21. பவாரணாவினிச்ச²யகதா²

116. படிக்கே²பபவாரணாதி பஞ்சன்னம் போ⁴ஜனானம் அஞ்ஞதரம் பு⁴ஞ்ஜமானேன யஸ்ஸ கஸ்ஸசி அபி⁴ஹடபோ⁴ஜனஸ்ஸ படிக்கே²பஸங்கா²தா பவாரணா. ஸா ச ந கேவலம் படிக்கே²பமத்தேன ஹோதி, அத² கோ² பஞ்சங்க³வஸேன. தத்ரிமானி பஞ்சங்கா³னி – அஸனம், போ⁴ஜனம், தா³யகஸ்ஸ ஹத்த²பாஸே டா²னம், அபி⁴ஹாரோ, அபி⁴ஹடஸ்ஸ படிக்கே²போதி. தத்த² அஸனந்தி விப்பகதபோ⁴ஜனம், பு⁴ஞ்ஜமானோ சேஸ புக்³க³லோ ஹோதீதி அத்தோ². போ⁴ஜனந்தி பவாரணப்பஹோனகம் போ⁴ஜனம், ஓத³னாதீ³னஞ்ச அஞ்ஞதரம் படிக்கி²பிதப்³ப³ம் போ⁴ஜனம் ஹோதீதி அத்தோ². தா³யகஸ்ஸ ஹத்த²பாஸே டா²னந்தி பவாரணப்பஹோனகம் போ⁴ஜனம் க³ண்ஹித்வா தா³யகஸ்ஸ அட்³ட⁴தேய்யஹத்த²ப்பமாணே ஓகாஸே அவட்டா²னம். அபி⁴ஹாரோதி ஹத்த²பாஸே டி²தஸ்ஸ தா³யகஸ்ஸ காயேன அபி⁴ஹாரோ. அபி⁴ஹடஸ்ஸ படிக்கே²போதி ஏவம் அபி⁴ஹடஸ்ஸ காயேன வா வாசாய வா படிக்கே²போ. இதி இமேஸம் பஞ்சன்னம் அங்கா³னம் வஸேன பவாரணா ஹோதி. வுத்தம்பி சேதம் –

‘‘பஞ்சஹி, உபாலி, ஆகாரேஹி பவாரணா பஞ்ஞாயதி, அஸனம் பஞ்ஞாயதி, போ⁴ஜனம் பஞ்ஞாயதி, ஹத்த²பாஸே டி²தோ, அபி⁴ஹரதி, படிக்கே²போ பஞ்ஞாயதீ’’தி (பரி. 428).

117. தத்ராயம் வினிச்ச²யோ (பாசி. அட்ட². 238-9) – ‘‘அஸன’’ந்திஆதீ³ஸு தாவ யம் அஸ்னாதி, யஞ்ச போ⁴ஜனம் ஹத்த²பாஸே டி²தேன அபி⁴ஹடம் படிக்கி²பதி, தம் ஓத³னோ கும்மாஸோ ஸத்து மச்சோ² மம்ஸந்தி இமேஸம் அஞ்ஞதரமேவ வேதி³தப்³ப³ம். தத்த² ஓத³னோ நாம ஸாலி வீஹி யவோ கோ³து⁴மோ கங்கு³ வரகோ குத்³ரூஸகோதி ஸத்தன்னம் த⁴ஞ்ஞானம் தண்டு³லேஹி நிப்³ப³த்தோ. தத்ர ஸாலீதி அந்தமஸோ நீவாரம் உபாதா³ய ஸப்³பா³பி ஸாலிஜாதி. வீஹீதி ஸப்³பா³பி வீஹிஜாதி. யவகோ³து⁴மேஸு பே⁴தோ³ நத்தி². கங்கூ³தி ஸேதரத்தகாளபே⁴தா³ ஸப்³பா³பி கங்கு³ஜாதி. வரகோதி அந்தமஸோ வரகசோரகம் உபாதா³ய ஸப்³பா³பி ஸேதவண்ணா வரகஜாதி. குத்³ரூஸகோதி காளகுத்³ரூஸகோ சேவ ஸாமாகாதி³பே⁴தா³ ச ஸப்³பா³பி திணத⁴ஞ்ஞஜாதி. நீவாரவரகசோரகா சேத்த² த⁴ஞ்ஞானுலோமாதி வத³ந்தி, த⁴ஞ்ஞானி ஹோந்து த⁴ஞ்ஞானுலோமானி வா, ஏதேஸம் வுத்தப்பபே⁴தா³னம் ஸத்தன்னம் த⁴ஞ்ஞானம் தண்டு³லே க³ஹேத்வா ‘‘ப⁴த்தம் பசிஸ்ஸாமா’’தி வா ‘‘யாகு³ம் பசிஸ்ஸாமா’’தி வா ‘‘அம்பி³லபாயாஸாதீ³ஸு அஞ்ஞதரம் பசிஸ்ஸாமா’’தி வா யம் கிஞ்சி ஸந்தா⁴ய பசந்து, ஸசே உண்ஹம் ஸீதலம் வா பு⁴ஞ்ஜந்தானம் போ⁴ஜனகாலே க³ஹிதக³ஹிதட்டா²னே ஓதி⁴ பஞ்ஞாயதி, ஓத³னஸங்க³ஹமேவ க³ச்ச²தி, பவாரணம் ஜனேதி. ஸசே ஓதி⁴ ந பஞ்ஞாயதி, யாகு³ஸங்க³ஹம் க³ச்ச²தி, பவாரணம் ந ஜனேதி.

யோபி பாயாஸோ வா பண்ணப²லகளீரமிஸ்ஸகா அம்பி³லயாகு³ வா உத்³த⁴னதோ ஓதாரிதமத்தா அப்³பு⁴ண்ஹா ஹோதி ஆவஜ்ஜித்வா பிவிதும் ஸக்கா, ஹத்தே²ன க³ஹிதோகாஸேபி ஓதி⁴ம் ந த³ஸ்ஸேதி, பவாரணம் ந ஜனேதி. ஸசே பன உஸுமாய விக³தாய ஸீதலபூ⁴தா க⁴னபா⁴வம் க³ச்ச²தி, ஓதி⁴ம் த³ஸ்ஸேதி, புன பவாரணம் ஜனேதி, புப்³பே³ தனுபா⁴வோ ந ரக்க²தி. ஸசேபி த³தி⁴தக்காதீ³னி ஆரோபேத்வா ப³ஹூ பண்ணப²லகளீரே பக்கி²பித்வா முட்டி²மத்தாபி தண்டு³லா பக்கி²த்தா ஹோந்தி, போ⁴ஜனகாலே சே ஓதி⁴ பஞ்ஞாயதி, பவாரணம் ஜனேதி. அயாகு³கே நிமந்தனே ‘‘யாகு³ம் த³ஸ்ஸாமா’’தி ப⁴த்தே உத³ககஞ்ஜிககீ²ராதீ³னி ஆகிரித்வா ‘‘யாகு³ம் க³ண்ஹதா²’’தி தே³ந்தி. கிஞ்சாபி தனுகோ ஹோதி, பவாரணம் ஜனேதியேவ. ஸசே பன பக்குதி²தேஸு உத³காதீ³ஸு பக்கி²பித்வா பசித்வா தே³ந்தி, யாகு³ஸங்க³ஹமேவ க³ச்ச²தி. யாகு³ஸங்க³ஹம் க³தேபி தஸ்மிம் வா அஞ்ஞஸ்மிம் வா யத்த² மச்ச²மம்ஸம் பக்கி²பந்தி, ஸசே ஸாஸபமத்தம்பி மச்ச²மம்ஸக²ண்ட³ம் வா ந்ஹாரு வா பஞ்ஞாயதி, பவாரணம் ஜனேதி, ஸுத்³த⁴ரஸகோ பன ரஸகயாகு³ வா ந ஜனேதி. ட²பேத்வா வுத்தத⁴ஞ்ஞதண்டு³லே அஞ்ஞேஹி வேணுதண்டு³லாதீ³ஹி வா கண்ட³மூலப²லேஹி வா யேஹி கேஹிசி கதம் ப⁴த்தம்பி பவாரணம் ந ஜனேதி, பகே³வ க⁴னயாகு³. ஸசே பனேத்த² மச்ச²மம்ஸம் பக்கி²பந்தி, ஜனேதி. மஹாபச்சரியம் ‘‘புப்பி²அத்தா²ய ப⁴த்தம்பி பவாரணம் ஜனேதீ’’தி வுத்தம். புப்பி²அத்தா²ய ப⁴த்தம் நாம புப்பி²க²ஜ்ஜகத்தா²ய குதி²துத³கே பக்கி²பித்வா ஸேதி³ததண்டு³லா வுச்சந்தி. ஸசே பன தே தண்டு³லே ஸுக்கா²பேத்வா கா²த³ந்தி, வட்டதி, நேவ ஸத்துஸங்க்²யம், ந ப⁴த்தஸங்க்²யம் க³ச்ச²ந்தி. புன தேஹி கதப⁴த்தம் பவாரேதியேவ. தே தண்டு³லே ஸப்பிதேலாதீ³ஸு வா பசந்தி, பூவம் வா கரோந்தி, ந பவாரேந்தி. புது²கா வா தாஹி கதஸத்துப⁴த்தாதீ³னி வா ந பவாரேந்தி.

கும்மாஸோ நாம யவேஹி கதகும்மாஸோ. அஞ்ஞேஹி பன முக்³கா³தீ³ஹி கதகும்மாஸோ பவாரணம் ந ஜனேதி.

ஸத்து நாம ஸாலிவீஹியவேஹி கதஸத்து. கங்கு³வரககுத்³ரூஸகஸீஸானிபி ப⁴ஜ்ஜித்வா ஈஸகம் கோட்டேத்வா து²ஸே பலாபேத்வா புன த³ள்ஹம் கோட்டேத்வா சுண்ணம் கரோந்தி. ஸசேபி தம் அல்லத்தா ஏகப³த்³த⁴ம் ஹோதி, ஸத்துஸங்க³ஹமேவ க³ச்ச²தி. க²ரபாகப⁴ஜ்ஜிதானம் வீஹீனம் தண்டு³லே கோட்டேத்வா தே³ந்தி, தம்பி சுண்ணம் ஸத்துஸங்க³ஹமேவ க³ச்ச²தி. ஸமபாகப⁴ஜ்ஜிதானம் பன வீஹீனம் வா வீஹிபலாஸானம் வா தண்டு³லா ப⁴ஜ்ஜிததண்டு³லா ஏவ வா ந பவாரேந்தி. தேஸம் பன தண்டு³லானம் சுண்ணம் பவாரேதி, க²ரபாகப⁴ஜ்ஜிதானம் வீஹீனம் குண்ட³கம்பி பவாரேதி. ஸமபாகப⁴ஜ்ஜிதானம் பன ஆதபஸுக்கா²னம் வா குண்ட³கம் ந பவாரேதி. லாஜா வா தேஹி கதப⁴த்தஸத்துஆதீ³னி வா ந பவாரேந்தி, ப⁴ஜ்ஜிதபிட்ட²ம் வா யம் கிஞ்சி ஸுத்³த⁴க²ஜ்ஜகம் வா ந பவாரேதி. மச்ச²மம்ஸபூரிதக²ஜ்ஜகம் பன ஸத்துமோத³கோ வா பவாரேதி. மச்சோ² மம்ஸஞ்ச பாகடமேவ.

அயம் பன விஸேஸோ – ஸசே யாகு³ம் பிவந்தஸ்ஸ யாகு³ஸித்த²மத்தானேவ த்³வே மச்ச²க²ண்டா³னி வா மம்ஸக²ண்டா³னி வா ஏகபா⁴ஜனே வா நானாபா⁴ஜனே வா தே³ந்தி, தானி சே அகா²த³ந்தோ அஞ்ஞம் யம் கிஞ்சி பவாரணப்பஹோனகம் படிக்கி²பதி, ந பவாரேதி. ததோ ஏகம் கா²தி³தம், ஏகம் ஹத்தே² வா பத்தே வா ஹோதி, ஸோ சே அஞ்ஞம் படிக்கி²பதி, பவாரேதி. த்³வேபி கா²தி³தானி ஹோந்தி, முகே² ஸாஸபமத்தம்பி அவஸிட்ட²ம் நத்தி², ஸசேபி அஞ்ஞம் படிக்கி²பதி, ந பவாரேதி. கப்பியமம்ஸம் கா²த³ந்தோ கப்பியமம்ஸம் படிக்கி²பதி, பவாரேதி. கப்பியமம்ஸம் கா²த³ந்தோ அகப்பியமம்ஸம் படிக்கி²பதி, ந பவாரேதி. கஸ்மா? அவத்து²தாய. யஞ்ஹி பி⁴க்கு²னோ கா²தி³தும் வட்டதி, தம்யேவ படிக்கி²பதோ பவாரணா ஹோதி. இத³ம் பன ஜானந்தோ அகப்பியத்தா படிக்கி²பதி, அஜானந்தோபி படிக்கி²பிதப்³ப³ட்டா²னே டி²தமேவ படிக்கி²பதி நாம, தஸ்மா ந பவாரேதி. ஸசே பன அகப்பியமம்ஸம் கா²த³ந்தோ கப்பியமம்ஸம் படிக்கி²பதி, பவாரேதி. கஸ்மா? வத்து²தாய. யஞ்ஹி தேன படிக்கி²த்தம், தம் பவாரணாய வத்து², யம் பன கா²த³தி, தம் கிஞ்சாபி படிக்கி²பிதப்³ப³ட்டா²னே டி²தம், கா²தி³யமானம் பன மம்ஸபா⁴வம் ந ஜஹதி, தஸ்மா பவாரேதி. அகப்பியமம்ஸம் வா கா²த³ந்தோ அகப்பியமம்ஸம் படிக்கி²பதி, புரிமனயேனேவ ந பவாரேதி. கப்பியமம்ஸம் வா அகப்பியமம்ஸம் வா கா²த³ந்தோ பஞ்சன்னம் போ⁴ஜனானம் யம் கிஞ்சி கப்பியபோ⁴ஜனம் படிக்கி²பதி, பவாரேதி. குலதூ³ஸகவேஜ்ஜகம்மஉத்தரிமனுஸ்ஸத⁴ம்மாரோசனஸாதி³தரூபியாதீ³ஹி நிப்³ப³த்தம் பு³த்³த⁴படிகுட்ட²ம் அனேஸனாய உப்பன்னம் அகப்பியபோ⁴ஜனம் படிக்கி²பதி, ந பவாரேதி. கப்பியபோ⁴ஜனம் வா அகப்பியபோ⁴ஜனம் படிக்கி²பதி, ந பவாரேதி. கப்பியபோ⁴ஜனம் வா அகப்பியபோ⁴ஜனம் வா பு⁴ஞ்ஜந்தோபி கப்பியபோ⁴ஜனம் படிக்கி²பதி, பவாரேதி. அகப்பியபோ⁴ஜனம் படிக்கி²பதி, ந பவாரேதீதி ஸப்³ப³த்த² வுத்தனயேனேவ காரணம் வேதி³தப்³ப³ம்.

118. ஏவம் ‘‘அஸன’’ந்திஆதீ³ஸு யஞ்ச அஸ்னாதி, யஞ்ச போ⁴ஜனம் ஹத்த²பாஸே டி²தேன அபி⁴ஹடம் படிக்கி²பந்தோ பவாரணம் ஆபஜ்ஜதி, தம் உத்வா இதா³னி யதா² ஆபஜ்ஜதி, தஸ்ஸ ஜானனத்த²ம் அயம் வினிச்ச²யோ – அஸனம் போ⁴ஜனந்தி ஏத்த² தாவ யேன ஏகஸித்த²ம்பி அஜ்ஜோ²ஹடம் ஹோதி ஸோ ஸசே பத்தமுக²ஹத்தா²னம் யத்த² கத்த²சி பஞ்சஸு போ⁴ஜனேஸு ஏகஸ்மிம்பி ஸதி அஞ்ஞம் பஞ்சஸு போ⁴ஜனேஸு ஏகம்பி படிக்கி²பதி, பவாரேதி. கத்த²சி போ⁴ஜனம் நத்தி², ஆமிஸக³ந்த⁴மத்தம் பஞ்ஞாயதி, ந பவாரேதி. முகே² ச ஹத்தே² ச போ⁴ஜனம் நத்தி², பத்தே அத்தி², தஸ்மிம் பன ஆஸனே அபு⁴ஞ்ஜிதுகாமோ, விஹாரம் வா பவிஸித்வா பு⁴ஞ்ஜிதுகாமோ, அஞ்ஞஸ்ஸ வா தா³துகாமோ தஸ்மிம் சே அந்தரே போ⁴ஜனம் படிக்கி²பதி, ந பவாரேதி. கஸ்மா? விப்பகதபோ⁴ஜனபா⁴வஸ்ஸ உபச்சி²ன்னத்தா. ‘‘யோபி அஞ்ஞத்ர க³ந்த்வா பு⁴ஞ்ஜிதுகாமோ முகே² ப⁴த்தம் கி³லித்வா ஸேஸம் ஆதா³ய க³ச்ச²ந்தோ அந்தராமக்³கே³ அஞ்ஞம் போ⁴ஜனம் படிக்கி²பதி, தஸ்ஸபி பவாரணா ந ஹோதீ’’தி மஹாபச்சரியம் வுத்தம். யதா² ச பத்தே, ஏவம் ஹத்தே²பி. முகே²பி வா விஜ்ஜமானம் போ⁴ஜனம் ஸசே அனஜ்ஜோ²ஹரிதுகாமோ ஹோதி, தஸ்மிஞ்ச க²ணே அஞ்ஞம் படிக்கி²பதி, ந பவாரேதி. ஏகஸ்மிஞ்ஹி பதே³ வுத்தம் லக்க²ணம் ஸப்³ப³த்த² வேதி³தப்³ப³ம் ஹோதி. அபிச குருந்தி³யம் ஏஸ நயோ த³ஸ்ஸிதோயேவ. வுத்தஞ்ஹி தத்த² ‘‘முகே² ப⁴த்தம் கி³லிதம், ஹத்தே² ப⁴த்தம் விகா⁴ஸாத³ஸ்ஸ தா³துகாமோ, பத்தே ப⁴த்தம் பி⁴க்கு²ஸ்ஸ தா³துகாமோ, ஸசே தஸ்மிம் க²ணே படிக்கி²பதி, ந பவாரேதீ’’தி.

ஹத்த²பாஸே டி²தோதி ஏத்த² பன ஸசே பி⁴க்கு² நிஸின்னோ ஹோதி, ஆஸனஸ்ஸ பச்சி²மந்ததோ பட்டா²ய, ஸசே டி²தோ, பண்ஹிஅந்ததோ பட்டா²ய, ஸசே நிபன்னோ, யேன பஸ்ஸேன நிபன்னோ, தஸ்ஸ பாரிமந்ததோ பட்டா²ய, தா³யகஸ்ஸ நிஸின்னஸ்ஸ வா டி²தஸ்ஸ வா நிபன்னஸ்ஸ வா ட²பேத்வா பஸாரிதஹத்த²ம் யம் ஆஸன்னதரம் அங்க³ம், தஸ்ஸ ஓரிமந்தேன பரிச்சி²ந்தி³த்வா அட்³ட⁴தேய்யஹத்தோ² ‘‘ஹத்த²பாஸோ’’தி வேதி³தப்³போ³. தஸ்மிம் ட²த்வா அபி⁴ஹடம் படிக்கி²பந்தஸ்ஸேவ பவாரணா ஹோதி, ந ததோ பரம்.

அபி⁴ஹரதீதி ஹத்த²பாஸப்³ப⁴ந்தரே டி²தோ க³ஹணத்த²ம் உபனாமேதி. ஸசே பன அனந்தரனிஸின்னோபி பி⁴க்கு² ஹத்தே² வா ஊரூஸு வா ஆதா⁴ரகே வா டி²தம் பத்தம் அனபி⁴ஹரித்வா ‘‘ப⁴த்தம் க³ண்ஹாஹீ’’தி வத³தி, தம் படிக்கி²பதோ பவாரணா நத்தி². ப⁴த்தபச்சி²ம் ஆனேத்வா புரதோ பூ⁴மியம் ட²பேத்வா ‘‘க³ண்ஹாஹீ’’தி வுத்தேபி ஏஸேவ நயோ. ஈஸகம் பன உத்³த⁴ரித்வா வா அபனாமேத்வா வா ‘‘க³ண்ஹதா²’’தி வுத்தே படிக்கி²பதோ பவாரணா ஹோதி. தே²ராஸனே நிஸின்னோ தே²ரோ தூ³ரே நிஸின்னஸ்ஸ த³ஹரபி⁴க்கு²ஸ்ஸ பத்தம் பேஸேத்வா ‘‘இதோ ஓத³னம் க³ண்ஹாஹீ’’தி வத³தி, க³ண்ஹித்வா பன க³தோ துண்ஹீ திட்ட²தி, த³ஹரோ ‘‘அலம் மய்ஹ’’ந்தி படிக்கி²பதி, ந பவாரேதி. கஸ்மா? தே²ரஸ்ஸ தூ³ரபா⁴வதோ தூ³தஸ்ஸ ச அனபி⁴ஹரணதோ. ஸசே பன க³ஹேத்வா ஆக³தோ பி⁴க்கு² ‘‘இத³ம் ப⁴த்தம் க³ண்ஹா’’தி வத³தி, தம் படிக்கி²பதோ பவாரணா ஹோதி. பரிவேஸனாயஏகோ ஏகேன ஹத்தே²ன ஓத³னபச்சி²ம், ஏகேன கடச்சு²ம் க³ஹேத்வா பி⁴க்கு²ம் பரிவிஸதி, தத்ர சே அஞ்ஞோ ஆக³ந்த்வா ‘‘அஹம் பச்சி²ம் தா⁴ரேஸ்ஸாமி, த்வம் ஓத³னம் தே³ஹீ’’தி வத்வா க³ஹிதமத்தமேவ கரோதி, பரிவேஸகோ ஏவ பன தம் தா⁴ரேதி, தஸ்மா ஸா அபி⁴ஹடாவ ஹோதி, ததோ தா³துகாமதாய க³ண்ஹந்தம் படிக்கி²பந்தஸ்ஸ பவாரணா ஹோதி. ஸசே பன பரிவேஸகேன பு²ட்ட²மத்தாவ ஹோதி, இதரோவ நம் தா⁴ரேதி, ததோ தா³துகாமதாய க³ண்ஹந்தம் படிக்கி²பந்தஸ்ஸ பவாரணா ந ஹோதி, கடச்சு²னா உத்³த⁴டப⁴த்தே பன ஹோதி. கடச்சு²னா அபி⁴ஹாரோயேவ ஹி தஸ்ஸ அபி⁴ஹாரோ. ‘‘த்³வின்னம் ஸமபா⁴ரேபி படிக்கி²பந்தோ பவாரேதியேவா’’தி மஹாபச்சரியம் வுத்தம். அனந்தரஸ்ஸ பி⁴க்கு²னோ ப⁴த்தே தீ³யமானே இதரோ பத்தம் ஹத்தே²ன பித³ஹதி, பவாரணா நத்தி². கஸ்மா? அஞ்ஞஸ்ஸ அபி⁴ஹடே படிக்கி²த்தத்தா.

படிக்கே²போ பஞ்ஞாயதீதி ஏத்த² வாசாய அபி⁴ஹடம் படிக்கி²பதோ பவாரணா நத்தி², காயேன அபி⁴ஹடம் பன யேன கேனசி ஆகாரேன காயேன வா வாசாய வா படிக்கி²பந்தஸ்ஸ பவாரணா ஹோதீதி வேதி³தப்³போ³. தத்ர காயேன படிக்கே²போ நாம அங்கு³லிம் வா ஹத்த²ம் வா மக்கி²காபீ³ஜனிம் வா சீவரகண்ணம் வா சாலேதி, ப⁴முகாய வா ஆகாரம் கரோதி, குத்³தோ⁴ வா ஓலோகேதி. வாசாய படிக்கே²போ நாம ‘‘அல’’ந்தி வா ‘‘ந க³ண்ஹாமீ’’தி வா ‘‘மா ஆகிரா’’தி வா ‘‘அபக³ச்சா²’’தி வா வத³தி. ஏவம் யேன கேனசி ஆகாரேன காயேன வா வாசாய வா படிக்கி²த்தே பவாரணா ஹோதி.

119. ஏகோ அபி⁴ஹடே ப⁴த்தே பவாரணாய பீ⁴தோ ஹத்தே² அபனேத்வா புனப்புனம் பத்தே ஓத³னம் ஆகிரந்தம் ‘‘ஆகிர ஆகிர, கோட்டேத்வா கோட்டேத்வா பூரேஹீ’’தி வத³தி, ஏத்த² கத²ந்தி? மஹாஸுமத்தே²ரோ தாவ ‘‘அனாகிரணத்தா²ய வுத்தத்தா பவாரணா ஹோதீ’’தி ஆஹ. மஹாபது³மத்தே²ரோ பன ‘‘ஆகிர பூரேஹீதி வத³ந்தஸ்ஸ நாம கஸ்ஸசி பவாரணா அத்தீ²’’தி வத்வா ‘‘ந பவாரேதீ’’தி ஆஹ.

அபரோ ப⁴த்தம் அபி⁴ஹரந்தம் பி⁴க்கு²ம் ஸல்லக்கே²த்வா ‘‘கிம், ஆவுஸோ, இதோபி கிஞ்சி க³ண்ஹிஸ்ஸஸி, த³ம்மி தே கிஞ்சீ’’தி ஆஹ, தத்ராபி ‘‘ஏவம் நாக³மிஸ்ஸதீதி வுத்தத்தா பவாரணா ஹோதீ’’தி மஹாஸுமத்தே²ரோ ஆஹ. மஹாபது³மத்தே²ரோ பன ‘‘க³ண்ஹிஸ்ஸஸீதி வத³ந்தஸ்ஸ நாம கஸ்ஸசி பவாரணா அத்தீ²’’தி வத்வா ‘‘ந பவாரேதீ’’தி ஆஹ.

ஏகோ ஸமம்ஸகம் ரஸம் அபி⁴ஹரித்வா ‘‘ரஸம் க³ண்ஹதா²’’தி வத³தி, தம் ஸுத்வா படிக்கி²பதோ பவாரணா நத்தி². ‘‘மச்ச²மம்ஸரஸ’’ந்தி வுத்தே படிக்கி²பதோ பவாரணா ஹோதி, ‘‘இத³ம் க³ண்ஹதா²’’தி வுத்தேபி ஹோதியேவ. மம்ஸம் விஸும் கத்வா ‘‘மம்ஸரஸம் க³ண்ஹதா²’’தி வத³தி, ‘‘தத்த² சே ஸாஸபமத்தம்பி மம்ஸக²ண்ட³ம் அத்தி², தம் படிக்கி²பதோ பவாரணா ஹோதி. ஸசே பன பரிஸ்ஸாவிதோ ஹோதி, வட்டதீ’’தி அப⁴யத்தே²ரோ ஆஹ.

மம்ஸரஸேன ஆபுச்ச²ந்தம் மஹாதே²ரோ ‘‘முஹுத்தம் ஆக³மேஹீ’’தி வத்வா ‘‘தா²லகம், ஆவுஸோ, ஆஹரா’’தி ஆஹ, ஏத்த² கத²ந்தி? மஹாஸுமத்தே²ரோ தாவ ‘‘அபி⁴ஹாரகஸ்ஸ க³மனம் உபச்சி²ன்னம், தஸ்மா பவாரேதீ’’தி ஆஹ. மஹாபது³மத்தே²ரோ பன ‘‘அயம் குஹிம் க³ச்ச²தி, கீதி³ஸம் ஏதஸ்ஸ க³மனம், க³ண்ஹந்தஸ்ஸபி நாம கஸ்ஸசி பவாரணா அத்தீ²’’தி வத்வா ‘‘ந பவாரேதீ’’தி ஆஹ.

களீரபனஸாதீ³ஹி மிஸ்ஸேத்வா மம்ஸம் பசந்தி, தம் க³ஹேத்வா ‘‘களீரஸூபம் க³ண்ஹத², பனஸப்³யஞ்ஜனம் க³ண்ஹதா²’’தி வத³ந்தி, ஏவம்பி ந பவாரேதி. கஸ்மா? அபவாரணாரஹஸ்ஸ நாமேன வுத்தத்தா. ஸசே பன ‘‘மச்ச²ஸூபம் மம்ஸஸூப’’ந்தி வா ‘‘இத³ம் க³ண்ஹதா²’’தி வா வத³ந்தி, பவாரேதி, மம்ஸகரம்ப³கோ நாம ஹோதி. தம் தா³துகாமோபி ‘‘கரம்ப³கம் க³ண்ஹதா²’’தி வத³தி, வட்டதி, ந பவாரேதி, ‘‘மம்ஸகரம்ப³க’’ந்தி வா ‘‘இத³’’ந்தி வா வுத்தே பன பவாரேதி. ஏஸ நயோ ஸப்³பே³ஸு மச்ச²மம்ஸமிஸ்ஸகேஸு.

120. ‘‘யோ பன நிமந்தனே பு⁴ஞ்ஜமானோ மம்ஸம் அபி⁴ஹடம் ‘உத்³தி³ஸ்ஸகத’ந்தி மஞ்ஞமானோ படிக்கி²பதி, பவாரிதோவ ஹோதீ’’தி மஹாபச்சரியம் வுத்தம். மிஸ்ஸககதா² பன குருந்தி³யம் ஸுட்டு² வுத்தா. ஏவஞ்ஹி தத்த² வுத்தம் – பிண்ட³சாரிகோ பி⁴க்கு² ப⁴த்தமிஸ்ஸகம் யாகு³ம் ஆஹரித்வா ‘‘யாகு³ம் க³ண்ஹதா²’’தி வத³தி, ந பவாரேதி, ‘‘ப⁴த்தம் க³ண்ஹதா²’’தி வுத்தே பவாரேதி. கஸ்மா? யேனாபுச்சி²தோ, தஸ்ஸ அத்தி²தாய. அயமேத்த² அதி⁴ப்பாயோ – ‘‘யாகு³மிஸ்ஸகம் க³ண்ஹதா²’’தி வத³தி, தத்ர சே யாகு³ ப³ஹுதரா வா ஹோதி ஸமஸமா வா, ந பவாரேதி. யாகு³ மந்தா³, ப⁴த்தம் ப³ஹுதரம், பவாரேதி. இத³ஞ்ச ஸப்³ப³அட்ட²கதா²ஸு வுத்தத்தா ந ஸக்கா படிக்கி²பிதும், காரணம் பனேத்த² து³த்³த³ஸம். ‘‘ப⁴த்தமிஸ்ஸகம் க³ண்ஹதா²’’தி வத³தி, ப⁴த்தம் ப³ஹுதரம் வா ஸமம் வா அப்பதரம் வா ஹோதி, பவாரேதியேவ. ப⁴த்தம் வா யாகு³ம் வா அனாமஸித்வா ‘‘மிஸ்ஸகம் க³ண்ஹதா²’’தி வத³தி, தத்ர சே ப⁴த்தம் ப³ஹுதரம் வா ஸமகம் வா ஹோதி, பவாரேதி, அப்பதரம் ந பவாரேதி, இத³ஞ்ச கரம்ப³கேன ந ஸமானேதப்³ப³ம். கரம்ப³கோ ஹி மம்ஸமிஸ்ஸகோபி ஹோதி அமம்ஸமிஸ்ஸகோபி, தஸ்மா கரம்ப³கந்தி வுத்தே பவாரணா நத்தி², இத³ம் பன ப⁴த்தமிஸ்ஸகமேவ. ஏத்த² வுத்தனயேனேவ பவாரணா ஹோதி. ப³ஹுரஸே ப⁴த்தே ரஸம், ப³ஹுகீ²ரே கீ²ரம், ப³ஹுஸப்பிம்ஹி ச பாயாஸே ஸப்பிம் க³ண்ஹதா²தி விஸும் கத்வா தே³தி, தம் படிக்கி²பதோ பவாரணா நத்தி².

யோ பன க³ச்ச²ந்தோ பவாரேதி, ஸோ க³ச்ச²ந்தோவ பு⁴ஞ்ஜிதும் லப⁴தி. கத்³த³மம் வா உத³கம் வா பத்வா டி²தேன அதிரித்தம் காரேதப்³ப³ம். ஸசே அந்தரா நதீ³ பூரா ஹோதி, நதீ³தீரே கு³ம்ப³ம் அனுபரியாயந்தேன பு⁴ஞ்ஜிதப்³ப³ம். அத² நாவா வா ஸேது வா அத்தி², தம் அபி⁴ருஹித்வாபி சங்கமந்தேனேவ பு⁴ஞ்ஜிதப்³ப³ம், க³மனம் ந உபச்சி²ந்தி³தப்³ப³ம். யானே வா ஹத்தி²அஸ்ஸபிட்டே² வா சந்த³மண்ட³லே வா ஸூரியமண்ட³லே வா நிஸீதி³த்வா பவாரிதேன யாவ மஜ்ஜ²ன்ஹிகம், தாவ தேஸு க³ச்ச²ந்தேஸுபி நிஸின்னேனேவ பு⁴ஞ்ஜிதப்³ப³ம். யோ டி²தோ பவாரேதி, டி²தேனேவ, யோ நிஸின்னோ பவாரேதி, நிஸின்னேனேவ பரிபு⁴ஞ்ஜிதப்³ப³ம், தம் தம் இரியாபத²ம் விகோபேந்தேன அதிரித்தம் காரேதப்³ப³ம். யோ உக்குடிகோ நிஸீதி³த்வா பவாரேதி, தேன உக்குடிகேனேவ பு⁴ஞ்ஜிதப்³ப³ம். தஸ்ஸ பன ஹேட்டா² பலாலபீட²ம் வா கிஞ்சி வா நிஸீத³னகம் தா³தப்³ப³ம். பீட²கே நிஸீதி³த்வா பவாரிதேன ஆஸனம் அசாலேத்வாவ சதஸ்ஸோ தி³ஸா பரிவத்தந்தேன பு⁴ஞ்ஜிதும் லப்³ப⁴தி. மஞ்சே நிஸீதி³த்வா பவாரிதேன இதோ வா ஏத்தோ வா ஸஞ்சரிதும் ந லப்³ப⁴தி. ஸசே பன நம் ஸஹ மஞ்சேன உக்கி²பித்வா அஞ்ஞத்ர நேந்தி, வட்டதி. நிபஜ்ஜித்வா பவாரிதேன நிபன்னேனேவ பரிபு⁴ஞ்ஜிதப்³ப³ம். பரிவத்தந்தேன யேன பஸ்ஸேன நிபன்னோ, தஸ்ஸ டா²னம் நாதிக்கமேதப்³ப³ம்.

121. பவாரிதேன பன கிம்காதப்³ப³ந்தி? யேன இரியாபதே²ன பவாரிதோ ஹோதி, தம் விகோபேத்வா அஞ்ஞேன இரியாபதே²ன சே பு⁴ஞ்ஜதி, அதிரித்தம் காராபேத்வா பு⁴ஞ்ஜிதப்³ப³ம். அனதிரித்தம் பன யம் கிஞ்சி யாவகாலிகஸங்க³ஹிதம் கா²த³னீயம் வா போ⁴ஜனீயம் வா கா²த³தி வா பு⁴ஞ்ஜதி வா, அஜ்ஜோ²ஹாரே அஜ்ஜோ²ஹாரே பாசித்தியம்.

தத்த² அனதிரித்தம் நாம நாதிரித்தம், ந அதி⁴கந்தி அத்தோ². தம் பன யஸ்மா கப்பியகதாதீ³ஹி ஸத்தஹி வினயகம்மாகாரேஹி அகதம் வா கி³லானஸ்ஸ அனதி⁴கம் வா ஹோதி, தஸ்மா பத³பா⁴ஜனே வுத்தம் –

‘‘அனதிரித்தம் நாம அகப்பியகதம் ஹோதி, அப்படிக்³க³ஹிதகதம் ஹோதி, அனுச்சாரிதகதம் ஹோதி, அஹத்த²பாஸே கதம் ஹோதி, அபு⁴த்தாவினா கதம் ஹோதி, பு⁴த்தாவினா ச பவாரிதேன ஆஸனா வுட்டி²தேன கதம் ஹோதி, ‘அலமேதம் ஸப்³ப³’ந்தி அவுத்தம் ஹோதி, ந கி³லானாதிரித்தம் ஹோதி, ஏதம் அனதிரித்தம் நாமா’’தி (பாசி. 239).

தத்த² அகப்பியகதந்தி யம் தத்த² ப²லம் வா கந்த³மூலாதி³ம் வா பஞ்சஹி ஸமணகப்பேஹி கப்பியம் அகதம், யஞ்ச அகப்பியமம்ஸம் வா அகப்பியபோ⁴ஜனம் வா, ஏதம் அகப்பியம் நாம. தம் அகப்பியம் ‘‘அலமேதம் ஸப்³ப³’’ந்தி ஏவம் அதிரித்தம் கதம்பி ‘‘அகப்பியகத’’ந்தி வேதி³தப்³ப³ம். அப்படிக்³க³ஹிதகதந்தி பி⁴க்கு²னா அப்படிக்³க³ஹிதம்யேவ புரிமனயேன அதிரித்தம் கதம். அனுச்சாரிதகதந்தி கப்பியம் காரேதும் ஆக³தேன பி⁴க்கு²னா ஈஸகம்பி அனுக்கி²த்தம் வா அனபனாமிதம் வா கதம். அஹத்த²பாஸே கதந்தி கப்பியம் காரேதும் ஆக³தஸ்ஸ ஹத்த²பாஸதோ ப³ஹி டி²தேன கதம். அபு⁴த்தாவினா கதந்தி யோ ‘‘அலமேதம் ஸப்³ப³’’ந்தி அதிரித்தம் கரோதி, தேன பவாரணப்பஹோனகபோ⁴ஜனம் அபு⁴த்தேன கதம். பு⁴த்தாவினா பவாரிதேன ஆஸனா வுட்டி²தேன கதந்தி இத³ம் உத்தானமேவ. ‘‘அலமேதம் ஸப்³ப³’’ந்தி அவுத்தந்தி வசீபே⁴த³ம் கத்வா ஏவம் அவுத்தம் ஹோதி. இதி இமேஹி ஸத்தஹி வினயகம்மாகாரேஹி யம் அதிரித்தம் கப்பியம் அகதம், யஞ்ச ந கி³லானாதிரித்தம், தது³ப⁴யம்பி ‘‘அனதிரித்த’’ந்தி வேதி³தப்³ப³ம்.

122. அதிரித்தம் பன தஸ்ஸேவ படிபக்க²னயேன வேதி³தப்³ப³ம். தேனேவ வுத்தம் பத³பா⁴ஜனே –

‘‘அதிரித்தம் நாம கப்பியகதம் ஹோதி, படிக்³க³ஹிதகதம் ஹோதி, உச்சாரிதகதம் ஹோதி, ஹத்த²பாஸே கதம் ஹோதி, பு⁴த்தாவினா கதம் ஹோதி, பு⁴த்தாவினா பவாரிதேன ஆஸனா அவுட்டி²தேன கதம் ஹோதி, ‘அலமேதம் ஸப்³ப³’ந்தி வுத்தம் ஹோதி, கி³லானாதிரித்தம் ஹோதி, ஏதம் அதிரித்தம் நாமா’’தி (பாசி. 239).

அபிசேத்த² பு⁴த்தாவினா கதம் ஹோதீதி அனந்தரனிஸின்னஸ்ஸ ஸபா⁴க³ஸ்ஸ பி⁴க்கு²னோ பத்ததோ ஏகம்பி ஸித்த²ம் வா மம்ஸஹீரம் வா கா²தி³த்வா கதம்பி ‘‘பு⁴த்தாவினாவ கதம் ஹோதீ’’தி வேதி³தப்³ப³ம். ஆஸனா அவுட்டி²தேனாதி ஏத்த² பன அஸம்மோஹத்த²ம் அயம் வினிச்ச²யோ – த்³வே பி⁴க்கூ² பாதோயேவ பு⁴ஞ்ஜமானா பவாரிதா ஹோந்தி, ஏகேன தத்தே²வ நிஸீதி³தப்³ப³ம், இதரேன நிச்சப⁴த்தம் வா ஸலாகப⁴த்தம் வா ஆனேத்வா உபட்³ட⁴ம் தஸ்ஸ பி⁴க்கு²னோ பத்தே ஆகிரித்வா ஹத்த²ம் தோ⁴வித்வா ஸேஸம் தேன பி⁴க்கு²னா கப்பியம் காராபேத்வா பு⁴ஞ்ஜிதப்³ப³ம். கஸ்மா? யஞ்ஹி தஸ்ஸ ஹத்தே² லக்³க³ம், தம் அகப்பியம் ஹோதி. ஸசே பன பட²மம் நிஸின்னோ பி⁴க்கு² ஸயமேவ தஸ்ஸ பத்ததோ ஹத்தே²ன க³ண்ஹாதி, ஹத்த²தோ⁴வனகிச்சம் நத்தி². ஸசே பன ஏவம் ‘கப்பியம் காரேத்வா பு⁴ஞ்ஜந்தஸ்ஸ புன கிஞ்சி ப்³யஞ்ஜனம் வா கா²த³னீயம் வா பத்தே ஆகிர’ந்தி யேன பட²மம் கப்பியம் கதம் ஹோதி, ஸோ புன காதும் ந லப⁴தி. யேன அகதம், தேன காதப்³ப³ம், யஞ்ச அகதம், தம் காதப்³ப³ம். யேன அகதந்தி அஞ்ஞேன பி⁴க்கு²னா யேன பட²மம் ந கதம், தேன காதப்³ப³ம். யஞ்ச அகதந்தி யேன பட²மம் கப்பியம் கதம், தேனபி யம் அகதம், தம் காதப்³ப³ம். பட²மபா⁴ஜனே பன காதும் ந லப்³ப⁴தி. தத்த² ஹி கரியமானே பட²மம் கதேன ஸத்³தி⁴ம் கதம் ஹோதி, தஸ்மா அஞ்ஞஸ்மிம் பா⁴ஜனே காதும் வட்டதீதி அதி⁴ப்பாயோ. ஏவம் கதம் பன தேன பி⁴க்கு²னா பட²மம் கதேன ஸத்³தி⁴ம் பு⁴ஞ்ஜிதும் வட்டதி.

கப்பியம் கரோந்தேன ச ந கேவலம் பத்தேயேவ, குண்டே³பி பச்சி²யம்பி யத்த² கத்த²சி புரதோ ட²பேத்வா ஓனாமிதபா⁴ஜனே காதப்³ப³ம். தம் ஸசே பி⁴க்கு²ஸதம் பவாரிதம் ஹோதி, ஸப்³பே³ஸம் பு⁴ஞ்ஜிதும் வட்டதி, அப்பவாரிதானம்பி வட்டதி. யேன பன கப்பியம் கதம், தஸ்ஸ ந வட்டதி. ஸசேபி பவாரேத்வா பிண்டா³ய பவிட்ட²ம் பி⁴க்கு²ம் பத்தம் க³ஹேத்வா அவஸ்ஸம் பு⁴ஞ்ஜனகே மங்க³லனிமந்தனே நிஸீதா³பேந்தி, அதிரித்தம் காராபேத்வாவ பு⁴ஞ்ஜிதப்³ப³ம். ஸசே தத்த² அஞ்ஞோ பி⁴க்கு² நத்தி², ஆஸனஸாலம் வா விஹாரம் வா பத்தம் பேஸேத்வா காரேதப்³ப³ம், கப்பியம் கரோந்தேன பன அனுபஸம்பன்னஸ்ஸ ஹத்தே² டி²தம் ந காதப்³ப³ம். ஸசே ஆஸனஸாலாயம் அப்³யத்தோ பி⁴க்கு² ஹோதி, ஸயம் க³ந்த்வா கப்பியம் காராபேத்வா ஆனேத்வா பு⁴ஞ்ஜிதப்³ப³ம்.

கி³லானாதிரித்தந்தி ஏத்த² ந கேவலம் யம் கி³லானஸ்ஸ பு⁴த்தாவஸேஸம் ஹோதி, தம் கி³லானாதிரித்தம், அத² கோ² யம் கிஞ்சி கி³லானம் உத்³தி³ஸ்ஸ ‘‘அஜ்ஜ வா யதா³ வா இச்ச²தி, ததா³ கா²தி³ஸ்ஸதீ’’தி ஆஹடம், தம் ஸப்³ப³ம் கி³லானாதிரித்தந்தி வேதி³தப்³ப³ம். யாமகாலிகம் பன ஸத்தாஹகாலிகம் யாவஜீவிகம் வா யம் கிஞ்சி அனதிரித்தம் ஆஹாரத்தா²ய பரிபு⁴ஞ்ஜந்தஸ்ஸ அஜ்ஜோ²ஹாரே அஜ்ஜோ²ஹாரே து³க்கடம். ஸசே பன யாமகாலிகாதீ³னி ஆமிஸஸம்ஸட்டா²னி ஹோந்தி, ஆஹாரத்தா²யபி அனாஹாரத்தா²யபி படிக்³க³ஹேத்வா அஜ்ஜோ²ஹரந்தஸ்ஸ பாசித்தியமேவ, அஸம்ஸட்டா²னி பன ஸதி பச்சயே பு⁴ஞ்ஜந்தஸ்ஸ அனாபத்தி.

இதி பாளிமுத்தகவினயவினிச்ச²யஸங்க³ஹே

பவாரணாவினிச்ச²யகதா² ஸமத்தா.