8. அதி⁴ட்டா²னவிகப்பனவினிச்ச²யகதா²

44. ஏவம் அனாமாஸவினிச்ச²யகத²ம் கதே²த்வா இதா³னி அதி⁴ட்டா²னவிகப்பனவினிச்ச²யம் கதே²தும் ‘‘அதி⁴ட்டா²னவிகப்பனேஸு பனா’’திஆதி³மாஹ. தத்த² அதி⁴ட்டி²யதே அதி⁴ட்டா²னம், க³ஹணம் ஸல்லக்க²ணந்தி அத்தோ². விகப்பியதே விகப்பனா, ஸங்கப்பனம் சிந்தனந்தி அத்தோ². தத்த² ‘‘திசீவரம் அதி⁴ட்டா²துந்தி நாமம் வத்வா அதி⁴ட்டா²தும். ந விகப்பேதுந்தி நாமம் வத்வா ந விகப்பேதும். ஏஸ நயோ ஸப்³ப³த்த². தஸ்மா திசீவரம் அதி⁴ட்ட²ஹந்தேன ‘இமம் ஸங்கா⁴டிம் அதி⁴ட்டா²மீ’திஆதி³னா நாமம் வத்வா அதி⁴ட்டா²தப்³ப³ம். விகப்பேந்தேன பன ‘இமம் ஸங்கா⁴டி’ந்திஆதி³னா தஸ்ஸ தஸ்ஸ சீவரஸ்ஸ நாமம் அக்³க³ஹேத்வாவ ‘இமம் சீவரம் துய்ஹம் விகப்பேமீ’தி விகப்பேதப்³ப³ம். திசீவரம் வா ஹோது அஞ்ஞம் வா, யதி³ தம் தம் நாமம் க³ஹேத்வா விகப்பேதி, அவிகப்பிதம் ஹோதி, அதிரேகசீவரட்டா²னே திட்ட²தீ’’தி ஸாரத்த²தீ³பனியம் (ஸாரத்த². டீ. 2.469) வுத்தம்.

விமதிவினோத³னியம் (வி. வி. டீ. 1.469) பன ‘‘திசீவரம் அதி⁴ட்டா²துந்தி ஸங்கா⁴டிஆதி³னாமேன அதி⁴ட்டா²தும். ந விகப்பேதுந்தி இமினா நாமேன ந விகப்பேதும், ஏதேன விகப்பிததிசீவரோ தேசீவரிகோ ந ஹோதி, தஸ்ஸ தஸ்மிம் அதி⁴ட்டி²ததிசீவரே விய அவிப்பவாஸாதி³னா காதப்³ப³விதி⁴ ந காதப்³போ³தி த³ஸ்ஸேதி, ந பன விகப்பனே தோ³ஸோ’’தி வுத்தம். வஜிரபு³த்³தி⁴டீகாயம் (வஜிர. டீ. பாராஜிக 469) பன ‘‘திசீவரம் அதி⁴ட்டா²துந்தி ஏத்த² திசீவரம் திசீவராதி⁴ட்டா²னேன அதி⁴ட்டா²தப்³ப³யுத்தகம், யம் வா திசீவராதி⁴ட்டா²னேன அதி⁴ட்டா²தும் ந விகப்பேதும் அனுஜானாமி, தஸ்ஸ அதி⁴ட்டா²னகாலபரிச்சே²தா³பா⁴வதோ ஸப்³ப³காலம் இச்ச²ந்தஸ்ஸ அதி⁴ட்டா²தும்யேவ அனுஜானாமி, தம் காலபரிச்சே²த³ம் கத்வா விகப்பேதும் நானுஜானாமி, ஸதி பன பச்சயே யதா³ ததா³ வா பச்சுத்³த⁴ரித்வா விகப்பேதும் வட்டதீதி ‘அனாபத்தி அந்தோத³ஸாஹம் அதி⁴ட்டே²தி விகப்பேதீ’தி வசனதோ ஸித்³த⁴ம் ஹோதீ’’தி வுத்தம்.

இமேஸு பன தீஸு டீகாவாதே³ஸு ததியவாதோ³ யுத்ததரோ விய தி³ஸ்ஸதி. கஸ்மா? பாளியா அட்ட²கதா²ய ச ஸம்ஸந்த³னதோ. கத²ம்? பாளியஞ்ஹி கதபரிச்சே²தா³ஸுயேவ த்³வீஸு வஸ்ஸிகஸாடிககண்டு³படிச்சா²தீ³ஸு ததோ பரம் விகப்பேதுந்தி வுத்தம், ததோ அஞ்ஞேஸு ந விகப்பேதும் இச்சேவ, தஸ்மா தேஸு அஸதி பச்சயே நிச்சம் அதி⁴ட்டா²தப்³ப³மேவ ஹோதி, ந விகப்பேதப்³ப³ந்தி அயம் பாளியா அதி⁴ப்பாயோ தி³ஸ்ஸதி, இதராஸு பன த்³வீஸு அனுஞ்ஞாதகாலேயேவ அதி⁴ட்டா²தப்³ப³ம், ‘‘ததோ பரம் விகப்பேது’’ந்தி ஏவம் பாளியா ஸம்ஸந்த³தி, அட்ட²கதா²யம் திசீவரம் திசீவரஸங்கே²பேன பரிஹரதோ அதி⁴ட்டா²துமேவ அனுஜானாமி, ந விகப்பேதும். வஸ்ஸிகஸாடிகம் பன சாதுமாஸதோ பரம் விகப்பேதுமேவ, ந அதி⁴ட்டா²தும், ஏவஞ்ச ஸதி யோ திசீவரே ஏகேன சீவரேன விப்பவஸிதுகாமோ ஹோதி, தஸ்ஸ சீவராதி⁴ட்டா²னம் பச்சுத்³த⁴ரித்வா விப்பவாஸஸுக²த்த²ம் விகப்பனாய ஓகாஸோ தி³ன்னோ ஹோதீதி.

பட²மவாதே³ ‘‘ந விகப்பேது’’ந்தி நாமம் வத்வா ‘‘ந விகப்பேது’’ந்தி அத்தோ² வுத்தோ, ஏவம் ஸந்தே ‘‘ததோ பரம் விகப்பேது’’ந்தி ஏத்த² ததோ பரம் நாமம் வத்வா விகப்பேதுந்தி அத்தோ² ப⁴வேய்ய, ஸோ ச அத்தோ² விகப்பனாதி⁴காரேன வுத்தோ, ‘‘நாமம் வத்வா’’தி ச விஸேஸனே கத்தப்³பே³ ஸதி ‘‘ந விகப்பேது’’ந்தி ச ‘‘ததோ பரம் விகப்பேது’’ந்தி ச பே⁴த³வசனம் ந ஸியா, ஸப்³பே³ஸுபி சீவரேஸு நாமம் அவத்வாவ விகப்பேதப்³ப³தோ, து³தியவாதே³ ச ‘‘ந விகப்பேது’’ந்தி இமினா நாமேன ந விகப்பேதுந்தி வுத்தம், ந அனுஜானாமீதி பாட²ஸேஸோ. பட²மே ச ‘‘திசீவரம் வா ஹோது அஞ்ஞம் வா, யதி³ தம் தம் நாமம் க³ஹேத்வா விகப்பேதி, அவிகப்பிதம் ஹோதி, அதிரேகசீவரட்டா²னே திட்ட²தீ’’தி. து³தியே ச ‘‘ந பன விகப்பனே தோ³ஸோ’’தி, தஞ்ச அஞ்ஞமஞ்ஞவிருத்³த⁴ம் விய தி³ஸ்ஸதி, தஸ்மா விசாரேதப்³ப³மேதம்.

ததோ பரம் விகப்பேதுந்தி சாதுமாஸதோ பரம் விகப்பேத்வா பரிபு⁴ஞ்ஜிதுந்தி தீஸு க³ண்டி²பதே³ஸு வுத்தம். கேசி பன ‘‘ததோ பரம் விகப்பேத்வா யாவ ஆகா³மிஸம்வச்ச²ரே வஸ்ஸானம் சாதுமாஸம், தாவ ட²பேதும் அனுஞ்ஞாத’’ந்திபி வத³ந்தி. ‘‘ததோ பரம் விகப்பேதும் அனுஜானாமீதி ஏத்தாவதா வஸ்ஸிகஸாடிகம் கண்டு³படிச்சா²தி³ஞ்ச தம் தம் நாமம் க³ஹேத்வா விகப்பேதும் அனுஞ்ஞாதந்தி ஏவமத்தோ² ந க³ஹேதப்³போ³. ததோ பரம் வஸ்ஸிகஸாடிகாதி³னாமஸ்ஸேவ அபா⁴வதோ, கஸ்மா ததோ பரம் விகப்பேந்தேனபி நாமம் க³ஹேத்வா ந விகப்பேதப்³ப³ம். உபி⁴ன்னம்பி ததோ பரம் விகப்பேத்வா பரிபோ⁴க³ஸ்ஸ அனுஞ்ஞாதத்தா ததா²விகப்பிதம் அஞ்ஞனாமேன அதி⁴ட்ட²ஹித்வா பரிபு⁴ஞ்ஜிதப்³ப³ந்தி தீஸுபி க³ண்டி²பதே³ஸு வுத்த’’ந்தி ஸாரத்த²தீ³பனியம் (ஸாரத்த². டீ. 2.469) வுத்தம். விமதிவினோத³னியம்பி (வி. வி. டீ. 1.469) ‘‘ததோ பரந்தி சாதுமாஸதோ பரம் விகப்பேத்வா பரிபு⁴ஞ்ஜிதும் அனுஞ்ஞாதந்தி கேசி வத³ந்தி. அஞ்ஞே பன ‘விகப்பேத்வா யாவ ஆகா³மிவஸ்ஸானம் தாவ ட²பேதும் வட்டதீ’தி வத³ந்தி. அபரே பன ‘விகப்பனே ந தோ³ஸோ, ததா² விகப்பிதம் பரிக்கா²ராதி³னாமேன அதி⁴ட்ட²ஹித்வா பரிபு⁴ஞ்ஜிதப்³ப³’ந்தி வத³ந்தீ’’தி வுத்தம்.

வஜிரபு³த்³தி⁴டீகாயம் (வஜிர. டீ. பாராஜிக 469) பன ‘‘வஸ்ஸிகஸாடிகம் ததோ பரம் விகப்பேதும்யேவ, நாதி⁴ட்டா²தும். வத்த²ஞ்ஹி கதபரியோஸிதம் அந்தோசாதுமாஸே வஸ்ஸானதி³வஸம் ஆதி³ம் கத்வா அந்தோத³ஸாஹே அதி⁴ட்டா²தும் அனுஜானாமி, சாதுமாஸதோ உத்³த⁴ம் அத்தனோ ஸந்தகம் கத்வா ட²பேதுகாமேன விகப்பேதும் அனுஜானாமீதி அத்தோ²’’தி வுத்தம். இதா⁴பி பச்சி²மவாதோ³ பஸத்த²தரோதி தி³ஸ்ஸதி, கஸ்மா? ஸுவிஞ்ஞேய்யத்தா, புரிமேஸு பன ஆசரியானம் அதி⁴ப்பாயோயேவ து³விஞ்ஞேய்யோ ஹோதி நானாவாத³ஸ்ஸேவ கதி²தத்தா. முட்டி²பஞ்சகந்தி முட்டி²யா உபலக்கி²தம் பஞ்சகம் முட்டி²பஞ்சகம், சதுஹத்தே² மினித்வா பஞ்சமம் ஹத்த²முட்டி²ம் கத்வா மினிதப்³ப³ந்தி அதி⁴ப்பாயோ. கேசி பன ‘‘முட்டி²ஹத்தா²னம் பஞ்சகம் முட்டி²பஞ்சகம். பஞ்சபி ஹத்தா² முட்டீ² கத்வாவ மினிதப்³பா³’’தி வத³ந்தி. முட்டி²த்திகந்தி ஏத்தா²பி ஏஸேவ நயோ. த்³விஹத்தே²ன அந்தரவாஸகேன திமண்ட³லம் படிச்சா²தே³தும் ஸக்காதி ஆஹ ‘‘பாருபனேனபீ’’திஆதி³. அதிரேகந்தி ஸுக³தசீவரதோ அதிரேகம். ஊனகந்தி முட்டி²பஞ்சகாதி³தோ ஊனகம். தேன ச தேஸு திசீவராதி⁴ட்டா²னம் ந ருஹதீதி த³ஸ்ஸேதி.

இமம் ஸங்கா⁴டிம் பச்சுத்³த⁴ராமீதி இமம் ஸங்கா⁴டிஅதி⁴ட்டா²னம் உக்கி²பாமி, பரிச்சஜாமீதி அத்தோ². ஸாரத்த²தீ³பனியம் (ஸாரத்த². டீ. 2.469) பன ‘‘பச்சுத்³த⁴ராமீதி ட²பேமி, பரிச்சஜாமீதி வா அத்தோ²’’இச்சேவ வுத்தம். காயவிகாரம் கரோந்தேனாதி ஹத்தே²ன சீவரம் பராமஸந்தேன, சாலேந்தேன வா. வாசாய அதி⁴ட்டா²தப்³பா³தி ஏத்த² காயேனபி சாலேத்வா வாசம்பி பி⁴ந்தி³த்வா காயவாசாஹி அதி⁴ட்டா²னம்பி ஸங்க³ஹிதந்தி வேதி³தப்³ப³ம், ‘‘காயேன அபு²ஸித்வா’’தி வத்தப்³ப³த்தா அஹத்த²பாஸஹத்த²பாஸவஸேன து³வித⁴ம் அதி⁴ட்டா²னம். தத்த² ‘‘ஹத்த²பாஸோ நாம அட்³ட⁴தேய்யஹத்தோ² வுச்சதி. ‘த்³வாத³ஸஹத்த²’ந்தி கேசி வத³ந்தி, தம் இத⁴ ந ஸமேதீ’’தி விமதிவினோத³னியம் (வி. வி. டீ. 1.469) வுத்தம். ‘‘இதா³னி ஸம்முகா²பரம்முகா²பே⁴தே³ன து³வித⁴ம் அதி⁴ட்டா²னம் த³ஸ்ஸேதும் ‘‘ஸசே ஹத்த²பாஸேதிஆதி³ வுத்தம். ஸாரத்த²தீ³பனியம் (ஸாரத்த². டீ. 2.469) பன ‘‘ஹத்த²பாஸேதி ச இத³ம் த்³வாத³ஸஹத்த²ம் ஸந்தா⁴ய வுத்தம், தஸ்மா த்³வாத³ஸஹத்த²ப்³ப⁴ந்தரே டி²தம் ‘இம’ந்தி வத்வா அதி⁴ட்டா²தப்³ப³ம், ததோ பரம் ‘ஏத’ந்தி வத்வா அதி⁴ட்டா²தப்³ப³ந்தி கேசி வத³ந்தி, க³ண்டி²பதே³ஸு பனேத்த² ந கிஞ்சி வுத்தம், பாளியம் அட்ட²கதா²யஞ்ச ஸப்³ப³த்த² ‘ஹத்த²பாஸோ’தி அட்³ட⁴தேய்யஹத்தோ² வுச்சதி, தஸ்மா இத⁴ விஸேஸவிகப்பனாய காரணம் க³வேஸிதப்³ப³’’ந்தி வுத்தம். ஏவம் பாளியட்ட²கதா²ஸுபி அட்³ட⁴தேய்யஹத்த²மேவ ஹத்த²பாஸோ வுத்தோ, டீகாசரியேஹி ச ததே³வ ஸம்படிச்சி²தோ, தஸ்மா அட்³ட⁴தேய்யஹத்த²ப்³ப⁴ந்தரே டி²தம் சீவரம் ‘‘இம’’ந்தி, ததோ ப³ஹிபூ⁴தம் ‘‘ஏத’’ந்தி வத்வா அதி⁴ட்டா²தப்³ப³ம்.

‘‘ஸாமந்தவிஹாரேதி இத³ம் ட²பிதட்டா²னஸல்லக்க²ணயோக்³கே³ டி²தம் ஸந்தா⁴ய வுத்தம், ததோ தூ³ரே டி²தம்பி ட²பிதட்டா²னம் ஸல்லக்கே²ந்தேன அதி⁴ட்டா²தப்³ப³மேவ. தத்தா²பி சீவரஸ்ஸ ட²பிதபா⁴வஸல்லக்க²ணமேவ பமாணம். ந ஹி ஸக்கா நிச்சஸ்ஸ டா²னம் ஸல்லக்கே²தும், ஏகஸ்மிம் விஹாரே ட²பேத்வா ததோ அஞ்ஞஸ்மிம் ட²பிதந்தி அதி⁴ட்டா²தும் ந வட்டதி. கேசி பன ‘ததா²பி அதி⁴ட்டி²தே ந தோ³ஸோ’தி வத³ந்தி, தம் அட்ட²கதா²ய ந ஸமேதி, வீமம்ஸிதப்³ப³’’ந்தி விமதிவினோத³னியம் (வி. வி. டீ. 1.469) வுத்தம். ஸாரத்த²தீ³பனியம் (ஸாரத்த². டீ. 2.469) பன ‘‘ஸாமந்தவிஹாரோ நாம யத்த² தத³ஹேவ க³ந்த்வா நிவத்தேதும் ஸக்கா. ஸாமந்தவிஹாரேதி இத³ம் தே³ஸனாஸீஸமத்தம், தஸ்மா ட²பிதட்டா²னம் ஸல்லக்கே²த்வா தூ³ரே டி²தம்பி அதி⁴ட்டா²தப்³ப³ந்தி வத³ந்தி. ட²பிதட்டா²னம் ஸல்லக்கே²த்வாதி ச இத³ம் ட²பிதட்டா²னஸல்லக்க²ணம் அனுச்ச²விகந்தி கத்வா வுத்தம், சீவரஸல்லக்க²ணமேவேத்த² பமாண’’ந்தி வுத்தம். வஜிரபு³த்³தி⁴டீகாயஞ்ச (வஜிர. டீ. பாராஜிக 469) ‘‘ஸங்கா⁴டி உத்தராஸங்கோ³ அந்தரவாஸகந்தி அதி⁴ட்டி²தானதி⁴ட்டி²தானம் ஸமானமேவ நாமம். ‘அயம் ஸங்கா⁴டீ’திஆதீ³ஸு அனதி⁴ட்டி²தா வுத்தா. ‘திசீவரேன விப்பவஸேய்யா’தி ஏத்த² அதி⁴ட்டி²தா வுத்தா. ஸாமந்தவிஹாரேதி கோ³சரகா³மதோ விஹாரேதி த⁴ம்மஸிரித்தே²ரோ. தூ³ரதரேபி லப்³ப⁴தேவாதி ஆசரியா. அனுக³ண்டி²பதே³பி ‘ஸாமந்தவிஹாரேதி தே³ஸனாஸீஸமத்தம், தஸ்மா ட²பிதட்டா²னம் ஸல்லக்கே²த்வா தூ³ரே டி²தம்பி அதி⁴ட்டா²தப்³ப³’ந்தி வுத்தம். ஸாமந்தவிஹாரோ நாம யத்த² தத³ஹேவ க³ந்த்வா நிவத்திதும் ஸக்கா. ரத்திவிப்பவாஸம் ரக்க²ந்தேன ததோ தூ³ரே டி²தம் அதி⁴ட்டா²தும் ந வட்டதி, ஏவம் கிர மஹாஅட்ட²கதா²யம் வுத்தந்தி. கேசி ‘சீவரவம்ஸே ட²பிதம் அஞ்ஞோ பரிவத்தேத்வா நாக³த³ந்தே ட²பேதி, தம் அஜானித்வா அதி⁴ட்ட²ஹந்தஸ்ஸபி ருஹதி சீவரஸ்ஸ ஸல்லக்கி²தத்தா’தி வத³ந்தீ’’தி, தஸ்மா ஆசரியானம் மதபே⁴த³ம் ஸம்ஸந்தி³த்வா க³ஹேதப்³ப³ம்.

அதி⁴ட்ட²ஹித்வா ட²பிதவத்தே²ஹீதி பரிக்கா²ரசோளனாமேன அதி⁴ட்ட²ஹித்வா ட²பிதவத்தே²ஹி. தேனேவ ‘‘இமம் பச்சுத்³த⁴ராமீ’’தி பரிக்கா²ரசோளஸ்ஸ பச்சுத்³தா⁴ரம் த³ஸ்ஸேதி, ஏதேன ச தேசீவரிகது⁴தங்க³ம் பரிஹரந்தேன பம்ஸுகூலாதி³வஸேன லத்³த⁴ம் வத்த²ம் த³ஸாஹப்³ப⁴ந்தரே கத்வா ரஜித்வா பாருபிதுமஸக்கோந்தேன பரிக்கா²ரசோளவஸேன அதி⁴ட்ட²ஹித்வாவ த³ஸாஹமதிக்கமாபேதப்³ப³ம், இதரதா² நிஸ்ஸக்³கி³யம் ஹோதீதி த³ஸ்ஸேதி, தேனேவ ‘‘ரஜிதகாலதோ பன பட்டா²ய நிக்கி²பிதும் ந வட்டதி, து⁴தங்க³சோரோ நாம ஹோதீ’’தி விஸுத்³தி⁴மக்³கே³ (விஸுத்³தி⁴. 1.25) வுத்தம். புன அதி⁴ட்டா²தப்³பா³னீதி இத³ஞ்ச ஸங்கா⁴டிஆதி³திசீவரனாமேன அதி⁴ட்ட²ஹித்வா பரிபு⁴ஞ்ஜிதுகாமஸ்ஸ வஸேன வுத்தம், இதரஸ்ஸ பன புரிமாதி⁴ட்டா²னமேவ அலந்தி வேதி³தப்³ப³ம். புன அதி⁴ட்டா²தப்³ப³ந்தி இமினா கப்பபி³ந்து³பி தா³தப்³ப³ந்தி த³ஸ்ஸேதி. அதி⁴ட்டா²னகிச்சம் நத்தீ²தி இமினா கப்பபி³ந்து³தா³னகிச்சம்பி நத்தீ²தி த³ஸ்ஸேதி, மஹந்ததரமேவாதிஆதி³ ஸப்³பா³தி⁴ட்டா²னஸாதா⁴ரணலக்க²ணம். தத்த² புன அதி⁴ட்டா²தப்³ப³ந்தி அனதி⁴ட்டி²தசீவரஸ்ஸ ஏகதே³ஸபூ⁴தத்தா அனதி⁴ட்டி²தஞ்சே, அதி⁴ட்டி²தஸ்ஸ அப்பபா⁴வேன ஏகதே³ஸபூ⁴தம் அதி⁴ட்டி²தஸங்க²மேவ க³ச்ச²தி, ததா² அதி⁴ட்டி²தஞ்சே, அனதி⁴ட்டி²தஸ்ஸ ஏகதே³ஸபூ⁴தம் அனதி⁴ட்டி²தஸங்க²ம் க³ச்ச²தீதி லக்க²ணம். ந கேவலஞ்சேத்த² து³தியபட்டமேவ, அத² கோ² ததியபட்டாதி³கம்பி. யதா²ஹ ‘‘அனுஜானாமி பி⁴க்க²வே…பே… உதுத்³த⁴டானம் து³ஸ்ஸானம் சதுக்³கு³ணம் ஸங்கா⁴டிம்…பே… பம்ஸுகூலே யாவத³த்த²’’ந்தி (மஹாவ. 348).

முட்டி²பஞ்சகாதி³திசீவரப்பமாணயுத்தம் ஸந்தா⁴ய ‘‘திசீவரம் பனா’’திஆதி³ வுத்தம். பரிக்கா²ரசோளம் அதி⁴ட்டா²துந்தி பரிக்கா²ரசோளம் கத்வா அதி⁴ட்டா²தும். அவஸேஸா பி⁴க்கூ²தி வக்க²மானகாலே நிஸின்னா பி⁴க்கூ². தஸ்மா வட்டதீதி யதா² ‘‘அனுஜானாமி, பி⁴க்க²வே, திசீவரம் அதி⁴ட்டா²தும், ந விகப்பேது’’ந்தி (மஹாவ. 358) வுத்தம், ஏவம் பரிக்கா²ரசோளம்பி வுத்தம், ந சஸ்ஸ உக்கட்ட²பரிச்சே²தோ³ வுத்தோ, ந ச ஸங்கா²பரிச்சே²தோ³, தஸ்மா தீணிபி சீவரானி பச்சுத்³த⁴ரித்வா இமானி சீவரானி பரிக்கா²ரசோளானி அதி⁴ட்ட²ஹித்வா பரிபு⁴ஞ்ஜிதும் வட்டதீதி அத்தோ². நிதா⁴னமுக²மேதந்தி ஏதம் பரிக்கா²ரசோளாதி⁴ட்டா²னம் நிதா⁴னமுக²ம் ட²பனமுக²ம், அதிரேகசீவரட்ட²பனகாரணந்தி அத்தோ². கத²ம் ஞாயதீதி சே, தேன கோ² பன ஸமயேன பி⁴க்கூ²னம் பரிபுண்ணம் ஹோதி திசீவரம், அத்தோ² ச ஹோதி பரிஸ்ஸாவனேஹிபி த²விகாஹிபி. ஏதஸ்மிம் வத்து²ஸ்மிம் ‘‘அனுஜானாமி, பி⁴க்க²வே, பரிக்கா²ரசோளக’’ந்தி அனுஞ்ஞாதத்தா பி⁴க்கூ²னஞ்ச ஏகமேவ பரிஸ்ஸாவனம், த²விகா வா வட்டதி, ந த்³வே வா தீணி வாதி படிக்கே²பாபா⁴வதோ விகப்பனூபக³பச்சி²மப்பமாணானி, அதிரேகப்பமாணானி வா பரிஸ்ஸாவனாதீ³னி பரிக்கா²ரானி கப்பந்தீதி ஸித்³த⁴ம். பட²மம் திசீவராதி⁴ட்டா²னேன அதி⁴ட்டா²தப்³ப³ம், புன பரிஹரிதும் அஸக்கோந்தேன பச்சுத்³த⁴ரித்வா பரிக்கா²ரசோளம் அதி⁴ட்டா²தப்³ப³ம், ந த்வேவ ஆதி³தோவ இத³ம் வுத்தம். ப³த்³த⁴ஸீமாய அவிப்பவாஸஸீமாஸம்முதிஸம்ப⁴வதோ சீவரவிப்பவாஸே நேவத்தி² தோ³ஸோதி ந தத்த² து³ப்பரிஹாரோதி ஆஹ ‘‘அப³த்³த⁴ஸீமாய து³ப்பரிஹார’’ந்தி.

45. அதிரித்தப்பமாணாய சே²த³னகம் பாசித்தியந்தி ஆஹ ‘‘அனதிரித்தப்பமாணா’’தி. ததோ பரம் பச்சுத்³த⁴ரித்வா விகப்பேதப்³பா³தி வஸ்ஸிகமாஸதோ பரம் அதி⁴ட்டா²னம் பச்சுத்³த⁴ரித்வா விகப்பேதப்³பா³, இமினா சதுன்னம் வஸ்ஸிகமாஸானம் உபரி அதி⁴ட்டா²னம் திட்ட²தீதி விஞ்ஞாயதி, அஸதோ பச்சுத்³த⁴ராயோகா³, யஞ்ச மாதிகாட்ட²கதா²யம் (கங்கா². அட்ட². கதி²னஸிக்கா²பத³வண்ணனா) ‘‘வஸ்ஸிகஸாடிகா வஸ்ஸானமாஸாதிக்கமேனாபி கண்டு³படிச்சா²தி³ ஆபா³த⁴வூபஸமேனாபி அதி⁴ட்டா²னம் விஜஹந்தீ’’தி வுத்தம், தம் ஸமந்தபாஸாதி³காயம் நத்தி², பரிவாரட்ட²கதா²யஞ்ச ‘‘அத்தா²பத்தி ஹேமந்தே ஆபஜ்ஜதி, நோ கி³ம்ஹே’’தி ஏத்த² ந தம் வுத்தம், கத்திகபுண்ணமாஸியா பச்சி²மே பாடிபத³தி³வஸே விகப்பேத்வா ட²பிதம் வஸ்ஸிகஸாடிகம் நிவாஸேந்தோ ஹேமந்தே ஆபஜ்ஜதி. குருந்தி³யம் பன ‘‘கத்திகபுண்ணமதி³வஸே அபச்சுத்³த⁴ரித்வா ஹேமந்தே ஆபஜ்ஜதீ’’தி வுத்தம், தம்பி ஸுவுத்தம். ‘‘சாதுமாஸம் அதி⁴ட்டா²தும், ததோ பரம் விகப்பேது’’ந்தி ஹி வுத்தம். தத்த² மஹாஅட்ட²கதா²யம் நிவாஸனபச்சயா து³க்கடம் வுத்தம், குருந்த³ட்ட²கதா²யம் பன அபச்சுத்³தா⁴ரபச்சயா, தஸ்மா குருந்தி³யம் வுத்தனயேனபி வஸ்ஸிகஸாடிகா வஸ்ஸானாதிக்கமேபி அதி⁴ட்டா²னம் ந விஜஹதீதி பஞ்ஞாயதி. அதி⁴ட்டா²னவிஜஹனேஸு ச வஸ்ஸானமாஸஆபா³தா⁴னம் விக³மே விஜஹனம் மாதிகாட்ட²கதா²யம்பி ந உத்³த⁴டம், தஸ்மா ஸமந்தபாஸாதி³காயம் (பாரா. அட்ட². 2.469) ஆக³தனயேன யாவ பச்சுத்³தா⁴ரா அதி⁴ட்டா²னம் திட்ட²தீதி க³ஹேதப்³ப³ம்.

நஹானத்தா²ய அனுஞ்ஞாதத்தா ‘‘வண்ணபே⁴த³மத்தரத்தாபி சேஸா வட்டதீ’’தி வுத்தம். த்³வே பன ந வட்டந்தீதி இமினா ஸங்கா⁴டிஆதீ³ஸுபி து³தியஅதி⁴ட்டா²னம் ந ருஹதி, தம் அதிரேகசீவரம் ஹோதீதி த³ஸ்ஸேதி. மஹாபச்சரியம் சீவரவஸேன பரிபோ⁴க³கிச்சஸ்ஸ அபா⁴வம் ஸந்தா⁴ய ‘‘அனாபத்தீ’’தி வுத்தா ஸேனாஸனபரிபோ⁴க³த்தா²ய தி³ன்னபச்சத்த²ரணே விய. யம் பன ‘‘பச்சத்த²ரணம்பி அதி⁴ட்டா²தப்³ப³’’ந்தி வுத்தம், தம் ஸேனாஸனத்தா²யேவாதி நியமிதம் ந ஹோதி நவஸு சீவரேஸு க³ஹிதத்தா, தஸ்மா அத்தனோ நாமேன அதி⁴ட்ட²ஹித்வா நித³ஹித்வா பரிக்கா²ரசோளம் விய யதா² ததா² வினியுஜ்ஜிதமேவாதி க³ஹேதப்³ப³ம், பாவாரோகோஜவோதி இமேஸம்பி பச்சத்த²ரணாதி³னா லோகேபி வோஹரணதோ ஸேனாஸனபரிக்கா²ரத்தா²ய தி³ன்னபச்சத்த²ரணதோ விஸும் க³ஹணம் கதம். ஸசே அவஸானே அபராவஸ்ஸிகஸாடிகா உப்பன்னா ஹோதி, புரிமவஸ்ஸிகஸாடிகம் பச்சுத்³த⁴ரித்வா விகப்பேத்வா அதி⁴ட்டா²தப்³பா³தி வத³ந்தி.

நிஸீத³னம்ஹி பமாணயுத்தந்தி ‘‘தீ³க⁴தோ ஸுக³தவித³த்தி²யா த்³வே வித³த்தி²யோ, வித்தா²ரதோ தி³யட்³ட⁴ம், த³ஸா வித³த்தீ²’’திஇமினா பமாணேன யுத்தம், தம் பன மஜ்ஜி²மபுரிஸஹத்த²ஸங்கா²தேன வட்³ட⁴கீஹத்தே²ன தீ³க⁴தோ திஹத்த²ம் ஹோதி, வித்தா²ரதோ ச²ளங்கு³லாதி⁴கத்³விஹத்த²ம், த³ஸா வித³த்தா²தி⁴கஹத்த²ம், இதா³னி மனுஸ்ஸானம் பகதிஹத்தே²ன தீ³க⁴தோ வித³த்தா²தி⁴கசதுஹத்த²ம் ஹோதி, வித்தா²ரதோ நவங்கு³லாதி⁴கதிஹத்த²ம், த³ஸா ச²ளங்கு³லாதி⁴கத்³விஹத்தா², ததோ ஊனம் வட்டதி, ந அதி⁴கம் ‘‘தம் அதிக்காமயதோ சே²த³னகம் பாசித்திய’’ந்தி (பாசி. 533) வுத்தத்தா. கண்டு³படிச்சா²தி³யா பமாணிகாதி ‘‘தீ³க⁴தோ சதஸ்ஸோ வித³த்தி²யோ ஸுக³தவித³த்தி²யா, திரியம் த்³வே வித³த்தி²யோ’’தி (பாசி. 538) வுத்தத்தா ஏவம் வுத்தப்பமாணயுத்தா, ஸா பன வட்³ட⁴கீஹத்தே²ன தீ³க⁴தோ ச²ஹத்தா² ஹோதி, வித்தா²ரதோ திஹத்தா², இதா³னி பகதிஹத்தே²ன பன தீ³க⁴தோ நவஹத்தா² ஹோதி, திரியதோ வித³த்தா²தி⁴கசதுஹத்தா²தி வேதி³தப்³பா³. விகப்பனூபக³பச்சி²மசீவரப்பமாணம் பரிக்கா²ரசோளந்தி ஏத்த² பன விகப்பனூபக³பச்சி²மசீவரப்பமாணம் நாம ஸுக³தங்கு³லேன தீ³க⁴தோ அட்ட²ங்கு³லம் ஹோதி, திரியதோ சதுரங்கு³லம், வட்³ட⁴கீஹத்தே²ன தீ³க⁴தோ ஏகஹத்த²ம் ஹோதி, திரியதோ வித³த்தி²ப்பமாணம், இதா³னி பகதிஹத்தே²ன பன தீ³க⁴தோ வித³த்தா²தி⁴கஹத்த²ம் ஹோதி, திரியதோ ச²ளங்கு³லாதி⁴கவித³த்தி²ப்பமாணம். தேனாஹ ‘‘தஸ்ஸ பமாண’’ந்திஆதி³.

பே⁴ஸஜ்ஜத்தா²யாதிஆதீ³ஸு அத்தனோ ஸந்தகபா⁴வதோ மோசேத்வா ட²பிதம் ஸந்தா⁴ய ‘‘அனதி⁴ட்டி²தேபி நத்தி² ஆபத்தீ’’தி வுத்தம், ‘‘இத³ம் பே⁴ஸஜ்ஜத்தா²ய, இத³ம் மாதுயா’’தி விப⁴ஜித்வா ஸகஸந்தகபா⁴வதோ மோசேத்வா ட²பேந்தேன அதி⁴ட்டா²னகிச்சம் நத்தீ²தி அதி⁴ப்பாயோ. ‘‘இமினா பே⁴ஸஜ்ஜம் சேதாபேஸ்ஸாமி, இத³ம் மாதுயா த³ஸ்ஸாமீ’’தி ட²பேந்தேன பன அதி⁴ட்டா²தப்³ப³மேவாதி வத³ந்தி. ஸேனாஸனபரிக்கா²ரத்தா²ய தி³ன்னபச்சத்த²ரணேதி ஏத்த² அனிவாஸேத்வா அபாருபித்வா கேவலம் மஞ்சபீடே²ஸுயேவ அத்த²ரித்வா பரிபு⁴ஞ்ஜியமானம் பச்சத்த²ரணம் அத்தனோ ஸந்தகம்பி அனதி⁴ட்டா²தும் வட்டதீதி வத³ந்தி, ஹேட்டா² பன பச்சத்த²ரணம்பி அதி⁴ட்டா²தப்³ப³மேவாதி அவிஸேஸேன வுத்தத்தா அத்தனோ ஸந்தகம் அதி⁴ட்டா²தப்³ப³மேவாதி அம்ஹாகம் க²ந்தி, வீமம்ஸித்வா க³ஹேதப்³ப³ம். தந்தே டி²தம்யேவ அதி⁴ட்டா²தப்³ப³ந்தி ஏத்த² பச்சா² வீதட்டா²னம் அதி⁴ட்டி²தமேவ ஹோதி, புன அதி⁴ட்டா²னகிச்சம் நத்தி². ஸசே பன பரிச்சே²த³ம் த³ஸ்ஸேத்வா அந்தரந்தரா வீதம் ஹோதி, புன அதி⁴ட்டா²தப்³ப³ந்தி வத³ந்தி. ஏஸேவ நயோதி விகப்பனூபக³ப்பமாணமத்தே வீதே தந்தே டி²தம்யேவ அதி⁴ட்டா²தப்³ப³ந்தி அத்தோ².

46. ‘‘ஹீனாயாவத்தனேனாதி ‘ஸிக்க²ம் அப்பச்சக்கா²ய கி³ஹிபா⁴வூபக³மனேனா’தி தீஸுபி க³ண்டி²பதே³ஸு வுத்தம், தம் யுத்தம் அஞ்ஞஸ்ஸ தா³னே விய சீவரே நிராலயபா⁴வேனேவ பரிச்சத்தத்தா. கேசி பன ‘ஹீனாயாவத்தனேனாதி பி⁴க்கு²னியா கி³ஹிபா⁴வூபக³மனேனேவாதி ஏதமத்த²ம் க³ஹேத்வா பி⁴க்கு² பன விப்³ப⁴மந்தோபி யாவ ஸிக்க²ம் ந பச்சக்கா²தி, தாவ பி⁴க்கு²யேவாதி அதி⁴ட்டா²னம் ந விஜஹதீ’தி வத³ந்தி, தம் ந க³ஹேதப்³ப³ம் ‘பி⁴க்கு²னியா ஹீனாயாவத்தனேனா’தி விஸேஸேத்வா அவுத்தத்தா. பி⁴க்கு²னியா ஹி கி³ஹிபா⁴வூபக³மனேன அதி⁴ட்டா²னவிஜஹனம் விஸும் வத்தப்³ப³ம் நத்தி² தஸ்ஸா விப்³ப⁴மனேனேவ அஸ்ஸமணீபா⁴வதோ. ஸிக்கா²பச்சக்கா²னேனாதி பன இத³ம் ஸசே பி⁴க்கு²லிங்கே³ டி²தோவ ஸிக்க²ம் பச்சக்கா²தி, தஸ்ஸ காயலக்³க³ம்பி சீவரம் அதி⁴ட்டா²னம் விஜஹதீதி த³ஸ்ஸனத்த²ம் வுத்த’’ந்தி ஸாரத்த²தீ³பனியம் (ஸாரத்த². டீ. 2.469) வுத்தம். விமதிவினோத³னியம் (வி. வி. டீ. 1.469) பன ‘‘ஹீனாயாவத்தனேனாதி இத³ம் அந்திமவத்து²ம் அஜ்ஜா²பஜ்ஜித்வா பி⁴க்கு²படிஞ்ஞாய டி²தஸ்ஸ சேவ தித்தி²யபக்கந்தஸ்ஸ ச பி⁴க்கு²னியா ச பி⁴க்கு²னிபா⁴வே நிரபேக்க²தாய கி³ஹிலிங்க³தித்தி²யலிங்க³க்³க³ஹணம் ஸந்தா⁴ய வுத்தம். ஸிக்க²ம் அப்பச்சக்கா²ய கி³ஹிபா⁴வூபக³மனம் ஸந்தா⁴ய வுத்தந்தி கேசி வத³ந்தி, தம் ந யுத்தம், ததா³பி தஸ்ஸ உபஸம்பன்னத்தா சீவரஸ்ஸ ச தஸ்ஸ ஸந்தகத்தா விஜஹனதோ’’தி வுத்தம், இதி இமானி த்³வே வசனானி அஞ்ஞமஞ்ஞவிருத்³தா⁴னி ஹுத்வா தி³ஸ்ஸந்தி.

அட்ட²கதா²யம் பன ‘‘ஹீனாயாவத்தனேன ஸிக்கா²பச்சக்கா²னேனா’’தி (பாரா. அட்ட². 2.469) விஸும் வுத்தத்தா ஹீனாயாவத்தந்தே ஸதி ஸிக்க²ம் அப்பச்சக்க²ந்தேபி சீவரம் அதி⁴ட்டா²னம் விஜஹதி, ஸிக்க²ம் பச்சக்க²ந்தே ஸதி ஹீனாய அனாவத்தந்தேபீதி அதி⁴ப்பாயோ தி³ஸ்ஸதி, தஸ்மா ஸிக்க²ம் அப்பச்சக்கா²ய கேவலம் கி³ஹிபா⁴வம் உபக³ச்ச²ந்தஸ்ஸ கிஞ்சாபி பி⁴க்கு²பா⁴வோ அத்தி², சீவரஸ்ஸ ச தஸ்ஸ ஸந்தகத்தா விஜஹனம், ததா²பி ‘‘ஹீனாயாவத்தனேனா’’தி வுத்தத்தா கி³ஹிபா⁴வூபக³மனேனேவ அதி⁴ட்டா²னவிஜஹனம் ஸியா யதா² தம் லிங்க³பரிவத்தனேன. கி³ஹிபா⁴வம் அனுபக³ந்த்வா ச கேவலம் ஸிக்கா²பச்சக்கா²னம் கரோந்தஸ்ஸ கிஞ்சாபி பி⁴க்கு²லிங்க³ம் அத்தி², சீவரஸ்ஸ ச தஸ்ஸ ஸந்தகத்தா விஜஹனம், ததா²பி ‘‘ஸிக்கா²பச்சக்கா²னேனா’’தி வுத்தத்தா ஸிக்கா²பச்சக்கா²னேனேவ அதி⁴ட்டா²னவிஜஹனம் ஸியா யதா² தம் பச்சுத்³த⁴ரணே, தஸ்மா பி⁴க்கு² வா ஹோது பி⁴க்கு²னீ வா, ஹீனாயாவத்திஸ்ஸாமீதி சித்தேன கி³ஹிலிங்க³க்³க³ஹணேன சீவரம் அதி⁴ட்டா²னம் விஜஹதி. ஸிக்கா²பச்சக்கா²னேன பன பி⁴க்கு²ஸ்ஸேவ சீவரம் பி⁴க்கு²னியா ஸிக்கா²பச்சக்கா²னாபா⁴வாதி அயமம்ஹாகம் க²ந்தி. அந்திமவத்து²அஜ்ஜா²பன்னகதித்தி²யபக்கந்தகானம் பன சீவரஸ்ஸ அதி⁴ட்டா²னவிஜஹனம் அட்ட²கதா²யம் அனாக³தத்தா தேஸஞ்ச ஹீனாயாவத்தானவோஹாராபா⁴வா விசாரேதப்³ப³ம்.

கனிட்ட²ங்கு³லினக²வஸேனாதி ஹேட்டி²மபரிச்சே²த³ம் த³ஸ்ஸேதி. ஓரதோ பரதோதி ஏத்த² ச ‘‘ஓரதோ சி²த்³த³ம் அதி⁴ட்டா²னம் பி⁴ந்த³தி, பரதோ ந பி⁴ந்த³தீ’’தி வுத்தம். கத²ம் ஓரபரபா⁴வோ வேதி³தப்³போ³தி? யதா² நதீ³பரிச்சி²ன்னே பதே³ஸே மனுஸ்ஸானம் வஸனதி³ஸாபா⁴கே³ தீரம் ஓரிமம் நாம ஹோதி, இதரதி³ஸாபா⁴கே³ தீரம் பாரிமம் நாம, ததா² பி⁴க்கூ²னம் நிவாஸனபாருபனட்டா²னபூ⁴தம் சீவரஸ்ஸ மஜ்ஜ²ட்டா²னம் யதா²வுத்தவித³த்தி²ஆதி³ப்பமாணஸ்ஸ பதே³ஸஸ்ஸ ஓரம் நாம, சீவரபரியந்தட்டா²னம் பரம் நாம, இதி லோகதோ வா யதா² ச ஓரதோ போ⁴க³ம் பரதோ அந்தம் கத்வா சீவரம் ட²பேதப்³ப³ந்தி வுத்தே பி⁴க்கு²னோ அபி⁴முக²ட்டா²னம் ஓரம் நாம, இதரட்டா²னம் பரம் நாம, ஏவம் பி⁴க்கூ²னம் நிவாஸனபாருபனட்டா²னம் ஓரம் நாம, இதரம் பரம் நாம. ஏவம் ஸாஸனதோ வா ஓரபரபா⁴வோ வேதி³தப்³போ³. தேனேவ யோ பன து³ப்³ப³லட்டா²னே பட²மம் அக்³க³ளம் த³த்வா பச்சா² து³ப்³ப³லட்டா²னம் சி²ந்தி³த்வா அபனேதி, அதி⁴ட்டா²னம் ந பி⁴ஜ்ஜதி. மண்ட³லபரிவத்தனேபி ஏஸேவ நயோதி ஸகலஸ்மிம் சீவரே அதி⁴ட்டா²னபி⁴ஜ்ஜனாபி⁴ஜ்ஜனபா⁴வோ த³ஸ்ஸிதோ. தேன வுத்தம் விமதிவினோத³னியம் (வி. வி. டீ. 1.469) ‘‘ஏஸ நயோதி இமினா பமாணயுத்தேஸு யத்த² கத்த²சி சி²த்³தே³ அதி⁴ட்டா²னம் விஜஹதீதிஆதி³அத்த²ம் ஸங்க³ண்ஹாதீ’’தி.

கு²த்³த³கம் சீவரந்தி முட்டி²பஞ்சகாதி³பே⁴த³ப்பமாணதோ அனூனமேவ கு²த்³த³கசீவரம். மஹந்தம் வா கு²த்³த³கம் கரோதீதி ஏத்த² திண்ணம் சீவரானம் சதூஸு பஸ்ஸேஸு யஸ்மிம் பதே³ஸே சி²த்³த³ம் அதி⁴ட்டா²னம் ந விஜஹதி, தஸ்மிம் பதே³ஸே ஸமந்ததோ சி²ந்தி³த்வா கு²த்³த³கம் கரோந்தஸ்ஸ அதி⁴ட்டா²னம் ந விஜஹதீதி அதி⁴ப்பாயோ. விமதிவினோத³னியம் பன வுத்தம் ‘‘மஹந்தம் வா கு²த்³த³கம் வா கரோதீதி ஏத்த² அதிமஹந்தம் சீவரம் முட்டி²பஞ்சகாதி³பச்சி²மப்பமாணயுத்தம் கத்வா ஸமந்ததோ சி²ந்த³னேனபி விச்சி²ந்த³னகாலே சி²ஜ்ஜமானட்டா²னம் சி²த்³த³ஸங்க²ம் ந க³ச்ச²தி, அதி⁴ட்டா²னம் ந விஜஹதி ஏவாதி ஸிஜ்ஜ²தி, ‘க⁴டேத்வா சி²ந்த³தி ந பி⁴ஜ்ஜதீ’தி வசனேன ச ஸமேதி. பரிக்கா²ரசோளம் பன விகப்பனூபக³பச்சி²மப்பமாணதோ ஊனம் கத்வா சி²த்³த³ம் அதி⁴ட்டா²னம் விஜஹதி அதி⁴ட்டா²னஸ்ஸ அனிஸ்ஸயத்தா, தானி புன ப³த்³தா⁴னி க⁴டிதானி புன அதி⁴ட்டா²தப்³ப³மேவாதி வேதி³தப்³ப³ம். கேசி பன ‘வஸ்ஸிகஸாடிகசீவரே த்³விதா⁴ சி²ன்னே யதி³பி ஏகேகம் க²ண்ட³ம் பச்சி²மப்பமாணம் ஹோதி, ஏகஸ்மிம்யேவ க²ண்டே³ அதி⁴ட்டா²னம் திட்ட²தி, ந இதரஸ்மிம், த்³வே பன ந வட்டந்தீ’தி வுத்தத்தா நிஸீத³னகண்டு³படிச்சா²தீ³ஸுபி ஏஸேவ நயோதி வத³ந்தீ’’தி.

47. ஸம்முகே² பவத்தா ஸம்முகா²தி பச்சத்தவசனம், தஞ்ச விகப்பனாவிஸேஸனம், தஸ்மா ‘‘ஸம்முகே²’’தி பு⁴ம்மத்தே² நிஸ்ஸக்கவசனம் கத்வாபி அத்த²ம் வத³ந்தி, அபி⁴முகே²தி அத்தோ². அத² வா ஸம்முகே²ன அத்தனோ வாசாய ஏவ விகப்பனா ஸம்முகா²விகப்பனா. பரம்முகே²ன விகப்பனா பரம்முகா²விகப்பனாதி கரணத்தே²னபி அத்தோ² த³ட்ட²ப்³போ³. அயமேவ பாளியா ஸமேதி. ஸன்னிஹிதாஸன்னிஹிதபா⁴வந்தி ஆஸன்னதூ³ரபா⁴வம். ஏத்தாவதா நிதே⁴தும் வட்டதீதி ஏத்தகேனேவ விகப்பனாகிச்சஸ்ஸ நிட்டி²தத்தா அதிரேகசீவரம் ந ஹோதீதி த³ஸாஹாதிக்கமே நிஸ்ஸக்³கி³யம் ந ஜனேதீதி அதி⁴ப்பாயோ. பரிபு⁴ஞ்ஜிதும்…பே… ந வட்டதீதி ஸயம் அபச்சுத்³தா⁴ரணபரிபு⁴ஞ்ஜனே பாசித்தியம், அதி⁴ட்ட²ஹனே பரேஸம் விஸ்ஸஜ்ஜனே ச து³க்கடஞ்ச ஸந்தா⁴ய வுத்தம். பரிபோ⁴கா³த³யோபி வட்டந்தீதி பரிபோ⁴க³விஸ்ஸஜ்ஜனஅதி⁴ட்டா²னானி வட்டந்தி. அபி-ஸத்³தே³ன நிதே⁴தும்பி வட்டதீதி அத்தோ². ஏதேன பச்சுத்³தா⁴ரேபி கதே சீவரம் அதி⁴ட்டா²துகாமேன விகப்பிதசீவரமேவ ஹோதி, ந அதிரேகசீவரம், தம் பன திசீவராதி³னாமேன அதி⁴ட்டா²துகாமேன அதி⁴ட்ட²ஹிதப்³ப³ம், இதரேன விகப்பிதசீவரமேவ கத்வா பரிபு⁴ஞ்ஜிதப்³ப³ந்தி த³ஸ்ஸேதி.

கேசி பன ‘‘யம் விகப்பிதசீவரம், தம் யாவ பரிபோ⁴க³காலா அபச்சுத்³த⁴ராபேத்வா நித³ஹேதப்³ப³ம், பரிபோ⁴க³காலே பன ஸம்பத்தே பச்சுத்³த⁴ராபேத்வா அதி⁴ட்ட²ஹித்வா பரிபு⁴ஞ்ஜிதப்³ப³ம். யதி³ ஹி ததோ புப்³பே³பி பச்சுத்³த⁴ராபேய்ய, பச்சுத்³தா⁴ரேனேவ விகப்பனாய விக³தத்தா அதிரேகசீவரம் நாம ஹோதி, த³ஸாஹாதிக்கமே பத்தேவ நிஸ்ஸக்³கி³யம், தஸ்மா யம் அபரிபு⁴ஞ்ஜித்வா ட²பேதப்³ப³ம், ததே³வ விகப்பேதப்³ப³ம். பச்சுத்³தா⁴ரே ச கதே அந்தோத³ஸாஹேயேவ அதி⁴ட்டா²தப்³ப³ம். யஞ்ச அட்ட²கதா²யம் (பாரா. அட்ட². 2.469) ‘ததோ பரம் பரிபோ⁴கா³தி³ வட்டதீ’திஆதி³ வுத்தம், தம் பாளியா விருஜ்ஜ²தீ’’தி வத³ந்தி, தம் தேஸம் மதிமத்தமேவ. பாளியஞ்ஹி ‘‘அந்தோத³ஸாஹம் அதி⁴ட்டே²தி விகப்பேதீ’’தி (பாரா. 469) ச ‘‘ஸாமம் சீவரம் விகப்பேத்வா அபச்சுத்³தா⁴ரணம் பரிபு⁴ஞ்ஜேய்ய பாசித்திய’’ந்தி (பாசி. 373) ச ‘‘அனாபத்தி ஸோ வா தே³தி, தஸ்ஸ வா விஸ்ஸாஸந்தோ பரிபு⁴ஞ்ஜதீ’’தி (பாசி. 376) ச ஸாமஞ்ஞதோ வுத்தத்தா, அட்ட²கதா²யஞ்ச (பாரா. அட்ட². 2.469) ‘‘இமம் சீவரம் வா விகப்பனம் வா பச்சுத்³த⁴ராமீ’’திஆதி³னா பச்சுத்³தா⁴ரம் அத³ஸ்ஸேத்வா ‘‘மய்ஹம் ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் கரோஹீ’’தி ஏவம் அத்தனோ ஸந்தகத்தம் அமோசேத்வாவ பரிபோ⁴கா³தி³வஸேன பச்சுத்³தா⁴ரஸ்ஸ வுத்தத்தா, ‘‘ததோ பபு⁴தி பரிபோ⁴கா³த³யோபி வட்டந்தீ’’தி அதி⁴ட்டா²னம் வினாபி விஸும் பரிபோ⁴க³ஸ்ஸ நிதா⁴னஸ்ஸ ச வுத்தத்தா விகப்பனானந்தரமேவ பச்சுத்³த⁴ராபேத்வா அனதி⁴ட்ட²ஹித்வா ஏவ ச திசீவரரஹிதம் விகப்பனாரஹம் சீவரம் பரிபு⁴ஞ்ஜிதுஞ்ச நித³ஹிதுஞ்ச இத³ம் பாடேக்கம் வினயகம்மந்தி கா²யதி. அபிச ப³ஹூனம் பத்தானம் விகப்பேதும் பச்சுத்³த⁴ரேதுஞ்ச வுத்தத்தா பச்சுத்³தா⁴ரே தேஸம் அதிரேகபத்ததா த³ஸ்ஸிதாதி ஸிஜ்ஜ²தி தேஸு ஏகஸ்ஸேவ அதி⁴ட்டா²தப்³ப³தோ, தஸ்மா அட்ட²கதா²யம் ஆக³தனயேனேவ க³ஹேதப்³ப³ம்.

மித்தோதி த³ள்ஹமித்தோ. ஸந்தி³ட்டோ²தி தி³ட்ட²மத்தோ, ந த³ள்ஹமித்தோ. பஞ்ஞத்திகோவிதோ³ ந ஹோதீதி ஏவம் விகப்பிதே அனந்தரமேவ ஏவம் பச்சுத்³த⁴ரிதப்³ப³ந்தி வினயகம்மம் ந ஜானாதி. தேனாஹ ‘‘ந ஜானாதி பச்சுத்³த⁴ரிது’’ந்தி. இமினாபி சேதம் வேதி³தப்³ப³ம் ‘‘விகப்பனாஸமனந்தரமேவ பச்சுத்³தா⁴ரோ காதப்³போ³’’தி. விகப்பிதவிகப்பனா நாமேஸா வட்டதீதி அதி⁴ட்டி²தஅதி⁴ட்டா²னம் வியாதி அதி⁴ப்பாயோ.

48. ஏவம் சீவரே அதி⁴ட்டா²னவிகப்பனானயம் த³ஸ்ஸேத்வா இதா³னி பத்தே அதி⁴ட்டா²னவிகப்பனானயம் த³ஸ்ஸேந்தோ ‘‘பத்தே பனா’’திஆதி³மாஹ. தத்த² பததி பிண்ட³பாதோ ஏத்தா²தி பத்தோ, ஜினஸாஸனபா⁴வோ பி⁴க்கா²பா⁴ஜனவிஸேஸோ. வுத்தஞ்ஹி ‘‘பத்தம் பக்கே² த³லே பத்தோ, பா⁴ஜனே ஸோ க³தே திஸூ’’தி, தஸ்மிம் பத்தே. பனாதி பக்க²ந்தரத்தே² நிபாதோ. நயோதி அதி⁴ட்டா²னவிகப்பனானயோ. சீவரே வுத்தஅதி⁴ட்டா²னவிகப்பனானயதோ அஞ்ஞபூ⁴தோ அயம் வக்க²மானோ பத்தே அதி⁴ட்டா²னவிகப்பனானயோ வேதி³தப்³போ³தி யோஜனா. பத்தம் அதி⁴ட்ட²ஹந்தேன பமாணயுத்தோவ அதி⁴ட்டா²தப்³போ³, ந அப்பமாணயுத்தோதி ஸம்ப³ந்தோ⁴. தேன பமாணதோ ஊனாதி⁴கே பத்தே அதி⁴ட்டா²னம் ந ருஹதி, தஸ்மா தாதி³ஸம் பத்தம் பா⁴ஜனபரிபோ⁴கே³ன பரிபு⁴ஞ்ஜிதப்³ப³ந்தி த³ஸ்ஸேதி. வக்க²தி ஹி ‘‘ஏதே பா⁴ஜனபரிபோ⁴கே³ன பரிபு⁴ஞ்ஜிதப்³பா³, ந அதி⁴ட்டா²னூபகா³ ந விகப்பனூபகா³’’தி.

த்³வே மக³த⁴னாளியோதி ஏத்த² மக³த⁴னாளி நாம யா மாக³தி⁴காய துலாய அட்³ட⁴தேரஸபலபரிமிதம் உத³கம் க³ண்ஹாதி. ஸீஹளதீ³பே பகதினாளிதோ கு²த்³த³கா ஹோதி, த³மிளனாளிதோ பன மஹந்தா. வுத்தஞ்ஹேதம் ஸமந்தபாஸாதி³காயம் (பாரா. அட்ட². 2.602) ‘‘மக³த⁴னாளி நாம அட்³ட⁴தேரஸபலா ஹோதீதி அந்த⁴கட்ட²கதா²யம் வுத்தம். ஸீஹளதீ³பே பகதினாளி மஹந்தா, த³மிளனாளி கு²த்³த³கா, மக³த⁴னாளிபமாணயுத்தா, தாய மக³த⁴னாளியா தி³யட்³ட⁴னாளி ஏகா ஸீஹளனாளி ஹோதீதி மஹாஅட்ட²கதா²யம் வுத்த’’ந்தி. அத² வா மக³த⁴னாளி நாம யா பஞ்ச குடு³வானி ஏகஞ்ச முட்டி²ம் ஏகாய ச முட்டி²யா ததியபா⁴க³ம் க³ண்ஹாதி. வுத்தஞ்ஹேதம் ஸாரத்த²தீ³பனியம் (ஸாரத்த². டீ. 2.598-602) ‘‘மக³த⁴னாளி நாம ச²பஸதா நாளீதி கேசி. ‘அட்ட²பஸதா’தி அபரே. தத்த² புரிமானம் மதேன திபஸதாய நாளியா த்³வே நாளியோ ஏகா மக³த⁴னாளி ஹோதி. பச்சி²மானம் சதுபஸதாய நாளியா த்³வே நாளியோ ஏகா மக³த⁴னாளி. ஆசரியத⁴ம்மபாலத்தே²ரேன பன பகதியா சதுமுட்டி²கம் குடு³வம், சதுகுடு³வம் நாளிகம், தாய நாளியா ஸோளஸ நாளியோ தோ³ணம், தம் பன மக³த⁴னாளியா த்³வாத³ஸ நாளியோ ஹோந்தீதி வுத்தம், தஸ்மா தேன நயேன மக³த⁴னாளி நாம பஞ்ச குடு³வானி ஏகஞ்ச முட்டி²ம் ஏகாய முட்டி²யா ததியபா⁴க³ஞ்ச க³ண்ஹாதீதி வேதி³தப்³ப³’’ந்தி. தத்த² குடு³வோதி பஸதோ. வுத்தஞ்ஹி அபி⁴தா⁴னப்பதீ³பிகாயம் –

‘‘குடு³வோ பஸதோ ஏகோ;

பத்தோ² தே சதுரோ ஸியும்;

ஆள்ஹகோ சதுரோ பத்தா²;

தோ³ணம் வா சதுராள்ஹக’’ந்தி.

அத² வா மக³த⁴னாளி நாம யா சதுகுடு³வாய நாளியா சதஸ்ஸோ நாளியோ க³ண்ஹாதி. வுத்தஞ்ஹேதம் விமதிவினோத³னியம் (வி. வி. டீ. 1.602) ‘‘த³மிளனாளீதி புராணகனாளிம் ஸந்தா⁴ய வுத்தம். ஸா ச சதுமுட்டி²கேஹி குடு³வேஹி அட்ட²குடு³வா, தாய நாளியா த்³வே நாளியோ மக³த⁴னாளி க³ண்ஹாதி, புராணா பன ஸீஹளனாளி திஸ்ஸோ நாளியோ க³ண்ஹாதீதி வத³ந்தி, தேஸம் மதேன மக³த⁴னாளி இதா³னி வத்தமானாய சதுகுடு³வாய த³மிளனாளியா சதுனாளிகா ஹோதி, ததோ மக³த⁴னாளிதோ உபட்³ட⁴ஞ்ச புராணத³மிளனாளிஸங்கா²தம் பத்த²ம் நாம ஹோதி, ஏதேன ச ஓமகோ நாம பத்தோ பத்தோ²த³னம் க³ண்ஹாதீதி பாளிவசனம் ஸமேதி. லோகியேஹிபி –

‘லோகியம் மக³த⁴ஞ்சேதி, பத்த²த்³வயமுதா³ஹடம்;

லோகியம் ஸோளஸபலம், மாக³த⁴ம் தி³கு³ணம் மத’ந்தி. (வி. வி. டீ. 1.602) –

ஏவம் லோகே நாளியா மக³த⁴னாளி தி³கு³ணாதி த³ஸ்ஸிதா. ஏவஞ்ச க³ய்ஹமானே ஓமகபத்தஸ்ஸ ச யாபனமத்தோத³னகா³ஹிகா ச ஸித்³தா⁴ ஹோதி. ந ஹி ஸக்கா அட்ட²குடு³வதோ ஊனோத³னகா³ஹினா பத்தேன அதூ²பீகதம் பிண்ட³பாதம் பரியேஸித்வா யாபேதும். தேனேவ வுத்தம் வேரஞ்ஜகண்ட³ட்ட²கதா²யம் ‘பத்தோ² நாம நாளிமத்தம் ஹோதி, ஏகஸ்ஸ புரிஸஸ்ஸ அலம் யாபனாயா’தி’’. வுத்தம்பி ஹேதம் ஜாதகட்ட²கதா²யம் (ஜா. அட்ட². 5.21.192) ‘‘பத்தோ²த³னோ நாலமயம் து³வின்ன’’ந்தி, ‘‘ஏகஸ்ஸ தி³ன்னம் த்³வின்னம் திண்ணம் பஹோதீ’’தி ச, தஸ்மா இத⁴ வுத்தனயானுஸாரேன க³ஹேதப்³ப³ந்தி. ஆலோபஸ்ஸ ஆலோபஸ்ஸ அனுரூபந்தி ஓத³னஸ்ஸ சதுபா⁴க³மத்தம். வுத்தஞ்ஹேதம் மஜ்ஜி²மனிகாயே ப்³ரஹ்மாயுஸுத்தஸம்வண்ணனாயம் (ம. நி. அட்ட². 2.387) ‘‘ப்³யஞ்ஜனஸ்ஸ மத்தா நாம ஓத³னசதுத்த²பா⁴கோ³’’தி. ஓத³னக³திகானீதி ஓத³னஸ்ஸ க³தி க³தி யேஸம் தானி ஓத³னக³திகானி. க³தீதி ச ஓகாஸோ ஓத³னஸ்ஸ அந்தோபவிஸனஸீலத்தா ஓத³னஸ்ஸ ஓகாஸோயேவ தேஸம் ஓகாஸோ ஹோதி, ந அஞ்ஞம் அத்தனோ ஓகாஸம் க³வேஸந்தீதி அத்தோ². பா⁴ஜனபரிபோ⁴கே³னாதி உத³காஹரணாதி³னா பா⁴ஜனபரிபோ⁴கே³ன.

ஏவம் பமாணதோ அதி⁴ட்டா²னூபக³விகப்பனூபக³பத்தம் த³ஸ்ஸேத்வா இதா³னி பாகதோ மூலதோ ச தம் த³ஸ்ஸேதும் ‘‘பமாணயுத்தானம்பீ’’திஆதி³மாஹ. தத்த² அயோபத்தோ பஞ்சஹி பாகேஹி பத்தோதி கம்மாரபக்கம்யேவ அனதி⁴ட்ட²ஹித்வா ஸமணஸாருப்பனீலவண்ணகரணத்தா²ய புனப்புனம் நானாஸம்பா⁴ரேஹி பசிதப்³போ³, அயோபத்தஸ்ஸ அதிகக்க²ளத்தா கம்மாரபாகேன ஸத்³தி⁴ம் பஞ்சவாரபக்கோயேவ ஸமணஸாருப்பனீலவண்ணோ ஹோதி. மத்திகாபத்தோ த்³வீஹி பாகேஹி பக்கோதி ஏத்தா²பி ஏஸேவ நயோ. தஸ்ஸ பன முது³கத்தா கும்ப⁴காரகபாகேன ஸத்³தி⁴ம் த்³விவாரபக்கோபி ஸமணஸாருப்பனீலவண்ணோ ஹோதி. ஏவம் கதோயேவ ஹி பத்தோ அதி⁴ட்டா²னூபகோ³ விகப்பனூபகோ³ ச ஹோதி, நாகதோ. தேன வக்க²தி ‘‘பாகே ச மூலே ச ஸுனிட்டி²தேயேவ அதி⁴ட்டா²னூபகோ³ ஹோதி. யோ அதி⁴ட்டா²னூபகோ³, ஸ்வேவ விகப்பனூபகோ³’’தி (வி. ஸங்க³. அட்ட². 48). ஸோ ஹத்த²ம் ஆக³தோபி அனாக³தோபி அதி⁴ட்டா²தப்³போ³ விகப்பேதப்³போ³தி ஏதேன தூ³ரே டி²தம்பி அதி⁴ட்டா²தும் விகப்பேதுஞ்ச லப⁴தி, ட²பிதட்டா²னஸல்லக்க²ணமேவ பமாணந்தி த³ஸ்ஸேதி. இதா³னி தமேவத்த²ம் வித்தா²ரேதுமாஹ ‘‘யதி³ ஹீ’’திஆதி³. ஹி-ஸத்³தோ³ வித்தா²ரஜோதகோ. தத்த² பசித்வா ட²பேஸ்ஸாமீதி காளவண்ணபாகம் ஸந்தா⁴ய வுத்தம்.

இதா³னி பத்தாதி⁴ட்டா²னம் த³ஸ்ஸேதுமாஹ ‘‘தத்த² த்³வே பத்தஸ்ஸ அதி⁴ட்டா²னா’’திஆதி³. தத்த² ஸாமந்தவிஹாரேதி இத³ம் உபலக்க²ணவஸேன வுத்தம், ததோ தூ³ரே டி²தம்பி அதி⁴ட்டா²தப்³ப³மேவ. ட²பிதட்டா²னம் ஸல்லக்கே²த்வாதி இத³ம்பி உபசாரமத்தம், பத்தஸல்லக்க²ணமேவேத்த² பமாணம்.

இதா³னி அதி⁴ட்டா²னவிஜஹனம் த³ஸ்ஸேதும் ‘‘ஏவம் அப்பமத்தஸ்ஸ’’த்யாதி³மாஹ. தத்த² பத்தே வா சி²த்³த³ம் ஹோதீதி முக²வட்டிதோ ஹேட்டா² த்³வங்கு³லமத்தோகாஸதோ பட்டா²ய யத்த² கத்த²சி சி²த்³த³ம் ஹோதி.

ஸத்தன்னம் த⁴ஞ்ஞானந்தி –

‘‘ஸாலி வீஹி ச குத்³ரூஸோ;

கோ³தூ⁴மோ வரகோ யவோ;

கங்கூ³தி ஸத்த த⁴ஞ்ஞானி;

நீவாராதீ³ து தப்³பி⁴தா³’’தி. –

வுத்தானம் ஸத்தவிதா⁴னம் த⁴ஞ்ஞானம்.

49. ஏவம் பத்தாதி⁴ட்டா²னம் த³ஸ்ஸேத்வா இதா³னி பத்தவிகப்பனம் த³ஸ்ஸேதும் ‘‘விகப்பனே பனா’’திஆதி³மாஹ. தம் சீவரவிகப்பனே வுத்தனயேனேவ வேதி³தப்³ப³ம்.

50. ஏவம் விகப்பனானயம் த³ஸ்ஸேத்வா இதா³னி பத்தே பி⁴ன்னே கத்தப்³ப³விதி⁴ம் த³ஸ்ஸேதுமாஹ ‘‘ஏவம் அதி⁴ட்ட²ஹித்வா’’இச்சாதி³. தத்த² அபத்தோதி இமினா அதி⁴ட்டா²னவிஜஹனம்பி த³ஸ்ஸேதி. பஞ்சப³ந்த⁴னேபி பத்தே அபரிபுண்ணபாகே பத்தே விய அதி⁴ட்டா²னம் ந ருஹதி. ‘‘திபுபட்டேன வா’’தி வுத்தத்தா தம்ப³லோஹாதி³கப்பியலோஹேஹி அயோபத்தஸ்ஸ சி²த்³த³ம் சா²தே³தும் வட்டதி. தேனேவ ‘‘லோஹமண்ட³லகேனா’’தி வுத்தம். ஸுத்³தே⁴ஹி…பே… ந வட்டதீதி இத³ம் உண்ஹபோ⁴ஜனே பக்கி²த்தே விலீயமானத்தா வுத்தம். பா²ணிதம் ஜா²பேத்வா பாஸாணசுண்ணேன ப³ந்தி⁴தும் வட்டதீதி பாஸாணசுண்ணேன ஸத்³தி⁴ம் பா²ணிதம் பசித்வா ததா²பக்கேன பாஸாணசுண்ணேன ப³ந்தி⁴தும் வட்டதி. அபரிபோ⁴கே³னாதி அயுத்தபரிபோ⁴கே³ன. ‘‘அனுஜானாமி பி⁴க்க²வே ஆதா⁴ரக’’ந்தி வுத்தத்தா மஞ்சபீடா²தீ³ஸு யத்த² கத்த²சி ஆதா⁴ரகம் ட²பேத்வா தத்த² பத்தம் ட²பேதும் வட்டதி ஆதா⁴ரகட்ட²பனோகாஸஸ்ஸ அனியமிதத்தாதி வத³ந்தி.

இதி வினயஸங்க³ஹஸம்வண்ணனாபூ⁴தே வினயாலங்காரே

அதி⁴ட்டா²னவிகப்பனவினிச்ச²யகதா²லங்காரோ நாம

அட்ட²மோ பரிச்சே²தோ³.