18. காலிகவினிச்ச²யகதா²

89. காலிகானிபி சத்தாரீதி ஏத்த² (பாசி. அட்ட². 255-256) யாவகாலிகம் யாமகாலிகம் ஸத்தாஹகாலிகம் யாவஜீவிகந்தி இமானி சத்தாரி காலிகானி வேதி³தப்³பா³னி. தத்த² புரேப⁴த்தம் படிக்³க³ஹேத்வா பரிபு⁴ஞ்ஜிதப்³ப³ம் யம் கிஞ்சி கா²த³னீயபோ⁴ஜனீயம் யாவ மஜ்ஜ²ன்ஹிகஸங்க²தோ காலோ, தாவ பரிபு⁴ஞ்ஜிதப்³ப³தோ யாவகாலிகம். ஸத்³தி⁴ம் அனுலோமபானேஹி அட்ட²வித⁴ம் பானம் யாவ ரத்தியா பச்சி²மயாமஸங்கா²தோ யாமோ, தாவ பரிபு⁴ஞ்ஜிதப்³ப³தோ யாமோ காலோ அஸ்ஸாதி யாமகாலிகம். ஸப்பிஆதி³ பஞ்சவித⁴ம் பே⁴ஸஜ்ஜம் படிக்³க³ஹேத்வா ஸத்தாஹம் நிதே⁴தப்³ப³தோ ஸத்தாஹோ காலோ அஸ்ஸாதி ஸத்தாஹகாலிகம். ட²பேத்வா உத³கம் அவஸேஸம் ஸப்³ப³ம்பி படிக்³க³ஹிதம் யாவஜீவம் பரிஹரித்வா ஸதி பச்சயே பரிபு⁴ஞ்ஜிதப்³ப³தோ யாவஜீவிகந்தி வுச்சதி.

90. தத்த² யாவகாலிகேஸு போ⁴ஜனீயம் நாம ஓத³னோ கும்மாஸோ ஸத்து மச்சோ² மம்ஸந்தி. பஞ்ச போ⁴ஜனானி யாமகாலிகம் ஸத்தாஹகாலிகம் யாவஜீவிகஞ்ச ட²பேத்வா அவஸேஸம் கா²த³னீயம் நாம. ஏத்த² (பாசி. அட்ட². 248-9) பன யம் தாவ ஸக்க²லிமோத³காதி³ புப்³ப³ண்ணாபரண்ணமயம் கா²த³னீயம், தத்த² வத்தப்³ப³மேவ நத்தி². யம்பி வனமூலாதி³ப்பபே⁴த³ம் ஆமிஸக³திகம் ஹோதி. ஸேய்யதி²த³ம் – மூலகா²த³னீயம் கந்த³கா²த³னீயம் முளாலகா²த³னீயம் மத்த²ககா²த³னீயம் க²ந்த⁴கா²த³னீயம் தசகா²த³னீயம் பத்தகா²த³னீயம் புப்ப²கா²த³னீயம் ப²லகா²த³னீயம் அட்டி²கா²த³னீயம் பிட்ட²கா²த³னீயம் நிய்யாஸகா²த³னீயந்தி, இத³ம்பி கா²த³னீயஸங்க்²யமேவ க³ச்ச²தி.

தத்த² பன ஆமிஸக³திகஸல்லக்க²ணத்த²ம் இத³ம் முக²மத்தனித³ஸ்ஸனம் – மூலகா²த³னீயே தாவ மூலகமூலம் கா²ரகமூலம் சச்சுமூலம் தம்ப³கமூலம் தண்டு³லேய்யகமூலம் வத்து²லேய்யகமூலம் வஜகலிமூலம் ஜஜ்ஜ²ரிமூலந்தி ஏவமாதீ³னி ஸூபேய்யபண்ணமூலானி ஆமிஸக³திகானி. ஏத்த² ச வஜகலிமூலே ஜரட்ட²ம் சி²ந்தி³த்வா ச²ட்³டே³ந்தி, தம் யாவஜீவிகம் ஹோதி. அஞ்ஞம்பி ஏவரூபம் ஏதேனேவ நயேன வேதி³தப்³ப³ம். மூலககா²ரகஜஜ்ஜ²ரிமூலானம் பன ஜரட்டா²னிபி ஆமிஸக³திகானேவாதி வுத்தம். யானி பன பாளியம் –

‘‘அனுஜானாமி, பி⁴க்க²வே, மூலானி பே⁴ஸஜ்ஜானி ஹலித்³தி³ம் ஸிங்கி³வேரம் வசம் வசத்தம் அதிவிஸம் கடுகரோஹிணிம் உஸீரம் ப⁴த்³த³முத்தகம், யானி வா பனஞ்ஞானிபி அத்தி² மூலானி பே⁴ஸஜ்ஜானி நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தீ’’தி (மஹாவ. 263) –

வுத்தானி, தானி யாவஜீவிகானி. தேஸம் சூளபஞ்சமூலம் மஹாபஞ்சமூலந்திஆதி³னா நயேன க³ணியமானானம் க³ணனாய அந்தோ நத்தி², கா²த³னீயத்த²ஞ்ச போ⁴ஜனீயத்த²ஞ்ச அப²ரணபா⁴வோயேவ பனேதேஸம் லக்க²ணம். தஸ்மா யம் கிஞ்சி மூலம் தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரதி, தம் யாவகாலிகம், இதரம் யாவஜீவிகந்தி வேதி³தப்³ப³ம். ஸுப³ஹும் வத்வாபி ஹி இமஸ்மிம்யேவ லக்க²ணே டா²தப்³ப³ம். நாமஸஞ்ஞாஸு பன வுச்சமானாஸு தம் தம் நாமம் அஜானந்தானம் ஸம்மோஹோயேவ ஹோதி, தஸ்மா நாமஸஞ்ஞாய ஆத³ரம் அகத்வா லக்க²ணமேவ த³ஸ்ஸிதம். யதா² ச மூலே, ஏவம் கந்தா³தீ³ஸுபி லக்க²ணம் த³ஸ்ஸயிஸ்ஸாம, தஸ்ஸேவ வஸேன வினிச்ச²யோ வேதி³தப்³போ³. யஞ்ச தம் பாளியம் ஹலித்³தா³தி³ அட்ட²வித⁴ம் வுத்தம், தஸ்ஸ க²ந்த⁴தசபுப்ப²ப²லாதி³ ஸப்³ப³ம் யாவஜீவிகந்தி வுத்தம்.

கந்த³கா²த³னீயே து³விதோ⁴ கந்தோ³ தீ³கோ⁴ ச பி⁴ஸகிம்ஸுககந்தா³தி³, வட்டோ ச உப்பலகஸேருககந்தா³தி³, யம் க³ண்டீ²திபி வத³ந்தி. தத்த² ஸப்³பே³ஸம் கந்தா³னம் ஜிண்ணஜரட்ட²ட்டா²னஞ்ச ச²ல்லி ச ஸுகு²மமூலானி ச யாவஜீவிகானி, தருணோ பன ஸுக²கா²த³னீயோ ஸாலகல்யாணிபோதககந்தோ³ கிம்ஸுகபோதககந்தோ³ அம்பா³டககந்தோ³ கேதககந்தோ³ மாலுவகந்தோ³ பி⁴ஸஸங்கா²தோ பது³மபுண்ட³ரீககந்தோ³ பிண்டா³லுமஸாலுஆத³யோ ச கீ²ரவல்லிகந்தோ³ ஆலுவகந்தோ³ ஸிக்³கு³கந்தோ³ தாலகந்தோ³ நீலுப்பலரத்துப்பலகுமுத³ஸோக³ந்தி⁴கானம் கந்தா³ கத³லிகந்தோ³ வேளுகந்தோ³ கஸேருககந்தோ³தி ஏவமாத³யோ தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ஞ்ச போ⁴ஜனீயத்த²ஞ்ச ப²ரணககந்தா³ யாவகாலிகா. கீ²ரவல்லிகந்தோ³ அதோ⁴தோ யாவஜீவிகோ, தோ⁴தோ யாவகாலிகோ. கீ²ரகாகோலிஜீவிகஉஸப⁴கலஸுணாதி³கந்தா³ பன யாவஜீவிகா. தே பாளியம் ‘‘யானி வா பனஞ்ஞானிபி அத்தி² மூலானி பே⁴ஸஜ்ஜானீ’’தி ஏவம் (மஹாவ. 263) மூலபே⁴ஸஜ்ஜஸங்க³ஹேனேவ ஸங்க³ஹிதா.

முளாலகா²த³னீயே பது³மமுளாலம் புண்ட³ரீகமுளாலம் மூலஸதி³ஸம்யேவ. ஏரகமுளாலம் கந்து³லமுளாலந்தி ஏவமாதி³ தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரணகமுளாலம் யாவகாலிகம், ஹலித்³தி³ஸிங்கி³வேரமகசிசதுரஸ்ஸவல்லிகேதகதாலஹிந்தாலகுந்தாலனாளிகேரபூக³ருக்கா²தி³முளாலம் பன யாவஜீவிகம். தம் ஸப்³ப³ம்பி பாளியம் ‘‘யானி வா பனஞ்ஞானிபி அத்தி² மூலானி பே⁴ஸஜ்ஜானீ’’தி ஏவம் மூலபே⁴ஸஜ்ஜஸங்க³ஹேனேவ ஸங்க³ஹிதம்.

மத்த²ககா²த³னீயே தாலஹிந்தாலகுந்தாலகேதகனாளிகேரபூக³ருக்க²க²ஜ்ஜூரிவேத்தஏரககத³லீனம் களீரஸங்கா²தா மத்த²கா, வேணுகளீரோ நளகளீரோ உச்சு²களீரோ மூலககளீரோ ஸாஸபகளீரோ ஸதாவரிகளீரோ ஸத்தன்னம் த⁴ஞ்ஞானம் களீராதி ஏவமாதி³ தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரணகோ ருக்க²வல்லிஆதீ³னம் மத்த²கோ யாவகாலிகோ, ஹலித்³தி³ஸிங்கி³வேரவசமகசிலஸுணானம் களீரா, தாலஹிந்தாலகுந்தாலனாளிகேரகளீரானஞ்ச சி²ந்தி³த்வா பாதிதோ ஜரட்ட²பு³ந்தோ³ யாவஜீவிகோ.

க²ந்த⁴கா²த³னீயே அந்தோபத²வீக³தோ ஸாலகல்யாணீக²ந்தோ⁴ உச்சு²க²ந்தோ⁴ நீலுப்பலரத்துப்பலகுமுத³ஸோக³ந்தி⁴கானம் த³ண்ட³கக²ந்தா⁴தி ஏவமாதி³ தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரணகோ க²ந்தோ⁴ யாவகாலிகோ, உப்பலஜாதீனம் பண்ணத³ண்ட³கோ பது³மஜாதீனம் ஸப்³போ³பி த³ண்ட³கோ கரவிந்த³த³ண்டா³த³யோ ச அவஸேஸஸப்³ப³க²ந்தா⁴ யாவஜீவிகா.

தசகா²த³னீயே உச்சு²தசோவ ஏகோ யாவகாலிகோ, ஸோபி ஸரஸோ, ஸேஸோ ஸப்³போ³ யாவஜீவிகோ. தேஸம் பன மத்த²கக²ந்த⁴தசானம் திண்ணம்பி பாளியம் கஸாவபே⁴ஸஜ்ஜேன ஸங்க³ஹோ வேதி³தப்³போ³. வுத்தஞ்ஹேதம் –

‘‘அனுஜானாமி, பி⁴க்க²வே, கஸாவானி பே⁴ஸஜ்ஜானி நிம்ப³கஸாவம் குடஜகஸாவம் படோலகஸாவம் ப²க்³க³வகஸாவம் நத்தமாலகஸாவம், யானி வா பனஞ்ஞானிபி அத்தி² கஸாவானி பே⁴ஸஜ்ஜானி நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தீ’’தி (மஹாவ. 263).

ஏத்த² ஹி ஏதேஸம்பி ஸங்க³ஹோ ஸிஜ்ஜ²தி. வுத்தகஸாவானி ச ஸப்³ப³கப்பியானீதி வேதி³தப்³பா³னி.

பத்தகா²த³னீயே மூலகம் கா²ரகோ சச்சு தம்ப³கோ தண்டு³லேய்யகோ பபுன்னாகோ³ வத்து²லேய்யகோ வஜகலி ஜஜ்ஜ²ரி ஸேல்லு ஸிக்³கு³ காஸமத்³த³கோ உம்மாசீனமுக்³கோ³ மாஸோ ராஜமாஸோ ட²பேத்வா மஹானிப்பா²வம் அவஸேஸனிப்பா²வோ அக்³கி³மந்தோ² ஸுனிஸன்னகோ ஸேதவரணோ நாளிகா பூ⁴மியம் ஜாதலோணீதி ஏதேஸம் பத்தானி, அஞ்ஞானி ச ஏவரூபானி தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ஞ்ச போ⁴ஜனீயத்த²ஞ்ச ப²ரணகானி பத்தானி ஏகம்ஸேன யாவகாலிகானி, யா பனஞ்ஞா மஹானக²பிட்டி²மத்தபண்ணா லோணிருக்கே² ச க³ச்சே² ச ஆரோஹதி, தஸ்ஸா பத்தம் யாவஜீவிகம். ப்³ரஹ்மிபத்தஞ்ச யாவகாலிகந்தி தீ³பவாஸினோ வத³ந்தி. அம்ப³பல்லவம் யாவகாலிகம், அஸோகபல்லவம் பன யாவஜீவிகம். யானி சஞ்ஞானி பாளியம் –

‘‘அனுஜானாமி, பி⁴க்க²வே, பண்ணானி பே⁴ஸஜ்ஜானி நிம்ப³பண்ணம் குடஜபண்ணம் படோலபண்ணம் ஸுலஸிபண்ணம் கப்பாஸபண்ணம், யானி வா பனஞ்ஞானிபி அத்தி² பண்ணானி பே⁴ஸஜ்ஜானி நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தீ’’தி (மஹாவ. 263) –

வுத்தானி, தானி யாவஜீவிகானி. ந கேவலஞ்ச பண்ணானி, தேஸம் புப்ப²ப²லானிபி. யாவஜீவிகபண்ணானம் பன ப²க்³க³வபண்ணம் அஜ்ஜுகபண்ணம் ப²ணிஜ்ஜகபண்ணம் தம்பூ³லபண்ணம் பது³மினிபண்ணந்தி ஏவம் க³ணனவஸேன அந்தோ நத்தி².

புப்ப²கா²த³னீயே மூலகபுப்ப²ம் கா²ரகபுப்ப²ம் சச்சுபுப்ப²ம் தம்ப³கபுப்ப²ம் வஜகலிபுப்ப²ம் ஜஜ்ஜ²ரிபுப்ப²ம் சூளனிப்பா²வபுப்ப²ம் மஹானிப்பா²வபுப்ப²ம் கஸேருகபுப்ப²ம் நாளிகேரதாலகேதகானம் தருணபுப்பா²னி ஸேதவரணபுப்ப²ம் ஸிக்³கு³புப்ப²ம் உப்பலபது³மஜாதிகானம் புப்பா²னம் கண்ணிகாமத்தம் அக³ந்தி⁴புப்ப²ம் கரீரபுப்ப²ம் ஜீவந்தீ புப்ப²ந்தி ஏவமாதி³ தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரணபுப்ப²ம் யாவகாலிகம், அஸோகப³குலகுய்யகபுன்னாக³சம்பகஜாதிகரவீரகணிகாரகுந்த³னவமாலிகமல்லிகாதீ³னம் பன புப்ப²ம் யாவஜீவிகம், தஸ்ஸ க³ணனாய அந்தோ நத்தி². பாளியம் பனஸ்ஸ கஸாவபே⁴ஸஜ்ஜேன ஸங்க³ஹோ வேதி³தப்³போ³.

ப²லகா²த³னீயே பனஸலபு³ஜதாலனாளிகேரஅம்ப³ஜம்பு³அம்பா³டகதிந்திணிகமாதுலுங்க³கபித்த²லாபு³கும்ப⁴ண்ட³புஸ்ஸப²லதிம்ப³ரூஸகதிபுஸவாதிங்க³ணசோசமோசமது⁴காதீ³னம் ப²லானி, யானி லோகே தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரந்தி, ஸப்³பா³னி தானி யாவகாலிகானி, நாமக³ணனவஸேன தேஸம் ந ஸக்கா பரியந்தம் த³ஸ்ஸேதும். யானி பன பாளியம் –

‘‘அனுஜானாமி, பி⁴க்க²வே, ப²லானி பே⁴ஸஜ்ஜானி பி³லங்க³ம் பிப்பலிம் மரீசம் ஹரீதகம் விபீ⁴தகம் ஆமலகம் கோ³ட்ட²ப²லம், யானி வா பனஞ்ஞானிபி அத்தி² ப²லானி பே⁴ஸஜ்ஜானி நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தீ’’தி (மஹாவ. 263) –

வுத்தானி, தானி யாவஜீவிகானி. தேஸம்பி அபரிபக்கானி அச்சி²வபி³ம்ப³வரணகேதககாஸ்மரீஆதீ³னம் ப²லானி ஜாதிப²லம் கடுகப²லம் ஏளா தக்கோலந்தி ஏவம் நாமவஸேன ந ஸக்கா பரியந்தம் த³ஸ்ஸேதும்.

அட்டி²கா²த³னீயே லபு³ஜட்டி² பனஸட்டி² அம்பா³டகட்டி² ஸாலட்டி² க²ஜ்ஜூரீகேதகதிம்ப³ரூஸகானம் தருணப²லட்டி² திந்திணிகட்டி² பி³ம்ப³ப²லட்டி² உப்பலபது³மஜாதீனம் போக்க²ரட்டீ²தி ஏவமாதீ³னி தேஸு தேஸு ஜனபதே³ஸு மனுஸ்ஸானம் பகதிஆஹாரவஸேன கா²த³னீயத்த²ம் போ⁴ஜனீயத்த²ஞ்ச ப²ரணகானி அட்டீ²னி யாவகாலிகானி, மது⁴கட்டி² புன்னாக³ட்டி² ஹரீதகாதீ³னம் அட்டீ²னி ஸித்³த⁴த்த²கட்டி² ராஜிகட்டீ²தி ஏவமாதீ³னி அட்டீ²னி யாவஜீவிகானி. தேஸம் பாளியம் ப²லபே⁴ஸஜ்ஜேனேவ ஸங்க³ஹோ வேதி³தப்³போ³.

பிட்ட²கா²த³னீயே ஸத்தன்னம் தாவ த⁴ஞ்ஞானம் த⁴ஞ்ஞானுலோமானம் அபரண்ணானஞ்ச பிட்ட²ம் பனஸபிட்ட²ம் லபு³ஜபிட்ட²ம் அம்பா³டகபிட்ட²ம் ஸாலபிட்ட²ம் தோ⁴தகதாலபிட்ட²ம் கீ²ரவல்லிபிட்ட²ஞ்சாதி ஏவமாதீ³னி தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரணகானி பிட்டா²னி யாவகாலிகானி, அதோ⁴தகம் தாலபிட்ட²ம் கீ²ரவல்லிபிட்ட²ம் அஸ்ஸக³ந்தா⁴தி³பிட்டா²னி ச யாவஜீவிகானி. தேஸம் பாளியம் கஸாவேஹி மூலப²லேஹி ச ஸங்க³ஹோ வேதி³தப்³போ³.

நிய்யாஸகா²த³னீயே – ஏகோ உச்சு²னிய்யாஸோவ ஸத்தாஹகாலிகோ, ஸேஸா –

‘‘அனுஜானாமி, பி⁴க்க²வே, ஜதூனி பே⁴ஸஜ்ஜானி ஹிங்கு³ம் ஹிங்கு³ஜதும் ஹிங்கு³ஸிபாடிகம் தகம் தகபத்திம் தகபண்ணிம் ஸஜ்ஜுலஸம், யானி வா பனஞ்ஞானிபி அத்தி² ஜதூனி பே⁴ஸஜ்ஜானீ’’தி (மஹாவ. 263) –

ஏவம் பாளியம் வுத்தா நிய்யாஸா யாவஜீவிகா. தத்த² யேவாபனகவஸேன ஸங்க³ஹிதானம் அம்ப³னிய்யாஸோ கணிகாரனிய்யாஸோதி ஏவம் நாமவஸேன ந ஸக்கா பரியந்தம் த³ஸ்ஸேதும். ஏவம் இமேஸு மூலகா²த³னீயாதீ³ஸு யம் கிஞ்சி யாவகாலிகம், ஸப்³ப³ம்பி இமஸ்மிம் அத்தே² அவஸேஸம் கா²த³னீயம் நாமாதி ஸங்க³ஹிதம்.

91. யாமகாலிகேஸு பன அட்ட² பானானி நாம அம்ப³பானம் ஜம்பு³பானம் சோசபானம் மோசபானம் மது⁴கபானம் முத்³தி³கபானம் ஸாலூகபானம் பா²ருஸகபானந்தி இமானி அட்ட² பானானி. தத்த² (மஹாவ. அட்ட². 300) அம்ப³பானந்தி ஆமேஹி வா பக்கேஹி வா அம்பே³ஹி கதபானம். தத்த² ஆமேஹி கரோந்தேன அம்ப³தருணானி பி⁴ந்தி³த்வா உத³கே பக்கி²பித்வா ஆதபே ஆதி³ச்சபாகேன பசித்வா பரிஸ்ஸாவேத்வா தத³ஹுபடிக்³க³ஹிதகேஹி மது⁴ஸக்காரகப்பூராதீ³ஹி யோஜேத்வா காதப்³ப³ம், ஏவம் கதம் புரேப⁴த்தமேவ கப்பதி. அனுபஸம்பன்னேஹி கதம் லபி⁴த்வா பன புரேப⁴த்தம் படிக்³க³ஹிதம் புரேப⁴த்தம் ஸாமிஸபரிபோ⁴கே³னபி வட்டதி, பச்சா²ப⁴த்தம் நிராமிஸபரிபோ⁴கே³ன யாவ அருணுக்³க³மனா வட்டதி. ஏஸ நயோ ஸப்³ப³பானேஸு. ஜம்பு³பானந்தி ஜம்பு³ப²லேஹி கதபானம். சோசபானந்தி அட்டி²ககத³லிப²லேஹி கதபானம். மோசபானந்தி அனட்டி²கேஹி கத³லிப²லேஹி கதபானம். மது⁴கபானந்தி மது⁴கானம் ஜாதிரஸேன கதபானம். தம் பன உத³கஸம்பி⁴ன்னம் வட்டதி, ஸுத்³த⁴ம் ந வட்டதி. முத்³தி³கபானந்தி முத்³தி³கா உத³கே மத்³தி³த்வா அம்ப³பானம் விய கதபானம். ஸாலூகபானந்தி ரத்துப்பலனீலுப்பலாதீ³னம் ஸாலூகே மத்³தி³த்வா கதபானம். பா²ருஸகபானந்தி பா²ருஸகப²லேஹி அம்ப³பானம் விய கதபானம். இமானி அட்ட² பானானி ஸீதானிபி ஆதி³ச்சபாகானிபி வட்டந்தி, அக்³கி³பாகானி ந வட்டந்தி.

அவஸேஸானி வேத்ததிந்திணிகமாதுலுங்க³கபித்த²கோஸம்ப³கரமந்தா³தி³கு²த்³த³கப²லபானானி அட்ட²பானக³அகானேவ. தானி கிஞ்சாபி பாளியம் ந வுத்தானி, அத² கோ² கப்பியம் அனுலோமேந்தி, தஸ்மா கப்பந்தி. ‘‘அனுஜானாமி, பி⁴க்க²வே, ஸப்³ப³ம் ப²லரஸம் ட²பேத்வா த⁴ஞ்ஞப²லரஸ’’ந்தி (மஹாவ. அட்ட². 300) வுத்தத்தா ட²பேத்வா ஸானுலோமத⁴ஞ்ஞப²லரஸம் அஞ்ஞம் ப²லபானம் நாம அகப்பியம் நத்தி², ஸப்³ப³ம் யாமகாலிகமேவ. தத்த² ஸானுலோமத⁴ஞ்ஞப²லரஸோ நாம ஸத்தன்னஞ்சேவ த⁴ஞ்ஞானம் தாலனாளிகேரபனஸலபு³ஜஅலாபு³கும்ப⁴ண்ட³புஸ்ஸப²லதிபுஸஏளாலுகாதி நவன்னஞ்ச மஹாப²லானம் ஸப்³பே³ஸஞ்ச புப்³ப³ண்ணாபரண்ணானம் அனுலோமத⁴ஞ்ஞானம் ரஸோ யாவகாலிகோ, தஸ்மா பச்சா²ப⁴த்தம் ந வட்டதி. ‘‘அனுஜானாமி, பி⁴க்க²வே, ஸப்³ப³ம் பத்தரஸம் ட²பேத்வா டா³கரஸ’’ந்தி (மஹாவ. 300) வுத்தத்தா பக்கடா³கரஸம் ட²பேத்வா யாவகாலிகபத்தானம்பி ஸீதோத³கேன மத்³தி³த்வா கதரஸோ வா ஆதி³ச்சபாகோ வா வட்டதி. ‘‘அனுஜானாமி, பி⁴க்க²வே, ஸப்³ப³ம் புப்ப²ரஸம் ட²பேத்வா மது⁴கபுப்ப²ரஸ’’ந்தி வுத்தத்தா மது⁴கபுப்ப²ரஸம் ட²பேத்வா ஸப்³போ³பி புப்ப²ரஸோ வட்டதி.

92. ஸத்தாஹகாலிகம் நாம ஸப்பி நவனீதம் தேலம் மது⁴ பா²ணிதந்தி இமானி பஞ்ச பே⁴ஸஜ்ஜானி. தத்த² ஸப்பி நாம கோ³ஸப்பி வா அஜிகாஸப்பி வா மஹிம்ஸஸப்பி வா யேஸம் மம்ஸம் கப்பதி, தேஸம் ஸப்பி. நவனீதம் நாம தேஸம்யேவ நவனீதம். தேலம் நாம திலதேலம் ஸாஸபதேலம் மது⁴கதேலம் ஏரண்ட³தேலம் வஸாதேலம். மது⁴ நாம மக்கி²காமது⁴. பா²ணிதம் நாம உச்சு²ம்ஹா நிப்³ப³த்தம் (பசி. 260). யாவஜீவிகம் பன ஹேட்டா² யாவகாலிகே மூலகா²த³னீயாதீ³ஸு வுத்தனயேனேவ வேதி³தப்³ப³ம்.

93. தத்த² (பாசி. அட்ட². 256) அருணோத³யே படிக்³க³ஹிதம் யாவகாலிகம் ஸதக்க²த்தும்பி நித³ஹித்வா யாவ காலோ நாதிக்கமதி, தாவ பரிபு⁴ஞ்ஜிதும் வட்டதி, யாமகாலிகம் ஏகம் அஹோரத்தம், ஸத்தாஹகாலிகம் ஸத்தரத்தம், இதரம் ஸதி பச்சயே யாவஜீவம்பி பரிபு⁴ஞ்ஜிதும் வட்டதி. படிக்³க³ஹேத்வா ஏகரத்தம் வீதினாமிதம் பன யம் கிஞ்சி யாவகாலிகம் வா யாமகாலிகம் வா அஜ்ஜோ²ஹரிதுகாமதாய க³ண்ஹந்தஸ்ஸ படிக்³க³ஹணே தாவ து³க்கடம், அஜ்ஜோ²ஹரதோ பன ஏகமேகஸ்மிம் அஜ்ஜோ²ஹாரே ஸன்னிதி⁴பச்சயா பாசித்தியம். ஸசேபி பத்தோ து³த்³தோ⁴தோ ஹோதி, யம் அங்கு³லியா க⁴ம்ஸந்தஸ்ஸ லேகா² பஞ்ஞாயதி, க³ண்டி²கபத்தஸ்ஸ வா க³ண்டி²கந்தரே ஸ்னேஹோ பவிட்டோ² ஹோதி, ஸோ உண்ஹே ஓதாபேந்தஸ்ஸ பக்³க⁴ரதி, உண்ஹயாகு³யா வா க³ஹிதாய ஸந்தி³ஸ்ஸதி, தாதி³ஸே பத்தேபி புனதி³வஸே பு⁴ஞ்ஜந்தஸ்ஸ பாசித்தியம், தஸ்மா பத்தம் தோ⁴வித்வா புன தத்த² அச்சோ²த³கம் வா ஆஸிஞ்சித்வா அங்கு³லியா வா க⁴ம்ஸித்வா நிஸ்னேஹபா⁴வோ ஜானிதப்³போ³. ஸசே ஹி உத³கே வா ஸ்னேஹபா⁴வோ, பத்தே வா அங்கு³லிலேகா² பஞ்ஞாயதி, து³த்³தோ⁴தோ ஹோதி, தேலவண்ணபத்தே பன அங்கு³லிலேகா² பஞ்ஞாயதி, ஸா அப்³போ³ஹாரிகா. யம்பி பி⁴க்கூ² நிரபேக்கா² ஸாமணேரானம் பரிச்சஜந்தி, தஞ்சே ஸாமணேரா நித³ஹித்வா தே³ந்தி, ஸப்³ப³ம் வட்டதி. ஸயம் படிக்³க³ஹேத்வா அபரிச்சத்தமேவ ஹி து³தியதி³வஸே ந வட்டதி. ததோ ஹி ஏகஸித்த²ம்பி அஜ்ஜோ²ஹரதோ பாசித்தியமேவ. அகப்பியமம்ஸேஸு மனுஸ்ஸமம்ஸே து²ல்லச்சயேன ஸத்³தி⁴ம் பாசித்தியம், அவஸேஸேஸு து³க்கடேன ஸத்³தி⁴ம்.

யாமகாலிகம் ஸதி பச்சயே அஜ்ஜோ²ஹரதோ பாசித்தியம், ஆஹாரத்தா²ய அஜ்ஜோ²ஹரதோ து³க்கடேன ஸத்³தி⁴ம் பாசித்தியம். ஸசே பவாரிதோ ஹுத்வா அனதிரித்தகதம் அஜ்ஜோ²ஹரதி, பகதிஆமிஸே த்³வே பாசித்தியானி, மனுஸ்ஸமம்ஸே து²ல்லச்சயேன ஸத்³தி⁴ம் த்³வே, ஸேஸஅகப்பியமம்ஸே து³க்கடேன ஸத்³தி⁴ம். யாமகாலிகம் ஸதி பச்சயே ஸாமிஸேன முகே²ன அஜ்ஜோ²ஹரதோ த்³வே, நிராமிஸேன ஏகமேவ. ஆஹாரத்தா²ய அஜ்ஜோ²ஹரதோ விகப்பத்³வயேபி து³க்கடம் வட்³ட⁴தி. ஸசே விகாலே அஜ்ஜோ²ஹரதி, பகதிபோ⁴ஜனே ஸன்னிதி⁴பச்சயா ச விகாலபோ⁴ஜனபச்சயா ச த்³வே பாசித்தியானி, அகப்பியமம்ஸே து²ல்லச்சயம் து³க்கடஞ்ச வட்³ட⁴தி. யாமகாலிகே விகாலபச்சயா அனாபத்தி. அனதிரித்தபச்சயா பன விகாலே ஸப்³ப³விகப்பேஸு அனாபத்தி.

ஸத்தாஹகாலிகம் பன யாவஜீவிகஞ்ச ஆஹாரத்தா²ய படிக்³க³ண்ஹதோ படிக்³க³ண்ஹனபச்சயா தாவ து³க்கடம், அஜ்ஜோ²ஹரதோ பன ஸசே நிராமிஸம் ஹோதி, அஜ்ஜோ²ஹாரே து³க்கடம். அத² ஆமிஸஸம்ஸட்ட²ம் படிக்³க³ஹேத்வா ட²பிதம் ஹோதி, யதா²வத்து²கம் பாசித்தியமேவ.

94. ஸத்தாஹகாலிகேஸு பன ஸப்பிஆதீ³ஸு அயம் வினிச்ச²யோ (பாரா. அட்ட². 2.622) – ஸப்பி தாவ புரேப⁴த்தம் படிக்³க³ஹிதம் தத³ஹுபுரேப⁴த்தம் ஸாமிஸம்பி நிராமிஸம்பி பரிபு⁴ஞ்ஜிதும் வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸம் பரிபு⁴ஞ்ஜிதப்³ப³ம். ஸத்தாஹாதிக்கமே ஸசே ஏகபா⁴ஜனே ட²பிதம், ஏகம் நிஸ்ஸக்³கி³யம். ஸசே ப³ஹூஸு, வத்து²க³ணனாய நிஸ்ஸக்³கி³யானி. பச்சா²ப⁴த்தம் படிக்³க³ஹிதம் நிராமிஸமேவ வட்டதி, புரேப⁴த்தம் வா பச்சா²ப⁴த்தம் வா உக்³க³ஹிதகம் கத்வா நிக்கி²த்தம் அஜ்ஜோ²ஹரிதும் ந வட்டதி, அப்³ப⁴ஞ்ஜனாதீ³ஸு உபனேதப்³ப³ம். ஸத்தாஹாதிக்கமேபி அனாபத்தி அனஜ்ஜோ²ஹரணீயதம் ஆபன்னத்தா. ஸசே அனுபஸம்பன்னோ புரேப⁴த்தம் படிக்³க³ஹிதனவனீதேன ஸப்பிம் கத்வா தே³தி, புரேப⁴த்தம் ஸாமிஸம்பி வட்டதி, ஸசே ஸயம் கரோதி, ஸத்தாஹம்பி நிராமிஸமேவ வட்டதி. பச்சா²ப⁴த்தம் படிக்³க³ஹிதனவனீதேன யேன கேனசி கதஸப்பி ஸத்தாஹம்பி நிராமிஸமேவ வட்டதி, உக்³க³ஹிதகேன கதே புப்³பே³ வுத்தஸுத்³த⁴ஸப்பினயேனேவ வினிச்ச²யோ வேதி³தப்³போ³. புரேப⁴த்தம் படிக்³க³ஹிதகீ²ரேன வா த³தி⁴னா வா கதஸப்பி அனுபஸம்பன்னேன கதம் ஸாமிஸம்பி தத³ஹுபுரேப⁴த்தம் வட்டதி, ஸயம்கதம் நிராமிஸமேவ வட்டதி.

95. நவனீதம் தாபேந்தஸ்ஸ ஹி ஸாமம்பாகோ ந ஹோதி, ஸாமம்பக்கேன பன தேன ஸத்³தி⁴ம் ஆமிஸம் ந வட்டதி, பச்சா²ப⁴த்ததோ பட்டா²ய ச ந வட்டதியேவ. ஸத்தாஹாதிக்கமேபி அனாபத்தி ஸவத்து²கஸ்ஸ படிக்³க³ஹிதத்தா. பச்சா²ப⁴த்தம் படிக்³க³ஹிதகேஹி கதம் பன அப்³ப⁴ஞ்ஜனாதீ³ஸு உபனேதப்³ப³ம். புரேப⁴த்தம்பி ச உக்³க³ஹிதகேஹி கதம், உப⁴யேஸம்பி ஸத்தாஹாதிக்கமே அனாபத்தி. ஏஸ நயோ அகப்பியமம்ஸஸப்பிம்ஹி. அயம் பன விஸேஸோ – யத்த² பாளியம் ஆக³தஸப்பினா நிஸ்ஸக்³கி³யம், தத்த² இமினா து³க்கடம். அந்த⁴கட்ட²கதா²யம் காரணபதிரூபகம் வத்வா மனுஸ்ஸஸப்பி ச நவனீதஞ்ச படிக்கி²த்தம், தம் து³ப்படிக்கி²த்தம் ஸப்³ப³அட்ட²கதா²ஸு அனுஞ்ஞாதத்தா. பரதோ சஸ்ஸ வினிச்ச²யோபி ஆக³ச்சி²ஸ்ஸதி. பாளியம் ஆக³தனவனீதம்பி புரேப⁴த்தம் படிக்³க³ஹிதம் தத³ஹுபுரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய நிராமிஸமேவ. ஸத்தாஹாதிக்கமே நானாபா⁴ஜனேஸு ட²பிதே பா⁴ஜனக³ணனாய, ஏகபா⁴ஜனேபி அமிஸ்ஸேத்வா பிண்ட³பிண்ட³வஸேன ட²பிதே பிண்ட³க³ணனாய நிஸ்ஸக்³கி³யானி. பச்சா²ப⁴த்தம் படிக்³க³ஹிதம் ஸப்பினயேன வேதி³தப்³ப³ம். ஏத்த² பன த³தி⁴கு³ளிகாயோபி தக்கபி³ந்தூ³னிபி ஹோந்தி, தஸ்மா தோ⁴தம் வட்டதீதி உபட்³ட⁴த்தே²ரா ஆஹம்ஸு. மஹாஸிவத்தே²ரோ பன ‘‘ப⁴க³வதா அனுஞ்ஞாதகாலதோ பட்டா²ய தக்கதோ உத்³த⁴டமத்தமேவ கா²தி³ம்ஸூ’’தி ஆஹ. தஸ்மா நவனீதம் பரிபு⁴ஞ்ஜந்தேன தோ⁴வித்வா த³தி⁴தக்கமக்கி²காகிபில்லிகாதீ³னி அபனேத்வா பரிபு⁴ஞ்ஜிதப்³ப³ம். பசித்வா ஸப்பிம் கத்வா பரிபு⁴ஞ்ஜிதுகாமேன அதோ⁴தம்பி பரிபு⁴ஞ்ஜிதும் வட்டதி. யம் தத்த² த³தி⁴க³தம் வா தக்கக³தம் வா, தம் க²யம் க³மிஸ்ஸதி. ஏத்தாவதா ஹி ஸவத்து²கபடிக்³க³ஹிதம் நாம ந ஹோதீதி அயமேத்த² அதி⁴ப்பாயோ. ஆமிஸேன ஸத்³தி⁴ம் பக்கத்தா பன தஸ்மிம்பி குக்குச்சாயந்தி குக்குச்சகா. இதா³னி உக்³க³ஹேத்வா ட²பிதனவனீதே ச புரேப⁴த்தம் கீ²ரத³தீ⁴னி படிக்³க³ஹேத்வா கதனவனீதே ச பச்சா²ப⁴த்தம் தானி படிக்³க³ஹேத்வா கதனவனீதே ச உக்³க³ஹிதகேஹி கதனவனீதே ச அகப்பியமம்ஸனவனீதே ச ஸப்³போ³ ஆபத்தானாபத்திபரிபோ⁴கா³பரிபோ⁴க³னயோ ஸப்பிம்ஹி வுத்தக்கமேனேவ க³ஹேதப்³போ³. தேலபி⁴க்கா²ய பவிட்டா²னம் பன பி⁴க்கூ²னம் தத்தே²வ ஸப்பிம்பி நவனீதம்பி பக்கதேலம்பி அபக்கதேலம்பி ஆகிரந்தி. தத்த² தக்கத³தி⁴பி³ந்தூ³னிபி ப⁴த்தஸித்தா²னிபி தண்டு³லகணாபி மக்கி²காத³யோபி ஹோந்தி, ஆதி³ச்சபாகம் கத்வா பரிஸ்ஸாவேத்வா க³ஹிதம் ஸத்தாஹகாலிகம் ஹோதி. படிக்³க³ஹேத்வா ச ட²பிதபே⁴ஸஜ்ஜேஹி ஸத்³தி⁴ம் பசித்வா நத்து²பானம்பி காதும் வட்டதி. ஸசே வத்³த³லிஸமயே லஜ்ஜீ ஸாமணேரோ யதா² தத்த² பதிததண்டு³லகணாத³யோ ந பச்சந்தி, ஏவம் அக்³கி³ம்ஹி விலீயாபேத்வா பரிஸ்ஸாவேத்வா புன பசித்வா தே³தி, புரிமனயேனேவ ஸத்தாஹம் வட்டதி.

96. தேலேஸு திலதேலம் தாவ புரேப⁴த்தம் படிக்³க³ஹிதம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய நிராமிஸமேவ வட்டதி. ஸத்தாஹாதிக்கமே தஸ்ஸ பா⁴ஜனக³ணனாய நிஸ்ஸக்³கி³யபா⁴வோ வேதி³தப்³போ³. பச்சா²ப⁴த்தம் படிக்³க³ஹிதம் ஸத்தாஹம் நிராமிஸமேவ வட்டதி, உக்³க³ஹிதகம் கத்வா நிக்கி²த்தம் அஜ்ஜோ²ஹரிதும் ந வட்டதி, ஸீஸமக்க²னாதீ³ஸு உபனேதப்³ப³ம், ஸத்தாஹாதிக்கமேபி அனாபத்தி. புரேப⁴த்தம் திலே படிக்³க³ஹேத்வா கததேலம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய அனஜ்ஜோ²ஹரணீயம் ஹோதி, ஸீஸமக்க²னாதீ³ஸு உபனேதப்³ப³ம், ஸத்தாஹாதிக்கமேபி அனாபத்தி. பச்சா²ப⁴த்தம் திலே படிக்³க³ஹேத்வா கததேலம் அனஜ்ஜோ²ஹரணீயமேவ ஸவத்து²கபடிக்³க³ஹிதத்தா. ஸத்தாஹாதிக்கமேபி அனாபத்தி, ஸீஸமக்க²னாதீ³ஸு உபனேதப்³ப³ம். புரேப⁴த்தம் வா பச்சா²ப⁴த்தம் வா உக்³க³ஹிதகதிலேஹி கததேலேபி ஏஸேவ நயோ. புரேப⁴த்தம் படிக்³க³ஹிததிலே ப⁴ஜ்ஜித்வா வா திலபிட்ட²ம் வா ஸேதே³த்வா உண்ஹோத³கேன வா தேமேத்வா கததேலம் ஸசே அனுபஸம்பன்னேன கதம், புரேப⁴த்தம் ஸாமிஸம்பி வட்டதி, அத்தனா கதம் நிப்³ப³ட்டிதத்தா புரேப⁴த்தம் நிராமிஸம் வட்டதி, ஸாமம்பக்கத்தா ஸாமிஸம் ந வட்டதி. ஸவத்து²கபடிக்³க³ஹிதத்தா பன பச்சா²ப⁴த்ததோ பட்டா²ய உப⁴யம்பி அனஜ்ஜோ²ஹரணீயம், ஸீஸமக்க²னாதீ³ஸு உபனேதப்³ப³ம், ஸத்தாஹாதிக்கமேபி அனாபத்தி. யதி³ பன அப்பம் உண்ஹோத³கம் ஹோதி அப்³பு⁴க்கிரணமத்தம், அப்³போ³ஹாரிகம் ஹோதி ஸாமம்பாகக³ணனம் ந க³ச்ச²தி. ஸாஸபதேலாதீ³ஸுபி அவத்து²கபடிக்³க³ஹிதேஸு அவத்து²கதிலதேலே வுத்தஸதி³ஸோவ வினிச்ச²யோ.

ஸசே பன புரேப⁴த்தம் படிக்³க³ஹிதானம் ஸாஸபாதீ³னம் சுண்ணேஹி ஆதி³ச்சபாகேன ஸக்கா தேலம் காதும், தம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய நிராமிஸமேவ வட்டதி, ஸத்தாஹாதிக்கமே நிஸ்ஸக்³கி³யம். யஸ்மா பன ஸாஸபமது⁴கசுண்ணானி ஸேதே³த்வா ஏரண்ட³கட்டீ²னி ச ப⁴ஜ்ஜித்வா ஏவ தேலம் கரோந்தி, தஸ்மா ஏதேஸம் தேலம் அனுபஸம்பன்னேஹி கதம் புரேப⁴த்தம் ஸாமிஸம்பி வட்டதி, வத்தூ²னம் யாவஜீவிகத்தா பன ஸவத்து²கபடிக்³க³ஹணே தோ³ஸோ நத்தி². அத்தனா கதம் ஸத்தாஹம் நிராமிஸபரிபோ⁴கே³னேவ பரிபு⁴ஞ்ஜிதப்³ப³ம். உக்³க³ஹிதகேஹி கதம் அனஜ்ஜோ²ஹரணீயம், பா³ஹிரபரிபோ⁴கே³ வட்டதி, ஸத்தாஹாதிக்கமேபி அனாபத்தி. தேலகரணத்தா²ய ஸாஸபமது⁴கஏரண்ட³கட்டீ²னி படிக்³க³ஹேத்வா கததேலம் ஸத்தாஹகாலிகம், து³தியதி³வஸே கதம் சா²ஹம் வட்டதி, ததியதி³வஸே கதம் பஞ்சாஹம் வட்டதி, சதுத்த², பஞ்சம, ச²ட்ட², ஸத்தமதி³வஸே கதம் தத³ஹேவ வட்டதி. ஸசே யாவ அருணஸ்ஸ உக்³க³மனா திட்ட²தி, நிஸ்ஸக்³கி³யம், அட்ட²மதி³வஸே கதம் அனஜ்ஜோ²ஹரணீயம், அனிஸ்ஸக்³கி³யத்தா பன பா³ஹிரபரிபோ⁴கே³ வட்டதி. ஸசேபி ந கரோதி, தேலத்தா²ய க³ஹிதஸாஸபாதீ³னம் ஸத்தாஹாதிக்கமே து³க்கடமேவ. பாளியம் பன அனாக³தானி அஞ்ஞானிபி நாளிகேரனிம்ப³கோஸம்ப³கரமந்தா³தீ³னம் தேலானி அத்தி², தானி படிக்³க³ஹேத்வா ஸத்தாஹம் அதிக்காமயதோ து³க்கடம் ஹோதி. அயமேதேஸு விஸேஸோ – ஸேஸம் யாவகாலிகவத்து²ம் யாவஜீவிகவத்து²ஞ்ச ஸல்லக்கே²த்வா ஸாமம்பாகஸவத்து²கபுரேப⁴த்தபச்சா²ப⁴த்தபடிக்³க³ஹிதஉக்³க³ஹிதவத்து²விதா⁴னம் ஸப்³ப³ம் வுத்தனயேனேவ வேதி³தப்³ப³ம்.

வஸாதேலம் நாம ‘‘அனுஜானாமி, பி⁴க்க²வே, பஞ்ச வஸானி அச்ச²வஸம் மச்ச²வஸம் ஸுஸுகாவஸம் ஸூகரவஸம் க³த்³ரப⁴வஸ’’ந்தி (மஹாவ. 262) ஏவம் அனுஞ்ஞாதவஸானம் தேலம். ஏத்த² ச ‘‘அச்ச²வஸ’’ந்தி வசனேன ட²பேத்வா மனுஸ்ஸவஸம் ஸப்³பே³ஸம் அகப்பியமம்ஸானம் வஸா அனுஞ்ஞாதா. மச்ச²க்³க³ஹணேன ச ஸுஸுகாபி க³ஹிதா ஹோந்தி, வாளமச்ச²த்தா பன விஸும் வுத்தம். மச்சா²தி³க்³க³ஹணேன சேத்த² ஸப்³பே³ஸம்பி கப்பியமம்ஸானம் வஸா அனுஞ்ஞாதா. மம்ஸேஸு ஹி த³ஸ மனுஸ்ஸஹத்தி²அஸ்ஸஸுனக²அஹிஸீஹப்³யக்³க⁴தீ³பிஅச்ச²தரச்சா²னம் மம்ஸானி அகப்பியானி, வஸாஸு ஏகா மனுஸ்ஸவஸா. கீ²ராதீ³ஸு அகப்பியம் நாம நத்தி². அனுபஸம்பன்னேஹி கதம் நிப்³ப³ட்டிதம் வஸாதேலம் புரேப⁴த்தம் படிக்³க³ஹிதம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸமேவ வட்டதி. யம் பன தத்த² ஸுகு²மரஜஸதி³ஸம் மம்ஸம் வா ந்ஹாரு வா அட்டி² வா லோஹிதம் வா ஹோதி, தம் அப்³போ³ஹாரிகம். ஸசே பன வஸம் படிக்³க³ஹேத்வா ஸயம் கரோதி, புரேப⁴த்தம் படிக்³க³ஹேத்வா பசித்வா பரிஸ்ஸாவேத்வா ஸத்தாஹம் நிராமிஸபரிபோ⁴கே³ன பரிபு⁴ஞ்ஜிதப்³ப³ம். நிராமிஸபரிபோ⁴க³ஞ்ஹி ஸந்தா⁴ய இத³ம் வுத்தம் ‘‘காலே படிக்³க³ஹிதம் காலே நிப்பக்கம் காலே ஸம்ஸட்ட²ம் தேலபரிபோ⁴கே³ன பரிபு⁴ஞ்ஜிது’’ந்தி (மஹாவ. 262). தத்ராபி அப்³போ³ஹாரிகம் அப்³போ³ஹாரிகமேவ, பச்சா²ப⁴த்தம் பன படிக்³க³ஹேதும் வா காதும் வா ந வட்டதியேவ. வுத்தஞ்ஹேதம் –

‘‘விகாலே சே, பி⁴க்க²வே, படிக்³க³ஹிதம் விகாலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி திண்ணம் து³க்கடானம். காலே சே, பி⁴க்க²வே, படிக்³க³ஹிதம் விகாலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி த்³வின்னம் து³க்கடானம். காலே சே, பி⁴க்க²வே, படிக்³க³ஹிதம் காலே நிப்பக்கம் விகாலே ஸம்ஸட்ட²ம், தம் சே பரிபு⁴ஞ்ஜேய்ய, ஆபத்தி து³க்கடஸ்ஸ. காலே சே, பி⁴க்க²வே, படிக்³க³ஹிதம் காலே நிப்பக்கம் காலே ஸம்ஸட்ட²ம், தம் சே பரிபு⁴ஞ்ஜேய்ய, அனாபத்தீ’’தி (மஹாவ. 262).

உபதிஸ்ஸத்தே²ரம் பன அந்தேவாஸிகா புச்சி²ம்ஸு ‘‘ப⁴ந்தே, ஸப்பினவனீதவஸானி ஏகதோ பசித்வா நிப்³ப³ட்டிதானி வட்டந்தி, ந வட்டந்தீ’’தி? ‘‘ந வட்டந்தி, ஆவுஸோ’’தி. தே²ரோ கிரேத்த² பக்கதேலகஸடே விய குக்குச்சாயதி. ததோ நம் உத்தரி புச்சி²ம்ஸு ‘‘ப⁴ந்தே, நவனீதே த³தி⁴கு³ளிகா வா தக்கபி³ந்து³ வா ஹோதி, ஏதம் வட்டதீ’’தி? ‘‘ஏதம்பி, ஆவுஸோ, ந வட்டதீ’’தி. ததோ நம் ஆஹம்ஸு ‘‘ப⁴ந்தே, ஏகதோ பசித்வா ஏகதோ ஸம்ஸட்டா²னி தேஜவந்தானி ஹோந்தி, ரோக³ம் நிக்³க³ண்ஹந்தீ’’தி. ‘‘ஸாதா⁴வுஸோ’’தி தே²ரோ ஸம்படிச்சி². மஹாஸுமத்தே²ரோ பனாஹ ‘‘கப்பியமம்ஸவஸாவ ஸாமிஸபரிபோ⁴கே³ வட்டதி, இதரா நிராமிஸபரிபோ⁴கே³ வட்டதீ’’தி. மஹாபது³மத்தே²ரோ பன ‘‘இத³ம் கி’’ந்தி படிக்கி²பித்வா ‘‘நனு வாதாபா³தி⁴கா பி⁴க்கூ² பஞ்சமூலகஸாவயாகு³யம் அச்ச²ஸூகரதேலாதீ³னி பக்கி²பித்வா யாகு³ம் பிவந்தி, ஸா தேஜுஸ்ஸத³த்தா ரோக³ம் நிக்³க³ண்ஹாதீ’’தி வத்வா ‘‘வட்டதீ’’தி ஆஹ.

97. மது⁴ நாம மது⁴கரீஹி மது⁴மக்கி²காஹி கு²த்³த³கமக்கி²காஹி ப⁴மரமக்கி²காஹி ச கதம் மது⁴. தம் புரேப⁴த்தம் படிக்³க³ஹிதம் புரேப⁴த்தம் ஸாமிஸபரிபோ⁴க³ம்பி வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸபரிபோ⁴க³மேவ வட்டதி, ஸத்தாஹாதிக்கமே நிஸ்ஸக்³கி³யம். ஸசே ஸிலேஸஸதி³ஸம் மஹாமது⁴ம் க²ண்ட³ம் கத்வா ட²பிதம், இதரம் வா நானாபா⁴ஜனேஸு, வத்து²க³ணனாய நிஸ்ஸக்³கி³யானி. ஸசே ஏகமேவ க²ண்ட³ம், ஏகபா⁴ஜனே வா இதரம், ஏகமேவ நிஸ்ஸக்³கி³யம். உக்³க³ஹிதகம் வுத்தனயேனேவ வேதி³தப்³ப³ம், அருமக்க²னாதீ³ஸு உபனேதப்³ப³ம். மது⁴படலம் வா மது⁴ஸித்த²கம் வா ஸசே மது⁴னா அமக்கி²தம் பரிஸுத்³த⁴ம், யாவஜீவிகம், மது⁴மக்கி²தம் பன மது⁴க³திகமேவ. சீரிகா நாம ஸபக்கா² தீ³க⁴மக்கி²கா தும்ப³ளனாமிகா ச அட்டி²பக்கி²கா காளமஹாப⁴மரா ஹோந்தி, தேஸம் ஆஸயேஸு நிய்யாஸஸதி³ஸம் மது⁴ ஹோதி, தம் யாவஜீவிகம்.

98. பா²ணிதம் நாம உச்சு²ரஸம் உபாதா³ய அபக்கா வா அவத்து²கபக்கா வா ஸப்³பா³பி அவத்து²கா உச்சு²விகதி. தம் பா²ணிதம் புரேப⁴த்தம் படிக்³க³ஹிதம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸமேவ வட்டதி, ஸத்தாஹாதிக்கமே வத்து²க³ணனாய நிஸ்ஸக்³கி³யம். ப³ஹூ பிண்டா³ சுண்ணே கத்வா ஏகபா⁴ஜனே பக்கி²த்தா ஹோந்தி க⁴னஸன்னிவேஸா, ஏகமேவ நிஸ்ஸக்³கி³யம். உக்³க³ஹிதகம் வுத்தனயேனேவ வேதி³தப்³ப³ம், க⁴ரதூ⁴பனாதீ³ஸு உபனேதப்³ப³ம். புரேப⁴த்தம் படிக்³க³ஹிதேன அபரிஸ்ஸாவிதஉச்சு²ரஸேன கதபா²ணிதம் ஸசே அனுபஸம்பன்னேன கதம், ஸாமிஸம்பி வட்டதி, ஸயம்கதம் நிராமிஸமேவ வட்டதி, பச்சா²ப⁴த்ததோ பட்டா²ய பன ஸவத்து²கபடிக்³க³ஹிதத்தா அனஜ்ஜோ²ஹரணீயம், ஸத்தாஹாதிக்கமேபி அனாபத்தி. பச்சா²ப⁴த்தம் அபரிஸ்ஸாவிதபடிக்³க³ஹிதேன கதம்பி அனஜ்ஜோ²ஹரணீயமேவ, ஸத்தாஹாதிக்கமேபி அனாபத்தி. ஏஸ நயோ உச்சு²ம் படிக்³க³ஹேத்வா கதபா²ணிதேபி. புரேப⁴த்தம் பன பரிஸ்ஸாவிதபடிக்³க³ஹிதேன கதம் ஸசே அனுபஸம்பன்னேன கதம், புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸமேவ. ஸயம்கதம் புரேப⁴த்தம்பி நிராமிஸமேவ, பச்சா²ப⁴த்தம் பரிஸ்ஸாவிதபடிக்³க³ஹிதேன கதம் பன நிராமிஸமேவ ஸத்தாஹம் வட்டதி. உக்³க³ஹிதகதம் வுத்தனயமேவ. ‘‘ஜா²மஉச்சு²பா²ணிதம் வா கோட்டிதஉச்சு²பா²ணிதம் வா புரேப⁴த்தமேவ வட்டதீ’’தி மஹாஅட்ட²கதா²யம் வுத்தம். மஹாபச்சரியம் பன ‘‘ஏதம் ஸவத்து²கபக்கம் வட்டதி, நோ வட்டதீ’’தி புச்ச²ம் கத்வா ‘‘உச்சு²பா²ணிதம் பச்சா²ப⁴த்தம் நோ வட்டனகம் நாம நத்தீ²’’தி வுத்தம், தம் யுத்தம். ஸீதோத³கேன கதம் மது⁴கபுப்ப²பா²ணிதம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸமேவ வட்டதி, ஸத்தாஹாதிக்கமே வத்து²க³ணனாய து³க்கடம், கீ²ரம் பக்கி²பித்வா கதம் மது⁴கபா²ணிதம் யாவகாலிகம். க²ண்ட³ஸக்க²ரம் பன கீ²ரஜல்லிகம் அபனேத்வா ஸோதே⁴ந்தி, தஸ்மா வட்டதி.

99. மது⁴கபுப்ப²ம் பன புரேப⁴த்தம்பி அல்லம் வட்டதி. ப⁴ஜ்ஜிதம்பி வட்டதி, ப⁴ஜ்ஜித்வா திலாதீ³ஹி மிஸ்ஸம் வா அமிஸ்ஸம் வா கத்வா கோட்டிதம் வட்டதி. யதி³ பன தம் க³ஹேத்வா மேரயத்தா²ய யோஜேந்தி, யோஜிதம் பீ³ஜதோ பட்டா²ய ந வட்டதி. கத³லீக²ஜ்ஜூரீஅம்ப³லபு³ஜபனஸசிஞ்சாதீ³னம் ஸப்³பே³ஸம் யாவகாலிகப²லானம் பா²ணிதம் யாவகாலிகமேவ. மரிசபக்கேஹி பா²ணிதம் கரோந்தி, தம் யாவஜீவிகம். ஏவம் யதா²வுத்தானி ஸத்தாஹகாலிகானி ஸப்பிஆதீ³னி பஞ்ச ‘‘அனுஜானாமி, பி⁴க்க²வே, பஞ்ச பே⁴ஸஜ்ஜானீ’’தி (மஹாவ. 260) பே⁴ஸஜ்ஜனாமேன அனுஞ்ஞாதத்தா பே⁴ஸஜ்ஜகிச்சம் கரோந்து வா மா வா, ஆஹாரத்த²ம் ப²ரிதும் ஸமத்தா²னிபி படிக்³க³ஹேத்வா தத³ஹுபுரேப⁴த்தம் யதா²ஸுக²ம், பச்சா²ப⁴த்ததோ பட்டா²ய ஸதி பச்சயே வுத்தனயேன ஸத்தாஹம் பரிபு⁴ஞ்ஜிதப்³பா³னி, ஸத்தாஹாதிக்கமே பன பே⁴ஸஜ்ஜஸிக்கா²பதே³ன நிஸ்ஸக்³கி³யம் பாசித்தியம். ஸசேபி ஸாஸபமத்தம் ஹோதி, ஸகிம் வா அங்கு³லியா க³ஹேத்வா ஜிவ்ஹாய ஸாயனமத்தம், நிஸ்ஸஜ்ஜிதப்³ப³மேவ பாசித்தியஞ்ச தே³ஸேதப்³ப³ம். நிஸ்ஸட்ட²ம் படிலபி⁴த்வா ந அஜ்ஜோ²ஹரிதப்³ப³ம், ந காயிகேன பரிபோ⁴கே³ன பரிபு⁴ஞ்ஜிதப்³ப³ம், காயோ வா காயே அரு வா ந மக்கே²தப்³ப³ம். தேஹி மக்கி²தானி காஸாவகத்தரயட்டி²உபாஹனபாத³கட²லிகமஞ்சபீடா²தீ³னிபி அபரிபோ⁴கா³னி. ‘‘த்³வாரவாதபானகவாடேஸுபி ஹத்தே²ன க³ஹணட்டா²னம் ந மக்கே²தப்³ப³’’ந்தி மஹாபச்சரியம் வுத்தம். ‘‘கஸாவே பன பக்கி²பித்வா த்³வாரவாதபானகவாடானி மக்கே²தப்³பா³னீ’’தி மஹாஅட்ட²கதா²யம் வுத்தம். பதீ³பே வா காளவண்ணே வா உபனேதும் வட்டதி. அஞ்ஞேன பன பி⁴க்கு²னா காயிகேன பரிபோ⁴கே³ன பரிபு⁴ஞ்ஜிதப்³ப³ம், ந அஜ்ஜோ²ஹரிதப்³ப³ம். ‘‘அனாபத்தி அந்தோஸத்தாஹம் அதி⁴ட்டே²தீ’’தி (பாரா. 625) வசனதோ பன ஸத்தாஹப்³ப⁴ந்தரே ஸப்பிஞ்ச தேலஞ்ச வஸஞ்ச முத்³த⁴னி தேலம் வா அப்³ப⁴ஞ்ஜனம் வா மது⁴ம் அருமக்க²னம் பா²ணிதம் க⁴ரதூ⁴பனம் அதி⁴ட்டே²தி அனாபத்தி, நேவ நிஸ்ஸக்³கி³யம் ஹோதி. ஸசே அதி⁴ட்டி²ததேலம் அனதி⁴ட்டி²ததேலபா⁴ஜனே ஆகிரிதுகாமோ ஹோதி, பா⁴ஜனே சே ஸுகு²மம் சி²த்³த³ம், பவிட்ட²ம் பவிட்ட²ம் தேலம் புராணதேலேன அஜ்ஜோ²த்த²ரீயதி, புன அதி⁴ட்டா²தப்³ப³ம். அத² மஹாமுக²ம் ஹோதி, ஸஹஸாவ ப³ஹு தேலம் பவிஸித்வா புராணதேலம் அஜ்ஜோ²த்த²ரதி, புன அதி⁴ட்டா²னகிச்சம் நத்தி². அதி⁴ட்டி²தக³திகமேவ ஹி தம் ஹோதி. ஏதேன நயேன அதி⁴ட்டி²ததேலபா⁴ஜனே அனதி⁴ட்டி²ததேலஆகிரணம்பி வேதி³தப்³ப³ம்.

ஸசே பன ஸத்தாஹாதிக்கந்தம் அனுபஸம்பன்னஸ்ஸ பரிச்சஜித்வா தே³தி, புன தேன அத்தனோ ஸந்தகம் கத்வா தி³ன்னம் பரிபு⁴ஞ்ஜிதும் வட்டதி. ஸசே ஹி ஸோ அபி⁴ஸங்க²ரித்வா வா அனபி⁴ஸங்க²ரித்வா வா தஸ்ஸ பி⁴க்கு²னோ நத்து²கம்மத்த²ம் த³தே³ய்ய, க³ஹேத்வா நத்து²கம்மம் காதப்³ப³ம். ஸசே பா³லோ ஹோதி, தா³தும் ந ஜானாதி, அஞ்ஞேன பி⁴க்கு²னா வத்தப்³போ³ ‘‘அத்தி² தே ஸாமணேர தேல’’ந்தி? ‘‘ஆம, ப⁴ந்தே, அத்தீ²’’தி. ஆஹர தே²ரஸ்ஸ பே⁴ஸஜ்ஜம் கரிஸ்ஸாமாதி. ஏவம்பி வட்டதி. ஸசே த்³வின்னம் ஸந்தகம் ஏகேன படிக்³க³ஹிதம் அவிப⁴த்தம் ஹோதி, ஸத்தாஹாதிக்கமே த்³வின்னம்பி அனாபத்தி, பரிபு⁴ஞ்ஜிதும் பன ந வட்டதி. ஸசே யேன படிக்³க³ஹிதம், ஸோ இதரம் ப⁴ணதி ‘‘ஆவுஸோ, இமம் தேலம் ஸத்தாஹமத்தம் பரிபு⁴ஞ்ஜிதும் வட்டதீ’’தி, ஸோ ச பரிபோ⁴க³ம் ந கரோதி, கஸ்ஸ ஆபத்தி? ந கஸ்ஸசி. கஸ்மா? யேன படிக்³க³ஹிதம், தேன விஸ்ஸஜ்ஜிதத்தா, இதரஸ்ஸ அப்படிக்³க³ஹிதத்தா.

100. இமேஸு (மஹாவ. அட்ட². 305) பன சதூஸு காலிகேஸு யாவகாலிகம் யாமகாலிகந்தி இத³மேவ த்³வயம் அந்தோவுத்த²கஞ்சேவ ஸன்னிதி⁴காரகஞ்ச ஹோதி, ஸத்தாஹகாலிகஞ்ச யாவஜீவிகஞ்ச அகப்பியகுடியம் நிக்கி²பிதும்பி வட்டதி, ஸன்னிதி⁴ம்பி ந ஜனேதி. யாவகாலிகம் பன அத்தனா ஸத்³தி⁴ம் ஸம்பி⁴ன்னரஸானி தீணிபி யாமகாலிகாதீ³னி அத்தனோ ஸபா⁴வம் உபனேதி. யாமகாலிகம் த்³வேபி ஸத்தாஹகாலிகாதீ³னி அத்தனோ ஸபா⁴வம் உபனேதி, ஸத்தாஹகாலிகம்பி அத்தனா ஸத்³தி⁴ம் ஸம்ஸட்ட²ம் யாவஜீவிகம் அத்தனோ ஸபா⁴வஞ்ஞேவ உபனேதி, தஸ்மா யாவகாலிகேன தத³ஹுபடிக்³க³ஹிதேன ஸத்³தி⁴ம் ஸம்ஸட்ட²ம் ஸம்பி⁴ன்னரஸம் ஸேஸகாலிகத்தயம் தத³ஹுபுரேப⁴த்தமேவ வட்டதி. யாமகாலிகேன ஸம்ஸட்ட²ம் பன இதரத்³வயம் தத³ஹுபடிக்³க³ஹிதம் யாவ அருணுக்³க³மனா வட்டதி. ஸத்தாஹகாலிகேன பன தத³ஹுபடிக்³க³ஹிதேன ஸத்³தி⁴ம் ஸம்ஸட்ட²ம் தத³ஹுபடிக்³க³ஹிதம் வா புரேபடிக்³க³ஹிதம் வா யாவஜீவிகம் ஸத்தாஹம் கப்பதி. த்³வீஹபடிக்³க³ஹிதேன சா²ஹம். தீஹபடிக்³க³ஹிதேன பஞ்சாஹம்…பே… ஸத்தாஹபடிக்³க³ஹிதேன தத³ஹேவ கப்பதீதி வேதி³தப்³ப³ம். காலயாமஸத்தாஹாதிக்கமேஸு சேத்த² விகாலபோ⁴ஜனஸன்னிதி⁴பே⁴ஸஜ்ஜஸிக்கா²பதா³னம் வஸேன ஆபத்தியோ வேதி³தப்³பா³.

ஸசே பன ஏகதோ படிக்³க³ஹிதானிபி சத்தாரி காலிகானி ஸம்பி⁴ன்னரஸானி ந ஹோந்தி, தஸ்ஸ தஸ்ஸேவ காலஸ்ஸ வஸேன பரிபு⁴ஞ்ஜிதும் வட்டந்தி. ஸசே ஹி ச²ல்லிம்பி அனபனேத்வா ஸகலேனேவ நாளிகேரப²லேன ஸத்³தி⁴ம் அம்ப³பானாதி³பானகம் படிக்³க³ஹிதம் ஹோதி, நாளிகேரம் அபனேத்வா தம் விகாலேபி கப்பதி. உபரி ஸப்பிபிண்ட³ம் ட²பேத்வா ஸீதலபாயாஸம் தே³ந்தி, யம் பாயாஸேன அஸம்ஸட்ட²ம் ஸப்பி, தம் அபனேத்வா ஸத்தாஹம் பரிபு⁴ஞ்ஜிதும் வட்டதி. த²த்³த⁴மது⁴பா²ணிதாதீ³ஸுபி ஏஸேவ நயோ. தக்கோலஜாதிப²லாதீ³ஹி அலங்கரித்வா பிண்ட³பாதம் தே³ந்தி, தானி உத்³த⁴ரித்வா தோ⁴வித்வா யாவஜீவம் பரிபு⁴ஞ்ஜிதப்³பா³னி. யாகு³யம் பக்கி²பித்வா தி³ன்னஸிங்கி³வேராதீ³ஸுபி தேலாதீ³ஸு பக்கி²பித்வா தி³ன்னலட்டி²மது⁴காதீ³ஸுபி ஏஸேவ நயோ. ஏவம் யம் யம் அஸம்பி⁴ன்னரஸம் ஹோதி, தம் தம் ஏகதோ படிக்³க³ஹிதம்பி யதா² ஸுத்³த⁴ம் ஹோதி, ததா² தோ⁴வித்வா தச்சே²த்வா வா தஸ்ஸ தஸ்ஸ காலஸ்ஸ வஸேன பரிபு⁴ஞ்ஜிதும் வட்டதி. ஸசே ஸம்பி⁴ன்னரஸம் ஹோதி ஸம்ஸட்ட²ம், ந வட்டதி.

இதி பாளிமுத்தகவினயவினிச்ச²யஸங்க³ஹே

காலிகவினிச்ச²யகதா² ஸமத்தா.