30. க³ருப⁴ண்ட³வினிச்ச²யகதா²

227. க³ருப⁴ண்டா³னீதி ஏத்த² ‘‘பஞ்சிமானி, பி⁴க்க²வே, அவிஸ்ஸஜ்ஜியானி ந விஸ்ஸஜ்ஜேதப்³பா³னி ஸங்கே⁴ன வா க³ணேன வா புக்³க³லேன வா, விஸ்ஸஜ்ஜிதானிபி அவிஸ்ஸஜ்ஜிதானி ஹோந்தி, யோ விஸ்ஸஜ்ஜேய்ய, ஆபத்தி து²ல்லச்சயஸ்ஸா’’திஆதி³னா (சூளவ. 321) நயேன த³ஸ்ஸிதானி ஆராமோ ஆராமவத்து², விஹாரோ விஹாரவத்து², மஞ்சோ பீட²ம் பி⁴ஸி பி³ம்போ³ஹனம், லோஹகும்பீ⁴ லோஹபா⁴ணகம் லோஹவாரகோ லோஹகடாஹம் வாஸி ப²ரஸு குடா²ரீ குதா³லோ நிகா²த³னம், வல்லி வேளு முஞ்ஜம் பப்³ப³ஜம் திணம் மத்திகா தா³ருப⁴ண்ட³ம் மத்திகாப⁴ண்ட³ந்தி இமானி பஞ்ச க³ருப⁴ண்டா³னி நாம.

தத்த² (சூளவ. அட்ட². 321) ஆராமோ நாம புப்பா²ராமோ வா ப²லாராமோ வா. ஆராமவத்து² நாம தேஸம்யேவ ஆராமானம் அத்தா²ய பரிச்சி²ந்தி³த்வா ட²பிதோகாஸோ, தேஸு வா ஆராமேஸு வினட்டே²ஸு தேஸம் போராணகபூ⁴மிபா⁴கோ³. விஹாரோ நாம யம் கிஞ்சி பாஸாதா³தி³ ஸேனாஸனம். விஹாரவத்து² நாம தஸ்ஸ பதிட்டா²னோகாஸோ. மஞ்சோ நாம மஸாரகோ பு³ந்தி³காப³த்³தோ⁴ குளீரபாத³கோ ஆஹச்சபாத³கோதி இமேஸம் சதுன்னம் மஞ்சானம் அஞ்ஞதரோ. பீட²ம் நாம மஸாரகாதீ³னம்யேவ சதுன்னம் பீடா²னம் அஞ்ஞதரம். பி⁴ஸி நாம உண்ணபி⁴ஸிஆதீ³னம் பஞ்சன்னம் அஞ்ஞதரா. பி³ம்போ³ஹனம் நாம ருக்க²தூலலதாதூலபோடகீதூலானம் அஞ்ஞதரம். லோஹகும்பீ⁴ நாம காளலோஹேன வா தம்ப³லோஹேன வா யேன கேனசி லோஹேன கதகும்பீ⁴. லோஹபா⁴ணகாதீ³ஸுபி ஏஸேவ நயோ. ஏத்த² பன பா⁴ணகந்தி அரஞ்ஜரோ வுச்சதி. வாரகோதி க⁴டோ. கடாஹம் கடாஹமேவ. வாஸிஆதீ³ஸு வல்லிஆதீ³ஸு ச து³விஞ்ஞேய்யம் நாம நத்தி². பஞ்சாதி ச ராஸிவஸேன வுத்தம், ஸரூபவஸேன பனேதானி பஞ்சவீஸதிவிதா⁴னி ஹோந்தி. வுத்தஞ்ஹேதம் –

‘‘த்³விஸங்க³ஹானி த்³வே ஹோந்தி, ததியம் சதுஸங்க³ஹம்;

சதுத்த²ம் நவகோட்டா²ஸம், பஞ்சமம் அட்ட²பே⁴த³னம்.

‘‘இதி பஞ்சஹி ராஸீஹி, பஞ்சனிம்மலலோசனோ;

பஞ்சவீஸவித⁴ம் நாதோ², க³ருப⁴ண்ட³ம் பகாஸயீ’’தி.

தத்ராயம் வினிச்ச²யகதா² – இத³ஞ்ஹி ஸப்³ப³ம்பி க³ருப⁴ண்ட³ம் ஸேனாஸனக்க²ந்த⁴கே ‘‘அவிஸ்ஸஜ்ஜிய’’ந்தி வுத்தம், கீடாகி³ரிவத்து²ஸ்மிம் ‘‘அவேப⁴ங்கி³ய’’ந்தி த³ஸ்ஸிதம், பரிவாரே பன –

‘‘அவிஸ்ஸஜ்ஜியம் அவேப⁴ங்கி³யம்,

பஞ்ச வுத்தா மஹேஸினா;

விஸ்ஸஜ்ஜேந்தஸ்ஸ பரிபு⁴ஞ்ஜந்தஸ்ஸ அனாபத்தி,

பஞ்ஹாமேஸா குஸலேஹி சிந்திதா’’தி. (பரி. 479) –

ஆக³தம். தஸ்மா மூலச்சே²ஜ்ஜவஸேன அவிஸ்ஸஜ்ஜியஞ்ச அவேப⁴ங்கி³யஞ்ச, பரிவத்தனவஸேன பன விஸ்ஸஜ்ஜேந்தஸ்ஸ பரிபு⁴ஞ்ஜந்தஸ்ஸ ச அனாபத்தீதி ஏவமேத்த² அதி⁴ப்பாயோ வேதி³தப்³போ³.

228. தத்ராயம் அனுபுப்³பி³கதா² – இத³ம் தாவ பஞ்சவித⁴ம்பி சீவரபிண்ட³பாதபே⁴ஸஜ்ஜத்தா²ய உபனேதும் ந வட்டதி, தா²வரேன ச தா²வரம், க³ருப⁴ண்டே³ன ச க³ருப⁴ண்ட³ம் பரிவத்தேதும் வட்டதி. தா²வரே பன கே²த்தம் வத்து² தளாகம் மாதிகாதி ஏவரூபம் பி⁴க்கு²ஸங்க⁴ஸ்ஸ விசாரேதும் வா ஸம்படிச்சி²தும் வா அதி⁴வாஸேதும் வா ந வட்டதி, கப்பியகாரகேஹேவ விசாரிததோ கப்பியப⁴ண்ட³ம் வட்டதி. ஆராமேன பன ஆராமம் ஆராமவத்து²ம் விஹாரம் விஹாரவத்து²ந்தி இமானி சத்தாரிபி பரிவத்தேதும் வட்டதி.

தத்ராயம் பரிவத்தனனயோ – ஸங்க⁴ஸ்ஸ நாளிகேராராமோ தூ³ரே ஹோதி, கப்பியகாரகா ப³ஹுதரம் கா²த³ந்தி, யம்பி ந கா²த³ந்தி, ததோ ஸகடவேதனம் த³த்வா அப்பமேவ ஆஹரந்தி, அஞ்ஞேஸம் பன தஸ்ஸ ஆராமஸ்ஸ அவிதூ³ரே கா³மவாஸீனம் மனுஸ்ஸானம் விஹாரஸ்ஸ ஸமீபே ஆராமோ ஹோதி, தே ஸங்க⁴ம் உபஸங்கமித்வா ஸகேன ஆராமேன தம் ஆராமம் யாசந்தி, ஸங்கே⁴ன ‘‘ருச்சதி ஸங்க⁴ஸ்ஸா’’தி அபலோகேத்வா ஸம்படிச்சி²தப்³போ³. ஸசேபி பி⁴க்கூ²னம் ருக்க²ஸஹஸ்ஸம் ஹோதி, மனுஸ்ஸானம் பஞ்ச ஸதானி, ‘‘தும்ஹாகம் ஆராமோ கு²த்³த³கோ’’தி ந வத்தப்³ப³ம். கிஞ்சாபி ஹி அயம் கு²த்³த³கோ, அத² கோ² இதரதோ ப³ஹுதரம் ஆயம் தே³தி. ஸசேபி ஸமகமேவ தே³தி, ஏவம்பி இச்சி²திச்சி²தக்க²ணே பரிபு⁴ஞ்ஜிதும் ஸக்காதி க³ஹேதப்³ப³மேவ. ஸசே பன மனுஸ்ஸானம் ப³ஹுதரா ருக்கா² ஹோந்தி, ‘‘நனு தும்ஹாகம் ப³ஹுதரா ருக்கா²’’தி வத்தப்³ப³ம். ஸசே ‘‘அதிரேகம் அம்ஹாகம் புஞ்ஞம் ஹோது, ஸங்க⁴ஸ்ஸ தே³மா’’தி வத³ந்தி, ஜானாபேத்வா ஸம்படிச்சி²தும் வட்டதி. பி⁴க்கூ²னம் ருக்கா² ப²லதா⁴ரினோ, மனுஸ்ஸானம் ருக்கா² ந தாவ ப²லம் க³ண்ஹந்தி, கிஞ்சாபி ந க³ண்ஹந்தி, ‘‘ந சிரேன க³ண்ஹிஸ்ஸந்தீ’’தி ஸம்படிச்சி²தப்³ப³மேவ. மனுஸ்ஸானம் ருக்கா² ப²லதா⁴ரினோ, பி⁴க்கூ²னம் ருக்கா² ந தாவ ப²லம் க³ண்ஹந்தி, ‘‘நனு தும்ஹாகம் ருக்கா² ப²லதா⁴ரினோ’’தி வத்தப்³ப³ம். ஸசே ‘‘க³ண்ஹத², ப⁴ந்தே, அம்ஹாகம் புஞ்ஞம் ப⁴விஸ்ஸதீ’’தி தே³ந்தி, ஜானாபேத்வா ஸம்படிச்சி²தும் வட்டதி. ஏவம் ஆராமேன ஆராமோ பரிவத்தேதப்³போ³. ஏதேனேவ நயேன ஆராமவத்து²பி விஹாரோபி விஹாரவத்து²பி ஆராமேன பரிவத்தேதப்³ப³ம், ஆராமவத்து²னா ச மஹந்தேன வா கு²த்³த³கேன வா ஆராமஆராமவத்து²விஹாரவிஹாரவத்தூ²னி.

கத²ம் விஹாரேன விஹாரோ பரிவத்தேதப்³போ³? ஸங்க⁴ஸ்ஸ அந்தோகா³மே கே³ஹம் ஹோதி, மனுஸ்ஸானம் விஹாரமஜ்ஜே² பாஸாதோ³ ஹோதி, உபோ⁴பி அக்³கே⁴ன ஸமகா, ஸசே மனுஸ்ஸா தேன பாஸாதே³ன தம் கே³ஹம் யாசந்தி, ஸம்படிச்சி²தும் வட்டதி. பி⁴க்கூ²னம் சே மஹக்³க⁴தரம் கே³ஹம் ஹோதி, ‘‘மஹக்³க⁴தரம் அம்ஹாகம் கே³ஹ’’ந்தி வுத்தே ச ‘‘கிஞ்சாபி மஹக்³க⁴தரம் பப்³ப³ஜிதானம் அஸாருப்பம், ந ஸக்கா தத்த² பப்³ப³ஜிதேஹி வஸிதும், இத³ம் பன ஸாருப்பம், க³ண்ஹதா²’’தி வத³ந்தி, ஏவம்பி ஸம்படிச்சி²தும் வட்டதி. ஸசே பன மனுஸ்ஸானம் மஹக்³க⁴ம் ஹோதி, ‘‘நனு தும்ஹாகம் கே³ஹம் மஹக்³க⁴’’ந்தி வத்தப்³ப³ம். ‘‘ஹோது, ப⁴ந்தே, அம்ஹாகம் புஞ்ஞம் ப⁴விஸ்ஸதி, க³ண்ஹதா²’’தி வுத்தே பன ஸம்படிச்சி²தும் வட்டதி. ஏவம்பி விஹாரேன விஹாரோ பரிவத்தேதப்³போ³. ஏதேனேவ நயேன விஹாரவத்து²பி ஆராமோபி ஆராமவத்து²பி விஹாரேன பரிவத்தேதப்³ப³ம், விஹாரவத்து²னா ச மஹக்³கே⁴ன வா அப்பக்³கே⁴ன வா விஹாரவிஹாரவத்து²ஆராமஆராமவத்தூ²னி. ஏவம் தா²வரேன தா²வரபரிவத்தனம் வேதி³தப்³ப³ம்.

க³ருப⁴ண்டே³ன க³ருப⁴ண்ட³பரிவத்தனே பன மஞ்சபீட²ம் மஹந்தம் வா ஹோது கு²த்³த³கம் வா, அந்தமஸோ சதுரங்கு³லபாத³கம் கா³மதா³ரகேஹி பம்ஸ்வாகா³ரகேஸு கீளந்தேஹி கதம்பி ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ம் ஹோதி. ஸசேபி ராஜராஜமஹாமத்தாத³யோ ஏகப்பஹாரேனேவ மஞ்சஸதம் வா மஞ்சஸஹஸ்ஸம் வா தே³ந்தி, ஸப்³பே³ கப்பியமஞ்சா ஸம்படிச்சி²தப்³பா³, ஸம்படிச்சி²த்வா ‘‘வுட்³ட⁴படிபாடியா ஸங்கி⁴கபரிபோ⁴கே³ன பரிபு⁴ஞ்ஜதா²’’தி தா³தப்³பா³, புக்³க³லிகவஸேன ந தா³தப்³பா³. அதிரேகமஞ்சே ப⁴ண்டா³கா³ராதீ³ஸு பஞ்ஞபேத்வா பத்தசீவரம் நிக்கி²பிதும்பி வட்டதி. ப³ஹிஸீமாய ‘‘ஸங்க⁴ஸ்ஸ தே³மா’’தி தி³ன்னமஞ்சோ ஸங்க⁴த்தே²ரஸ்ஸ வஸனட்டா²னே தா³தப்³போ³. தத்த² சே ப³ஹூ மஞ்சா ஹோந்தி, மஞ்சேன கம்மம் நத்தி². யஸ்ஸ வஸனட்டா²னே கம்மம் அத்தி², தத்த² ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி தா³தப்³போ³. மஹக்³கே⁴ன ஸதக்³க⁴னகேன வா ஸஹஸ்ஸக்³க⁴னகேன வா மஞ்சேன அஞ்ஞம் மஞ்சஸதம் லப⁴தி, பரிவத்தேத்வா க³ஹேதப்³ப³ம். ந கேவலம் மஞ்சேன மஞ்சோயேவ, ஆராமஆராமவத்து²விஹாரவிஹாரவத்து²பீட²பி⁴ஸிபி³ம்போ³ஹனானிபி பரிவத்தேதும் வட்டந்தி. ஏஸ நயோ பீட²பி⁴ஸிபி³ம்போ³ஹனேஸுபி. ஏதேஸு பன அகப்பியம் ந பரிபு⁴ஞ்ஜிதப்³ப³ம், கப்பியம் ஸங்கி⁴கபரிபோ⁴கே³ன பரிபு⁴ஞ்ஜிதப்³ப³ம். அகப்பியம் வா மஹக்³க⁴ம் கப்பியம் வா பரிவத்தேத்வா வுத்தவத்தூ²னி க³ஹேதப்³பா³னி. அக³ருப⁴ண்டு³பக³ம் பன பி⁴ஸிபி³ம்போ³ஹனம் நாம நத்தி².

229. லோஹகும்பீ⁴ லோஹபா⁴ணகம் லோஹகடாஹந்தி இமானி தீணி மஹந்தானி வா ஹோந்து கு²த்³த³கானி வா, அந்தமஸோ பஸதமத்தஉத³கக³ண்ஹனகானிபி க³ருப⁴ண்டா³னியேவ. லோஹவாரகோ பன காளலோஹதம்ப³லோஹவட்டலோஹகம்ஸலோஹானம் யேன கேனசி கதோ ஸீஹளதீ³பே பாத³க³ண்ஹனகோ பா⁴ஜேதப்³போ³. பாதோ³ ச நாம மக³த⁴னாளியா பஞ்சனாளிமத்தம் க³ண்ஹாதி, ததோ அதிரேகக³ண்ஹனகோ க³ருப⁴ண்ட³ம். இமானி தாவ பாளியம் ஆக³தானி லோஹபா⁴ஜனானி. பாளியம் பன அனாக³தானி பி⁴ங்கா³ரபடிக்³க³ஹஉளஉங்கத³ப்³பி³கடச்சு²பாதிதட்டகஸரகஸமுக்³க³அங்கா³ரகபல்லதூ⁴மகடச்சு²ஆதீ³னி கு²த்³த³கானி வா மஹந்தானி வா ஸப்³பா³னி க³ருப⁴ண்டா³னி. பத்தோ அயதா²லகம் தம்ப³லோஹதா²லகந்தி இமானி பன பா⁴ஜனீயானி. கம்ஸலோஹவட்டலோஹபா⁴ஜனவிகதி ஸங்கி⁴கபரிபோ⁴கே³ன வா கி³ஹிவிகடா வா வட்டதி, புக்³க³லிகபரிபோ⁴கே³ன ந வட்டதி. கம்ஸலோஹாதி³பா⁴ஜனம் ஸங்க⁴ஸ்ஸ தி³ன்னம்பி ஹி பாரிஹாரியம் ந வட்டதி, கி³ஹிவிகடனீஹாரேனேவ பரிபு⁴ஞ்ஜிதப்³ப³ந்தி மஹாபச்சரியம் வுத்தம்.

ட²பேத்வா பன பா⁴ஜனவிகதிம் அஞ்ஞஸ்மிம்பி கப்பியலோஹப⁴ண்டே³ அஞ்ஜனீ அஞ்ஜனிஸலாகா கண்ணமலஹரணீ ஸூசி பண்ணஸூசி கு²த்³த³கோ பிப்ப²லகோ கு²த்³த³கம் ஆரகண்டகம் குஞ்சிகா தாளம் கத்தரயட்டி² வேத⁴கோ நத்து²தா³னம் பி⁴ண்டி³வாலோ லோஹகூடோ லோஹகுத்தி லோஹகு³ளோ லோஹபிண்டி³ லோஹசக்கலிகம் அஞ்ஞம்பி விப்பகதலோஹப⁴ண்ட³ம் பா⁴ஜனீயம். தூ⁴மனேத்தபா²லதீ³பருக்க²தீ³பகபல்லகஓலம்ப³கதீ³பஇத்தி²புரிஸதிரச்சா²னக³தரூபகானி பன அஞ்ஞானி வா பி⁴த்திச்ச²த³னகவாடாதீ³ஸு உபனேதப்³பா³னி அந்தமஸோ லோஹகி²லகம் உபாதா³ய ஸப்³பா³னி லோஹப⁴ண்டா³னி க³ருப⁴ண்டா³னியேவ ஹோந்தி, அத்தனா லத்³தா⁴னிபி பரிஹரித்வா புக்³க³லிகபரிபோ⁴கே³ன ந பரிபு⁴ஞ்ஜிதப்³பா³னி, ஸங்கி⁴கபரிபோ⁴கே³ன வா கி³ஹிவிகடானி வா வட்டந்தி. திபுப⁴ண்டே³பி ஏஸேவ நயோ. கீ²ரபாஸாணமயானி தட்டகஸரகாதீ³னி க³ருப⁴ண்டா³னியேவ.

க⁴டகோ பன தேலபா⁴ஜனம் வா பாத³க³ண்ஹனகதோ அதிரேகமேவ க³ருப⁴ண்ட³ம். ஸுவண்ணரஜதஹாரகூடஜாதிப²லிகபா⁴ஜனானி கி³ஹிவிகடானிபி ந வட்டந்தி, பகே³வ ஸங்கி⁴கபரிபோ⁴கே³ன வா புக்³க³லிகபரிபோ⁴கே³ன வா. ஸேனாஸனபரிபோ⁴கே³ பன ஆமாஸம்பி அனாமாஸம்பி ஸப்³ப³ம் வட்டதி.

வாஸிஆதீ³ஸு யாய வாஸியா ட²பேத்வா த³ந்தகட்ட²ச்சே²த³னம் வா உச்சு²தச்ச²னம் வா அஞ்ஞம் மஹாகம்மம் காதும் ந ஸக்கா, அயம் பா⁴ஜனீயா. ததோ மஹந்ததரா யேன கேனசி ஆகாரேன கதா வாஸி க³ருப⁴ண்ட³மேவ. ப²ரஸு பன அந்தமஸோ வேஜ்ஜானம் ஸிராவேத⁴னப²ரஸுபி க³ருப⁴ண்ட³மேவ. குடா²ரியம் ப²ரஸுஸதி³ஸோயேவ வினிச்ச²யோ. யா பன ஆவுத⁴ஸங்கே²பேன கதா, அயம் அனாமாஸா. குதா³லோ அந்தமஸோ சதுரங்கு³லமத்தோபி க³ருப⁴ண்ட³மேவ. நிகா²த³னம் சதுரஸ்ஸமுக²ம் வா ஹோது தோ³ணிமுக²ம் வா வங்கம் வா உஜுகம் வா, அந்தமஸோ ஸம்முஞ்ஜனீத³ண்ட³கவேத⁴னம்பி த³ண்ட³ப³த்³த⁴ம் சே, க³ருப⁴ண்ட³மேவ. ஸம்முஞ்ஜனீத³ண்ட³க²ணனகம் பன அத³ண்ட³கம் ப²லமத்தமேவ. யம் ஸக்கா ஸிபாடிகாய பக்கி²பித்வா பரிஹரிதும், தம் பா⁴ஜனீயம். ஸிக²ரம்பி நிகா²த³னேனேவ ஸங்க³ஹிதம். யேஹி மனுஸ்ஸேஹி விஹாரே வாஸிஆதீ³னி தி³ன்னானி ஹோந்தி, தே சே க⁴ரே த³ட்³டே⁴ வா சோரேஹி வா விலுத்தே ‘‘தே³த² நோ, ப⁴ந்தே, உபகரணே, புன பாகதிகே கரிஸ்ஸாமா’’தி வத³ந்தி, தா³தப்³பா³. ஸசே ஆஹரந்தி, ந வாரேதப்³பா³, அனாஹரந்தாபி ந சோதே³தப்³பா³.

கம்மாரதச்ச²காரசுந்த³காரனளகாரமணிகாரபத்தப³ந்த⁴கானம் அதி⁴கரணிமுட்டி²கஸண்டா³ஸதுலாதீ³னி ஸப்³பா³னி லோஹமயஉபகரணானி ஸங்கே⁴ தி³ன்னகாலதோ பட்டா²ய க³ருப⁴ண்டா³னி. திபுகோட்டகஸுவண்ணகாரசம்மகாரஉபகரணேஸுபி ஏஸேவ நயோ. அயம் பன விஸேஸோ – திபுகோட்டகஉபகரணேஸுபி திபுச்சே²த³னகஸத்த²கம், ஸுவண்ணகாரஉபகரணேஸு ஸுவண்ணச்சே²த³னகஸத்த²கம், சம்மகாரஉபகரணேஸு கதபரிகம்மசம்மச்சே²த³னககு²த்³த³கஸத்த²கந்தி இமானி பா⁴ஜனீயப⁴ண்டா³னி. நஹாபிததுன்னகாரஉபகரணேஸுபி ட²பேத்வா மஹாகத்தரிம் மஹாஸண்டா³ஸம் மஹாபிப்ப²லிகஞ்ச ஸப்³ப³ம் பா⁴ஜனீயம், மஹாகத்தரிஆதீ³னி க³ருப⁴ண்டா³னி.

வல்லிஆதீ³ஸு வேத்தவல்லிஆதி³கா யா காசி அட்³ட⁴பா³ஹுப்பமாணா வல்லி ஸங்க⁴ஸ்ஸ தி³ன்னா வா தத்த²ஜாதகா வா ரக்கி²தகோ³பிதா க³ருப⁴ண்ட³ம் ஹோதி, ஸா ஸங்க⁴கம்மே ச சேதியகம்மே ச கதே ஸசே அதிரேகா ஹோதி, புக்³க³லிககம்மேபி உபனேதும் வட்டதி. அரக்கி²தா பன க³ருப⁴ண்ட³மேவ ந ஹோதி. ஸுத்தமகசிவாகனாளிகேரஹீரசம்மமயா ரஜ்ஜுகா வா யோத்தானி வா வாகே ச நாளிகேரஹீரே ச வட்டேத்வா கதா ஏகவட்டா வா த்³விவட்டா வா ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ம். ஸுத்தம் பன அவட்டேத்வா தி³ன்னம் மகசிவாகனாளிகேரஹீரா ச பா⁴ஜனீயா. யேஹி பனேதானி ரஜ்ஜுகயோத்தாதீ³னி தி³ன்னானி ஹோந்தி, தே அத்தனோ கரணீயேன ஹரந்தா ந வாரேதப்³பா³.

யோ கோசி அந்தமஸோ அட்ட²ங்கு³லஸூசித³ண்ட³கமத்தோபி வேளு ஸங்க⁴ஸ்ஸ தி³ன்னோ வா தத்த²ஜாதகோ வா ரக்கி²தகோ³பிதோ க³ருப⁴ண்ட³ம், ஸோபி ஸங்க⁴கம்மே ச சேதியகம்மே ச கதே அதிரேகோ புக்³க³லிககம்மே ச தா³தும் வட்டதி. பாத³க³ண்ஹனகதேலனாளி பன கத்தரயட்டி² உபாஹனத³ண்ட³கோ ச²த்தத³ண்ட³கோ ச²த்தஸலாகாதி இத³மேத்த² பா⁴ஜனீயப⁴ண்ட³ம். த³ட்³ட⁴கே³ஹமனுஸ்ஸா க³ண்ஹித்வா க³ச்ச²ந்தா ந வாரேதப்³பா³. ரக்கி²தகோ³பிதம் வேளும் க³ண்ஹந்தேன ஸமகம் வா அதிரேகம் வா தா²வரம் அந்தமஸோ தம்அக்³க⁴னகவல்லிகாயபி பா²திகம்மம் கத்வா க³ஹேதப்³போ³, பா²திகம்மம் அகத்வா க³ண்ஹந்தேன தத்தே²வ வளஞ்ஜேதப்³போ³. க³மனகாலே ஸங்கி⁴கே ஆவாஸே ட²பேத்வா க³ந்தப்³ப³ம், அஸதியா க³ஹேத்வா க³தேன பஹிணித்வா தா³தப்³போ³. தே³ஸந்தரக³தேன ஸம்பத்தவிஹாரோ ஸங்கி⁴காவாஸே ட²பேதப்³போ³.

திணந்தி முஞ்ஜஞ்ச பப்³ப³ஜஞ்ச ட²பேத்வா அவஸேஸம் யம் கிஞ்சி திணம். யத்த² பன திணம் நத்தி², தத்த² பண்ணேஹி சா²தே³ந்தி, தஸ்மா பண்ணம்பி திணேனேவ ஸங்க³ஹிதம். இதி முஞ்ஜாதீ³ஸு யம் கிஞ்சி முட்டி²ப்பமாணம் திணம் தாலபண்ணாதீ³ஸு ச ஏகபண்ணம்பி ஸங்க⁴ஸ்ஸ தி³ன்னம் வா தத்த²ஜாதகம் வா ப³ஹாராமே ஸங்க⁴ஸ்ஸ திணவத்து²தோ ஜாததிணம் வா ரக்கி²தகோ³பிதம் க³ருப⁴ண்ட³ம் ஹோதி, தம்பி ஸங்க⁴கம்மே ச சேதியகம்மே ச கதே அதிரேகம் புக்³க³லிககம்மே தா³தும் வட்டதி, த³ட்³ட⁴கே³ஹமனுஸ்ஸா க³ஹேத்வா க³ச்ச²ந்தா ந வாரேதப்³பா³. அட்ட²ங்கு³லப்பமாணோபி ரித்தபோத்த²கோ க³ருப⁴ண்ட³மேவ.

மத்திகா பகதிமத்திகா வா ஹோது பஞ்சவண்ணா வா ஸுதா⁴ வா ஸஜ்ஜுரஸகங்கு³ட்ட²ஸிலேஸாதீ³ஸு வா யம் கிஞ்சி து³ல்லப⁴ட்டா²னே ஆனேத்வா தி³ன்னம் தத்த²ஜாதகம் வா, ரக்கி²தகோ³பிதம் தாலப²லபக்கமத்தம் க³ருப⁴ண்ட³ம் ஹோதி, தம்பி ஸங்க⁴கம்மே ச சேதியகம்மே ச நிட்டி²தே அதிரேகம் புக்³க³லிககம்மே ச தா³தும் வட்டதி, ஹிங்கு³ஹிங்கு³லகஹரிதாலமனோஸிலஞ்ஜனானி பன பா⁴ஜனீயப⁴ண்டா³னி.

தா³ருப⁴ண்டே³ ‘‘யோ கோசி அட்ட²ங்கு³லஸூசித³ண்ட³மத்தோபி தா³ருப⁴ண்ட³கோ தா³ருது³ல்லப⁴ட்டா²னே ஸங்க⁴ஸ்ஸ தி³ன்னோ வா தத்த²ஜாதகோ வா ரக்கி²தகோ³பிதோ, அயம் க³ருப⁴ண்ட³ம் ஹோதீ’’தி குருந்தி³யம் வுத்தம். மஹாஅட்ட²கதா²யம் பன ஸப்³ப³ம்பி தா³ருவேளுசம்மபாஸாணாதி³விகதிம் தா³ருப⁴ண்டே³ன ஸங்க³ண்ஹித்வா ஆஸந்தி³கதோ பட்டா²ய தா³ருப⁴ண்டே³ வினிச்ச²யோ வுத்தோ. தத்ராயம் நயோ – ஆஸந்தி³கோ ஸத்தங்கோ³ ப⁴த்³த³பீட²ம் பீடி²கா ஏகபாத³கபீட²ம் ஆமண்ட³கவண்டகபீட²ம் ப²லகம் கோச்ச²ம் பலாலபீட²ந்தி இமேஸு தாவ யம் கிஞ்சி கு²த்³த³கம் வா ஹோது மஹந்தம் வா, ஸங்க⁴ஸ்ஸ தி³ன்னம் க³ருப⁴ண்ட³ம் ஹோதி. பலாலபீடே²ன சேத்த² கத³லிபத்தாதி³பீடா²னிபி ஸங்க³ஹிதானி. ப்³யக்³க⁴சம்மஓனத்³த⁴ம்பி வாளரூபபரிக்கி²த்தம் ரதனபரிஸிப்³பி³தம் கோச்ச²ம் க³ருப⁴ண்ட³மேவ, வங்கப²லகம் தீ³க⁴ப²லகம் சீவரதோ⁴வனப²லகம் க⁴ட்டனப²லகம் க⁴ட்டனமுக்³க³ரோ த³ந்தகட்ட²ச்சே²த³னக³ண்டி²கா த³ண்ட³முக்³க³ரோ அம்ப³ணம் ரஜனதோ³ணி உத³கபடிச்ச²கோ தா³ருமயோ வா த³ந்தமயோ வா வேளுமயோ வா ஸபாத³கோபி அபாத³கோபி ஸமுக்³கோ³ மஞ்ஜூஸா பாத³க³ண்ஹனகதோ அதிரேகப்பமாணோ கரண்டோ³ உத³கதோ³ணி உத³ககடாஹம் உளுங்கோ கடச்சு² பானீயஸராவம் பானீயஸங்கோ²தி ஏதேஸுபி யம் கிஞ்சி ஸங்கே⁴ தி³ன்னம் க³ருப⁴ண்ட³ம். ஸங்க²தா²லகம் பன பா⁴ஜனீயம், ததா² தா³ருமயோ உத³கதும்போ³.

பாத³கத²லிகமண்ட³லம் தா³ருமயம் வா ஹோது சோளபண்ணாதி³மயம் வா, ஸப்³ப³ம் க³ருப⁴ண்ட³ம். ஆதா⁴ரகோ பத்தபிதா⁴னம் தாலவண்டம் பீ³ஜனீ சங்கோடகம் பச்சி² யட்டி²ஸம்முஞ்ஜனீ முட்டி²ஸம்முஞ்ஜனீதி ஏதேஸுபி யம் கிஞ்சி கு²த்³த³கம் வா ஹோது மஹந்தம் வா, தா³ருவேளுபண்ணசம்மாதீ³ஸு யேன கேனசி கதம் க³ருப⁴ண்ட³மேவ. த²ம்ப⁴துலாஸோபானப²லகாதீ³ஸு தா³ருமயம் வா பாஸாணமயம் வா யம் கிஞ்சி கே³ஹஸம்பா⁴ரரூபம் யோ கோசி கடஸாரகோ யம் கிஞ்சி பூ⁴மத்த²ரணம் யம் கிஞ்சி அகப்பியசம்மம், ஸப்³ப³ம் ஸங்கே⁴ தி³ன்னம் க³ருப⁴ண்ட³ம், பூ⁴மத்த²ரணம் காதும் வட்டதி. ஏளகசம்மம் பன பச்சத்த²ரணக³திகம் ஹோதி, தம்பி க³ருப⁴ண்ட³மேவ. கப்பியசம்மானி பா⁴ஜனீயானி. குருந்தி³யம் பன ‘‘ஸப்³ப³ம் மஞ்சப்பமாணம் சம்மம் க³ருப⁴ண்ட³’’ந்தி வுத்தம்.

உது³க்க²லம் முஸலம் ஸுப்பம் நிஸத³ம் நிஸத³போதோ பாஸாணதோ³ணி பாஸாணகடாஹம் துரிவேமப⁴ஸ்தாதி³ ஸப்³ப³ம் பேஸகாராதி³ப⁴ண்ட³ம் ஸப்³ப³ம் கஸிப⁴ண்ட³ம் ஸப்³ப³ம் சக்கயுத்தகம் யானம் க³ருப⁴ண்ட³மேவ. மஞ்சபாதோ³ மஞ்சஅடனீ பீட²பாதோ³ பீட²அடனீ வாஸிப²ரஸுஆதீ³னம் த³ண்டா³தி ஏதேஸு யம் கிஞ்சி விப்பகததச்ச²னகம்மம் அனிட்டி²தமேவ பா⁴ஜனீயம், தச்சி²தமட்ட²ம் பன க³ருப⁴ண்ட³ம் ஹோதி. அனுஞ்ஞாதவாஸியா பன த³ண்டோ³ ச²த்தமுட்டி²பண்ணம் கத்தரயட்டி² உபாஹனா அரணிஸஹிதம் த⁴ம்மகரணோ பாத³க³ண்ஹனகதோ அனதிரித்தம் ஆமலகதும்ப³ம் ஆமலகக⁴டோ லாபு³கதும்ப³ம் லாபு³க⁴டோ விஸாணகதும்ப³ந்தி ஸப்³ப³மேவேதம் பா⁴ஜனீயம், ததோ மஹந்ததரம் க³ருப⁴ண்ட³ம். ஹத்தி²த³ந்தோ வா யம் கிஞ்சி விஸாணம் வா அதச்சி²தம் யதா²க³தமேவ பா⁴ஜனீயம். தேஹி கதமஞ்சபாதா³தீ³ஸு புரிமஸதி³ஸோயேவ வினிச்ச²யோ. தச்சி²தனிட்டி²தோபி ஹிங்கு³கரண்ட³கோ க³ண்டி²கா விதோ⁴ அஞ்ஜனீ அஞ்ஜனீஸலாகா உத³கபுஞ்ச²னீதி இத³ம் ஸப்³ப³ம் பா⁴ஜனீயமேவ.

மத்திகாப⁴ண்டே³ ஸப்³ப³ம் மனுஸ்ஸானம் உபபோ⁴க³பரிபோ⁴க³ம் க⁴டபீட²ராதி³குலாலபா⁴ஜனம் பத்தகடாஹம் அங்கா³ரகடாஹம் தூ⁴மதா³னம் தீ³பருக்க²கோ தீ³பகபல்லிகா சயனிட்ட²கா ச²த³னிட்ட²கா தூ²பிகாதி ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ம், பாத³க³ண்ஹனகதோ அனதிரித்தப்பமாணோ பன க⁴டகோ பத்தம் தா²லகம் கஞ்சனகோ குண்டி³காதி இத³மேத்த² பா⁴ஜனீயப⁴ண்ட³ம். யதா² ச மத்திகாப⁴ண்டே³, ஏவம் லோஹப⁴ண்டே³பி குண்டி³கா பா⁴ஜனீயகோட்டா²ஸமேவ ப⁴ஜதீதி அயமேத்த² அனுபுப்³பி³கதா².

இதி பாளிமுத்தகவினயவினிச்ச²யஸங்க³ஹே

க³ருப⁴ண்ட³வினிச்ச²யகதா² ஸமத்தா.