31. சோத³னாதி³வினிச்ச²யகதா²

230. ஏவம் க³ருப⁴ண்ட³வினிச்ச²யம் கதே²த்வா இதா³னி சோத³னாதி³வினிச்ச²யம் கதே²தும் ‘‘சோத³னாதி³வினிச்ச²யோதி ஏத்த² பனா’’திஆதி³மாஹ. தத்த² சோதீ³யதே சோத³னா, தோ³ஸாரோபனந்தி அத்தோ². ஆதி³-ஸத்³தே³ன ஸாரணாத³யோ ஸங்க³ண்ஹாதி. வுத்தஞ்ஹேதம் கம்மக்க²ந்த⁴கே (சூளவ. 4, 5) ‘‘சோதே³த்வா கதம் ஹோதி, ஸாரேத்வா கதம் ஹோதி, ஆபத்திம் ரோபேத்வா கதம் ஹோதீ’’தி. ‘‘சோதே³தும் பன கோ லப⁴தி, கோ ந லப⁴தீ’’தி இத³ம் அனுத்³த⁴ம்ஸனாதி⁴ப்பாயம் வினாபி சோத³னாலக்க²ணம் த³ஸ்ஸேதும் வுத்தம். ஸீலஸம்பன்னோதி இத³ம் து³ஸ்ஸீலஸ்ஸ வசனம் அப்பமாணந்தி அதி⁴ப்பாயேன வுத்தம். பி⁴க்கு²னீனம் பன பி⁴க்கு²ம் சோதே³தும் அனிஸ்ஸரத்தா ‘பி⁴க்கு²னிமேவா’தி வுத்தம். ஸதிபி பி⁴க்கு²னீனம் பி⁴க்கூ²ஸு அனிஸ்ஸரபா⁴வே தாஹி கதசோத³னாபி சோத³னாரஹத்தா சோத³னாயேவாதி அதி⁴ப்பாயேன ‘‘பஞ்சபி ஸஹத⁴ம்மிகா லப⁴ந்தீ’’தி வுத்தம். பி⁴க்கு²ஸ்ஸ ஸுத்வா சோதே³தீதிஆதி³னா சோத³கோ யேஸம் ஸுத்வா சோதே³தி, தேஸம்பி வசனம் பமாணமேவாதி ஸம்படிச்சி²தத்தா தேஸம் சோத³னாபி ருஹதேவாதி த³ஸ்ஸேதும் ‘‘தே²ரோ ஸுத்தம் நித³ஸ்ஸேஸீ’’தி ஸாரத்த²தீ³பனியம் (ஸாரத்த². டீ. 2.385-386) வுத்தம். விமதிவினோத³னியம் (வி. வி. டீ. 1.386) பன ‘‘அமூலகசோத³னாபஸங்கே³ன ஸமூலகசோத³னாலக்க²ணாதி³ம் த³ஸ்ஸேதும் ‘சோதே³தும் பன கோ லப⁴தி, கோ ந லப⁴தீ’திஆதி³ ஆரத்³த⁴ம். ‘பி⁴க்கு²ஸ்ஸ ஸுத்வா சோதே³தீ’திஆதி³ஸுத்தம் யஸ்மா யே சோத³கஸ்ஸ அஞ்ஞேஸம் விபத்திம் பகாஸேந்தி, தேபி தஸ்மிம் க²ணே சோத³கபா⁴வே ட²த்வாவ பகாஸேந்தி, தேஸஞ்ச வசனம் க³ஹேத்வா இதரோபி யஸ்மா சோதே³துஞ்ச அஸம்படிச்ச²ந்தம் தேஹி தித்தி²யஸாவகபரியோஸானேஹி பட²மசோத³கேஹி ஸம்படிச்சா²பேதுஞ்ச லப⁴தி, தஸ்மா இத⁴ ஸாத⁴கபா⁴வேன உத்³த⁴டந்தி வேதி³தப்³ப³’’ந்தி வுத்தம்.

க³ருகானம் த்³வின்னந்தி பாராஜிகஸங்கா⁴தி³ஸேஸானம். அவஸேஸானந்தி து²ல்லச்சயாதீ³னம் பஞ்சன்னம் ஆபத்தீனம். மிச்சா²தி³ட்டி² நாம ‘‘நத்தி² தி³ன்ன’’ந்திஆதி³னயப்பவத்தா த³ஸவத்து²கா தி³ட்டி². ‘‘அந்தவா லோகோ அனந்தவா லோகோ’’திஆதி³கா அந்தம் க³ண்ஹாபகதி³ட்டி² அந்தக்³கா³ஹிகா நாம. ஆஜீவஹேது பஞ்ஞத்தானம் ச²ன்னந்தி ஆஜீவஹேதுபி ஆபஜ்ஜிதப்³பா³னம் உத்தரிமனுஸ்ஸத⁴ம்மே பாராஜிகம், ஸஞ்சரித்தே ஸங்கா⁴தி³ஸேஸோ, ‘‘யோ தே விஹாரே வஸதி, ஸோ அரஹா’’தி பரியாயேன து²ல்லச்சயம், பி⁴க்கு²ஸ்ஸ பணீதபோ⁴ஜனவிஞ்ஞத்தியா பாசித்தியம், பி⁴க்கு²னியா பணீதபோ⁴ஜனவிஞ்ஞத்தியா பாடிதே³ஸனீயம், ஸூபோத³னவிஞ்ஞத்தியா து³க்கடந்தி இமேஸம் பரிவாரே (பரி. 287) வுத்தானம் ச²ன்னம். ந ஹேதா ஆபத்தியோ ஆஜீவஹேது ஏவ பஞ்ஞத்தா ஸஞ்சரித்தாதீ³னம் அஞ்ஞதா²பி ஆபஜ்ஜிதப்³ப³தோ. ஆஜீவஹேதுபி ஏதாஸம் ஆபஜ்ஜனம் ஸந்தா⁴ய ஏவம் வுத்தம், ஆஜீவஹேதுபி பஞ்ஞத்தானந்தி அத்தோ². தி³ட்டி²விபத்திஆஜீவவிபத்தீஹி சோதே³ந்தோபி தம்மூலிகாய ஆபத்தியா ஏவ சோதே³தி.

‘‘கஸ்மா மம் ந வந்த³ஸீ’’தி புச்சி²தே ‘‘அஸ்ஸமணோஸி, அஸக்யபுத்தியோஸீ’’தி அவந்த³னகாரணஸ்ஸ வுத்தத்தா அந்திமவத்து²ம் அஜ்ஜா²பன்னோ ந வந்தி³தப்³போ³தி வத³ந்தி. சோதே³துகாமதாய ஏவ அவந்தி³த்வா அத்தனா வத்தப்³ப³ஸ்ஸ வுத்தமத்த²ம் ட²பேத்வா அவந்தி³யபா⁴வே தம் காரணம் ந ஹோதீதி சூளக³ண்டி²பதே³ மஜ்ஜி²மக³ண்டி²பதே³ ச வுத்தம். அந்திமவத்து²அஜ்ஜா²பன்னஸ்ஸ அவந்தி³யேஸு அவுத்தத்தா தேன ஸத்³தி⁴ம் ஸயந்தஸ்ஸ ஸஹஸேய்யாபத்தியா அபா⁴வதோ, தஸ்ஸ ச படிக்³க³ஹணஸ்ஸ ருஹனதோ ததே³வ யுத்ததரந்தி விஞ்ஞாயதி. கிஞ்சாபி யாவ ஸோ பி⁴க்கு²பா⁴வம் படிஜானாதி, தாவ வந்தி³தப்³போ³, யதா³ பன ‘‘அஸ்ஸமணோம்ஹீ’’தி படிஜானாதி, ததா³ ந வந்தி³தப்³போ³தி அயமேத்த² விஸேஸோ வேதி³தப்³போ³. அந்திமவத்து²ம் அஜ்ஜா²பன்னஸ்ஸ ஹி பி⁴க்கு²பா⁴வம் படிஜானந்தஸ்ஸேவ பி⁴க்கு²பா⁴வோ, ந ததோ பரம். பி⁴க்கு²பா⁴வம் அப்படிஜானந்தோ ஹி அனுபஸம்பன்னபக்க²ம் ப⁴ஜதி. யஸ்மா ஆமிஸம் தே³ந்தோ அத்தனோ இச்சி²தட்டா²னேயேவ தே³தி, தஸ்மா படிபாடியா நிஸின்னானம் யாகு³ப⁴த்தாதீ³னி தே³ந்தேன ஏகஸ்ஸ சோதே³துகாமதாய அதி³ன்னேபி சோத³னா நாம ந ஹோதீதி ஆஹ ‘‘ந தாவ தா சோத³னா ஹோதீ’’தி.

231. சோதே³தப்³போ³தி சுதி³தோ, சுதி³தோ ஏவ சுதி³தகோ, அபராத⁴வந்தோ புக்³க³லோ. சோதே³தீதி சோத³கோ, அபராத⁴பகாஸகோ. சுதி³தகோ ச சோத³கோ ச சுதி³தகசோத³கா. உப்³பா³ஹிகாயாதி உப்³ப³ஹந்தி வியோஜேந்தி ஏதாய அலஜ்ஜீனம் தஜ்ஜனிம் வா கலஹம் வாதி உப்³பா³ஹிகா, ஸங்க⁴ஸம்முதி, தாய. வினிச்சி²னனம் நாம தாய ஸம்மதபி⁴க்கூ²ஹி வினிச்சி²னனமேவ. அலஜ்ஜுஸ்ஸன்னாய ஹி பரிஸாய ஸமத²க்க²ந்த⁴கே ஆக³தேஹி த³ஸஹங்கே³ஹி ஸமன்னாக³தா த்³வே தயோ பி⁴க்கூ² தத்தே²வ வுத்தாய ஞத்திது³தியகம்மவாசாய ஸம்மன்னிதப்³பா³. வுத்தஞ்ஹேதம் ஸமத²க்க²ந்த⁴கே (சூளவ. 231-232) –

‘‘தேஹி சே, பி⁴க்க²வே, பி⁴க்கூ²ஹி தஸ்மிம் அதி⁴கரணே வினிச்சி²யமானே அனந்தானி சேவ ப⁴ஸ்ஸானி ஜாயந்தி, ந சேகஸ்ஸ பா⁴ஸிதஸ்ஸ அத்தோ² விஞ்ஞாயதி. அனுஜானாமி, பி⁴க்க²வே, ஏவரூபம் அதி⁴கரணம் உப்³பா³ஹிகாய வூபஸமேதும். த³ஸஹங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³, ஸீலவா ஹோதி, பாதிமோக்க²ஸம்வரஸம்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ ஸமாதா³ய ஸிக்க²தி ஸிக்கா²பதே³ஸு, ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் அபி⁴வத³ந்தி, ததா²ரூபஸ்ஸ த⁴ம்மா ப³ஹுஸ்ஸுதா ஹோந்தி தா⁴தா வசஸா பரிசிதா மனஸானுபேக்கி²தா தி³ட்டி²யா ஸுப்படிவித்³தா⁴, உப⁴யானி கோ² பனஸ்ஸ பாதிமோக்கா²னி வித்தா²ரேன ஸ்வாக³தானி ஹோந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ, வினயே கோ² பன சே²கோ ஹோதி அஸம்ஹீரோ, படிப³லோ ஹோதி உபோ⁴ அத்த²பச்சத்தி²கே அஸ்ஸாஸேதும் ஸஞ்ஞாபேதும் நிஜ்ஜா²பேதும் பேக்கே²தும் பஸ்ஸிதும் பஸாதே³தும், அதி⁴கரணஸமுப்பாத³வூபஸமகுஸலோ ஹோதி, அதி⁴கரணம் ஜானாதி, அதி⁴கரணஸமுத³யம் ஜானாதி, அதி⁴கரணனிரோத⁴ம் ஜானாதி, அதி⁴கரணனிரோத⁴கா³மினிபடிபத³ம் ஜானாதி. அனுஜானாமி, பி⁴க்க²வே, இமேஹி த³ஸஹங்கே³ஹி ஸமன்னாக³தம் பி⁴க்கு²ம் உப்³பா³ஹிகாய ஸம்மன்னிதும்.

‘‘ஏவஞ்ச பன, பி⁴க்க²வே, ஸம்மன்னிதப்³போ³. பட²மம் பி⁴க்கு² யாசிதப்³போ³, யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴, அம்ஹாகம் இமஸ்மிம் அதி⁴கரணே வினிச்சி²யமானே அனந்தானி சேவ ப⁴ஸ்ஸானி ஜாயந்தி, ந சேகஸ்ஸ பா⁴ஸிதஸ்ஸ அத்தோ² விஞ்ஞாயதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கு²ம் ஸம்மன்னேய்ய உப்³பா³ஹிகாய இமம் அதி⁴கரணம் வூபஸமேதும், ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴, அம்ஹாகம் இமஸ்மிம் அதி⁴கரணே வினிச்சி²யமானே அனந்தானி சேவ ப⁴ஸ்ஸானி ஜாயந்தி, ந சேகஸ்ஸ பா⁴ஸிதஸ்ஸ அத்தோ² விஞ்ஞாயதி. ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கு²ம் ஸம்மன்னதி உப்³பா³ஹிகாய இமம் அதி⁴கரணம் வூபஸமேதும். யஸ்ஸாயஸ்மதோ க²மதி இத்த²ன்னாமஸ்ஸ ச இத்த²ன்னாமஸ்ஸ ச பி⁴க்கு²னோ ஸம்முதி உப்³பா³ஹிகாய இமம் அதி⁴கரணம் வூபஸமேதும், ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸேய்ய.

‘‘ஸம்மதோ ஸங்கே⁴ன இத்த²ன்னாமோ ச இத்த²ன்னாமோ ச பி⁴க்கு² உப்³பா³ஹிகாய இமம் அதி⁴கரணம் வூபஸமேதும், க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

தேஹி ச ஸம்மதேஹி விஸும் வா நிஸீதி³த்வா தஸ்ஸா ஏவ வா பரிஸாய ‘‘அஞ்ஞேஹி ந கிஞ்சி கதே²தப்³ப³’’ந்தி ஸாவேத்வா தம் அதி⁴கரணம் வினிச்சி²தப்³ப³ம். தும்ஹாகந்தி சுதி³தகசோத³கே ஸந்தா⁴ய வுத்தம்.

‘‘கிம்ஹீதி கிஸ்மிம் வத்து²ஸ்மிம். கிம்ஹி நம்பி ந ஜானாஸீதி கிம்ஹி நந்தி வசனம்பி ந ஜானாஸி. நாஸ்ஸ அனுயோகோ³ தா³தப்³போ³தி நாஸ்ஸ புச்சா² படிபுச்சா² தா³தப்³பா³’’தி ஸாரத்த²தீ³பனியம் (ஸாரத்த². டீ. 2.385-386) வுத்தம், விமதிவினோத³னியம் (வி. வி. டீ. 1.386) பன – கிம்ஹீதி கிஸ்மிம் வத்து²ஸ்மிம், கதரவிபத்தியந்தி அத்தோ². கிம்ஹி நம் நாமாதி இத³ம் ‘‘கதராய விபத்தியா ஏதம் சோதே³ஸீ’’தி யாய காயசி விஞ்ஞாயமானாய பா⁴ஸாய வுத்தேபி சோத³கஸ்ஸ வினயே அபகதஞ்ஞுதாய ‘‘ஸீலாசாரதி³ட்டி²ஆஜீவவிபத்தீஸு கதராயாதி மம் புச்ச²தீ’’தி விஞ்ஞாதும் அஸக்கோந்தஸ்ஸ புச்சா², ந பன ‘‘கிம்ஹீ’’திஆதி³பத³த்த²மத்தம் அஜானந்தஸ்ஸ. ந ஹி அனுவிஜ்ஜகோ சோத³கம் பா³லம் அபரிசிதபா⁴ஸாய ‘‘கிம்ஹி ந’’ந்தி புச்ச²தி. கிம்ஹி நம்பி ந ஜானாஸீதி இத³ம்பி வசனமத்தம் ஸந்தா⁴ய வுத்தம் ந ஹோதி. ‘‘கதரவிபத்தியா’’தி வுத்தே ‘‘அஸுகாய விபத்தியா’’தி வத்தும்பி ‘‘ந ஜானாஸீ’’தி வசனஸ்ஸ அதி⁴ப்பாயமேவ ஸந்தா⁴ய வுத்தந்தி க³ஹேதப்³ப³ம். தேனேவ வக்க²தி ‘‘நாஸ்ஸ அனுயோகோ³ தா³தப்³போ³’’தி.

‘‘தஸ்ஸ நயோ தா³தப்³போ³’’தி தஸ்ஸாதி பா³லஸ்ஸ லஜ்ஜிஸ்ஸ. ‘‘தஸ்ஸ நயோ தா³தப்³போ³’’தி வத்வா ச ‘‘கிம்ஹி நம் சோதே³ஸீதி ஸீலவிபத்தியா’’திஆதி³ அதி⁴ப்பாயப்பகாஸனமேவ நயதா³னம் வுத்தம், ந பன கிம்ஹி-நம்-பதா³னம்பரியாயமத்தத³ஸ்ஸனம். ந ஹி பா³லோ ‘‘கதரவிபத்தியம் நம் சோதே³ஸீ’’தி இமஸ்ஸ வசனஸ்ஸ அத்தே² ஞாதேபி விபத்திப்பபே⁴த³ம், அத்தனா சோதி³யமானம் விபத்திஸரூபஞ்ச ஜானிதும் ஸக்கோதி, தஸ்மா தேனேவ அஜானனேன அலஜ்ஜீ அபஸாதே³தப்³போ³. கிம்ஹி நந்தி இத³ம்பி உபலக்க²ணமத்தம். அஞ்ஞேன வா யேன கேனசி ஆகாரேன அவிஞ்ஞுதம் பகாஸேத்வா விஸ்ஸஜ்ஜேதப்³போ³வ. ‘‘து³ம்மங்கூனம் புக்³க³லானம் நிக்³க³ஹாயா’’திஆதி³வசனதோ ‘‘அலஜ்ஜீனிக்³க³ஹத்தா²ய…பே… பஞ்ஞத்த’’ந்தி வுத்தம். ஏஹிதீதி ஏதி, ஹி-காரோ ஏத்த² ஆக³மோ த³ட்ட²ப்³போ³, ஆக³மிஸ்ஸதீதி அத்தோ². தி³ட்ட²ஸந்தானேனாதி தி³ட்ட²னியாமேன. அலஜ்ஜிஸ்ஸ படிஞ்ஞாய ஏவ காதப்³ப³ந்தி வசனபடிவசனக்கமேனேவ தோ³ஸே ஆவிபூ⁴தேபி அலஜ்ஜிஸ்ஸ ‘‘அஸுத்³தோ⁴ அஹ’’ந்தி தோ³ஸஸம்படிச்ச²னபடிஞ்ஞாய ஏவ ஆபத்தியா காதப்³ப³ந்தி அத்தோ². கேசி பன ‘‘அலஜ்ஜிஸ்ஸ ஏதம் நத்தீ²தி ஸுத்³த⁴படிஞ்ஞாய ஏவ அனாபத்தியா காதப்³ப³ந்தி அயமேத்த² அத்தோ² ஸங்க³ஹிதோ’’தி வத³ந்தி, தம் ந யுத்தம் அனுவிஜ்ஜகஸ்ஸேவ நிரத்த²கத்தாபத்திதோ, சோத³கேனேவ அலஜ்ஜிபடிஞ்ஞாய டா²தப்³ப³தோ. தோ³ஸோபக³மபடிஞ்ஞா ஏவ ஹி இத⁴ படிஞ்ஞாதி அதி⁴ப்பேதா, தேனேவ வக்க²தி ‘‘ஏதம்பி நத்தி², ஏதம்பி நத்தீ²தி படிஞ்ஞம் ந தே³தீ’’திஆதி³.

தத³த்த²தீ³பனத்த²ந்தி அலஜ்ஜிஸ்ஸ தோ³ஸே ஆவிபூ⁴தேபி தஸ்ஸ தோ³ஸோபக³மபடிஞ்ஞாய ஏவ காதப்³ப³தாதீ³பனத்த²ம். விவாத³வத்து²ஸங்கா²தே அத்தே² பச்சத்தி²கா அத்த²பச்சத்தி²கா. ஸஞ்ஞம் த³த்வாதி தேஸம் கதா²பச்சே²த³த்த²ம் அபி⁴முக²கரணத்த²ஞ்ச ஸத்³த³ம் கத்வா. வினிச்சி²னிதும் அனனுச்ச²விகோதி அஸுத்³தோ⁴தி ஸஞ்ஞாய சோத³கபக்கே² பவிட்ட²த்தா அனுவிஜ்ஜகபா⁴வதோ ப³ஹிபூ⁴தத்தா அனுவிஜ்ஜிதும் அஸக்குணேய்யத்தம் ஸந்தா⁴ய வுத்தம். ஸந்தே³ஹே ஏவ ஹி ஸதி அனுவிஜ்ஜிதும் ஸக்கா, அஸுத்³த⁴லத்³தி⁴யா பன ஸதி சுதி³தகேன வுத்தம் ஸப்³ப³ம் அஸச்சதோபி படிபா⁴தி, கத²ம் தத்த² அனுவிஜ்ஜனா ஸியாதி.

ததா² நாஸிதகோவ ப⁴விஸ்ஸதீதி இமினா வினிச்ச²யம்பி அத³த்வா ஸங்க⁴தோ வியோஜனம் நாம லிங்க³னாஸனா விய அயம்பி ஏகோ நாஸனப்பகாரோதி த³ஸ்ஸேதி. ஏகஸம்போ⁴க³பரிபோ⁴கா³தி இத³ம் அத்தனோ ஸந்திகா தேஸம் விமோசனத்த²ம் வுத்தம், ந பன தேஸம் அஞ்ஞமஞ்ஞஸம்போ⁴கே³ யோஜனத்த²ம்.

விரத்³த⁴ம் ஹோதீதி ஸஞ்சிச்ச ஆபத்திம் ஆபன்னோ ஹோதி. ஆதி³தோ பட்டா²ய அலஜ்ஜீ நாம நத்தீ²தி இத³ம் ‘‘பக்கா²னம் அனுரக்க²ணத்தா²ய படிஞ்ஞம் ந தே³தீ’’தி இமஸ்ஸ அலஜ்ஜீலக்க²ணஸம்ப⁴வஸ்ஸ கரணவசனம். படிச்சா²தி³தகாலதோ பட்டா²ய அலஜ்ஜீ நாம ஏவ, புரிமோ லஜ்ஜிபா⁴வோ ந ரக்க²தீதி அத்தோ². படிஞ்ஞம் ந தே³தீதி ‘‘ஸசே மயா கததோ³ஸம் வக்கா²மி, மய்ஹம் அனுவத்தகா பி⁴ஜ்ஜிஸ்ஸந்தீ’’தி படிஞ்ஞம் ந தே³தி. டா²னே ந திட்ட²தீதி லஜ்ஜிட்டா²னே ந திட்ட²தி, காயவாசாஸு வீதிக்கமோ ஹோதி ஏவாதி அதி⁴ப்பாயோ. தேனாஹ ‘‘வினிச்ச²யோ ந தா³தப்³போ³’’தி, புப்³பே³ பக்கி²கானம் படிஞ்ஞாய வூபஸமிதஸ்ஸபி அதி⁴கரணஸ்ஸ து³வூபஸந்ததாய அயம்பி ததா² நாஸிதகோவ ப⁴விஸ்ஸதீதி அதி⁴ப்பாயோ.

232. அதி³ன்னாதா³னவத்து²ம் வினிச்சி²னந்தேன பஞ்சவீஸதி அவஹாரா ஸாது⁴கம் ஸல்லக்கே²தப்³பா³தி ஏத்த² பஞ்சவீஸதி அவஹாரா நாம பஞ்ச பஞ்சகானி, தத்த² பஞ்ச பஞ்சகானி நாம நானாப⁴ண்ட³பஞ்சகம் ஏகப⁴ண்ட³பஞ்சகம் ஸாஹத்தி²கபஞ்சகம் புப்³ப³பயோக³பஞ்சகம் தே²ய்யாவஹாரபஞ்சகந்தி. ததா² ஹி வுத்தம் கங்கா²விதரணியம் (கங்கா². அட்ட². து³தியபாராஜிகவண்ணனா) ‘‘தே பன அவஹாரா பஞ்ச பஞ்சகானி ஸமோதா⁴னேத்வா ஸாது⁴கம் ஸல்லக்கே²தப்³பா³’’திஆதி³. தத்த² நானாப⁴ண்ட³பஞ்சகஏகப⁴ண்ட³பஞ்சகானி பத³பா⁴ஜனே (பாரா. 92) வுத்தானம் ‘‘ஆதி³யேய்ய, ஹரேய்ய, அவஹரேய்ய, இரியாபத²ம் விகோபேய்ய, டா²னா சாவேய்யா’’தி இமேஸம் பதா³னம் வஸேன லப்³ப⁴ந்தி. ததா² ஹி வுத்தம் போராணேஹி –

‘‘ஆதி³யந்தோ ஹரந்தோவ;

ஹரந்தோ இரியாபத²ம்;

விகோபேந்தோ ததா² டா²னா;

சாவேந்தோபி பராஜிகோ’’தி.

தத்த² நானாப⁴ண்ட³பஞ்சகம் ஸவிஞ்ஞாணகஅவிஞ்ஞாணகவஸேன த³ட்ட²ப்³ப³ம், இதரம் ஸவிஞ்ஞாணகவஸேனேவ. கத²ம்? ஆதி³யேய்யாதி ஆராமம் அபி⁴யுஞ்ஜதி, ஆபத்தி து³க்கடஸ்ஸ. ஸாமிகஸ்ஸ விமதிம் உப்பாதே³தி, ஆபத்தி து²ல்லச்சயஸ்ஸ. ஸாமிகோ ‘‘ந மய்ஹம் ப⁴விஸ்ஸதீ’’தி து⁴ரம் நிக்கி²பதி, ஆபத்தி பாராஜிகஸ்ஸ. ஹரேய்யாதி அஞ்ஞஸ்ஸ ப⁴ண்ட³ம் ஹரந்தோ ஸீஸே பா⁴ரம் தே²ய்யசித்தோ ஆமஸதி, து³க்கடம். ப²ந்தா³பேதி, து²ல்லச்சயம். க²ந்த⁴ம் ஓரோபேதி, பாராஜிகம். அவஹரேய்யாதி உபனிக்கி²த்தம் ப⁴ண்ட³ம் ‘‘தே³ஹி மே ப⁴ண்ட³’’ந்தி வுச்சமானோ ‘‘நாஹம் க³ண்ஹாமீ’’தி ப⁴ணதி, து³க்கடம். ஸாமிகஸ்ஸ விமதிம் உப்பாதே³தி, து²ல்லச்சயம். ஸாமிகோ ‘‘ந மய்ஹம் ப⁴விஸ்ஸதீ’’தி து⁴ரம் நிக்கி²பதி, பாராஜிகம். இரியாபத²ம் விகோபேய்யாதி ‘‘ஸஹப⁴ண்ட³ஹாரகம் நேஸ்ஸாமீ’’தி பட²மம் பாத³ம் அதிக்காமேதி, து²ல்லச்சயம். து³தியம் பாத³ம் அதிக்காமேதி, பாராஜிகம். டா²னா சாவேய்யாதி த²லட்ட²ம் ப⁴ண்ட³ம் தே²ய்யசித்தோ ஆமஸதி, து³க்கடம். ப²ந்தா³பேதி, து²ல்லச்சயம். டா²னா சாவேதி, பாராஜிகம். ஏவம் தாவ நானாப⁴ண்ட³பஞ்சகம் வேதி³தப்³ப³ம். ஸஸ்ஸாமிகஸ்ஸ பன தா³ஸஸ்ஸ வா திரச்சா²னக³தஸ்ஸ வா யதா²வுத்தேன அபி⁴யோகா³தி³னா நயேன ஆதி³யனஹரண அவஹரண இரியாபத²விகோபன டா²னாசாவனவஸேன ஏகப⁴ண்ட³பஞ்சகம் வேதி³தப்³ப³ம். தேனாஹு போராணா –

‘‘தத்த² நானேகப⁴ண்டா³னம், பஞ்சகானம் வஸா பன;

ஆதி³யனாதி³பஞ்சகா, து³விதா⁴தி உதீ³ரிதா’’தி.

கதமம் ஸாஹத்தி²கபஞ்சகம்? ஸாஹத்தி²கோ ஆணத்திகோ நிஸ்ஸக்³கி³யோ அத்த²ஸாத⁴கோ து⁴ரனிக்கே²போதி. ததா² ஹி வுத்தம் –

‘‘ஸாஹத்தா²ணத்திகோ சேவ, நிஸ்ஸக்³கி³யோத்த²ஸாத⁴கோ;

து⁴ரனிக்கே²பகோ சாதி, இத³ம் ஸாஹத்த²பஞ்சக’’ந்தி.

தத்த² ஸாஹத்தி²கோ நாம பரஸ்ஸ ப⁴ண்ட³ம் ஸஹத்தா² அவஹரதி. ஆணத்திகோ நாம ‘‘அஸுகஸ்ஸ ப⁴ண்ட³ம் அவஹரா’’தி அஞ்ஞம் ஆணாபேதி. நிஸ்ஸக்³கி³யோ நாம ஸுங்ககா⁴தபரிகப்பிதோகாஸானம் அந்தோ ட²த்வா ப³ஹி பாதனம். அத்த²ஸாத⁴கோ நாம ‘‘அஸுகஸ்ஸ ப⁴ண்ட³ம் யதா³ ஸக்கோஸி, ததா³ தம் அவஹரா’’தி ஆணாபேதி. தத்த² ஸசே பரோ அனந்தராயிகோ ஹுத்வா தம் அவஹரதி, ஆணாபகஸ்ஸ ஆணத்திக்க²ணேயேவ பாராஜிகம். பரஸ்ஸ வா பன தேலகும்பி⁴யா பாத³க்³க⁴னகம் தேலம் அவஸ்ஸம் பிவனகானி உபாஹனாதீ³னி பக்கி²பதி, ஹத்த²தோ முத்தமத்தேயேவ பாராஜிகம். து⁴ரனிக்கே²போ பன ஆராமாபி⁴யோக³உபனிக்கி²த்தப⁴ண்ட³வஸேன வேதி³தப்³போ³. தாவகாலிகப⁴ண்ட³தே³ய்யானி அதே³ந்தஸ்ஸபி ஏஸேவ நயோதி இத³ம் ஸாஹத்தி²கபஞ்சகம்.

கதமம் புப்³ப³பயோக³பஞ்சகம்? புப்³ப³பயோகோ³ ஸஹபயோகோ³ ஸம்விதா³வஹாரோ ஸங்கேதகம்மம் நிமித்தகம்மந்தி. தேன வுத்தம் –

‘‘புப்³ப³ஸஹபயோகோ³ ச, ஸம்விதா³ஹரணம் ததா²;

ஸங்கேதகம்மம் நிமித்தம், இத³ம் ஸாஹத்த²பஞ்சக’’ந்தி.

தத்த² ஆணத்திவஸேன புப்³ப³பயோகோ³ வேதி³தப்³போ³. டா²னாசாவனவஸேன, கி²லாதீ³னி ஸங்காமேத்வா கே²த்தாதி³க்³க³ஹணவஸேன ச ஸஹபயோகோ³ வேதி³தப்³போ³. ஸம்விதா³வஹாரோ நாம ‘‘அஸுகம் நாம ப⁴ண்ட³ம் அவஹரிஸ்ஸாமா’’தி ஸம்வித³ஹித்வா ஸம்மந்தயித்வா அவஹரணம். ஏவம் ஸம்வித³ஹித்வா க³தேஸு ஹி ஏகேனபி தஸ்மிம் ப⁴ண்டே³ டா²னா சாவிதே ஸப்³பே³ஸம் அவஹாரோ ஹோதி. ஸங்கேதகம்மம் நாம ஸஞ்ஜானனகம்மம். ஸசே ஹி புரேப⁴த்தாதீ³ஸு யம் கிஞ்சி காலம் பரிச்சி²ந்தி³த்வா ‘‘அஸுகஸ்மிம் காலே இத்த²ன்னாமம் ப⁴ண்ட³ம் அவஹரா’’தி வுத்தோ ஸங்கேததோ அபச்சா² அபுரே தம் அவஹரதி, ஸங்கேதகாரகஸ்ஸ ஸங்கேதகரணக்க²ணேயேவ அவஹாரோ. நிமித்தகம்மம் நாம ஸஞ்ஞுப்பாத³னத்த²ம் அக்கி²னிக²ணனாதி³னிமித்தகரணம். ஸசே ஹி ஏவம் கதனிமித்ததோ அபச்சா² அபுரே ‘‘யம் அவஹரா’’தி வுத்தோ, தம் அவஹரதி, நிமித்தகாரகஸ்ஸ நிமித்தக்க²ணேயேவ அவஹாரோதி இத³ம் புப்³ப³பயோக³பஞ்சகம்.

கதமம் தே²ய்யாவஹாரபஞ்சகம்? தே²ய்யாவஹாரோ பஸய்ஹாவஹாரோ பரிகப்பாவஹாரோ படிச்ச²ன்னாவஹாரோ குஸாவஹாரோதி. தேன வுத்தம் –

‘‘தே²ய்யா பஸய்ஹா பரிகப்பா, படிச்ச²ன்னா குஸா ததா²;

அவஹாரா இமே பஞ்ச, தே²ய்யாவஹாரபஞ்சக’’ந்தி.

தத்த² யோ ஸந்தி⁴ச்சே²தா³தீ³னி கத்வா அதி³ஸ்ஸமானோ அவஹரதி, கூடதுலாகூடமானகூடகஹாபணாதீ³ஹி வா வஞ்சேத்வா க³ண்ஹாதி, தஸ்ஸேவம் க³ண்ஹதோ அவஹாரோ தே²ய்யாவஹாரோதி வேதி³தப்³போ³. யோ பன பஸய்ஹ ப³லக்காரேன பரேஸம் ஸந்தகம் க³ண்ஹாதி கா³மகா⁴தகாத³யோ விய, அத்தனோ பத்தப³லிதோ வா வுத்தனயேனேவ அதி⁴கம் க³ண்ஹாதி ராஜப⁴டாத³யோ விய, தஸ்ஸேவம் க³ண்ஹதோ அவஹாரோ பஸய்ஹாவஹாரோதி வேதி³தப்³போ³. பரிகப்பேத்வா க³ஹணம் பன பரிகப்பாவஹாரோ நாம.

ஸோ ப⁴ண்டோ³காஸஸ்ஸ வஸேன து³விதோ⁴. தத்ராயம் ப⁴ண்ட³பரிகப்போ – ஸாடகத்தி²கோ அந்தோக³ப்³ப⁴ம் பவிஸித்வா ‘‘ஸசே ஸாடகோ ப⁴விஸ்ஸதி, க³ண்ஹிஸ்ஸாமி. ஸசே ஸுத்தம், ந க³ண்ஹிஸ்ஸாமீ’’தி பரிகப்பேத்வா அந்த⁴காரே பஸிப்³ப³கம் க³ண்ஹாதி. தத்ர சே ஸாடகோ ஹோதி, உத்³தா⁴ரேயேவ பாராஜிகம். ஸுத்தஞ்சே ஹோதி, ரக்க²தி. ப³ஹி நீஹரித்வா முஞ்சித்வா ‘‘ஸுத்த’’ந்தி ஞத்வா புன ஆஹரித்வா ட²பேதி, ரக்க²தியேவ. ‘‘ஸுத்த’’ந்தி ஞத்வாபி யம் லத்³த⁴ம், தம் க³ஹேதப்³ப³ந்தி க³ச்ச²தி, பத³வாரேன காரேதப்³போ³. பூ⁴மியம் ட²பேத்வா க³ண்ஹாதி, உத்³தா⁴ரே பாராஜிகம். ‘‘சோரோ சோரோ’’தி அனுப³ந்தோ⁴ ச²ட்³டே³த்வா பலாயதி, ரக்க²தி. ஸாமிகா தி³ஸ்வா க³ண்ஹந்தி, ரக்க²தியேவ. அஞ்ஞோ சே க³ண்ஹாதி, ப⁴ண்ட³தே³ய்யம். ஸாமிகேஸு நிவத்தந்தேஸு ஸயம் தி³ஸ்வா பம்ஸுகூலஸஞ்ஞாய ‘‘பகே³வேதம் மயா க³ஹிதம், மம தா³னி ஸந்தக’’ந்தி க³ண்ஹந்தஸ்ஸபி ப⁴ண்ட³தே³ய்யமேவ. தத்த² ய்வாயம் ‘‘ஸசே ஸாடகோ ப⁴விஸ்ஸதி, க³ண்ஹிஸ்ஸாமீ’’திஆதி³னா நயேன பவத்தோ பரிகப்போ, அயம் ப⁴ண்ட³பரிகப்போ நாம. ஓகாஸபரிகப்போ பன ஏவம் வேதி³தப்³போ³ – ஏகச்சோ பன பரபரிவேணாதீ³னி பவிட்டோ² கிஞ்சி லோப⁴னேய்யப⁴ண்ட³ம் தி³ஸ்வா க³ப்³ப⁴த்³வாரபமுக²ஹேட்டா² பாஸாத³த்³வாரகோட்ட²கருக்க²மூலாதி³வஸேன பரிச்சே²த³ம் கத்வா ‘‘ஸசே மம் ஏத்த²ந்தரே பஸ்ஸிஸ்ஸந்தி, த³ட்டு²காமதாய க³ஹேத்வா விசரந்தோ விய த³ஸ்ஸாமி. நோ சே பஸ்ஸிஸ்ஸந்தி, ஹரிஸ்ஸாமீ’’தி பரிகப்பேதி, தஸ்ஸ தம் ஆதா³ய பரிகப்பிதபரிச்சே²த³ம் அதிக்கந்தமத்தே அவஹாரோ ஹோதி. இதி ய்வாயம் வுத்தனயேனேவ பவத்தோ பரிகப்போ, அயம் ஓகாஸபரிகப்போ நாம. ஏவமிமேஸம் த்³வின்னம் பரிகப்பானம் வஸேன பரிகப்பேத்வா க³ண்ஹதோ அவஹாரோ பரிகப்பாவஹாரோதி வேதி³தப்³போ³.

படிச்சா²தே³த்வா பன அவஹரணம் படிச்ச²ன்னாவஹாரோ. ஸோ ஏவம் வேதி³தப்³போ³ – யோ பி⁴க்கு² உய்யானாதீ³ஸு பரேஸம் ஓமுஞ்சித்வா ட²பிதம் அங்கு³லிமுத்³தி³காதி³ம் தி³ஸ்வா ‘‘பச்சா² க³ண்ஹிஸ்ஸாமீ’’தி பம்ஸுனா வா பண்ணேன வா படிச்சா²தே³தி, தஸ்ஸ ஏத்தாவதா உத்³தா⁴ரோ நத்தீ²தி ந தாவ அவஹாரோ ஹோதி. யதா³ பன ஸாமிகா விசினந்தா அபஸ்ஸித்வா ‘‘ஸ்வே ஜானிஸ்ஸாமா’’தி ஸாலயாவ க³தா ஹோந்தி, அத²ஸ்ஸ தம் உத்³த⁴ரதோ உத்³தா⁴ரே அவஹாரோ. ‘‘படிச்ச²ன்னகாலேயேவ ஏதம் மம ஸந்தக’’ந்தி ஸகஸஞ்ஞாய வா ‘‘க³தாதா³னி தே, ச²ட்³டி³தப⁴ண்ட³ம் இத³’’ந்தி பம்ஸுகூலஸஞ்ஞாய வா க³ண்ஹந்தஸ்ஸ பன ப⁴ண்ட³தே³ய்யம். தேஸு து³தியததியதி³வஸே ஆக³ந்த்வா விசினித்வா அதி³ஸ்வா து⁴ரனிக்கே²பம் கத்வா க³தேஸுபி க³ஹிதம் ப⁴ண்ட³தே³ய்யமேவ. பச்சா² ஞத்வா சோதி³யமானஸ்ஸ அத³த³தோ ஸாமிகானம் து⁴ரனிக்கே²பே அவஹாரோ ஹோதி. கஸ்மா? யஸ்மா தஸ்ஸ பயோகே³ன தேஹி ந தி³ட்ட²ம். யோ பன ததா²ரூபம் ப⁴ண்ட³ம் யதா²டா²னே டி²தம்யேவ அப்படிச்சா²தே³த்வா தே²ய்யசித்தோ பாதே³ன அக்கமித்வா கத்³த³மே வா வாலிகாய வா பவேஸேதி, தஸ்ஸ பவேஸிதமத்தேயேவ அவஹாரோ.

குஸம் ஸங்காமேத்வா பன அவஹரணம் குஸாவஹாரோ நாம. ஸோபி ஏவம் வேதி³தப்³போ³ – யோ பி⁴க்கு² விலீவமயம் வா தாலபண்ணமயம் வா கதஸஞ்ஞாணம் யம் கிஞ்சி குஸம் பாதேத்வா சீவரே பா⁴ஜியமானே அத்தனோ கோட்டா²ஸஸ்ஸ ஸமீபே டி²தம் ஸமக்³க⁴தரம் வா மஹக்³க⁴தரம் வா ஸமஸமம் வா அக்³கே⁴ன பரஸ்ஸ கோட்டா²ஸம் ஹரிதுகாமோ அத்தனோ கோட்டா²ஸே பதிதம் குஸம் பரஸ்ஸ கோட்டா²ஸே பாதேதுகாமதாய உத்³த⁴ரதி, ரக்க²தி தாவ. பரஸ்ஸ கோட்டா²ஸே பாதிதே ரக்க²தேவ. யதா³ பன தஸ்மிம் பதிதே பரஸ்ஸ கோட்டா²ஸதோ பரஸ்ஸ குஸம் உத்³த⁴ரதி, உத்³த⁴டமத்தே அவஹாரோ. ஸசே பட²மதரம் பரஸ்ஸ கோட்டா²ஸதோ குஸம் உத்³த⁴ரதி, அத்தனோ கோட்டா²ஸே பாதேதுகாமதாய உத்³தா⁴ரே ரக்க²தி, பாதனேபி ரக்க²தி. அத்தனோ கோட்டா²ஸதோ பன அத்தனோ குஸம் உத்³த⁴ரதோ உத்³தா⁴ரேயேவ ரக்க²தி, தம் உத்³த⁴ரித்வா பரகோட்டா²ஸே பாதேந்தஸ்ஸ ஹத்த²தோ முத்தமத்தே அவஹாரோ ஹோதி, அயம் குஸாவஹாரோ. அயமேத்த² ஸங்கே²போ, வித்தா²ரோ பன ஸமந்தபாஸாதி³கதோ (பாரா. அட்ட². 1.92) க³ஹேதப்³போ³.

துலயித்வாதி உபபரிக்கி²த்வா.

ஸாமீசீதி வத்தம், ஆபத்தி பன நத்தீ²தி அதி⁴ப்பாயோ.

மஹாஜனஸம்மத்³தோ³தி மஹாஜனஸங்கோ²போ⁴. ப⁴ட்டே² ஜனகாயேதி அபக³தே ஜனகாயே. ‘‘இத³ஞ்ச காஸாவம் அத்தனோ ஸந்தகம் கத்வா ஏதஸ்ஸேவ பி⁴க்கு²னோ தே³ஹீ’’தி கிம் காரணா ஏவமாஹ? சீவரஸ்ஸாமிகேன து⁴ரனிக்கே²போ கதோ, தஸ்மா தஸ்ஸ அதி³ன்னம் க³ஹேதும் ந வட்டதி. அவஹாரகோபி விப்படிஸாரஸ்ஸ உப்பன்னகாலதோ பட்டா²ய சீவரஸ்ஸாமிகம் பரியேஸந்தோ விசரதி ‘‘த³ஸ்ஸாமீ’’தி, சீவரஸ்ஸாமிகேன ச ‘‘மமேத’’ந்தி வுத்தே ஏதேனபி அவஹாரகேன ஆலயோ பரிச்சத்தோ, தஸ்மா ஏவமாஹ. யதி³ ஏவம் சீவரஸ்ஸாமிகோயேவ ‘‘அத்தனோ ஸந்தகம் க³ண்ஹாஹீ’’தி கஸ்மா ந வுத்தோதி? உபி⁴ன்னம் குக்குச்சவினோத³னத்த²ம். கத²ம்? அவஹாரகஸ்ஸ ‘‘மயா ஸஹத்தே²ன ந தி³ன்னம், ப⁴ண்ட³தே³ய்யமேத’’ந்தி குக்குச்சம் உப்பஜ்ஜேய்ய, இதரஸ்ஸ ‘‘மயா பட²மம் து⁴ரனிக்கே²பம் கத்வா பச்சா² அதி³ன்னம் க³ஹித’’ந்தி குக்குச்சம் உப்பஜ்ஜேய்யாதி.

ஸமக்³க⁴ந்தி அப்பக்³க⁴ம்.

தா³ருஅத்த²ம் ப²ரதீதி தா³ரூஹி கத்தப்³ப³கிச்சம் ஸாதே⁴தி. மயி ஸந்தேதிஆதி³ ஸப்³ப³ம் ரஞ்ஞா பஸாதே³ன வுத்தம், தே²ரேன பன ‘‘அனனுச்ச²விகம் கத’’ந்தி ந மஞ்ஞிதப்³ப³ம்.

ஏகதி³வஸம் த³ந்தகட்ட²ச்சே²த³னாதி³னா யா அயம் அக்³க⁴ஹானி வுத்தா, ஸா ப⁴ண்ட³ஸ்ஸாமினா கிணித்வா க³ஹிதமேவ ஸந்தா⁴ய வுத்தா. ஸப்³ப³ம் பனேதம் அட்ட²கதா²சரியப்பமாணேன க³ஹேதப்³ப³ம். பாஸாணஞ்ச ஸக்க²ரஞ்ச பாஸாணஸக்க²ரம்.

‘‘தா⁴ரேய்ய அத்த²ம் விசக்க²ணோ’’தி இமஸ்ஸேவ விவரணம் ‘‘ஆபத்திம் வா அனாபத்திம் வா’’திஆதி³. ‘‘ஸிக்கா²பத³ம் ஸமம் தேனா’’தி இதோ புப்³பே³ ஏகா கா³தா² –

‘‘து³தியம் அது³தியேன, யம் ஜினேன பகாஸிதம்;

பராஜிதகிலேஸேன, பாராஜிகபத³ம் இதா⁴’’தி.

தாய ஸத்³தி⁴ம் க⁴டேத்வா அது³தியேன பராஜிதகிலேஸேன ஜினேன து³தியம் யம் இத³ம் பாராஜிகபத³ம் பகாஸிதம், இத⁴ தேன ஸமம் அனேகனயவோகிண்ணம் க³ம்பீ⁴ரத்த²வினிச்ச²யம் அஞ்ஞம் கிஞ்சி ஸிக்கா²பத³ம் ந விஜ்ஜதீதி யோஜனா. தத்த² பராஜிதகிலேஸேனாதி ஸந்தானே புன அனுப்பத்தித⁴ம்மதாபாத³னே சதூஹி மக்³க³ஞாணேஹி ஸஹ வாஸனாய ஸமுச்சி²ன்னஸப்³ப³கிலேஸேன. விமதிவினோத³னியம் (வி. வி. டீ. 1.159) பன ‘‘பராஜிதகிலேஸேனாதி விஜிதகிலேஸேன, நிகிலேஸேனாதி அத்தோ²’’தி வுத்தம். இதா⁴தி இமஸ்மிம் ஸாஸனே.

தேனாதி தேன து³தியபாராஜிகஸிக்கா²பதே³ன. அத்தோ² நாம பாளிஅத்தோ². வினிச்ச²யோ நாம பாளிமுத்தவினிச்ச²யோ. அத்தோ² ச வினிச்ச²யோ ச அத்த²வினிச்ச²யா, தே க³ம்பீ⁴ரா யஸ்மிந்தி க³ம்பீ⁴ரத்த²வினிச்ச²யம் . வத்து²ம்ஹி ஓதிண்ணேதி சோத³னாவஸேன வா அத்தனாவ அத்தனோ வீதிக்கமாரோசனவஸேன வா ஸங்க⁴மஜ்ஜே² அதி³ன்னாதா³னவத்து²ஸ்மிம் ஓதிண்ணே. ஏத்தா²தி ஓதிண்ணே வத்து²ஸ்மிம். வினிச்ச²யோதி ஆபத்தானாபத்தினியமனம். அவத்வாவாதி ‘‘த்வம் பாராஜிகம் ஆபன்னோ’’தி அவத்வாவ. கப்பியேபி ச வத்து²ஸ்மிந்தி அத்தனா க³ஹேதும் கப்பியே மாதுபிதுஆதி³ஸந்தகேபி வத்து²ஸ்மிம். லஹுவத்தினோதி தே²ய்யசித்துப்பாதே³ன லஹுபரிவத்தினோ. ஆஸீவிஸந்தி ஸீக⁴மேவ ஸகலஸரீரே ப²ரணஸமத்த²விஸம்.

233. பகதிமனுஸ்ஸேஹி உத்தரிதரானம் பு³த்³தா⁴தி³உத்தமபுரிஸானம் அதி⁴க³மத⁴ம்மோதி உத்தரிமனுஸ்ஸத⁴ம்மோ, தஸ்ஸ பரேஸம் ஆரோசனம் உத்தரிமனுஸ்ஸத⁴ம்மாரோசனம். தம் வினிச்சி²னந்தேன ச² டா²னானி ஸோதே⁴தப்³பா³னீதி யோஜனா. தத்த² கிம் தே அதி⁴க³தந்தி அதி⁴க³மபுச்சா². கிந்தி தே அதி⁴க³தந்தி உபாயபுச்சா². கதா³ தே அதி⁴க³தந்தி காலபுச்சா². கத்த² தே அதி⁴க³தந்தி ஓகாஸபுச்சா². கதமே தே கிலேஸா பஹீனாதி பஹீனகிலேஸபுச்சா². கதமேஸம் த்வம் த⁴ம்மானம் லாபீ⁴தி படிலத்³த⁴த⁴ம்மபுச்சா². இதா³னி தமேவ ச²ட்டா²னவிஸோத⁴னம் வித்தா²ரேதுமாஹ ‘‘ஸசே ஹீ’’திஆதி³. தத்த² ஏத்தாவதாதி ஏத்தகேன ப்³யாகரணவசனமத்தேன ந ஸக்காரோ காதப்³போ³. ப்³யாகரணஞ்ஹி ஏகஸ்ஸ அயாதா²வதோபி ஹோதீதி. இமேஸு ச²ஸு டா²னேஸு ஸோத⁴னத்த²ம் ஏவம் வத்தப்³போ³தி யதா² நாம ஜாதரூபபதிரூபகம்பி ஜாதரூபம் விய கா²யதீதி ஜாதரூபம் நிக⁴ம்ஸனதாபனசே²த³னேஹி ஸோதே⁴தப்³ப³ம், ஏவமேவ இதா³னேவ வுத்தேஸு ச²ஸு டா²னேஸு பக்கி²பித்வா ஸோத⁴னத்த²ம் வத்தப்³போ³. விமோக்கா²தீ³ஸூதி ஆதி³-ஸத்³தே³ன ஸமாபத்திஞாணத³ஸ்ஸனமக்³க³பா⁴வனாப²லஸச்சி²கிரியாதி³ம் ஸங்க³ண்ஹாதி. பாகடோ ஹோதி அதி⁴க³தவிஸேஸஸ்ஸ ஸதிஸம்மோஸாபா⁴வதோ. ஸேஸபுச்சா²ஸுபி ‘‘பாகடோ ஹோதீ’’தி பதே³ ஏஸேவ நயோ.

ஸப்³பே³ஸஞ்ஹி அத்தனா அதி⁴க³தமக்³கே³ன பஹீனா கிலேஸா பாகடா ஹோந்தீதி இத³ம் யேபு⁴ய்யவஸேன வுத்தம். கஸ்ஸசி ஹி அத்தனா அதி⁴க³தமக்³க³வஜ்ஜ²கிலேஸேஸு ஸந்தே³ஹோ உப்பஜ்ஜதியேவ மஹானாமஸ்ஸ ஸக்கஸ்ஸ விய. ஸோ ஹி ஸகதா³கா³மீ ஸமானோபி ‘‘தஸ்ஸ மய்ஹம், ப⁴ந்தே, ஏவம் ஹோதி – கோ ஸு நாம மே த⁴ம்மோ அஜ்ஜ²த்தம் அப்பஹீனோ, யேன மே ஏகதா³ லோப⁴த⁴ம்மாபி சித்தம் பரியாதா³ய திட்ட²ந்தி, தோ³ஸத⁴ம்மாபி சித்தம் பரியாதா³ய திட்ட²ந்தி, மோஹத⁴ம்மாபி சித்தம் பரியாதா³ய திட்ட²ந்தீ’’தி (ம. நி. 1.175) ப⁴க³வந்தம் புச்சி². அயம் கிர ராஜா ஸகதா³கா³மிமக்³கே³ன லோப⁴தோ³ஸமோஹா நிரவஸேஸா பஹீயந்தீதி ஸஞ்ஞீ அஹோஸீதி.

யாய படிபதா³ய யஸ்ஸ அரியமக்³கோ³ ஆக³ச்ச²தி, ஸா புப்³ப³பா⁴க³படிபத்தி ஆக³மனபடிபதா³. ஸோதே⁴தப்³பா³தி ஸுத்³தா⁴, உதா³ஹு ந ஸுத்³தா⁴தி விசாரணவஸேன ஸோதே⁴தப்³பா³. ‘‘ந ஸுஜ்ஜ²தீதி தத்த² தத்த² பமாத³படிபத்திஸம்ப⁴வதோ. அபனேதப்³போ³தி அத்தனோ படிஞ்ஞாய அபனேதப்³போ³’’தி ஸாரத்த²தீ³பனியம் (ஸாரத்த². டீ. 2.197-198). விமதிவினோத³னியம் (வி. வி. டீ. 1.197) பன ‘‘ந ஸுஜ்ஜ²தீதி புச்சி²யமானோ படிபத்திக்கமம் உல்லங்கி⁴த்வா கதே²ஸி. அபனேதப்³போ³தி தயா வுத்தக்கமேனாயம் த⁴ம்மோ ந ஸக்கா அதி⁴க³ந்துந்தி அதி⁴க³தமானதோ அபனேதப்³போ³’’தி வுத்தம். ‘‘ஸுஜ்ஜ²தீ’’தி வத்வா ஸுஜ்ஜ²னாகாரம் த³ஸ்ஸேதும் ‘‘தீ³க⁴ரத்த’’ந்திஆதி³ வுத்தம். பஞ்ஞாயதீதி ஏத்தா²பி ‘‘யதீ³’’தி பத³ம் ஆனேத்வா யதி³ ஸோ பி⁴க்கு² தாய படிபதா³ய பஞ்ஞாயதீதி ஸம்ப³ந்தோ⁴. சதூஸு பச்சயேஸு அலக்³க³த்தா ‘‘ஆகாஸே பாணிஸமேன சேதஸா’’தி வுத்தம். வுத்தஸதி³ஸம் ப்³யாகரணம் ஹோதீதி யோஜனா. தத்த² வுத்தஸதி³ஸந்தி தஸ்ஸ பி⁴க்கு²னோ ப்³யாகரணம் இமஸ்மிம் ஸுத்தே வுத்தேன ஸதி³ஸம், ஸமந்தி அத்தோ². கீ²ணாஸவஸ்ஸ படிபத்திஸதி³ஸா படிபத்தி ஹோதீதி தீ³க⁴ரத்தம் ஸுவிக்க²ம்பி⁴தகிலேஸத்தா, இத³ஞ்ச அரஹத்தம் படிஜானந்தஸ்ஸ வஸேன வுத்தம். தேனாஹ ‘‘கீ²ணாஸவஸ்ஸ நாமா’’திஆதி³. கீ²ணாஸவஸ்ஸ நாம…பே… ந ஹோதீதி பஹீனவிபல்லாஸத்தா, ஜீவிதனிகந்தியா ச அபா⁴வதோ ந ஹோதி, புது²ஜ்ஜனஸ்ஸ பன அப்பஹீனவிபல்லாஸத்தா ஜீவிதனிகந்திஸப்³பா⁴வதோ ச அப்பமத்தகேனபி ஹோதி, ஏவம் ஸுவிக்க²ம்பி⁴தகிலேஸஸ்ஸ வத்தனஸேக்க²த⁴ம்மபடிஜானனம் இமினா ப⁴யுப்பாத³னேன, அம்பி³லாதி³த³ஸ்ஸனே கே²ளுப்பாதா³தி³னா ச ந ஸக்கா வீமம்ஸிதும், தஸ்மா தஸ்ஸ வசனேனேவ தம் ஸத்³தா⁴தப்³ப³ம்.

அயம் பி⁴க்கு² ஸம்பன்னவேய்யாகரணோதி இத³ம் ந கேவலம் அபா⁴யனகமேவ ஸந்தா⁴ய வுத்தம் ஏகச்சஸ்ஸ ஸூரஜாதிகஸ்ஸ புது²ஜ்ஜனஸ்ஸபி அபா⁴யனதோ, ரஜ்ஜனீயாரம்மணானம் ப³த³ரஸாளவாதி³அம்பி³லமத்³த³னாதீ³னம் உபயோஜனேபி கே²ளுப்பாதா³தி³தண்ஹுப்பத்திரஹிதம் ஸப்³ப³தா² ஸுவிஸோதி⁴தமேவ ஸந்தா⁴ய வுத்தந்தி வேதி³தப்³ப³ம்.

234. ‘‘நீஹரித்வாதி ஸாஸனதோ நீஹரித்வா’’தி ஸாரத்த²தீ³பனியம் (ஸாரத்த². டீ. 2.45) வுத்தம், விமதிவினோத³னியம் (வி. வி. டீ. 1.45) பன ‘‘நீஹரித்வாதி பாளிதோ உத்³த⁴ரித்வா’’தி. ததா² ஹி ‘‘பஞ்சஹுபாலி, அங்கே³ஹி ஸமன்னாக³தேன பி⁴க்கு²னா நானுயுஞ்ஜிதப்³ப³ம். கதமேஹி பஞ்சஹி? ஸுத்தம் ந ஜானாதி, ஸுத்தானுலோமம் ந ஜானாதீ’’திஆதி³பாளிதோ (பரி. 442) ஸுத்தம் ஸுத்தானுலோமஞ்ச நீஹரிம்ஸு, ‘‘அனாபத்தி ஏவம் அம்ஹாகம் ஆசரியானம் உக்³க³ஹோ பரிபுச்சா²தி ப⁴ணதீ’’தி ஏவமாதி³தோ ஆசரியவாத³ம், ‘‘ஆயஸ்மா உபாலி ஏவமாஹ ‘அனாபத்தி ஆவுஸோ ஸுபினந்தேனா’’தி (பாரா. 78) ஏவமாதி³தோ அத்தனோமதிம் நீஹரிம்ஸு. ஸா ச தே²ரஸ்ஸ அத்தனோமதி ஸுத்தேன ஸங்க³ஹிதத்தா ஸுத்தம் ஜாதம், ஏவமஞ்ஞாபி ஸுத்தாதீ³ஹி ஸங்க³ஹிதாவ க³ஹேதப்³பா³, நேதராதி வேதி³தப்³ப³ம். அத² வா நீஹரித்வாதி விப⁴ஜித்வா, ஸாட்ட²கத²ம் ஸகலம் வினயபிடகம் ஸுத்தாதீ³ஸு சதூஸு பதே³ஸேஸு பக்கி²பித்வா சதுதா⁴ விப⁴ஜித்வா வினயம் பகாஸேஸும் தப்³பி³னிமுத்தஸ்ஸ அபா⁴வாதி அதி⁴ப்பாயோ. வஜிரபு³த்³தி⁴டீகாயம்பி (வஜிர. டீ. பாராஜிக 45) ‘‘நீஹரித்வாதி ஏத்த² ஸாஸனதோ நீஹரித்வாதி அத்தோ²…பே… தாய ஹி அத்தனோமதியா தே²ரோ ஏதத³க்³க³ட்ட²பனம் லப⁴தி. அபிச வுத்தஞ்ஹேதம் ப⁴க³வதா ‘அனுபஸம்பன்னேன பஞ்ஞத்தேன வா அபஞ்ஞத்தேன வா வுச்சமானோ…பே… அனாத³ரியம் கரோதி, ஆபத்தி து³க்கடஸ்ஸா’தி. தத்த² ஹி பஞ்ஞத்தம் நாம ஸுத்தம், ஸேஸத்தயம் அபஞ்ஞத்தம் நாம. தேனாயம் ‘சதுப்³பி³த⁴ஞ்ஹி வினயம், மஹாதே²ரா’தி கா³தா² ஸுவுத்தா’’தி வுத்தம்.

வுத்தந்தி மிலிந்த³பஞ்ஹே நாக³ஸேனத்தே²ரேன வுத்தம். பஜ்ஜதே அனேன அத்தோ²தி பத³ம், ப⁴க³வதா கண்டா²தி³வண்ணுப்பத்திட்டா²னம் ஆஹச்ச விஸேஸேத்வா பா⁴ஸிதம் பத³ம் ஆஹச்சபத³ம், ப⁴க³வதோயேவ வசனம். தேனாஹ ‘‘ஆஹச்சபத³ந்தி ஸுத்தம் அதி⁴ப்பேத’’ந்தி ஸாரத்த²தீ³பனியம் (ஸாரத்த². டீ. 2.45) வுத்தம். விமதிவினோத³னியம் (வி. வி. டீ. 1.45) பன ‘‘கண்டா²தி³வண்ணுப்பத்திட்டா²னகரணாதீ³ஹி நீஹரித்வா அத்தனோ வசீவிஞ்ஞத்தியாவ பா⁴ஸிதம் வசனம் ஆஹச்சபத³’’ந்தி வுத்தம். வஜிரபு³த்³தி⁴டீகாயம் (வஜிர. டீ. பாராஜிக 45) பன ‘‘அட்ட² வண்ணட்டா²னானி ஆஹச்ச வுத்தேன பத³னிகாயேனாதி அத்தோ², உதா³ஹடேன கண்டோ²க்கந்தேன பத³ஸமூஹேனாதி அதி⁴ப்பாயோ’’தி வுத்தம். ‘‘இத³ம் கப்பதி, இத³ம் ந கப்பதீ’’தி ஏவம் அவிஸேஸேத்வா ‘‘யம் பி⁴க்க²வே மயா ‘இத³ம் ந கப்பதீ’தி அப்படிக்கி²த்தம், தஞ்சே அகப்பியம் அனுலோமேதி, கப்பியம் படிபா³ஹதி, தம் வோ ந கப்பதீ’’திஆதி³னா (மஹாவ. 305) வுத்தஸாமஞ்ஞலக்க²ணம் இத⁴ ரஸோதி அதி⁴ப்பேதந்தி ஆஹ ‘‘ரஸோதி ஸுத்தானுலோம’’ந்தி. ரஸோதி ஸாரோ ‘‘பத்தரஸோ’’திஆதீ³ஸு (த⁴. ஸ. 628-630) விய, படிக்கி²த்தானுஞ்ஞாதஸுத்தஸாரோதி அத்தோ². ரஸோதி வா லக்க²ணம் படிவத்து²கம் அனுத்³த⁴ரித்வா லக்க²ணானுலோமேன வுத்தத்தா. ரஸேனாதி தஸ்ஸ ஆஹச்சபா⁴ஸிதஸ்ஸ ரஸேன, ததோ உத்³த⁴டேன வினிச்ச²யேனாதி அத்தோ². ஸுத்தசா²யா விய ஹி ஸுத்தானுலோமந்தி. த⁴ம்மஸங்கா³ஹகபபு⁴திஆசரியபரம்பரதோ ஆனீதா அட்ட²கதா²தந்தி இத⁴ ‘‘ஆசரியவம்ஸோ’’தி அதி⁴ப்பேதாதி ஆஹ ‘‘ஆசரியவம்ஸோதி ஆசரியவாதோ³’’தி, ஆசரியவாதோ³ ‘‘ஆசரியவம்ஸோ’’தி வுத்தோ பாளியம் வுத்தானம் ஆசரியானம் பரம்பராய ஆப⁴தோவ பமாணந்தி த³ஸ்ஸனத்த²ம். அதி⁴ப்பாயோதி காரணோபபத்திஸித்³தோ⁴ உஹாபோஹனயபவத்தோ பச்சக்கா²தி³பமாணபதிரூபகோ. அதி⁴ப்பாயோதி ஏத்த² ‘‘அத்தனோமதீ’’தி கேசி அத்த²ம் வத³ந்தி.

வினயபிடகே பாளீதி இத⁴ அதி⁴காரவஸேன வுத்தம், ஸேஸபிடகேஸுபி ஸுத்தாதி³சதுனயா யதா²னுரூபம் லப்³ப⁴ந்தேவ.

‘‘மஹாபதே³ஸாதி மஹாஓகாஸா. மஹந்தானி வினயஸ்ஸ பதிட்டா²பனட்டா²னானி, யேஸு பதிட்டா²பிதோ வினயோ வினிச்சி²னீயதி அஸந்தே³ஹதோ, மஹந்தானி வா காரணானி மஹாபதே³ஸா, மஹந்தானி வினயவினிச்ச²யகாரணானீதி வுத்தம் ஹோதி. அத்த²தோ பன ‘யம் பி⁴க்க²வே’திஆதி³னா வுத்தாஸாதி⁴ப்பாயா பாளியேவ மஹாபதே³ஸாதி வத³ந்தி. தேனேவாஹ ‘யே ப⁴க³வதா ஏவம் வுத்தா’திஆதி³. இமே ச மஹாபதே³ஸா க²ந்த⁴கே ஆக³தா, தஸ்மா தேஸம் வினிச்ச²யகதா² தத்தே²வ ஆவி ப⁴விஸ்ஸதீதி இத⁴ ந வுச்சதீ’’தி ஸாரத்த²தீ³பனியம் (ஸாரத்த². டீ. 2.45) வுத்தம். விமதிவினோத³னியம் (வி. வி. டீ. 1.45) பன ‘‘மஹாபதே³ஸாதி மஹாஓகாஸா மஹாவிஸயா, தே அத்த²தோ ‘யம் பி⁴க்க²வேதிஆதி³பாளிவஸேன அகப்பியானுலோமதோ கப்பியானுலோமதோ ச புக்³க³லேஹி நயதோ ததா² ததா² க³ய்ஹமானா அத்த²னயா ஏவ. தே ஹி ப⁴க³வதா ஸரூபதோ அவுத்தேஸுபி படிக்கி²த்தானுலோமேஸு அனுஞ்ஞாதானுலோமேஸு ச ஸேஸேஸு கிச்சேஸு நிவத்திபவத்திஹேதுதாய மஹாகோ³சராதி ‘மஹாபதே³ஸா’தி வுத்தா, ந பன ‘யம் பி⁴க்க²வே மயா இத³ம் ந கப்பதீ’திஆதி³னா வுத்தா ஸாதி⁴ப்பாயா பாளியேவ தஸ்ஸா ஸுத்தே பவிட்ட²த்தா. ‘ஸுத்தானுலோமம்பி ஸுத்தே ஓதாரேதப்³ப³ம்…பே… ஸுத்தமேவ ப³லவதர’ந்தி (பாரா. அட்ட². 1.45) ஹி வுத்தம். ந ஹேஸா ஸாதி⁴ப்பாயா பாளி ஸுத்தே ஓதாரேதப்³பா³, ந க³ஹேதப்³பா³ வா ஹோதி. யேனாயம் ஸுத்தானுலோமம் ஸியா, தஸ்மா இமம் பாளிஅதி⁴ப்பாயம் நிஸ்ஸாய புக்³க³லேஹி க³ஹிதா யதா²வுத்தஅத்தா²வ ஸுத்தானுலோமம், தம்பகாஸகத்தா பன அயம் பாளிபி ஸுத்தானுலோமந்தி க³ஹேதப்³ப³ம். தேனாஹ ‘யே ப⁴க³வதா ஏவம் வுத்தா’திஆதி³. ‘யம் பி⁴க்க²வே’திஆதி³பாளினயேன ஹி புக்³க³லேஹி க³ஹிதப்³பா³ யே அகப்பியானுலோமாத³யோ அத்தா² வுத்தா, தே மஹாபதே³ஸாதி அத்தோ²’’தி வுத்தம்.

வஜிரபு³த்³தி⁴டீகாயம்பி (வஜிர. டீ. பாராஜிக 45) ‘‘பரிவாரட்ட²கதா²யம் இத⁴ ச கிஞ்சாபி ‘ஸுத்தானுலோமம் நாம சத்தாரோ மஹாபதே³ஸா’தி வுத்தம், அத² கோ² மஹாபதே³ஸனயஸித்³த⁴ம் படிக்கி²த்தாபடிக்கி²த்தம் அனுஞ்ஞாதானனுஞ்ஞாதம் கப்பியாகப்பியந்தி அத்த²தோ வுத்தம் ஹோதி. தத்த² யஸ்மா ‘டா²னம் ஓகாஸோ பதே³ஸோதி காரணவேவசனானி ‘அட்டா²னமேதம், ஆனந்த³, அனவகாஸோ’திஆதி³ ஸாஸனதோ, ‘நிக்³க³ஹட்டா²ன’ந்தி ச ‘அஸந்தி³ட்டி²ட்டா²ன’ந்தி ச ‘அஸந்தி³ட்டி² ச பன பதே³ஸோ’தி ச லோகதோ, தஸ்மா மஹாபதே³ஸாதி மஹாகாரணானீதி அத்தோ². காரணம் நாம ஞாபகோ ஹேது இதா⁴தி⁴ப்பேதம், மஹந்தபா⁴வோ பன தேஸம் மஹாவிஸயத்தா மஹாபூ⁴தானம் விய. தே து³விதா⁴ வினயமஹாபதே³ஸா ஸுத்தந்திகமஹாபதே³ஸா சாதி. தத்த² வினயமஹாபதே³ஸா வினயே யோக³ம் க³ச்ச²ந்தி, இதரே உப⁴யத்தா²பி, தேனேவ பரிவாரே (பரி. 442) அனுயோக³வத்தே ‘த⁴ம்மம் ந ஜானாதி, த⁴ம்மானுலோமம் ந ஜானாதீ’தி’’ வுத்தம். தத்த² த⁴ம்மந்தி ட²பேத்வா வினயபிடகம் அவஸேஸம் பிடகத்³வயம், த⁴ம்மானுலோமந்தி ஸுத்தந்திகே சத்தாரோ மஹாபதே³ஸேதிஆதி³.

யதி³ ஸாபி தத்த² தத்த² ப⁴க³வதா பவத்திதா பகிண்ணகதே³ஸனாவ அட்ட²கதா², ஸா பன த⁴ம்மஸங்கா³ஹகேஹி பட²மம் தீணி பிடகானி ஸங்கா³யித்வா தஸ்ஸ அத்த²வண்ணனானுரூபேனேவ வாசனாமக்³க³ம் ஆரோபிதத்தா ‘‘ஆசரியவாதோ³’’தி வுச்சதி ‘‘ஆசரியா வத³ந்தி ஸம்வண்ணேந்தி பாளிம் ஏதேனா’’தி கத்வா. தேனாஹ ‘‘ஆசரியவாதோ³ நாம…பே… அட்ட²கதா²தந்தீ’’தி. திஸ்ஸோ ஹி ஸங்கீ³தியோ ஆருள்ஹோயேவ பு³த்³த⁴வசனஸ்ஸ அத்த²ஸம்வண்ணனாபூ⁴தோ கதா²மக்³கோ³ மஹாமஹிந்த³த்தே²ரேன தம்ப³பண்ணிதீ³பம் ஆப⁴தோ, பச்சா² தம்ப³பண்ணியேஹி மஹாதே²ரேஹி ஸீஹளபா⁴ஸாய ட²பிதோ நிகாயந்தரலத்³தி⁴ஸங்கரபரிஹரணத்த²ம். ப⁴க³வதோ பகிண்ணகதே³ஸனாபூ⁴தா ச ஸுத்தானுலோமபூ⁴தா ச அட்ட²கதா² யஸ்மா த⁴ம்மஸங்கா³ஹகத்தே²ரேஹி பாளிவண்ணனாக்கமேன ஸங்க³ஹேத்வா வுத்தா, தஸ்மா ஆசரியவாதோ³தி வுத்தா. ஏதேன ச அட்ட²கதா² ஸுத்தஸுத்தானுலோமேஸு அத்த²தோ ஸங்க³ய்ஹதீதி வேதி³தப்³ப³ம். யதா² ச ஏஸா, ஏவம் அத்தனோமதிபி பமாணபூ⁴தா. ந ஹி ப⁴க³வதோ வசனம் வசனானுலோமஞ்ச அனிஸ்ஸாய அக்³க³ஸாவகாத³யோபி அத்தனோ ஞாணப³லேன ஸுத்தாபி⁴த⁴ம்மவினயேஸு கிஞ்சி ஸம்முதிபரமத்த²பூ⁴தம் அத்த²ம் வத்தும் ஸக்கோந்தி, தஸ்மா ஸப்³ப³ம்பி வசனம் ஸுத்தே ஸுத்தானுலோமே ச ஸங்க³ய்ஹதி. விஸும் பன அட்ட²கதா²தீ³னம் ஸங்க³ஹிதத்தா தத³வஸேஸம் ஸுத்தஸுத்தானுலோமதோ க³ஹேத்வா சதுதா⁴ வினயோ நித்³தி³ட்டோ².

கிஞ்சாபி அத்தனோமதி ஸுத்தாதீ³ஹி ஸம்ஸந்தி³த்வாவ பரிகப்பீயதி, ததா²பி ஸா ந ஸுத்தாதீ³ஸு விஸேஸதோ நித்³தி³ட்டா²தி ஆஹ ‘‘ஸுத்தஸுத்தானுலோமஆசரியவாதே³ முஞ்சித்வா’’தி. அனுபு³த்³தி⁴யாதி ஸுத்தாதீ³னியேவ அனுக³தபு³த்³தி⁴யா. நயக்³கா³ஹேனாதி ஸுத்தாதி³தோ லப்³ப⁴மானனயக்³க³ஹணேன. அத்தனோமதிம் ஸாமஞ்ஞதோ பட²மம் த³ஸ்ஸேத்வா இதா³னி தமேவ விஸேஸேத்வா த³ஸ்ஸேந்தோ ‘‘அபிசா’’திஆதி³மாஹ. தத்த² ‘‘ஸுத்தந்தாபி⁴த⁴ம்மவினயட்ட²கதா²ஸூ’’தி வசனதோ பிடகத்தயஸ்ஸபி ஸாதா⁴ரணா ஏஸா கதா²தி வேதி³தப்³பா³. தே²ரவாதோ³தி மஹாஸுமத்தே²ராதீ³னம் கா³ஹோ. இதா³னி தத்த² படிபஜ்ஜிதப்³பா³காரம் த³ஸ்ஸேந்தோ ஆஹ ‘‘தம் பனா’’திஆதி³. தத்த² அத்தே²னாதி அத்தனா நயதோ க³ஹிதேன அத்தே²ன. பாளிந்தி அத்தனோ கா³ஹஸ்ஸ நிஸ்ஸயபூ⁴தம் ஸாட்ட²கத²ம் பாளிம். பாளியாதி தப்படிக்கே²பத்த²ம் பரேனாப⁴தாய ஸாட்ட²கதா²ய பாளியா, அத்தனா க³ஹிதம் அத்த²ம் நிஸ்ஸாய, பாளிஞ்ச ஸம்ஸந்தி³த்வாதி அத்தோ². ஆசரியவாதே³தி அத்தனா பரேன ச ஸமுத்³த⁴டஅட்ட²கதா²ய. ஓதாரேதப்³பா³தி ஞாணேன அனுப்பவேஸேதப்³பா³. ஓதரதி சேவ ஸமேதி சாதி அத்தனா உத்³த⁴டேஹி ஸம்ஸந்த³னவஸேன ஓதரதி, பரேன உத்³த⁴டேன ஸமேதி. ஸப்³ப³து³ப்³ப³லாதி அஸப்³ப³ஞ்ஞுபுக்³க³லஸ்ஸ தோ³ஸவாஸனாய யாதா²வதோ அத்த²ஸம்படிபத்திஅபா⁴வதோ வுத்தம்.

பமாத³பாட²வஸேன ஆசரியவாத³ஸ்ஸ ஸுத்தானுலோமேன அஸம்ஸந்த³னாபி ஸியாதி ஆஹ ‘‘இதரோ ந க³ஹேதப்³போ³’’தி. ஸமேந்தமேவ க³ஹேதப்³ப³ந்தி யே ஸுத்தேன ஸம்ஸந்த³ந்தி, ஏவரூபாவ அத்தா² மஹாபதே³ஸதோ உத்³த⁴ரிதப்³பா³தி த³ஸ்ஸேதி ததா² ததா² உத்³த⁴டஅத்தா²னம்யேவ ஸுத்தானுலோமத்தா. தேனாஹ ‘‘ஸுத்தானுலோமதோ ஹி ஸுத்தமேவ ப³லவதர’’ந்தி. அத² வா ஸுத்தானுலோமஸ்ஸ ஸுத்தேகதே³ஸத்தேபி ஸுத்தே விய ‘‘இத³ம் கப்பதி, இத³ம் ந கப்பதீ’’தி பரிச்சி²ந்தி³த்வா ஆஹச்சபா⁴ஸிதம் கிஞ்சி நத்தீ²தி ஆஹ ‘‘ஸுத்தா…பே… ப³லவதர’’ந்தி. அப்படிவத்தியந்தி அப்படிபா³ஹியம். காரகஸங்க⁴ஸதி³ஸந்தி பமாணத்தா ஸங்கீ³திகாரகஸங்க⁴ஸதி³ஸம். ‘‘பு³த்³தா⁴னம் டி²தகாலஸதி³ஸ’’ந்தி இமினா பு³த்³தா⁴னம்யேவ கதி²தத⁴ம்மபா⁴வம் த³ஸ்ஸேதி, த⁴ரமானபு³த்³த⁴ஸதி³ஸந்தி வுத்தம் ஹோதி. ஸுத்தே ஹி படிபா³ஹிதே பு³த்³தோ⁴வ படிபா³ஹிதோ ஹோதி. ‘‘ஸகவாதீ³ ஸுத்தம் க³ஹேத்வா கதே²தீதி ஸகவாதீ³ அத்தனோ ஸுத்தம் க³ஹேத்வா வோஹரதி. பரவாதீ³ ஸுத்தானுலோமந்தி அஞ்ஞனிகாயவாதீ³ அத்தனோ நிகாயே ஸுத்தானுலோமம் க³ஹேத்வா கதே²தீ’’தி ஸாரத்த²தீ³பனியம் (ஸாரத்த². டீ. 2.45) வுத்தம்.

விமதிவினோத³னியம் (வி. வி. டீ. 1.45) பன ‘‘ஸகவாதீ³ ஸுத்தம் க³ஹேத்வா கதே²தீதிஆதீ³ஸு யோ யதா²பூ⁴தமத்த²ம் க³ஹேத்வா கத²னஸீலோ, ஸோ ஸகவாதீ³. ஸுத்தந்தி ஸங்கீ³தித்தயாருள்ஹம் பாளிவசனம். பரவாதீ³தி மஹாவிஹாரவாஸீ வா ஹோது அஞ்ஞனிகாயவாஸீ வா, யோ விபரீததோ அத்த²ம் க³ஹேத்வா கத²னஸீலோ, ஸோவ இத⁴ ‘பரவாதீ³’தி வுத்தோ. ஸுத்தானுலோமந்தி ஸங்கீ³தித்தயாருள்ஹம் வா அனாருள்ஹம் வா யம் கிஞ்சி விபல்லாஸதோ வா வஞ்சனாய வா ‘ஸங்கீ³தித்தயாக³தமித³’ந்தி த³ஸ்ஸியமானம் ஸுத்தானுலோமம். கேசி ‘அஞ்ஞனிகாயே ஸுத்தானுலோம’ந்தி வத³ந்தி, தம் ந யுத்தம் ஸகவாதீ³பரவாதீ³னம் உபி⁴ன்னம்பி ஸங்கீ³தித்தயாருள்ஹஸுத்தாதீ³னமேவ க³ஹேதப்³ப³தோ. ததா² ஹி வக்க²தி ‘திஸ்ஸோ ஸங்கீ³தியோ ஆருள்ஹம் பாளிஆக³தம் பஞ்ஞாயதி, க³ஹேதப்³ப³’ந்திஆதி³ (பாரா. அட்ட². 1.45). ந ஹி ஸகவாதீ³ அஞ்ஞனிகாயஸுத்தாதி³ம் பமாணதோ க³ண்ஹாதி. யேன தேஸு ஸுத்தாதீ³ஸு த³ஸ்ஸிதேஸு தத்த² டா²தப்³ப³ம் ப⁴வேய்ய, வக்க²தி ச ‘பரோ தஸ்ஸ அகப்பியபா⁴வஸாத⁴கம் ஸுத்ததோ ப³ஹும் காரணஞ்ச வினிச்ச²யஞ்ச த³ஸ்ஸேதி…பே… ஸாதூ⁴தி ஸம்படிச்சி²த்வா அகப்பியேயேவ டா²தப்³ப³’ந்தி (பாரா. அட்ட². 1.45), தஸ்மா பரவாதி³னாபி ஸங்கீ³தித்தயே அனாருள்ஹம்பி அனாருள்ஹமிச்சேவ த³ஸ்ஸீயதி, கேவலம் தஸ்ஸ தஸ்ஸ ஸுத்தாதி³னோ ஸங்கீ³தித்தயே அனாக³தஸ்ஸ கூடதா, ஆக³தஸ்ஸ ச ப்³யஞ்ஜனச்சா²யாய அஞ்ஞதா² அதி⁴ப்பாயயோஜனா ச விஸேஸா, தத்த² ச யம் கூடம், தம் அபனீயதி. யம் அஞ்ஞதா² யோஜிதம், தம் தஸ்ஸ விபரீததாத³ஸ்ஸனத்த²ம் தத³ஞ்ஞேன ஸுத்தாதி³னா ஸம்ஸந்த³னா கரீயதி. யோ பன பரவாதி³னா க³ஹிதோ அதி⁴ப்பாயோ ஸுத்தந்தாதி³னா ஸம்ஸந்த³தி, ஸோ ஸகவாதி³னாபி அத்தனோ கா³ஹம் விஸ்ஸஜ்ஜேத்வா க³ஹேதப்³போ³தி உபி⁴ன்னம்பி ஸங்கீ³தித்தயாக³தமேவ ஸுத்தம் பமாணந்தி வேதி³தப்³ப³ம். தேனேவ கதா²வத்து²பகரணே ‘ஸகவாதே³ பஞ்ச ஸுத்தஸதானி பரவாதே³ பஞ்சா’தி, ஸுத்தஸஹஸ்ஸம்பி அதி⁴ப்பாயக்³க³ஹணனானத்தேன ஸங்கீ³தித்தயாக³தமேவ க³ஹிதம், ந நிகாயந்தரே’’தி வுத்தம்.

வஜிரபு³த்³தி⁴டீகாயம் (வஜிர. டீ. பாராஜிக 45) பன ‘‘பரவாதீ³தி அம்ஹாகம் ஸமயவிஜானனகோ அஞ்ஞனிகாயிகோதி வுத்தம். பரவாதீ³ ஸுத்தானுலோமந்தி கத²ம்? ‘அஞ்ஞத்ர உத³கத³ந்தபோனா’தி ஸுத்தம் ஸகவாதி³ஸ்ஸ, தத³னுலோமதோ நாளிகேரப²லஸ்ஸ உத³கம்பி உத³கமேவ ஹோதீதி பரவாதீ³ ச.

‘நாளிகேரஸ்ஸ யம் தோயம், புராணம் பித்தவட்³ட⁴னம்;

தமேவ தருணம் தோயம், பித்தக⁴ம் ப³லவட்³ட⁴ன’ந்தி. –

ஏவம் பரவாதி³னா வுத்தே ஸகவாதீ³ த⁴ஞ்ஞப²லஸ்ஸ க³திகத்தா, ஆஹாரத்த²ஸ்ஸ ச ப²ரணதோ ‘யாவகாலிகமேவ த’ந்தி வத³ந்தோ படிக்கி²பதீ’’தி. கே²பம் வா க³ரஹம் வா அகத்வாதி ‘‘கிம் இமினா’’தி கே²பம் படிக்கே²பம் ச²ட்³ட³னம் வா ‘‘கிமேஸ பா³லோ வத³தி, கிமேஸ பா³லோ ஜானாதீ’’தி க³ரஹம் நிந்த³ம் வா அகத்வா. ஸுத்தானுலோமந்தி அத்தனா அவுத்தம் அஞ்ஞனிகாயே ஸுத்தானுலோமம். ‘‘ஸுத்தே ஓதாரேதப்³ப³ந்தி ஸகவாதி³னா ஸுத்தே ஓதாரேதப்³ப³’’ந்தி ஸாரத்த²தீ³பனியம் (ஸாரத்த². டீ. 2.45). விமதிவினோத³னியம் (வி. வி. டீ. 1.45) பன ‘‘ஸுத்தே ஓதாரேதப்³ப³ந்தி யஸ்ஸ ஸுத்தஸ்ஸ அனுலோமனதோ இத³ம் ஸுத்தானுலோமம் அகாஸி, தஸ்மிம், தத³னுரூபே வா அஞ்ஞதரஸ்மிம் ஸுத்தே அத்தனா க³ஹிதம் ஸுத்தானுலோமம் அத்த²தோ ஸம்ஸந்த³னவஸேன ஓதாரேதப்³ப³ம். ‘இமினா ச இமினா ச காரணேன இமஸ்மிம் ஸுத்தே ஸம்ஸந்த³தீ’தி ஸம்ஸந்தே³த்வா த³ஸ்ஸேதப்³ப³ந்தி அத்தோ²’’தி வுத்தம். ஸுத்தஸ்மிம்யேவ டா²தப்³ப³ந்தி அத்தனோ ஸுத்தேயேவ டா²தப்³ப³ம். அயந்தி ஸகவாதீ³. பரோதி பரவாதீ³. ஆசரியவாதோ³ ஸுத்தே ஓதாரேதப்³போ³தி யஸ்ஸ ஸுத்தஸ்ஸ ஸம்வண்ணனாவஸேன அயம் ஆசரியவாதோ³ பவத்தோ, தஸ்மிம், தாதி³ஸே ச அஞ்ஞஸ்மிம் ஸுத்தே புப்³பா³பரஅத்த²ஸம்ஸந்த³னவஸேன ஓதாரேதப்³ப³ம். கா³ரய்ஹாசரியவாதோ³தி பமாத³லிகி²தோ, பி⁴ன்னலத்³தி⁴கேஹி ச ட²பிதோ, ஏஸ நயோ ஸப்³ப³த்த².

வஜிரபு³த்³தி⁴டீகாயம் (வஜிர. டீ. பாராஜிக 45) பன – பரோ ஆசரியவாத³ந்தி ‘‘ஸுங்கம் பரிஹரதீதி ஏத்த² உபசாரம் ஓக்கமித்வா கிஞ்சாபி பரிஹரதி, அவஹாரோ ஏவா’’தி அட்ட²கதா²வசனதோ ‘‘ததா² கரோந்தோ பாராஜிகமாபஜ்ஜதீ’’தி பரவாதி³னா வுத்தே ஸகவாதீ³ ‘‘ஸுங்கம் பரிஹரதி, ஆபத்தி து³க்கடஸ்ஸா’’தி ஸுத்தம் தத்தே²வ ஆக³தமஹாஅட்ட²கதா²வசனேன ஸத்³தி⁴ம் த³ஸ்ஸேத்வா படிஸேதே⁴தி. ததா² கரோந்தஸ்ஸ து³க்கடமேவாதி. பரோ அத்தனோமதிந்தி ஏத்த² ‘‘புரேப⁴த்தம் பரஸந்தகம் அவஹராதி புரேப⁴த்தமேவ ஹரிஸ்ஸாமீதி வாயமந்தஸ்ஸ பச்சா²ப⁴த்தம் ஹோதி, புரேப⁴த்தபயோகோ³வ ஸோ, தஸ்மா மூலட்டோ² ந முச்சதீதி தும்ஹாகம் தே²ரவாத³த்தா மூலட்ட²ஸ்ஸ பாராஜிகமேவா’’தி பரவாதி³னா வுத்தே ஸகவாதீ³ ‘‘தம் ஸங்கேதம் புரே வா பச்சா² வா தம் ப⁴ண்ட³ம் அவஹரதி, மூலட்ட²ஸ்ஸ அனாபத்தீ’’தி ஸுத்தம் த³ஸ்ஸேத்வா படிக்கி²பதி.

பரோ ஸுத்தந்தி ‘‘அனியதஹேதுத⁴ம்மோ ஸம்மத்தனியதஹேதுத⁴ம்மஸ்ஸ ஆரம்மணபச்சயேன பச்சயோ’’தி ஸுத்தம் பட்டா²னே லிகி²தம் த³ஸ்ஸேத்வா ‘‘அரியமக்³க³ஸ்ஸ ந நிப்³பா³னமேவாரம்மண’’ந்தி பரவாதி³னா வுத்தே ஸகவாதீ³ ஆரம்மணத்திகாதி³ஸுத்தானுலோமேன ஓதரதீதி படிக்கி²பதி. ஸுத்தானுலோமே ஓதரந்தம்யேவ ஹி ஸுத்தம் நாம, நேதரம். தேன வுத்தம் ‘‘பாளிஆக³தம் பஞ்ஞாயதீ’’தி ஏத்தகேனபி ஸித்³தே⁴ ‘‘திஸ்ஸோ ஸங்கீ³தியோ ஆருள்ஹம் பாளிஆக³தம் பஞ்ஞாயதீ’’திஆதி³. தாதி³ஸஞ்ஹி பமாத³லேக²ந்தி ஆசரியோ. ‘‘அப்பமாதோ³ அமதபத³ம், பமாதோ³ மச்சுனோ பத³’’ந்தி (த⁴. ப. 21) வசனதோ தி³ன்னபோ⁴ஜனே பு⁴ஞ்ஜித்வா பரிஸ்ஸயானி பரிவஜ்ஜித்வா ஸதிம் பச்சுபட்ட²பேத்வா விஹரந்தோ நிச்சோ ஹோதீதி. ஏவரூபஸ்ஸ அத்த²ஸ்ஸ ஆருள்ஹம்பி ஸுத்தம் ந க³ஹேதப்³ப³ம். தேன வுத்தம் ‘‘நோ சே ததா² பஞ்ஞாயதீ’’தி ஸித்³தே⁴பி ‘‘நோ சே ததா² பஞ்ஞாயதி, ந ஓதரதி ந ஸமேதீதி. பா³ஹிரகஸுத்தம் வா’’தி வுத்தத்தா அத்தனோ ஸுத்தம்பி அத்தே²ன அஸமேந்தம் ந க³ஹேதப்³ப³ம். பரோ ஆசரியவாத³ந்திஆதீ³ஸு த்³வீஸு நயேஸு பமாத³லேக²வஸேன தத்த² தத்த² ஆக³தட்ட²கதா²வசனம் தே²ரவாதே³ஹி ஸத்³தி⁴ம் யோஜேத்வா வேதி³தப்³ப³ம்.

அதா²யம் ஆசரியவாத³ம் க³ஹேத்வா கதே²தி, பரோ ஸுத்தந்தி பரவாதி³னா ‘‘மூலபீ³ஜம் நாம ஹலித்³தி³ ஸிங்கி³வேரம் வசா…பே… பீ³ஜே பீ³ஜஸஞ்ஞீ சி²ந்த³தி வா சே²தா³பேதி வா பி⁴ந்த³தி வா…பே… ஆபத்தி பாசித்தியஸ்ஸா’’தி (பாசி. 91) தும்ஹாகம் பாட²த்தா ‘‘ஹலித்³தி³க³ண்டி²ம் சி²ந்த³ந்தஸ்ஸ பாசித்திய’’ந்தி வுத்தே ஸகவாதீ³ ‘‘யானி வா பனஞ்ஞானி அத்தி² மூலே ஜாயந்தி, மூலே ஸஞ்ஜாயந்தீ’’திஆதி³ம் த³ஸ்ஸேத்வா தஸ்ஸ அட்ட²கதா²ஸங்கா²தேன ஆசரியவாதே³ன படிக்கி²பதி. ந ஹி க³ண்டி²ம்ஹி க³ண்டி² ஜாயதீதி. பரோ ஸுத்தானுலோமந்தி பரவாதி³னா ‘‘அனாபத்தி ஏவம் அம்ஹாகம் ஆசரியானம் உக்³க³ஹோ’’தி வசனஸ்ஸானுலோமதோ ‘‘அம்ஹாகம் போராணபி⁴க்கூ² ஏகபாஸாதே³ க³ப்³ப⁴ம் த²கேத்வா அனுபஸம்பன்னேன ஸயிதும் வட்டதீதி ததா² கத்வா ஆக³தா, தஸ்மா அம்ஹாகம் வட்டதீதி தும்ஹேஸு ஏவ ஏகச்சேஸு வத³ந்தேஸு ‘‘தும்ஹாகம் ந கிஞ்சி வத்தும் ஸக்கா’’தி வுத்தே ஸகவாதீ³ ‘‘ஸுத்தம் ஸுத்தானுலோமஞ்ச உக்³க³ஹிதகானம்யேவ ஆசரியானம் உக்³க³ஹோ பமாண’’ந்திஆதி³அட்ட²கதா²வசனம் த³ஸ்ஸேத்வா படிஸேதே⁴தி. பரோ அத்தனோமதிந்தி ‘‘த்³வாரம் விவரித்வா அனாபுச்சா² ஸயிதேஸு கே முச்சந்தீ’’தி ஏத்த² பன த்³வேபி ஜனா முச்சந்தி – யோ ச யக்க²க³ஹிதகோ, யோ ச ப³ந்தி⁴த்வா நிபஜ்ஜாபிதோதி தும்ஹாகம் தே²ரவாத³த்தா அஞ்ஞே ஸப்³பே³பி யதா² ததா² வா நிபன்னாத³யோபி முச்சந்தீதி படிஸேதே⁴தி.

அத² பனாயம் அத்தனோமதிம் க³ஹேத்வா கதே²தி, பரோ ஸுத்தந்தி ‘‘ஆபத்திம் ஆபஜ்ஜந்தீ’’தி பரவாதி³னா வுத்தே ஸகவாதீ³ ‘‘தி³வா கிலந்தரூபோ மஞ்சே நிஸின்னோ பாதே³ பூ⁴மிதோ அமோசேத்வாவ நித்³தா³வஸேன நிபஜ்ஜதி, தஸ்ஸ அனாபத்தீ’’திஆதி³அட்ட²கதா²வசனம் த³ஸ்ஸேத்வா ஏகப⁴ங்கே³ன நிபன்னாத³யோபி முச்சந்தீதி படிஸேதே⁴தி.

அதா²யம் அத்தனோமதிம் க³ஹேத்வா கதே²தி, பரோ ஸுத்தானுலோமந்தி ‘‘தோ³மனஸ்ஸம்பாஹம் தே³வானமிந்த³ து³விதே⁴ன வதா³மி ஸேவிதப்³ப³ம்பி அஸேவிதப்³ப³ம்பீதிஆதி³வசனேஹி (தீ³. நி. 2.360) ஸம்ஸந்த³னதோ ஸதா³ரபோஸே தோ³ஸோ தும்ஹாகம் நத்தி², தேன வுத்தம் ‘புத்ததா³ரஸ்ஸ ஸங்க³ஹோ’’தி (கு². பா. 5.6; ஸு. நி. 265) பரவாதி³னா வுத்தே ‘‘கிஞ்சாபி ஸகவாதீ³ ப³ஹுஸ்ஸுதோ ந ஹோதி, அத² கோ² ராக³ஸஹிதேனேவ அகுஸலேன ப⁴விதப்³ப³’’ந்தி படிக்கி²பதி. ஸேஸேஸுபி இமினா நயேன அஞ்ஞதா²பி அனுரூபதோ யோஜேதப்³ப³ம், இத³ம் ஸப்³ப³ம் உபதிஸ்ஸத்தே²ராத³யோ ஆஹு. த⁴ம்மஸிரித்தே²ரோ பன ‘‘ஏத்த² பரோதி வுத்தோ அஞ்ஞனிகாயிகோ, ஸோ பன அத்தனோ ஸுத்தாதீ³னியேவ ஆஹரதி, தானி ஸகவாதீ³ அத்தனோ ஸுத்தாதி³ம்ஹி ஓதாரேத்வா ஸசே ஸமேதி, க³ண்ஹாதி. நோ சே, படிக்கி²பதீ’’தி வத³தீதி ஆக³தம்.

நனு ச ‘‘ஸுத்தானுலோமதோ ஸுத்தமேவ ப³லவதர’’ந்தி ஹேட்டா² வுத்தம், இத⁴ பன ‘‘ஸுத்தம் ஸுத்தானுலோமே ஓதாரேதப்³ப³’’ந்திஆதி³ கஸ்மா வுத்தந்தி? நாயம் விரோதோ⁴, ‘‘ஸுத்தானுலோமதோ ஸுத்தமேவ ப³லவதர’’ந்தி இத³ஞ்ஹி ஸகமதேயேவ ஸுத்தம் ஸந்தா⁴ய வுத்தம். தத்த² ஹி ஸகமதிபரியாபன்னமேவ ஸுத்தாதி³ம் ஸந்தா⁴ய ‘‘அத்தனோமதி ஸப்³ப³து³ப்³ப³லா, அத்தனோமதிதோ ஆசரியவாதோ³ ப³லவதரோ, ஆசரியவாத³தோ ஸுத்தானுலோமம் ப³லவதரம், ஸுத்தானுலோமதோ ஸுத்தமேவ ப³லவதர’’ந்தி ச வுத்தம். இத⁴ பன பரவாதி³னா ஆனீதம் அஞ்ஞனிகாயே ஸுத்தம் ஸந்தா⁴ய ‘‘ஸுத்தானுலோமே ஸுத்தம் ஓதாரேதப்³ப³’’ந்திஆதி³ வுத்தம், தஸ்மா பரவாதி³னா ஆனீதம் ஸுத்தாதி³ அத்தனோ ஸுத்தானுலோமஆசரியவாத³அத்தனோமதீஸு ஓதாரேத்வா ஸமேந்தம்யேவ க³ஹேதப்³ப³ம், இதரம் ந க³ஹேதப்³ப³ந்தி அயம் நயோ இத⁴ வுச்சதீதி ந கோசி புப்³பா³பரவிரோதோ⁴தி அயம் ஸாரத்த²தீ³பனியாக³தோ (ஸாரத்த². டீ. 2.45) நயோ. விமதிவினோத³னியம் (வி. வி. டீ. 1.45) பன ‘‘யம் கிஞ்சி கூடஸுத்தம் பா³ஹிரகஸுத்தாதி³வசனம் ந க³ஹேதப்³ப³ந்தி த³ஸ்ஸேதும் ஸுத்தம் ஸுத்தானுலோமே ஓதாரேதப்³ப³ந்திஆதி³ வுத்த’’ந்தி வுத்தம்.

பா³ஹிரகஸுத்தந்தி திஸ்ஸோ ஸங்கீ³தியோ அனாருள்ஹகு³ள்ஹவேஸ்ஸந்தராதீ³னி ச மஹாஸங்கி⁴கனிகாயவாஸீனம் ஸுத்தானி. வேத³ல்லாதீ³னந்தி ஆதி³-ஸத்³தே³ன கு³ள்ஹஉம்மக்³கா³தி³க்³க³ஹணம் வேதி³தப்³ப³ம். இதரம் கா³ரய்ஹஸுத்தம் ந க³ஹேதப்³ப³ம். ‘‘அத்தனோமதியமேவ டா²தப்³ப³’’ந்தி இமினா அஞ்ஞனிகாயதோ ஆனீதஸுத்ததோபி ஸகனிகாயே அத்தனோமதியேவ ப³லவதராதி த³ஸ்ஸேதி. ‘‘ஸகவாதீ³ ஸுத்தம் க³ஹேத்வா கதே²தி, பரவாதீ³ ஸுத்தமேவா’’தி ஏவமாதி³னா ஸமானஜாதிகானம் வஸேன வாரோ ந வுத்தோ. ஸுத்தஸ்ஸ ஸுத்தேயேவ ஓதாரணம் பி⁴ன்னம் விய ஹுத்வா ந பஞ்ஞாயதி, வுத்தனயேனேவ ச ஸக்கா யோஜேதுந்தி.

இதா³னி ஸகவாதீ³பரவாதீ³னம் கப்பியாகப்பியாதி³பா⁴வம் ஸந்தா⁴ய விவாதே³ உப்பன்னே தத்த² படிபஜ்ஜிதப்³ப³விதி⁴ம் த³ஸ்ஸேந்தோ ஆஹ ‘‘அத² பனாயம் கப்பியந்தி க³ஹேத்வா கதே²தீ’’திஆதி³. அத² வா ஏவம் ஸுத்தஸுத்தானுலோமாதி³முகே²ன ஸாமஞ்ஞதோ விவாத³ம் த³ஸ்ஸேத்வா இதா³னி விஸேஸதோ விவாத³வத்து²ம் தப்³பி³னிச்ச²யமுகே²ன ஸுத்தாதி³ஞ்ச த³ஸ்ஸேதும் ‘‘அத² பனாயம் கப்பிய’’ந்திஆதி³ வுத்தம். தத்த² ஸுத்தே ச ஸுத்தானுலோமே ச ஓதாரேதப்³ப³ந்தி ஸகவாதி³னா அத்தனோயேவ ஸுத்தே ச ஸுத்தானுலோமே ச ஓதாரேதப்³ப³ம். பரோ காரணம் ந விந்த³தீதி பரவாதீ³ காரணம் ந லப⁴தி. ஸுத்ததோ ப³ஹும் காரணஞ்ச வினிச்ச²யஞ்ச த³ஸ்ஸேதீதி பரவாதீ³ அத்தனோ ஸுத்ததோ ப³ஹும் காரணஞ்ச வினிச்ச²யஞ்ச ஆஹரித்வா த³ஸ்ஸேதி, ‘‘ஸாதூ⁴தி ஸம்படிச்சி²த்வா அகப்பியேயேவ டா²தப்³ப³’’ந்தி இமினா அத்தனோ நிகாயே ஸுத்தாதீ³னி அலப⁴ந்தேன ஸகவாதி³னா பரவாதீ³வசனேயேவ டா²தப்³ப³ந்தி வத³தி. ஸுத்தே ச ஸுத்தானுலோமே சாதி ஏத்த² ச-காரோ விகப்பனத்தோ², தேன ஆசரியவாதா³தீ³னம்பி ஸங்க³ஹோ. தேனாஹ ‘‘காரணஞ்ச வினிச்ச²யஞ்ச த³ஸ்ஸேதீ’’தி. தத்த² காரணந்தி ஸுத்தாதி³னயம் நிஸ்ஸாய அத்தனோமதியா உத்³த⁴டம் ஹேதும். வினிச்ச²யந்தி அட்ட²கதா²வினிச்ச²யம்.

த்³வின்னம்பி காரணச்சா²யா தி³ஸ்ஸதீதி ஸகவாதீ³பரவாதீ³னம் உபி⁴ன்னம்பி கப்பியாகப்பியபா⁴வஸாத⁴கம் காரணபதிரூபகச்சா²யா தி³ஸ்ஸதி. தத்த² காரணச்சா²யாதி ஸுத்தாதீ³ஸு ‘‘கப்பிய’’ந்தி கா³ஹஸ்ஸ, ‘‘அகப்பிய’’ந்தி கா³ஹஸ்ஸ ச நிமித்தபூ⁴தேன கிச்சே²ன படிபாத³னீயம் அவிபூ⁴தகாரணம் காரணச்சா²யா, காரணபதிரூபகந்தி அத்தோ². யதி³ த்³வின்னம்பி காரணச்சா²யா தி³ஸ்ஸதி, கஸ்மா அகப்பியேயேவ டா²தப்³ப³ந்தி ஆஹ ‘‘வினயஞ்ஹி பத்வா’’திஆதி³. ‘‘வினயம் பத்வா’’தி வுத்தமேவத்த²ம் பாகடதரம் கத்வா த³ஸ்ஸேந்தோ ஆஹ ‘‘கப்பியாகப்பியவிசாரணம் ஆக³ம்மா’’தி. ருந்தி⁴தப்³ப³ந்திஆதீ³ஸு து³ப்³பி³ஞ்ஞேய்யவினிச்ச²யே கப்பியாகப்பியபா⁴வே ஸதி ‘‘கப்பிய’’ந்தி க³ஹணம் ருந்தி⁴தப்³ப³ம், ‘‘அகப்பிய’’ந்தி க³ஹணம் கா³ள்ஹம் காதப்³ப³ம், அபராபரப்பவத்தம் கப்பியக்³க³ஹணம் ஸோதம் பச்சி²ந்தி³தப்³ப³ம், க³ருகபா⁴வஸங்க²தே அகப்பியேயேவ டா²தப்³ப³ந்தி அத்தோ². அத² வா ருந்தி⁴தப்³ப³ந்தி கப்பியஸஞ்ஞாய வீதிக்கமகாரணம் ருந்தி⁴தப்³ப³ம், தம்னிவாரணசித்தம் த³ள்ஹதரம் காதப்³ப³ம். ஸோதம் பச்சி²ந்தி³தப்³ப³ந்தி தத்த² வீதிக்கமப்பவத்தி பச்சி²ந்தி³தப்³பா³. க³ருகபா⁴வேதி அகப்பியபா⁴வேதி அத்தோ².

ப³ஹூஹி ஸுத்தவினிச்ச²யகாரணேஹீதி ப³ஹூஹி ஸுத்தேஹி சேவ ததோ ஆனீதவினிச்ச²யகாரணேஹி ச. அத² வா ஸுத்தேன அட்ட²கதா²வினிச்ச²யேன ச லத்³த⁴காரணேஹி. அத்தனோ க³ஹணம் ந விஸ்ஸஜ்ஜேதப்³ப³ந்தி ஸகவாதி³னா அத்தனோ ‘‘அகப்பிய’’ந்தி க³ஹணம் ந விஸ்ஸஜ்ஜேதப்³ப³ந்தி அத்தோ².

இதா³னி வுத்தமேவத்த²ம் நிக³மேந்தோ ‘‘ஏவ’’ந்திஆதி³மாஹ. தத்த² யோதி ஸகவாதீ³பரவாதீ³ஸு யோ கோசி. கேசி பன ‘‘ஸகவாதீ³ஸுயேவ யோ கோசி இதா⁴தி⁴ப்பேதோ’’தி வத³ந்தி, ஏவம் ஸந்தே ‘‘அத² பனாயம் கப்பியந்தி க³ஹேத்வா கதே²தீ’’திஆதீ³ஸு ஸப்³ப³த்த² உபோ⁴பி ஸகவாதி³னோயேவ ஸியும் ஹேட்டா² வுத்தஸ்ஸேவ நிக³மனவஸேன ‘‘ஏவ’’ந்திஆதி³னா வுத்தத்தா, தஸ்மா தம் ந க³ஹேதப்³ப³ம். அதிரேககாரணம் லப⁴தீதி ஏத்த² ஸுத்தாதீ³ஸு புரிமம் புரிமம் அதிரேககாரணம் நாம, யோ வா ஸுத்தாதீ³ஸு சதூஸு ப³ஹுதரம் காரணம் லப⁴தி, ஸோ அதிரேககாரணம் லப⁴தி நாம.

ஸுட்டு² பவத்தி ஏதஸ்ஸாதி, ஸுட்டு² பவத்ததி ஸீலேனாதி வா ஸுப்பவத்தி. தேனாஹ ‘‘ஸுப்பவத்தீதி ஸுட்டு² பவத்த’’ந்தி. வாசாய உக்³க³தம் வாசுக்³க³தம், வசஸா ஸுக்³க³ஹிதந்தி வுத்தம் ஹோதி. அத² வா வாசுக்³க³தந்தி வாசாய உக்³க³தம், தத்த² நிரந்தரம் டி²தந்தி அத்தோ². ஸுத்ததோதி இமஸ்ஸ விவரணம் ‘‘பாளிதோ’’தி. ஏத்த² ச ‘‘ஸுத்தம் நாம ஸகலம் வினயபிடக’’ந்தி வுத்தத்தா புன ஸுத்ததோதி தத³த்த²படிபாத³கம் ஸுத்தாபி⁴த⁴ம்மபாளிவசனம் அதி⁴ப்பேதம். அனுப்³யஞ்ஜனஸோதி இமஸ்ஸ விவரணம் ‘‘பரிபுச்ச²தோ ச அட்ட²கதா²தோ சா’’தி. பாளிம் அனுக³ந்த்வா அத்த²ஸ்ஸ ப்³யஞ்ஜனதோ பகாஸனதோ ‘‘அனுப்³யஞ்ஜன’’ந்தி ஹி பரிபுச்சா² அட்ட²கதா² ச வுச்சதி. ஏத்த² ச அட்ட²கதா²ய விஸும் க³ஹிதத்தா ‘‘பரிபுச்சா²’’தி தே²ரவாதோ³ வுத்தோ. அத² வா பரிபுச்சா²தி ஆசரியஸ்ஸ ஸந்திகா பாளியா அத்த²ஸவனம். அட்ட²கதா²தி பாளிமுத்தகவினிச்ச²யோ. தது³ப⁴யம்பி பாளிம் அனுக³ந்த்வா அத்த²ஸ்ஸ ப்³யஞ்ஜனதோ ‘‘அனுப்³யஞ்ஜன’’ந்தி வுத்தம்.

வினயேதி வினயாசாரே. தேனேவ வக்க²தி ‘‘வினயம் அஜஹந்தோ அவோக்கமந்தோ’’திஆதி³. தத்த² பதிட்டா²னம் நாம ஸஞ்சிச்ச ஆபத்தியா அனாபஜ்ஜனாதி³னா ஹோதீதி ஆஹ ‘‘லஜ்ஜிபா⁴வேன பதிட்டி²தோ’’தி, தேன லஜ்ஜீ ஹோதீதி வுத்தம் ஹோதி. வினயத⁴ரஸ்ஸ லக்க²ணே வத்தப்³பே³ கிம் இமினா லஜ்ஜிபா⁴வேனாதி ஆஹ ‘‘அலஜ்ஜீ ஹீ’’திஆதி³. தத்த² ப³ஹுஸ்ஸுதோபீதி இமினா பட²மலக்க²ணஸமன்னாக³மம் த³ஸ்ஸேதி. லாப⁴க³ருகதாயாதி இமினா வினயே டி²ததாய அபா⁴வே பட²மலக்க²ணயோகா³ கிச்சகரோ ந ஹோதி, அத² கோ² அகிச்சகரோ அனத்த²கரோ ஏவாதி த³ஸ்ஸேதி. ஸங்க⁴பே⁴த³ஸ்ஸ புப்³ப³பா⁴கே³ பவத்தகலஹஸ்ஸேதம் அதி⁴வசனம் ஸங்க⁴ராஜீதி. குக்குச்சகோதி அணுமத்தேஸுபி வஜ்ஜேஸு ப⁴யத³ஸ்ஸனவஸேன குக்குச்சம் உப்பாதே³ந்தோ. தந்திம் அவிஸம்வாதே³த்வாதி பாளிம் அஞ்ஞதா² அகத்வா. அவோக்கமந்தோதி அனதிக்கமந்தோ.

வித்து²னதீதி அத்த²ம் அதி³ஸ்வா நித்து²னதி, வித்த²ம்ப⁴தி வா. விப்ப²ந்த³தீதி கம்பதி. ஸந்திட்டி²தும் ந ஸக்கோதீதி ஏகஸ்மிம்யேவ அத்தே² பதிட்டா²தும் ந ஸக்கோதி. தேனாஹ ‘‘யம் யம் பரேன வுச்சதி, தம் தம் அனுஜானாதீ’’தி. ஸகவாத³ம் ச²ட்³டே³த்வா பரவாத³ம் க³ண்ஹாதீதி ‘‘உச்சு²ம்ஹி கஸடம் யாவஜீவிகம், ரஸோ ஸத்தாஹகாலிகோ, தது³ப⁴யவினிமுத்தோ ச உச்சு² நாம விஸும் நத்தி², தஸ்மா உச்சு²பி விகாலே வட்டதீ’’தி பரவாதி³னா வுத்தே தம்பி க³ண்ஹாதி. ஏகேகலோமந்தி பலிதம் ஸந்தா⁴ய வுத்தம். யம்ஹீதி யஸ்மிம் புக்³க³லே. பரிக்க²யம் பரியாதா³னந்தி அத்த²தோ ஏகம்.

ஆசரியபரம்பராதி ஆசரியானம் வினிச்ச²யபரம்பரா. தேனேவ வக்க²தி ‘‘அத்தனோமதிம் பஹாய…பே… யதா² ஆசரியோ ச ஆசரியாசரியோ ச பாளிஞ்ச பரிபுச்ச²ஞ்ச வத³ந்தி, ததா² ஞாதும் வட்டதீ’’தி. ந ஹி ஆசரியானம் நாமமத்ததோ பரம்பரஜானனே பயோஜனம் அத்தி². புப்³பா³பரானுஸந்தி⁴தோதி புப்³ப³வசனஸ்ஸ அபரவசனேன ஸஹ அத்த²ஸம்ப³ந்த⁴ஜானனதோ. அத்த²தோதி ஸத்³த³த்த²பிண்ட³த்த²அதி⁴ப்பேதத்தா²தி³தோ. காரணதோதி தத³த்து²பபத்திதோ. ஆசரியபரம்பரந்தி இமஸ்ஸேவ வேவசனம் ‘‘தே²ரவாத³ங்க³’’ந்தி, தே²ரபடிபாடிந்தி அத்தோ². த்³வே தயோ பரிவட்டாதி த்³வே தயோ பரம்பரா.

இமேஹி ச பன தீஹி லக்க²ணேஹீதி ஏத்த² பட²மேன லக்க²ணேன வினயஸ்ஸ ஸுட்டு² உக்³க³ஹிதபா⁴வோ வுத்தோ, து³தியேன தத்த² லஜ்ஜிபா⁴வேன சேவ அசலதாய ச ஸுப்பதிட்டி²ததா, ததியேன பாளிஅட்ட²கதா²ஸு ஸரூபேன அனாக³தானம்பி தத³னுலோமதோ ஆசரியேஹி தி³ன்னனயதோ வினிச்சி²னிதும் ஸமத்த²தா. ஓதிண்ணே வத்து²ஸ்மிந்தி சோத³னாவஸேன வீதிக்கமவத்து²ஸ்மிம் ஸங்க⁴மஜ்ஜே² ஓதிண்ணே. சோத³கேன ச சுதி³தகேன ச வுத்தே வத்தப்³பே³தி ஏவம் ஓதிண்ணவத்து²ம் நிஸ்ஸாய சோத³கேன ‘‘தி³ட்ட²ம் ஸுத’’ந்திஆதி³னா, சுதி³தகேன ‘‘அத்தீ²’’திஆதி³னா ச யம் வத்தப்³ப³ம், தஸ்மிம் வத்தப்³பே³ வுத்தேதி அத்தோ². வத்து² ஓலோகேதப்³ப³ந்தி தஸ்ஸ தஸ்ஸ ஸிக்கா²பத³ஸ்ஸ வத்து² ஓலோகேதப்³ப³ம். ‘‘திணேன வா பண்ணேன வா…பே… யோ ஆக³ச்சே²ய்ய, ஆபத்தி து³க்கடஸ்ஸா’’தி ஹித³ம் நிஸ்ஸக்³கி³யே அஞ்ஞாதகவிஞ்ஞத்திஸிக்கா²பத³ஸ்ஸ (பாரா. 517) வத்து²ஸ்மிம் பஞ்ஞத்தம்.

து²ல்லச்சயது³ப்³பா⁴ஸிதாபத்தீனம் மாதிகாய அனாக³தத்தா ‘‘பஞ்சன்னம் ஆபத்தீனம் அஞ்ஞதர’’ந்தி வுத்தம். திகது³க்கடந்தி ‘‘அனுபஸம்பன்னே உபஸம்பன்னஸஞ்ஞீ உஜ்ஜா²யதி கீ²யதி, ஆபத்தி து³க்கடஸ்ஸா’’திஆதி³னா (பாசி. 106) ஆக³தம் திகது³க்கடம். அஞ்ஞதரம் வா ஆபத்திந்தி ‘‘காலே விகாலஸஞ்ஞீ, ஆபத்தி து³க்கடஸ்ஸ, காலே வேமதிகோ, ஆபத்தி து³க்கடஸ்ஸா’’திஆதி³கம் (பாசி. 250) து³கது³க்கடம் ஸந்தா⁴ய வுத்தம்.

அந்தராபத்திந்தி ஏத்த² தஸ்மிம் தஸ்மிம் ஸிக்கா²பதே³ ஆக³தவத்து²வீதிக்கமம் வினா அஞ்ஞஸ்மிம் வத்து²வீதிக்கமே நிதா³னதோ பபு⁴தி வினீதவத்து²பரியோஸானா அந்தரந்தரா வுத்தா ஆபத்தி. இத⁴ பன ‘‘வத்து²ம் ஓலோகேதீ’’தி விஸும் க³ஹிதத்தா தத³வஸேஸா அந்தராபத்தீதி க³ஹிதா. படிலாதம் உக்கி²பதீதி இத³ம்பி விஸிப்³ப³னஸிக்கா²பதே³ (பாசி. 350) ஆக³தம், தத்த² ட³ய்ஹமானம் அலாதம் அக்³கி³கபாலாதி³தோ ப³ஹி பதிதம் அவிஜ்ஜா²தமேவ படிஉக்கி²பதி, புன யதா²டா²னே ட²பேதீதி அத்தோ². விஜ்ஜா²தம் பன படிக்கி²பந்தஸ்ஸ பாசித்தியமேவ.

அனாபத்திந்தி ஏத்த² அந்தரந்தரா வுத்தா அனாபத்திபி அத்தி², ‘‘அனாபத்தி, பி⁴க்க²வே, இத்³தி⁴மஸ்ஸ இத்³தி⁴விஸயே’’திஆதி³ விய ஸாபி ஸங்க³ய்ஹதி. ஸிக்கா²பத³ந்தரேஸூதி வினீதவத்து²ம் அந்தோகத்வா ஏகேகஸ்மிம் ஸிக்கா²பத³ந்தரே.

பாராஜிகாபத்தீதி ந வத்தப்³ப³ந்தி இத³ம் ஆபன்னபுக்³க³லேன லஜ்ஜித⁴ம்மே ட²த்வா யதா²பூ⁴தம் ஆவிகரணேபி து³ப்³பி³னிச்ச²யம் அதி³ன்னாதா³னாதி³ம் ஸந்தா⁴ய வுத்தம். யம் பன மேது²னாதீ³ஸு விஜானனம், தம் வத்தப்³ப³மேவ. தேனாஹ ‘‘மேது²னத⁴ம்மவீதிக்கமோ ஹீ’’திஆதி³. யோ பன அலஜ்ஜிதாய படிஞ்ஞம் அத³த்வா விக்கே²பம் கரோதி, தஸ்ஸ ஆபத்தி ந ஸக்கா ஓளாரிகாபி வினிச்சி²னிதும். யாவ ஸோ யதா²பூ⁴தம் நாவிகரோதி, ஸங்க⁴ஸ்ஸ ச ஆபத்திஸந்தே³ஹோ ந விக³ச்ச²தி, தாவ நாஸிதகோவ ப⁴விஸ்ஸதி. ஸுகு²மாதி அத்தனோபி து³விஞ்ஞேய்யஸபா⁴வஸ்ஸ லஹுபரிவத்தினோ சித்தஸ்ஸ ஸீக⁴பரிவத்திதாய வுத்தம். ஸுகு²மாதி வா சித்தபரிவத்தியா ஸுகு²மதாய ஸுகு²மா. தேனாஹ ‘‘சித்தலஹுகா’’தி, சித்தம் விய லஹுகாதி அத்தோ². அத² வா சித்தம் லஹு ஸீக⁴பரிவத்தி ஏதேஸந்தி சித்தலஹுகா. தேதி தே வீதிக்கமே. தம்வத்து²கந்தி தே அதி³ன்னாதா³னமனஉஸ்ஸவிக்³க³ஹவீதிக்கமா வத்து² அதி⁴ட்டா²னம் காரணமேதஸ்ஸாதி தம்வத்து²கம்.

யம் ஆசரியோ ப⁴ணதி, தம் கரோஹீதிஆதி³ ஸப்³ப³ம் லஜ்ஜீபேஸலம் குக்குச்சகமேவ ஸந்தா⁴ய வுத்தம். யோ யாதா²வதோ பகாஸேத்வா ஸுத்³தி⁴மேவ க³வேஸதி, தேனபி. பாராஜிகோஸீதி ந வத்தப்³போ³தி அனாபத்திகோடியாபி ஸங்கியமானத்தா வுத்தம். தேனேவ ‘‘பாராஜிகச்சா²யா’’தி வுத்தம். ‘‘ஸீலானி ஸோதே⁴த்வாதி யம்வத்து²கம் குக்குச்சம் உப்பன்னம், தம் அமனஸிகரித்வா அவஸேஸஸீலானி ஸோதே⁴த்வா’’தி ஸாரத்த²தீ³பனியம் (ஸாரத்த². டீ. 2.45) வுத்தம், விமதிவினோத³னியம் (வி. வி. டீ. 1.45) பன ‘‘ஸீலானி ஸோதே⁴த்வாதி யஸ்மிம் வீதிக்கமே பாராஜிகாஸங்கா வத்ததி, தத்த² பாராஜிகாபா⁴வபக்க²ம் க³ஹேத்வா தே³ஸனாவுட்டா²னகா³மினீனம் ஆபத்தீனம் ஸோத⁴னவஸேன ஸீலானி ஸோதே⁴த்வா’’தி. பாகடபா⁴வதோ ஸுக²வலஞ்ஜதாய ச ‘‘த்³வத்திம்ஸாகாரம் தாவ மனஸி கரோஹீ’’தி வுத்தம், உபலக்க²ணவஸேன வா. அஞ்ஞஸ்மிம் கம்மட்டா²னே கதபரிசயேன தமேவ மனஸி காதப்³ப³ம். யம் கிஞ்சி வா அபி⁴ருசிதம் மனஸி காதும் வட்டதேவ. கம்மட்டா²னம் க⁴டயதீதி அந்தரந்தரா க²ண்ட³ம் அத³ஸ்ஸேத்வா சித்தேன ஸத்³தி⁴ம் ஆரம்மணபா⁴வேன சிரகாலம் க⁴டயதி. ஸங்கா²ரா பாகடா ஹுத்வா உபட்ட²ஹந்தீதி விபஸ்ஸனாகம்மட்டா²னிகோ சே, தஸ்ஸ ஸங்கா²ரா பாகடா ஹுத்வா உபட்ட²ஹந்தி.

ஸசே கதபாராஜிகவீதிக்கமோ ப⁴வேய்ய, தஸ்ஸ ஸதிபி அஸரிதுகாமதாய விப்படிஸாரவத்து²வஸேன புனப்புனம் தம் உபட்ட²ஹதீதி சித்தேகக்³க³தம் ந விந்த³தி. தேன வுத்தம் ‘‘கம்மட்டா²னம் ந க⁴டயதீ’’திஆதி³. கம்மட்டா²னம் ந க⁴டயதீதி சித்தக்கோ²பா⁴தி³ப³ஹுலஸ்ஸ ஸுத்³த⁴ஸீலஸ்ஸபி சித்தம் ந ஸமாதி⁴யதி, தம் இத⁴ பாராஜிகமூலந்தி ந க³ஹேதப்³ப³ம். கதபாபமூலகேன விப்படிஸாரேனேவேத்த² சித்தஸ்ஸ அஸமாதி⁴யனம் ஸந்தா⁴ய ‘‘கம்மட்டா²னம் ந க⁴டயதீ’’திஆதி³ வுத்தம். தேனாஹ ‘‘விப்படிஸாரக்³கி³னா’’திஆதி³. அத்தனாதி சித்தேன கரணபூ⁴தேன புக்³க³லோ கத்தா ஜானாதி, பச்சத்தே வா கரணவசனம், அத்தா ஸயம் ஜானாதீதி அத்தோ². அஞ்ஞா ச தே³வதா ஜானந்தீதி ஆரக்க²தே³வதாஹி அஞ்ஞா பரசித்தவிது³னியோ தே³வதா ஜானந்தி.

இமஸ்மிம் டா²னே பண்டி³தேஹி விசாரேதப்³ப³ம் காரணம் அத்தி². கத²ம்? இதா³னி ஏகச்சே வினயத⁴ரா பட²மபாராஜிகவிஸயே வத்து²ம்ஹி ஓதிண்ணே இத்தி²யா வா புரிஸேன வா க³ஹட்டே²ன வா பப்³ப³ஜிதேன வா சோதி³யமானே சுதி³தகம் பி⁴க்கு²ம் புச்சி²த்வா படிஞ்ஞாய அதீ³யமானாய தம் பி⁴க்கு²ம் ஸுஸானே ஏககமேவ ஸயாபேந்தி, ஏவம் ஸயாபியமானோ ஸோ பி⁴க்கு² ஸசே ப⁴யஸந்தாஸவிரஹிதோ ஸப்³ப³ரத்திம் தஸ்மிம் ஸுஸானே ஸயிதும் வா நிஸீதி³தும் வா ஸக்கோதி, தம் ‘‘பரிஸுத்³தோ⁴ ஏஸோ’’தி வினிச்சி²னந்தி. ஸசே பன ப⁴யஸந்தாஸப்பத்தோ ஸப்³ப³ரத்திம் ஸயிதும் வா நிஸீதி³தும் வா ந ஸக்கோதி, தம் ‘‘அஸுத்³தோ⁴’’தி வினிச்சி²னந்தி, தம் அயுத்தம் விய தி³ஸ்ஸதி. கஸ்மாதி சே? அட்ட²கதா²ய விருத்³தோ⁴தி, அட்ட²கதா²யம் து³தியததியபாராஜிகவிஸயே ஏவ ததா²ரூபோ விசாரோ வுத்தோ, ந பட²மசதஉத்த²பாராஜிகவிஸயே. வுத்தஞ்ஹி தத்த² ‘‘மேது²னத⁴ம்மவீதிக்கமோ ஹி உத்தரிமனுஸ்ஸத⁴ம்மவீதிக்கமோ ச ஓளாரிகோ, அதி³ன்னாதா³னமனுஸ்ஸவிக்³க³ஹவீதிக்கமா பன ஸுகு²மா சித்தலஹுகா, தே ஸுகு²மேனேவ ஆபஜ்ஜதி, ஸுகு²மேன ரக்க²தி, தஸ்மா விஸேஸேன தம்வத்து²கம் குக்குச்சம் புச்சி²யமானோ’’தி. டீகாயஞ்ச (ஸாரத்த². டீ. 2.45) வுத்தம் ‘‘தம்வத்து²கந்தி தே அதி³ன்னாதா³னமனுஸ்ஸவிக்³க³ஹவீதிக்கமா வத்து² அதி⁴ட்டா²னம் காரணமேதஸ்ஸாதி தம்வத்து²க’’ந்தி, இத³ம்பி ஏகம் காரணம்.

தத்தா²பி அஞ்ஞே பண்டி³தேபி வினிச்சி²னாபேத்வா தேஸம்பி பாராஜிகச்சா²யாதி³ஸ்ஸனேயேவ ததா² வினிச்ச²யோ காதப்³போ³, ந ஸுத்³த⁴பா⁴வதி³ஸ்ஸனே. வுத்தஞ்ஹி அட்ட²கதா²யம் ‘‘ஆபத்தீதி அவத்வா ‘ஸசஸ்ஸ ஆசரியோ த⁴ரதி…பே… அத² த³ஹரஸ்ஸபி பாராஜிகச்சா²யாவ உபட்டா²தி, தேனபி ‘பாராஜிகோஸீ’தி ந வத்தப்³போ³. து³ல்லபோ⁴ ஹி பு³த்³து⁴ப்பாதோ³, ததோ து³ல்லப⁴தரா பப்³ப³ஜ்ஜா ச உபஸம்பதா³ ச, ஏவம் பன வத்தப்³ப³’’ந்தி, இத³மேகம். நிஸீதா³பியமானோபி விவித்தோகாஸேயேவ நிஸீதா³பேதப்³போ³, ந ஸுஸானே. வுத்தஞ்ஹி தத்த² ‘‘விவித்தம் ஓகாஸம் ஸம்மஜ்ஜித்வா தி³வாவிஹாரம் நிஸீதி³த்வா’’திஆதி³, இத³மேகம். விவித்தோகாஸே நிஸீதா³பியமானோபி தி³வாயேவ நிஸீதா³பேதப்³போ³, ந ரத்திம். ததா² ஹி வுத்தம் ‘‘தி³வஸம் அதிக்கந்தம்பி ந ஜானாதி, ஸோ தி³வஸாதிக்கமே உபட்டா²னம் ஆக³தோ ஏவம் வத்தப்³போ³’’தி, இத³மேகம்.

ஈதி³ஸம் விதா⁴னம் ஸயம் ஆரோசிதே ஏவ விதா⁴தப்³ப³ம், ந பரேஹி சோதி³யமானே. ததா² ஹி வுத்தம் ‘‘ஏவம் கதவீதிக்கமேன பி⁴க்கு²னா ஸயமேவ ஆக³ந்த்வா ஆரோசிதே படிபஜ்ஜிதப்³ப³’’ந்தி. அத² கஸ்மா இதா³னி ஏவம் கரோந்தீதி? கி³ஹீனம் அஸக்கி²கஅட்டகரணே உத³கே நிமுஜ்ஜாபனம் விய மஞ்ஞமானா ஏவம் கரோந்தி. தம்பி மாயாகுஸலா மனுஸ்ஸா விவிதே⁴ஹி உபாயேஹி விதத²ம் கரோந்தி, தஸ்மா ஸச்சம்பி ஹோதி, அஸச்சம்பி ஹோதி. தேனேவ ச காரணேன மஹோஸத⁴பண்டி³தாத³யோ போ³தி⁴ஸத்தா அஸக்கி²கம்பி அட்டம் உத³கனிமுஜ்ஜாபனாதி³னா ந வினிச்சி²னந்தி, உபி⁴ன்னம் வசனம் பரிஸம் கா³ஹாபேத்வா தேஸம் வசனஞ்ச கிரியஞ்ச பரிக்³க³ஹேத்வா ஸச்சஞ்ச விதத²ஞ்ச ஞத்வாவ வினிச்சி²னந்தி. ஸாஸனே பன பி⁴க்கூ² ஸூரஜாதிகாபி ஸந்தி, பீ⁴ருகஜாதிகாபி ஸந்தி. ஸுஸானஞ்ச நாம பகதிமனுஸ்ஸானம்பி ப⁴யஸந்தாஸகரம் ஹோதி, ரத்திகாலே பன அதிவிய ப⁴யானகம் ஹுத்வா உபட்டா²தி, ஏவம்பூ⁴தே ஸுஸானே ரத்தியம் ஏகோ அஸஹாயோ ஹுத்வா நிபஜ்ஜாபியமானோ பீ⁴ருகஜாதிகோ பி⁴க்கு² பரிஸுத்³த⁴ஸீலோபி ஸமானோ கிம் ந பா⁴யேய்ய, கத²ம் ஸப்³ப³ரத்திம் ஸயிதும் வா நிஸீதி³தும் வா ஸக்குணேய்ய, ததா²ரூபம் பி⁴க்கு²ம் ‘‘அபரிஸுத்³தோ⁴’’தி வத³ந்தோ கத²ம் கிச்சகரோ ப⁴விஸ்ஸதி.

அலஜ்ஜீ பன ஸூரஜாதிகோ அத்தனோ வஜ்ஜம் படிச்சா²தே³துகாமோ பா⁴யந்தோபி அபா⁴யந்தோ விய ஹுத்வா ‘‘ஸசே விகாரம் த³ஸ்ஸேஸ்ஸாமி, அனத்த²ம் மே கரிஸ்ஸந்தீ’’தி அனத்த²ப⁴யேன அதி⁴வாஸேத்வா ஸயிதும் வா நிஸீதி³தும் வா ஸக்குணேய்ய, ஏவரூபம் புக்³க³லம் ‘‘பரிஸுத்³தோ⁴’’தி வத³ந்தோ கத²ம் ஸுவினிச்சி²தோ ப⁴விஸ்ஸதீதி. இத³ம்பி ஏகம் காரணம்.

அதா²பி வதே³ய்யும் – யதா² உத³கே நிமுஜ்ஜாபிதமனுஸ்ஸானம் அஸச்சவாதீ³னம் தே³வதானுபா⁴வேன கும்பீ⁴லாத³யோ ஆக³ந்த்வா க³ண்ஹந்தா விய உபட்ட²ஹந்தி, தஸ்மா அஸச்சவாதி³னோ ஸீக⁴ம் ப்லவந்தி, ஸச்சவாதீ³னம் பன ந உபட்ட²ஹந்தி, தஸ்மா தே ஸுகே²ன நிஸீதி³தும் ஸக்கோந்தி, ஏவம் தேஸம்பி பி⁴க்கூ²னம் அபரிஸுத்³த⁴ஸீலானம் தே³வதானுபா⁴வேன ஸீஹப்³யக்³கா⁴த³யோ ஆக³தா விய பஞ்ஞாயந்தி, தஸ்மா தே ஸப்³ப³ரத்திம் ஸயிதும் வா நிஸீதி³தும் வா ந ஸக்கோந்தி. பரிஸுத்³த⁴ஸீலானம் பன ததா² ந பஞ்ஞாயந்தி, தஸ்மா தே ஸப்³ப³ரத்திம் தே³வதாஹி ரக்கி²தா ஹுத்வா ப⁴யஸந்தாஸரஹிதா ஸுஸானே ஸயிதும் வா நிஸீதி³தும் வா ஸக்கோந்தி, ஏவம் தே³வதா ஸக்கி²ம் கத்வா வினிச்சி²தத்தா ஸுவினிச்சி²தமேவ ஹோதீதி, தம்பி ததா² ந ஸக்கா வத்தும். கஸ்மா? அட்ட²கதா²டீகாதீ³ஸு ததா² அவுத்தத்தா. அட்ட²கதா²யஞ்ஹி ‘‘விவித்தம் ஓகாஸம் ஸம்மஜ்ஜித்வா தி³வாவிஹாரம் நிஸீதி³த்வா ஸீலானி ஸோதே⁴த்வா ‘த்³வத்திம்ஸாகாரம் தாவ மனஸிகரோஹீ’தி வத்தப்³போ³. ஸசே தஸ்ஸ அரோக³ம் ஸீலம் கம்மட்டா²னம் க⁴டயதி, ஸங்கா²ரா பாகடா ஹுத்வா உபட்ட²ஹந்தி, உபசாரப்பனாப்பத்தம் விய சித்தம் ஏகக்³க³ம் ஹோதி, தி³வஸம் அதிக்கந்தம்பி ந ஜானாதி…பே… யஸ்ஸ பன ஸீலம் பி⁴ன்னம் ஹோதி, தஸ்ஸ கம்மட்டா²னம் ந க⁴டயதி, பதோதா³பி⁴துன்னம் விய சித்தம் கம்பதி, விப்படிஸாரக்³கி³னா ட³ய்ஹதி, தத்தபாஸாணே நிஸின்னோ விய தங்க²ணஞ்ஞேவ வுட்டா²தீ’’தி ஏத்தகமேவ வுத்தம்.

டீகாயம்பி (ஸாரத்த². டீ. 2.45) ‘‘கம்மட்டா²னம் க⁴டயதீதி அந்தரந்தரா க²ண்ட³ம் அத³ஸ்ஸேத்வா சித்தேன ஸத்³தி⁴ம் ஆரம்மணபா⁴வேன சிரகாலம் க⁴டயதி. ஸங்கா²ரா பாகடா உபட்ட²ஹந்தீதி விபஸ்ஸனாகம்மட்டா²னிகோ சே, தஸ்ஸ ஸங்கா²ரா பாகடா ஹுத்வா உபட்ட²ஹந்தி. ஸசே கதபாராஜிகவீதிக்கமோ ப⁴வேய்ய, தஸ்ஸ ஸதிபி அஸரிதுகாமதாய விப்படிஸாரவத்து²வஸேன புனப்புனம் தம் உபட்ட²ஹதீதி சித்தேகக்³க³தம் ந விந்த³தீ’’தி ஏத்தகமேவ வுத்தம்.

விமதிவினோத³னியம்பி (வி. வி. டீ. 1.45) ‘‘கம்மட்டா²னம் க⁴டயதீதி விப்படிஸாரமூலகேன விக்கே²பேன அந்தரந்தரா க²ண்ட³ம் அத³ஸ்ஸேத்வா பப³ந்த⁴வஸேன சித்தேன ஸங்க⁴டயதி. ஸங்கா²ராதி விபஸ்ஸனாகம்மட்டா²னவஸேன வுத்தம். ஸாபத்திகஸ்ஸ ஹி பகு³ணம்பி கம்மட்டா²னம் ந ஸுட்டு² உபட்டா²தி. பகே³வ பாராஜிகஸ்ஸ. தஸ்ஸ ஹி விப்படிஸாரனின்னதாய சித்தம் ஏகக்³க³ம் ந ஹோதி. ஏகஸ்ஸ பன விதக்கவிக்கே²பாதி³ப³ஹுலஸ்ஸ ஸுத்³த⁴ஸீலஸ்ஸபி சித்தம் ந ஸமாதி⁴யதி, தம் இத⁴ பாராஜிகமூலந்தி ந க³ஹேதப்³ப³ம். கதபாபமூலகேன விப்படிஸாரேனேவேத்த² சித்தஸ்ஸ அஸமாதி⁴யனம் ஸந்தா⁴ய ‘கம்மட்டா²னம் ந க⁴டயதீ’திஆதி³ வுத்த’’ந்தி ஏத்தகமேவ வுத்தம், ந வுத்தம் ‘‘தே³வதானுபா⁴வேனா’’திஆதி³, தஸ்மா யதி³ பு³த்³த⁴ஸாஸனே ஸகா³ரவோ ஸிக்கா²காமோ பி⁴க்கு² து³தியததியபாராஜிகவிஸயே அத்தனோ கஞ்சி வீதிக்கமம் தி³ஸ்வா ‘‘பாராஜிகம் ஆபன்னோ நு கோ² அஹம், ந நு கோ²’’தி ஸம்ஸயபக்க²ந்தோ³ வினயத⁴ரம் உபஸங்கமித்வா தம் வீதிக்கமம் யதா²பூ⁴தம் ஆசிக்கி²த்வா புச்சே²ய்ய, ததோ வினயத⁴ரேன அட்ட²கதா²யம் வுத்தனயேனேவ ‘‘ஸப்³ப³ம் புப்³ப³விதா⁴னம் கத்வா விவித்தம் ஓகாஸம் ஸம்மஜ்ஜித்வா தி³வாவிஹாரம் நிஸீதி³த்வா ஸீலானி ஸோதே⁴த்வா த்³வத்திம்ஸாகாரே தாவ மனஸிகரோஹீ’’தி ஏத்தகமேவ வத்தப்³போ³, ந வத்தப்³போ³ ‘‘ஸுஸானே ஸேய்யம் கப்பேஹீ’’திஆதி³. ஆக³தகாலேபி அட்ட²கதா²யம் ஆக³தனயேனேவ புச்சி²த்வா அட்ட²கதா²யம் ஆக³தனயேனேவஸ்ஸ ஸுத்³தா⁴ஸுத்³த⁴பா⁴வோ வத்தப்³போ³தி த³ட்ட²ப்³ப³ம்.

ஏவம் ஹோது, ஏவம் ஸந்தே இதா³னி பட²மபாராஜிகவிஸயே சோதே³ந்தானம் கத²ம் வினிச்ச²யோ காதப்³போ³தி? சோத³கேன வத்து²ஸ்மிம் ஆரோசிதே சுதி³தகோ புச்சி²தப்³போ³ ‘‘ஸந்தமேதம், நோ’’தி ஏவம் வத்து²ம் உபபரிக்கி²த்வா பூ⁴தேன வத்து²னா சோதே³த்வா ஸாரேத்வா ஞத்திஸம்பதா³ய அனுஸ்ஸாவனஸம்பதா³ய தம் அதி⁴கரணம் வூபஸமேதப்³ப³ம். ஏவம்பி அலஜ்ஜீ நாம ‘‘ஏதம்பி நத்தி², ஏதம்பி நத்தீ²’’தி வதே³ய்ய, படிஞ்ஞம் ந த³தே³ய்ய, அத² கிம் காதப்³ப³ந்தி? ஏவம்பி அலஜ்ஜிஸ்ஸ படிஞ்ஞாய ஏவ ஆபத்தியா காரேதப்³ப³ம் யதா² தம் திபிடகசூளாப⁴யத்தே²ரேனாதி. வுத்தஞ்ஹேதம் அட்ட²கதா²யம் (பாரா. அட்ட². 2.385-386) ‘‘ஏவம் லஜ்ஜினா சோதி³யமானோ அலஜ்ஜீ ப³ஹூஸுபி வத்தூ²ஸு உப்பன்னேஸு படிஞ்ஞம் ந தே³தி, ஸோ ‘நேவ ஸுத்³தோ⁴’தி வத்தப்³போ³, ந ‘அஸுத்³தோ⁴’தி, ஜீவமதகோ நாம ஆமகபூதிகோ நாம சேஸ. ஸசே பனஸ்ஸ அஞ்ஞம்பி தாதி³ஸம் வத்து² உப்பஜ்ஜதி, ந வினிச்சி²தப்³ப³ம், ததா² நாஸிதகோவ ப⁴விஸ்ஸதீ’’திஆதி³.

235. ஏவம் வினயத⁴ரலக்க²ணஞ்ச ச²ட்டா²னஓலோகனஞ்ச விதி³த்வா இதா³னி…பே… வினிச்ச²யோ வேதி³தப்³போ³தி யோஜனா. கிமத்த²ந்தி ஆஹ ‘‘யா ஸா…பே… ஜானனத்த²’’ந்தி. யா ஸா புப்³பே³ வுத்தப்பபே⁴தா³ சோத³னா அத்தி², தஸ்ஸாயேவ ஸம்பத்திவிபத்திஜானனத்த²ம் ஆதி³மஜ்ஜ²பஅயோஸானாதீ³னம் வஸேன வினிச்ச²யோ வேதி³தப்³போ³, ந அவுத்தசோத³னாபபே⁴த³ஜானனத்த²ந்தி அத்தோ². ஸேய்யதி²த³ந்தி புச்ச²னத்தே² நிபாதோ, ஸோ வினிச்ச²யோ கதமோதி அத்தோ².

சோத³னாய கதி மூலானி, கதி வத்தூ²னி, கதி பூ⁴மியோதி ஏத்த² ‘‘கதிஹாகாரேஹீ’’திபி வத்தப்³ப³ம். வுத்தஞ்ஹேதம் பரிவாரே (பரி. 362) சோத³னாகண்டே³ ‘‘சோத³னாய கதி மூலானி, கதி வத்தூ²னி, கதி பூ⁴மியோ, கதிஹாகாரேஹி சோதே³தீ’’தி. மேத்தசித்தோ வக்கா²மி, நோ தோ³ஸந்தரோதி ஏதஸ்ஸபி பரதோ ‘‘சோத³னாய இமா பஞ்ச பூ⁴மியோ. கதமேஹி த்³வீஹாகாரேஹி சோதே³தி, காயேன வா சோதே³தி, வாசாய வா சோதே³தி, இமேஹி த்³வீஹாகாரேஹி சோதே³தீ’’தி வத்தப்³ப³ம். கஸ்மா? சோத³னாகண்டே³ (பரி. 362) ததா² விஜ்ஜமானதோதி. பன்னரஸஸு த⁴ம்மேஸு பதிட்டா²தப்³ப³ந்தி பரிஸுத்³த⁴காயஸமாசாரதா, பரிஸுத்³த⁴வசீஸமாசாரதா, மேத்தசித்தே பச்சுபட்டி²ததா, ப³ஹுஸ்ஸுததா, உப⁴யபாதிமோக்க²ஸ்வாக³ததா, காலேன வசனதா, பூ⁴தேன வசனதா, ஸண்ஹேன வசனதா, அத்த²ஸஞ்ஹிதேன வசனதா, மேத்தசித்தோ ஹுத்வா வசனதா, காருஞ்ஞதா, ஹிதேஸிதா, அனுகம்பதா, ஆபத்திவுட்டா²னதா, வினயபுரேக்கா²ரதாதி. வுத்தஞ்ஹேதம் உபாலிபஞ்சகே (பரி. 436) ‘‘சோத³கேனுபாலி பி⁴க்கு²னா பரம் சோதே³துகாமேன ஏவம் பச்சவேக்கி²தப்³ப³ம் – பரிஸுத்³த⁴காயஸமாசாரோ நு கோ²ம்ஹி…பே… பரிஸுத்³த⁴வசீஸமாசாரோ நு கோ²ம்ஹி…பே… மேத்தம் நு கோ² மே சித்தம் பச்சுபட்டி²தம் ஸப்³ரஹ்மசாரீஸு…பே… ப³ஹுஸ்ஸுதோ நு கோ²ம்ஹி ஸுதத⁴ரோ ஸுதஸன்னிசயோ…பே… உப⁴யானி கோ² மே பாதிமோக்கா²னி வித்தா²ரேன ஸ்வாக³தானி…பே… காலேன வக்கா²மி, நோ அகாலேன, பூ⁴தேன வக்கா²மி, நோ அபூ⁴தேன, ஸண்ஹேன வக்கா²மி, நோ ப²ருஸேன, அத்த²ஸஞ்ஹிதேன வக்கா²மி, நோ அனத்த²ஸஞ்ஹிதேன, மேத்தசித்தோ வக்கா²மி, நோ தோ³ஸந்தரோ…பே… காருஞ்ஞதா, ஹிதேஸிதா, அனுகம்பதா, ஆபத்திவுட்டா²னதா, வினயபுரேக்கா²ரதா’’தி.

தத்த² காருஞ்ஞதாதி காருணிகபா⁴வோ. இமினா கருணா ச கருணாபுப்³ப³பா⁴கோ³ ச த³ஸ்ஸிதோ. ஹிதேஸிதாதி ஹிதக³வேஸனதா. அனுகம்பதாதி தேன ஹிதேன ஸம்யோஜனதா. ஆபத்திவுட்டா²னதாதி ஆபத்திதோ வுட்டா²பேத்வா ஸுத்³த⁴ந்தே பதிட்டா²பனதா. வத்து²ம் சோதே³த்வா ஸாரேத்வா படிஞ்ஞம் ஆரோபேத்வா யதா²படிஞ்ஞாய கம்மகரணம் வினயபுரேக்கா²ரதா நாம. அமூலகம்பி ஸமூலகம்பி ‘‘மூல’’ந்தி க³ஹேத்வா வத³ந்தீதி ஆஹ ‘‘த்³வே மூலானீ’’தி. காலேன வக்கா²மீதிஆதீ³ஸு ஏகோ ஏகம் ஓகாஸம் காரேத்வா சோதே³ந்தோ காலேன வத³தி நாம. ஸங்க⁴மஜ்ஜே² க³ணமஜ்ஜே² ஸலாகக்³க³யாகு³அக்³க³விதக்கமாளகபி⁴க்கா²சாரமக்³க³ஆஸனஸாலாதீ³ஸு, உபட்டா²கேஹி பரிவாரிதக்க²ணே வா சோதே³ந்தோ அகாலேன வத³தி நாம. தச்சே²ன வத்து²னா சோதே³ந்தோ பூ⁴தேன வத³தி நாம. துச்சே²ன சோதே³ந்தோ அபூ⁴தேன வத³தி நாம. ‘‘அம்போ⁴ மஹல்லக பரிஸாவசர பம்ஸுகூலிக த⁴ம்மகதி²க பதிரூபம் தவ இத³’’ந்தி வத³ந்தோ ப²ருஸேன வத³தி நாம. ‘‘ப⁴ந்தே, மஹல்லகா பரிஸாவசரா பம்ஸுகூலிகா த⁴ம்மகதி²கா பதிரூபம் தும்ஹாகம் இத³’’ந்தி வத³ந்தோ ஸண்ஹேன வத³தி நாம. காரணனிஸ்ஸிதம் கத்வா வத³ந்தோ அத்த²ஸஞ்ஹிதேன வத³தி நாம. மேத்தசித்தோ வக்கா²மி, நோ தோ³ஸந்தரோதி மேத்தசித்தம் உபட்டா²பேத்வா வக்கா²மி, ந து³ட்ட²சித்தோ ஹுத்வா. ஸச்சே ச அகுப்பே சாதி வசீஸச்சே ச அகுப்பதாய ச. சுதி³தகேன ஹி ஸச்சஞ்ச வத்தப்³ப³ம், கோபோ ச ந காதப்³போ³, அத்தனா ச ந குச்சி²தப்³ப³ம், பரோ ச ந க⁴ட்டேதப்³போ³தி அத்தோ².

இமஸ்மிம் டா²னே ‘‘ஸங்கே⁴ன ஓதிண்ணானோதிண்ணம் ஜானிதப்³ப³ம் – அனுவிஜ்ஜகேன யேன த⁴ம்மேன யேன வினயேன யேன ஸத்து²ஸாஸனேன தம் அதி⁴கரணம் வூபஸம்மதி, ததா² தம் அதி⁴கரணம் வூபஸமேதப்³ப³’’ந்தி வத்தப்³ப³ம். வுத்தஞ்ஹேதம் சோத³னாகண்டே³ (பரி. 363) ‘‘சோத³கேன கத²ம் படிபஜ்ஜிதப்³ப³ம்? சுதி³தகேன கத²ம் படிபஜ்ஜிதப்³ப³ம்? ஸங்கே⁴ன கத²ம் படிபஜ்ஜிதப்³ப³ம்? அனுவிஜ்ஜகேன கத²ம் படிபஜ்ஜிதப்³ப³ம்? சோத³கேன கத²ம் படிபஜ்ஜிதப்³ப³ந்தி? சோத³கேன பஞ்சஸு த⁴ம்மேஸு பதிட்டா²ய பரோ சோதே³தப்³போ³. காலேன வக்கா²மி நோ அகாலேன, பூ⁴தேன வக்கா²மி நோ அபூ⁴தேன, ஸண்ஹேன வக்கா²மி நோ ப²ருஸேன, அத்த²ஸஞ்ஹிதேன வக்கா²மி நோ அனத்த²ஸஞ்ஹிதேன, மேத்தசித்தோ வக்கா²மி நோ தோ³ஸந்தரோதி. சோத³கேன ஏவம் படிபஜ்ஜிதப்³ப³ம். சுதி³தகேன கத²ம் படிபஜ்ஜிதப்³ப³ந்தி? சுதி³தகேன த்³வீஸு த⁴ம்மேஸு பதிட்டா²தப்³ப³ம் ஸச்சே ச அகுப்பே ச. சுதி³தகேன ஏவம் படிபஜ்ஜிதப்³ப³ம். ஸங்கே⁴ன கத²ம் படிபஜ்ஜிதப்³ப³ந்தி? ஸங்கே⁴ன ஓதிண்ணானோதிண்ணம் ஜானிதப்³ப³ம். ஸங்கே⁴ன ஏவம் படிபஜ்ஜிதப்³ப³ம். அனுவிஜ்ஜகேன கத²ம் படிபஜ்ஜிதப்³ப³ந்தி? அனுவிஜ்ஜகேன யேன த⁴ம்மேன யேன வினயேன யேன ஸத்து²ஸாஸனேன தம் அதி⁴கரணம் வூபஸம்மதி, ததா² தம் அதி⁴கரணம் வூபஸமேதப்³ப³ம். அனுவிஜ்ஜகேன ஏவம் படிபஜ்ஜிதப்³ப³’’ந்தி.

அட்ட²கதா²யம்பி (பரி. அட்ட². 362-363) ‘‘சோத³னாய கோ ஆதீ³திஆதி³புச்சா²னம் விஸ்ஸஜ்ஜனே ஸச்சே அகுப்பே சாதி ஏத்த² ஸச்சே பதிட்டா²தப்³ப³ம் அகுப்பே ச, யம் கதம் வா அகதம் வா, ததே³வ வத்தப்³ப³ம், ந சோத³கே வா அனுவிஜ்ஜகே வா ஸங்கே⁴ வா கோபோ உப்பாதே³தப்³போ³. ஓதிண்ணானோதிண்ணம் ஜானிதப்³ப³ந்தி ஓதிண்ணஞ்ச அனோதிண்ணஞ்ச வசனம் ஜானிதப்³ப³ம். தத்ராயம் ஜானனவிதி⁴ – ஏத்தகா சோத³கஸ்ஸ புப்³ப³கதா², ஏத்தகா பச்சி²மகதா², ஏத்தகா சுதி³தகஸ்ஸ புப்³ப³கதா², ஏத்தகா பச்சி²மகதா²தி ஜானிதப்³பா³. சோத³கஸ்ஸ பமாணம் க³ண்ஹிதப்³ப³ம், சுதி³தகஸ்ஸ பமாணம் க³ண்ஹிதப்³ப³ம், அனுவிஜ்ஜகஸ்ஸ பமாணம் க³ண்ஹிதப்³ப³ம். அனுவிஜ்ஜகோ அப்பமத்தகம்பி அஹாபேந்தோ ‘ஆவுஸோ, ஸமன்னாஹரித்வா உஜும் கத்வா ஆஹரா’தி வத்தப்³போ³, ஸங்கே⁴ன ஏவம் படிபஜ்ஜிதப்³ப³ம். யேன த⁴ம்மேன யேன வினயேன யேன ஸத்து²ஸாஸனேன தம் அதி⁴கரணம் வூபஸம்மதீதி ஏத்த² த⁴ம்மோதி பூ⁴தம் வத்து². வினயோதி சோத³னா சேவ ஸாரணா ச. ஸத்து²ஸாஸனந்தி ஞத்திஸம்பதா³ சேவ அனுஸ்ஸாவனஸம்பதா³ ச. ஏதேன ஹி த⁴ம்மேன ச வினயேன ச ஸத்து²ஸாஸனேன ச அதி⁴கரணம் வூபஸம்மதி, தஸ்மா அனுவிஜ்ஜகேன பூ⁴தேன வத்து²னா சோதே³த்வா ஆபத்திம் ஸாரேத்வா ஞத்திஸம்பதா³ய சேவ அனுஸ்ஸாவனஸம்பதா³ய ச தம் அதி⁴கரணம் வூபஸமேதப்³ப³ம், அனுவிஜ்ஜகேன ஏவம் படிபஜ்ஜிதப்³ப³’’ந்தி ஆக³தம், தஸ்மா வத்தப்³ப³மேத்தகம் த்³வயந்தி.

ஏவம் ஏகதே³ஸேன சோத³னாகண்ட³னயம் த³ஸ்ஸேத்வா இதா³னி ஏகதே³ஸேனேவ மஹாஸங்கா³மனயம் த³ஸ்ஸேந்தோ ‘‘அனுவிஜ்ஜகேன சோத³கோ புச்சி²தப்³போ³’’திஆதி³மாஹ. தத்த² யம் கோ² த்வம், ஆவுஸோ, இமம் பி⁴க்கு²ம் சோதே³ஸி, கிம்ஹி நம் சோதே³ஸீதி சோத³னாஸாமஞ்ஞதோ வுத்தம், பாளியம் (மஹாவ. 237) பன பவாரணட்ட²பனவஸேன சோத³னம் ஸந்தா⁴ய ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ பவாரணம் ட²பேஸீ’’தி வுத்தம். ஸேஸம் ஸுவிஞ்ஞேய்யமேவ.

ஏவம் ஏகதே³ஸேன மஹாஸங்கா³மனயம் த³ஸ்ஸேத்வா இதா³னி ஏகதே³ஸேனேவ சூளஸங்கா³மனயம் த³ஸ்ஸேதும் ‘‘ஸங்கா³மாவசரேன பி⁴க்கு²னா’’திஆதி³மாஹ. தத்த² ஸங்கா³மாவசரேன பி⁴க்கு²னாதி ஸங்கா³மோ வுச்சதி அதி⁴கரணவினிச்ச²யத்தா²ய ஸங்க⁴ஸன்னிபாதோ. தத்ர ஹி அத்தபச்சத்தி²கா சேவ ஸாஸனபச்சத்தி²கா ச உத்³த⁴ம்மம் உப்³பி³னயம் ஸத்து²ஸாஸனம் தீ³பேந்தா ஸமோஸரந்தி வேஸாலிகா வஜ்ஜிபுத்தகா விய. யோ பி⁴க்கு² தேஸம் பச்சத்தி²கானம் லத்³தி⁴ம் மத்³தி³த்வா ஸகவாத³தீ³பனத்தா²ய தத்த² அவசரதி, அஜ்ஜோ²கா³ஹேத்வா வினிச்ச²யம் பவத்தேதி, ஸோ ஸங்கா³மாவசரோ நாம யஸத்தே²ரோ விய, தேன ஸங்கா³மாவசரேன பி⁴க்கு²னா ஸங்க⁴ம் உபஸங்கமந்தேன நீசசித்தேன ஸங்கோ⁴ உபஸங்கமிதப்³போ³. நீசசித்தேனாதி மானத்³த⁴ஜம் நிபாதேத்வா நிஹதமானசித்தேன. ரஜோஹரணஸமேனாதி பாத³புஞ்ச²னஸமேன, யதா² ரஜோஹரணஸ்ஸ ஸம்கிலிட்டே² வா அஸம்கிலிட்டே² வா பாதே³ புஞ்சி²யமானே நேவ ராகோ³ ந தோ³ஸோ, ஏவம் இட்டா²னிட்டே²ஸு அரஜ்ஜந்தேன அது³ஸ்ஸந்தேனாதி அத்தோ². யதா²பதிரூபே ஆஸனேதி யதா²பதிரூபம் ஆஸனம் ஞத்வா அத்தனோ பாபுணனட்டா²னே தே²ரானம் பி⁴க்கூ²னம் பிட்டி²ம் அத³ஸ்ஸேத்வா நிஸீதி³தப்³ப³ம்.

அனானாகதி²கேனாதி நானாவித⁴ம் தம் தம் அனத்த²கத²ம் அகதே²ந்தேன. அதிரச்சா²னகதி²கேனாதி தி³ட்ட²ஸுதமுதம்பி ராஜகதா²தி³கம் திரச்சா²னகத²ம் அகதே²ந்தேன. ஸாமம் வா த⁴ம்மோ பா⁴ஸிதப்³போ³தி ஸங்க⁴ஸன்னிபாதட்டா²னே கப்பியாகப்பியஸன்னிஸ்ஸிதா வா ரூபாரூபபரிச்சே²த³ஸமத²சாரவிபஸ்ஸனாசாரட்டா²னனிஸஜ்ஜவத்தாதி³னிஸ்ஸிதா வா கதா² த⁴ம்மோ நாம. ஏவரூபோ த⁴ம்மோ ஸயம் வா பா⁴ஸிதப்³போ³, பரோ வா அஜ்ஜே²ஸிதப்³போ³. யோ பி⁴க்கு² ததா²ரூபிம் கத²ம் கதே²தும் பஹோதி, ஸோ வத்தப்³போ³ ‘‘ஆவுஸோ, ஸங்க⁴மஜ்ஜ²ம்ஹி பஞ்ஹே உப்பன்னே த்வம் கதே²ய்யாஸீ’’தி. அரியோ வா துண்ஹீபா⁴வோ நாதிமஞ்ஞிதப்³போ³தி அரியா துண்ஹீ நிஸீத³ந்தா ந பா³லபுது²ஜ்ஜனா விய நிஸீத³ந்தி, அஞ்ஞதரம் கம்மட்டா²னம் க³ஹேத்வாவ நிஸீத³ந்தி. இதி கம்மட்டா²னமனஸிகாரவஸேன துண்ஹீபா⁴வோ அரியோ துண்ஹீபா⁴வோ நாம, ஸோ நாதிமஞ்ஞிதப்³போ³, ‘‘கிம் கம்மட்டா²னானுயோகே³னா’’தி நாவஜானிதப்³போ³, அத்தனோ பதிரூபம் கம்மட்டா²னம் க³ஹேத்வாவ நிஸீதி³தப்³ப³ந்தி அத்தோ².

ந உபஜ்ஜா²யோ புச்சி²தப்³போ³தி ‘‘கோ நாம துய்ஹம் உபஜ்ஜா²யோ’’தி ந புச்சி²தப்³போ³. ஏஸ நயோ ஸப்³ப³த்த². ந ஜாதீதி ‘‘க²த்தியஜாதியோ த்வம் ப்³ராஹ்மணஜாதியோ’’தி ஏவம் ஜாதி ந புச்சி²தப்³பா³. ந ஆக³மோதி ‘‘தீ³க⁴பா⁴ணகோ த்வம் மஜ்ஜி²மபா⁴ணகோ’’தி ஏவம் ஆக³மோ ந புச்சி²தப்³போ³. குலபதே³ஸோபி க²த்தியகுலாதி³வஸேனேவ வேதி³தப்³போ³. அத்ரஸ்ஸ பேமம் வா தோ³ஸோ வாதி தத்ர புக்³க³லே ஏதேஸம் காரணானம் அஞ்ஞதரவஸேன பேமம் வா ப⁴வேய்ய தோ³ஸோ வா.

நோ பரிஸகப்பிகேனாதி பரிஸகப்பகேன பரிஸானுவிதா⁴யகேன ந ப⁴விதப்³ப³ம், யம் பரிஸாய ருச்சதி, ததே³வ சேதேத்வா கப்பேத்வா ந கதே²தப்³ப³ந்தி அத்தோ². ந ஹத்த²முத்³தா³ த³ஸ்ஸேதப்³பா³தி கதே²தப்³பே³ ச அகதே²தப்³பே³ ச ஸஞ்ஞாஜனனத்த²ம் ஹத்த²விகாரோ ந காதப்³போ³.

அத்த²ம் அனுவிதி⁴யந்தேனாதி வினிச்ச²யபடிவேத⁴மேவ ஸல்லக்கே²ந்தேன, ‘‘இத³ம் ஸுத்தம் உபலப்³ப⁴தி, இமஸ்மிம் வினிச்ச²யே இத³ம் வக்கா²மீ’’தி ஏவம் பரிதுலயந்தேன நிஸீதி³தப்³ப³ந்தி அத்தோ². ந ச ஆஸனா வுட்டா²தப்³ப³ந்தி ந ஆஸனா வுட்டா²ய ஸன்னிபாதமண்ட³லே விசரிதப்³ப³ம். வினயத⁴ரே ஹி உட்டி²தே ஸப்³பா³ பரிஸா வுட்ட²ஹந்தி, தஸ்மா ந வுட்டா²தப்³ப³ம். ந வீதிஹாதப்³ப³ந்தி ந வினிச்ச²யோ ஹாபேதப்³போ³. ந கும்மக்³கோ³ ஸேவிதப்³போ³தி ந ஆபத்தி தீ³பேதப்³பா³. அஸாஹஸிகேன ப⁴விதப்³ப³ந்தி ந ஸஹஸா காரினா ப⁴விதப்³ப³ம், ந ஸஹஸா து³ருத்தவசனம் கதே²தப்³ப³ந்தி அத்தோ². வசனக்க²மேனாதி து³ருத்தவாசம் க²மனஸீலேன. ஹிதபரிஸக்கினாதி ஹிதேஸினா ஹிதக³வேஸினா கருணா ச கருணாபுப்³ப³பா⁴கோ³ ச உபட்டா²பேதப்³போ³தி அயம் பத³த்³வயேபி அதி⁴ப்பாயோ. அனஸுருத்தேனாதி ந அஸுருத்தேன, அஸுருத்தம் வுச்சதி விக்³கா³ஹிககதா²ஸங்கா²தம் அஸுந்த³ரவசனம், தம் ந கதே²தப்³ப³ந்தி அத்தோ². அத்தா பரிக்³க³ஹேதப்³போ³தி ‘‘வினிச்சி²னிதும் வூபஸமேதும் ஸக்கி²ஸ்ஸாமி நு கோ², நோ’’தி ஏவம் அத்தா பரிக்³க³ஹேதப்³போ³, அத்தனோ பமாணம் ஜானிதப்³ப³ந்தி அத்தோ². பரோ பரிக்³க³ஹேதப்³போ³தி ‘‘லஜ்ஜியா நு கோ² அயம் பரிஸா ஸக்கா ஸஞ்ஞாபேதும், உதா³ஹு நோ’’தி ஏவம் பரோ பரிக்³க³ஹேதப்³போ³. சோத³கோ பரிக்³க³ஹேதப்³போ³தி ‘‘த⁴ம்மசோத³கோ நு கோ², நோ’’தி ஏவம் பரிக்³க³ஹேதப்³போ³. சுதி³தகோ பரிக்³க³ஹேதப்³போ³தி ‘‘த⁴ம்மசுதி³தகோ நு கோ², நோ’’தி ஏவம் பரிக்³க³ஹேதப்³போ³. அத⁴ம்மசோத³கோ பரிக்³க³ஹேதப்³போ³தி தஸ்ஸ பமாணம் ஜானிதப்³ப³ம். ஸேஸேஸுபி ஏஸேவ நயோ.

வுத்தம் அஹாபேந்தேனாதி சோத³கசுதி³தகேஹி வுத்தவசனம் அஹாபேந்தேன. அவுத்தம் அபகாஸேந்தேனாதி அனோஸடம் வத்து²ம் அபகாஸேந்தேன. மந்தோ³ ஹாஸேதப்³போ³தி மந்தோ³ மோமூள்ஹோ பக்³க³ண்ஹிதப்³போ³, ‘‘நனு த்வம் குலபுத்தோ’’தி உத்தேஜேத்வா அனுயோக³வத்தம் கதா²பேத்வா தஸ்ஸ அனுயோகோ³ க³ண்ஹிதப்³போ³. பீ⁴ரு அஸ்ஸாஸேதப்³போ³தி யஸ்ஸ ஸங்க⁴மஜ்ஜ²ம் வா க³ணமஜ்ஜ²ம் வா அனோஸடபுப்³ப³த்தா ஸாரஜ்ஜம் உப்பஜ்ஜதி, தாதி³ஸோ ‘‘மா பா⁴யி, விஸ்ஸத்தோ² கத²யாஹி, மயம் தே உபத்த²ம்பா⁴ ப⁴விஸ்ஸாமா’’தி வத்வாபி அனுயோக³வத்தம் கதா²பேதப்³போ³. சண்டோ³ நிஸேதே⁴தப்³போ³தி அபஸாரேதப்³போ³ தஜ்ஜேதப்³போ³. அஸுசி விபா⁴வேதப்³போ³தி அலஜ்ஜிம் பகாஸேத்வா ஆபத்திம் தே³ஸாபேதப்³போ³. உஜுமத்³த³வேனாதி யோ பி⁴க்கு² உஜு ஸீலவா காயவங்காதி³ரஹிதோ, ஸோ மத்³த³வேனேவ உபசரிதப்³போ³. த⁴ம்மேஸு ச புக்³க³லேஸு சாதி ஏத்த² யோ த⁴ம்மக³ருகோ ஹோதி, ந புக்³க³லக³ருகோ, அயமேவ த⁴ம்மேஸு ச புக்³க³லேஸு ச மஜ்ஜ²த்தோதி வேதி³தப்³போ³. ஸேஸம் ஸுவிஞ்ஞேய்யமேவ.

இதி வினயஸங்க³ஹஸம்வண்ணனாபூ⁴தே வினயாலங்காரே

சோத³னாதி³வினிச்ச²யகதா²லங்காரோ நாம

ஏகதிம்ஸதிமோ பரிச்சே²தோ³.