31. சோத³னாதி³வினிச்ச²யகதா²

230. சோத³னாதி³வினிச்ச²யோதி ஏத்த² (பாரா. அட்ட². 2.385-6) பன சோதே³தும் கோ லப⁴தி, கோ ந லப⁴தி? து³ப்³ப³லசோத³கவசனம் தாவ க³ஹேத்வா கோசி ந லப⁴தி. து³ப்³ப³லசோத³கோ நாம ஸம்ப³ஹுலேஸு கதா²ஸல்லாபேன நிஸின்னேஸு ஏகோ ஏகம் ஆரப்³ப⁴ அனோதி³ஸ்ஸகம் கத்வா பாராஜிகவத்து²ம் கதே²தி, அஞ்ஞோ தம் ஸுத்வா இதரஸ்ஸ க³ந்த்வா ஆரோசேதி, ஸோ தம் உபஸங்கமித்வா ‘‘த்வம் கிர மம் இத³ஞ்சித³ஞ்ச வத³ஸீ’’தி ப⁴ணதி, ஸோ ‘‘நாஹம் ஏவரூபம் ஜானாமி, கதா²பவத்தியம் பன மயா அனோதி³ஸ்ஸகம் கத்வா வுத்தமத்தி². ஸசே அஹம் தவ இமம் து³க்கு²ப்பத்திம் ஜானேய்யம், ஏத்தகம்பி ந கதே²ய்ய’’ந்தி. அயம் து³ப்³ப³லசோத³கோ. தஸ்ஸேதம் கதா²ஸல்லாபம் க³ஹேத்வா தம் பி⁴க்கு²ம் கோசி சோதே³தும் ந லப⁴தி, ஏதம் பன அக்³க³ஹேத்வா ஸீலஸம்பன்னோ பி⁴க்கு² பி⁴க்கு²ம் வா பி⁴க்கு²னிம் வா, ஸீலஸம்பன்னா ச பி⁴க்கு²னீ பி⁴க்கு²னீமேவ சோதே³தும் லப⁴தீதி மஹாபது³மத்தே²ரோ ஆஹ. மஹாஸுமத்தே²ரோ பன ‘‘பஞ்சபி ஸஹத⁴ம்மிகா லப⁴ந்தீ’’தி ஆஹ. கோ³த³த்தத்தே²ரோ ‘‘ந கோசி ந லப⁴தீ’’தி வத்வா ‘‘பி⁴க்கு²ஸ்ஸ ஸுத்வா சோதே³தி, பி⁴க்கு²னியா ஸுத்வா…பே… தித்தி²யஸாவகானம் ஸுத்வா சோதே³தீ’’தி இத³ம் ஸுத்தம் ஆஹரி. திண்ணம்பி தே²ரானம் வாதே³ சுதி³தகஸ்ஸேவ படிஞ்ஞாய காரேதப்³போ³.

அயம் பன சோத³னா நாம தி³ட்ட²சோத³னா ஸுதசோத³னா பரிஸங்கிதசோத³னாதி திவிதா⁴ ஹோதி. அபராபி சதுப்³பி³தா⁴ ஹோதி ஸீலவிபத்திசோத³னா ஆசாரவிபத்திசோத³னா தி³ட்டி²விபத்திசோத³னா ஆஜீவவிபத்திசோத³னாதி. தத்த² க³ருகானம் த்³வின்னம் ஆபத்திக்க²ந்தா⁴னம் வஸேன ஸீலவிபத்திசோத³னா வேதி³தப்³பா³, அவஸேஸானம் வஸேன ஆசாரவிபத்திசோத³னா, மிச்சா²தி³ட்டி²அந்தக்³கா³ஹிகதி³ட்டி²வஸேன தி³ட்டி²விபத்திசோத³னா, ஆஜீவஹேது பஞ்ஞத்தானம் ச²ன்னம் ஸிக்கா²பதா³னம் வஸேன ஆஜீவவிபத்திசோத³னா வேதி³தப்³பா³.

அபராபி சதுப்³பி³தா⁴ ஹோதி வத்து²ஸந்த³ஸ்ஸனா ஆபத்திஸந்த³ஸ்ஸனா ஸம்வாஸபடிக்கே²போ ஸாமீசிபடிக்கே²போதி. தத்த² வத்து²ஸந்த³ஸ்ஸனா நாம ‘‘த்வம் மேது²னம் த⁴ம்மம் படிஸேவி, அதி³ன்னம் ஆதி³யி, மனுஸ்ஸம் கா⁴தயித்த², அபூ⁴தம் ஆரோசயித்தா²’’தி ஏவம் பவத்தா. ஆபத்திஸந்த³ஸ்ஸனா நாம ‘‘த்வம் மேது²னத⁴ம்மபாராஜிகாபத்திம் ஆபன்னோ’’திஏவமாதி³னயப்பவத்தா. ஸம்வாஸபடிக்கே²போ நாம ‘‘நத்தி² தயா ஸத்³தி⁴ம் உபோஸதோ² வா பவாரணா வா ஸங்க⁴கம்மம் வா’’தி ஏவம் பவத்தோ. ஸாமீசிபடிக்கே²போ நாம அபி⁴வாத³னபச்சுட்டா²னஅஞ்ஜலீகம்மபீ³ஜனாதி³கம்மானம் அகரணம். தம் படிபாடியா வந்த³னாதீ³னி கரோந்தோ ஏகஸ்ஸ அகத்வா ஸேஸானம் கரணகாலே வேதி³தப்³ப³ம். ஏத்தாவதாபி சோத³னா நாம ஹோதி. யாகு³ப⁴த்தாதி³னா பன யம் இச்ச²தி, தம் ஆபுச்ச²தி, ந தாவதா சோத³னா ஹோதி.

அபரா பாதிமோக்க²ட்ட²பனக்க²ந்த⁴கே (சூளவ. 387) ‘‘ஏகம், பி⁴க்க²வே, அத⁴ம்மிகம் பாதிமோக்க²ட்ட²பனம், ஏகம் த⁴ம்மிக’’ந்திஆதி³ம் கத்வா யாவ த³ஸ அத⁴ம்மிகானி பாதிமோக்க²ட்ட²பனானி, த³ஸ த⁴ம்மிகானீதி ஏவம் அத⁴ம்மிகா பஞ்சபஞ்ஞாஸ, த⁴ம்மிகா பஞ்சபஞ்ஞாஸாதி த³ஸுத்தரஸதம் சோத³னா வுத்தா. தா தி³ட்டே²ன சோதே³ந்தஸ்ஸ த³ஸுத்தரஸதம், ஸுதேன சோதே³ந்தஸ்ஸ த³ஸுத்தரஸதம், பரிஸங்காய சோதே³ந்தஸ்ஸ த³ஸுத்தரஸதந்தி திம்ஸாதி⁴கானி தீணி ஸதானி ஹோந்தி. தானி காயேன சோதே³ந்தஸ்ஸ, வாசாய சோதே³ந்தஸ்ஸ, காயவாசாய சோதே³ந்தஸ்ஸாதி திகு³ணானி கதானி நவுதாதி⁴கானி நவ ஸதானி ஹோந்தி. தானி அத்தனா சோதே³ந்தஸ்ஸபி பரேன சோதா³பேந்தஸ்ஸபி தத்தகானேவாதி வீஸதிஊனானி த்³வே ஸஹஸ்ஸானி ஹோந்தி. புன தி³ட்டா²தி³பே⁴தே³ ஸமூலிகாமூலிகவஸேன அனேகஸஹஸ்ஸா சோத³னா ஹோந்தீதி வேதி³தப்³பா³.

231. வுத்தப்பபே⁴தா³ஸு பன இமாஸு சோத³னாஸு யாய காயசி சோத³னாய வஸேன ஸங்க⁴மஜ்ஜே² ஓஸடே வத்து²ஸ்மிம் சுதி³தகசோத³கா வத்தப்³பா³ ‘‘தும்ஹே அம்ஹாகம் வினிச்ச²யேன துட்டா² ப⁴விஸ்ஸதா²’’தி. ஸசே ‘‘ப⁴விஸ்ஸாமா’’தி வத³ந்தி, ஸங்கே⁴ன தம் அதி⁴கரணம் ஸம்படிச்சி²தப்³ப³ம். அத² பன ‘‘வினிச்சி²னத² தாவ, ப⁴ந்தே, ஸசே அம்ஹாகம் க²மிஸ்ஸதி, க³ண்ஹிஸ்ஸாமா’’தி வத³ந்தி, ‘‘சேதியம் தாவ வந்த³தா²’’திஆதீ³னி வத்வா தீ³க⁴ஸுத்தம் கத்வா விஸ்ஸஜ்ஜிதப்³ப³ம். தே சே சிரரத்தம் கிலந்தா பக்கந்தபரிஸா உபச்சி²ன்னபக்கா² ஹுத்வா புன யாசந்தி, யாவததியம் படிக்கி²பித்வா யதா³ நிம்மதா³ ஹோந்தி, ததா³ நேஸம் அதி⁴கரணம் வினிச்சி²னிதப்³ப³ம். வினிச்சி²னந்தேஹி ச ஸசே அலஜ்ஜுஸ்ஸன்னா ஹோதி பரிஸா, உப்³பா³ஹிகாய தம் அதி⁴கரணம் வினிச்சி²னிதப்³ப³ம். ஸசே பா³லுஸ்ஸன்னா ஹோதி பரிஸா, ‘‘தும்ஹாகம் ஸபா⁴கே³ வினயத⁴ரே பரியேஸதா²’’தி வினயத⁴ரே பரியேஸாபேத்வா யேன த⁴ம்மேன யேன வினயேன யேன ஸத்து²ஸாஸனேன தம் அதி⁴கரணம் வூபஸம்மதி, ததா² தம் அதி⁴கரணம் வூபஸமேதப்³ப³ம்.

தத்த² ச த⁴ம்மோதி பூ⁴தம் வத்து². வினயோதி சோத³னா சேவ ஸாரணா ச. ஸத்து²ஸாஸனந்தி ஞத்திஸம்பதா³ ச அனுஸ்ஸாவனஸம்பதா³ ச. தஸ்மா சோத³கேன வத்து²ஸ்மிம் ஆரோசிதே சுதி³தகோ புச்சி²தப்³போ³ ‘‘ஸந்தமேதம், நோ’’தி. ஏவம் வத்து²ம் உபபரிக்கி²த்வா பூ⁴தேன வத்து²னா சோதே³த்வா ஸாரேத்வா ஞத்திஸம்பதா³ய ச அனுஸ்ஸாவனஸம்பதா³ய ச தம் அதி⁴கரணம் வூபஸமேதப்³ப³ம். தத்ர சே அலஜ்ஜீ லஜ்ஜிம் சோதே³தி, ஸோ ச அலஜ்ஜீ பா³லோ ஹோதி அப்³யத்தோ, நாஸ்ஸ நயோ தா³தப்³போ³, ஏவம் பன வத்தப்³போ³ ‘‘கிம்ஹி நம் சோதே³ஸீ’’தி. அத்³தா⁴ ஸோ வக்க²தி ‘‘கிமித³ம், ப⁴ந்தே, கிம்ஹி நம் நாமா’’தி. ‘‘த்வம் கிம்ஹி நம்பி ந ஜானாஸி, ந யுத்தம் தயா ஏவரூபேன பா³லேன பரம் சோதே³து’’ந்தி உய்யோஜேதப்³போ³, நாஸ்ஸ அனுயோகோ³ தா³தப்³போ³. ஸசே பன ஸோ அலஜ்ஜீ பண்டி³தோ ஹோதி ப்³யத்தோ, தி³ட்டே²ன வா ஸுதேன வா அஜ்ஜோ²த்த²ரித்வா ஸம்பாதே³தும் ஸக்கோதி, ஏதஸ்ஸ அனுயோக³ம் த³த்வா லஜ்ஜிஸ்ஸேவ படிஞ்ஞாய கம்மம் காதப்³ப³ம்.

ஸசே லஜ்ஜீ அலஜ்ஜிம் சோதே³தி, ஸோ ச லஜ்ஜீ பா³லோ ஹோதி அப்³யத்தோ, ந ஸக்கோதி அனுயோக³ம் தா³தும், தஸ்ஸ நயோ தா³தப்³போ³ ‘‘கிம்ஹி நம் சோதே³ஸி ஸீலவிபத்தியா வா ஆசாரவிபத்திஆதீ³ஸு வா ஏகிஸ்ஸா’’தி. கஸ்மா பன இமஸ்ஸேவ ஏவம் நயோ தா³தப்³போ³, ந இதரஸ்ஸாதி, நனு ந யுத்தம் வினயத⁴ரானம் அக³திக³மனந்தி? ந யுத்தமேவ. இத³ம் பன அக³திக³மனம் ந ஹோதி, த⁴ம்மானுக்³க³ஹோ நாம ஏஸோ. அலஜ்ஜினிக்³க³ஹத்தா²ய ஹி லஜ்ஜிபக்³க³ஹத்தா²ய ச ஸிக்கா²பத³ம் பஞ்ஞத்தம். தத்ர அலஜ்ஜீ நயம் லபி⁴த்வா அஜ்ஜோ²த்த²ரந்தோ ஏஹிதி, லஜ்ஜீ பன நயம் லபி⁴த்வா தி³ட்டே² தி³ட்ட²ஸந்தானேன ஸுதே ஸுதஸந்தானேன பதிட்டா²ய கதே²ஸ்ஸதி, தஸ்மா தஸ்ஸ த⁴ம்மானுக்³க³ஹோ வட்டதி. ஸசே பன ஸோ லஜ்ஜீ பண்டி³தோ ஹோதி ப்³யத்தோ, பதிட்டா²ய கதே²தி, அலஜ்ஜீ ச ‘‘ஏதம்பி நத்தி², ஏதம்பி நத்தீ²’’தி படிஞ்ஞம் ந தே³தி, அலஜ்ஜிஸ்ஸ படிஞ்ஞாய ஏவ காதப்³ப³ம்.

தத³த்த²தீ³பனத்த²ஞ்ச இத³ம் வத்து² வேதி³தப்³ப³ம் – திபிடகசூளாப⁴யத்தே²ரோ கிர லோஹபாஸாத³ஸ்ஸ ஹேட்டா² பி⁴க்கூ²னம் வினயம் கதே²த்வா ஸாயன்ஹஸமயே வுட்டா²தி, தஸ்ஸ வுட்டா²னஸமயே த்³வே அத்தபச்சத்தி²கா கத²ம் பவத்தேஸும். ஏகோ ‘‘ஏதம்பி நத்தி², ஏதம்பி நத்தீ²’’தி படிஞ்ஞம் ந தே³தி, அத² அப்பாவஸேஸே பட²மயாமே தே²ரஸ்ஸ தஸ்மிம் புக்³க³லே ‘‘அயம் பதிட்டா²ய கதே²தி, அயம் பன படிஞ்ஞம் ந தே³தி, ப³ஹூனி ச வத்தூ²னி ஓஸடானி, அத்³தா⁴ ஏதம் கதம் ப⁴விஸ்ஸதீ’’தி அஸுத்³த⁴லத்³தி⁴ உப்பன்னா. ததோ பீ³ஜனீத³ண்ட³கேன பாத³கத²லிகாய ஸஞ்ஞம் த³த்வா ‘‘அஹம், ஆவுஸோ, வினிச்சி²னிதும் அனனுச்ச²விகோ, அஞ்ஞேன வினிச்சி²னாபேஹீ’’தி ஆஹ. ‘‘கஸ்மா, ப⁴ந்தே’’தி? தே²ரோ தமத்த²ம் ஆரோசேஸி. சுதி³தகபுக்³க³லஸ்ஸ காயே டா³ஹோ உட்டி²தோ, ததோ ஸோ தே²ரம் வந்தி³த்வா ‘‘ப⁴ந்தே, வினிச்சி²னிதும் அனுரூபேன வினயத⁴ரேன நாம தும்ஹாதி³ஸேனேவ ப⁴விதும் வட்டதி, சோத³கேன ச ஈதி³ஸேனேவ ப⁴விதும் வட்டதீ’’தி வத்வா ஸேதகானி நிவாஸேத்வா ‘‘சிரம் கிலமிதாத்த² மயா’’தி க²மாபேத்வா பக்காமி.

ஏவம் லஜ்ஜினா சோதி³யமானோ அலஜ்ஜீ ப³ஹூஸுபி வத்தூ²ஸு உப்பன்னேஸு படிஞ்ஞம் ந தே³தி, ஸோ நேவ ‘‘ஸுத்³தோ⁴’’தி வத்தப்³போ³, ந ‘‘அஸுத்³தோ⁴’’தி, ஜீவமதகோ நாம ஆமகபூதிகோ நாம சேஸ. ஸசே பனஸ்ஸ அஞ்ஞம்பி தாதி³ஸம் வத்து² உப்பஜ்ஜதி, ந வினிச்சி²னிதப்³ப³ம், ததா² நாஸிதகோ ப⁴விஸ்ஸதி. ஸசே பன அலஜ்ஜீயேவ அலஜ்ஜிம் சோதே³தி, ஸோ வத்தப்³போ³ ‘‘ஆவுஸோ, தவ வசனேனாயம் கிம் ஸக்கா வத்து’’ந்தி. இதரம்பி ததே²வ வத்வா ‘‘உபோ⁴பி ஏகஸம்போ⁴க³பரிபோ⁴கா³ ஹுத்வா ஜீவதா²’’தி உய்யோஜேதப்³பா³. ஸீலத்தா²ய நேஸம் வினிச்ச²யோ ந காதப்³போ³, பத்தசீவரபரிவேணாதி³அத்தா²ய பன பதிரூபம் ஸக்கி²ம் லபி⁴த்வா காதப்³போ³தி.

அத² லஜ்ஜீ லஜ்ஜிம் சோதே³தி, விவாதோ³ ச நேஸம் கிஸ்மிஞ்சிதே³வ அப்பமத்தகோ ஹோதி, ஸஞ்ஞாபேத்வா ‘‘மா ஏவம் கரோதா²’’தி அச்சயம் தே³ஸாபேத்வா உய்யோஜேதப்³பா³. அத² பனேத்த² சுதி³தகேன ஸஹஸா விரத்³த⁴ம் ஹோதி, ஆதி³தோ பட்டா²ய அலஜ்ஜீ நாம நத்தி². ஸோ ச பக்கா²னுரக்க²ணத்தா²ய படிஞ்ஞம் ந தே³தி, ‘‘மயம் ஸத்³த³ஹாம, மயம் ஸத்³த³ஹாமா’’தி ப³ஹூ உட்ட²ஹந்தி, ஸோ தேஸம் படிஞ்ஞாய ஏகவாரம் த்³வேவாரம் ஸுத்³தோ⁴ ஹோது, அத² பன விரத்³த⁴காலதோ பட்டா²ய டா²னே ந திட்ட²தி, வினிச்ச²யோ ந தா³தப்³போ³.

232. அதி³ன்னாதா³னவத்து²ம் வினிச்சி²னந்தேன (பாரா. அட்ட². 1.92) பன பஞ்சவீஸதி அவஹாரா ஸாது⁴கம் ஸல்லக்கே²தப்³பா³. தேஸு ச குஸலேன வினயத⁴ரேன ஓதிண்ணம் வத்து²ம் ஸஹஸா அவினிச்சி²னித்வாவ பஞ்ச டா²னானி ஓலோகேதப்³பா³னி, யானி ஸந்தா⁴ய போராணா ஆஹு –

‘‘வத்து²ம் காலஞ்ச தே³ஸஞ்ச, அக்³க⁴ம் பரிபோ⁴க³பஞ்சமம்;

துலயித்வா பஞ்ச டா²னானி, தா⁴ரேய்யத்த²ம் விசக்க²ணோ’’தி. (பாரா. அட்ட². 1.92);

தத்த² வத்து²ந்தி ப⁴ண்ட³ம். அவஹாரகேன ஹி ‘‘மயா இத³ம் நாம அவஹட’’ந்தி வுத்தேபி ஆபத்திம் அனாரோபேத்வாவ தம் ப⁴ண்ட³ம் ‘‘ஸஸாமிகம் வா அஸாமிகம் வா’’தி உபபரிக்கி²தப்³ப³ம். ஸஸாமிகேபி ஸாமிகானம் ஸாலயபா⁴வோ வா நிராலயபா⁴வோ வா உபபரிக்கி²தப்³போ³. ஸசே தேஸம் ஸாலயகாலே அவஹடம், ப⁴ண்ட³ம் அக்³கா⁴பேத்வா ஆபத்தி காதப்³பா³. ஸசே நிராலயகாலே, பாராஜிகேன ந காதப்³பா³. ப⁴ண்ட³ஸாமிகேஸு பன ப⁴ண்ட³ம் ஆஹராபேந்தேஸு ப⁴ண்ட³ம் தா³தப்³ப³ம். அயமேத்த² ஸாமீசி.

இமஸ்ஸ பனத்த²ஸ்ஸ தீ³பனத்த²மித³ம் வத்து² – பா⁴தியராஜகாலே கிர மஹாசேதியபூஜாய த³க்கி²ணதி³ஸதோ ஏகோ பி⁴க்கு² ஸத்தஹத்த²ம் பண்டு³காஸாவம் அம்ஸே கரித்வா சேதியங்க³ணம் பாவிஸி. தங்க²ணமேவ ச ராஜாபி சேதியவந்த³னத்த²ம் ஆக³தோ. ததோ உஸ்ஸாரணாய வத்தமானாய மஹாஜனஸம்மத்³தோ³ அஹோஸி. அத² ஸோ பி⁴க்கு² ஜனஸம்மத்³த³பீளிதோ அம்ஸதோ பதந்தம் காஸாவம் அதி³ஸ்வாவ நிக்க²ந்தோ, நிக்க²மித்வா காஸாவம் அபஸ்ஸந்தோ ‘‘கோ ஈதி³ஸே ஜனஸம்மத்³தே³ காஸாவம் லச்ச²தி, ந தா³னி தம் மய்ஹ’’ந்தி து⁴ரனிக்கே²பம் கத்வா க³தோ. அத²ஞ்ஞோ பி⁴க்கு² பச்சா² ஆக³ச்ச²ந்தோ தம் காஸாவம் தி³ஸ்வா தே²ய்யசித்தேன க³ஹேத்வா புன விப்படிஸாரீ ஹுத்வா ‘‘அஸ்ஸமணோ தா³னிம்ஹி, விப்³ப⁴மிஸ்ஸாமீ’’தி சித்தே உப்பன்னே ‘‘வினயத⁴ரே புச்சி²த்வா ஞஸ்ஸாமீ’’தி சிந்தேஸி.

தேன ஸமயேன சூளஸுமனத்தே²ரோ நாம ஸப்³ப³பரியத்தித⁴ரோ வினயாசரியபாமோக்கோ² மஹாவிஹாரே படிவஸதி. ஸோ பி⁴க்கு² தே²ரம் உபஸங்கமித்வா வந்தி³த்வா ஓகாஸம் காரேத்வா அத்தனோ குக்குச்சம் புச்சி². தே²ரோ தேன ப⁴ட்டே² ஜனகாயே பச்சா² ஆக³ந்த்வா க³ஹிதபா⁴வம் ஞத்வா ‘‘அத்தி² தா³னி ஏத்த² ஓகாஸோ’’தி சிந்தேத்வா ஆஹ ‘‘ஸசே காஸாவஸாமிகம் பி⁴க்கு²ம் ஆனேய்யாஸி, ஸக்கா ப⁴வேய்ய தவ பதிட்டா² காது’’ந்தி. கதா²ஹம், ப⁴ந்தே, தம் த³க்கி²ஸ்ஸாமீதி. தஹிம் தஹிம் க³ந்த்வா ஓலோகேஹீதி. ஸோ பஞ்சபி மஹாவிஹாரே ஓலோகேத்வா நேவ அத்³த³க்கி². ததோ நம் தே²ரோ புச்சி² ‘‘கதராய தி³ஸாய ப³ஹூ பி⁴க்கூ² ஆக³ச்ச²ந்தீ’’தி? ‘‘த³க்கி²ணதி³ஸாய, ப⁴ந்தே’’தி. தேன ஹி காஸாவம் தீ³க⁴தோ ச திரியஞ்ச மினித்வா ட²பேஹி, ட²பேத்வா த³க்கி²ணதி³ஸாய விஹாரபடிபாடியா விசினித்வா தம் பி⁴க்கு²ம் ஆனேஹீதி. ஸோ ததா² கத்வா தம் பி⁴க்கு²ம் தி³ஸ்வா தே²ரஸ்ஸ ஸந்திகம் ஆனேஸி. தே²ரோ புச்சி² ‘‘தவேத³ம் காஸாவ’’ந்தி? ‘‘ஆம, ப⁴ந்தே’’தி. குஹிம் தே பாதிதந்தி? ஸோ ஸப்³ப³ம் ஆசிக்கி². தே²ரோ தேன கதம் து⁴ரனிக்கே²பம் ஸுத்வா இதரம் புச்சி² ‘‘தயா இத³ம் குஹிம் தி³ஸ்வா க³ஹித’’ந்தி? ஸோபி ஸப்³ப³ம் ஆரோசேஸி. ததோ தம் தே²ரோ ஆஹ ‘‘ஸசே தே ஸுத்³த⁴சித்தேன க³ஹிதம் அப⁴விஸ்ஸ, அனாபத்தியேவ தே அஸ்ஸ, தே²ய்யசித்தேன பன க³ஹிதத்தா து³க்கடம் ஆபன்னோஸி, தம் தே³ஸேத்வா அனாபத்திகோ ஹோதி, இத³ஞ்ச காஸாவம் அத்தனோ ஸந்தகம் கத்வா ஏதஸ்ஸேவ பி⁴க்கு²னோ தே³ஹீ’’தி. ஸோ பி⁴க்கு² அமதேனேவ அபி⁴ஸித்தோ வரமஸ்ஸாஸப்பத்தோ அஹோஸி. ஏவம் வத்து² ஓலோகேதப்³ப³ம்.

காலோதி அவஹாரகாலோ. ததே³வ ஹி ப⁴ண்ட³ம் கதா³சி அப்பக்³க⁴ம் ஹோதி, கதா³சி மஹக்³க⁴ம். தஸ்மா தம் ப⁴ண்ட³ம் யஸ்மிம் காலே அவஹடம், தஸ்மிம்யேவ காலே யோ தஸ்ஸ அக்³கோ⁴ ஹோதி, தேன அக்³கே⁴ன ஆபத்தி காரேதப்³பா³. ஏவம் காலோ ஓலோகேதப்³போ³.

தே³ஸோதி அவஹாரதே³ஸோ. தஞ்ஹி ப⁴ண்ட³ம் யஸ்மிம் தே³ஸே அவஹடம், தஸ்மிம்யேவ தே³ஸே யோ தஸ்ஸ அக்³கோ⁴ ஹோதி, தேன அக்³கே⁴ன ஆபத்தி காரேதப்³பா³. ப⁴ண்டு³ட்டா²னதே³ஸே ஹி ப⁴ண்ட³ம் அப்பக்³க⁴ம் ஹோதி, அஞ்ஞத்த² மஹக்³க⁴ம்.

இமஸ்ஸபி ச அத்த²ஸ்ஸ தீ³பனத்த²மித³ம் வத்து² – அந்தரஸமுத்³தே³ கிர ஏகோ பி⁴க்கு² ஸுஸண்டா²னம் நாளிகேரம் லபி⁴த்வா ப⁴மம் ஆரோபேத்வா ஸங்க²தா²லகஸதி³ஸம் மனோரமம் பானீயதா²லகம் கத்வா தத்தே²வ ட²பேத்வா சேதியகி³ரிம் அக³மாஸி. அஞ்ஞோ பி⁴க்கு² அந்தரஸமுத்³த³ம் க³ந்த்வா தஸ்மிம் விஹாரே படிவஸந்தோ தம் தா²லகம் தி³ஸ்வா தே²ய்யசித்தேன க³ஹேத்வா சேதியகி³ரிமேவ ஆக³தோ. தஸ்ஸ தத்த² யாகு³ம் பிவந்தஸ்ஸ தம் தா²லகம் தி³ஸ்வா தா²லகஸாமிகோ பி⁴க்கு² ஆஹ ‘‘குதோ தே இத³ம் லத்³த⁴’’ந்தி. அந்தரஸமுத்³த³தோ மே ஆனீதந்தி. ஸோ தம் ‘‘நேதம் தவ ஸந்தகம், தே²ய்யாய தே க³ஹித’’ந்தி ஸங்க⁴மஜ்ஜ²ம் ஆகட்³டி⁴. தத்த² ச வினிச்ச²யம் அலபி⁴த்வா மஹாவிஹாரம் அக³மிம்ஸு, தத்த² ச பே⁴ரிம் பஹராபேத்வா மஹாசேதியஸமீபே ஸன்னிபாதம் கத்வா வினிச்ச²யம் ஆரபி⁴ம்ஸு. வினயத⁴ரத்தே²ரா அவஹாரம் ஸஞ்ஞாபேஸும்.

தஸ்மிஞ்ச ஸன்னிபாதே ஆபி⁴த⁴ம்மிககோ³த³த்தத்தே²ரோ நாம வினயகுஸலோ ஹோதி, ஸோ ஏவமாஹ ‘‘இமினா இத³ம் தா²லகம் குஹிம் அவஹட’’ந்தி? ‘‘அந்தரஸமுத்³தே³ அவஹட’’ந்தி. தத்த² தம் கிம் அக்³க⁴தீதி. ந கிஞ்சி அக்³க⁴தி. தத்ர ஹி நாளிகேரம் பி⁴ந்தி³த்வா மிஞ்ஜம் கா²தி³த்வா கபாலம் ச²ட்³டே³தி, தா³ருஅத்த²ம் பன ப²ரதீதி. இமஸ்ஸ பி⁴க்கு²னோ ஏத்த² ஹத்த²கம்மம் கிம் அக்³க⁴தீதி? மாஸகம் வா ஊனமாஸகம் வாதி. அத்தி² பன கத்த²சி ஸம்மாஸம்பு³த்³தே⁴ன மாஸகே வா ஊனமாஸகே வா பாராஜிகம் பஞ்ஞத்தந்தி. ஏவம் வுத்தே ‘‘ஸாது⁴ ஸாது⁴, ஸுகதி²தம் ஸுவினிச்சி²த’’ந்தி ஏகஸாது⁴காரோ அஹோஸி. தேன ச ஸமயேன பா⁴தியராஜாபி சேதியவந்த³னத்த²ம் நக³ரதோ நிக்க²ந்தோ தம் ஸத்³த³ம் ஸுத்வா ‘‘கிம் இத³’’ந்தி புச்சி²த்வா ஸப்³ப³ம் படிபாடியா ஸுத்வா நக³ரே பே⁴ரிம் சராபேஸி ‘‘மயி ஸந்தே பி⁴க்கூ²னம்பி பி⁴க்கு²னீனம்பி கி³ஹீனம்பி அதி⁴கரணம் ஆபி⁴த⁴ம்மிககோ³த³த்தத்தே²ரேன வினிச்சி²தம் ஸுவினிச்சி²தம், தஸ்ஸ வினிச்ச²யே அதிட்ட²மானம் ராஜாணாய ட²பேமீ’’தி. ஏவம் தே³ஸோ ஓலோகேதப்³போ³.

அக்³கோ⁴தி ப⁴ண்ட³க்³கோ⁴. நவப⁴ண்ட³ஸ்ஸ ஹி யோ அக்³கோ⁴ ஹோதி, ஸோ பச்சா² பரிஹாயதி. யதா² நவதோ⁴தோ பத்தோ அட்ட² வா த³ஸ வா அக்³க⁴தி, ஸோ பச்சா² பி⁴ன்னோ வா சி²த்³தோ³ வா ஆணிக³ண்டி²காஹதோ வா அப்பக்³கோ⁴ ஹோதி, தஸ்மா ந ஸப்³ப³தா³ ப⁴ண்ட³ம் பகதிஅக்³கே⁴னேவ காதப்³ப³ந்தி. ஏவம் அக்³கோ⁴ ஓலோகேதப்³போ³.

பரிபோ⁴கோ³தி ப⁴ண்ட³பரிபோ⁴கோ³. பரிபோ⁴கே³னபி ஹி வாஸிஆதி³ப⁴ண்ட³ஸ்ஸ அக்³கோ⁴ பரிஹாயதி. தஸ்மா ஏவம் உபபரிக்கி²தப்³ப³ம் – ஸசே கோசி கஸ்ஸசி பாத³க்³க⁴னகம் வாஸிம் ஹரதி, தத்ர வாஸிஸாமிகோ புச்சி²தப்³போ³ ‘‘தயா அயம் வாஸி கித்தகேன கீதா’’தி? ‘‘பாதே³ன, ப⁴ந்தே’’தி. கிம் பன தே கிணித்வாவ ட²பிதா, உதா³ஹு நம் வளஞ்ஜேஸீதி? ஸசே வத³தி ‘‘ஏகதி³வஸம் மே த³ந்தகட்ட²ம் வா ரஜனச²ல்லி வா பத்தபசனகதா³ரு வா சி²ன்னம், க⁴ம்ஸித்வா வா நிஸிதா’’தி, அத²ஸ்ஸ போராணகோ அக்³கோ⁴ ப⁴ட்டோ²தி வேதி³தப்³போ³. யதா² ச வாஸியா, ஏவம் அஞ்ஜனியா வா அஞ்ஜனிஸலாகாய வா குஞ்சிகாய வா பலாலேன வா து²ஸேஹி வா இட்ட²கசுண்ணேன வா ஏகவாரம் க⁴ம்ஸித்வா தோ⁴விதமத்தேனபி அக்³கோ⁴ ப⁴ஸ்ஸதி. திபுமண்ட³லஸ்ஸ மகரத³ந்தச்சே²த³னேனபி பரிமஜ்ஜனமத்தேனபி, உத³கஸாடகஸ்ஸ ஸகிம் நிவாஸனபாருபனேனபி பரிபோ⁴க³ஸீஸேன அம்ஸே வா ஸீஸே வா ட²பனமத்தேனபி, தண்டு³லாதீ³னம் பப்போ²டனேனபி ததோ ஏகம் வா த்³வே வா அபனயனேனபி அந்தமஸோ ஏகம் பாஸாணஸக்க²ரம் உத்³த⁴ரித்வா ச²ட்³டி³தமத்தேனபி, ஸப்பிதேலாதீ³னம் பா⁴ஜனந்தரபஅவத்தனேனபி அந்தமஸோ ததோ மக்கி²கம் வா கிபில்லிகம் வா உத்³த⁴ரித்வா ச²ட்³டி³தமத்தேனபி, கு³ளபிண்ட³கஸ்ஸ மது⁴ரபா⁴வஜானனத்த²ம் நகே²ன விஜ்ஜி²த்வா அணுமத்தம் க³ஹிதமத்தேனபி அக்³கோ⁴ ப⁴ஸ்ஸதி. தஸ்மா யம் கிஞ்சி பாத³க்³க⁴னகம் வுத்தனயேனேவ ஸாமிகேஹி பரிபோ⁴கே³ன ஊனம் கதம் ஹோதி, ந தம் அவஹடோ பி⁴க்கு² பாராஜிகேன காதப்³போ³தி. ஏவம் அக்³கோ⁴ ஓலோகேதப்³போ³.

ஏவம் இமானி துலயித்வா பஞ்ச டா²னானி தா⁴ரேய்ய அத்த²ம் விசக்க²ணோ, ஆபத்திம் வா அனாபத்திம் வா க³ருகம் வா லஹுகம் வா ஆபத்திம் யதா²டா²னே ட²பேய்யாதி. தேனாஹு அட்ட²கதா²சரியா –

‘‘ஸிக்கா²பத³ம் ஸமம் தேன, அஞ்ஞம் கிஞ்சி ந விஜ்ஜதி;

அனேகனயவோகிண்ணம், க³ம்பீ⁴ரத்த²வினிச்ச²யம்.

‘‘தஸ்மா வத்து²ம்ஹி ஓதிண்ணே, பி⁴க்கு²னா வினயஞ்ஞுனா;

வினயானுக்³க³ஹேனேத்த², கரோந்தேன வினிச்ச²யம்.

‘‘பாளிம் அட்ட²கத²ஞ்சேவ, ஸாதி⁴ப்பாயமஸேஸதோ;

ஓக³ய்ஹ அப்பமத்தேன, கரணீயோ வினிச்ச²யோ.

‘‘ஆபத்தித³ஸ்ஸனுஸ்ஸாஹோ, ந கத்தப்³போ³ குதா³சனம்;

பஸ்ஸிஸ்ஸாமி அனாபத்தி-மிதி கயிராத² மானஸம்.

‘‘பஸ்ஸித்வாபி ச ஆபத்திம், அவத்வாவ புனப்புனம்;

வீமம்ஸித்வாத² விஞ்ஞூஹி, ஸம்ஸந்தி³த்வா ச தம் வதே³.

‘‘கப்பியேபி ச வத்து²ஸ்மிம், சித்தஸ்ஸ லஹுவத்தினோ;

வஸேன ஸாமஞ்ஞகு³ணா, சவந்தீத⁴ புது²ஜ்ஜனா.

‘‘தஸ்மா பரபரிக்கா²ரம், ஆஸீவிஸமிவோரக³ம்;

அக்³கி³ம் விய ச ஸம்பஸ்ஸம், நாமஸேய்ய விசக்க²ணோ’’தி. (பாரா. அட்ட². 1.160-1 தத்ராயம் அனுஸாஸனீ);

233. உத்தரிமனுஸ்ஸத⁴ம்மாரோசனம் வினிச்சி²னந்தேன (பாரா. அட்ட². 2.197) பன ‘‘கிம் தே அதி⁴க³தம். கிந்தி தே அதி⁴க³தம், கதா³ தே அதி⁴க³தம், கத்த² தே அதி⁴க³தம், கதமே தே கிலேஸா பஹீனா, கதமேஸம் த்வம் த⁴ம்மானம் லாபீ⁴’’தி இமானி ச² டா²னானி விஸோதே⁴தப்³பா³னி. ஸசே ஹி கோசி பி⁴க்கு² உத்தரிமனுஸ்ஸத⁴ம்மாதி⁴க³மம் ப்³யாகரேய்ய, ந ஸோ ஏத்தாவதா ஸக்காரோ காதப்³போ³, இமேஸம் பன ச²ன்னம் டா²னானம் ஸோத⁴னத்த²ம் ஏவம் வத்தப்³போ³ ‘‘கிம் தே அதி⁴க³தம், கிம் ஜா²னம் உதா³ஹு விமோக்கா²தீ³ஸு அஞ்ஞதர’’ந்தி. யோ ஹி யேன அதி⁴க³தோ த⁴ம்மோ, ஸோ தஸ்ஸ பாகடோ ஹோதி. ஸசே ‘‘இத³ம் நாம மே அதி⁴க³த’’ந்தி வத³தி, ததோ ‘‘கிந்தி தே அதி⁴க³த’’ந்தி புச்சி²தப்³போ³, ‘‘அனிச்சலக்க²ணாதீ³ஸு கிம் து⁴ரம் கத்வா அட்ட²திம்ஸாய வா ஆரம்மணேஸு ரூபாரூபஅஜ்ஜ²த்தப³ஹித்³தா⁴தி³பே⁴தே³ஸு வா த⁴ம்மேஸு கேன முகே²ன அபி⁴னிவிஸித்வா’’தி. யோ ஹி யஸ்ஸாபி⁴னிவேஸோ, ஸோ தஸ்ஸ பாகடோ ஹோதி. ஸசே ‘‘அயம் நாம மே அபி⁴னிவேஸோ, ஏவம் மயா அதி⁴க³த’’ந்தி வத³தி, ததோ ‘‘கதா³ தே அதி⁴க³த’’ந்தி புச்சி²தப்³போ³, ‘‘கிம் புப்³ப³ண்ஹே, உதா³ஹு மஜ்ஜ²ன்ஹிகாதீ³ஸு அஞ்ஞதரஸ்மிம் காலே’’தி. ஸப்³பே³ஸஞ்ஹி அத்தனா அதி⁴க³தகாலோ பாகடோ ஹோதி. ஸசே ‘‘அமுகஸ்மிம் நாம காலே அதி⁴க³க’’ந்தி வத³தி, ததோ ‘‘கத்த² தே அதி⁴க³த’’ந்தி புச்சி²தப்³போ³, ‘‘கிம் தி³வாட்டா²னே, உதா³ஹு ரத்திட்டா²னாதீ³ஸு அஞ்ஞதரஸ்மிம் ஓகாஸே’’தி. ஸப்³பே³ஸஞ்ஹி அத்தனா அதி⁴க³தோகாஸோ பாகடோ ஹோதி. ஸசே ‘‘அமுகஸ்மிம் நாம மே ஓகாஸே அதி⁴க³த’’ந்தி வத³தி, ததோ ‘‘கதமே தே கிலேஸா பஹீனா’’தி புச்சி²தப்³போ³, ‘‘கிம் பட²மமக்³க³வஜ்ஜா², உதா³ஹு து³தியாதி³மக்³க³வஜ்ஜா²’’தி. ஸப்³பே³ஸஞ்ஹி அத்தனா அதி⁴க³தமக்³கே³ன பஹீனா கிலேஸா பாகடா ஹோந்தி.

ஸசே ‘‘இமே நாம மே கிலேஸா பஹீனா’’தி வத³தி, ததோ ‘‘கதமேஸம் த்வம் த⁴ம்மானம் லாபீ⁴’’தி புச்சி²தப்³போ³, ‘‘கிம் ஸோதாபத்திமக்³க³ஸ்ஸ, உதா³ஹு ஸகதா³கா³மிமக்³கா³தீ³ஸு அஞ்ஞதரஸ்ஸா’’தி. ஸப்³பே³ஸஞ்ஹி அத்தனா அதி⁴க³தத⁴ம்மோ பாகடோ ஹோதி. ஸசே ‘‘இமேஸம் நாமாஹம் த⁴ம்மானம் லாபீ⁴’’தி வத³தி, ஏத்தாவதாபிஸ்ஸ வசனம் ந ஸத்³தா⁴தப்³ப³ம். ப³ஹுஸ்ஸுதா ஹி உக்³க³ஹபரிபுச்சா²குஸலா பி⁴க்கூ² இமானி ச² டா²னானி ஸோதே⁴தும் ஸக்கோந்தி, இமஸ்ஸ பன பி⁴க்கு²னோ ஆக³மனபடிபதா³ ஸோதே⁴தப்³பா³. யதி³ ஆக³மனபடிபதா³ ந ஸுஜ்ஜ²தி, ‘‘இமாய படிபதா³ய லோகுத்தரத⁴ம்மோ நாம ந லப்³ப⁴தீ’’தி அபனேதப்³போ³. யதி³ பனஸ்ஸ ஆக³மனபடிபதா³ ஸுஜ்ஜ²தி, தீ³க⁴ரத்தம் தீஸு ஸிக்கா²ஸு அப்பமத்தோ ஜாக³ரியமனுயுத்தோ சதூஸு பச்சயேஸு அலக்³கோ³ ஆகாஸே பாணிஸமேன சேதஸா விஹரதீதி பஞ்ஞாயதி, தஸ்ஸ பி⁴க்கு²னோ ப்³யாகரணம் படிபதா³ய ஸத்³தி⁴ம் ஸம்ஸந்த³தி. ‘‘ஸேய்யதா²பி நாம க³ங்கோ³த³கம் யமுனோத³கேன ஸம்ஸந்த³தி ஸமேதி, ஏவமேவ ஸுபஞ்ஞத்தா தேன ப⁴க³வதா ஸாவகானம் நிப்³பா³னகா³மினீ படிபதா³, ஸம்ஸந்த³தி நிப்³பா³னஞ்ச படிபதா³ சா’’தி (தீ³. நி. 2.296) வுத்தஸதி³ஸம் ஹோதி. அபிச கோ² ந ஏத்தகேனபி ஸக்காரோ காதப்³போ³. கஸ்மா? ஏகச்சஸ்ஸ ஹி புது²ஜ்ஜனஸ்ஸபி ஸதோ கீ²ணாஸவஸ்ஸ படிபத்திஸதி³ஸா படிபத்தி ஹோதி, தஸ்மா ஸோ பி⁴க்கு² தேஹி தேஹி உபாயேஹி உத்தாஸேதப்³போ³. கீ²ணாஸவஸ்ஸ நாம அஸனியாபி மத்த²கே பதமானாய ப⁴யம் வா ச²ம்பி⁴தத்தம் வா லோமஹம்ஸோ வா ந ஹோதி, புது²ஜ்ஜனஸ்ஸ அப்பமத்தகேனபி ஹோதி.

தத்ரிமானி வத்தூ²னி (ம. நி. அட்ட². 3.102) – தீ³க⁴பா⁴ணகஅப⁴யத்தே²ரோ கிர ஏகம் பிண்ட³பாதிகம் பரிக்³க³ஹேதும் அஸக்கோந்தோ த³ஹரஸ்ஸ ஸஞ்ஞம் அதா³ஸி. ஸோ தம் நஹாயமானம் கல்யாணீனதீ³முக²த்³வாரே நிமுஜ்ஜித்வா பாதே³ அக்³க³ஹேஸி. பிண்ட³பாதிகோ ‘‘கும்பீ⁴லோ’’தி ஸஞ்ஞாய மஹாஸத்³த³மகாஸி, ததா³ நம் ‘‘புது²ஜ்ஜனோ’’தி ஜானிம்ஸு.

சந்த³முக²திஸ்ஸராஜகாலே பன மஹாவிஹாரே ஸங்க⁴த்தே²ரோ கீ²ணாஸவோ து³ப்³ப³லசக்கு²கோ விஹாரேயேவ அச்ச²தி. ராஜா ‘‘தே²ரம் பரிக்³க³ண்ஹிஸ்ஸாமீ’’தி பி⁴க்கூ²ஸு பி⁴க்கா²சாரம் க³தேஸு அப்பஸத்³தோ³ உபஸங்கமித்வா ஸப்போ விய பாதே³ அக்³க³ஹேஸி. தே²ரோ ஸிலாத²ம்போ⁴ விய நிச்சலோ ஹுத்வா ‘‘கோ ஏத்தா²’’தி ஆஹ. ‘‘அஹம், ப⁴ந்தே, திஸ்ஸோ’’தி? ‘‘ஸுக³ந்த⁴ம் வாயஸி நோ திஸ்ஸா’’தி. ஏவம் கீ²ணாஸவஸ்ஸ ப⁴யம் நாம நத்தி².

ஏகச்சோ பன புது²ஜ்ஜனோபி அதிஸூரோ ஹோதி நிப்³ப⁴யோ. ஸோ ரஜனீயேன ஆரம்மணேன பரிக்³க³ண்ஹிதப்³போ³. வஸப⁴ராஜாபி ஏகம் தே²ரம் பரிக்³க³ண்ஹமானோ க⁴ரே நிஸீதா³பேத்வா தஸ்ஸ ஸந்திகே ப³த³ரஸாளவம் மத்³த³மானோ நிஸீதி³. மஹாதே²ரஸ்ஸ கே²ளோ சலிதோ, தே²ரஸ்ஸ புது²ஜ்ஜனபா⁴வோ ஆவிபூ⁴தோ. கீ²ணாஸவஸ்ஸ ஹி ரஸதண்ஹா நாம ஸுப்பஹீனா, தி³ப்³பே³ஸுபி ரஸேஸு நிகந்தி நாம ந ஹோதி, தஸ்மா இமேஹி உபாயேஹி பரிக்³க³ஹேத்வா ஸசஸ்ஸ ப⁴யம் வா ச²ம்பி⁴தத்தம் வா ரஸதண்ஹா வா உப்பஜ்ஜதி, ‘‘ந ச த்வம் அரஹா’’தி அபனேதப்³போ³. ஸசே பன அபீ⁴ரு அச்ச²ம்பீ⁴ அனுத்ராஸீ ஹுத்வா ஸீஹோ விய நிஸீத³தி, தி³ப்³பா³ரம்மணேபி நிகந்திம் ந ஜனேதி, அயம் பி⁴க்கு² ஸம்பன்னவேய்யாகரணோ ஸமந்தா ராஜராஜமஹாமத்தாதீ³ஹி பேஸிதம் ஸக்காரம் அரஹதீதி வேதி³தப்³போ³. ஏவம் தாவ உத்தரிமனுஸ்ஸத⁴ம்மாரோசனம் வினிச்சி²னிதப்³ப³ம்.

234. ஸகலே பன வினயவினிச்ச²யே (பாரா. அட்ட². 1.45) கோஸல்லம் பத்த²யந்தேன சதுப்³பி³தோ⁴ வினயோ ஜானிதப்³போ³.

சதுப்³பி³த⁴ஞ்ஹி வினயம், மஹாதே²ரா மஹித்³தி⁴கா;

நீஹரித்வா பகாஸேஸும், த⁴ம்மஸங்கா³ஹகா புரா.

கதமம் சதுப்³பி³த⁴ம்? ஸுத்தம் ஸுத்தானுலோமம் ஆசரியவாத³ம் அத்தனோமதிந்தி. யம் ஸந்தா⁴ய வுத்தம் ‘‘ஆஹச்சபதே³ன கோ², மஹாராஜ, ரஸேன ஆசரியவம்ஸேன அதி⁴ப்பாயா’’தி (மி. ப. 4.2.3). ஏத்த² ஹி ஆஹச்சபத³ந்தி ஸுத்தம் அதி⁴ப்பேதம். ரஸோதி ஸுத்தானுலோமம். ஆசரியவம்ஸோதி ஆசரியவாதோ³. அதி⁴ப்பாயோதி அத்தனோமதி.

தத்த² ஸுத்தம் நாம ஸகலவினயபிடகே பாளி.

ஸுத்தானுலோமம் நாம சத்தாரோ மஹாபதே³ஸா. யே ப⁴க³வதா ஏவம் வுத்தா –

‘‘யம், பி⁴க்க²வே, மயா ‘இத³ம் ந கப்பதீ’தி அப்படிக்கி²த்தம், தஞ்சே அகப்பியம் அனுலோமேதி, கப்பியம் படிபா³ஹதி, தம் வோ ந கப்பதி. யம், பி⁴க்க²வே, மயா ‘இத³ம் ந கப்பதீ’தி அப்படிக்கி²த்தம், தஞ்சே கப்பியம் அனுலோமேதி, அகப்பியம் படிபா³ஹதி, தம் வோ கப்பதி. யம், பி⁴க்க²வே, மயா ‘இத³ம் கப்பதீ’தி அனனுஞ்ஞாதம், தம் சே அகப்பியம் அனுலோமேதி, கப்பியம் படிபா³ஹதி, தம் வோ ந கப்பதி. யம், பி⁴க்க²வே, மயா ‘இத³ம் கப்பதீ’தி அனனுஞ்ஞாதம், தஞ்சே கப்பியம் அனுலோமேதி, அகப்பியம் படிபா³ஹதி, தம் வோ கப்பதீ’’தி (மஹாவ. 305).

ஆசரியவாதோ³ நாம த⁴ம்மஸங்கா³ஹகேஹி பஞ்சஹி அரஹந்தஸதேஹி ட²பிதா பாளிவினிமுத்தா ஓக்கந்தவினிச்ச²யப்பவத்தா அட்ட²கதா²தந்தி.

அத்தனோமதி நாம ஸுத்தஸுத்தானுலோமஆசரியவாதே³ முஞ்சித்வா அனுமானேன அத்தனோ அனுபு³த்³தி⁴யா நயக்³கா³ஹேன உபட்டி²தாகாரகத²னம்.

அபிச ஸுத்தந்தாபி⁴த⁴ம்மவினயட்ட²கதா²ஸு ஆக³தோ ஸப்³போ³பி தே²ரவாதோ³ அத்தனோமதி நாம. தம் பன அத்தனோமதிம் க³ஹேத்வா கதே²ந்தேன ந த³ள்ஹக்³கா³ஹம் க³ஹேத்வா வோஹரிதப்³ப³ம், காரணம் ஸல்லக்கே²த்வா அத்தே²ன பாளிம், பாளியா ச அத்த²ம் ஸம்ஸந்தி³த்வா கதே²தப்³ப³ம், அத்தனோமதி ஆசரியவாதே³ ஓதாரேதப்³பா³. ஸசே தத்த² ஓதரதி சேவ ஸமேதி ச, க³ஹேதப்³பா³. ஸசே நேவ ஓதரதி ந ஸமேதி, ந க³ஹேதப்³பா³. அயஞ்ஹி அத்தனோமதி நாம ஸப்³ப³து³ப்³ப³லா, அத்தனோமதிதோ ஆசரியவாதோ³ ப³லவதரோ.

ஆசரியவாதோ³பி ஸுத்தானுலோமே ஓதாரேதப்³போ³. தத்த² ஓதரந்தோ ஸமேந்தோ ஏவ க³ஹேதப்³போ³, இதரோ ந க³ஹேதப்³போ³. ஆசரியவாத³தோ ஹி ஸுத்தானுலோமம் ப³லவதரம்.

ஸுத்தானுலோமம்பி ஸுத்தே ஓதாரேதப்³ப³ம். தத்த² ஓதரந்தம் ஸமேந்தமேவ க³ஹேதப்³ப³ம், இதரம் ந க³ஹேதப்³ப³ம். ஸுத்தானுலோமதோ ஹி ஸுத்தமேவ ப³லவதரம். ஸுத்தஞ்ஹி அப்படிவத்தியம் காரகஸங்க⁴ஸதி³ஸம் பு³த்³தா⁴னம் டி²தகாலஸதி³ஸம். தஸ்மா யதா³ த்³வே பி⁴க்கூ² ஸாகச்ச²ந்தி, ஸகவாதீ³ ஸுத்தம் க³ஹேத்வா கதே²தி, பரவாதீ³ ஸுத்தானுலோமம். தேஹி அஞ்ஞமஞ்ஞம் கே²பம் வா க³ரஹம் வா அகத்வா ஸுத்தானுலோமம் ஸுத்தே ஓதாரேதப்³ப³ம். ஸசே ஓதரதி ஸமேதி, க³ஹேதப்³ப³ம், நோ சே, ந க³ஹேதப்³ப³ம், ஸுத்தஸ்மிம்யேவ டா²தப்³ப³ம். அதா²யம் ஸுத்தம் க³ஹேத்வா கதே²தி, பரோ ஆசரியவாத³ம். தேஹிபி அஞ்ஞமஞ்ஞம் கே²பம் வா க³ரஹம் வா அகத்வா ஆசரியவாதோ³ ஸுத்தே ஓதாரேதப்³போ³. ஸசே ஓதரதி ஸமேதி, க³ஹேதப்³போ³. அனோதரந்தோ அஸமேந்தோ ச கா³ரய்ஹாசரியவாதோ³ ந க³ஹேதப்³போ³, ஸுத்தஸ்மிம்யேவ டா²தப்³ப³ம். அதா²யம் ஸுத்தம் க³ஹேத்வா கதே²தி, பரோ அத்தனோமதிம். தேஹிபி அஞ்ஞமஞ்ஞம் கே²பம் வா க³ரஹம் வா அகத்வா அத்தனோமதி ஸுத்தே ஓதாரேதப்³பா³. ஸசே ஓதரதி ஸமேதி, க³ஹேதப்³பா³, நோ சே, ந க³ஹேதப்³பா³, ஸுத்தஸ்மிம்யேவ டா²தப்³ப³ம்.

அதா²யம் ஸுத்தானுலோமம் க³ஹேத்வா கதே²தி, பரோ ஸுத்தம், ஸுத்தானுலோமே ஓதாரேதப்³ப³ம். ஸசே ஓதரதி ஸமேதி, திஸ்ஸோ ஸங்கீ³தியோ ஆருள்ஹம் பாளிஆக³தம் பஞ்ஞாயதி, க³ஹேதப்³ப³ம், நோ சே ததா² பஞ்ஞாயதி, ந ஓதரதி ந ஸமேதி, பா³ஹிரகஸுத்தம் வா ஹோதி ஸிலோகோ வா அஞ்ஞம் வா கா³ரய்ஹஸுத்தம் கு³ள்ஹவேஸ்ஸந்தரகு³ள்ஹவினயவேத³ல்லாதீ³னம் அஞ்ஞதரதோ ஆப⁴தம், ந க³ஹேதப்³ப³ம், ஸுத்தானுலோமஸ்மிம்யேவ டா²தப்³ப³ம். அதா²யம் ஸுத்தானுலோமம் க³ஹேத்வா கதே²தி, பரோ ஆசரியவாத³ம். ஆசரியவாதோ³ ஸுத்தானுலோமே ஓதாரேதப்³போ³. ஸசே ஓதரதி ஸமேதி, க³ஹேதப்³போ³. நோ சே, ந க³ஹேதப்³போ³, ஸுத்தானுலோமேயேவ டா²தப்³ப³ம். அதா²யம் ஸுத்தானுலோமம் க³ஹேத்வா கதே²தி, பரோ அத்தனோமதிம். அத்தனோமதி ஸுத்தானுலோமே ஓதாரேதப்³பா³. ஸசே ஓதரதி ஸமேதி, க³ஹேதப்³பா³. நோ சே, ந க³ஹேதப்³பா³, ஸுத்தானுலோமேயேவ டா²தப்³ப³ம்.

அதா²யம் ஆசரியவாத³ம் க³ஹேத்வா கதே²தி, பரோ ஸுத்தம். ஸுத்தம் ஆசரியவாதே³ ஓதாரேதப்³ப³ம். ஸசே ஓதரதி ஸமேதி, க³ஹேதப்³ப³ம். இதரம் கா³ரய்ஹஸுத்தம் ந க³ஹேதப்³ப³ம், ஆசரியவாதே³யேவ டா²தப்³ப³ம். அதா²யம் ஆசரியவாத³ம் க³ஹேத்வா கதே²தி, பரோ ஸுத்தானுலோமம். ஸுத்தானுலோமம் ஆசரியவாதே³ ஓதாரேதப்³ப³ம். ஓதரந்தம் ஸமேந்தமேவ க³ஹேதப்³ப³ம், இதரம் ந க³ஹேதப்³ப³ம், ஆசரியவாதே³யேவ டா²தப்³ப³ம். அதா²யம் ஆசரியவாத³ம் க³ஹேத்வா கதே²தி, பரோ அத்தனோமதிம். அத்தனோமதி ஆசரியவாதே³ ஓதாரேதப்³பா³. ஸசே ஓதரதி ஸமேதி, க³ஹேதப்³பா³. நோ சே, ந க³ஹேதப்³பா³, ஆசரியவாதே³யேவ டா²தப்³ப³ம்.

அத² பனாயம் அத்தனோமதிம் க³ஹேத்வா கதே²தி, பரோ ஸுத்தம். ஸுத்தம் அத்தனோமதியம் ஓதாரேதப்³ப³ம். ஸசே ஓதரதி ஸமேதி, க³ஹேதப்³ப³ம். இதரம் கா³ரய்ஹஸுத்தம் ந க³ஹேதப்³ப³ம், அத்தனோமதியமேவ டா²தப்³ப³ம். அதா²யம் அத்தனோமதிம் க³ஹேத்வா கதே²தி, பரோ ஸுத்தானுலோமம். ஸுத்தானுலோமம் அத்தனோமதியம் ஓதாரேதப்³ப³ம். ஓதரந்தம் ஸமேந்தமேவ க³ஹேதப்³ப³ம், இதரம் ந க³ஹேதப்³ப³ம், அத்தனோமதியமேவ டா²தப்³ப³ம். அதா²யம் அத்தனோமதிம் க³ஹேத்வா கதே²தி, பரோ ஆசரியவாத³ம். ஆசரியவாதோ³ அத்தனோமதியம் ஓதாரேதப்³போ³. ஸசே ஓதரதி ஸமேதி, க³ஹேதப்³போ³. இதரோ கா³ரய்ஹாசரியவாதோ³ ந க³ஹேதப்³போ³, அத்தனோமதியமேவ டா²தப்³ப³ம், அத்தனோ க³ஹணமேவ ப³லியம் காதப்³ப³ம். ஸப்³ப³ட்டா²னேஸு ச கே²போ வா க³ரஹா வா ந காதப்³பா³தி.

அத² பனாயம் கப்பியந்தி க³ஹேத்வா கதே²தி, பரோ அகப்பியந்தி, ஸுத்தே ச ஸுத்தானுலோமே ச ஓதாரேதப்³ப³ம். ஸசே கப்பியம் ஹோதி, கப்பியே டா²தப்³ப³ம். ஸசே அகப்பியம், அகப்பியே டா²தப்³ப³ம். அதா²யம் தஸ்ஸ கப்பியபா⁴வஸாத⁴கம் ஸுத்ததோ ப³ஹும் காரணஞ்ச வினிச்ச²யஞ்ச த³ஸ்ஸேதி, பரோ காரணம் ந விந்த³தி, கப்பியேவ டா²தப்³ப³ம். அத² பரோ தஸ்ஸ அகப்பியபா⁴வஸாத⁴கம் ஸுத்ததோ ப³ஹும் காரணஞ்ச வினிச்ச²யஞ்ச த³ஸ்ஸேதி, அனேன அத்தனோ க³ஹணந்தி கத்வா த³ள்ஹம் ஆதா³ய ந டா²தப்³ப³ம், ‘‘ஸாதூ⁴’’தி ஸம்படிச்சி²த்வா அகப்பியே ஏவ டா²தப்³ப³ம். அத² த்³வின்னம்பி காரணச்சா²யா தி³ஸ்ஸதி, படிக்கி²த்தபா⁴வோயேவ ஸாது⁴, அகப்பியே டா²தப்³ப³ம். வினயஞ்ஹி பத்வா கப்பியாகப்பியவிசாரணம் ஆக³ம்ம ருந்தி⁴தப்³ப³ம், கா³ள்ஹம் கத்தப்³ப³ம், ஸோதம் பச்சி²ந்தி³தப்³ப³ம், க³ருகபா⁴வேயேவ டா²தப்³ப³ம்.

அத² பனாயம் அகப்பியந்தி க³ஹேத்வா கதே²தி, பரோ கப்பியந்தி, ஸுத்தே ச ஸுத்தானுலோமே ச ஓதாரேதப்³ப³ம். ஸசே கப்பியம் ஹோதி, கப்பியே டா²தப்³ப³ம். ஸசே அகப்பியம், அகப்பியே டா²தப்³ப³ம். அதா²யம் ப³ஹூஹி ஸுத்தவினிச்ச²யகாரணேஹி அகப்பியபா⁴வம் த³ஸ்ஸேதி, பரோ காரணம் ந விந்த³தி, அகப்பியே டா²தப்³ப³ம். அத² பரோ ப³ஹூஹி ஸுத்தவினிச்ச²யகாரணேஹி கப்பியபா⁴வம் த³ஸ்ஸேதி, அயம் காரணம் ந விந்த³தி, கப்பியே டா²தப்³ப³ம். அத² த்³வின்னம்பி காரணச்சா²யா தி³ஸ்ஸதி, அத்தனோ க³ஹணம் ந விஸ்ஸஜ்ஜேதப்³ப³ம். யதா² சாயம் கப்பியாகப்பியே அகப்பியகப்பியே ச வினிச்ச²யோ வுத்தோ, ஏவம் அனாபத்திஆபத்திவாதே³ ஆபத்தானாபத்திவாதே³ ச, லஹுகக³ருகாபத்திவாதே³ க³ருகலஹுகாபத்திவாதே³ சாபி வினிச்ச²யோ வேதி³தப்³போ³. நாமமத்தேயேவ ஹி ஏத்த² நானம், யோஜனானயே நானம் நத்தி², தஸ்மா ந வித்தா²ரிதம்.

ஏவம் கப்பியாகப்பியாதி³வினிச்ச²யே உப்பன்னே யோ ஸுத்தஸுத்தானுலோமஆசரியவாத³அத்தனோமதீஸு அதிரேககாரணம் லப⁴தி, தஸ்ஸ வாதே³ டா²தப்³ப³ம், ஸப்³ப³ஸோ பன காரணவினிச்ச²யம் அலப⁴ந்தேன ஸுத்தம் ந ஜஹிதப்³ப³ம், ஸுத்தஸ்மிம்யேவ டா²தப்³ப³ந்தி. ஏவம் ஸகலவினயவினிச்ச²யே கோஸல்லம் பத்த²யந்தேன அயம் சதுப்³பி³தோ⁴ வினயோ ஜானிதப்³போ³.

இமஞ்ச பன சதுப்³பி³த⁴ம் வினயம் ஞத்வாபி வினயத⁴ரேன புக்³க³லேன திலக்க²ணஸமன்னாக³தேன ப⁴விதப்³ப³ம். தீணி ஹி வினயத⁴ரஸ்ஸ லக்க²ணானி இச்சி²தப்³பா³னி. கதமானி தீணி? ஸுத்தஞ்சஸ்ஸ ஸ்வாக³தம் ஹோதி ஸுப்பவத்தி ஸுவினிச்சி²தம் ஸுத்ததோ அனுப்³யஞ்ஜனஸோதி இத³மேகம் லக்க²ணம். வினயே கோ² பன டி²தோ ஹோதி அஸம்ஹீரோதி இத³ம் து³தியம். ஆசரியபரம்பரா கோ² பனஸ்ஸ ஸுக்³க³ஹிதா ஹோதி ஸுமனஸிகதா ஸூபதா⁴ரிதாதி இத³ம் ததியம்.

தத்த² ஸுத்தம் நாம ஸகலம் வினயபிடகம். தத³ஸ்ஸ ஸ்வாக³தம் ஹோதீதி ஸுட்டு² ஆக³தம். ஸுப்பவத்தீதி ஸுட்டு² பவத்தம் பகு³ணம் வாசுக்³க³தம். ஸுவினிச்சி²தம் ஸுத்தஸோ அனுப்³யஞ்ஜனஸோதி பாளிதோ ச பரிபுச்ச²தோ ச அட்ட²கதா²தோ ச ஸுவினிச்சி²தம் ஹோதி கங்கா²சே²த³னம் கத்வா உக்³க³ஹிதம். வினயே கோ² பன டி²தோ ஹோதீதி வினயே லஜ்ஜிபா⁴வேன பதிட்டி²தோ ஹோதி. அலஜ்ஜீ ஹி ப³ஹுஸ்ஸுதோபி ஸமானோ லாப⁴க³ருகதாய தந்திம் விஸம்வாதே³த்வா உத்³த⁴ம்மம் உப்³பி³னயம் ஸத்து²ஸாஸனம் தீ³பேத்வா ஸாஸனே மஹந்தம் உபத்³த³வம் கரோதி, ஸங்க⁴பே⁴த³ம்பி ஸங்க⁴ராஜிம்பி உப்பாதே³தி. லஜ்ஜீ பன குக்குச்சகோ ஸிக்கா²காமோ ஜீவிதஹேதுபி தந்திம் அவிஸம்வாதே³த்வா த⁴ம்மமேவ வினயமேவ தீ³பேதி, ஸத்து²ஸாஸனம் க³ருகம் கத்வா ட²பேதி. ததா² ஹி புப்³பே³ மஹாதே²ரா திக்க²த்தும் வாசம் நிச்சா²ரேஸும் ‘‘அனாக³தே லஜ்ஜீ ரக்கி²ஸ்ஸதி, லஜ்ஜீ ரக்கி²ஸ்ஸதி, லஜ்ஜீ ரக்கி²ஸ்ஸதீ’’தி (பாரா. அட்ட². 1.45). ஏவம் யோ லஜ்ஜீ, ஸோ வினயம் அவிஜஹந்தோ அவோக்கமந்தோ லஜ்ஜிபா⁴வேனேவ வினயே டி²தோ ஹோதி ஸுப்பதிட்டி²தோதி.

அஸம்ஹீரோதி ஸம்ஹீரோ நாம யோ பாளியம் வா அட்ட²கதா²யம் வா ஹேட்ட²தோ வா உபரிதோ வா பத³படிபாடியா வா புச்சி²யமானோ வித்து²னதி விப்ப²ந்த³தி ஸந்திட்டி²தும் ந ஸக்கோதி, யம் யம் பரேன வுச்சதி, தம் தம் அனுஜானாதி, ஸகவாத³ம் ச²ட்³டே³த்வா பரவாத³ம் க³ண்ஹாதி. யோ பன பாளியம் வா அட்ட²கதா²யம் வா ஹேட்டு²பரியேன வா பத³படிபாடியா வா புச்சி²யமானோ ந வித்து²னதி ந விப்ப²ந்த³தி, ஏகேகலோமம் ஸண்டா³ஸேன க³ண்ஹந்தோ விய ‘‘ஏவம் மயம் வதா³ம, ஏவம் நோ ஆசரியா வத³ந்தீ’’தி விஸ்ஸஜ்ஜேதி, யம்ஹி பாளி ச பாளிவினிச்ச²யோ ச ஸுவண்ணபா⁴ஜனே பக்கி²த்தஸீஹவஸா விய பரிக்க²யம் பரியாதா³னம் அக³ச்ச²ந்தோ திட்ட²தி, அயம் வுச்சதி ‘‘அஸம்ஹீரோ’’தி.

ஆசரியபரம்பரா கோ² பனஸ்ஸ ஸுக்³க³ஹிதா ஹோதீதி தே²ரபரம்பரா வம்ஸபரம்பரா அஸ்ஸ ஸுட்டு² க³ஹிதா ஹோதி. ஸுமனஸிகதாதி ஸுட்டு² மனஸிகதா, ஆவஜ்ஜிதமத்தே உஜ்ஜலிதபதீ³போ விய ஹோதி. ஸூபதா⁴ரிதாதி ஸுட்டு² உபதா⁴ரிதா புப்³பா³பரானுஸந்தி⁴தோ அத்த²தோ காரணதோ ச உபதா⁴ரிதா. அத்தனோமதிம் பஹாய ஆசரியஸுத்³தி⁴யா வத்தா ஹோதி, ‘‘மய்ஹம் ஆசரியோ அஸுகாசரியஸ்ஸ ஸந்திகே உக்³க³ண்ஹி, ஸோ அஸுகஸ்ஸா’’தி ஏவம் ஸப்³ப³ம் ஆசரியபரம்பரம் தே²ரவாத³ங்க³ம் ஹரித்வா யாவ உபாலித்தே²ரோ ஸம்மாஸம்பு³த்³த⁴ஸ்ஸ ஸந்திகே உக்³க³ண்ஹீதி பாபேத்வா ட²பேதி, ததோபி ஆஹரித்வா உபாலித்தே²ரோ ஸம்மாஸம்பு³த்³த⁴ஸ்ஸ ஸந்திகே உக்³க³ண்ஹி, தா³ஸகத்தே²ரோ அத்தனோ உபஜ்ஜா²யஸ்ஸ உபாலித்தே²ரஸ்ஸ, ஸோணத்தே²ரோ அத்தனோ உபஜ்ஜா²யஸ்ஸ தா³ஸகத்தே²ரஸ்ஸ, ஸிக்³க³வத்தே²ரோ அத்தனோ உபஜ்ஜா²யஸ்ஸ ஸோணத்தே²ரஸ்ஸ, மோக்³க³லிபுத்ததிஸ்ஸத்தே²ரோ அத்தனோ உபஜ்ஜா²யஸ்ஸ ஸிக்³க³வத்தே²ரஸ்ஸ சண்ட³வஜ்ஜித்தே²ரஸ்ஸ சாதி ஏவம் ஸப்³ப³ம் ஆசரியபரம்பரம் தே²ரவாத³ங்க³ம் ஆஹரித்வா அத்தனோ ஆசரியம் பாபேத்வா ட²பேதி. ஏவம் உக்³க³ஹிதா ஹி ஆசரியபரம்பரா ஸுக்³க³ஹிதா ஹோதி. ஏவம் அஸக்கோந்தேன பன அவஸ்ஸம் த்³வே தயோ பரிவட்டா உக்³க³ஹேதப்³பா³. ஸப்³ப³பச்சி²மேன ஹி நயேன யதா² ஆசரியோ ஆசரியாசரியோ ச பாளிஞ்ச பரிபுச்ச²ஞ்ச வத³ந்தி, ததா² ஞாதும் வட்டதி.

இமேஹி ச பன தீஹி லக்க²ணேஹி ஸமன்னாக³தேன வினயத⁴ரேன வத்து²வினிச்ச²யத்த²ம் ஸன்னிபதிதே ஸங்கே⁴ ஓதிண்ணே வத்து²ஸ்மிம் சோத³கேன ச சுதி³தகேன ச வுத்தே வத்தப்³பே³ ஸஹஸா அவினிச்சி²னித்வாவ ச² டா²னானி ஓலோகேதப்³பா³னி. கதமானி ச²? வத்து² ஓலோகேதப்³ப³ம், மாதிகா ஓலோகேதப்³பா³, பத³பா⁴ஜனீயம் ஓலோகேதப்³ப³ம், திகபரிச்சே²தோ³ ஓலோகேதப்³போ³, அந்தராபத்தி ஓலோகேதப்³பா³, அனாபத்தி ஓலோகேதப்³பா³தி.

வத்து²ம் ஓலோகேந்தோபி ஹி ‘‘திணேன வா பண்ணேன வா படிச்சா²தே³த்வா ஆக³ந்தப்³ப³ம், ந த்வேவ நக்³கே³ன ஆக³ந்தப்³ப³ம், யோ ஆக³ச்சே²ய்ய, ஆபத்தி து³க்கடஸ்ஸா’’தி (பாரா. 517) ஏவம் ஏகச்சம் ஆபத்திம் பஸ்ஸதி, ஸோ தம் ஸுத்தம் ஆனேத்வா தம் அதி⁴கரணம் வூபஸமேஸ்ஸதி.

மாதிகம் ஓலோகேந்தோபி ‘‘ஸம்பஜானமுஸாவாதே³ பாசித்திய’’ந்திஆதி³னா (பாசி. 3) நயேன பஞ்சன்னம் ஆபத்தீனம் அஞ்ஞதரம் ஆபத்திம் பஸ்ஸதி, ஸோ தம் ஸுத்தம் ஆனேத்வா தம் அதி⁴கரணம் வூபஸமேஸ்ஸதி.

பத³பா⁴ஜனீயம் ஓலோகேந்தோபி ‘‘அக்க²யிதே ஸரீரே மேது²னம் த⁴ம்மம் படிஸேவதி, ஆபத்தி பாராஜிகஸ்ஸ. யேபு⁴ய்யேன க²யிதே ஸரீரே மேது²னம் த⁴ம்மம் படிஸேவதி, ஆபத்தி து²ல்லச்சயஸ்ஸா’’திஆதி³னா (பாரா. 59 அத்த²தோ ஸமானம்) நயேன ஸத்தன்னம் ஆபத்தீனம் அஞ்ஞதரம் ஆபத்திம் பஸ்ஸதி, ஸோ பத³பா⁴ஜனீயதோ ஸுத்தம் ஆனேத்வா தம் அதி⁴கரணம் வூபஸமேஸ்ஸதி.

திகபரிச்சே²த³ம் ஓலோகேந்தோபி திகஸங்கா⁴தி³ஸேஸம் வா திகபாசித்தியம் வா திகது³க்கடம் வா அஞ்ஞதரம் வா ஆபத்திம் திகபரிச்சே²தே³ பஸ்ஸதி, ஸோ ததோ ஸுத்தம் ஆனேத்வா தம் அதி⁴கரணம் வூபஸமேஸ்ஸதி.

அந்தராபத்திம் ஓலோகேந்தோபி ‘‘படிலாதம் உக்கி²பதி, ஆபத்தி து³க்கடஸ்ஸா’’தி (பாசி. 355) ஏவம் யா ஸிக்கா²பத³ந்தரேஸு அந்தராபத்தி ஹோதி, தம் பஸ்ஸதி, ஸோ தம் ஸுத்தம் ஆனேத்வா தம் அதி⁴கரணம் வூபஸமேஸ்ஸதி.

அனாபத்திம் ஓலோகேந்தோபி ‘‘அனாபத்தி பி⁴க்கு² அஸாதி³யந்தஸ்ஸ, அதே²ய்யசித்தஸ்ஸ, ந மரணாதி⁴ப்பாயஸ்ஸ, அனுல்லபனாதி⁴ப்பாயஸ்ஸ, ந மோசனாதி⁴ப்பாயஸ்ஸ அஸஞ்சிச்ச அஸதியா அஜானந்தஸ்ஸா’’தி (பாரா. 72, 136, 180, 225, 263 தோ²கம் தோ²கம் விஸதி³ஸம்) ஏவம் தஸ்மிம் தஸ்மிம் ஸிக்கா²பதே³ நித்³தி³ட்ட²ம் அனாபத்திம் பஸ்ஸதி, ஸோ தம் ஸுத்தம் ஆனேத்வா தம் அதி⁴கரணம் வூபஸமேஸ்ஸதி.

யோ ஹி பி⁴க்கு² சதுப்³பி³த⁴வினயகோவிதோ³ திலக்க²ணஸம்பன்னோ இமானி ச² டா²னானி ஓலோகேத்வா அதி⁴கரணம் வூபஸமேஸ்ஸதி, தஸ்ஸ வினிச்ச²யோ அப்படிவத்தியோ பு³த்³தே⁴ன ஸயம் நிஸீதி³த்வா வினிச்சி²தஸதி³ஸோ ஹோதி. தம் சே ஏவம் வினிச்ச²யகுஸலம் பி⁴க்கு²ம் கோசி கதஸிக்கா²பத³வீதிக்கமோ பி⁴க்கு² உபஸங்கமித்வா அத்தனோ குக்குச்சம் புச்சே²ய்ய, தேன ஸாது⁴கம் ஸல்லக்கே²த்வா ஸசே அனாபத்தி ஹோதி, ‘‘அனாபத்தீ’’தி வத்தப்³ப³ம். ஸசே பன ஆபத்தி ஹோதி, ஸா தே³ஸனாகா³மினீ சே, ‘‘தே³ஸனாகா³மினீ’’தி வத்தப்³ப³ம். வுட்டா²னகா³மினீ சே, ‘‘வுட்டா²னகா³மினீ’’தி வத்தப்³ப³ம். அத²ஸ்ஸ பாராஜிகச்சா²யா தி³ஸ்ஸதி, ‘‘பாராஜிகாபத்தீ’’தி ந வத்தப்³ப³ம். கஸ்மா? மேது²னத⁴ம்மவீதிக்கமோ ஹி உத்தரிமனுஸ்ஸத⁴ம்மவீதிக்கமோ ச ஓளாரிகோ, அதி³ன்னாதா³னமனஉஸ்ஸவிக்³க³ஹவீதிக்கமா பன ஸுகு²மா சித்தலஹுகா. தே ஸுகு²மேனேவ ஆபஜ்ஜதி, ஸுகு²மேன ரக்க²தி, தஸ்மா விஸேஸேன தம்வத்து²கம் குக்குச்சம் புச்சி²யமானோ ‘‘ஆபத்தீ’’தி அவத்வா ஸசஸ்ஸ ஆசரியோ த⁴ரதி, ததோ தேன ஸோ பி⁴க்கு² ‘‘அம்ஹாகம் ஆசரியம் புச்சா²’’தி பேஸேதப்³போ³. ஸசே ஸோ புன ஆக³ந்த்வா ‘‘தும்ஹாகம் ஆசரியோ ஸுத்ததோ நயதோ ஓலோகேத்வா ‘ஸதேகிச்சோ²’தி மம் ஆஹா’’தி வத³தி, ததோ தேன ஸோ ‘‘ஸாது⁴ ஸுட்டு² யம் ஆசரியோ ப⁴ணதி, தம் கரோஹீ’’தி வத்தப்³போ³. அத² பனஸ்ஸ ஆசரியோ நத்தி², ஸத்³தி⁴ம் உக்³க³ஹிதத்தே²ரோ பன அத்தி², தஸ்ஸ ஸந்திகம் பேஸேதப்³போ³ ‘‘அம்ஹேஹி ஸஹ உக்³க³ஹிதத்தே²ரோ க³ணபாமோக்கோ², தம் க³ந்த்வா புச்சா²’’தி. தேனபி ‘‘ஸதேகிச்சோ²’’தி வினிச்சி²தே ‘‘ஸாது⁴ ஸுட்டு² தஸ்ஸ வசனம் கரோஹீ’’தி வத்தப்³போ³. அத² தஸ்ஸ ஸத்³தி⁴ம் உக்³க³ஹிதத்தே²ரோபி நத்தி², அந்தேவாஸிகோ பண்டி³தோ அத்தி², தஸ்ஸ ஸந்திகம் பேஸேதப்³போ³ ‘‘அஸுகத³ஹரம் க³ந்த்வா புச்சா²’’தி. தேனபி ‘‘ஸதேகிச்சோ²’’தி வினிச்சி²தே ‘‘ஸாது⁴ ஸுட்டு² தஸ்ஸ வசனம் கரோஹீ’’தி வத்தப்³போ³. அத² த³ஹரஸ்ஸபி பாராஜிகச்சா²யாவ உபட்டா²தி, தேனபி ‘‘பாராஜிகோஸீ’’தி ந வத்தப்³போ³. து³ல்லபோ⁴ ஹி பு³த்³து⁴ப்பாதோ³, ததோ து³ல்லப⁴தரா பப்³ப³ஜ்ஜா ச உபஸம்பதா³ ச. ஏவம் பன வத்தப்³போ³ ‘‘விவித்தம் ஓகாஸம் ஸம்மஜ்ஜித்வா தி³வாவிஹாரம் நிஸீதி³த்வா ஸீலானி விஸோதே⁴த்வா த்³வத்திம்ஸாகாரம் தாவ மனஸிகரோஹீ’’தி. ஸசே தஸ்ஸ அரோக³ம் ஸீலம், கம்மட்டா²னம் க⁴டயதி, ஸங்கா²ரா பாகடா ஹுத்வா உபட்ட²ஹந்தி, உபசாரப்பனாப்பத்தம் விய சித்தம் ஏகக்³க³ம் ஹோதி, தி³வஸம் அதிக்கந்தம்பி ந ஜானாதி, ஸோ தி³வஸாதிக்கமே உபட்டா²னம் ஆக³தோ ஏவம் வத்தப்³போ³ ‘‘கீதி³ஸா தே சித்தப்பவத்தீ’’தி. ஆரோசிதாய ச சித்தபவத்தியா வத்தப்³போ³ ‘‘பப்³ப³ஜ்ஜா நாம சித்தவிஸுத்³த⁴த்தா²ய, அப்பமத்தோ ஸமணத⁴ம்மம் கரோஹீ’’தி.

யஸ்ஸ பன ஸீலம் பி⁴ன்னம் ஹோதி, தஸ்ஸ கம்மட்டா²னம் ந க⁴டயதி, பதோதா³பி⁴துன்னம் விய சித்தம் விகம்பதி, விப்படிஸாரக்³கி³னா ட³ய்ஹதி, தத்தபாஸாணே நிஸின்னோ விய தங்க²ணேயேவ வுட்டா²தி. ஸோ ஆக³தோ ‘‘கா தே சித்தபவத்தீ’’தி புச்சி²தப்³போ³. ஆரோசிதாய சித்தபவத்தியா ‘‘நத்தி² லோகே ரஹோ நாம பாபகம்மம் பகுப்³ப³தோ. ஸப்³ப³பட²மஞ்ஹி பாபம் கரோந்தோ அத்தனா ஜானாதி. அத²ஸ்ஸ ஆரக்க²தே³வதா பரசித்தவிதூ³ ஸமணப்³ராஹ்மணா அஞ்ஞா ச தே³வதா ஜானந்தி, த்வம்யேவ தா³னி தவ ஸோத்தி²ம் பரியேஸாஹீ’’தி வத்தப்³போ³. ஏவம் கதவீதிக்கமேனேவ பி⁴க்கு²னா ஸயமேவ ஆக³ந்த்வா ஆரோசிதே படிபஜ்ஜிதப்³ப³ம்.

235. இதா³னி யா ஸா புப்³பே³ வுத்தப்பபே⁴தா³ சோத³னா, தஸ்ஸாயேவ ஸம்பத்திவிபத்திஜானனத்த²ம் ஆதி³மஜ்ஜ²பரியோஸானாதீ³னம் வஸேன வினிச்ச²யோ வேதி³தப்³போ³. ஸேய்யதி²த³ம், சோத³னாய கோ ஆதி³, கிம் மஜ்ஜே², கிம் பரியோஸானம்? சோத³னாய ‘‘அஹம் தம் வத்துகாமோ, கரோது மே ஆயஸ்மா ஓகாஸ’’ந்தி ஏவம் ஓகாஸகம்மம் ஆதி³. ஓதிண்ணேன வத்து²னா சோதே³த்வா ஸாரேத்வா வினிச்ச²யோ மஜ்ஜே². ஆபத்தியம் வா அனாபத்தியம் வா பதிட்டா²பனேன ஸமதோ² பரியோஸானம்.

சோத³னாய கதி மூலானி, கதி வத்தூ²னி, கதி பூ⁴மியோ? சோத³னாய த்³வே மூலானி ஸமூலிகா வா அமூலிகா வா. தீணி வத்தூ²னி தி³ட்ட²ம் ஸுதம் பரிஸங்கிதம். பஞ்ச பூ⁴மியோ காலேன வக்கா²மி, நோ அகாலேன, பூ⁴தேன வக்கா²மி, நோ அபூ⁴தேன, ஸண்ஹேன வக்கா²மி, நோ ப²ருஸேன, அத்த²ஸம்ஹிதேன வக்கா²மி, நோ அனத்த²ஸம்ஹிதேன, மேத்தசித்தோ வக்கா²மி, நோ தோ³ஸந்தரோதி. இமாய ச பன சோத³னாய சோத³கேன புக்³க³லேன ‘‘பரிஸுத்³த⁴காயஸமாசாரோ நு கோ²ம்ஹீ’’திஆதி³னா (பரி. 436) நயேன உபாலிபஞ்சகேஸு வுத்தேஸு பன்னரஸஸு த⁴ம்மேஸு பதிட்டா²தப்³ப³ம். சுதி³தகேன த்³வீஸு த⁴ம்மேஸு பதிட்டா²தப்³ப³ம் ஸச்சே ச அகுப்பே சாதி.

அனுவிஜ்ஜகேன (பரி. 360) ச சோத³கோ புச்சி²தப்³போ³ ‘‘யம் கோ² த்வம், ஆவுஸோ, இமம் பி⁴க்கு²ம் சோதே³ஸி, கிம்ஹி நம் சோதே³ஸி, ஸீலவிபத்தியா சோதே³ஸி, ஆசாரவிபத்தியா சோதே³ஸி, தி³ட்டி²விபத்தியா சோதே³ஸீ’’தி. ஸோ சே ஏவம் வதே³ய்ய ‘‘ஸீலவிபத்தியா வா சோதே³மி, ஆசாரவிபத்தியா வா சோதே³மி, தி³ட்டி²விபத்தியா வா சோதே³மீ’’தி. ஸோ ஏவமஸ்ஸ வசனீயோ ‘‘ஜானாஸி பனாயஸ்மா ஸீலவிபத்திம், ஜானாஸி ஆசாரவிபத்திம், ஜானாஸி தி³ட்டி²விபத்தி’’ந்தி. ஸோ சே ஏவம் வதே³ய்ய ‘‘ஜானாமி கோ² அஹம், ஆவுஸோ, ஸீலவிபத்திம், ஜானாமி ஆசாரவிபத்திம், ஜானாமி தி³ட்டி²விபத்தி’’ந்தி. ஸோ ஏவமஸ்ஸ வசனீயோ ‘‘கதமா பனாவுஸோ, ஸீலவிபத்தி, கதமா ஆசாரவிபத்தி, கதமா தி³ட்டி²விபத்தீ’’தி? ஸோ சே ஏவம் வதே³ய்ய ‘‘சத்தாரி பாராஜிகானி தேரஸ ஸங்கா⁴தி³ஸேஸா, அயம் ஸீலவிபத்தி. து²ல்லச்சயம் பாசித்தியம் பாடிதே³ஸனீயம் து³க்கடம் து³ப்³பா⁴ஸிதம், அயம் ஆசாரவிபத்தி. மிச்சா²தி³ட்டி² அந்தக்³கா³ஹிகா தி³ட்டி², அயம் தி³ட்டி²விபத்தீ’’தி.

ஸோ ஏவமஸ்ஸ வசனீயோ ‘‘யம் கோ² த்வம், ஆவுஸோ, இமம் பி⁴க்கு²ம் சோதே³ஸி, தி³ட்டே²ன வா சோதே³ஸி, ஸுதேன வா சோதே³ஸி, பரிஸங்காய வா சோதே³ஸீ’’தி. ஸோ சே ஏவம் வதே³ய்ய ‘‘தி³ட்டே²ன வா சோதே³மி, ஸுதேன வா சோதே³மி, பரிஸங்காய வா சோதே³மீ’’தி. ஸோ ஏவமஸ்ஸ வசனீயோ ‘‘யம் கோ² த்வம், ஆவுஸோ, இமம் பி⁴க்கு²ம் தி³ட்டே²ன சோதே³ஸி, கிம் தே தி³ட்ட²ம், கிந்தி தே தி³ட்ட²ம், கதா³ தே தி³ட்ட²ம், கத்த² தே தி³ட்ட²ம், பாராஜிகம் அஜ்ஜா²பஜ்ஜந்தோ தி³ட்டோ², ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ², து²ல்லச்சயம் பாசித்தியம் பாடிதே³ஸனீயம் து³க்கடம் து³ப்³பா⁴ஸிதம் அஜ்ஜா²பஜ்ஜந்தோ தி³ட்டோ², கத்த² சாயம் பி⁴க்கு² அஹோஸி, கத்த² ச த்வம் கரோஸி, கிஞ்ச த்வம் கரோஸி, கிம் அயம் பி⁴க்கு² கரோதீ’’தி?

ஸோ சே ஏவம் வதே³ய்ய ‘‘ந கோ² அஹம், ஆவுஸோ, இமம் பி⁴க்கு²ம் தி³ட்டே²ன சோதே³மி, அபிச ஸுதேன சோதே³மீ’’தி. ஸோ ஏவமஸ்ஸ வசனீயோ ‘‘யம் கோ² த்வம், ஆவுஸோ, இமம் பி⁴க்கு²ம் ஸுதேன சோதே³ஸி, கிம் தே ஸுதம், கிந்தி தே ஸுதம், கதா³ தே ஸுதம், கத்த² தே ஸுதம், பாராஜிகம் அஜ்ஜா²பன்னோதி ஸுதம், ஸங்கா⁴தி³ஸேஸம் அஜ்ஜா²பன்னோதி ஸுதம், து²ல்லச்சயம் பாசித்தியம் பாடிதே³ஸனீயம் து³க்கடம் து³ப்³பா⁴ஸிதம் அஜ்ஜா²பன்னோதி ஸுதம், பி⁴க்கு²ஸ்ஸ ஸுதம், பி⁴க்கு²னியா ஸுதம், ஸிக்க²மானாய ஸுதம், ஸாமணேரஸ்ஸ ஸுதம், ஸாமணேரியா ஸுதம், உபாஸகஸ்ஸ ஸுதம், உபாஸிகாய ஸுதம், ராஜூனம் ஸுதம், ராஜமஹாமத்தானம் ஸுதம், தித்தி²யானம் ஸுதம், தித்தி²யஸாவகானம் ஸுத’’ந்தி.

ஸோ சே ஏவம் வதே³ய்ய ‘‘ந கோ² அஹம், ஆவுஸோ, இமம் பி⁴க்கு²ம் ஸுதேன சோதே³மி, அபிச பரிஸங்காய சோதே³மீ’’தி. ஸோ ஏவமஸ்ஸ வசனீயோ ‘‘யம் கோ² த்வம், ஆவுஸோ, இமம் பி⁴க்கு²ம் பரிஸங்காய சோதே³ஸி, கிம் பரிஸங்கஸி, கிந்தி பரிஸங்கஸி, கதா³ பரிஸங்கஸி, கத்த² பரிஸங்கஸி? பாராஜிகம் த⁴ம்மம் அஜ்ஜா²பன்னோதி பரிஸங்கஸி, ஸங்கா⁴தி³ஸேஸம் து²ல்லச்சயம் பாசித்தியம் பாடிதே³ஸனீயம் து³க்கடம் து³ப்³பா⁴ஸிதம் அஜ்ஜா²பன்னோதி பரிஸங்கஸி, பி⁴க்கு²ஸ்ஸ ஸுத்வா பரிஸங்கஸி, பி⁴க்கு²னியா ஸுத்வா…பே… தித்தி²யஸாவகானம் ஸுத்வா பரிஸங்கஸீ’’தி.

தி³ட்ட²ம் தி³ட்டே²ன ஸமேதி, தி³ட்டே²ன ஸம்ஸந்த³தே தி³ட்ட²ம்;

தி³ட்ட²ம் படிச்ச ந உபேதி, அஸுத்³த⁴பரிஸங்கிதோ;

ஸோ புக்³க³லோ படிஞ்ஞாய, காதப்³போ³ தேனுபோஸதோ².

ஸுதம் ஸுதேன ஸமேதி, ஸுதேன ஸம்ஸந்த³தே ஸுதம்;

ஸுதம் படிச்ச ந உபேதி, அஸுத்³த⁴பரிஸங்கிதோ;

ஸோ புக்³க³லோ படிஞ்ஞாய, காதப்³போ³ தேனுபோஸதோ².

முதம் முதேன ஸமேதி, முதேன ஸம்ஸந்த³தே முதம்;

முதம் படிச்ச ந உபேதி, அஸுத்³த⁴பரிஸங்கிதோ;

ஸோ புக்³க³லோ படிஞ்ஞாய, காதப்³போ³ தேனுபோஸதோ².

படிஞ்ஞா லஜ்ஜீஸு கதா, அலஜ்ஜீஸு ஏவம் ந விஜ்ஜதி;

ப³ஹும்பி அலஜ்ஜீ பா⁴ஸேய்ய, வத்தானுஸந்தி⁴தேன காரயேதி. (பரி. 359);

அபிசேத்த² ஸங்கா³மாவசரேன பி⁴க்கு²னா ஸங்க⁴ம் உபஸங்கமந்தேன நீசசித்தேன ஸங்கோ⁴ உபஸங்கமிதப்³போ³ ரஜோஹரணஸமேன சித்தேன, ஆஸனகுஸலேன ப⁴விதப்³ப³ம் நிஸஜ்ஜகுஸலேன, தே²ரே பி⁴க்கூ² அனுபக²ஜ்ஜந்தேன நவே பி⁴க்கூ² ஆஸனேன அப்படிபா³ஹந்தேன யதா²பதிரூபே ஆஸனே நிஸீதி³தப்³ப³ம், அனானாகதி²கேன ப⁴விதப்³ப³ம் அதிரச்சா²னகதி²கேன, ஸாமம் வா த⁴ம்மோ பா⁴ஸிதப்³போ³, பரோ வா அஜ்ஜே²ஸிதப்³போ³, அரியோ வா துண்ஹீபா⁴வோ நாதிமஞ்ஞிதப்³போ³.

ஸங்கே⁴ன அனுமதேன புக்³க³லேன அனுவிஜ்ஜகேன அனுவிஜ்ஜிதுகாமேன ந உபஜ்ஜா²யோ புச்சி²தப்³போ³, ந ஆசரியோ புச்சி²தப்³போ³, ந ஸத்³தி⁴விஹாரிகோ புச்சி²தப்³போ³, ந அந்தேவாஸிகோ புச்சி²தப்³போ³, ந ஸமானுபஜ்ஜா²யகோ புச்சி²தப்³போ³, ந ஸமானாசரியகோ புச்சி²தப்³போ³, ந ஜாதி புச்சி²தப்³பா³, ந நாமம் புச்சி²தப்³ப³ம், ந கோ³த்தம் புச்சி²தப்³ப³ம், ந ஆக³மோ புச்சி²தப்³போ³, ந குலபதே³ஸோ புச்சி²தப்³போ³, ந ஜாதிபூ⁴மி புச்சி²தப்³பா³. தம் கிம்காரணா? அத்ரஸ்ஸ பேமம் வா தோ³ஸோ வா, பேமே வா ஸதி தோ³ஸே வா ச²ந்தா³பி க³ச்சே²ய்ய தோ³ஸாபி க³ச்சே²ய்ய மோஹாபி க³ச்சே²ய்ய ப⁴யாபி க³ச்சே²ய்யாதி.

ஸங்கே⁴ன அனுமதேன புக்³க³லேன அனுவிஜ்ஜகேன அனுவிஜ்ஜிதுகாமேன ஸங்க⁴க³ருகேன ப⁴விதப்³ப³ம், நோ புக்³க³லக³ருகேன, ஸத்³த⁴ம்மக³ருகேன ப⁴விதப்³ப³ம், நோ ஆமிஸக³ருகேன, அத்த²வஸிகேன ப⁴விதப்³ப³ம், நோ பரிஸகப்பிகேன, காலேன அனுவிஜ்ஜிதப்³ப³ம், நோ அகாலேன, பூ⁴தேன அனுவிஜ்ஜிதப்³ப³ம், நோ அபூ⁴தேன, ஸண்ஹேன அனுவிஜ்ஜிதப்³ப³ம், நோ ப²ருஸேன, அத்த²ஸம்ஹிதேன அனுவிஜ்ஜிதப்³ப³ம், நோ அனத்த²ஸம்ஹிதேன, மேத்தசித்தேன அனுவிஜ்ஜிதப்³ப³ம், நோ தோ³ஸந்தரேன, ந உபகண்ணகஜப்பினா ப⁴விதப்³ப³ம், ந ஜிம்ஹம் பேக்கி²தப்³ப³ம், ந அக்கி² நிக²ணிதப்³ப³ம், ந ப⁴முகம் உக்கி²பிதப்³ப³ம், ந ஸீஸம் உக்கி²பிதப்³ப³ம், ந ஹத்த²விகாரோ காதப்³போ³, ந ஹத்த²முத்³தா³ த³ஸ்ஸேதப்³பா³.

ஆஸனகுஸலேன ப⁴விதப்³ப³ம் நிஸஜ்ஜகுஸலேன, யுக³மத்தம் பேக்க²ந்தேன அத்த²ம் அனுவிதி⁴யந்தேன ஸகே ஆஸனே நிஸீதி³தப்³ப³ம், ந ச ஆஸனா வுட்டா²தப்³ப³ம், ந வீதிஹாதப்³ப³ம், ந கும்மக்³கோ³ ஸேவிதப்³போ³, ந பா³ஹாவிக்கே²பகம் ப⁴ணிதப்³ப³ம், அதுரிதேன ப⁴விதப்³ப³ம் அஸாஹஸிகேன, அசண்டி³கதேன ப⁴விதப்³ப³ம் வசனக்க²மேன, மேத்தசித்தேன ப⁴விதப்³ப³ம் ஹிதானுகம்பினா, காருணிகேன ப⁴விதப்³ப³ம் ஹிதபரிஸக்கினா, அஸம்ப²ப்பலாபினா ப⁴விதப்³ப³ம் பரியந்தபா⁴ணினா, அவேரவஸிகேன ப⁴விதப்³ப³ம் அனஸுருத்தேன, அத்தா பரிக்³க³ஹேதப்³போ³, பரோ பரிக்³க³ஹேதப்³போ³, சோத³கோ பரிக்³க³ஹேதப்³போ³, சுதி³தகோ பரிக்³க³ஹேதப்³போ³, அத⁴ம்மசோத³கோ பரிக்³க³ஹேதப்³போ³, அத⁴ம்மசுதி³தகோ பரிக்³க³ஹேதப்³போ³, த⁴ம்மசோத³கோ பரிக்³க³ஹேதப்³போ³, த⁴ம்மசுதி³தகோ பரிக்³க³ஹேதப்³போ³, வுத்தம் அஹாபேந்தேன அவுத்தம் அப்பகாஸேந்தேன ஓதிண்ணானி பத³ப்³யஞ்ஜனானி ஸாது⁴கம் உக்³க³ஹேத்வா பரோ பரிபுச்சி²த்வா யதா²படிஞ்ஞாய காரேதப்³போ³, மந்தோ³ ஹாஸேதப்³போ³, பீ⁴ரு அஸ்ஸாஸேதப்³போ³, சண்டோ³ நிஸேதே⁴தப்³போ³, அஸுசி விபா⁴வேதப்³போ³, உஜுமத்³த³வேன ந ச²ந்தா³க³தி க³ந்தப்³பா³, ந தோ³ஸாக³தி க³ந்தப்³பா³, ந மோஹாக³தி க³ந்தப்³பா³, ந ப⁴யாக³தி க³ந்தப்³பா³, மஜ்ஜ²த்தேன ப⁴விதப்³ப³ம் த⁴ம்மேஸு ச புக்³க³லேஸு ச, ஏவஞ்ச பன அனுவிஜ்ஜகோ அனுவிஜ்ஜமானோ ஸத்து² சேவ ஸாஸனகரோ ஹோதி, விஞ்ஞூனஞ்ச ஸப்³ரஹ்மசாரீனம் பியோ ச ஹோதி மனாபோ ச க³ரு ச பா⁴வனீயோ சாதி.

இதி பாளிமுத்தகவினயவினிச்ச²யஸங்க³ஹே

சோத³னாதி³வினிச்ச²யகதா² ஸமத்தா.