5. குலஸங்க³ஹவினிச்ச²யகதா²

27. ஏவம் விஞ்ஞத்திவினிச்ச²யம் கதே²த்வா இதா³னி குலஸங்க³ஹவினிச்ச²யம் கதே²தும் ‘‘குலஸங்க³ஹோ’’திஆதி³மாஹ. தத்த² ஸங்க³ண்ஹனம் ஸங்க³ஹோ, குலானம் ஸங்க³ஹோ குலஸங்க³ஹோ, பச்சயதா³யகாதீ³னம் கி³ஹீனம் அனுக்³க³ஹகரணம். அனுக்³க³ஹத்தோ² ஹேத்த² ஸங்க³ஹ-ஸத்³தோ³ யதா² ‘‘புத்ததா³ரஸ்ஸ ஸங்க³ஹோ’’தி (கு². பா. 5.6; ஸு. நி. 265).

28. தத்த² கோட்டனந்தி ஸயம் சி²ந்த³னம். கோட்டாபனந்தி ‘‘இமம் சி²ந்தா³’’தி அஞ்ஞேஸம் சே²தா³பனம். ஆளியா ப³ந்த⁴னந்தி யதா² க³ச்ச²மூலே உத³கம் ஸந்திட்ட²தி, ததா² ஸமந்ததோ ப³ந்த⁴னம். உத³கஸ்ஸாதி அகப்பியஉத³கஸ்ஸ ‘‘கப்பியஉத³கஸிஞ்சன’’ந்தி விஸும் வக்க²மானத்தா, தஞ்ச ஆராமாதி³அத்த²ம் ரோபனே அகப்பியவோஹாரேஸுபி கப்பியவோஹாரேஸுபி கப்பியஉத³கஸிஞ்சனாதி³ வட்டதீதி வக்க²மானத்தா இதா⁴பி விபா⁴க³ம் கத்வா கப்பியஉத³கஸிஞ்சனாதி³ விஸும் த³ஸ்ஸிதம். ஏத்த² ச கதமம் அகப்பியஉத³கம், கதமம் பன கப்பியஉத³கந்தி? ஸப்பாணகம் அகப்பியஉத³கம், அப்பாணகம் கப்பியஉத³கந்தி. கத²ம் விஞ்ஞாயதீதி சே, ‘‘யோ பன பி⁴க்கு² ஜானம் ஸப்பாணகம் உத³கம் திணம் வா மத்திகம் வா ஸிஞ்சேய்ய வா ஸிஞ்சாபேய்ய வா பாசித்திய’’ந்தி வசனதோ. யதா² கோட்டனக²ணனாதி³காயிககிரியாபி அகப்பியவோஹாரே ஸங்க³ஹிதா, ஏவம் மாதிகாஉஜுகரணாதி³கப்பியவோஹாரேபீதி ஆஹ ‘‘ஸுக்க²மாதிகாய உஜுகரண’’ந்தி. ஹத்த²பாத³முக²தோ⁴வனனஹஆனோத³கஸிஞ்சனந்தி இமினாபி பகாரந்தரேன கப்பியஉத³கஸிஞ்சனமேவ த³ஸ்ஸேதி. அகப்பியவோஹாரே கோட்டனக²ணனாதி³வஸேன ஸயம் கரணஸ்ஸபி கத²ம் ஸங்க³ஹோதி? அகப்பியந்தி வோஹரியதீதி அகப்பியவோஹாரோதி அகப்பியபூ⁴தம் கரணகாராபனாதி³ ஸப்³ப³மேவ ஸங்க³ஹிதம், ந பன அகப்பியவசனமத்தந்தி த³ட்ட²ப்³ப³ம். கப்பியவோஹாரேபி ஏஸேவ நயோ. ஸுக்க²மாதிகாய உஜுகரணந்தி இமினா புராணபண்ணாதீ³னம் ஹரணம்பி ஸங்க³ஹிதந்தி த³ட்ட²ப்³ப³ம். குதா³லாதீ³னி பூ⁴மியம் ட²பேத்வா டா²னதோ ஹத்தே²ன க³ஹேத்வா டா²னமேவ பாகடதரந்தி ‘‘ஓபா⁴ஸோ’’தி வுத்தம்.

29. மஹாபச்சரிவாத³ம் பதிட்டா²பேதுகாமோ பச்சா² வத³தி. வனத்தா²யாதி இத³ம் கேசி ‘‘வதத்தா²யா’’தி பட²ந்தி, தேஸம் வதிஅத்தா²யாதி அத்தோ². வஜிரபு³த்³தி⁴டீகாயம்பி ததே²வ வுத்தம், ‘‘ஆராமரோபா வனரோபா, யே நரா ஸேதுகாரகா’’தி (ஸம். நி. 1.47) வசனதோ பன தம் விசாரேதப்³ப³ம். அகப்பியவோஹாரேபி ஏகச்சம் வட்டதீதி த³ஸ்ஸேதும் ‘‘ந கேவலஞ்ச ஸேஸ’’ந்திஆதி³மாஹ. யம் கிஞ்சி மாதிகந்தி ஸுக்க²மாதிகம் வா அஸுக்க²மாதிகம் வா. கப்பியஉத³கம் ஸிஞ்சிதுந்தி இமினா ‘‘கப்பியஉத³கம் ஸிஞ்சதா²’’தி வத்தும்பி வட்டதீதி த³ஸ்ஸேதி. ஸயம் ரோபேதும்பி வட்டதீதி இமினா ‘‘ரோபேஹீ’’தி வத்தும்பி வட்டதீதிபி ஸித்³த⁴ம்.

30. பாசித்தியஞ்சேவ து³க்கடஞ்சாதி பத²வீக²ணனபச்சயா பாசித்தியம், குலஸங்க³ஹபச்சயா து³க்கடம். அகப்பியவோஹாரேனாதி ‘‘இத³ம் க²ண, இத³ம் ரோபேஹீ’’தி அகப்பியவோஹாரேன. து³க்கடமேவாதி குலஸங்க³ஹபச்சயா து³க்கடம். உப⁴யத்ராதி கப்பியாகப்பியபத²வியம்.

ஸப்³ப³த்தா²தி குலஸங்க³ஹபரிபோ⁴க³ஆராமாதி³அத்தா²ய ரோபிதே. து³க்கடம்பீதி ந கேவலம் பாசித்தியமேவ. கப்பியேனாதி கப்பியஉத³கேன. தேஸம்யேவ த்³வின்னந்தி குலஸங்க³ஹபரிபோ⁴கா³னம். து³க்கடந்தி குலஸங்க³ஹத்தா²ய ஸயம் ஸிஞ்சனே, கப்பியவோஹாரேன வா அகப்பியவோஹாரேன வா ஸிஞ்சாபனே து³க்கடம், பரிபோ⁴க³த்தா²ய ஸயம் ஸிஞ்சனே, அகப்பியவோஹாரேன ஸிஞ்சாபனே ச து³க்கடம். பயோக³ப³ஹுலதாயாதி ஸயம் கரணே, காயபயோக³ஸ்ஸ காராபனே வசீபயோக³ஸ்ஸ ப³ஹுத்தேன. ஆபத்திப³ஹுலதா வேதி³தப்³பா³தி ஏத்த² ஸயம் ஸிஞ்சனே தா⁴ராபச்சே²த³க³ணனாய ஆபத்திக³ணனா வேதி³தப்³பா³. ஸிஞ்சாபனே பன புனப்புனம் ஆணாபேந்தஸ்ஸ வாசாய வாசாய ஆபத்தி, ஸகிம் ஆணத்தஸ்ஸ ப³ஹுஸிஞ்சனே ஏகாவ.

ஓசினனே து³க்கடபாசித்தியானீதி குலஸங்க³ஹபச்சயா து³க்கடம், பூ⁴தகா³மபாதப்³யதாய பாசித்தியம். அஞ்ஞத்தா²தி வத்து²பூஜாதி³அத்தா²ய ஓசினனே. ஸகிம் ஆணத்தோதி அகப்பியவோஹாரேன ஆணத்தோ. பாசித்தியமேவாதி அகப்பியவோஹாரேன ஆணத்தத்தா பூ⁴தகா³மஸிக்கா²பதே³ன (பாசி. 90-91) பாசித்தியம். கப்பியவசனேன பன வத்து²பூஜாதி³அத்தா²ய ஓசினாபேந்தஸ்ஸ அனாபத்தியேவ.

31. க³ந்த²னேன நிப்³ப³த்தம் தா³மம் க³ந்தி²மம். ஏஸ நயோ ஸேஸேஸுபி. ந வட்டதீதி குலஸங்க³ஹத்தா²ய, வத்து²பூஜாதி³அத்தா²ய வா வுத்தனயேன கரோந்தஸ்ஸ காராபேந்தஸ்ஸ ச து³க்கடந்தி அத்தோ². வட்டதீதி வத்து²பூஜாதி³அத்தா²ய வட்டதி, குலஸங்க³ஹத்தா²ய பன கப்பியவோஹாரேன காராபேந்தஸ்ஸபி து³க்கடமேவ. புரிமனயேனேவாதி ‘‘பி⁴க்கு²ஸ்ஸ வா’’திஆதி³னா வுத்தனயேன. த⁴ம்மாஸனவிதானே ப³த்³த⁴கண்டகேஸு புப்பா²னி வினிவிஜ்ஜி²த்வா ட²பேந்தீதி ஸம்ப³ந்தோ⁴. உபரூபரி விஜ்ஜி²த்வா ச²த்தஸதி³ஸம் கத்வா ஆவுணனதோ ‘‘ச²த்தாதி⁴ச²த்தம் வியா’’தி வுத்தம். ‘‘கத³லிக்க²ந்த⁴ம்ஹீ’’திஆதி³னா வுத்தம் ஸப்³ப³மேவ ஸந்தா⁴ய ‘‘தம் அதிஓளாரிகமேவா’’தி வுத்தம், ஸப்³ப³த்த² கரணே, அகப்பியவோஹாரேன காராபனே ச து³க்கடமேவாதி அத்தோ². புப்ப²விஜ்ஜ²னத்த²ம் கண்டகம்பி ப³ந்தி⁴தும் ந வட்டதீதி இமஸ்ஸ உபலக்க²ணத்தா புப்ப²தா³மோலம்ப³காதி³அத்தா²ய ரஜ்ஜுப³ந்த⁴னாதி³பி ந வட்டதீதி கேசி வத³ந்தி. அஞ்ஞே பன ‘‘புப்ப²விஜ்ஜ²னத்த²ம் கண்டகந்தி விஸேஸிதத்தா தத³த்த²ம் கண்டகமேவ ப³ந்தி⁴தும் ந வட்டதி, தஞ்ச அட்ட²கதா²பமாணேனா’’தி வத³ந்தி, வீமம்ஸித்வா க³ஹேதப்³ப³ம். புப்ப²படிச்ச²கம் நாம த³ந்தாதீ³ஹி கதம் புப்பா²தா⁴னம். ஏதம்பி நாக³த³ந்தகம்பி ஸசி²த்³த³மேவ க³ஹேதப்³ப³ம். அஸோகபிண்டி³யாதி அஸோகஸாகா²னம், புப்பா²னம் வா ஸமூஹே. ஸாரத்த²தீ³பனியம் (ஸாரத்த². டீ. 2.431) பன ‘‘அஸோகபிண்டி³யாதி அஸோகபுப்ப²மஞ்ஜரிகாயா’’தி வுத்தம். த⁴ம்மரஜ்ஜு நாம சேதியம் வா போ³தி⁴ம் வா புப்ப²ப்பவேஸனத்த²ம் ஆவிஜ்ஜி²த்வா ப³ந்த⁴ரஜ்ஜு. விமதிவினோத³னியம் (வி. வி. டீ. 1.431) பன ‘‘த⁴ம்மரஜ்ஜு நாம சேதியாதீ³னி பரிக்கி²பித்வா தேஸஞ்ச ரஜ்ஜுயா ச அந்தரா புப்ப²ப்பவேஸனத்தா²ய ப³ந்த⁴ரஜ்ஜு. ஸிதி²லவட்டிதாய வா வட்டியா அப்³ப⁴ந்தரே புப்ப²ப்பவேஸனத்தா²ய ஏவம் ப³ந்தா⁴திபி வத³ந்தீ’’தி வுத்தம்.

மத்த²கதா³மந்தி த⁴ம்மாஸனாதி³மத்த²கே பலம்ப³கதா³மம். தேஸம்யேவாதி உப்பலாதீ³னம் ஏவ. வாகேன வாதி புப்ப²னாளம் பா²லேத்வா புப்பே²ன ஏகாப³த்³த⁴ட்டி²தவாகேன த³ண்டே³ன ச ஏகாப³த்³தே⁴னேவ. ஏதேன புப்ப²ம் பீ³ஜகா³மஸங்க³ஹம் ந க³ச்ச²தி பஞ்சஸு பீ³ஜேஸு அபவிட்ட²த்தா பண்ணம் விய, தஸ்மா கப்பியம் அகாராபேத்வாபி விகோபனே தோ³ஸோ நத்தி². யஞ்ச சி²ன்னஸ்ஸபி மகுளஸ்ஸ விகஸனம், தம்பி அதிதருணஸ்ஸ அபா⁴வா வுட்³டி⁴லக்க²ணம் ந ஹோதி, பரிணதஸ்ஸ பன மகுளஸ்ஸ பத்தானம் ஸினேஹே பரியாதா³னம் க³தே விஸும்பா⁴வோ ஏவ விகாஸோ, தேனேவ சி²ன்னமகுளவிகாஸோ அசி²ன்னமகுளவிகாஸதோ பரிஹீனோ, மிலாதனியுத்தோ வா தி³ஸ்ஸதி. யஞ்ச மிலாதஸ்ஸ உத³கஸஞ்ஞோகே³ அமிலானதாபஜ்ஜனம், தம்பி தம்பு³லபண்ணாதீ³ஸு ஸமானம் வுட்³டி⁴லக்க²ணம் ந ஹோதி. பாளிஅட்ட²கதா²ஸு ச ந கத்த²சி புப்பா²னம் கப்பியகரணம் ஆக³தம், தஸ்மா புப்ப²ம் ஸப்³ப³தா² அபீ³ஜமேவாதி விஞ்ஞாயதி, வீமம்ஸித்வா க³ஹேதப்³ப³ம்.

‘‘பஸிப்³ப³கே வியா’’தி வுத்தத்தா புப்ப²ம் பஸிப்³ப³கே வா பஸிப்³ப³கஸதி³ஸம் ப³ந்தே⁴ யத்த² கத்த²சி சீவரே வா பக்கி²பிதும் வட்டதீதி ஸித்³த⁴ம். ஸாரத்த²தீ³பனியம் (ஸாரத்த². டீ. 2.431) பன ‘‘க²ந்தே⁴ ட²பிதகாஸாவஸ்ஸாதி க²ந்தே⁴ ட²பிதஸங்கா⁴டிம் ஸந்தா⁴ய வுத்தம். தஞ்ஹி ததா²ப³ந்தி⁴தும் ஸக்கா ப⁴வேய்ய. இமினா ச அஞ்ஞம்பி தாதி³ஸம் காஸாவம் வா வத்த²ம் வா வுத்தனயேன ப³ந்தி⁴த்வா தத்த² புப்பா²னி பக்கி²பிதும் வட்டதீதி ஸித்³த⁴ம். அம்ஸப⁴ண்டி³கபஸிப்³ப³கே பக்கி²த்தஸதி³ஸத்தா வேடி²மம் நாம ந ஜாதம், தஸ்மா ஸிதி²லப³ந்த⁴ஸ்ஸ அந்தரந்தரா பக்கி²பிதும்பி வட்டதீதி வத³ந்தீ’’தி வுத்தம். ஹேட்டா² த³ண்ட³கம் பன ப³ந்தி⁴தும் ந வட்டதீதி ரஜ்ஜுஆதீ³ஹி ப³ந்த⁴னம் ஸந்தா⁴ய வுத்தம், புப்ப²ஸ்ஸேவ பன அச்சி²ன்னத³ண்ட³கேஹி ப³ந்தி⁴தும் வட்டதி ஏவ.

புப்ப²படே ச த³ட்ட²ப்³ப³ந்தி புப்ப²படம் கரோந்தஸ்ஸ தீ³க⁴தோ புப்ப²தா³மஸ்ஸ ஹரணபச்சாஹரணவஸேன பூரணம் ஸந்தா⁴ய வுத்தம், திரியதோ ஹரணம் பன வாயிமம் நாம ஹோதி, ந புரிமம். ‘‘புரிமட்டா²னம் அதிக்காமேதீ’’தி ஸாமஞ்ஞதோ வுத்தத்தா புரிமம் புப்ப²கோடிம் பு²ஸாபேத்வா வா அபு²ஸாபேத்வா வா பரிக்கி²பனவஸேன அதிக்காமேந்தஸ்ஸ ஆபத்தியேவ. ப³ந்தி⁴தும் வட்டதீதி புப்ப²ரஹிதாய ஸுத்தவாககோடியா ப³ந்தி⁴தும் வட்டதி. ஏகவாரம் ஹரித்வா பரிக்கி²பித்வாதி இத³ம் புப்³பே³ வுத்தசேதியாதி³பரிக்கே²பம் புப்ப²படகரணஞ்ச ஸந்தா⁴ய வுத்தம், தஸ்மா சேதியம் வா போ³தி⁴ம் வா பரிக்கி²பந்தேன ஏகவாரம் பரிக்கி²பித்வா புரிமட்டா²னம் ஸம்பத்தே அஞ்ஞஸ்ஸ தா³தப்³ப³ம், தேனபி ஏகவாரம் பரிக்கி²பித்வா ததே²வ காதப்³ப³ம். புப்ப²படம் கரோந்தேன ச ஹரித்வா அஞ்ஞஸ்ஸ தா³தப்³ப³ம், தேனபி ததே²வ காதப்³ப³ம். ஸசேபி த்³வேயேவ பி⁴க்கூ² உபோ⁴ஸு பஸ்ஸேஸு ட²த்வா பரியாயேன ஹரந்தி, வட்டதியேவாதி வத³ந்தி.

பரேஹி பூரிதந்தி தீ³க⁴தோ பஸாரிதம். வாயிதுந்தி திரியதோ ஹரிதும், தம் பன ஏகவாரம்பி ந லப⁴தி. புப்பா²னி ட²பேந்தேனாதி அக³ந்தி²தானி பாகதிகபுப்பா²னி அஞ்ஞமஞ்ஞம் பு²ஸாபேத்வாபி ட²பேந்தேன. புப்ப²தா³மம் பன பூஜனத்தா²ய பூ⁴மியம் ட²பேந்தேன பு²ஸாபேத்வா வா அபு²ஸாபேத்வா வா தி³கு³ணம் கத்வா ட²பேதும் ந வட்டதீதி வத³ந்தி.

32. க⁴டிகதா³மஓலம்ப³கோதி ஹேட்டா²பா⁴கே³ க⁴டிகாகாரயுத்தோ, தா³ருக⁴டிகாகாரோ வா ஓலம்ப³கோ. ஸாரத்த²தீ³பனியம் (ஸாரத்த². டீ. 2.431) பன ‘‘க⁴டிகதா³மஓலம்ப³கோதி அந்தே க⁴டிகாகாரயுத்தோ யமகதா³மஓலம்ப³கோ’’தி வுத்தம். வஜிரபு³த்³தி⁴டீகாயம் (வஜிர. டீ. பாராஜிக 431) பன ‘‘க⁴டிகதா³மஓலம்ப³கோதி யமகதா³மஓலம்ப³கோதி லிகி²த’’ந்தி வுத்தம், ஏகேகம் பன தா³மம் நிக்க²ந்தஸுத்தகோடியாவ ப³ந்தி⁴த்வா ஓலம்பி³தும் வட்டதி, புப்ப²தா³மத்³வயம் ஸங்க⁴டிதுகாமேனபி நிக்க²ந்தஸுத்தகோடியாவ ஸுத்தகோடிம் ஸங்க⁴டிதும் வட்டதி. அட்³ட⁴சந்தா³காரேன மாலாகு³ணபரிக்கே²போதி அட்³ட⁴சந்தா³காரேன மாலாகு³ணஸ்ஸ புனப்புனம் ஹரணபச்சாஹரணவஸேன பூரேத்வா பரிக்கி²பனம், தேனேவ தம் புரிமே பவிட்ட²ம், தஸ்மா ஏதம்பி அட்³ட⁴சந்தா³காரம் புனப்புனம் ஹரணபச்சாஹரணவஸேன பூரேதும் ந வட்டதி. ஏகவாரம் பன அட்³ட⁴சந்தா³காரகரணே மாலாகு³ணம் ஹரிதும் வட்டதீதி வத³ந்தி. புப்ப²தா³மகரணந்தி ஏத்த² ஸுத்தகோடியம் க³ஹேத்வாபி ஏகதோ காதும் ந வட்டதீதி வத³ந்தி. ஸுத்தமயம் கே³ண்டு³கம் நாம, கே³ண்டு³கக²ரபத்ததா³மானம் படிக்கி²த்தத்தா சேலாதீ³ஹி கததா³மம்பி ந வட்டதி அகப்பியானுலோமத்தாதி வத³ந்தி. பரஸந்தகம் தே³தி, து³க்கடமேவாதி விஸ்ஸாஸக்³கா³ஹேன பரஸந்தகம் க³ஹேத்வா தே³ந்தம் ஸந்தா⁴ய வுத்தம். து²ல்லச்சயந்தி ஏத்த² ப⁴ண்ட³தே³ய்யம்பி ஹோதி.

33. தஞ்ச கோ² வத்து²பூஜனத்தா²யாதி மாதாபிதூனம்பி புப்ப²ம் தே³ந்தேன வத்து²பூஜனத்தா²யேவ தா³தப்³ப³ந்தி த³ஸ்ஸேதி. ‘‘மண்ட³னத்தா²ய பன ஸிவலிங்கா³தி³பூஜனத்தா²யா’’தி ஏத்தகமேவ வுத்தத்தா ‘‘இமம் விக்கிணித்வா ஜீவிஸ்ஸந்தீ’’தி மாதாபிதூனம் வட்டதி, ஸேஸஞாதகானம் தாவகாலிகமேவ தா³தும் வட்டதி. கஸ்ஸசிபீதி ஞாதகஸ்ஸ வா அஞ்ஞாதகஸ்ஸ வா கஸ்ஸசிபி. ஞாதிஸாமணேரேஹேவாதி தேஸம் கி³ஹிபரிகம்மமோசனத்த²ம் வுத்தம். இதரேதி அஞ்ஞாதகா. தேஹிபி ஸாமணேரேஹி ஆசரியுபஜ்ஜா²யானம் வத்தஸீஸேன ஹரிதப்³ப³ம். ஸம்பத்தானம் ஸாமணேரானம் உபட்³ட⁴பா⁴க³ம் தா³தும் வட்டதீதி ஸங்கி⁴கஸ்ஸ லாப⁴ஸ்ஸ உபசாரஸீமட்ட²ஸாமணேரானம்பி ஸந்தகத்தா தேஸம்பி உபட்³ட⁴பா⁴கோ³ லப்³ப⁴தேவாதி கத்வா வுத்தம். சூளகந்தி உபட்³ட⁴பா⁴க³தோபி உபட்³ட⁴ம். சதுத்த²பா⁴க³ஸ்ஸேதம் அதி⁴வசனம். ஸாமணேரா…பே… ட²பேந்தீதி இத³ம் அரக்கி²தஅகோ³பிதம் ஸந்தா⁴ய வுத்தம். ஸாரத்த²தீ³பனியம் பன ‘‘வஸ்ஸக்³கே³ன அபா⁴ஜனீயம் ஸந்தா⁴ய வுத்த’’ந்தி வுத்தம். தத்த² தத்தா²தி மக்³கே³ வா சேதியங்க³ணே வா.

34. ஸாமணேரேஹி தா³பேதும் ந லப⁴ந்தீதி இத³ம் ஸாமணேரேஹி கி³ஹிகம்மம் காரிதம் விய ஹோதீதி வுத்தம், ந பன புப்ப²தா³னம் ஹோதீதி ஸாமணேரானம்பி ந வட்டனதோ. வுத்தஞ்ச ‘‘ஸயமேவா’’திஆதி³. ந ஹி தம் புப்ப²தா³னம் நாம ஸியா. யதி³ ஹி ததா² ஆக³தானம் தேஸம் தா³னம் புப்ப²தா³னம் நாம ப⁴வேய்ய, ஸாமணேரேஹிபி தா³தும் ந லப்³பே⁴ய்ய. ஸயமேவாதி ஸாமணேரா ஸயமேவ. யாகு³ப⁴த்தாதீ³னி ஆதா³யாதி இத³ம் பி⁴க்கூ²னம் அத்தா²ய யாகு³ப⁴த்தாதி³ஸம்பாத³னம் ஸந்தா⁴ய வுத்தத்தா ‘‘ந வட்டதீ’’தி அவிஸேஸேன வுத்தம். அவிஸேஸேன வுத்தந்தி இமினா ஸப்³பே³ஸம்பி ந வட்டதீதி த³ஸ்ஸேதி.

35. வுத்தனயேனேவாதி ‘‘மாதாபிதூனம் தாவ ஹரித்வாபி ஹராபேத்வாபி பக்கோஸித்வாபி பக்கோஸாபேத்வாபி தா³தும் வட்டதி, ஸேஸஞாதகானம் பக்கோஸாபேத்வாவ. மாதாபிதூனஞ்ச ஹராபேந்தேன ஞாதிஸாமணேரேஹேவ ஹராபேதப்³ப³ம். இதரே பன யதி³ ஸயமேவ இச்ச²ந்தி, வட்டதீ’’தி இமம் புப்ப²தா³னே வுத்தனயம் ப²லதா³னேபி அதிதி³ஸதி, தஸ்மா ப²லம்பி மாதாபிதூனம் ஹரணஹராபனாதி³னா தா³தும் வட்டதி, ஸேஸஞாதீனம் பக்கோஸாபேத்வாவ. இதா³னி ‘‘யோ ஹரித்வா வா ஹராபேத்வா வா…பே… இஸ்ஸரவதாய த³த³தோ து²ல்லச்சய’’ந்தி (பாரா. அட்ட². 2.436-437) இமம் புப்ப²தா³னே வுத்தனயம் ப²லதா³னே ஸங்கி²பித்வா த³ஸ்ஸேந்தோ ‘‘குலஸங்க³ஹத்தா²ய பனா’’திஆதி³மாஹ. கீ²ணபரிப்³ப³யானந்தி ஆக³ந்துகே ஸந்தா⁴ய வுத்தம். ப²லபரிச்சே²தே³னாதி ‘‘ஏத்தகானி ப²லானி தா³தப்³பா³னீ’’தி ஏவம் ப²லபரிச்சே²தே³ன வா. ருக்க²பரிச்சே²தே³ன வாதி ‘‘இமேஹி ருக்கே²ஹி தா³தப்³பா³னீ’’தி ஏவம் ருக்க²பரிச்சே²தே³ன வா. பரிச்சி²ன்னேஸுபி பன ருக்கே²ஸு ‘‘இத⁴ ப²லானி ஸுந்த³ரானி, இதோ க³ண்ஹதா²’’தி வத³ந்தேன குலஸங்க³ஹோ கதோ நாம ஹோதீதி ஆஹ ‘‘ஏவம் பன ந வத்தப்³ப³’’ந்தி. ருக்க²ச்ச²ல்லீதி ருக்க²த்தசோ, ஸா ‘‘பா⁴ஜனீயப⁴ண்ட³’’ந்தி வுத்தா. வுத்தனயேனாதி புப்ப²ப²லாதீ³ஸு வுத்தனயேன குலஸங்க³ஹோ ஹோதீதி த³ஸ்ஸேதி.

36. தேஸம் தேஸம் கி³ஹீனம் கா³மந்தரதே³ஸந்தராதீ³ஸு ஸாஸனபடிஸாஸனஹரணம் ஜங்க⁴பேஸனியம். தேனாஹ ‘‘கி³ஹீனம் தூ³தேய்யம் ஸாஸனஹரணகம்ம’’ந்தி. தூ³தஸ்ஸ கம்மம் தூ³தேய்யம். பட²மம் ஸாஸனம் அக்³க³ஹேத்வாபி…பே… பதே³ பதே³ து³க்கடந்தி இத³ம் ‘‘தஸ்ஸ ஸாஸனம் ஆரோசேஸ்ஸாமீ’’தி இமினா அதி⁴ப்பாயேன க³மனம் ஸந்தா⁴ய வுத்தம். தஸ்ஸ பன ஸாஸனம் படிக்கி²பித்வா ஸயமேவ காருஞ்ஞே டி²தோ க³ந்த்வா அத்தனோ பதிரூபம் ஸாஸனம் ஆரோசேதி, அனாபத்தி. கி³ஹீனஞ்ச கப்பியஸாஸனம் ஹரிதும் வட்டதீதி ஸம்ப³ந்தோ⁴. இமேஹி பன அட்ட²ஹி குலதூ³ஸககம்மேஹீதி புப்ப²தா³னம் ப²லதா³னம் சுண்ணதா³னம் மத்திகதா³னம் த³ந்தகட்ட²தா³னம் வேளுதா³னம் பண்ணதா³னம் ஜங்க⁴பேஸனிகந்தி இமேஹி யதா²வுத்தேஹி. பப்³பா³ஜனீயகம்மகதோதி குலதூ³ஸனபச்சயா கதபப்³பா³ஜனீயகம்மோ.

37. ஸேக்க²பூ⁴மியம் வாதி இமினா ஜா²னபூ⁴மிம்பி ஸங்க³ண்ஹாதி. திண்ணம் விவேகானந்தி காயசித்தஉபதி⁴விவேகபூ⁴தானம் திண்ணம் விவேகானம். பிண்டா³ய சரணஸ்ஸ போ⁴ஜனபரியோஸானத்தா வுத்தம் ‘‘யாவ போ⁴ஜனபரியோஸான’’ந்தி. பு⁴த்வா ஆக³ச்ச²ந்தஸ்ஸபி புன வுத்தனயேனேவ பணிதா⁴ய சீவரஸண்டா²பனாதீ³னி கரோந்தஸ்ஸ து³க்கடமேவாதி த³ட்ட²ப்³ப³ம்.

இதி வினயஸங்க³ஹஸம்வண்ணனாபூ⁴தே வினயாலங்காரே

குலஸங்க³ஹவினிச்ச²யகதா²லங்காரோ நாம

பஞ்சமோ பரிச்சே²தோ³.