உத³கபடிச்சா²தி³ம் வத்த²படிச்சா²தி³’’ந்தி (சூளவ. 261) வசனதோ திஸ்ஸோ படிச்சா²தி³யோ வட்டந்தி. ஏத்த² ச ஜந்தாக⁴ரபடிச்சா²தி³ உத³கபடிச்சா²தி³ ச பரிகம்மம் கரோந்தஸ்ஸேவ வட்டதி, ஸேஸேஸு அபி⁴வாத³னாதீ³ஸு ந வட்டதி. வத்த²படிச்சா²தி³ பன ஸப்³ப³கம்மேஸு வட்டதி.

32. ‘‘ந, பி⁴க்க²வே, புப்பா²பி⁴கிண்ணேஸு ஸயனேஸு ஸயிதப்³ப³ம், யோ ஸஸேய்ய, ஆபத்தி து³க்கடஸ்ஸா’’தி (சூளவ. 264) வசனதோ புப்பே²ஹி ஸந்த²தேஸு ஸயனேஸு ந ஸயிதப்³ப³ம், க³ந்த⁴க³ந்த⁴ம் பன க³ஹேத்வா கவாடே பஞ்சங்கு³லிம் தா³தும் வட்டதி புப்ப²ம் க³ஹேத்வா விஹாரே ஏகமந்தம் நிக்கி²பிதும்.

33. ‘‘ந, பி⁴க்க²வே, ஆஸித்தகூபதா⁴னே பு⁴ஞ்ஜிதப்³ப³ம், யோ பு⁴ஞ்ஜேய்ய, ஆபத்தி து³க்கடஸ்ஸா’’தி (சூளவ. 264) வசனதோ ஆஸித்தகூபதா⁴னே ட²பேத்வா ந பு⁴ஞ்ஜிதப்³ப³ம். ஆஸித்தகூபதா⁴னந்தி தம்ப³லோஹேன வா ரஜதேன வா கதாய பேளாய ஏதம் அதி⁴வசனம், படிக்கி²த்தத்தா பன தா³ருமயாபி ந வட்டதி.

34. ‘‘அனுஜானாமி, பி⁴க்க²வே, மளோரிக’’ந்தி (சூளவ. 264) வசனதோ மளோரிகாய ட²பேத்வா பு⁴ஞ்ஜிதும் வட்டதி. மளோரிகாதி த³ண்டா³தா⁴ரகோ வுச்சதி. யட்டி²ஆதா⁴ரகபண்ணாதா⁴ரகபச்சி²கபீடா²தீ³னிபி ஏத்தே²வ பவிட்டா²னி. ஆதா⁴ரகஸங்கே²பக³மனதோ ஹி பட்டா²ய சி²த்³த³ம் வித்³த⁴ம்பி அவித்³த⁴ம்பி வட்டதியேவ.

35. ‘‘ந, பி⁴க்க²வே, ஏகபா⁴ஜனே பு⁴ஞ்ஜிதப்³ப³ம், யோ பு⁴ஞ்ஜேய்ய, ஆபத்தி து³க்கடஸ்ஸா’’தி(சூளவ. 264) ஆதி³வசனதோ ந ஏகபா⁴ஜனே பு⁴ஞ்ஜிதப்³ப³ம், ந ஏகதா²லகே பாதப்³ப³ம். ஸசே பன ஏகோ பி⁴க்கு² பா⁴ஜனதோ ப²லம் வா பூபம் வா க³ஹேத்வா க³ச்ச²தி, தஸ்மிம் அபக³தே இதரஸ்ஸ ஸேஸகம் பு⁴ஞ்ஜிதும் வட்டதி, இதரஸ்ஸபி தஸ்மிம் கீ²ணே புன க³ஹேதும் வட்டதி.

‘‘ந, பி⁴க்க²வே, ஏகமஞ்சே துவட்டிதப்³ப³ம், யோ துவட்டேய்ய, ஆபத்தி து³க்கடஸ்ஸா’’தி(சூளவ. 264) ஆதி³வசனதோ ந ஏகமஞ்சே நிபஜ்ஜிதப்³ப³ம், ந ஏகத்த²ரணே நிபஜ்ஜிதப்³ப³ம். வவத்தா²னம் பன த³ஸ்ஸேத்வா மஜ்ஜே² காஸாவம் வா கத்தரயட்டி²ம் வா அந்தமஸோ காயப³ந்த⁴னம்பி ட²பேத்வா நிபஜ்ஜந்தானம் அனாபத்தி. ஏகபாவுரணேஹி ஏகத்த²ரணபாவுரணேஹி ச ந நிபஜ்ஜிதப்³ப³ம். ஏகம் அத்த²ரணஞ்சேவ பாவுரணஞ்ச ஏதேஸந்தி ஏகத்த²ரணபாவுரணா. ஸம்ஹாரிமானம் பாவாரத்த²ரணகடஸாரகாதீ³னம் ஏகம் அந்தம் அத்த²ரித்வா ஏகம் பாருபித்வா நிபஜ்ஜந்தானமேதம் அதி⁴வசனம்.

36. ‘‘ந, பி⁴க்க²வே, சேலப்படிகா அக்கமிதப்³பா³, யோ அக்கமேய்ய, ஆபத்தி து³க்கடஸ்ஸா’’தி (சூளவ. 268) வசனதோ ந சேலஸந்தா²ரோ அக்கமிதப்³போ³, ‘‘அனுஜானாமி, பி⁴க்க²வே, கி³ஹீனம் மங்க³லத்தா²ய யாசியமானேன சேலப்படிகம் அக்கமிது’’ந்தி (சூளவ. 268) வசனதோ பன காசி இத்தீ² (சூளவ. அட்ட². 268) அபக³தக³ப்³பா⁴ வா ஹோதி க³ருக³ப்³பா⁴ வா, ஏவரூபேஸு டா²னேஸு மங்க³லத்தா²ய யாசியமானேன அக்கமிதும் வட்டதி. ‘‘அனுஜானாமி, பி⁴க்க²வே, தோ⁴தபாத³கம் அக்கமிது’’ந்தி (சூளவ. 268) வசனதோ பாத³தோ⁴வனட்டா²னே தோ⁴தேஹி பாதே³ஹி அக்கமனத்தா²ய அத்த²தபச்சத்த²ரணம் அக்கமிதும் வட்டதி.

37. ‘‘ந, பி⁴க்க²வே, கதகம் பரிபு⁴ஞ்ஜிதப்³ப³ம், யோ பரிபு⁴ஞ்ஜேய்ய, ஆபத்தி து³க்கடஸ்ஸா’’தி (சூளவ. 269) வசனதோ கதகம் ந வட்டதி. கதகம் நாம பது³மகண்ணிகாகாரம் பாத³க⁴ம்ஸனத்த²ம் கண்டகே உட்டா²பேத்வா கதம். தம் வட்டம் வா ஹோது சதுரஸ்ஸாதி³பே⁴த³ம் வா, பா³ஹுலிகானுயோக³த்தா படிக்கி²த்தமேவ, நேவ படிக்³க³ஹேதும், ந பரிபு⁴ஞ்ஜிதும் வட்டதி. ‘‘அனுஜானாமி, பி⁴க்க²வே, திஸ்ஸோ பாத³க⁴ம்ஸனியோ ஸக்க²ரம் கத²லம் ஸமுத்³த³பே²ணக’’ந்தி (சூளவ. 269) வசனதோ ஸக்க²ராதீ³ஹி பாத³க⁴ம்ஸனம் வட்டதி. ஸக்க²ராதி பாஸாணோ வுச்சதி, பாஸாணபே²ணகோபி வட்டதியேவ.

38. ‘‘ந, பி⁴க்க²வே, சாமரிபீ³ஜனீ தா⁴ரேதப்³பா³, யோ தா⁴ரேய்ய, ஆபத்தி து³க்கடஸ்ஸா’’தி (சூளவ. 269) வசனதோ சாமரிவாலேஹி கதபீ³ஜனீ ந வட்டதி. ‘‘அனுஜானாமி, பி⁴க்க²வே, மகஸபீ³ஜனிம். அனுஜானாமி பி⁴க்க²வே திஸ்ஸோ பீ³ஜனியோ வாகமயம் உஸீரமயம் மோரபிஞ்ச²மயம். அனுஜானாமி, பி⁴க்க²வே, விதூ⁴பனஞ்ச தாலவண்டஞ்சா’’தி (சூளவ. 269) வசனதோ மகஸபீ³ஜனீஆதி³ வட்டதி. தத்த² விதூ⁴பனந்தி பீ³ஜனீ வுச்சதி. தாலவண்டம் பன தாலபண்ணேஹி வா கதம் ஹோது வேளுத³ந்தவிலீவேஹி வா மோரபிஞ்சே²ஹி வா சம்மவிகதீஹி வா, ஸப்³ப³ம் வட்டதி. மகஸபீ³ஜனீ த³ந்தமயவிஸாணமயத³ண்ட³காபி வட்டதி. வாகமயபீ³ஜனியா கேதகபாரோஹகுந்தாலபண்ணாதி³மயாபி ஸங்க³ஹிதா.

39. ‘‘ந, பி⁴க்க²வே, ச²த்தம் தா⁴ரேதப்³ப³ம், யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, கி³லானஸ்ஸ ச²த்த’’ந்தி (சூளவ. 270) வசனதோ அகி³லானேன ச²த்தம் ந தா⁴ரேதப்³ப³ம். யஸ்ஸ பன காயடா³ஹோ வா பித்தகோபோ வா ஹோதி சக்கு² வா து³ப்³ப³லம், அஞ்ஞோ வா கோசி ஆபா³தோ⁴ வினா ச²த்தேன உப்பஜ்ஜதி, தஸ்ஸ கா³மே வா அரஞ்ஞே வா ச²த்தம் வட்டதி. வஸ்ஸே பன சீவரகு³த்தத்த²ம்பி வாளமிக³சோரப⁴யேஸு அத்தகு³த்தத்த²ம்பி வட்டதி, ஏகபண்ணச்ச²த்தம் பன ஸப்³ப³த்தே²வ வட்டதி. ‘‘அனுஜானாமி, பி⁴க்க²வே, அகி³லானேனபி ஆராமே ஆராமூபசாரே ச²த்தம் தா⁴ரேது’’ந்தி (சூளவ. 270) வசனதோ பன அகி³லானஸ்ஸபி ஆராமஆராமூபசாரேஸு ச²த்தம் தா⁴ரேதும் வட்டதி.

40. ‘‘ந, பி⁴க்க²வே, தீ³கா⁴ நகா² தா⁴ரேதப்³பா³, யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, மம்ஸப்பமாணேன நக²ம் சி²ந்தி³து’’ந்தி (சூளவ. 274) வசனதோ தீ³கா⁴ நகா² சி²ந்தி³தப்³பா³. ‘‘ந, பி⁴க்க²வே, வீஸதிமட்ட²ம் காராபேதப்³ப³ம், யோ காராபேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, மலமத்தம் அபகட்³டி⁴து’’ந்தி (சூளவ. 274) வசனதோ வீஸதிபி நகே² லிகி²தமட்டே² காராபேதும் ந வட்டதி, நக²தோ மலமத்தம் பன அபகட்³டி⁴தும் வட்டதி.

‘‘ந, பி⁴க்க²வே, ஸம்பா³தே⁴ லோமம் ஸம்ஹராபேதப்³ப³ம், யோ ஸம்ஹராபேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஆபா³த⁴பச்சயா ஸம்பா³தே⁴ லோமம் ஸம்ஹராபேது’’ந்தி (சூளவ. 275) வசனதோ க³ண்ட³வணாதி³ஆபா³த⁴ம் வினா ஸம்பா³தே⁴ லோமம் ஸம்ஹராபேதும் ந வட்டதி. ‘‘ந, பி⁴க்க²வே, தீ³க⁴ம் நாஸிகாலோமம் தா⁴ரேதப்³ப³ம், யோ தா⁴ரேய்ய, ஆபத்தி து³க்கடஸ்ஸா’’தி (சூளவ. 275) வசனதோ ஸண்டா³ஸேன நாஸிகாலோமம் ஸம்ஹராபேதும் வட்டதி. ஸக்க²ராதீ³ஹி நாஸிகாலோமம் கா³ஹாபனேபி ஆபத்தி நத்தி², அனுரக்க²ணத்த²ம் பன ‘‘அனுஜானாமி, பி⁴க்க²வே, ஸண்டா³ஸ’’ந்தி (சூளவ. 275) ஸண்டா³ஸோ அனுஞ்ஞாதோ. ‘‘ந, பி⁴க்க²வே, பலிதம் கா³ஹாபேதப்³ப³ம், யோ கா³ஹாபேய்ய, ஆபத்தி து³க்கடஸ்ஸா’’தி (சூளவ. 275) வசனதோ பலிதம் கா³ஹாபேதும் ந வட்டதி. யம் பன ப⁴முகாய வா நலாடே வா தா³டி²காய வா உக்³க³ந்த்வா பீ³ப⁴ச்ச²ம் ஹுத்வா டி²தம், தாதி³ஸம் லோமம் பலிதம் வா அபலிதம் வா கா³ஹாபேதும் வட்டதி.

41. ‘‘ந, பி⁴க்க²வே, அகாயப³ந்த⁴னேன கா³மோ பவிஸிதப்³போ³, யோ பவிஸேய்ய, ஆபத்தி து³க்கடஸ்ஸா’’தி (சூளவ. 278) வசனதோ அகாயப³ந்த⁴னேன கா³மோ ந பவிஸிதப்³போ³, அப³ந்தி⁴த்வா நிக்க²மந்தேன யத்த² ஸரதி, தத்த² ப³ந்தி⁴தப்³ப³ம். ‘‘ஆஸனஸாலாய ப³ந்தி⁴ஸ்ஸாமீ’’தி க³ந்தும் வட்டதி, ஸரித்வா யாவ ந ப³ந்த⁴தி, ந தாவ பிண்டா³ய சரிதப்³ப³ம்.

42. ‘‘ந, பி⁴க்க²வே, கி³ஹினிவத்த²ம் நிவாஸேதப்³ப³ம், யோ நிவாஸேய்ய, ஆபத்தி து³க்கடஸ்ஸா’’தி(சூளவ. 280) ஆதி³வசனதோ ஹத்தி²ஸோண்டா³தி³வஸேன கி³ஹினிவத்த²ம் ந நிவாஸேதப்³ப³ம், ஸேதபடபாருதாதி³வஸேன ந கி³ஹிபாருதம் பாருபிதப்³ப³ம், மல்லகம்மகராத³யோ விய கச்ச²ம் ப³ந்தி⁴த்வா ந நிவாஸேதப்³ப³ம். ஏவம் நிவாஸேதும் கி³லானஸ்ஸபி மக்³க³ப்படிபன்னஸ்ஸபி ந வட்டதி. யம்பி மக்³க³ம் க³ச்ச²ந்தா ஏகம் வா த்³வே வா கோணே உக்கி²பித்வா அந்தரவாஸகஸ்ஸ உபரி லக்³க³ந்தி, அந்தோ வா ஏகம் காஸாவம் ததா² நிவாஸேத்வா ப³ஹி அபரம் நிவாஸேந்தி, ஸப்³ப³ம் ந வட்டதி. கி³லானோ பன அந்தோகாஸாவஸ்ஸ ஓவட்டிகம் த³ஸ்ஸேத்வா அபரம் உபரி நிவாஸேதும் லப⁴தி, அகி³லானேன த்³வே நிவாஸேந்தேன ஸகு³ணம் கத்வா நிவாஸேதப்³பா³னி.

43. ‘‘ந, பி⁴க்க²வே, உப⁴தோகாஜம் ஹரிதப்³ப³ம், யோ ஹரேய்ய, ஆபத்தி து³க்கடஸ்ஸா’’தி (சூளவ. 281) வசனதோ உப⁴தோகாஜம் ஹரிதும் ந வட்டதி. ‘‘அனுஜானாமி, பி⁴க்க²வே, ஏகதோகாஜம் அந்தராகாஜம் ஸீஸபா⁴ரம் க²ந்த⁴பா⁴ரம் கடிபா⁴ரம் ஓலம்ப³க’’ந்தி வசனதோ ஏகதோகாஜாதி³ம் ஹரிதும் வட்டதி.

44. ‘‘ந, பி⁴க்க²வே, தீ³க⁴ம் த³ந்தகட்ட²ம் கா²தி³தப்³ப³ம், யோ கா²தே³ய்ய, ஆபத்தி து³க்கடஸ்ஸா’’தி (சூளவ. 282) வசனதோ ந தீ³க⁴ம் த³ந்தகட்ட²ம் கா²தி³தப்³ப³ம். ‘‘அனுஜானாமி, பி⁴க்க²வே, அட்ட²ங்கு³லபரமம் த³ந்தகட்ட²ம். அனுஜானாமி, பி⁴க்க²வே, சதுரங்கு³லபச்சி²மம் த³ந்தகட்ட²’’ந்தி (சூளவ. 282) வசனதோ மனுஸ்ஸானம் பமாணங்கு³லேன அட்ட²ங்கு³லபரமம் சதுரங்கு³லபச்சி²மஞ்ச த³ந்தகட்ட²ம் கா²தி³தப்³ப³ம்.

45. ‘‘ந, பி⁴க்க²வே, ருக்கோ² அபி⁴ருஹிதப்³போ³, யோ அபி⁴ருஹேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஸதி கரணீயே போரிஸம் ருக்க²ம் அபி⁴ருஹிதும் ஆபதா³ஸு யாவத³த்த²’’ந்தி (சூளவ. 284) வசனதோ ந ருக்க²ம் அபி⁴ருஹிதப்³ப³ம், ஸுக்க²கட்ட²க³ஹணாதி³கிச்சே பன ஸதி புரிஸப்பமாணம் அபி⁴ருஹிதும் வட்டதி. ஆபதா³ஸூதி வாளமிகா³த³யோ வா தி³ஸ்வா மக்³க³மூள்ஹோ வா தி³ஸா ஓலோகேதுகாமோ ஹுத்வா த³வடா³ஹம் வா உத³கோக⁴ம் வா ஆக³ச்ச²ந்தம் தி³ஸ்வா அதிஉச்சம்பி ருக்க²ம் ஆரோஹிதும் வட்டதி.

46. ‘‘ந, பி⁴க்க²வே, பு³த்³த⁴வசனம் ச²ந்த³ஸோ ஆரோபேதப்³ப³ம், யோ ஆரோபேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஸகாய நிருத்தியா பு³த்³த⁴வசனம் பரியாபுணிது’’ந்தி (சூளவ. 285) வசனதோ வேத³ம் விய பு³த்³த⁴வசனம் ஸக்கடபா⁴ஸாய வாசனாமக்³க³ம் ஆரோசேதும் ந வட்டதி, ஸகாய பன மாக³தி⁴காய நிருத்தியா பரியாபுணிதப்³ப³ம்.

47. ‘‘ந, பி⁴க்க²வே, லோகாயதம் பரியாபுணிதப்³ப³ம், யோ பரியாபுணேய்ய, ஆபத்தி து³க்கடஸ்ஸா’’தி(சஊளவ. 286) ஆதி³வசனதோ லோகாயதஸங்கா²தம் ‘‘ஸப்³ப³ம் உச்சி²ட்ட²ம், ஸப்³ப³ம் அனுச்சி²ட்ட²ம், ஸேதோ காகோ, காளோ ப³கோ இமினா ச இமினா ச காரணேனா’’தி ஏவமாதி³னிரத்த²ககாரணபடிஸம்யுத்தம் தித்தி²யஸத்த²ம் நேவ பரியாபுணிதப்³ப³ம், ந பரஸ்ஸ வாசேதப்³ப³ம். ந ச திரச்சா²னவிஜ்ஜா பரியாபுணிதப்³பா³, ந பரஸ்ஸ வாசேதப்³பா³.

48. ‘‘ந, பி⁴க்க²வே, கி²பிதே ‘ஜீவா’தி வத்தப்³போ³, யோ வதே³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, கி³ஹீனம் ‘ஜீவத² ப⁴ந்தே’தி வுச்சமானேன ‘சிரம் ஜீவா’தி வத்து’’ந்தி (சூளவ. 288) வசனதோ கி²பிதே ‘‘ஜீவா’’தி ந வத்தப்³ப³ம், கி³ஹினா பன ‘‘ஜீவதா²’’தி வுச்சமானேன ‘‘சிரம் ஜீவா’’தி வத்தும் வட்டதி.

49. ‘‘ந, பி⁴க்க²வே, லஸுணம் கா²தி³தப்³ப³ம், யோ கா²தே³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஆபா³த⁴பச்சயா லஸுணம் கா²தி³து’’ந்தி (சூளவ. 289) வசனதோ ஆபா³த⁴ம் வினா லஸுணம் கா²தி³தும் ந வட்டதி, ஸூபஸம்பாகாதீ³ஸு (பாசி. அட்ட². 797) பக்கி²த்தம் பன வட்டதி. தஞ்ஹி பச்சமானேஸு முக்³க³ஸூபாதீ³ஸு வா மச்ச²மம்ஸவிகதியா வா தேலே வா ப³த³ரஸாளவாதீ³ஸு வா அம்பி³லஸாகாதீ³ஸு வா உத்தரிப⁴ங்கே³ஸு வா யத்த² கத்த²சி அந்தமஸோ யாகு³ப⁴த்தேபி பக்கி²த்தம் வட்டதி.

50. ‘‘ந, பி⁴க்க²வே, அதோ⁴தேஹி பாதே³ஹி ஸேனாஸனம் அக்கமிதப்³ப³ம், யோ அக்கமேய்ய, ஆபத்தி து³க்கடஸ்ஸா’’தி (சூளவ. 324) வசனதோ அதோ⁴தேஹி பாதே³ஹி மஞ்சபீடா²தி³ஸேனாஸனம் பரிகம்மகதா வா பூ⁴மி ந அக்கமிதப்³பா³. ‘‘ந, பி⁴க்க²வே, அல்லேஹி பாதே³ஹி ஸேனாஸனம் அக்கமிதப்³ப³ம், யோ அக்கமேய்ய ஆபத்தி து³க்கடஸ்ஸா’’தி (சூளவ. 324) வசனதோ யேஹி (சூளவ. அட்ட². 324) அக்கந்தட்டா²னே உத³கம் பஞ்ஞாயதி, ஏவரூபேஹி அல்லபாதே³ஹி பரிப⁴ண்ட³கதா பூ⁴மி வா ஸேனாஸனம் வா ந அக்கமிதப்³ப³ம். ஸசே பன உத³கஸினேஹமத்தமேவ பஞ்ஞாயதி, ந உத³கம், வட்டதி. பாத³புஞ்ச²னிம் பன அல்லபாதே³ஹிபி அக்கமிதும் வட்டதியேவ. ‘‘ந, பி⁴க்க²வே, ஸஉபாஹனேன ஸேனாஸனம் அக்கமிதப்³ப³ம், யோ அக்கமேய்ய, ஆபத்தி து³க்கடஸ்ஸா’’தி (சூளவ. 324) வசனதோ தோ⁴தபாதே³ஹி அக்கமிதப்³ப³ட்டா²னம் ஸஉபாஹனேன அக்கமிதும் ந வட்டதி.

‘‘ந, பி⁴க்க²வே, பரிகம்மகதாய பூ⁴மியா நிட்டு²பி⁴தப்³ப³ம், யோ நிட்டு²பே⁴ய்ய, ஆபத்தி து³க்கடஸ்ஸா’’தி (சூளவ. 324) வசனதோ பரிகம்மகதாய பூ⁴மியா ந நிட்டு²பி⁴தப்³ப³ம். ‘‘அனுஜானாமி, பி⁴க்க²வே, கே²ளமல்லக’’ந்தி (சூளவ. 324) ஏவம் அனுஞ்ஞாதே கே²ளமல்லகே நிட்டு²பி⁴தப்³ப³ம். ‘‘அனுஜானாமி, பி⁴க்க²வே, சோளகேன பலிவேடே²து’’ந்தி (சூளவ. 324) வசனதோ ஸுதா⁴பூ⁴மியா வா பரிப⁴ண்ட³பூ⁴மியா வா மஞ்சபீட²ம் நிக்கி²பந்தேன ஸசே தட்டிகா வா கடஸாரகோ வா நத்தி², சோளகேன மஞ்சபீடா²னம் பாதா³ வேடே²தப்³பா³, தஸ்மிம் அஸதி பண்ணம்பி அத்த²ரிதும் வட்டதி, கிஞ்சி அனத்த²ரித்வா ட²பேந்தஸ்ஸ பன து³க்கடம். யதி³ பன தத்த² நேவாஸிகா அனத்த²தாய பூ⁴மியாபி ட²பேந்தி, அதோ⁴தபாதே³ஹிபி வளஞ்ஜேந்தி, ததே²வ வளஞ்ஜேதும் வட்டதி.

‘‘ந, பி⁴க்க²வே, பரிகம்மகதா பி⁴த்தி அபஸ்ஸேதப்³பா³, யோ அபஸ்ஸேய்ய, ஆபத்தி து³க்கடஸ்ஸா’’தி (சூளவ. 324) வசனதோ பரிகம்மகதா பி⁴த்தி ஸேதபி⁴த்தி வா ஹோது சித்தகம்மகதா வா, ந அபஸ்ஸேதப்³பா³. ந கேவலஞ்ச பி⁴த்திமேவ, த்³வாரம்பி வாதபானம்பி அபஸ்ஸேனப²லகம்பி பாஸாணத்த²ம்ப⁴ம்பி ருக்க²த்த²ம்ப⁴ம்பி சீவரேன வா யேன கேனசி அப்படிச்சா²தே³த்வா அபஸ்ஸிதும் ந லப⁴தி. ‘‘அனுஜானாமி, பி⁴க்க²வே, பச்சத்த²ரித்வா நிபஜ்ஜிது’’ந்தி (சூளவ. 325) வசனதோ பன தோ⁴தபாதே³ஹி அக்கமிதப்³ப³ம், பரிப⁴ண்ட³கதம் பூ⁴மிம் வா பூ⁴மத்த²ரணம் ஸேனாஸனம் வா ஸங்கி⁴கமஞ்சபீட²ம் வா அத்தனோ ஸந்தகேன பச்சத்த²ரணேன பச்சத்த²ரித்வாவ நிபஜ்ஜிதப்³ப³ம். ஸசே நித்³தா³யதோபி பச்சத்த²ரணே ஸங்குடிதே கோசி ஸரீராவயவோ மஞ்சம் வா பீட²ம் வா பு²ஸதி, ஆபத்தியேவ, லோமேஸு பன பு²ஸந்தேஸு லோமக³ணனாய ஆபத்தியோ. பரிபோ⁴க³ஸீஸேன அபஸ்ஸயந்தஸ்ஸபி ஏஸேவ நயோ. ஹத்த²தலபாத³தலேஹி பன பு²ஸிதும் அக்கமிதும் வா வட்டதி, மஞ்சம் வா பீட²ம் வா ஹரந்தஸ்ஸ காயே படிஹஞ்ஞதி, அனாபத்தி.

51. ‘‘த³ஸயிமே, பி⁴க்க²வே, அவந்தி³யா. புரேஉபஸம்பன்னேன பச்சு²பஸம்பன்னோ அவந்தி³யோ, அனுபஸம்பன்னோ அவந்தி³யோ, நானாஸம்வாஸகோ வுட்³ட⁴தரோ அத⁴ம்மவாதீ³ அவந்தி³யோ, மாதுகா³மோ அவந்தி³யோ, பண்ட³கோ அவந்தி³யோ, பாரிவாஸிகோ அவந்தி³யோ, மூலாயபடிகஸ்ஸனாரஹோ அவந்தி³யோ, மானத்தாரஹோ அவந்தி³யோ, மானத்தசாரிகோ அவந்தி³யோ, அப்³பா⁴னாரஹோ அவந்தி³யோ’’தி (சூளவ. 312) வசனதோ இமே த³ஸ அவந்தி³யாதி வேதி³தப்³பா³.

‘‘பச்சு²பஸம்பன்னேன புரேஉபஸம்பன்னோ வந்தி³யோ, நானாஸம்வாஸகோ வுட்³ட⁴தரோ த⁴ம்மவாதீ³ வந்தி³யோ, ததா²க³தோ அரஹம் ஸம்மாஸம்பு³த்³தோ⁴ வந்தி³யோ’’தி (சூளவ. 312) – வசனதோ இமே தயோ வந்தி³தப்³பா³.

52. ‘‘அனுஜானாமி, பி⁴க்க²வே, தீணி தூலானி ருக்க²தூலம் லதாதூலம் போடகீதூல’’ந்தி (சூளவ. 297) வசனதோ இமானி தீணி தூலானி கப்பியானி. தத்த² (சூளவ. அட்ட². 297) ருக்க²தூலந்தி ஸிம்ப³லிருக்கா²தீ³னம் யேஸம் கேஸஞ்சி ருக்கா²னம் தூலம். லதாதூலந்தி கீ²ரவல்லிஆதீ³னம் யாஸம் காஸஞ்சி வல்லீனம் தூலம். போடகீதூலந்தி போடகீதிணாதீ³னம் யேஸம் கேஸஞ்சி திணஜாதிகானம் அந்தமஸோ உச்சு²னளாதீ³னம்பி தூலம். ஏதேஹி தீஹி ஸப்³ப³பூ⁴தகா³மா ஸங்க³ஹிதா ஹோந்தி. ருக்க²வல்லிதிணஜாதியோ ஹி முஞ்சித்வா அஞ்ஞோ பூ⁴தகா³மோ நாம நத்தி², தஸ்மா யஸ்ஸ கஸ்ஸசி பூ⁴தகா³மஸ்ஸ தூலம் பி³ம்போ³ஹனே வட்டதி. பி⁴ஸிம் பன பாபுணித்வா ஸப்³ப³மேதம் அகப்பியதூலந்தி வுச்சதி. ந கேவலஞ்ச பி³ம்போ³ஹனே ஏதம் தூலமேவ, ஹம்ஸமோராதீ³னம் ஸப்³ப³ஸகுணானம் ஸீஹாதீ³னம் ஸப்³ப³சதுப்பதா³னஞ்ச லோமம்பி வட்டதி, பியங்கு³புப்ப²ப³குலபுப்பா²தீ³னம் பன யம் கிஞ்சி புப்ப²ம் ந வட்டதி. தமாலபத்தம் ஸுத்³த⁴மேவ ந வட்டதி, மிஸ்ஸகம் பன வட்டதி, பி⁴ஸீனம் அனுஞ்ஞாதம் பஞ்சவித⁴ம் உண்ணாதி³தூலம்பி வட்டதி.

53. ‘‘அனுஜானாமி, பி⁴க்க²வே, பஞ்ச பி⁴ஸியோ உண்ணபி⁴ஸிம் சோளபி⁴ஸிம் வாகபி⁴ஸிம் திணபி⁴ஸிம் பண்ணபி⁴ஸி’’ந்தி (சூளவ. 297) வசனதோ பஞ்சஹி உண்ணாதீ³ஹி பூரிதா பஞ்ச பி⁴ஸியோ அனுஞ்ஞாதா. தூலக³ணனாய ஹி ஏதாஸம் க³ணனா வுத்தா. தத்த² உண்ணக்³க³ஹணேன ந கேவலம் ஏளகலோமமேவ க³ஹிதம், ட²பேத்வா பன மனுஸ்ஸலோமம் யம் கிஞ்சி கப்பியாகப்பியமம்ஸஜாதீனம் பக்கி²சதுப்பதா³னம் லோமம் ஸப்³ப³ம் இத⁴ உண்ணக்³க³ஹணேனேவ க³ஹிதம். தஸ்மா ச²ன்னம் சீவரானம் ச²ன்னம் அனுலோமசீவரானஞ்ச அஞ்ஞதரேன பி⁴ஸிச்ச²விம் கத்வா தம் ஸப்³ப³ம் பக்கி²பித்வா பி⁴ஸிம் காதும் வட்டதி. ஏளகலோமானி பன அபக்கி²பித்வா கம்ப³லமேவ சதுக்³கு³ணம் பஞ்சகு³ணம் வா பக்கி²பித்வா கதாபி உண்ணபி⁴ஸிஸங்க்²யமேவ க³ச்ச²தி.

சோளபி⁴ஸிஆதீ³ஸு யம் கிஞ்சி நவசோளம் வா புராணசோளம் வா ஸம்ஹரித்வா அந்தோ பக்கி²பித்வா வா கதா சோளபி⁴ஸி. யம் கிஞ்சி வாகம் பக்கி²பித்வா கதா வாகபி⁴ஸி. யம் கிஞ்சி திணம் பக்கி²பித்வா கதா திணபி⁴ஸி. அஞ்ஞத்ர ஸுத்³த⁴தமாலபத்தா யம் கிஞ்சி பண்ணம் பக்கி²பித்வா கதா பண்ணபி⁴ஸீதி வேதி³தப்³பா³. தமாலபத்தம் பன அஞ்ஞேன மிஸ்ஸமேவ வட்டதி. ஸுத்³த⁴ம் ந வட்டதி. யம் பனேதம் உண்ணாதி³பஞ்சவித⁴ம் தூலம் பி⁴ஸியம் வட்டதி, தம் மஸூரகேபி வட்டதீதி குருந்தி³யம் வுத்தம். ஏதேன மஸூரகம் பரிபு⁴ஞ்ஜிதும் வட்டதீதி ஸித்³த⁴ம் ஹோதி. பி⁴ஸியா பமாணனியமோ நத்தி², மஞ்சபி⁴ஸி பீட²பி⁴ஸி பூ⁴மத்த²ரணபி⁴ஸி சங்கமனபி⁴ஸி பாத³புஞ்ச²னபி⁴ஸீதி ஏதாஸம் அனுரூபதோ ஸல்லக்கே²த்வா அத்தனோ ருசிவஸேன பமாணம் காதப்³ப³ம். பி³ம்போ³ஹனம் பன பமாணயுத்தமேவ வட்டதி.

54. ‘‘ந, பி⁴க்க²வே, அட்³ட⁴காயிகானி பி³ம்போ³ஹனானி தா⁴ரேதப்³பா³னி, யோ தா⁴ரேய்ய, ஆபத்தி து³க்கடஸ்ஸா’’தி (சூளவ. 297) யேஸு கடிதோ பட்டா²ய யாவ ஸீஸம் உபத³ஹந்தி, தாதி³ஸானி உபட்³ட⁴காயப்பமாணானி பி³ம்போ³ஹனானி படிக்கி²பித்வா ‘‘அனுஜானாமி, பி⁴க்க²வே, ஸீஸப்பமாணம் பி³ம்போ³ஹன’’ந்தி (சூளவ. 297) ஸீஸப்பமாணம் அனுஞ்ஞாதம். ஸீஸப்பமாணம் நாம யஸ்ஸ வித்தா²ரதோ தீஸு கண்ணேஸு த்³வின்னம் கண்ணானம் அந்தரம் மினியமானம் வித³த்தி² சேவ சதுரங்கு³லஞ்ச ஹோதி, மஜ்ஜ²ட்டா²னம் முட்டி²ரதனம் ஹோதி. ‘‘தீ³க⁴தோ பன தி³யட்³ட⁴ரதனம் வா த்³விரதனம் வா’’தி குருந்தி³யம் வுத்தம். அயம் ஸீஸப்பமாணஸ்ஸ உக்கட்ட²பரிச்சே²தோ³, இதோ உத்³த⁴ம் ந வட்டதி, ஹேட்டா² வட்டதி. அகி³லானஸ்ஸ ஸீஸூபதா⁴னஞ்ச பாதூ³பதா⁴னஞ்சாதி த்³வயமேவ வட்டதி, கி³லானஸ்ஸ பி³ம்போ³ஹனானி ஸந்த²ரித்வா உபரி பச்சத்த²ரணம் த³த்வா நிபஜ்ஜிதும்பி வட்டதி. ‘‘யானி பன பி⁴ஸீனம் அனுஞ்ஞாதானி பஞ்ச கப்பியதூலானி, தேஹி பி³ம்போ³ஹனம் மஹந்தம்பி வட்டதீ’’தி பு²ஸ்ஸதே³வத்தே²ரோ ஆஹ. வினயத⁴ரஉபதிஸ்ஸத்தே²ரோ பன ‘‘பி³ம்போ³ஹனம் கரிஸ்ஸாமீதி கப்பியதூலம் வா அகப்பியதூலம் வா பக்கி²பித்வா கரோந்தஸ்ஸ பமாணமேவ வட்டதீ’’தி ஆஹ.

55. ‘‘அனுஜானாமி, பி⁴க்க²வே, ஆஸந்தி³க’’ந்தி (சூளவ. 297) வசனதோ சதுரஸ்ஸபீட²ஸங்கா²தோ ஆஸந்தி³கோ வட்டதி, ஸோ ச ‘‘அனுஜானாமி, பி⁴க்க²வே, உச்சகம்பி ஆஸந்தி³க’’ந்தி (சூளவ. 297) வசனதோ அட்ட²ங்கு³லதோ உச்சபாத³கோபி வட்டதி. ஏகதோபா⁴கே³ன தீ³க⁴பீட²மேவ ஹி அட்ட²ங்கு³லதோ உச்சபாத³கம் ந வட்டதி, தஸ்மா சதுரஸ்ஸபீட²ம் பமாணாதிக்கந்தம்பி வட்டதி. ‘‘அனுஜானாமி, பி⁴க்க²வே, ஸத்தங்க³’’ந்தி (சூளவ. 297) வசனதோ தீஸு தி³ஸாஸு அபஸ்ஸயம் கத்வா கதமஞ்சோபி வட்டதி. ‘‘அனுஜானாமி, பி⁴க்க²வே, உச்சகம்பி ஸத்தங்க³’’ந்தி (சூளவ. 297) வசனதோ அயம்பி பமாணாதிக்கந்தோ ச வட்டதி. ‘‘அனுஜானாமி, பி⁴க்க²வே, ப⁴த்³த³பீட²’’ந்திஆதி³னா (சூளவ. 297) பாளியம் அனுஞ்ஞாதம் வேத்தமயபீட²ம் பிலோதிகாப³த்³த⁴பீட²ம் தா³ருபட்டிகாய உபரி பாதே³ ட²பேத்வா போ⁴ஜனப²லகம் விய கதம் ஏளகபாத³பீட²ம் ஆமலகாகாரேன யோஜிதம் ப³ஹுபாத³கம் ஆமண்ட³கவட்டிகபீட²ம் பலாலபீட²ம் ப²லகபீட²ஞ்ச பாளியம் அனாக³தஞ்ச அஞ்ஞம்பி யம் கிஞ்சி தா³ருமயபீட²ம் வட்டதி.

‘‘ந, பி⁴க்க²வே, உச்சே மஞ்சே ஸயிதப்³ப³ம், யோ ஸயேய்ய, ஆபத்தி து³க்கடஸ்ஸா’’தி (சூளவ. 297) வசனதோ பமணாதிக்கந்தே மஞ்சே ஸயந்தஸ்ஸ து³க்கடம், தம் பன கரோந்தஸ்ஸ காராபேந்தஸ்ஸ ச சே²த³னகம் பாசித்தியம். அஞ்ஞேன கதம் படிலபி⁴த்வா பரிபு⁴ஞ்ஜந்தேன சி²ந்தி³த்வா பரிபு⁴ஞ்ஜிதப்³ப³ம். ஸசே ந சி²ந்தி³துகாமோ ஹோதி, பூ⁴மியம் நிக²னித்வா பமாணம் உபரி த³ஸ்ஸேதி, உத்தானகம் வா கத்வா பரிபு⁴ஞ்ஜதி, உக்கி²பித்வா துலாஸங்கா⁴டே ட²பேத்வா அட்டம் கத்வா பரிபு⁴ஞ்ஜதி, வட்டதி. ‘‘ந, பி⁴க்க²வே, உச்சா மஞ்சபடிபாத³கா தா⁴ரேதப்³பா³, யோ தா⁴ரேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்ட²ங்கு³லபரமம் மஞ்சபடிபாத³க’’ந்தி (சூளவ. 297) வசனதோ மனுஸ்ஸானம் பமாணங்கு³லேன அட்ட²ங்கு³லபரமோவ மஞ்சபடிபாத³கோ வட்டதி, ததோ உத்³த⁴ம் ந வட்டதி.

56. ‘‘ந, பி⁴க்க²வே, உச்சாஸயனமஹாஸயனானி தா⁴ரேதப்³பா³னி, ஸேய்யதி²த³ம், ஆஸந்தி³ பல்லங்கோ கோ³னகோ சித்தகோ படிகா படலிகா தூலிகா விகதிகா உத்³த³லோமி ஏகந்தலோமி கட்டிஸ்ஸம் கோஸேய்யம் குத்தகம் ஹத்த²த்த²ரம் அஸ்ஸத்த²ரம் ரத²த்த²ரம் அஜினபவேணீ கத³லிமிக³பவரபச்சத்த²ரணம் ஸஉத்தரச்ச²த³ம் உப⁴தோலோஹிதகூபதா⁴னம், யோ தா⁴ரேய்ய, ஆபத்தி து³க்கடஸ்ஸா’’தி (மஹாவ. 254) வசனதோ உச்சாஸயனமஹாஸயனானி ந வட்டந்தி. தத்த² (மஹாவ. அட்ட². 254) உச்சாஸயனம் நாம பமாணாதிக்கந்தம் மஞ்சம். மஹாஸயனம் நாம அகப்பியத்த²ரணம். ஆஸந்தி³ஆதீ³ஸு ஆஸந்தீ³தி பமாணாதிக்கந்தாஸனம். பல்லங்கோதி பாதே³ஸு வாளரூபானி ட²பேத்வா கதோ. கோ³னகோதி தீ³க⁴லோமகோ மஹாகோஜவோ. சதுரங்கு³லாதி⁴கானி கிர தஸ்ஸ லோமானி. சித்தகோதி ரதனசித்ரஉண்ணாமயத்த²ரகோ. படிகாதி உண்ணாமயோ ஸேதத்த²ரகோ. படலிகாதி க⁴னபுப்ப²கோ உண்ணாமயலோமத்த²ரகோ, யோ ‘‘ஆமலகபடோ’’திபி வுச்சதி. தூலிகாதி பகதிதூலிகாயேவ. விகதிகாதி ஸீஹப்³யக்³கா⁴தி³ரூபவிசித்ரோ உண்ணாமயத்த²ரகோ. உத்³த³லோமீதி ஏகதோ உக்³க³தலோமம் உண்ணாமயத்த²ரணம். ஏகந்தலோமீதி உப⁴தோ உக்³க³தலோமம் உண்ணாமயத்த²ரணம். கட்டிஸ்ஸந்தி ரதனபரிஸிப்³பி³தம் கோஸேய்யகட்டிஸ்ஸமயம் பச்சத்த²ரணம். கோஸேய்யந்தி ரதனபரிஸிப்³பி³தம் கோஸியஸுத்தமயம் பச்சத்த²ரணம், ஸுத்³த⁴கோஸேய்யம் பன வட்டதி.

குத்தகந்தி ஸோளஸன்னம் நாடகித்தீ²னம் ட²த்வா நச்சனயோக்³க³ம் உண்ணாமயத்த²ரணம். ஹத்த²த்த²ரஅஸ்ஸத்த²ரா ஹத்தி²அஸ்ஸபிட்டீ²ஸு அத்த²ரணகஅத்த²ரணா ஏவ. ரத²த்த²ரேபி ஏஸேவ நயோ. அஜினபவேணீதி அஜினசம்மேஹி மஞ்சப்பமாணேன ஸிப்³பி³த்வா கதா பவேணீ. கத³லிமிக³பவரபச்சத்த²ரணந்தி கத³லிமிக³சம்மம் நாம அத்தி², தேன கதம் பவரபச்சத்த²ரணந்தி அத்தோ². தம் கிர ஸேதவத்த²ஸ்ஸ உபரி கத³லிமிக³சம்மம் பத்த²ரித்வா ஸிப்³பி³த்வா கரோந்தி. ஸஉத்தரச்ச²த³ந்தி ஸஹ உத்தரச்ச²தே³ன, உபரிப³த்³தே⁴ன ரத்தவிதானேன ஸத்³தி⁴ந்தி அத்தோ². ஸேதவிதானம்பி ஹேட்டா² அகப்பியபச்சத்த²ரணே ஸதி ந வட்டதி, அஸதி பன வட்டதி. உப⁴தோலோஹிதகூபதா⁴னந்தி ஸீஸூபதா⁴னஞ்ச பாதூ³பதா⁴னஞ்சாதி மஞ்சஸ்ஸ உப⁴தோலோஹிதகூபதா⁴னம், ஏதம் ந கப்பதி. யம் பன ஏகமேவ உபதா⁴னம் உபோ⁴ஸு பஸ்ஸேஸு ரத்தம் வா ஹோது பது³மவண்ணம் வா விசித்ரம் வா, ஸசே பமாணயுத்தம், வட்டதி, மஹாஉபதா⁴னம் பன படிக்கி²த்தம். கோ³னகாதீ³னி (சூளவ. அட்ட². 320) ஸங்கி⁴கவிஹாரே வா புக்³க³லிகவிஹாரே வா மஞ்சபீட²கேஸு அத்த²ரித்வா பரிபு⁴ஞ்ஜிதும் ந வட்டந்தி, த⁴ம்மாஸனே பன கி³ஹிவிகதனீஹாரேன லப்³ப⁴ந்தி, தத்ராபி நிபஜ்ஜிதும் ந வட்டதி.

‘‘அனுஜானாமி, பி⁴க்க²வே, ட²பேத்வா தீணி ஆஸந்தி³ம் பல்லங்கம் தூலிகம் கி³ஹிவிகதம் அபி⁴னிஸீதி³தும், ந த்வேவ அபி⁴னிபஜ்ஜிது’’ந்தி (சூளவ. 314) – வசனதோ ஆஸந்தா³தி³த்தயம் ட²பேத்வா அவஸேஸேஸு கோ³னகாதீ³ஸு கி³ஹிவிகதேஸு த⁴ம்மாஸனே வா ப⁴த்தக்³கே³ வா அந்தரக⁴ரே வா நிஸீதி³தும் வட்டதி, நிபஜ்ஜிதும் ந வட்டதி. தூலோனத்³த⁴ம் பன மஞ்சபீட²ம் ப⁴த்தக்³கே³ அந்தரக⁴ரேயேவ நிஸீதி³தும் வட்டதி, தத்தா²பி நிபஜ்ஜிதும் வட்டதி. தூலோனத்³த⁴ம் பன மஞ்சபீட²ம் காராபேந்தஸ்ஸபி உத்³தா³லனகம் பாசித்தியம்.

‘‘அனுஜானாமி, பி⁴க்க²வே, ஓனத்³த⁴மஞ்சம் ஓனத்³த⁴பீட²’’ந்தி (சூளவ. 297) வசனதோ பன சம்மாதீ³ஹி ஓனத்³த⁴ம் மஞ்சபீட²ம் வட்டதி. ‘‘அனுஜானாமி, பி⁴க்க²வே, பாவாரம். அனுஜானாமி, பி⁴க்க²வே, கோஸேய்யபாவாரம். அனுஜானாமி, பி⁴க்க²வே, கோஜவம். அனுஜானாமி, பி⁴க்க²வே, கம்ப³ல’’ந்தி (மஹாவ. 337-338) – வசனதோ பாவாராதீ³னி ஸங்கி⁴கானி வா ஹோந்து புக்³க³லிகானி வா, யதா²ஸுக²ம் விஹாரே வா அந்தரக⁴ரே வா யத்த² கத்த²சி பரிபு⁴ஞ்ஜிதும் வட்டந்தி. கோஜவம் பனேத்த² பகதிகோஜவமேவ வட்டதி, மஹாபிட்டி²யகோஜவம் ந வட்டதி.

‘‘அனுஜானாமி, பி⁴க்க²வே, ஸப்³ப³ம் பாஸாத³பரிபோ⁴க³’’ந்தி (சூளவ. 320) வசனதோ ஸுவண்ணரஜதாதி³விசித்ரானி (சூளவ. அட்ட². 320) கவாடானி மஞ்சபீடா²னி தாலவண்டானி ஸுவண்ணரஜதயோனி பானீயக⁴டபானீயஸராவானி, யம் கிஞ்சி சித்தகம்மகதம், ஸப்³ப³ம் ஸேனாஸனபரிபோ⁴கே³ வட்டதி. ‘‘பாஸாத³ஸ்ஸ தா³ஸிதா³ஸம் கே²த்தவத்து²ம் கோ³மஹிம்ஸம் தே³மா’’தி வத³ந்தி, பாடேக்கம் க³ஹணகிச்சம் நத்தி², பாஸாதே³ படிக்³க³ஹிதே படிக்³க³ஹிதமேவ ஹோதி.