34. பகிண்ணகவினிச்ச²யகதா²

ஏவம் கம்மாகம்மவினிச்ச²யகத²ம் கதே²த்வா இதா³னி பகிண்ணகவினிச்ச²யகத²ம் கதே²தும் ‘‘இதா³னி பகிண்ணககதா² வேதி³தப்³பா³’’திஆதி³மாஹ. தத்த² பகாரேன கிண்ணாதி பகிண்ணா, தி³வாஸேய்யாதி கதா² விய விஸும் விஸும் அப்பவத்தித்வா ஏகஸ்மிம்யேவ பரிச்சே²தே³ கரணவஸேன பவத்தா க³ணபோ⁴ஜனகதா²த³யோ. பகிண்ணகா ஸகத்தே² க-பச்சயவஸேன.

தத்ராயம் பகிண்ணகமாதிகா –

க³ணபோ⁴ஜனகதா² ச, பரம்பரா ச போ⁴ஜனா;

அனாபுச்சா² பம்ஸுகூலம், ததோ அச்சி²ன்னசீவரம்.

படிபா⁴னசித்தம் விப்ப-கதபோ⁴ஜனமேவ ச;

உத்³தி³ஸந்துத்³தி³ஸாபேந்தா, திவஸ்ஸந்தரிகா ததா².

தீ³கா⁴ஸனம் கி³லானுப-ட்டா²னம் மரணவண்ணகம்;

அத்தபாதனமப்பச்ச-வேக்கி²த்வா நிஸின்னம் ததா².

த³வாய ஸிலாவிஜ்ஜ²னம், தா³யாளிம்பனகம் ததா²;

மிச்சா²தி³ட்டி²குலாப⁴தம், கோ³பகதா³னமேவ ச.

த⁴ம்மிகாயாசனா சேவ, உச்சாராதீ³ன ச²ட்³ட³னம்;

ந்ஹானே ருக்க²க⁴ம்ஸனானி, வலிகாதீ³ன தா⁴ரணம்.

தீ³க⁴கேஸா ஆதா³ஸாதி³, நச்சாத்³யங்க³ச்சே²தா³தி³ ச;

பத்தோ ஸப்³ப³பம்ஸுகூலம், பரிஸ்ஸவன நக்³கி³யம்.

க³ந்த⁴புப்ப²ம் ஆஸித்தகம், மளோரிகேகபா⁴ஜனம்;

சேலபதி பாத³க⁴ம்ஸீ, பீ³ஜனீ ச²த்தமேவ ச.

நகா²லோமா காயப³ந்தா⁴, நிவாஸனபாருபனா;

காஜ த³ந்தகட்ட²ஞ்சேவ, ருக்கா²ரோஹனகம்பி ச.

ச²ந்தா³ரோபா லோகாயதா, கி²பிதம் லஸுணம் ததா²;

ந அக்கமிதப்³பா³தீ³னி, அவந்தி³யா ச வந்தி³யா.

வந்த³னாகாரகதா² ச, ஆஸந்தா³தி³கதா²பி ச;

உச்சாஸனமஹாஸனம், பாஸாத³பரிபோ⁴க³கம்.

உபாஹனம் யானஞ்சேவ, சீவரம் சி²ன்னசீவரம்;

அகப்பியசீவரஞ்ச, சீவரஸ்ஸ விசாரணா.

த³ண்ட³கதி²னகஞ்சேவ, க³ஹபதிசீவரம் ததா²;

ச²சீவரம் ரஜனாதி³, அதிரேகஞ்ச சீவரம்.

அட்ட²வரம் நிஸீத³னம், அத⁴ம்மகம்மமேவ ச;

ஓகாஸோ ஸத்³தா⁴தே³ய்யோ ச, ஸந்தருத்தரகோபி ச.

சீவரனிக்கே²போ சேவ, ஸத்த²வத்தி²கம்மம் ததா²;

நஹாபிதோ த³ஸபா⁴கோ³, பாதே²ய்யம் பதே³ஸோபி ச.

ஸம்ஸட்ட²ம் பஞ்சபே⁴ஸஜ்ஜம், து³தியம் வஸா மூலகம்;

பிட்ட²ம் கஸாவ பண்ணஞ்ச, ப²லஞ்ச ஜது லோணகம்.

சுண்ணம் அமனுஸ்ஸாபா³த⁴ம், அஞ்ஜனம் நத்து²மேவ ச;

தூ⁴மனேத்தம் தேலபாகம், ஸேத³ம் லோஹிதமோசனம்.

பாத³ப்³ப⁴ஞ்ஜம் க³ண்டா³பா³தோ⁴, விஸஞ்ச க⁴ரதி³ன்னகோ;

து³ட்ட²க³ஹணிகோ பண்டு³-ரோகோ³ ச²விதோ³ஸோபி ச.

அபி⁴ஸன்னதோ³ஸகாயோ, லோணஸுவீரகோ ததா²;

அந்தோவுத்தா²தி³கதா² ச, உக்³க³ஹிதபடிக்³க³ஹோ.

ததோ நிஹதகதா² ச, புரேப⁴த்தபடிக்³க³ஹோ;

வனட்ட²ம் போக்க²ரட்ட²ஞ்ச, ததா² அகதகப்பதம்.

யாகு³கதா² கு³ளகதா², மஹாபதே³ஸமேவ ச;

ஆனிஸம்ஸகதா² சேதி, பகிண்ணகம்ஹி ஆக³தா.

க³ணபோ⁴ஜனகதா²

1. தத்த² க³ணிதப்³போ³ ஸங்க்²யாதப்³போ³தி க³ணோ, யோ கோசி ஸமூஹோ, இத⁴ பன சதுவக்³கா³தி³க³ணோ அதி⁴ப்பேதோ. பு⁴ஞ்ஜதே போ⁴ஜனம், ப்³யவஹரணபா⁴வஸங்கா²தா போ⁴ஜனகிரியா, க³ணஸ்ஸ போ⁴ஜனம் க³ணபோ⁴ஜனம், தஸ்மிம். க³ணபோ⁴ஜனே பாசித்தியம் ஹோதீதி ஏத்த² ஜனகஹேதும்ஹி பு⁴ம்மவசனம். அஞ்ஞத்ர ஸமயாதி கி³லானாதி³ஸத்தவித⁴ம் ஸமயம் ட²பேத்வா. இமஸ்ஸ ஸிக்கா²பத³ஸ்ஸ விஞ்ஞத்திம் கத்வா பு⁴ஞ்ஜனவத்து²ஸ்மிம் பஞ்ஞத்தத்தா விஞ்ஞத்திதோ க³ணபோ⁴ஜனம் வத்து²வஸேனேவ பாகடந்தி தம் அவத்வா ‘‘க³ணபோ⁴ஜனம் நாம யத்த²…பே… நிமந்திதா பு⁴ஞ்ஜந்தீ’’தி நிமந்தனவஸேனேவஸ்ஸ பத³பா⁴ஜனே க³ணபோ⁴ஜனம் வுத்தம். கிஞ்சி பன ஸிக்கா²பத³ம் வத்து²அனுரூபம்பி ஸியாதி ‘‘பத³பா⁴ஜனே வுத்தனயேனேவ க³ணபோ⁴ஜனம் ஹோதீ’’தி கேஸஞ்சி ஆஸங்கா ப⁴வேய்யாதி தன்னிவத்தனத்த²ம் ‘‘க³ணபோ⁴ஜனம் த்³வீஹி ஆகாரேஹி பஸவதீ’’தி வுத்தம். ஏகதோ க³ண்ஹந்தீதி ஏத்த² அஞ்ஞமஞ்ஞஸ்ஸ த்³வாத³ஸஹத்த²ம் அமுஞ்சித்வா டி²தா ஏகதோ க³ண்ஹந்தி நாமாதி க³ஹேதப்³ப³ம். ‘‘அம்ஹாகம் சதுன்னம்பி ப⁴த்தம் தே³ஹீ’தி வா விஞ்ஞாபேய்யு’’ந்தி வசனதோ, ஹேட்டா² ‘‘த்வம் ஏகஸ்ஸ பி⁴க்கு²னோ ப⁴த்தம் தே³ஹி, த்வம் த்³வின்னந்தி ஏவம் விஞ்ஞாபேத்வா’’தி வசனதோ ச அத்தனோ அத்தா²ய அஞ்ஞேன விஞ்ஞத்தம்பி ஸாதி³யந்தஸ்ஸ க³ணபோ⁴ஜனம் ஹோதியேவாதி த³ட்ட²ப்³ப³ம். ஏவம் விஞ்ஞத்திதோ பஸவதீதி ஏத்த² விஞ்ஞத்தியா ஸதி க³ணந்தஸ்ஸ ஏகதோ ஹுத்வா க³ஹணே இமினா ஸிக்கா²பதே³ன ஆபத்தி, விஸும் க³ஹணே பணீதபோ⁴ஜனஸூபோத³னவிஞ்ஞத்தீஹி ஆபத்தி வேதி³தப்³பா³.

பஞ்சன்னம் போ⁴ஜனானம் நாமம் க³ஹேத்வாதி ஏத்த² ‘‘போ⁴ஜனம் க³ண்ஹதா²தி வுத்தேபி க³ணபோ⁴ஜனம் ஹோதியேவா’’தி வத³ந்தி. ‘‘ஹேட்டா² அத்³தா⁴னக³மனவத்து²ஸ்மிம், நாவாபி⁴ருஹனவத்து²ஸ்மிஞ்ச ‘இதே⁴வ, ப⁴ந்தே, பு⁴ஞ்ஜதா²’தி வுத்தே யஸ்மா குக்குச்சாயந்தா ந படிக்³க³ண்ஹிம்ஸு, தஸ்மா ‘பு⁴ஞ்ஜதா²’தி வுத்தேபி க³ணபோ⁴ஜனம் ஹோதியேவா’’தி தீஸுபி க³ண்டி²பதே³ஸு வுத்தம். ‘‘பஞ்சன்னம் போ⁴ஜனானம் நாமம் க³ஹேத்வா நிமந்தேதீ’’தி வுத்தத்தா பன ‘‘ஓத³னம் பு⁴ஞ்ஜதா²’’தி வா ‘‘ப⁴த்தம் பு⁴ஞ்ஜதா²’’தி வா போ⁴ஜனனாமம் க³ஹேத்வாவ வுத்தே க³ணபோ⁴ஜனம் ஹோதி, ந அஞ்ஞதா². ‘‘இதே⁴வ, ப⁴ந்தே, பு⁴ஞ்ஜதா²’’தி ஏத்தா²பி ‘‘ஓத³ன’’ந்தி வா ‘‘ப⁴த்த’’ந்தி வா வத்வாவ தே ஏவம் நிமந்தேஸுந்தி க³ஹேதப்³ப³ம். க³ணவஸேன வா நிமந்திதத்தா தே பி⁴க்கூ² அபகதஞ்ஞுதாய குக்குச்சாயந்தா ந படிக்³க³ண்ஹிம்ஸூதி அயம் அம்ஹாகம் க²ந்தி, வீமம்ஸித்வா யுத்ததரம் க³ஹேதப்³ப³ம். விமதிவினோத³னியம் (வி. வி. டீ. பாசித்திய 2.217-218) பன ‘‘யேன கேனசி வேவசனேனாதி வுத்தத்தா ‘போ⁴ஜனம் க³ண்ஹதா²’திஆதி³ஸாமஞ்ஞனாமேனபி க³ணபோ⁴ஜனம் ஹோதி. யம் பன பாளியம் அத்³தா⁴னக³மனாதி³வத்தூ²ஸு ‘இதே⁴வ பு⁴ஞ்ஜதா²’தி வுத்தவசனஸ்ஸ குக்குச்சாயனம், தம்பி ஓத³னாதி³னாமம் க³ஹேத்வா வுத்தத்தா ஏவ கதந்தி வேதி³தப்³ப³’’ந்தி வுத்தம்.

குருந்தீ³வசனே விசாரேதீதி பஞ்சக²ண்டா³தி³வஸேன ஸம்வித³ஹதி. க⁴ட்டேதீதி அனுவாதம் சி²ந்தி³த்வா ஹத்தே²ன, த³ண்ட³கேன வா க⁴ட்டேதி. ஸுத்தம் கரோதீதி ஸுத்தம் வட்டேதி. வலேதீதி த³ண்ட³கே வா ஹத்தே² வா ஆவட்டேதி. ‘‘அபி⁴னவஸ்ஸேவ சீவரஸ்ஸ கரணம் இத⁴ சீவரகம்மம் நாம, புராணசீவரே ஸூசிகம்மம் சீவரகம்மம் நாம ந ஹோதீ’’தி வத³ந்தி. விமதிவினோத³னியம் (வி. வி. டீ. பாசித்திய 2.217-218) பன ‘‘ஆக³ந்துகபட்டந்தி அச்சி²ந்தி³த்வா அன்வாதி⁴ம் ஆரோபேத்வா கரணசீவரம் ஸந்தா⁴ய வுத்தம். ட²பேதீதி ஏகம் அந்தம் சீவரே ப³ந்த⁴னவஸேன ட²பேதி. பச்சாக³தம் ஸிப்³ப³தீதி தஸ்ஸேவ து³தியஅந்தம் பரிவத்தித்வா ஆஹதம் ஸிப்³ப³தி. ஆக³ந்துகபட்டம் ப³ந்த⁴தீதி சீவரேன லக்³க³ம் கரோந்தோ புனப்புனம் தத்த² தத்த² ஸுத்தேன ப³ந்த⁴தி. க⁴ட்டேதீதி பமாணேன க³ஹேத்வா த³ண்டா³தீ³ஹி க⁴ட்டேதி. ஸுத்தம் கரோதீதி ஸுத்தம் திகு³ணாதி³பா⁴வேன வட்டேதி. வலேதீதி அனேககு³ணஸுத்தம் ஹத்தே²ன வா சக்கத³ண்டே³ன வா வட்டேதி ஏகத்தம் கரோதி. பரிவத்தனம் கரோதீதி பரிவத்தனத³ண்ட³யந்தகம் கரோதி. யஸ்மிம் ஸுத்தகு³ளம் பவேஸேத்வா வேளுனாளிகாதீ³ஸு ட²பேத்வா பரிப்³ப⁴மாபேத்வா ஸுத்தகோடிதோ பட்டா²ய ஆகட்³ட⁴ந்தீ’’தி வுத்தம். வஜிரபு³த்³தி⁴டீகாயம் (வஜிர. டீ. பாசித்திய 209-218) ந ‘‘ஆக³ந்துகபட்டம் மோக⁴ஸுத்தேன ஸிப்³பி³த்வா ட²பேந்தி. தத்த² அனுவாதே யதா² ஏகதலம் ஹோதி, ததா² ஹத்தே²ஹி க⁴ட்டேதி. வலேதீதி ஆவட்டேதி. பரிவத்தனந்தி ஸுத்தம் க³ண்ஹந்தானம் ஸுக²க்³க³ஹணத்த²ம் ஸுத்தபரிவத்தனம் கரோதி, பட்டம் ஸிப்³ப³ந்தானம் ஸுக²ஸிப்³ப³னத்த²ம் பட்டபரிவத்தனஞ்ச, நவசீவரகாரகோ இதா⁴தி⁴ப்பேதோ, ந இதரோ’’தி வுத்தம்.

அனிமந்திதசதுத்த²ந்தி அனிமந்திதோ சதுத்தோ² யஸ்ஸ பி⁴க்கு²சதுக்கஸ்ஸ, தம் அனிமந்திதசதுத்த²ம். ஏவம் ஸேஸேஸுபி. தேனாஹ ‘‘பஞ்சன்னம் சதுக்கான’’ந்தி, ‘‘சதுத்தே² ஆக³தே ந யாபேந்தீதி வசனதோ ஸசே அஞ்ஞோ கோசி ஆக³ச்ச²ந்தோ நத்தி², சத்தாரோயேவ ச தத்த² நிஸின்னா யாபேதும் ந ஸக்கோந்தி, ந வட்டதீ’’தி வத³ந்தி. க³ணபோ⁴ஜனாபத்திஜனகனிமந்தனபா⁴வதோ ‘‘அகப்பியனிமந்தன’’ந்தி வுத்தம். ஸம்பவேஸேத்வாதி நிஸீதா³பேத்வா. க³ணோ பி⁴ஜ்ஜதீதி க³ணோ ஆபத்திம் ந ஆபஜ்ஜதீதி அதி⁴ப்பாயோ. விமதிவினோத³னியம் (வி. வி. டீ. பாசித்திய 2.220) பன ‘‘ஸம்பவேஸேத்வாதி தேஹி யோஜேத்வா. க³ணோ பி⁴ஜ்ஜதீதி நிமந்திதஸங்கோ⁴ ந ஹோதீதி அத்தோ²’’தி வுத்தம்.

‘‘யத்த² சத்தாரோ பி⁴க்கூ²…பே… பு⁴ஞ்ஜந்தீ’’தி இமாய பாளியா ஸம்ஸந்த³னதோ ‘‘இதரேஸம் பன க³ணபூரகோ ஹோதீ’’தி வுத்தம். அவிஸேஸேனாதி ‘‘கி³லானோ வா சீவரகாரகோ வா’’தி அவிஸேஸேத்வா ஸப்³ப³ஸாதா⁴ரணவசனேன. தஸ்மாதி அவிஸேஸிதத்தா.

அதி⁴வாஸேத்வா க³தேஸூதி ஏத்த² அகப்பியனிமந்தனாதி⁴வாஸனக்க²ணே புப்³ப³பயோகே³ து³க்கடம்பி நத்தி², விஞ்ஞத்திதோ பஸவனே பன விஞ்ஞத்திக்க²ணே இதரஸிக்கா²பதே³ஹி து³க்கடம் ஹோதீதி க³ஹேதப்³ப³ம். பு⁴த்வா க³தேஸூதி ஏத்த² ஆக³தேஸுபி போ⁴ஜனகிச்சே நிட்டி²தே க³ண்ஹிதும் வட்டதி. தானி ச தேஹி ஏகதோ ந க³ஹிதானீதி யேஹி போ⁴ஜனேஹி விஸங்கேதோ நத்தி², தானி போ⁴ஜனானி தேஹி பி⁴க்கூ²ஹி ஏகதோ ந க³ஹிதானி ஏகேன பச்சா² க³ஹிதத்தா. மஹாதே²ரேதி பி⁴க்கூ² ஸந்தா⁴ய வுத்தம். நிமந்தனம் ஸாதி³யதா²தி நிமந்தனப⁴த்தம் படிக்³க³ண்ஹத². யானீதி கும்மாஸாதீ³னி தேஹி பி⁴க்கூ²ஹி ஏகேன பச்சா² க³ஹிதத்தா ஏகதோ ந க³ஹிதானி. ப⁴த்துத்³தே³ஸகேன பண்டி³தேன ப⁴விதப்³ப³ம்…பே… மோசேதப்³பா³தி ஏதேன ப⁴த்துத்³தே³ஸகேன அகப்பியனிமந்தனே ஸாதி³தே ஸப்³பே³ஸம்பி ஸாதி³தம் ஹோதி, ஏகதோ க³ண்ஹந்தானம் க³ணபோ⁴ஜனாபத்தி ச ஹோதீதி த³ஸ்ஸேதி. தூ³தஸ்ஸ த்³வாரே ஆக³ந்த்வா புன ‘‘ப⁴த்தம் க³ண்ஹதா²’’தி வசனப⁴யேன ‘‘கா³மத்³வாரே அட்ட²த்வா’’தி வுத்தம். தத்த² தத்த² க³ந்த்வாதி அந்தரவீதி²ஆதீ³ஸு தத்த² தத்த² டி²தானம் ஸந்திகம் க³ந்த்வா. பி⁴க்கூ²னம் அத்தா²ய க⁴ரத்³வாரே ட²பேத்வா தீ³யமானேபி ஏஸேவ நயோ. நிவத்ததா²தி வுத்தே பன நிவத்திதும் வட்டதீதி ‘‘நிவத்ததா²’’தி விச்சி²ந்தி³த்வா பச்சா² ‘‘ப⁴த்தம் க³ண்ஹதா²’’தி வுத்தத்தா வட்டதி.

பரம்பரபோ⁴ஜனகதா²

2. பரம்பரபோ⁴ஜனகதா²யம் பன பரஸ்ஸ பரஸ்ஸ போ⁴ஜனம் பரம்பரபோ⁴ஜனம். கிம் தம்? பட²மம் நிமந்திதப⁴த்தம் ட²பேத்வா அஞ்ஞஸ்ஸ போ⁴ஜனகிரியா. பரம்பரபோ⁴ஜனம் க³ணபோ⁴ஜனம் விய விஞ்ஞத்திதோ ச நிமந்தனதோ ச ந பஸவதீதி ஆஹ ‘‘பரம்பரபோ⁴ஜனம் பனா’’திஆதி³. பன-ஸத்³தோ³ விஸேஸத்த²ஜோதகோ. விகப்பனாவஸேனேவ தம் ப⁴த்தம் அஸந்தம் நாம ஹோதீதி அனுபஞ்ஞத்திவஸேன விகப்பனம் அட்ட²பேத்வா யதா²பஞ்ஞத்தஸிக்கா²பத³மேவ ட²பிதம். பரிவாரே (பரி. 86) பன விகப்பனாயம் அனுஜானனம்பி அனுபஞ்ஞத்திஸதி³ஸந்தி கத்வா ‘‘சதஸ்ஸோ அனுபஞ்ஞத்தியோ’’தி வுத்தம், மஹாபச்சரியாதீ³ஸு வுத்தனயம் பச்சா² வத³ந்தோ பாளியா ஸம்ஸந்த³னதோ பரம்முகா²விகப்பனமேவ பதிட்டா²பேதி. கேசி பன ‘‘ததா³ அத்தனோ ஸந்திகே ட²பேத்வா ப⁴க³வந்தம் அஞ்ஞஸ்ஸ அபா⁴வதோ தே²ரோ ஸம்முகா²விகப்பனம் நாகாஸி, ப⁴க³வதா ச விஸும் ஸம்முகா²விகப்பனா ந வுத்தா, ததா²பி ஸம்முகா²விகப்பனாபி வட்டதீ’’தி வத³ந்தி. தேனேவ மாதிகாட்ட²கதா²யம்பி (கங்கா². அட்ட². பரம்பரபோ⁴ஜனஸிக்கா²பத³வண்ணனா) ‘‘யோ பி⁴க்கு² பஞ்சஸு ஸஹத⁴ம்மிகேஸு அஞ்ஞதரஸ்ஸ ‘மய்ஹம் ப⁴த்தபச்சாஸம் துய்ஹம் த³ம்மீ’தி வா ‘விகப்பேமீ’தி வா ஏவம் ஸம்முகா² வா ‘இத்த²ன்னாமஸ்ஸ த³ம்மீ’தி வா ‘விகப்பேமீ’தி வா ஏவம் பரம்முகா² வா பட²மனிமந்தனம் அவிகப்பேத்வா பச்சா² நிமந்திதகுலே லத்³த⁴பி⁴க்க²தோ ஏகஸித்த²ம்பி அஜ்ஜோ²ஹரதி, பாசித்திய’’ந்தி வுத்தம்.

பஞ்சஹி போ⁴ஜனேஹி நிமந்திதஸ்ஸ யேன யேன பட²மம் நிமந்திதோ, தஸ்ஸ தஸ்ஸ போ⁴ஜனதோ உப்படிபாடியா அவிகப்பேத்வா வா பரஸ்ஸ பரஸ்ஸ போ⁴ஜனம் பரம்பரபோ⁴ஜனந்தி ஆஹ ‘‘ஸசே பன மூலனிமந்தனம் ஹேட்டா² ஹோதி, பச்சி²மம் பச்சி²மம் உபரி, தம் உபரிதோ பட்டா²ய பு⁴ஞ்ஜந்தஸ்ஸ ஆபத்தீ’’தி. ஹத்த²ம் அந்தோ பவேஸேத்வா ஸப்³ப³ஹேட்டி²மம் க³ண்ஹந்தஸ்ஸ மஜ்ஜே² டி²தம்பி அந்தோஹத்த²க³தம் ஹோதீதி ஆஹ ‘‘ஹத்த²ம் பன…பே… யதா² யதா² வா பு⁴ஞ்ஜந்தஸ்ஸ அனாபத்தீ’’தி. கீ²ரஸ்ஸ ரஸஸ்ஸ ச ப⁴த்தேன அமிஸ்ஸம் ஹுத்வா உபரி டி²தத்தா ‘‘கீ²ரம் வா ரஸம் வா பிவதோ அனாபத்தீ’’தி வுத்தம்.

‘‘மஹாஉபாஸகோதி கே³ஹஸ்ஸாமிகோ. மஹாஅட்ட²கதா²யம் ‘ஆபத்தீ’தி வசனேன குருந்தி³யம் ‘வட்டதீ’தி வசனம் விருத்³த⁴ம் விய தி³ஸ்ஸதி. த்³வின்னம்பி அதி⁴ப்பாயோ மஹாபச்சரியம் விபா⁴விதோ’’தி மஹாக³ண்டி²பதே³ வுத்தம்.

ஸப்³பே³ நிமந்தேந்தீதி அகப்பியனிமந்தனவஸேன நிமந்தேந்தி. ‘‘பரம்பரபோ⁴ஜனம் நாம பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதோ, தம் ட²பேத்வா அஞ்ஞம் பஞ்சன்னம் போ⁴ஜனானம் அஞ்ஞதரம் போ⁴ஜனம் பு⁴ஞ்ஜதி, ஏதம் பரம்பரபோ⁴ஜனம் நாமா’’தி வுத்தத்தா ஸதிபி பி⁴க்கா²சரியாய பட²மம் லத்³த⁴பா⁴வே ‘‘பிண்டா³ய சரித்வா லத்³த⁴ம் ப⁴த்தம் பு⁴ஞ்ஜதி, ஆபத்தீ’’தி வுத்தம்.

விமதிவினோத³னியம் (வி. வி. டீ. பாசித்திய 2.229) பன ‘‘கீ²ரம் வா ரஸம் வாதி பஞ்சபோ⁴ஜனாமிஸ்ஸம் ப⁴த்ததோ உபரி டி²தம் ஸந்தா⁴ய வுத்தம். தஞ்ஹி அபோ⁴ஜனத்தா உப்படிபாடியா பிவதோபி அனாபத்தி. தேனாஹ ‘பு⁴ஞ்ஜந்தேனா’திஆதீ³’’தி வுத்தம். வஜிரபு³த்³தி⁴டீகாயம் (வஜிர. டீ. பாசித்திய 229) பன ‘‘ஏத்த² ‘மஹாஉபாஸகோ பி⁴க்கூ² நிமந்தேதி…பே… பச்சா² லத்³த⁴ம் ப⁴த்தம் பு⁴ஞ்ஜந்தஸ்ஸ ஆபத்தி. பிண்டா³ய சரித்வா லத்³த⁴ப⁴த்தம் பு⁴ஞ்ஜதி, ஆபத்தீ’தி அட்ட²கதா²யம் வசனதோ, ‘காலஸ்ஸேவ பிண்டா³ய சரித்வா பு⁴ஞ்ஜிம்ஹா’தி பாளிதோ, க²ந்த⁴கே ‘ந ச, பி⁴க்க²வே, அஞ்ஞத்ர நிமந்தனே அஞ்ஞஸ்ஸ போ⁴ஜ்ஜயாகு³ பரிபு⁴ஞ்ஜிதப்³பா³, யோ பு⁴ஞ்ஜேய்ய, யதா²த⁴ம்மோ காரேதப்³போ³’தி வசனதோ ச நிமந்தேத்வா வா பவேதே³து அனிமந்தேத்வா வா, பட²மக³ஹிதனிமந்திதஸ்ஸ பி⁴க்கு²னோ பட²மனிமந்தனபோ⁴ஜனதோ அஞ்ஞம் யம் கிஞ்சி பரஸந்தகம் போ⁴ஜனம் பரம்பரபோ⁴ஜனாபத்திம் கரோதி. அத்தனோ ஸந்தகம், ஸங்க⁴க³ணதோ லத்³த⁴ம் வா அக³ஹட்ட²ஸந்தகம் வட்டதி, நிமந்தனதோ பட²மம் நிப³த்³த⁴த்தா பன நிச்சப⁴த்தாதி³பரஸந்தகம்பி வட்டதீ’’தி வுத்தம்.

அனாபுச்சா²கதா²

3. அனாபுச்சா²கதா²யம் ‘‘பகதிவசனேனாதி ஏத்த² யம் த்³வாத³ஸஹத்த²ப்³ப⁴ந்தரே டி²தேன ஸோதும் ஸக்கா ப⁴வேய்ய, தம் பகதிவசனம் நாம. ஆபுச்சி²தப்³போ³தி ‘அஹம் இத்த²ன்னாமஸ்ஸ க⁴ரம் க³ச்சா²மீ’தி வா ‘சாரித்தகம் ஆபஜ்ஜாமீ’தி வா ஈதி³ஸேன வசனேன ஆபுச்சி²தப்³போ³. ஸேஸமேத்த² உத்தானமேவ. பஞ்சன்னம் போ⁴ஜனானம் அஞ்ஞதரேன நிமந்தனஸாதி³யனம், ஸந்தம் பி⁴க்கு²ம் அனாபுச்சா², ப⁴த்தியக⁴ரதோ அஞ்ஞக⁴ரப்பவேஸனம், மஜ்ஜ²ன்ஹிகானதிக்கமோ, ஸமயஸ்ஸ வா ஆபதா³னம் வா அபா⁴வோதி இமானி பனேத்த² பஞ்ச அங்கா³னீ’’தி ஸாரத்த²தீ³பனியம் (ஸாரத்த². டீ. பாசித்திய 3.298) ஏத்தகமேவ வுத்தம், விமதிவினோத³னியம் (வி. வி. டீ. பசித்திய 2.298) பன ‘‘பரியேஸித்வா ஆரோசனகிச்சம் நத்தீ²தி வுத்தத்தா யோ அபரியேஸிதப்³போ³ உபஸங்கமிதும் யுத்தட்டா²னே தி³ஸ்ஸதி, ஸோ ஸசேபி பகதிவசனஸ்ஸ ஸவனூபசாரம் அதிக்கம்ம டி²தோ, உபஸங்கமித்வா ஆபுச்சி²தப்³போ³. தேனாஹ ‘அபிச…பே… யம் பஸ்ஸதி, ஸோ ஆபுச்சி²தப்³போ³’திஆதி³. அனாபத்திவாரே சேத்த² அந்தராராமாதீ³னஞ்ஞேவ வுத்தத்தா விஹாரதோ கா³மவீதி²ம் அனுஞ்ஞாதகாரணம் வினா அதிக்கமந்தஸ்ஸாபி ஆபத்தி ஹோதி, ந பன க⁴ரூபசாரம் அதிக்கமந்தஸ்ஸேவ. யம் பன பாளியம் ‘அஞ்ஞஸ்ஸ க⁴ரூபசாரம் ஓக்கமந்தஸ்ஸ…பே… பட²மபாத³ம் உம்மாரம் அதிக்காமேதீ’திஆதி³ வுத்தம், தம் கா³மே பவிட்ட²ம் ஸந்தா⁴ய வுத்தம், ததா²பி அஞ்ஞஸ்ஸ க⁴ரூபசாரம் அனோக்கமித்வா வீதி²மஜ்ஜே²னேவ க³ந்த்வா இச்சி²திச்சி²தக⁴ரத்³வாராபி⁴முகே² ட²த்வா மனுஸ்ஸே ஓலோகேத்வா க³ச்ச²ந்தஸ்ஸபி பாசித்தியமேவ. தத்த² கேசி ‘வீதி²யம் அதிக்கமந்தஸ்ஸ க⁴ரூபசாரக³ணனாய ஆபத்தியோ’தி வத³ந்தி. அஞ்ஞே பன ‘யானி குலானி உத்³தி³ஸ்ஸ க³தோ, தேஸம் க³ணனாயா’தி. பஞ்சன்னம் போ⁴ஜனானம் அஞ்ஞதரேன நிமந்தனஸாதி³யனம், ஸந்தம் பி⁴க்கு²ம் அனாபுச்ச²னா, ப⁴த்தியக⁴ரதோ அஞ்ஞக⁴ரூபஸங்கமனம், மஜ்ஜ²ன்ஹிகானதிக்கமோ, ஸமயாபதா³னம் அபா⁴வோதி இமானேத்த² பஞ்ச அங்கா³னீ’’தி. விகாலகா³மப்பவேஸனேபி ‘‘அபரிக்கி²த்தஸ்ஸ கா³மஸ்ஸ உபசாரோ அதி³ன்னாதா³னே வுத்தனயேனேவ வேதி³தப்³போ³’’தி இமினா து³தியலேட்³டு³பாதோ இத⁴ உபசாரோதி த³ஸ்ஸேதி. ஸேஸமேத்த² உத்தானமேவ. ஸந்தம் பி⁴க்கு²ம் அனாபுச்ச²னா, அனுஞ்ஞாதகாரணாபா⁴வோ, விகாலே கா³மப்பவேஸனந்தி இமானி பனேத்த² தீணி அங்கா³னி.

பம்ஸுகூலகதா²

4. பம்ஸுகூலகதா²யம் அபி⁴ன்னே ஸரீரேதி அப்³பு⁴ண்ஹே அல்லஸரீரே. ‘‘அப்³பு⁴ண்ஹே’’தி இமினாபி வுத்தமேவ பரியாயபே⁴த³மந்தரேன விபா⁴வேதும் ‘‘அல்லஸரீரே’’தி வுத்தம்.

விஸபா⁴க³ஸரீரேதி இத்தி²ஸரீரே. விஸபா⁴க³ஸரீரத்தா அச்சாஸன்னேன ந ப⁴விதப்³ப³ந்தி ஆஹ ‘‘ஸீஸே வா’’திஆதி³. வட்டதீதி விஸபா⁴க³ஸரீரேபி அத்தனாவ வுத்தவிதி⁴ம் காதும் ஸாடகஞ்ச க³ஹேதும் வட்டதி. கேசி பன ‘‘கிஞ்சாபி இமினா ஸிக்கா²பதே³ன அனாபத்தி, இத்தி²ரூபம் பன ஆமஸந்தஸ்ஸ து³க்கட’’ந்தி வத³ந்தி. ‘‘யதா²கம்மம் க³தோதி ததோ பேதத்தபா⁴வதோ மதபா⁴வம் த³ஸ்ஸேதி. அப்³பு⁴ண்ஹேதி ஆஸன்னமரணதாய ஸரீரஸ்ஸ உண்ஹஸமங்கி³தம் த³ஸ்ஸேதி, தேனேவாஹ ‘அல்லஸரீரே’தி. குணபஸபா⁴வம் உபக³தம்பி பி⁴ன்னமேவ அல்லபா⁴வதோ பி⁴ன்னத்தா. விஸபா⁴க³ஸரீரேதி இத்தி²ஸரீரே. ‘ஸீஸே வா’திஆதி³ அத⁴க்க²கே உப்³ப⁴ஜாணுமண்ட³லே பதே³ஸே சித்தவிகாரப்பத்திம் ஸந்தா⁴ய வுத்தம், யத்த² கத்த²சி அனாமஸந்தேன கதம் ஸுகதமேவ. மதஸரீரம்பி ஹி யேன கேனசி ஆகாரேன ஸஞ்சிச்ச பு²ஸந்தஸ்ஸ அனாமாஸது³க்கடமேவாதி வத³ந்தி, தம் யுத்தமேவ. ந ஹி அபாராஜிகவத்து²கேபி சித்தாதி³இத்தி²ரூபே ப⁴வந்தம் து³க்கடம் பாராஜிகவத்து²பூ⁴தே மதித்தி²ஸரீரே நிவத்ததீ’’தி விமதிவினோத³னியம் (வி. வி. டீ. 1.135) வுத்த.

இமஸ்மிம் டா²னே ஆசரியேன அவுத்தாபி பம்ஸுகூலகதா² பம்ஸுகூலஸாமஞ்ஞேன வேதி³தப்³பா³. ஸா ஹி சீவரக்க²ந்த⁴கே (மஹாவ. 340) ஏவம் ஆக³தா ‘‘தேன கோ² பன ஸமயேன யே தே பி⁴க்கூ² க³ஹபதிசீவரம் ஸாதி³யந்தி, தே குக்குச்சாயந்தா பம்ஸுகூலம் ந ஸாதி³யந்தி ‘ஏகம்யேவ ப⁴க³வதா சீவரம் அனுஞ்ஞாதம், ந த்³வே’தி. ப⁴க³வதோ ஏதமத்த²ம் ஆரோசேஸும் – அனுஜானாமி, பி⁴க்க²வே, க³ஹபதிசீவரம் ஸாதி³யந்தேன பம்ஸுகூலம்பி ஸாதி³யிதும், தது³ப⁴யேனபாஹம், பி⁴க்க²வே, ஸந்துட்டி²ம் வண்ணேமீ’’தி. தத்த² ‘‘ஏகம்யேவ ப⁴க³வதா சீவரம் அனுஞ்ஞாதம், ந த்³வேதி தே ‘கிர இதரீதரேன சீவரேனா’தி ஏதஸ்ஸ ‘க³ஹபதிகேன வா பம்ஸுகூலேன வா’தி ஏவம் அத்த²ம் ஸல்லக்கி²ம்ஸு. தத்த² பன இதரீதரேனபீதி அப்பக்³கே⁴னபி மஹக்³கே⁴னபி யேன கேனசீதி அத்தோ²’’தி அட்ட²கதா²யம் வுத்தோ, தஸ்மா து⁴தங்க³ம் அஸமாதி³யித்வா வினயபம்ஸுகூலமத்தஸாதி³யகேன பி⁴க்கு²னா க³ஹபதிசீவரம்பி ஸாதி³தப்³ப³ம் ஹோதி, பம்ஸுகூலது⁴தங்க³த⁴ரஸ்ஸ பன க³ஹபதிசீவரம் ந வட்டதி ‘‘க³ஹபதிசீவரம் படிக்கி²பாமி, பம்ஸுகூலிகங்க³ம் ஸமாதி³யாமீ’’தி ஸமாதா³னதோதி த³ட்ட²ப்³ப³ம்.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ஸு அத்³தா⁴னமக்³க³ப்படிபன்னா ஹோந்தி. ஏகச்சே பி⁴க்கூ² ஸுஸானம் ஓக்கமிம்ஸு பம்ஸுகூலாய, ஏகச்சே பி⁴க்கூ² நாக³மேஸும். யே தே பி⁴க்கூ² ஸுஸானம் ஓக்கமிம்ஸு பம்ஸுகூலாய, தே பம்ஸுகூலானி லபி⁴ம்ஸு. யே தே பி⁴க்கூ² நாக³மேஸும், தே ஏவமாஹம்ஸு ‘‘அம்ஹாகம்பி, ஆவுஸோ, பா⁴க³ம் தே³தா²’’தி. தே ஏவமாஹம்ஸு ‘‘ந மயம், ஆவுஸோ, தும்ஹாகம் பா⁴க³ம் த³ஸ்ஸாம, கிஸ்ஸ தும்ஹே நாக³மித்தா²’’தி. ப⁴க³வதோ ஏதமத்த²ம் ஆரோசேஸும் – அனுஜானாமி, பி⁴க்க²வே, நாக³மேந்தானம் நாகாமா பா⁴க³ம் தா³துந்தி. தத்த² நாக³மேஸுந்தி யாவ தே ஸுஸானதோ ஆக³ச்ச²ந்தி, தாவ தே ந அச்சி²ம்ஸு, பக்கமிம்ஸுயேவ. நாகாமா பா⁴க³ம் தா³துந்தி ந அனிச்சா²ய தா³தும். யதி³ பன இச்ச²ந்தி, தா³தப்³போ³.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ஸு அத்³தா⁴னமக்³க³ப்படிபன்னா ஹோந்தி. ஏகச்சே பி⁴க்கூ² ஸுஸானம் ஓக்கமிம்ஸு பம்ஸுகூலாய, ஏகச்சே பி⁴க்கூ² ஆக³மேஸும். யே தே பி⁴க்கூ² ஸுஸானம் ஓக்கமிம்ஸு பம்ஸுகூலாய, தே பம்ஸுகூலானி லபி⁴ம்ஸு. யே தே பி⁴க்கூ² ஆக³மேஸும், தே ஏவமாஹம்ஸு ‘‘அம்ஹாகம்பி, ஆவுஸா,ஏ பா⁴க³ம் தே³தா²’’தி. தே ஏவமாஹம்ஸு ‘‘ந மயம், ஆவுஸோ, தும்ஹாகம் பா⁴க³ம் த³ஸ்ஸாம, கிஸ்ஸ தும்ஹே ந ஓக்கமித்தா²’’தி. ப⁴க³வதோ ஏதமத்த²ம் ஆரோசேஸும் – அனுஜானாமி, பி⁴க்க²வே, ஆக³மேந்தானம் அகாமா பா⁴க³ம் தா³துந்தி.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ஸு அத்³தா⁴னமக்³க³ப்படிபன்னா ஹோந்தி. ஏகச்சே பி⁴க்கூ² பட²மம் ஸுஸானம் ஓக்கமிம்ஸு பம்ஸுகூலாய, ஏகச்சே பி⁴க்கூ² பச்சா² ஓக்கமிம்ஸு. யே தே பி⁴க்கூ² பட²மம் ஸுஸானம் ஓக்கமிம்ஸு பம்ஸுகூலாய, தே பம்ஸுகூலானி லபி⁴ம்ஸு. யே தே பி⁴க்கூ² பச்சா² ஓக்கமிம்ஸு, தே ந லபி⁴ம்ஸு. தே ஏவமாஹம்ஸு ‘‘அம்ஹாகம்பி, ஆவுஸோ, பா⁴க³ம் தே³தா²’’தி. தே ஏவமாஹம்ஸு ‘‘ந மயம், ஆவுஸோ, தும்ஹாகம் பா⁴க³ம் த³ஸ்ஸாம, கிஸ்ஸ தும்ஹே பச்சா² ஓக்கமித்தா²’’தி. ப⁴க³வதோ ஏதமத்த²ம் ஆரோசேஸும் – அனுஜானாமி, பி⁴க்க²வே, பச்சா² ஓக்கந்தானம் நாகாமா பா⁴க³ம் தா³துந்தி.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ஸு அத்³தா⁴னமக்³க³ப்படிபன்னா ஹோந்தி. தே ஸதி³ஸா ஸுஸானம் ஓக்கமிம்ஸு பம்ஸுகூலாய. ஏகச்சே பி⁴க்கூ² பம்ஸுகூலானி லபி⁴ம்ஸு, ஏகச்சே பி⁴க்கூ² ந லபி⁴ம்ஸு. யே தே பி⁴க்கூ² ந லபி⁴ம்ஸு, தே ஏவமாஹம்ஸு ‘‘அம்ஹாகம்பி, ஆவுஸோ, பா⁴க³ம் தே³தா²’’தி. தே ஏவமாஹம்ஸு ‘‘ந மயம், ஆவுஸோ, தும்ஹாகம் பா⁴க³ம் த³ஸ்ஸாம, கிஸ்ஸ தும்ஹே ந லபி⁴த்தா²’’தி. ப⁴க³வதோ ஏதமத்த²ம் ஆரோசேஸும் – அனுஜானாமி, பி⁴க்க²வே, ஸதி³ஸானம் ஓக்கந்தானம் அகாமா பா⁴க³ம் தா³துந்தி.

தத்த² ஆக³மேஸுந்தி உபசாரே அச்சி²ம்ஸு. தேனாஹ ப⁴க³வா ‘‘அனுஜானாமி, பி⁴க்க²வே, ஆக³மேந்தானம் அகாமா பா⁴க³ம் தா³து’’ந்தி. உபசாரேதி ஸுஸானஸ்ஸ ஆஸன்னப்பதே³ஸே. யதி³ பன மனுஸ்ஸா ‘‘இதா⁴க³தா ஏவ க³ண்ஹந்தூ’’தி தே³ந்தி, ஸஞ்ஞாணம் வா கத்வா க³ச்ச²ந்தி ‘‘ஸம்பத்தா க³ண்ஹந்தூ’’தி. ஸம்பத்தானம் ஸப்³பே³ஸம்பி பாபுணாதி. ஸசே ச²ட்³டே³த்வா க³தா, யேன க³ஹிதம், ஸோ ஏவ ஸாமீ. ஸதி³ஸா ஸுஸானம் ஓக்கமிம்ஸூதி ஸப்³பே³ ஸமம் ஓக்கமிம்ஸு, ஏகதி³ஸாய வா ஓக்கமிம்ஸூதிபி அத்தோ².

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ஸு அத்³தா⁴னமக்³க³ப்படிபன்னா ஹோந்தி. தே கதிகம் கத்வா ஸுஸானம் ஓக்கமிம்ஸு பம்ஸுகூலாய. ஏகச்சே பி⁴க்கூ² பம்ஸுகூலானி லபி⁴ம்ஸு, ஏகச்சே பி⁴க்கூ² ந லபி⁴ம்ஸு. யே தே பி⁴க்கூ² ந லபி⁴ம்ஸு, தே ஏவமாஹம்ஸு ‘‘அம்ஹாகம்பி, ஆவுஸோ, பா⁴க³ம் தே³தா²’’தி. தே ஏவமாஹம்ஸு ‘‘ந மயம், ஆவுஸோ, தும்ஹாகம் பா⁴க³ம் த³ஸ்ஸாம, கிஸ்ஸ தும்ஹே ந லபி⁴த்தா²’’தி. ப⁴க³வதோ ஏதமத்த²ம் ஆரோசேஸும் – அனுஜானாமி, பி⁴க்க²வே, கதிகம் கத்வா ஓக்கந்தானம் அகாமா பா⁴க³ம் தா³துந்தி. தத்த² தே கதிகம் கத்வாதி ‘‘லத்³த⁴ம் பம்ஸுகூலம் ஸப்³பே³ பா⁴ஜேத்வா க³ண்ஹிஸ்ஸாமா’’தி ப³ஹிமேவ கதிகம் கத்வா. ச²ட்³டே³த்வா க³தாதி கிஞ்சி அவத்வாயேவ ச²ட்³டே³த்வா க³தா. ஏதேன ‘‘பி⁴க்கூ² க³ண்ஹந்தூ’’தி ச²ட்³டி³தே ஏவ அகாமா பா⁴க³தா³னம் விஹிதம், கேவலம் ச²ட்³டி³தே பன கதிகாய அஸதி ஏகதோ ப³ஹூஸு பவிட்டே²ஸு யேன க³ஹிதம், தேன அகாமா பா⁴கோ³ ந தா³தப்³போ³தி த³ஸ்ஸேதி. ஸமானா தி³ஸா புரத்தி²மாதி³பே⁴தா³ ஏதேஸந்தி ஸதி³ஸாதி ஆஹ ‘‘ஏகதி³ஸாய வா ஓக்கமிம்ஸூ’’தி.

அச்சி²ன்னசீவரகதா²

5. அச்சி²ன்னசீவரகதா²யம் அனுபுப்³ப³கதா²தி அனுபுப்³பே³ன வினிச்ச²யகதா². ஸேஸபரிக்கா²ரானம் ஸத்³தி⁴விஹாரிகேஹி க³ஹிதத்தா நிவாஸனபாருபனமேவ அவஸிட்ட²ந்தி ஆஹ ‘‘நிவாஸனபாருபனமத்தம்யேவ ஹரித்வா’’தி. ஸத்³தி⁴விஹாரிகானம் தாவ ஆக³மனஸ்ஸ வா அனாக³மனஸ்ஸ வா அஜானனதாய வுத்தம் ‘‘தே²ரேஹி நேவ தாவ…பே… பு⁴ஞ்ஜிதப்³ப³’’ந்தி. பரேஸம்பி அத்தா²ய லப⁴ந்தீதி அத்தனோ சீவரம் த³த³மானா ஸயம் ஸாகா²ப⁴ங்கே³ன படிச்சா²தே³ந்தீதி தேஸம் அத்தா²யபி ப⁴ஞ்ஜிதும் லப⁴ந்தி. ‘‘திணேன வா பண்ணேன வா படிச்சா²தே³த்வா ஆக³ந்தப்³ப³’’ந்தி வசனதோ ஈதி³ஸேஸு பூ⁴தகா³மபாதப்³யதாபி அனுஞ்ஞாதாயேவ ஹோதீதி ஆஹ ‘‘நேவ பூ⁴தகா³மபாதப்³யதாய பாசித்தியம் ஹோதீ’’தி. ந தேஸம் தா⁴ரணே து³க்கடந்தி தேஸம் தித்தி²யத⁴ஜானம் தா⁴ரணேபி து³க்கடம் நத்தி².

யானி ச நேஸம் வத்தா²னி தே³ந்தீதி ஸம்ப³ந்தோ⁴. தே²ரானம் ஸயமேவ தி³ன்னத்தா வுத்தம் ‘‘அச்சி²ன்னசீவரட்டா²னே டி²தத்தா’’தி. யதி³ லத்³தி⁴ம் க³ண்ஹாதி, தித்தி²யபக்கந்தகோ நாம ஹோதி. தஸ்மா வுத்தம் ‘‘லத்³தி⁴ம் அக்³க³ஹேத்வா’’தி. ‘‘நோ சே ஹோதி, ஸங்க⁴ஸ்ஸ விஹாரசீவரம் வா…பே… ஆபத்தி து³க்கடஸ்ஸா’’தி இமினா அந்தராமக்³கே³ பவிட்ட²விஹாரதோ நிக்க²மித்வா அஞ்ஞத்த² அத்தனோ அபி⁴ருசிதட்டா²னம் க³ச்ச²ந்தஸ்ஸ து³க்கடம் வுத்தம், இமினா ச ‘‘யம் ஆவாஸம் பட²மம் உபக³ச்ச²தீ’’தி வுத்தம் அந்தராமக்³கே³ டி²தவிஹாரம்பி ஸசே நக்³கோ³ ஹுத்வா க³ச்ச²தி, து³க்கடமேவாதி வேதி³தப்³ப³ம். யதி³ ஏவம் தத்த² கஸ்மா ந வுத்தந்தி சே? அனோகாஸத்தா. தத்த² ஹி ‘‘அனுஜானாமி, பி⁴க்க²வே, அச்சி²ன்னசீவரஸ்ஸ வா…பே… சீவரம் விஞ்ஞாபேது’’ந்தி இமினா ஸம்ப³ந்தே⁴ன ஸங்கி⁴கம்பி சீவரம் நிவாஸேதும் பாருபிதுஞ்ச அனுஜானந்தோ ‘‘யம் ஆவாஸம் பட²மம்…பே… க³ஹேத்வா பாருபிது’’ந்தி ஆஹ, தஸ்மா தத்த² அனோகாஸத்தா து³க்கடம் ந வுத்தம்.

விஹாரசீவரந்தி ஸேனாஸனசீவரம். சிமிலிகாஹீதி படபிலோதிகாஹி. தஸ்ஸ உபரீதி பூ⁴மத்த²ரணஸ்ஸ உபரி. விதே³ஸக³தேனாதி அஞ்ஞம் சீவரம் அலபி⁴த்வா விதே³ஸக³தேன. ஏகஸ்மிம்…பே… ட²பேதப்³ப³ந்தி ஏத்த² ஸேஸேன க³ஹேத்வா ஆக³தத்தா ட²பேந்தேன ச ஸங்கி⁴கபரிபோ⁴க³வஸேனேவ ட²பிதத்தா அஞ்ஞஸ்மிம் ஸேனாஸனே நியமிதம்பி அஞ்ஞத்த² ட²பேதும் வட்டதீதி வத³ந்தி. பரிபோ⁴கே³னேவாதி அஞ்ஞம் சீவரம் அலபி⁴த்வா பரிபு⁴ஞ்ஜனேன.

பரிபோ⁴க³ஜிண்ணந்தி யதா² தேன சீவரேன ஸரீரம் படிச்சா²தே³தும் ந ஸக்கா, ஏவம் ஜிண்ணம். கப்பியவோஹாரேனாதி கயவிக்கயாபத்திதோ மோசனத்த²ம் வுத்தம். ‘‘விஞ்ஞாபேந்தஸ்ஸா’’தி இமஸ்ஸேவ அத்த²ம் விபா⁴வேதி ‘‘சேதாபேந்தஸ்ஸ பரிவத்தாபேந்தஸ்ஸா’’தி. அத்தனோ த⁴னேன ஹி விஞ்ஞாபனம் நாம பரிவத்தனமேவாதி அதி⁴ப்பாயோ. ஸங்க⁴வஸேன பவாரிதானம் விஞ்ஞாபனே வத்தம் த³ஸ்ஸேதி ‘‘பமாணமேவ வட்டதீ’’தி. ஸங்க⁴வஸேன ஹி பவாரிதே ஸப்³பே³ஸம் ஸாதா⁴ரணத்தா அதி⁴கம் விஞ்ஞாபேதும் ந வட்டதி. யம் யம் பவாரேதீதி யம் யம் சீவராதி³ம் த³ஸ்ஸாமீதி பவாரேதி. விஞ்ஞாபனகிச்சம் நத்தீ²தி வினா விஞ்ஞத்தியா தீ³யமானத்தா விஞ்ஞாபேத்வா கிம் கரிஸ்ஸதீதி அதி⁴ப்பாயோ. அஞ்ஞஸ்ஸத்தா²யாதி ஏத்த²பி ‘‘ஞாதகானம் பவாரிதான’’ந்தி இத³ம் அனுவத்ததியேவாதி ஆஹ ‘‘அத்தனோ ஞாதகபவாரிதே’’திஆதி³. விகப்பனுபக³சீவரதா, ஸமயாபா⁴வோ, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி.

விமதிவினோத³னியம் (வி. வி. டீ. 1.515) பன பாளியம் த⁴ம்மனிமந்தனாதி ஸமணேஸு வத்தப்³பா³சாரத⁴ம்மமத்தவஸேன நிமந்தனா, தா³துகாமதாய கதனிமந்தனா ந ஹோதீதி அத்தோ². தேனேவ ‘‘விஞ்ஞாபேஸ்ஸதீ’’தி வுத்தம். அஞ்ஞாதகஅப்பவாரிததோ ஹி விஞ்ஞத்தி நாம ஹோதி.

‘‘திணேன வா பண்ணேன வா படிச்சா²தே³த்வா ஆக³ந்தப்³ப³’’ந்தி இமினா பூ⁴தகா³மவிகோபனம் அனுஞ்ஞாதந்தி ஆஹ ‘‘நேவபூ⁴தகா³மபாதப்³யதாயா’’திஆதி³. பட²மம் ஸுத்³த⁴சித்தேன லிங்க³ம் க³ஹேத்வா பச்சா² லத்³தி⁴ம் க³ண்ஹந்தோபி தித்தி²யபக்கந்தகோ ஏவாதி ஆஹ ‘‘நிவாஸேத்வாபி லத்³தி⁴ ந க³ஹேதப்³பா³’’தி.

யம் ஆவாஸம் பட²மம் உபக³ச்ச²தீதி ஏத்த²பி விஹாரசீவராதி³அத்தா²ய பவிஸந்தேனபி திணாதீ³ஹி படிச்சா²தே³த்வாவ க³ந்தப்³ப³ம், ‘‘ந த்வேவ நக்³கே³ன ஆக³ந்தப்³ப³’’ந்தி ஸாமஞ்ஞதோ து³க்கடஸ்ஸ வுத்தத்தா. சிமிலிகாஹீதி படபிலோதிகாஹி. பரிபோ⁴கே³னேவாதி அஞ்ஞம் சீவரம் அலபி⁴த்வா பரிபு⁴ஞ்ஜனேன. பரிபோ⁴க³ஜிண்ணந்தி யதா² தம் சீவரம் பரிபு⁴ஞ்ஜியமானம் ஓப⁴க்³க³விப⁴க்³க³தாய அஸாருப்பம் ஹோதி, ஏவம் ஜிண்ணம்.

அஞ்ஞஸ்ஸத்தா²யாதி ஏத்த²பி ‘‘ஞாதகானம் பவாரிதான’’ந்தி இத³ம் அனுவத்ததேவாதி ஆஹ ‘‘அத்தனோ ஞாதகபவாரிதே’’திஆதி³. இத⁴ பன அஞ்ஞஸ்ஸ அச்சி²ன்னனட்ட²சீவரஸ்ஸ அத்தா²ய அஞ்ஞாதகஅப்பவாரிதே விஞ்ஞாபேந்தஸ்ஸ நிஸ்ஸக்³கி³யேன அனாபத்தீதி அத்தோ² க³ஹேதப்³போ³, இதரதா² ‘‘ஞாதகானம் பவாரிதான’’ந்தி இமினா விஸேஸோ ந ப⁴வேய்ய, தேனேவ அனந்தரஸிக்கா²பதே³ வக்க²தி ‘‘அட்ட²கதா²ஸு (பாரா. அட்ட². 2.526) பன ஞாதகபவாரிதட்டா²னே…பே… பமாணமேவ வட்டதீதி வுத்தம், தம் பாளியா ந ஸமேதீ’’தி ச ‘‘யஸ்மா பனித³ம் ஸிக்கா²பத³ம் அஞ்ஞஸ்ஸத்தா²ய விஞ்ஞாபனவத்து²ஸ்மிம்யேவ பஞ்ஞத்தம், தஸ்மா இத⁴ ‘அஞ்ஞஸ்ஸத்தா²யா’தி ந வுத்த’’ந்தி ச. விகப்பனுபக³சீவரதா, ஸமயாபா⁴வோ, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி.

‘‘தஞ்சே அஞ்ஞாதகோ க³ஹபதி வா க³ஹபதானீ வா ப³ஹூஹி சீவரேஹி அபி⁴ஹட்டு²ம் பவாரேய்ய, ஸந்தருத்தரபரமம் தேன பி⁴க்கு²னா ததோ சீவரம் ஸாதி³தப்³ப³ம், ததோ சே உத்தரி ஸாதி³யேய்ய, நிஸ்ஸக்³கி³யம் பாசித்திய’’ந்தி இமஸ்மிம் தது³த்தரிஸிக்கா²பதே³ (பாரா. 523) அபி⁴ஹட்டு²ந்தி ஏத்த² அபீ⁴தி உபஸக்³கோ³, ஹரிதுந்தி அத்தோ², க³ண்ஹிதுந்தி வுத்தம் ஹோதி. பவாரேய்யாதி இச்சா²பேய்ய, இச்ச²ம் ருசிம் உப்பாதே³ய்ய வதே³ய்ய நிமந்தேய்யாதி அத்தோ². அபி⁴ஹட்டு²ம் பவாரேந்தேன பன யதா² வத்தப்³ப³ம். தம் ஆகாரம் த³ஸ்ஸேதும் ‘‘யாவத்தகம் இச்ச²ஸி, தாவத்தகம் க³ண்ஹாஹீ’’தி ஏவமஸ்ஸ பத³பா⁴ஜனம் வுத்தம். அத² வா யதா² ‘‘நேக்க²ம்மம் த³ட்டு² கே²மதோ’’தி ஏத்த² தி³ஸ்வாதி அத்தோ², ஏவமித⁴பி அபி⁴ஹட்டு²ம் பவாரேய்யாதி அபி⁴ஹரித்வா பவாரேய்யாதி அத்தோ². தத்த² காயாபி⁴ஹாரோ வாசாபி⁴ஹாரோதி து³விதோ⁴ அபி⁴ஹாரோ. காயேன வா ஹி வத்தா²தீ³னி அபி⁴ஹரித்வா பாத³மூலே ட²பேத்வா ‘‘யத்தகம் இச்ச²ஸி, தத்தகம் க³ண்ஹாஹீ’’தி வத³ந்தோ பவாரேய்ய, வாசாய வா ‘‘அம்ஹாகம் து³ஸ்ஸகோட்டா²கா³ரம் பரிபுண்ணம், யத்தகம் இச்ச²ஸி, தத்தகம் க³ண்ஹாஹீ’’தி வத³ந்தோ பவாரேய்ய, தது³ப⁴யம்பி ஏகஜ்ஜ²ம் கத்வா ‘‘அபி⁴ஹட்டு²ம் பவாரேய்யா’’தி வுத்தம்.

ஸந்தருத்தரபரமந்தி ஸஅந்தரம் உத்தரம் பரமம் அஸ்ஸ சீவரஸ்ஸாதி ஸந்தருத்தரபரமம், நிவாஸனேன ஸத்³தி⁴ம் பாருபனம் உக்கட்ட²பரிச்சே²தோ³ அஸ்ஸாதி வுத்தம் ஹோதி. ததோ சீவரம் ஸாதி³தப்³ப³ந்தி ததோ அபி⁴ஹடசீவரதோ ஏத்தகம் சீவரம் க³ஹேதப்³ப³ம், ந இதோ பரந்தி அத்தோ². யஸ்மா பன அச்சி²ன்னஸப்³ப³சீவரேன தேசீவரிகேனேவ பி⁴க்கு²னா ஏவம் படிபஜ்ஜிதப்³ப³ம், அஞ்ஞேன அஞ்ஞதா²பி, தஸ்மா தம் விபா⁴க³ம் த³ஸ்ஸேதும் ‘‘ஸசே தீணி நட்டா²னி ஹோந்தீ’’திஆதி³னா நயேனஸ்ஸ பத³பா⁴ஜனம் வுத்தம்.

தத்ராயம் வினிச்ச²யோ – யஸ்ஸ தீணி நட்டா²னி, தேன த்³வே ஸாதி³தப்³பா³னி, ஏகம் நிவாஸேத்வா ஏகம் பாருபித்வா அஞ்ஞம் ஸபா⁴க³ட்டா²னதோ பரியேஸிஸ்ஸதி. யஸ்ஸ த்³வே நட்டா²னி, தேன ஏகம் ஸாதி³தப்³ப³ம். ஸசே பகதியாவ ஸந்தருத்தரேன சரதி, த்³வே ஸாதி³தப்³பா³னி, ஏவம் ஏகம் ஸாதி³யந்தேனேவ ஸமோ ப⁴விஸ்ஸதி. யஸ்ஸ தீஸு ஏகம் நட்ட²ம், ந ஸாதி³தப்³ப³ம். யஸ்ஸ பன த்³வீஸு ஏகம் நட்ட²ம், ஏகம் ஸாதி³தப்³ப³ம். யஸ்ஸ ஏகம்யேவ ஹோதி, தஞ்ச நட்ட²ம், த்³வே ஸாதி³தப்³பா³னி. பி⁴க்கு²னியா பன பஞ்சஸுபி நட்டே²ஸு த்³வே ஸாதி³தப்³பா³னி, சதூஸு நட்டே²ஸு ஏகம் ஸாதி³தப்³ப³ம், தீஸு நட்டே²ஸு கிஞ்சி ந ஸாதி³தப்³ப³ம், கோ பன வாதோ³ த்³வீஸு வா ஏகஸ்மிம் வா. யேன கேனசி ஹி ஸந்தருத்தரபரமதாய டா²தப்³ப³ம், ததோ உத்தரி ந லப்³ப⁴தீதி இத³மேத்த² லக்க²ணம்.

ஸேஸகம் ஆஹரிஸ்ஸாமீதி த்³வே சீவரானி கத்வா ஸேஸம் புன ஆஹரிஸ்ஸாமீதி அத்தோ². ந அச்சி²ன்னகாரணாதி பா³ஹுஸச்சாதி³கு³ணவஸேன தே³ந்தி. ஞாதகானந்திஆதீ³ஸு ஞாதகானம் தே³ந்தானம் ஸாதி³யந்தஸ்ஸ, பவாரிதானம் தே³ந்தானம் ஸாதி³யந்தஸ்ஸ, அத்தனோ த⁴னேன ஸாதி³யந்தஸ்ஸ அனாபத்தீதி அத்தோ². அட்ட²கதா²ஸு பன ‘‘ஞாதகபவாரிதட்டா²னே பகதியா ப³ஹும்பி வட்டதி, அச்சி²ன்னகாரணா பமாணமேவ வட்டதீ’’தி வுத்தம், தம் பாளியா ந ஸமேதி. யஸ்மா பனித³ம் ஸிக்கா²பத³ம் அஞ்ஞஸ்ஸத்தா²ய விஞ்ஞாபனவத்து²ஸ்மிம்யேவ பஞ்ஞத்தம், தஸ்மா இத⁴ ‘‘அஞ்ஞஸ்ஸத்தா²யா’’தி ந வுத்தம். ஸேஸம் உத்தானத்த²மேவ. ஸமுட்டா²னாதீ³ஸு இத³ம்பி ச²ஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மவசீகம்மம், திசித்தம், திவேத³னந்தி.

ஸத்தமே பாளியம் பக்³கா³ஹிகஸாலந்தி து³ஸ்ஸவாணிஜகானம் ஆபணம், ‘‘பக்³கா³ஹிதஸால’’ந்திபி பட²ந்தி. அபீ⁴தி உபஸக்³கோ³தி தஸ்ஸ விஸேஸத்தா²பா⁴வம் த³ஸ்ஸேதி. தேனாஹ ‘‘ஹரிதுந்தி அத்தோ²’’தி. வரஸத்³த³ஸ்ஸ இச்சா²யம் வத்தமானத்தா ஆஹ ‘‘இச்சா²பேய்யா’’தி. த³ட்டு² கே²மதோதி ஏத்த² கா³தா²ப³ந்த⁴வஸேன அனுனாஸிகலோபோ த³ட்ட²ப்³போ³. ஸஅந்தரந்தி அந்தரவாஸகஸஹிதம். உத்தரந்தி உத்தராஸங்க³ம். அஸ்ஸ சீவரஸ்ஸாதி ஸாதி³தப்³ப³சீவரஸ்ஸ. அச்சி²ன்னஸப்³ப³சீவரேனாதி அச்சி²ன்னானி ஸப்³பா³னி தீணி சீவரானி அஸ்ஸாதி அச்சி²ன்னஸப்³ப³சீவரோ, தேனாதி அத்தோ². யஸ்ஸ ஹி அச்சி²ந்த³னஸமயே தீணி சீவரானி ஸன்னிஹிதானி ஹோந்தி, தானி ஸப்³பா³னி அச்சி²ன்னானீதி ஸோ ‘‘அச்சி²ன்னஸப்³ப³சீவரோ’’தி வுச்சதி. தேனேவ ‘‘அச்சி²ன்னஸப்³ப³சீவரேன தேசீவரிகேனா’’தி வுத்தம். தேசீவரிகேனாதி ஹி அச்சி²ந்த³னஸமயே திசீவரஸ்ஸ ஸன்னிஹிதபா⁴வம் ஸந்தா⁴ய வுத்தம், ந பன வினயே தேசீவரிகாபா⁴வம், து⁴தங்க³தேசீவரிகபா⁴வம் வா ஸந்தா⁴ய. ஏவம் படிபஜ்ஜிதப்³ப³ந்தி ‘‘ஸந்தருத்தரபரமம் தேன பி⁴க்கு²னா ததோ சீவரம் ஸாதி³தப்³ப³’’ந்தி வுத்தவிதி⁴னா படிபஜ்ஜிதப்³ப³ம். அஞ்ஞேனாதி அச்சி²ன்னஅஸப்³ப³சீவரேன. யஸ்ஸ தீஸு சீவரேஸு ஏகம் வா த்³வே வா சீவரானி அச்சி²ன்னானி ஹோந்தி, தேனாதி அத்தோ². அஞ்ஞதா²பீதி ‘‘ஸந்தருத்தரபரம’’ந்தி வுத்தவிதா⁴னதோ அஞ்ஞதா²பி. யஸ்ஸ ஹி தீஸு த்³வே சீவரானி அச்சி²ன்னானி ஹோந்தி, ஏகம் ஸாதி³தப்³ப³ம், ஏகஸ்மிம் அச்சி²ன்னே ந ஸாதி³தப்³ப³ந்தி ந தஸ்ஸ ஸந்தருத்தரபரமஸாதி³யனம் ஸம்ப⁴வதி. அயமேவ ச அத்தோ² பத³பா⁴ஜனேன விபா⁴விதோ. தேனாஹ ‘‘தம் விபா⁴க³ம் த³ஸ்ஸேது’’ந்தி.

கேசி பன ‘‘தேசீவரிகேனாதி வுத்தத்தா திசீவரம் பரிக்கா²ரசோளவஸேன அதி⁴ட்ட²ஹித்வா பரிபு⁴ஞ்ஜதோ தஸ்மிம் நட்டே² ப³ஹூனிபி க³ஹேதும் லப⁴தீ’’தி வத³ந்தி, தம் ந க³ஹேதப்³ப³ம். பத³பா⁴ஜனஸ்ஸ ஹி அதி⁴ப்பாயம் த³ஸ்ஸேந்தேன யஸ்மா பன ‘‘அச்சி²ன்னஸப்³ப³சீவரேன…பே… தம் விபா⁴க³ம் த³ஸ்ஸேது’’ந்தி வுத்தம், பத³பா⁴ஜனே ச ந தாதி³ஸோ அத்தோ² உபலப்³ப⁴தி, தஸ்மா தம் ந க³ஹேதப்³ப³மேவ. யம்பி மாதிகாட்ட²கதா²யம் (கங்கா². அட்ட². ததுத்தரிஸிக்கா²பத³வண்ணனா) வுத்தம் ‘‘யஸ்ஸ அதி⁴ட்டி²ததிசீவரஸ்ஸ தீணி நட்டா²னீ’’தி, தத்த²பி அதி⁴ட்டி²தக்³க³ஹணம் ஸரூபகத²னமத்தந்தி க³ஹேதப்³ப³ம், ந பன திசீவராதி⁴ட்டா²னேன அதி⁴ட்டி²தசீவரஸ்ஸேவாதி ஏவமத்தோ² க³ஹேதப்³போ³ பாளியம் அட்ட²கதா²யஞ்ச ததா² அத்த²ஸ்ஸாஸம்ப⁴வதோ. ந ஹி திசீவராதி⁴ட்டா²னேன அதி⁴ட்டி²தசீவரஸ்ஸேவ இத³ம் ஸிக்கா²பத³ம் பஞ்ஞத்தந்தி ஸக்கா விஞ்ஞாதும். புரிமஸிக்கா²பதே³ன ஹி அச்சி²ன்னசீவரஸ்ஸ அஞ்ஞாதகவிஞ்ஞத்தியா அனுஞ்ஞாதத்தா பமாணம் அஜானித்வா விஞ்ஞாபனவத்து²ஸ்மிம் பமாணதோ ஸாதி³யனம் அனுஜானந்தேன ப⁴க³வதா இத³ம் ஸிக்கா²பத³ம் பஞ்ஞத்தம், தஸ்மா பரிக்கா²ரசோளிகஸ்ஸ ப³ஹும்பி ஸாதி³தும் வட்டதீதி அயமத்தோ² நேவ பாளியா ஸமேதி, ந ச ப⁴க³வதோ அதி⁴ப்பாயம் அனுலோமேதி.

யஸ்ஸ தீணி நட்டா²னி, தேன த்³வே ஸாதி³தப்³பா³னீதி ஏத்த² யஸ்ஸ திசீவரதோ அதி⁴கம்பி சீவரம் அஞ்ஞத்த² டி²தம் அத்தி², ததா³ தஸ்ஸ சீவரஸ்ஸ அலப்³ப⁴னீயபா⁴வதோ தேனபி ஸாதி³தும் வட்டதீதி வேதி³தப்³ப³ம். பகதியாவ ஸந்தருத்தரேன சரதீதி ஸாஸங்கஸிக்கா²பத³வஸேன வா அவிப்பவாஸஸம்முதிவஸேன வா ததியஸ்ஸ அலாபே⁴ன வா சரதி. ‘‘த்³வே நட்டா²னீ’’தி அதி⁴காரத்தா வுத்தம் ‘‘த்³வே ஸாதி³தப்³பா³னீ’’தி. ஏகம் ஸாதி³யந்தேனேவ ஸமோ ப⁴விஸ்ஸதீதி திண்ணம் சீவரானம் த்³வீஸு நட்டே²ஸு ஏகம் ஸாதி³யந்தேன ஸமோ ப⁴விஸ்ஸதி உபி⁴ன்னம்பி ஸந்தருத்தரபரமதாய அவட்டா²னதோ. யஸ்ஸ ஏகம்யேவ ஹோதீதி அஞ்ஞேன கேனசி காரணேன வினட்ட²ஸேஸசீவரம் ஸந்தா⁴ய வுத்தம்.

‘‘ஸேஸகம் தும்ஹேவ ஹோதூதி தே³ந்தீ’’தி வுத்தத்தா ‘‘பமாணயுத்தம் க³ண்ஹிஸ்ஸாம, ஸேஸகம் ஆஹரிஸ்ஸாமா’’தி வத்வா க³ஹேத்வா க³மனஸமயேபி ‘‘ஸேஸகம்பி தும்ஹாகம்யேவ ஹோதூ’’தி வத³ந்தி, லத்³த⁴கப்பியமேவ. பவாரிதானந்தி அச்சி²ன்னகாலதோ புப்³பே³யேவ பவாரிதானம். பாளியா ந ஸமேதீதி ஸந்தருத்தரபரமதோ உத்தரி ஸாதி³யனே அனாபத்தித³ஸ்ஸனத்த²ம் ‘‘அனாபத்தி ஞாதகானம் பவாரிதான’’ந்தி வுத்தத்தா ந ஸமேதி. ஸந்தருத்தரபரமம் ஸாதி³யந்தஸ்ஸ ஹி ஆபத்திப்பஸங்கோ³யேவ நத்தி², ஸதி ச ஸிக்கா²பதே³ன ஆபத்திப்பஸங்கே³ அனாபத்தி யுத்தா த³ஸ்ஸேதுந்தி அதி⁴ப்பாயோ. கேசி பன ‘‘பமாணமேவ வட்டதீதி இத³ம் ஸல்லேக²த³ஸ்ஸனத்த²ம் வுத்த’’ந்தி வத³ந்தி.

யஸ்மா பனித³ம்…பே… ந வுத்தந்தி ஏத்தா²யமதி⁴ப்பாயோ – ‘‘அஞ்ஞஸ்ஸத்தா²யா’’தி வுச்சமானே அஞ்ஞேஸம் அத்தா²ய பமாணம் அதிக்கமித்வாபி க³ண்ஹிதும் வட்டதீதி ஆபஜ்ஜதி, தஞ்ச அஞ்ஞஸ்ஸத்தா²ய விஞ்ஞாபனவத்து²ஸ்மிம் பஞ்ஞத்தத்தா வத்து²னா ஸம்ஸந்தி³யமானம் ந ஸமேதி. ந ஹி யம் வத்து²ம் நிஸ்ஸாய ஸிக்கா²பத³ம் பஞ்ஞத்தம், தஸ்மிம்யேவ அனாபத்திவசனம் யுத்தந்தி. க³ண்டி²பதே³ஸு பன தீஸுபி ‘‘இமஸ்ஸ ஸிக்கா²பத³ஸ்ஸ அத்தனோ ஸாதி³யனபடிப³த்³த⁴தாவஸேன பவத்தத்தா ‘அஞ்ஞஸ்ஸத்தா²யா’தி வத்தும் ஓகாஸோயேவ நத்தி², தஸ்மா ந வுத்த’’ந்தி கதி²தம். இத⁴ ‘‘அஞ்ஞஸ்ஸத்தா²யா’’தி அவுத்தத்தா அஞ்ஞேஸம் அத்தா²ய ஞாதகபவாரிதேஸு அதி⁴கம் விஞ்ஞாபேந்தஸ்ஸ ஆபத்தீதி சே? ந, தத்த² புரிமஸிக்கா²பதே³னேவ அனாபத்திஸித்³தி⁴தோ. ததுத்தரிதா, அச்சி²ன்னாதி³காரணதா, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி.

விமதிவினோத³னியம் (வி. வி. டீ. 1.522-524) பன ‘‘பாளியம் பக்³கா³ஹிகஸாலந்தி து³ஸ்ஸாபணம். தஞ்ஹி வாணிஜகேஹி து³ஸ்ஸானி பக்³க³ஹேத்வா த³ஸ்ஸனட்டா²னதாய ‘பக்³கா³ஹிகஸாலா’தி வுச்சதி. அஸ்ஸ சீவரஸ்ஸாதி ஸாதி³தப்³ப³சீவரஸ்ஸ. தேசீவரிகேனாதி இமினா அச்சி²ன்னதிசீவரதோ அஞ்ஞஸ்ஸ விஹாராதீ³ஸு நிஹிதஸ்ஸ சீவரஸ்ஸ அபா⁴வம் த³ஸ்ஸேதி. யதி³ ப⁴வேய்ய, விஞ்ஞாபேதும் ந வட்டேய்ய, தாவகாலிகம் நிவாஸேத்வா அத்தனோ சீவரம் க³ஹேதப்³ப³ம். தாவகாலிகம்பி அலப⁴ந்தஸ்ஸ பூ⁴தகா³மவிகோபனம் கத்வா திணபண்ணேஹி ச²த³னம் விய விஞ்ஞாபனம்பி வட்டதி ஏவ. அஞ்ஞேனாதி அச்சி²ன்னஅஸப்³ப³சீவரேன. ‘த்³வே நட்டா²னீ’தி அதி⁴காரதோ வுத்தம் ‘த்³வே ஸாதி³தப்³பா³னீ’தி. பாளியா ந ஸமேதீதி ‘அனாபத்தி ஞாதகானம் பவாரிதான’ந்தி (பாரா. 526) இமாய பாளியா ந ஸமேதி ததுத்தரி விஞ்ஞாபனஆபத்திப்பஸங்கே³ ஏவ வுத்தத்தா. அஞ்ஞஸ்ஸத்தா²யாதி ந வுத்தந்தி இத³ம் அஞ்ஞஸ்ஸத்தா²ய ததுத்தரி விஞ்ஞாபனே நிஸ்ஸக்³கி³யம் பாசித்தியம் ஹோதீதி இமமத்த²ம் தீ³பேதி. தஞ்ச பாசித்தியம் யேஸம் அத்தா²ய விஞ்ஞாபேதி, தேஸம் வா ஸியா விஞ்ஞாபகஸ்ஸேவ வா, ந தாவ தேஸம், தேஹி அவிஞ்ஞாபிதத்தா, நாபி விஞ்ஞாபகஸ்ஸ, அத்தானம் உத்³தி³ஸ்ஸ அவிஞ்ஞத்தத்தா. தஸ்மா அஞ்ஞஸ்ஸத்தா²ய விஞ்ஞாபேந்தஸ்ஸபி நிஸ்ஸக்³கி³யம் பாசித்தியம் ந தி³ஸ்ஸதி. பாளியம் பன இமஸ்ஸ ஸிக்கா²பத³ஸ்ஸ அத்தனோ ஸாதி³யனபடிப³த்³த⁴தாவஸேன பவத்தத்தா ‘அஞ்ஞஸ்ஸத்தா²யா’தி அனாபத்திவாரே ந வுத்தந்தி வத³ந்தி, தஞ்ச யுத்தம் விய தி³ஸ்ஸதி, வீமம்ஸித்வா க³ஹேதப்³ப³ம். ததுத்தரிசீவரதா, அச்சி²ன்னாதி³காரணதா, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னீ’’தி.

இத³ம் ததுத்தரிஸிக்கா²பத³வினிச்ச²யம் ஆசரியேன அவுத்தம்பி அச்சி²ன்னசீவராதி⁴காரேயேவ பவத்தத்தா அம்ஹேஹி க³ஹிதம், அஞ்ஞாதகவிஞ்ஞத்திஸிக்கா²பத³ஸ்ஸ ஸமயேஸு அச்சி²ன்னசீவரகாலே அஞ்ஞாதகானம் விஞ்ஞாபேதப்³ப³பா⁴வோ ப⁴க³வதா வுத்தோ, தேஹி தி³ன்னசீவரஸ்ஸ மத்தஸோ க³ஹிதபா⁴வோ ததுத்தரிஸிக்கா²பதே³ன வுத்தோ. தஸ்மா அச்சி²ன்னசீவரஅதி⁴காரோயேவ ஹோதீதி.

சீவரஅச்சி²ந்த³னவினிச்ச²யகதா²

இதோ பரம் அச்சி²ந்த³னஸாமஞ்ஞேன சீவரஅச்சி²ந்த³னவினிச்ச²யம் வக்கா²ம – தத்த² யம்பி த்யாஹந்தி யம்பி தே அஹம். ஸோ கிர ‘‘மம பத்தசீவரஉபாஹனபச்சத்த²ரணானி வஹந்தோ மயா ஸத்³தி⁴ம் சாரிகம் பக்கமிஸ்ஸதீ’’தி அதா³ஸி. தேனேவமாஹ ‘‘மயா ஸத்³தி⁴ம் ஜனபத³சாரிகம் பக்கமிஸ்ஸதீ’’தி. அச்சி²ந்தீ³தி ப³லக்காரேன அக்³க³ஹேஸி, ஸகஸஞ்ஞாய க³ஹிதத்தா பனஸ்ஸ பாராஜிகம் நத்தி², கிலமேத்வா க³ஹிதத்தா ஆபத்தி பஞ்ஞத்தா.

ஸயம் அச்சி²ந்த³தி, நிஸ்ஸக்³கி³யம் பாசித்தியந்தி ஏகம் சீவரம் ஏகாப³த்³தா⁴னி ச ப³ஹூனி அச்சி²ந்த³தோ ஏகா ஆபத்தி, ஏகதோ அப³த்³தா⁴னி விஸும் விஸும் டி²தானி ப³ஹூனி அச்சி²ந்த³தோ, ‘‘ஸங்கா⁴டிம் ஆஹர, உத்தராஸங்க³ம் ஆஹரா’’தி ஏவம் ஆஹராபயதோ ச வத்து²க³ணனாய ஆபத்தியோ. ‘‘மயா தி³ன்னானி ஸப்³பா³னி ஆஹரா’’தி வத³தோபி ஏகவசனேனேவ ஸம்ப³ஹுலா ஆபத்தியோ.

அஞ்ஞம் ஆணாபேதி, ஆபத்தி து³க்கடஸ்ஸாதி ‘‘சீவரம் க³ண்ஹா’’தி ஆணாபேதி, ஏகம் து³க்கடம். ஆணத்தோ ப³ஹூனி க³ண்ஹாதி, ஏகம் பாசித்தியம். ‘‘ஸங்கா⁴டிம் க³ண்ஹ, உத்தராஸங்க³ம் க³ண்ஹா’’தி வத³தோ வாசாய வாசாய து³க்கடம். ‘‘மயா தி³ன்னானி ஸப்³பா³னி க³ண்ஹா’’தி வத³தோ ஏகவாசாய ஸம்ப³ஹுலா ஆபத்தியோ.

அஞ்ஞம் பரிக்கா²ரந்தி விகப்பனுபக³பச்சி²மம் சீவரம் ட²பேத்வா யம் கிஞ்சி அந்தமஸோ ஸூசிம்பி. வேடே²த்வா ட²பிதஸூசீஸுபி வத்து²க³ணனாய து³க்கடானி. ஸிதி²லவேடி²தாஸு ஏவம். கா³ள்ஹம் கத்வா ப³த்³தா⁴ஸு பன ஏகமேவ து³க்கடந்தி மஹாபச்சரியம் வுத்தம். ஸூசிக⁴ரே பக்கி²த்தாஸுபி ஏஸேவ நயோ. த²விகாய பக்கி²பித்வா ஸிதி²லப³த்³த⁴கா³ள்ஹப³த்³தே⁴ஸு திகடுகாதீ³ஸு பே⁴ஸஜ்ஜேஸுபி ஏஸேவ நயோ.

ஸோ வா தே³தீதி ‘‘ப⁴ந்தே, தும்ஹாகம்யேவ இத³ம் ஸாருப்ப’’ந்தி ஏவம் வா தே³தி. அத² வா பன ‘‘ஆவுஸோ, மயம் துய்ஹம் ‘வத்தபடிபத்திம் கரிஸ்ஸதி, அம்ஹாகம் ஸந்திகே உபஜ்ஜ²ம் க³ண்ஹிஸ்ஸதி, த⁴ம்மம் பரியாபுணிஸ்ஸதீ’தி சீவரம் அத³ம்ஹா, ஸோதா³னி த்வம் ந வத்தம் கரோஸி, ந உபஜ்ஜ²ம் க³ண்ஹாஸி, ந த⁴ம்மம் பரியாபுணாஸீ’’தி ஏவமாதீ³ஹி வுத்தோ ‘‘ப⁴ந்தே, சீவரத்தா²ய மஞ்ஞே ப⁴ணத², இத³ம் வோ சீவர’’ந்தி தே³தி, ஏவம்பி ஸோ வா தே³தி. தி³ஸாபக்கந்தம் வா பன த³ஹரம் ‘‘நிவத்தேத² ந’’ந்தி ப⁴ணதி, ஸோ ந நிவத்ததி. ‘‘சீவரம் க³ஹேத்வா ருந்த⁴தா²’’தி ஏவம் சே நிவத்ததி, ஸாது⁴. ஸசே ‘‘பத்தசீவரத்தா²ய மஞ்ஞே தும்ஹே ப⁴ணத², க³ண்ஹத² ந’’ந்தி தே³தி, ஏவம்பி ஸோயேவ தே³தி. விப்³ப⁴ந்தம் வா தி³ஸ்வா ‘‘மயம் துய்ஹம் ‘வத்தம் கரிஸ்ஸதீ’தி பத்தசீவரம் அத³ம்ஹா, ஸோதா³னி த்வம் விப்³ப⁴மித்வா சரஸீ’’தி வத³தி, இதரோ ‘‘க³ண்ஹத² தும்ஹாகம் பத்தசீவர’’ந்தி தே³தி, ஏவம்பி ஸோ வா தே³தி. ‘‘மம ஸந்திகே உபஜ்ஜ²ம் க³ண்ஹந்தஸ்ஸேவ தே தே³மி, அஞ்ஞத்த² க³ண்ஹந்தஸ்ஸ ந தே³மி. வத்தம் கரோந்தஸ்ஸேவ தே³மி, அகரோந்தஸ்ஸ ந தே³மி. த⁴ம்மம் பரியாபுணந்தஸ்ஸேவ தே³மி, அபரியாபுணந்தஸ்ஸ ந தே³மி. அவிப்³ப⁴மந்தஸ்ஸேவ தே³மி, விப்³ப⁴மந்தஸ்ஸ ந தே³மீ’’தி ஏவம் பன தா³தும் ந வட்டதி, த³த³தோ து³க்கடம், ஆஹராபேதும் பன வட்டதி. சஜித்வா தி³ன்னம் அச்சி²ந்தி³த்வா க³ண்ஹந்தோ ப⁴ண்ட³க்³கே⁴ன காரேதப்³போ³. ஸேஸமேத்த² உத்தானமேவ. அயம் ஸமந்தபாஸாதி³கதோ உத்³த⁴டவினிச்ச²யோ.

யம்பி த்யாஹந்தி ஏத்த² யந்தி காரணவசனம், தஸ்மா ஏவமேத்த² ஸம்ப³ந்தோ⁴ வேதி³தப்³போ³ – ‘‘மயா ஸத்³தி⁴ம் ஜனபத³சாரிகம் பக்கமிஸ்ஸதீதி யம் காரணம் நிஸ்ஸாய அஹம் தே, ஆவுஸோ, சீவரம் அதா³ஸிம், தம் ந கரோஸீ’’தி குபிதோ அனத்தமனோ அச்சி²ந்தீ³தி. யந்தி வா சீவரம் பராமஸதி. தத்த² ‘‘மயா ஸத்³தி⁴ம் ஜனபத³சாரிகம் பக்கமிஸ்ஸதீதி யம்பி தே அஹம் சீவரம் அதா³ஸிம், தம் சீவரம் க³ண்ஹிஸ்ஸாமீ’’தி குபிதோ அனத்தமனோ அச்சி²ந்தீ³தி ஸம்ப³ந்தி⁴தப்³ப³ம்.

ஆணத்தோ ப³ஹூனி க³ண்ஹாதி, ஏகம் பாசித்தியந்தி ‘‘சீவரம் க³ண்ஹா’’தி ஆணத்தியா ஏகசீவரவிஸயத்தா ஏகமேவ பாசித்தியம். வாசாய வாசாய து³க்கடந்தி ஏத்த² அச்சி²ன்னேஸு வத்து²க³ணனாய பாசித்தியானி. ஏகவாசாய ஸம்ப³ஹுலா ஆபத்தியோதி இத³ம் அச்சி²ன்னேஸு வத்து²க³ணனாய ஆபஜ்ஜிதப்³ப³ம் பாசித்தியாபத்திம் ஸந்தா⁴ய வுத்தம், ஆணத்தியா ஆபஜ்ஜிதப்³ப³ம் பன து³க்கடம் ஏகமேவ.

ஏவந்தி இமினா ‘‘வத்து²க³ணனாய து³க்கடானீ’’தி இத³ம் பராமஸதி. ஏஸேவ நயோதி ஸிதி²லம் கா³ள்ஹஞ்ச பக்கி²த்தாஸு ஆபத்தியா ப³ஹுத்தம் ஏகத்தஞ்ச அதிதி³ஸதி.

ஆவுஸோ மயந்திஆதீ³ஸு க³ண்ஹிதுகாமதாய ஏவம் வுத்தேபி தேனேவ தி³ன்னத்தா அனாபத்தி. அம்ஹாகம் ஸந்திகே உபஜ்ஜ²ம் க³ண்ஹிஸ்ஸதீதி இத³ம் ஸாமணேரஸ்ஸபி தா³னம் தீ³பேதி, தஸ்மா கிஞ்சாபி பாளியம் ‘‘பி⁴க்கு²ஸ்ஸ ஸாமம் சீவரம் த³த்வா’’தி வுத்தம், ததா²பி அனுபஸம்பன்னகாலே த³த்வாபி உபஸம்பன்னகாலே அச்சி²ந்த³ந்தஸ்ஸ பாசித்தியமேவாதி வேதி³தப்³ப³ம். அச்சி²ந்த³னஸமயே உபஸம்பன்னபா⁴வோயேவ ஹேத்த² பமாணம். தே³தீதி துட்டோ² வா குபிதோ வா தே³தி. ருத்³த⁴தா²தி நிவாரேத². ஏவம் பன தா³தும் ந வட்டதீதி ஏத்த² ஏவம் தி³ன்னம் ந தாவ ‘‘தஸ்ஸ ஸந்தக’’ந்தி அனதி⁴ட்ட²ஹித்வாவ பரிபு⁴ஞ்ஜிதப்³ப³ந்தி வேதி³தப்³ப³ம். ஆஹராபேதும் பன வட்டதீதி ஏவம் தி³ன்னம் ப⁴திஸதி³ஸத்தா ஆஹராபேதும் வட்டதி. சஜித்வா தி³ன்னந்தி வுத்தனயேன அத³த்வா அனபேக்கே²ன ஹுத்வா தஸ்ஸேவ தி³ன்னம். ப⁴ண்ட³க்³கே⁴ன காரேதப்³போ³தி ஸகஸஞ்ஞாய வினா க³ண்ஹந்தோ ப⁴ண்ட³ம் அக்³கா⁴பேத்வா ஆபத்தியா காரேதப்³போ³. விகப்பனுபக³பச்சி²மசீவரதா, ஸாமம் தி³ன்னதா, ஸகஸஞ்ஞிதா, உபஸம்பன்னதா, கோத⁴வஸேன அச்சி²ந்த³னம் வா அச்சி²ந்தா³பனம் வாதி இமானேத்த² பஞ்ச அங்கா³னி. அயம் ஸாரத்த²தீ³பனீபாடோ² (ஸாரத்த². டீ. 2.635).

விமதிவினோத³னியம் (வி. வி. டீ. 1.631) பன ‘‘யம்பி…பே… அச்சி²ந்தீ³தி ஏத்த² யம் தே அஹம் சீவரம் அதா³ஸிம், தம் ‘மயா ஸத்³தி⁴ம் பக்கமிஸ்ஸதீ’தி ஸஞ்ஞாய அதா³ஸிம், ந அஞ்ஞதா²தி குபிதோ அச்சி²ந்தீ³தி ஏவம் அஜ்ஜா²ஹரித்வா யோஜேதப்³ப³ம். ஏகம் து³க்கடந்தி யதி³ ஆணத்தோ அவஸ்ஸம் அச்சி²ந்த³தி, ஆணத்திக்க²ணே ஏவ பாசித்தியம். யதி³ ந அச்சி²ந்த³தி, ததா³ ஏவ து³க்கடந்தி த³ட்ட²ப்³ப³ம். ஏகவாசாய ஸம்ப³ஹுலாபத்தியோதி யதி³ ஆணத்தோ அனந்தராயேன அச்சி²ந்த³தி, ஆணத்திக்க²ணேயேவ வத்து²க³ணனாய பாசித்தியாபத்தியோ பயோக³கரணக்க²ணேயேவ ஆபத்தியா ஆபஜ்ஜிதப்³ப³தோ, சீவரம் பன அச்சி²ன்னேயேவ நிஸ்ஸக்³கி³யம் ஹோதி. யதி³ ஸோ ந அச்சி²ந்த³தி, ஆணத்திக்க²ணே ஏகமேவ து³க்கடந்தி த³ட்ட²ப்³ப³ம். ஏவமஞ்ஞத்த²பி ஈதி³ஸேஸு நயோ ஞாதப்³போ³. உபஜ்ஜ²ம் க³ண்ஹிஸ்ஸதீதி ஸாமணேரஸ்ஸ தா³னம் தீ³பேதி, தேன ச ஸாமணேரகாலே த³த்வா உபஸம்பன்னகாலே அச்சி²ந்த³தோபி பாசித்தியம் தீ³பேதி. ‘‘பி⁴க்கு²ஸ்ஸ ஸாமம் சீவரம் த³த்வா’’தி இத³ம் உக்கட்ட²வஸேன வுத்தம். ஆஹராபேதும் பன வட்டதீதி கம்மே அகதே ப⁴திஸதி³ஸத்தா வுத்தம். விகப்பனுபக³பச்சி²மசீவரதா, ஸாமம் தி³ன்னதா, ஸகஸஞ்ஞிதா, உபஸம்பன்னதா, கோத⁴வஸேன அச்சி²ந்த³னம் வா அச்சி²ந்தா³பனம் வாதி இமானேத்த² பஞ்ச அங்கா³னீ’’தி வுத்தம்.

படிபா⁴னசித்தகதா²

6. படிபா⁴னசித்தகதா²யம் அட்ட²கதா²யம் வுத்தனயேனேவ ஸுவிஞ்ஞேய்யந்தி ஸாரத்த²தீ³பனியம் ந கிஞ்சி வுத்தம், விமதிவினோத³னியம் (வி. வி. டீ. சூளவக்³க³ 2.299) பன ‘‘கரோஹீதி வத்தும் ந வட்டதீதி ஆணத்தியா ஏவ படிக்கி²த்தத்தா த்³வாரபாலம் ‘கிம் ந கரோஸீ’திஆதி³னா பரியாயேன வத்தும் வட்டதி. ஜாதகபகரணந்தி ஜாதகபடிஸம்யுத்தம் இத்தி²புரிஸாதி³ யம் கிஞ்சி ரூபம் அதி⁴ப்பேதம். ‘பரேஹி காராபேது’ந்தி வுத்தத்தா பு³த்³த⁴ரூபம்பி ஸயம் காதும் ந லப⁴தீ’’தி வுத்தம்.

விப்பகதபோ⁴ஜனகதா²

7. விப்பகதபோ⁴ஜனகதா²யம்பி ஸாரத்த²தீ³பனீ விமதிவினோத³னீ வஜிரபு³த்³தி⁴டீகாஸு ந கிஞ்சி வுத்தம். பட²மம் கதம் பகதம், வி அனிட்டி²தம் பகதம் விப்பகதம், விப்பகதம் போ⁴ஜனம் யேன ஸோ விப்பகதபோ⁴ஜனோ, பட²மம் பு⁴ஞ்ஜித்வா அனிட்டி²தபோ⁴ஜனகிச்சோ பி⁴க்கு². வுத்தேன பி⁴க்கு²னா பவிஸிதப்³ப³ந்தி ஸம்ப³ந்தோ⁴. ரித்தஹத்த²ம்பி உட்டா²பேதும் ந வட்டதீதி ஏத்த² காரணமாஹ ‘‘விப்பகதபோ⁴ஜனோயேவ ஹி ஸோ ஹோதீ’’தி, யாகு³க²ஜ்ஜகாதீ³ஸுபி பீதேஸு கா²தி³தேஸுபி ப⁴த்தஸ்ஸ அபு⁴த்தத்தா அனிட்டி²தபோ⁴ஜனகிச்சோ ஹோதி. பவாரிதோ ஹோதி, தேன வத்தப்³போ³தி பவாரிதேன ஆஸனா வுட்டி²தேன பு⁴ஞ்ஜிதும் அலப⁴மானத்தா அத்தனோ ஸந்திகே உத³கே அஸந்தே வத்தப்³போ³தி அத்தோ². ஸேஸம் ஸுவிஞ்ஞேய்யமேவ.

உத்³தி³ஸந்தஉத்³தி³ஸாபனகதா²

8. உத்³தி³ஸந்தஉத்³தி³ஸாபனகதா²யம் உத்³தி³ஸந்தேனாதி உத்³தே³ஸம் தே³ந்தேன, பாளிம் வாசேந்தேனாதி அத்தோ². உத்³தி³ஸாபேந்தேனாதி உத்³தே³ஸம் க³ண்ஹந்தேன, பாளிம் வாசாபேந்தேனாதி அத்தோ². உச்சதரேபீதி பி-ஸத்³தே³ன ஸமானாஸனம் ஸம்பிண்டே³தி. நீசதரேபீதி ஏத்தா²பி ஏஸேவ நயோ.

திவஸ்ஸந்தரிககதா²

9. திவஸ்ஸந்தரிககதா²யம் தீணி வஸ்ஸானி திவஸ்ஸம், தீணி வா வஸ்ஸானி திவஸ்ஸானி, திவஸ்ஸானம் அந்தரம் திவஸ்ஸந்தரம், திவஸ்ஸந்தரே டி²தோதி திவஸ்ஸந்தரோ, தேன திவஸ்ஸந்தரேன, அந்தர-ஸத்³தோ³ மஜ்ஜ²த்த²வாசகோ, ண-பச்சயோ டி²தத்தே². தேனாஹ வஜிரபு³த்³தி⁴டீகாயம் (வஜிர. டீ. சூளவக்³க³ 320) ‘‘திவஸ்ஸந்தரேனாதி திண்ணம் வஸ்ஸானம் அந்தோ டி²தேனா’’தி. அட்ட²கதா²யம் (சூளவ. அட்ட². 320) பன ஸரூபமேவ த³ஸ்ஸேந்தோ ‘‘திவஸ்ஸந்தரோ நாமா’’திஆதி³மாஹ. இமே ஸப்³பே³தி ஸப்³பே³ திவிதா⁴ இமே ஸமானாஸனிகா. ஸேஸம் ஸுவிஞ்ஞேய்யமேவ.

தீ³கா⁴ஸனகதா²

10. தீ³கா⁴ஸனகதா²யம் ஸம்ஹாரிமம் வாதி ஸம்ஹரிதும் யுத்தம் கடஸாரகாதி³. அஸம்ஹாரிமம் வாதி ஸம்ஹரிதும் அஸக்குணேய்யம் பாஸாணாதி³ ஆஸனம். தேனாஹ ஸாரத்த²தீ³பனியம் (ஸாரத்த². டீ. சூளவக்³க³ 3.320) ‘‘தீ³கா⁴ஸனம் நாம மஞ்சபீட²வினிமுத்தம் யம் கிஞ்சி திண்ணன்னம் ஏகதோ ஸுக²ம் நிஸீதி³தும் பஹோதீ’’தி. கஸ்மா பன ‘‘திண்ணன்னம் பஹோதீ’’தி வுத்தம், நனு த்³வின்னம் பஹோனகாஸனம்பி தீ³க⁴மேவாதி சோத³னம் ஸந்தா⁴யாஹ ‘‘அனுஜானாமி…பே… ஏத்தகம் பச்சி²மம் தீ³கா⁴ஸனந்தி ஹி வுத்த’’ந்தி. த்³வின்னம் பஹோனகே ஹி அதீ³கா⁴ஸனே ஸமானாஸனிகேஹேவ ஸஹ நிஸீதி³தும் வட்டதி, திண்ணன்னம் பஹோனகதோ பட்டா²ய க³ஹிதே தீ³கா⁴ஸனே பன அஸமானாஸனிகேஹிபி ஸஹ நிஸீதி³தும் வட்டதி. யதி³ ஏவம் பண்ட³காதீ³ஹிபி ஸஹ நிஸீதி³தும் வட்டேய்யாதி சோத³னம் மனஸி கத்வா ஆஹ ‘‘அனுஜானாமி, பி⁴க்க²வே, ட²பேத்வா பண்ட³க’’ந்திஆதி³. தத்த² அத்தோ² ஸுவிஞ்ஞேய்யோவ.

கி³லானுபட்டா²னகதா²

11. கி³லானுபட்டா²னகதா²யம் பலிபன்னோதி நிமுக்³கோ³, மக்கி²தோதி அத்தோ². உச்சாரேத்வாதி உக்கி²பித்வா. ஸமானாசரியகோதி ஏத்த² ‘‘ஸசேபி ஏகஸ்ஸ ஆசரியஸ்ஸ ஏகோ அந்தேவாஸிகோ ஹோதி, ஏகோ ஸத்³தி⁴விஹாரிகோ, ஏதேபி அஞ்ஞமஞ்ஞம் ஸமானாசரியகா ஏவா’’தி வத³ந்தி. பே⁴ஸஜ்ஜம் யோஜேதும் அஸமத்தோ² ஹோதீதி வேஜ்ஜேன ‘‘இத³ஞ்சித³ஞ்ச பே⁴ஸஜ்ஜம் க³ஹேத்வா இமினா யோஜேத்வா தா³தப்³ப³’’ந்தி வுத்தே ததா² காதும் அஸமத்தோ²தி அத்தோ². நீஹாதுந்தி நீஹரிதும், ச²ட்³டே³துந்தி அத்தோ². விமதிவினோத³னியம் (வி. வி. டீ. மஹாவக்³க³ 2.365-366) பன ‘‘பூ⁴மியம் பரிப⁴ண்ட³ம் அகாஸீதி கி³லானேன நிபன்னபூ⁴மியம் கிலிட்ட²ட்டா²னம் தோ⁴வித்வா ஹரிதூபலித்தம் காரேஸீதி அத்தோ². பே⁴ஸஜ்ஜம் யோஜேதும் அஸமத்தோ²தி பரேஹி வுத்தவிதி⁴ம்பி காதும் அஸமத்தோ²’’தி வுத்தம்.

மரணவண்ணகதா²

12. மரணவண்ணகதா²யம் மரணத்தி²காவ ஹுத்வாதி இமஸ்ஸ காயஸ்ஸ பே⁴தே³ன ஸக்³க³பாபனாதி⁴ப்பாயத்தா அத்த²தோ மரணத்தி²காவ ஹுத்வா. மரணத்தி²கபா⁴வம் அஜானந்தாதி ‘‘ஏவம் அதி⁴ப்பாயினோ மரணத்தி²கா நாம ஹோந்தீ’’தி அத்தனோ மரணத்தி²கபா⁴வம் அஜானந்தா. ந ஹி தே அத்தனோ சித்தப்பவத்திம் ந ஜானந்தி. வோஹாரவஸேனாதி புப்³ப³பா⁴க³வோஹாரவஸேன, மரணாதி⁴ப்பாயஸ்ஸ ஸன்னிட்டா²பகசேதனாக்க²ணே கருணாய அபா⁴வதோ காருஞ்ஞேன பாஸே ப³த்³த⁴ஸூகரமோசனம் விய ந ஹோதீதி அதி⁴ப்பாயோ. ‘‘யதா²யுனா’’தி வுத்தமேவத்த²ம் யதா²னுஸந்தி⁴னாதி பரியாயந்தரேன வுத்தம், யதா²னுஸந்தி⁴னா யதா²யுபரிச்சே²தே³னாதி வுத்தம் ஹோதி. அத² வா யதா²னுஸந்தி⁴னாதி யதா²னுப்பப³ந்தே⁴ன, யாவ தஸ்மிம் ப⁴வே ஸந்தானஸ்ஸ அனுப்பப³ந்தோ⁴ அவிச்சி²ன்னபவத்தி ஹோதி, தாவ ட²த்வாதி வுத்தம் ஹோதி.

விமதிவினோத³னியம் (வி. வி. டீ. 1.180) ‘‘வோஹாரவஸேனாதி புப்³ப³பா⁴க³வோஹாரவஸேன மரணாதி⁴ப்பாயஸ்ஸ ஸன்னிட்டா²பகசேதனாக்க²ணே கருணாய அபா⁴வதோ, காருஞ்ஞேன பாஸே ப³த்³த⁴ஸூகரமோசனம் விய ந ஹோதீதி அதி⁴ப்பாயோ. ‘யதா²யுனா’தி வுத்தமேவத்த²ம் யதா²னுஸந்தி⁴னாதி பரியாயந்தரேன வுத்த’’ந்தி வுத்தம். வஜிரபு³த்³தி⁴டீகாயம் (வஜிர. டீ. பாராஜிக 180) பன ‘‘மரணத்தி²காவ ஹுத்வாதி இமஸ்ஸ காயஸ்ஸ பே⁴தே³ன ஸக்³க³பாபனாதி⁴ப்பாயத்தா அத்த²தோ மரணத்தி²காவ ஹுத்வா. ‘‘ஏவம்அதி⁴ப்பாயினோ மரணத்தி²கா நாம ஹோந்தீ’’தி அத்தனோ மரணத்தி²கபா⁴வம் அஜானந்தா ஆபன்னா பாராஜிகம். ந ஹி தே அத்தனோ சித்தப்பவத்திம் ந ஜானந்தீதி வுச்சந்தி. வோஹாரவஸேனாதி புப்³ப³பா⁴கே³ வோஹாரவஸேன, ஸன்னிட்டா²னே பனேதம் நத்தி², பாஸே ப³த்³த⁴ஸூகரமோசனே விய ந ஹோதி. யதா²னுஸந்தி⁴னாதி அந்தரா அமரித்வாதி அத்தோ²’’தி வுத்தம்.

அத்தபாதனகதா²

13. அத்தபாதனகதா²யம் விப⁴த்திப்³யத்தயேனாதி விப⁴த்திவிபரிணாமேன. விஸேஸாதி⁴க³மோதி ஸமாதி⁴ விபஸ்ஸனா ச. அதிவிய பாகடத்தா ‘‘ஹத்த²ப்பத்தோ விய தி³ஸ்ஸதீ’’தி வுத்தம். உபச்சி²ந்த³தீதி விஸேஸாதி⁴க³மஸ்ஸ விக்கே²போ மா ஹோதூதி ஆஹாரம் உபச்சி²ந்த³தி. விஸேஸாதி⁴க³மந்தி லோகுத்தரத⁴ம்மபடிலாப⁴ம். ப்³யாகரித்வாதி ஆரோசேத்வா. உபச்சி²ந்த³தி, ந வட்டதீதி யஸ்மா ஸபா⁴கா³னம் லஜ்ஜீபி⁴க்கூ²னம்யேவ அரியா அத்தனா அதி⁴க³தவிஸேஸம் தாதி³ஸே காரணே ஸதி ஆரோசேந்தி, தே ச பி⁴க்கூ² அப்பதிரூபாய அனேஸனாய பச்சயம் ந பரியேஸந்தி, தஸ்மா தேஹி பரியேஸிதபச்சயே குக்குச்சம் உப்பாதே³த்வா ஆஹாரம் உபச்சி²ந்தி³தும் ந வட்டதீதி அத்தோ². ஸபா⁴கா³னஞ்ஹி ப்³யாகதத்தா உபச்சி²ந்தி³தும் ந லப⁴தி. தே ஹி கப்பியகே²த்தம் ஆரோசேந்தி. தேனேவ ‘‘ஸபா⁴கா³னஞ்ஹி லஜ்ஜீபி⁴க்கூ²னம் கதே²தும் வட்டதீதி இத³ம் ‘உபச்சி²ந்த³தி, ந வட்டதீ’தி இமஸ்ஸ காரணம் த³ஸ்ஸேந்தேன வுத்த’’ந்தி தீஸுபி க³ண்டி²பதே³ஸு வுத்தம். அத² வா விஸேஸாதி⁴க³மம் ப்³யாகரித்வாதி இத³ம் விஸேஸஸ்ஸ அதி⁴க³தபா⁴வத³ஸ்ஸனத்த²ம் வுத்தம், அதி⁴க³மந்தராயம் ஆஸங்கந்தேனேவ ச ஆஹாருபச்சே²தோ³ காதப்³போ³தி அனுஞ்ஞாதத்தா அதி⁴க³தேன ந காதப்³போ³தி த³ஸ்ஸேதும் ‘‘விஸேஸாதி⁴க³மம் ப்³யாகரித்வா ஆஹாரம் உபச்சி²ந்த³தி, ந வட்டதீ’’தி வுத்தம். கிம் பன அரியா அத்தனா அதி⁴க³தவிஸேஸம் அஞ்ஞேஸம் ஆரோசேந்தீதி இமிஸ்ஸா சோத³னாய ‘‘ஸபா⁴கா³னஞ்ஹி லஜ்ஜீபி⁴க்கூ²னம் கதே²தும் வட்டதீ’’தி வுத்தம், அயமேத்த² யுத்ததரோதி அம்ஹாகம் க²ந்தி, க³ண்டி²பதே³பி அயமத்தோ² த³ஸ்ஸிதோயேவாதி.

விமதிவினோத³னியம்பி (வி. வி. டீ. 1.182-183) ‘‘விப⁴த்திப்³யத்தயேனாதி விப⁴த்திவிபரிணாமேன. விஸேஸாதி⁴க³மோதி ஸமாதி⁴ விபஸ்ஸனா ச. விஸேஸாதி⁴க³மந்தி லோகுத்தரத⁴ம்மபடிலாப⁴ம். ப்³யாகரித்வாதி ஆரோசேத்வா, இத³ஞ்ச விஸேஸஸ்ஸ அதி⁴க³தபா⁴வத³ஸ்ஸனத்த²ம் வுத்தம். அதி⁴க³தவிஸேஸா ஹி தி³ட்டா²னுக³திஆபஜ்ஜனத்த²ம் லஜ்ஜீபி⁴க்கூ²னம் அவஸ்ஸம் அதி⁴க³மம் ப்³யாகரோந்தி, அதி⁴க³தவிஸேஸேன பன அப்³யாகரித்வாபி ஆஹாரம் உபச்சி²ந்தி³தும் ந வட்டதி, அதி⁴க³மந்தராயவினோத³னத்த²மேவ ஆஹாருபச்சே²த³ஸ்ஸ அனுஞ்ஞாதத்தா தத³தி⁴க³மே ஸோ ந காதப்³போ³வ. கிம் பனாதி⁴க³மம் ஆரோசேதும் வட்டதீதி ஆஹ ஸபா⁴கா³னஞ்ஹீதிஆதீ³’’தி வுத்தம். வஜிரபு³த்³தி⁴டீகாயம் (வஜிர. டீ. பாராஜிக 181-183) ‘‘ஹத்த²ப்பத்தோ விய தி³ஸ்ஸதி, ‘தஸ்ஸ விக்கே²போ மா ஹோதூ’தி உபச்சி²ந்த³தி, விஸேஸாதி⁴க³மம் ப்³யாகரித்வா தப்பப⁴வம் ஸக்காரம் லஜ்ஜாயந்தோ ஆஹாரம் உபச்சி²ந்த³தி ஸபா⁴கா³னம் ப்³யாகதத்தா. தே ஹி கப்பியகே²த்தம் ஆரோசேந்தீ’’தி வுத்தம்.

அப்பச்சவேக்கி²த்வானிஸின்னகதா²

14. அப்பச்சவேக்கி²த்வா நிஸின்னகதா²யம் அப்படிவேக்கி²த்வாதி அனுபபரிக்கி²த்வா. உத்³த⁴ம் வா அதோ⁴ வா ஸங்கமந்தீதி பச்சா² ஆக³தானம் ஓகாஸதா³னத்த²ம் நிஸின்னபாளியா உத்³த⁴ம் வா அதோ⁴ வா க³ச்ச²ந்தி. படிவேக்க²ணகிச்சம் நத்தீ²தி பச்சா² ஆக³தேஹி உபபரிக்க²ணகிச்சம் நத்தி². ஹேட்டா² கிஸ்மிஞ்சி விஜ்ஜமானே ஸாடகம் வலிம் க³ண்ஹாதீதி ஆஹ ‘‘யஸ்மிம் வலி ந பஞ்ஞாயதீ’’தி. படிவேக்க²ணஞ்சேதம் கி³ஹீனம் ஸந்தகேயேவாதி த³ட்ட²ப்³ப³ம். விமதிவினோத³னியம்பி (வி. வி. டீ. 1.180) ‘‘ஹேட்டா² கிஸ்மிஞ்சி விஜ்ஜமானே ஸாடகம் வலிம் க³ண்ஹாதீதி ஆஹ ‘யஸ்மிம் வலி ந பஞ்ஞாயதீ’தி. படிவேக்க²ணஞ்சேதம் கி³ஹீனம் ஸந்தகே ஏவாதி த³ட்ட²ப்³ப³’’ந்தி ஏத்தகமேவ வுத்தம், வஜிரபு³த்³தி⁴டீகாயம்பி (வஜிர. டீ. பாராஜிக 180) ‘‘அப்படிவேக்கி²த்வாதி அவிசாரேத்வா. ஹேட்டி²மபா⁴கே³ ஹி கிஸ்மிஞ்சி விஜ்ஜமானே வலி பஞ்ஞாயதீ’’தி ஏத்தகமேவ.

த³வாயஸிலாவிஜ்ஜ²னகதா²

15. த³வாயஸிலாவிஜ்ஜ²னகதா²யம் த³வாஸத்³தோ³ ஹஸாதி⁴ப்பாயவாசகோ. படிபுப்³ப³வித⁴-தா⁴து பவட்டனத்தோ²தி ஆஹ ‘‘ஹஸாதி⁴ப்பாயேன பாஸாணோ ந பவட்டேதப்³போ³’’தி. ஸிலாஸத்³த³ஸ்ஸ பாஸாணவாசகத்தா ஸோ ஏவ ந படிவிஜ்ஜி²தப்³போ³தி சோத³னம் ஸந்தா⁴யாஹ ‘‘ந கேவலஞ்சா’’திஆதி³. யதி³ ஏவம் ஸப்³பே³ஸம்பி அத்தா²ய ந வட்டேய்யாதி ஆஹ ‘‘சேதியாதீ³னம் அத்தா²யா’’திஆதி³. தோ⁴வனத³ண்ட³கந்தி ப⁴ண்ட³தோ⁴வனத³ண்ட³ம். விமதிவினோத³னியம் (வி. வி. டீ. 1.182-183) பன ‘‘ப⁴ண்ட³கம் வா தோ⁴வந்தாதி சீவரம் வா தோ⁴வந்தா. தோ⁴வனத³ண்ட³கந்தி சீவரதோ⁴வனத³ண்ட³’’ந்தி வுத்தம்.

தா³யாலிம்பனகதா²

16. தா³யாலிம்பனகதா²யம் அல்ல…பே… பாசித்தியந்தி ஸுக்க²ட்டா²னேபி அக்³கி³ம் பாதேத்வா இமினா அதி⁴ப்பாயேன ஆலிம்பேந்தஸ்ஸ பாசித்தியமேவ. து³க்கடந்தி ஸுக்க²ட்டா²னே வா ஸுக்க²ம் ‘‘அஸுக்க²’’ந்தி அவவத்த²பேத்வா வா அக்³கி³ம் பாதேந்தஸ்ஸ து³க்கடம். கீளாதி⁴ப்பாயேபி ஏஸேவ நயோ, கீளாதி⁴ப்பாயோ ச படபடாயமானஸத்³த³ஸ்ஸாத³வஸேனேவ வேதி³தப்³போ³. படிபக்க²பூ⁴தோ அக்³கி³ படக்³கி³. பரித்தகரணந்தி ஆரக்க²கரணம். ஸயம் வா உட்டி²தந்தி வாதேரிதானம் வேளுஆதீ³னம் அஞ்ஞமஞ்ஞஸங்க⁴ட்டனேன ஸமுட்டி²தம். நிருபாதா³னோதி இந்த⁴னரஹிதோ. விமதிவினோத³னியம் (வி. வி. டீ. 1.190) பன ‘‘கி²ட்³டா³தி⁴ப்பாயேனபி து³க்கடந்தி ஸுக்க²திணாதீ³ஸு அக்³கி³கரணம் ஸந்தா⁴ய வுத்தம். அல்லேஸு பன கீளாதி⁴ப்பாயேனபி கரோந்தஸ்ஸ பாசித்தியமேவ. படிபக்க²பூ⁴தோ, படிமுக²ம் க³ச்ச²ந்தோ வா அக்³கி³ படக்³கி³, தஸ்ஸ அல்லதிணாதீ³ஸுபி தா³னம் அனுஞ்ஞாதம். தம் தே³ந்தேன தூ³ரதோவ ஆக³ச்ச²ந்தம் தா³வக்³கி³ம் தி³ஸ்வா விஹாரஸ்ஸ ஸமந்ததோ ஏகக்க²ணே அகத்வா ஏகதே³ஸதோ பட்டா²ய விஹாரஸ்ஸ ஸமந்ததோ ஸணிகம் ஜா²பேத்வா யதா² மஹந்தோபி அக்³கி³ விஹாரம் பாபுணிதும் ந ஸக்கோதி, ஏவம் விஹாரஸ்ஸ ஸமந்தா அப்³போ⁴காஸம் கத்வா படக்³கி³ தா³தப்³போ³. ஸோ டா³வக்³கி³னோ படிபத²ம் க³ந்த்வா ஏகதோ ஹுத்வா தேன ஸஹ நிப்³பா³தி. பரித்தகரணந்தி ஸமந்தா ருக்க²திணாதி³ச்சே²த³னபரிகா²க²ணனாதி³ஆரக்க²கரணம். தேனாஹ ‘திணகுடிகானம் ஸமந்தா பூ⁴மிதச்ச²ன’ந்திஆதீ³’’தி, வஜிரபு³த்³தி⁴டீகாயம் (வஜிர. டீ. பாராஜிக 190) பன ‘‘பரித்தந்தி ரக்க²ணம், தம் த³ஸ்ஸேதும் ‘ஸமந்தா பூ⁴மிதச்ச²ன’ந்திஆதி³ வுத்த’’ந்தி ஏத்தகமேவ வுத்தம்.

மிச்சா²தி³ட்டி²குலாப⁴தகதா²

17. மிச்சா²தி³ட்டி²குலாப⁴தகதா²யம் நத்தி² ஸத்³தா⁴ ஏதேஸூதி அஸ்ஸத்³தா⁴, மச்ச²ரினோ, தேஸு அஸ்ஸத்³தே⁴ஸு. மிச்சா²தி³ட்டி²யா யுத்தானி குலானி மிச்சா²தி³ட்டி²குலானி, மஜ்ஜே²லோபததியாதப்புரிஸஸமாஸோ, ‘‘நத்தி² தி³ன்ன’’ந்திஆதி³னயப்பவத்தாய த³ஸவத்து²காய மிச்சா²தி³ட்டி²யா யுத்தகுலானி, தேஸு. மிச்சா²தி³ட்டி²குலேஸு லபி⁴த்வாதி ஸம்ப³ந்தோ⁴. அஸக்கச்சகாரீனம் தேஸம் ஸக்கச்சகரணேன, அப்பணீததா³யீனம் தேஸம் பணீததா³னேன ப⁴விதப்³ப³மேத்த² காரணேனாதி காரணம் உபபரிக்கி²த்வாவ பு⁴ஞ்ஜிதும் யுத்தந்தி ஆஹ ‘‘அனுபபரிக்கி²த்வா நேவ அத்தனா பு⁴ஞ்ஜிதப்³ப³ம், ந பரேஸம் தா³தப்³ப³’’ந்தி. யேன காரணேன ப⁴விதப்³ப³ம், தம் த³ஸ்ஸேதும் ‘‘விஸமிஸ்ஸம்பி ஹீ’’திஆதி³ வுத்தம். ந கேவலம் பிண்ட³பாதமேவாதி ஆஹ ‘‘யம்பீ’’திஆதி³. தத்த² காரணமாஹ ‘‘அபிஹிதவத்து²ஸ்மிம்பி ஹீ’’திஆதி³. ததோ அஞ்ஞம்பி த³ஸ்ஸேதி க³ந்த⁴ஹலித்³தா³தி³மக்கி²தோதிஆதி³னா. தத்த²பி காரணம் த³ஸ்ஸேதுமாஹ ‘‘ஸரீரே ரோக³ட்டா²னானீ’’திஆதி³.

கோ³பகதா³னகதா²

18. கோ³பகதா³னகதா²யம் பரேஸம் ஸந்தகம் கோ³பேதி ரக்க²தீதி கோ³பகோ, தஸ்ஸ தா³னம் கோ³பகதா³னம், உய்யானபாலகாதீ³ஹி பி⁴க்கூ²னம் தா³தப்³ப³தா³னம். தத்த² பண்ணம் ஆரோபேத்வாதி ‘‘ஏத்தகேஹேவ ருக்கே²ஹி ஏத்தகமேவ க³ஹேதப்³ப³’’ந்தி பண்ணம் ஆரோபேத்வா, லிகி²த்வாதி வுத்தம் ஹோதி. நிமித்தஸஞ்ஞம் கத்வாதி ஸங்கேதம் கத்வா. தா³ரகாதி தேஸம் புத்தனத்தாத³யோ தா³ரகா. அஞ்ஞேபி யே கேசி கோ³பகா ஹோந்தி, தே ஸப்³பே³பி வுத்தா. ஸப்³ப³த்த²பி கி³ஹீனம் கோ³பகதா³னே யத்தகம் கோ³பகா தே³ந்தி, தத்தகம் க³ஹேதப்³ப³ம். ஸங்கி⁴கே பன யதா²பரிச்சே²த³மேவ க³ஹேதப்³ப³ந்தி தீ³பிதத்தா ‘‘அத்த²தோ ஏக’’ந்தி வுத்தம். விமதிவினோத³னியம்பி (வி. வி. டீ. 1.156) ‘‘பண்ணம் ஆரோபேத்வாதி ‘ஏத்தகே ருக்கே² ரக்கி²த்வா ததோ ஏத்தகம் க³ஹேதப்³ப³’ந்தி பண்ணம் ஆரோபேத்வா. நிமித்தஸஞ்ஞம் கத்வாதி ஸங்கேதம் கத்வா. தா³ரகாதி தேஸம் புத்தனத்தாத³யோ யே கேசி கோ³பேந்தி, தே ஸப்³பே³பி இத⁴ ‘தா³ரகா’தி வுத்தா’’தி, வஜிரபு³த்³தி⁴டீகாயம் (வஜிர. டீ. பாராஜிக 156) பன ‘‘ஆராமரக்க²காதி விஸ்ஸத்த²வஸேன க³ஹேதப்³ப³ம். அதி⁴ப்பாயம் ஞத்வாதி ஏத்த² யஸ்ஸ தா³னம் படிக்³க³ண்ஹந்தம் பி⁴க்கு²ம், பா⁴க³ம் வா ஸாமிகா ந ரக்க²ந்தி ந த³ண்டே³ந்தி, தஸ்ஸ தா³னம் அப்படிச்சா²தே³த்வா க³ஹேதும் வட்டதீதி இத⁴ ஸன்னிட்டா²னம், தம்பி ‘ந வட்டதி ஸங்கி⁴கே’தி வுத்த’’ந்தி வுத்தம்.

யத்தா²தி யஸ்மிம் ஆவாஸே. அஞ்ஞேஸம் அபா⁴வந்தி அஞ்ஞேஸம் ஆக³ந்துகபி⁴க்கூ²னம் அபா⁴வம். தத்தா²தி தாதி³ஸே ஆவாஸே. பா⁴ஜேத்வா கா²த³ந்தீதி ஆக³ந்துகானம்பி ஸம்பத்தானம் பா⁴ஜேத்வா கா²த³ந்தீதி அதி⁴ப்பாயோ. சதூஸு பச்சயேஸு ஸம்மா உபனேந்தீதி அம்ப³ப²லாதீ³னி விக்கிணித்வா சீவராதீ³ஸு சதூஸு பச்சயேஸு ஸம்மா உபனேந்தி. சீவரத்தா²ய நியமேத்வா தி³ன்னாதி ‘‘இமேஸம் ருக்கா²னம் ப²லானி விக்கிணித்வா சீவரேஸுயேவ உபனேதப்³பா³னி, ந பா⁴ஜேத்வா கா²தி³தப்³பா³னீ’’தி ஏவம் நியமேத்வா தி³ன்னா. தேஸுபி ஆக³ந்துகா அனிஸ்ஸராதி பச்சயபரிபோ⁴க³த்தா²ய நியமேத்வா தி³ன்னத்தா பா⁴ஜேத்வா கா²தி³தும் அனிஸ்ஸரா. ந தேஸு…பே… டா²தப்³ப³ந்தி ஏத்த² ஆக³ந்துகேஹி ஹேட்டா² வுத்தனயேன பா⁴ஜேத்வா கா²தி³தப்³ப³ந்தி அதி⁴ப்பாயோ. தேஸம் கதிகாய டா²தப்³ப³ந்தி ‘‘பா⁴ஜேத்வா ந கா²தி³தப்³ப³’’ந்தி வா ‘‘ஏத்தகேஸு ருக்கே²ஸு ப²லானி க³ண்ஹிஸ்ஸாமா’’தி வா ‘‘ஏத்தகானி ப²லானி க³ண்ஹிஸ்ஸாமா’’தி வா ‘‘ஏத்தகானம் தி³வஸானம் அப்³ப⁴ந்தரே க³ண்ஹிஸ்ஸாமா’’தி வா ‘‘ந கிஞ்சி க³ண்ஹிஸ்ஸாமா’’தி வா ஏவம் கதாய ஆவாஸிகானம் கதிகாய ஆக³ந்துகேஹி டா²தப்³ப³ம். மஹாஅட்ட²கதா²யம் ‘‘அனிஸ்ஸரா’’தி வசனேன தீ³பிதோயேவ அத்தோ² மஹாபச்சரியம் ‘‘சதுன்னம் பச்சயான’’ந்திஆதி³னா வித்தா²ரேத்வா த³ஸ்ஸிதோ. பரிபோ⁴க³வஸேனேவாதி ஏத்த² ஏவ-ஸத்³தோ³ அட்டா²னப்பயுத்தோ, பரிபோ⁴க³வஸேன தமேவ பா⁴ஜேத்வாதி யோஜேதப்³ப³ம். ஏத்த² ஏதஸ்மிம் விஹாரே, ரட்டே²வா.

ஸேனாஸனபச்சயந்தி ஸேனாஸனஞ்ச தத³த்தா²ய நியமேத்வா ட²பிதஞ்ச. லாமககோடியாதி லாமகம் ஆதி³ம் கத்வா, லாமகஸேனாஸனதோ பட்டா²யாதி வுத்தம் ஹோதி. ஸேனாஸனேபி திணாதீ³னி லாமககோடியாவ விஸ்ஸஜ்ஜேதப்³பா³னி, ஸேனாஸனபரிக்கா²ராபி லாமககோடியாவ விஸ்ஸஜ்ஜேதப்³பா³. மூலவத்து²ச்சே²த³ம் பன கத்வா ந உபனேதப்³ப³ந்தி இமினா கிம் வுத்தம் ஹோதி? தீஸுபி க³ண்டி²பதே³ஸு தாவ இத³ம் வுத்தம் ‘‘ஸப்³பா³னி ஸேனாஸனானி ந விஸ்ஸஜ்ஜேதப்³பா³னீதி வுத்தம் ஹோதீ’’தி. லாமககோடியா விஸ்ஸஜ்ஜந்தேஹிபி ஸேனாஸனபூ⁴மியோ ந விஸ்ஸஜ்ஜேதப்³பா³தி அயமத்தோ² வுத்தோ ஹோதீதி நோ க²ந்தி. வீமம்ஸித்வா யம் ருச்சதி, தம் க³ஹேதப்³ப³ம்.

த⁴ம்மஸந்தகேன பு³த்³த⁴பூஜம் காதும், பு³த்³த⁴ஸந்தகேன வா த⁴ம்மபூஜம் காதும் வட்டதி ந வட்டதீதி? ‘‘ததா²க³தஸ்ஸ கோ² ஏதம், வாஸேட்ட², அதி⁴வசனம் த⁴ம்மகாயோ இதிபீ’’தி ச ‘‘யோ கோ², வக்கலி, த⁴ம்மம் பஸ்ஸதி, ஸோ மம் பஸ்ஸதீ’’தி (ஸம். நி. 3.87) ச வசனதோ வட்டதீதி வத³ந்தி. கேசி பன ‘‘ஏவம் ஸந்தே ‘யோ, பி⁴க்க²வே, மம் உபட்ட²ஹேய்ய, ஸோ கி³லானம் உபட்ட²ஹேய்யா’தி (மஹாவ. 365) வசனதோ பு³த்³த⁴ஸந்தகேன கி³லானஸ்ஸபி பே⁴ஸஜ்ஜம் காதும் யுத்தந்தி ஆபஜ்ஜேய்ய, தஸ்மா ந வட்டதீ’’தி வத³ந்தி, தம் அகாரணம். ந ஹி ‘‘யோ, பி⁴க்க²வே, மம் உபட்ட²ஹேய்ய, ஸோ கி³லானம் உபட்ட²ஹேய்யா’’தி (மஹாவ. 365) இமினா அத்தனோ ச கி³லானஸ்ஸ ச ஏகஸதி³ஸதா, தது³பட்டா²னஸ்ஸ வா ஸமப²லதா வுத்தா. அயஞ்ஹேத்த² அத்தோ² – ‘‘யோ மம் ஓவாதா³னுஸாஸனீகரணேன உபட்ட²ஹேய்ய, ஸோ கி³லானம் உபட்ட²ஹேய்ய, மம ஓவாத³காரகேன கி³லானோ உபட்டா²தப்³போ³’’தி (மஹாவ. அட்ட². 365). ப⁴க³வதோ ச கி³லானஸ்ஸ ச உபட்டா²னம் ஏகஸதி³ஸந்தி ஏவம் பனேத்த² அத்தோ² ந க³ஹேதப்³போ³, தஸ்மா ‘‘யோ வோ, ஆனந்த³, மயா த⁴ம்மோ ச வினயோ ச தே³ஸிதோ பஞ்ஞத்தோ, ஸோ வோ மமச்சயேன ஸத்தா²’’தி (தீ³. நி. 2.216) வசனதோ ‘‘அஹஞ்ச கோ² பனிதா³னி ஏககோவ ஓவதா³மி அனுஸாஸாமி, மயி பரினிப்³பு³தே இமானி சதுராஸீதி பு³த்³த⁴ஸஹஸ்ஸானி தும்ஹே ஓவதி³ஸ்ஸந்தி அனுஸாஸிஸ்ஸந்தீ’’தி (தீ³. நி. அட்ட². 2.216) வுத்தத்தா ச ப³ஹுஸ்ஸுதம் பி⁴க்கு²ம் பஸம்ஸந்தேன ச ‘‘யோ ப³ஹுஸ்ஸுதோ, ந ஸோ தும்ஹாகம் ஸாவகோ நாம, பு³த்³தோ⁴ நாம ஏஸ சுந்தா³’’தி வுத்தத்தா த⁴ம்மக³ருகத்தா ச ததா²க³தஸ்ஸ புப்³ப³னயோ ஏவ பஸத்த²தரோதி அம்ஹாகம் க²ந்தி. விமதிவினோத³னியம்பி ‘‘யத்தா²தி யஸ்மிம் ஆவாஸே. அஞ்ஞேஸந்தி அஞ்ஞேஸம் ஆக³ந்துகானம். தேஸுபி ஆக³ந்துகா அனிஸ்ஸராதி ஸேனாஸனே நிரந்தரம் வஸந்தானம் சீவரத்தா²ய தா³யகேஹி, பி⁴க்கூ²ஹி வா நியமேத்வா தி³ன்னத்தா பா⁴ஜேத்வா கா²தி³தும் அனிஸ்ஸரா. ஆக³ந்துகேஹிபி இச்ச²ந்தேஹி தஸ்மிம் விஹாரே வஸ்ஸானாதீ³ஸு பவிஸித்வா சீவரத்தா²ய க³ஹேதப்³ப³ம். தேஸம் கதிகாய டா²தப்³ப³ந்தி ஸப்³பா³னி ப²லாப²லானி அபா⁴ஜேத்வா ‘ஏத்தகேஸு ருக்கே²ஸு ப²லானி பா⁴ஜேத்வா பரிபு⁴ஞ்ஜிஸ்ஸாம, அஞ்ஞேஸு ப²லாப²லேஹி ஸேனாஸனானி படிஜக்³கி³ஸ்ஸாமா’தி வா ‘பிண்ட³பாதாதி³பச்சயம் ஸம்பாதே³ஸ்ஸாமா’தி வா ‘கிஞ்சிபி அபா⁴ஜேத்வா சதுபச்சயத்தா²யேவ உபனேமா’தி வா ஏவம் ஸம்மா உபனேந்தானம் ஆவாஸிகானம் கதிகாய ஆக³ந்துகேஹி டா²தப்³ப³ம். மஹாஅட்ட²கதா²யம் ‘அனிஸ்ஸரா’தி வசனேன தீ³பிதோ ஏவ அத்தோ², மஹாபச்சரியம் ‘சதுன்னம் பச்சயான’ந்திஆதி³னா வித்தா²ரேத்வா த³ஸ்ஸிதோ. பரிபோ⁴க³வஸேனேவாதி ஏத்த² ஏவ-ஸத்³தோ³ அட்டா²னப்பயுத்தோ, பரிபோ⁴க³வஸேன தமேவ பா⁴ஜேத்வாதி யோஜேதப்³ப³ம். ஏத்தா²தி ஏதஸ்மிம் விஹாரே, ரட்டே² வா. ஸேனாஸனபச்சயந்தி ஸேனாஸனஞ்ச தத³த்தா²ய நியமேத்வா ட²பிதஞ்ச. ‘ஏகம் வா த்³வே வா வரஸேனாஸனானி ட²பேத்வா’தி வுத்தமேவத்த²ம் புன ப்³யதிரேகமுகே²ன த³ஸ்ஸேதும் ‘மூலவத்து²ச்சே²த³ம் பன கத்வா ந உபனேதப்³ப³’ந்தி வுத்தம், ஸேனாஸனஸங்கா²தவத்து²னோ மூலச்சே²த³ம் கத்வா ஸப்³பா³னி ஸேனாஸனானி ந விஸ்ஸஜ்ஜேதப்³பா³னீதி அத்தோ². கேசி பனேத்த² ‘ஏகம் வா த்³வே வா வரஸேனாஸனானி ட²பேத்வா லாமகதோ பட்டா²ய விஸ்ஸஜ்ஜந்தேஹிபி ஸேனாஸனபூ⁴மியோ ந விஸ்ஸஜ்ஜேதப்³பா³தி அயமத்தோ² வுத்தோ’தி வத³ந்தி, தம்பி யுத்தமேவ இமஸ்ஸபி அத்த²ஸ்ஸ அவஸ்ஸம் வத்தப்³ப³தோ, இதரதா² கேசி ஸஹ வத்து²னாபி விஸ்ஸஜ்ஜேதப்³ப³ம் மஞ்ஞேய்யு’’ந்தி.

வஜிரபு³த்³தி⁴டீகாயம் (வஜிர. டீ. பாராஜிக 153) ‘‘ஏத்த² ஏதஸ்மிம் விஹாரே பரசக்காதி³ப⁴யம் ஆக³தம். மூலவத்து²ச்சே²த³ந்தி ‘ஸப்³ப³ஸேனாஸனானம் ஏதே இஸ்ஸரா’தி வசனதோ இதரே அனிஸ்ஸராதி தீ³பிதம் ஹோதி. அயமேவ பி⁴க்கு² இஸ்ஸரோதி யத்த² ஸோ இச்ச²தி, தத்த² அத்தஞாதஹேதும் லப⁴தீதி கிர அத்தோ², அபி ச ‘த³ஹரோ’தி வத³ந்தி. ஸவத்து²கந்தி ஸஹ பூ⁴மியாதி வுத்தம் ஹோதீ’’தி.

த⁴ம்மிகாரக்க²யாசனகதா²

19. த⁴ம்மிகாரக்க²யாசனகதா²யம் ‘‘கீ³வாயேவாதி ஆணத்தியா அபா⁴வதோ. தேஸம் அனத்த²காமதாயாதி ‘சோரோ’தி வுத்தம் மம வசனம் ஸுத்வா கேசி த³ண்டி³ஸ்ஸந்தி, ஜீவிதா வோரோபேஸ்ஸந்தீதி ஏவம் ஸஞ்ஞாய. ஏதேன கேவலம் ப⁴யேன வா பரிக்கா²ரக்³க³ஹணத்த²ம் வா ஸஹஸா ‘சோரோ’தி வுத்தே த³ண்டி³தேபி ந தோ³ஸோதி த³ஸ்ஸேதி. ராஜபுரிஸானஞ்ஹி ‘சோரோ அய’ந்தி உத்³தி³ஸ்ஸகத²னே ஏவ கீ³வா. பி⁴க்கூ²னம், பன ஆராமிகாதீ³னம் வா ஸம்முகா² ‘அஸுகோ சோரோ ஏவமகாஸீ’தி கேனசி வுத்தவசனம் நிஸ்ஸாய ஆராமிகாதீ³ஸு ராஜபுரிஸானம் வத்வா த³ண்டா³பேந்தேஸுபி பி⁴க்கு²ஸ்ஸ ந கீ³வா ராஜபுரிஸானம் அவுத்தத்தா, யேஸஞ்ச வுத்தம், தேஹி ஸயம் சோரஸ்ஸ அத³ண்டி³தத்தாதி க³ஹேதப்³ப³ம். ‘த்வம் ஏதஸ்ஸ ஸந்தகம் அச்சி²ந்தா³’தி ஆணத்தோபி ஹி ஸசே அஞ்ஞேன அச்சி²ந்தா³பேதி, ஆணாபகஸ்ஸ அனாபத்தி விஸங்கேதத்தா. அத்தனோ வசனகரந்தி இத³ம் ஸாமீசிவஸேன வுத்தம். வசனம் அகரோந்தானம் ராஜபுரிஸானம்பி ‘இமினா க³ஹிதபரிக்கா²ரம் ஆஹராபேஹி, மா சஸ்ஸ த³ண்ட³ம் கரோஹீ’தி உத்³தி³ஸ்ஸ வத³ந்தஸ்ஸபி த³ண்டே³ க³ஹிதேபி ந கீ³வா ஏவ த³ண்ட³க்³க³ஹணஸ்ஸ படிக்கி²த்தத்தா ‘அஸுகப⁴ண்ட³ம் அவஹரா’தி ஆணாபேத்வா விப்படிஸாரே உப்பன்னே புன படிக்கி²பனே (பாரா. 121) விய. தா³ஸாதீ³னம் ஸம்படிச்ச²னே விய தத³த்தா²ய அட்³ட³கரணே பி⁴க்கூ²னம்பி து³க்கடந்தி ஆஹ ‘கப்பியஅட்³டோ³ நாம, ந வட்டதீ’தி. கேனசி பன பி⁴க்கு²னா கே²த்தாதி³அத்தா²ய வோஹாரிகானம் ஸந்திகம் க³ந்த்வா அட்³டே³ கதேபி தம் கே²த்தாதி³ஸம்படிச்ச²னே விய ஸப்³பே³ஸம் அகப்பியம் ந ஹோதி புப்³பே³ ஏவ ஸங்க⁴ஸந்தகத்தா. பி⁴க்கு²ஸ்ஸேவ பன பயோக³வஸேன ஆபத்தியோ ஹோந்தி. தா³ஸாதீ³னம்பி பன அத்தா²ய ரக்க²ம் யாசிதும் வோஹாரிகேன புட்டே²ன ஸங்க⁴ஸ்ஸ உப்பன்னம் கப்பியக்கமம் வத்தும் ஆராமிகாதீ³ஹி ச அட்³ட³ம் காராபேதும் வட்டதி ஏவ. விஹாரவத்தா²தி³கப்பியஅட்³ட³ம் பன பி⁴க்கு²னா ஸயம்பி காதும் வட்டதீ’’தி விமதிவினோத³னியம் (வி. வி. டீ. பாசித்திய 2.679) ஆக³தோ.

வஜிரபு³த்³தி⁴டீகாயம் (வஜிர. டீ. பாசித்திய 681) ‘‘கீ³வாதி கேவலம் கீ³வா ஏவ ஹோதி, ந பாராஜிகம். காராபேத்வா தா³தப்³பா³தி ஏத்த² ஸசே ஆவுத⁴ப⁴ண்ட³ம் ஹோதி, தஸ்ஸ தா⁴ரா ந காராபேதப்³பா³, அஞ்ஞேன பன ஆகாரேன ஸஞ்ஞாபேதப்³ப³’’ந்தி வுத்தம்.

உச்சாராதி³ச²ட்³ட³னகதா²

20. உச்சாராதி³ச²ட்³ட³னகதா²யம் அட்ட²மே உச்சாராதி³ச²ட்³ட³னே ‘‘உச்சாராதி³பா⁴வோ, அனபலோகனம், வளஞ்ஜனட்டா²னம், திரோகுட்டபாகாரதா, ச²ட்³ட³னம் வா ச²ட்³டா³பனம் வாதி இமானி பனேத்த² பஞ்ச அங்கா³னி, நவமே ஹரிதூபரி ச²ட்³ட³னே ஸப்³பே³ஸந்தி பி⁴க்கு²ஸ்ஸ பி⁴க்கு²னியா ச. இத⁴ கே²த்தபாலகா ஆராமாதி³கோ³பகா ச ஸாமிகா ஏவா’’தி ஏத்தகமேவ ஸாரத்த²தீ³பனியம் (ஸாரத்த². டீ. பாசித்திய 3.830) வுத்தம். விமதிவினோத³னியம் (வி. வி. டீ. பாசித்திய 2.830) பன ‘‘அட்ட²மே வளஞ்ஜியமானதிரோகுட்டாதி³தா, அனபலோகேத்வா உச்சாராதீ³னம் ச²ட்³ட³னாதீ³தி த்³வே அங்கா³னி. நவமே ‘மத்த²கச்சி²ன்னனாளிகேரம்பீ’தி வுத்தத்தா ஹரிதூபரி ச²ட்³ட³னமேவ படிக்கி²த்தம். தேனாஹ ‘அனிக்கி²த்தபீ³ஜேஸூ’திஆதி³. யத்த² ச ச²ட்³டே³தும் வட்டதி, தத்த² ஹரிதே வச்சாதி³ம் காதும்பி வட்டதி ஏவ. ஸப்³பே³ஸந்தி பி⁴க்கு²பி⁴க்கு²னீன’’ந்தி வுத்தம். வஜிரபு³த்³தி⁴டீகாயம் (வஜிர. டீ. பாசித்திய 832) பன ‘‘ஸாமிகே அபலோகேத்வாவ ச²ட்³டே³தீதி கத்த²சி போத்த²கே நத்தி², கத்த²சி அத்தி², அத்தி²பா⁴வோவ ஸேய்யோ கிரியாகிரியத்தா ஸிக்கா²பத³ஸ்ஸ. இத⁴ கே²த்தபாலகா ஆராமாதி³கோ³பகா ச ஸாமிகா ஏவ. ‘ஸங்க⁴ஸ்ஸ கே²த்தே ஆராமே ச தத்த² கசவரம் ந ச²ட்³டே³தப்³ப³ந்தி கதிகா சே நத்தி², பி⁴க்கு²ஸ்ஸ ச²ட்³டே³தும் வட்டதி ஸங்க⁴பரியாபன்னத்தா, ந பி⁴க்கு²னீனம். தாஸம்பி பி⁴க்கு²னிஸங்க⁴ஸந்தகே வுத்தனயேன வட்டதி, ந தத்த² பி⁴க்கு²ஸ்ஸ. ஏவம் ஸந்தேபி ஸாருப்பவஸேனேவ காதப்³ப³ந்தி வுத்த’’ந்தி வுத்தம்.

பி⁴க்கு²விப⁴ங்கே³ பன ஸேகி²யவண்ணனாயம் (பாசி. அட்ட². 651) ‘‘அஸஞ்சிச்சாதி படிச்ச²ன்னட்டா²னம் க³ச்ச²ந்தஸ்ஸ ஸஹஸா உச்சாரோ வா பஸ்ஸாவோ வா நிக்க²மதி, அஸஞ்சிச்சகதோ நாம, அனாபத்தி. ந ஹரிதேதி ஏத்த² யம்பி ஜீவருக்க²ஸ்ஸ மூலம் பத²வியம் தி³ஸ்ஸமானம் க³ச்ச²தி, ஸாகா² வா பூ⁴மிலக்³கா³ க³ச்ச²தி, ஸப்³ப³ம் ஹரிதஸங்கா²தமேவ, க²ந்தே⁴ நிஸீதி³த்வா அப்பஹரிதட்டா²னே பாதேதும் வட்டதி. அப்பஹரிதட்டா²னம் ஓலோகேந்தஸ்ஸேவ ஸஹஸா நிக்க²மதி, கி³லானட்டா²னே டி²தோ ஹோதி, வட்டதி. அப்பஹரிதே கதோதி அப்பஹரிதம் அலப⁴ந்தேன திணண்டு³பகம் வா பலாலண்டு³பகம் வா ட²பேத்வா கதோபி பச்சா² ஹரிதம் ஓத்த²ரதி, வட்டதியேவ. ‘கே²ளேன சேத்த² ஸிங்கா⁴ணிகாபி ஸங்க³ஹிதா’தி மஹாபச்சரியம் வுத்தம். ந உத³கேதி ஏதம் பரிபோ⁴க³உத³கமேவ ஸந்தா⁴ய வுத்தம். வச்சகுடிஸமஉத்³தா³தி³உத³கேஸு பன அபரிபோ⁴கே³ஸு அனாபத்தி. தே³வே வஸ்ஸந்தே ஸமந்ததோ உத³கோகோ⁴ ஹோதி, அனுத³கட்டா²னம் ஓலோகேந்தஸ்ஸேவ நிக்க²மதி, வட்டதி. மஹாபச்சரியம் வுத்தம் ஏதாதி³ஸே காலே அனுத³கட்டா²னம் அலப⁴ந்தேன காதும் வட்டதீ’’தி வுத்தம். தஸ்ஸம் வண்ணனாயம் விமதிவினோத³னியஞ்ச (வி. வி. டீ. பாசித்திய 2.652) ‘‘கே²ளேன சேத்த² ஸிங்கா⁴ணிகாபி ஸங்க³ஹிதாதி ஏத்த² உத³கக³ண்டு³ஸகம் கத்வா உச்சு²கசவராதி³ஞ்ச முகே²னேவ ஹரிதும் உத³கேஸு ச²ட்³டே³தும் வட்டதீதி த³ட்ட²ப்³ப³’’ந்தி வுத்தம்.

இமஸ்மிம் டா²னே பண்டி³தேஹி விசாரேதப்³ப³ம் அத்தி² – ‘‘வச்சகுடிஸமுத்³தா³தி³உத³கேஸு பன அபரிபோ⁴கே³ஸு அனாபத்தீ’’தி அட்ட²கதா²யம் வுத்தம், ஏவம் ஸந்தே நதீ³ஜாதஸ்ஸராதீ³ஸு ஆபத்தி வா அனாபத்தி வாதி. தத்த² ஸமுத்³தா³தீ³தி ஆதி³-ஸத்³தே³ன நதீ³ஜாதஸ்ஸராபி ஸங்க³ஹிதாவ, தஸ்மா அனாபத்தீதி சே? ந சேவம் த³ட்ட²ப்³ப³ம். யதி³ ஹி ஸமுத்³தா³தீ³தி ஏத்த² ஆதி³-ஸத்³தே³ன நதீ³ஜாதஸ்ஸராபி ஸங்க³ஹிதா, ஏவம் ஸதி டீகாசரியா வதே³ய்யும், ந பன வத³ந்தி, அட்ட²கதா²யஞ்ச ‘‘வச்சகுடிஸமுத்³தா³தி³உத³கேஸூ’’தி ஏத்தகமேவ வதே³ய்ய, ததா² பன அவத்வா ‘‘அபரிபோ⁴கே³ஸூ’’தி ஹேதுமந்தவிஸேஸனபத³ம்பி க³ஹிதம். தேன ஞாயதி ‘‘ஆதி³ஸத்³தே³ன அபரிபோ⁴கா³னி சந்த³னிகாதி³உத³கானி ஏவ க³ஹிதானி, ந பரிபோ⁴கா³னி நதீ³ஜாதஸ்ஸராதி³உத³கானீ’’தி. தேன ச வச்சகுடிஸமுத்³தா³தி³உத³கானி அபரிபோ⁴க³த்தா அனாபத்திகரானி ஹோந்தி, நதீ³ஜாதஸ்ஸராதி³உத³கானி பன பரிபோ⁴க³த்தா ஆபத்திகரானீதி. கத²ம் பன ‘‘அபரிபோ⁴கே³ஸூ’’தி இமஸ்ஸ பத³ஸ்ஸ ஹேதுமந்தபத³பா⁴வோ ஜானிதப்³போ³தி? யுத்திதோ ஆக³மதோ ச. கத²ம் யுத்திதோ? ‘‘வச்சகுடிஸமுத்³தா³தி³உத³கானி பரிபோ⁴கா³னிபி ஸந்தி, அபரிபோ⁴கா³னிபீ’’தி அப்³யபி⁴சாரியபா⁴வதோ. ப்³யபி⁴சாரே ஹி ஸம்ப⁴வே ஏவ ஸதி விஸேஸனம் ஸாத்த²கம் ஸியா. கத²ம் ஆக³மதோ? வுத்தஞ்ஹேதம் ஆசரியபு³த்³த⁴த³த்தத்தே²ரேன வினயவினிச்ச²யே (வி. வி. 1954) ‘‘தேஸம் அபரிபோ⁴க³த்தா’’தி. தஸ்மா ஆதி³-ஸத்³தே³ன அபரிபோ⁴கா³னியேவ உத³கானி க³ஹிதானி, ந பரிபோ⁴கா³னி. வுத்தஞ்ஹேதம் வினயவினிச்ச²யடீகாயம் ‘‘வச்சகுடிஸமுத்³தா³தி³உத³கேஸூதி ஏத்த² ஆதி³-ஸத்³தே³ன ஸப்³ப³ம் அபரிபோ⁴க³ஜலம் ஸங்க³ய்ஹதி, தேனேவ தேஸம் அபரிபோ⁴க³த்தமேவ காரணமாஹா’’தி, தஸ்மா மனுஸ்ஸானம் பரிபோ⁴கே³ஸு நதீ³ஜாதஸ்ஸரதளாகபோக்க²ரணியாதி³உத³கேஸு உச்சாரபஸ்ஸாவாதி³கரணம் ந வட்டதீதி ஜானிதப்³ப³மேதம். ‘‘தே³வே வஸ்ஸந்தே ஸமந்ததோ உத³கோகோ⁴ ஹோதி, அனுத³கட்டா²னம் ஓலோகேந்தஸ்ஸேவ நிக்க²மதி, வட்டதி. மஹாபச்சரியம் வுத்தம் ஏதாதி³ஸே காலே அனுத³கட்டா²னம் அலப⁴ந்தேன காதும் வட்டதீதி வுத்த’’ந்தி அட்ட²கதா²யம் ஆக³தத்தா மஹந்தேஸு நதீ³ஜாதஸ்ஸராதீ³ஸு நாவாதீ³ஹி க³தகாலே தாதி³ஸே காரணே ஸதி ‘‘தீரம் உபனேஹீ’’தி வத்வா ‘‘உபனேதும் அஸக்குணேய்யட்டா²னே உத³கேபி காதும் வட்டதி, அனாபத்தீ’’தி அட்ட²கதா²னுலோமதோ விஞ்ஞாயதி, உபபரிக்கி²த்வா க³ஹேதப்³ப³ம்.

நஹானேருக்கா²தி³க⁴ம்ஸனகதா²

21. நஹானே ருக்கா²தி³க⁴ம்ஸனந்தி ஏத்த² அட்ட²பதா³காரேனாதி அட்ட²பத³ப²லகாகாரேன, ஜூதப²லகஸதி³ஸந்தி வுத்தம் ஹோதி. மல்லகமூலகஸண்டா²னேனாதி கே²ளமல்லகமூலஸண்டா²னேன. விமதிவினோத³னியம் (வி. வி. டீ. சூளவக்³க³ 2.243) பன ‘‘அட்ட²பதா³காரேனாதி ஜூதப²லகே அட்ட²க³ப்³ப⁴ராஜிஆகாரேன. மல்லகமூலஸண்டா²னேனாதி கே²ளமல்லகமூலஸண்டா²னேன. இத³ஞ்ச வட்டாதா⁴ரகம் ஸந்தா⁴ய வுத்தம். கண்டகே உட்டா²பேத்வா கதவட்டகபாலஸ்ஸேதம் அதி⁴வசனம். புது²பாணிகந்தி முட்டி²ம் அகத்வா விகஸிதஹத்த²தலேஹி பிட்டி²பரிகம்மம் வுச்சதி. ஏதமேவ ஸந்தா⁴ய ஹத்த²பரிகம்ம’’ந்தி வுத்தம். வஜிரபு³த்³தி⁴டீகாயம் (வஜிர. டீ. சூளவக்³க³ 244) பன ‘‘புது²பாணினா கத்தப்³ப³ம் கம்மம் புது²பாணிகம்ம’’ந்தி வுத்தம்.

ஏவம் பாளிஅனுஸாரேனேவ நஹானே கத்தப்³பா³கத்தப்³ப³ம் த³ஸ்ஸேத்வா இதா³னி நஹானதித்தே² நஹாயந்தானம் பி⁴க்கூ²னம் நஹானவிதி⁴ம் த³ஸ்ஸேந்தோ ‘‘இத³ம் பனேத்த² நஹானவத்த’’ந்திஆதி³மாஹ. தத்த² பஸ்ஸந்தானம் அப்பஸாதா³வஹனதோ, கி³ஹிபுரிஸானம் கம்மம் வியாதி க³ரஹிதப்³ப³பா⁴வதோ ச வுத்தம் ‘‘யத்த² வா தத்த² வா…பே… ந ஓதரிதப்³ப³’’ந்தி. அஞ்ஞேஸு ஸம்முகீ²பூ⁴தேஸு அனுத³கஸாடகேன நஹாயிதும் து³க்கரத்தா ‘‘ஸப்³ப³தி³ஸா பன ஓலோகேத்வா விவித்தபா⁴வம் ஞத்வா’’தி வுத்தம். ஏவம்பி கா²ணுகு³ம்ப³லதாதீ³ஹி படிச்ச²ன்னாபி ஹுத்வா திட்டே²ய்யுந்தி ஆஹ ‘‘கா²ணு…பே… உக்காஸித்வா’’தி. உத்³த⁴ம்முகே²ன சீவராபனயனம் ஹராயிதப்³ப³ம் ஸியாதி வுத்தம் ‘‘அவகுஜ்ஜ…பே… அபனேத்வா’’தி. ததோ காயப³ந்த⁴னட்ட²பனவத்தமாஹ ‘‘காயப³ந்த⁴ன’’ந்த்யாதி³னா. ததோ உத³கஸாடிகாய ஸதி தம் நிவாஸேத்வா ஓதரிதப்³ப³ம் ஸியா, தாய அஸதியா கிம் காதப்³ப³ந்தி சோத³னம் ஸந்தா⁴யாஹ ‘‘ஸசே’’திஆதி³. தத்த² புப்³பே³ ‘‘டி²தகேனேவ ந ஓதரிதப்³ப³’’ந்தி அஹிரிகாகாரஸ்ஸ படிஸித்³த⁴த்தா இத⁴ ஹிரிமந்தாகாரம் த³ஸ்ஸேதி உத³கந்தே உக்குடிகம் நிஸீதி³த்வா நிவாஸனம் மோசேத்வாதி. உண்ணட்டா²னே, ஸமட்டா²னே வா பஸாரிதே ஸதி வா தேன அஞ்ஞத்த² க³ச்சே²ய்யாதி ஆஹ ‘‘ஸசே நின்னட்டா²ன’’ந்திஆதி³.

ஓதரந்தேன கிம் காதப்³ப³ந்தி புச்ச²ம் ஸந்தா⁴ய ‘‘ஓதரந்தேன ஸணிக’’ந்த்யாதி³. தத்த² புப்³பே³ ‘‘வேகே³ன ந ஓதரிதப்³ப³’’ந்தி படிஸித்³தா⁴னுரூபமாஹ ‘‘ஸணிக’’ந்தி. அதிக³ம்பீ⁴ரம் க³ச்ச²ந்தோ உத³கோக⁴தரங்க³வாதாதீ³ஹி பஹரந்தோ சலிதகாயோ ஸியா, அதிஉத்தானே நிஸீத³ந்தோ அப்படிச்ச²ன்னகாயோ ஸியாதி வுத்தம் ‘‘நாபி⁴ப்பமாணமத்தம் ஓதரித்வா’’தி. அத்தனோ ஹத்த²விகாராதீ³ஹி வீசிம் உட்டா²பேந்தோ, ஸத்³த³ஞ்ச கரோந்தோ உத்³த⁴டசபலபா⁴வோ ஸியாதி வுத்தம் ‘‘வீசிம் அனுட்ட²பேந்தேன ஸத்³த³ம் அகரோந்தேன நிவத்தித்வா’’தி. நிவத்தித்வா கிம் காதப்³ப³ந்தி ஆஹ ஆக³ததி³ஸாபி⁴முகே²ன நிமுஜ்ஜிதப்³ப³’’ந்தி, அபி⁴முகே²ன ஹுத்வாதி பாட²ஸேஸோ. இதா³னி தப்ப²லம் த³ஸ்ஸேந்தோ ‘‘ஏவ’’ந்த்யாதி³மாஹ. ததோ உம்முஜ்ஜந்தேன கிம் காதப்³ப³ந்தி புச்சா²யமாஹ ‘‘உம்முஜ்ஜந்தேனபீ’’திஆதி³. ஸேஸம் ஸுவிஞ்ஞேய்யமேவ. சீவரம் பாருபித்வாவ டா²தப்³ப³ம், கஸ்மாதி சே? ந தாவ காயதோ உத³கம் ஓதரதி, தஸ்மா தோ²கம் காலம் உத்தராஸங்க³ம் சீவரம் உபோ⁴ஹி ஹத்தே²ஹி அந்தே க³ஹேத்வா புரதோ கத்வா டா²தப்³ப³ம். ததோ காயஸ்ஸ ஸுக்க²பா⁴வம் ஞத்வா சீவரம் பாருபித்வா யதா²ருசி க³ந்தப்³ப³ந்தி.

வலிகாதி³கதா²

22. வலிகாதி³கதா²யம் ‘‘முத்தோலம்ப³காதீ³னந்தி ஆதி³-ஸத்³தே³ன குண்ட³லாதி³ம் ஸங்க³ண்ஹாதி. பலம்ப³கஸுத்தந்தி யஞ்ஞோபசிதாகாரேன ஓலம்ப³கஸுத்த’’ந்தி ஸாரத்த²தீ³பனியம் (ஸாரத்த². டீ. சூளவக்³க³ 3.245). விமதிவினோத³னியம் (வி. வி. டீ. சூளவக்³க³ 2.245) பன ‘‘முத்தோலம்ப³காதீ³னந்தி ஆதி³-ஸத்³தே³ன குண்ட³லாதி³ம் ஸங்க³ண்ஹாதி. பலம்ப³கஸுத்தந்தி ப்³ராஹ்மணானம் யஞ்ஞோபசிதஸுத்தாதி³ஆகாரம் வுச்சதி. வலயந்தி ஹத்த²பாத³வலய’’ந்தி வுத்தம். வஜிரபு³த்³தி⁴டீகாயம் (வஜிர. டீ. சூளவக்³க³ 245) பன ‘‘கண்ணதோ நிக்க²ந்தமுத்தோலம்ப³காதீ³னம் குண்ட³லாதீ³னந்தி லிகி²தம். ‘காயூர’ந்தி பாளிபாடோ². ‘கேயூராதீ³னீ’தி ஆசரியேனுத்³த⁴ட’’ந்தி வுத்தம்.

தீ³க⁴கேஸகதா²

23. தீ³க⁴கேஸகதா²யம் ஸாரத்த²தீ³பனியம் ந கிஞ்சி வுத்தம். விமதிவினோத³னியம் (வி. வி. டீ. சூளவக்³க³ 2.246) பன ‘‘த்³வங்கு³லேதி உபயோக³ப³ஹுவசனம், த்³வங்கு³லப்பமாணம் அதிக்காமேதும் ந வட்டதீதி அத்தோ². ஏத்த² ச து³மாஸஸ்ஸ வா த்³வங்கு³லஸ்ஸ வா அதிக்கந்தபா⁴வம் அஜானந்தஸ்ஸபி கேஸமஸ்ஸுக³ணனாய அசித்தகாபத்தியோ ஹோந்தீதி வத³ந்தி. கோச்சே²னாதி உஸீரஹீராதீ³னி ப³ந்தி⁴த்வா ஸமகம் சி²ந்தி³த்வா க³ஹிதகோச்சே²ன. சிக்கலேனாதி ஸிலேஸயுத்ததேலேன. உண்ஹாபி⁴தத்தரஜஸிரானம்பீதி உண்ஹாபி⁴தத்தானம் ரஜோகிண்ணஸிரானம். அத்³த³ஹத்தே²னாதி அல்லஹத்தே²னா’’தி வுத்தம்.

உபரி பன பாளியம் (சூளவ. 275) ‘‘தேன கோ² பன ஸமயேன ச²ப்³ப³க்³கி³யா பி⁴க்கூ² மஸ்ஸும் கப்பாபேந்தி. மஸ்ஸும் வட்³டா⁴பேந்தி. கோ³லோமிகம் காராபேந்தி. சதுரஸ்ஸகம் காராபேந்தி. பரிமுக²ம் காராபேந்தி. அட்³ட⁴து³கம் காராபேந்தி. தா³டி²கம் ட²பேந்தி. ஸம்பா³தே⁴ லோமம் ஸம்ஹராபேந்தி. மனுஸ்ஸா உஜ்ஜா²யந்தி கீ²யந்தி விபாசேந்தி ‘ஸேய்யதா²பி கி³ஹீ காமபோ⁴கி³னோ’தி. ப⁴க³வதோ ஏதமத்த²ம் ஆரோசேஸும் – ந, பி⁴க்க²வே, மஸ்ஸு கப்பாபேதப்³ப³ம். ந மஸ்ஸு வட்³டா⁴பேதப்³ப³ம். ந கோ³லோமிகம் காராபேதப்³ப³ம். ந சதுரஸ்ஸகம் காராபேதப்³ப³ம். ந பரிமுக²ம் காராபேதப்³ப³ம். ந அட்³ட⁴து³கம் காராபேதப்³ப³ம். ந தா³டி²கா ட²பேதப்³பா³. ந ஸம்பா³தே⁴ லோமம் ஸம்ஹராபேதப்³ப³ம், யோ ஸம்ஹராபேய்ய, ஆபத்தி து³க்கடஸ்ஸா’’தி ஆக³தம். அட்ட²கதா²யம்பி (சூளவ. அட்ட². 275) ‘‘மஸ்ஸும் கப்பாபேந்தீதி கத்தரியா மஸ்ஸும் சே²தா³பேந்தி. மஸ்ஸும் வட்³டா⁴பேந்தீதி மஸ்ஸும் தீ³க⁴ம் காரேந்தி. கோ³லோமிகந்தி ஹனுகம்ஹி தீ³க⁴ம் கத்வா ட²பிதம் ஏளகமஸ்ஸு வுச்சதி. சதுரஸ்ஸகந்தி சதுகோணம். பரிமுக²ந்தி உத³ரே லோமஸம்ஹரணம். அட்³ட⁴து³கந்தி உத³ரே லோமராஜிட்ட²பனம். ஆபத்தி து³க்கடஸ்ஸாதி மஸ்ஸுகப்பாபனாதீ³ஸு ஸப்³ப³த்த² ஆபத்தி து³க்கடஸ்ஸா’’தி வுத்தம்.

புன பாளியம் (சூளவ. 275) ‘‘தேன கோ² பன ஸமயேன பி⁴க்கூ² ஸக்க²ரிகாயபி மது⁴ஸித்த²கேனபி நாஸிகாலோமம் கா³ஹாபேந்தி, நாஸிகா து³க்கா² ஹோந்தி. அனுஜானாமி, பி⁴க்க²வே, ஸண்டா³ஸந்தி. தேன கோ² பன ஸமயேன ச²ப்³ப³க்³கி³யா பி⁴க்கூ² பலிதம் கா³ஹாபேந்தி. மனுஸ்ஸா உஜ்ஜா²யந்தி கீ²யந்தி விபாசேந்தி ‘ஸேய்யதா²பி கி³ஹீ காமபோ⁴கி³னோ’தி. ப⁴க³வதோ ஏதமத்த²ம் ஆரோசேஸும் – ந, பி⁴க்க²வே, பலிதம் கா³ஹாபேதப்³ப³ம், யோ கா³ஹாபேய்ய, ஆபத்தி து³க்கடஸ்ஸா’’தி ஆக³தம். ‘‘ஸக்க²ராதீ³ஹி நாஸிகாலோமக்³கா³ஹாபனே ஆபத்தி நத்தி², அனுரக்க²ணத்த²ம் பன ஸண்டா³ஸோ அனுஞ்ஞாதோ’’தி அட்ட²கதா²யம் வுத்தம். ‘‘ந, பி⁴க்க²வே, பலிதம் கா³ஹாபேதப்³ப³ந்தி ஏத்த² ப⁴முகாய வா நலாடே வா தா³டி²காய வா உக்³க³ந்த்வா பீ³ப⁴ச்ச²ம் டி²தம், தாதி³ஸம் லோமம் பலிதம் வா அபலிதம் வா கா³ஹாபேதும் வட்டதீ’’தி ச வுத்தம்.

ஆதா³ஸாதி³கதா²

24. ஆதா³ஸாதி³கதா²யம் ஆதா³ஸோ நாம மண்ட³னபகதிகானம் மனுஸ்ஸானம் அத்தனோ முக²ச்சா²யாத³ஸ்ஸனத்த²ம் கம்ஸலோஹாதீ³ஹி கதோ ப⁴ண்ட³விஸேஸோ. உத³கபத்தோ நாம உத³கட்ட²பனகோ பாதிஸராவாதி³கோ பா⁴ஜனவிஸேஸோ. கம்ஸபத்தாதீ³னீதி ஆதா³ஸபா⁴வேன அகதானி பரிஸுத்³த⁴பா⁴வேன ஆலோககரானி வத்தூ²னி. ஆதி³-ஸத்³தே³ன ஸுவண்ணரஜதஜாதிப²லிகாத³யோ ஸங்க³ண்ஹாதி, கஞ்ஜியாதீ³னீதி ஏத்த² ஆதி³-ஸத்³தே³ன த்³ரவஜாதிகானி தேலமது⁴கீ²ராதீ³னி. ஆபா³த⁴பச்சயாதி அத்தனோ முகே² உப்பன்னவணபச்சயா. தேனாஹ ‘‘ஸஞ்ச²வி நு கோ² மே வணோ’’திஆதி³. ஆயும் ஸங்க²ரோதீதி ஆயுஸங்கா²ரோ. கோ ஸோ? அத்தபா⁴வோ, தம் ஆயுஸங்கா²ரம், தம் ஓலோகேந்தோ கேனாகாரேன ஓலோகேய்யாதி புச்சா²யமாஹ ‘‘ஜிண்ணோ நு கோ²ம்ஹி நோதி ஏவ’’ந்தி. தஸ்ஸத்தோ² – மம அத்தபா⁴வோ ஜிண்ணோ நு கோ² வா, நோ ஜிண்ணோ நு கோ² வாதி ஏவம் இமினா மனஸிகாரேன கம்மட்டா²னஸீஸேன ஓலோகேதும் வட்டதி. ‘‘ஸோப⁴தி நு கோ² மே அத்தபா⁴வோ, நோ வா’’தி ஏவம் பவத்தேன அத்தஸினேஹவஸேன ஓலோகேதும் ந வட்டதீதி.