23. நிஸ்ஸயவினிச்ச²யகதா²

151. நிஸ்ஸயோதி ஏத்த² பன அயம் நிஸ்ஸயோ நாம கேன தா³தப்³போ³, கேன ந தா³தப்³போ³, கஸ்ஸ தா³தப்³போ³, கஸ்ஸ ந தா³தப்³போ³, கத²ம் க³ஹிதோ ஹோதி, கத²ம் படிப்பஸ்ஸம்ப⁴தி, நிஸ்ஸாய கேன வஸிதப்³ப³ம், கேன ச ந வஸிதப்³ப³ந்தி? தத்த² கேன தா³தப்³போ³, கேன ந தா³தப்³போ³தி ஏத்த² தாவ ‘‘அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன த³ஸவஸ்ஸேன வா அதிரேகத³ஸவஸ்ஸேன வா உபஸம்பாதே³தும், நிஸ்ஸயம் தா³து’’ந்தி (மஹாவ. 76, 82) ச வசனதோ யோ ப்³யத்தோ ஹோதி படிப³லோ உபஸம்பதா³ய த³ஸவஸ்ஸோ வா அதிரேகத³ஸவஸ்ஸோ வா, தேன தா³தப்³போ³, இதரேன ந தா³தப்³போ³. ஸசே தே³தி, து³க்கடம் ஆபஜ்ஜதி.

ஏத்த² (பாசி. அட்ட². 145-147) ச ‘‘ப்³யத்தோ’’தி இமினா பரிஸுபட்டா²பகப³ஹுஸ்ஸுதோ வேதி³தப்³போ³. பரிஸுபட்டா²பகேன ஹி ஸப்³ப³ந்திமேன பரிச்சே²தே³ன பரிஸம் அபி⁴வினயே வினேதும் த்³வே விப⁴ங்கா³ பகு³ணா வாசுக்³க³தா காதப்³பா³, அஸக்கோந்தேன தீஹி ஜனேஹி ஸத்³தி⁴ம் பரிவத்தனக்க²மா காதப்³பா³, கம்மாகம்மஞ்ச க²ந்த⁴கவத்தஞ்ச உக்³க³ஹேதப்³ப³ம், பரிஸாய பன அபி⁴த⁴ம்மே வினயனத்த²ம் ஸசே மஜ்ஜி²மபா⁴ணகோ ஹோதி, மூலபண்ணாஸகோ உக்³க³ஹேதப்³போ³, தீ³க⁴பா⁴ணகேன மஹாவக்³கோ³, ஸம்யுத்தபா⁴ணகேன ஹேட்டி²மா வா தயோ வக்³கா³ மஹாவக்³கோ³ வா, அங்கு³த்தரபா⁴ணகேன ஹேட்டா² வா உபரி வா உபட்³ட⁴னிகாயோ உக்³க³ஹேதப்³போ³, அஸக்கோந்தேன திகனிபாததோ பட்டா²ய உக்³க³ஹேதும்பி வட்டதி. மஹாபச்சரியம் பன ‘‘ஏகம் க³ண்ஹந்தேன சதுக்கனிபாதம் வா பஞ்சகனிபாதம் வா உக்³க³ஹேதும் வட்டதீ’’தி வுத்தம். ஜாதகபா⁴ணகேன ஸாட்ட²கத²ம் ஜாதகம் உக்³க³ஹேதப்³ப³ம், ததோ ஓரம் ந வட்டதி. ‘‘த⁴ம்மபத³ம்பி ஸஹ வத்து²னா உக்³க³ஹேதும் வட்டதீ’’தி மஹாபச்சரியம் வுத்தம். ததோ ததோ ஸமுச்சயம் கத்வா மூலபண்ணாஸகமத்தம் வட்டதி, ‘‘ந வட்டதீ’’தி குருந்த³ட்ட²கதா²யம் படிக்கி²த்தம், இதராஸு விசாரணாயேவ நத்தி². அபி⁴த⁴ம்மே கிஞ்சி க³ஹேதப்³ப³ந்தி ந வுத்தம். யஸ்ஸ பன ஸாட்ட²கத²ம்பி வினயபிடகம் அபி⁴த⁴ம்மபிடகஞ்ச பகு³ணம், ஸுத்தந்தே ச வுத்தப்பகாரோ க³ந்தோ² நத்தி², பரிஸம் உபட்டா²பேதும் ந லப⁴தி. யேன பன ஸுத்தந்ததோ ச வினயதோ ச வுத்தப்பமாணோ க³ந்தோ² உக்³க³ஹிதோ, அயம் பரிஸுபட்டா²கோ ப³ஹுஸ்ஸுதோவ ஹோதி, தி³ஸாபாமோக்கோ² யேனகாமம்க³மோ பரிஸம் உபட்டா²பேதும் லப⁴தி, அயம் இமஸ்மிம் அத்தே² ‘‘ப்³யத்தோ’’தி அதி⁴ப்பேதோ.

யோ பன அந்தேவாஸினோ வா ஸத்³தி⁴விஹாரிகஸ்ஸ வா கி³லானஸ்ஸ ஸக்கோதி உபட்டா²னாதீ³னி காதும், அயம் இத⁴ ‘‘படிப³லோ’’தி அதி⁴ப்பேதோ. யம் பன வுத்தம் –

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³. ந அஸேக்கே²ன ஸீலக்க²ந்தே⁴ன ஸமன்னாக³தோ ஹோதி, ந அஸேக்கே²ன ஸமாதி⁴க்க²ந்தே⁴ன ஸமன்னாக³தோ ஹோதி, ந அஸேக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, ந அஸேக்கே²ன விமுத்திக்க²ந்தே⁴ன ஸமன்னாக³தோ ஹோதி, ந அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³. அத்தனா ந அஸேக்கே²ன ஸீலக்க²ந்தே⁴ன ஸமன்னாக³தோ ஹோதி, ந பரம் அஸேக்கே² ஸீலக்க²ந்தே⁴ ஸமாத³பேதா. அத்தனா ந அஸேக்கே²ன ஸமாதி⁴க்க²ந்தே⁴ன ஸமன்னாக³தோ ஹோதி, ந பரம் அஸேக்கே² ஸமாதி⁴க்க²ந்தே⁴ ஸமாத³பேதா. அத்தனா ந அஸேக்கே²ன பஞ்ஞாக்க²ந்தே⁴ன ஸமன்னாக³தோ ஹோதி, ந பரம் அஸேக்கே² பஞ்ஞாக்க²ந்தே⁴ ஸமாத³பேதா. அத்தனா ந அஸேக்கே²ன விமுத்திக்க²ந்தே⁴ன ஸமன்னாக³தோ ஹோதி, ந பரம் அஸேக்கே² விமுத்திக்க²ந்தே⁴ ஸமாத³பேதா. அத்தனா ந அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி, ந பரம் அஸேக்கே² விமுத்திஞாணத³ஸ்ஸனக்க²ந்தே⁴ ஸமாத³பேதா. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³. அஸ்ஸத்³தோ⁴ ஹோதி, அஹிரிகோ ஹோதி, அனோத்தப்பீ ஹோதி, குஸீதோ ஹோதி, முட்ட²ஸ்ஸதி ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³. அதி⁴ஸீலே ஸீலவிபன்னோ ஹோதி, அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி, அப்பஸ்ஸுதோ ஹோதி, து³ப்பஞ்ஞோ ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³. ந படிப³லோ ஹோதி அந்தேவாஸிம் வா ஸத்³தி⁴விஹாரிம் வா கி³லானம் உபட்டா²தும் வா உபட்டா²பேதும் வா, அனபி⁴ரதம் வூபகாஸேதும் வா வூபகாஸாபேதும் வா, உப்பன்னம் குக்குச்சம் த⁴ம்மதோ வினோதே³தும், ஆபத்திம் ந ஜானாதி, ஆபத்தியா வுட்டா²னம் ந ஜானாதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³. ந படிப³லோ ஹோதி அந்தேவாஸிம் வா ஸத்³தி⁴விஹாரிம் வா ஆபி⁴ஸமாசாரிகாய ஸிக்கா²ய ஸிக்கா²பேதும், ஆதி³ப்³ரஹ்மசரியகாய ஸிக்கா²ய வினேதும், அபி⁴த⁴ம்மே வினேதும், அபி⁴வினயே வினேதும், உப்பன்னம் தி³ட்டி²க³தம் த⁴ம்மதோ விவேசேதும். இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³. ஆபத்திம் ந ஜானாதி, அனாபத்திம் ந ஜானாதி, லஹுகம் ஆபத்திம் ந ஜானாதி, க³ருகம் ஆபத்திம் ந ஜானாதி, உப⁴யானி கோ² பனஸ்ஸ பாதிமோக்கா²னி வித்தா²ரேன ந ஸ்வாக³தானி ஹோந்தி ந ஸுவிப⁴த்தானி ந ஸுப்பவத்தீனி ந ஸுவினிச்சி²தானி ஸுத்தஸோ அனுப்³யஞ்ஜனஸோ. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³. ஆபத்திம் ந ஜானாதி, அனாபத்திம் ந ஜானாதி, லஹுகம் ஆபத்திம் ந ஜானாதி, க³ருகம் ஆபத்திம் ந ஜானாதி, ஊனத³ஸவஸ்ஸோ ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³’’திஆதி³ (மஹாவ. 84). தம்பி –

‘‘அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன த³ஸவஸ்ஸேன வா அதிரேகத³ஸவஸ்ஸேன வா உபஸம்பாதே³தும், நிஸ்ஸயம் தா³து’’ந்தி (மஹாவ. 76, 82) ச ஏவம் ஸங்கே²பதோ வுத்தஸ்ஸேவ உபஜ்ஜா²யாசரியலக்க²ணஸ்ஸ வித்தா²ரத³ஸ்ஸனத்த²ம் வுத்தம்.

தத்த² (மஹாவ. அட்ட². 84) கிஞ்சி அயுத்தவஸேன படிக்கி²த்தம், கிஞ்சி ஆபத்திஅங்க³வஸேன. ததா² ஹி ‘‘ந அஸேக்கே²ன ஸீலக்க²ந்தே⁴னா’’தி ச ‘‘அத்தனா ந அஸேக்கே²னா’’தி ச ‘‘அஸ்ஸத்³தோ⁴’’தி ச ஆதீ³ஸு தீஸு பஞ்சகேஸு அயுத்தவஸேன படிக்கே²போ கதோ, ந ஆபத்திஅங்க³வஸேன. யோ ஹி அஸேக்கே²ஹி ஸீலக்க²ந்தா⁴தீ³ஹி அஸமன்னாக³தோ பரே ச தத்த² ஸமாத³பேதும் அஸக்கோந்தோ அஸ்ஸத்³தி⁴யாதி³தோ³ஸயுத்தோவ ஹுத்வா பரிஸம் பரிஹரதி, தஸ்ஸ பரிஸா ஸீலாதீ³ஹி பரியாயதியேவ ந வட்³ட⁴தி, தஸ்மா ‘‘தேன ந உபஸம்பாதே³தப்³ப³’’ந்திஆதி³ அயுத்தவஸேன வுத்தம், ந ஆபத்திஅங்க³வஸேன. ந ஹி கீ²ணாஸவஸ்ஸேவ உபஜ்ஜா²சரியபா⁴வோ ப⁴க³வதா அனுஞ்ஞாதோ, யதி³ தஸ்ஸேவ அனுஞ்ஞாதோ அப⁴விஸ்ஸ, ‘‘ஸசே உபஜ்ஜா²யஸ்ஸ அனபி⁴ரதி உப்பன்னா ஹோதீ’’திஆதி³ம் ந வதே³ய்ய, யஸ்மா பன கீ²ணாஸவஸ்ஸ பரிஸா ஸீலாதீ³ஹி ந பரிஹாயதி, தஸ்மா ‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³’’ந்திஆதி³ வுத்தம்.

அதி⁴ஸீலே ஸீலவிபன்னோதிஆதீ³ஸு பாராஜிகஞ்ச ஸங்கா⁴தி³ஸேஸஞ்ச ஆபன்னோ அதி⁴ஸீலே ஸீலவிபன்னோ நாம. இதரே பஞ்சாபத்திக்க²ந்தே⁴ ஆபன்னோ அஜ்ஜா²சாரே ஆசாரவிபன்னோ நாம. ஸம்மாதி³ட்டி²ம் பஹாய அந்தக்³கா³ஹிகாய தி³ட்டி²யா ஸமன்னாக³தோ அதிதி³ட்டி²யா தி³ட்டி²விபன்னோ நாம. யத்தகம் ஸுதம் பரிஸம் பரிஹரந்தஸ்ஸ இச்சி²தப்³ப³ம், தேன விரஹிதத்தா அப்பஸ்ஸுதோ. யம் தேன ஜானிதப்³ப³ம் ஆபத்தாதி³, தஸ்ஸ அஜானனதோ து³ப்பஞ்ஞோ. இமஸ்மிம் பஞ்சகே புரிமானி தீணி பதா³னி அயுத்தவஸேன வுத்தானி, பச்சி²மானி த்³வே ஆபத்திஅங்க³வஸேன.

ஆபத்திம் ந ஜானாதீதி ‘‘இத³ம் நாம மயா கத’’ந்தி வுத்தே ‘‘இமம் நாம ஆபத்திம் அயம் ஆபன்னோ’’தி ந ஜானாதி. வுட்டா²னம் ந ஜானாதீதி ‘‘வுட்டா²னகா³மினிதோ வா தே³ஸனாகா³மினிதோ வா ஆபத்திதோ ஏவம் நாம வுட்டா²னம் ஹோதீ’’தி ந ஜானாதி. இமஸ்மிஞ்ஹி பஞ்சகே புரிமானி த்³வே பதா³னி அயுத்தவஸேன வுத்தானி, பச்சி²மானி தீணி ஆபத்திஅங்க³வஸேன.

ஆபி⁴ஸமாசாரிகாய ஸிக்கா²யாதி க²ந்த⁴கவத்தே வினேதும் ந படிப³லோ ஹோதீதி அத்தோ². ஆதி³ப்³ரஹ்மசரியகாயாதி ஸேக்க²பண்ணத்தியம் வினேதும் ந படிப³லோதி அத்தோ². அபி⁴த⁴ம்மேதி நாமரூபபரிச்சே²தே³ வினேதும் ந படிப³லோதி அத்தோ². அபி⁴வினயேதி ஸகலே வினயபிடகே வினேதும் ந படிப³லோதி அத்தோ². வினேதும் ந படிப³லோதி ச ஸப்³ப³த்த² ஸிக்கா²பேதும் ந ஸக்கோதீதி அத்தோ². த⁴ம்மதோ விவேசேதுந்தி த⁴ம்மேன காரணேன விஸ்ஸஜ்ஜாபேதும். இமஸ்மிம் பஞ்சகே ஸப்³ப³பதே³ஸு ஆபத்தி.

‘‘ஆபத்திம் ந ஜானாதீ’’திஆதி³பஞ்சகஸ்மிம் வித்தா²ரேனாதி உப⁴தோவிப⁴ங்கே³ன ஸத்³தி⁴ம். ந ஸ்வாக³தானீதி ந ஸுட்டு² ஆக³தானி. ஸுவிப⁴த்தானீதி ஸுட்டு² விப⁴த்தானி பத³பச்சாப⁴ட்ட²ஸங்கரதோ³ஸரஅதானி. ஸுப்பவத்தீனீதி பகு³ணானி வாசுக்³க³தானி ஸுவினிச்சி²தானி. ஸுத்தஸோதி க²ந்த⁴கபரிவாரதோ ஆஹரிதப்³ப³ஸுத்தவஸேன ஸுட்டு² வினிச்சி²தானி. அனுப்³யஞ்ஜனஸோதி அக்க²ரபத³பாரிபூரியா ச ஸுவினிச்சி²தானி அக²ண்டா³னி அவிபரீதக்க²ரானி. ஏதேன அட்ட²கதா² தீ³பிதா. அட்ட²கதா²தோ ஹி ஏஸ வினிச்ச²யோ ஹோதீதி. இமஸ்மிம் பஞ்சகேபி ஸப்³ப³பதே³ஸு ஆபத்தி. ஊனத³ஸவஸ்ஸபரியோஸானபஞ்சகேபி ஏஸேவ நயோ. இதி ஆதி³தோ தயோ பஞ்சகா, சதுத்தே² தீணி பதா³னி, பஞ்சமே த்³வே பதா³னீதி ஸப்³பே³பி சத்தாரோ பஞ்சகா அயுத்தவஸேன வுத்தா, சதுத்தே² பஞ்சகே த்³வே பதா³னி, பஞ்சமே தீணி, ச²ட்ட²ஸத்தமட்ட²மா தயோ பஞ்சகாதி ஸப்³பே³பி சத்தாரோ பஞ்சகா ஆபத்திஅங்க³வஸேன வுத்தா.

ஸுக்கபக்கே² பன வுத்தவிபரியாயேன ‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ம், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³. அஸேக்கே²ன ஸீலக்க²ந்தே⁴ன ஸமன்னாக³தோ ஹோதீ’’திஆதி³னா (மஹாவ. 84) அட்ட² பஞ்சகா ஆக³தாயேவ. தத்த² ஸப்³ப³த்தே²வ அனாபத்தி.

152. கஸ்ஸ தா³தப்³போ³, கஸ்ஸ ந தா³தப்³போ³தி ஏத்த² பன யோ லஜ்ஜீ ஹோதி, தஸ்ஸ தா³தப்³போ³. இதரஸ்ஸ ந தா³தப்³போ³ ‘‘ந, பி⁴க்க²வே, அலஜ்ஜீனம் நிஸ்ஸயோ தா³தப்³போ³, யோ த³தே³ய்ய, ஆபத்தி து³க்கடஸ்ஸா’’தி (மஹாவ. 120) வசனதோ. நிஸ்ஸாய வஸந்தேனபி அலஜ்ஜீ நிஸ்ஸாய ந வஸிதப்³ப³ம். வுத்தஞ்ஹேதம் ‘‘ந, பி⁴க்க²வே, அலஜ்ஜீனம் நிஸ்ஸாய வத்த²ப்³ப³ம், யோ வஸேய்ய, ஆபத்தி து³க்கடஸ்ஸா’’தி (மஹாவ. 120). ஏத்த² (மஹாவ. அட்ட². 120) ச அலஜ்ஜீனந்தி உபயோக³த்தே² ஸாமிவசனம், அலஜ்ஜிபுக்³க³லே நிஸ்ஸாய ந வஸிதப்³ப³ந்தி வுத்தம் ஹோதி. தஸ்மா நவம் டா²னம் க³தேன ‘‘ஏஹி, பி⁴க்கு², நிஸ்ஸயம் க³ண்ஹாஹீ’’தி வுச்சமானேனபி சதூஹபஞ்சாஹம் நிஸ்ஸயதா³யகஸ்ஸ லஜ்ஜிபா⁴வம் உபபரிக்கி²த்வா நிஸ்ஸயோ க³ஹேதப்³போ³. ‘‘அனுஜானாமி, பி⁴க்க²வே, சதூஹபஞ்சாஹம் ஆக³மேதும் யாவ பி⁴க்கு²ஸபா⁴க³தம் ஜானாமீ’’தி (மஹாவ. 120) ஹி வுத்தம். ஸசே ‘‘தே²ரோ லஜ்ஜீ’’தி பி⁴க்கூ²னம் ஸந்திகே ஸுத்வா ஆக³ததி³வஸேயேவ க³ஹேதுகாமோ ஹோதி, தே²ரோ பன ‘‘ஆக³மேஹி தாவ, வஸந்தோ ஜானிஸ்ஸஸீ’’தி கதிபாஹம் ஆசாரம் உபபரிக்கி²த்வா நிஸ்ஸயம் தே³தி, வட்டதி, பகதியா நிஸ்ஸயக³ஹணட்டா²னம் க³தேன பன தத³ஹேவ க³ஹேதப்³போ³, ஏகதி³வஸம்பி பரிஹாரோ நத்தி². ஸசே பட²மயாமே ஆசரியஸ்ஸ ஓகாஸோ நத்தி², ஓகாஸம் அலப⁴ந்தோ ‘‘பச்சூஸஸமயே க³ஹேஸ்ஸாமீ’’தி ஸயதி, அருணம் உக்³க³தம்பி ந ஜானாதி, அனாபத்தி. ஸசே பன ‘‘க³ண்ஹிஸ்ஸாமீ’’தி ஆபோ⁴க³ம் அகத்வா ஸயதி, அருணுக்³க³மனே து³க்கடம். அக³தபுப்³ப³ம் டா²னம் க³தேன த்³வே தீணி தி³வஸானி வஸித்வா க³ந்துகாமேன அனிஸ்ஸிதேன வஸிதப்³ப³ம். ‘‘ஸத்தாஹம் வஸிஸ்ஸாமீ’’தி ஆலயம் கரோந்தேன பன நிஸ்ஸயோ க³ஹேதப்³போ³. ஸசே தே²ரோ ‘‘கிம் ஸத்தாஹம் வஸந்தஸ்ஸ நிஸ்ஸயேனா’’தி வத³தி, படிக்கி²த்தகாலதோ பட்டா²ய லத்³த⁴பரிஹாரோ ஹோதி.

‘‘அனுஜானாமி, பி⁴க்க²வே, அத்³தா⁴னமக்³க³ப்படிபன்னேன பி⁴க்கு²னா நிஸ்ஸயம் அலப⁴மானேன அனிஸ்ஸிதேன வத்து²’’ந்தி வசனதோ பன அத்³தா⁴னமக்³க³ப்படிபன்னோ ஸசே அத்தனா ஸத்³தி⁴ம் அத்³தா⁴னமக்³க³ப்படிபன்னம் நிஸ்ஸயதா³யகம் ந லப⁴தி, ஏவம் நிஸ்ஸயம் அலப⁴மானேன அனிஸ்ஸிதேன ப³ஹூனிபி தி³வஸானி க³ந்தும் வட்டதி. ஸசே புப்³பே³ நிஸ்ஸயம் க³ஹேத்வா வுத்த²புப்³ப³ம் கிஞ்சி ஆவாஸம் பவிஸதி, ஏகரத்தம் வஸந்தேனபி நிஸ்ஸயோ க³ஹேதப்³போ³. அந்தராமக்³கே³ விஸ்ஸமந்தோ வா ஸத்த²ம் வா பரியேஸந்தோ கதிபாஹம் வஸதி, அனாபத்தி. அந்தோவஸ்ஸே பன நிப³த்³த⁴வாஸம் வஸிதப்³ப³ம், நிஸ்ஸயோ ச க³ஹேதப்³போ³. நாவாய க³ச்ச²ந்தஸ்ஸ பன வஸ்ஸானே ஆக³தேபி நிஸ்ஸயம் அலப⁴ந்தஸ்ஸ அனாபத்தி. ஸசே அந்தராமக்³கே³ கி³லானோ ஹோதி, நிஸ்ஸயம் அலப⁴மானேன அனிஸ்ஸிதேன வஸிதும் வட்டதி.

கி³லானுபட்டா²கோபி கி³லானேன யாசியமானோ அனிஸ்ஸிதோ ஏவ வஸிதும் லப⁴தி. வுத்தஞ்ஹேதம் ‘‘அனுஜானாமி, பி⁴க்க²வே, கி³லானேன பி⁴க்கு²னா நிஸ்ஸயம் அலப⁴மானேன அனிஸ்ஸிதேன வத்து²ம், அனுஜானாமி, பி⁴க்க²வே, கி³லானுபட்டா²கேன பி⁴க்கு²னா நிஸ்ஸயம் அலப⁴மானேன யாசியமானேன அனிஸ்ஸிதேன வத்து²’’ந்தி (மஹாவ. 121). ஸசே பன ‘‘யாசாஹி ம’’ந்தி வுச்சமானோபி கி³லானோ மானேன ந யாசதி, க³ந்தப்³ப³ம்.

‘‘அனுஜானாமி, பி⁴க்க²வே, ஆரஞ்ஞிகேன பி⁴க்கு²னா பா²ஸுவிஹாரம் ஸல்லக்கே²ந்தேன நிஸ்ஸயம் அலப⁴மானேன அனிஸ்ஸிதேன வத்து²ம் ‘யதா³ பதிரூபோ நிஸ்ஸயதா³யகோ ஆக³ச்சி²ஸ்ஸதி, ததா³ தஸ்ஸ நிஸ்ஸாய வஸிஸ்ஸாமீ’’’தி வசனதோ பன யத்த² வஸந்தஸ்ஸ ஸமத²விபஸ்ஸனானம் படிலாப⁴வஸேன பா²ஸு ஹோதி, தாதி³ஸம் பா²ஸுவிஹாரம் ஸல்லக்கே²ந்தேன நிஸ்ஸயம் அலப⁴மானேன அனிஸ்ஸிதேன வத்த²ப்³ப³ம். இமஞ்ச பன பரிஹாரம் நேவ ஸோதாபன்னோ, ந ஸகதா³கா³மிஅனாகா³மிஅரஹந்தோ லப⁴ந்தி, ந தா²மக³தஸ்ஸ ஸமாதி⁴னோ வா விபஸ்ஸனாய வா லாபீ⁴, விஸ்ஸட்ட²கம்மட்டா²னே பன பா³லபுது²ஜ்ஜனே கதா²வ நத்தி². யஸ்ஸ கோ² பன ஸமதோ² வா விபஸ்ஸனா வா தருணா ஹோதி, அயம் இமம் பரிஹாரம் லப⁴தி, பவாரணாஸங்க³ஹோபி ஏதஸ்ஸேவ அனுஞ்ஞாதோ. தஸ்மா இமினா புக்³க³லேன ஆசரியே பவாரேத்வா க³தேபி ‘‘யதா³ பதிரூபோனிஸ்ஸயதா³யகோ ஆக³ச்சி²ஸ்ஸதி, தம் நிஸ்ஸாய வஸிஸ்ஸாமீ’’தி ஆபோ⁴க³ம் கத்வா புன யாவ ஆஸாள்ஹீபுண்ணமா, தாவ அனிஸ்ஸிதேன வத்து²ம் வட்டதி. ஸசே பன ஆஸாள்ஹீமாஸே ஆசரியோ நாக³ச்ச²தி, யத்த² நிஸ்ஸயோ லப்³ப⁴தி, தத்த² க³ந்தப்³ப³ம்.

153. கத²ம் க³ஹிதோ ஹோதீதி ஏத்த² உபஜ்ஜா²யஸ்ஸ ஸந்திகே தாவ உபஜ்ஜ²ம் க³ண்ஹந்தேன ஏகம்ஸம் உத்தராஸங்க³ம் கரித்வா பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ‘‘உபஜ்ஜா²யோ மே, ப⁴ந்தே, ஹோஹீ’’தி திக்க²த்தும் வத்தப்³ப³ம். ஏவம் ஸத்³தி⁴விஹாரிகேன வுத்தே ஸசே உபஜ்ஜா²யோ ‘‘ஸாஹூ’’தி வா ‘‘லஹூ’’தி வா ‘‘ஓபாயிக’’ந்தி வா ‘‘பதிரூப’’ந்தி வா ‘‘பாஸாதி³கேன ஸம்பாதே³ஹீ’’தி வா காயேன விஞ்ஞாபேதி, வாசாய விஞ்ஞாபேதி, காயேன வாசாய விஞ்ஞாபேதி, க³ஹிதோ ஹோதி உபஜ்ஜா²யோ. இத³மேவ ஹேத்த² உபஜ்ஜா²யக்³க³ஹணம், யதி³த³ம் உபஜ்ஜா²யஸ்ஸ இமேஸு பஞ்சஸு பதே³ஸு யஸ்ஸ கஸ்ஸசி பத³ஸ்ஸ வாசாய ஸாவனம் காயேன வா அத்த²விஞ்ஞாபனந்தி. கேசி பன ‘‘ஸாதூ⁴’’தி ஸம்படிச்ச²னம் ஸந்தா⁴ய வத³ந்தி, ந தம் பமாணம். ஆயாசனதா³னமத்தேன ஹி க³ஹிதோ ஹோதி உபஜ்ஜா²யோ, ந ஏத்த² ஸம்படிச்ச²னம் அங்க³ம். ஸத்³தி⁴விஹாரிகேனபி ந கேவலம் ‘‘இமினா மே பதே³ன உபஜ்ஜா²யோ க³ஹிதோ’’தி ஞாதும் வட்டதி, ‘‘அஜ்ஜதக்³கே³ தா³னி தே²ரோ மய்ஹம் பா⁴ரோ, அஹம்பி தே²ரஸ்ஸ பா⁴ரோ’’தி இத³ம்பி ஞாதும் வட்டதி (மஹாவ. அட்ட². 64). வுத்தஞ்ஹேதம் –

‘‘உபஜ்ஜா²யோ, பி⁴க்க²வே, ஸத்³தி⁴விஹாரிகம்ஹி புத்தசித்தம் உபட்ட²பேஸ்ஸதி, ஸத்³தி⁴விஹாரிகோ உபஜ்ஜா²யம்ஹி பிதுசித்தம் உபட்ட²பேஸ்ஸதி, ஏவம் தே அஞ்ஞமஞ்ஞம் ஸகா³ரவா ஸப்பதிஸ்ஸா ஸபா⁴க³வுத்தினோ விஹரந்தா இமஸ்மிம் த⁴ம்மவினயே வுட்³டி⁴ம் விரூள்ஹிம் வேபுல்லம் ஆபஜ்ஜிஸ்ஸந்தீ’’தி (மஹாவ. 65).

ஆசரியஸ்ஸ ஸந்திகே நிஸ்ஸயக்³க³ஹணேபி அயமேவ வினிச்ச²யோ. அயம் பனேத்த² விஸேஸோ – ஆசரியஸ்ஸ ஸந்திகே நிஸ்ஸயம் க³ண்ஹந்தேன உக்குடிகம் நிஸீதி³த்வா ‘‘ஆசரியோ மே, ப⁴ந்தே, ஹோஹி, ஆயஸ்மதோ நிஸ்ஸாய வச்சா²மீ’’தி (மஹாவ. 77) திக்க²த்தும் வத்தப்³ப³ம், ஸேஸம் வுத்தனயமேவ.

154. கத²ம் படிப்பஸ்ஸம்ப⁴தீதி ஏத்த² தாவ உபஜ்ஜா²யம்ஹா பஞ்சஹாகாரேஹி நிஸ்ஸயபடிப்பஸ்ஸத்³தி⁴ வேதி³தப்³பா³, ஆசரியம்ஹா ச²ஹி ஆகாரேஹி. வுத்தஞ்ஹேதம் –

‘‘பஞ்சிமா, பி⁴க்க²வே, நிஸ்ஸயபடிப்பஸ்ஸத்³தி⁴யோ உபஜ்ஜா²யம்ஹா. உபஜ்ஜா²யோ பக்கந்தோ வா ஹோதி, விப்³ப⁴ந்தோ வா, காலகதோ வா, பக்க²ஸங்கந்தோ வா, ஆணத்தியேவ பஞ்சமீ. இமா கோ², பி⁴க்க²வே, பஞ்ச நிஸ்ஸயபடிப்பஸ்ஸத்³தி⁴யோ உபஜ்ஜா²யம்ஹா.

ச²யிமா, பி⁴க்க²வே, நிஸ்ஸயபடிப்பஸ்ஸத்³தி⁴யோ ஆசரியம்ஹா. ஆசரியோ பக்கந்தோ வா ஹோதி, விப்³ப⁴ந்தோ வா, காலகதோ வா, பக்க²ஸங்கந்தோ வா, ஆணத்தியேவ பஞ்சமீ, உபஜ்ஜா²யேன வா ஸமோதா⁴னக³தோ ஹோதி. இமா கோ², பி⁴க்க²வே, ச² நிஸ்ஸயபடிப்பஸ்ஸத்³தி⁴யோ ஆசரியம்ஹா’’தி (மஹாவ. 83).

தத்ராயம் வினிச்ச²யோ (மஹாவ. அட்ட². 83) – பக்கந்தோதி தி³ஸம் க³தோ. ஏவம் க³தே ச பன தஸ்மிம் ஸசே விஹாரே நிஸ்ஸயதா³யகோ அத்தி², யஸ்ஸ ஸந்திகே அஞ்ஞதா³பி நிஸ்ஸயோ வா க³ஹிதபுப்³போ³ ஹோதி, யோ வா ஏகஸம்போ⁴க³பரிபோ⁴கோ³, தஸ்ஸ ஸந்திகே நிஸ்ஸயோ க³ஹேதப்³போ³, ஏகதி³வஸம்பி பரிஹாரோ நத்தி². ஸசே தாதி³ஸோ நத்தி², அஞ்ஞோ லஜ்ஜீ பேஸலோ அத்தி², தஸ்ஸ பேஸலபா⁴வம் ஜானந்தேன தத³ஹேவ நிஸ்ஸயோ யாசிதப்³போ³. ஸசே தே³தி, இச்சேதம் குஸலம். அத² பன ‘‘தும்ஹாகம் உபஜ்ஜா²யோ லஹும் ஆக³மிஸ்ஸதீ’’தி புச்ச²தி, உபஜ்ஜா²யேன சே ததா² வுத்தம், ‘‘ஆம, ப⁴ந்தே’’தி வத்தப்³ப³ம். ஸசே வத³தி ‘‘தேன ஹி உபஜ்ஜா²யஸ்ஸ ஆக³மனம் ஆக³மேதா²’’தி, வட்டதி. அத² பனஸ்ஸ பகதியா பேஸலபா⁴வம் ந ஜானாதி, சத்தாரி பஞ்ச தி³வஸானி தஸ்ஸ பி⁴க்கு²ஸ்ஸ ஸபா⁴க³தம் ஓலோகேத்வா ஓகாஸம் காரேத்வா நிஸ்ஸயோ க³ஹேதப்³போ³. ஸசே பன விஹாரே நிஸ்ஸயதா³யகோ நத்தி², உபஜ்ஜா²யோ ச ‘‘அஹம் கதிபாஹேன ஆக³மிஸ்ஸாமி, மா உக்கண்டி²த்தா²’’தி வத்வா க³தோ, யாவ ஆக³மனா பரிஹாரோ லப்³ப⁴தி, அதா²பி நம் தத்த² மனுஸ்ஸா பரிச்சி²ன்னகாலதோ உத்தரிபி பஞ்ச வா த³ஸ வா தி³வஸானி வாஸேந்தியேவ, தேன விஹாரம் பவத்தி பேஸேதப்³பா³ ‘‘த³ஹரா மா உக்கண்ட²ந்து, அஹம் அஸுகதி³வஸம் நாம ஆக³மிஸ்ஸாமீ’’தி, ஏவம்பி பரிஹாரோ லப்³ப⁴தி. அத² ஆக³ச்ச²தோ அந்தராமக்³கே³ நதீ³பூரேன வா சோராதீ³ஹி வா உபத்³த³வோ ஹோதி, தே²ரோ உத³கோஸக்கனம் வா ஆக³மேதி, ஸஹாயே வா பரியேஸதி, தம் சே பவத்திம் த³ஹரா ஸுணந்தி, யாவ ஆக³மனா பரிஹாரோ லப்³ப⁴தி. ஸசே பன ஸோ ‘‘இதே⁴வாஹம் வஸிஸ்ஸாமீ’’தி பஹிணதி, பரிஹாரோ நத்தி². யத்த² நிஸ்ஸயோ லப்³ப⁴தி, தத்த² க³ந்தப்³ப³ம். விப்³ப⁴ந்தே பன காலகதே பக்க²ஸங்கந்தே வா ஏகதி³வஸம்பி பரிஹாரோ நத்தி², யத்த² நிஸ்ஸயோ லப்³ப⁴தி, தத்த² க³ந்தப்³ப³ம்.

ஆணத்தீதி பன நிஸ்ஸயபணாமனா வுச்சதி, தஸ்மா ‘‘பணாமேமி த’’ந்தி வா ‘‘மா இத⁴ படிக்கமீ’’தி வா ‘‘நீஹர தே பத்தசீவர’’ந்தி வா ‘‘நாஹம் தயா உபட்டா²பேதப்³போ³’’தி வாதி இமினா பாளினயேன ‘‘மா மம் கா³மப்பவேஸனம் ஆபுச்சீ²’’திஆதி³னா பாளிமுத்தகனயேன வா யோ நிஸ்ஸயபணாமனாய பணாமிதோ ஹோதி, தேன உபஜ்ஜா²யோ க²மாபேதப்³போ³. ஸசே ஆதி³தோவ ந க²மதி, த³ண்ட³கம்மம் ஆஹரித்வா திக்க²த்தும் தாவ ஸயமேவ க²மாபேதப்³போ³. நோ சே க²மதி, தஸ்மிம் விஹாரே மஹாதே²ரே க³ஹேத்வா க²மாபேதப்³போ³. நோ சே க²மதி, ஸாமந்தவிஹாரே பி⁴க்கூ² க³ஹேத்வா க²மாபேதப்³போ³. ஸசே ஏவம்பி ந க²மதி, அஞ்ஞத்த² க³ந்த்வா உபஜ்ஜா²யஸ்ஸ ஸபா⁴கா³னம் ஸந்திகே வஸிதப்³ப³ம் ‘‘அப்பேவ நாம ‘ஸபா⁴கா³னம் மே ஸந்திகே வஸதீ’தி ஞத்வாபி க²மேய்யா’’தி. ஸசே ஏவம்பி ந க²மதி, தத்ரேவ வஸிதப்³ப³ம். தத்ர சே து³ப்³பி⁴க்கா²தி³தோ³ஸேன ந ஸக்கா ஹோதி வஸிதும், தம்யேவ விஹாரம் ஆக³ந்த்வா அஞ்ஞஸ்ஸ ஸந்திகே நிஸ்ஸயம் க³ஹேத்வா வஸிதும் வட்டதி. அயமாணத்தியம் வினிச்ச²யோ.

ஆசரியம்ஹா நிஸ்ஸயபடிப்பஸ்ஸத்³தீ⁴ஸு ஆசரியோ பக்கந்தோ வா ஹோதீதி ஏத்த² கோசி ஆசரியோ ஆபுச்சி²த்வா பக்கமதி, கோசி அனாபுச்சி²த்வா, அந்தேவாஸிகோபி ஏவமேவ. தத்ர ஸசே அந்தேவாஸிகோ ஆசரியம் ஆபுச்ச²தி ‘‘அஸுகம் நாம, ப⁴ந்தே, டா²னம் க³ந்தும் இச்சா²மி கேனசிதே³வ கரணீயேனா’’தி, ஆசரியேன ச ‘‘கதா³ க³மிஸ்ஸஸீ’’தி வுத்தோ ‘‘ஸாயன்ஹே வா ரத்திம் வா உட்ட²ஹித்வா க³மிஸ்ஸாமீ’’தி வத³தி, ஆசரியோபி ‘‘ஸாதூ⁴’’தி ஸம்படிச்ச²தி, தம் க²ணம்யேவ நிஸ்ஸயோ படிப்பஸ்ஸம்ப⁴தி. ஸசே பன ‘‘ப⁴ந்தே, அஸுகம் நாம டா²னம் க³ந்துகாமோம்ஹீ’’தி வுத்தே ஆசரியோ ‘‘அஸுகஸ்மிம் நாம கா³மே பிண்டா³ய சரித்வா பச்சா² ஜானிஸ்ஸஸீ’’தி வத³தி, ஸோ ச ‘‘ஸாதூ⁴’’தி ஸம்படிச்ச²தி, ததோ சே க³தோ ஸுக³தோ. ஸசே பன ந க³ச்ச²தி, நிஸ்ஸயோ ந படிப்பஸ்ஸம்ப⁴தி. அதா²பி ‘‘க³ச்சா²மீ’’தி வுத்தே ஆசரியேன ‘‘மா தாவ க³ச்ச², ரத்திம் மந்தேத்வா ஜானிஸ்ஸாமா’’தி வுத்தோ மந்தேத்வா க³ச்ச²தி, ஸுக³தோ. நோ சே க³ச்ச²தி, நிஸ்ஸயோ ந படிப்பஸ்ஸம்ப⁴தி. ஆசரியம் அனாபுச்சா² பக்கமந்தஸ்ஸ பன உபசாரஸீமாதிக்கமே நிஸ்ஸயோ படிப்பஸ்ஸம்ப⁴தி, அந்தோஉபசாரஸீமதோ படினிவத்தந்தஸ்ஸ ந படிப்பஸ்ஸம்ப⁴தி. ஸசே பன ஆசரியோ அந்தேவாஸிகம் ஆபுச்ச²தி ‘‘ஆவுஸோ, அஸுகம் நாம டா²னம் க³மிஸ்ஸாமீ’’தி, அந்தேவாஸிகேன ச ‘‘கதா³’’தி வுத்தே ‘‘ஸாயன்ஹே வா ரத்திபா⁴கே³ வா’’தி வத³தி, அந்தேவாஸிகோபி ‘‘ஸாதூ⁴’’தி ஸம்படிச்ச²தி, தம் க²ணம்யேவ நிஸ்ஸயோ படிப்பஸ்ஸம்ப⁴தி, ஸசே பன ஆசரியோ ‘‘ஸ்வே பிண்டா³ய சரித்வா க³மிஸ்ஸாமீ’’தி வத³தி, இதரோ ச ‘‘ஸாதூ⁴’’தி ஸம்படிச்ச²தி, ஏகதி³வஸம் தாவ நிஸ்ஸயோ ந படிப்பஸ்ஸம்ப⁴தி, புனதி³வஸே படிப்பஸ்ஸத்³தோ⁴ ஹோதி. ‘‘அஸுகஸ்மிம் நாம கா³மே பிண்டா³ய சரித்வா ஜானிஸ்ஸாமி மம க³மனம் வா அக³மனம் வா’’தி வத்வா பன ஸசே ந க³ச்ச²தி, நிஸ்ஸயோ ந படிப்பஸ்ஸம்ப⁴தி. அதா²பி ‘‘க³ச்சா²மீ’’தி வுத்தே அந்தேவாஸிகேன ‘‘மா தாவ க³ச்ச²த², ரத்திம் மந்தேத்வா ஜானிஸ்ஸதா²’’தி வுத்தோ மந்தேத்வாபி ந க³ச்ச²தி, நிஸ்ஸயோ ந படிப்பஸ்ஸம்ப⁴தி. ஸசே உபோ⁴பி ஆசரியந்தேவாஸிகா கேனசிதே³வ கரணீயேன ப³ஹிஸீமம் க³ச்ச²ந்தி, ததோ சே ஆசரியோ க³மியசித்தே உப்பன்னே அனாபுச்சா²வ க³ந்த்வா த்³வின்னம் லேட்³டு³பாதானம் அந்தோயேவ நிவத்ததி, நிஸ்ஸயோ ந படிப்பஸ்ஸம்ப⁴தி. ஸசே த்³வே லேட்³டு³பாதே அதிக்கமித்வா நிவத்ததி, படிப்பஸ்ஸத்³தோ⁴ ஹோதி. ஆசரியுபஜ்ஜா²யா த்³வே லேட்³டு³பாதே அதிக்கம்ம அஞ்ஞஸ்மிம் விஹாரே வஸந்தி, நிஸ்ஸயோ படிப்பஸ்ஸம்ப⁴தி. ஆசரியே விப்³ப⁴ந்தே காலகதே பக்க²ஸங்கந்தே ச தம் க²ணம்யேவ படிப்பஸ்ஸம்ப⁴தி.

ஆணத்தியம் பன ஆசரியோ முஞ்சிதுகாமோவ ஹுத்வா நிஸ்ஸயபணாமனாய பணாமேதி, அந்தேவாஸிகோ ச ‘‘கிஞ்சாபி மம் ஆசரியோ பணாமேதி, அத² கோ² ஹத³யேன முது³கோ’’தி ஸாலயோ ஹோதி, நிஸ்ஸயோ ந படிப்பஸ்ஸம்ப⁴தி. ஸசேபி ஆரியோ ஸாலயோ, அந்தேவாஸிகோ நிராலயோ ‘‘ந தா³னி இமம் நிஸ்ஸாய வஸிஸ்ஸாமீ’’தி து⁴ரம் நிக்கி²பதி, ஏவம்பி ந படிப்பஸ்ஸம்ப⁴தி. உபி⁴ன்னம் ஸாலயபா⁴வே பன ந படிப்பஸ்ஸம்ப⁴தியேவ, உபி⁴ன்னம் து⁴ரனிக்கே²பேன படிப்பஸ்ஸம்ப⁴தி, பணாமிதேன த³ண்ட³கம்மம் ஆஹரித்வா திக்க²த்தும் க²மாபேதப்³போ³. நோ சே க²மதி, உபஜ்ஜா²யே வுத்தனயேன படிபஜ்ஜிதப்³ப³ம். யதா²பஞ்ஞத்தம் பன ஆசரியுபஜ்ஜா²யவத்தம் பரிபூரேந்தம் அதி⁴மத்தபேமாதி³பஞ்சங்க³ஸமன்னாக³தம் அந்தேவாஸிகம் ஸத்³தி⁴விஹாரிகம் வா பணாமேந்தஸ்ஸ து³க்கடம், இதரம் அபணாமேந்தஸ்ஸபி து³க்கடமேவ. வுத்தஞ்ஹேதம் –

‘‘ந, பி⁴க்க²வே, ஸம்மாவத்தந்தோ பணாமேதப்³போ³, யோ பணாமேய்ய, ஆபத்தி து³க்கடஸ்ஸ. ந ச, பி⁴க்க²வே, அஸம்மாவத்தந்தோ ந பணாமேதப்³போ³, யோ ந பணாமேய்ய, ஆபத்தி து³க்கடஸ்ஸ (மஹாவ. 80).

‘‘பஞ்சஹி, பி⁴க்க²வே, அங்கே³ஹி ஸமன்னாக³தம் அந்தேவாஸிகம் அபணாமேந்தோ ஆசரியோ ஸாதிஸாரோ ஹோதி, பணாமேந்தோ அனதிஸாரோ ஹோதி. ஆசரியம்ஹி நாதி⁴மத்தம் பேமம் ஹோதி, நாதி⁴மத்தோ பஸாதோ³ ஹோதி, நாதி⁴மத்தா ஹிரீ ஹோதி, நாதி⁴மத்தோ கா³ரவோ ஹோதி, நாதி⁴மத்தா பா⁴வனா ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தம் அந்தேவாஸிகம் அபணாமேந்தோ ஆசரியோ ஸாதிஸாரோ ஹோதி, பணாமேந்தோ அனதிஸாரோ ஹோதி (மஹாவ. 81).

‘‘பஞ்சஹி, பி⁴க்க²வே, அங்கே³ஹி ஸமன்னாக³தம் ஸத்³தி⁴விஹாரிகம் அபணாமேந்தோ உபஜ்ஜா²யோ ஸாதிஸாரோ ஹோதி, பணாமேந்தோ அனதிஸாரோ ஹோதி. உபஜ்ஜா²யம்ஹி நாதி⁴மத்தம் பேமம் ஹோதி, நாதி⁴மத்தோ பஸாதோ³ ஹோதி, நாதி⁴மத்தா ஹிரீ ஹோதி, நாதி⁴மத்தோ கா³ரவோ ஹோதி, நாதி⁴மத்தா பா⁴வனா ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தம் ஸத்³தி⁴விஹாரிகம் அபணாமேந்தோ உபஜ்ஜா²யோ ஸாதிஸாரோ ஹோதி, பணாமேந்தோ அனதிஸாரோ ஹோதீ’’திஆதி³ (மஹாவ. 68).

தத்த² (மஹாவ. அட்ட². 68) நாதி⁴மத்தம் பேமம் ஹோதீதி உபஜ்ஜா²யம்ஹி அதி⁴மத்தம் கே³ஹஸ்ஸிதபேமம் ந ஹோதி. நாதி⁴மத்தா பா⁴வனா ஹோதீதி அதி⁴மத்தா மேத்தாபா⁴வனா ந ஹோதீதி அத்தோ².

உபஜ்ஜா²யேன வா ஸமோதா⁴னக³தோதி ஏத்த² (மஹாவ. அட்ட². 83) த³ஸ்ஸனஸவனவஸேன ஸமோதா⁴னம் வேதி³தப்³ப³ம். ஸசே ஹி ஆசரியம் நிஸ்ஸாய வஸந்தோ ஸத்³தி⁴விஹாரிகோ ஏகவிஹாரே சேதியம் வா வந்த³ந்தம், ஏககா³மே வா பிண்டா³ய சரந்தம் உபஜ்ஜா²யம் பஸ்ஸதி, நிஸ்ஸயோ படிப்பஸ்ஸம்ப⁴தி. உபஜ்ஜா²யோ பஸ்ஸதி, ஸத்³தி⁴விஹாரிகோ ந பஸ்ஸதி, ந படிப்பஸ்ஸம்ப⁴தி. மக்³க³ப்படிபன்னம் வா ஆகாஸேன வா க³ச்ச²ந்தம் உபஜ்ஜா²யம் தி³ஸ்வா தூ³ரத்தா ‘‘பி⁴க்கூ²’’தி ஜானாதி, ‘‘உபஜ்ஜா²யோ’’தி ந ஜானாதி, ந படிப்பஸ்ஸம்ப⁴தி. ஸசே ஜானாதி, படிப்பஸ்ஸம்ப⁴தி. உபரிபாஸாதே³ உபஜ்ஜா²யோ வஸதி, ஹேட்டா² ஸத்³தி⁴விஹாரிகோ, தம் அதி³ஸ்வாவ யாகு³ம் பிவித்வா படிக்கமதி, ஆஸனஸாலாய வா நிஸின்னம் அதி³ஸ்வாவ ஏகமந்தே பு⁴ஞ்ஜித்வா பக்கமதி, த⁴ம்மஸ்ஸவனமண்ட³பே வா நிஸின்னம்பி தம் அதி³ஸ்வாவ த⁴ம்மம் ஸுத்வா பக்கமதி, நிஸ்ஸயோ ந படிப்பஸ்ஸம்ப⁴தி. ஏவம் தாவ த³ஸ்ஸனவஸேன ஸமோதா⁴னம் வேதி³தப்³ப³ம். ஸவனவஸேன பன ஸசே உபஜ்ஜா²யஸ்ஸ விஹாரே வா அந்தரக⁴ரே வா த⁴ம்மம் வா கதே²ந்தஸ்ஸ அனுமோத³னம் வா கரோந்தஸ்ஸ ஸத்³த³ம் ஸுத்வா ‘‘உபஜ்ஜா²யஸ்ஸ மே ஸத்³தோ³’’தி ஸஞ்ஜானாதி, நிஸ்ஸயோ படிப்பஸ்ஸம்ப⁴தி, அஸஞ்ஜானந்தஸ்ஸ ந படிப்பஸ்ஸம்ப⁴தி. அயம் ஸமோதா⁴னே வினிச்ச²யோ.

155. நிஸ்ஸாய கேன வஸிதப்³ப³ம், கேன ந வஸிதப்³ப³ந்தி ஏத்த² பன ‘‘அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன பஞ்ச வஸ்ஸானி நிஸ்ஸாய வத்து²ம், அப்³யத்தேன யாவஜீவ’’ந்தி (மஹாவ. 103) வசனதோ யோ அப்³யத்தோ ஹோதி, தேன யாவஜீவம் நிஸ்ஸாயேவ வஸிதப்³ப³ம். ஸசாயம் (மஹாவ. அட்ட². 103) வுட்³ட⁴தரம் ஆசரியம் ந லப⁴தி, உபஸம்பதா³ய ஸட்டி²வஸ்ஸோ வா ஸத்ததிவஸ்ஸோ வா ஹோதி, நவகதரஸ்ஸபி ப்³யத்தஸ்ஸ ஸந்திகே உக்குடிகம் நிஸீதி³த்வா அஞ்ஜலிம் பக்³க³ஹேத்வா ‘‘ஆசரியோ மே, ஆவுஸோ, ஹோதி, ஆயஸ்மதோ நிஸ்ஸாய வச்சா²மீ’’தி ஏவம் திக்க²த்தும் வத்வா நிஸ்ஸயோ க³ஹேதப்³போ³வ. கா³மப்பவேஸனம் ஆபுச்ச²ந்தேனபி உக்குடிகம் நிஸீதி³த்வா அஞ்ஜலிம் பக்³க³ஹேத்வா ‘‘கா³மப்பவேஸனம் ஆபுச்சா²மி ஆசரியா’’தி வத்தப்³ப³ம். ஏஸ நயோ ஸப்³ப³ஆபுச்ச²னேஸு.

யோ பன ப்³யத்தோ ஹோதி உபஸம்பதா³ய பஞ்சவஸ்ஸோ, தேன அனிஸ்ஸிதேன வத்து²ம் வட்டதி. தஸ்மா நிஸ்ஸயமுச்சனகேன (பாசி. அட்ட². 145-147) உபஸம்பதா³ய பஞ்சவஸ்ஸேன ஸப்³ப³ந்திமேன பரிச்சே²தே³ன த்³வே மாதிகா பகு³ணா வாசுக்³க³தா கத்தப்³பா³, பக்க²தி³வஸேஸு த⁴ம்மஸ்ஸவனத்தா²ய ஸுத்தந்ததோ சத்தாரோ பா⁴ணவாரா, ஸம்பத்தானம் பரிஸானம் பரிகத²னத்தா²ய அந்த⁴கவிந்த³(அ. நி. 5.114) மஹாராஹுலோவாத³(ம. நி. 2.113 ஆத³யோ) அம்ப³ட்ட²(த³ஈ. நி. 1.254 ஆத³யோ) ஸதி³ஸோ ஏகோ கதா²மக்³கோ³, ஸங்க⁴ப⁴த்தமங்க³லாமங்க³லேஸு அனுமோத³னத்தா²ய திஸ்ஸோ அனுமோத³னா, உபோஸத²பவாரணாதி³ஜானனத்த²ம் கம்மாகம்மவினிச்ச²யோ, ஸமணத⁴ம்மகரணத்த²ம் ஸமாதி⁴வஸேன வா விபஸ்ஸனாவஸேன வா அரஹத்தபரியோஸானமேகம் கம்மட்டா²னம், ஏத்தகம் உக்³க³ஹேதப்³ப³ம். ஏத்தாவதா ஹி அயம் ப³ஹுஸ்ஸுதோ ஹோதி சாதுத்³தி³ஸோ, யத்த² கத்த²சி அத்தனோ இஸ்ஸரியேன வஸிதும் லப⁴தி. யம் பன வுத்தம் –

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். ந அஸேக்கே²ன ஸீலக்க²ந்தே⁴ன ஸமன்னாக³தோ ஹோதி, ந அஸேக்கே²ன ஸமாதி⁴க்க²ந்தே⁴ன… ந அஸேக்கே²ன பஞ்ஞாக்க²ந்தே⁴ன… ந அஸேக்கே²ன விமுத்திக்க²ந்தே⁴ன… ந அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். அஸ்ஸத்³தோ⁴ ஹோதி, அஹிரிகோ ஹோதி, அனோத்தப்பீ ஹோதி, குஸீதோ ஹோதி, முட்ட²ஸ்ஸதி ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். அதி⁴ஸீலே ஸீலவிபன்னோ ஹோதி, அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி, அப்பஸ்ஸுதோ ஹோதி, து³ப்பஞ்ஞோ ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். ஆபத்திம் ந ஜானாதி, அனாபத்திம் ந ஜானாதி, லஹுகம் ஆபத்திம் ந ஜானாதி, க³ருகம் ஆபத்திம் ந ஜானாதி, உப⁴யானி கோ² பனஸ்ஸ பாதிமோக்கா²னி வித்தா²ரேன ந ஸ்வாக³தானி ஹோந்தி ந ஸுவிப⁴த்தானி ந ஸுப்பவத்தீனி ந ஸுவினிச்சி²தானி ஸுத்தஸோ அனுப்³யஞ்ஜனஸோ. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். ஆபத்திம் ந ஜானாதி, அனாபத்திம் ந ஜானாதி, லஹுகம் ஆபத்திம் ந ஜானாதி, க³ருகம் ஆபத்திம் ந ஜானாதி, ஊனபஞ்சவஸ்ஸோ ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³’’ந்தி (மஹாவ. 103). ஏத்தா²பி புரிமனயேனேவ அயுத்தவஸேன ஆபத்திஅங்க³வஸேன ச படிக்கே²போ கதோதி த³ட்ட²ப்³ப³ம்.

பா³லானம் பன அப்³யத்தானம் தி³ஸம்க³மிகானம் அந்தேவாஸிகஸத்³தி⁴விஹாரிகானம் அனுஞ்ஞா ந தா³தப்³பா³. ஸசே தே³ந்தி, ஆசரியுபஜ்ஜா²யானம் து³க்கடம். தே சே அனனுஞ்ஞாதா க³ச்ச²ந்தி, தேஸம்பி து³க்கடம். வுத்தஞ்ஹேதம் –

‘‘இத⁴ பன, பி⁴க்க²வே, ஸம்ப³ஹுலா பி⁴க்கூ² பா³லா அப்³யத்தா தி³ஸம்க³மிகா ஆசரியுபஜ்ஜா²யே ஆபுச்ச²ந்தி. தே, பி⁴க்க²வே, ஆசரியுபஜ்ஜா²யேஹி புச்சி²தப்³பா³ ‘‘கஹம் க³மிஸ்ஸத², கேன ஸத்³தி⁴ம் க³மிஸ்ஸதா²’’தி. தே சே, பி⁴க்க²வே, பா³லா அப்³யத்தா அஞ்ஞே பா³லே அப்³யத்தே அபதி³ஸேய்யும். ந, பி⁴க்க²வே, ஆசரியுபஜ்ஜா²யேஹி அனுஜானிதப்³பா³, அனுஜானேய்யும் சே, ஆபத்தி து³க்கடஸ்ஸ. தே சே, பி⁴க்க²வே, பா³லா அப்³யத்தா அனனுஞ்ஞாதா ஆசரியுபஜ்ஜா²யேஹி க³ச்சே²ய்யும் சே, ஆபத்தி து³க்கடஸ்ஸா’’தி (மஹாவ. 163).

இதி பாளிமுத்தகவினயவினிச்ச²யஸங்க³ஹே

நிஸ்ஸயவினிச்ச²யகதா² ஸமத்தா.