11. கயவிக்கயஸமாபத்திவினிச்ச²யகதா²

57. கயவிக்கயஸமாபத்தீதி கயவிக்கயஸமாபஜ்ஜனம். ‘‘இமினா இமம் தே³ஹீ’’திஆதி³னா (பாரா. அட்ட². 2.595) ஹி நயேன பரஸ்ஸ கப்பியப⁴ண்ட³ம் க³ண்ஹந்தோ கயம் ஸமாபஜ்ஜதி, அத்தனோ கப்பியப⁴ண்ட³ம் தே³ந்தோ விக்கயம். அயம் பன கயவிக்கயோ ட²பேத்வா பஞ்ச ஸஹத⁴ம்மிகே அவஸேஸேஹி கி³ஹிபப்³ப³ஜிதேஹி அந்தமஸோ மாதாபிதூஹிபி ஸத்³தி⁴ம் ந வட்டதி.

தத்ராயம் வினிச்ச²யோ – வத்தே²ன வா வத்த²ம் ஹோது, ப⁴த்தேன வா ப⁴த்தம், யம் கிஞ்சி கப்பியம் ‘‘இமினா இமம் தே³ஹீ’’தி வத³தி, து³க்கடம். ஏவம் வத்வா மாதுயாபி அத்தனோ ப⁴ண்ட³ம் தே³தி, து³க்கடம், ‘‘இமினா இமம் தே³ஹீ’’தி வுத்தோ வா ‘‘இமம் தே³ஹி, இமம் தே த³ஸ்ஸாமீ’’தி தம் வத்வா வா மாதுயாபி ப⁴ண்ட³ம் அத்தனா க³ண்ஹாதி, து³க்கடம், அத்தனோ ப⁴ண்டே³ பரஹத்த²ம், பரப⁴ண்டே³ ச அத்தனோ ஹத்த²ம் ஸம்பத்தே நிஸ்ஸக்³கி³யம் பாசித்தியம். மாதரம் வா பன பிதரம் வா ‘‘இமம் தே³ஹீ’’தி வத³தோ விஞ்ஞத்தி ந ஹோதி, ‘‘இமம் க³ண்ஹாஹீ’’தி த³த³தோ ஸத்³தா⁴தே³ய்யவினிபாதனம் ந ஹோதி. அஞ்ஞாதகம் ‘‘இமம் தே³ஹீ’’தி வத³தோ விஞ்ஞத்தி, ‘‘இமம் க³ண்ஹாஹீ’’தி த³த³தோ ஸத்³தா⁴தே³ய்யவினிபாதனம், ‘‘இமினா இமம் தே³ஹீ’’தி கயவிக்கயம் ஆபஜ்ஜதோ நிஸ்ஸக்³கி³யம். தஸ்மா கப்பியப⁴ண்ட³ம் பரிவத்தந்தேன மாதாபிதூஹிபி ஸத்³தி⁴ம் கயவிக்கயம், அஞ்ஞாதகேஹி ஸத்³தி⁴ம் திஸ்ஸோ ஆபத்தியோ மோசேந்தேன பரிவத்தேதப்³ப³ம்.

தத்ராயம் பரிவத்தனவிதி⁴ – பி⁴க்கு²ஸ்ஸ பாதே²ய்யதண்டு³லா ஹோந்தி, ஸோ அந்தராமக்³கே³ ப⁴த்தஹத்த²ம் புரிஸம் தி³ஸ்வா ‘‘அம்ஹாகம் தண்டு³லா அத்தி², ந ச நோ இமேஹி அத்தோ², ப⁴த்தேன பன அத்தோ²’’தி வத³தி, புரிஸோ தண்டு³லே க³ஹேத்வா ப⁴த்தம் தே³தி, வட்டதி. திஸ்ஸோபி ஆபத்தியோ ந ஹோந்தி, அந்தமஸோ நிமித்தகம்மமத்தம்பி ந ஹோதி. கஸ்மா? மூலஸ்ஸ அத்தி²தாய. யோ பன ஏவம் அகத்வா ‘‘இமினா இமம் தே³ஹீ’’தி பரிவத்தேதி, யதா²வத்து²கமேவ. விகா⁴ஸாத³ம் தி³ஸ்வா ‘‘இமம் ஓத³னம் பு⁴ஞ்ஜித்வா ரஜனம் வா தா³ரூனி வா ஆஹரா’’தி வத³தி, ரஜனச²ல்லிக³ணனாய தா³ருக³ணனாய ச நிஸ்ஸக்³கி³யானி ஹோந்தி. ‘‘இமம் ஓத³னம் பு⁴ஞ்ஜித்வா இமம் நாம கரோதா²’’தி த³ந்தகாராதீ³ஹி ஸிப்பிகேஹி த⁴ம்மகரணாதீ³ஸு தம் தம் பரிக்கா²ரம் காரேதி, ரஜகேஹி வா வத்த²ம் தோ⁴வாபேதி, யதா²வத்து²கமேவ. நஹாபிதேன கேஸே சி²ந்தா³பேதி, கம்மகாரேஹி நவகம்மம் காரேதி, யதா²வத்து²கமேவ. ஸசே பன ‘‘இத³ம் ப⁴த்தம் பு⁴ஞ்ஜித்வா இத³ம் கரோதா²’’தி ந வத³தி, ‘‘இத³ம் ப⁴த்தம் பு⁴ஞ்ஜ, பு⁴த்தோஸி, பு⁴ஞ்ஜிஸ்ஸஸி, இத³ம் நாம கரோஹீ’’தி வத³தி, வட்டதி. ஏத்த² ச கிஞ்சாபி வத்த²தோ⁴வனே வா கேஸச்சே²த³னே வா பூ⁴மிஸோத⁴னாதி³னவகம்மே வா பரப⁴ண்ட³ம் அத்தனோ ஹத்த²க³தம் நிஸ்ஸஜ்ஜிதப்³ப³ம் நாம நத்தி², மஹாஅட்ட²கதா²யம் பன த³ள்ஹம் கத்வா வுத்தத்தா ந ஸக்கா ஏதம் படிக்கி²பிதும், தஸ்மா யதா² நிஸ்ஸக்³கி³யவத்து²ம்ஹி பரிபு⁴த்தே வா நட்டே² வா பாசித்தியம் தே³ஸேதி, ஏவமிதா⁴பி தே³ஸேதப்³ப³ம்.

யம் கிஞ்சி கப்பியப⁴ண்ட³ம் க³ண்ஹிதுகாமதாய அக்³க⁴ம் புச்சி²தும் வட்டதி, தஸ்மா ‘‘அயம் தவ பத்தோ கிம் அக்³க⁴தீ’’தி புச்சி²தே ‘‘இத³ம் நாமா’’தி வத³தி, ஸசே அத்தனோ கப்பியப⁴ண்ட³ம் மஹக்³க⁴ம் ஹோதி, ஏவஞ்ச நம் படிவத³தி ‘‘உபாஸக மம இத³ம் வத்து² மஹக்³க⁴ம், தவ பத்தம் அஞ்ஞஸ்ஸ தே³ஹீ’’தி. தம் ஸுத்வா இதரோ ‘‘அஞ்ஞம் தா²லகம்பி த³ஸ்ஸாமீ’’தி வத³தி, க³ண்ஹிதும் வட்டதி. ஸசே ஸோ பத்தோ மஹக்³கோ⁴, பி⁴க்கு²னோ வத்து² அப்பக்³க⁴ம், பத்தஸாமிகோ சஸ்ஸ அப்பக்³க⁴பா⁴வம் ந ஜானாதி, பத்தோ ந க³ஹேதப்³போ³, ‘‘மம வத்து² அப்பக்³க⁴’’ந்தி ஆசிக்கி²தப்³ப³ம். மஹக்³க⁴பா⁴வம் ஞத்வா வஞ்சேத்வா க³ண்ஹந்தோபி ஹி ப⁴ண்ட³ம் அக்³கா⁴பேத்வா காரேதப்³ப³தம் ஆபஜ்ஜதி. ஸசே பத்தஸாமிகோ ‘‘ஹோது, ப⁴ந்தே, ஸேஸம் மம புஞ்ஞம் ப⁴விஸ்ஸதீ’’தி தே³தி, வட்டதி. கப்பியகாரகஸ்ஸ பன ‘‘இமினா இமம் க³ஹேத்வா தே³ஹீ’’தி ஆசிக்கி²தும் வட்டதி, தஸ்மா யஸ்ஸ ஹத்த²தோ ப⁴ண்ட³ம் க³ண்ஹாதி, தம் ட²பேத்வா அஞ்ஞம் அந்தமஸோ தஸ்ஸ புத்தபா⁴திகம்பி கப்பியகாரகம் கத்வா ‘‘இமினா இமம் நாம க³ஹேத்வா தே³ஹீ’’தி ஆசிக்க²தி, ஸோ சே சே²கோ ஹோதி, புனப்புனம் அபனேத்வா விவதி³த்வா க³ண்ஹாதி, துண்ஹீபூ⁴தேன டா²தப்³ப³ம். நோ சே சே²கோ ஹோதி, ந ஜானாதி க³ஹேதும், வாணிஜகோ ச தம் வஞ்சேதி, ‘‘மா க³ண்ஹாஹீ’’தி வத்தப்³போ³.

‘‘இத³ம் படிக்³க³ஹிதம் தேலம் வா ஸப்பி வா அம்ஹாகம் அத்தி², அம்ஹாகஞ்ச அஞ்ஞேன அப்படிக்³க³ஹிதகேன அத்தோ²’’தி வுத்தே பன ஸசே ஸோ தம் க³ஹேத்வா அஞ்ஞம் தே³தி, பட²மம் அத்தனோ தேலம் ந மினாபேதப்³ப³ம். கஸ்மா? நாளியஞ்ஹி அவஸிட்ட²தேலம் ஹோதி, தம் பச்சா² மினந்தஸ்ஸ அப்படிக்³க³ஹிதம் தூ³ஸேய்ய. அயஞ்ச கயவிக்கயோ நாம கப்பியப⁴ண்ட³வஸேன வுத்தோ. கப்பியேன ஹி கப்பியம் பரிவத்தேந்தஸ்ஸ கயவிக்கயஸிக்கா²பதே³ன நிஸ்ஸக்³கி³யம் வுத்தம், அகப்பியேன பன அகப்பியம் பரிவத்தேந்தஸ்ஸ, கப்பியேன வா அகப்பியம் அகப்பியேன வா கப்பியம் பரிவத்தேந்தஸ்ஸ ரூபியஸம்வோஹாரஸிக்கா²பதே³ன நிஸ்ஸக்³கி³யம், தஸ்மா உபோ⁴ஸு வா ஏகஸ்மிம் வா அகப்பியே ஸதி ரூபியஸம்வோஹாரோ நாம ஹோதி.

58. ரூபியஸம்வோஹாரஸ்ஸ ச க³ருபா⁴வதீ³பனத்த²ம் இத³ம் பத்தசதுக்கம் வேதி³தப்³ப³ம். யோ ஹி ரூபியம் உக்³க³ண்ஹித்வா தேன அயபீ³ஜம் ஸமுட்டா²பேதி, தம் கோட்டாபேத்வா தேன லோஹேன பத்தம் காரேதி, அயம் பத்தோ மஹாஅகப்பியோ நாம, ந ஸக்கா கேனசி உபாயேன கப்பியோ காதும். ஸசேபி தம் வினாஸேத்வா தா²லகம் காரேதி, தம்பி அகப்பியம். வாஸிம் காரேதி, தாய சி²ன்னத³ந்தகட்ட²ம்பி அகப்பியம். ப³ளிஸம் காரேதி, தேன மாரிதா மச்சா²பி அகப்பியா. வாஸிம் தாபேத்வா உத³கம் வா கீ²ரம் வா உண்ஹாபேதி, தம்பி அகப்பியமேவ.

யோ பன ரூபியம் உக்³க³ண்ஹித்வா தேன பத்தம் கிணாதி, அயம்பி பத்தோ அகப்பியோ. ‘‘பஞ்சன்னம்பி ஸஹத⁴ம்மிகானம் ந கப்பதீ’’தி மஹாபச்சரியம் வுத்தம். ஸக்கா பன கப்பியோ காதும். ஸோ ஹி மூலே மூலஸாமிகானம், பத்தே ச பத்தஸாமிகானம் தி³ன்னே கப்பியோ ஹோதி, கப்பியப⁴ண்ட³ம் த³த்வா க³ஹேத்வா பரிபு⁴ஞ்ஜிதும் வட்டதி.

யோபி ரூபியம் உக்³க³ண்ஹாபேத்வா கப்பியகாரகேன ஸத்³தி⁴ம் கம்மாரகுலம் க³ந்த்வா பத்தம் தி³ஸ்வா ‘‘அயம் மய்ஹம் ருச்சதீ’’தி வத³தி, கப்பியகாரகோ ச தம் ரூபியம் த³த்வா கம்மாரம் ஸஞ்ஞாபேதி, அயம்பி பத்தோ கப்பியவோஹாரேன க³ஹிதோபி து³தியபத்தஸதி³ஸோயேவ, மூலஸ்ஸ ஸம்படிச்சி²தத்தா அகப்பியோ. கஸ்மா ஸேஸானம் ந கப்பதீதி? மூலஸ்ஸ அனிஸ்ஸட்ட²த்தா.

யோ பன ரூபியம் அஸம்படிச்சி²த்வா ‘‘தே²ரஸ்ஸ பத்தம் கிணித்வா தே³ஹீ’’தி பஹிதகப்பியகாரகேன ஸத்³தி⁴ம் கம்மாரகுலம் க³ந்த்வா பத்தம் தி³ஸ்வா ‘‘இமே கஹாபணே க³ஹேத்வா இமம் தே³ஹீ’’தி கஹாபணே தா³பேத்வா க³ஹிதோ, அயம் பத்தோ ஏதஸ்ஸேவ பி⁴க்கு²னோ ந வட்டதி து³ப்³பி³சாரிதத்தா, அஞ்ஞேஸம் பன வட்டதி மூலஸ்ஸ அஸம்படிச்சி²தத்தா. மஹாஸுமத்தே²ரஸ்ஸ கிர உபஜ்ஜா²யோ அனுருத்³த⁴த்தே²ரோ நாம அஹோஸி. ஸோ அத்தனோ ஏவரூபம் பத்தம் ஸப்பிஸ்ஸ பூரேத்வா ஸங்க⁴ஸ்ஸ நிஸ்ஸஜ்ஜி. திபிடகசூளனாக³த்தே²ரஸ்ஸ ஸத்³தி⁴விஹாரிகானம் ஏவரூபோ பத்தோ அஹோஸி. தம் தே²ரோபி ஸப்பிஸ்ஸ பூரேத்வா ஸங்க⁴ஸ்ஸ நிஸ்ஸஜ்ஜாபேஸீதி. இத³ம் அகப்பியபத்தசதுக்கம்.

ஸசே பன ரூபியம் அஸம்படிச்சி²த்வா ‘‘தே²ரஸ்ஸ பத்தம் கிணித்வா தே³ஹீ’’தி பஹிதகப்பியகாரகேன ஸத்³தி⁴ம் கம்மாரகுலம் க³ந்த்வா பத்தம் தி³ஸ்வா ‘‘அயம் மய்ஹம் ருச்சதீ’’தி வா ‘‘இமாஹம் க³ஹேஸ்ஸாமீ’’தி வா வத³தி, கப்பியகாரகோ ச தம் ரூபியம் த³த்வா கம்மாரம் ஸஞ்ஞாபேதி, அயம் பத்தோ ஸப்³ப³கப்பியோ பு³த்³தா⁴னம்பி பரிபோ⁴கா³ரஹோ. இமம் பன ரூபியஸம்வோஹாரம் கரோந்தேன ‘‘இமினா இமம் க³ஹேத்வா தே³ஹீ’’தி கப்பியகாரகம்பி ஆசிக்கி²தும் ந வட்டதி.

இதி பாளிமுத்தகவினயவினிச்ச²யஸங்க³ஹே

கயவிக்கயஸமாபத்திவினிச்ச²யகதா² ஸமத்தா.