22. பப்³ப³ஜ்ஜாவினிச்ச²யகதா²

123. பப்³ப³ஜ்ஜாதி ஏத்த² பன பப்³ப³ஜ்ஜாபேக்க²ம் குலபுத்தம் பப்³பா³ஜேந்தேன யே பாளியம் ‘‘ந பி⁴க்க²வே பஞ்சஹி ஆபா³தே⁴ஹி பு²ட்டோ² பப்³பா³ஜேதப்³போ³’’திஆதி³னா (மஹாவ. 89) படிக்கி²த்தா புக்³க³லா, தே வஜ்ஜேத்வா பப்³ப³ஜ்ஜாதோ³ஸவிரஹிதோ புக்³க³லோ பப்³பா³ஜேதப்³போ³. தத்ராயம் வினிச்ச²யோ (மஹாவ. அட்ட². 88) – குட்ட²ம் க³ண்டோ³ கிலாஸோ ஸோஸோ அபமாரோதி இமேஹி பஞ்சஹி ஆபா³தே⁴ஹி பு²ட்டோ² ந பப்³பா³ஜேதப்³போ³, பப்³பா³ஜேந்தோ பன து³க்கடம் ஆபஜ்ஜதி ‘‘யோ பப்³பா³ஜேய்ய, ஆபத்தி து³க்கடஸ்ஸா’’தி வுத்தத்தா. தத்த² குட்ட²ந்தி ரத்தகுட்ட²ம் வா ஹோது காளகுட்ட²ம் வா, யம் கிஞ்சி கிடிப⁴த³த்³த³உகச்சு²ஆதி³ப்பபே⁴த³ம்பி ஸப்³ப³ம் குட்ட²மேவாதி வுத்தம். தஞ்சே நக²பிட்டி²ப்பமாணம்பி வட்³ட⁴னகபக்கே² டி²தம் ஹோதி, ந பப்³பா³ஜேதப்³போ³. ஸசே பன நிவாஸனபாவுரணேஹி பகதிபடிச்ச²ன்னட்டா²னே நக²பிட்டி²ப்பமாணம் அவட்³ட⁴னகபக்கே² டி²தம் ஹோதி, வட்டதி. ‘‘முகே² பன ஹத்த²பாத³பிட்டீ²ஸு வா ஸசேபி அவட்³ட⁴னகபக்கே² டி²தம், நக²பிட்டி²தோ ச கு²த்³த³கதரம்பி ந வட்டதியேவா’’தி குருந்தி³யம் வுத்தம். திகிச்சா²பேத்வா பப்³பா³ஜேந்தேனபி பகதிவண்ணே ஜாதேயேவ பப்³பா³ஜேதப்³போ³, கோ³தா⁴பிட்டி²ஸதி³ஸசுண்ணஓகிரணஸரீரம்பி பப்³பா³ஜேதும் ந வட்டதி.

க³ண்டோ³தி மேத³க³ண்டோ³ வா ஹோது அஞ்ஞோ வா, யோ கோசி கோலட்டி²மத்தகோபி சே வட்³ட⁴னகபக்கே² டி²தோ க³ண்டோ³ ஹோதி, ந பப்³பா³ஜேதப்³போ³. படிச்ச²ன்னட்டா²னே பன கோலட்டி²மத்தே அவட்³ட⁴னகபக்கே² டி²தே வட்டதி, முகா²தி³கே அப்படிச்ச²ன்னட்டா²னே அவட்³ட⁴னகபக்கே² டி²தேபி ந வட்டதி. திகிச்சா²பேத்வா பப்³பா³ஜேந்தேனபி ஸரீரம் ஸச்ச²விம் காராபேத்வா பப்³பா³ஜேதப்³போ³. உண்ணிக³ண்டா³ நாம ஹோந்தி கோ³த²னகா விய அங்கு³லிகா விய ச தத்த² தத்த² லம்ப³ந்தி, ஏதேபி க³ண்டா³யேவ, தேஸு ஸதி பப்³பா³ஜேதும் ந வட்டதி. த³ஹரகாலே கீ²ரபீளகா யோப்³ப³ன்னகாலே ச முகே² க²ரபீளகா நாம ஹோந்தி, மஹல்லககாலே நஸ்ஸந்தி, ந தா க³ண்ட³ஸங்க்²யம் க³ச்ச²ந்தி, தாஸு ஸதி பப்³பா³ஜேதும் வட்டதி. அஞ்ஞா பன ஸரீரே க²ரபீளகா நாம, அபரா பது³மகண்ணிகா நாம ஹோந்தி, அஞ்ஞா ஸாஸபபீ³ஜகா நாம ஸாஸபமத்தாயேவ ஸகலஸரீரம் ப²ரந்தி, ஸப்³பா³ குட்ட²ஜாதிகாவ, தாஸு ஸதி ந பப்³பா³ஜேதப்³போ³.

கிலாஸோதி ந பி⁴ஜ்ஜனகம் ந பக்³க⁴ரணகம் பது³மபுண்ட³ரீகபத்தவண்ணம் குட்ட²ம். யேன கு³ன்னம் விய ஸப³லம் ஸரீரம் ஹோதி, தஸ்மிம் குட்டே² வுத்தனயேனேவ வினிச்ச²யோ வேதி³தப்³போ³. ஸோஸோதி ஸோஸப்³யாதி⁴. தஸ்மிம் ஸதி ந பப்³பா³ஜேதப்³போ³. அபமாரோதி பித்தும்மாதோ³ வா யக்கு²ம்மாதோ³ வா. தத்த² புப்³ப³வேரிகேன அமனுஸ்ஸேன க³ஹிதோ து³த்திகிச்சோ² ஹோதி, அப்பமத்தகேபி பன அபமாரே ஸதி ந பப்³பா³ஜேதப்³போ³.

124. ‘‘ந, பி⁴க்க²வே, ராஜப⁴டோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’தி (மஹாவ. 90) வசனதோ ராஜப⁴டோபி ந பப்³பா³ஜேதப்³போ³. ஏத்த² ச அமச்சோ வா ஹோது மஹாமத்தோ வா ஸேவகோ வா கிஞ்சி டா²னந்தரம் பத்தோ வா அப்பத்தோ வா, யோ கோசி ரஞ்ஞோ ப⁴த்தவேதனப⁴டோ, ஸப்³போ³ ராஜப⁴டோதி ஸங்க்²யம் க³ச்ச²தி, ஸோ ந பப்³பா³ஜேதப்³போ³. தஸ்ஸ பன புத்தனத்தபா⁴துகா யே ராஜதோ ப⁴த்தவேதனம் ந க³ண்ஹந்தி, தே பப்³பா³ஜேதும் வட்டதி. யோ பன ராஜதோ லத்³த⁴ம் நிப³த்³த⁴போ⁴க³ம் வா மாஸஸம்வச்ச²ரபரிப்³ப³யம் வா ரஞ்ஞோயேவ நிய்யாதே³தி, புத்தபா⁴துகே வா தம் டா²னம் ஸம்படிச்சா²பேத்வா ராஜானம் ‘‘ந தா³னாஹம் தே³வஸ்ஸ ப⁴டோ’’தி ஆபுச்ச²தி, யேன வா யம்காரணா வேதனம் க³ஹிதம், தம் கம்மம் கதம் ஹோதி, யோ வா ‘‘பப்³ப³ஜஸ்ஸூ’’தி ரஞ்ஞா அனுஞ்ஞாதோ ஹோதி, தம்பி பப்³பா³ஜேதும் வட்டதி.

125. சோரோபி த⁴ஜப³ந்தோ⁴ ந பப்³பா³ஜேதப்³போ³ ‘‘ந, பி⁴க்க²வே, த⁴ஜப³ந்தோ⁴ சோரோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’தி (மஹாவ. 91) வுத்தத்தா. தத்த² த⁴ஜம் ப³ந்தி⁴த்வா விய விசரதீதி த⁴ஜப³ந்தோ⁴, மூலதே³வாத³யோ விய லோகே பாகடோதி வுத்தம் ஹோதி. தஸ்மா யோ கா³மகா⁴தம் வா பந்த²து³ஹனம் வா நக³ரே ஸந்தி⁴ச்சே²தா³தி³கம்மம் வா கரோந்தோ விசரதி, பஞ்ஞாயதி ச ‘‘அஸுகோ நாம இத³ம் இத³ம் கரோதீ’’தி, ஸோ ந பப்³பா³ஜேதப்³போ³. யோ பன ராஜபுத்தோ ரஜ்ஜம் பத்தே²ந்தோ கா³மகா⁴தாதீ³னி கரோதி, ஸோ பப்³பா³ஜேதப்³போ³. ராஜானோ ஹி தஸ்மிம் பப்³ப³ஜிதே துஸ்ஸந்தி, ஸசே பன ந துஸ்ஸந்தி, ந பப்³பா³ஜேதப்³போ³. புப்³பே³ மஹாஜனே பாகடோ சோரோ பச்சா² சோரகம்மம் பஹாய பஞ்ச ஸீலானி ஸமாதி³யதி, தஞ்சே மனுஸ்ஸா ஏவம் ஜானந்தி, பப்³பா³ஜேதப்³போ³. யே பன அம்ப³லபு³ஜாதி³சோரகா ஸந்தி⁴ச்சே²தா³தி³சோரா ஏவ வா அதி³ஸ்ஸமானா தே²ய்யம் கரோந்தி, பச்சா²பி ‘‘இமினா நாம இத³ம் கத’’ந்தி ந பஞ்ஞாயந்தி, தேபி பப்³பா³ஜேதும் வட்டதி.

126. காரபே⁴த³கோ பன சோரோ ந பப்³பா³ஜேதப்³போ³ ‘‘ந, பி⁴க்க²வே, காரபே⁴த³கோ சோரோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’தி (மஹாவ. 92) வுத்தத்தா. தத்த² காரோ வுச்சதி ப³ந்த⁴னாகா³ரம். இத⁴ பன அந்து³ப³ந்த⁴னம் வா ஹோது ஸங்க²லிகப³ந்த⁴னம் வா ரஜ்ஜுப³ந்த⁴னம் வா கா³மப³ந்த⁴னம் வா நிக³மப³ந்த⁴னம் வா நக³ரப³ந்த⁴னம் வா புரிஸகு³த்தி வா ஜனபத³ப³ந்த⁴னம் வா தீ³பப³ந்த⁴னம் வா, யோ ஏதேஸு யம் கிஞ்சி ப³ந்த⁴னம் பி⁴ந்தி³த்வா வா சி²ந்தி³த்வா வா முஞ்சித்வா வா விவரித்வா வா அபஸ்ஸமானானம் வா பலாயதி, ஸோ காரபே⁴த³கோதி ஸங்க்²யம் க³ச்ச²தி. தஸ்மா ஈதி³ஸோ காரபே⁴த³கோ சோரோ தீ³பப³ந்த⁴னம் பி⁴ந்தி³த்வா தீ³பந்தரம் க³தோபி ந பப்³பா³ஜேதப்³போ³. யோ பன ந சோரோ, கேவலம் ஹத்த²கம்மம் அகரோந்தோ ‘‘ஏவம் நோ அபலாயந்தோ கரிஸ்ஸதீ’’தி ராஜயுத்தாதீ³ஹி ப³த்³தோ⁴, ஸோ காரம் பி⁴ந்தி³த்வா பலாதோபி பப்³பா³ஜேதப்³போ³. யோ பன கா³மனிக³மபட்டனாதீ³னி கேணியா க³ஹேத்வா தம் அஸம்பாதே³ந்தோ ப³ந்த⁴னாகா³ரம் பவேஸிதோ ஹோதி, ஸோபி பலாயித்வா ஆக³தோ ந பப்³பா³ஜேதப்³போ³. யோபி கஸிகம்மாதீ³ஹி த⁴னம் ஸம்பாதே³த்வா ஜீவந்தோ ‘‘நிதா⁴னம் இமினா லத்³த⁴’’ந்தி பேஸுஞ்ஞம் உபஸம்ஹரித்வா கேனசி ப³ந்தா⁴பிதோ ஹோதி, தம் தத்தே²வ பப்³பா³ஜேதும் ந வட்டதி, பலாயித்வா க³தம் பன க³தட்டா²னே பப்³பா³ஜேதும் வட்டதி.

127. ‘‘ந, பி⁴க்க²வே, லிகி²தகோ சோரோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’தி (மஹாவ. 93) வசனதோ பன லிகி²தகோ சோரோ ந பப்³பா³ஜேதப்³போ³. தத்த² லிகி²தகோ நாம யோ கோசி சோரிகம் வா அஞ்ஞம் வா க³ரும் ராஜாபராத⁴ம் கத்வா பலாதோ, ராஜா ச நம் பண்ணே வா போத்த²கே வா ‘‘இத்த²ன்னாமோ யத்த² தி³ஸ்ஸதி, தத்த² க³ஹேத்வா மாரேதப்³போ³’’தி வா ‘‘ஹத்த²பாதா³தீ³னி அஸ்ஸ சி²ந்தி³தப்³பா³னீ’’தி வா ‘‘ஏத்தகம் நாம த³ண்ட³ம் ஆஹராபேதப்³போ³’’தி வா லிகா²பேதி, அயம் லிகி²தகோ நாம, ஸோ ந பப்³பா³ஜேதப்³போ³.

128. கஸாஹதோ கதத³ண்ட³கம்மோபி ந பப்³பா³ஜேதப்³போ³ ‘‘ந, பி⁴க்க²வே, கஸாஹதோ கதத³ண்ட³கம்மோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’தி (மஹாவ. 94) வசனதோ. ஏத்த² பன யோ வசனபேஸனாதீ³னி அகரோந்தோ ஹஞ்ஞதி, ந ஸோ கதத³ண்ட³கம்மோ. யோ பன கேணியா வா அஞ்ஞதா² வா கிஞ்சி க³ஹேத்வா கா²தி³த்வா புன தா³தும் அஸக்கோந்தோ ‘‘அயமேவ தே த³ண்டோ³ ஹோதூ’’தி கஸாஹி ஹஞ்ஞதி, அயமேவ கஸாஹதோ கதத³ண்ட³கம்மோ. ஸோ ச கஸாஹி வா ஹதோ ஹோது அட்³ட⁴த³ண்ட³காதீ³னம் வா அஞ்ஞதரேன, யாவ அல்லவணோ ஹோதி, ந தாவ பப்³பா³ஜேதப்³போ³, வணே பன பாகதிகே கத்வா பப்³பா³ஜேதப்³போ³. ஸசே பன ஜாணூஹி வா கப்பரேஹி வா நாளிகேரபாஸாணாதீ³ஹி வா கா⁴தேத்வா முத்தோ ஹோதி, ஸரீரே சஸ்ஸ க³ண்டி²யோ பஞ்ஞாயந்தி, ந பப்³பா³ஜேதப்³போ³, பா²ஸுகம் கத்வா ஏவ க³ண்டீ²ஸு ஸன்னிஸின்னாஸு பப்³பா³ஜேதப்³போ³.

129. லக்க²ணாஹதோ பன கதத³ண்ட³கம்மோ ந பப்³பா³ஜேதப்³போ³ ‘‘ந, பி⁴க்க²வே, லக்க²ணஹதோ கதத³ண்ட³கம்மோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’தி (மஹாவ. 95) வசனதோ. ஏத்த²பி கதத³ண்ட³கம்மபா⁴வோ புரிமனயேனேவ வேதி³தப்³போ³. யஸ்ஸ பன நலாடே வா ஊருஆதீ³ஸு வா தத்தேன லோஹேன லக்க²ணம் ஆஹதம் ஹோதி, ஸோ ஸசே பு⁴ஜிஸ்ஸோ, யாவ அல்லவணோ ஹோதி, தாவ ந பப்³பா³ஜேதப்³போ³. ஸசேபிஸ்ஸ வணா ருள்ஹா ஹோந்தி ச²வியா ஸமபரிச்சே²தா³, லக்க²ணம் ந பஞ்ஞாயதி, திமண்ட³லம் நிவத்த²ஸ்ஸ உத்தராஸங்கே³ கதே படிச்ச²ன்னோகாஸே சே ஹோதி, பப்³பா³ஜேதும் வட்டதி, அப்படிச்ச²ன்னோகாஸே சே, ந வட்டதி.

130. ‘‘ந, பி⁴க்க²வே, இணாயிகோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’தி (மஹாவ. 96) வசனதோ இணாயிகோபி ந பப்³பா³ஜேதப்³போ³. தத்த² இணாயிகோ நாம யஸ்ஸ பிதிபிதாமஹேஹி வா இணம் க³ஹிதம் ஹோதி, ஸயம் வா இணம் க³ஹிதம் ஹோதி, யம் வா ஆட²பேத்வா மாதாபிதூஹி கிஞ்சி க³ஹிதம் ஹோதி, ஸோ தம் இணம் பரேஸம் தா⁴ரேதீதி இணாயிகோ. யம் பன அஞ்ஞே ஞாதகா ஆட²பேத்வா கிஞ்சி க³ண்ஹந்தி, ஸோ ந இணாயிகோ. ந ஹி தே தம் ஆட²பேதும் இஸ்ஸரா, தஸ்மா தம் பப்³பா³ஜேதும் வட்டதி, இதரம் ந வட்டதி. ஸசே பனஸ்ஸ ஞாதிஸாலோஹிதா ‘‘மயம் த³ஸ்ஸாம, பப்³பா³ஜேத² ந’’ந்தி இணம் அத்தனோ பா⁴ரம் கரோந்தி, அஞ்ஞோ வா கோசி தஸ்ஸ ஆசாரஸம்பத்திம் தி³ஸ்வா ‘‘பப்³பா³ஜேத² நம், அஹம் இணம் த³ஸ்ஸாமீ’’தி வத³தி, பப்³பா³ஜேதும் வட்டதி. தேஸு அஸதி பி⁴க்கு²னா ததா²ரூபஸ்ஸ உபட்டா²கஸ்ஸபி ஆரோசேதப்³ப³ம் ‘‘ஸஹேதுகோ ஸத்தோ இணபலிபோ³தே⁴ன ந பப்³ப³ஜதீ’’தி. ஸசே ஸோ படிபஜ்ஜதி, பப்³பா³ஜேதப்³போ³. ஸசேபி அத்தனோ கப்பியப⁴ண்ட³ம் அத்தி², ‘‘ஏதம் த³ஸ்ஸாமீ’’தி பப்³பா³ஜேதப்³போ³. ஸசே பன நேவ ஞாதகாத³யோ படிபஜ்ஜந்தி, ந அத்தனோ த⁴னம் அத்தி², ‘‘பப்³பா³ஜேத்வா பி⁴க்கா²ய சரித்வா மோசேஸ்ஸாமீ’’தி பப்³பா³ஜேதும் ந வட்டதி. ஸசே பப்³பா³ஜேதி, து³க்கடம். பலாதோபி ஆனேத்வா தா³தப்³போ³. நோ சே தே³தி, ஸப்³ப³ம் இணம் கீ³வா ஹோதி. அஜானித்வா பப்³பா³ஜயதோ அனாபத்தி, பஸ்ஸந்தேன பன ஆனேத்வா இணஸாமிகானம் த³ஸ்ஸேதப்³போ³, அபஸ்ஸந்தஸ்ஸ கீ³வா ந ஹோதி.

ஸசே இணாயிகோ அஞ்ஞம் தே³ஸம் க³ந்த்வா புச்சி²யமானோபி ‘‘நாஹம் கஸ்ஸசி கிஞ்சி தா⁴ரேமீ’’தி வத்வா பப்³ப³ஜதி, இணஸாமிகோ ச தம் பரியேஸந்தோ தத்த² க³ச்ச²தி, த³ஹரோ தம் தி³ஸ்வா பலாயதி, ஸோ தே²ரம் உபஸங்கமித்வா ‘‘அயம், ப⁴ந்தே, கேன பப்³பா³ஜிதோ, மம ஏத்தகம் நாம த⁴னம் க³ஹேத்வா பலாதோ’’தி வத³தி, தே²ரேன வத்தப்³ப³ம் ‘‘மயா, உபாஸக, ‘அணணோ அஹ’ந்தி வத³ந்தோ பப்³பா³ஜிதோ, கிம் தா³னி கரோமி, பஸ்ஸ மே பத்தசீவர’’ந்தி. அயம் தத்த² ஸாமீசி. பலாதே பன கீ³வா ந ஹோதி. ஸசே பன நம் தே²ரஸ்ஸ ஸம்முகா²வ தி³ஸ்வா ‘‘அயம் மம இணாயிகோ’’தி வத³தி, ‘‘தவ இணாயிகம் த்வமேவ ஜானாஹீ’’தி வத்தப்³போ³, ஏவம்பி கீ³வா ந ஹோதி. ஸசேபி ஸோ ‘‘பப்³ப³ஜிதோ அயம் தா³னி குஹிம் க³மிஸ்ஸதீ’’தி வத³தி, தே²ரேன ‘‘த்வம்யேவ ஜானாஹீ’’தி வத்தப்³போ³. ஏவம்பிஸ்ஸ பலாதே கீ³வா ந ஹோதி. ஸசே பன தே²ரோ ‘‘குஹிம் தா³னி அயம் க³மிஸ்ஸதி, இதே⁴வ அச்ச²தூ’’தி வத³தி, ஸோ சே பலாயதி, கீ³வா ஹோதி. ஸசே ஸோ ஸஹேதுகோ ஸத்தோ ஹோதி வத்தஸம்பன்னோ, தே²ரேன ‘‘ஈதி³ஸோ அய’’ந்தி வத்தப்³ப³ம். இணஸாமிகோ சே ‘‘ஸாதூ⁴’’தி விஸ்ஸஜ்ஜேதி, இச்சேதம் குஸலம், ‘‘உபட்³டு⁴பட்³ட⁴ம் தே³தா²’’தி வத³தி, தா³தப்³ப³ம். அபரேன ஸமயேன அதிஆராத⁴கோ ஹோதி, ‘‘ஸப்³ப³ம் தே³தா²’’தி வுத்தேபி தா³தப்³ப³மேவ. ஸசே பன உத்³தே³ஸபரிபுச்சா²தீ³ஸு குஸலோ ஹோதி ப³ஹூபகாரோ பி⁴க்கூ²னம், பி⁴க்கா²சாரவத்தேன பரியேஸித்வாபி இணம் தா³தப்³ப³மேவ.

131. தா³ஸோபி ந பப்³பா³ஜேதப்³போ³ ‘‘ந, பி⁴க்க²வே, தா³ஸோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’தி (மஹாவ. 97) வசனதோ. தத்த² சத்தாரோ தா³ஸா அந்தோஜாதோ த⁴னக்கீதோ கரமரானீதோ ஸாமம் தா³ஸப்³யம் உபக³தோதி. தத்த² அந்தோஜாதோ நாம ஜாதியா தா³ஸோ க⁴ரதா³ஸியா புத்தோ. த⁴னக்கீதோ நாம மாதாபிதூனம் ஸந்திகா புத்தோ வா ஸாமிகானம் ஸந்திகா தா³ஸோ வா த⁴னம் த³த்வா தா³ஸசாரித்தம் ஆரோபேத்வா கீதோ. ஏதே த்³வேபி ந பப்³பா³ஜேதப்³பா³. பப்³பா³ஜேந்தேன தத்த² தத்த² சாரித்தவஸேன அதா³ஸே கத்வா பப்³பா³ஜேதப்³பா³. கரமரானீதோ நாம திரோரட்ட²ம் விலோபம் வா கத்வா உபலாபேத்வா வா திரோரட்ட²தோ பு⁴ஜிஸ்ஸமானுஸகானி ஆஹரந்தி, அந்தோரட்டே²யேவ வா கதாபராத⁴ம் கிஞ்சி கா³மம் ராஜா ‘‘விலும்பதா²’’தி ச ஆணாபேதி, ததோ மானுஸகானிபி ஆஹரந்தி, தத்த² ஸப்³பே³ புரிஸா தா³ஸா, இத்தி²யோ தா³ஸியோ. ஏவரூபோ கரமரானீதோ தா³ஸோ யேஹி ஆனீதோ, தேஸம் ஸந்திகே வஸந்தோ வா ப³ந்த⁴னாகா³ரே ப³த்³தோ⁴ வா புரிஸேஹி ரக்கி²யமானோ வா ந பப்³பா³ஜேதப்³போ³, பலாயித்வா பன க³தோ க³தட்டா²னே பப்³பா³ஜேதப்³போ³. ரஞ்ஞா துட்டே²ன ‘‘கரமரானீதகே முஞ்சதா²’’தி வத்வா வா ஸப்³ப³ஸாதா⁴ரணேன வா நயேன ப³ந்த⁴னமோக்கே² கதே பப்³பா³ஜேதப்³போ³வ.

ஸாமம் தா³ஸப்³யம் உபக³தோ நாம ஜீவிதஹேது வா ஆரக்க²ஹேது வா ‘‘அஹம் தே தா³ஸோ’’தி ஸயமேவ தா³ஸபா⁴வம் உபக³தோ ராஜூனம் ஹத்தி²அஸ்ஸகோ³மஹிம்ஸகோ³பகாத³யோ விய. தாதி³ஸோ தா³ஸோ ந பப்³பா³ஜேதப்³போ³. ரஞ்ஞோ வண்ணதா³ஸீனம் புத்தா ஹோந்தி அமச்சபுத்தஸதி³ஸா, தேபி ந பப்³பா³ஜேதப்³பா³. பு⁴ஜிஸ்ஸித்தி²யோ அஸஞ்ஞதா வண்ணதா³ஸீஹி ஸத்³தி⁴ம் விசரந்தி, தாஸம் புத்தே பப்³பா³ஜேதும் வட்டதி. ஸசே ஸயமேவ பண்ணம் ஆரோபேந்தி, ந வட்டதி. ப⁴டிபுத்தக³ணாதீ³னம் தா³ஸாபி தேஹி அதி³ன்னா ந பப்³பா³ஜேதப்³பா³. விஹாரேஸு ராஜூஹி ஆராமிகதா³ஸா நாம தி³ன்னா ஹோந்தி, தேபி பப்³பா³ஜேதும் ந வட்டதி, பு⁴ஜிஸ்ஸே கத்வா பன பப்³பா³ஜேதும் வட்டதி. மஹாபச்சரியம் ‘‘அந்தோஜாதத⁴னக்கீதகே ஆனேத்வா பி⁴க்கு²ஸங்க⁴ஸ்ஸ ‘ஆராமிகே தே³மா’தி தே³ந்தி, தக்கம் ஸீஸே ஆஸித்தகஸதி³ஸாவ ஹோந்தி, தே பப்³பா³ஜேதும் வட்டதீ’’தி வுத்தம். குருந்தி³யம் பன ‘‘ஆராமிகம் தே³மாதி கப்பியவோஹாரேன தே³ந்தி, யேன கேனசி வோஹாரேன தி³ன்னோ ஹோது, நேவ பப்³பா³ஜேதப்³போ³’’தி வுத்தம். து³க்³க³தமனுஸ்ஸா ‘‘ஸங்க⁴ம் நிஸ்ஸாய ஜீவிஸ்ஸாமா’’தி விஹாரே கப்பியகாரகா ஹோந்தி, ஏதே பப்³பா³ஜேதும் வட்டதி. யஸ்ஸ மாதாபிதரோ தா³ஸா, மாதா ஏவ வா தா³ஸீ, பிதா அதா³ஸோ, தம் பப்³பா³ஜேதும் ந வட்டதி. யஸ்ஸ பன மாதா அதா³ஸீ, பிதா தா³ஸோ, தம் பப்³பா³ஜேதும் வட்டதி. பி⁴க்கு²ஸ்ஸ ஞாதகா வா உபட்டா²கா வா தா³ஸம் தே³ந்தி ‘‘இமம் பப்³பா³ஜேத², தும்ஹாகம் வேய்யாவச்சம் கரிஸ்ஸதீ’’தி, அத்தனோ வாஸ்ஸ தா³ஸோ அத்தி², பு⁴ஜிஸ்ஸோ கதோவ பப்³பா³ஜேதப்³போ³. ஸாமிகா தா³ஸம் தே³ந்தி ‘‘இமம் பப்³பா³ஜேத², ஸசே அபி⁴ரமிஸ்ஸதி, அதா³ஸோ. விப்³ப⁴மிஸ்ஸதி சே, அம்ஹாகம் தா³ஸோவ ப⁴விஸ்ஸதீ’’தி, அயம் தாவகாலிகோ நாம, தம் பப்³பா³ஜேதும் ந வட்டதீதி குருந்தி³யம் வுத்தம். நிஸ்ஸாமிகதா³ஸோ ஹோதி, ஸோபி பு⁴ஜிஸ்ஸோ கதோவ பப்³பா³ஜேதப்³போ³. அஜானந்தோ பப்³பா³ஜேத்வா உபஸம்பாதே³த்வா வா பச்சா² ஜானந்தி, பு⁴ஜிஸ்ஸம் காதுமேவ வட்டதி.

இமஸ்ஸ ச அத்த²ஸ்ஸ பகாஸனத்த²ம் இத³ம் வத்து²ம் வத³ந்தி – ஏகா கிர குலதா³ஸீ ஏகேன ஸத்³தி⁴ம் அனுராத⁴புரா பலாயித்வா ரோஹணே வஸமானா புத்தம் படிலபி⁴, ஸோ பப்³ப³ஜித்வா உபஸம்பன்னகாலே லஜ்ஜீ குக்குச்சகோ அஹோஸி. அதே²கதி³வஸம் மாதரம் புச்சி² ‘‘கிம் உபாஸிகே தும்ஹாகம் பா⁴தா வா ப⁴கி³னீ வா நத்தி², ந கிஞ்சி ஞாதகம் பஸ்ஸாமீ’’தி. தாத, அஹம் அனுராத⁴புரே குலதா³ஸீ, தவ பிதரா ஸத்³தி⁴ம் பலாயித்வா இத⁴ வஸாமீதி. ஸீலவா பி⁴க்கு² ‘‘அஸுத்³தா⁴ கிர மே பப்³ப³ஜ்ஜா’’தி ஸம்வேக³ம் லபி⁴த்வா மாதரம் தஸ்ஸ குலஸ்ஸ நாமகோ³த்தம் புச்சி²த்வா அனுராத⁴புரம் ஆக³ம்ம தஸ்ஸ குலஸ்ஸ க⁴ரத்³வாரே அட்டா²ஸி, ‘‘அதிச்ச²த², ப⁴ந்தே’’தி வுத்தேபி நாதிக்கமி. தே ஆக³ந்த்வா ‘‘கிம், ப⁴ந்தே’’தி புச்சி²ம்ஸு. ‘‘தும்ஹாகம் இத்த²ன்னாமா தா³ஸீ பலாதா அத்தீ²’’தி? ‘‘அத்தி², ப⁴ந்தே’’. அஹம் தஸ்ஸா புத்தோ, ஸசே மம் தும்ஹே அனுஜானாத², பப்³ப³ஜ்ஜம் லபா⁴மி, தும்ஹே மய்ஹம் ஸாமிகாதி. தே ஹட்ட²துட்டா² ஹுத்வா ‘‘ஸுத்³தா⁴, ப⁴ந்தே, தும்ஹாகம் பப்³ப³ஜ்ஜா’’தி தம் பு⁴ஜிஸ்ஸம் கத்வா மஹாவிஹாரே வஸாபேஸும் சதூஹி பச்சயேஹி படிஜக்³க³ந்தா. தே²ரோ தம் குலம் நிஸ்ஸாய வஸமானோயேவ அரஹத்தம் பாபுணீதி.

132. ‘‘ந, பி⁴க்க²வே, ஹத்த²ச்சி²ன்னோ பப்³பா³ஜேதப்³போ³. ந பாத³ச்சி²ன்னோ, ந ஹத்த²பாத³ச்சி²ன்னோ, ந கண்ணச்சி²ன்னோ, ந கண்ணனாஸச்சி²ன்னோ, ந அங்கு³லிச்சி²ன்னோ, ந அளச்சி²ன்னோ, ந கண்ட³ரச்சி²ன்னோ, ந ப²ணஹத்த²கோ, ந கு²ஜ்ஜோ, ந வாமனோ ந க³லக³ண்டீ³, ந லக்க²ணாஹதோ, ந கஸாஹதோ, ந லிகி²தகோ, ந ஸீபதீ³, ந பாபரோகீ³, ந பரிஸதூ³ஸகோ, ந காணோ, ந குணீ, ந க²ஞ்ஜோ, ந பக்க²ஹதோ, ந சி²ன்னிரியாபதோ², ந ஜராது³ப்³ப³லோ, ந அந்தோ⁴, ந மூகோ³, ந ப³தி⁴ரோ, ந அந்த⁴மூகோ³, ந அந்த⁴ப³தி⁴ரோ, ந மூக³ப³தி⁴ரோ, ந அந்த⁴மூக³ப³தி⁴ரோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’தி (மஹாவ. 119) வசனதோ பன ஹத்த²ச்சி²ன்னாத³யோபி ந பப்³பா³ஜேதப்³பா³.

தத்த² ஹத்த²ச்சி²ன்னோதி யஸ்ஸ ஹத்த²தலே வா மணிப³ந்தே⁴ வா கப்பரே வா யத்த² கத்த²சி ஏகோ வா த்³வே வா ஹத்தா² சி²ன்னா ஹோந்தி. பாத³ச்சி²ன்னோதி யஸ்ஸ அக்³க³பாதே³ வா கோ³ப்ப²கேஸு வா ஜங்கா⁴ய வா யத்த² கத்த²சி ஏகோ வா த்³வே வா பாதா³ சி²ன்னா ஹோந்தி. ஹத்த²பாத³ச்சி²ன்னோதி யஸ்ஸ வுத்தப்பகாரேனேவ சதூஸு ஹத்த²பாதே³ஸு த்³வே வா தயோ வா ஸப்³பே³ வா ஹத்த²பாதா³ சி²ன்னா ஹோந்தி. கண்ணச்சி²ன்னோதி யஸ்ஸ கண்ணமூலே வா கண்ணஸக்க²லிகாய வா ஏகோ வா த்³வே வா கண்ணா சி²ன்னா ஹோந்தி. யஸ்ஸ பன கண்ணாவட்டே சி²ஜ்ஜந்தி, ஸக்கா ச ஹோதி ஸங்கா⁴டேதும், ஸோ கண்ணம் ஸங்கா⁴டேத்வா பப்³பா³ஜேதப்³போ³. நாஸச்சி²ன்னோதி யஸ்ஸ அஜபத³கே வா அக்³கே³ வா ஏகபுடே வா யத்த² கத்த²சி நாஸா சி²ன்னா ஹோதி. யஸ்ஸ பன நாஸிகா ஸக்கா ஹோதி ஸந்தே⁴தும், ஸோ தம் பா²ஸுகம் கத்வா பப்³பா³ஜேதப்³போ³. கண்ணனாஸச்சி²ன்னோ உப⁴யவஸேன வேதி³தப்³போ³. அங்கு³லிச்சி²ன்னோதி யஸ்ஸ நக²ஸேஸம் அத³ஸ்ஸேத்வா ஏகா வா ப³ஹூ வா அங்கு³லியோ சி²ன்னா ஹோந்தி. யஸ்ஸ பன ஸுத்ததந்துமத்தம்பி நக²ஸேஸம் பஞ்ஞாயதி, தம் பப்³பா³ஜேதும் வட்டதி. அளச்சி²ன்னோதி யஸ்ஸ சதூஸு அங்கு³ட்ட²கேஸு அங்கு³லியம் வுத்தனயேனேவ ஏகோ வா ப³ஹூ வா அங்கு³ட்ட²கா சி²ன்னா ஹோந்தி. கண்ட³ரச்சி²ன்னோதி யஸ்ஸ கண்ட³ரனாமகா மஹான்ஹாரூ புரதோ வா பச்ச²தோ வா சி²ன்னா ஹோந்தி, யேஸு ஏகஸ்ஸபி சி²ன்னத்தா அக்³க³பாதே³ன வா சங்கமதி, மூலேன வா சங்கமதி, ந பாத³ம் பதிட்டா²பேதும் ஸக்கோதி.

ப²ணஹத்த²கோதி யஸ்ஸ வக்³கு³லிபக்க²கா விய அங்கு³லியோ ஸம்ப³த்³தா⁴ ஹோந்தி, ஏதம் பப்³பா³ஜேதுகாமேன அங்கு³லந்தரிகாயோ பா²லேத்வா ஸப்³ப³ம் அந்தரசம்மம் அபனேத்வா பா²ஸுகம் கத்வா பப்³பா³ஜேதப்³போ³. யஸ்ஸபி ச² அங்கு³லியோ ஹோந்தி, தம் பப்³பா³ஜேதுகாமேன அதி⁴கம் அங்கு³லிம் சி²ந்தி³த்வா பா²ஸுகம் கத்வா பப்³பா³ஜேதப்³போ³. கு²ஜ்ஜோதி யோ உரஸ்ஸ வா பிட்டி²யா வா பஸ்ஸஸ்ஸ வா நிக்க²ந்தத்தா கு²ஜ்ஜஸரீரோ. யஸ்ஸ பன கிஞ்சி கிஞ்சி அங்க³பச்சங்க³ம் ஈஸகம் வங்கம், தம் பப்³பா³ஜேதும் வட்டதி. மஹாபுரிஸோ ஏவ ஹி ப்³ரஹ்முஜுக³த்தோ, அவஸேஸோ ஸத்தோ அகு²ஜ்ஜோ நாம நத்தி². வாமனோதி ஜங்க⁴வாமனோ வா கடிவாமனோ வா உப⁴யவாமனோ வா. ஜங்க⁴வாமனஸ்ஸ கடிதோ பட்டா²ய ஹேட்டி²மகாயோ ரஸ்ஸோ ஹோதி, உபரிமகாயோ பரிபுண்ணோ. கடிவாமனஸ்ஸ கடிதோ பட்டா²ய உபரிமகாயோ ரஸ்ஸோ ஹோதி, ஹேட்டி²மகாயோ பரிபுண்ணோ. உப⁴யவாமனஸ்ஸ உபோ⁴பி காயா ரஸ்ஸா ஹோந்தி, யேஸம் ரஸ்ஸத்தா பூ⁴தானம் விய பரிவடுமோ மஹாகுச்சி²க⁴டஸதி³ஸோ அத்தபா⁴வோ ஹோதி, தம் திவித⁴ம்பி பப்³பா³ஜேதும் ந வட்டதி.

க³லக³ண்டீ³தி யஸ்ஸ கும்ப⁴ண்ட³ம் விய க³லே க³ண்டோ³ ஹோதி. தே³ஸனாமத்தமேவ சேதம், யஸ்மிம் கிஸ்மிஞ்சி பன பதே³ஸே க³ண்டே³ ஸதி ந பப்³பா³ஜேதப்³போ³. தத்த² வினிச்ச²யோ ‘‘ந, பி⁴க்க²வே, பஞ்சஹி ஆபா³தே⁴ஹி பு²ட்டோ² பப்³பா³ஜேதப்³போ³’’தி (மஹாவ. 89) ஏத்த² வுத்தனயேனேவ வேதி³தப்³போ³. லக்க²ணாஹதகஸாஹதலிகி²தகேஸு யம் வத்தப்³ப³ம், தம் ஹேட்டா² வுத்தமேவ. ஸீபதீ³தி பா⁴ரபாதோ³ வுச்சதி. யஸ்ஸ பாதோ³ தூ²லோ ஹோதி ஸஞ்ஜாதபீளகோ க²ரோ, ஸோ ந பப்³பா³ஜேதப்³போ³. யஸ்ஸ பன ந தாவ க²ரபா⁴வம் க³ண்ஹாதி, ஸக்கா ஹோதி உபனாஹம் ப³ந்தி⁴த்வா உத³கஆவாடே பவேஸேத்வா உத³கவாலிகாய பூரேத்வா யதா² ஸிரா பஞ்ஞாயந்தி, ஜங்கா⁴ ச தேலனாளிகா விய ஹோதி, ஏவம் மிலாபேதும், தஸ்ஸ பாத³ம் ஈதி³ஸம் கத்வா தம் பப்³பா³ஜேதும் வட்டதி. ஸசே புன வட்³ட⁴தி, உபஸம்பாதே³ந்தேனபி ததா² கத்வாவ உபஸம்பாதே³தப்³போ³. பாபரோகீ³தி அரிஸப⁴க³ந்த³ரபித்தஸேம்ஹகாஸஸோஸாதீ³ஸு யேன கேனசி ரோகே³ன நிச்சாதுரோ அதேகிச்ச²ரோகோ³ ஜேகு³ச்சோ² அமனாபோ, அயம் ந பப்³பா³ஜேதப்³போ³.

133. பரிஸதூ³ஸகோதி யோ அத்தனோ விரூபதாய பரிஸம் தூ³ஸேதி, அதிதீ³கோ⁴ வா ஹோதி அஞ்ஞேஸம் ஸீஸப்பமாணனாபி⁴ப்பதே³ஸோ, அதிரஸ்ஸோ வா உப⁴யவாமனபூ⁴தரூபம் விய, அதிகாளோ வா ஜா²பிதக்கே²த்தே கா²ணுகோ விய, அச்சோதா³தோ வா த³தி⁴தக்காதீ³ஹி பமஜ்ஜிததம்ப³லோஹவண்ணோ, அதிகிஸோ வா மந்த³மம்ஸலோஹிதோ அட்டி²ஸிராசம்மஸரீரோ விய, அதிதூ²லோ வா பா⁴ரியமம்ஸோ மஹோத³ரோ மஹாபூ⁴தஸதி³ஸோ, அபி⁴மஹந்தஸீஸோ வா பச்சி²ம் ஸீஸே கத்வா டி²தோ விய, அதிகு²த்³த³கஸீஸோ வா ஸரீரஸ்ஸ அனனுரூபேன அதிகு²த்³த³கேன ஸீஸேன ஸமன்னாக³தோ, கூடகூடஸீஸோ வா தாலப²லபிண்டி³ஸதி³ஸேன ஸீஸேன ஸமன்னாக³தோ, ஸிக²ரஸீஸோ வா உத்³த⁴ம் அனுபுப்³ப³தனுகேன ஸீஸேன ஸமன்னாக³தோ, நாளிஸீஸோ வா மஹாவேணுபப்³ப³ஸதி³ஸேன ஸீஸேன ஸமன்னாக³தோ, கப்பஸீஸோ வா பப்³பா⁴ரஸீஸோ வா சதூஸு பஸ்ஸேஸு யேன கேனசி பஸ்ஸேன ஓனதேன ஸீஸேன ஸமன்னாக³தோ, வணஸீஸோ வா பூதிஸீஸோ வா கண்ணிககேஸோ வா பாணகேஹி கா²யிதகேதா³ரே ஸஸ்ஸஸதி³ஸேஹி தஹிம் தஹிம் உட்டி²தேஹி கேஸேஹி ஸமன்னாக³தோ, நில்லோமஸீஸோ வா தூ²லத²த்³த⁴கேஸோ வா தாலஹீரஸதி³ஸேஹி கேஸேஹி ஸமன்னாக³தோ, ஜாதிபலிதேஹி பண்ட³ரகேஸோ வா பகதிதம்ப³கேஸோ வா ஆதி³த்தேஹி விய கேஸேஹி ஸமன்னாக³தோ, ஆவட்டஸீஸோ வா கு³ன்னம் ஸரீரே ஆவட்டஸதி³ஸேஹி உத்³த⁴க்³கே³ஹி கேஸாவட்டேஹி ஸமன்னாக³தோ, ஸீஸலோமேஹி ஸத்³தி⁴ம் ஏகாப³த்³த⁴ப⁴முகலோமோ வா ஜாலப³த்³தே⁴ன விய நலாடேன ஸமன்னாக³தோ.

ஸம்ப³த்³த⁴ப⁴முகோ வா நில்லோமப⁴முகோ வா மக்கடப⁴முகோ வா அதிமஹந்தக்கி² வா அதிகு²த்³த³கக்கி² வா மஹிம்ஸசம்மே வாஸிகோணேன பஹரித்வா கதசி²த்³த³ஸதி³ஸேஹி அக்கீ²ஹி ஸமன்னாக³தோ, விஸமக்கி² வா ஏகேன மஹந்தேன, ஏகேன கு²த்³த³கேன அக்கி²னா ஸமன்னாக³தோ, விஸமசக்கலோ வா ஏகேன உத்³த⁴ம், ஏகேன அதோ⁴தி ஏவம் விஸமஜாதேஹி அக்கி²சக்கேஹி ஸமன்னாக³தோ, கேகரோ வா க³ம்பீ⁴ரக்கி² வா யஸ்ஸ க³ம்பீ⁴ரே உத³பானே உத³கதாரகா விய அக்கி²தாரகா பஞ்ஞாயந்தி, நிக்க²ந்தக்கி² வா யஸ்ஸ கக்கடஸ்ஸேவ அக்கி²தாரகா நிக்க²ந்தா ஹோந்தி, ஹத்தி²கண்ணோ வா மஹந்தாஹி கண்ணஸக்க²லீஹி ஸமன்னாக³தோ, மூஸிககண்ணோ வா ஜதுககண்ணோ வா கு²த்³த³காஹி கண்ணஸக்க²லீஹி ஸமன்னாக³தோ, சி²த்³த³மத்தகண்ணோ வா யஸ்ஸ வினா கண்ணஸக்க²லீஹி கண்ணச்சி²த்³த³மத்தமேவ ஹோதி, அவித்³த⁴கண்ணோ வா, யோனகஜாதிகோ பன பரிஸதூ³ஸகோ ந ஹோதி, ஸபா⁴வோயேவ ஹி ஸோ தஸ்ஸ. கண்ணப⁴க³ந்த³ரிகோ வா நிச்சபூதினா கண்ணேன ஸமன்னாக³தோ, க³ண்ட³கண்ணோ வா ஸதா³ பக்³க⁴ரிதபுப்³பே³ன கண்ணேன ஸமன்னாக³தோ, டங்கிதகண்ணோ வா கோ³ப⁴த்தனாளிகாய அக்³க³ஸதி³ஸேஹி கண்ணேஹி ஸமன்னாக³தோ, அதிபிங்க³லக்கி² வா, மது⁴பிங்க³லம் பன பப்³பா³ஜேதும் வட்டதி. நிப்பகு²மக்கி² வா அஸ்ஸுபக்³க⁴ரணக்கி² வா புப்பி²தக்கி² வா அக்கி²பாகேன ஸமன்னாக³தக்கி² வா.

அதிமஹந்தனாஸிகோ வா அதிகு²த்³த³கனாஸிகோ வா சிபிடனாஸிகோ வா மஜ்ஜே² அப்பதிட்ட²ஹித்வா ஏகபஸ்ஸே டி²தவங்கனாஸிகோ வா தீ³க⁴னாஸிகோ வா ஸுகதுண்ட³ஸதி³ஸாய ஜிவ்ஹாய லேஹிதும் ஸக்குணேய்யாய நாஸிகாய ஸமன்னாக³தோ, நிச்சம் பக்³க⁴ரிதஸிங்கா⁴ணிகனாஸோ வா, மஹாமுகோ² வா யஸ்ஸ படங்க³மண்டூ³கஸ்ஸேவ முக²னிமித்தம்யேவ மஹந்தம் ஹோதி, முக²ம் பன லாபு³ஸதி³ஸம் அதிகு²த்³த³கம், பி⁴ன்னமுகோ² வா வங்கமுகோ² வா மஹாஓட்டோ² வா உக்க²லிமுக²வட்டிஸதி³ஸேஹி ஓட்டே²ஹி ஸமன்னாக³தோ, தனுகஓட்டோ² வா பே⁴ரிசம்மஸதி³ஸேஹி த³ந்தே பித³ஹிதும் அஸமத்தே²ஹி ஓட்டே²ஹி ஸமன்னாக³தோ, மஹாத⁴ரோட்டோ² வா தனுகஉத்தரோட்டோ² வா தனுகஅத⁴ரோட்டோ² வா மஹாஉத்தரோட்டோ² வா ஓட்ட²சி²ன்னகோ வா ஏளமுகோ² வா உப்பக்கமுகோ² வா ஸங்க²துண்ட³கோ வா ப³ஹி ஸேதேஹி அந்தோ அதிரத்தேஹி ஓட்டே²ஹி ஸமன்னாக³தோ, து³க்³க³ந்த⁴குணபமுகோ² வா, மஹாத³ந்தோ வா அட்ட²கத³ந்தஸதி³ஸேஹி த³ந்தேஹி ஸமன்னாக³தோ, அஸுரத³ந்தோ வா ஹேட்டா² வா உபரி வா ப³ஹி நிக்க²ந்தத³ந்தோ, யஸ்ஸ பன ஸக்கா ஹோதி ஓட்டே²ஹி பித³ஹிதும், கதே²ந்தஸ்ஸேவ பஞ்ஞாயதி, நோ அகதே²ந்தஸ்ஸ, தம் பப்³பா³ஜேதும் வட்டதி. பூதித³ந்தோ வா நித்³த³ந்தோ வா அதிகு²த்³த³கத³ந்தோ வா யஸ்ஸ பன த³ந்தந்தரே கலந்த³கத³ந்தோ விய ஸுகு²மத³ந்தோ ஹோதி, தம் பப்³பா³ஜேதும் வட்டதி.

மஹாஹனுகோ வா கோ³ஹனுஸதி³ஸேன ஹனுனா ஸமன்னாக³தோ, தீ³க⁴ஹனுகோ வா சிபிடஹனுகோ வா அந்தோபவிட்டே²ன விய அதிரஸ்ஸேன ஹனுகேன ஸமன்னாக³தோ, பி⁴ன்னஹனுகோ வா வங்கஹனுகோ வா நிம்மஸ்ஸுதா³டி²கோ வா பி⁴க்கு²னீஸதி³ஸமுகோ², தீ³க⁴க³லோ வா ப³கக³லஸதி³ஸேன க³லேன ஸமன்னாக³தோ, ரஸ்ஸக³லோ வா அந்தோபவிட்டே²ன விய க³லேன ஸமன்னாக³தோ, பி⁴ன்னக³லோ வா ப⁴ட்ட²அம்ஸகூடோ வா அஹத்தோ² வா ஏகஹத்தோ² வா அதிரஸ்ஸஹத்தோ² வா அதிதீ³க⁴ஹத்தோ² வா பி⁴ன்னஉரோ வா பி⁴ன்னபிட்டி² வா கச்சு²க³த்தோ வா கண்டு³க³த்தோ வா த³த்³து³க³த்தோ வா கோ³தா⁴க³த்தோ வா யஸ்ஸ கோ³தா⁴ய விய க³த்ததோ சுண்ணானி பதந்தி. ஸப்³ப³ஞ்சேதம் விரூபகரணம் ஸந்தா⁴ய வித்தா²ரிதவஸேன வுத்தம், வினிச்ச²யோ பனேத்த² பஞ்சாபா³தே⁴ஸு வுத்தனயேன வேதி³தப்³போ³.

ப⁴ட்ட²கடிகோ வா மஹாஆனிஸதோ³ வா உத்³த⁴னகூடஸதி³ஸேஹி ஆனிஸத³மம்ஸேஹி அச்சுக்³க³தேஹி ஸமன்னாக³தோ, மஹாஊருகோ வா வாதண்டி³கோ வா மஹாஜாணுகோ வா ஸங்க⁴ட்டனஜாணுகோ வா தீ³க⁴ஜங்கோ⁴ வா யட்டி²ஸதி³ஸஜங்கோ⁴, விகடோ வா ஸங்க⁴ட்டோ வா உப்³ப³த்³த⁴பிண்டி³கோ வா, ஸோ து³விதோ⁴ ஹேட்டா² ஓருள்ஹாஹி வா உபரி ஆருள்ஹாஹி வா மஹதீஹி ஜங்க⁴பிண்டி³காஹி ஸமன்னாக³தோ, மஹாஜங்கோ⁴ வா தூ²லஜங்க⁴பிண்டி³கோ வா மஹாபாதோ³ வா மஹாபண்ஹி வா பிட்டி²கபாதோ³ வா பாத³வேமஜ்ஜ²தோ உட்டி²தஜங்கோ⁴, வங்கபாதோ³ வா, ஸோ து³விதோ⁴ அந்தோ வா ப³ஹி வா பரிவத்தபாதோ³, க³ண்டி²கங்கு³லி வா ஸிங்கி³வேரப²ணஸதி³ஸாஹி அங்கு³லீஹி ஸமன்னாக³தோ, அந்த⁴னகோ² வா காளவண்ணேஹி பூதினகே²ஹி ஸமன்னாக³தோ, ஸப்³போ³பி ஏஸ பரிஸதூ³ஸகோ. ஏவரூபோ பரிஸதூ³ஸகோ ந பப்³பா³ஜேதப்³போ³.

134. காணோதி பஸன்னந்தோ⁴ வா ஹோது புப்பா²தீ³ஹி வா உபஹதபஸாதோ³, த்³வீஹி வா ஏகேன வா அக்கி²னா ந பஸ்ஸதி, ஸோ ந பப்³பா³ஜேதப்³போ³. மஹாபச்சரியம் பன ஏகக்கி²காணோ ‘‘காணோ’’தி வுத்தோ, த்³விஅக்கி²காணோ அந்தே⁴ன ஸங்க³ஹிதோ. மஹாஅட்ட²கதா²யம் ஜச்சந்தோ⁴ ‘‘அந்தோ⁴’’தி வுத்தோ. தஸ்மா உப⁴யம்பி பரியாயேன யுஜ்ஜதி. குணீதி ஹத்த²குணீ வா பாத³குணீ வா அங்கு³லிகுணீ வா, யஸ்ஸ ஏதேஸு ஹத்தா²தீ³ஸு யம் கிஞ்சி வங்கம் பஞ்ஞாயதி. க²ஞ்ஜோதி நதஜாணுகோ வா பி⁴ன்னஜங்கோ⁴ வா மஜ்ஜே² ஸம்குடிதபாத³த்தா குண்ட²பாத³கோ வா பிட்டி²பாத³மஜ்ஜே²ன சங்கமந்தோ, அக்³கே³ ஸம்குடிதபாத³த்தா குண்ட²பாத³கோ வா பிட்டி²பாத³க்³கே³ன சங்கமந்தோ, அக்³க³பாதே³னேவ சங்கமனக²ஞ்ஜோ வா பண்ஹிகாய சங்கமனக²ஞ்ஜோ வா பாத³ஸ்ஸ பா³ஹிரந்தேன சங்கமனக²ஞ்ஜோ வா பாத³ஸ்ஸ அப்³ப⁴ந்தரேன சங்கமனக²ஞ்ஜோ வா கோ³ப்ப²கானம் உபரி ப⁴க்³க³த்தா ஸகலேன பிட்டி²பாதே³ன சங்கமனக²ஞ்ஜோ வா. ஸப்³போ³பேஸ க²ஞ்ஜோயேவ, ந பப்³பா³ஜேதப்³போ³.

பக்க²ஹதோதி யஸ்ஸ ஏகோ ஹத்தோ² வா பாதோ³ வா அத்³த⁴ஸரீரம் வா ஸுக²ம் ந வஹதி. சி²ன்னிரியாபதோ²தி பீட²ஸப்பீ வுச்சதி. ஜராது³ப்³ப³லோதி ஜிண்ணபா⁴வேன து³ப்³ப³லோ அத்தனோ சீவரரஜனாதி³கம்மம்பி காதும் அஸமத்தோ². யோ பன மஹல்லகோபி ப³லவா ஹோதி, அத்தானம் படிஜக்³கி³தும் ஸக்கோதி, ஸோ பப்³பா³ஜேதப்³போ³. அந்தோ⁴தி ஜச்சந்தோ⁴ வுச்சதி. மூகோ³தி யஸ்ஸ வசீபே⁴தோ³ ந பவத்ததி, யஸ்ஸபி பவத்ததி, ஸரணக³மனம் பன பரிபுண்ணம் பா⁴ஸிதும் ந ஸக்கோதி, தாதி³ஸம் மம்மனம்பி பப்³பா³ஜேதும் ந வட்டதி. யோ பன ஸரணக³மனமத்தம் பரிபுண்ணம் பா⁴ஸிதும் ஸக்கோதி, தம் பப்³பா³ஜேதும் வட்டதி. ப³தி⁴ரோதி யோ ஸப்³பே³ன ஸப்³ப³ம் ந ஸுணாதி. யோ பன மஹாஸத்³த³ம் ஸுணாதி, தம் பப்³பா³ஜேதும் வட்டதி. அந்த⁴மூகா³த³யோ உப⁴யதோ³ஸவஸேன வுத்தா. யேஸஞ்ச பப்³ப³ஜ்ஜா படிக்கி²த்தா, உபஸம்பதா³பி தேஸம் படிக்கி²த்தாவ. ஸசே பன நே ஸங்கோ⁴ உபஸம்பாதே³தி, ஸப்³பே³பி ஸூபஸம்பன்னா, காரகஸங்கோ⁴ பன ஆசரியுபஜ்ஜா²யா ச ஆபத்திதோ ந முச்சந்தி.

135. பண்ட³கோ உப⁴தோப்³யஞ்ஜனகோ தே²ய்யஸம்வாஸகோ தித்தி²யபக்கந்தகோ திரச்சா²னக³தோ மாதுகா⁴தகோ பிதுகா⁴தகோ அரஹந்தகா⁴தகோ லோஹிதுப்பாத³கோ ஸங்க⁴பே⁴த³கோ பி⁴க்கு²னீதூ³ஸகோதி இமே பன ஏகாத³ஸ புக்³க³லா ‘‘பண்ட³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’தி (மஹாவ. 109) ஆதி³வசனதோ அப⁴ப்³பா³, நேவ நேஸம் பப்³ப³ஜ்ஜா, ந உபஸம்பதா³ ச ருஹதி, தஸ்மா ந பப்³பா³ஜேதப்³பா³ ந உபஸம்பாதே³தப்³பா³, ஜானித்வா பப்³பா³ஜேந்தோ உபஸம்பாதே³ந்தோ ச து³க்கடம் ஆபஜ்ஜதி. அஜானித்வாபி பப்³பா³ஜிதா உபஸம்பாதி³தா ச ஜானித்வா லிங்க³னாஸனாய நாஸேதப்³பா³.

தத்த² பண்ட³கோதி ஆஸித்தபண்ட³கோ உஸூயபண்ட³கோ ஓபக்கமிகபண்ட³கோ பக்க²பண்ட³கோ நபும்ஸகபண்ட³கோதி பஞ்ச பண்ட³கா. தேஸு யஸ்ஸ பரேஸம் அங்க³ஜாதம் முகே²ன க³ஹேத்வா அஸுசினா ஆஸித்தஸ்ஸ பரிளாஹோ வூபஸம்மதி, அயம் ஆஸித்தபண்ட³கோ. யஸ்ஸ பரேஸம் அஜ்ஜா²சாரம் பஸ்ஸதோ உஸூயாய உப்பன்னாய பரிளாஹோ வூபஸம்மதி, அயம் உஸூயபண்ட³கோ. யஸ்ஸ உபக்கமேன பீ³ஜானி அபனீதானி, அயம் ஓபக்கமிகபண்ட³கோ. ஏகச்சோ பன அகுஸலவிபாகானுபா⁴வேன காளபக்கே² பண்ட³கோ ஹோதி, ஜுண்ஹபக்கே² பனஸ்ஸ பரிளாஹோ வூபஸம்மதி, அயம் பக்க²பண்ட³கோ. யோ பன படிஸந்தி⁴யம்யேவ அபா⁴வகோ உப்பன்னோ, அயம் ந பும்ஸகபண்ட³கோ. தேஸு ஆஸித்தபண்ட³கஸ்ஸ ச உஸூயபண்ட³கஸ்ஸ ச பப்³ப³ஜ்ஜா ந வாரிதா, இதரேஸம் திண்ணம் வாரிதா. ‘‘தேஸுபி பக்க²பண்ட³கஸ்ஸ யஸ்மிம் பக்கே² பண்ட³கோ ஹோதி, தஸ்மிம்யேவஸ்ஸ பக்கே² பப்³ப³ஜ்ஜா வாரிதா’’தி குருந்தி³யம் வுத்தம்.

136. உப⁴தோப்³யஞ்ஜனகோதி (மஹாவ. அட்ட². 116) இத்தி²னிமித்துப்பாத³னகம்மதோ ச புரிஸனிமித்துப்பாத³னகம்மதோ ச உப⁴தோப்³யஞ்ஜனமஸ்ஸ அத்தீ²தி உப⁴தோப்³யஞ்ஜனகோ. ஸோ து³விதோ⁴ ஹோதி இத்தி²உப⁴தோப்³யஞ்ஜனகோ புரிஸஉப⁴தோப்³யஞ்ஜனகோதி. தத்த² இத்தி²உப⁴தோப்³யஞ்ஜனகஸ்ஸ இத்தி²னிமித்தம் பாகடம் ஹோதி, புரிஸனிமித்தம் படிச்ச²ன்னம். புரிஸஉப⁴தோப்³யஞ்ஜனகஸ்ஸ புரிஸனிமித்தம் பாகடம், இத்தி²னிமித்தம் படிச்ச²ன்னம். இத்தி²உப⁴தோப்³யஞ்ஜனகஸ்ஸ இத்தீ²ஸு புரிஸத்தம் கரோந்தஸ்ஸ இத்தி²னிமித்தம் படிச்ச²ன்னம் ஹோதி, புரிஸனிமித்தம் பாகடம். புரிஸஉப⁴தோப்³யஞ்ஜனகஸ்ஸ புரிஸானம் இத்தி²பா⁴வம் உபக³ச்ச²ந்தஸ்ஸ புரிஸனிமித்தம் படிச்ச²ன்னம் ஹோதி, இத்தி²னிமித்தம் பாகடம் ஹோதி. இத்தி²உப⁴தோப்³யஞ்ஜனகோ ஸயஞ்ச க³ப்³ப⁴ம் க³ண்ஹாதி, பரஞ்ச க³ண்ஹாபேதி, புரிஸஉப⁴தோப்³யஞ்ஜனகோ பன ஸயம் ந க³ண்ஹாதி, பரம் பன க³ண்ஹாபேதீதி இத³மேதேஸம் நானாகரணம். இமஸ்ஸ பன து³வித⁴ஸ்ஸபி உப⁴தோப்³யஞ்ஜனகஸ்ஸ நேவ பப்³ப³ஜ்ஜா அத்தி², ந உபஸம்பதா³.

137. தே²ய்யஸம்வாஸகோதி தயோ தே²ய்யஸம்வாஸகா லிங்க³த்தே²னகோ ஸம்வாஸத்தே²னகோ உப⁴யத்தே²னகோதி. தத்த² யோ ஸயம் பப்³ப³ஜித்வா விஹாரம் க³ந்த்வா ந பி⁴க்கு²வஸ்ஸானி க³ணேதி, ந யதா²வுட்³ட⁴ம் வந்த³னம் ஸாதி³யதி, ந ஆஸனேன படிபா³ஹதி, ந உபோஸத²பவாரணாதீ³ஸு ஸந்தி³ஸ்ஸதி, அயம் லிங்க³மத்தஸ்ஸேவ தே²னிதத்தா லிங்க³த்தே²னகோ நாம. யோ பன பி⁴க்கூ²ஹி பப்³பா³ஜிதோ ஸாமணேரோ ஸமானோ விதே³ஸம் க³ந்த்வா ‘‘அஹம் த³ஸவஸ்ஸோ வா வீஸதிவஸ்ஸோ வா’’தி முஸா வத்வா பி⁴க்கு²வஸ்ஸானி க³ணேதி, யதா²வுட்³ட⁴ம் வந்த³னம் ஸாதி³யதி, ஆஸனேன படிபா³ஹதி, உபோஸத²பவஆரணாதீ³ஸு ஸந்தி³ஸ்ஸதி, அயம் ஸம்வாஸமத்தஸ்ஸேவ தே²னிதத்தா ஸம்வாஸத்தே²னகோ நாம. பி⁴க்கு²வஸ்ஸக³ணனாதி³கோ ஹி ஸப்³போ³பி கிரியபே⁴தோ³ இமஸ்மிம் அத்தே² ‘‘ஸம்வாஸோ’’தி வேதி³தப்³போ³. ஸிக்க²ம் பச்சக்கா²ய ‘‘ந மம் கோசி ஜானாதீ’’தி புன ஏவம் படிபஜ்ஜந்தேபி ஏஸேவ நயோ. யோ பன ஸயம் பப்³ப³ஜித்வா விஹாரம் க³ந்த்வா பி⁴க்கு²வஸ்ஸானி க³ணேதி, யதா²வுட்³ட⁴ம் வந்த³னம் ஸாதி³யதி, ஆஸனேன படிபா³ஹதி, உபோஸத²பவாரணாதீ³ஸு ஸந்தி³ஸ்ஸதி, அயம் லிங்க³ஸ்ஸ சேவ ஸம்வாஸஸ்ஸ ச தே²னிதத்தா உப⁴யத்தே²னகோ நாம. அயம் திவிதோ⁴பி தே²ய்யஸம்வாஸகோ அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³, புன பப்³ப³ஜ்ஜம் யாசந்தோபி ந பப்³பா³ஜேதப்³போ³.

138. ஏத்த² ச அஸம்மோஹத்த²ம் இத³ம் பகிண்ணகம் வேதி³தப்³ப³ம் –

‘‘ராஜது³ப்³பி⁴க்க²கந்தார, ரோக³வேரிப⁴யேன வா;

சீவராஹரணத்த²ம் வா, லிங்க³ம் ஆதி³யதீத⁴ யோ.

‘‘ஸம்வாஸம் நாதி⁴வாஸேதி, யாவ ஸோ ஸுத்³த⁴மானஸோ;

தே²ய்யஸம்வாஸகோ நாம, தாவ ஏஸ ந வுச்சதீ’’தி. (மஹாவ. அட்ட². 110);

தத்ராயம் வித்தா²ரனயோ – இதே⁴கச்சஸ்ஸ ராஜா குத்³தோ⁴ ஹோதி, ஸோ ‘‘ஏவம் மே ஸோத்தி² ப⁴விஸ்ஸதீ’’தி ஸயமேவ லிங்க³ம் க³ஹேத்வா பலாயதி. தம் தி³ஸ்வா ரஞ்ஞோ ஆரோசேந்தி, ராஜா ‘‘ஸசே பப்³ப³ஜிதோ, ந தம் லப்³பா⁴ கிஞ்சி காது’’ந்தி தஸ்மிம் கோத⁴ம் படிவினேதி. ஸோ ‘‘வூபஸந்தம் மே ராஜப⁴ய’’ந்தி ஸங்க⁴மஜ்ஜ²ம் அனோஸரித்வாவ கி³ஹிலிங்க³ம் க³ஹேத்வா ஆக³தோ பப்³பா³ஜேதப்³போ³. அதா²பி ‘‘ஸாஸனம் நிஸ்ஸாய மயா ஜீவிதம் லத்³த⁴ம், ஹந்த³ தா³னி அஹம் பப்³ப³ஜாமீ’’தி உப்பன்னஸம்வேகோ³ தேனேவ லிங்கே³ன ஆக³ந்த்வா ஆக³ந்துகவத்தம் ந ஸாதி³யதி, பி⁴க்கூ²ஹி புட்டோ² வா அபுட்டோ² வா யதா²பூ⁴தமத்தானம் ஆவிகத்வா பப்³ப³ஜ்ஜம் யாசதி, லிங்க³ம் அபனேத்வா பப்³பா³ஜேதப்³போ³. ஸசே பன ஸோ வத்தம் ஸாதி³யதி, பப்³ப³ஜிதாலயம் த³ஸ்ஸேதி, ஸப்³ப³ம் புப்³பே³ வுத்தம் வஸ்ஸக³ணனாதி³பே⁴த³ம் விதி⁴ம் படிபஜ்ஜதி, அயம் ந பப்³பா³ஜேதப்³போ³.

இத⁴ பனேகச்சோ து³ப்³பி⁴க்கே² ஜீவிதும் அஸக்கோந்தோ ஸயமேவ லிங்க³ம் க³ஹேத்வா ஸப்³ப³பாஸண்டி³யப⁴த்தானி பு⁴ஞ்ஜந்தோ து³ப்³பி⁴க்கே² வீதிவத்தே ஸங்க⁴மஜ்ஜ²ம் அனோஸரித்வாவ கி³ஹிலிங்க³ம் க³ஹேத்வா ஆக³தோதி ஸப்³ப³ம் புரிமஸதி³ஸமேவ.

அபரோ மஹாகந்தாரம் நித்த²ரிதுகாமோ ஹோதி, ஸத்த²வாஹோ ச பப்³ப³ஜிதே க³ஹேத்வா க³ச்ச²தி. ஸோ ‘‘ஏவம் மம் ஸத்த²வாஹோ க³ஹேத்வா க³மிஸ்ஸதீ’’தி ஸயமேவ லிங்க³ம் க³ஹேத்வா ஸத்த²வாஹேன ஸத்³தி⁴ம் கந்தாரம் நித்த²ரித்வா கே²மந்தம் பத்வா ஸங்க⁴மஜ்ஜ²ம் அனோஸரித்வாவ கி³ஹிலிங்க³ம் க³ஹேத்வா ஆக³தோதி ஸப்³ப³ம் புரிமஸதி³ஸமேவ.

அபரோ ரோக³ப⁴யே உப்பன்னே ஜீவிதும் அஸக்கோந்தோ ஸயமேவ லிங்க³ம் க³ஹேத்வா ஸப்³ப³பாஸண்டி³யப⁴த்தானி பு⁴ஞ்ஜந்தோ ரோக³ப⁴யே வூபஸந்தே ஸங்க⁴மஜ்ஜ²ம் அனோஸரித்வாவ கி³ஹிலிங்க³ம் க³ஹேத்வா ஆக³தோதி ஸப்³ப³ம் புரிமஸதி³ஸமேவ.

அபரஸ்ஸ ஏகோ வேரிகோ குத்³தோ⁴ ஹோதி, கா⁴தேதுகாமோ நம் விசரதி. ஸோ ‘‘ஏவம் மே ஸோத்தி² ப⁴விஸ்ஸதீ’’தி ஸயமேவ லிங்க³ம் க³ஹேத்வா பலாயதி. வேரிகோ ‘‘குஹிம் ஸோ’’தி பரியேஸந்தோ ‘‘பப்³ப³ஜித்வா பலாதோ’’தி ஸுத்வா ‘‘ஸசே பப்³ப³ஜிதோ, ந தம் லப்³பா⁴ கிஞ்சி காது’’ந்தி தஸ்மிம் கோத⁴ம் படிவினேதி. ஸோ ‘‘வூபஸந்தம் மே வேரிப⁴ய’’ந்தி ஸங்க⁴மஜ்ஜ²ம் அனோஸரித்வாவ கி³ஹிலிங்க³ம் க³ஹேத்வா ஆக³தோதி ஸப்³ப³ம் புரிமஸதி³ஸமேவ.

அபரோ ஞாதிகுலம் க³ந்த்வா ஸிக்க²ம் பச்சக்கா²ய கி³ஹீ ஹுத்வா ‘‘இமானி சீவரானி இத⁴ நஸ்ஸிஸ்ஸந்தி, ஸசேபி இமானி க³ஹேத்வா விஹாரம் க³மிஸ்ஸாமி, அந்தராமக்³கே³ மம் ‘சோரோ’தி க³ஹேஸ்ஸந்தி, யம்னூனாஹம் காயபரிஹாரியானி கத்வா க³ச்சே²ய்ய’’ந்தி சீவராஹரணத்த²ம் நிவாஸேத்வா ச பாருபித்வா ச விஹாரம் க³ச்ச²தி. தம் தூ³ரதோவ ஆக³ச்ச²ந்தம் தி³ஸ்வா ஸாமணேரா ச த³ஹரா ச அப்³பு⁴க்³க³ச்ச²ந்தி, வத்தம் த³ஸ்ஸேந்தி. ஸோ ந ஸாதி³யதி, யதா²பூ⁴தமத்தானம் ஆவிகரோதி. ஸசே பி⁴க்கூ² ‘‘ந தா³னி மயம் தம் முஞ்சிஸ்ஸாமா’’தி ப³லக்காரேன பப்³பா³ஜேதுகாமா ஹோந்தி, காஸாயானி அபனேத்வா புன பப்³பா³ஜேதப்³போ³. ஸசே பன ‘‘நயிமே மம் ஹீனாயாவத்தபா⁴வம் ஜானந்தீ’’தி தம்யேவ பி⁴க்கு²பா⁴வம் படிஜானித்வா ஸப்³ப³ம் புப்³பே³ வுத்தம் வஸ்ஸக³ணனாதி³பே⁴த³ம் விதி⁴ம் படிபஜ்ஜதி, அயம் ந பப்³பா³ஜேதப்³போ³.

அபரோ மஹாஸாமணேரோ ஞாதிகுலம் க³ந்த்வா உப்பப்³ப³ஜித்வா கம்மந்தானுட்டா²னேன உப்³பா³ள்ஹோ புன ‘‘தா³னி அஹம் ஸாமணேரோ ப⁴விஸ்ஸாமி, தே²ரோபி மே உப்பப்³ப³ஜிதபா⁴வம் ந ஜானாதீ’’தி ததே³வ பத்தசீவரம் ஆதா³ய விஹாரம் க³ச்ச²தி, தமத்த²ம் பி⁴க்கூ²னம் ந ஆரோசேதி, ஸாமணேரபா⁴வம் படிஜானாதி, அயம் தே²ய்யஸம்வாஸகோயேவ, பப்³ப³ஜ்ஜம் ந லப⁴தி. ஸசேபிஸ்ஸ லிங்க³க்³க³ஹணகாலே ஏவம் ஹோதி ‘‘நாஹம் கஸ்ஸசி ஆரோசேஸ்ஸாமீ’’தி, விஹாரஞ்ச க³தோ ஆரோசேதி, க³ஹணேனேவ தே²ய்யஸம்வாஸகோ. அதா²பிஸ்ஸ க³ஹணகாலே ‘‘ஆசிக்கி²ஸ்ஸாமீ’’தி சித்தம் உப்பன்னம் ஹோதி, விஹாரஞ்ச க³ந்த்வா ‘‘குஹிம் த்வம், ஆவுஸோ, க³தோ’’தி வுத்தோ ‘‘ந தா³னி மம் இமே ஜானந்தீ’’தி வஞ்சேத்வா நாசிக்க²தி, ‘‘நாசிக்கி²ஸ்ஸாமீ’’தி ஸஹ து⁴ரனிக்கே²பேன அயம்பி தே²ய்யஸம்வாஸகோவ. ஸசே பனஸ்ஸ க³ஹணகாலேபி ‘‘ஆசிக்கி²ஸ்ஸாமீ’’தி ஹோதி, விஹாரம் க³ந்த்வாபி ஆசிக்க²தி, அயம் புன பப்³ப³ஜ்ஜம் லப⁴தி.

அபரோ த³ஹரஸாமணேரோ மஹந்தோ வா பன அப்³யத்தோ. ஸோ புரிமனயேனேவ உப்பப்³ப³ஜித்வா க⁴ரே வச்ச²ககோ³ரக்க²ணாதீ³னி கம்மானி காதும் ந இச்ச²தி. தமேனம் ஞாதகா தானியேவ காஸாயானி அச்சா²தே³த்வா தா²லகம் வா பத்தம் வா ஹத்தே² த³த்வா ‘‘க³ச்ச², ஸமணோவ ஹோஹீ’’தி க⁴ரா நீஹரந்தி. ஸோ விஹாரம் க³ச்ச²தி, நேவ நம் பி⁴க்கூ² ஜானந்தி ‘‘அயம் உப்பப்³ப³ஜித்வா புன ஸயமேவ பப்³ப³ஜிதோ’’தி, நாபி ஸயம் ஜானாதி ‘‘யோ ஏவம் பப்³ப³ஜதி, ஸோ தே²ய்யஸம்வாஸகோ நாம ஹோதீ’’தி. ஸசே பன தம் பரிபுண்ணவஸ்ஸம் உபஸம்பாதே³ந்தி, ஸூபஸம்பன்னோ. ஸசே பன அனுபஸம்பன்னகாலேயேவ வினயவினிச்ச²யே வத்தமானே ஸுணாதி ‘‘யோ ஏவம் பப்³ப³ஜதி, ஸோ தே²ய்யஸம்வாஸகோ நாம ஹோதீ’’தி, தேன ‘‘மயா ஏவம் கத’’ந்தி பி⁴க்கூ²னம் ஆசிக்கி²தப்³ப³ம். ஏவம் புன பப்³ப³ஜ்ஜம் லப⁴தி. ஸசே பன ‘‘தா³னி ந மம் கோசி ஜானாதீ’’தி நாரோசேதி, து⁴ரம் நிக்கி²த்தமத்தேயேவ தே²ய்யஸம்வாஸகோ.

பி⁴க்கு² ஸிக்க²ம் பச்சக்கா²ய லிங்க³ம் அனபனேத்வா து³ஸ்ஸீலகம்மம் கத்வா வா அகத்வா வா புன ஸப்³ப³ம் புப்³பே³ வுத்தம் வஸ்ஸக³ணனாதி³பே⁴த³ம் விதி⁴ம் படிபஜ்ஜதி, தே²ய்யஸம்வாஸகோ ஹோதி. ஸிக்க²ம் அப்பச்சக்கா²ய ஸலிங்கே³ டி²தோ மேது²னம் படிஸேவித்வா வஸ்ஸக³ணனாதி³பே⁴த³ம் விதி⁴ம் ஆபஜ்ஜந்தோ தே²ய்யஸம்வாஸகோ ந ஹோதி, பப்³ப³ஜ்ஜாமத்தம் லப⁴தி. அந்த⁴கட்ட²கதா²யம் பன ‘‘ஏஸோ தே²ய்யஸம்வாஸகோ’’தி வுத்தம், தம் ந க³ஹேதப்³ப³ம்.

ஏகோ பி⁴க்கு² காஸாயே ஸஉஸ்ஸாஹோவ ஓதா³தம் நிவாஸேத்வா மேது²னம் படிஸேவித்வா புன காஸாயானி நிவாஸேத்வா வஸ்ஸக³ணனாதி³பே⁴த³ம் விதி⁴ம் ஆபஜ்ஜதி, அயம்பி தே²ய்யஸம்வாஸகோ ந ஹோதி, பப்³ப³ஜ்ஜாமத்தம் லப⁴தி. ஸசே பன காஸாயே து⁴ரம் நிக்கி²பித்வா ஓதா³தம் நிவாஸேத்வா மேது²னம் படிஸேவித்வா புன காஸாயானி நிவாஸேத்வா வஸ்ஸக³ணனாதி³பே⁴த³ம் விதி⁴ம் ஆபஜ்ஜதி, தே²ய்யஸம்வாஸகோ ஹோதி. ஸாமணேரோ ஸலிங்கே³ டி²தோ மேது²னாதி³அஸ்ஸமணகரணத⁴ம்மம் ஆபஜ்ஜித்வாபிதே²ய்யஸம்வாஸகோ ந ஹோதி. ஸசேபி காஸாயே ஸஉஸ்ஸாஹோவ காஸாயானி அபனேத்வா மேது²னம் படிஸேவித்வா புன காஸாயானி நிவாஸேதி, நேவ தே²ய்யஸம்வாஸகோ ஹோதி. ஸசே பன காஸாயே து⁴ரம் நிக்கி²பித்வா நக்³கோ³ வா ஓதா³தவத்தோ² வா மேது²னஸேவனாதீ³ஹி அஸ்ஸமணோ ஹுத்வா காஸாயம் நிவாஸேதி, தே²ய்யஸம்வாஸகோ ஹோதி.

ஸசே கி³ஹிபா⁴வம் பத்த²யமானோ காஸாயம் ஓவட்டிகம் கத்வா அஞ்ஞேன வா ஆகாரேன கி³ஹினிவாஸனேன நிவாஸேதி ‘‘ஸோப⁴தி நு கோ² மே கி³ஹிலிங்க³ம், ந ஸோப⁴தீ’’தி வீமம்ஸனத்த²ம், ரக்க²தி தாவ. ‘‘ஸோப⁴தீ’’தி ஸம்படிச்சி²த்வா பன புன லிங்க³ம் ஸாதி³யந்தோ தே²ய்யஸம்வாஸகோ ஹோதி. ஓதா³தம் நிவாஸேத்வா வீமம்ஸனஸம்படிச்ச²னேஸுபி ஏஸேவ நயோ. ஸசே பன நிவத்த²காஸாவஸ்ஸ உபரி ஓதா³தம் நிவாஸேத்வா வீமம்ஸதி வா ஸம்படிச்ச²தி வா, ரக்க²தியேவ. பி⁴க்கு²னியாபி ஏஸேவ நயோ. ஸாபி கி³ஹிபா⁴வம் பத்த²யமானா ஸசே காஸாயம் கி³ஹினிவாஸனம் நிவாஸேதி ‘‘ஸோப⁴தி நு கோ² மே கி³ஹிலிங்க³ம், ந ஸோப⁴தீ’’தி வீமம்ஸனத்த²ம், ரக்க²தியேவ. ஸசே ‘‘ஸோப⁴தீ’’தி ஸம்படிச்ச²தி, ந ரக்க²தி. ஓதா³தம் நிவாஸேத்வா வீமம்ஸனஸம்படிச்ச²னேஸுபி ஏஸேவ நயோ. நிவத்த²காஸாயஸ்ஸ பன உபரி ஓதா³தம் நிவாஸேத்வா வீமம்ஸது வா ஸம்படிச்ச²து வா, ரக்க²தியேவ.

ஸசே கோசி வுட்³ட⁴பப்³ப³ஜிதோ வஸ்ஸானி அக³ணேத்வா பாளியம்பி அட்ட²த்வா ஏகபஸ்ஸேன க³ந்த்வா மஹாபேளாதீ³ஸு கடச்சு²னா உக்கி²த்தே ப⁴த்தபிண்டே³ பத்தம் உபனாமேத்வா ஸேனோ விய மம்ஸபேஸிம் க³ஹேத்வா க³ச்ச²தி, தே²ய்யஸம்வாஸகோ ந ஹோதி, பி⁴க்கு²வஸ்ஸானி பன க³ணேத்வா க³ண்ஹந்தோ தே²ய்யஸம்வாஸகோ ஹோதி. ஸயம் ஸாமணேரோவ ஸாமணேரபடிபாடியா கூடவஸ்ஸானி க³ணேத்வா க³ண்ஹந்தோ தே²ய்யஸம்வாஸகோ ந ஹோதி. பி⁴க்கு² பி⁴க்கு²படிபாடியா கூடவஸ்ஸானி க³ணேத்வா க³ண்ஹந்தோ ப⁴ண்ட³க்³கே⁴ன காரேதப்³போ³.

139. தித்தி²யபக்கந்தகோதி தித்தி²யேஸு பக்கந்தோ பவிட்டோ²தி தித்தி²யபக்கந்தகோ, ஸோபி ந பப்³பா³ஜேதப்³போ³. தத்ராயம் வினிச்ச²யோ – உபஸம்பன்னோ பி⁴க்கு² ‘‘தித்தி²யோ ப⁴விஸ்ஸாமீ’’தி ஸலிங்கே³னேவ தேஸம் உபஸ்ஸயம் க³ச்ச²தி, பத³வாரே பத³வாரே து³க்கடம், தேஸம் லிங்கே³ ஆதி³ன்னமத்தே தித்தி²யபக்கந்தகோ ஹோதி. யோபி ஸயமேவ ‘‘தித்தி²யோ ப⁴விஸ்ஸ’’ந்தி குஸசீராதீ³னி நிவாஸேதி, தித்தி²யபக்கந்தகோ ஹோதியேவ. யோ பன நக்³கோ³ நஹாயந்தோ அத்தானம் ஓலோகேத்வா ‘‘ஸோப⁴தி மே ஆஜீவகபா⁴வோ, ஆஜீவகோ ப⁴விஸ்ஸ’’ந்தி காஸாயானி அனாதா³ய நக்³கோ³ ஆஜீவகானம் உபஸ்ஸயம் க³ச்ச²தி, பத³வாரே பத³வாரே து³க்கடம். ஸசே பனஸ்ஸ அந்தராமக்³கே³ ஹிரோத்தப்பம் உப்பஜ்ஜதி, து³க்கடானி தே³ஸேத்வா முச்சதி. தேஸம் உபஸ்ஸயம் க³ந்த்வாபி தேஹி வா ஓவதி³தோ அத்தனா வா ‘‘இமேஸம் பப்³ப³ஜ்ஜா அதிது³க்கா²’’தி தி³ஸ்வா நிவத்தந்தோபி முச்சதியேவ. ஸசே பன ‘‘கிம் தும்ஹாகம் பப்³ப³ஜ்ஜாய உக்கட்ட²’’ந்தி புச்சி²த்வா ‘‘கேஸமஸ்ஸுலுஞ்சனாதீ³னீ’’தி வுத்தோ ஏககேஸம்பி லுஞ்சாபேதி, உக்குடிகப்பதா⁴னாதீ³னி வா வத்தானி ஆதி³யதி, மோரபிஞ்சா²தீ³னி வா நிவாஸேதி, தேஸம் லிங்க³ம் க³ண்ஹாதி, ‘‘அயம் பப்³ப³ஜ்ஜா ஸேட்டா²’’தி ஸேட்ட²பா⁴வம் வா உபக³ச்ச²தி, ந முச்சதி, தித்தி²யபக்கந்தகோ ஹோதி. ஸசே பன ‘‘ஸோப⁴தி நு கோ² மே தித்தி²யபப்³ப³ஜ்ஜா, நனு கோ² ஸோப⁴தீ’’தி வீமம்ஸனத்த²ம் குஸசீராதீ³னி வா நிவாஸேதி, ஜடம் வா ப³ந்த⁴தி, கா²ரிகாஜம் வா ஆதி³யதி, யாவ ந ஸம்படிச்ச²தி லத்³தி⁴ம், தாவ ரக்க²தி, ஸம்படிச்சி²தமத்தே தித்தி²யபக்கந்தகோ ஹோதி. அச்சி²ன்னசீவரோ பன குஸசீராதீ³னி நிவாஸேந்தோ ராஜப⁴யாதீ³ஹி வா தித்தி²யலிங்க³ம் க³ண்ஹந்தோ லத்³தி⁴யா அபா⁴வேன நேவ தித்தி²யபக்கந்தகோ ஹோதி. ‘‘அயஞ்ச தித்தி²யபக்கந்தகோ நாம உபஸம்பன்னபி⁴க்கு²னா கதி²தோ, தஸ்மா ஸாமணேரோ ஸலிங்கே³ன தித்தி²யாயதனம் க³தோபி புன பப்³ப³ஜ்ஜஞ்ச உபஸம்பத³ஞ்ச லப⁴தீ’’தி குருந்தி³யம் வுத்தம். புரிமோ பன தே²ய்யஸம்வாஸகோ அனுபஸம்பன்னேன கதி²தோ, தஸ்மா உபஸம்பன்னோ கூடவஸ்ஸம் க³ணேந்தோபி அஸ்ஸமணோ ந ஹோதி. லிங்கே³ ஸஉஸ்ஸாஹோ பாராஜிகம் ஆபஜ்ஜித்வா பி⁴க்கு²வஸ்ஸாதீ³னி க³ண்ஹந்தோபி தே²ய்யஸம்வாஸகோ ந ஹோதி.

140. திரச்சா²னக³தோதி நாகோ³ வா ஹோது ஸுபண்ணமாணவகாதீ³னம் வா அஞ்ஞதரோ அந்தமஸோ ஸக்கம் தே³வராஜானம் உபாதா³ய யோ கோசி அமனுஸ்ஸஜாதியோ, ஸப்³போ³வ இமஸ்மிம் அத்தே² ‘‘திரச்சா²னக³தோ’’தி வேதி³தப்³போ³. ஸோ ச நேவ உபஸம்பாதே³தப்³போ³ ந பப்³பா³ஜேதப்³போ³, உபஸம்பன்னோபி நாஸேதப்³போ³.

141. மாதுகா⁴தகாதீ³ஸு பன யேன மனுஸ்ஸித்தி²பூ⁴தா ஜனிகா மாதா ஸயம்பி மனுஸ்ஸஜாதிகேனேவ ஸபா⁴ ஸஞ்சிச்ச ஜீவிதா வோரோபிதா, அயம் ஆனந்தரியேன மாதுகா⁴தககம்மேன மாதுகா⁴தகோ. ஏதஸ்ஸ பப்³ப³ஜ்ஜா ச உபஸம்பதா³ ச படிக்கி²த்தா. யேன பன மனுஸ்ஸித்தி²பூ⁴தாபி அஜனிகா போஸாவனிகா மாதா வா சூளமாதா வா ஜனிகாபி வா ந மனுஸ்ஸித்தி²பூ⁴தா மாதா கா⁴திதா, தஸ்ஸ பப்³ப³ஜ்ஜா ந வாரிதா, ந ச ஆனந்தரிகோ ஹோதி. யேன ஸயம் திரச்சா²னபூ⁴தேன மனுஸ்ஸித்தி²பூ⁴தா மாதா கா⁴திதா, ஸோபி ஆனந்தரிகோ ந ஹோதி, திரச்சா²னக³தத்தா பனஸ்ஸ பப்³ப³ஜ்ஜா படிக்கி²த்தா. பிதுகா⁴தகேபி ஏஸேவ நயோ. ஸசேபி ஹி வேஸியா புத்தோ ஹோதி, ‘‘அயம் மே பிதா’’தி ந ஜானாதி, யஸ்ஸ ஸம்ப⁴வேன நிப்³ப³த்தோ, ஸோ சே அனேன கா⁴திதோ, பிதுகா⁴தகோத்வேவ ஸங்க்²யம் க³ச்ச²தி, ஆனந்தரியஞ்ச பு²ஸதி.

அரஹந்தகா⁴தகோபி மனுஸ்ஸஅரஹந்தவஸேனேவ வேதி³தப்³போ³. மனுஸ்ஸஜாதியஞ்ஹி அந்தமஸோ அபப்³ப³ஜிதம்பி கீ²ணாஸவம் தா³ரகம் வா தா³ரிகம் வா ஸஞ்சிச்ச ஜீவிதா வோரோபேந்தோ அரஹந்தகா⁴தகோவ ஹோதி, ஆனந்தரியஞ்ச பு²ஸதி, பப்³ப³ஜ்ஜா சஸ்ஸ வாரிதா. அமனுஸ்ஸஜாதிகம் பன அரஹந்தம் மனுஸ்ஸஜாதிகம் வா அவஸேஸம் அரியபுக்³க³லம் கா⁴தேத்வா ஆனந்தரிகோ ந ஹோதி, பப்³ப³ஜ்ஜாபிஸ்ஸ ந வாரிதா, கம்மம் பன ப³லவம் ஹோதி. திரச்சா²னோ மனுஸ்ஸஅரஹந்தம்பி கா⁴தேத்வா ஆனந்தரிகோ ந ஹோதி, கம்மம் பன பா⁴ரியந்தி அயமேத்த² வினிச்ச²யோ.

யோ பன தே³வத³த்தோ விய து³ட்ட²சித்தேன வத⁴கசித்தேன ததா²க³தஸ்ஸ ஜீவமானகஸரீரே கு²த்³த³கமக்கி²காய பிவனமத்தம்பி லோஹிதம் உப்பாதே³தி, அயம் லோஹிதுப்பாத³கோ நாம. ஏதஸ்ஸ பப்³ப³ஜ்ஜா ச உபஸம்பதா³ ச வாரிதா. யோ பன ரோக³வூபஸமத்த²ம் ஜீவகோ விய ஸத்தே²ன பா²லேத்வா பூதிமம்ஸலோஹிதம் ஹரித்வா பா²ஸுகம் கரோதி, ப³ஹும் ஸோ புஞ்ஞம் பஸவதீதி.

யோ தே³வத³த்தோ விய ஸாஸனம் உத்³த⁴ம்மம் உப்³பி³னயம் கத்வா சதுன்னம் கம்மானம் அஞ்ஞதரவஸேன ஸங்க⁴ம் பி⁴ந்த³தி, அயம் ஸங்க⁴பே⁴த³கோ நாம. ஏதஸ்ஸ பப்³ப³ஜ்ஜா ச உபஸம்பதா³ ச வாரிதா.

யோ பன பகதத்தம் பி⁴க்கு²னிம் திண்ணம் மக்³கா³னம் அஞ்ஞதரஸ்மிம் தூ³ஸேதி, அயம் பி⁴க்கு²னீதூ³ஸகோ நாம. ஏதஸ்ஸ பப்³ப³ஜ்ஜா ச உபஸம்பதா³ ச வாரிதா. யோ பன காயஸம்ஸக்³கே³ன ஸீலவினாஸம் பாபேதி, தஸ்ஸ பப்³ப³ஜ்ஜா ச உபஸம்பதா³ ச ந வாரிதா. ப³லக்காரேன ஓதா³தவத்த²வஸனம் கத்வா அனிச்ச²மானம்யேவ தூ³ஸேந்தோபி பி⁴க்கு²னீதூ³ஸகோயேவ, ப³லக்காரேன பன ஓதா³தவத்த²வஸனம் கத்வா இச்ச²மானம் தூ³ஸேந்தோ பி⁴க்கு²னீதூ³ஸகோ ந ஹோதி. கஸ்மா? யஸ்மா கி³ஹிபா⁴வே ஸம்படிச்சி² தமத்தேயேவ ஸா அபி⁴க்கு²னீ ஹோதி. ஸகிம்ஸீலவிபன்னம் பச்சா² தூ³ஸேந்தோ ஸிக்க²மானஸாமணேரீஸு ச விப்படிபஜ்ஜந்தோ நேவ பி⁴க்கு²னீதூ³ஸகோ ஹோதி, பப்³ப³ஜ்ஜம்பி உபஸம்பத³ம்பி லப⁴தி. இதி இமே ஏகாத³ஸ அப⁴ப்³ப³புக்³க³லா வேதி³தப்³பா³.

142. ஊனவீஸதிவஸ்ஸஸ்ஸ பன உபஸம்பதா³யேவ படிக்கி²த்தா, ந பப்³ப³ஜ்ஜா, தஸ்மா படிஸந்தி⁴க்³க³ஹணதோ பட்டா²ய பரிபுண்ணவீஸதிவஸ்ஸோ உபஸம்பாதே³தப்³போ³. க³ப்³ப⁴வீஸோபி ஹி பரிபுண்ணவீஸதிவஸ்ஸோத்வேவ ஸங்க்²யம் க³ச்ச²தி. யதா²ஹ ப⁴க³வா –

‘‘யம், பி⁴க்க²வே, மாதுகுச்சி²ஸ்மிம் பட²மம் சித்தம் உப்பன்னம், பட²மம் விஞ்ஞாணம் பாதுபூ⁴தம், தது³பாதா³ய ஸாவஸ்ஸ ஜாதி. அனுஜானாமி, பி⁴க்க²வே, க³ப்³ப⁴வீஸம் உபஸம்பாதே³து’’ந்தி (மஹாவ. 124).

தத்த² (பாசி. அட்ட². 404) யோ த்³வாத³ஸ மாஸே மாதுகுச்சி²ஸ்மிம் வஸித்வா மஹாபவாரணாய ஜாதோ, ஸோ ததோ பட்டா²ய யாவ ஏகூனவீஸதிமே வஸ்ஸே மஹாபவாரணா, தம் அதிக்கமித்வா பாடிபதே³ உபஸம்பாதே³தப்³போ³. ஏதேனுபாயேன ஹாயனவட்³ட⁴னம் வேதி³தப்³ப³ம். போராணகத்தே²ரா பன ஏகூனவீஸதிவஸ்ஸம் ஸாமணேரம் நிக்க²மனீயபுண்ணமாஸிம் அதிக்கம்ம பாடிபத³தி³வஸே உபஸம்பாதே³ந்தி. கஸ்மா? ஏகஸ்மிம் வஸ்ஸே ச² சாதுத்³த³ஸிகஉபோஸதா² ஹோந்தி, இதி வீஸதியா வஸ்ஸேஸு சத்தாரோ மாஸா பரிஹாயந்தி, ராஜானோ ததியே ததியே க³ஸ்ஸே வஸ்ஸம் உக்கட்³ட⁴ந்தி, இதி அட்டா²ரஸவஸ்ஸேஸு ச² மாஸா வட்³ட⁴ந்தி, ததோ உபோஸத²வஸேன பரிஹீனே சத்தாரோ மாஸே அபனேத்வா த்³வே மாஸா அவஸேஸா ஹோந்தி, தே த்³வே மாஸே க³ஹேத்வா வீஸதி வஸ்ஸானி பரிபுண்ணானி ஹோந்தீதி நிக்கங்கா² ஹுத்வா நிக்க²மனீயபுண்ணமாஸிம் அதிக்கம்ம பாடிபதே³ உபஸம்பாதே³ந்தி.

ஏத்த² பன யோ பவாரேத்வா வீஸதிவஸ்ஸோ ப⁴விஸ்ஸதி, தம் ஸந்தா⁴ய ‘‘ஏகூனவீஸதிவஸ்ஸ’’ந்தி வுத்தம். தஸ்மா யோ மாதுகுச்சி²ஸ்மிம் த்³வாத³ஸ மாஸே வஸி, ஸோ ஏகவீஸதிவஸ்ஸோ ஹோதி. யோ ஸத்த மாஸே வஸி, ஸோ ஸத்தமாஸாதி⁴கவீஸதிவஸ்ஸோ. ச²மாஸஜாதோ பன ந ஜீவதி, ஊனவீஸதிவஸ்ஸம் பன ‘‘பரிபுண்ணவீஸதிவஸ்ஸோ’’தி ஸஞ்ஞாய உபஸம்பாதே³ந்தஸ்ஸ அனாபத்தி, புக்³க³லோ பன அனுபஸம்பன்னோவ ஹோதி. ஸசே பன ஸோ த³ஸவஸ்ஸச்சயேன அஞ்ஞம் உபஸம்பாதே³தி, தஞ்சே முஞ்சித்வா க³ணோ பூரதி, ஸூபஸம்பன்னோ. ஸோபி ச யாவ ந ஜானாதி, தாவஸ்ஸ நேவ ஸக்³க³ந்தராயோ ந மோக்க²ந்தராயோ, ஞத்வா பன புன உபஸம்பஜ்ஜிதப்³ப³ம்.

143. இதி இமேஹி பப்³ப³ஜ்ஜாதோ³ஸேஹி விரஹிதோபி ‘‘ந, பி⁴க்க²வே, அனனுஞ்ஞாதோ மாதாபிதூஹி புத்தோ பப்³பா³ஜேதப்³போ³’’தி (மஹாவ. 105) வசனதோ மாதாபிதூஹி அனனுஞ்ஞாதோ ந பப்³பா³ஜேதப்³போ³. தத்த² (மஹாவ. அட்ட². 105) மாதாபிதூஹீதி ஜனகே ஸந்தா⁴ய வுத்தம். ஸசே த்³வேபி அத்தி², த்³வேபி ஆபுச்சி²தப்³பா³. ஸசே பிதா மதோ ஹோதி மாதா வா, யோ ஜீவதி, ஸோ ஆபுச்சி² தப்³போ³, பப்³ப³ஜிதாபி ஆபுச்சி²தப்³பா³வ. ஆபுச்ச²ந்தேன ஸயம் வா க³ந்த்வா ஆபுச்சி²தப்³ப³ம், அஞ்ஞோ வா பேஸேதப்³போ³. ஸோ ஏவ வா பேஸேதப்³போ³ ‘‘க³ச்ச² மாதாபிதரோ ஆபுச்சி²த்வா ஏஹீ’’தி. ஸசே ‘‘அனுஞ்ஞாதோம்ஹீ’’தி வத³தி, ஸத்³த³ஹந்தேன பப்³பா³ஜேதப்³போ³. பிதா ஸயம் பப்³ப³ஜிதோ புத்தம்பி பப்³பா³ஜேதுகாமோ ஹோதி, மாதரம் ஆபுச்சி²த்வா பப்³பா³ஜேது. மாதா வா தீ⁴தரம் பப்³பா³ஜேதுகாமா பிதரம் ஆபுச்சி²த்வாவ பப்³பா³ஜேது. பிதா புத்ததா³ரேன அனத்தி²கோ பலாயி, மாதா ‘‘இமம் பப்³ப³ஜேதா²’’தி புத்தம் பி⁴க்கூ²னம் தே³தி, ‘‘பிதாஸ்ஸ குஹி’’ந்தி வுத்தே ‘‘சித்தகேளிம் கீளிதும் பலாதோ’’தி வத³தி, தம் பப்³பா³ஜேதும் வட்டதி. மாதா கேனசி புரிஸேன ஸத்³தி⁴ம் பலாதா ஹோதி, பிதா பன ‘‘பப்³பா³ஜேதா²’’தி வத³தி, ஏத்தா²பி ஏஸேவ நயோ. பிதா விப்பவுத்தோ² ஹோதி, மாதா புத்தம் ‘‘பப்³பா³ஜேதா²’’தி அனுஜானாதி, ‘‘பிதாஸ்ஸ குஹி’’ந்தி வுத்தே ‘‘கிம் தும்ஹாகம் பிதரா, அஹம் ஜானிஸ்ஸாமீ’’தி வத³தி, பப்³பா³ஜேதும் வட்டதீதி குருந்தி³யம் வுத்தம்.

மாதாபிதரோ மதா, தா³ரகோ சூளமாதாதீ³னம் ஸந்திகே ஸம்வத்³தோ⁴, தஸ்மிம் பப்³பா³ஜியமானே ஞாதகா கலஹம் வா கரோந்தி கி²ய்யந்தி வா, தஸ்மா விவாது³பச்சே²த³னத்த²ம் ஆபுச்சி²த்வா பப்³பா³ஜேதப்³போ³, அனாபுச்சி²த்வா பப்³பா³ஜேந்தஸ்ஸ பன ஆபத்தி நத்தி². த³ஹரகாலே க³ஹேத்வா போஸகா மாதாபிதரோ நாம ஹோந்தி, தேஸுபி ஏஸேவ நயோ. புத்தோ அத்தானம் நிஸ்ஸாய ஜீவதி, ந மாதாபிதரோ. ஸசேபி ராஜா ஹோதி, ஆபுச்சி²த்வாவ பப்³பா³ஜேதப்³போ³. மாதாபிதூஹி அனுஞ்ஞாதோ பப்³ப³ஜித்வா புன விப்³ப⁴மதி, ஸசேபி ஸதக்க²த்தும் பப்³ப³ஜித்வா விப்³ப⁴மதி, ஆக³தாக³தகாலே புனப்புனம் ஆபுச்சி²த்வாவ பப்³பா³ஜேதப்³போ³. ஸசேபி ஏவம் வத³ந்தி ‘‘அயம் விப்³ப⁴மித்வா கே³ஹம் ஆக³தோ, அம்ஹாகம் கம்மம் ந கரோதி, பப்³ப³ஜித்வா தும்ஹாகம் வத்தம் ந பூரேதி, நத்தி² இமஸ்ஸ ஆபுச்ச²னகிச்சம், ஆக³தாக³தம் நம் பப்³பா³ஜேய்யாதா²’’தி, ஏவம் நிஸ்ஸட்ட²ம் புன அனாபுச்சா²பி பப்³பா³ஜேதும் வட்டதி.

யோபி த³ஹரகாலேயேவ ‘‘அயம் தும்ஹாகம் தி³ன்னோ, யதா³ இச்ச²த², ததா³ பப்³பா³ஜேய்யாதா²’’தி ஏவம் தி³ன்னோ ஹோதி, ஸோபி ஆக³தாக³தோ புன அனாபுச்சி²த்வாவ பப்³பா³ஜேதப்³போ³. யம் பன த³ஹரகாலேயேவ ‘‘இமம், ப⁴ந்தே, பப்³பா³ஜேய்யாதா²’’தி அனுஜானித்வா பச்சா² வுட்³டி⁴ப்பத்தகாலே நானுஜானந்தி, அயம் ந அனாபுச்சா² பப்³பா³ஜேதப்³போ³. ஏகோ மாதாபிதூஹி ஸத்³தி⁴ம் ப⁴ண்டி³த்வா ‘‘பப்³பா³ஜேத² ம’’ந்தி ஆக³ச்ச²தி, ‘‘ஆபுச்சி²த்வா ஏஹீ’’தி ச வுத்தோ ‘‘நாஹம் க³ச்சா²மி, ஸசே மம் ந பப்³பா³ஜேத², விஹாரம் வா ஜா²பேமி, ஸத்தே²ன வா தும்ஹே பஹராமி, தும்ஹாகம் ஞாதகானம் வா உபட்டா²கானம் வா ஆராமச்சே²த³னாதீ³ஹி அனத்த²ம் உப்பாதே³மி, ருக்கா² வா பதித்வா மராமி, சோரமஜ்ஜ²ம் வா பவிஸாமி, தே³ஸந்தரம் வா க³ச்சா²மீ’’தி வத³தி, தம் தஸ்ஸேவ ரக்க²ணத்தா²ய பப்³பா³ஜேதும் வட்டதி. ஸசே பனஸ்ஸ மாதாபிதரோ ஆக³ந்த்வா ‘‘கஸ்மா அம்ஹாகம் புத்தம் பப்³பா³ஜயித்தா²’’தி வத³ந்தி, தேஸம் தமத்த²ம் ஆரோசேத்வா ‘‘ரக்க²ணத்தா²ய நம் பப்³பா³ஜயிம்ஹ, பஞ்ஞாயத² தும்ஹே புத்தேனா’’தி வத்தப்³பா³. ‘‘ருக்கா² பதிஸ்ஸாமீ’’தி அபி⁴ருஹித்வா பன ஹத்த²பாதே³ முஞ்சந்தம் பப்³பா³ஜேதும் வட்டதியேவ.

ஏகோ விதே³ஸம் க³ந்த்வா பப்³ப³ஜ்ஜம் யாசதி, ஆபுச்சி²த்வா சே க³தோ, பப்³பா³ஜேதப்³போ³. நோ சே, த³ஹரபி⁴க்கு²ம் பேஸேத்வா ஆபுச்சா²பேத்வா பப்³பா³ஜேதப்³போ³. அதிதூ³ரஞ்சே ஹோதி, பப்³பா³ஜேத்வாபி பி⁴க்கூ²ஹி ஸத்³தி⁴ம் பேஸேத்வா த³ஸ்ஸேதும் வட்டதி. குருந்தி³யம் பன வுத்தம் ‘‘ஸசே தூ³ரம் ஹோதி, மக்³கோ³ ச மஹாகந்தாரோ, ‘க³ந்த்வா ஆபுச்சி²ஸ்ஸாமீ’தி பப்³பா³ஜேதும் வட்டதீ’’தி. ஸசே பன மாதாபிதூனம் ப³ஹூ புத்தா ஹோந்தி, ஏவஞ்ச வத³ந்தி ‘‘ப⁴ந்தே, ஏதேஸம் தா³ரகானம் யம் இச்ச²த², தம் பப்³பா³ஜேய்யாதா²’’தி, தா³ரகே வீமம்ஸித்வா யம் இச்ச²தி, ஸோ பப்³பா³ஜேதப்³போ³. ஸசேபி ஸகலேன குலேன வா கா³மேன வா அனுஞ்ஞாதோ ஹோதி ‘‘ப⁴ந்தே, இமஸ்மிம் குலே வா கா³மே வா யம் இச்ச²த², தம் பப்³பா³ஜேய்யாதா²’’தி, யம் இச்ச²தி, ஸோ பப்³பா³ஜேதப்³போ³தி.

144. ஏவம் (மஹாவ. அட்ட². 34) பப்³ப³ஜ்ஜாதோ³ஸவிரஹிதம் மாதாபிதூஹி அனுஞ்ஞாதம் பப்³பா³ஜேந்தேனபி ச ஸசே அச்சி²ன்னகேஸோ ஹோதி, ஏகஸீமாயஞ்ச அஞ்ஞேபி பி⁴க்கூ² அத்தி², கேஸச்சே²த³னத்தா²ய ப⁴ண்டு³கம்மம் ஆபுச்சி²தப்³ப³ம். தத்ராயம் ஆபுச்ச²னவிதி⁴ (மஹாவ. அட்ட². 98) – ஸீமாபரியாபன்னே பி⁴க்கூ² ஸன்னிபாதேத்வா பப்³ப³ஜ்ஜாபேக்க²ம் தத்த² நேத்வா ‘‘ஸங்க⁴ம், ப⁴ந்தே, இமஸ்ஸ தா³ரகஸ்ஸ ப⁴ண்டு³கம்மம் ஆபுச்சா²மீ’’தி திக்க²த்தும் வா த்³விக்க²த்தும் வா ஸகிம் வா வத்தப்³ப³ம். ஏத்த² ச ‘‘இமஸ்ஸ தா³ரகஸ்ஸ ப⁴ண்டு³கம்மம் ஆபுச்சா²மீ’’திபி ‘‘இமஸ்ஸ ஸமணகரணம் ஆபுச்சா²மீ’’திபி ‘‘அயம் ஸமணோ ஹோதுகாமோ’’திபி ‘‘அயம் பப்³ப³ஜிதுகாமோ’’திபி வத்தும் வட்டதியேவ. ஸசே ஸபா⁴க³ட்டா²னம் ஹோதி, த³ஸ வா வீஸதி வா திம்ஸம் வா பி⁴க்கூ² வஸந்தீதி பரிச்சே²தோ³ பஞ்ஞாயதி, தேஸம் டி²தோகாஸம் வா நிஸின்னோகாஸம் வா க³ந்த்வாபி புரிமனயேனேவ ஆபுச்சி²தப்³ப³ம். பப்³ப³ஜ்ஜாபேக்க²ம் வினாவ த³ஹரபி⁴க்கூ² வா ஸாமணேரே வா பேஸேத்வாபி ‘‘ஏகோ, ப⁴ந்தே, பப்³ப³ஜ்ஜாபேக்கோ² அத்தி², தஸ்ஸ ப⁴ண்டு³கம்மம் ஆபுச்சா²மா’’திஆதி³னா நயேன ஆபுச்சா²பேதும் வட்டதி. ஸசே கேசி பி⁴க்கூ² ஸேனாஸனம் வா கு³ம்பா³தீ³னி வா பவிஸித்வா நித்³தா³யந்தி வா ஸமணத⁴ம்மம் வா கரோந்தி, ஆபுச்ச²கா ச பரியேஸந்தாபி அதி³ஸ்வா ‘‘ஸப்³பே³ ஆபுச்சி²தா அம்ஹேஹீ’’தி ஸஞ்ஞினோ ஹோந்தி, பப்³ப³ஜ்ஜா நாம லஹுககம்மம், தஸ்மா பப்³ப³ஜிதோ ஸுபப்³ப³ஜிதோ, பப்³பா³ஜேந்தஸ்ஸபி அனாபத்தி.

ஸசே பன விஹாரோ மஹா ஹோதி அனேகபி⁴க்கு²ஸஹஸ்ஸாவாஸோ, ஸப்³பே³ பி⁴க்கூ² ஸன்னிபாதாபேதும்பி து³க்கரம், பகே³வ படிபாடியா ஆபுச்சி²தும், க²ண்ட³ஸீமாய வா ட²த்வா நதீ³ஸமுத்³தா³தீ³னி வா க³ந்த்வா பப்³பா³ஜேதப்³போ³. யோ பன நவமுண்டோ³ வா ஹோதி விப்³ப⁴ந்தகோ வா நிக³ண்டா²தீ³ஸு அஞ்ஞதரோ வா த்³வங்கு³லகேஸோ வா ஊனத்³வங்கு³லகேஸோ வா, தஸ்ஸ கேஸச்சே²த³னகிச்சம் நத்தி², தஸ்மா ப⁴ண்டு³கம்மம் அனாபுச்சி²த்வாபி தாதி³ஸம் பப்³பா³ஜேதும் வட்டதி. த்³வங்கு³லாதிரித்தகேஸோ பன யோ ஹோதி அந்தமஸோ ஏகஸிகா²மத்தத⁴ரோபி, ஸோ ப⁴ண்டு³கம்மம் ஆபுச்சி²த்வாவ பப்³பா³ஜேதப்³போ³.

145. ஏவம் ஆபுச்சி²த்வா பப்³பா³ஜேந்தேன ச பரிபுண்ணபத்தசீவரோவ பப்³பா³ஜேதப்³போ³. ஸசே தஸ்ஸ நத்தி², யாசிதகேனபி பத்தசீவரேன பப்³பா³ஜேதும் வட்டதி, ஸபா⁴க³ட்டா²னே விஸ்ஸாஸேன க³ஹேத்வாபி பப்³பா³ஜேதும் வட்டதி. ஸசே (மஹாவ. அட்ட². 118) பன அபக்கம் பத்தம் சீவரூபகா³னி ச வத்தா²னி க³ஹேத்வா ஆக³தோ ஹோதி, யாவ பத்தோ பச்சதி, சீவரானி ச கரீயந்தி, தாவ விஹாரே வஸந்தஸ்ஸ அனாமட்ட²பிண்ட³பாதம் தா³தும் வட்டதி, தா²லகேஸு பு⁴ஞ்ஜிதும் வட்டதி. புரேப⁴த்தம் ஸாமணேரபா⁴க³ஸமகோ ஆமிஸபா⁴கோ³ தா³தும் வட்டதி, ஸேனாஸனக்³கா³ஹோ பன ஸலாகப⁴த்தஉத்³தே³ஸப⁴த்தனிமந்தனாதீ³னி ச ந வட்டந்தி. பச்சா²ப⁴த்தம்பி ஸாமணேரபா⁴க³ஸமோ தேலதண்டு³லமது⁴பா²ணிதாதி³பே⁴ஸஜ்ஜபா⁴கோ³ வட்டதி. ஸசே கி³லானோ ஹோதி, பே⁴ஸஜ்ஜமஸ்ஸ காதும் வட்டதி, ஸாமணேரஸ்ஸ விய ஸப்³ப³ம் படிஜக்³க³னகம்மம். உபஸம்பதா³பேக்க²ம் பன யாசிதகேன பத்தசீவரேன உபஸம்பாதே³தும் ந வட்டதி. ‘‘ந, பி⁴க்க²வே, யாசிதகேன பத்தசீவரேன உபஸம்பாதே³தப்³போ³, யோ உபஸம்பாதே³ய்ய, ஆபத்தி து³க்கடஸ்ஸா’’தி (மஹாவ. 118) வுத்தம். தஸ்மா ஸோ பரிபுண்ணபத்தசீவரோயேவ உபஸம்பாதே³தப்³போ³. ஸசே தஸ்ஸ நத்தி², ஆசரியுபஜ்ஜா²யா சஸ்ஸ தா³துகாமா ஹோந்தி, அஞ்ஞே வா பி⁴க்கூ² நிரபேக்கே²ஹி நிஸ்ஸஜ்ஜித்வா அதி⁴ட்டா²னுபக³ம் பத்தசீவரம் தா³தப்³ப³ம். யாசிதகேன பன பத்தேன வா சீவரேன வா உபஸம்பாதே³ந்தஸ்ஸேவ ஆபத்தி ஹோதி, கம்மம் பன ந குப்பதி.

146. பரிபுண்ணபத்தசீவரம் (மஹாவ. அட்ட². 34) பப்³பா³ஜேந்தேனபி ஸசே ஓகாஸோ ஹோதி, ஸயம் பப்³பா³ஜேதப்³போ³. ஸசே உத்³தே³ஸபரிபுச்சா²தீ³ஹி ப்³யாவடோ ஹோதி, ஓகாஸம் ந லப⁴தி, ஏகோ த³ஹரபி⁴க்கு² வத்தப்³போ³ ‘‘ஏதம் பப்³பா³ஜேஹீ’’தி. அவுத்தோபி சே த³ஹரபி⁴க்கு² உபஜ்ஜா²யம் உத்³தி³ஸ்ஸ பப்³பா³ஜேதி, வட்டதி. ஸசே த³ஹரபி⁴க்கு² நத்தி², ஸாமணேரோபி வத்தப்³போ³ ‘‘ஏதம் க²ண்ட³ஸீமம் நேத்வா பப்³பா³ஜேத்வா காஸாயானி அச்சா²தே³த்வா ஏஹீ’’தி. ஸரணானி பன ஸயம் தா³தப்³பா³னி. ஏவம் பி⁴க்கு²னாவ பப்³பா³ஜிதோ ஹோதி. புரிஸஞ்ஹி பி⁴க்கு²தோ அஞ்ஞோ பப்³பா³ஜேதும் ந லப⁴தி, மாதுகா³மம் பி⁴க்கு²னீதோ அஞ்ஞோ, ஸாமணேரோ பன ஸாமணேரீ வா ஆணத்தியா காஸாயானி தா³தும் லப⁴ந்தி, கேஸோரோபனம் யேன கேனசி கதம் ஸுகதம்.

ஸசே பன ப⁴ப்³ப³ரூபோ ஹோதி ஸஹேதுகோ ஞாதோ யஸஸ்ஸீ குலபுத்தோ, ஓகாஸம் கத்வாபி ஸயமேவ பப்³பா³ஜேதப்³போ³, ‘‘மத்திகாமுட்டி²ம் க³ஹேத்வா நஹாயித்வா ஆக³ச்சா²ஹீ’’தி ச ந பன விஸ்ஸஜ்ஜேதப்³போ³. பப்³ப³ஜிதுகாமானஞ்ஹி பட²மம் ப³லவஉஸ்ஸாஹோ ஹோதி, பச்சா² பன காஸாயானி ச கேஸஹரணஸத்த²கஞ்ச தி³ஸ்வா உத்ரஸந்தி, ஏத்தோயேவ பலாயந்தி, தஸ்மா ஸயமேவ நஹானதித்த²ம் நேத்வா ஸசே நாதித³ஹரோ, ‘‘நஹாஹீ’’தி வத்தப்³போ³, கேஸா பனஸ்ஸ ஸயமேவ மத்திகம் க³ஹேத்வா தோ⁴விதப்³பா³. த³ஹரகுமாரகோ பன ஸயம் உத³கம் ஓதரித்வா கோ³மயமத்திகாஹி க⁴ம்ஸித்வா நஹாபேதப்³போ³. ஸசேபிஸ்ஸ கச்சு² வா பிளகா வா ஹோந்தி, யதா² மாதா புத்தம் ந ஜிகு³ச்ச²தி, ஏவமேவம் அஜிகு³ச்ச²ந்தேன ஸாது⁴கம் ஹத்த²பாத³தோ ச ஸீஸதோ ச பட்டா²ய க⁴ம்ஸித்வா க⁴ம்ஸித்வா நஹாபேதப்³போ³. கஸ்மா? ஏத்தகேன ஹி உபகாரேன குலபுத்தா ஆசரியுபஜ்ஜா²யேஸு ச ஸாஸனே ச ப³லவஸினேஹா திப்³ப³கா³ரவா அனிவத்தித⁴ம்மா ஹோந்தி, உப்பன்னம் அனபி⁴ரதிம் வினோதே³த்வா தே²ரபா⁴வம் பாபுணந்தி, கதஞ்ஞுகதவேதி³னோ ஹோந்தி.

ஏவம் நஹாபனகாலே பன கேஸமஸ்ஸும் ஓரோபனகாலே வா ‘‘த்வம் ஞாதோ யஸஸ்ஸீ, இதா³னி மயம் தம் நிஸ்ஸாய பச்சயேஹி ந கிலமிஸ்ஸாமா’’தி ந வத்தப்³போ³, அஞ்ஞாபி அனிய்யானிககதா² ந வத்தப்³பா³, அத² க்²வஸ்ஸ ‘‘ஆவுஸோ, ஸுட்டு² உபதா⁴ரேஹி, ஸதிம் உபட்டா²பேஹீ’’தி வத்வா தசபஞ்சககம்மட்டா²னம் ஆசிக்கி²தப்³ப³ம். ஆசிக்க²ந்தேன ச வண்ணஸண்டா²னக³ந்தா⁴ஸயோகாஸவஸேன அஸுசிஜேகு³ச்ச²படிக்கூலபா⁴வம் நிஜ்ஜீவனிஸ்ஸத்தபா⁴வம் வா பாகடம் கரோந்தேன ஆசிக்கி²தப்³ப³ம். ஸசே ஹி ஸோ புப்³பே³ மத்³தி³தஸங்கா²ரோ ஹோதி பா⁴விதபா⁴வனோ கண்டகவேதா⁴பேக்கோ² விய பரிபக்கக³ண்டோ³ ஸூரியுக்³க³மனாபேக்க²ம் விய ச பரிணதபது³மம், அத²ஸ்ஸ ஆரத்³த⁴மத்தே கம்மட்டா²னம் மனஸிகாரே இந்தா³ஸனி விய பப்³ப³தே கிலேஸபப்³ப³தே சுண்ணயமானம்யேவ ஞாணம் பவத்ததி, கு²ரக்³கே³யேவ அரஹத்தம் பாபுணாதி. யே ஹி கேசி கு²ரக்³கே³ அரஹத்தம் பத்தா, ஸப்³பே³ தே ஏவரூபம் ஸவனம் லபி⁴த்வா கல்யாணமித்தேன ஆசரியேன தி³ன்னனயம் நிஸ்ஸாய, நோ அனிஸ்ஸாய. தஸ்மாஸ்ஸ ஆதி³தோவ ஏவரூபீ கதா² கதே²தப்³பா³தி.

கேஸேஸு பன ஓரோபிதேஸு ஹலித்³தி³சுண்ணேன வா க³ந்த⁴சுண்ணேன வா ஸீஸஞ்ச ஸரீரஞ்ச உப்³ப³ட்டேத்வா கி³ஹிக³ந்த⁴ம் அபனேத்வா காஸாயானி திக்க²த்தும் வா த்³விக்க²த்தும் வா ஸகிம் வா படிக்³கா³ஹாபேதப்³போ³. அதா²பிஸ்ஸ ஹத்தே² அத³த்வா ஆசரியோ வா உபஜ்ஜா²யோ வா ஸயமேவ அச்சா²தே³தி, வட்டதி. ஸசே அஞ்ஞம் த³ஹரம் வா ஸாமணேரம் வா உபாஸகம் வா ஆணாபேதி ‘‘ஆவுஸோ, ஏதானி காஸாயானி க³ஹேத்வா ஏதம் அச்சா²தே³ஹீ’’தி, தஞ்ஞேவ வா ஆணாபேதி ‘‘ஏதானி க³ஹேத்வா அச்சா²தே³ஹீ’’தி, ஸப்³ப³ம் தம் வட்டதி, ஸப்³ப³ம் தேன பி⁴க்கு²னாவ தி³ன்னம் ஹோதி. யம் பன நிவாஸனம் வா பாருபனம் வா அனாணத்தியா நிவாஸேதி வா பாருபதி வா, தம் அபனேத்வா புன தா³தப்³ப³ம். பி⁴க்கு²னா ஹி ஸஹத்தே²ன வா ஆணத்தியா வா தி³ன்னமேவ காஸாயம் வட்டதி, அதி³ன்னம் ந வட்டதி. ஸசேபி தஸ்ஸேவ ஸந்தகம் ஹோதி, கோ பன வாதோ³ உபஜ்ஜா²யமூலகே.

147. ஏவம் பன தி³ன்னானி காஸாயானி அச்சா²தா³பேத்வா ஏகம்ஸம் உத்தராஸங்க³ம் காராபேத்வா யே தத்த² ஸன்னிபதிதா பி⁴க்கூ², தேஸம் பாதே³ வந்தா³பேத்வா அத² ஸரணக³ஹணத்த²ம் உக்குடிகம் நிஸீதா³பேத்வா அஞ்ஜலிம் பக்³க³ண்ஹாபேத்வா ‘‘ஏவம் வதே³ஹீ’’தி வத்தப்³போ³, ‘‘யமஹம் வதா³மி, தம் வதே³ஹீ’’தி வத்தப்³போ³. அத²ஸ்ஸ உபஜ்ஜா²யேன வா ஆசரியேன வா ‘‘பு³த்³த⁴ம் ஸரணம் க³ச்சா²மீ’’திஆதி³னா நயேன ஸரணானி தா³தப்³பா³னி யதா²வுத்தபடிபாடியாவ, ந உப்படிபாடியா. ஸசே ஹி ஏகபத³ம்பி ஏகக்க²ரம்பி உப்படிபாடியா தே³தி, பு³த்³த⁴ம் ஸரணம்யேவ வா திக்க²த்தும் த³த்வா புன இதரேஸு ஏகேகம் திக்க²த்தும் தே³தி, அதி³ன்னானி ஹோந்தி ஸரணானி.

இமஞ்ச பன ஸரணக³மனுபஸம்பத³ம் படிக்கி²பித்வா அனுஞ்ஞாதஉபஸம்பதா³ ஏகதோஸுத்³தி⁴யா வட்டதி, ஸாமணேரபப்³ப³ஜ்ஜா பன உப⁴தோஸுத்³தி⁴யாவ வட்டதி, நோ ஏகதோஸுத்³தி⁴யா. தஸ்மா உபஸம்பதா³ய ஸசே ஆசரியோ ஞத்திதோ³ஸஞ்சேவ கம்மவாசாதோ³ஸஞ்ச வஜ்ஜேத்வா கம்மம் கரோதி, ஸுகதம் ஹோதி. பப்³ப³ஜ்ஜாய பன இமானி தீணி ஸரணானி பு³-கார த⁴-காராதீ³னம் ப்³யஞ்ஜனானம் டா²னகரணஸம்பத³ம் அஹாபேந்தேன ஆசரியேனபி அந்தேவாஸிகேனபி வத்தப்³பா³னி. ஸசே ஆசரியோ வத்தும் ஸக்கோதி, அந்தேவாஸிகோ ந ஸக்கோதி, அந்தேவாஸிகோ வா ஸக்கோதி, ஆசரியோ ந ஸக்கோதி, உபோ⁴பி வா ந ஸக்கோந்தி, ந வட்டதி. ஸசே பன உபோ⁴பி ஸக்கோந்தி, வட்டதி. இமானி ச பன த³த³மானேன ‘‘பு³த்³த⁴ம் ஸரணம் க³ச்சா²மீ’’தி ஏவம் ஏகஸம்ப³ந்தா⁴னி அனுனாஸிகந்தானி வா கத்வா தா³தப்³பா³னி, ‘‘பு³த்³த⁴ம ஸரணம க³ச்சா²மீ’’தி ஏவம் விச்சி²ந்தி³த்வா மகாரந்தானி வா கத்வா தா³தப்³பா³னி. அந்த⁴கட்ட²கதா²யம் ‘‘நாமம் ஸாவேத்வா ‘அஹம், ப⁴ந்தே, பு³த்³த⁴ரக்கி²தோ யாவஜீவம் பு³த்³த⁴ம் ஸரணம் க³ச்சா²மீ’’தி வுத்தம், தம் ஏகட்ட²கதா²யம்பி நத்தி², பாளியம்பி ந வுத்தம், தேஸம் ருசிமத்தமேவ, தஸ்மா ந க³ஹேதப்³ப³ம். ந ஹி ததா² அவத³ந்தஸ்ஸ ஸரணம் குப்பதி. ஏத்தாவதா ச ஸாமணேரபூ⁴மியம் பதிட்டி²தோ ஹோதி.

148. ஸசே பனேஸ க³திமா ஹோதி பண்டி³தஜாதிகோ, அத²ஸ்ஸ தஸ்மிம்யேவ டா²னே ஸிக்கா²பதா³னி உத்³தி³ஸிதப்³பா³னி. கத²ம்? யதா² ப⁴க³வதா உத்³தி³ட்டா²னி. வுத்தஞ்ஹேதம் –

‘‘அனுஜானாமி, பி⁴க்க²வே, ஸாமணேரானம் த³ஸ ஸிக்கா²பதா³னி, தேஸு ச ஸாமணேரேஹி ஸிக்கி²தும். பாணாதிபாதா வேரமணி, அதி³ன்னாதா³னா வேரமணி, அப்³ரஹ்மசரியா வேரமணி, முஸாவாதா³ வேரமணி, ஸுராமேரயமஜ்ஜபமாத³ட்டா²னா வேரமணி, விகாலபோ⁴ஜனா வேரமணி, நச்சகீ³தவாதி³த விஸூகத³ஸ்ஸனா வேரமணி, மாலாக³ந்த⁴ விலேபன தா⁴ரண மண்ட³ன விபூ⁴ஸனட்டா²னா வேரமணி, உச்சாஸயனமஹாஸயனா வேரமணி, ஜாதரூபரஜதபடிக்³க³ஹணா வேரமணீ’’தி (மஹாவ. 106).

அந்த⁴கட்ட²கதா²யம் பன ‘‘அஹம், ப⁴ந்தே, இத்த²ன்னாமோ யாவஜீவம் பாணாதிபாதா வேரமணிஸிக்கா²பத³ம் ஸமாதி³யாமீ’’தி ஏவம் ஸரணதா³னம் விய ஸிக்கா²பத³தா³னம்பி வுத்தம், தம் நேவ பாளியம், ந அட்ட²கதா²ஸு அத்தி², தஸ்மா யதா²பாளியாவ உத்³தி³ஸிதப்³பா³னி. பப்³ப³ஜ்ஜா ஹி ஸரணக³மனேஹேவ ஸித்³தா⁴, ஸிக்கா²பதா³னி பன கேவலம் ஸிக்கா²பத³பூரணத்த²ம் ஜானிதப்³பா³னி, தஸ்மா பாளியா ஆக³தனயேனேவ உக்³க³ஹேதும் அஸக்கோந்தஸ்ஸ யாய காயசி பா⁴ஸாய அத்த²வஸேனபி ஆசிக்கி²தும் வட்டதி. யாவ பன அத்தனா ஸிக்கி²தப்³ப³ஸிக்கா²பதா³னி ந ஜானாதி, ஸங்கா⁴டிபத்தசீவரதா⁴ரணட்டா²னனிஸஜ்ஜாதீ³ஸு பானபோ⁴ஜனாதி³விதி⁴ம்ஹி ச ந குஸலோ ஹோதி, தாவ போ⁴ஜனஸாலம் வா ஸலாகபா⁴ஜனட்டா²னம் வா அஞ்ஞம் வா ததா²ரூபட்டா²னம் ந பேஸேதப்³போ³, ஸந்திகாவசரோயேவ காதப்³போ³, பா³லதா³ரகோ விய படிபஜ்ஜிதப்³போ³, ஸப்³ப³மஸ்ஸ கப்பியாகப்பியம் ஆசிக்கி²தப்³ப³ம், நிவாஸனபாருபனாதீ³ஸு அபி⁴ஸமாசாரிகேஸு வினேதப்³போ³. தேனபி –

‘‘அனுஜானாமி, பி⁴க்க²வே, த³ஸஹங்கே³ஹி ஸமன்னாக³தம் ஸாமணேரம் நாஸேதும். பாணாதிபாதீ ஹோதி, அதி³ன்னாதா³யீ ஹோதி, அப்³ரஹ்மசாரீ ஹோதி, முஸாவாதீ³ ஹோதி, மஜ்ஜபாயீ ஹோதி, பு³த்³த⁴ஸ்ஸ அவண்ணம் பா⁴ஸதி, த⁴ம்மஸ்ஸ அவண்ணம் பா⁴ஸதி, ஸங்க⁴ஸ்ஸ அவண்ணம் பா⁴ஸதி, மிச்சா²தி³ட்டி²கோ ஹோதி, பி⁴க்கு²னீதூ³ஸகோ ஹோதீ’’தி (மஹாவ. 108) –

ஏவம் வுத்தானி த³ஸ நாஸனங்கா³னி ஆரகா பரிவஜ்ஜேத்வா ஆபி⁴ஸமாசாரிகம் பரிபூரேந்தேன த³ஸவிதே⁴ ஸீலே ஸாது⁴கம் ஸிக்கி²தப்³ப³ம்.

149. யோ பன (மஹாவ. அட்ட². 108) பாணாதிபாதாதீ³ஸு த³ஸஸு நாஸனங்கே³ஸு ஏகம்பி கம்மம் கரோதி, ஸோ லிங்க³னாஸனாய நாஸேதப்³போ³. தீஸு ஹி நாஸனாஸு லிங்க³னாஸனாயேவ இதா⁴தி⁴ப்பேதா. யதா² ச பி⁴க்கூ²னம் பாணாதிபாதாதீ³ஸு தா தா ஆபத்தியோ ஹோந்தி, ந ததா² ஸாமணேரானம். ஸாமணேரோ ஹி குந்த² கிபில்லிகம்பி மாரேத்வா மங்கு³லண்ட³கம்பி பி⁴ந்தி³த்வா நாஸேதப்³ப³தம்யேவ பாபுணாதி, தாவதே³வஸ்ஸ ஸரணக³மனானி ச உபஜ்ஜா²யக்³க³ஹணஞ்ச ஸேனாஸனக்³கா³ஹோ ச படிப்பஸ்ஸம்ப⁴ந்தி, ஸங்க⁴லாப⁴ம் ந லப⁴தி, லிங்க³மத்தமேவ ஏகம் அவஸிட்ட²ம் ஹோதி. ஸோ ஸசே ஆகிண்ணதோ³ஸோவ ஹோதி, ஆயதிம் ஸம்வரே ந திட்ட²தி, நிக்கட்³டி⁴தப்³போ³. அத² ஸஹஸா விரஜ்ஜி²த்வா ‘‘து³ட்டு² மயா கத’’ந்தி புன ஸம்வரே டா²துகாமோ ஹோதி, லிங்க³னாஸனகிச்சம் நத்தி², யதா²னிவத்த²பாருதஸ்ஸேவ ஸரணானி தா³தப்³பா³னி, உபஜ்ஜா²யோ தா³தப்³போ³. ஸிக்கா²பதா³னி பன ஸரணக³மனேனேவ இஜ்ஜ²ந்தி. ஸாமணேரானஞ்ஹி ஸரணக³மனம் பி⁴க்கூ²னம் உபஸம்பத³கம்மவாசாஸதி³ஸம், தஸ்மா பி⁴க்கூ²னம் விய சதுபாரிஸுத்³தி⁴ஸீலம் இமினாபி த³ஸ ஸீலானி ஸமாதி³ன்னானேவ ஹோந்தி, ஏவம் ஸந்தேபி த³ள்ஹீகரணத்த²ம் ஆயதிம் ஸம்வரே பதிட்டா²பனத்த²ம் புன தா³தப்³பா³னி. ஸசே புரிமிகாய புன ஸரணானி க³ஹிதானி, பச்சி²மிகாய வஸ்ஸாவாஸிகம் லச்ச²தி. ஸசே பச்சி²மிகாய க³ஹிதானி, ஸங்கே⁴ன அபலோகேத்வா லாபோ⁴ தா³தப்³போ³. அதி³ன்னாதா³னே திணஸலாகமத்தேனபி வத்து²னா, அப்³ரஹ்மசரியே தீஸு மக்³கே³ஸு யத்த² கத்த²சி விப்படிபத்தியா, முஸாவாதே³ ஹஸாதி⁴ப்பாயதாயபி முஸா ப⁴ணிதே அஸ்ஸமணோ ஹோதி, நாஸேதப்³ப³தம் ஆபஜ்ஜதி, மஜ்ஜபானே பன பி⁴க்கு²னோ அஜானித்வாபி பீ³ஜதோ பட்டா²ய மஜ்ஜம் பிவந்தஸ்ஸ பாசித்தியம். ஸாமணேரோ ஜானித்வா பிவந்தோவ ஸீலபே⁴த³ம் ஆபஜ்ஜதி, ந அஜானித்வா. யானி பனஸ்ஸ இதரானி பஞ்ச ஸிக்கா²பதா³னி, ஏதேஸு பி⁴ன்னேஸு ந நாஸேதப்³போ³, த³ண்ட³கம்மம் காதப்³ப³ம். ஸிக்கா²பதே³ பன புன தி³ன்னேபி அதி³ன்னேபி வட்டதி, த³ண்ட³கம்மேன பன பீளேத்வா ஆயதிம் ஸம்வரே ட²பனத்தா²ய தா³தப்³ப³மேவ.

அவண்ணபா⁴ஸனே பன ‘‘அரஹம் ஸம்மாஸம்பு³த்³தோ⁴’’திஆதீ³னம் படிபக்க²வஸேன பு³த்³த⁴ஸ்ஸ வா ‘‘ஸ்வாக்கா²தோ’’திஆதீ³னம் படிபக்க²வஸேன த⁴ம்மஸ்ஸ வா ‘‘ஸுப்படிபன்னோ’’திஆதீ³னம் படிபக்க²வஸேன ஸங்க⁴ஸ்ஸ வா அவண்ணம் பா⁴ஸந்தோ ரதனத்தயம் நிந்த³ந்தோ க³ரஹந்தோ ஆசரியுபஜ்ஜா²யாதீ³ஹி ‘‘மா ஏவம் அவசா’’தி அவண்ணபா⁴ஸனே ஆதீ³னவம் த³ஸ்ஸேத்வா நிவாரேதப்³போ³. ‘‘ஸசே யாவததியம் வுச்சமானோ ந ஓரமதி, கண்டகனாஸனாய நாஸேதப்³போ³’’தி குருந்தி³யம் வுத்தம். மஹாஅட்ட²கதா²யம் பன ‘‘ஸசே ஏவம் வுச்சமானோ தம் லத்³தி⁴ம் நிஸ்ஸஜ்ஜதி, த³ண்ட³கம்மம் காரேத்வா அச்சயம் தே³ஸாபேதப்³போ³. ஸசே ந நிஸ்ஸஜ்ஜதி, ததே²வ ஆதா³ய பக்³க³ய்ஹ திட்ட²தி, லிங்க³னாஸனாய நாஸேதப்³போ³’’தி வுத்தம், தம் யுத்தம். அயமேவ ஹி நாஸனா இதா⁴தி⁴ப்பேதாதி. மிச்சா²தி³ட்டி²கேபி ஏஸேவ நயோ. ஸஸ்ஸதுச்சே²தா³னஞ்ஹி அஞ்ஞதரதி³ட்டி²கோ ஸசே ஆசரியாதீ³ஹி ஓவதி³யமானோ நிஸ்ஸஜ்ஜதி, த³ண்ட³கம்மம் காரேத்வா அச்சயம் தே³ஸாபேதப்³போ³, அபடினிஸ்ஸஜ்ஜந்தோவ நாஸேதப்³போ³. பி⁴க்கு²னீதூ³ஸகோ சேத்த² காமம் அப்³ரஹ்மசாரிக்³க³ஹணேன க³ஹிதோவ, அப்³ரஹ்மசாரிம் பன ஆயதிம் ஸம்வரே டா²துகாமம் ஸரணானி த³த்வா உபஸம்பாதே³தும் வட்டதி. பி⁴க்கு²னீதூ³ஸகோ ஆயதிம் ஸம்வரே டா²துகாமோபி பப்³ப³ஜ்ஜம்பி ந லப⁴தி, பகே³வ உபஸம்பத³ந்தி ஏதமத்த²ம் த³ஸ்ஸேதும் ‘‘பி⁴க்கு²னீதூ³ஸகோ’’தி இத³ம் விஸும் த³ஸமம் அங்க³ம் வுத்தந்தி வேதி³தப்³ப³ம்.

150. ‘‘அனுஜானாமி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ ஸாமணேரஸ்ஸ த³ண்ட³கம்மம் காதும். பி⁴க்கூ²னம் அலாபா⁴ய பரிஸக்கதி, பி⁴க்கூ²னம் அனத்தா²ய பரிஸக்கதி, பி⁴க்கூ²னம் அவாஸாய பரிஸக்கதி, பி⁴க்கூ² அக்கோஸதி, பரிபா⁴ஸதி, பி⁴க்கூ² பி⁴க்கூ²ஹி பே⁴தே³தீ’’தி (மஹாவ. 107) ‘‘வசனதோ பன இமானி பஞ்ச அங்கா³னி, ஸிக்கா²பதே³ஸு ச பச்சி²மானி விகாலபோ⁴ஜனாதீ³னி பஞ்சாதி த³ஸ த³ண்ட³கம்மவத்தூ²னி. கிம்பனேத்த² த³ண்ட³கம்மம் கத்தப்³ப³’’ந்தி? ‘‘அனுஜானாமி, பி⁴க்க²வே, யத்த² வா வஸதி, யத்த² வா படிக்கமதி, தத்த² ஆவரணம் காது’’ந்தி (மஹாவ. 107) வசனதோ யத்த² (மஹாவ. அட்ட². 107) வஸதி வா பவிஸதி வா, தத்த² ஆவரணம் காதப்³ப³ம் ‘‘மா இத⁴ பவிஸா’’தி. உப⁴யேனபி அத்தனோ பரிவேணஞ்ச வஸ்ஸக்³கே³ன பத்தஸேனாஸனஞ்ச வுத்தம். தஸ்மா ந ஸப்³போ³ ஸங்கா⁴ராமோ ஆவரணம் காதப்³போ³, கரோந்தோ ச து³க்கடம் ஆபஜ்ஜதி ‘‘ந, பி⁴க்க²வே, ஸப்³போ³ ஸங்கா⁴ராமோ ஆவரணம் காதப்³போ³, யோ கரேய்ய, ஆபத்தி து³க்கடஸ்ஸா’’தி வுத்தத்தா. ந ச முக²த்³வாரிகோ ஆஹாரோ ஆவரணம் காதப்³போ³, கரோந்தோ ச து³க்கடம் ஆபஜ்ஜதி ‘‘ந, பி⁴க்க²வே, முக²த்³வாரிகோ ஆஹாரோ ஆவரணம் காதப்³போ³, யோ கரேய்ய, ஆபத்தி து³க்கடஸ்ஸா’’தி வுத்தத்தா. தஸ்மா ‘‘அஜ்ஜ மா கா²த³ மா பு⁴ஞ்ஜா’’தி வத³தோபி ‘‘ஆஹாரம்பி நிவாரேஸ்ஸாமீ’’தி பத்தசீவரம் அந்தோ நிக்கி²பதோபி ஸப்³ப³பயோகே³ஸு து³க்கடம். அனாசாரஸ்ஸ பன து³ப்³ப³சஸாமணேரஸ்ஸ த³ண்ட³கம்மம் கத்வா யாகு³ம் வா ப⁴த்தம் வா பத்தசீவரம் வா த³ஸ்ஸேத்வா ‘‘ஏத்தகே நாம த³ண்ட³கம்மே ஆஹடே இத³ம் லச்ச²ஸீ’’தி வத்தும் வட்டதி. ப⁴க³வதா ஹி ஆவரணமேவ த³ண்ட³கம்மம் வுத்தம். த⁴ம்மஸங்கா³ஹகத்தே²ரேஹி பன ‘‘அபராதா⁴னுரூபம் உத³கதா³ருவாலிகாதீ³னம் ஆஹராபனம்பி காதப்³ப³’’ந்தி வுத்தம், தஸ்மா தம்பி காதப்³ப³ம், தஞ்ச கோ² ‘‘ஓரமிஸ்ஸதி விரமிஸ்ஸதீ’’தி அனுகம்பாய, ந ‘‘நஸ்ஸிஸ்ஸதி விப்³ப⁴மிஸ்ஸதீ’’திஆதி³னயப்பவத்தேன பாபஜ்ஜா²ஸயேன. ‘‘த³ண்ட³கம்மம் கரோமீ’’தி ச உண்ஹபாஸாணே வா நிபஜ்ஜாபேதும் பாஸாணிட்ட²காதீ³னி வா ஸீஸே நிக்கி²பாபேதும் உத³கம் வா பவேஸேதும் ந வட்டதி.

உபஜ்ஜா²யம் அனாபுச்சா²பி த³ண்ட³கம்மம் ந காரேதப்³ப³ம் ‘‘ந, பி⁴க்க²வே, உபஜ்ஜா²யம் அனாபுச்சா² ஆவரணம் காதப்³ப³ம், யோ கரேய்ய, ஆபத்தி து³க்கடஸ்ஸா’’தி (மஹாவ. 108) வசனதோ. ஏத்த² பன ‘‘தும்ஹாகம் ஸாமணேரஸ்ஸ அயம் நாம அபராதோ⁴, த³ண்ட³கம்மமஸ்ஸ கரோதா²’’தி திக்க²த்தும் வுத்தே ஸசே ஸோ உபஜ்ஜா²யோ த³ண்ட³கம்மம் ந கரோதி, ஸயம் காதும் வட்டதி. ஸசேபி ஆதி³தோ உபஜ்ஜா²யோ வத³தி ‘‘மய்ஹம் ஸாமணேரானம் தோ³ஸே ஸதி தும்ஹே த³ண்ட³கம்மம் கரோதா²’’தி, காதும் வட்டதியேவ. யதா² ச ஸாமணேரானம், ஏவம் ஸத்³தி⁴விஹாரிகந்தேவாஸிகானம்பி த³ண்ட³கம்மம் காதும் வட்டதி, அஞ்ஞேஸம் பன பரிஸா ந அபலாளேதப்³பா³, அபலாளேந்தோ து³க்கடம் ஆபஜ்ஜதி ‘‘ந, பி⁴க்க²வே, அஞ்ஞஸ்ஸ பரிஸா அபலாளேதப்³பா³, யோ அபலாளேய்ய, ஆபத்தி து³க்கடஸ்ஸா’’தி (மஹாவ. 108) வசனதோ. தஸ்மா ‘‘தும்ஹாகம் பத்தம் தே³ம, சீவரம் தே³மா’’தி அத்தனோ உபட்டா²னகரணத்த²ம் ஸங்க³ண்ஹித்வா ஸாமணேரா வா ஹோந்து உபஸம்பன்னா வா, அந்தமஸோ து³ஸ்ஸீலபி⁴க்கு²ஸ்ஸபி பரஸ்ஸ பரிஸபூ⁴தே பி⁴ந்தி³த்வா க³ண்ஹிதும் ந வட்டதி, ஆதீ³னவம் பன வத்தும் வட்டதி ‘‘தயா நஹாயிதும் ஆக³தேன கூ³த²மக்க²னம் விய கதம் து³ஸ்ஸீலம் நிஸ்ஸாய விஹரந்தேனா’’தி. ஸசே ஸோ ஸயமேவ ஜானித்வா உபஜ்ஜ²ம் வா நிஸ்ஸயம் வா யாசதி, தா³தும் வட்டதி.

இதி பாளிமுத்தகவினயவினிச்ச²யஸங்க³ஹே

பப்³ப³ஜ்ஜாவினிச்ச²யகதா² ஸமத்தா.