14. பத²வீக²ணனவினிச்ச²யகதா²

72. பத²வீதி த்³வே பத²வீ ஜாதா ச பத²வீ அஜாதா ச பத²வீதி. தத்த² ஜாதா நாம பத²வீ ஸுத்³த⁴பம்ஸுகா ஸுத்³த⁴மத்திகா அப்பபாஸாணா அப்பஸக்க²ரா அப்பகட²லா அப்பமரும்பா³ அப்பவாலுகா யேபு⁴ய்யேனபம்ஸுகா யேபு⁴ய்யேனமத்திகா, அத³ட்³டா⁴பி வுச்சதி ‘‘ஜாதா பத²வீ’’தி. யோபி பம்ஸுபுஞ்ஜோ வா மத்திகாபுஞ்ஜோ வா அதிரேகசாதுமாஸம் ஓவட்டோ², ஸோபி வுச்சதி ‘‘ஜாதா பத²வீ’’தி. அஜாதா நாம பத²வீ ஸுத்³த⁴பாஸாணா ஸுத்³த⁴ஸக்க²ரா ஸுத்³த⁴கட²லா ஸுத்³த⁴மரும்பா³ ஸுத்³த⁴வாலுகா அப்பபம்ஸுகா அப்பமத்திகா யேபு⁴ய்யேனபாஸாணா யேபு⁴ய்யேனஸக்க²ரா யேபு⁴ய்யேனகட²லா யேபு⁴ய்யேனமரும்பா³ யேபு⁴ய்யேனவாலுகா, த³ட்³டா⁴பி வுச்சதி ‘‘அஜாதா பத²வீ’’தி. யோபி பம்ஸுபுஞ்ஜோ வா மத்திகாபுஞ்ஜோ வா ஓமகசாதுமாஸம் ஓவட்டோ², ஸோபி வுச்சதி ‘‘அஜாதா பத²வீ’’தி (பாசி. 84-86).

தத்த² ஜாதபத²விம் க²ணந்தஸ்ஸ க²ணாபேந்தஸ்ஸ வா பாசித்தியம். தத்ராயம் வினிச்ச²யோ (பாசி. அட்ட². 86) – ஸசே ஸயம் க²ணதி, பஹாரே பஹாரே பாசித்தியம். ஸசே அஞ்ஞம் ஆணாபேதி, ஸகிம் ஆணத்தோ ஸசேபி ஸகலதி³வஸம் க²ணதி, ஆணாபகஸ்ஸ ஏகமேவ பாசித்தியம். ஸசே பன குஸீதோ ஹோதி, புனப்புனம் ஆணாபேதப்³போ³, தம் ஆணாபேத்வா க²ணாபேந்தஸ்ஸ வாசாய வாசாய பாசித்தியம். ஸசே ‘‘போக்க²ரணிம் க²ணாஹீ’’தி வத³தி, வட்டதி. க²தாயேவ ஹி போக்க²ரணீ நாம ஹோதி. தஸ்மா அயம் கப்பியவோஹாரோ. ஏஸ நயோ ‘‘வாபிம் தளாகம் ஆவாடம் க²ணா’’திஆதீ³ஸுபி. ‘‘இமம் ஓகாஸம் க²ண, இமஸ்மிம் ஓகாஸே போக்க²ரணிம் க²ணா’’தி வத்தும் பன ந வட்டதி. ‘‘கந்த³ம் க²ண, மூலம் க²ணா’’தி அனியமேத்வா வத்தும் வட்டதி, ‘‘இமம் வல்லிம் க²ண, இமஸ்மிம் ஓகாஸே கந்த³ம் வா மூலம் வா க²ணா’’தி வத்தும் ந வட்டதி.

73. போக்க²ரணிம் ஸோதே⁴ந்தேஹி யோ குடேஹி உஸ்ஸிஞ்சிதும் ஸக்கா ஹோதி தனுககத்³த³மோ, தம் அபனேதும் வட்டதி, ப³ஹலோ ந வட்டதி. ஆதபேன ஸுக்க²கத்³த³மோ ப²லதி, தத்ர யோ ஹேட்டா² பத²வியா அஸம்ப³ந்தோ⁴, தமேவ அபனேதும் வட்டதி. உத³கேன க³தட்டா²னே உத³கபப்படகோ நாம ஹோதி, வாதபஹாரேன சலதி, தம் அபனேதும் வட்டதி. போக்க²ரணீஆதீ³னம் தடம் பி⁴ஜ்ஜித்வா உத³கஸாமந்தா பததி. ஸசே ஓமகசாதுமாஸம் ஓவட்ட²ம், சி²ந்தி³தும் பி⁴ந்தி³தும் வா வட்டதி, சாதுமாஸதோ உத்³த⁴ம் ந வட்டதி. ஸசே பன உத³கேயேவ பததி, தே³வேன அதிரேகசாதுமாஸம் ஓவட்டே²பி உத³கேயேவ உத³கஸ்ஸ பதிதத்தா வட்டதி.

பாஸாணபிட்டி²யம் ஸோண்டி³ம் க²ணந்தி, ஸசே தத்த² பட²மமேவ ஸுகு²மரஜம் பததி, தம் தே³வேன ஓவட்ட²ம் ஹோதி, சாதுமாஸச்சயேன அகப்பியபத²வீஸங்க்²யம் க³ச்ச²தி. உத³கே பரியாதி³ன்னே ஸோண்டி³ம் ஸோதே⁴ந்தேஹி விகோபேதும் ந வட்டதி. ஸசே பட²மமேவ உத³கேன பூரதி, பச்சா² ரஜம் பததி, தம் விகோபேதும் வட்டதி. தத்த² ஹி தே³வே வஸ்ஸந்தேபி உத³கேயேவ உத³கம் பததி. பிட்டி²பாஸாணே ஸுகு²மரஜம் ஹோதி, தே³வே பு²ஸாயந்தே அல்லீயதி, தம்பி சாதுமாஸச்சயேன விகோபேதும் ந வட்டதி. அகதபப்³பா⁴ரே வம்மிகோ உட்டி²தோ ஹோதி, யதா²ஸுக²ம் விகோபேதும் வட்டதி. ஸசே அப்³போ⁴காஸே உட்ட²ஹதி, ஓமகசாதுமாஸம் ஓவட்டோ²யேவ வட்டதி. ருக்கா²தீ³ஸு ஆருள்ஹஉபசிகமத்திகாயம்பி ஏஸேவ நயோ. க³ண்டு³ப்பாத³கூ³த²மூஸிகுக்கரகோ³கண்டகாதீ³ஸுபி ஏஸேவ நயோ. கோ³கண்டகோ நாம கா³வீனம் கு²ரச்சி²ன்னகத்³த³மோ வுச்சதி. ஸசே பன ஹேட்டி²மதலேன பூ⁴மிஸம்ப³ந்தோ⁴ ஹோதி, ஏகதி³வஸம்பி ந வட்டதி. கஸிதட்டா²னே நங்க³லச்சி²ன்னமத்திகாபிண்ட³ம் க³ண்ஹந்தஸ்ஸ ஏஸேவ நயோ.

புராணஸேனாஸனம் ஹோதி அச்ச²த³னம் வா வினட்ட²ச்ச²த³னம் வா அதிரேகசாதுமாஸம் ஓவட்ட²ம் ஜாதபத²வீஸங்க்²யமேவ க³ச்ச²தி, ததோ அவஸேஸம் ச²த³னிட்ட²கம் வா கோ³பானஸீஆதி³கம் உபகரணம் வா ‘‘இட்ட²கம் க³ண்ஹாமி, கோ³பானஸிம் பி⁴த்திபாத³ம் பத³ரத்த²ரணம் பாஸாத³த்த²ம்ப⁴ம் க³ண்ஹாமீ’’தி ஸஞ்ஞாய க³ண்ஹிதும் வட்டதி, தேன ஸத்³தி⁴ம் மத்திகா பததி, அனாபத்தி, பி⁴த்திமத்திகம் க³ண்ஹந்தஸ்ஸ பன ஆபத்தி. ஸசே யா யா அதிந்தா, தம் தம் க³ண்ஹாதி, அனாபத்தி. அந்தோகே³ஹே மத்திகாபுஞ்ஜோ ஹோதி, தஸ்மிம் ஏகதி³வஸம் ஓவட்டே² கே³ஹம் சா²தே³ந்தி. ஸசே ஸப்³போ³ திந்தோ, சாதுமாஸச்சயேன ஜாதபத²வீயேவ. அத²ஸ்ஸ உபரிபா⁴கோ³யேவ திந்தோ, அந்தோ அதிந்தோ, யத்தகம் திந்தம், தம் கப்பியகாரகேஹி கப்பியவோஹாரேன அபனாமேத்வா ஸேஸம் யதா²ஸுக²ம் வளஞ்ஜேதும் வட்டதி உத³கேன தேமிதத்தா. ஏகாப³த்³தா⁴யேவ ஹி ஜாதபத²வீ ஹோதி, ந இதராதி. அப்³போ⁴காஸே மத்திகாபாகாரோ ஹோதி, அதிரேகசாதுமாஸம் ஓவட்டோ² ஜாதபத²வீஸங்க்²யம் க³ச்ச²தி, தத்த² லக்³க³பம்ஸும் பன அல்லஹத்தே²ன சு²பித்வா க³ஹேதும் வட்டதி. ஸசே இட்ட²கபாகாரோ ஹோதி, யேபு⁴ய்யேனகட²லட்டா²னே திட்ட²தி, யதா²ஸுக²ம் விகோபேதும் வட்டதி. அப்³போ⁴காஸே டி²தமண்ட³பத்த²ம்ப⁴ம் இதோ சிதோ ச ஸஞ்சாலேத்வா பத²விம் விகோபேந்தேன க³ஹேதும் ந வட்டதி, உஜுகமேவ உத்³த⁴ரிதும் வட்டதி. அஞ்ஞம்பி ஸுக்க²ருக்க²ம் ஸுக்க²கா²ணுகம் வா க³ண்ஹந்தஸ்ஸ ஏஸேவ நயோ.

74. நவகம்மத்த²ம் த²ம்ப⁴ம் வா பாஸாணம் வா ருக்க²ம் வா த³ண்ட³கேஹி உச்சாலேத்வா பவட்டேந்தா க³ச்ச²ந்தி, தத்த² ஜாதபத²வீ பி⁴ஜ்ஜதி, ஸசே ஸுத்³த⁴சித்தா பவட்டேந்தி, அனாபத்தி. அத² பன தேன அபதே³ஸேன பத²விம் பி⁴ந்தி³துகாமாயேவ ஹோந்தி, ஆபத்தி. ஸாகா²தீ³னி கட்³ட⁴ந்தானம்பி பத²வியம் தா³ரூனி பா²லேந்தானம்பி ஏஸேவ நயோ. பத²வியம் அட்டி²ஸூசிகண்டகாதீ³ஸுபி யம் கிஞ்சி ஆகோடேதும் வா பவேஸேதும் வா ந வட்டதி, ‘‘பஸ்ஸாவதா⁴ராய வேகே³ன பத²விம் பி⁴ந்தி³ஸ்ஸாமீ’’தி ஏவம் பஸ்ஸாவம்பி காதும் ந வட்டதி. கரோந்தஸ்ஸ பி⁴ஜ்ஜதி, ஆபத்தி, ‘‘விஸமபூ⁴மிம் ஸமம் கரிஸ்ஸாமீ’’தி ஸம்மஜ்ஜனியா க⁴ம்ஸிதும்பி ந வட்டதி. வத்தஸீஸேனேவ ஹி ஸம்மஜ்ஜிதப்³ப³ம். கேசி கத்தரயட்டி²யா பூ⁴மிம் கோட்டேந்தி, பாத³ங்கு³ட்ட²கேன விலிக²ந்தி, ‘‘சங்கமிதட்டா²னம் த³ஸ்ஸேஸ்ஸாமா’’தி புனப்புனம் பூ⁴மிம் பி⁴ந்த³ந்தா சங்கமந்தி, ஸப்³ப³ம் ந வட்டதி, வீரியஸம்பக்³க³ஹத்த²ம் பன ஸமணத⁴ம்மம் கரோந்தேன ஸுத்³த⁴சித்தேன சங்கமிதும் வட்டதி. ‘‘ஹத்த²ம் கோ²விஸ்ஸாமா’’தி பத²வியம் க⁴ம்ஸந்தி, ந வட்டதி, அக⁴ம்ஸந்தேன பன அல்லஹத்த²ம் பத²வியம் ட²பேத்வா ரஜம் க³ஹேதும் வட்டதி.

கேசி கண்டு³கச்சு²ஆதீ³ஹி ஆபா³தி⁴கா சி²ன்னதடாதீ³ஸு அங்க³பச்சங்கா³னி க⁴ம்ஸந்தி, ந வட்டதி. ஜாதபத²விம் த³ஹதி வா த³ஹாபேதி வா, பாசித்தியம், அந்தமஸோ பத்தம்பி பசந்தோ யத்தகேஸு டா²னேஸு அக்³கி³ம் தே³தி வா தா³பேதி வா, தத்தகானி பாசித்தியானி, தஸ்மா பத்தம் பசந்தேனபி புப்³பே³ பக்கட்டா²னேயேவ பசிதப்³போ³. அத³ட்³டா⁴ய பத²வியா அக்³கி³ம் ட²பேதும் ந வட்டதி, பத்தபசனகபாலஸ்ஸ பன உபரி அக்³கி³ம் ட²பேதும் வட்டதி. தா³ரூனம் உபரி ட²பேதி, ஸோ அக்³கி³ தானி த³ஹந்தோ க³ந்த்வா பத²விம் த³ஹதி, ந வட்டதி. இட்ட²ககபாலாதீ³ஸுபி ஏஸேவ நயோ. தத்ராபி ஹி இட்ட²காதீ³னம்யேவ உபரி ட²பேதும் வட்டதி. கஸ்மா? தேஸம் அனுபாதா³னத்தா. ந ஹி தானி அக்³கி³ஸ்ஸ உபாதா³னஸங்க்²யம் க³ச்ச²ந்தி, ஸுக்க²கா²ணுஸுக்க²ருக்கா²தீ³ஸுபி அக்³கி³ம் தா³தும் ந வட்டதி. ஸசே பன ‘‘பத²விம் அப்பத்தமேவ நிப்³பா³பேத்வா க³மிஸ்ஸாமீ’’தி தே³தி, வட்டதி. பச்சா² நிப்³பா³பேதும் ந ஸக்கோதி, அவிஸயத்தா அனாபத்தி. திணுக்கம் க³ஹேத்வா க³ச்ச²ந்தோ ஹத்தே² ட³ய்ஹமானே பூ⁴மியம் பாதேதி, அனாபத்தி. பதிதட்டா²னேயேவ உபாதா³னம் த³த்வா அக்³கி³ம் காதும் வட்டதி. த³ட்³ட⁴பத²வியா ச யத்தகம் டா²னம் உஸுமாய அனுக³தம், ஸப்³ப³ம் விகோபேதும் வட்டதி.

யோ பன அஜானனகோ பி⁴க்கு² அரணிஸஹிதேன அக்³கி³ம் நிப்³ப³த்தேத்வா ஹத்தே²ன உக்கி²பித்வா ‘‘கிம் கரோமீ’’தி வத³தி, ‘‘ஜாலேஹீ’’தி வத்தப்³போ³. ‘‘ஹத்தோ² ட³ய்ஹதீ’’தி வத³தி, ‘‘யதா² ந ட³ய்ஹதி, ததா² கரோஹீ’’தி வத்தப்³போ³. ‘‘பூ⁴மியம் பாதேஹீ’’தி பன ந வத்தப்³போ³. ஸசே ஹத்தே² ட³ய்ஹமானே பாதேதி, ‘‘பத²விம் த³ஹிஸ்ஸாமீ’’தி அபாதிதத்தா அனாபத்தி, பதிதட்டா²னே பன அக்³கி³ம் காதும் வட்டதி. ‘‘இமஸ்ஸ த²ம்ப⁴ஸ்ஸ ஆவாடம் ஜான, மஹாமத்திகம் ஜான, து²ஸமத்திகம் ஜான, மஹாமத்திகம் தே³ஹி, து²ஸமத்திகம் தே³ஹி, மத்திகம் ஆஹர, பம்ஸும் ஆஹர, மத்திகாய அத்தோ², பம்ஸுனா அத்தோ², இமஸ்ஸ த²ம்ப⁴ஸ்ஸ ஆவாடம் கப்பியம் கரோஹி, இமம் மத்திகம் கப்பியம் கரோஹி, இமம் பம்ஸும் கப்பியம் கரோஹீ’’தி ஏவம் கப்பியவோஹாரேன யம் கிஞ்சி காராபேதும் வட்டதி. அஞ்ஞவிஹிதோ கேனசி ஸத்³தி⁴ம் கிஞ்சி கதே²ந்தோ பாத³ங்கு³ட்ட²கேன கத்தரயட்டி²யா வா பத²விம் விலிக²ந்தோ திட்ட²தி, ஏவம் அஸதியா விலிக²ந்தஸ்ஸ பி⁴ந்த³ந்தஸ்ஸ வா அனாபத்தி.

இதி பாளிமுத்தகவினயவினிச்ச²யஸங்க³ஹே

பத²வீக²ணனவினிச்ச²யகதா² ஸமத்தா.