17. மஞ்சபீடா²தி³ஸங்கி⁴கஸேனாஸனேஸு படிபஜ்ஜிதப்³ப³வினிச்ச²யகதா²

82. விஹாரே ஸங்கி⁴கே ஸேய்யம், ஸந்த²ரித்வான பக்கமோதி ஸங்கி⁴கே விஹாரே ஸேய்யம் ஸந்த²ரித்வான அஞ்ஞத்த² வஸிதுகாமதாய விஹாரதோ பக்கமனம். தத்ராயம் வினிச்ச²யோ –

‘‘யோ பன பி⁴க்கு² ஸங்கி⁴கே விஹாரே ஸேய்யம் ஸந்த²ரித்வா வா ஸந்த²ராபேத்வா வா தம் பக்கமந்தோ நேவ உத்³த⁴ரேய்ய ந உத்³த⁴ராபேய்ய அனாபுச்ச²ம் வா க³ச்சே²ய்ய, பாசித்திய’’ந்தி (பாசி. 115) –

வசனதோ ஸங்கி⁴கே விஹாரே ஸேய்யம் ஸயம் ஸந்த²ரித்வா அஞ்ஞேன வா ஸந்த²ராபேத்வா உத்³த⁴ரணாதீ³னி அகத்வா பரிக்கி²த்தஸ்ஸ ஆராமஸ்ஸ பரிக்கே²பம், அபரிக்கி²த்தஸ்ஸ உபசாரம் அதிக்கமந்தஸ்ஸ பாசித்தியம்.

தத்த² ஸேய்யா நாம பி⁴ஸி சிமிலிகா உத்தரத்த²ரணம் பூ⁴மத்த²ரணம் தட்டிகா சம்மக²ண்டோ³ நிஸீத³னம் பச்சத்த²ரணம் திணஸந்தா²ரோ பண்ணஸந்தா²ரோதி த³ஸவிதா⁴. தத்த² பி⁴ஸீதி மஞ்சகபி⁴ஸி வா பீட²கபி⁴ஸி வா. சிமிலிகா நாம ஸுதா⁴தி³பரிகம்மகதாய பூ⁴மியா வண்ணானுரக்க²ணத்த²ம் கதா, தம் ஹேட்டா² பத்த²ரித்வா உபரி கடஸாரகம் பத்த²ரந்தி. உத்தரத்த²ரணம் நாம மஞ்சபீடா²னம் உபரி அத்த²ரிதப்³ப³கபச்சத்த²ரணம். பூ⁴மத்த²ரணம் நாம பூ⁴மியம் அத்த²ரிதப்³பா³ கடஸாரகாதி³விகதி. தட்டிகா நாம தாலபண்ணேஹி வா வாகேஹி வா கததட்டிகா. சம்மக²ண்டோ³ நாம ஸீஹப்³யக்³க⁴தீ³பிதரச்ச²சம்மாதீ³ஸுபி யம் கிஞ்சி சம்மம். அட்ட²கதா²ஸு ஹி ஸேனாஸனபரிபோ⁴கே³ படிக்கி²த்தசம்மம் ந தி³ஸ்ஸதி, தஸ்மா ஸீஹப்³யக்³க⁴சம்மாதீ³னம் பரிஹரணேயேவ படிக்கே²போ வேதி³தப்³போ³. நிஸீத³னந்தி ஸத³ஸம் வேதி³தப்³ப³ம். பச்சத்த²ரணந்தி பாவாரோ கோஜவோதி ஏத்தகமேவ வுத்தம். திணஸந்தா²ரோதி யேஸம் கேஸஞ்சி திணானம் ஸந்தா²ரோ. ஏஸ நயோ பண்ணஸந்தா²ரேபி. ஏவம் பன இமம் த³ஸவித⁴ம் ஸேய்யம் ஸங்கி⁴கே விஹாரே ஸந்த²ரித்வா வா ஸந்த²ராபேத்வா வா பக்கமந்தேன ஆபுச்சி²த்வா பக்கமிதப்³ப³ம், ஆபுச்ச²ந்தேன ச பி⁴க்கு²ம்ஹி ஸதி பி⁴க்கு² ஆபுச்சி²தப்³போ³, தஸ்மிம் அஸதி ஸாமணேரோ, தஸ்மிம் அஸதி ஆராமிகோ, தஸ்மிம் அஸதி யேன விஹாரோ காரிதோ, ஸோ விஹாரஸாமிகோ, தஸ்ஸ வா குலே யோ கோசி ஆபுச்சி²தப்³போ³, தஸ்மிம்பி அஸதி சதூஸு பாஸாணேஸு மஞ்சம் ட²பேத்வா மஞ்சே அவஸேஸமஞ்சபீடா²னி ஆரோபேத்வா உபரி பி⁴ஸிஆதி³கம் த³ஸவித⁴ம்பி ஸேய்யம் ராஸிம் கத்வா தா³ருப⁴ண்ட³ம் மத்திகாப⁴ண்ட³ம் படிஸாமேத்வா த்³வாரவாதபானானி பித³ஹித்வா க³மியவத்தம் பூரேத்வா க³ந்தப்³ப³ம்.

ஸசே பன ஸேனாஸனம் ஓவஸ்ஸதி, ச²த³னத்த²ஞ்ச திணம் வா இட்ட²கா வா ஆனீதா ஹோந்தி, ஸசே உஸ்ஸஹதி, சா²தே³தப்³ப³ம். நோ சே ஸக்கோதி, யோ ஓகாஸோ அனோவஸ்ஸகோ, தத்த² மஞ்சபீடா²தீ³னி நிக்கி²பித்வா க³ந்தப்³ப³ம். ஸசே ஸப்³ப³ம்பி ஓவஸ்ஸதி, உஸ்ஸஹந்தேன அந்தோகா³மே உபாஸகானம் க⁴ரே ட²பேதப்³ப³ம். ஸசே தேபி ‘‘ஸங்கி⁴கம் நாம, ப⁴ந்தே, பா⁴ரியம், அக்³கி³தா³ஹாதீ³னம் பா⁴யாமா’’தி ந ஸம்படிச்ச²ந்தி, அப்³போ⁴காஸேபி பாஸாணானம் உபரி மஞ்சம் ட²பேத்வா ஸேஸம் புப்³பே³ வுத்தனயேனேவ நிக்கி²பித்வா திணேஹி ச பண்ணேஹி ச படிச்சா²தே³த்வா க³ந்தும் வட்டதி. யஞ்ஹி தத்த² அங்க³மத்தம்பி அவஸிஸ்ஸதி, தம் அஞ்ஞேஸம் தத்த² ஆக³தபி⁴க்கூ²னம் உபகாரம் ப⁴விஸ்ஸதீதி. உத்³த⁴ரித்வா க³ச்ச²ந்தேன பன மஞ்சபீட²கவாடம் ஸப்³ப³ம் அபனேத்வா ஸம்ஹரித்வா சீவரவம்ஸே லக்³கே³த்வாவ க³ந்தப்³ப³ம். பச்சா² ஆக³ந்த்வா வஸனகபி⁴க்கு²னாபி புன மஞ்சபீட²ம் ட²பயித்வா க³ச்ச²ந்தேன ததே²வ காதப்³ப³ம். அந்தோகுட்டதோ ஸேய்யம் ப³ஹிகுட்டே பஞ்ஞபேத்வா வஸந்தேன க³மனகாலே புன க³ஹிதட்டா²னேயேவ படிஸாமேதப்³ப³ம். உபரிபாஸாத³தோ ஓரோபேத்வா ஹேட்டா²பாஸாதே³ வஸந்தஸ்ஸபி ஏஸேவ நயோ. ரத்திட்டா²னதி³வாட்டா²னேஸு மஞ்சபீட²ம் பஞ்ஞபேத்வா ப³ஹிக³மனகாலே புன க³ஹிதட்டா²னேயேவ ட²பேதப்³ப³ம்.

83. ஸேனாஸனேஸு பன அயம் ஆபுச்சி²தப்³பா³னாபுச்சி²தப்³ப³வினிச்ச²யோ – யா தாவ பூ⁴மியம் தீ³க⁴ஸாலா வா பண்ணஸாலா வா ஹோதி, யம் வா ருக்க²த்த²ம்பே⁴ஸு கதகே³ஹம் உபசிகானம் உட்டா²னட்டா²னம் ஹோதி, ததோ பக்கமந்தேன தாவ ஆபுச்சி²த்வாவ பக்கமிதப்³ப³ம். தஸ்மிஞ்ஹி கதிபயானி தி³வஸானி அஜக்³கி³யமானே வம்மிகாவ ஸந்திட்ட²ந்தி. யம் பன பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம் ஸிலுச்சயலேணம் வா ஸுதா⁴லித்தஸேனாஸனம் வா, யத்த² யத்த² உபசிகாஸங்கா நத்தி², ததோ பக்கமந்தஸ்ஸ ஆபுச்சி²த்வாபி அனாபுச்சி²த்வாபி க³ந்தும் வட்டதி, ஆபுச்ச²னம் பன வத்தம். ஸசே தாதி³ஸேபி ஸேனாஸனே ஏகேன பஸ்ஸேன உபசிகா ஆரோஹந்தி, ஆபுச்சி²த்வாவ க³ந்தப்³ப³ம். யோ பன ஆக³ந்துகோ பி⁴க்கு² ஸங்கி⁴கஸேனாஸனம் க³ஹேத்வாவ ஸந்தம் பி⁴க்கு²ம் அனுவத்தந்தோ அத்தனோ ஸேனாஸனம் அக்³க³ஹேத்வா வஸதி, யாவ ஸோ ந க³ண்ஹாதி, தாவ தம் ஸேனாஸனம் புரிமபி⁴க்கு²ஸ்ஸேவ பலிபோ³தோ⁴. யதா³ பன ஸோ ஸேனாஸனம் க³ஹேத்வா அத்தனோ இஸ்ஸரியேன வஸதி, ததோ பட்டா²ய ஆக³ந்துகஸ்ஸேவ பலிபோ³தோ⁴. ஸசே உபோ⁴பி விப⁴ஜித்வா க³ண்ஹந்தி, உபி⁴ன்னம்பி பலிபோ³தோ⁴.

மஹாபச்சரியம் பன வுத்தம் – ஸசே த்³வே தயோ ஏகதோ ஹுத்வா பஞ்ஞபேந்தி, க³மனகாலே ஸப்³பே³ஹி ஆபுச்சி²தப்³ப³ம். தேஸு சே பட²மம் க³ச்ச²ந்தோ ‘‘பச்சி²மோ ஜக்³கி³ஸ்ஸதீ’’தி ஆபோ⁴க³ம் கத்வா க³ச்ச²தி, வட்டதி, பச்சி²மஸ்ஸ ஆபோ⁴கே³ன முத்தி நத்தி². ப³ஹூ ஏகம் பேஸேத்வா ஸந்த²ராபேந்தி, க³மனகாலே ஸப்³பே³ஹி வா ஆபுச்சி²தப்³ப³ம், ஏகம் வா பேஸேத்வா ஆபுச்சி²தப்³ப³ம். அஞ்ஞதோ மஞ்சபீடா²தீ³னி ஆனேத்வா அஞ்ஞத்ர வஸித்வா க³மனகாலே தத்தே²வ நேதப்³பா³னி. ஸசே அஞ்ஞதோ ஆனேத்வா வஸமானஸ்ஸ அஞ்ஞோ வுட்³ட⁴தரோ ஆக³ச்ச²தி, ந படிபா³ஹிதப்³போ³, ‘‘மயா, ப⁴ந்தே, அஞ்ஞாவாஸதோ ஆனீதம், பாகதிகம் கரேய்யாதா²’’தி வத்தப்³ப³ம். தேன ‘‘ஏவம் கரிஸ்ஸாமீ’’தி ஸம்படிச்சி²தே இதரஸ்ஸ க³ந்தும் வட்டதி. ஏவம் அஞ்ஞத்த² ஹரித்வாபி ஸங்கி⁴கபரிபோ⁴கே³ன பரிபு⁴ஞ்ஜந்தஸ்ஸ ஹி நட்ட²ம் வா ஜிண்ணம் வா சோரேஹி வா ஹடம் கீ³வா நேவ ஹோதி, புக்³க³லிகபரிபோ⁴கே³ன பரிபு⁴ஞ்ஜந்தஸ்ஸ பன கீ³வா ஹோதி. அஞ்ஞஸ்ஸ மஞ்சபீட²ம் பன ஸங்கி⁴கபரிபோ⁴கே³ன வா புக்³க³லிகபரிபோ⁴கே³ன வா பரிபு⁴ஞ்ஜந்தஸ்ஸ நட்ட²ம் கீ³வாயேவ. அந்தோவிஹாரே ஸேய்யம் ஸந்த²ரித்வா ‘‘அஜ்ஜேவ ஆக³ந்த்வா படிஜக்³கி³ஸ்ஸாமீ’’தி ஏவம் ஸாபேக்கோ² நதீ³பாரம் கா³மந்தரம் வா க³ந்த்வா யத்த²ஸ்ஸ க³மனசித்தம் உப்பன்னம், தத்தே²வ டி²தோ கஞ்சி பேஸேத்வா ஆபுச்ச²தி, நதீ³பூரராஜசோராதீ³ஸு வா கேனசி பலிபோ³தோ⁴ ஹோதி உபத்³து³தோ, ந ஸக்கோதி பச்சாக³ந்தும், ஏவம்பூ⁴தஸ்ஸ அனாபத்தி.

விஹாரஸ்ஸ உபசாரே பன உபட்டா²னஸாலாய வா மண்ட³பே வா ருக்க²மூலே வா ஸேய்யம் ஸந்த²ரித்வா வா ஸந்த²ராபேத்வா வா தம் பக்கமந்தோ நேவ உத்³த⁴ரதி ந உத்³த⁴ராபேதி அனாபுச்ச²ம் வா க³ச்ச²தி, து³க்கடம். வுத்தப்பகாரஞ்ஹி த³ஸவித⁴ம் ஸேய்யம் அந்தோக³ப்³பா⁴தி³ம்ஹி கு³த்தட்டா²னே பஞ்ஞபேத்வா க³ச்ச²ந்தஸ்ஸ யஸ்மா ஸேய்யாபி ஸேனாஸனம்பி உபசிகாஹி பலுஜ்ஜதி, வம்மிகராஸியேவ ஹோதி, தஸ்மா பாசித்தியம் வுத்தம். ப³ஹி பன உபட்டா²னஸாலாதீ³ஸு பஞ்ஞபேத்வா க³ச்ச²ந்தஸ்ஸ ஸேய்யாமத்தமேவ நஸ்ஸேய்ய டா²னஸ்ஸ அகு³த்ததாய, ந ஸேனாஸனம், தஸ்மா ஏத்த² து³க்கடம் வுத்தம். மஞ்சபீட²ம் பன யஸ்மா ந ஸக்கா ஸஹஸா உபசிகாஹி கா²யிதும், தஸ்மா தம் விஹாரேபி ஸந்த²ரித்வா க³ச்ச²ந்தஸ்ஸ து³க்கடம். விஹாரஸ்ஸூபசாரே உபட்டா²னஸாலாயம் மண்ட³பே ருக்க²மூலேபி ஸந்த²ரித்வா பக்கமந்தஸ்ஸ து³க்கடமேவ.

84. ‘‘யோ பன பி⁴க்கு² ஸங்கி⁴கம் மஞ்சம் வா பீட²ம் வா பி⁴ஸிம் வா கோச்ச²ம் வா அஜ்ஜோ²காஸே ஸந்த²ரித்வா வா ஸந்த²ராபேத்வா வா தம் பக்கமந்தோ நேவ உத்³த⁴ரேய்ய ந உத்³த⁴ராபேய்ய அனாபுச்ச²ம் வா க³ச்சே²ய்ய, பாசித்திய’’ந்தி (பாசி. 109) வசனதோ ஸங்கி⁴கானி பன மஞ்சபீடா²தீ³னி சத்தாரி அஜ்ஜோ²காஸே ஸந்த²ரித்வா வா ஸந்த²ராபேத்வா வா உத்³த⁴ரணாதீ³னி அகத்வா ‘‘அஜ்ஜேவ ஆக³மிஸ்ஸாமீ’’தி க³ச்ச²ந்தஸ்ஸபி தா²மமஜ்ஜி²மஸ்ஸ புரிஸஸ்ஸ லேட்³டு³பாதாதிக்கமே பாசித்தியம். ஏத்த² கோச்ச²ம் நாம வாகமயம் வா உஸீரமயம் வா முஞ்ஜமயம் வா பப்³ப³ஜமயம் வா ஹேட்டா² ச உபரி ச வித்த²தம் மஜ்ஜே² ஸம்கி²த்தம் பணவஸண்டா²னம் கத்வா ப³த்³த⁴ம். தம் கிர மஜ்ஜே² ஸீஹப்³யக்³க⁴சம்மபரிக்கி²த்தம்பி கரோந்தி, அகப்பியசம்மம் நாமேத்த² நத்தி². ஸேனாஸனஞ்ஹி ஸோவண்ணமயம்பி வட்டதி, தஸ்மா தம் மஹக்³க⁴ம் ஹோதி.

‘‘அனுஜானாமி, பி⁴க்க²வே, அட்ட² மாஸே அவஸ்ஸிகஸங்கேதே மண்ட³பே வா ருக்க²மூலே வா யத்த² காகா வா குலலா வா ந ஊஹத³ந்தி, தத்த² ஸேனாஸனம் நிக்கி²பிது’’ந்தி (பாசி. 110) வசனதோ பன வஸ்ஸிகவஸ்ஸானமாஸாதி ஏவம் அபஞ்ஞாதே சத்தாரோ ஹேமந்திகே, சத்தாரோ கி³ம்ஹிகேதி அட்ட² மாஸே ஸாகா²மண்ட³பே வா பத³ரமண்ட³பே வா ருக்க²மூலே வா நிக்கி²பிதும் வட்டதி. யஸ்மிம் பன காகா வா குலலா வா அஞ்ஞே வா ஸகுந்தா து⁴வனிவாஸேன குலாவகே கத்வா வஸந்தி, தஸ்ஸ ருக்க²ஸ்ஸ மூலே ந நிக்கி²பிதப்³ப³ம். ‘‘அட்ட² மாஸே’’தி வசனதோ யேஸு ஜனபதே³ஸு வஸ்ஸகாலே ந வஸ்ஸதி, தேஸு சத்தாரோ மாஸே நிக்கி²பிதும் ந வட்டதியேவ. ‘‘அவஸ்ஸிகஸங்கேதே’’தி வசனதோ யத்த² ஹேமந்தே தே³வோ வஸ்ஸதி, தத்த² ஹேமந்தேபி அஜ்ஜோ²காஸே நிக்கி²பிதும் ந வட்டதி. கி³ம்ஹே பன ஸப்³ப³த்த² விக³தவலாஹகம் விஸுத்³த⁴ம் நதம் ஹோதி, ஏவரூபே காலே கேனசிதே³வ கரணீயேன அஜ்ஜோ²காஸே மஞ்சபீட²ம் நிக்கி²பிதும் வட்டதி.

85. அப்³போ⁴காஸிகேனபி வத்தம் ஜானிதப்³ப³ம். தஸ்ஸ ஹி ஸசே புக்³க³லிகமஞ்சகோ அத்தி², தத்தே²வ ஸயிதப்³ப³ம். ஸங்கி⁴கம் க³ண்ஹந்தேன வேத்தேன வா வாகேன வா வீதமஞ்சகோ க³ஹேதப்³போ³, தஸ்மிம் அஸதி புராணமஞ்சகோ க³ஹேதப்³போ³, தஸ்மிம் அஸதி நவவாயிமோ வா ஓனத்³த⁴கோ வா க³ஹேதப்³போ³. க³ஹேத்வா பன ‘‘அஹம் உக்கட்ட²ருக்க²மூலிகோ உக்கட்ட²அப்³போ⁴காஸிகோ’’தி சீவரகுடிம்பி அகத்வா அஸமயே அஜ்ஜோ²காஸே வா ருக்க²மூலே வா பஞ்ஞபேத்வா நிபஜ்ஜிதும் ந வட்டதி. ஸசே பன சதுக்³கு³ணேனபி சீவரேன கதா குடி அதேமேந்தம் ரக்கி²தும் ந ஸக்கோதி, ஸத்தாஹவத்³த³லிகாதீ³னி ப⁴வந்தி, பி⁴க்கு²னோ காயானுக³திகத்தா வட்டதி. அரஞ்ஞே பண்ணகுடீஸு வஸந்தானம் ஸீலஸம்பதா³ய பஸன்னசித்தா மனுஸ்ஸா நவம் மஞ்சபீட²ம் தே³ந்தி ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி, வஸித்வா க³ச்ச²ந்தேஹி ஸாமந்தவிஹாரே ஸபா⁴க³பி⁴க்கூ²னம் பேஸேத்வா க³ந்தப்³ப³ம், ஸபா⁴கா³னம் அபா⁴வேன அனோவஸ்ஸகே நிக்கி²பித்வா க³ந்தப்³ப³ம், அனோவஸ்ஸகே அஸதி ருக்கே² லக்³கே³த்வா க³ந்தப்³ப³ம். சேதியங்க³ணே ஸம்மஜ்ஜனிம் க³ஹேத்வா போ⁴ஜனஸாலங்க³ணம் வா உபோஸதா²கா³ரங்க³ணம் வா பரிவேணதி³வாட்டா²னஅக்³கி³ஸாலாதீ³ஸு வா அஞ்ஞதரம் ஸம்மஜ்ஜித்வா தோ⁴வித்வா புன ஸம்மஜ்ஜனிமாளகேயேவ ட²பேதப்³பா³. உபோஸதா²கா³ராதீ³ஸு அஞ்ஞதரஸ்மிம் க³ஹேத்வா அவஸேஸானி ஸம்மஜ்ஜந்தஸ்ஸபி ஏஸேவ நயோ.

யோ பன பி⁴க்கா²சாரமக்³க³ம் ஸம்மஜ்ஜந்தோ க³ந்துகாமோ ஹோதி, தேன ஸம்மஜ்ஜித்வா ஸசே அந்தராமக்³கே³ ஸாலா அத்தி², தத்த² ட²பேதப்³பா³. ஸசே நத்தி², வலாஹகானம் அனுட்டி²தபா⁴வம் ஸல்லக்கே²த்வா ‘‘யாவாஹம் கா³மதோ நிக்க²மாமி, தாவ ந வஸ்ஸிஸ்ஸதீ’’தி ஜானந்தேன யத்த² கத்த²சி நிக்கி²பித்வா புன பச்சாக³ச்ச²ந்தேன பாகதிகட்டா²னே ட²பேதப்³பா³. ‘‘ஸசே வஸ்ஸிஸ்ஸதீதி ஜானந்தோ அஜ்ஜோ²காஸே ட²பேதி, து³க்கட’’ந்தி மஹாபச்சரியம் வுத்தம். ஸசே பன தத்ர தத்ரேவ ஸம்மஜ்ஜனத்தா²ய ஸம்மஜ்ஜனீ நிக்கி²த்தா ஹோதி, தம் தம் டா²னம் ஸம்மஜ்ஜித்வா தத்ர தத்ரேவ நிக்கி²பிதும் வட்டதி, ஆஸனஸாலம் ஸம்மஜ்ஜந்தேன வத்தம் ஜானிதப்³ப³ம். தத்ரித³ம் வத்தம் – மஜ்ஜ²தோ பட்டா²ய பாத³ட்டா²னாபி⁴முகா² வாலிகா ஹரிதப்³பா³, கசவரம் ஹத்தே²ஹி க³ஹேத்வா ப³ஹி ச²ட்³டே³தப்³ப³ம்.

86. ஸசே வுத்தப்பகாரம் சதுப்³பி³த⁴ம்பி ஸங்கி⁴கம் ஸேனாஸனம் அஜ்ஜோ²காஸே வா ருக்க²மூலே வா மண்ட³பே வா அனுபஸம்பன்னேன ஸந்த²ராபேதி, யேன ஸந்த²ராபிதம், தஸ்ஸ பலிபோ³தோ⁴. ஸசே பன உபஸம்பன்னேன ஸந்த²ராபேதி, யேன ஸந்த²தம், தஸ்ஸ பலிபோ³தோ⁴. தத்ராயம் வினிச்ச²யோ (பாசி. அட்ட². 111) – தே²ரோ போ⁴ஜனஸாலாயம் ப⁴த்தகிச்சம் கத்வா த³ஹரம் ஆணாபேதி ‘‘க³ச்ச² தி³வாட்டா²னே மஞ்சபீட²ம் பஞ்ஞபேஹீ’’தி. ஸோ ததா² கத்வா நிஸின்னோ, தே²ரோ யதா²ருசி விசரித்வா தத்த² க³ந்த்வா த²விகம் வா உத்தராஸங்க³ம் வா ட²பேதி, ததோ பட்டா²ய தே²ரஸ்ஸ பலிபோ³தோ⁴. நிஸீதி³த்வா ஸயம் க³ச்ச²ந்தோ நேவ உத்³த⁴ரதி ந உத்³த⁴ராபேதி, லேட்³டு³பாதாதிக்கமே பாசித்தியம். ஸசே பன தே²ரோ தத்த² த²விகம் வா உத்தராஸங்க³ம் வா அட்ட²பேத்வா சங்கமந்தோவ த³ஹரம் ‘‘க³ச்ச² த்வ’’ந்தி ப⁴ணதி, தேன ‘‘இத³ம், ப⁴ந்தே, மஞ்சபீட²’’ந்தி ஆசிக்கி²தப்³ப³ம். ஸசே தே²ரோ வத்தம் ஜானாதி, ‘‘த்வம் க³ச்ச², அஹம் பாகதிகம் கரிஸ்ஸாமீ’’தி வத்தப்³ப³ம். ஸசே பா³லோ ஹோதி அனுக்³க³ஹிதவத்தோ, ‘‘க³ச்ச², மா இத⁴ திட்ட², நேவ நிஸீதி³தும் ந நிபஜ்ஜிதும் தே³மீ’’தி த³ஹரம் தஜ்ஜேதியேவ. த³ஹரேன ‘‘ப⁴ந்தே, ஸுக²ம் ஸயதா²’’தி கப்பம் லபி⁴த்வா வந்தி³த்வா க³ந்தப்³ப³ம். தஸ்மிம் க³தே தே²ரஸ்ஸேவ பலிபோ³தோ⁴, புரிமனயேனேவ சஸ்ஸ ஆபத்தி வேதி³தப்³பா³.

அத² பன ஆணத்திக்க²ணேயேவ த³ஹரோ ‘‘மய்ஹம் ப⁴ண்டே³ ப⁴ண்ட³தோ⁴வனாதி³ கிஞ்சி கரணீயம் அத்தீ²’’தி வத³தி, தே²ரோ பன தம் ‘‘பஞ்ஞபேத்வா க³ச்சா²ஹீ’’தி வத்வா போ⁴ஜனஸாலதோ நிக்க²மித்வா அஞ்ஞத்த² க³ச்ச²தி, பாது³த்³தா⁴ரேன காரேதப்³போ³. ஸசே தத்தே²வ க³ந்த்வா நிஸீத³தி, புரிமனயேனேவ சஸ்ஸ லேட்³டு³பாதாதிக்கமே ஆபத்தி. ஸசே பன தே²ரோ ஸாமணேரம் ஆணாபேதி, ஸாமணேரே தத்த² மஞ்சபீட²ம் பஞ்ஞபேத்வா நிஸின்னேபி போ⁴ஜனஸாலதோ அஞ்ஞத்த² க³ச்ச²ந்தோ பாது³த்³தா⁴ரேன காரேதப்³போ³. க³ந்த்வா நிஸின்னோ புன க³மனகாலே லேட்³டு³பாதாதிக்கமே ஆபத்தியா காரேதப்³போ³. ஸசே பன ஆணாபேந்தோ ‘‘மஞ்சபீட²ம் பஞ்ஞபேத்வா தத்தே²வ நிஸீதா³’’தி ஆணாபேதி, யத்ரிச்ச²தி, தத்ர க³ந்த்வா ஆக³ந்தும் லப⁴தி. ஸயம் பன பாகதிகம் அகத்வா க³ச்ச²ந்தஸ்ஸ லேட்³டு³பாதாதிக்கமே பாசித்தியம். அந்தரஸன்னிபாதே மஞ்சபீடா²தீ³னி பஞ்ஞபேத்வா நிஸின்னேஹி க³மனகாலே ஆராமிகானம் ‘‘இத³ம் படிஸாமேதா²’’தி வத்தப்³ப³ம், அவத்வா க³ச்ச²ந்தானம் லேட்³டு³பாதாதிக்கமே ஆபத்தி.

87. மஹாத⁴ம்மஸ்ஸவனம் நாம ஹோதி, தத்த² உபோஸதா²கா³ரதோபி போ⁴ஜனஸாலதோபி ஆஹரித்வா மஞ்சபீடா²னி பஞ்ஞபேந்தி, ஆவாஸிகானம்யேவ பலிபோ³தோ⁴. ஸசே ஆக³ந்துகா ‘‘இத³ம் அம்ஹாகம் உபஜ்ஜா²யஸ்ஸ, இத³ம் ஆசரியஸ்ஸா’’தி க³ண்ஹந்தி, ததோ பட்டா²ய தேஸம் பலிபோ³தோ⁴. க³மனகாலே பாகதிகம் அகத்வா லேட்³டு³பாதம் அதிக்கமந்தானம் ஆபத்தி. மஹாபச்சரியம் பன வுத்தம் ‘‘யாவ அஞ்ஞே ந நிஸீத³ந்தி, தாவ யேஹி பஞ்ஞத்தம், தேஸம் பா⁴ரோ, அஞ்ஞேஸு ஆக³ந்த்வா நிஸின்னேஸு நிஸின்னகானம் பா⁴ரோ. ஸசே தே அனுத்³த⁴ரித்வா வா அனுத்³த⁴ராபேத்வா வா க³ச்ச²ந்தி, து³க்கடம். கஸ்மா? அனாணத்தியா பஞ்ஞபிதத்தா’’தி. த⁴ம்மாஸனே பஞ்ஞத்தே யாவ உஸ்ஸாரகோ வா த⁴ம்மகதி²கோ வா நாக³ச்ச²தி, தாவ பஞ்ஞாபகானம் பலிபோ³தோ⁴. தஸ்மிம் ஆக³ந்த்வா நிஸின்னே தஸ்ஸ பலிபோ³தோ⁴. ஸகலம் அஹோரத்தம் த⁴ம்மஸ்ஸவனம் ஹோதி, அஞ்ஞோ உஸ்ஸாரகோ வா த⁴ம்மகதி²கோ வா உட்டா²தி, அஞ்ஞோ நிஸீத³தி, யோ யோ ஆக³ந்த்வா நிஸீத³தி, தஸ்ஸ தஸ்ஸேவ பா⁴ரோ. உட்ட²ஹந்தேன பன ‘‘இத³மாஸனம் தும்ஹாகம் பா⁴ரோ’’தி வத்வா க³ந்தப்³ப³ம். ஸசேபி இதரஸ்மிம் அனாக³தே பட²மம் நிஸின்னோ உட்டா²ய க³ச்ச²தி, தஸ்மிஞ்ச அந்தோஉபசாரட்டே²யேவ இதரோ ஆக³ந்த்வா நிஸீத³தி, உட்டா²ய க³தோ ஆபத்தியா ந காரேதப்³போ³. ஸசே பன இதரஸ்மிம் அனாக³தேயேவ பட²மம் நிஸின்னோ உட்டா²யாஸனா லேட்³டு³பாதம் அதிக்கமதி, ஆபத்தியா காரேதப்³போ³. ‘‘ஸப்³ப³த்த² லேட்³டு³பாதாதிக்கமே பட²மபாதே³ து³க்கடம், து³தியபாதே³ பாசித்திய’’ந்தி அயம் நயோ மஹாபச்சரியம் வுத்தோதி.

88. ஸசே பன வுத்தப்பகாரஸேனாஸனதோ அஞ்ஞம் ஸங்கி⁴கம் சிமிலிகம் வா உத்தரத்த²ரணம் வா பூ⁴மத்த²ரணம் வா தட்டிகம் வா சம்மக²ண்ட³ம் வா பாத³புஞ்ச²னிம் வா ப²லகபீட²ம் வா அஜ்ஜோ²காஸே ஸந்த²ரித்வா வா ஸந்த²ராபேத்வா வா தம் பக்கமந்தோ நேவ உத்³த⁴ரதி ந உத்³த⁴ராபேதி அனாபுச்ச²ம் வா க³ச்ச²தி, து³க்கடம். ஆதா⁴ரகம் பத்தபிதா⁴னகம் பாத³கட²லிகம் தாலவண்டம் பீ³ஜனிபத்தகம் யம் கிஞ்சி தா³ருப⁴ண்ட³ம் அந்தமஸோ பானீயஉளுங்கம் பானீயஸங்க²ம் அஜ்ஜோ²காஸே நிக்கி²பித்வா க³ச்ச²ந்தஸ்ஸபி து³க்கடம். அஜ்ஜோ²காஸே ரஜனம் பசித்வா ரஜனபா⁴ஜனம் ரஜனஉளுங்கோ ரஜனதோ³ணிகாதி ஸப்³ப³ம் அக்³கி³ஸாலாய படிஸாமேதப்³ப³ம். ஸசே அக்³கி³ஸாலா நத்தி², அனோவஸ்ஸகே பப்³பா⁴ரே நிக்கி²பிதப்³ப³ம். தஸ்மிம்பி அஸதி யத்த² ஓலோகேந்தா பி⁴க்கூ² பஸ்ஸந்தி, தாதி³ஸே டா²னே ட²பேத்வா க³ந்தும் வட்டதி. அஞ்ஞபுக்³க³லிகே பன மஞ்சபீடா²தி³ஸேனாஸனேபி து³க்கடமேவ. ஏத்த² பன ‘‘யஸ்மிம் விஸ்ஸாஸக்³கா³ஹோ ந ருஹதி, தஸ்ஸ ஸந்தகே து³க்கடம். யஸ்மிம் பன விஸ்ஸாஸக்³கா³ஹோ ருஹதி, தஸ்ஸ ஸந்தகம் அத்தனோ புக்³க³லிகமேவ ஹோதீ’’தி மஹாபச்சரியாதீ³ஸு வுத்தம். அத்தனோ புக்³க³லிகே பன அனாபத்தியேவ. யோ பி⁴க்கு² வா ஸாமணேரோ வா ஆராமிகோ வா லஜ்ஜீ ஹோதி, அத்தனோ பலிபோ³த⁴ம் விய மஞ்ஞதி, ததா²ரூபம் அனாபுச்சி²த்வா க³ச்ச²ந்தஸ்ஸபி அனாபத்தி. யோ பன ஆதபே ஓதாபேந்தோ ‘‘ஆக³ந்த்வா உத்³த⁴ரிஸ்ஸாமீ’’தி க³ச்ச²தி, தஸ்ஸபி அனாபத்தி.

இதி பாளிமுத்தகவினயவினிச்ச²யஸங்க³ஹே

மஞ்சபீடா²தி³ஸங்கி⁴கஸேனாஸனேஸு

படிபஜ்ஜிதப்³ப³வினிச்ச²யகதா² ஸமத்தா.