16. ஸஹஸேய்யவினிச்ச²யகதா²

79. து³வித⁴ம் ஸஹஸேய்யகந்தி ‘‘யோ பன பி⁴க்கு² அனுபஸம்பன்னேன உத்தரிதி³ரத்ததிரத்தம் ஸஹஸேய்யம் கப்பேய்ய, பாசித்தியம் (பாசி. 49). யோ பன பி⁴க்கு² மாதுகா³மேன ஸஹஸேய்யம் கப்பேய்ய, பாசித்திய’’ந்தி (பாசி. 56) ஏவம் வுத்தம் ஸஹஸேய்யஸிக்கா²பத³த்³வயம் ஸந்தா⁴ய வுத்தம். தத்ராயம் வினிச்ச²யோ (பாசி. அட்ட². 50-51) – அனுபஸம்பன்னேன ஸத்³தி⁴ம் திண்ணம் ரத்தீனம் உபரி சதுத்த²தி³வஸே அத்த²ங்க³தே ஸூரியே ஸப்³ப³ச்ச²ன்னஸப்³ப³பரிச்ச²ன்னே யேபு⁴ய்யச்ச²ன்னயேபு⁴ய்யபரிச்ச²ன்னே வா ஸேனாஸனே புப்³பா³பரியேன வா ஏகக்க²ணே வா நிபஜ்ஜந்தஸ்ஸ பாசித்தியம். தத்த² ச²த³னம் அனாஹச்ச தி³யட்³ட⁴ஹத்து²ப்³பே³தே⁴ன பாகாராதி³னா யேன கேனசி பரிச்ச²ன்னம்பி ஸப்³ப³பரிச்ச²ன்னமிச்சேவ வேதி³தப்³ப³ம். யம் ஸேனாஸனம் உபரி பஞ்சஹி ச²த³னேஹி அஞ்ஞேன வா கேனசி ஸப்³ப³மேவ பரிச்ச²ன்னம், இத³ம் ஸப்³ப³ச்ச²ன்னம் நாம ஸேனாஸனம். அட்ட²கதா²ஸு பன பாகடவோஹாரம் க³ஹேத்வா வாசுக்³க³தவஸேன ‘‘ஸப்³ப³ச்ச²ன்னம் நாம பஞ்சஹி ச²த³னேஹி ச²ன்ன’’ந்தி வுத்தம். கிஞ்சாபி வுத்தம், அத² கோ² து³ஸ்ஸகுடியம் ஸயந்தஸ்ஸபி ந ஸக்கா அனாபத்தி காதும், தஸ்மா யம் கிஞ்சி படிச்சா²த³னஸமத்த²ம் இத⁴ ச²த³னஞ்ச பரிச்ச²ன்னஞ்ச வேதி³தப்³ப³ம். பஞ்சவித⁴ச்ச²த³னேயேவ ஹி க³ய்ஹமானே பத³ரச்ச²ன்னேபி ஸஹஸேய்யா ந ப⁴வேய்ய, தஸ்மா யம் ஸேனாஸனம் பூ⁴மிதோ பட்டா²ய யாவச²த³னம் ஆஹச்ச பாகாரேன வா அஞ்ஞேன வா கேனசி அந்தமஸோ வத்தே²னபி பரிக்கி²த்தம், இத³ம் ஸப்³ப³பரிச்ச²ன்னம் நாம ஸேனாஸனம். ச²த³னம் அனாஹச்ச ஸப்³ப³ந்திமேன பரியாயேன தி³யட்³ட⁴ஹத்து²ப்³பே³தே⁴ன பாகாராதி³னா பரிக்கி²த்தம்பி ஸப்³ப³பரிச்ச²ன்னமேவ. யஸ்ஸ பன உபரி ப³ஹுதரம் டா²னம் ச²ன்னம், அப்பம் அச்ச²ன்னம், ஸமந்ததோ வா ப³ஹுதரம் பரிக்கி²த்தம், அப்பம் அபரிக்கி²த்தம், இத³ம் யேபு⁴ய்யேனச²ன்னம் யேபு⁴ய்யேனபரிச்ச²ன்னம் நாம.

இமினா லக்க²ணேன ஸமன்னாக³தோ ஸசேபி ஸத்தபூ⁴மிகோ பாஸாதோ³ ஏகூபசாரோ ஹோதி, ஸதக³ப்³ப⁴ம் வா சதுஸாலம், ஏகம் ஸேனாஸனமிச்சேவ ஸங்க²ம் க³ச்ச²தி. ஏவரூபே ஸேனாஸனே அனுபஸம்பன்னேன ஸத்³தி⁴ம் சதுத்த²தி³வஸே அத்த²ங்க³தே ஸூரியே நிபஜ்ஜந்தஸ்ஸ பாசித்தியம் வுத்தம். ஸசே பன ஸம்ப³ஹுலா ஸாமணேரா, ஏகோ பி⁴க்கு², ஸாமணேரக³ணனாய பாசித்தியா. தே சே உட்டா²யுட்டா²ய நிபஜ்ஜந்தி, தேஸம் பயோகே³ பயோகே³ பி⁴க்கு²ஸ்ஸ ஆபத்தி, பி⁴க்கு²ஸ்ஸ உட்டா²யுட்டா²ய நிபஜ்ஜனே பன பி⁴க்கு²ஸ்ஸேவ பயோகே³ன பி⁴க்கு²ஸ்ஸ ஆபத்தி. ஸசே ஸம்ப³ஹுலா பி⁴க்கூ², ஏகோ ஸாமணேரோ, ஏகோபி ஸப்³பே³ஸம் ஆபத்திம் கரோதி. தஸ்ஸ உட்டா²யுட்டா²ய நிபஜ்ஜனேனபி பி⁴க்கூ²னம் ஆபத்தியேவ. உப⁴யேஸம் ஸம்ப³ஹுலபா⁴வேபி ஏஸேவ நயோ.

80. அபிசேத்த² ஏகாவாஸாதி³கம்பி சதுக்கம் வேதி³தப்³ப³ம். யோ ஹி ஏகஸ்மிம் ஆவாஸே ஏகேனேவ அனுபஸம்பன்னேன ஸத்³தி⁴ம் திரத்தம் ஸஹஸேய்யம் கப்பேதி, தஸ்ஸ சதுத்த²தி³வஸதோ பட்டா²ய தே³வஸிகா ஆபத்தி. யோபி ஏகஸ்மிம்யேவ ஆவாஸே நானாஅனுபஸம்பன்னேஹி ஸத்³தி⁴ம் திரத்தம் ஸஹஸேய்யம் கப்பேதி, தஸ்ஸபி. யோபி நானாஆவாஸேஸு ஏகேனேவ அனுபஸம்பன்னேன ஸத்³தி⁴ம் திரத்தம் ஸஹஸேய்யம் கப்பேதி, தஸ்ஸபி. யோபி நானாஆவாஸேஸு நானாஅனுபஸம்பன்னேஹி ஸத்³தி⁴ம் யோஜனஸதம்பி க³ந்த்வா ஸஹஸேய்யம் கப்பேதி, தஸ்ஸபி சதுத்த²தி³வஸதோ பட்டா²ய தே³வஸிகா ஆபத்தி.

அயஞ்ச ஸஹஸேய்யாபத்தி நாம ‘‘பி⁴க்கு²ம் ட²பேத்வா அவஸேஸோ அனுபஸம்பன்னோ நாமா’’தி வசனதோ அந்தமஸோ பாராஜிகவத்து²பூ⁴தேன திரச்சா²னக³தேனபி ஸத்³தி⁴ம் ஹோதி, தஸ்மா ஸசேபி கோ³தா⁴பி³ளாலமங்கு³ஸாதீ³ஸு கோசி பவிஸித்வா பி⁴க்கு²னோ வஸனஸேனாஸனே ஏகூபசாரட்டா²னே ஸயதி, ஸஹஸேய்யாவ ஹோதி. யதி³ பன த²ம்பா⁴னம் உபரி கதபாஸாத³ஸ்ஸ உபரிமதலேன ஸத்³தி⁴ம் அஸம்ப³த்³த⁴பி⁴த்திகஸ்ஸ பி⁴த்தியா உபரிடி²தஸுஸிரதுலாஸீஸஸ்ஸ ஸுஸிரேன பவிஸித்வா துலாய அப்³ப⁴ந்தரே ஸயித்வா தேனேவ ஸுஸிரேன நிக்க²மித்வா க³ச்ச²தி, ஹேட்டா²பாஸாதே³ ஸயிதபி⁴க்கு²ஸ்ஸ அனாபத்தி. ஸசே ச²த³னே சி²த்³த³ம் ஹோதி, தேன பவிஸித்வா அந்தோச²த³னே வஸித்வா தேனேவ பக்கமதி, நானூபசாரே உபரிமதலே ச²த³னப்³ப⁴ந்தரே ஸயிதஸ்ஸ ஆபத்தி, ஹேட்டி²மதலே ஸயிதஸ்ஸ அனாபத்தி. ஸசே அந்தோபாஸாதே³னேவ ஆரோஹித்வா ஸப்³ப³தலானி பரிபு⁴ஞ்ஜந்தி, ஏகூபசாரானி ஹோந்தி, தேஸு யத்த² கத்த²சி ஸயிதஸ்ஸ ஆபத்தி, ஸபா⁴ஸங்கே²பேன கதே அட்³ட⁴குட்டகே ஸேனாஸனே ஸயிதஸ்ஸ துலாவாளஸகா⁴டாதீ³ஸு கபோதாத³யோ ஸயந்தி, ஆபத்தியேவ. பரிக்கே²பஸ்ஸ ப³ஹிக³தே நிப்³ப³கோஸப்³ப⁴ந்தரே ஸயந்தி, அனாபத்தி. பரிமண்ட³லம் வா சதுரஸ்ஸம் வா ஏகச்ச²த³னாய க³ப்³ப⁴மாலாய ஸதக³ப்³ப⁴ம் சேபி ஸேனாஸனம் ஹோதி, தத்ர சே ஏகேன ஸாதா⁴ரணத்³வாரேன பவிஸித்வா விஸும் பாகாரேன அபரிச்சி²ன்னக³ப்³பூ⁴பசாரே ஸப்³ப³க³ப்³பே⁴பி பவிஸந்தி, ஏகக³ப்³பே⁴பி அனுபஸம்பன்னே நிபன்னே ஸப்³ப³க³ப்³பே⁴ஸு நிபன்னானம் ஆபத்தி. ஸசே ஸபமுகா² க³ப்³பா⁴ ஹோந்தி, பமுக²ஞ்ச உபரி அச்ச²ன்னம், பமுகே² ஸயிதோ க³ப்³பே⁴ ஸயிதானம் ஆபத்திம் ந கரோதி. ஸசே பன க³ப்³ப⁴ச்ச²த³னேனேவ ஸத்³தி⁴ம் ஸம்ப³ந்த⁴ச²த³னம், தத்ர ஸயிதோ ஸப்³பே³ஸம் ஆபத்திம் கரோதி. கஸ்மா? ஸப்³ப³ச்ச²ன்னத்தா ச ஸப்³ப³பரிச்ச²ன்னத்தா ச. க³ப்³ப⁴பரிக்கே²போயேவ ஹிஸ்ஸ பரிக்கே²போ.

81. யேபி ஏகஸாலத்³விஸாலதிஸாலசதுஸாலஸன்னிவேஸா மஹாபாஸாதா³ ஏகஸ்மிம் ஓகாஸே பாதே³ தோ⁴வித்வா பவிட்டே²ன ஸக்கா ஹோந்தி ஸப்³ப³த்த² அனுபரிக³ந்தும், தேஸுபி ஸஹஸேய்யாபத்தியா ந முச்சதி. ஸசே தஸ்மிம் தஸ்மிம் டா²னே உபசாரம் பரிச்சி²ந்தி³த்வா கதா ஹோந்தி, ஏகூபசாரட்டா²னேயேவ ஆபத்தி. த்³வீஹி த்³வாரேஹி யுத்தஸ்ஸ ஸுதா⁴ச²த³னமண்ட³பஸ்ஸ மஜ்ஜே² பாகாரம் கரோந்தி, ஏகேன த்³வாரேன பவிஸித்வா ஏகஸ்மிம் பரிச்சே²தே³ அனுபஸம்பன்னோ ஸயதி, ஏகஸ்மிம் பி⁴க்கு², அனாபத்தி. பாகாரே கோ³தா⁴தீ³னம் பவிஸனமத்தம் சி²த்³த³ம் ஹோதி, ஏகஸ்மிஞ்ச பரிச்சே²தே³ கோ³தா⁴ ஸயந்தி, அனாபத்தியேவ. ந ஹி சி²த்³தே³ன கே³ஹம் ஏகூபசாரம் நாம ஹோதி. ஸசே பாகாரமஜ்ஜே² சி²ந்தி³த்வா த்³வாரம் யோஜேந்தி, ஏகூபசாரதாய ஆபத்தி. தம் த்³வாரம் கவாடேன பித³ஹித்வா ஸயந்தி, ஆபத்தியேவ. ந ஹி த்³வாரபித³ஹனேன கே³ஹம் நானூபசாரம் நாம ஹோதி, த்³வாரம் வா அத்³வாரம். கவாடஞ்ஹி ஸம்வரணவிவரணேஹி யதா²ஸுக²ம் வளஞ்ஜனத்தா²ய கதம், ந வளஞ்ஜுபச்சே²த³னத்தா²ய. ஸசே தம் த்³வாரம் புன இட்ட²காஹி பித³ஹந்தி, அத்³வாரம் ஹோதி, புரிமே நானூபசாரபா⁴வேயேவ திட்ட²தி. தீ³க⁴பமுக²ம் சேதியக⁴ரம் ஹோதி, ஏகம் கவாடம் அந்தோ, ஏகம் ப³ஹி, த்³வின்னம் கவாடானம் அந்தரே அனுபஸம்பன்னோ அந்தோசேதியக⁴ரே ஸயந்தஸ்ஸ ஆபத்திம் கரோதி ஏகூபசாரத்தா.

அயஞ்ஹேத்த² ஸங்கே²போ – ஸேனாஸனம் கு²த்³த³கம் வா ஹோது மஹந்தம் வா, அஞ்ஞேன ஸத்³தி⁴ம் ஸம்ப³ந்த⁴ம் வா அஸம்ப³ந்த⁴ம் வா, தீ³க⁴ம் வா வட்டம் வா சதுரஸ்ஸம் வா, ஏகபூ⁴மிகம் வா அனேகபூ⁴மிகம் வா, யம் யம் ஏகூபசாரம், ஸப்³ப³த்த² ஸஹஸேய்யாபத்தி ஹோதீதி. ஏத்த² ச யேன கேனசி படிச்ச²த³னேன ஸப்³ப³ச்ச²ன்னே ஸப்³ப³பரிச்ச²ன்னே பாசித்தியம், யேபு⁴ய்யேனச²ன்னே யேபு⁴ய்யேனபரிச்ச²ன்னே பாசித்தியம், ஸப்³ப³ச்ச²ன்னே யேபு⁴ய்யேனபரிச்ச²ன்னே பாசித்தியம், ஸப்³ப³ச்ச²ன்னே உபட்³ட⁴பரிச்ச²ன்னே பாசித்தியம், யேபு⁴ய்யேனச²ன்னே உபட்³ட⁴பரிச்ச²ன்னே பாசித்தியம், ஸப்³ப³பரிச்ச²ன்னே யேபு⁴ய்யேனச²ன்னே பாசித்தியம், ஸப்³ப³பரிச்ச²ன்னே உபட்³ட⁴ச்ச²ன்னே பாசித்தியம், யேபு⁴ய்யேனபரிச்ச²ன்னே உபட்³ட⁴ச்ச²ன்னே பாசித்தியந்தி அட்ட² பாசித்தியானி. உபட்³ட⁴ச்ச²ன்னே உபட்³ட⁴பரிச்ச²ன்னே து³க்கடம், ஸப்³ப³ச்ச²ன்னே சூளகபரிச்ச²ன்னே து³க்கடம், யேபு⁴ய்யேனச²ன்னே சூளகபரிச்ச²ன்னே து³க்கடம், ஸப்³ப³பரிச்ச²ன்னே சூளகச்ச²ன்னே து³க்கடம், யேபு⁴ய்யேனபரிச்ச²ன்னே சூளகச்ச²ன்னே து³க்கடந்தி பஞ்ச து³க்கடானி வேதி³தப்³பா³னி. ஸப்³ப³ச்ச²ன்னே ஸப்³ப³அபரிச்ச²ன்னே, ஸப்³ப³பரிச்ச²ன்னே ஸப்³ப³அச்ச²ன்னே, யேபு⁴ய்யேனஅச்ச²ன்னே யேபு⁴ய்யேனஅபரிச்ச²ன்னே, உபட்³ட⁴ச்ச²ன்னே சூளகபரிச்ச²ன்னே, உபட்³ட⁴பரிச்ச²ன்னே சூளகச்ச²ன்னே சூளகபரிச்ச²ன்னே ச அனாபத்தி. மாதுகா³மேன ஸஹ நிபஜ்ஜந்தஸ்ஸபி அயமேவ வினிச்ச²யோ. அயஞ்ஹேத்த² விஸேஸோ – அனுபஸம்பன்னேன ஸத்³தி⁴ம் நிபஜ்ஜந்தஸ்ஸ சதுத்த²தி³வஸே ஆபத்தி, மாதுகா³மேன ஸத்³தி⁴ம் பட²மதி³வஸேதி. யக்கி²பேதீஹி பன தி³ஸ்ஸமானகரூபாஹி திரச்சா²னக³தித்தி²யா ச மேது²னத⁴ம்மவத்து²பூ⁴தாய ஏவ து³க்கடம், ஸேஸாஹி அனாபத்தி.

இதி பாளிமுத்தகவினயவினிச்ச²யஸங்க³ஹே

ஸஹஸேய்யவினிச்ச²யகதா² ஸமத்தா.