15. பூ⁴தகா³மவினிச்ச²யகதா²

75. பூ⁴தகா³மோதி பஞ்சஹி பீ³ஜேஹி ஜாதானம் ருக்க²லதாதீ³னமேதம் அதி⁴வசனம். தத்ரிமானி பஞ்ச பீ³ஜானி – மூலபீ³ஜம் க²ந்த⁴பீ³ஜம் ப²ளுபீ³ஜம் அக்³க³பீ³ஜம் பீ³ஜபீ³ஜந்தி. தத்த² மூலபீ³ஜம் நாம ஹலித்³தி³ ஸிங்கி³வேரம் வசா வசத்தம் அதிவிஸம் கடுகரோஹிணீ உஸீரம் ப⁴த்³த³முத்தகம், யானி வா பனஞ்ஞானிபி அத்தி² மூலே ஜாயந்தி மூலே ஸஞ்ஜாயந்தி, ஏதம் மூலபீ³ஜம் நாம. க²ந்த⁴பீ³ஜம் நாம அஸ்ஸத்தோ² நிக்³ரோதோ⁴ பிலக்கோ² உது³ம்ப³ரோ கச்ச²கோ கபித்த²னோ, யானி வா பனஞ்ஞானிபி அத்தி² க²ந்தே⁴ ஜாயந்தி க²ந்தே⁴ ஸஞ்ஜாயந்தி, ஏதம் க²ந்த⁴பீ³ஜம் நாம. ப²ளுபீ³ஜம் நாம உச்சு² வேளு நளோ, யானி வா பனஞ்ஞானிபி அத்தி² பப்³பே³ ஜாயந்தி பப்³பே³ ஸஞ்ஜாயந்தி, ஏதம் ப²ளுபீ³ஜம் நாம. அக்³க³பீ³ஜம் நாம அஜ்ஜுகம் ப²ணிஜ்ஜகம் ஹிரிவேரம், யானி வா பனஞ்ஞானிபி அத்தி² அக்³கே³ ஜாயந்தி அக்³கே³ ஸஞ்ஜாயந்தி, ஏதம் அக்³க³பீ³ஜம் நாம. பீ³ஜபீ³ஜம் நாம புப்³ப³ண்ணம் அபரண்ணம், யானி வா பனஞ்ஞானிபி அத்தி² பீ³ஜே ஜாயந்தி பீ³ஜே ஸஞ்ஜாயந்தி, ஏதம் பீ³ஜபீ³ஜம் நாம (பாசி. 91). தத்த² பூ⁴தகா³மே பூ⁴தகா³மஸஞ்ஞீ சி²ந்த³தி வா சி²ந்தா³பேதி வா பி⁴ந்த³தி வா பி⁴ந்தா³பேதி வா பசதி வா பசாபேதி வா, பாசித்தியம். பூ⁴தகா³மஞ்ஹி விகோபேந்தஸ்ஸ பாசித்தியம், பூ⁴தகா³மபரிமோசிதம் பஞ்சவித⁴ம்பி பீ³ஜகா³மம் விகோபேந்தஸ்ஸ து³க்கடம்.

76. பீ³ஜகா³மபூ⁴தகா³மோ (பாசி. அட்ட². 922) நாமேஸ அத்தி² உத³கட்டோ², அத்தி² த²லட்டோ². தத்த² உத³கட்டோ² ஸாஸபமத்திகதிலபீ³ஜகாதி³பே⁴தா³ ஸபண்ணிகா ச அபண்ணிகா ச ஸப்³பா³ ஸேவாலஜாதி, அந்தமஸோ உத³கபப்படகம் உபாதா³ய ‘‘பூ⁴தகா³மோ’’தி வேதி³தப்³போ³. உத³கபப்படகோ நாம உபரி த²த்³தோ⁴ ப²ருஸவண்ணோ ஹேட்டா² முது³ நீலவண்ணோ ஹோதி. தத்த² யஸ்ஸ ஸேவாலஸ்ஸ மூலம் ஓருஹித்வா பத²வியம் பதிட்டி²தம், தஸ்ஸ பத²வீ டா²னம். யோ உத³கே ஸஞ்சரதி, தஸ்ஸ உத³கம். பத²வியம் பதிட்டி²தம் யத்த² கத்த²சி விகோபேந்தஸ்ஸ, உத்³த⁴ரித்வா வா டா²னந்தரம் ஸங்காமேந்தஸ்ஸ பாசித்தியம், உத³கே ஸஞ்சரந்தம் விகோபேந்தஸ்ஸேவ பாசித்தியம். ஹத்தே²ஹி பன இதோ சிதோ சவியூஹித்வா நஹாயிதும் வட்டதி. ஸகலஞ்ஹி உத³கம் தஸ்ஸ டா²னம், தஸ்மா ந ஸோ ஏத்தாவதா டா²னந்தரம் ஸங்காமிதோ ஹோதி. உத³கதோ பன உத³கேன வினா ஸஞ்சிச்ச உக்கி²பிதும் ந வட்டதி, உத³கேன ஸத்³தி⁴ம் உக்கி²பித்வா புன உத³கே பக்கி²பிதும் வட்டதி. உப்பலினிபது³மினிஆதீ³னி ஜலஜவல்லிதிணானி உத³கதோ உத்³த⁴ரந்தஸ்ஸ வா தத்தே²வ விகோபேந்தஸ்ஸ வா பாசித்தியம், பரேஹி உப்பாடிதானி விகோபேந்தஸ்ஸ து³க்கடம். தானி ஹி பீ³ஜகா³மே ஸங்க³ஹம் க³ச்ச²ந்தி, திலபீ³ஜகஸாஸபமத்திகஸேவாலோபி உத³கதோ உத்³த⁴டோ அமிலாதோ அக்³க³பீ³ஜஸங்க³ஹம் க³ச்ச²தி. மஹாபச்சரியாதீ³ஸு ‘‘அனந்தகதிலபீ³ஜகஉத³கபப்படகாதீ³னி து³க்கடவத்தூ²னீ’’தி வுத்தம், தத்த² காரணம் ந தி³ஸ்ஸதி. அந்த⁴கட்ட²கதா²யம் ‘‘ஸம்புண்ணபூ⁴தகா³மம் ந ஹோதி, தஸ்மா து³க்கட’’ந்தி வுத்தம், தம்பி ந ஸமேதி. பூ⁴தகா³மே ஹி பாசித்தியம் பீ³ஜகா³மே து³க்கடம் வுத்தம். அஸம்புண்ணபூ⁴தகா³மோ நாம ததியோ கோட்டா²ஸோ நேவ பாளியம், ந அட்ட²கதா²ஸு ஆக³தோ, அதே²தம் பீ³ஜகா³மஸங்க³ஹம் க³மிஸ்ஸதீதி, தம்பி ந யுத்தம் அபூ⁴தகா³மமூலத்தா தாதி³ஸஸ்ஸ பீ³ஜகா³மஸ்ஸாதி. அபிச ‘‘க³ருகலஹுகேஸு க³ருகே டா²தப்³ப³’’ந்தி ஏதம் வினயலக்க²ணம்.

த²லட்டே² சி²ன்னருக்கா²னம் அவஸிட்டோ² ஹரிதகா²ணு நாம ஹோதி, தத்த² ககுத⁴கரஞ்ஜபியங்கு³பனஸாதீ³னம் கா²ணு உத்³த⁴ம் வட்³ட⁴தி, ஸோ பூ⁴தகா³மேன ஸங்க³ஹிதோ. தாலனாளிகேராதீ³னம் கா²ணு உத்³த⁴ம் ந வட்³ட⁴தி, ஸோ பீ³ஜகா³மேன ஸங்க³ஹிதோ. கத³லியா பன அப²லிதாய கா²ணு பூ⁴தகா³மேன ஸங்க³ஹிதோ, ப²லிதாய பீ³ஜகா³மேன. கத³லீ பன ப²லிதா யாவ நீலபண்ணா, தாவ பூ⁴தகா³மேனேவ ஸங்க³ஹிதா, ததா² ப²லிதோ வேளு. யதா³ பன அக்³க³தோ பட்டா²ய ஸுஸ்ஸதி, ததா³ பீ³ஜகா³மேன ஸங்க³ஹம் க³ச்ச²தி. கதரபீ³ஜகா³மேன? ப²ளுபீ³ஜகா³மேன. கிம் ததோ நிப்³ப³த்ததி? ந கிஞ்சி. யதி³ ஹி நிப்³ப³த்தேய்ய, பூ⁴தகா³மேன ஸங்க³ஹம் க³ச்சே²ய்ய. இந்த³ஸாலாதி³ருக்கே² சி²ந்தி³த்வா ராஸிம் கரோந்தி, கிஞ்சாபி ராஸிகதத³ண்ட³கேஹி ரதனப்பமாணாபி ஸாகா² நிக்க²மந்தி, பீ³ஜகா³மேனேவ பன ஸங்க³ஹம் க³ச்ச²ந்தி. மண்ட³பத்தா²ய வா வதிஅத்தா²ய வா வல்லிஆரோபனத்தா²ய வா பூ⁴மியம் நிக²ணந்தி, மூலேஸு சேவ பண்ணேஸு ச நிக்³க³தேஸு புன பூ⁴தகா³மஸங்க்²யம் க³ச்ச²ந்தி, மூலமத்தேஸு பன பண்ணமத்தேஸு வா நிக்³க³தேஸுபி பீ³ஜகா³மேன ஸங்க³ஹிதா ஏவ.

யானி கானிசி பீ³ஜானி பத²வியம் வா உத³கேன ஸிஞ்சித்வா ட²பிதானி, கபாலாதீ³ஸு வா அல்லபம்ஸும் பக்கி²பித்வா நிக்கி²த்தானி ஹோந்தி, ஸப்³பா³னி மூலமத்தே வா பண்ணமத்தே வா நிக்³க³தேபி பீ³ஜானியேவ. ஸசேபி மூலானி ச உபரி அங்குரோ ச நிக்³க³ச்ச²தி, யாவ அங்குரோ ஹரிதோ ந ஹோதி, தாவ பீ³ஜானியேவ. முக்³கா³தீ³னம் பன பண்ணேஸு உட்டி²தேஸு, வீஹிஆதீ³னம் வா அங்குரே ஹரிதே நீலவண்ணே ஜாதே பூ⁴தகா³மஸங்க³ஹம் க³ச்ச²ந்தி. தாலட்டீ²னம் பட²மம் ஸூகரதா³டா² விய மூலம் நிக்³க³ச்ச²தி, நிக்³க³தேபி யாவ உபரி பத்தவட்டி ந நிக்³க³ச்ச²தி, தாவ பீ³ஜகா³மோ நாமயேவ. நாளிகேரஸ்ஸ தசம் பி⁴ந்தி³த்வா த³ந்தஸூசி விய அங்குரோ நிக்³க³ச்ச²தி, யாவ மிக³ஸிங்க³ஸதி³ஸா நீலபத்தவட்டி ந ஹோதி, தாவ பீ³ஜகா³மோயேவ. மூலே அனிக்³க³தேபி தாதி³ஸாய பத்தவட்டியா ஜாதாய அமூலகபூ⁴தகா³மே ஸங்க³ஹம் க³ச்ச²தி.

அம்ப³ட்டி²ஆதீ³னி வீஹிஆதீ³ஹி வினிச்சி²னிதப்³பா³னி. வந்தா³கா வா அஞ்ஞா வா யா காசி ருக்கே² ஜாயித்வா ருக்க²ம் ஓத்த²ரதி, ருக்கோ²வ தஸ்ஸா டா²னம், தம் விகோபேந்தஸ்ஸ வா ததோ உத்³த⁴ரந்தஸ்ஸ வா பாசித்தியம். ஏகா அமூலிகா லதா ஹோதி, அங்கு³லிவேட²கோ விய வனப்பகு³ம்ப³த³ண்ட³கே வேடே²தி, தஸ்ஸாபி அயமேவ வினிச்ச²யோ. கே³ஹபமுக²பாகாரவேதி³கா சேதியாதீ³ஸு நீலவண்ணோ ஸேவாலோ ஹோதி, யாவ த்³வே தீணி பத்தானி ந ஸஞ்ஜாயந்தி, தாவ அக்³க³பீ³ஜஸங்க³ஹம் க³ச்ச²தி. பத்தேஸு ஜாதேஸு பாசித்தியவத்து², தஸ்மா தாதி³ஸேஸு டா²னேஸு ஸுதா⁴லேபம்பி தா³தும் ந வட்டதி, அனுபஸம்பன்னேன லித்தஸ்ஸ உபரி ஸினேஹலேபோ தா³தும் வட்டதி. ஸசே நிதா³க⁴ஸமயே ஸுக்க²ஸேவாலோ திட்ட²தி, தம் ஸம்முஞ்ஜனீஆதீ³ஹி க⁴ம்ஸித்வா அபனேதும் வட்டதி. பானீயக⁴டாதீ³னம் ப³ஹி ஸேவாலோ து³க்கடவத்து², அந்தோ அப்³போ³ஹாரிகோ, த³ந்தகட்ட²பூவாதீ³ஸு கண்ணகம்பி அப்³போ³ஹாரிகமேவ. வுத்தஞ்ஹேதம் ‘‘ஸசே கே³ருகபரிகம்மகதா பி⁴த்தி கண்ணகிதா ஹோதி, சோளகம் தேமேத்வா பீளேத்வா பமஜ்ஜிதப்³பா³’’தி (மஹாவ. 66).

77. பாஸாணஜாதி பாஸாணத³த்³து³ஸேவாலஸேலேய்யகாதீ³னி அஹரிதவண்ணானி அபத்தகானி ச து³க்கடவத்து²கானி. அஹிச்ச²த்தகம் யாவ மகுடம் ஹோதி, தாவ து³க்கடவத்து², புப்பி²தகாலதோ பட்டா²ய அப்³போ³ஹாரிகம், அல்லருக்க²தோ பன அஹிச்ச²த்தகம் க³ண்ஹந்தோ ருக்க²தசம் விகோபேதி, தஸ்மா தத்த² பாசித்தியம். ருக்க²பபடிகாயபி ஏஸேவ நயோ. யா பன இந்த³ஸாலககுதா⁴தீ³னம் பபடிகா ருக்க²தோ முச்சித்வா திட்ட²தி, தம் க³ண்ஹந்தஸ்ஸ அனாபத்தி. நிய்யாஸம்பி ருக்க²தோ முச்சித்வா டி²தம் ஸுக்க²ருக்கே² வா லக்³க³ம் க³ண்ஹிதும் வட்டதி, அல்லருக்க²தோ ந வட்டதி. லாகா²யபி ஏஸேவ நயோ. ருக்க²ம் சாலேத்வா பண்டு³பலாஸம் வா பரிணதகணிகாராதி³புப்ப²ம் வா பாதேந்தஸ்ஸ பாசித்தியமேவ. ஹத்த²குக்குச்சேன முது³கேஸு இந்த³ஸாலனுஹீக²ந்தா⁴தீ³ஸு வா தத்த²ஜாதகதாலபண்ணாதீ³ஸு வா அக்க²ரம் சி²ந்த³ந்தஸ்ஸபி ஏஸேவ நயோ. ஸாமணேரானம் புப்ப²ம் ஓசினந்தானம் ஸாக²ம் ஓனாமேத்வா தா³தும் வட்டதி. தேஹி பன புப்பே²ஹி பானீயம் ந வாஸேதப்³ப³ம், பானீயவாஸத்தி²கேன ஸாமணேரம் உக்கி²பித்வா ஓசினாபேதப்³பா³னி. ப²லஸாகா²பி அத்தனா கா²தி³துகாமேன ந ஓனாமேதப்³பா³, ஸாமணேரம் உக்கி²பித்வா ப²லம் கா³ஹாபேதப்³ப³ம். கிஞ்சி க³ச்ச²ம் வாலதம் வா உப்பாடேந்தேஹி ஸாமணேரேஹி ஸத்³தி⁴ம் க³ஹேத்வா ஆகட்³டி⁴தும் ந வட்டதி, தேஸம் பன உஸ்ஸாஹஜனனத்த²ம் அனாகட்³ட⁴ந்தேன கட்³ட⁴னாகாரம் த³ஸ்ஸேந்தேன விய அக்³கே³ க³ஹேதும் வட்டதி. யேஸம் ருக்கா²னம் ஸாகா² ருஹதி, தேஸம் ஸாக²ம் மக்கி²கபீ³ஜனாதீ³னம் அத்தா²ய கப்பியம் அகாராபேத்வா க³ஹிதம், தசே வா பத்தே வா அந்தமஸோ நகே²னபி விலேக²ந்தஸ்ஸ து³க்கடம். அல்லஸிங்கி³வேராதீ³ஸுபி ஏஸேவ நயோ. ஸசே பன கப்பியம் காராபேத்வா ஸீதலே பதே³ஸே ட²பிதஸ்ஸ மூலம் ஸஞ்ஜாயதி, உபரிபா⁴கே³ சி²ந்தி³தும் வட்டதி. ஸசே அங்குரோ ஜாயதி, ஹேட்டா²பா⁴கே³ சி²ந்தி³தும் வட்டதி, மூலே ச அங்குரே ச ஜாதே ந வட்டதி.

‘‘ஸம்முஞ்ஜனீஸலாகாயபி திணானி சி²ந்தி³ஸ்ஸாமீ’’தி பூ⁴மியம் ஸம்மஜ்ஜந்தோ ஸயம் வா சி²ந்த³தி, அஞ்ஞேன வா சே²தா³பேதி, ந வட்டதி. சங்கமந்தோபி ‘‘சி²ஜ்ஜனகம் சி²ஜ்ஜது, பி⁴ஜ்ஜனகம் பி⁴ஜ்ஜது, சங்கமிதட்டா²னம் த³ஸ்ஸேஸ்ஸாமீ’’தி ஸஞ்சிச்ச பாதே³ஹி அக்கமந்தோ திணவல்லிஆதீ³னி ஸயம் வா சி²ந்த³தி, அஞ்ஞேன வா சே²தா³பேதி, ந வட்டதி. ஸசேபி ஹி திணம் வா லதம் வா க³ந்தி²ம் கரோந்தஸ்ஸ பி⁴ஜ்ஜதி, க³ந்தி²ம்பி காதும் ந வட்டதி. தாலருக்கா²தீ³ஸு பன சோரானம் அனாருஹணத்தா²ய தா³ருமக்கடகம் ஆகோடேந்தி, கண்டகே ப³ந்த⁴ந்தி, பி⁴க்கு²ஸ்ஸ ஏவம் காதும் ந வட்டதி. ஸசே தா³ருமக்கடகோ ருக்கே² அல்லீனமத்தோவ ஹோதி, ருக்க²ம் ந பீளேதி, வட்டதி. ‘‘ருக்க²ம் சி²ந்த³, லதம் சி²ந்த³, கந்த³ம் வா மூலம் வா உப்பாடேஹீ’’தி வத்தும் வட்டதி அனியமிதத்தா. நியமேத்வா பன ‘‘இமம் ருக்க²ம் சி²ந்தா³’’திஆதி³ வத்தும் ந வட்டதி. நாமம் க³ஹேத்வாபி ‘‘அம்ப³ருக்க²ம் சதுரம்ஸவல்லிம் ஆலுவகந்த³ம் முஞ்ஜதிணம் அஸுகருக்க²ச்ச²ல்லிம் சி²ந்த³ பி⁴ந்த³ உப்பாடேஹீ’’திஆதி³வசனம்பி அனியமிதமேவ ஹோதி. ‘‘இமம் அம்ப³ருக்க²’’ந்திஆதி³வசனமேவ ஹி நியமிதம் நாம, தம் ந வட்டதி. பத்தம்பி பசிதுகாமோ திணாதீ³னம் உபரி ஸஞ்சிச்ச அக்³கி³ம் கரோந்தோ ஸயம் வா பசதி, அஞ்ஞேன வா பசாபேதி, ந வட்டதி. அனியமேத்வா பன ‘‘முக்³கே³ பச, மாஸே பசா’’திஆதி³ வத்தும் வட்டதி, ‘‘இமே முக்³கே³ பசா’’தி ஏவம் வத்தும் ந வட்டதி. ‘‘இமம் மூலபே⁴ஸஜ்ஜம் ஜான, இமம் மூலம் வா பண்ணம் வா தே³ஹி, இமம் ருக்க²ம் வா லதம் வா ஆஹர, இமினா புப்பே²ன ப²லேன வா அத்தோ², இமம் ருக்க²ம் வா லதம் வா ப²லம் வா கப்பியம் கரோஹீ’’தி ஏவம் பன வத்தும் வட்டதி. ஏத்தாவதா பூ⁴தகா³மபரிமோசிதம் கதம் ஹோதி.

78. பரிபு⁴ஞ்ஜந்தேன பன பீ³ஜகா³மபரிமோசனத்த²ம் புன கப்பியம் காராபேதப்³ப³ம். கப்பியகரணஞ்சேத்த² இமினா ஸுத்தானுஸாரேன வேதி³தப்³ப³ம் –

‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லம் பரிபு⁴ஞ்ஜிதும் அக்³கி³பரிஜிதம் ஸத்த²பரிஜிதம் நக²பரிஜிதம் அபீ³ஜம் நிப்³ப³ட்டபீ³ஜஞ்ஞேவ பஞ்சம’’ந்தி (சூளவ. 250).

தத்த² அக்³கி³பரிஜிதந்தி அக்³கி³னா பரிஜிதம் அதி⁴பூ⁴தம் த³ட்³ட⁴ம் பு²ட்ட²ந்தி அத்தோ². ஸத்த²பரிஜிதந்தி ஸத்தே²ன பரிஜிதம் அதி⁴பூ⁴தம் சி²ன்னம் வித்³த⁴ம் வாதி அத்தோ². ஏஸ நயோ நக²பரிஜிதே. அபீ³ஜனிப்³ப³ட்டபீ³ஜானி ஸயமேவ கப்பியானி. அக்³கி³னா கப்பியம் கரோந்தேன கட்ட²க்³கி³கோ³மயக்³கி³ஆதீ³ஸு யேன கேனசி அந்தமஸோ லோஹக²ண்டே³னபி ஆதி³த்தேன கப்பியம் காதப்³ப³ம், தஞ்ச கோ² ஏகதே³ஸே பு²ஸந்தேன ‘‘கப்பிய’’ந்தி வத்வாவ காதப்³ப³ம். ஸத்தே²ன கரோந்தேன யஸ்ஸ கஸ்ஸசி லோஹமயஸத்த²ஸ்ஸ அந்தமஸோ ஸூசினக²ச்சே²த³னானம்பி துண்டே³ன வா தா⁴ராய வா சே²த³ம் வா வேத⁴ம் வா த³ஸ்ஸேந்தேன ‘‘கப்பிய’’ந்தி வத்வாவ காதப்³ப³ம். நகே²ன கப்பியம் கரோந்தேன பூதினகே²ன ந காதப்³ப³ம், மனுஸ்ஸானம் பன ஸீஹப்³யக்³க⁴தீ³பிமக்கடானம் ஸகுந்தானஞ்ச நகா² திகி²ணா ஹோந்தி, தேஹி காதப்³ப³ம். அஸ்ஸமஹிம்ஸஸூகரமிக³கோ³ரூபாதீ³னம் கு²ரா அதிகி²ணா, தேஹி ந காதப்³ப³ம், கதம்பி அகதம் ஹோதி. ஹத்தி²னகா² பன கு²ரா ந ஹோந்தி, தேஹி ச வட்டதி. யேஹி பன காதும் வட்டதி, தேஹி தத்த²ஜாதகேஹிபி உத்³த⁴ரித்வா க³ஹிதகேபி சே²த³ம் வா வேத⁴ம் வா த³ஸ்ஸேந்தேன ‘‘கப்பிய’’ந்தி வத்வாவ காதப்³ப³ம்.

தத்த² ஸசேபி பீ³ஜானம் பப்³ப³தமத்தோ ராஸி, ருக்க²ஸஹஸ்ஸம் வா சி²ந்தி³த்வா ஏகாப³த்³த⁴ம் கத்வா உச்சூ²னம் வா மஹாபா⁴ரோ ப³ந்தி⁴த்வா ட²பிதோ ஹோதி, ஏகஸ்மிம் பீ³ஜே வா ருக்க²ஸாகா²ய வா உச்சு²ம்ஹி வா கப்பியே கதே ஸப்³ப³ம் கதம் ஹோதி. உச்சூ² ச தா³ரூனி ச ஏகதோ ப³த்³தா⁴னி ஹோந்தி, ‘‘உச்சு²ம் கப்பியம் கரிஸ்ஸாமீ’’தி தா³ரும் விஜ்ஜ²தி, வட்டதியேவ. ஸசே பன யாய ரஜ்ஜுயா வா வல்லியா வா ப³த்³தா⁴னி, தம் விஜ்ஜ²தி, ந வட்டதி. உச்சு²க²ண்டா³னம் பச்சி²ம் பூரேத்வா ஆஹரந்தி, ஏகஸ்மிம் க²ண்டே³ கப்பியே கதே ஸப்³ப³ம் கதமேவ. மரீசபக்காதீ³ஹி ச மிஸ்ஸேத்வா ப⁴த்தம் ஆஹரந்தி, ‘‘கப்பியம் கரோஹீ’’தி வுத்தே ஸசேபி ப⁴த்தஸித்தே² விஜ்ஜ²தி, வட்டதியேவ. திலதண்டு³லாதீ³ஸுபி ஏஸேவ நயோ. யாகு³யா பக்கி²த்தானி பன ஏகாப³த்³தா⁴னி ஹுத்வா ந ஸந்திட்ட²ந்தி, தத்த² ஏகமேகம் விஜ்ஜி²த்வா கப்பியம் காதப்³ப³மேவ. கபித்த²ப²லாதீ³னம் அந்தோ மிஞ்ஜம் கடாஹம் முஞ்சித்வா ஸஞ்சரதி, பி⁴ந்தா³பேத்வா கப்பியம் காராபேதப்³ப³ம், ஏகாப³த்³த⁴ம் ஹோதி, கடாஹேபி காதும் வட்டதி.

இதி பாளிமுத்தகவினயவினிச்ச²யஸங்க³ஹே

பூ⁴தகா³மவினிச்ச²யகதா² ஸமத்தா.