4. விஞ்ஞத்திவினிச்ச²யகதா²

21. ஏவம் பே⁴ஸஜ்ஜாதி³வினிச்ச²யம் கதே²த்வா இதா³னி விஞ்ஞத்திவினிச்ச²யம் கதே²தும் ‘‘விஞ்ஞத்தீதி யாசனா’’திஆதி³மாஹ. தத்த² விஞ்ஞாபனா விஞ்ஞத்தி, ‘‘இமினா நோ அத்தோ²’’தி விஞ்ஞாபனா, யாசனாதி வுத்தம் ஹோதி. தேனாஹ ‘‘விஞ்ஞத்தீதி யாசனா’’தி. தத்ர விஞ்ஞத்தியம் அயம் மயா வக்க²மானோ வினிச்ச²யோ வேதி³தப்³போ³தி யோஜனா. மூலச்சே²ஜ்ஜாயாதி (வி. வி. டீ. 1.342) பரஸந்தகபா⁴வதோ மோசேத்வா அத்தனோ ஏவ ஸந்தககரணவஸேன. ஏவம் யாசதோ அஞ்ஞாதகவிஞ்ஞத்திது³க்கடஞ்சேவ தா³ஸபடிக்³க³ஹது³க்கடஞ்ச ஹோதி ‘‘தா³ஸிதா³ஸபடிக்³க³ஹணா படிவிரதோ (தீ³. நி. 1.10, 194) ஹோதீ’’தி வசனம் நிஸ்ஸாய அட்ட²கதா²யம் படிக்கி²த்தத்தா. ஞாதகபவாரிதட்டா²னதோ பன தா³ஸம் மூலச்சே²ஜ்ஜாய யாசந்தஸ்ஸ ஸாதி³யனவஸேனேவ து³க்கடம். ஸககம்மந்தி பாணவத⁴கம்மம். இத³ஞ்ச பாணாதிபாததோ³ஸபரிஹாராய வுத்தம், ந விஞ்ஞத்திபரிஹாராய. அனியமேத்வாபி ந யாசிதப்³பா³தி ஸாமீசித³ஸ்ஸனத்த²ம் வுத்தம், ஸுத்³த⁴சித்தேன பன ஹத்த²கம்மம் யாசந்தஸ்ஸ ஆபத்தி நாம நத்தி². யதி³ச்ச²கம் காராபேதும் வட்டதீதி ‘‘ஹத்த²கம்மம் யாசாமி, தே³தா²’’திஆதி³னா அயாசித்வாபி வட்டதி, ஸகிச்சபஸுதம்பி ஏவம் காராபேந்தஸ்ஸ விஞ்ஞத்தி நத்தி² ஏவ, ஸாமீசித³ஸ்ஸனத்த²ம் பன விப⁴ஜித்வா வுத்தம்.

ஸப்³ப³கப்பியபா⁴வதீ³பனத்த²ந்தி ஸப்³ப³ஸோ கப்பியபா⁴வத³ஸ்ஸனத்த²ம். மூலம் தே³தா²தி வத்தும் வட்டதீதி ‘‘மூலம் த³ஸ்ஸாமா’’தி பட²மம் வுத்தத்தா விஞ்ஞத்தி வா ‘‘மூல’’ந்தி வசனஸ்ஸ கப்பியாகப்பியவத்து²ஸாமஞ்ஞவசனத்தா அகப்பியவசனம் வா நிட்டி²தப⁴திகிச்சானம் தா³பனதோ அகப்பியவத்து²ஸாதி³யனம் வா ந ஹோதீதி கத்வா வுத்தம். மூலச்சே²ஜ்ஜாய வாதி இத³ம் இத⁴ த²ம்பா⁴தீ³னம் தா³ஸிதா³ஸாதி³பா⁴வாபா⁴வதோ வுத்தம். அனஜ்ஜா²வுத்த²கந்தி அபரிக்³க³ஹிதம், அஸ்ஸாமிகந்தி அத்தோ².

22. ந கேவலஞ்ச…பே… சீவராதீ³னி காராபேதுகாமேனாதிஆதீ³ஸு சீவரம் காராபேதுகாமஸ்ஸ அஞ்ஞாதகஅப்பவாரிததந்தவாயேஹி ஹத்த²கம்மயாசனவஸேன வாயாபனே விஞ்ஞத்திபச்சயா து³க்கடாபா⁴வேபி சீவரவாயாபனஸிக்கா²பதே³ன யதா²ரஹம் பாசித்தியது³க்கடானி ஹோந்தீதி வேதி³தப்³ப³ம். அகப்பியகஹாபணாதி³ ந தா³தப்³ப³ந்தி கப்பியமுகே²ன லத்³த⁴ம்பி தத்த² கம்மகரணத்தா²ய இமஸ்ஸ கஹாபணம் தே³ஹீதி வத்வா ‘‘தா³தும் வட்டதீ’’தி வுத்தம். புப்³பே³ கதகம்மஸ்ஸ தா³பனே கிஞ்சாபி தோ³ஸோ ந தி³ஸ்ஸதி, ததா²பி அஸாருப்பமேவாதி வத³ந்தி. கதகம்மத்தா²யபி கப்பியவோஹாரேன பரியாயதோ ப⁴திம் தா³பேந்தஸ்ஸ நத்தி² தோ³ஸோ, ஸாரத்த²தீ³பனியம் (ஸாரத்த². டீ. 1.342) பன ‘‘அகப்பியகஹாபணாதி³ ந தா³தப்³ப³ந்தி கிஞ்சாபி அகப்பியகஹாபணாதி³ம் அஸாதி³யந்தேன கப்பியவோஹாரதோ தா³தும் வட்டதி, ததா²பி ஸாருப்பம் ந ஹோதி, மனுஸ்ஸா ச ஏதஸ்ஸ ஸந்தகம் கிஞ்சி அத்தீ²தி விஹேடே²தப்³ப³ம் மஞ்ஞந்தீதி அகப்பியகஹாபணாதி³தா³னம் படிக்கி²த்த’’ந்தி வுத்தம். ததே²வ பாசேத்வாதி ஹத்த²கம்மவஸேனேவ பாசேத்வா. ‘‘கிம் ப⁴ந்தே’’தி ஏத்தகேபி புச்சி²தே யத³த்தா²ய பவிட்டோ², தம் கதே²தும் லப⁴தி புச்சி²தபஞ்ஹத்தா.

23. வத்தந்தி சாரித்தம், ஆபத்தி பன ந ஹோதீதி அதி⁴ப்பாயோ. கப்பியம் காராபேத்வா படிக்³க³ஹேதப்³பா³னீதி ஸாகா²ய மக்கி²கபீ³ஜனேன பண்ணாதி³சே²தே³ பீ³ஜகா³மகோபனஸ்ஸ சேவ தத்த² லக்³க³ரஜாதி³அப்படிக்³க³ஹிதகஸ்ஸ ச பரிஹாரத்தா²ய வுத்தம், தது³ப⁴யாஸங்காய அஸதி ததா² அகரணே தோ³ஸோ நத்தி². ஸாரத்த²தீ³பனியம் (ஸாரத்த². டீ. 1.342) பன ‘‘கப்பியம் காராபேத்வா படிக்³க³ஹேதப்³பா³னீதி ஸாகா²ய லக்³க³ரஜஸ்மிம் பத்தே பதிதேபி ஸாக²ம் சி²ந்தி³த்வா கா²தி³துகாமதாயபி ஸதி ஸுக²பரிபோ⁴க³த்த²ம் வுத்த’’ந்தி வுத்தம். நதி³யாதீ³ஸு உத³கஸ்ஸ அபரிக்³க³ஹிதத்தா ‘‘ஆஹராதி வத்தும் வட்டதீ’’தி வுத்தம். கே³ஹதோ…பே… நேவ வட்டதீதி பரிக்³க³ஹிதுத³கத்தா விஞ்ஞத்தியா து³க்கடம் ஹோதீதி அதி⁴ப்பாயோ. ‘‘ந ஆஹடம் பரிபு⁴ஞ்ஜிது’’ந்தி வசனதோ விஞ்ஞத்தியா ஆபன்னம் து³க்கடம் தே³ஸேத்வாபி தம் வத்து²ம் பரிபு⁴ஞ்ஜந்தஸ்ஸ பரிபோ⁴கே³ பரிபோ⁴கே³ து³க்கடமேவ, பஞ்சன்னம்பி ஸஹத⁴ம்மிகானம் ந வட்டதி.

‘‘அலஜ்ஜீஹி பன பி⁴க்கூ²ஹி வா ஸாமணேரேஹி வா ஹத்த²கம்மம் ந காரேதப்³ப³’’ந்தி ஸாமஞ்ஞதோ வுத்தத்தா அத்தனோ அத்தா²ய யம் கிஞ்சி ஹத்த²கம்மம் காரேதும் ந வட்டதி. யம் பன அலஜ்ஜீ நிவாரியமானோபி பீ³ஜனாதி³ம் கரோதி, தத்த² தோ³ஸோ நத்தி², சேதியகம்மாதீ³னி பன தேஹி காராபேதும் வட்டதீதி விமதிவினோத³னியம் (வி. வி. டீ. 1.342) வுத்தம். ஸாரத்த²தீ³பனியம் (ஸாரத்த². டீ. 2.342) பன ‘‘அலஜ்ஜீஹி…பே… ந காரேதப்³ப³ந்தி இத³ம் உத்தரிப⁴ங்கா³தி⁴காரத்தா அஜ்ஜோ²ஹரணீயம் ஸந்தா⁴ய வுத்தம், பா³ஹிரபரிபோ⁴கே³ஸு பன அலஜ்ஜீஹிபி ஹத்த²கம்மம் காரேதும் வட்டதீ’’தி வுத்தம். ஏத்த² ச ‘‘அலஜ்ஜீஹி ஸாமணேரேஹீ’’தி வுத்தத்தா ‘‘ஸஞ்சிச்ச ஆபத்திம் ஆபஜ்ஜதீ’’தி (பரி. 359) அலஜ்ஜிலக்க²ணம் உக்கட்ட²வஸேன உபஸம்பன்னே படிச்ச உபலக்க²ணதோ வுத்தந்தி தம்லக்க²ணவிரஹிதானம் ஸாமணேராதீ³னம் லிங்க³த்தே²னகோ³த்ரபு⁴பரியோஸானானம் பி⁴க்கு²படிஞ்ஞானம் து³ஸ்ஸீலானம்பி ஸாதா⁴ரணவஸேன அலஜ்ஜிலக்க²ணம் யதா²ட²பிதபடிபத்தியா அதிட்ட²னமேவாதி க³ஹேதப்³ப³ம்.

24. கோ³ணம் பன…பே… ஆஹராபேந்தஸ்ஸ து³க்கடந்தி விஞ்ஞத்திக்க²ணே விஞ்ஞத்திபச்சயா, படிலாப⁴க்க²ணே கோ³ணானம் ஸாதி³யனபச்சயா ச து³க்கடம். கோ³ணஞ்ஹி அத்தனோ அத்தா²ய அவிஞ்ஞத்தியா லத்³த⁴ம்பி ஸாதி³தும் ந வட்டதி ‘‘ஹத்தி²க³வாஸ்ஸவளவபடிக்³க³ஹணா படிவிரதோ ஹோதீ’’தி (தீ³. நி. 1.10, 194) வுத்தத்தா. தேனேவாஹ ‘‘ஞாதகபவாரிதட்டா²னதோபி மூலச்சே²ஜ்ஜாய யாசிதும் ந வட்டதீ’’தி. ஏத்த² ச விஞ்ஞத்திது³க்கடாபா⁴வேபி அகப்பியவத்து²யாசனேபி படிக்³க³ஹணேபி து³க்கடமேவ. ரக்கி²த்வாதி சோராதி³உபத்³த³வதோ ரக்கி²த்வா. ஜக்³கி³த்வாதி திணஅன்னாதீ³ஹி போஸேத்வா. ந ஸம்படிச்சி²தப்³ப³ந்தி அத்தனோ அத்தா²ய கோ³ஸாதி³யனஸ்ஸ படிக்கி²த்தத்தா வுத்தம்.

25. ஞாதகபவாரிதட்டா²னே பன வட்டதீதி ஸகடஸ்ஸ ஸம்படிச்சி²தப்³ப³த்தா மூலச்சே²ஜ்ஜவஸேன யாசிதும் வட்டதி. தாவகாலிகம் வட்டதீதி உப⁴யத்தா²பி வட்டதீதி அத்தோ²தி விமதிவினோத³னியம் (வி. வி. டீ. 1.342) வுத்தம். ஸாரத்த²தீ³பனியம் (ஸாரத்த². டீ. 2.342) பன ‘‘ஸகடம் தே³தா²தி…பே… ந வட்டதீதி மூலச்சே²ஜ்ஜவஸேன ஸகடம் தே³தா²தி வத்தும் ந வட்டதி. தாவகாலிகம் வட்டதீதி தாவகாலிகம் கத்வா ஸப்³ப³த்த² யாசிதும் வட்டதீ’’தி வுத்தம். வாஸிஆதீ³னி புக்³க³லிகானிபி வட்டந்தீதி ஆஹ ‘‘ஏஸ நயோ வாஸீ’’திஆதி³. வல்லிஆதீ³ஸு ச பரபரிக்³க³ஹிதேஸு ஏஸ நயோதி யோஜேதப்³ப³ம். க³ருப⁴ண்ட³ப்பஹோனகேஸுயேவாதி இத³ம் விஞ்ஞத்திம் ஸந்தா⁴ய வுத்தம், அதி³ன்னாதா³னே பன திணஸலாகம் உபாதா³ய பரபரிக்³க³ஹிதம் தே²ய்யசித்தேன க³ண்ஹதோ அவஹாரோ ஏவ, ப⁴ண்ட³க்³கே⁴ன காரேதப்³போ³. வல்லிஆதீ³ஸூதி ஏத்த² ஆதி³-ஸத்³தே³ன பாளிஆக³தானம் வேளுமுஞ்ஜபப்³ப³ஜதிணமத்திகானம் ஸங்க³ஹோ த³ட்ட²ப்³போ³. தத்த² ச யஸ்மிம் பதே³ஸே ஹரிதாலஜாதிஹிங்கு³லிகாதி³ அப்பகம்பி மஹக்³க⁴ம் ஹோதி, தத்த² தம் தாலபக்கப்பமாணதோ ஊனம்பி க³ருப⁴ண்ட³மேவ, விஞ்ஞாபேதுஞ்ச ந வட்டதி.

26. ஸாதி விஞ்ஞத்தி. பரிகதா²தீ³ஸு ‘‘ஸேனாஸனம் ஸம்பா³த⁴’’ந்திஆதி³னா பரியாயேன கத²னம் பரிகதா² நாம. உஜுகமேவ அகதே²த்வா ‘‘பி⁴க்கூ²னம் கிம் பாஸாதோ³ ந வட்டதீ’’திஆதி³னா அதி⁴ப்பாயோ யதா² விபூ⁴தோ ஹோதி, ஏவம் கத²னம் ஓபா⁴ஸோ நாம. ஸேனாஸனாதி³அத்த²ம் பூ⁴மிபரிகம்மாதி³கரணவஸேன பச்சயுப்பாதா³ய நிமித்தகரணம் நிமித்தகம்மம் நாம. தீஸு பச்சயேஸு விஞ்ஞத்திஆத³யோ த³ஸ்ஸிதா, கி³லானபச்சயே பன கத²ந்தி ஆஹ ‘‘கி³லானபச்சயே பனா’’திஆதி³. ததா² உப்பன்னம் பன பே⁴ஸஜ்ஜம் ரோகே³ வூபஸந்தே பு⁴ஞ்ஜிதும் வட்டதி, ந வட்டதீதி? தத்த² வினயத⁴ரா ‘‘ப⁴க³வதா ரோக³ஸீஸேன பரிபோ⁴க³ஸ்ஸ த்³வாரம் தி³ன்னம், தஸ்மா அரோக³காலேபி பு⁴ஞ்ஜிதும் வட்டதி, ஆபத்தி ந ஹோதீ’’தி வத³ந்தி, ஸுத்தந்திகா பன ‘‘கிஞ்சாபி ஆபத்தி ந ஹோதி, ஆஜீவம் பன கோபேதி, தஸ்மா ஸல்லேக²படிபத்தியம் டி²தஸ்ஸ ந வட்டதி, ஸல்லேக²ம் கோபேதீ’’தி வத³ந்தீதி.

இதி வினயஸங்க³ஹஸம்வண்ணனாபூ⁴தே வினயாலங்காரே

விஞ்ஞத்திவினிச்ச²யகதா²லங்காரோ நாம

சதுத்தோ² பரிச்சே²தோ³.