19. கப்பியபூ⁴மிவினிச்ச²யகதா²

101. கப்பியாசதுபூ⁴மியோதி ஏத்த² ‘‘அனுஜானாமி, பி⁴க்க²வே, சதஸ்ஸோ கப்பியபூ⁴மியோ உஸ்ஸாவனந்திகம் கோ³னிஸாதி³கம் க³ஹபதிம் ஸம்முதி’’ந்தி (மஹாவ. 295) வசனதோ உஸ்ஸாவனந்திகா கோ³னிஸாதி³கா க³ஹபதி ஸம்முதீதி இமா சதஸ்ஸோ கப்பியபூ⁴மியோ வேதி³தப்³பா³. தத்த² (மஹாவ. அட்ட². 295) உஸ்ஸாவனந்திகா தாவ ஏவம் காதப்³பா³ – யோ த²ம்பா⁴னம் வா உபரி பி⁴த்திபாதே³ வா நிக²னித்வா விஹாரோ கரீயதி, தஸ்ஸ ஹேட்டா² த²ம்ப⁴படிச்ச²கா பாஸாணா பூ⁴மிக³திகா ஏவ. பட²மத்த²ம்ப⁴ம் பன பட²மபி⁴த்திபாத³ம் வா பதிட்டா²பேந்தேஹி ப³ஹூஹி ஸம்பரிவாரேத்வா ‘‘கப்பியகுடிம் கரோம, கப்பியகுடிம் கரோமா’’தி வாசம் நிச்சா²ரேந்தேஹி மனுஸ்ஸேஸு உக்கி²பித்வா பதிட்டா²பேந்தேஸு ஆமஸித்வா வா ஸயம் உக்கி²பித்வா வா த²ம்போ⁴ வா பி⁴த்திபாதோ³ வா பதிட்டா²பேதப்³போ³. குருந்தி³மஹாபச்சரீஸு பன ‘‘கப்பியகுடி கப்பியகுடீதி வத்வா பதிட்டா²பேதப்³ப³’’ந்தி வுத்தம். அந்த⁴கட்ட²கதா²யம் ‘‘ஸங்க⁴ஸ்ஸ கப்பியகுடிம் அதி⁴ட்டா²மீ’’தி வுத்தம், தம் பன அவத்வாபி அட்ட²கதா²ஸு வுத்தனயேன வுத்தே தோ³ஸோ நத்தி². இத³ம் பனேத்த² ஸாதா⁴ரணலக்க²ணம் ‘‘த²ம்ப⁴பதிட்டா²பனஞ்ச வசனபரியோஸானஞ்ச ஸமகாலம் வட்டதீ’’தி. ஸசே ஹி அனிட்டி²தே வசனே த²ம்போ⁴ பதிட்டா²தி, அப்பதிட்டி²தே வா தஸ்மிம் வசனம் நிட்டா²தி, அகதா ஹோதி கப்பியகுடி. தேனேவ மஹாபச்சரியம் வுத்தம் ‘‘ப³ஹூஹி ஸம்பரிவாரேத்வா வத்தப்³ப³ம், அவஸ்ஸஞ்ஹி ஏத்த² ஏகஸ்ஸபி வசனனிட்டா²னஞ்ச த²ம்ப⁴பதிட்டா²னஞ்ச ஏகதோ ப⁴விஸ்ஸதீ’’தி. இட்ட²காஸிலாமத்திகாகுட்டகாஸு பன குடீஸு ஹேட்டா² சயம் ப³ந்தி⁴த்வா வா அப³ந்தி⁴த்வா வா கரோந்து, யதோ பட்டா²ய பி⁴த்திம் உட்டா²பேதுகாமா ஹோந்தி, தம் ஸப்³ப³பட²மம் இட்ட²கம் வா ஸிலம் வா மத்திகாபிண்ட³ம் வா க³ஹேத்வா வுத்தனயேனேவ கப்பியகுடி காதப்³பா³, இட்ட²காத³யோ பி⁴த்தியம் பட²மிட்ட²காதீ³னம் ஹேட்டா² ந வட்டந்தி, த²ம்பா⁴ பன உபரி உக்³க³ச்ச²ந்தி, தஸ்மா வட்டந்தி. அந்த⁴கட்ட²கதா²யம் ‘‘த²ம்பே⁴ஹி கரியமானே சதூஸு கோணேஸு சத்தாரோ த²ம்பா⁴, இட்ட²காதி³குட்டே சதூஸு கோணேஸு த்³வே திஸ்ஸோ இட்ட²கா அதி⁴ட்டா²தப்³பா³’’தி வுத்தம். ததா² பன அகதாயபி தோ³ஸோ நத்தி², அட்ட²கதா²ஸு ஹி வுத்தமேவ பமாணம்.

கோ³னிஸாதி³கா து³விதா⁴ ஆராமகோ³னிஸாதி³கா விஹாரகோ³னிஸாதி³காதி. தாஸு யத்த² நேவ ஆராமோ, ந ஸேனாஸனானி பரிக்கி²த்தானி ஹோந்தி, அயம் ஆராமகோ³னிஸாதி³கா நாம. யத்த² ஸேனாஸனானி ஸப்³பா³னி வா ஏகச்சானி வா பரிக்கி²த்தானி, ஆராமோ அபரிக்கி²த்தோ, அயம் விஹாரகோ³னிஸாதி³கா நாம. இதி உப⁴யத்ராபி ஆராமஸ்ஸ அபரிக்கி²த்தபா⁴வோயேவ பமாணம். ‘‘ஆராமோ பன உபட்³ட⁴பரிக்கி²த்தோபி ப³ஹுதரம் பரிக்கி²த்தோபி பரிக்கி²த்தோயேவ நாமா’’தி குருந்தி³மஹாபச்சரீஸு வுத்தம், ஏத்த² கப்பியகுடிம் லத்³து⁴ம் வட்டதி.

க³ஹபதீதி மனுஸ்ஸா ஆவாஸம் கத்வா ‘‘கப்பியகுடிம் தே³ம, பரிபு⁴ஞ்ஜதா²’’தி வத³ந்தி, ஏஸா க³ஹபதி நாம, ‘‘கப்பியகுடிம் காதும் தே³மா’’தி வுத்தேபி வட்டதியேவ. அந்த⁴கட்ட²கதா²யம் பன ‘‘யஸ்மா பி⁴க்கு²ம் ட²பேத்வா ஸேஸஸஹத⁴ம்மிகானம் ஸப்³பே³ஸஞ்ச தே³வமனுஸ்ஸானம் ஹத்த²தோ படிக்³க³ஹோ ச ஸன்னிதி⁴ ச அந்தோவுத்த²ஞ்ச தேஸம் ஸந்தகம் பி⁴க்கு²ஸ்ஸ வட்டதி, தஸ்மா தேஸம் கே³ஹானி வா தேஹி தி³ன்னகப்பியகுடி வா க³ஹபதீதி வுச்சதீ’’தி வுத்தம், புனபி வுத்தம் ‘‘பி⁴க்கு²ஸங்க⁴ஸ்ஸ விஹாரம் ட²பேத்வா பி⁴க்கு²னுபஸ்ஸயோ வா ஆராமிகானம் வா தித்தி²யானம் வா தே³வதானம் வா நாகா³னம் வா அபி ப்³ரஹ்மானம் விமானம் கப்பியகுடி ஹோதீ’’தி, தம் ஸுவுத்தம். ஸங்க⁴ஸந்தகமேவ ஹி பி⁴க்கு²ஸந்தகம் வா கே³ஹம் க³ஹபதிகுடிகா ந ஹோதி.

ஸம்முதி நாம ஞத்திது³தியகம்மவாசாய ஸாவேத்வா ஸம்மதா. ஏவஞ்ச பன, பி⁴க்க²வே, ஸம்மன்னிதப்³பா³, ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம் ஸங்கோ⁴ இத்த²ன்னாமம் விஹாரம் கப்பியபூ⁴மிம் ஸம்மன்னேய்ய, ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமம் விஹாரம் கப்பியபூ⁴மிம் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ விஹாரஸ்ஸ கப்பியபூ⁴மியா ஸம்முதி, ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸேய்ய.

‘‘ஸம்மதோ ஸங்கே⁴ன இத்த²ன்னாமோ விஹாரோ கப்பியபூ⁴மி க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி (மஹாவ. 295).

கம்மவாசம் அவத்வா அபலோகனகம்மவஸேன ஸாவேத்வா கதாபி ஸம்மதா ஏவ.

102. யம் (மஹாவ. அட்ட². 295) இமாஸு சதூஸு கப்பியபூ⁴மீஸு வுத்தம் ஆமிஸம், தம் ஸப்³ப³ம் அந்தோவுத்த²ஸங்க்²யம் ந க³ச்ச²தி. பி⁴க்கூ²னஞ்ச பி⁴க்கு²னீனஞ்ச அந்தோவுத்த²அந்தோபக்கமோசனத்த²ஞ்ஹி கப்பியகுடியோ அனுஞ்ஞாதா. யம் பன அகப்பியபூ⁴மியம் ஸஹஸேய்யப்பஹோனகே கே³ஹே வுத்தம் ஸங்கி⁴கம் வா புக்³க³லிகம் வா பி⁴க்கு²ஸ்ஸ பி⁴க்கு²னியா வா ஸந்தகம் ஏகரத்தம்பி ட²பிதம், தம் அந்தோவுத்த²ம், தத்த² பக்கஞ்ச அந்தோபக்கம் நாம ஹோதி, ஏதம் ந கப்பதி. ஸத்தாஹகாலிகம் பன யாவஜீவிகஞ்ச வட்டதி.

தத்ராயம் வினிச்ச²யோ – ஸாமணேரோ பி⁴க்கு²ஸ்ஸ தண்டு³லாதி³கம் ஆமிஸம் ஆஹரித்வா கப்பியகுடியம் நிக்கி²பித்வா புனதி³வஸே பசித்வா தே³தி, அந்தோவுத்த²ம் ந ஹோதி. தத்த² அகப்பியகுடியம் நிக்கி²த்தஸப்பிஆதீ³ஸு கிஞ்சி பக்கி²பித்வா தே³தி. முக²ஸன்னிதி⁴ நாம ஹோதி. மஹாபச்சரியம் பன ‘‘அந்தோவுத்த²ம் ஹோதீ’’தி வுத்தம். தத்த² நாமமத்தமேவ நானாகரணம், பி⁴க்கு² அகப்பியகுடியம் ட²பிதஸப்பிஞ்ச யாவஜீவிகபண்ணஞ்ச ஏகதோ பசித்வா பரிபு⁴ஞ்ஜதி, ஸத்தாஹம் நிராமிஸம் வட்டதி. ஸசே ஆமிஸஸம்ஸட்ட²ம் கத்வா பரிபு⁴ஞ்ஜதி, அந்தோவுத்த²ஞ்சேவ ஸாமம்பக்கஞ்ச ஹோதி. ஏதேனுபாயேன ஸப்³ப³ஸம்ஸக்³கா³ வேதி³தப்³பா³. யம் கிஞ்சி ஆமிஸம் பி⁴க்கு²னோ பசிதும் ந வட்டதி. ஸசேபிஸ்ஸ உண்ஹயாகு³யா ஸுலஸிபண்ணானி வா ஸிங்கி³வேரம் வா லோணம் வா பக்கி²பந்தி, தம்பி சாலேதும் ந வட்டதி, ‘‘யாகு³ம் நிப்³பா³பேமீ’’தி பன சாலேதும் வட்டதி. உத்தண்டு³லப⁴த்தம் லபி⁴த்வா பித³ஹிதும் ந வட்டதி. ஸசே பன மனுஸ்ஸா பித³ஹித்வா தே³ந்தி, வட்டதி. ‘‘ப⁴த்தம் மா நிப்³பா³யதூ’’தி பித³ஹிதும் வட்டதி, கீ²ரதக்காதீ³ஸு பன ஸகிம் குதி²தேஸு அக்³கி³ம் காதும் வட்டதி புனபாகஸ்ஸ அனுஞ்ஞாதத்தா.

இமா பன கப்பியகுடியோ கதா³ ஜஹிதவத்து²கா ஹோந்தி? உஸ்ஸாவனந்திகா தாவ யா த²ம்பா⁴னம் உபரி பி⁴த்திபாதே³ வா நிக²னித்வா கதா, ஸா ஸப்³பே³ஸு த²ம்பே⁴ஸு ச பி⁴த்திபாதே³ஸு ச அபனீதேஸு ஜஹிதவத்து²கா ஹோதி. ஸசே பன த²ம்பே⁴ வா பி⁴த்திபாதே³ வா பரிவத்தேந்தி, யோ யோ டி²தோ, தத்த² தத்த² பதிட்டா²தி, ஸப்³பே³ஸுபி பரிவத்திதேஸு அஜஹிதவத்து²காவ ஹோதி. இட்ட²காதீ³ஹி கதா சயஸ்ஸ உபரி பி⁴த்திஅத்தா²ய ட²பிதம் இட்ட²கம் வா ஸிலம் வா மத்திகாபிண்ட³ம் வா ஆதி³ம் கத்வா வினாஸிதகாலே ஜஹிதவத்து²காவ ஹோதி. யேஹி பன இட்ட²காதீ³ஹி அதி⁴ட்டி²தா, தேஸு அபனீதேஸுபி தத³ஞ்ஞேஸு பதிட்டா²தீதி அஜஹிதவத்து²காவ ஹோதி. கோ³னிஸாதி³கா பாகாராதீ³ஹி பரிக்கே²பே கதே ஜஹிதவத்து²காவ ஹோதி. புன தஸ்மிம் ஆராமே கப்பியகுடிம் லத்³து⁴ம் வட்டதி. ஸசே பன புனபி பாகாராத³யோ தத்த² தத்த² க²ண்டா³ ஹோந்தி, ததோ ததோ கா³வோ பவிஸந்தி, புன கப்பியகுடி ஹோதி. இதரா பன த்³வே கோ³பானஸீமத்தம் ட²பேத்வா ஸப்³ப³ஸ்மிம் ச²த³னே வினட்டே² ஜஹிதவத்து²காவ ஹோந்தி. ஸசே கோ³பானஸீனம் உபரி ஏகம்பி பக்க²பாஸகமண்ட³லம் அத்தி², ரக்க²தி.

103. யத்ர பனிமா சதஸ்ஸோபி கப்பியபூ⁴மியோ நத்தி², தத்த² கிம் காதப்³ப³ந்தி? அனுபஸம்பன்னஸ்ஸ த³த்வா தஸ்ஸ ஸந்தகம் கத்வா பரிபு⁴ஞ்ஜிதப்³ப³ம். தத்ரித³ம் வத்து² – கரவிகதிஸ்ஸத்தே²ரோ கிர வினயத⁴ரபாமோக்கோ² மஹாஸீவத்தே²ரஸ்ஸ ஸந்திகம் அக³மாஸி. ஸோ தீ³பாலோகேன ஸப்பிகும்ப⁴ம் பஸ்ஸித்வா ‘‘ப⁴ந்தே, கிமேத’’ந்தி புச்சி². தே²ரோ ‘‘ஆவுஸோ, கா³மதோ ஸப்பிகும்போ⁴ ஆப⁴தோ லூக²தி³வஸே ஸப்பினா பு⁴ஞ்ஜனத்தா²யா’’தி ஆஹ. ததோ நம் திஸ்ஸத்தே²ரோ ‘‘ந வட்டதி, ப⁴ந்தே’’தி ஆஹ. தே²ரோ புனதி³வஸே பமுகே² நிக்கி²பாபேஸி. திஸ்ஸத்தே²ரோ புன ஏகதி³வஸம் ஆக³தோ தம் தி³ஸ்வா ததே²வ புச்சி²த்வா ‘‘ப⁴ந்தே, ஸஹஸேய்யப்பஹோனகட்டா²னே ட²பேதும் ந வட்டதீ’’தி ஆஹ. தே²ரோ புனதி³வஸே ப³ஹி நீஹராபேத்வா நிக்கி²பாபேஸி, தம் சோரா ஹரிம்ஸு. ஸோ புன ஏகதி³வஸம் ஆக³தம் திஸ்ஸத்தே²ரமாஹ ‘‘ஆவுஸோ, தயா ‘ந வட்டதீ’தி வுத்தே ஸோ கும்போ⁴ ப³ஹி நிக்கி²த்தோ சோரேஹி ஹடோ’’தி. ததோ நம் திஸ்ஸத்தே²ரோ ஆஹ ‘‘நனு, ப⁴ந்தே, அனுபஸம்பன்னஸ்ஸ தா³தப்³போ³ அஸ்ஸ, அனுபஸம்பன்னஸ்ஸ ஹி த³த்வா தஸ்ஸ ஸந்தகம் கத்வா பரிபு⁴ஞ்ஜிதும் வட்டதீ’’தி.

இதி பாளிமுத்தகவினயவினிச்ச²யஸங்க³ஹே

கப்பியபூ⁴மிவினிச்ச²யகதா² ஸமத்தா.