6. மச்ச²மம்ஸவினிச்ச²யகதா²

38. ஏவம் குலஸங்க³ஹவினிச்ச²யம் கதே²த்வா இதா³னி மச்ச²மம்ஸவினிச்ச²யம் கதே²தும் ‘‘மச்ச²மம்ஸேஸு பனா’’திஆதி³ வுத்தம். தத்த² த²லே ட²பிதமத்தே மரதி, கேவட்டாதீ³ஹி வா மாரியதீதி மச்சோ². மச்ச²ஸ்ஸ இத³ந்தி மச்ச²ம், மஸியதே ஆமஸியதேதி மம்ஸம், மச்ச²ஞ்ச மம்ஸஞ்ச மச்ச²மம்ஸானி, தேஸு. மச்ச²மம்ஸேஸு பன வினிச்ச²யோ ஏவம் வேதி³தப்³போ³தி யோஜனா. மச்ச²க்³க³ஹணேனாதி ஏத்த² நித்³தா⁴ரணம் ந காதப்³ப³ம். பன-ஸத்³தோ³ பக்க²ந்தரத்தோ², தி³வாஸேய்யாதீ³ஸு வினிச்ச²யதோ அபரோ மச்ச²மம்ஸேஸு வினிச்ச²யோ வேதி³தப்³போ³தி அத்தோ². க³ய்ஹதே அனேனாதி க³ஹணம். கிம் தம்? ஸத்³தோ³, மச்ச²இதி க³ஹணம் மச்ச²க்³க³ஹணம், தேன மச்ச²க்³க³ஹணேன, மச்ச²ஸத்³தே³னாதி அத்தோ². மம்ஸேஸு பன…பே… அகப்பியானீதி ஏத்த² மனுஸ்ஸமம்ஸம் ஸமானஜாதிமம்ஸதோ படிக்கி²த்தம். ஹத்தி²அஸ்ஸானம் மம்ஸானி ராஜங்க³தோ, ஸுனக²அஹீனம் ஜேகு³ச்ச²பா⁴வதோ, ஸேஸானம் வாளமிக³த்தா பி⁴க்கூ²னம் பரிப³ந்த⁴விமோசனத்த²ம் படிக்கி²த்தந்தி த³ட்ட²ப்³ப³ம்.

திகோடிபரிஸுத்³த⁴ந்தி தி³ட்ட²ஸுதபரிஸங்கிதஸங்கா²தாஹி தீஹி கோடீஹி தீஹி ஆகாரேஹி தீஹி காரணேஹி பரிஸுத்³த⁴ம், விமுத்தந்தி அத்தோ². தத்த² அதி³ட்ட²அஸுதானி சக்கு²விஞ்ஞாணஸோதவிஞ்ஞாணானம் அனாரம்மணபா⁴வதோ ஜானிதப்³பா³னி. அபரிஸங்கிதம் பன கத²ம் ஜானிதப்³ப³ந்தி ஆஹ ‘‘அபரிஸங்கிதம் பனா’’திஆதி³, தீணி பரிஸங்கிதானி ஞத்வா தேஸம் படிபக்க²வஸேன அபரிஸங்கிதம் ஜானிதப்³ப³ந்தி அத்தோ². இதா³னி தானி தீணி பரிஸங்கிதானி ச ஏவம் பரிஸங்கிதே ஸதி பி⁴க்கூ²ஹி கத்தப்³ப³விதி⁴ஞ்ச தேன விதி⁴னா அபரிஸங்கிதே ஸதி கத்தப்³ப³பா⁴வஞ்ச வித்தா²ரதோ த³ஸ்ஸேதும் ‘‘கத²’’ந்திஆதி³மாஹ. தத்த² தி³ஸ்வா பரிஸங்கிதம் தி³ட்ட²பரிஸங்கிதம் நாம. ஸுத்வா பரிஸங்கிதம் ஸுதபரிஸங்கிதம் நாம. அதி³ஸ்வா அஸுத்வா தக்கேன அனுமானேன பரிஸங்கிதம் தது³ப⁴யவினிமுத்தபரிஸங்கிதம் நாம. தம் திவித⁴ம்பி பரிஸங்கிதஸாமஞ்ஞேன ஏகா கோடி ஹோதி, ததோ விமுத்தம் அபரிஸங்கிதம் நாம. ஏவம் அதி³ட்ட²ம் அஸுதம் அபரிஸங்கிதம் மச்ச²மம்ஸம் திகோடிபரிஸுத்³த⁴ம் ஹோதி.

ஜாலம் மச்ச²ப³ந்த⁴னம். வாகு³ரா மிக³ப³ந்தி⁴னீ. கப்பதீதி யதி³ தேஸம் வசனேன ஸங்கா நிவத்ததி, வட்டதி, ந தம் வசனம் லேஸகப்பம் காதும் வட்டதி. தேனேவ வக்க²தி ‘‘யத்த² ச நிப்³பே³மதிகோ ஹோதி, தம் ஸப்³ப³ம் கப்பதீ’’தி. பவத்தமம்ஸந்தி ஆபணாதீ³ஸு பவத்தம் விக்காயிகம் வா மதமம்ஸம் வா. மங்க³லாதீ³னந்தி ஆதி³-ஸத்³தே³ன ஆஹுனபாஹுனாதி³கே ஸங்க³ண்ஹாதி. பி⁴க்கூ²னம்யேவ அத்தா²ய அகதந்தி ஏத்த² அட்டா²னப்பயுத்தோ ஏவ-ஸத்³தோ³, பி⁴க்கூ²னம் அத்தா²ய அகதமேவாதி ஸம்ப³ந்தி⁴தப்³ப³ம், தஸ்மா பி⁴க்கூ²னஞ்ச மங்க³லாதீ³னஞ்சாதி மிஸ்ஸேத்வா கதம்பி ந வத்ததீதி வேதி³தப்³ப³ம். கேசி பன ‘‘யதா²டி²தவஸேன அவதா⁴ரணம் க³ஹேத்வா வட்டதீ’’தி வத³ந்தி, தம் ந ஸுந்த³ரம். யத்த² ச நிப்³பே³மதிகோ ஹோதீதி பி⁴க்கூ²னம் அத்தா²ய கதேபி ஸப்³பே³ன ஸப்³ப³ம் பரிஸங்கிதாபா⁴வமாஹ.

39. தமேவத்த²ம் ஆவிகாதும் ‘‘ஸசே பனா’’திஆதி³ வுத்தம். இதரேஸம் வட்டதீதி அஜானந்தானம் வட்டதி, ஜானதோவேத்த² ஆபத்தி ஹோதீதி. தேயேவாதி யே உத்³தி³ஸ்ஸ கதம், தேயேவ. உத்³தி³ஸ்ஸ கதமம்ஸபரிபோ⁴க³தோ அகப்பியமம்ஸபரிபோ⁴கே³ விஸேஸம் த³ஸ்ஸேதும் ‘‘அகப்பியமம்ஸம் பனா’’திஆதி³ வுத்தம். புரிமஸ்மிம் ஸசித்தகாபத்தி, இதரஸ்மிம் அசித்தகா. தேனாஹ ‘‘அகப்பியமம்ஸம் அஜானித்வா பு⁴ஞ்ஜந்தஸ்ஸபி ஆபத்தியேவா’’தி. ‘‘பரிபோ⁴க³காலே புச்சி²த்வா பரிபு⁴ஞ்ஜிஸ்ஸாமீதி வா க³ஹேத்வா புச்சி²த்வாவ பரிபு⁴ஞ்ஜிதப்³ப³’’ந்தி (வி. ஸங்க³. அட்ட². 39) வசனதோ அகப்பியமம்ஸம் அஜானித்வா படிக்³க³ண்ஹந்தஸ்ஸ படிக்³க³ஹணே அனாபத்தி ஸித்³தா⁴. அஜானித்வா பரிபு⁴ஞ்ஜந்தஸ்ஸேவ ஹி ஆபத்தி வுத்தா. வத்தந்தி வத³ந்தீதி இமினா ஆபத்தி நத்தீ²தி த³ஸ்ஸேதி.

இதி வினயஸங்க³ஹஸம்வண்ணனாபூ⁴தே வினயாலங்காரே

மச்ச²மம்ஸவினிச்ச²யகதா²லங்காரோ நாம

ச²ட்டோ² பரிச்சே²தோ³.