33. கம்மாகம்மவினிச்ச²யகதா²

249. கம்மாகம்மந்தி ஏத்த² (பரி. 482-484) பன கம்மானி சத்தாரி – அபலோகனகம்மம் ஞத்திகம்மம் ஞத்திது³தியகம்மம் ஞத்திசதுத்த²கம்மந்தி. இமானி சத்தாரி கம்மானி கதிஹாகாரேஹி விபஜ்ஜந்தி? பஞ்சஹாகாரேஹி விபஜ்ஜந்தி – வத்து²தோ வா ஞத்திதோ வா அனுஸ்ஸாவனதோ வா ஸீமதோ வா பரிஸதோ வா.

கத²ம் வத்து²தோ கம்மானி விபஜ்ஜந்தி? ஸம்முகா²கரணீயம் கம்மம் அஸம்முகா² கரோதி, வத்து²விபன்னம் அத⁴ம்மகம்மம். படிபுச்சா²கரணீயம் கம்மம் அபடிபுச்சா² கரோதி, வத்து²விபன்னம் அத⁴ம்மகம்மம். படிஞ்ஞாய கரணீயம் கம்மம் அபடிஞ்ஞாய கரோதி, வத்து²விபன்னம் அத⁴ம்மகம்மம். ஸதிவினயாரஹஸ்ஸ அமூள்ஹவினயம் தே³தி, வத்து²விபன்னம் அத⁴ம்மகம்மம். அமூள்ஹவினயாரஹஸ்ஸ தஸ்ஸ பாபியஸிககம்மம் கரோதி, வத்து²விபன்னம் அத⁴ம்மகம்மம். தஸ்ஸ பாபியஸிககம்மாரஹஸ்ஸ தஜ்ஜனீயகம்மம் கரோதி, வத்து²விபன்னம் அத⁴ம்மகம்மம். தஜ்ஜனீயகம்மாரஹஸ்ஸ நியஸ்ஸகம்மம் கரோதி, வத்து²விபன்னம் அத⁴ம்மகம்மம். நியஸ்ஸகம்மாரஹஸ்ஸ பப்³பா³ஜனீயகம்மம் கரோதி, வத்து²விபன்னம் அத⁴ம்மகம்மம். பப்³பா³ஜனீயகம்மாரஹஸ்ஸ படிஸாரணீயகம்மம் கரோதி, வத்து²விபன்னம் அத⁴ம்மகம்மம். படிஸாரணீயகம்மாரஹஸ்ஸ உக்கே²பனீயகம்மம் கரோதி, வத்து²விபன்னம் அத⁴ம்மகம்மம். உக்கே²பனீயகம்மாரஹஸ்ஸ பரிவாஸம் தே³தி, வத்து²விபன்னம் அத⁴ம்மகம்மம். பரிவாஸாரஹஸ்ஸ மூலாய படிகஸ்ஸதி, வத்து²விபன்னம் அத⁴ம்மகம்மம். மூலாயபடிகஸ்ஸனாரஹஸ்ஸ மானத்தம் தே³தி, வத்து²விபன்னம் அத⁴ம்மகம்மம். மானத்தாரஹம் அப்³பே⁴தி, வத்து²விபன்னம் அத⁴ம்மகம்மம். அப்³பா⁴னாரஹம் உபஸம்பாதே³தி, வத்து²விபன்னம் அத⁴ம்மகம்மம். அனுபோஸதே² உபோஸத²ம் கரோதி, வத்து²விபன்னம் அத⁴ம்மகம்மம். அபவாரணாய பவாரேதி, வத்து²விபன்னம் அத⁴ம்மகம்மம். பண்ட³கம் உபஸம்பாதே³தி, வத்து²விபன்னம் அத⁴ம்மகம்மம். தே²ய்யஸம்வாஸகம், தித்தி²யபக்கந்தகம், திரச்சா²னக³தம், மாதுகா⁴தகம், பிதுகா⁴தகம், அரஹந்தகா⁴தகம், பி⁴க்கு²னிதூ³ஸகம், ஸங்க⁴பே⁴த³கம், லோஹிதுப்பாத³கம், உப⁴தோப்³யஞ்ஜனகம், ஊனவீஸதிவஸ்ஸம் புக்³க³லம் உபஸம்பாதே³தி, வத்து²விபன்னம் அத⁴ம்மகம்மம். ஏவம் வத்து²தோ கம்மானி விபஜ்ஜந்தி.

கத²ம் ஞத்திதோ கம்மானி விபஜ்ஜந்தி? பஞ்சஹாகாரேஹி ஞத்திதோ கம்மானி விபஜ்ஜந்தி – வத்து²ம் ந பராமஸதி, ஸங்க⁴ம் ந பராமஸதி, புக்³க³லம் ந பராமஸதி, ஞத்திம் ந பராமஸதி, பச்சா² வா ஞத்திம் ட²பேதி. இமேஹி பஞ்சஹாகாரேஹி ஞத்திதோ கம்மானி விபஜ்ஜந்தி.

கத²ம் அனுஸ்ஸாவனதோ கம்மானி விபஜ்ஜந்தி? பஞ்சஹாகாரேஹி அனுஸ்ஸாவனதோ கம்மானி விபஜ்ஜந்தி – வத்து²ம் ந பராமஸதி, ஸங்க⁴ம் ந பராமஸதி, புக்³க³லம் ந பராமஸதி, ஸாவனம் ஹாபேதி, அகாலே வா ஸாவேதி. இமேஹி பஞ்சஹாகாரேஹி அனுஸ்ஸாவனதோ கம்மானி விபஜ்ஜந்தி.

கத²ம் ஸீமதோ கம்மானி விபஜ்ஜந்தி? ஏகாத³ஸஹி ஆகாரேஹி ஸீமதோ கம்மானி விபஜ்ஜந்தி – அதிகு²த்³த³கம் ஸீமம் ஸம்மன்னதி, அதிமஹதிம் ஸீமம் ஸம்மன்னதி, க²ண்ட³னிமித்தம் ஸீமம் ஸம்மன்னதி, சா²யானிமித்தம் ஸீமம் ஸம்மன்னதி, அனிமித்தம் ஸீமம் ஸம்மன்னதி, ப³ஹிஸீமே டி²தோ ஸீமம் ஸம்மன்னதி, நதி³யா ஸீமம் ஸம்மன்னதி, ஸமுத்³தே³ ஸீமம் ஸம்மன்னதி, ஜாதஸ்ஸரே ஸீமம் ஸம்மன்னதி, ஸீமாய ஸீமம் ஸம்பி⁴ந்த³தி, ஸீமாய ஸீமம் அஜ்ஜோ²த்த²ரதி. இமேஹி ஏகாத³ஸஹி ஆகாரேஹி ஸீமதோ கம்மானி விபஜ்ஜந்தி.

கத²ம் பரிஸதோ கம்மானி விபஜ்ஜந்தி? த்³வாத³ஸஹி ஆகாரேஹி பரிஸதோ கம்மானி விபஜ்ஜந்தி – சதுவக்³க³கரணீயே கம்மே யாவதிகா பி⁴க்கூ² கம்மப்பத்தா தே அனாக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, சதுவக்³க³கரணே கம்மே யாவதிகா பி⁴க்கூ² கம்மப்பத்தா, தே ஆக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, சதுவக்³க³கரணே கம்மே யாவதிகா பி⁴க்கூ² கம்மப்பத்தா, தே ஆக³தா ஹோந்தி, ச²ந்தா³ரஹானம் ச²ந்தோ³ ஆஹடோ ஹோதி, ஸம்முகீ²பூ⁴தா படிக்கோஸந்தி.

பஞ்சவக்³க³கரணே கம்மே…பே… த³ஸவக்³க³கரணே கம்மே…பே… வீஸதிவக்³க³கரணே கம்மே யாவதிகா பி⁴க்கூ² கம்மப்பத்தா, தே அனாக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, வீஸதிவக்³க³கரணே கம்மே யாவதிகா பி⁴க்கூ² கம்மப்பத்தா, தே ஆக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, வீஸதிவக்³க³கரணே கம்மே யாவதிகா பி⁴க்கூ² கம்மப்பத்தா, தே ஆக³தா ஹோந்தி, ச²ந்தா³ரஹானம் ச²ந்தோ³ ஆஹடோ ஹோதி, ஸம்முகீ²பூ⁴தா படிக்கோஸந்தி. இமேஹி த்³வாத³ஸஹி ஆகாரேஹி பரிஸதோ கம்மானி விபஜ்ஜந்தி.

சதுவக்³க³கரணே கம்மே சத்தாரோ பி⁴க்கூ² பகதத்தா கம்மப்பத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி, ஸோ நேவ கம்மப்பத்தோ நாபி ச²ந்தா³ரஹோ, அபிச கம்மாரஹோ. பஞ்சவக்³க³கரணே கம்மே பஞ்ச பி⁴க்கூ² பகதத்தா கம்மப்பத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி, ஸோ நேவ கம்மப்பத்தோ நாபி ச²ந்தா³ரஹோ, அபிச கம்மாரஹோ. த³ஸவக்³க³கரணே கம்மே த³ஸ பி⁴க்கூ² பகதத்தா கம்மப்பத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி, ஸோ நேவ கம்மப்பத்தோ நாபி ச²ந்தா³ரஹோ, அபிச கம்மாரஹோ. வீஸதிவக்³க³கரணே கம்மே வீஸதி பி⁴க்கூ² பகதத்தா கம்மப்பத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி, ஸோ நேவ கம்மப்பத்தோ நாபி ச²ந்தா³ரஹோ, அபிச கம்மாரஹோ.

250. அபலோகனகம்மம் கதி டா²னானி க³ச்ச²தி? ஞத்திகம்மம், ஞத்திது³தியகம்மம், ஞத்திசதுத்த²கம்மம் கதி டா²னானி க³ச்ச²தி? அபலோகனகம்மம் பஞ்ச டா²னானி க³ச்ச²தி. ஞத்திகம்மம் நவ டா²னானி க³ச்ச²தி. ஞத்திது³தியகம்மம் ஸத்த டா²னானி க³ச்ச²தி. ஞத்திசதுத்த²கம்மம் ஸத்த டா²னானி க³ச்ச²தி.

அபலோகனகம்மம் கதமானி பஞ்ச டா²னானி க³ச்ச²தி? ஓஸாரணம் நிஸ்ஸாரணம் ப⁴ண்டு³கம்மம் ப்³ரஹ்மத³ண்ட³ம் கம்மலக்க²ணஞ்ஞேவ பஞ்சமம். அபலோகனகம்மம் இமானி பஞ்ச டா²னானி க³ச்ச²தி.

ஞத்திகம்மம் கதமானி நவ டா²னானி க³ச்ச²தி? ஓஸாரணம் நிஸ்ஸாரணம் உபோஸத²ம் பவாரணம் ஸம்முதிம் தா³னம் படிக்³க³ஹணம் பச்சுக்கட்³ட⁴னம் கம்மலக்க²ணஞ்ஞேவ நவமம். ஞத்திகம்மம் இமானி நவ டா²னானி க³ச்ச²தி.

ஞத்திது³தியகம்மம் கதமானி ஸத்த டா²னானி க³ச்ச²தி? ஓஸாரணம் நிஸ்ஸாரணம் ஸம்முதிம் தா³னம் உத்³த⁴ரணம் தே³ஸனம் கம்மலக்க²ணஞ்ஞேவ ஸத்தமம். ஞத்திது³தியகம்மம் இமானி ஸத்த டா²னானி க³ச்ச²தி.

ஞத்திசதுத்த²கம்மம் கதமானி ஸத்த டா²னானி க³ச்ச²தி? ஓஸாரணம் நிஸ்ஸாரணம் ஸம்முதிம் தா³னம் நிக்³க³ஹம் ஸமனுபா⁴ஸனம் கம்மலக்க²ணஞ்ஞேவ ஸத்தமம். ஞத்திசதுத்த²கம்மம் இமானி ஸத்த டா²னானி க³ச்ச²தி. அயம் தாவ பாளினயோ.

251. அயம் பனேத்த² ஆதி³தோ பட்டா²ய வினிச்ச²யகதா² (பரி. அட்ட². 482) – அபலோகனகம்மம் நாம ஸீமட்ட²கஸங்க⁴ம் ஸோதே⁴த்வா ச²ந்தா³ரஹானம் ச²ந்த³ம் ஆஹரித்வா ஸமக்³க³ஸ்ஸ ஸங்க⁴ஸ்ஸ அனுமதியா திக்க²த்தும் ஸாவேத்வா கத்தப்³ப³கம்மம். ஞத்திகம்மம் நாம வுத்தனயேனேவ ஸமக்³க³ஸ்ஸ ஸங்க⁴ஸ்ஸ அனுமதியா ஏகாய ஞத்தியா கத்தப்³ப³கம்மம். ஞத்திது³தியகம்மம் நாம வுத்தனயேனேவ ஸமக்³க³ஸ்ஸ ஸங்க⁴ஸ்ஸ அனுமதியா ஏகாய ஞத்தியா ஏகாய ச அனுஸ்ஸாவனாயாதி ஏவம் ஞத்திது³தியாய அனுஸ்ஸாவனாய கத்தப்³ப³கம்மம். ஞத்திசதுத்த²கம்மம் நாம வுத்தனயேனேவ ஸமக்³க³ஸ்ஸ ஸங்க⁴ஸ்ஸ அனுமதியா ஏகாய ஞத்தியா தீஹி ச அனுஸ்ஸாவனாஹீதி ஏவம் ஞத்திசதுத்தா²ஹி தீஹி அனுஸ்ஸாவனாஹி கத்தப்³ப³கம்மம்.

தத்ர அபலோகனகம்மம் அபலோகேத்வாவ காதப்³ப³ம், ஞத்திகம்மாதி³வஸேன ந காதப்³ப³ம். ஞத்திகம்மம்பி ஏகம் ஞத்திம் ட²பேத்வாவ காதப்³ப³ம், அபலோகனகம்மாதி³வஸேன ந காதப்³ப³ம். ஞத்திது³தியகம்மம் பன அபலோகேத்வா காதப்³ப³ம்பி அகாதப்³ப³ம்பி அத்தி². தத்த² ஸீமாஸம்முதி ஸீமாஸமூஹனம் கதி²னதா³னம் கதி²னுத்³தா⁴ரோ குடிவத்து²தே³ஸனா விஹாரவத்து²தே³ஸனாதி இமானி ச²கம்மானி க³ருகானி அபலோகேத்வா காதும் ந வட்டதி, ஞத்திது³தியகம்மவாசம் ஸாவேத்வாவ காதப்³பா³னி. அவஸேஸா தேரஸ ஸம்முதியோ ஸேனாஸனக்³கா³ஹகமதகசீவரதா³னாதி³ஸம்முதியோ சாதி ஏதானி லஹுககம்மானி, அபலோகேத்வாபி காதும் வட்டந்தி, ஞத்திகம்மஞத்திசதுத்த²கம்மவஸேன பன ந காதப்³ப³மேவ. ‘‘ஞத்திசதுத்த²கம்மவஸேன கயிரமானம் த³ள்ஹதரம் ஹோதி, தஸ்மா காதப்³ப³’’ந்தி ஏகச்சே வத³ந்தி. ஏவம் பன ஸதி கம்மஸங்கரோ ஹோதி, தஸ்மா ந காதப்³ப³ந்தி படிக்கி²த்தமேவ. ஸசே பன அக்க²ரபரிஹீனம் வா பத³பரிஹீனம் வா து³ருத்தபத³ம் வா ஹோதி, தஸ்ஸ ஸோத⁴னத்த²ம் புனப்புனம் வத்தும் வட்டதி. இத³ம் அகுப்பகம்மஸ்ஸ த³ள்ஹீகம்மம் ஹோதி, குப்பகம்மே கம்மம் ஹுத்வா திட்ட²தி. ஞத்திசதுத்த²கம்மம் ஞத்திஞ்ச திஸ்ஸோ ச கம்மவாசாயோ ஸாவேத்வாவ காதப்³ப³ம், அபலோகனகம்மாதி³வஸேன ந காதப்³ப³ம்.

ஸம்முகா²கரணீயம் கம்மம் அஸம்முகா² கரோதி, வத்து²விபன்னம் அத⁴ம்மகம்மந்தி ஏத்த² பன அத்தி² கம்மம் ஸம்முகா²கரணீயம், அத்தி² கம்மம் அஸம்முகா²கரணீயம். தத்த² அஸம்முகா²கரணீயம் நாம தூ³தேனூபஸம்பதா³, பத்தனிக்குஜ்ஜனம், பத்துக்குஜ்ஜனம், உம்மத்தகஸ்ஸ பி⁴க்கு²னோ உம்மத்தகஸம்முதி, ஸேக்கா²னம் குலானம் ஸேக்க²ஸம்முதி, ச²ன்னஸ்ஸ பி⁴க்கு²னோ ப்³ரஹ்மத³ண்டோ³, தே³வத³த்தஸ்ஸ பகாஸனீயகம்மம், அபஸாத³னீயம் த³ஸ்ஸேந்தஸ்ஸ பி⁴க்கு²னோ பி⁴க்கு²னிஸங்கே⁴ன காதப்³ப³ம் அவந்தி³யகம்மந்தி அட்ட²வித⁴ம் ஹோதி. இத³ம் அட்ட²வித⁴ம்பி கம்மம் அஸம்முகா² கதம் ஸுகதம் ஹோதி அகுப்பம், ஸேஸானி ஸப்³ப³கம்மானி ஸம்முகா² ஏவ காதப்³பா³னி. ஸங்க⁴ஸம்முக²தா த⁴ம்மஸம்முக²தா வினயஸம்முக²தா புக்³க³லஸம்முக²தாதி இமம் சதுப்³பி³த⁴ம் ஸம்முகா²வினயம் உபனேத்வாவ காதப்³பா³னி. ஏவம் கதானி ஹி ஸுகதானி ஹோந்தி, ஏவம் அகதானி பனேதானி இமம் ஸம்முகா²வினயஸங்கா²தம் வத்து²ம் வினா கதத்தா வத்து²விபன்னானி நாம ஹோந்தி. தேன வுத்தம் ‘‘ஸம்முகா²கரணீயம் கம்மம் அஸம்முகா² கரோதி, வத்து²விபன்னம் அத⁴ம்மகம்ம’’ந்தி. படிபுச்சா²கரணீயாதீ³ஸுபி படிபுச்சா²தி³கரணமேவ வத்து², தம் வத்து²ம் வினா கதத்தா தேஸம்பி வத்து²விபன்னதா வேதி³தப்³பா³. அபிச ஊனவீஸதிவஸ்ஸம் வா அந்திமவத்து²ம் அஜ்ஜா²பன்னபுப்³ப³ம் வா ஏகாத³ஸஸு வா அப⁴ப்³ப³புக்³க³லேஸு அஞ்ஞதரம் உபஸம்பாதே³ந்தஸ்ஸபி வத்து²விபன்னம் அத⁴ம்மகம்மம் ஹோதி. அயம் வத்து²தோ கம்மவிபத்தியம் வினிச்ச²யோ.

ஞத்திதோ விபத்தியம் பன வத்து²ம் ந பராமஸதீதி யஸ்ஸ உபஸம்பதா³தி³கம்மம் கரோதி, தம் ந பராமஸதி, தஸ்ஸ நாமம் ந க³ண்ஹாதி. ‘‘ஸுணாது மே, ப⁴ந்தே, ஸங்கோ⁴, அயம் த⁴ம்மரக்கி²தோ ஆயஸ்மதோ பு³த்³த⁴ரக்கி²தஸ்ஸ உபஸம்பதா³பேக்கோ²’’தி வத்தப்³பே³ ‘‘ஸுணாது மே, ப⁴ந்தே, ஸங்கோ⁴, ஆயஸ்மதோ பு³த்³த⁴ரக்கி²தஸ்ஸ உபஸம்பதா³பேக்கோ²’’தி வத³தி. ஏவம் வத்து²ம் ந பராமஸதி.

ஸங்க⁴ம் ந பராமஸதீதி ஸங்க⁴ஸ்ஸ நாமம் ந க³ண்ஹாதி. ‘‘ஸுணாது மே, ப⁴ந்தே, ஸங்கோ⁴, அயம் த⁴ம்மரக்கி²தோ’’தி வத்தப்³பே³ ‘‘ஸுணாது மே, ப⁴ந்தே, அயம் த⁴ம்மரக்கி²தோ’’தி வத³தி. ஏவம் ஸங்க⁴ம் ந பராமஸதி.

புக்³க³லம் ந பராமஸதீதி யோ உபஸம்பதா³பேக்க²ஸ்ஸ உபஜ்ஜா²யோ, தம் ந பராமஸதி, தஸ்ஸ நாமம் ந க³ண்ஹாதி. ‘‘ஸுணாது மே, ப⁴ந்தே, ஸங்கோ⁴, அயம் த⁴ம்மரக்கி²தோ ஆயஸ்மதோ பு³த்³த⁴ரக்கி²தஸ்ஸ உபஸம்பதா³பேக்கோ²’’தி வத்தப்³பே³ ‘‘ஸுணாது மே, ப⁴ந்தே, ஸங்கோ⁴, அயம் த⁴ம்மரக்கி²தோ உபஸம்பதா³பேக்கோ²’’தி வத³தி. ஏவம் புக்³க³லம் ந பராமஸதி.

ஞத்திம் ந பராமஸதீதி ஸப்³பே³ன ஸப்³ப³ம் ஞத்திம் ந பராமஸதி, ஞத்திது³தியகம்மே ஞத்திம் அட்ட²பேத்வா த்³விக்க²த்தும் கம்மவாசாய ஏவ அனுஸ்ஸாவனகம்மம் கரோதி, ஞத்திசதுத்த²கம்மேபி ஞத்திம் அட்ட²பேத்வா சதுக்க²த்தும் கம்மவாசாய ஏவ அனுஸ்ஸாவனகம்மம் கரோதி. ஏவம் ஞத்திம் ந பராமஸதி.

பச்சா² வா ஞத்திம் ட²பேதீதி பட²மம் கம்மவாசாய அனுஸ்ஸாவனகம்மம் கத்வா ‘‘ஏஸா ஞத்தீ’’தி வத்வா ‘‘க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி வத³தி. ஏவம் பச்சா² ஞத்திம் ட²பேதி. இதி இமேஹி பஞ்சஹாகாரேஹி ஞத்திதோ கம்மானி விபஜ்ஜந்தி.

அனுஸ்ஸாவனதோ விபத்தியம் பன வத்து²ஆதீ³னி தாவ வுத்தனயேனேவ வேதி³தப்³பா³னி. ஏவம் பன நேஸம் அபராமஸனம் ஹோதி – ‘‘ஸுணாது மே, ப⁴ந்தே, ஸங்கோ⁴’’தி பட²மானுஸ்ஸாவனாய வா ‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி. ஸுணாது மே, ப⁴ந்தே, ஸங்கோ⁴’’தி து³தியததியானுஸ்ஸாவனாஸு வா ‘‘அயம் த⁴ம்மரக்கி²தோ ஆயஸ்மதோ பு³த்³த⁴ரக்கி²தஸ்ஸ உபஸம்பதா³பேக்கோ²’’தி வத்தப்³பே³ ‘‘ஸுணாது மே, ப⁴ந்தே, ஸங்கோ⁴, ஆயஸ்மதோ பு³த்³த⁴ரக்கி²தஸ்ஸா’’தி வத³ந்தோ வத்து²ம் ந பராமஸதி நாம. ‘‘ஸுணாது மே, ப⁴ந்தே, ஸங்கோ⁴, அயம் த⁴ம்மரக்கி²தோ’’தி வத்தப்³பே³ ‘‘ஸுணாது மே, ப⁴ந்தே, அயம் த⁴ம்மரக்கி²தோ’’தி வத³ந்தோ ஸங்க⁴ம் ந பராமஸதி நாம. ‘‘ஸுணாது மே, ப⁴ந்தே, ஸங்கோ⁴, அயம் த⁴ம்மரக்கி²தோ ஆயஸ்மதோ பு³த்³த⁴ரக்கி²தஸ்ஸா’’தி வத்தப்³பே³ ‘‘ஸுணாது மே, ப⁴ந்தே, ஸங்கோ⁴, அயம் த⁴ம்மரக்கி²தோ உபஸம்பதா³பேக்கோ²’’தி வத³ந்தோ புக்³க³லம் ந பராமஸதி நாம.

ஸாவனம் ஹாபேதீதி ஸப்³பே³ன ஸப்³ப³ம் கம்மவாசாய அனுஸ்ஸாவனம் ந கரோதி, ஞத்திது³தியகம்மே த்³விக்க²த்தும் ஞத்திமேவ ட²பேதி, ஞத்திசதுத்த²கம்மே சதுக்க²த்தும் ஞத்திமேவ ட²பேதி. ஏவம் ஸாவனம் ஹாபேதி. யோபி ஞத்திது³தியகம்மே ஏகம் ஞத்திம் ட²பேத்வா ஏகம் கம்மவாசம் அனுஸ்ஸாவேந்தோ அக்க²ரம் வா ச²ட்³டே³தி, பத³ம் வா து³ருத்தம் கரோதி, அயம்பி ஸாவனம் ஹாபேதியேவ. ஞத்திசதுத்த²கம்மே பன ஏகம் ஞத்திம் ட²பேத்வா ஸகிமேவ வா த்³விக்க²த்தும் வா கம்மவாசாய அனுஸ்ஸாவனம் கரோந்தோபி அக்க²ரம் வா பத³ம் வா ச²ட்³டே³ந்தோபி து³ருத்தம் கரோந்தோபி அனுஸ்ஸாவனம் ஹாபேதியேவாதி வேதி³தப்³போ³.

252. ‘‘து³ருத்தம் கரோதீ’’தி ஏத்த² பன அயம் வினிச்ச²யோ. யோ ஹி அஞ்ஞஸ்மிம் அக்க²ரே வத்தப்³பே³ அஞ்ஞம் வத³தி, அயம் து³ருத்தம் கரோதி நாம. தஸ்மா கம்மவாசம் கரோந்தேன பி⁴க்கு²னா ய்வாயம் –

‘‘ஸிதி²லம் த⁴னிதஞ்ச தீ³க⁴ரஸ்ஸம், க³ருகம் லஹுகஞ்ச நிக்³க³ஹிதம்;

ஸம்ப³ந்த⁴ம் வவத்தி²தம் விமுத்தம், த³ஸதா⁴ ப்³யஞ்ஜனபு³த்³தி⁴யா பபே⁴தோ³’’தி. –

வுத்தோ, அயம் ஸுட்டு² உபலக்கே²தப்³போ³. ஏத்த² ஹி ஸிதி²லம் நாம பஞ்சஸு வக்³கே³ஸு பட²மததியம். த⁴னிதம் நாம தேஸ்வேவ து³தியசதுத்த²ம். தீ³க⁴ந்தி தீ³கே⁴ன காலேன வத்தப்³ப³ஆகாராதி³. ரஸ்ஸந்தி ததோ உபட்³ட⁴காலேன வத்தப்³ப³அகாராதி³. க³ருகந்தி தீ³க⁴மேவ, யம் வா ‘‘ஆயஸ்மதோ பு³த்³த⁴ரக்கி²தத்தே²ரஸ்ஸ யஸ்ஸ நக்க²மதீ’’தி ஏவம் ஸம்யோக³பரம் கத்வா வுச்சதி. லஹுகந்தி ரஸ்ஸமேவ, யம் வா ‘‘ஆயஸ்மதோ பு³த்³த⁴ரக்கி²தத்தே²ரஸ்ஸ யஸ்ஸ ந க²மதீ’’தி ஏவம் அஸம்யோக³பரம் கத்வா வுச்சதி. நிக்³க³ஹிதந்தி யம் கரணானி நிக்³க³ஹேத்வா அவிஸ்ஸஜ்ஜேத்வா அவிவடேன முகே²ன ஸானுனாஸிகம் கத்வா வத்தப்³ப³ம். ஸம்ப³ந்த⁴ந்தி யம் பரபதே³ன ஸம்ப³ந்தி⁴த்வா ‘‘துண்ஹிஸ்ஸா’’தி வா ‘‘துண்ஹஸ்ஸா’’தி வா வுச்சதி. வவத்தி²தந்தி யம் பரபதே³ன அஸம்ப³ந்த⁴ம் கத்வா விச்சி²ந்தி³த்வா ‘‘துண்ஹீ அஸ்ஸா’’தி வா ‘‘துண்ஹ அஸ்ஸா’’தி வா வுச்சதி. விமுத்தந்தி யம் கரணானி அனிக்³க³ஹேத்வா விஸ்ஸஜ்ஜேத்வா விவடேன முகே²ன அனுனாஸிகம் அகத்வா வுச்சதி.

தத்த² ‘‘ஸுணாது மே’’தி வத்தப்³பே³ த-காரஸ்ஸ த²-காரம் கத்வா ‘‘ஸுணாது² மே’’தி வசனம் ஸிதி²லஸ்ஸ த⁴னிதகரணம் நாம, ததா² ‘‘பத்தகல்லம் ஏஸா ஞத்தீ’’தி வத்தப்³பே³ ‘‘பத்த²கல்லம் ஏஸா ஞத்தீ²’’திஆதி³வசனம். ‘‘ப⁴ந்தே ஸங்கோ⁴’’தி வத்தப்³பே³ ப⁴-காரக⁴-காரானம் ப³-காரக³-காரே கத்வா ‘‘ப³ந்தே ஸம்கோ³’’தி வசனம் த⁴னிதஸ்ஸ ஸிதி²லகரணம் நாம. ‘‘ஸுணாது மே’’தி விவடேன முகே²ன வத்தப்³பே³ பன ‘‘ஸுணம்து மே’’தி வா ‘‘ஏஸா ஞத்தீ’’தி வத்தப்³பே³ ‘‘ஏஸம் ஞத்தீ’’தி வா அவிவடேன முகே²ன அனனுனாஸிகம் கத்வா வசனம் விமுத்தஸ்ஸ நிக்³க³ஹிதவசனம் நாம. ‘‘பத்தகல்ல’’ந்தி அவிவடேன முகே²ன அனுனாஸிகம் கத்வா வத்தப்³பே³ ‘‘பத்தகல்லா’’தி விவடேன முகே²ன அனுனாஸிகம் அகத்வா வசனம் நிக்³க³ஹிதஸ்ஸ விமுத்தவசனம் நாம. இதி ஸிதி²லே கத்தப்³பே³ த⁴னிதம், த⁴னிதே கத்தப்³பே³ ஸிதி²லம், விமுத்தே கத்தப்³பே³ நிக்³க³ஹிதம், நிக்³க³ஹிதே கத்தப்³பே³ விமுத்தந்தி இமானி சத்தாரி ப்³யஞ்ஜனானி அந்தோகம்மவாசாய கம்மம் தூ³ஸேந்தி. ஏவம் வத³ந்தோ ஹி அஞ்ஞஸ்மிம் அக்க²ரே வத்தப்³பே³ அஞ்ஞம் வத³தி, து³ருத்தம் கரோதீதி வுச்சதி.

இதரேஸு பன தீ³க⁴ரஸ்ஸாதீ³ஸு ச²ஸு ப்³யஞ்ஜனேஸு தீ³க⁴ட்டா²னே தீ³க⁴மேவ, ரஸ்ஸட்டா²னே ரஸ்ஸமேவாதி ஏவம் யதா²டா²னே தம் ததே³வ அக்க²ரம் பா⁴ஸந்தேன அனுக்கமாக³தம் பவேணிம் அவினாஸேந்தேன கம்மவாசா காதப்³பா³. ஸசே பன ஏவம் அகத்வா தீ³கே⁴ வத்தப்³பே³ ரஸ்ஸம், ரஸ்ஸே வா வத்தப்³பே³ தீ³க⁴ம் வத³தி, ததா² க³ருகே வத்தப்³பே³ லஹுகம், லஹுகே வா வத்தப்³பே³ க³ருகம் வத³தி, ஸம்ப³ந்தே⁴ வா பன வத்தப்³பே³ வவத்தி²தம், வவத்தி²தே வா வத்தப்³பே³ ஸம்ப³ந்த⁴ம் வத³தி, ஏவம் வுத்தேபி கம்மவாசா ந குப்பதி. இமானி ஹி ச² ப்³யஞ்ஜனானி கம்மம் ந கோபேந்தி. யம் பன ஸுத்தந்திகத்தே²ரா ‘‘த³-காரோ த-காரமாபஜ்ஜதி, த-காரோ த³-காரமாபஜ்ஜதி, ச-காரோ ஜ-காரமாபஜ்ஜதி, ஜ-காரோ ச-காரமாபஜ்ஜதி, ய-காரோ க-காரமாபஜ்ஜதி, க-காரோ ய-காரமாபஜ்ஜதி, தஸ்மா த³-காராதீ³ஸு வத்தப்³பே³ஸு த-காராதி³வசனம் ந விருஜ்ஜ²தீ’’தி வத³ந்தி, தம் கம்மவாசம் பத்வா ந வட்டதி. தஸ்மா வினயத⁴ரேன நேவ த³-காரோ த-காரோ காதப்³போ³…பே… ந க-காரோ ய-காரோ. யதா²பாளியா நிருத்திம் ஸோதே⁴த்வா த³ஸவிதா⁴ய ப்³யஞ்ஜனனிருத்தியா வுத்ததோ³ஸே பரிஹரந்தேன கம்மவாசா காதப்³பா³. இதரதா² ஹி ஸாவனம் ஹாபேதி நாம.

அகாலே வா ஸாவேதீதி ஸாவனாய அகாலே அனோகாஸே ஞத்திம் அட்ட²பேத்வா பட²மம்யேவ அனுஸ்ஸாவனகம்மம் கத்வா பச்சா² ஞத்திம் ட²பேதி. இதி இமேஹி பஞ்சஹாகாரேஹி அனுஸ்ஸாவனதோ கம்மானி விபஜ்ஜந்தி.

253. ஸீமதோ விபத்தியம் பன அதிகு²த்³த³கஸீமா நாம யா ஏகவீஸதி பி⁴க்கூ² ந க³ண்ஹாதி. குருந்தி³யம் பன ‘‘யத்த² ஏகவீஸதி பி⁴க்கூ² நிஸீதி³தும் ந ஸக்கோந்தீ’’தி வுத்தம். தஸ்மா யா ஏவரூபா ஸீமா, அயம் ஸம்மதாபி அஸம்மதா கா³மகே²த்தஸதி³ஸாவ ஹோதி, தத்த² கதம் கம்மம் குப்பதி. ஏஸ நயோ ஸேஸஸீமாஸுபி. ஏத்த² பன அதிமஹதீ நாம யா கேஸக்³க³மத்தேனபி தியோஜனம் அதிக்கமித்வா ஸம்மதா ஹோதி. க²ண்ட³னிமித்தா நாம அக⁴டிதனிமித்தா வுச்சதி. புரத்தி²மாய தி³ஸாய நிமித்தம் கித்தேத்வா அனுக்கமேனேவ த³க்கி²ணாய பச்சி²மாய உத்தராய தி³ஸாய கித்தேத்வா புன புரத்தி²மாய தி³ஸாய புப்³ப³கித்திதம் நிமித்தம் படிகித்தேத்வா ட²பேதும் வட்டதி, ஏவம் அக²ண்ட³னிமித்தா ஹோதி. ஸசே பன அனுக்கமேன ஆஹரித்வா உத்தராய தி³ஸாய நிமித்தம் கித்தேத்வா தத்தே²வ ட²பேதி, க²ண்ட³னிமித்தா ஹோதி. அபராபி க²ண்ட³னிமித்தா நாம யா அனிமித்துபக³ம் தசஸாரருக்க²ம் வா கா²ணுகம் வா பம்ஸுபுஞ்ஜம் வா வாலுகபுஞ்ஜம் வா அஞ்ஞதரம் அந்தரா ஏகம் நிமித்தம் கத்வா ஸம்மதா ஹோதி. சா²யானிமித்தா நாம யா பப்³ப³தச்சா²யாதீ³னம் யம் கிஞ்சி சா²யம் நிமித்தம் கத்வா ஸம்மதா ஹோதி. அனிமித்தா நாம யா ஸப்³பே³ன ஸப்³ப³ம் நிமித்தானி அகித்தேத்வா ஸம்மதா ஹோதி. ப³ஹிஸீமே டி²தோ ஸீமம் ஸம்மன்னதி நாம நிமித்தானி கித்தேத்வா நிமித்தானம் ப³ஹி டி²தோ ஸம்மன்னதி. நதி³யா ஸமுத்³தே³ ஜாதஸ்ஸரே ஸீமம் ஸம்மன்னதீதி ஏதேஸு நதீ³ஆதீ³ஸு யம் ஸம்மன்னதி, ஸா ஏவம் ஸம்மதாபி ‘‘ஸப்³பா³, பி⁴க்க²வே, நதீ³ அஸீமா, ஸப்³போ³ ஸமுத்³தோ³ அஸீமோ, ஸப்³போ³ ஜாதஸ்ஸரோ அஸீமோ’’தி (மஹாவ. 147) வசனதோ அஸம்மதாவ ஹோதி. ஸீமாய ஸீமம் ஸம்பி⁴ந்த³தீதி அத்தனோ ஸீமாய பரேஸம் ஸீமம் ஸம்பி⁴ந்த³தி. ஸீமாய ஸீமம் அஜ்ஜோ²த்த²ரதீதி அத்தனோ ஸீமாய பரேஸம் ஸீமம் அஜ்ஜோ²த்த²ரதி. தத்த² யதா² ஸம்பே⁴தோ³ ச அஜ்ஜோ²த்த²ரணஞ்ச ஹோதி, தம் ஸப்³ப³ம் ஸீமாகதா²யம் வுத்தமேவ. இதி இமா ஏகாத³ஸபி ஸீமா அஸீமா கா³மகே²த்தஸதி³ஸா ஏவ, தாஸு நிஸீதி³த்வா கதம் கம்மம் குப்பதி. தேன வுத்தம் ‘‘இமேஹி ஏகாத³ஸஹி ஆகாரேஹி ஸீமதோ கம்மானி விபஜ்ஜந்தீ’’தி.

பரிஸதோ கம்மவிபத்தியம் பன கிஞ்சி அனுத்தானம் நாம நத்தி². யம்பி தத்த² கம்மப்பத்தச²ந்தா³ரஹலக்க²ணம் வத்தப்³ப³ம் ஸியா, தம்பி பரதோ ‘‘சத்தாரோ பி⁴க்கூ² பகதத்தா கம்மப்பத்தா’’திஆதி³னா நயேன வுத்தமேவ. தத்த² பகதத்தா கம்மப்பத்தாதி சதுவக்³க³கரணே கம்மே சத்தாரோ பகதத்தா அனுக்கி²த்தா அனிஸ்ஸாரிதா பரிஸுத்³த⁴ஸீலா சத்தாரோ பி⁴க்கூ² கம்மப்பத்தா கம்மஸ்ஸ அரஹா அனுச்ச²விகா ஸாமினோ. ந தேஹி வினா தம் கம்மம் கரீயதி, ந தேஸம் ச²ந்தோ³ வா பாரிஸுத்³தி⁴ வா ஏதி, அவஸேஸா பன ஸசேபி ஸஹஸ்ஸமத்தா ஹோந்தி, ஸசே ஸமானஸம்வாஸகா ஸப்³பே³ ச²ந்தா³ரஹாவ ஹோந்தி, ச²ந்த³பாரிஸுத்³தி⁴ம் த³த்வா ஆக³ச்ச²ந்து வா மா வா, கம்மம் பன திட்ட²தி. யஸ்ஸ பன ஸங்கோ⁴ பரிவாஸாதி³கம்மம் கரோதி, ஸோ நேவ கம்மப்பத்தோ நாபி ச²ந்தா³ரஹோ, அபிச யஸ்மா தம் புக்³க³லம் வத்து²ம் கத்வா ஸங்கோ⁴ கம்மம் கரோதி, தஸ்மா கம்மாரஹோதி வுச்சதி. ஸேஸகம்மேஸுபி ஏஸேவ நயோ.

254. அபலோகனகம்மம் கதமானி பஞ்ச டா²னானி க³ச்ச²தி, ஓஸாரணம் நிஸ்ஸாரணம் ப⁴ண்டு³கம்மம் ப்³ரஹ்மத³ண்ட³ம் கம்மலக்க²ணஞ்ஞேவ பஞ்சமந்தி ஏத்த² ‘‘ஓஸாரணம் நிஸ்ஸாரண’’ந்தி பத³ஸிலிட்ட²தாயேதம் வுத்தம், பட²மம் பன நிஸ்ஸாரணா ஹோதி, பச்சா² ஓஸாரணா. தத்த² யா ஸா கண்டகஸ்ஸ ஸாமணேரஸ்ஸ த³ண்ட³கம்மனாஸனா, ஸா நிஸ்ஸாரணாதி வேதி³தப்³பா³. தஸ்மா ஏதரஹி ஸசேபி ஸாமணேரோ பு³த்³த⁴ஸ்ஸ வா த⁴ம்மஸ்ஸ வா ஸங்க⁴ஸ்ஸ வா அவண்ணம் ப⁴ணதி, அகப்பியம் ‘‘கப்பிய’’ந்தி தீ³பேதி, மிச்சா²தி³ட்டி²கோ ஹோதி, அந்தக்³கா³ஹிகாய தி³ட்டி²யா ஸமன்னாக³தோ, ஸோ யாவததியம் நிவாரேத்வா தம் லத்³தி⁴ம் விஸ்ஸஜ்ஜாபேதப்³போ³. நோ சே விஸ்ஸஜ்ஜேதி, ஸங்க⁴ம் ஸன்னிபாதேத்வா ‘‘விஸ்ஸஜ்ஜேஹீ’’தி வத்தப்³போ³. நோ சே விஸ்ஸஜ்ஜேதி, ப்³யத்தேன பி⁴க்கு²னா அபலோகனகம்மம் கத்வா நிஸ்ஸாரேதப்³போ³. ஏவஞ்ச பன கம்மம் காதப்³ப³ம் –

‘‘ஸங்க⁴ம், ப⁴ந்தே, புச்சா²மி ‘அயம் இத்த²ன்னாமோ ஸாமணேரோ பு³த்³த⁴ஸ்ஸ த⁴ம்மஸ்ஸ ஸங்க⁴ஸ்ஸ அவண்ணவாதீ³ மிச்சா²தி³ட்டி²கோ, யம் அஞ்ஞே ஸாமணேரா லப⁴ந்தி தி³ரத்ததிரத்தம் பி⁴க்கூ²ஹி ஸத்³தி⁴ம் ஸஹஸேய்யம், தஸ்ஸா அலாபா⁴ய நிஸ்ஸாரணா ருச்சதி ஸங்க⁴ஸ்ஸா’தி. து³தியம்பி. ததியம்பி ப⁴ந்தே ஸங்க⁴ம் புச்சா²மி ‘அயம் இத்த²ன்னாமோ ஸாமணேரோ…பே… ருச்சதி ஸங்க⁴ஸ்ஸா’தி, சர பிரே வினஸ்ஸா’’தி.

ஸோ அபரேன ஸமயேன ‘‘அஹம், ப⁴ந்தே, பா³லதாய அஞாணதாய அலக்கி²கதாய ஏவம் அகாஸிம், ஸ்வாஹம் ஸங்க⁴ம் க²மாபேமீ’’தி க²மாபேந்தோ யாவததியம் யாசாபேத்வா அபலோகனகம்மேனேவ ஓஸாரேதப்³போ³, ஏவஞ்ச பன ஓஸாரேதப்³போ³. ஸங்க⁴மஜ்ஜே² ப்³யத்தேன பி⁴க்கு²னா ஸங்க⁴ஸ்ஸ அனுமதியா ஸாவேதப்³ப³ம் –

‘‘ஸங்க⁴ம், ப⁴ந்தே, புச்சா²மி ‘அயம் இத்த²ன்னாமோ ஸாமணேரோ பு³த்³த⁴ஸ்ஸ த⁴ம்மஸ்ஸ ஸங்க⁴ஸ்ஸ அவண்ணவாதீ³ மிச்சா²தி³ட்டி²கோ, யம் அஞ்ஞே ஸாமணேரா லப⁴ந்தி தி³ரத்ததிரத்தம் பி⁴க்கூ²ஹி ஸத்³தி⁴ம் ஸஹஸேய்யம், தஸ்ஸா அலாபா⁴ய நிஸ்ஸாரிதோ, ஸ்வாயம் இதா³னி ஸோரதோ நிவாதவுத்தி லஜ்ஜித⁴ம்மம் ஓக்கந்தோ ஹிரோத்தப்பே பதிட்டி²தோ கதத³ண்ட³கம்மோ அச்சயம் தே³ஸேதி, இமஸ்ஸ ஸாமணேரஸ்ஸ யதா² புரே காயஸம்போ⁴க³ஸாமக்³கி³தா³னம் ருச்சதி ஸங்க⁴ஸ்ஸா’’’தி.

ஏவம் திக்க²த்தும் வத்தப்³ப³ம். ஏவம் அபலோகனகம்மம் ஓஸாரணஞ்ச நிஸ்ஸாரணஞ்ச க³ச்ச²தி. ப⁴ண்டு³கம்மம் பப்³ப³ஜ்ஜாவினிச்ச²யகதா²ய வுத்தமேவ.

ப்³ரஹ்மத³ண்டோ³ பன ந கேவலம் ச²ன்னஸ்ஸேவ பஞ்ஞத்தோ, யோ அஞ்ஞோபி பி⁴க்கு² முக²ரோ ஹோதி, பி⁴க்கூ² து³ருத்தவசனேஹி க⁴ட்டேந்தோ கு²ம்ஸேந்தோ வம்பே⁴ந்தோ விஹரதி, தஸ்ஸபி தா³தப்³போ³, ஏவஞ்ச பன தா³தப்³போ³. ஸங்க⁴மஜ்ஜே² ப்³யத்தேன பி⁴க்கு²னா ஸங்க⁴ஸ்ஸ அனுமதியா ஸாவேதப்³ப³ம் –

‘‘ப⁴ந்தே, இத்த²ன்னாமோ பி⁴க்கு² முக²ரோ, பி⁴க்கூ² து³ருத்தவசனேஹி க⁴ட்டேந்தோ கு²ம்ஸேந்தோ வம்பே⁴ந்தோ விஹரதி, ஸோ பி⁴க்கு² யம் இச்சே²ய்ய, தம் வதே³ய்ய, பி⁴க்கூ²ஹி இத்த²ன்னாமோ பி⁴க்கு² நேவ வத்தப்³போ³, ந ஓவதி³தப்³போ³ ந அனுஸாஸிதப்³போ³, ஸங்க⁴ம், ப⁴ந்தே, புச்சா²மி ‘இத்த²ன்னாமஸ்ஸ பி⁴க்கு²னோ ப்³ரஹ்மத³ண்ட³ஸ்ஸ தா³னம் ருச்சதி ஸங்க⁴ஸ்ஸா’தி. து³தியம்பி புச்சா²மி…பே… ததியம்பி புச்சா²மி ‘இத்த²ன்னாமஸ்ஸ பி⁴க்கு²னோ ப்³ரஹ்மத³ண்ட³ஸ்ஸ தா³னம் ருச்சதி ஸங்க⁴ஸ்ஸா’’’தி.

தஸ்ஸ அபரேன ஸமயேன ஸம்மா வத்தித்வா க²மாபேந்தஸ்ஸ ப்³ரஹ்மத³ண்டோ³ படிப்பஸ்ஸம்பே⁴தப்³போ³, ஏவஞ்ச பன படிப்பஸ்ஸம்பே⁴தப்³போ³. ப்³யத்தேன பி⁴க்கு²னா ஸங்க⁴மஜ்ஜே² ஸாவேதப்³ப³ம் –

‘‘ப⁴ந்தே, பி⁴க்கு²ஸங்கோ⁴ அஸுகஸ்ஸ பி⁴க்கு²னோ ப்³ரஹ்மத³ண்ட³ம் அதா³ஸி, ஸோ பி⁴க்கு² ஸோரதோ நிவாதவுத்தி லஜ்ஜித⁴ம்மம் ஓக்கந்தோ ஹிரோத்தப்பே பதிட்டி²தோ படிஸங்கா² ஆயதிம் ஸம்வரே திட்ட²தி, ஸங்க⁴ம், ப⁴ந்தே, புச்சா²மி ‘தஸ்ஸ பி⁴க்கு²னோ ப்³ரஹ்மத³ண்ட³ஸ்ஸ படிப்பஸ்ஸத்³தி⁴ ருச்சதி ஸங்க⁴ஸ்ஸா’’’தி.

ஏவம் யாவததியம் வத்வா அபலோகனகம்மேனேவ ப்³ரஹ்மத³ண்டோ³ படிப்பஸ்ஸம்பே⁴தப்³போ³தி.

கம்மலக்க²ணஞ்ஞேவ பஞ்சமந்தி யம் தம் ப⁴க³வதா பி⁴க்கு²னிக்க²ந்த⁴கே –

‘‘தேன கோ² பன ஸமயேன ச²ப்³ப³க்³கி³யா பி⁴க்கூ² பி⁴க்கு²னியோ கத்³த³மோத³கேன ஓஸிஞ்சந்தி ‘அப்பேவ நாம அம்ஹேஸு ஸாரஜ்ஜேய்யு’ந்தி, காயம் விவரித்வா பி⁴க்கு²னீனம் த³ஸ்ஸேந்தி, ஊரும் விவரித்வா பி⁴க்கு²னீனம் த³ஸ்ஸேந்தி, அங்க³ஜாதம் விவரித்வா பி⁴க்கு²னீனம் த³ஸ்ஸேந்தி. பி⁴க்கு²னியோ ஓபா⁴ஸேந்தி, பி⁴க்கு²னீஹி ஸத்³தி⁴ம் ஸம்பயோஜேந்தி ‘அப்பேவ நாம அம்ஹேஸு ஸாரஜ்ஜேய்யு’’’ந்தி (சூளவ. 411) –

இமேஸு வத்தூ²ஸு யேஸம் பி⁴க்கூ²னம் து³க்கடம் பஞ்ஞபேத்வா ‘‘அனுஜானாமி, பி⁴க்க²வே, தஸ்ஸ பி⁴க்கு²னோ த³ண்ட³கம்மம் காது’’ந்தி வத்வா ‘‘கிம் நு கோ² த³ண்ட³கம்மம் காதப்³ப³’’ந்தி ஸம்ஸயே உப்பன்னே ‘‘அவந்தி³யோ ஸோ, பி⁴க்க²வே, பி⁴க்கு² பி⁴க்கு²னிஸங்கே⁴ன காதப்³போ³’’தி ஏவம் அவந்தி³யகம்மம் அனுஞ்ஞாதம், தம் கம்மலக்க²ணஞ்ஞேவ பஞ்சமம், இமஸ்ஸ அபலோகனகம்மஸ்ஸ டா²னம் ஹோதி. தஸ்ஸ ஹி கம்மஞ்ஞேவ லக்க²ணம், ந ஓஸாரணாதீ³னி, தஸ்மா கம்மலக்க²ணந்தி வுச்சதி. தஸ்ஸ கரணம் படிப்பஸ்ஸத்³தி⁴யா ஸத்³தி⁴ம் வித்தா²ரதோ த³ஸ்ஸயிஸ்ஸாம. பி⁴க்கு²னுபஸ்ஸயே ஸன்னிபதிதஸ்ஸ பி⁴க்கு²னிஸங்க⁴ஸ்ஸ அனுமதியா ப்³யத்தாய பி⁴க்கு²னியா ஸாவேதப்³ப³ம் –

‘‘அய்யே, அஸுகோ நாம அய்யோ பி⁴க்கு²னீனம் அபாஸாதி³கம் த³ஸ்ஸேதி, ஏதஸ்ஸ அய்யஸ்ஸ அவந்தி³யகரணம் ருச்சதீ’’தி பி⁴க்கு²னிஸங்க⁴ம் புச்சா²மி. ‘அய்யே, அஸுகோ நாம அய்யோ பி⁴க்கு²னீனம் அபாஸாதி³கம் த³ஸ்ஸேதி, ஏதஸ்ஸ அய்யஸ்ஸ அவந்தி³யகரணம் ருச்சதீ’தி து³தியம்பி. ததியம்பி பி⁴க்கு²னிஸங்க⁴ம் புச்சா²மீ’’தி.

ஏவம் திக்க²த்தும் ஸாவேத்வா அபலோகனகம்மேன அவந்தி³யகம்மம் காதப்³ப³ம்.

ததோ பட்டா²ய ஸோ பி⁴க்கு² பி⁴க்கு²னீஹி ந வந்தி³தப்³போ³. ஸசே அவந்தி³யமானோ ஹிரோத்தப்பம் பச்சுபட்ட²பேத்வா ஸம்மா வத்ததி, தேன பி⁴க்கு²னியோ க²மாபேதப்³பா³. க²மாபேந்தன பி⁴க்கு²னுபஸ்ஸயம் அக³ந்த்வா விஹாரேயேவ ஸங்க⁴ம் வா க³ணம் வா ஏகம் பி⁴க்கு²ம் வா உபஸங்கமித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ‘‘அஹம், ப⁴ந்தே, படிஸங்கா² ஆயதிம் ஸம்வரே திட்டா²மி, ந புன அபாஸாதி³கம் த³ஸ்ஸேஸ்ஸாமி, பி⁴க்கு²னிஸங்கோ⁴ மய்ஹம் க²மதூ’’தி க²மாபேதப்³ப³ம். தேன ஸங்கே⁴ன வா க³ணேன வா ஏகம் பி⁴க்கு²ம் பேஸேத்வா ஏகபி⁴க்கு²னா வா ஸயமேவ க³ந்த்வா பி⁴க்கு²னியோ வத்தப்³பா³ ‘‘அயம் பி⁴க்கு² படிஸங்கா² ஆயதிம் ஸம்வரே டி²தோ, இமினா அச்சயம் தே³ஸேத்வா பி⁴க்கு²னிஸங்கோ⁴ க²மாபிதோ, பி⁴க்கு²னிஸங்கோ⁴ இமம் பி⁴க்கு²ம் வந்தி³யம் கரோதூ’’தி. ஸோ வந்தி³யோ காதப்³போ³, ஏவஞ்ச பன காதப்³போ³. பி⁴க்கு²னுபஸ்ஸயே ஸன்னிபதிதஸ்ஸ பி⁴க்கு²னிஸங்க⁴ஸ்ஸ அனுமதியா ப்³யத்தாய பி⁴க்கு²னியா ஸாவேதப்³ப³ம் –

‘‘அய்யே, அஸுகோ நாம அய்யோ பி⁴க்கு²னீனம் அபாஸாதி³கம் த³ஸ்ஸேதீதி பி⁴க்கு²னிஸங்கே⁴ன அவந்தி³யோ கதோ, ஸோ லஜ்ஜித⁴ம்மம் ஓக்கமித்வா படிஸங்கா² ஆயதிம் ஸம்வரே டி²தோ, அச்சயம் தே³ஸேத்வா பி⁴க்கு²னிஸங்க⁴ம் க²மாபேஸி, தஸ்ஸ அய்யஸ்ஸ வந்தி³யகரணம் ருச்சதீதி பி⁴க்கு²னிஸங்க⁴ம் புச்சா²மீ’’தி –

திக்க²த்தும் வத்தப்³ப³ம். ஏவம் அபலோகனகம்மேனேவ வந்தி³யோ காதப்³போ³.

255. அயம் பனேத்த² பாளிமுத்தகோபி கம்மலக்க²ணவினிச்ச²யோ (பரி. அட்ட². 495-496). இத³ஞ்ஹி கம்மலக்க²ணம் நாம பி⁴க்கு²னிஸங்க⁴மூலகம் பஞ்ஞத்தம், பி⁴க்கு²ஸங்க⁴ஸ்ஸபி பனேதம் லப்³ப⁴தியேவ. யஞ்ஹி பி⁴க்கு²ஸங்கோ⁴ ஸலாகப⁴த்தஉபோஸத²க்³கே³ஸு ச அபலோகனகம்மம் கரோதி, ஏதம்பி கம்மலக்க²ணமேவ. அச்சி²ன்னசீவரஜிண்ணசீவரனட்ட²சீவரானஞ்ஹி ஸங்க⁴ம் ஸன்னிபாதேத்வா ப்³யத்தேன பி⁴க்கு²னா யாவததியம் ஸாவேத்வா அபலோகனகம்மம் கத்வா சீவரம் தா³தும் வட்டதி. அப்பமத்தகவிஸ்ஸஜ்ஜகேன பன சீவரம் கரோந்தஸ்ஸ பச்சயபா⁴ஜனீயகதா²யம் வுத்தப்பபே⁴தா³னி ஸூசிஆதீ³னி அனபலோகேத்வாபி தா³தப்³பா³னி. தேஸம் தா³னே ஸோயேவ இஸ்ஸரோ, ததோ அதிரேகம் தே³ந்தேன அபலோகேத்வா தா³தப்³ப³ம். ததோ ஹி அதிரேகதா³னே ஸங்கோ⁴ ஸாமீ. கி³லானபே⁴ஸஜ்ஜம்பி தத்த² வுத்தப்பகாரம் ஸயமேவ தா³தப்³ப³ம், அதிரேகம் இச்ச²ந்தஸ்ஸ அபலோகேத்வா தா³தப்³ப³ம். யோபி ச து³ப்³ப³லோ வா சி²ன்னிரியாபதோ² வா பச்சி²ன்னபி⁴க்கா²சாரபதோ² வா மஹாகி³லானோ, தஸ்ஸ மஹாவாஸேஸு தத்ருப்பாத³தோ தே³வஸிகம் நாளி வா உபட்³ட⁴னாளி வா, ஏகதி³வஸம்யேவ வா பஞ்ச வா த³ஸ வா தண்டு³லனாளியோ தே³ந்தேன அபலோகனகம்மம் கத்வாவ தா³தப்³பா³. பேஸலஸ்ஸ பி⁴க்கு²னோ தத்ருப்பாத³தோ இணபலிபோ³த⁴ம்பி ப³ஹுஸ்ஸுதஸ்ஸ ஸங்க⁴பா⁴ரனித்த²ரகஸ்ஸ பி⁴க்கு²னோ அனுட்டா²பனீயஸேனாஸனம்பி ஸங்க⁴கிச்சம் கரோந்தானம் கப்பியகாரகாதீ³னம் ப⁴த்தவேதனம்பி அபலோகனகம்மேன தா³தும் வட்டதி.

சதுபச்சயவஸேன தி³ன்னதத்ருப்பாத³தோ ஸங்கி⁴கம் ஆவாஸம் ஜக்³கா³பேதும் வட்டதி, ‘‘அயம் பி⁴க்கு² இஸ்ஸரவதாய விசாரேதீ’’தி கதா²பச்சி²ந்த³னத்த²ம் பன ஸலாகக்³கா³தீ³ஸு வா அந்தரஸன்னிபாதே வா ஸங்க⁴ம் ஆபுச்சி²த்வாவ ஜக்³கா³பேதப்³போ³. சீவரபிண்ட³பாதத்தா²ய ஓதி³ஸ்ஸ தி³ன்னதத்ருப்பாத³தோபி அபலோகேத்வா ஆவாஸோ ஜக்³கா³பேதப்³போ³, அனபலோகேத்வாபி வட்டதி, ‘‘ஸூரோ வதாயம் பி⁴க்கு² சீவரபிண்ட³பாதத்தா²ய ஓதி³ஸ்ஸ தி³ன்னதோ ஆவாஸம் ஜக்³கா³பேதீ’’தி ஏவம் உப்பன்னகதா²பச்சே²த³னத்த²ம் பன அபலோகனகம்மமேவ கத்வா ஜக்³கா³பேதப்³போ³.

சேதியே ச²த்தம் வா வேதி³கம் வா போ³தி⁴க⁴ரம் வா ஆஸனக⁴ரம் வா அகதம் வா கரோந்தேன ஜிண்ணம் வா படிஸங்க²ரோந்தேன ஸுதா⁴கம்மம் வா கரோந்தேன மனுஸ்ஸே ஸமாத³பேத்வா காதும் வட்டதி. ஸசே காரகோ நத்தி², சேதியஸ்ஸ உபனிக்கே²பதோ காரேதப்³ப³ம். உபனிக்கே²பேபி அஸதி அபலோகனகம்மம் கத்வா தத்ருப்பாத³தோ காரேதப்³ப³ம், ஸங்கி⁴கேனபி அபலோகேத்வா சேதியகிச்சம் காதும் வட்டதி. சேதியஸ்ஸ ஸந்தகேன அபலோகேத்வாபி ஸங்கி⁴ககிச்சம் ந வட்டதி, தாவகாலிகம் பன க³ஹேத்வா படிபாகதிகம் காதும் வட்டதி. சேதியே ஸுதா⁴கம்மாதீ³னி கரோந்தேஹி பன பி⁴க்கா²சாரதோ வா ஸங்க⁴தோ வா யாபனமத்தம் அலப⁴ந்தேஹி சேதியஸந்தகதோ யாபனமத்தம் க³ஹேத்வா பரிபு⁴ஞ்ஜந்தேஹி வத்தம் காதும் வட்டதி, ‘‘வத்தம் கரோமா’’தி மச்ச²மம்ஸாதீ³ஹி ஸங்க⁴ப⁴த்தம் காதும் ந வட்டதி.

யே விஹாரே ரோபிதா ப²லருக்கா² ஸங்கே⁴ன பரிக்³க³ஹிதா ஹோந்தி, ஜக்³க³னகம்மம் லப⁴ந்தி. யேஸம் ப²லானி க⁴ண்டிம் பஹரித்வா பா⁴ஜேத்வா பரிபு⁴ஞ்ஜந்தி, தேஸு அபலோகனகம்மம் ந காதப்³ப³ம். யே பன அபரிக்³க³ஹிதா, தேஸு அபலோகனகம்மம் காதப்³ப³ம், தம் பன ஸலாகக்³க³யாக³க்³க³ப⁴த்தக்³க³அந்தரஸஅஆபாதேஸுபி காதும் வட்டதி, உபோஸத²க்³கே³ பன வட்டதியேவ. தத்த² ஹி அனாக³தானம்பி ச²ந்த³பாரிஸுத்³தி⁴ ஆஹரீயதி, தஸ்மா தம் ஸுவிஸோதி⁴தம் ஹோதி. ஏவஞ்ச பன காதப்³ப³ம், ப்³யத்தேன பி⁴க்கு²னா பி⁴க்கு²ஸங்க⁴ஸ்ஸ அனுமதியா ஸாவேதப்³ப³ம் –

‘‘ப⁴ந்தே, யம் இமஸ்மிம் விஹாரே அந்தோஸீமாய ஸங்க⁴ஸந்தகம் மூலதசபத்தஅங்குரபுப்ப²ப²லகா²த³னீயாதி³ அத்தி², தம் ஸப்³ப³ம் ஆக³தாக³தானம் பி⁴க்கூ²னம் யதா²ஸுக²ம் பரிபு⁴ஞ்ஜிதும் ருச்சதீதி ஸங்க⁴ம் புச்சா²மீ’’தி –

திக்க²த்தும் புச்சி²தப்³ப³ம்.

சதூஹி பஞ்சஹி பி⁴க்கூ²ஹி கதம் ஸுகதமேவ. யஸ்மிம்பி விஹாரே த்³வே தயோ ஜனா வஸந்தி, தேஹி நிஸீதி³த்வா கதம்பி ஸங்கே⁴ன கதஸதி³ஸமேவ. யஸ்மிம் பன ஏகோ பி⁴க்கு² ஹோதி, தேன பி⁴க்கு²னா உபோஸத²தி³வஸே புப்³ப³கரணபுப்³ப³கிச்சம் கத்வா நிஸின்னேன கதம்பி கதிகவத்தம் ஸங்கே⁴ன கதஸதி³ஸமேவ ஹோதி. கரோந்தேன பன ப²லவாரேன காதும்பி சத்தாரோ மாஸே ச² மாஸே ஏகஸம்வச்ச²ரந்தி ஏவம் பரிச்சி²ந்தி³த்வாபி அபரிச்சி²ந்தி³த்வாபி காதும் வட்டதி. பரிச்சி²ன்னே யதா²பரிச்சே²த³ம் பரிபு⁴ஞ்ஜித்வா புன காதப்³ப³ம். அபரிச்சி²ன்னே யாவ ருக்கா² த⁴ரந்தி, தாவ வட்டதி. யேபி தேஸம் ருக்கா²னம் பீ³ஜேஹி அஞ்ஞே ருக்கா² ரோபிதா ஹோந்தி, தேஸம்பி ஸா ஏவ கதிகா.

ஸசே பன அஞ்ஞஸ்மிம் விஹாரே ரோபிதா ஹோந்தி, தேஸம் யத்த² ரோபிதா, தஸ்மிம்யேவ விஹாரே ஸங்கோ⁴ ஸாமீ. யேபி அஞ்ஞதோ பீ³ஜானி ஆஹரித்வா புரிமவிஹாரே பச்சா² ரோபிதா, தேஸு அஞ்ஞா கதிகா காதப்³பா³, கதிகாய கதாய புக்³க³லிகட்டா²னே திட்ட²ந்தி, யதா²ஸுக²ம் ப²லாதீ³னி பரிபு⁴ஞ்ஜிதும் வட்டந்தி. ஸசே பனேத்த² தம் தம் ஓகாஸம் பரிக்கி²பித்வா பரிவேணானி கத்வா ஜக்³க³ந்தி, தேஸம் பி⁴க்கூ²னம் புக்³க³லிகட்டா²னே திட்ட²ந்தி, அஞ்ஞே பரிபு⁴ஞ்ஜிதும் ந லப⁴ந்தி. தேஹி பன ஸங்க⁴ஸ்ஸ த³ஸமபா⁴க³ம் த³த்வா பரிபு⁴ஞ்ஜிதப்³பா³னி. யோபி மஜ்ஜே²விஹாரே ருக்க²ம் ஸாகா²ஹி பரிவாரேத்வா ரக்க²தி, தஸ்ஸபி ஏஸேவ நயோ.

போராணகவிஹாரம் க³தஸ்ஸ ஸம்பா⁴வனீயபி⁴க்கு²னோ ‘‘தே²ரோ ஆக³தோ’’தி ப²லாப²லம் ஆஹரந்தி, ஸசே தத்த² மூலே ஸப்³ப³பரியத்தித⁴ரோ ப³ஹுஸ்ஸுதபி⁴க்கு² விஹாஸி, ‘‘அத்³தா⁴ ஏத்த² தீ³கா⁴ கதிகா கதா ப⁴விஸ்ஸதீ’’தி நிக்குக்குச்சேன பரிபு⁴ஞ்ஜிதப்³ப³ம். விஹாரே ப²லாப²லம் பிண்ட³பாதிகானம்பி வட்டதி, து⁴தங்க³ம் ந கோபேதி. ஸாமணேரா அத்தனோ ஆசரியுபஜ்ஜா²யானம் ப³ஹூனி ப²லானி தே³ந்தி, அஞ்ஞே பி⁴க்கூ² அலப⁴ந்தா கி²ய்யந்தி, கி²ய்யனமத்தமேவ தம் ஹோதி. ஸசே து³ப்³பி⁴க்க²ம் ஹோதி, ஏகம் பனஸருக்க²ம் நிஸ்ஸாய ஸட்டி²பி ஜனா ஜீவந்தி, தாதி³ஸே காலே ஸப்³பே³ஸம் ஸங்க³ஹகரணத்தா²ய பா⁴ஜேத்வா கா²தி³தப்³ப³ம். அயம் ஸாமீசி. யாவ பன கதிகவத்தம் ந படிப்பஸ்ஸம்ப⁴தி, தாவ தேஹி கா²யிதம் ஸுகா²யிதமேவ. கதா³ பன கதிகவத்தம் படிப்பஸ்ஸம்ப⁴தி? யதா³ ஸமக்³கோ³ ஸங்கோ⁴ ஸன்னிபதித்வா ‘‘இதோ பட்டா²ய பா⁴ஜேத்வா கா²த³ந்தூ’’தி ஸாவேபி⁴, ஏகபி⁴க்கு²கே பன விஹாரே ஏதேன ஸாவிதேபி புரிமகதிகா படிப்பஸ்ஸம்ப⁴தியேவ. ஸசே படிப்பஸ்ஸத்³தா⁴ய கதிகாய ஸாமணேரா நேவ ருக்க²தோ பாதேந்தி, ந பூ⁴மிதோ க³ஹேத்வா பி⁴க்கூ²னம் தே³ந்தி, பதிதப²லானி பாதே³ஹி பஹரந்தா விசரந்தி, தேஸம் த³ஸமபா⁴க³தோ பட்டா²ய யாவ உபட்³ட⁴ப²லபா⁴கே³ன பா²திகம்மம் காதப்³ப³ம். அத்³தா⁴ பா²திகம்மலோபே⁴ன ஆஹரித்வா த³ஸ்ஸேந்தி, புன ஸுபி⁴க்கே² ஜாதே கப்பியகாரகேஸு ஆக³ந்த்வா ஸாகா²பரிவாராதீ³னி கத்வா ருக்கே² ரக்க²ந்தேஸு ஸாமணேரானம் பா²திகம்மம் ந காதப்³ப³ம், பா⁴ஜேத்வா பரிபு⁴ஞ்ஜிதப்³ப³ம்.

‘‘விஹாரே ப²லாப²லம் அத்தீ²’’தி ஸாமந்தகா³மேஹி மனுஸ்ஸா கி³லானானம் வா க³ப்³பி⁴னீனம் வா அத்தா²ய ஆக³ந்த்வா ‘‘ஏகம் நாளிகேரம் தே³த², அம்ப³ம் தே³த², லபு³ஜம் தே³தா²’’தி யாசந்தி, தா³தப்³ப³ம், ந தா³தப்³ப³ந்தி? தா³தப்³ப³ம். அதீ³யமானே ஹி தே தோ³மனஸ்ஸிகா ஹோந்தி. தே³ந்தேன பன ஸங்க⁴ம் ஸன்னிபாதேத்வா யாவததியம் ஸாவேத்வா அபலோகனகம்மம் கத்வாவ தா³தப்³ப³ம், கதிகவத்தம் வா கத்வா ட²பேதப்³ப³ம், ஏவஞ்ச பன காதப்³ப³ம். ப்³யத்தேன பி⁴க்கு²னா ஸங்க⁴ஸ்ஸ அனுமதியா ஸாவேதப்³ப³ம் –

‘‘ஸாமந்தகா³மேஹி மனுஸ்ஸா ஆக³ந்த்வா கி³லானாதீ³னம் அத்தா²ய ப²லாப²லம் யாசந்தி, த்³வே நாளிகேரானி த்³வே தாலப²லானி த்³வே பனஸானி பஞ்ச அம்பா³னி பஞ்ச கத³லிப²லானி க³ண்ஹந்தானம் அனிவாரணம், அஸுகருக்க²தோ ச அஸுகருக்க²தோ ச ப²லம் க³ண்ஹந்தானம் அனிவாரணம் ருச்சதி பி⁴க்கு²ஸங்க⁴ஸ்ஸா’’தி –

திக்க²த்தும் வத்தப்³ப³ம். ததோ பட்டா²ய கி³லானாதீ³னம் நாமம் க³ஹேத்வா யாசந்தா ‘‘க³ண்ஹதா²’’தி ந வத்தப்³பா³, வத்தம் பன ஆசிக்கி²தப்³ப³ம் ‘‘நாளிகேராதீ³னி இமினா நாம பரிச்சே²தே³ன க³ண்ஹந்தானம் அஸுகருக்க²தோ ச அஸுகருக்க²தோ ச ப²லம் க³ண்ஹந்தானம் அனிவாரணம் கத’’ந்தி. அனுவிசரித்வா பன ‘‘அயம் மது⁴ரப²லோ அம்போ³, இதோ க³ண்ஹதா²’’திபி ந வத்தப்³பா³.

ப²லபா⁴ஜனகாலே பன ஆக³தானம் ஸம்மதேன உபட்³ட⁴பா⁴கோ³ தா³தப்³போ³, அஸம்மதேன அபலோகேத்வா தா³தப்³ப³ம். கீ²ணபரிப்³ப³யோ வா மக்³க³க³மியஸத்த²வாஹோ வா அஞ்ஞோ வா இஸ்ஸரோ ஆக³ந்த்வா யாசதி, அபலோகேத்வாவ தா³தப்³ப³ம், ப³லக்காரேன க³ஹேத்வா கா²த³ந்தோ ந வாரேதப்³போ³. குத்³தோ⁴ ஹி ஸோ ருக்கே²பி சி²ந்தே³ய்ய, அஞ்ஞம்பி அனத்த²ம் கரேய்ய. புக்³க³லிகபரிவேணம் ஆக³ந்த்வா கி³லானஸ்ஸ நாமேன யாசந்தோ ‘‘அம்ஹேஹி சா²யாதீ³னம் அத்தா²ய ரோபிதம், ஸசே அத்தி², தும்ஹே ஜானாதா²’’தி வத்தப்³போ³. யதி³ பன ப²லப⁴ரிதாவ ருக்கா² ஹோந்தி, கண்டகே ப³ந்தி⁴த்வா ப²லவாரேன க³ண்ஹந்தி, அபச்சாஸீஸந்தேன ஹுத்வா தா³தப்³ப³ம், ப³லக்காரேன க³ண்ஹந்தோ ந வாரேதப்³போ³. புப்³பே³ வுத்தமேவேத்த² காரணம்.

ஸங்க⁴ஸ்ஸ ப²லாராமோ ஹோதி, படிஜக்³க³னம் ந லப⁴தி. ஸசே தம் கோசி வத்தஸீஸேன ஜக்³க³தி, ஸங்க⁴ஸ்ஸேவ ஹோதி. அதா²பி கஸ்ஸசி படிப³லஸ்ஸ பி⁴க்கு²னோ ‘‘இமம் ஸப்புரிஸ ஜக்³கி³த்வா தே³ஹீ’’தி ஸங்கோ⁴ பா⁴ரம் கரோதி, ஸோ சே வத்தஸீஸேன ஜக்³க³தி, ஏவம்பி ஸங்க⁴ஸ்ஸேவ ஹோதி. பா²திகம்மம் பச்சாஸீஸந்தஸ்ஸ பன ததியபா⁴கே³ன வா உபட்³ட⁴பா⁴கே³ன வா பா²திகம்மம் காதப்³ப³ம். ‘‘பா⁴ரியம் கம்ம’’ந்தி வத்வா ஏத்தகேன அனிச்ச²ந்தோ பன ‘‘ஸப்³ப³ம் தவேவ ஸந்தகம் கத்வா மூலபா⁴க³ம் த³ஸமபா⁴க³மத்தம் த³த்வா ஜக்³கா³ஹீ’’திபி வத்தப்³போ³, க³ருப⁴ண்ட³த்தா பன ந மூலச்சே²ஜ்ஜவஸேன தா³தப்³ப³ம். ஸோ மூலபா⁴க³ம் த³த்வா கா²த³ந்தோ அகதாவாஸம் வா கத்வா கதாவாஸம் வா ஜக்³கி³த்வா நிஸ்ஸிதகானம் ஆராமம் நிய்யாதேதி, தேஹிபி மூலபா⁴கோ³ தா³தப்³போ³வ.

யதா³ பன பி⁴க்கூ² ஸயம் ஜக்³கி³தும் பஹோந்தி, அத² தேஸம் ஜக்³கி³தும் ந தா³தப்³ப³ம், ஜக்³கி³தகாலே பன ந வாரேதப்³பா³, ஜக்³க³னகாலேயேவ வாரேதப்³பா³. ‘‘ப³ஹு தும்ஹேஹி கா²யிதம், இதா³னி மா ஜக்³கி³த்த², பி⁴க்கு²ஸங்கோ⁴யேவ ஜக்³கி³ஸ்ஸதீ’’தி வத்தப்³ப³ம். ஸசே பன நேவ வத்தஸீஸேன ஜக்³க³ந்தோ அத்தி², ந பா²திகம்மேன, ந ஸங்கோ⁴ ஜக்³கி³தும் பஹோதி, ஏகோ அனாபுச்சி²த்வாவ ஜக்³கி³த்வா பா²திகம்மம் வட்³டே⁴த்வா பச்சாஸீஸதி, அபலோகனகம்மேன பா²திகம்மம் வட்³டே⁴த்வாவ தா³தப்³ப³ம். இதி இமம் ஸப்³ப³ம்பி கம்மலக்க²ணமேவ ஹோதி. அபலோகனகம்மம் இமானி பஞ்ச டா²னானி க³ச்ச²தி.

256. ஞத்திகம்மட்டா²னபே⁴தே³ பன (பரி. அட்ட². 495-496) –

‘‘ஸுணாது மே, ப⁴ந்தே, ஸங்கோ⁴, இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ², அனுஸிட்டோ² ஸோ மயா, யதி³ ஸங்க⁴ஸ்ஸ பத்தகல்லம், இத்த²ன்னாமோ ஆக³ச்சே²ய்ய, ‘ஆக³ச்சா²ஹீ’தி வத்தப்³போ³’’தி –

ஏவம் உபஸம்பதா³பேக்க²ஸ்ஸ ஓஸாரணா ஓஸாரணா நாம.

‘‘ஸுணந்து மே ஆயஸ்மந்தா, அயம் இத்த²ன்னாமோ பி⁴க்கு² த⁴ம்மகதி²கோ, இமஸ்ஸ நேவ ஸுத்தம் ஆக³ச்ச²தி, நோ ஸுத்தவிப⁴ங்கோ³, ஸோ அத்த²ம் அஸல்லக்கே²த்வா ப்³யஞ்ஜனச்சா²யாய அத்த²ம் படிபா³ஹதி, யதா³யஸ்மந்தானம் பத்தகல்லம், இத்த²ன்னாமம் பி⁴க்கு²ம் வுட்டா²பேத்வா அவஸேஸா இமம் அதி⁴கரணம் வூபஸமேய்யாமா’’தி –

ஏவம் உப்³பா³ஹிகவினிச்ச²யே த⁴ம்மகதி²கஸ்ஸ பி⁴க்கு²னோ நிஸ்ஸாரணா நிஸ்ஸாரணா நாம.

‘‘ஸுணாது மே, ப⁴ந்தே, ஸங்கோ⁴, அஜ்ஜுபோஸதோ² பன்னரஸோ, யதி³ ஸங்க⁴ஸ்ஸ பத்தகல்லம், ஸங்கோ⁴ உபோஸத²ம் கரேய்யா’’தி –

ஏவம் உபோஸத²கம்மவஸேன ட²பிதா ஞத்தி உபோஸதோ² நாம.

‘‘ஸுணாது மே, ப⁴ந்தே, ஸங்கோ⁴, அஜ்ஜ பவாரணா பன்னரஸீ, யதி³ ஸங்க⁴ஸ்ஸ பத்தகல்லம், ஸங்கோ⁴ பவாரேய்யா’’தி –

ஏவம் பவாரணகம்மவஸேன ட²பிதா ஞத்தி பவாரணா நாம.

‘‘ஸுணாது மே, ப⁴ந்தே, ஸங்கோ⁴, இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பேக்கோ², யதி³ ஸங்க⁴ஸ்ஸ பத்தகல்லம், அஹம் இத்த²ன்னாமம் அனுஸாஸேய்ய’’ந்தி, ‘‘யதி³ ஸங்க⁴ஸ்ஸ பத்தகல்லம், இத்த²ன்னாமோ இத்த²ன்னாமம் அனுஸாஸேய்யா’’தி, ‘‘யதி³ ஸங்க⁴ஸ்ஸ பத்தகல்லம், அஹம் இத்த²ன்னாமம் அந்தராயிகே த⁴ம்மே புச்சே²ய்ய’’ந்தி, ‘‘யதி³ ஸங்க⁴ஸ்ஸ பத்தகல்லம், இத்த²ன்னாமோ இத்த²ன்னாமம் அந்தராயிகே த⁴ம்மே புச்சே²ய்யா’’தி, ‘‘யதி³ ஸங்க⁴ஸ்ஸ பத்தகல்லம், அஹம் இத்த²ன்னாமம் வினயம் புச்சே²ய்ய’’ந்தி, ‘‘யதி³ ஸங்க⁴ஸ்ஸ பத்தகல்லம், இத்த²ன்னாமோ இத்த²ன்னாமம் வினயம் புச்சே²ய்யா’’தி, ‘‘யதி³ ஸங்க⁴ஸ்ஸ பத்தகல்லம், அஹம் இத்த²ன்னாமேன வினயம் புட்டோ² விஸ்ஸஜ்ஜேய்ய’’ந்தி, ‘‘யதி³ ஸங்க⁴ஸ்ஸ பத்தகல்லம், இத்த²ன்னாமோ இத்த²ன்னாமேன வினயம் புட்டோ² விஸ்ஸஜ்ஜேய்யா’’தி –

ஏவம் அத்தானம் வா பரம் வா ஸம்மன்னிதும் ட²பிதா ஞத்தி ஸம்முதி நாம.

‘‘ஸுணாது மே, ப⁴ந்தே, ஸங்கோ⁴, இத³ம் சீவரம் இத்த²ன்னாமஸ்ஸ பி⁴க்கு²னோ நிஸ்ஸக்³கி³யம் ஸங்க⁴ஸ்ஸ நிஸ்ஸட்ட²ம், யதி³ ஸங்க⁴ஸ்ஸ பத்தகல்லம், ஸங்கோ⁴ இமம் சீவரம் இத்த²ன்னாமஸ்ஸ பி⁴க்கு²னோ த³தே³ய்யா’’தி, ‘‘யதா³யஸ்மந்தானம் பத்தகல்லம், ஆயஸ்மந்தா இமம் சீவரம் இத்த²ன்னாமஸ்ஸ பி⁴க்கு²னோ த³தே³ய்யு’’ந்தி –

ஏவம் நிஸ்ஸட்ட²சீவரபத்தாதீ³னம் தா³னம் தா³னம் நாம.

‘‘ஸுணாது மே, ப⁴ந்தே, ஸங்கோ⁴, அயம் இத்த²ன்னாமோ பி⁴க்கு² ஆபத்திம் ஸரதி விவரதி உத்தானிம் கரோதி தே³ஸேதி, யதி³ ஸங்க⁴ஸ்ஸ பத்தகல்லம், அஹம் இத்த²ன்னாமஸ்ஸ பி⁴க்கு²னோ ஆபத்திம் படிக்³க³ண்ஹேய்ய’’ந்தி, ‘‘யதா³யஸ்மந்தானம் பத்தகல்லம், அஹம் இத்த²ன்னாமஸ்ஸ பி⁴க்கு²னோ ஆபத்திம் படிக்³க³ண்ஹேய்ய’’ந்தி, தேன வத்தப்³போ³ ‘‘பஸ்ஸஸீ’’தி. ஆம, பஸ்ஸாமீதி. ‘‘ஆயதிம் ஸம்வரேய்யாஸீ’’தி –

ஏவம் ஆபத்திபடிக்³க³ஹோ படிக்³க³ஹோ நாம.

‘‘ஸுணந்து மே ஆயஸ்மந்தா ஆவாஸிகா, யதா³யஸ்மந்தானம் பத்தகல்லம், இதா³னி உபோஸத²ம் கரேய்யாம, பாதிமோக்க²ம் உத்³தி³ஸேய்யாம, ஆக³மே காளே பவாரேய்யாமா’’தி.

தே சே, பி⁴க்க²வே, பி⁴க்கூ² ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா தம் காளம் அனுவஸேய்யும், ஆவாஸிகேன பி⁴க்கு²னா ப்³யத்தேன படிப³லேன ஆவாஸிகா பி⁴க்கூ² ஞாபேதப்³பா³ –

‘‘ஸுணந்து மே ஆயஸ்மந்தா ஆவாஸிகா, யதா³யஸ்மந்தானம் பத்தகல்லம், இதா³னி உபோஸத²ம் கரேய்யாம, பாதிமோக்க²ம் உத்³தி³ஸேய்யாம, ஆக³மே ஜுண்ஹே பவாரேய்யாமா’’தி –

ஏவம் கதா பவாரணாபச்சுக்கட்³ட⁴னா பச்சுக்கட்³ட⁴னா நாம.

ஸப்³பே³ஹேவ ஏகஜ்ஜ²ம் ஸன்னிபதிதப்³ப³ம், ஸன்னிபதித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴, அம்ஹாகம் ப⁴ண்ட³னஜாதானம் கலஹஜாதானம் விவாதா³பன்னானம் விஹரதம் ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம், ஸசே மயம் இமாஹி ஆபத்தீஹி அஞ்ஞமஞ்ஞம் காரேஸ்ஸாம, ஸியாபி தம் அதி⁴கரணம் கக்க²ளத்தாய வாளத்தாய பே⁴தா³ய ஸம்வத்தேய்ய, யதி³ ஸங்க⁴ஸ்ஸ பத்தகல்லம், ஸங்கோ⁴ இமம் அதி⁴கரணம் திணவத்தா²ரகேன வூபஸமேய்ய ட²பேத்வா து²ல்லவஜ்ஜம் ட²பேத்வா கி³ஹிப்படிஸம்யுத்த’’ந்தி –

ஏவம் திணவத்தா²ரகஸமதே²ன கத்வா ஸப்³ப³பட²மா ஸப்³ப³ஸங்கா³ஹிகஞத்தி கம்மலக்க²ணம் நாம.

ததா² ததோ பரா ஏகேகஸ்மிம் பக்கே² ஏகேகம் கத்வா த்³வே ஞத்தியோ. இதி யதா²வுத்தப்பபே⁴த³ம் ஓஸாரணம் நிஸ்ஸாரணம்…பே… கம்மலக்க²ணஞ்ஞேவ நவமந்தி ஞத்திகம்மம் இமானி நவ டா²னானி க³ச்ச²தி.

257. ஞத்திது³தியகம்மட்டா²னபே⁴தே³ (பரி. அட்ட². 495-496) பன வட்³ட⁴ஸ்ஸ லிச்ச²வினோ பத்தனிக்குஜ்ஜனவஸேன க²ந்த⁴கே வுத்தா நிஸ்ஸாரணா, தஸ்ஸேவ பத்துக்குஜ்ஜனவஸேன க²ந்த⁴கே வுத்தா ஓஸாரணா ச வேதி³தப்³பா³. வுத்தஞ்ஹேதம் (சூளவ. 265-266) –

‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ உபாஸகஸ்ஸ பத்தோ நிக்குஜ்ஜிதப்³போ³. பி⁴க்கூ²னம் அலாபா⁴ய பரிஸக்கதி, பி⁴க்கூ²னம் அனத்தா²ய பரிஸக்கதி, பி⁴க்கூ²னம் அவாஸாய பரிஸக்கதி, பி⁴க்கூ² அக்கோஸதி பரிபா⁴ஸதி, பி⁴க்கூ² பி⁴க்கூ²ஹி பே⁴தே³தி, பு³த்³த⁴ஸ்ஸ அவண்ணம் பா⁴ஸதி, த⁴ம்மஸ்ஸ அவண்ணம் பா⁴ஸதி, ஸங்க⁴ஸ்ஸ அவண்ணம் பா⁴ஸதி. அனுஜானாமி, பி⁴க்க²வே, இமேஹி அட்ட²ஹி அங்கே³ஹி ஸமன்னாக³தஸ்ஸ உபாஸகஸ்ஸ பத்தம் நிக்குஜ்ஜிதும்.

ஏவஞ்ச பன பி⁴க்க²வே நிக்குஜ்ஜிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴, வட்³டோ⁴ லிச்ச²வீ ஆயஸ்மந்தம் த³ப்³ப³ம் மல்லபுத்தம் அமூலிகாய ஸீலவிபத்தியா அனுத்³த⁴ம்ஸேதி, யதி³ ஸங்க⁴ஸ்ஸ பத்தகல்லம், ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தம் நிக்குஜ்ஜேய்ய, அஸம்போ⁴க³ம் ஸங்கே⁴ன கரேய்ய, ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴, வட்³டோ⁴ லிச்ச²வீ ஆயஸ்மந்தம் த³ப்³ப³ம் மல்லபுத்தம் அமூலிகாய ஸீலவிபத்தியா அனுத்³த⁴ம்ஸேதி, ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தம் நிக்குஜ்ஜதி, அஸம்போ⁴க³ம் ஸங்கே⁴ன கரோதி, யஸ்ஸாயஸ்மதோ க²மதி வட்³ட⁴ஸ்ஸ லிச்ச²விஸ்ஸ பத்தஸ்ஸ நிக்குஜ்ஜனா அஸம்போ⁴க³ம் ஸங்கே⁴ன கரணம், ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸேய்ய.

‘‘நிக்குஜ்ஜிதோ ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ அஸம்போ⁴கோ³ ஸங்கே⁴ன, க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ உபாஸகஸ்ஸ பத்தோ உக்குஜ்ஜிதப்³போ³. ந பி⁴க்கூ²னம் அலாபா⁴ய பரிஸக்கதி, ந பி⁴க்கூ²னம் அனத்தா²ய பரிஸக்கதி…பே… ந ஸங்க⁴ஸ்ஸ அவண்ணம் பா⁴ஸதி. அனுஜானாமி, பி⁴க்க²வே, இமேஹி அட்ட²ஹி அங்கே³ஹி ஸமன்னாக³தஸ்ஸ உபாஸகஸ்ஸ பத்தம் உக்குஜ்ஜிதும்.

ஏவஞ்ச பன, பி⁴க்க²வே, உக்குஜ்ஜிதப்³போ³. தேன, பி⁴க்க²வே, வட்³டே⁴ன லிச்ச²வினா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ –

‘‘ஸங்கே⁴ன மே, ப⁴ந்தே, பத்தோ நிக்குஜ்ஜிதோ, அஸம்போ⁴கோ³ம்ஹி ஸங்கே⁴ன, ஸோஹம், ப⁴ந்தே, ஸம்மா வத்தாமி, லோமம் பாதேமி, நேத்தா²ரம் வத்தாமி, ஸங்க⁴ம் பத்துக்குஜ்ஜனம் யாசாமீ’’தி.

து³தியம்பி யாசிதப்³போ³. ததியம்பி யாசிதப்³போ³.

ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴, ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ நிக்குஜ்ஜிதோ, அஸம்போ⁴கோ³ ஸங்கே⁴ன, ஸோ ஸம்மா வத்ததி, லோமம் பாதேதி, நேத்தா²ரம் வத்ததி, ஸங்க⁴ம் பத்துக்குஜ்ஜனம் யாசதி, யதி³ ஸங்க⁴ஸ்ஸ பத்தகல்லம், ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தம் உக்குஜ்ஜேய்ய, ஸம்போ⁴க³ம் ஸங்கே⁴ன கரேய்ய, ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴, ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ நிக்குஜ்ஜிதோ, அஸம்போ⁴கோ³ ஸங்கே⁴ன, ஸோ ஸம்மா வத்ததி, லோமம் பாதேதி, நேத்தா²ரம் வத்ததி, ஸங்க⁴ம் பத்துக்குஜ்ஜனம் யாசதி, ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தம் உக்குஜ்ஜதி, ஸம்போ⁴க³ம் ஸங்கே⁴ன கரோதி, யஸ்ஸாயஸ்மதோ க²மதி வட்³ட⁴ஸ்ஸ லிச்ச²விஸ்ஸ பத்தஸ்ஸ உக்குஜ்ஜனா ஸம்போ⁴க³ம் ஸங்கே⁴ன கரணம், ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸேய்ய.

‘‘உக்குஜ்ஜிதோ ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ ஸம்போ⁴கோ³ ஸங்கே⁴ன, க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

ஏத்த² (சூளவ. அட்ட². 265) ச அட்ட²ஸு அங்கே³ஸு ஏககேனபி அங்கே³ன ஸமன்னாக³தஸ்ஸ பத்தனிக்குஜ்ஜனகம்மம் காதும் வட்டதி, அந்தோஸீமாய வா நிஸ்ஸீமம் க³ந்த்வா நதீ³ஆதீ³ஸு வா நிக்குஜ்ஜிதும் வட்டதியேவ. ஏவம் நிக்குஜ்ஜிதே பன பத்தே தஸ்ஸ கே³ஹே கோசி தே³ய்யத⁴ம்மோ ந க³ஹேதப்³போ³, ‘‘அஸுகஸ்ஸ கே³ஹே பி⁴க்க²ம் மா க³ண்ஹித்தா²’’தி அஞ்ஞவிஹாரேஸுபி பேஸேதப்³ப³ம். உக்குஜ்ஜனகாலே பன யாவததியம் யாசாபேத்வா ஹத்த²பாஸம் விஜஹாபேத்வா ஞத்திது³தியகம்மேன உக்குஜ்ஜிதப்³போ³.

ஸீமாஸம்முதி, திசீவரேன அவிப்பவாஸஸம்முதி, ஸந்த²தஸம்முதி, ப⁴த்துத்³தே³ஸகஸேனாஸனக்³கா³ஹாபகப⁴ண்டா³கா³ரியசீவரபடிக்³கா³ஹகசீவரபா⁴ஜகயாகு³பா⁴ஜகக²ஜ்ஜபா⁴ஜகப²லபா⁴ஜகஅப்பமத்தகவிஸ்ஸஜ்ஜகஸாடியக்³கா³ஹாபகபத்தக்³கா³ஹாபகஆராமிகபேஸகஸாமணேரபேஸகஸம்முதீதி ஏதாஸம் ஸம்முதீனம் வஸேன ஸம்முதி வேதி³தப்³பா³. கதி²னசீவரதா³னமதகசீவரதா³னவஸேன தா³னம் வேதி³தப்³ப³ம். கதி²னுத்³தா⁴ரவஸேன உத்³தா⁴ரோ வேதி³தப்³போ³. குடிவத்து²விஹாரவத்து²தே³ஸனாவஸேன தே³ஸனா வேதி³தப்³பா³. யா பன திணவத்தா²ரகஸமதே² ஸப்³ப³ஸங்கா³ஹிகஞத்திஞ்ச ஏகேகஸ்மிம் பக்கே² ஏகேகஞத்திஞ்சாதி திஸ்ஸோ ஞத்தியோ ட²பேத்வா புன ஏகேகஸ்மிம் பக்கே² ஏகேகாதி த்³வே ஞத்திது³தியகம்மவாசா வுத்தா, தாஸம் வஸேன கம்மலக்க²ணம் வேதி³தப்³ப³ம். இதி ஞத்திது³தியகம்மம் இமானி ஸத்த டா²னானி க³ச்ச²தி.

258. ஞத்திசதுத்த²கம்மட்டா²னபே⁴தே³ பன தஜ்ஜனீயகம்மாதீ³னம் ஸத்தன்னம் கம்மானம் வஸேன நிஸ்ஸாரணா, தேஸம்யேவ ச கம்மானம் படிப்பஸ்ஸம்ப⁴னவஸேன ஓஸாரணா வேதி³தப்³பா³. பி⁴க்கு²னோவாத³கஸம்முதிவஸேன ஸம்முதி வேதி³தப்³பா³. பரிவாஸதா³னமானத்ததா³னவஸேன தா³னம் வேதி³தப்³ப³ம். மூலாயபடிகஸ்ஸனகம்மவஸேன நிக்³க³ஹோ வேதி³தப்³போ³. உக்கி²த்தானுவத்திகா, அட்ட² யாவததியகா, அரிட்டோ², சண்ட³காளீ ச இமேதே யாவததியகாதி இமாஸம் ஏகாத³ஸன்னம் ஸமனுபா⁴ஸனானம் வஸேன ஸமனுபா⁴ஸனா வேதி³தப்³பா³. உபஸம்பத³கம்மஅப்³பா⁴னகம்மவஸேன கம்மலக்க²ணம் வேதி³தப்³ப³ம். இதி ஞத்திசதுத்த²கம்மம் இமானி ஸத்த டா²னானி க³ச்ச²தி. ஏவம் கம்மானி ச கம்மவிபத்தி ச தேஸம் கம்மானம் காரகஸங்க⁴பரிச்சே²தோ³ ச விபத்திவிரஹிதானம் கம்மானம் டா²னபே⁴த³க³மனஞ்ச வேதி³தப்³ப³ம்.

இதி பாளிமுத்தகவினயவினிச்ச²யஸங்க³ஹே

கம்மாகம்மவினிச்ச²யகதா² ஸமத்தா.

பகிண்ணககண்ட³மாதிகா

க³ணபோ⁴ஜம் பரம்பரம், நாபுச்சா² பம்ஸுகூலகம்;

அச்சி²ன்னம் படிபா⁴னஞ்ச, விப்பகதஉத்³தி³ஸனம்.

திவஸ்ஸந்தம் தீ³கா⁴ஸனம், கி³லானுபட்ட²வண்ணனம்;

அத்தபாதமனவேக்க²ம், ஸிலாபவிஜ்ஜ²லிம்பனம்.

மிச்சா²தி³ட்டி²கோ³பதா³னம், த⁴ம்மிகாரக்கு²ச்சாராதி³;

ந்ஹானக⁴ம்ஸம் பண்ட³காதி³, தீ³க⁴கேஸாத்³யாதா³ஸாதி³.

நச்சாத³ங்க³சே²த³னித்³தி⁴, பத்தோ ஸப்³ப³பம்ஸுகூலம்;

பரிஸ்ஸாவனம் நக்³கோ³ ச, புப்ப²க³ந்த⁴ஆஸித்தகம்.

மளோரிகேகபா⁴ஜனம், சேலபடி பாத³க⁴ம்ஸீ;

பீ³ஜனீ ச²த்தனகா²தி³, காயப³ந்த⁴னிவாஸனம்.

காஜஹரம் த³ந்தகட்ட²ம், ருக்கா²ரோஹோ ச²ந்தா³ரோபோ;

லோகாயதம் கி²பிதகோ, லஸுணம் நக்கமிதப்³ப³ம்.

அவந்தி³யோ தூலபி⁴ஸி, பி³ம்போ³ஹனஆஸந்தா³தி³;

உச்சாஸனமஹாஸனம், சீவரஅத⁴ம்மோகாஸோ.

ஸத்³தா⁴தே³ய்யம் ஸந்துத்தரம், நிக்கே²போ ஸத்த²கம்மாதி³;

நஹாபிதோ த³ஸபா⁴கோ³, பாதே²ய்யம் மஹாபதே³ஸோ;

ஆனிஸம்ஸோதி மாதிகா.