7. அனாமாஸவினிச்ச²யகதா²

40. ஏவம் மச்ச²மம்ஸவினிச்ச²யம் கதே²த்வா இதா³னி அனாமாஸவினிச்ச²யம் கதே²தும் ‘‘அனாமாஸ’’ந்திஆதி³மாஹ. தத்த² ஆமஸியதேதி ஆமாஸம், ந ஆமாஸம் அனாமாஸம், அபராமஸிதப்³ப³ந்தி அத்தோ². பாரிபந்தி²காதி விகுப்பனிகா, அந்தராயிகாதி வுத்தம் ஹோதி. நதீ³ஸோதேன வுய்ஹமானம் மாதரந்தி ஏதம் உக்கட்ட²பரிச்சே²த³த³ஸ்ஸனத்த²ம் வுத்தம். அஞ்ஞாஸு பன இத்தீ²ஸு காருஞ்ஞாதி⁴ப்பாயேன மாதரி வுத்தனயேன படிபஜ்ஜந்தஸ்ஸ நேவத்தி² தோ³ஸோதி வத³ந்தி. ‘‘மாதர’’ந்தி வுத்தத்தா அஞ்ஞாஸு ந வட்டதீதி வத³ந்தாபி அத்தி². ஏத்த² க³ண்ஹாஹீதி ந வத்தப்³பா³தி கே³ஹஸ்ஸிதபேமேன காயப்படிப³த்³தே⁴ன பு²ஸனே து³க்கடம் ஸந்தா⁴ய வுத்தம். காருஞ்ஞேன பன வத்தா²தி³ம் க³ஹேதும் அஸக்கோந்திம் ‘‘க³ண்ஹாஹீ’’தி வத³ந்தஸ்ஸபி அவஸபா⁴வப்பத்திதோ உத³கே நிமுஜ்ஜந்திம் காருஞ்ஞேன ஸஹஸா அனாமாஸந்தி அசிந்தேத்வா கேஸாதீ³ஸு க³ஹேத்வா மோக்கா²தி⁴ப்பாயேன ஆகட்³ட⁴தோபி அனாபத்தியேவ. ந ஹி மீயமானம் மாதரம் உபேக்கி²தும் வட்டதி. அஞ்ஞாதிகாய இத்தி²யாபி ஏஸேவ நயோ. உக்கட்டா²ய மாதுயாபி ஆமாஸோ ந வட்டதீதி த³ஸ்ஸனத்த²ம் ‘‘மாதர’’ந்தி வுத்தம். தஸ்ஸ காதப்³ப³ம் பன அஞ்ஞாஸம்பி இத்தீ²னம் கரோந்தஸ்ஸபி அனாபத்தியேவ அனாமாஸத்தே விஸேஸாபா⁴வா.

திணண்டு³பகந்தி ஹிரிவேராதி³மூலேஹி கேஸாலங்காரத்தா²ய கதசும்ப³டகம். தாலபண்ணமுத்³தி³கந்தி தாலபண்ணேஹி கதம் அங்கு³லிமுத்³தி³கம். தேன தாலபண்ணாதி³மயம் கடிஸுத்தகண்ணபிளந்த⁴னாதி³ ஸப்³ப³ம் ந வட்டதீதி ஸித்³த⁴ம். பரிவத்தேத்வாதி அத்தனோ நிவாஸனபாருபனபா⁴வதோ அபனேத்வா, சீவரத்தா²ய பரிணாமேத்வாதி வுத்தம் ஹோதி. சீவரத்தா²ய பாத³மூலே ட²பேதீதி இத³ம் நித³ஸ்ஸனமத்தம். பச்சத்த²ரணவிதானாதி³அத்த²ம்பி வட்டதியேவ, பூஜாதி³அத்த²ம் தாவகாலிகம்பி ஆமஸிதும் வட்டதி. ஸீஸபஸாத⁴னத³ந்தஸூசீதி இத³ம் ஸீஸாலங்காரத்தா²ய படபிலோதிகாஹி கதஸீஸபஸாத⁴னகஞ்சேவ த³ந்தஸூசிஆதி³ சாதி த்³வே தயோ. ஸீஸபஸாத⁴னம் ஸிபாடிகோபகரணத்தா²ய சேவ த³ந்தஸூசிம் ஸூசிஉபகரணத்தா²ய ச க³ஹேதப்³ப³ந்தி யதா²க்கமம் அத்த²ம் த³ஸ்ஸேதி. கேஸகலாபம் ப³ந்தி⁴த்வா தத்த² திரியம் பவேஸனத்தா²ய கதா ஸூசி ஏவ ஸீஸபஸாத⁴னகத³ந்தஸூசீதி ஏகமேவ கத்வா ஸிபாடிகாய பக்கி²பித்வா பரிஹரிதப்³ப³ஸூசியேவ தஸ்ஸ தஸ்ஸ கிச்சஸ்ஸ உபகரணந்தி ஸிபாடிகஸூசிஉபகரணம், ஏவம் வா யோஜனா காதப்³பா³.

போத்த²கரூபந்தி ஸுதா⁴தீ³ஹி கதம் பாராஜிகவத்து²பூ⁴தானம் திரச்சா²னக³தித்தீ²னம் ஸண்டா²னேன கதம்பி அனாமாஸமேவ. இத்தி²ரூபானி த³ஸ்ஸேத்வா கதம் வத்து²பி⁴த்திஆதி³ஞ்ச இத்தி²ரூபம் அனாமஸித்வா வளஞ்ஜேதும் வட்டதி. ஏவரூபே ஹி அனாமாஸே காயஸம்ஸக்³க³ராகே³ அஸதி காயப்படிப³த்³தே⁴ன ஆமஸதோ தோ³ஸோ நத்தி². பி⁴ந்தி³த்வாதி ஏத்த² ஹத்தே²ன அக்³க³ஹேத்வாவ கேனசி த³ண்டா³தி³னா பி⁴ந்தி³தப்³ப³ம். ஏத்த² ச அனாமாஸம்பி த³ண்ட³பாஸாணாதீ³ஹி பே⁴த³னஸ்ஸ அட்ட²கதா²யம் வுத்தத்தா, பாளியம்பி ஆபதா³ஸு மோக்கா²தி⁴ப்பாயஸ்ஸ ஆமஸனேபி அனாபத்தியா வுத்தத்தா ச ஸப்பினிஆதி³வாளமிகீ³ஹி க³ஹிதபாணகானம் மோசனத்தா²ய தம் தம் ஸப்பினிஆதி³வத்து²ம் த³ண்டா³தீ³ஹி படிக்கி²பித்வா க³ஹேதும், மாதுஆதி³ம் உத³கே மீயமானம் வத்தா²தீ³ஹி க³ஹேதும், அஸக்கோந்திம் கேஸாதீ³ஸு க³ஹேத்வா காருஞ்ஞேன உக்கி²பிதுஞ்ச வட்டதீதி அயமத்தோ² க³ஹேதப்³போ³வ. ‘‘அட்ட²கதா²யம் ‘ந த்வேவ ஆமஸிதப்³பா³’தி இத³ம் பன வசனம் அமீயமானம் வத்து²ம் ஸந்தா⁴ய வுத்தந்தி அயம் அம்ஹாகம் க²ந்தீ’’தி விமதிவினோத³னியம் (வி. வி. டீ. 1.281) வுத்தம்.

41. மக்³க³ம் அதி⁴ட்டா²யாதி ‘‘மக்³கோ³ அய’’ந்தி மக்³க³ஸஞ்ஞம் உப்பாதே³த்வாதி அத்தோ². பஞ்ஞபேத்வா தே³ந்தீதி இத³ம் ஸாமீசிவஸேன வுத்தம், தேஹி பன ‘‘ஆஸனம் பஞ்ஞபேத்வாவ நிஸீத³தா²’’தி வுத்தே ஸயமேவ பஞ்ஞபேத்வா நிஸீதி³தும் வட்டதி. தத்த² ஜாதகானீதி அச்சி²ந்தி³த்வா பூ⁴தகா³மபா⁴வேனேவ டி²தானி. ‘‘கீளந்தேனா’’தி வுத்தத்தா ஸதி பச்சயே ஆமஸந்தஸ்ஸ அனாபத்தி, இத³ஞ்ச கி³ஹிஸந்தகம் ஸந்தா⁴ய வுத்தம், பி⁴க்கு²ஸந்தகம் பன பரிபோ⁴கா³ரஹம் ஸப்³ப³தா² ஆமஸிதும் ந வட்டதி து³ரூபசிண்ணத்தா. தாலபனஸாதீ³னீதி சேத்த² ஆதி³-ஸத்³தே³ன நாளிகேரலபு³ஜதிபுஸஅலாபு³கும்ப⁴ண்ட³புஸ்ஸப²லஏளாலுகப²லானம் ஸங்க³ஹோ த³ட்ட²ப்³போ³. ‘‘யதா²வுத்தப²லானம்யேவ சேத்த² கீளாதி⁴ப்பாயேன ஆமஸனம் ந வட்டதீ’’தி வுத்தத்தா பாஸாணஸக்க²ராதீ³னி கீளாதி⁴ப்பாயேனபி ஆமஸிதும் வட்டதி. அனுபஸம்பன்னானம் த³ஸ்ஸாமீதி இத³ம் அபடிக்³க³ஹேத்வா க³ஹணம் ஸந்தா⁴ய வுத்தம். அத்தனோபி அத்தா²ய படிக்³க³ஹேத்வா க³ஹணே தோ³ஸோ நத்தி² அனாமாஸத்தாபா⁴வா.

42. முத்தாதி (ம. நி. டீ. 1.2 பத²வீவாரவண்ணனா; ஸாரத்த². டீ. 2.281) ஹத்தி²கும்ப⁴ஜாதிகா அட்ட²விதா⁴ முத்தா. ததா² ஹி ஹத்தி²கும்ப⁴ம், வராஹதா³ட²ம், பு⁴ஜக³ஸீஸம், வலாஹகம், வேளு, மச்ச²ஸிரோ, ஸங்கோ², ஸிப்பீதி அட்ட² முத்தாயோனியோ. தத்த² ஹத்தி²கும்ப⁴ஜா பீதவண்ணா பபா⁴ஹீனா. வராஹதா³டா² வராஹதா³டா²வண்ணாவ. பு⁴ஜக³ஸீஸஜா நீலாதி³வண்ணா ஸுவிஸுத்³தா⁴ வட்டலா ச. வலாஹகஜா பா⁴ஸுரா து³ப்³பி³பா⁴கா³ ரத்திபா⁴கே³ அந்த⁴காரம் வித⁴மேந்தியோ திட்ட²ந்தி, தே³வூபபோ⁴கா³ ஏவ ச ஹோந்தி. வேளுஜா கரகப²லஸமானவண்ணா ந பா⁴ஸுரா, தே ச வேளூ அமனுஸ்ஸகோ³சரேயேவ பதே³ஸே ஜாயந்தி. மச்ச²ஸிரஜா பாடீ²னபிட்டி²ஸமானவண்ணா வட்டலா லக⁴வோ ச தேஜவந்தா ஹோந்தி பபா⁴விஹீனா ச, தே ச மச்சா² ஸமுத்³த³மஜ்ஜே²யேவ ஜாயந்தி. ஸங்க²ஜா ஸங்க²உத³ரச்ச²விவண்ணா கோலப²லப்பமாணாபி ஹோந்தி பபா⁴விஹீனாவ. ஸிப்பிஜா பபா⁴விஸேஸயுத்தா ஹோந்தி நானாஸண்டா²னா. ஏவம் ஜாதிதோ அட்ட²விதா⁴ஸு முத்தாஸு யா மச்ச²ஸங்க²ஸிப்பிஜா, தா ஸாமுத்³தி³கா. பு⁴ஜக³ஜாபி காசி ஸாமுத்³தி³கா ஹோந்தி, இதரா அஸாமுத்³தி³கா. யஸ்மா ப³ஹுலம் ஸாமுத்³தி³காவ முத்தா லோகே தி³ஸ்ஸந்தி, தத்தா²பி ஸிப்பிஜாவ, இதரா கதா³சி காசி, தஸ்மா ஸம்மோஹவினோத³னியம் (விப⁴. அட்ட². 173) ‘‘முத்தாதி ஸாமுத்³தி³கா முத்தா’’தி வுத்தம்.

மணீதி வேளுரியாதி³தோ அஞ்ஞோ ஜோதிரஸாதி³பே⁴தோ³ ஸப்³போ³ மணி. வேளுரியோதி அல்லவேளுவண்ணோ மணி, ‘‘மஜ்ஜாரக்கி²மண்ட³லவண்ணோ’’திபி வத³ந்தி. ஸங்கோ²தி ஸாமுத்³தி³கஸங்கோ². ஸிலாதி முக்³க³வண்ணா அதிஸினித்³தா⁴ காளஸிலா. மணிவோஹாரம் அக³தா ரத்தஸேதாதி³வண்ணா ஸுமட்டா²பி ஸிலா அனாமாஸா ஏவாதி வத³ந்தி. ஸாரத்த²தீ³பனியம் (ஸாரத்த². டீ. 2.281) பன ‘‘ஸங்கோ²தி ஸாமுத்³தி³கஸங்கோ². ஸிலாதி காளஸிலாபண்டு³ஸிலாஸேதஸிலாதி³பே⁴தா³ ஸப்³பா³பி ஸிலா’’தி வுத்தம். பவாளம் ஸமுத்³த³தோ ஜாதனாதிரத்தமணி. ரஜதந்தி கஹாபணமாஸாதி³பே⁴த³ம் ஜதுமாஸாதி³ம் உபாதா³ய ஸப்³ப³ம் வுத்தாவஸேஸரூபியம் க³ஹிதம். ஜாதரூபந்தி ஸுவண்ணம். லோஹிதங்கோதி ரத்தமணி. மஸாரக³ல்லந்தி கப³ரவண்ணோ மணி. ‘‘மரகத’’ந்திபி வத³ந்தி.

ப⁴ண்ட³மூலத்தா²யாதி பத்தசீவராதி³மூலத்தா²ய. குட்ட²ரோக³ஸ்ஸாதி நித³ஸ்ஸனமத்தம். தாய வூபஸமேதப்³ப³ஸ்ஸ யஸ்ஸ கஸ்ஸசி ரோக³ஸ்ஸ அத்தா²ய வட்டதியேவ. ‘‘பே⁴ஸஜ்ஜத்த²ஞ்ச அவித்³தா⁴யேவ முத்தா வட்டதீ’’தி தீஸுபி க³ண்டி²பதே³ஸு வுத்தா. பே⁴ஸஜ்ஜத்தா²ய பிஸித்வா யோஜிதானம் முத்தானம் ரதனபா⁴வவிஜஹனதோ க³ஹணக்க²ணேபி ரதனாகாரேன அபேக்கா²பா⁴வா ‘‘பே⁴ஸஜ்ஜத்தா²ய பன வட்டதீ’’தி வுத்தம். யாவ பன தா முத்தா ரதனரூபேன திட்ட²ந்தி, தாவ ஆமஸிதும் ந வட்டந்தி. ஏவம் அஞ்ஞம்பி ரதனபாஸாணம் பிஸித்வா பே⁴ஸஜ்ஜே யோஜனத்தா²ய க³ஹேதும் வட்டதி ஏவ. ஜாதரூபரஜதம் பன மிஸ்ஸேத்வா யோஜனபே⁴ஸஜ்ஜத்தா²யபி ஸம்படிச்சி²தும் ந வட்டதி. க³ஹட்டே²ஹி யோஜேத்வா தி³ன்னம்பி யதி³ பே⁴ஸஜ்ஜே ஸுவண்ணாதி³ரூபேன திட்ட²தி, வியோஜேதுஞ்ச ஸக்கா, தாதி³ஸம் பே⁴ஸஜ்ஜம்பி ந வட்டதி. தம் அப்³போ³ஹாரிகத்தக³தஞ்சே வட்டதி. ‘‘ஜாதிப²லிகம் உபாதா³யா’’தி வுத்தத்தா ஸூரியகந்தசந்த³கந்தாதி³கம் ஜாதிபாஸாணம் மணிம்ஹி ஏவ ஸங்க³ஹிதந்தி த³ட்ட²ப்³ப³ம். ஆகரமுத்தோதி ஆகரதோ முத்தமத்தோ. ப⁴ண்ட³மூலத்த²ம் ஸம்படிச்சி²தும் வட்டதீதி இமினாவ ஆமஸிதும்பி வட்டதீதி த³ஸ்ஸேதி. பசித்வா கதோதி காசகாரேஹி பசித்வா கதோ.

த⁴மனஸங்கோ² ச தோ⁴தவித்³தோ⁴ ச ரதனமிஸ்ஸோ சாதி யோஜேதப்³ப³ம். வித்³தோ⁴திஆதி³பா⁴வேன கதசி²த்³தோ³. ரதனமிஸ்ஸோதி கஞ்சனலதாதி³விசித்தோ முத்தாதி³ரதனக²சிதோ ச. ஏதேன த⁴மனஸங்க²தோ அஞ்ஞோ ரதனஸம்மிஸ்ஸோ அனாமாஸோதி த³ஸ்ஸேதி. ஸிலாயம்பி ஏஸேவ நயோ. பானீயஸங்கோ²தி இமினா தா²லகாதி³ஆகாரேன கதஸங்க²மயபா⁴ஜனானி பி⁴க்கூ²னம் ஸம்படிச்சி²தும் வட்டந்தீதி ஸித்³த⁴ம். ஸேஸந்தி ரதனமிஸ்ஸம் ட²பேத்வா அவஸேஸம். முக்³க³வண்ணம்யேவ ரதனஸம்மிஸ்ஸம் கரோந்தி, ந அஞ்ஞந்தி ஆஹ ‘‘முக்³க³வண்ணாவா’’தி, முக்³க³வண்ணா ரதனஸம்மிஸ்ஸாவ ந வட்டதீதி வுத்தம் ஹோதி. ஸேஸாதி ரதனஸம்மிஸ்ஸம் ட²பேத்வா அவஸேஸா ஸிலா.

பீ³ஜதோ பட்டா²யாதி தா⁴துபாஸாணதோ பட்டா²ய. ஸுவண்ணசேதியந்தி தா⁴துகரண்ட³கம். படிக்கி²பீதி ‘‘தா⁴துட்ட²பனத்தா²ய க³ண்ஹதா²’’தி அவத்வா ‘‘தும்ஹாகம் க³ண்ஹதா²’’தி பேஸிதத்தா படிக்கி²பி. விமதிவினோத³னியம் (வி. வி. டீ. 1.281) பன ‘‘படிக்கி²பீதி ஸுவண்ணமயஸ்ஸ தா⁴துகரண்ட³கஸ்ஸ பு³த்³தா⁴தி³ரூபஸ்ஸ ச அத்தனோ ஸந்தககரணே நிஸ்ஸக்³கி³யத்தா வுத்த’’ந்தி வுத்தம். ஸுவண்ணபு³ப்³பு³ளகந்தி ஸுவண்ணதாரகம். ‘‘ரூபியச²ட்³ட³கட்டா²னே’’தி வுத்தத்தா ரூபியச²ட்³ட³கஸ்ஸ ஜாதரூபரஜதம் ஆமஸித்வா ச²ட்³டே³தும் வட்டதீதி வுத்தம். கேளாபயிதுந்தி ஆமஸித்வா இதோ சிதோ ச ஸஞ்சாரேதும். வுத்தந்தி மஹாஅட்ட²கதா²யம் வுத்தம். கசவரமேவ ஹரிதும் வட்டதீதி கோ³பகா வா ஹோந்து அஞ்ஞே வா, ஹத்தே²னபி புஞ்சி²த்வா கசவரம் அபனேதும் வட்டதி, ‘‘மலம்பி பமஜ்ஜிதும் வட்டதியேவா’’தி ஸாரத்த²தீ³பனியம் (ஸாரத்த². டீ. 2.281) வுத்தம். விமதிவினோத³னியம் (வி. வி. டீ. 1.281) பன ‘‘கசவரமேவ ஹரிதும் வட்டதீதி கோ³பகா வா ஹோந்து அஞ்ஞே வா, ஹத்தே²னபி புஞ்சி²த்வா கசவரம் அபனேதும் வட்டதி, மலம்பி மஜ்ஜிதும் வட்டதி ஏவாதி வத³ந்தி, தம் அட்ட²கதா²ய ந ஸமேதி கேளாயனஸதி³ஸத்தா’’தி வுத்தம். கத²ம் ந ஸமேதி? மஹாஅட்ட²கதா²யம் சேதியக⁴ரகோ³பகா ரூபியச²ட்³ட³கட்டா²னே டி²தாதி தேஸம்யேவ கேளாயனம் அனுஞ்ஞாதம், ந அஞ்ஞேஸம், தஸ்மா ‘‘கோ³பகா வா ஹோந்து அஞ்ஞே வா’’தி வசனம் மஹாஅட்ட²கதா²ய ந ஸமேதி.

குருந்தி³யம் பன தம்பி படிக்கி²த்தம், ஸுவண்ணசேதியே கசவரமேவ ஹரிதும் வட்டதீதி ஏத்தகமேவ அனுஞ்ஞாதம், தஸ்மா ஸாவதா⁴ரணம் கத்வா வுத்தத்தா ‘‘ஹத்தே²னபி புஞ்சி²த்வா’’தி ச ‘‘மலம்பி பமஜ்ஜிதும் வட்டதி ஏவா’’தி ச வசனம் குருந்த³ட்ட²கதா²ய ந ஸமேதி, தஸ்மா விசாரேதப்³ப³மேதந்தி. ஆரகூடலோஹந்தி ஸுவண்ணவண்ணோ கித்திமலோஹவிஸேஸோ. திவித⁴ஞ்ஹி கித்திமலோஹம் – கம்ஸலோஹம் வட்டலோஹம் ஆரகூடலோஹந்தி. தத்த² திபுதம்பே³ மிஸ்ஸேத்வா கதம் கம்ஸலோஹம் நாம, ஸீஸதம்பே³ மிஸ்ஸேத்வா கதம் வட்டலோஹம், ரஸதுத்தே²ஹி ரஞ்ஜிதம் தம்ப³ம் ஆரகூடலோஹம் நாம. ‘‘பகதிரஸதம்பே³ மிஸ்ஸேத்வா கதம் ஆரகூட’’ந்தி ச ஸாரத்த²தீ³பனியம் (ஸாரத்த². டீ. 2.281) வுத்தம். தம் பன ‘‘ஜாதரூபக³திக’’ந்தி வுத்தத்தா உக்³க³ண்ஹதோ நிஸ்ஸக்³கி³யம்பி ஹோதீதி கேசி வத³ந்தி, ரூபியேஸு பன அக³ணிதத்தா நிஸ்ஸக்³கி³யம் ந ஹோதி, ஆமஸனே ஸம்படிச்ச²னே ச து³க்கடமேவாதி வேதி³தப்³ப³ம். ஸப்³போ³பி கப்பியோதி யதா²வுத்தஸுவண்ணாதி³மயானம் ஸேனாஸனபரிக்கா²ரானம் ஆமஸனகோ³பனாதி³வஸேன பரிபோ⁴கோ³ ஸப்³ப³தா² கப்பியோதி அதி⁴ப்பாயோ. தேனாஹ ‘‘தஸ்மா’’திஆதி³. ‘‘பி⁴க்கூ²னம் த⁴ம்மவினயவண்ணனட்டா²னே’’தி வுத்தத்தா ஸங்கி⁴கமேவ ஸுவண்ணாதி³மயம் ஸேனாஸனம் ஸேனாஸனபரிக்கா²ரா ச வட்டந்தி, ந புக்³க³லிகானீதி க³ஹேதப்³ப³ம். படிஜக்³கி³தும் வட்டந்தீதி ஸேனாஸனபடிப³ந்த⁴தோ வுத்தம்.

43. ஸாமிகானம் பேஸேதப்³ப³ந்தி ஸாமிகானம் ஸாஸனம் பேஸேதப்³ப³ம். பி⁴ந்தி³த்வாதி பட²மமேவ அனாமஸித்வா பாஸாணாதி³னா கிஞ்சிமத்தம் பே⁴த³ம் கத்வா பச்சா² கப்பியப⁴ண்ட³த்தா²ய அதி⁴ட்ட²ஹித்வா ஹத்தே²ன க³ஹேதும் வட்டதி. தேனாஹ ‘‘கப்பியப⁴ண்ட³ம் கரிஸ்ஸாமீதி ஸம்படிச்சி²தும் வட்டதீ’’தி. ஏத்தா²பி தஞ்ச வியோஜேத்வா ஆமஸிதப்³ப³ம். ப²லகஜாலிகாதீ³னீதி ஏத்த² ஸரபரித்தாணாய ஹத்தே²ன க³ஹேதப்³ப³ம். கிடிகாப²லகம் அக்கி²ரக்க²ணத்தா²ய அயலோஹாதீ³ஹி ஜாலாகாரேன கத்வா ஸீஸாதீ³ஸு படிமுஞ்சிதப்³ப³ம் ஜாலிகம் நாம. ஆதி³-ஸத்³தே³ன கவசாதி³கம் ஸங்க³ண்ஹாதி. அனாமாஸானீதி மச்ச²ஜாலாதி³பரூபரோத⁴ம் ஸந்தா⁴ய வுத்தம், ந ஸரபரித்தாணம் தஸ்ஸ ஆவுத⁴ப⁴ண்ட³த்தாபா⁴வா. தேன வக்க²தி ‘‘பரூபரோத⁴னிவாரணஞ்ஹீ’’திஆதி³ (வி. ஸங்க³. அட்ட². 43). ஆஸனஸ்ஸாதி சேதியஸ்ஸஸமந்தா கதபரிப⁴ண்ட³ஸ்ஸ. ப³ந்தி⁴ஸ்ஸாமீதி காகாதீ³னம் அதூ³ஸனத்தா²ய ப³ந்தி⁴ஸ்ஸாமி.

‘‘பே⁴ரிஸங்கா⁴டோதி ஸங்க⁴டிதசம்மபே⁴ரீ. வீணாஸங்கா⁴டோதி ஸங்க⁴டிதசம்மவீணா’’தி ஸாரத்த²தீ³பனியம் (ஸாரத்த². டீ. 2.281) வுத்தம். ‘‘சம்மவினத்³தா⁴ வீணாபே⁴ரிஆதீ³னீ’’தி மஹாஅட்ட²கதா²யம் வுத்தவசனதோ விஸேஸாபா⁴வா ‘‘குருந்தி³யம் பனா’’திஆதி³னா ததோ விஸேஸஸ்ஸ வத்துமாரத்³த⁴த்தா ச பே⁴ரிஆதீ³னம் வினத்³தோ⁴பகரணஸமூஹோ பே⁴ரிவீணாஸங்கா⁴டோதி வேதி³தப்³போ³ ‘‘ஸங்க⁴டிதப்³போ³தி ஸங்கா⁴டோ’’தி கத்வா. துச்ச²போக்க²ரந்தி அவினத்³த⁴சம்மபே⁴ரிவீணானம் போக்க²ரம். ஆரோபிதசம்மந்தி புப்³பே³ ஆரோபிதம் ஹுத்வா பச்சா² ததோ அபனேத்வா விஸும் ட²பிதமுக²சம்மமத்தம், ந ஸேஸோபகரணஸஹிதம், தம் பன ஸங்கா⁴தோதி அயம் விஸேஸோ. ஓனஹிதுந்தி பே⁴ரிபோக்க²ராதீ³னி சம்மம் ஆரோபேத்வா சம்மவத்³தி⁴ஆதீ³ஹி ஸப்³பே³ஹி உபகரணேஹி வினந்தி⁴தும். ஓனஹாபேதுந்தி ததே²வ அஞ்ஞேஹி வினந்தா⁴பேதும்.

இதி வினயஸங்க³ஹஸம்வண்ணனாபூ⁴தே வினயாலங்காரே

அனாமாஸவினிச்ச²யகதா²லங்காரோ நாம

ஸத்தமோ பரிச்சே²தோ³.