12. ரூபியாதி³படிக்³க³ஹணவினிச்ச²யகதா²

59. ரூபியாதி³படிக்³க³ஹோதி ஜாதரூபாதி³படிக்³க³ண்ஹனம். தத்த² (பாரா. அட்ட². 2.583-4) ஜாதரூபம் ரஜதம் ஜாதரூபமாஸகோ ரஜதமாஸகோதி சதுப்³பி³த⁴ம் நிஸ்ஸக்³கி³யவத்து². தம்ப³லோஹாதீ³ஹி கதோ லோஹமாஸகோ. ஸாரதா³ருனா வா வேளுபேஸிகாய வா அந்தமஸோ தாலபண்ணேனபி ரூபம் சி²ந்தி³த்வா கதோ தா³ருமாஸகோ. லாகா²ய வா நிய்யாஸேன வா ரூபம் ஸமுட்டா²பேத்வா கதோ ஜதுமாஸகோ. யோ யோ யத்த² யத்த² ஜனபதே³ யதா³ யதா³ வோஹாரம் க³ச்ச²தி, அந்தமஸோ அட்டி²மயோபி சம்மமயோபி ருக்க²ப²லபீ³ஜமயோபி ஸமுட்டா²பிதரூபோபி அஸமுட்டா²பிதரூபோபீதி அயம் ஸப்³போ³பி ரஜதமாஸகேனேவ ஸங்க³ஹிதோ. முத்தா மணி வேளுரியோ ஸங்கோ² ஸிலா பவாளம் லோஹிதங்கோ மஸாரக³ல்லம் ஸத்த த⁴ஞ்ஞானி தா³ஸிதா³ஸகே²த்தவத்து²புப்பா²ராமப²லாராமாத³யோதி இத³ம் து³க்கடவத்து². தத்த² நிஸ்ஸக்³கி³யவத்து²ம் அத்தனோ வா ஸங்க⁴க³ணபுக்³க³லசேதியானம் வா அத்தா²ய ஸம்படிச்சி²தும் ந வட்டதி. அத்தனோ அத்தா²ய ஸம்படிச்ச²தோ நிஸ்ஸக்³கி³யம் பாசித்தியம் ஹோதி, ஸேஸானம் அத்தா²ய து³க்கடம். து³க்கடவத்து²ம் ஸப்³பே³ஸம்பி அத்தா²ய ஸம்படிச்ச²தோ து³க்கடமேவ.

தத்ராயம் வினிச்ச²யோ (பாரா. அட்ட². 2.538-9) – ஸசே கோசி ஜாதரூபரஜதம் ஆஹரித்வா ‘‘இத³ம் ஸங்க⁴ஸ்ஸ த³ம்மி, ஆராமம் வா கரோத² சேதியம் வா போ⁴ஜனஸாலாதீ³னம் வா அஞ்ஞதர’’ந்தி வத³தி, இத³ம் ஸம்படிச்சி²தும் ந வட்டதி. ஸசே பன ‘‘நயித³ம் பி⁴க்கூ²னம் ஸம்படிச்சி²தும் வட்டதீ’’தி படிக்கி²த்தே ‘‘வட்³ட⁴கீனம் வா கம்மகாரானம் வா ஹத்தே² ப⁴விஸ்ஸதி, கேவலம் தும்ஹே ஸுகதது³க்கடம் ஜானாதா²’’தி வத்வா தேஸம் ஹத்தே² த³த்வா பக்கமதி, வட்டதி. அதா²பி ‘‘மம மனுஸ்ஸானம் ஹத்தே² ப⁴விஸ்ஸதி, மய்ஹமேவ வா ஹத்தே² ப⁴விஸ்ஸதி, கேவலம் தும்ஹே யம் யஸ்ஸ தா³தப்³ப³ம், தத³த்தா²ய பேஸேதா²’’தி வத³தி, ஏவம்பி வட்டதி. ஸசே பன ஸம்க⁴ம் வா க³ணம் வா புக்³க³லம் வா அனாமஸித்வா ‘‘இத³ம் ஹிரஞ்ஞஸுவண்ணம் சேதியஸ்ஸ தே³ம, விஹாரஸ்ஸ தே³ம, நவகம்மஸ்ஸ தே³மா’’தி வத³ந்தி, படிக்கி²பிதும் ந வட்டதி, ‘‘இமே இத³ம் ப⁴ணந்தீ’’தி கப்பியகாரகானம் ஆசிக்கி²தப்³ப³ம். ‘‘சேதியாதீ³னம் அத்தா²ய தும்ஹே க³ஹேத்வா ட²பேத்வா’’தி வுத்தே பன ‘‘அம்ஹாகம் க³ஹேதும் ந வட்டதீ’’தி படிக்கி²பிதப்³ப³ம்.

ஸசே பன கோசி ப³ஹும் ஹிரஞ்ஞஸுவண்ணம் ஆனேத்வா ‘‘இத³ம் ஸம்க⁴ஸ்ஸ த³ம்மி, சத்தாரோ பச்சயே பரிபு⁴ஞ்ஜதா²’’தி வத³தி, தஞ்சே ஸம்கோ⁴ ஸம்படிச்ச²தி, படிக்³க³ஹணேபி பரிபோ⁴கே³பி ஆபத்தி. தத்ர சேகோ பி⁴க்கு² ‘‘நயித³ம் கப்பதீ’’தி படிக்கி²பதி, உபாஸகோ ச ‘‘யதி³ன கப்பதி, மய்ஹமேவ ப⁴விஸ்ஸதீ’’தி தம் ஆதா³ய க³ச்ச²தி. ஸோ பி⁴க்கு² ‘‘தயா ஸம்க⁴ஸ்ஸ லாப⁴ந்தராயோ கதோ’’தி ந கேனசி கிஞ்சி வத்தப்³போ³. யோ ஹி தம் சோதே³தி, ஸ்வேவ ஸாபத்திகோ ஹோதி. தேன பனேகேன ப³ஹூ அனாபத்திகா கதா. ஸசே பன பி⁴க்கூ²ஹி ‘‘ந வட்டதீ’’தி படிக்கி²த்தே ‘‘கப்பியகாரகானம் வா ஹத்தே² ப⁴விஸ்ஸதி, மம புரிஸானம் வா மய்ஹம் வா ஹத்தே² ப⁴விஸ்ஸதி, கேவலம் தும்ஹே பச்சயே பரிபு⁴ஞ்ஜதா²’’தி வத³தி, வட்டதி.

சதுபச்சயத்தா²ய ச தி³ன்னம் யேன யேன பச்சயேன அத்தோ² ஹோதி, தம் தத³த்த²ம் உபனேதப்³ப³ம். சிவரத்தா²ய தி³ன்னம் சீவரேயேவ உபனேதப்³ப³ம். ஸசே சீவரேன தாதி³ஸோ அத்தோ² நத்தி², பிண்ட³பாதாதீ³ஹி ஸம்கோ⁴ கிலமதி, ஸம்க⁴ஸுட்டு²தாய அபலோகேத்வா தத³த்தா²யபி உபனேதப்³ப³ம். ஏஸ நயோ பிண்ட³பாதகி³லானபச்சயத்தா²ய தி³ன்னேபி. ஸேனாஸனத்தா²ய தி³ன்னம் பன ஸேனாஸனஸ்ஸ க³ருப⁴ண்ட³த்தா ஸேனாஸனேயேவ உபனேதப்³ப³ம். ஸசே பன பி⁴க்கூ²ஸு ஸேனாஸனம் ச²ட்³டே³த்வா க³தேஸு ஸேனாஸனம் வினஸ்ஸதி, ஈதி³ஸே காலே ஸேனாஸனம் விஸ்ஸஜ்ஜேத்வாபி பி⁴க்கூ²னம் பரிபோ⁴கோ³ அனுஞ்ஞாதோ, தஸ்மா ஸேனாஸனஜக்³க³னத்த²ம் மூலச்சே²ஜ்ஜம் அகத்வா யாபனமத்தம் பரிபு⁴ஞ்ஜிதப்³ப³ம்.

60. ஸசே கோசி ‘‘மய்ஹம் திஸஸ்ஸஸம்பாத³னகம் மஹாதளாகம் அத்தி², தம் ஸம்க⁴ஸ்ஸ த³ம்மீ’’தி வத³தி, தஞ்சே ஸம்கோ⁴ ஸம்படிச்ச²தி, படிக்³க³ஹணேபி பரிபோ⁴கே³பி ஆபத்தியேவ. யோ பன தம் படிக்கி²பதி, ஸோ புரிமனயேனேவ ந கேனசி கிஞ்சி வத்தப்³போ³. யோ ஹி தம் சோதே³தி, ஸ்வேவ ஸாபத்திகோ ஹோதி. தேன பனேகேன ப³ஹூ அனாபத்திகா கதா. யோ பன ‘‘தாதி³ஸம்யேவ தளாகம் த³ம்மீ’’தி வத்வா பி⁴க்கூ²ஹி ‘‘ந வட்டதீ’’தி படிக்கி²த்தோ வத³தி ‘‘அஸுகஞ்ச அஸுகஞ்ச ஸங்க⁴ஸ்ஸ தளாகம் அத்தி², தம் கத²ம் வட்டதீ’’தி. ஸோ வத்தப்³போ³ ‘‘கப்பியம் கத்வா தி³ன்னம் ப⁴விஸ்ஸதீ’’தி. கத²ம் தி³ன்னம் கப்பியம் ஹோதீதி. ‘‘சத்தாரோ பச்சயே பரிபு⁴ஞ்ஜதா²’’தி வத்வா தி³ன்னந்தி. ஸோ ஸசே ‘‘ஸாது⁴, ப⁴ந்தே சத்தாரோ பச்சயே பரிபு⁴ஞ்ஜதா²’’தி தே³தி, வட்டதி. அதா²பி ‘‘தளாகம் க³ண்ஹதா²’’தி வத்வா ‘‘ந வட்டதீ’’தி படிக்கி²த்தோ ‘‘கப்பியகாரகோ அத்தீ²’’தி புச்சி²த்வா ‘‘நத்தீ²’’தி வுத்தே ‘‘இத³ம் அஸுகோ நாம விசாரேஸ்ஸதி, அஸுகஸ்ஸ வா ஹத்தே² மய்ஹம் வா ஹத்தே² ப⁴விஸ்ஸதி, ஸங்கோ⁴ கப்பியப⁴ண்ட³ம் பரிபு⁴ஞ்ஜதூ’’தி வத³தி, வட்டதி. ஸசேபி ‘‘ந வட்டதீ’’தி படிக்கி²த்தோ ‘‘உத³கம் பரிபு⁴ஞ்ஜிஸ்ஸதி, ப⁴ண்ட³கம் தோ⁴விஸ்ஸதி, மிக³பக்கி²னோ பிவிஸ்ஸந்தீ’’தி வத³தி, ஏவம்பி வட்டதி. அதா²பி ‘‘ந வட்டதீ’’தி படிக்கி²த்தோ வத³தி ‘‘கப்பியஸீஸேன க³ண்ஹதா²’’தி. ‘‘ஸாது⁴ உபாஸக, ஸங்கோ⁴ பானீயம் பிவிஸ்ஸதி, ப⁴ண்ட³கம் தோ⁴விஸ்ஸதி, மிக³பக்கி²னோ பிவிஸ்ஸந்தீ’’தி வத்வா பரிபு⁴ஞ்ஜிதும் வட்டதி. அதா²பி ‘‘மம தளாகம் வா போக்க²ரணிம் வா ஸங்க⁴ஸ்ஸ த³ம்மீ’’தி வுத்தே ‘‘ஸாது⁴ உபாஸக, ஸங்கோ⁴ பானீயம் பிவிஸ்ஸதீ’’திஆதீ³னி வத்வா பரிபு⁴ஞ்ஜிதும் வட்டதியேவ.

யதி³ பன பி⁴க்கூ²ஹி ஹத்த²கம்மம் யாசித்வா ஸஹத்தே²ன ச கப்பியபத²விம் க²ணித்வா உத³கபரிபோ⁴க³த்தா²ய தளாகம் காரிதம் ஹோதி, தஞ்சே நிஸ்ஸாய ஸஸ்ஸம் நிப்பா²தே³த்வா மனுஸ்ஸா விஹாரே கப்பியப⁴ண்ட³ம் தே³ந்தி, வட்டதி. அத² மனுஸ்ஸா ஏவ ஸங்க⁴ஸ்ஸ உபகாரத்தா²ய ஸங்கி⁴கபூ⁴மிம் க²ணித்வா தம் நிஸ்ஸாய நிப்ப²ன்னஸஸ்ஸதோ கப்பியப⁴ண்ட³ம் தே³ந்தி, ஏதம்பி வட்டதி. ‘‘அம்ஹாகம் ஏகம் கப்பியகாரகம் ட²பேதா²’’தி வுத்தே ச ட²பேதும்பி லப்³ப⁴தி. அத² தே மனுஸ்ஸா ராஜப³லினா உபத்³து³தா பக்கமந்தி, அஞ்ஞே படிபஜ்ஜந்தி, ந ச பி⁴க்கூ²னம் கிஞ்சி தே³ந்தி, உத³கம் வாரேதும் லப்³ப⁴தி, தஞ்ச கோ² கஸிகம்மகாலேயேவ, ந ஸஸ்ஸகாலே. ஸசே தே வத³ந்தி ‘‘நனு, ப⁴ந்தே, புப்³பே³பி மனுஸ்ஸா இமம் நிஸ்ஸாய ஸஸ்ஸம் அகம்ஸூ’’தி, ததோ வத்தப்³பா³ ‘‘தே ஸங்க⁴ஸ்ஸ இமஞ்ச இமஞ்ச உபகாரம் அகம்ஸு, இத³ஞ்சித³ஞ்ச கப்பியப⁴ண்ட³கம் அத³ம்ஸூ’’தி. ஸசே தே வத³ந்தி ‘‘மயம்பி த³ஸ்ஸாமா’’தி, ஏவம்பி வட்டதி.

ஸசே பன கோசி அப்³யத்தோ அகப்பியவோஹாரேன தளாகம் படிக்³க³ண்ஹாதி வா காரேதி வா, தம் பி⁴க்கூ²ஹி ந பரிபு⁴ஞ்ஜிதப்³ப³ம், தம் நிஸ்ஸாய லத்³த⁴கப்பியப⁴ண்ட³ம்பி அகப்பியமேவ. ஸசே பி⁴க்கூ²ஹி பரிச்சத்தபா⁴வம் ஞத்வா ஸாமிகோ வா தஸ்ஸ புத்ததீ⁴தரோ வா அஞ்ஞோ வா கோசி வம்ஸே உப்பன்னோ புன கப்பியவோஹாரேன தே³தி, வட்டதி. பச்சி²ன்னே குலவம்ஸே யோ தஸ்ஸ ஜனபத³ஸ்ஸ ஸாமிகோ, ஸோ அச்சி²ந்தி³த்வா கப்பியவோஹாரேன புன தே³தி சித்தலபப்³ப³தே பி⁴க்கு²னா நீஹடஉத³கவாஹகம் அளனாக³ராஜமஹேஸீ விய, ஏவம்பி வட்டதி. கப்பியவோஹாரேபி உத³கவஸேன படிக்³க³ஹிததளாகே ஸுத்³த⁴சித்தானம் மத்திகுத்³த⁴ரணபாளிப³ந்த⁴னாதீ³னி ச காதும் வட்டதி. தம் நிஸ்ஸாய பன ஸஸ்ஸம் கரோந்தே தி³ஸ்வா கப்பியகாரகம் ட²பேதும் ந வட்டதி. யதி³ தே ஸயமேவ கப்பியப⁴ண்ட³ம் தே³ந்தி, க³ஹேதப்³ப³ம். நோ சே தே³ந்தி, ந சோதே³தப்³ப³ம். பச்சயவஸேன படிக்³க³ஹிததளாகே கப்பியகாரகம் ட²பேதும் வட்டதி, மத்திகுத்³த⁴ரணபாளிப³ந்த⁴னாதீ³னி காரேதும் ந வட்டதி. ஸசே கப்பியகாரகா ஸயமேவ கரோந்தி, வட்டதி. அப்³யத்தேன பன லஜ்ஜிபி⁴க்கு²னா காராபிதேஸு கிஞ்சாபி படிக்³க³ஹணம் கப்பியம், பி⁴க்கு²ஸ்ஸ பன பயோக³பச்சயா உப்பன்னேன மிஸ்ஸத்தா விஸக³தபிண்ட³பாதோ விய அகப்பியமம்ஸரஸமிஸ்ஸபோ⁴ஜனம் விய ச து³ப்³பி³னிபோ⁴க³ம் ஹோதி, ஸப்³பே³ஸம் அகப்பியமேவ.

61. ஸசே பன உத³கஸ்ஸ ஓகாஸோ அத்தி², தளாகஸ்ஸ பாளி தி²ரா, ‘‘யதா² ப³ஹும் உத³கம் க³ண்ஹாதி, ஏவம் கரோஹி, தீரஸமீபே உத³கம் கரோஹீ’’தி ஏவம் உத³கமேவ விசாரேதி, வட்டதி. உத்³த⁴னே அக்³கி³ம் ந பாதேந்தி, ‘‘உத³ககம்மம் லப்³ப⁴து உபாஸகா’’தி வத்தும் வட்டதி, ‘‘ஸஸ்ஸம் கத்வா ஆஹரதா²’’தி வத்தும் பன ந வட்டதி. ஸசே பன தளாகே அதிப³ஹும் உத³கம் தி³ஸ்வா பஸ்ஸதோ வா பிட்டி²தோ வா மாதிகம் நீஹராபேதி, வனம் சி²ந்தா³பேத்வா கேதா³ரே காராபேதி, போராணகேதா³ரேஸு வா பகதிபா⁴க³ம் அக்³க³ஹேத்வா அதிரேகம் க³ண்ஹாதி, நவஸஸ்ஸே வா அபரிச்சி²ன்னபா⁴கே³ ‘‘ஏத்தகே கஹாபணே தே³தா²’’தி கஹாபணே உட்டா²பேதி, ஸப்³பே³ஸம் அகப்பியம்.

யோ பன ‘‘கஸத² வபதா²’’தி அவத்வா ‘‘ஏத்தகாய பூ⁴மியா ஏத்தகோ நாம பா⁴கோ³’’தி ஏவம் பூ⁴மிம் வா பதிட்டா²பேதி, ‘‘ஏத்தகே பூ⁴மிபா⁴கே³ அம்ஹேஹி ஸஸ்ஸம் கதம், ஏத்தகம் நாம பா⁴க³ம் க³ண்ஹதா²’’தி வத³ந்தேஸு கஸ்ஸகேஸு பூ⁴மிப்பமாணக³ஹணத்த²ம் ரஜ்ஜுயா வா த³ண்டே³ன வா மினாதி, க²லே வா ட²த்வா ரக்க²தி, க²லதோ வா நீஹராபேதி, கோட்டா²கா³ரே வா படிஸாமேதி, தஸ்ஸேவ தம் அகப்பியம். ஸசே கஸ்ஸகா கஹாபணே ஆஹரித்வா ‘‘இமே ஸங்க⁴ஸ்ஸ ஆஹடா’’தி வத³ந்தி, அஞ்ஞதரோ ச பி⁴க்கு² ‘‘ந ஸங்கோ⁴ கஹாபணே கா²த³தீ’’தி ஸஞ்ஞாய ‘‘ஏத்தகேஹி கஹாபணேஹி ஸாடகே ஆஹரத², ஏத்தகேஹி யாகு³ஆதீ³னி ஸம்பாதே³தா²’’தி வத³தி, யம் தே ஆஹரந்தி, தம் ஸப்³பே³ஸம் அகப்பியம். கஸ்மா? கஹாபணானம் விசாரிதத்தா. ஸசே த⁴ஞ்ஞம் ஆஹரித்வா ‘‘இத³ம் ஸங்க⁴ஸ்ஸ ஆஹட’’ந்தி வத³ந்தி, அஞ்ஞதரோ ச பி⁴க்கு² புரிமனயேனேவ ‘‘ஏத்தகேஹி வீஹீஹி இத³ஞ்சித³ஞ்ச ஆஹரதா²’’தி வத³தி, யம் தே ஆஹரந்தி, தம் தஸ்ஸேவ அகப்பியம். கஸ்மா? த⁴ஞ்ஞஸ்ஸ விசாரிதத்தா. ஸசே தண்டு³லம் வா அபரண்ணம் வா ஆஹரித்வா ‘‘இத³ம் ஸங்க⁴ஸ்ஸ ஆஹட’’ந்தி வத³ந்தி, அஞ்ஞதரோ ச பி⁴க்கு² புரிமனயேனேவ ‘‘ஏத்தகேஹி தண்டு³லேஹி இத³ஞ்சித³ஞ்ச ஆஹரதா²’’தி வத³தி, யம் தே ஆஹரந்தி, தம் ஸப்³பே³ஸம் கப்பியம். கஸ்மா? கப்பியானம் தண்டு³லாதீ³னம் விசாரிதத்தா. கயவிக்கயேபி அனாபத்தி கப்பியகாரகஸ்ஸ ஆசிக்கி²தத்தா.

62. புப்³பே³ பன சித்தலபப்³ப³தே ஏகோ பி⁴க்கு² சதுஸாலத்³வாரே ‘‘அஹோ வத ஸ்வே ஸங்க⁴ஸ்ஸ ஏத்தகப்பமாணே பூவே பசேய்யு’’ந்தி ஆராமிகானம் ஸஞ்ஞாஜனனத்த²ம் பூ⁴மியம் மண்ட³லம் அகாஸி. தம் தி³ஸ்வா சே²கோ ஆராமிகோ ததே²வ கத்வா து³தியதி³வஸே பே⁴ரியா ஆகோடிதாய ஸன்னிபதிதே ஸங்கே⁴ பூவம் க³ஹேத்வா ஸங்க⁴த்தே²ரம் ஆஹ – ‘‘ப⁴ந்தே, அம்ஹேஹி இதோ புப்³பே³ நேவ பிதூனம், ந பிதாமஹானம் ஏவரூபம் ஸுதபுப்³ப³ம், ஏகேன அய்யேன சதுஸாலத்³வாரே பூவத்தா²ய ஸஞ்ஞா கதா, இதோ தா³னி பபு⁴தி அய்யா அத்தனோ அத்தனோ சித்தானுரூபம் வத³ந்து, அம்ஹாகம்பி பா²ஸுவிஹாரோ ப⁴விஸ்ஸதீ’’தி. மஹாதே²ரோ ததோவ நிவத்தி, ஏகபி⁴க்கு²னாபி பூவோ ந க³ஹிதோ. ஏவம் புப்³பே³ தத்ருப்பாத³ம் ந பரிபு⁴ஞ்ஜிம்ஸு. தஸ்மா –

ஸல்லேக²ம் அச்சஜந்தேன, அப்பமத்தேன பி⁴க்கு²னா;

கப்பியேபி ந காதப்³பா³, ஆமிஸத்தா²ய லோலதாதி. (பாரா. அட்ட². 2.538-9);

யோ சாயம் தளாகே வுத்தோ, போக்க²ரணீஉத³கவாஹகமாதிகாதீ³ஸுபி ஏஸேவ நயோ.

63. புப்³ப³ண்ணாபரண்ணஉச்சு²ப²லாப²லாதீ³னம் விருஹனட்டா²னம் யம் கிஞ்சி கே²த்தம் வா வத்து²ம் வா ‘‘த³ம்மீ’’தி வுத்தேபி ‘‘ந வட்டதீ’’தி படிக்கி²பித்வா தளாகே வுத்தனயேனேவ யதா³ கப்பியவோஹாரேன ‘‘சதுபச்சயபரிபோ⁴க³த்தா²ய த³ம்மீ’’தி வத³தி, ததா³ ஸம்படிச்சி²தப்³ப³ம், ‘‘வனம் த³ம்மி அரஞ்ஞம் த³ம்மீ’’தி வுத்தே பன வட்டதி. ஸசே மனுஸ்ஸா பி⁴க்கூ²ஹி அனாணத்தாயேவ தத்த² ருக்கே² சி²ந்தி³த்வா அபரண்ணாதீ³னி ஸம்பாதே³த்வா பி⁴க்கூ²னம் பா⁴க³ம் தே³ந்தி, வட்டதி, அதே³ந்தா ந சோதே³தப்³பா³. ஸசே கேனசிதே³வ அந்தராயேன தேஸு பக்கந்தேஸு அஞ்ஞே கரோந்தி, ந ச பி⁴க்கூ²னம் கிஞ்சி தே³ந்தி, தே வாரேதப்³பா³. ஸசே வத³ந்தி ‘‘நனு, ப⁴ந்தே, புப்³பே³ மனுஸ்ஸா இத⁴ ஸஸ்ஸானி அகம்ஸூ’’தி, ததோ வத்தப்³பா³ ‘‘தே ஸங்க⁴ஸ்ஸ இத³ஞ்சித³ஞ்ச கப்பியப⁴ண்ட³ம் அத³ம்ஸூ’’தி. ஸசே வத³ந்தி ‘‘மயம்பி த³ஸ்ஸாமா’’தி, ஏவம் வட்டதி.

கிஞ்சி ஸஸ்ஸுட்டா²னகம் பூ⁴மிப்பதே³ஸம் ஸந்தா⁴ய ‘‘ஸீமம் தே³மா’’தி வத³ந்தி, வட்டதி. ஸீமபரிச்சே²த³னத்த²ம் பன த²ம்பா⁴ வா பாஸாணா வா ஸயம் ந ட²பேதப்³பா³, பூ⁴மி நாம அனக்³கா⁴, அப்பகேனபி பாராஜிகோ ப⁴வேய்ய. ஆராமிகானம் பன வத்தப்³ப³ம் ‘‘இமினா டா²னேன அம்ஹாகம் ஸீமா க³தா’’தி. ஸசேபி ஹி தே அதி⁴கம் க³ண்ஹந்தி, பரியாயேன கதி²தத்தா அனாபத்தி. யதி³ பன ராஜராஜமஹாமத்தாத³யோ ஸயமேவ த²ம்பே⁴ ட²பாபேத்வா ‘‘சத்தாரோ பச்சயே பரிபு⁴ஞ்ஜதா²’’தி தே³ந்தி, வட்டதியேவ.

ஸசே கோசி அந்தோஸீமாயம் தளாகம் வா க²ணதி, விஹாரமஜ்ஜே²ன வா மாதிகம் நேதி, சேதியங்க³ணபோ³தி⁴யங்க³ணாதீ³னி து³ஸ்ஸந்தி, வாரேதப்³போ³. ஸசே ஸங்கோ⁴ கிஞ்சி லபி⁴த்வா ஆமிஸக³ருகதாய ந வாரேதி, ஏகோ பி⁴க்கு² வாரேதி, ஸோவ பி⁴க்கு² இஸ்ஸரோ. ஸசே ஏகோ பி⁴க்கு² ந வாரேதி ‘‘நேத² தும்ஹே’’தி, தேஸம்யேவ பக்கோ² ஹோதி. ஸங்கோ⁴ வாரேதி, ஸங்கோ⁴வ இஸ்ஸரோ. ஸங்கி⁴கேஸு ஹி கம்மேஸு யோ த⁴ம்மகம்மம் கரோதி, ஸோவ இஸ்ஸரோ. ஸசே வாரியமானோபி கரோதி, ஹேட்டா² க³ஹிதம் பம்ஸும் ஹேட்டா² பக்கி²பித்வா, உபரி க³ஹிதம் பம்ஸும் உபரி பக்கி²பித்வா பூரேதப்³பா³.

ஸசே கோசி யதா²ஜாதமேவ உச்சு²ம் வா அபரண்ணம் வா அலாபு³கும்ப⁴ண்டா³தி³கம் வா வல்லிப²லம் தா³துகாமோ ‘‘ஏதம் ஸப்³ப³ம் உச்சு²கே²த்தம் அபரண்ணவத்து²ம் வல்லிப²லாவாடம் த³ம்மீ’’தி வத³தி, ஸஹ வத்து²னா பராமட்ட²த்தா ந வட்டதீதி மஹாஸுமத்தே²ரோ ஆஹ. மஹாபது³மத்தே²ரோ பன ‘‘அபி⁴லாபமத்தமேதம், ஸாமிகானம்யேவ ஹி ஸோ பூ⁴மிபா⁴கோ³, தஸ்மா வட்டதீ’’தி ஆஹ. ‘‘தா³ஸம் த³ம்மீ’’தி வத³தி, ந வட்டதி. ‘‘ஆராமிகம் த³ம்மி, வேய்யாவச்சகரம் த³ம்மி, கப்பியகாரகம் த³ம்மீ’’தி வுத்தே வட்டதி. ஸசே ஆராமிகோ புரேப⁴த்தம்பி பச்சா²ப⁴த்தம்பி ஸங்க⁴ஸ்ஸேவ கம்மம் கரோதி, ஸாமணேரஸ்ஸ விய ஸப்³ப³ம் பே⁴ஸஜ்ஜம் படிஜக்³க³னம்பி தஸ்ஸ காதப்³ப³ம். ஸசே புரேப⁴த்தமேவ ஸங்க⁴ஸ்ஸ கம்மம் கரோதி, பச்சா²ப⁴த்தம் அத்தனோ கரோதி, ஸாயம் நிவாபோ ந தா³தப்³போ³. யேபி பஞ்சதி³வஸவாரேன வா பக்க²வாரேன வா ஸங்க⁴ஸ்ஸ கம்மம் கத்வா ஸேஸகாலே அத்தனோ கம்மம் கரோந்தி, தேஸம்பி கரணகாலேயேவ ப⁴த்தஞ்ச நிவாபோ ச தா³தப்³போ³. ஸசே ஸங்க⁴ஸ்ஸ கம்மம் நத்தி², அத்தனோயேவ கம்மம் கத்வா ஜீவந்தி, தே சே ஹத்த²கம்மமூலம் ஆனேத்வா தே³ந்தி, க³ஹேதப்³ப³ம். நோ சே தே³ந்தி, ந கிஞ்சி வத்தப்³பா³. யம் கிஞ்சி ரஜகதா³ஸம்பி பேஸகாரதா³ஸம்பி ஆராமிகனாமேன ஸம்படிச்சி²தும் வட்டதி.

ஸசே ‘‘கா³வோ தே³மா’’தி வத³ந்தி, ‘‘ந வட்டதீ’’தி படிக்கி²பிதப்³பா³. இமா கா³வோ குதோதி. பண்டி³தேஹி பஞ்சகோ³ரஸபரிபோ⁴க³த்தா²ய தி³ன்னாதி. ‘‘மயம்பி பஞ்சகோ³ரஸபரிபோ⁴க³த்தா²ய தே³மா’’தி வுத்தே வட்டந்தி. அஜிகாதீ³ஸுபி ஏஸேவ நயோ. ‘‘ஹத்தி²ம் தே³ம, அஸ்ஸம், மஹிம்ஸம், குக்குடம், ஸூகரம் தே³மா’’தி வத³ந்தி, ஸம்படிச்சி²தும் ந வட்டதி. ஸசே கேசி மனுஸ்ஸா ‘‘அப்போஸ்ஸுக்கா, ப⁴ந்தே, தும்ஹே ஹோத², மயம் இமே க³ஹேத்வா தும்ஹாகம் கப்பியப⁴ண்ட³ம் த³ஸ்ஸாமா’’தி க³ண்ஹந்தி, வட்டதி. குக்குடஸூகரே ‘‘ஸுக²ம் ஜீவந்தூ’’தி அரஞ்ஞே விஸ்ஸஜ்ஜாபேதும் வட்டதி. ‘‘இமம் தளாகம், இமம் கே²த்தம், இமம் வத்து²ம் விஹாரஸ்ஸ தே³மா’’தி வுத்தே படிக்கி²பிதும் ந லப்³ப⁴தி.

64. ஸசே கோசி பி⁴க்கு²ம் உத்³தி³ஸ்ஸ தூ³தேன ஹிரஞ்ஞஸுவண்ணாதி³சீவரசேதாபன்னம் பஹிணேய்ய ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஹீ’’தி, ஸோ சே தூ³தோ தம் பி⁴க்கு²ம் உபஸங்கமித்வா ஏவம் வதே³ய்ய ‘‘இத³ம் கோ², ப⁴ந்தே, ஆயஸ்மந்தம் உத்³தி³ஸ்ஸ சீவரசேதாபன்னம் ஆப⁴தம், படிக்³க³ண்ஹது ஆயஸ்மா சீவரசேதாபன்ன’’ந்தி, தேன பி⁴க்கு²னா ஸோ தூ³தோ ஏவமஸ்ஸ வசனீயோ ‘‘ந கோ² மயம், ஆவுஸோ, சீவரசேதாபன்னம் படிக்³க³ண்ஹாம, சீவரஞ்ச கோ² மயம் படிக்³க³ண்ஹாம காலேன கப்பிய’’ந்தி. ஸோ சே தூ³தோ தம் பி⁴க்கு²ம் ஏவம் வதே³ய்ய ‘‘அத்தி² பனாயஸ்மதோ கோசி வேய்யாவச்சகரோ’’தி, சீவரத்தி²கேன பி⁴க்கு²னா வேய்யாவச்சகரோ நித்³தி³ஸிதப்³போ³ ஆராமிகோ வா உபாஸகோ வா ‘‘ஏஸோ கோ², ஆவுஸோ, பி⁴க்கூ²னம் வேய்யாவச்சகரோ’’தி. ந வத்தப்³போ³ ‘‘தஸ்ஸ தே³ஹீ’’தி வா ‘‘ஸோ வா நிக்கி²பிஸ்ஸதி, ஸோ வா பரிவத்தேஸ்ஸதி, ஸோ வா சேதாபேஸ்ஸதீ’’தி. ஸோ சே தூ³தோ தம் வேய்யாவச்சகரம் ஸஞ்ஞாபேத்வா தம் பி⁴க்கு²ம் உபஸங்கமித்வா ஏவம் வதே³ய்ய ‘‘யம் கோ², ப⁴ந்தே, ஆயஸ்மா வேய்யாவச்சகரம் நித்³தி³ஸி, ஆணத்தோ ஸோ மயா, உபஸங்கமது ஆயஸ்மா காலேன, சீவரேன தம் அச்சா²தே³ஸ்ஸதீ’’தி. சீவரத்தி²கேன பி⁴க்கு²னா வேய்யாவச்சகரோ உபஸங்கமித்வா த்³வத்திக்க²த்தும் சோதே³தப்³போ³ ஸாரேதப்³போ³ ‘‘அத்தோ² மே, ஆவுஸோ, சீவரேனா’’தி. ந வத்தப்³போ³ ‘‘தே³ஹி மே சீவரம், ஆஹர மே சீவரம், பரிவத்தேஹி மே சீவரம், சேதாபேஹி மே சீவர’’ந்தி. ஸசே த்³வத்திக்க²த்தும் சோத³யமானோ ஸாரயமானோ தம் சீவரம் அபி⁴னிப்பா²தே³தி, இச்சேதம் குஸலம். நோ சே அபி⁴னிப்பா²தே³தி, தத்த² க³ந்த்வா சதுக்க²த்தும் பஞ்சக்க²த்தும் ச²க்க²த்துபரமம் துண்ஹீபூ⁴தேன உத்³தி³ஸ்ஸ டா²தப்³ப³ம், ந ஆஸனே நிஸீதி³தப்³ப³ம், ந ஆமிஸம் படிக்³க³ஹேதப்³ப³ம், ந த⁴ம்மோ பா⁴ஸிதப்³போ³. ‘‘கிம் காரணா ஆக³தோஸீ’’தி புச்சி²யமானேன ‘‘ஜானாஹி, ஆவுஸோ’’தி ஏத்தகமேவ வத்தப்³ப³ம்.

ஸசே ஆஸனே வா நிஸீத³தி, ஆமிஸம் வா படிக்³க³ண்ஹாதி, த⁴ம்மம் வா பா⁴ஸதி, டா²னம் ப⁴ஞ்ஜதி. ஸசே சதுக்க²த்தும் சோதே³தி, சதுக்க²த்தும் டா²தப்³ப³ம். பஞ்சக்க²த்தும் சோதே³தி, த்³விக்க²த்தும் டா²தப்³ப³ம். ச²க்க²த்தும் சோதே³தி, ந டா²தப்³ப³ம். ஏகாய ஹி சோத³னாய டா²னத்³வயம் ப⁴ஞ்ஜதி. யதா² ச²க்க²த்தும் சோதே³த்வா ந டா²தப்³ப³ம், ஏவம் த்³வாத³ஸக்க²த்தும் ட²த்வா ந சோதே³தப்³ப³ம். தஸ்மா ஸசே சோதே³தியேவ ந திட்ட²தி, ச² சோத³னா லப்³ப⁴ந்தி. ஸசே திட்ட²தியேவ ந சோதே³தி, த்³வாத³ஸ டா²னானி லப்³ப⁴ந்தி. ஸசே சோதே³திபி திட்ட²திபி, ஏகாய சோத³னாய த்³வே டா²னானி ஹாபேதப்³பா³னி. தத்த² யோ ஏகதி³வஸமேவ புனப்புனம் க³ந்த்வா ச²க்க²த்தும் சோதே³தி, ஸகிம்யேவ வா க³ந்த்வா ‘‘அத்தோ² மே, ஆவுஸோ, சீவரேனா’’தி ச²க்க²த்தும் வத³தி, தத்த² ஏகதி³வஸமேவ புனப்புனம் க³ந்த்வா த்³வாத³ஸக்க²த்தும் திட்ட²தி, ஸகிமேவ வா க³ந்த்வா தத்ர தத்ர டா²னே திட்ட²தி, ஸோபி ஸப்³ப³சோத³னாயோ ஸப்³ப³ட்டா²னானி ச ப⁴ஞ்ஜதி, கோ பன வாதோ³ நானாதி³வஸேஸு. ததோ சே உத்தரி வாயமமானோ தம் சீவரம் அபி⁴னிப்பா²தே³தி, பயோகே³ து³க்கடம், படிலாபே⁴ன நிஸ்ஸக்³கி³யம் ஹோதி. நோ சே ஸக்கோதி தம் அபி⁴னிப்பா²தே³தும், யதோ ராஜதோ ராஜமஹாமத்ததோ வா அஸ்ஸ பி⁴க்கு²னோ தம் சீவரசேதாபன்னம் ஆனீதம், தஸ்ஸ ஸந்திகம் ஸாமம் வா க³ந்தப்³ப³ம், தூ³தோ வா பாஹேதப்³போ³ ‘‘யம் கோ² தும்ஹே ஆயஸ்மந்தோ பி⁴க்கு²ம் உத்³தி³ஸ்ஸ சீவரசேதாபன்னம் பஹிணித்த², ந தம் தஸ்ஸ பி⁴க்கு²னோ கிஞ்சி அத்த²ம் அனுபோ⁴தி, யுஞ்ஜந்தாயஸ்மந்தோ ஸகம், மா தும்ஹாகம் ஸந்தகம் வினஸ்ஸதூ’’தி. அயம் தத்த² ஸாமீசி. யோ பன நேவ ஸாமம் க³ச்ச²தி, ந தூ³தம் பாஹேதி, வத்தபே⁴தே³ து³க்கடம் ஆபஜ்ஜதி.

65. கிம் பன (பாரா. அட்ட². 2.538-9) ஸப்³ப³கப்பியகாரகேஸு ஏவம் படிபஜ்ஜிதப்³ப³ந்தி? ந படிபஜ்ஜிதப்³ப³ம். அயஞ்ஹி கப்பியகாரகோ நாம ஸங்கே²பதோ து³விதோ⁴ நித்³தி³ட்டோ² அனித்³தி³ட்டோ² ச. தத்த² நித்³தி³ட்டோ² து³விதோ⁴ பி⁴க்கு²னா நித்³தி³ட்டோ² தூ³தேன நித்³தி³ட்டோ²தி. அனித்³தி³ட்டோ²பி து³விதோ⁴ முக²வேவடிககப்பியகாரகோ பரம்முக²கப்பியகாரகோதி. தேஸு பி⁴க்கு²னா நித்³தி³ட்டோ² ஸம்முகா²ஸம்முக²வஸேன சதுப்³பி³தோ⁴ ஹோதி, ததா² தூ³தேன நித்³தி³ட்டோ²பி. கத²ம்? இதே⁴கச்சோ பி⁴க்கு²ஸ்ஸ சீவரத்தா²ய தூ³தேன அகப்பியவத்து²ம் பஹிணதி, தூ³தோ தம் பி⁴க்கு²ம் உபஸங்கமித்வா ‘‘இத³ம், ப⁴ந்தே, இத்த²ன்னாமேன தும்ஹாகம் சீவரத்தா²ய பஹிதம், க³ண்ஹத² ந’’ந்தி வத³தி, பி⁴க்கு² ‘‘நயித³ம் கப்பதீ’’தி படிக்கி²பதி, தூ³தோ ‘‘அத்தி² பன தே, ப⁴ந்தே, வேய்யாவச்சகரோ’’தி புச்ச²தி, புஞ்ஞத்தி²கேஹி ச உபாஸகேஹி ‘‘பி⁴க்கூ²னம் வேய்யாவச்சம் கரோதா²’’தி ஆணத்தா வா, பி⁴க்கூ²னம் வா ஸந்தி³ட்ட²ஸம்ப⁴த்தா கேசி வேய்யாவச்சகரா ஹோந்தி, தேஸம் அஞ்ஞதரோ தஸ்மிம் க²ணே பி⁴க்கு²ஸ்ஸ ஸந்திகே நிஸின்னோ ஹோதி, பி⁴க்கு² தம் நித்³தி³ஸதி ‘‘அயம் பி⁴க்கூ²னம் வேய்யாவச்சகரோ’’தி, தூ³தோ தஸ்ஸ ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் கிணித்வா தே³ஹீ’’தி க³ச்ச²தி, அயம் பி⁴க்கு²னா ஸம்முகா²னித்³தி³ட்டோ².

நோ சே பி⁴க்கு²ஸ்ஸ ஸந்திகே நிஸின்னோ ஹோதி, அபிச கோ² பி⁴க்கு² நித்³தி³ஸதி ‘‘அஸுகஸ்மிம் நாம கா³மே இத்த²ன்னாமோ பி⁴க்கூ²னம் வேய்யாவச்சகரோ’’தி, ஸோ க³ந்த்வா தஸ்ஸ ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் கிணித்வா த³தே³ய்யாஸீ’’தி ஆக³ந்த்வா பி⁴க்கு²ஸ்ஸ ஆரோசேத்வா க³ச்ச²தி, அயமேகோ பி⁴க்கு²னா அஸம்முகா²னித்³தி³ட்டோ².

ந ஹேவ கோ² ஸோ தூ³தோ அத்தனா ஆக³ந்த்வா ஆரோசேதி, அபிச கோ² அஞ்ஞம் பஹிணதி ‘‘தி³ன்னம் மயா, ப⁴ந்தே, தஸ்ஸ ஹத்தே² சீவரசேதாபன்னம், தும்ஹே சீவரம் க³ண்ஹேய்யாதா²’’தி, அயம் து³தியோ பி⁴க்கு²னா அஸம்முகா²னித்³தி³ட்டோ².

ந ஹேவ கோ² அஞ்ஞம் பஹிணதி, அபிச க³ச்ச²ந்தோவ பி⁴க்கு²ம் வத³தி ‘‘அஹம் தஸ்ஸ ஹத்தே² சீவரசேதாபன்னம் த³ஸ்ஸாமி, தும்ஹே சீவரம் க³ண்ஹேய்யாதா²’’தி, அயம் ததியோ பி⁴க்கு²னா அஸம்முகா²னித்³தி³ட்டோ²தி ஏவம் ஏகோ ஸம்முகா²னித்³தி³ட்டோ² தயோ அஸம்முகா²னித்³தி³ட்டா²தி இமே சத்தாரோ பி⁴க்கு²னா நித்³தி³ட்ட²வேய்யாவச்சகரா நாம. ஏதேஸு இத⁴ வுத்தனயேனேவ படிபஜ்ஜிதப்³ப³ம்.

அபரோ பி⁴க்கு² புரிமனயேனேவ தூ³தேன புச்சி²தோ நத்தி²தாய வா அவிசாரேதுகாமதாய வா ‘‘நத்த²ம்ஹாகம் கப்பியகாரகோ’’தி வத³தி, தஸ்மிம் க²ணே கோசி மனுஸ்ஸோ ஆக³ச்ச²தி, தூ³தோ தஸ்ஸ ஹத்தே² அகப்பியவத்து²ம் த³த்வா ‘‘இமஸ்ஸ ஹத்த²தோ சீவரம் க³ண்ஹேய்யாதா²’’தி வத்வா க³ச்ச²தி, அயம் தூ³தேன ஸம்முகா²னித்³தி³ட்டோ²தி ஏவம் ஏகோ ஸம்முகா²னித்³தி³ட்டோ².

அபரோ தூ³தோ கா³மம் பவிஸித்வா அத்தனா அபி⁴ருசிதஸ்ஸ கஸ்ஸசி ஹத்தே² அகப்பியவத்து²ம் த³த்வா புரிமனயேனேவ ஆக³ந்த்வா வா ஆரோசேதி, அஞ்ஞம் வா பஹிணதி ‘‘அஹம் அஸுகஸ்ஸ நாம ஹத்தே² சீவரசேதாபன்னம் த³ஸ்ஸாமி, தும்ஹே சீவரம் க³ண்ஹேய்யாதா²’’தி வத்வா வா க³ச்ச²தி, அயம் ததியோ தூ³தேன அஸம்முகா²னித்³தி³ட்டோ²தி ஏவம் ஏகோ ஸம்முகா²னித்³தி³ட்டோ² தயோ அஸம்முகா²னித்³தி³ட்டா²தி இமே சத்தாரோ தூ³தேன நித்³தி³ட்ட²வேய்யாவச்சகரா நாம. ஏதேஸு மேண்ட³கஸிக்கா²பதே³ வுத்தனயேனேவ படிபஜ்ஜிதப்³ப³ம். வுத்தஞ்ஹேதம் –

‘‘ஸந்தி, பி⁴க்க²வே, மனுஸ்ஸா ஸத்³தா⁴ பஸன்னா, தே கப்பியகாரகானம் ஹத்தே² ஹிரஞ்ஞம் உபனிக்கி²பந்தி ‘இமினா யம் அய்யஸ்ஸ கப்பியம், தம் தே³தா²’தி. அனுஜானாமி, பி⁴க்க²வே, யம் ததோ கப்பியம், தம் ஸாதி³தும், ந த்வேவாஹம், பி⁴க்க²வே, ‘கேனசி பரியாயேன ஜாதரூபரஜதம் ஸாதி³தப்³ப³ம் பரியேஸிதப்³ப³’ந்தி வதா³மீ’’தி (மஹாவ. 299).

ஏத்த² சோத³னாய பரிமாணம் நத்தி², மூலம் அஸாதி³யந்தேன ஸஹஸ்ஸக்க²த்தும்பி சோத³னாய வா டா²னேன வா கப்பியப⁴ண்ட³ம் ஸாதி³தும் வட்டதி. நோ சே தே³தி, அஞ்ஞம் கப்பியகாரகம் ட²பேத்வாபி ஆஹராபேதப்³ப³ம். ஸசே இச்ச²தி, மூலஸாமிகானம்பி கதே²தப்³ப³ம். நோ சே இச்ச²தி, ந கதே²தப்³ப³ம்.

அபரோ பி⁴க்கு² புரிமனயேனேவ தூ³தேன புச்சி²தோ ‘‘நத்த²ம்ஹாகம் கப்பியகாரகோ’’தி வத³தி, தத³ஞ்ஞோ ஸமீபே டி²தோ ஸுத்வா ‘‘ஆஹர போ⁴, அஹம் அய்யஸ்ஸ சீவரம் சேதாபேத்வா த³ஸ்ஸாமீ’’தி வத³தி. தூ³தோ ‘‘ஹந்த³ போ⁴ த³தே³ய்யாஸீ’’தி தஸ்ஸ ஹத்தே² த³த்வா பி⁴க்கு²ஸ்ஸ அனாரோசேத்வாவ க³ச்ச²தி, அயம் முக²வேவடிககப்பியகாரகோ. அபரோ பி⁴க்கு²னோ உபட்டா²கஸ்ஸ வா அஞ்ஞஸ்ஸ வா ஹத்தே² அகப்பியவத்து²ம் த³த்வா ‘‘தே²ரஸ்ஸ சீவரம் த³தே³ய்யாஸீ’’தி ஏத்தோவ பக்கமதி, அயம் பரம்முகா²கப்பியகாரகோதி இமே த்³வே அனித்³தி³ட்ட²கப்பியகாரகா நாம. ஏதேஸு அஞ்ஞாதகஅப்பவாரிதேஸு விய படிபஜ்ஜிதப்³ப³ம். ஸசே ஸயமேவ சீவரம் ஆனேத்வா த³த³ந்தி, க³ஹேதப்³ப³ம். நோ சே, ந கிஞ்சி வத்தப்³பா³. யதா² ச தூ³தஸ்ஸ ஹத்தே² சீவரத்தா²ய அகப்பியவத்து²ம்ஹி பேஸிதே வினிச்ச²யோ வுத்தோ, ஏவம் பிண்ட³பாதாதீ³னம்பி அத்தா²ய பேஸிதே ஸயம் ஆக³ந்த்வா தீ³யமானே ச வினிச்ச²யோ வேதி³தப்³போ³.

66. உபனிக்கி²த்தஸாதி³யனே பன அயம் வினிச்ச²யோ (பாரா. அட்ட². 2.583-4) – கிஞ்சி அகப்பியவத்து²ம் பாத³மூலே ட²பேத்வா ‘‘இத³ம் அய்யஸ்ஸ ஹோதூ’’தி வுத்தே ஸசேபி சித்தேன ஸாதி³யதி, க³ண்ஹிதுகாமோ ஹோதி, காயேன வா வாசாய வா ‘‘நயித³ம் கப்பதீ’’தி படிக்கி²பதி, அனாபத்தி. காயவாசாஹி வா அப்படிக்கி²பித்வாபி ஸுத்³த⁴சித்தோ ஹுத்வா ‘‘நயித³ம் அம்ஹாகம் கப்பதீ’’தி ந ஸாதி³யதி, அனாபத்தியேவ. தீஸு த்³வாரேஸு ஹி யேன கேனசி படிக்கி²த்தம் படிக்கி²த்தமேவ ஹோதி. ஸசே பன காயவாசாஹி அப்படிக்கி²பித்வா சித்தேன அதி⁴வாஸேதி, காயவாசாஹி கத்தப்³ப³ஸ்ஸ படிக்கே²பஸ்ஸ அகரணதோ அகிரியஸமுட்டா²னம் காயத்³வாரே ச வசீத்³வாரே ச ஆபத்திம் ஆபஜ்ஜதி, மனோத்³வாரே பன ஆபத்தி நாம நத்தி².

ஏகோ ஸதம் வா ஸஹஸ்ஸம் வா பாத³மூலே ட²பேதி ‘‘துய்ஹித³ம் ஹோதூ’’தி, பி⁴க்கு² ‘‘நயித³ம் கப்பதீ’’தி படிக்கி²பதி, உபாஸகோ ‘‘பரிச்சத்தம் மயா தும்ஹாக’’ந்தி க³தோ, அஞ்ஞோ தத்த² ஆக³ந்த்வா புச்ச²தி ‘‘கிம், ப⁴ந்தே, இத³’’ந்தி, யம் தேன ச அத்தனா ச வுத்தம், தம் ஆசிக்கி²தப்³ப³ம். ஸோ சே வத³தி ‘‘கோ³பயிஸ்ஸாமஹம், ப⁴ந்தே, கு³த்தட்டா²னம் த³ஸ்ஸேதா²’’தி, ஸத்தபூ⁴மிகம்பி பாஸாத³ம் அபி⁴ருஹித்வா ‘‘இத³ம் கு³த்தட்டா²ன’’ந்தி ஆசிக்கி²தப்³ப³ம், ‘‘இத⁴ நிக்கி²பாஹீ’’தி ந வத்தப்³ப³ம். ஏத்தாவதா கப்பியஞ்ச அகப்பியஞ்ச நிஸ்ஸாய டி²தம் ஹோதி, த்³வாரம் பித³ஹித்வா ரக்க²ந்தேன வஸிதப்³ப³ம். ஸசே கிஞ்சி விக்காயிகப⁴ண்ட³ம் பத்தம் வா சீவரம் வா க³ஹேத்வா ஆக³ச்ச²தி, ‘‘இத³ம் க³ஹேஸ்ஸத², ப⁴ந்தே’’தி வுத்தே ‘‘உபாஸக, அத்தி² அம்ஹாகம் இமினா அத்தோ², வத்து² ச ஏவரூபம் நாம ஸம்விஜ்ஜதி, கப்பியகாரகோ நத்தீ²’’தி வத்தப்³ப³ம். ஸசே ஸோ வத³தி ‘‘அஹம் கப்பியகாரகோ ப⁴விஸ்ஸாமி, த்³வாரம் விவரித்வா தே³தா²’’தி, த்³வாரம் விவரித்வா ‘‘இமஸ்மிம் ஓகாஸே ட²பித’’ந்தி வத்தப்³ப³ம், ‘‘இத³ம் க³ண்ஹா’’தி ந வத்தப்³ப³ம். ஏவம்பி கப்பியஞ்ச அகப்பியஞ்ச நிஸ்ஸாய டி²தமேவ ஹோதி. ஸோ சே தம் க³ஹேத்வா தஸ்ஸ கப்பியப⁴ண்ட³ம் தே³தி, வட்டதி. ஸசே அதி⁴கம் க³ண்ஹாதி, ‘‘ந மயம் தவ ப⁴ண்ட³ம் க³ண்ஹாம, நிக்க²மாஹீ’’தி வத்தப்³போ³.

67. யேன பன ஜாதரூபாதி³சதுப்³பி³த⁴ம் நிஸ்ஸக்³கி³யவத்து² படிக்³க³ஹிதம், தேன கிம் காதப்³ப³ந்தி? ஸங்க⁴மஜ்ஜே² நிஸ்ஸஜ்ஜிதப்³ப³ம். கத²ம்? தேன பி⁴க்கு²னா (பாரா. 584) ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கூ²னம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ ‘‘அஹம், ப⁴ந்தே, ரூபியம் படிக்³க³ஹேஸிம், இத³ம் மே நிஸ்ஸக்³கி³யம், இமாஹம் நிஸ்ஸஜ்ஜாமீ’’தி நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. ஸசே தத்த² ஆக³ச்ச²தி ஆராமிகோ வா உபாஸகோ வா, ஸோ வத்தப்³போ³ ‘‘ஆவுஸோ, இத³ம் ஜானாஹீ’’தி. ஸசே ஸோ ப⁴ணதி ‘‘இமினா கிம் ஆஹரிஸ்ஸாமீ’’தி, ந வத்தப்³போ³ ‘‘இமம் வா இமம் வா ஆஹரா’’தி, கப்பியம் ஆசிக்கி²தப்³ப³ம் ஸப்பிம் வா தேலம் வா மது⁴ம் வா பா²ணிதம் வா. ஆசிக்க²ந்தேன ச ‘‘இமினா ஸப்பிம் வா தேலம் வா மது⁴ம் வா பா²ணிதம் வா ஆஹரா’’தி ந வத்தப்³ப³ம், ‘‘இத³ஞ்சித³ஞ்ச ஸங்க⁴ஸ்ஸ கப்பிய’’ந்தி ஏத்தகமேவ வத்தப்³ப³ம். ஸசே ஸோ தேன பரிவத்தேத்வா கப்பியம் ஆஹரதி, ரூபியபடிக்³கா³ஹகம் ட²பேத்வா ஸப்³பே³ஹேவ பா⁴ஜேத்வா பரிபு⁴ஞ்ஜிதப்³ப³ம், ரூபியபடிக்³கா³ஹகேன பா⁴கோ³ ந க³ஹேதப்³போ³.

அஞ்ஞேஸம் (பாரா. அட்ட². 2.583-4) பி⁴க்கூ²னம் வா ஆராமிகானம் வா பத்தபா⁴க³ம்பி லபி⁴த்வா பரிபு⁴ஞ்ஜிதும் ந வட்டதி, அந்தமஸோ மக்கடாதீ³ஹி ததோ ஹரித்வா அரஞ்ஞே ட²பிதம் வா தேஸம் ஹத்த²தோ க³ளிதம் வா திரச்சா²னபடிக்³க³ஹிதம்பி பம்ஸுகூலம்பி ந வட்டதியேவ. ததோ ஆஹடேன பா²ணிதேன ஸேனாஸனதூ⁴பனம்பி ந வட்டதி. ஸப்பினா வா தேலேன வா பதீ³பம் கத்வா தீ³பாலோகே நிபஜ்ஜிதும், கஸிணபரிகம்மம் காதும், போத்த²கம்பி வாசேதும் ந வட்டதி. தேலமது⁴பா²ணிதேஹி பன ஸரீரே வணம் மக்கே²தும் ந வட்டதியேவ. தேன வத்து²னா மஞ்சபீடா²தீ³னி வா க³ண்ஹந்தி, உபோஸதா²கா³ரம் வா போ⁴ஜனஸாலம் வா கரோந்தி, பரிபு⁴ஞ்ஜிதும் ந வட்டதி. சா²யாபி கே³ஹபரிச்சே²தே³ன டி²தாவ ந வட்டதி, பரிச்சே²தா³திக்கந்தா ஆக³ந்துகத்தா வட்டதி. தம் வத்து²ம் விஸ்ஸஜ்ஜேத்வா கதேன மக்³கே³னபி ஸேதுனாபி நாவாயபி உளும்பேனாபி க³ந்தும் ந வட்டதி. தேன வத்து²னா க²ணாபிதாய போக்க²ரணியா உப்³பி⁴தோ³த³கம் பாதும் வா பரிபு⁴ஞ்ஜிதும் வா ந வட்டதி. அந்தோ உத³கே பன அஸதி அஞ்ஞம் ஆக³ந்துகம் உத³கம் வா வஸ்ஸோத³கம் வா பவிட்ட²ம் வட்டதி. கீதாய யேன ஸத்³தி⁴ம் கீதா, தம் ஆக³ந்துகம்பி ந வட்டதி. தம் வத்து²ம் உபனிக்கே²பம் ட²பேத்வா ஸங்கோ⁴ பச்சயே பரிபு⁴ஞ்ஜதி, தேபி பச்சயா தஸ்ஸ ந வட்டந்தி. ஆராமோ க³ஹிதோ ஹோதி, ஸோபி பரிபு⁴ஞ்ஜிதும் ந வட்டதி. யதி³ பூ⁴மிபி பீ³ஜம்பி அகப்பியம், நேவ பூ⁴மிம், ந ப²லம் பரிபு⁴ஞ்ஜிதும் வட்டதி. ஸசே பூ⁴மிம்யேவ கிணித்வா அஞ்ஞானி பீ³ஜானி ரோபிதானி, ப²லம் வட்டதி. அத² பீ³ஜானி கிணித்வா கப்பியபூ⁴மியம் ரோபிதானி, ப²லம் ந வட்டதி, பூ⁴மியம் நிஸீதி³தும் வா நிபஜ்ஜிதும் வா வட்டதி.

ஸசே பன தத்த² ஆக³தோ கப்பியகாரகோ தம் பரிவத்தேத்வா ஸங்க⁴ஸ்ஸ கப்பியம் ஸப்பிதேலாதி³ம் ஆஹரிதும் ந ஜானாதி, ஸோ வத்தப்³போ³ ‘‘ஆவுஸோ, இமம் ச²ட்³டே³ஹீ’’தி. ஸசே ஸோ ச²ட்³டே³தி, இச்சேதம் குஸலம். நோ சே ச²ட்³டே³தி, பஞ்சஹங்கே³ஹி ஸமன்னாக³தோ பி⁴க்கு² ரூபியச²ட்³ட³கோ ஸம்மன்னிதப்³போ³ யோ ந ச²ந்தா³க³திம் க³ச்சே²ய்ய, ந தோ³ஸாக³திம் க³ச்சே²ய்ய, ந மோஹாக³திம் க³ச்சே²ய்ய, ந ப⁴யாக³திம் க³ச்சே²ய்ய, ச²ட்³டி³தாச²ட்³டி³தஞ்ச ஜானேய்ய. ஏவஞ்ச பன ஸம்மன்னிதப்³போ³, பட²மம் பி⁴க்கு² யாசிதப்³போ³, யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴, யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் ரூபியச²ட்³ட³கம் ஸம்மன்னேய்ய, ஏஸா ஞத்தி. ஸுணாது மே, ப⁴ந்தே, ஸங்கோ⁴, ஸங்கோ⁴ இத்த²ன்னாமம் பி⁴க்கு²ம் ரூபியச²ட்³ட³கம் ஸம்மன்னதி, யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ரூபியச²ட்³ட³கஸ்ஸ ஸம்முதி, ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸேய்ய. ஸம்மதோ ஸங்கே⁴ன இத்த²ன்னாமோ பி⁴க்கு² ரூபியச²ட்³ட³கோ, க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி (பாரா. 585).

68. தேன ஸம்மதேன (பாரா. அட்ட². 2.585) பி⁴க்கு²னா நிமித்தம் அகத்வா அக்கீ²னி நிமீலேத்வா நதி³யா வா பபாதே வா வனக³ஹனே வா கூ³த²ம் விய அனபேக்கே²ன பதிதோகாஸம் அஸமன்னாரஹந்தேன ச²ட்³டே³தப்³ப³ம். ஸசே நிமித்தம் கத்வா பாதேதி, து³க்கடம் ஆபஜ்ஜதி. ஏவம் ஜிகு³ச்சி²தப்³பே³பி ரூபியே ப⁴க³வா பரியாயேன பி⁴க்கூ²னம் பரிபோ⁴க³ம் ஆசிக்கி². ரூபியபடிக்³கா³ஹகஸ்ஸ பன கேனசி பரியாயேன ததோ உப்பன்னபச்சயபரிபோ⁴கோ³ ந வட்டதி. யதா² சாயம் ஏதஸ்ஸ ந வட்டதி, ஏவம் அஸந்தஸம்பா⁴வனாய வா குலதூ³ஸககம்மேன வா குஹனாதீ³ஹி வாஉப்பன்னபச்சயா நேவ தஸ்ஸ, ந அஞ்ஞஸ்ஸ வட்டந்தி, த⁴ம்மேன ஸமேன உப்பன்னாபி அபச்சவேக்கி²த்வா பரிபு⁴ஞ்ஜிதும் ந வட்டந்தி. சத்தாரோ ஹி பரிபோ⁴கா³ – தே²ய்யபரிபோ⁴கோ³ இணபரிபோ⁴கோ³ தா³யஜ்ஜபரிபோ⁴கோ³ ஸாமிபரிபோ⁴கோ³தி. தத்த² ஸங்க⁴மஜ்ஜே²பி நிஸீதி³த்வா பரிபு⁴ஞ்ஜந்தஸ்ஸ து³ஸ்ஸீலஸ்ஸ பரிபோ⁴கோ³ தே²ய்யபரிபோ⁴கோ³ நாம. ஸீலவதோ அபச்சவேக்கி²தபரிபோ⁴கோ³ இணபரிபோ⁴கோ³ நாம. தஸ்மா சீவரம் பரிபோ⁴கே³ பரிபோ⁴கே³ பச்சவேக்கி²தப்³ப³ம், பிண்ட³பாதோ ஆலோபே ஆலோபே, ததா² அஸக்கோந்தேன புரேப⁴த்தபச்சா²ப⁴த்தபுரிமயாமமஜ்ஜி²மயாமபச்சி²மயாமேஸு. ஸசஸ்ஸ அபச்சவேக்க²தோ அருணோ உக்³க³ச்ச²தி, இணபரிபோ⁴க³ட்டா²னே திட்ட²தி. ஸேனாஸனம்பி பரிபோ⁴கே³ பரிபோ⁴கே³ பச்சவேக்கி²தப்³ப³ம். பே⁴ஸஜ்ஜஸ்ஸ படிக்³க³ஹணேபி பரிபோ⁴கே³பி ஸதிபச்சயதா வட்டதி, ஏவம் ஸந்தேபி படிக்³க³ஹணே ஸதிம் கத்வா பரிபோ⁴கே³ அகரோந்தஸ்ஸேவ ஆபத்தி, படிக்³க³ஹணே பன ஸதிம் அகத்வா பரிபோ⁴கே³ கரோந்தஸ்ஸ அனாபத்தி. சதுப்³பி³தா⁴ ஹி ஸுத்³தி⁴ – தே³ஸனாஸுத்³தி⁴ ஸம்வரஸுத்³தி⁴ பரியேட்டி²ஸுத்³தி⁴ பச்சவேக்க²ணஸுத்³தீ⁴தி.

தத்த² தே³ஸனாஸுத்³தி⁴ நாம பாதிமோக்க²ஸம்வரஸீலம். தஞ்ஹி தே³ஸனாய ஸுஜ்ஜ²னதோ ‘‘தே³ஸனாஸுத்³தீ⁴’’தி வுச்சதி. ஸம்வரஸுத்³தி⁴ நாம இந்த்³ரியஸம்வரஸீலம். தஞ்ஹி ‘‘ந புனேவம் கரிஸ்ஸாமீ’’தி சித்தாதி⁴ட்டா²னஸம்வரேனேவ ஸுஜ்ஜ²னதோ ‘‘ஸம்வரஸுத்³தீ⁴’’தி வுச்சதி. பரியேட்டி²ஸுத்³தி⁴ நாம ஆஜீவபாரிஸுத்³தி⁴ஸீலம். தஞ்ஹி அனேஸனம் பஹாய த⁴ம்மேன ஸமேன பச்சயே உப்பாதே³ந்தஸ்ஸ பரியேஸனாய ஸுத்³த⁴த்தா ‘‘பரியேட்டி²ஸுத்³தீ⁴’’தி வுச்சதி. பச்சவேக்க²ணஸுத்³தி⁴ நாம பச்சயபரிபோ⁴க³ஸன்னிஸ்ஸிதஸீலம். தஞ்ஹி ‘‘படிஸங்கா² யோனிஸோ சீவரம் படிஸேவாமீ’’திஆதி³னா (ம. நி. 1.23; அ. நி. 6.58) நயேன வுத்தேன பச்சவேக்க²ணேன ஸுஜ்ஜ²னதோ ‘‘பச்சவேக்க²ணஸுத்³தீ⁴’’தி வுச்சதி, தேன வுத்தம் ‘‘படிக்³க³ஹணே பன ஸதிம் அகத்வா பரிபோ⁴கே³ கரோந்தஸ்ஸ அனாபத்தீ’’தி.

ஸத்தன்னம் ஸேக்கா²னம் பச்சயபரிபோ⁴கோ³ தா³யஜ்ஜபரிபோ⁴கோ³ நாம. தே ஹி ப⁴க³வதோ புத்தா, தஸ்மா பிதுஸந்தகானம் பச்சயானம் தா³யாதா³ ஹுத்வா தே பச்சயே பரிபு⁴ஞ்ஜந்தி. கிம் பன தே ப⁴க³வதோ பச்சயே பரிபு⁴ஞ்ஜந்தி, கி³ஹீனம் பச்சயே பரிபு⁴ஞ்ஜந்தீதி? கி³ஹீஹி தி³ன்னாபி ப⁴க³வதா அனுஞ்ஞாதத்தா ப⁴க³வதோ ஸந்தகா ஹோந்தி, தஸ்மா ப⁴க³வதோ பச்சயே பரிபு⁴ஞ்ஜந்தீதி வேதி³தப்³ப³ம். த⁴ம்மதா³யாத³ஸுத்த (ம. நி. 1.29 ஆத³யோ) ஞ்சேத்த² ஸாத⁴கம். கீ²ணாஸவானம் பரிபோ⁴கோ³ ஸாமிபரிபோ⁴கோ³ நாம. தே ஹி தண்ஹாய தா³ஸப்³யம் அதீதத்தா ஸாமினோ ஹுத்வா பரிபு⁴ஞ்ஜந்தி. இதி இமேஸு பரிபோ⁴கே³ஸு ஸாமிபரிபோ⁴கோ³ ச தா³யஜ்ஜபரிபோ⁴கோ³ ச ஸப்³பே³ஸம்பி வட்டதி, இணபரிபோ⁴கோ³ ந வட்டதி, தே²ய்யபரிபோ⁴கே³ கதா²யேவ நத்தி².

அபரேபி சத்தாரோ பரிபோ⁴கா³ – லஜ்ஜிபரிபோ⁴கோ³ அலஜ்ஜிபரிபோ⁴கோ³ த⁴ம்மியபரிபோ⁴கோ³ அத⁴ம்மியபரிபோ⁴கோ³தி. தத்த² அலஜ்ஜினோ லஜ்ஜினா ஸத்³தி⁴ம் பரிபோ⁴கோ³ வட்டதி, ஆபத்தியா ந காரேதப்³போ³. லஜ்ஜினோ அலஜ்ஜினா ஸத்³தி⁴ம் யாவ ந ஜானாதி, தாவ வட்டதி. ஆதி³தோ பட்டா²ய ஹி அலஜ்ஜீ நாம நத்தி², தஸ்மா யதா³ஸ்ஸ அலஜ்ஜிபா⁴வம் ஜானாதி, ததா³ வத்தப்³போ³ ‘‘தும்ஹே காயத்³வாரே வசீத்³வாரே ச வீதிக்கமம் கரோத², தம் அப்பதிரூபம், மா ஏவமகத்தா²’’தி. ஸசே அனாதி³யித்வா கரோதியேவ, யதி³ தேன ஸத்³தி⁴ம் பரிபோ⁴க³ம் கரோதி, ஸோபி அலஜ்ஜீயேவ ஹோதி. யோபி அத்தனோ பா⁴ரபூ⁴தேன அலஜ்ஜினா ஸத்³தி⁴ம் பரிபோ⁴க³ம் கரோதி, ஸோபி நிவாரேதப்³போ³. ஸசே ந ஓரமதி, அயம்பி அலஜ்ஜீயேவ ஹோதி. ஏவம் ஏகோ அலஜ்ஜீ அலஜ்ஜிஸதம்பி கரோதி. அலஜ்ஜினோ பன அலஜ்ஜினாவ ஸத்³தி⁴ம் பரிபோ⁴கே³ ஆபத்தி நாம நத்தி². லஜ்ஜினோ லஜ்ஜினா ஸத்³தி⁴ம் பரிபோ⁴கோ³ த்³வின்னம் க²த்தியகுமாரானம் ஸுவண்ணபாதியம் போ⁴ஜனஸதி³ஸோ. த⁴ம்மியாத⁴ம்மியபரிபோ⁴கோ³ பச்சயவஸேனேவ வேதி³தப்³போ³. தத்த² ஸசே புக்³க³லோபி அலஜ்ஜீ, பிண்ட³பாதோபி அத⁴ம்மியோ, உபோ⁴ ஜேகு³ச்சா². புக்³க³லோ அலஜ்ஜீ, பிண்ட³பாதோ த⁴ம்மியோ, புக்³க³லம் ஜிகு³ச்சி²த்வா பிண்ட³பாதோ ந க³ஹேதப்³போ³. மஹாபச்சரியம் பன ‘‘து³ஸ்ஸீலோ ஸங்க⁴தோ உத்³தே³ஸப⁴த்தாதீ³னி லபி⁴த்வா ஸங்க⁴ஸ்ஸேவ தே³தி, ஏதானி யதா²தா³னமேவ க³ஹிதத்தா வட்டந்தீ’’தி வுத்தம். புக்³க³லோ லஜ்ஜீ, பிண்ட³பாதோ அத⁴ம்மியோ, பிண்ட³பாதோ ஜேகு³ச்சோ² ந க³ஹேதப்³போ³. புக்³க³லோ லஜ்ஜீ, பிண்ட³பாதோபி த⁴ம்மியோ, வட்டதி.

அபரே த்³வே பக்³க³ஹா த்³வே ச பரிபோ⁴கா³ – லஜ்ஜிபக்³க³ஹோ அலஜ்ஜிபக்³க³ஹோ, த⁴ம்மபரிபோ⁴கோ³ ஆமிஸபரிபோ⁴கோ³தி. தத்த² அலஜ்ஜினோ லஜ்ஜிம் பக்³க³ஹேதும் வட்டதி, ந ஸோ ஆபத்தியா காரேதப்³போ³. ஸசே பன லஜ்ஜீ அலஜ்ஜிம் பக்³க³ண்ஹாதி, அனுமோத³னாய அஜ்ஜே²ஸதி, த⁴ம்மகதா²ய அஜ்ஜே²ஸதி, குலேஸு உபத்த²ம்பே⁴தி, இதரோபி ‘‘அம்ஹாகம் ஆசரியோ ஈதி³ஸோ ச ஈதி³ஸோ சா’’தி தஸ்ஸ பரிஸதி வண்ணம் பா⁴ஸதி, அயம் ஸாஸனம் ஓஸக்காபேதி அந்தரதா⁴பேதீதி வேதி³தப்³போ³. த⁴ம்மபரிபோ⁴க³ஆமிஸபரிபோ⁴கே³ஸு பன யத்த² ஆமிஸபரிபோ⁴கோ³ வட்டதி, த⁴ம்மபரிபோ⁴கோ³பி தத்த² வட்டதி. யோ பன கோடியம் டி²தோ, க³ந்தோ² தஸ்ஸ புக்³க³லஸ்ஸ அச்சயேன நஸ்ஸிஸ்ஸதி, தம் த⁴ம்மானுக்³க³ஹேன உக்³க³ண்ஹிதும் வட்டதீதி வுத்தம். தத்ரித³ம் வத்து² – மஹாப⁴யே கிர ஏகஸ்ஸேவ பி⁴க்கு²னோ மஹானித்³தே³ஸோ பகு³ணோ அஹோஸி. அத² சதுனிகாயிகதிஸ்ஸத்தே²ரஸ்ஸ உபஜ்ஜா²யோ மஹாதிபிடகத்தே²ரோ நாம மஹாரக்கி²தத்தே²ரம் ஆஹ ‘‘ஆவுஸோ மஹாரக்கி²த, ஏதஸ்ஸ ஸந்திகே மஹானித்³தே³ஸம் க³ண்ஹாஹீ’’தி. ‘‘பாபோ கிராயம், ப⁴ந்தே, ந க³ண்ஹாமீ’’தி. ‘‘க³ண்ஹாவுஸோ, அஹம் தே ஸந்திகே நிஸீதி³ஸ்ஸாமீ’’தி. ‘‘ஸாது⁴, ப⁴ந்தே, தும்ஹேஸு நிஸின்னேஸு க³ண்ஹிஸ்ஸாமீ’’தி பட்ட²பேத்வா ரத்திந்தி³வம் நிரந்தரம் பரியாபுணந்தோ ஓஸானதி³வஸே ஹேட்டா²மஞ்சே இத்தி²ம் தி³ஸ்வா ‘‘ப⁴ந்தே, ஸுதம்யேவ மே புப்³பே³, ஸசாஹம் ஏவம் ஜானேய்யம், ந ஈதி³ஸஸ்ஸ ஸந்திகே த⁴ம்மம் பரியாபுணேய்ய’’ந்தி ஆஹ. தஸ்ஸ பன ஸந்திகே ப³ஹூ மஹாதே²ரா உக்³க³ண்ஹித்வா மஹானித்³தே³ஸம் பதிட்டா²பேஸுந்தி.

இதி பாளிமுத்தகவினயவினிச்ச²யஸங்க³ஹே

ரூபியாதி³படிக்³க³ஹணவினிச்ச²யகதா² ஸமத்தா.