32. க³ருகாபத்திவுட்டா²னவினிச்ச²யகதா²

படிச்ச²ன்னபரிவாஸகதா²

236. ஏவம் சோத³னாதி³வினிச்ச²யம் கதே²த்வா இதா³னி க³ருகாபத்திவுட்டா²னவினிச்ச²யம் கதே²தும் ‘‘க³ருகாபத்திவுட்டா²ன’’ந்திஆதி³மாஹ. தத்த² க³ரு அலஹுகம் படிகரணம் ஏதிஸ்ஸா ஆபத்தியாதி க³ருகா, ஆபஜ்ஜிதப்³பா³தி ஆபத்தி, க³ருகா ச ஸா ஆபத்தி சாதி க³ருகாபத்தி, வுட்ட²ஹதே வுட்டா²னம், க³ருகாபத்தியா வுட்டா²னம் க³ருகாபத்தி வுட்டா²னம். கிம் தம்? ஸங்கா⁴தி³ஸேஸாபத்திதோ பரிஸுத்³த⁴பா⁴வோ. தேனாஹ ‘‘பரிவாஸமானத்தாதீ³ஹி வினயகம்மேஹி க³ருகாபத்திதோ வுட்டா²ன’’ந்தி. கிஞ்சாபி சதுப்³பி³தோ⁴ பரிவாஸோ, அப்படிச்ச²ன்னபரிவாஸோ பன இத⁴ நாதி⁴ப்பேதோதி ஆஹ ‘‘திவிதோ⁴ பரிவாஸோ’’தி. ததா² ஹி வுத்தம் ஸமந்தபாஸாதி³காயம் (சூளவ. அட்ட². 75) ‘‘தத்த² சதுப்³பி³தோ⁴ பரிவாஸோ – அப்படிச்ச²ன்னபரிவாஸோ படிச்ச²ன்னபரிவாஸோ ஸுத்³த⁴ந்தபரிவாஸோ ஸமோதா⁴னபரிவாஸோதி. தேஸு ‘யோ ஸோ, பி⁴க்க²வே, அஞ்ஞோபி அஞ்ஞதித்தி²யபுப்³போ³ இமஸ்மிம் த⁴ம்மவினயே ஆகங்க²தி பப்³ப³ஜ்ஜம், ஆகங்க²தி உபஸம்பத³ம், தஸ்ஸ சத்தாரோ மாஸே பரிவாஸோ தா³தப்³போ³’தி ஏவம் மஹாக²ந்த⁴கே (மஹாவ. 86) வுத்தோ தித்தி²யபரிவாஸோ அப்படிச்ச²ன்னபரிவாஸோ நாம. தத்த² யம் வத்தப்³ப³ம், தம் வுத்தமேவ. அயம் பன இத⁴ அனதி⁴ப்பேதோ’’தி. இதோ பரம் அட்ட²கதா²யம் வுத்தனயேனேவ ஸுவிஞ்ஞேய்யோதி தஸ்மா து³ப்³பி³ஞ்ஞேய்யட்டா²னேயேவ வண்ணயிஸ்ஸாம.

237. ஏவம் யோ யோ ஆபன்னோ ஹோதி, தஸ்ஸ தஸ்ஸ நாமம் க³ஹேத்வா கம்மவாசா காதப்³பா³தி ஏதேன பாளியம் ஸப்³ப³ஸாதா⁴ரணவஸேன ‘‘ஸுணாது மே, ப⁴ந்தே, ஸங்கோ⁴, அயம் இத்த²ன்னாமோ பி⁴க்கூ²’’தி ச ‘‘யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமஸ்ஸ பி⁴க்கு²னோ’’தி ச ஆக³தேபி கம்மவாசாப⁴ணனகாலே ததா² அப⁴ணித்வா ‘‘அயம் பு³த்³த⁴ரக்கி²தோ பி⁴க்கூ²’’தி ச ‘‘இமஸ்ஸ பு³த்³த⁴ரக்கி²தஸ்ஸ பி⁴க்கு²னோ’’தி ச ஏவம் ஸகஸகனாமம் உத்³த⁴ரித்வாவ கம்மவாசா காதப்³பா³தி த³ஸ்ஸேதி.

மாளகஸீமாயமேவ வத்தம் ஸமாதா³தப்³ப³ம், ந ததோ ப³ஹி. கஸ்மா? ‘‘அஞ்ஞத்த² கம்மவாசா அஞ்ஞத்த² ஸமாதா³ன’’ந்தி வத்தப்³ப³தோ³ஸப்பஸங்க³தோ. அஸமாதி³ன்னவத்தஸ்ஸ ஆரோசனாஸம்ப⁴வதோ, மாளகஸீமாய ஸன்னிபதிதானம் பி⁴க்கூ²னம் ஏகஸ்ஸபி அனாரோசனே ஸதி ரத்திச்சே²த³ஸம்ப⁴வதோ ச. பரிவாஸம் ஸமாதி³யாமி, வத்தம் ஸமாதி³யாமீதி இமேஸு த்³வீஸு பதே³ஸு ஏகேகேன வா உபோ⁴ஹி பதே³ஹி வா ஸமாதா³தப்³ப³ம். கத²ம் விஞ்ஞாயதீதி சே? ‘‘ஏகபதே³னபி சேத்த² நிக்கி²த்தோ ஹோதி பரிவாஸோ, த்³வீஹி பன ஸுனிக்கி²த்தோயேவ, ஸமாதா³னேபி ஏஸேவ நயோ’’தி வக்க²மானத்தா. ஸமாதி³யித்வா தத்தே²வ ஸங்க⁴ஸ்ஸ ஆரோசேதப்³ப³ம், ந தத்த² அனாரோசேத்வா அஞ்ஞத்த² க³ந்தப்³ப³ம். கஸ்மா? வுட்டி²தாய பரிஸாய புன ஸன்னிபாதேதும் து³க்கரத்தா, ஏகஸ்ஸபி பி⁴க்கு²னோ அனாரோசேத்வா அருணுட்டா²பனே ஸதி ரத்திச்சே²த³கரத்தா.

ஆரோசேந்தேன ஏவம் ஆரோசேதப்³ப³ந்தி ஸம்ப³ந்தோ⁴. ‘‘அஹம் ப⁴ந்தே…பே… ஸங்கோ⁴ தா⁴ரேதூ’’தி ஏத்தகமேவ வத்வா யாசனே விய ‘‘து³தியம்பி ததியம்பீ’’தி அவுத்தத்தா அச்சாயிககரணே ஸதி ஏகவாரம் ஆரோசிதேபி உபபன்னமேவாதி த³ட்ட²ப்³ப³ம். வேதி³யாமஹம் ப⁴ந்தே, வேதி³யதீதி மம் ஸங்கோ⁴ தா⁴ரேதூதி ஏத்த² ‘‘வேதி³யாமீதி சித்தேன ஸம்படிச்சி²த்வா ஸுக²ம் அனுப⁴வாமி, ந தப்பச்சயா அஹம் து³க்கி²தோதி அதி⁴ப்பாயோ’’தி ஸாரத்த²தீ³பனியம் (ஸாரத்த². டீ. சூளவக்³க³ 3.97) வுத்தம். ஏத்த² ச ‘‘ஸுக²ம் வேதே³மி வேத³ன’’ந்திஆதீ³ஸு விய பி-ஸத்³தோ³ அனுப⁴வனத்தோ² ஹோதி. வஜிரபு³த்³தி⁴டீகாயம் (வஜிர. டீ. சூளவக்³க³ 97) பன ‘‘வேதி³யாமீதி ஜானேமி, சித்தேன ஸம்படிச்சி²த்வா ஸுக²ம் அனுப⁴வாமி, ந தப்பச்சயா அஹம் து³க்கி²தோதி அதி⁴ப்பாயோதி லிகி²த’’ந்தி வுத்தம். ஏத்த² பன ‘‘தீ³பங்கரோ லோகவிதூ³’’திஆதீ³ஸு விய ஞாணத்தோ² அனுப⁴வனத்தோ² ச. விமதிவினோத³னியம் (வி. வி. டீ. சூளவக்³க³ 2.97) பன ‘‘வேதி³யாமஹந்தி ஜானாபேமஹம், ஆரோசேமீதி அத்தோ², அனுப⁴வாமீதிபிஸ்ஸ அத்த²ம் வத³ந்தி. புரிமம் பன பஸம்ஸந்தி ஆரோசனவசனத்தா’’தி. ஏத்த² து –

‘‘ஸம்பன்னம் ஸாலிகேதா³ரம், ஸுவா கா²த³ந்தி ப்³ராஹ்மண;

படிவேதே³மி தே ப்³ரஹ்மே, ந நம் வாரேதுமுஸ்ஸஹே’’தி. –

ஆதீ³ஸு விய ஆரோசனத்தோ²தி த³ட்ட²ப்³போ³.

ஆரோசேத்வா…பே… நிக்கி²பிதப்³ப³ந்தி து³க்கடபரிமோசனத்த²ம் வுத்தம். கேசி பன ‘‘தத³ஹேவ புன வத்தம் ஸமாதி³யித்வா அருணம் உட்டா²பேதுகாமஸ்ஸ ரத்திச்சே²த³பரிஹாரத்த²ம்பீ’’தி வத³ந்தி. யஸ்ஸ மாளகே நாரோசிதம், தஸ்ஸ ஆரோசேத்வா நிக்கி²பிதப்³ப³ம். யஸ்ஸ ஆரோசிதம், தஸ்ஸ புன ஆரோசனகிச்சம் நத்தி², கேவலம் நிக்கி²பிதப்³ப³மேவ. ‘‘ஸபா⁴கா³ பி⁴க்கூ² வஸந்தீ’’தி வுத்தத்தா விஸபா⁴கா³னம் வஸனட்டா²னே வத்தம் அஸமாதி³யித்வா ப³ஹி ஏவ காதும்பி வட்டதீதி த³ட்ட²ப்³ப³ம். த்³வே லேட்³டு³பாதே அதிக்கமித்வாதி இத³ம் விஹாரே பி⁴க்கூ²னம் ஸஜ்ஜா²யாதி³ஸத்³த³ஸவனூபசாரவிஜஹனத்த²ம் வுத்தம், மஹாமக்³க³தோ ஓக்கம்மாதி இத³ம் மக்³க³படிபன்னானம் பி⁴க்கூ²னம் ஸவனூபசாராதிக்கமனத்த²ம், கு³ம்பே³ன வாதிஆதி³ த³ஸ்ஸனூபசாரவிஜஹனத்த²ம். ஸோபி கேனசி கம்மேன புரேஅருணே ஏவ க³ச்ச²தீதி இமினா ஆரோசனாய கதாய ஸப்³பே³ஸு பி⁴க்கூ²ஸு ப³ஹிவிஹாரம் க³தேஸுபி ஊனேக³ணேசரணதோ³ஸோ வா விப்பவாஸதோ³ஸோ வா ந ஹோதி ஆரோசனத்த²த்தா ஸஹவாஸஸ்ஸாதி த³ஸ்ஸேதி. தேனாஹ ‘‘அயஞ்சா’’திஆதி³. அனிக்கி²த்தவத்தேன அந்தோஉபசாரக³தானம் ஸப்³பே³ஸம்பி ஆரோசேதப்³பா³. ‘‘அயம் நிக்கி²த்தவத்தஸ்ஸ பரிஹாரோ’’தி வுத்தம், தத்த² நிக்கி²த்தவத்தஸ்ஸாதி வத்தம் நிக்கி²பித்வா பரிவஸந்தஸ்ஸாதி அத்தோ². அயம் பனேத்த² தே²ரஸ்ஸ அதி⁴ப்பாயோ – வத்தம் நிக்கி²பித்வா பரிவஸந்தஸ்ஸ உபசாரக³தானம் ஸப்³பே³ஸம் ஆரோசனகிச்சம் நத்தி², தி³ட்ட²ரூபானம் ஸுதஸத்³தா³னம் ஆரோசேதப்³ப³ம், அதி³ட்ட²அஸுதானம்பி அந்தோத்³வாத³ஸஹத்த²க³தானம் ஆரோசேதப்³ப³ம். இத³ம் வத்தம் நிக்கி²பித்வா பரிவஸந்தஸ்ஸ லக்க²ணந்தி. தே²ரஸ்ஸாதி மஹாபது³மத்தே²ரஸ்ஸ.

238. குக்குச்சவினோத³னத்தா²யாதி இமேஸு படிச்ச²ன்னதி³வஸப்பமாணேன பரிவஸிததி³வஸேஸு ‘‘ஸியும் நு கோ² திவித⁴ரத்திச்சே²த³காரணயுத்தானி கானிசி தி³வஸானி, ஏவம் ஸதி அபரிபுண்ணபரிவாஸதி³வஸத்தா ந மானத்தாரஹோ ப⁴வேய்ய, அஸதி ச மானத்தாரஹபா⁴வே மானத்தம் தி³ன்னம்பி அதி³ன்னம்யேவ ப⁴வேய்ய, ஏவஞ்ச ஸதி ஆபன்னாபத்திதோ வுட்டா²னம் ந ப⁴வேய்யா’’தி இமஸ்ஸ வினயகுக்குச்சஸ்ஸ வினோத³னத்தா²ய. ஏகேன வா த்³வீஹி வா தீஹி வா தி³வஸேஹி அதி⁴கதரானி தி³வஸானி பரிவஸித்வா நனு சாயம் பரிவுத்த²பரிவாஸோ, தஸ்மானேன மானத்தமேவ யாசிதப்³ப³ம், அத² கஸ்மா வத்தம் ஸமாதி³யித்வா மானத்தம் யாசிதப்³ப³ந்தி ஆஹாதி சோத³னம் மனஸி கரோந்தேன வுத்தம் ‘‘அயஞ்ஹி வத்தே ஸமாதி³ன்னே’’திஆதி³. ஹி யஸ்மா அயம் பி⁴க்கு² வத்தே ஸமாதி³ன்னே ஏவ மானத்தாரஹோ ஹோதி, ந அஸமாதி³ன்னே, இதி தஸ்மா வத்தம் ஸமாதி³யித்வா மானத்தம் யாசிதப்³ப³ந்தி ஸம்ப³ந்தோ⁴. நனு ச கம்மவாசாயம் ‘‘ஸோ பரிவுத்த²பரிவாஸோ ஸங்க⁴ம் மானத்தம் யாசதி’’இச்சேவ வுத்தம், ந வுத்தம் ‘‘ஸமாதி³ன்னவத்தோ’’தி, அத² கஸ்மா ‘‘வத்தே ஸமாதி³ன்னே ஏவ மானத்தாரஹோ ஹோதீ’’தி வுத்தந்தி சோத³னம் ஸந்தா⁴யாஹ ‘‘நிக்கி²த்தவத்தேன பரிவுத்த²த்தா’’தி. யஸ்மா அயம் பி⁴க்கு² நிக்கி²த்தவத்தேன ஹுத்வா பரிவுத்தோ² ஹோதி, நோ அனிக்கி²த்தவத்தேன, தஸ்மா நிக்கி²த்தவத்தேன ஹுத்வா பரிவுத்த²த்தா அயம் பி⁴க்கு² வத்தே ஸமாதி³ன்னே ஏவ மானத்தாரஹோ ஹோதி, நோ அஸமாதி³ன்னேதி யோஜனா. ததா² ஹி வுத்தம் ‘‘அனிக்கி²த்தவத்தஸ்ஸ பன புன ஸமாதா³னகிச்சம் நத்தி². ஸோ ஹி படிச்ச²ன்னதி³வஸாதிக்கமேனேவ மானத்தாரஹோ ஹோதி, தஸ்மா தஸ்ஸ மானத்தம் தா³தப்³ப³மேவா’’தி.

சதூஹி பஞ்சஹி வா பி⁴க்கூ²ஹி ஸத்³தி⁴ந்தி ஊனேக³ணேசரணதோ³ஸா விமுச்சனத்த²ம். பரிக்கி²த்தஸ்ஸ விஹாரஸ்ஸ பரிக்கே²பதோதிஆதி³ கிஞ்சாபி பாளியம் நத்தி², அத² கோ² அட்ட²கதா²சரியானம் வசனேன ததா² ஏவ படிபஜ்ஜிதப்³ப³ந்தி ச வுத்தம். ‘‘அத்தி²பா⁴வம் ஸல்லக்கே²த்வாதி த்³வாத³ஸஹத்தே² உபசாரே ஸல்லக்கே²த்வா, அனிக்கி²த்தவத்தானம் உபசாரஸீமாய ஆக³தபா⁴வம் ஸல்லக்கே²த்வா ஸஹவாஸாதி³கம் வேதி³தப்³ப³ந்தி ச வுத்தம். ‘நிக்கி²பந்தேன ஆரோசேத்வா நிக்கி²பிதப்³ப³ம் பயோஜனம் அத்தீ²’தி ச வுத்தம், ந பன தம் பயோஜனம் த³ஸ்ஸித’’ந்தி வஜிரபு³த்³தி⁴டீகாயம் (வஜிர. டீ. சூளவக்³க³ 97) வுத்தம், வத்தபே⁴த³து³க்கடா முச்சனபயோஜனம் ஹோதீதி வேதி³தப்³ப³ம்.

239. அப்³பா⁴னம் காதும் ந வட்டதீதி கதம்பி அகதமேவ ஹோதீதி அத்தோ². ‘‘தேனாபி வத்தம் ஸமாதி³யித்வா ஆரோசேத்வா அப்³பா⁴னம் யாசிதப்³ப³’’ந்தி வுத்தத்தா அப்³பா⁴னயாசனத்த²ம் மானத்தஸ்ஸ ஸமாதி³யனகாலேபி ஆரோசேதப்³ப³மேவ. புப்³பே³ மானத்தசாரிதகாலே ஆரோசிதமேவாதி அனாரோசேத்வா அப்³பா⁴னம் ந யாசிதப்³ப³ந்தி விஞ்ஞாயதி. ஏவம் மானத்தயாசனகாலேபி பரிவாஸம் ஸமாதி³யித்வா ஆரோசேதப்³ப³மேவாதி த³ட்ட²ப்³ப³ம்.

240. சிண்ணமானத்தோ பி⁴க்கு² அப்³பே⁴தப்³போ³தி சிண்ணமானத்தஸ்ஸ ச அப்³பா⁴னாரஹஸ்ஸ ச நின்னானாகரணத்தா வுத்தம். அஞ்ஞதா² ‘‘அப்³பா⁴னாரஹோ அப்³பே⁴தப்³போ³’’தி வத்தப்³ப³ம் ஸியா. உக்கே²பனீயகம்மகதோபி அத்தனோ லத்³தி⁴க்³க³ஹணவஸேன ஸபா⁴க³பி⁴க்கு²ம்ஹி ஸதி தஸ்ஸ அனாரோசாபேதும் ந லப⁴தி.

‘‘அனந்தராயிகஸ்ஸ பன அந்தராயிகஸஞ்ஞாய சா²த³யதோ அச்ச²ன்னாவா’’தி பாடோ². அவேரிபா⁴வேன ஸபா⁴கோ³ அவேரிஸபா⁴கோ³. ‘‘ஸபா⁴க³ஸங்கா⁴தி³ஸேஸம் ஆபன்னஸ்ஸ பன ஸந்திகே ஆவி காதும் ந வட்டதீ’’தி பஸங்க³தோ இதே⁴வ பகாஸிதம். லஹுகேஸு படிக்கே²போ நத்தி². தத்த² ஞத்தியா ஆவி கத்வா உபோஸத²ம் காதும் அனுஞ்ஞாதத்தா லஹுகஸபா⁴க³ம் ஆவி காதும் வட்டதீதி. ஸபா⁴க³ஸங்கா⁴தி³ஸேஸம் பன ஞத்தியா ஆரோசனம் ந வட்டதீதி கிர. ‘‘தஸ்ஸ ஸந்திகே தம் ஆபத்திம் படிகரிஸ்ஸதீதி (மஹாவ. 171) வுத்தத்தா லஹுகஸ்ஸேவாயம் ஸமனுஞ்ஞாதா. ந ஹி ஸக்கா ஸுத்³த⁴ஸ்ஸ ஏகஸ்ஸ ஸந்திகே ஸங்கா⁴தி³ஸேஸஸ்ஸ படிகரணம் காது’’ந்தி லிகி²தம். லஹுகேஸுபி ஸபா⁴க³ம் ஆவி காதும் ந வட்டதீதி. தஸ்மா ஏவ ஹி ஞத்தியா ஆவிகரணம் அனுஞ்ஞாதம், இதரதா² தம் நிரத்த²கம் ஸியா. அஞ்ஞமஞ்ஞாரோசனஸ்ஸ வட்டதி, ததோ ந வட்டதீதி தீ³பனத்த²மேவ ஞத்தியா ஆவிகரணமனுஞ்ஞாதம், தேனேவ இத⁴ ‘‘ஸபா⁴க³ஸங்கா⁴தி³ஸேஸம் ஆபன்னஸ்ஸா’’திஆதி³ வுத்தம், அயமத்தோ² ‘‘ஏத்தாவதா தே த்³வே நிராபத்திகா ஹோந்தி, தேஸம் ஸந்திகே ஸேஸேஹி ஸபா⁴கா³பத்தியோ தே³ஸேதப்³பா³’’தி வசனேன கங்கா²விதரணியம்பி (கங்கா². அட்ட². நிதா³னவண்ணனா) பகாஸிதோவ. ஸங்கா⁴தி³ஸேஸம் பன ஞத்தியா ஆரோசேத்வா உபோஸத²ம் காதும் வட்டதி. தஸ்ஸா ஞத்தியா அயமத்தோ² – யதா³ ஸுத்³த⁴ம் பி⁴க்கு²ம் பஸ்ஸிஸ்ஸதி, தஸ்ஸ ஸந்திகே அஞ்ஞமஞ்ஞாரோசனவஸேன படிகரிஸ்ஸதி, ஏவம் படிகதே ‘‘ந ச, பி⁴க்க²வே, ஸாபத்திகேன பாதிமோக்க²ம் ஸோதப்³ப³ம், யோ ஸுணேய்ய, ஆபத்தி து³க்கடஸ்ஸா’’தி (சூளவ. 386) வுத்தாபத்திதோ மோக்கோ² ஹோதி, தஸ்மா ‘‘க³ருகம் வா ஹோது லஹுகம் வா, ஞத்தியா ஆவி காதும் வட்டதீ’’தி வுத்தம். உபோ⁴ஸு நயேஸு யுத்ததரம் க³ஹேதப்³ப³ம். ‘‘நாமஞ்சேவ ஆபத்தி சாதி தேன தேன வீதிக்கமேனாபன்னாபத்தி ஆபத்தி. நாமந்தி தஸ்ஸா ஆபத்தியா நாம’’ந்தி லிகி²தம். ஆரோசேத்வா நிக்கி²பிதப்³ப³ந்தி ஏத்த² ஆரோசனம் வத்தபே⁴த³து³க்கடபரிஹரணப்பயோஜனந்தி வேதி³தப்³ப³ம்.

‘‘ஸதியேவ அந்தராயே அந்தராயிகஸஞ்ஞீ சா²தே³தி, அச்ச²ன்னா ஹோதி. அந்தராயிகஸ்ஸ பன அந்தராயிகஸஞ்ஞாய வா அனந்தராயிகஸஞ்ஞாய வா சா²த³யதோ அச்ச²ன்னாவா’’திபி பாடோ². அவேரீதி ஹிதகாமோ. உத்³த⁴ஸ்தே அருணேதி உட்டி²தே அருணே. ஸுத்³த⁴ஸ்ஸ ஸந்திகேதி ஸபா⁴க³ஸங்கா⁴தி³ஸேஸம் அனாபன்னஸ்ஸ ஸந்திகே. வத்து²ந்தி அஸுசிமோசனாதி³வீதிக்கமம். ஸுக்கவிஸ்ஸட்டீ²தி வத்து² சேவ கோ³த்தஞ்சாதி ‘‘ஸுக்கவிஸ்ஸட்டீ²’’தி இத³ம் அஸுசிமோசனலக்க²ணஸ்ஸ வீதிக்கமஸ்ஸ பகாஸனதோ வத்து² சேவ ஹோதி, ஸஜாதியஸாதா⁴ரணவிஜாதியவினிவத்தஸபா⁴வாய ஸுக்கவிஸ்ஸட்டி²யா ஏவ பகாஸனதோ கோ³த்தஞ்ச ஹோதீதி அத்தோ². க³ம் தாயதீதி ஹி கோ³த்தம். ஸங்கா⁴தி³ஸேஸோதி நாமஞ்சேவ ஆபத்தி சாதி ஸங்கா⁴தி³ஸேஸோதி தேன தேன வீதிக்கமேன ஆபன்னஸ்ஸ ஆபத்தினிகாயஸ்ஸ நாமபகாஸனதோ நாமஞ்சேவ ஹோதி, ஆபத்திஸபா⁴வதோ ஆபத்தி ச.

ஸுத்³த⁴ஸ்ஸாதி ஸபா⁴க³ஸங்கா⁴தி³ஸேஸம் அனாபன்னஸ்ஸ, ததோ வுட்டி²தஸ்ஸ வா. அஞ்ஞஸ்மிந்தி ஸுத்³த⁴ந்தபரிவாஸவஸேன ஆபத்திவுட்டா²னதோ அஞ்ஞஸ்மிம் ஆபத்திவுட்டா²னே. படிச்சா²தி³யித்தா²தி படிச்ச²ன்னா. கா ஸா? ஆபத்தி. தி³வஸாதீ³ஹி பரிச்சி²ந்தி³த்வா வஸனம் பரிவாஸோ. கோ ஸோ? வினயகம்மகரணம். படிச்ச²ன்னாய ஆபத்தியா பரிவாஸோ படிச்ச²ன்னபரிவாஸோ.

படிச்ச²ன்னபரிவாஸகதா² நிட்டி²தா.

ஸுத்³த⁴ந்தபரிவாஸகதா²

242. ஸுஜ்ஜ²னம் ஸுத்³தோ⁴, கோ ஸோ? ஆபத்திவிக³மோ. அமதி ஓஸானபா⁴வம் க³ச்ச²தீதி அந்தோ, ஸுத்³தோ⁴ அந்தோ யஸ்ஸ பரிவாஸஸ்ஸாதி ஸுத்³த⁴ந்தோ, ஸுத்³த⁴ந்தோ ச ஸோ பரிவாஸோ சாதி ஸுத்³த⁴ந்தபரிவாஸோ, ஸுத்³த⁴காலம் பரியந்தம் கத்வா அஸுத்³த⁴காலப்பமாணேன பரிச்சி²ந்தி³த்வா கதபரிவாஸோ.

ஸுத்³த⁴ந்தபரிவாஸகதா² நிட்டி²தா.

ஓதா⁴னஸமோதா⁴னபரிவாஸகதா²

243. ஸமோதீ⁴யதே ஸமோதா⁴னம், நானாகாலிகா நானாவத்து²கா ஆபத்தியோ அக்³கா⁴தி³வஸேன ஸமோதா⁴னம் ஏகீகரணம், ஸமோதா⁴னேத்வா கதோ பரிவாஸோ ஸமோதா⁴னபரிவாஸோதி விக்³க³ஹோ. கம்மவாசாயம் ‘‘படிகஸ்ஸிதோ ஸங்கே⁴ன இத்த²ன்னாமோ பி⁴க்கு² அந்தரா ஸம்ப³ஹுலானம் ஆபத்தீனம் அப்படிச்ச²ன்னானம் மூலாயபடிகஸ்ஸனா, க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி ஏத்த² க³த்யத்த²தா⁴துயா கம்மனி ச நயனத்த²தா⁴துயா கம்மனி ச தத³த்த²ஸம்பதா³னே ச விப⁴த்திபரிணாமே சாதி இமேஸு சதூஸு டா²னேஸு ஆயாதே³ஸஸ்ஸ வுத்தத்தா, படிபுப்³ப³கஸதா⁴துயா ச நயனத்த²த்தா ‘‘மூலாயா’’தி இத³ம் ‘‘படிகஸ்ஸிதோ’’தி ஏத்த² கம்மம், தஸ்மா ‘‘படிகஸ்ஸிதோ…பே… மூலாய’’ இதி ஏத்தகமேவ ப⁴விதப்³ப³ம், ந ‘‘மூலாயபடிகஸ்ஸனா’’தி ஏவம் மஞ்ஞமானா ஸத்³த³விது³னோ ‘‘படிகஸ்ஸனா’’தி இத³ம் அதி⁴கந்தி வா வதே³ய்யும் மக்கே²ய்யும் வா, ந பனேதம் வத்தப்³ப³ம். நவபாடே²ஸுயேவ அயம் பாடோ² ஸத்³த³லக்க²ணயுத்தோ வா அயுத்தோ வாதி சிந்தேதப்³போ³, ந பன பாளியட்ட²கதா²தி³தோ ஆக³தேஸு போராணபாடே²ஸு. தேஸு பன கத²ம் யோஜியமானோ அயம் பாடோ² ஸத்³த³யுத்தியா ச அத்த²யுத்தியா ச ஸமன்னாக³தோ ப⁴வேய்யாதி யோஜனாகாரோயேவ சிந்தேதப்³போ³. அயஞ்ச பாடோ² போராணபாளிபாடோ²வ, தஸ்மா ‘‘மூலாயபடிகஸ்ஸனா’’தி இத³ம் கரணவஸேன விபரிணாமேத்வா ‘‘மூலாயபடிகஸ்ஸனாய படிகஸ்ஸிதோ’’தி யோஜேதப்³ப³ம்.

கத²ம் பனேதஸ்ஸ போராணபாட²பா⁴வோ ஜானிதப்³போ³தி? பகரணே ஆக³தத்தா. வுத்தஞ்ஹி விமதிவினோத³னியம் (வி. வி. டீ. சூளவக்³க³ 2.102) ‘‘பாளியம் படிகஸ்ஸிதோ ஸங்கே⁴ன உதா³யி பி⁴க்கு² அந்தரா ஏகிஸ்ஸா ஆபத்தியா…பே… மூலாயபடிகஸ்ஸனாதி இத³ம் கரணவஸேன விபரிணாமேத்வா மூலாயபடிகஸ்ஸனாய படிகஸ்ஸிதோதி யோஜேதப்³ப³’’ந்தி. அத² வா ‘‘மூலாய படிகஸ்ஸனா மூலாயபடிகஸ்ஸனா’’தி அலுத்தஸமாஸவஸேன உத்தரபதே³ன ஸமாஸம் கத்வா ஸங்கே⁴ன இத்த²ன்னாமோ பி⁴க்கு² அந்தரா ஸம்ப³ஹுலானம் ஆபத்தீனம் அப்படிச்ச²ன்னானம் ஹேது படிகஸ்ஸிதோ. ஸா மூலாயபடிகஸ்ஸனா க²மதி ஸங்க⁴ஸ்ஸாதி யோஜேதப்³ப³ம். ததா² ஹி வுத்தம் தத்தே²வ (வி. வி. டீ. சூளவக்³க³ 2.102) ‘‘அத² வா மூலாயபடிகஸ்ஸனா க²மதி ஸங்க⁴ஸ்ஸாதி உத்தரபதே³ன ஸஹ பச்சத்தவஸேனேவ யோஜேதும்பி வட்டதீ’’தி.

தம் தே³ந்தேன பட²மம் மூலாய படிகஸ்ஸித்வா பச்சா²பரிவாஸோ தா³தப்³போ³தி ஏத்த² தம் ஓதா⁴னஸமோதா⁴னபரிவாஸம் தே³ந்தேன பட²மம் தம் பி⁴க்கு²ம் மூலாய படிகஸ்ஸித்வா மூலதி³வஸே ஆகட்³டி⁴த்வா தஸ்ஸ அந்தராபத்தியா ஸமோதா⁴னபரிவாஸோ தா³தப்³போ³தி அத்தோ². யதா² கிம் விமதிவினோத³னியம் (வி. வி. டீ. சூளவக்³க³ 2.102) ‘‘உதா³யிம் பி⁴க்கு²ம் அந்தரா ஏகிஸ்ஸா ஆபத்தியா…பே… மூலாய படிகஸ்ஸித்வாதி ஏத்த² அந்தரா ஏகிஸ்ஸா ஆபத்தியா ஹேதுபூ⁴தாய உதா³யிம் பி⁴க்கு²ம் மூலாய படிகஸ்ஸித்வா மூலதி³வஸே ஆகட்³டி⁴த்வா தஸ்ஸா அந்தராபத்தியா ஸமோதா⁴னபரிவாஸம் தே³தூதி யோஜனா’’தி வுத்தம். மஹாஸுமத்தே²ரவாதே³ ஆவிகாராபேத்வா விஸ்ஸஜ்ஜேதப்³போ³தி தஸ்ஸ அதேகிச்ச²பா⁴வம் தேனேவ ஸங்க⁴ஸ்ஸ பாகடம் காரேத்வா லஜ்ஜீக³ணதோ வியோஜனவஸேன விஸ்ஸஜ்ஜேதப்³போ³தி அத்தோ².

ஓதா⁴னஸமோதா⁴னபரிவாஸகதா² நிட்டி²தா.

அக்³க⁴ஸமோதா⁴னபரிவாஸகதா²

244. அக்³கே⁴ன அக்³க⁴வஸேன அரஹவஸேன ஸமோதா⁴னம் அக்³க⁴ஸமோதா⁴னம், ஆபன்னாஸு ஸம்ப³ஹுலாஸு ஆபத்தீஸு யா ஆபத்தியோ சிரதரப்படிச்ச²ன்னாயோ, தாஸம் அக்³கே⁴ன ஸமோதா⁴ய தாஸம் ரத்திபரிச்சே²த³வஸேன அவஸேஸானம் ஊனதரப்படிச்ச²ன்னானம் ஆபத்தீனம் பரிவாஸோ தீ³யதி, அயம் வுச்சதி அக்³க⁴ஸமோதா⁴னோ . ஸதம் ஆபத்தியோதி காயஸம்ஸக்³கா³தி³வஸேன ஏகதி³வஸே ஆபன்னா ஸதம் ஆபத்தியோ. த³ஸஸதந்தி ஸஹஸ்ஸஆபத்தியோ. ரத்திஸதம் சா²த³யித்வானாதி யோஜேதப்³ப³ம். ‘‘அக்³க⁴ஸமோதா⁴னோ நாம ஸபா⁴க³வத்து²காயோ ஸம்ப³ஹுலா ஆபத்தியோ ஆபன்னஸ்ஸ ப³ஹுரத்திம் படிச்சா²தி³தாபத்தியம் நிக்கி²பித்வா தா³தப்³போ³, இதரோ நானாவத்து²கானம் வஸேனாதி அயமேதேஸம் விஸேஸோ’’தி வஜிரபு³த்³தி⁴டீகாயம் (வஜிர. டீ. சூளவக்³க³ 102) வுத்தம்.

அக்³க⁴ஸமோதா⁴னபரிவாஸகதா² நிட்டி²தா.

246. லிங்க³பரிவத்தனககதா²யம் யதி³ கஸ்ஸசி பி⁴க்கு²னோ இத்தி²லிங்க³ம் பாது ப⁴வேய்ய, கிம் தேன புன உபஜ்ஜா² க³ஹேதப்³பா³, புன உபஸம்பதா³ காதப்³பா³, கிம் பி⁴க்கூ²பஸம்பதா³தோ பட்டா²ய வஸ்ஸக³ணனா காதப்³பா³, உதா³ஹு இதோ பட்டா²யாதி புச்சா²ய ஸதி தம் பரிஹரிதுமாஹ ‘‘ஸசே’’திஆதி³. ஏவம் ஸந்தே ஸா பி⁴க்கு²னீ பி⁴க்கூ²னம் மஜ்ஜே²யேவ வஸிதப்³ப³ம் ப⁴வேய்யாதி சோத³னம் ஸந்தா⁴யாஹ ‘‘அப்பதிரூப’’ந்திஆதி³. ஏவம் ஸந்தே பி⁴க்கு²பூ⁴தகாலே ஆபஜ்ஜிதாபத்தியோ கத²ம் காதப்³பா³தி சோத³னம் மனஸி கத்வா ஆஹ ‘‘யா தே³ஸனாகா³மினியோ வா’’திஆதி³. தத்த² பி⁴க்கூ²னம் பி⁴க்கு²னீஹி ஸாதா⁴ரணாதி ஸஞ்சரித்தாத³யோ. அஸாதா⁴ரணாதி ஸுக்கவிஸ்ஸட்டி²ஆத³யோ. ஹோது ப⁴க³வதோ அனுஞ்ஞாதவஸேன லிங்கே³ பரிவத்தே அஸாதா⁴ரணாபத்தீஹி வுட்டி²தபா⁴வோ, புன பகதிலிங்கே³ உப்பன்னே புன ஆபத்தி ஸியாதி ஆஸங்கம் பரிஹரிதும் ‘‘புன பகதிலிங்கே³’’திஆதி³ வுத்தம். இதா³னி தமத்த²ம் பாளியா ஸாதே⁴தும் ‘‘வுத்தஞ்சேத’’ந்திஆதி³மாஹ. தஸ்ஸத்தோ² பட²மபாராஜிகவண்ணனாய டீகாஸு (ஸாரத்த². டீ. 2.69; வஜிர. டீ. பாராஜிக 69) வுத்தனயேனேவ த³ட்ட²ப்³போ³, இத⁴ பன க³ருகாபத்திவுட்டா²னகதா²பூ⁴தத்தா ஸாயேவ கதா² வுச்சதே.

247. தத்த² பி⁴க்கு²னீஹி ஸாதா⁴ரணாய படிச்ச²ன்னாய ஆபத்தியாதி ஸஞ்சரித்தாதி³ஆபத்தியா, ஹேத்வத்தே² சேதம் கரணவசனம். பரிவஸந்தஸ்ஸாதி அனாத³ரே ஸாமிவசனம். பக்க²மானத்தமேவ தா³தப்³ப³ம், ந புன பரிவாஸோ தா³தப்³போ³ பி⁴க்கு²னிபா⁴வே அபரிவாஸாரஹத்தாதி அதி⁴ப்பாயோ. மானத்தம் சரந்தஸ்ஸாதி அனாத³ரேயேவ ஸாமிவசனம், சா²ரத்தமானத்தே ஆசிண்ணேயேவ பரிவத்ததி, புன பக்க²மானத்தமேவ தா³தப்³ப³ந்தி. தேன வக்க²தி ‘‘ஸசே சிண்ணமானத்தஸ்ஸா’’திஆதி³. அகுஸலவிபாகே பரிக்கீ²ணேதி புரிஸிந்த்³ரியஸ்ஸ அந்தரதா⁴னம் ஸந்தா⁴ய வுத்தம். இத்தி²ந்த்³ரியபதிட்டா²னம் பன குஸலவிபாகமேவ. வுத்தஞ்ஹி அட்ட²கதா²யம் ‘‘உப⁴யம்பி அகுஸலேன அந்தரதா⁴யதி, குஸலேன படிலப்³ப⁴தீ’’தி. சா²ரத்தம் மானத்தமேவ தா³தப்³ப³ம், ந பரிவாஸோ தா³தப்³போ³, ந வா பக்க²மானத்தம் தா³தப்³ப³ம்.

‘‘அயம் பன விஸேஸோ’’தி வத்வா தம் விஸேஸம் த³ஸ்ஸேதுமாஹ ‘‘ஸசே’’திஆதி³. பரிவாஸதா³னம் நத்தி², சா²ரத்தம் மானத்தமேவ தா³தப்³ப³ம். கஸ்மா? பி⁴க்கு²னிகாலே படிச்ச²ன்னத்தா. பி⁴க்கு²காலே ச²ன்னாயேவ ஹி ஆபத்தி பரிவாஸாரஹா ஹோதி, நோ பி⁴க்கு²னிகாலேதி அயமேதாஸம் விஸேஸோ. பக்க²மானத்தம் சரந்தியாதி அனாத³ரே ஸாமிவசனம், பக்க²மானத்தே ஆசிண்ணேயேவாதி அத்தோ². ததா² ஹி வக்க²தி ‘‘சிண்ணமானத்தாயா’’திஆதி³. சா²ரத்தம் மானத்தம் சரந்தஸ்ஸாதிஆதி³ வுத்தனயமேவ.

பரிவாஸவினிச்ச²யகதா²

இதா³னி ஸங்கா⁴தி³ஸேஸாபத்தி யஸ்மா ஸாவஸேஸக³ருகாபத்தி ஹோதி ஸதேகிச்சா², தஸ்மா யதா² நாம ரோகா³துரோ புக்³க³லோ கிஞ்சி அத்தனோ ஹிதஸுக²காரணம் காதும் ந ஸக்கோதி, தமேனம் காருணிகோ திகிச்ச²கோ கருணாஸஞ்சோதி³தோ திகிச்ச²ம் கத்வா கே³லஞ்ஞதோ வுட்டா²பேத்வா ஹிதஸுக²ம் ஜனேதி, ஏவம் ஸங்கா⁴தி³ஸேஸாபத்திஸமங்கீ³ புக்³க³லோ ஆணாவீதிக்கமந்தராயிகபா⁴வதோ ஸக்³க³மோக்க²மக்³க³ம் ஸோதே⁴தும் ந ஸக்கோதி, தமேனம் மஹாகாருணிகோ ப⁴க³வா மஹாகருணாய ஸஞ்சோதி³தமானஸோ அனேகேஹி நயேஹி ஆபத்திதோ வுட்டா²னம் கத்வா ஸக்³க³மோக்க²ஸுகே² பதிட்ட²பேதி, ப⁴க³வதோ அதி⁴ப்பாயஞ்ஞுனோ அட்ட²கதா²சரியாபி அனேகேஹி காரணேஹி ப⁴க³வதோ வசனஸ்ஸ அத்த²ம் பகாஸேத்வா விஸுத்³த⁴காமானம் நயம் தே³ந்தி, ததா² டீகாசரியாத³யோபி. ஏவம் தி³ன்னே பன நயே யோனிஸோ மனஸி காதும் ஸக்கோந்தா பண்டி³தா யதா²னுஸிட்ட²ம் படிபஜ்ஜந்தி, அஸக்கோந்தா அஞ்ஞதா² அத்த²ம் க³ஹேத்வா ந யதா²னுஸிட்ட²ம் படிபஜ்ஜந்தி, தேஸம் தி³ட்டா²னுக³திம் அனுக³ச்ச²ந்தா ஸிஸ்ஸாத³யோபி ததே²வ கரோந்தி, தஸ்மா ப⁴க³வதோ வசனஞ்ச புப்³பே³னாபரம் ஸம்ஸந்தி³த்வா அட்ட²கதா²டீகாதி³வசனஞ்ச ஸம்மா துலயித்வா தத²தோ ப⁴க³வதோ அதி⁴ப்பாயம் ஞத்வா யதா²னுஸிட்ட²ம் படிபஜ்ஜந்தேஹி க³ருகாபத்திதோ வுட்ட²ஹனத்த²ம் யோகோ³ கரணீயோ.

தஸ்மா யதா³ பி⁴க்கூ² ஆக³ச்ச²ந்தி வினயத⁴ரஸ்ஸ ஸந்திகம் ‘‘க³ருகாபத்திவுட்டா²னம் கரிஸ்ஸாமா’’தி, ததா³ வினயத⁴ரேன ‘‘த்வம் கதராபத்திம் ஆபன்னோ’’தி புச்சி²தப்³போ³. ‘‘ஸங்கா⁴தி³ஸேஸம் ஆபன்னோ’’தி வுத்தே ‘‘கதரஸங்கா⁴தி³ஸேஸ’’ந்தி புச்சி²த்வா ‘‘இமம் நாமா’’தி வுத்தே ஸுக்கவிஸ்ஸட்டி²யம் மோசேதுகாமசேதனா, உபக்கமோ, முச்சனந்தி தீணி அங்கா³னி. காயஸம்ஸக்³கே³ மனுஸ்ஸித்தீ², இத்தி²ஸஞ்ஞிதா, காயஸம்ஸக்³க³ராகோ³, தேன ராகே³ன வாயாமோ, ஹத்த²க்³கா³ஹாதி³ஸமாபஜ்ஜனந்தி பஞ்ச அங்கா³னி. து³ட்டு²ல்லவாசாயம் மனுஸ்ஸித்தீ², இத்தி²ஸஞ்ஞிதா, து³ட்டு²ல்லவாசஸ்ஸாத³ராகோ³, தேன ராகே³ன ஓபா⁴ஸனம், தங்க²ணவிஜானனந்தி பஞ்ச அங்கா³னி. அத்தகாமே மனுஸ்ஸித்தீ², இத்தி²ஸஞ்ஞிதா, அத்தகாமபாரிசரியாய ராகோ³, தேன ராகே³ன வண்ணப⁴ணனம், தங்க²ணவிஜானனந்தி பஞ்ச அங்கா³னி. ஸஞ்சரித்தே யேஸு ஸஞ்சரித்தம் ஸமாபஜ்ஜதி, தேஸம் மனுஸ்ஸஜாதிகதா, நாலம்வசனீயதா, படிக்³க³ண்ஹனவீமம்ஸனபச்சாஹரணானீதி பஞ்ச அங்கா³னி. குடிகாரே உல்லித்தாதீ³னம் அஞ்ஞதரதா, ஹேட்டி²மபமாணஸம்ப⁴வோ, அதே³ஸிதவத்து²கதா, பமாணாதிக்கந்ததா, அத்துத்³தே³ஸிகதா, வாஸாகா³ரதா, லேபக⁴டனாதி ஸத்த பமாணயுத்தாதீ³ஸு ச²தா⁴ அங்கா³னி. விஹாரகாரே தானியேவ ச² அங்கா³னி. து³ட்ட²தோ³ஸே யம் சோதே³தி, தஸ்ஸ உபஸம்பன்னோதி ஸங்க்²யுபக³மனம், தஸ்மிம் ஸுத்³த⁴ஸஞ்ஞிதா, யேன பாராஜிகேன சோதே³தி, தஸ்ஸ தி³ட்டா²தி³வஸேன அமூலகதா, சாவனாதி⁴ப்பாயேன ஸம்முகா²சோத³னா, தஸ்ஸ தங்க²ணவிஜானனந்தி பஞ்ச அங்கா³னி. அஞ்ஞபா⁴கி³யே அஞ்ஞபா⁴கி³யஸ்ஸ அதி⁴கரணஸ்ஸ கஞ்சிதே³ஸம் லேஸமத்தம் உபாதி³யனதா, புரிமானி பஞ்சாதி ச² அங்கா³னி. ஸங்க⁴பே⁴தே³ பே⁴தா³ய பரக்கமனம், த⁴ம்மகம்மேன ஸமனுபா⁴ஸனம், கம்மவாசாபரியோஸானம், அப்படினிஸ்ஸஜ்ஜனந்தி சத்தாரி அங்கா³னி. பே⁴தா³னுவத்தகே அங்கே³ஸு யதா² தத்த² பரக்கமனம், ஏவம் இத⁴ அனுவத்தனந்தி சத்தாரி அங்கா³னி. து³ப்³ப³சே அங்கே³ஸு யதா² தத்த² பரக்கமனம், ஏவம் இத⁴ அவசனீயகரணதாதி சத்தாரி அங்கா³னி. குலதூ³ஸகே அங்கே³ஸு யதா² தத்த² பரக்கமனம், ஏவம் இத⁴ ச²ந்தா³தீ³ஹி பாபனந்தி சத்தாரி அங்கா³னி. இதி இமானி அங்கா³னி ஸோதே⁴த்வா ஸசே அங்க³பாரிபூரீ ஹோதி, ‘‘ஸங்கா⁴தி³ஸேஸோ’’தி வத்தப்³போ³. நோ சே, ‘‘நாயம் ஸங்கா⁴தி³ஸேஸோ, து²ல்லச்சயாதீ³ஸு அஞ்ஞதராபத்தீ’’தி வத்வா ‘‘நாயம் வுட்டா²னகா³மினீ, தே³ஸனாகா³மினீ அயம் ஆபத்தி, தஸ்மா பதிரூபஸ்ஸ பி⁴க்கு²ஸ்ஸ ஸந்திகே தே³ஸேஹீ’’தி வத்வா தே³ஸாபேதப்³போ³.

அத² பன அனாபத்திச்சா²யா பஞ்ஞாயதி, ‘‘அனாபத்தீ’’தி வத்வா உய்யோஜேதப்³பா³. ஸசே பன ஸங்கா⁴தி³ஸேஸச்சா²யா பஞ்ஞாயதி, ‘‘த்வம் இமம் ஆபத்திம் ஆபஜ்ஜித்வா சா²தே³ஸி, ந சா²தே³ஸீ’’தி புச்சி²த்வா ‘‘ந சா²தே³மீ’’தி வுத்தே ‘‘தேன ஹி த்வம் ந பரிவாஸாரஹோ, மானத்தாரஹோவ ஹோதீ’’தி வத்தப்³போ³. ‘‘சா²தே³மீ’’தி பன வுத்தே ‘‘த³ஸஸு ஆகாரேஸு அஞ்ஞதரகாரணேன சா²தே³ஸி, உதா³ஹு அஞ்ஞகாரணேனா’’தி புச்சி²த்வா ‘‘த³ஸஸு அஞ்ஞதரகாரணேனா’’தி வுத்தே ‘‘ஏவம்பி மானத்தாரஹோ ஹோதி, ந பரிவாஸாரஹோ’’தி வத்தப்³போ³. அத² ‘‘அஞ்ஞகாரணேனா’’தி வத³தி, ஏவம் ஸந்தேபி ‘‘த்வம் ஆபத்திஆபன்னபா⁴வம் ஜானந்தோ படிச்சா²தே³ஸி, உதா³ஹு அஜானந்தோ’’தி புச்சி²த்வா ‘‘அஜானந்தோ படிச்சா²தே³மீ’’தி வுத்தே ச ‘‘ஆபத்திஆபன்னபா⁴வம் ஸரந்தோ படிச்சா²தே³ஸி, உதா³ஹு விஸரித்வா படிச்சா²தே³ஸீ’’தி புச்சி²த்வா ‘‘விஸரித்வா படிச்சா²தே³மீ’’தி வுத்தே ச ‘‘ஆபத்திஆபன்னபா⁴வே வேமதிகோ ஹுத்வா படிச்சா²தே³ஸி, உதா³ஹு நிப்³பே³மதிகோ ஹுத்வா’’தி புச்சி²த்வா ‘‘வேமதிகோ ஹுத்வா’’தி வுத்தே ச ‘‘ந த்வம் பரிவாஸாரஹோ, மானத்தாரஹோவ ஹோதீ’’தி வத்தப்³போ³.

அத² ‘‘ஜானந்தோ படிச்சா²தே³மீ’’தி வுத்தே ச ‘‘ஸரந்தோ படிச்சா²தே³மீ’’தி வுத்தே ச ‘‘நிப்³பே³மதிகோ ஹுத்வா படிச்சா²தே³மீ’’தி வுத்தே ச ‘‘த்வம் பரிவாஸாரஹோ’’தி வத்தப்³போ³. வுத்தஞ்ஹேதம் ஸமுச்சயக்க²ந்த⁴கே (சூளவ. 144) ‘‘ஸோ ஏவம் வத³தி ‘யாயம், ஆவுஸோ, ஆபத்தி ஜானபடிச்ச²ன்னா, த⁴ம்மிகம் தஸ்ஸா ஆபத்தியா பரிவாஸதா³னம், த⁴ம்மத்தா ருஹதி. யா ச க்²வாயம், ஆவுஸோ, ஆபத்தி அஜானப்படிச்ச²ன்னா, அத⁴ம்மிகம் தஸ்ஸா ஆபத்தியா பரிவாஸதா³னம், அத⁴ம்மத்தா ந ருஹதி. ஏகிஸ்ஸா, ஆவுஸோ, ஆபத்தியா பி⁴க்கு² மானத்தாரஹோ’’’தி ச, ‘‘ஸோ ஏவம் வத³தி ‘யாயம் ஆபத்தி ஸரமானபடிச்ச²ன்னா, த⁴ம்மிகம் தஸ்ஸா ஆபத்தியா பரிவாஸதா³னம், த⁴ம்மத்தா ருஹதி. யா ச க்²வாயம் ஆபத்தி அஸரமானபடிச்ச²ன்னா, அத⁴ம்மிகம் தஸ்ஸா ஆபத்தியா பரிவாஸதா³னம், அத⁴ம்மத்தா ந ருஹதி. ஏகிஸ்ஸா, ஆவுஸோ, ஆபத்தியா பி⁴க்கு² மானத்தாரஹோ’’’தி ச, ‘‘ஸோ ஏவம் வத³தி ‘யாயம், ஆவுஸோ, ஆபத்தி நிப்³பே³மதிகபடிச்ச²ன்னா, த⁴ம்மிகம் தஸ்ஸா ஆபத்தியா பரிவாஸதா³னம், த⁴ம்மத்தா ருஹதி. யா ச க்²வாயம், ஆவுஸோ, ஆபத்தி வேமதிகபடிச்ச²ன்னா, அத⁴ம்மிகம் தஸ்ஸா ஆபத்தியா பரிவாஸதா³னம், அத⁴ம்மத்தா ந ருஹதி. ஏகிஸ்ஸா, ஆவுஸோ, ஆபத்தியா பி⁴க்கு²மானத்தாரஹோ’’’தி ச.

ஏவம் பரிவாஸாரஹபா⁴வம் பகாஸேத்வா ‘‘அயம் பி⁴க்கு² பரிவாஸாரஹோ, தீஸு பரிவாஸேஸு கதரபரிவாஸாரஹோ’’தி சிந்தேத்வா ‘‘பி⁴க்கு² த்வம் கதி ஆபத்தியோ சா²தே³ஸீ’’தி புச்சி²த்வா ‘‘ஏகம் ஆபத்தி’’ந்தி வா ‘‘த்³வே தீணி ததுத்தரி வா ஆபத்தியோ சா²தே³மீ’’தி வா வுத்தே ‘‘கதீஹம் த்வம் ஆபத்திம் படிச்சா²தே³ஸீ’’தி புச்சி²த்வா ‘‘ஏகாஹமேவாஹம் படிச்சா²தே³மீ’’தி வா ‘‘த்³வீஹம் தீஹம் ததுத்தரி வா படிச்சா²தே³மீ’’தி வா வுத்தே ‘‘யாவதீஹம் படிச்சா²தே³ஸி, தாவதீஹம் த்வம் படிவஸிஸ்ஸஸீ’’தி வத்தப்³போ³. வுத்தஞ்ஹேதம் ப⁴க³வதா ‘‘யாவதீஹம் ஜானம் படிச்சா²தே³தி, தாவதீஹம் தேன பி⁴க்கு²னா அகாமா பரிவத்த²ப்³ப³’’ந்தி. ததோ ‘‘அயம் பி⁴க்கு² ஆபத்திபரியந்தம் ஜானாதி, தஸ்மா படிச்ச²ன்னபரிவாஸாரஹோ’’தி (பாரா. 442) ஞத்வா தத³னுரூபா கம்மவாசா காதப்³பா³.

ஏத்த² ச ஆபத்திபரியந்தபுச்ச²னம் கம்மவாசாகரணத்த²மேவ ஹோதி, ரத்திபரியந்தபுச்ச²னம் பன தத³த்த²ஞ்சேவ ஸுத்³த⁴ந்தபரிவாஸஸ்ஸ அனனுரூபபா⁴வத³ஸ்ஸனத்த²ஞ்ச ஹோதி. வுத்தஞ்ஹி அட்ட²கதா²யம் (சுளவ. அட்ட². 102) ‘‘ஸோ து³விதோ⁴ சூளஸுத்³த⁴ந்தோ மஹாஸுத்³த⁴ந்தோதி, து³விதோ⁴பி சேஸ ரத்திபரிச்சே²த³ம் ஸகலம் வா ஏகச்சம் வா அஜானந்தஸ்ஸ ச அஸரந்தஸ்ஸ ச தத்த² வேமதிகஸ்ஸ ச தா³தப்³போ³. ஆபத்திபரியந்தம் பன ‘அஹம் ஏத்தகா ஆபத்தியோ ஆபன்னோ’தி ஜானாது வா, மா வா, அகாரணமேத’’ந்தி. ததோ தஸ்ஸ பி⁴க்கு²னோ நிஸீத³னட்டா²னம் ஜானிதப்³ப³ம். து³வித⁴ஞ்ஹி நிஸீத³னட்டா²னம் அனிக்கி²த்தவத்தேன நிஸீதி³தப்³ப³ட்டா²னம், நிக்கி²த்தவத்தேன நிஸீதி³தப்³ப³ட்டா²னந்தி.

தத்த² அப்பபி⁴க்கு²கே விஹாரே ஸபா⁴க³பி⁴க்கூ²னம் வஸனட்டா²னே உபசாரஸீமாபரிச்சி²ன்னோ அந்தோவிஹாரோ அனிக்கி²த்தவத்தேன நிஸீதி³தப்³ப³ட்டா²னம் ஹோதி. உபசாரஸீமம் அதிக்கம்ம மஹாமக்³க³தோ ஓக்கம்ம கு³ம்ப³வதிபடிச்ச²ன்னட்டா²னம் நிக்கி²த்தவத்தேன நிஸீதி³தப்³ப³ட்டா²னம் ஹோதி. வுத்தஞ்ஹி அட்ட²கதா²யம் (சூளவ. அட்ட². 102) ‘‘ஸசே அப்பபி⁴க்கு²கோ விஹாரோ ஹோதி, ஸபா⁴கா³ பி⁴க்கூ² வஸந்தி, வத்தம் அனிக்கி²பித்வா விஹாரேயேவ ரத்திபரிக்³க³ஹோ காதப்³போ³. அத² ந ஸக்கா ஸோதே⁴தும், வுத்தனயேனேவ வத்தம் நிக்கி²பித்வா பச்சூஸஸமயே ஏகேன பி⁴க்கு²னா ஸத்³தி⁴ம் மானத்தவண்ணனாயம் வுத்தனயேனேவ உபசாரஸீமம் அதிக்கமித்வா மஹாமக்³கா³ ஓக்கம்ம படிச்ச²ன்னட்டா²னே நிஸீதி³த்வா அந்தோஅருணேயேவ வுத்தனயேனேவ வத்தம் ஸமாதி³யித்வா தஸ்ஸ பி⁴க்கு²னோ பரிவாஸோ ஆரோசேதப்³போ³’’தி. ‘‘மானத்தவண்ணனாயம் வுத்தனயேனேவா’’தி ச ‘‘ஸசே அப்பபி⁴க்கு²கோ விஹாரோ ஹோதி, ஸபா⁴கா³ பி⁴க்கூ² வஸந்தி, வத்தம் அனிக்கி²பித்வா அந்தோவிஹாரேயேவ ரத்தியோ க³ணேதப்³பா³. அத² ந ஸக்கா ஸோதே⁴தும், வுத்தனயேனேவ வத்தம் நிக்கி²பித்வா பச்சூஸஸமயே சதூஹி பஞ்சஹி வா பி⁴க்கூ²ஹி ஸத்³தி⁴ம் பரிக்கி²த்தஸ்ஸ விஹாரஸ்ஸ பரிக்கே²பதோ, அபரிக்கி²த்தஸ்ஸ பரிக்கே²பாரஹட்டா²னதோ த்³வே லேட்³டு³பாதே அதிக்கமித்வா மஹாமக்³க³தோ ஓக்கம்ம கு³ம்பே³ன வா வதியா வா படிச்ச²ன்னட்டா²னே நிஸீதி³தப்³ப³’’ந்தி (வி. ஸங்க³. அட்ட². 238) இத³ம் வசனம் ஸந்தா⁴ய வுத்தம்.

தத்த² அப்பபி⁴க்கு²கோ விஹாரோ ஹோதீதி இத³ம் ப³ஹுபி⁴க்கு²கே விஹாரே அஞ்ஞே பி⁴க்கூ² க³ச்ச²ந்தி, அஞ்ஞே பி⁴க்கூ² ஆக³ச்ச²ந்தி, தஸ்மா ரத்திச்சே²த³வத்தபே⁴த³காரணானி ஸோதே⁴தும் து³க்கரத்தா வுத்தம். வக்க²தி ஹி ‘‘அத² ந ஸக்கா ஸோதே⁴து’’ந்தி. ஸபா⁴கா³ பி⁴க்கூ² வஸந்தீதி இத³ம் விஸபா⁴கா³னம் வேரீபி⁴க்கூ²னம் ஸந்திகே வத்தம் ஆரோசேந்தோ பகாஸேதுகாமோ ஹோதி, தஸ்மா வுத்தம். வுத்தஞ்ஹி அட்ட²கதா²யம் (சூளவ. அட்ட². 102; வி. ஸங்க³. அட்ட². 236) ‘‘தஸ்மா அவேரிஸபா⁴க³ஸ்ஸ ஸந்திகே ஆரோசேதப்³பா³. யோ பன விஸபா⁴கோ³ ஹோதி ஸுத்வா பகாஸேதுகாமோ, ஏவரூபஸ்ஸ உபஜ்ஜா²யஸ்ஸபி ஸந்திகே நாரோசேதப்³பா³’’தி, தஸ்மா விஸபா⁴கா³னம் வஸனட்டா²னே வத்தம் அஸமாதி³யித்வா ப³ஹியேவ காதும்பி வட்டதீதி த³ட்ட²ப்³ப³ம். விஹாரேயேவாதி அந்தோஉபசாரஸீமாயமேவ. வக்க²தி ஹி ‘‘அத² ந ஸக்கா…பே… உபசாரஸீமம் அதிக்கமித்வா’’தி. ரத்திபரிக்³க³ஹோ காதப்³போ³தி ரத்திக³ணனா காதப்³பா³. வுத்தஞ்ஹி மானத்தவண்ணனாயம் ‘‘ரத்தியோ க³ணேதப்³பா³’’தி. அத² ந ஸக்கா ஸோதே⁴துந்தி ப³ஹுபி⁴க்கு²கத்தா வா விஹாரஸ்ஸ விஸபா⁴கா³னம் வஸனட்டா²னத்தா வா ரத்திச்சே²த³வத்தாபே⁴த³காரணானிபி ஸோதே⁴தும் ந ஸக்கா. வத்தம் நிக்கி²பித்வாதி பரிவாஸவத்தம் நிக்கி²பித்வா. பச்சூஸஸமயேதி பச்சி²மயாமகாலே அருணோத³யதோ புரேதரமேவ. ததா² ஹி வக்க²தி ‘‘அந்தோஅருணேயேவ வுத்தனயேன வத்தம் ஸமாதி³யித்வா தஸ்ஸ பி⁴க்கு²னோ பரிவாஸோ ஆரோசேதப்³போ³’’தி. ஏகேன பி⁴க்கு²னா ஸத்³தி⁴ந்தி விப்பவாஸரத்திச்சே²த³விமுச்சனத்த²ம் வினா பகதத்தேன ஸபி⁴க்கு²கஆவாஸஅபி⁴க்கு²கஅனாவாஸக³மனஸங்கா²தவத்தபே⁴த³விமுச்சனத்த²ஞ்ச வுத்தம். ததா² ஹி வுத்தம் ‘‘ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ அனாவாஸோ க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா’’தி (சூளவ. 76).

மானத்தவண்ணனாயம் வுத்தனயேனாதி ‘‘பரிக்கி²த்தஸ்ஸ விஹாரஸ்ஸ பரிக்கே²பதோ, அபரிக்கி²த்தஸ்ஸ பரிக்கே²பாரஹட்டா²னதோ த்³வே லேட்³டு³பாதே அதிக்கமித்வா’’தி வுத்தனயேன. யதி³ ஏவம் விஸமமித³ம் நயத³ஸ்ஸனம், பரிக்கே²பபரிக்கே²பாரஹட்டா²னே ஏவ ஹி உபசாரஸீமா ஹோதி, கஸ்மா தத்த² உபசாரஸீமதோ த்³வேலேட்³டு³பாதாதிக்கமோ வுத்தோ, இத⁴ பன உபசாரஸீமாதிக்கமோ ஏவாதி? ஸச்சம், ததா²பி விஹாரே பி⁴க்கூ²னம் ஸஜ்ஜா²யாதி³ஸத்³த³ஸவனஸப்³பா⁴வதோ ஸுவிதூ³ராதிக்கமோ வுத்தோ, இத⁴ பன உபசாரஸீமதோ அதிக்கமமத்தோபி அதிக்கமோயேவாதி கத்வா வுத்தோ. பு³த்³த⁴மதஞ்ஞுனோ ஹி அட்ட²கதா²சரியா. ததா² ஹி வுத்தம் வஜிரபு³த்³தி⁴டீகாயம் (வஜிர. டீ. சூளவக்³க³ 97) ‘‘பரிக்கி²த்தஸ்ஸ விஹாரஸ்ஸ பரிக்கே²பதோதிஆதி³ கிஞ்சாபி பாளியம் நத்தி², அத² கோ² அட்ட²கதா²சரியானம் வசனேன ததா² ஏவ படிபஜ்ஜிதப்³ப³ந்தி ச வுத்த’’ந்தி.

மானத்தவண்ணனாயம் சதூஹி பஞ்சஹி வா பி⁴க்கூ²ஹி ஸத்³தி⁴ந்தி இத³ம் பன ஊனேக³ணேசரணரத்திச்சே²த³விமுச்சனத்த²ம் வுத்தம். த்³வே லேட்³டு³பாதே அதிக்கமித்வாதிஆதி³ அஞ்ஞேஸம் பி⁴க்கூ²னம் ஸவனூபசாரத³ஸ்ஸனூபசாரவிஜஹனத்த²ம் வுத்தம். தேனேவாஹ டீகாசரியோ ‘‘த்³வே லேட்³டு³பாதே அதிக்கமித்வாதி இத³ம் விஹாரே பி⁴க்கூ²னம் ஸஜ்ஜா²யாதி³ஸத்³த³ஸவனூபசாரவிஜஹனத்த²ம் வுத்தம், ‘மஹாமக்³க³தோ ஓக்கம்மாதி இத³ம் மக்³க³படிபன்னானம் பி⁴க்கூ²னம் ஸவனூபசாரவிஜஹனத்த²ம், கு³ம்பே³ன வாதிஆதி³ த³ஸ்ஸனூபசாரவிஜஹனத்த²’’ந்தி. தஸ்மா யதா²வுத்தம் து³வித⁴ம் டா²னம் பரிவஸந்தமானத்தசாரிகபி⁴க்கூ²ஹி நிஸீதி³தப்³ப³ட்டா²னம் ஹோதி. தேஸு ச யதி³ அந்தோவிஹாரேயேவ நிஸீதி³த்வா பரிவஸதி, உபசாரஸீமக³தானம் ஸப்³பே³ஸம் பி⁴க்கூ²னம் ஆரோசேதப்³ப³ம் ஹோதி. அத² ப³ஹிஉபசாரஸீமாயம், தி³ட்ட²ரூபானம் ஸுதஸத்³தா³னம் ஆரோசேதப்³ப³ம். அதி³ட்ட²அஸுதானம்பி அந்தோத்³வாத³ஸஹத்த²க³தானம் ஆரோசேதப்³ப³மேவ. வுத்தஞ்ஹி வஜிரபு³த்³தி⁴டீகாயம் ‘‘வத்தம் நிக்கி²பித்வா வஸந்தஸ்ஸ உபசாரஸீமக³தானம் ஸப்³பே³ஸம் ஆரோசனகிச்சம் நத்தி², தி³ட்ட²ரூபானம் ஸுதஸத்³தா³னம் ஆரோசேதப்³ப³ம். அதி³ட்ட²அஸ்ஸுதானம்பி அந்தோத்³வாத³ஸஹத்த²க³தானம் ஆரோசேதப்³ப³ம். இத³ம் வத்தம் நிக்கி²பித்வா வஸந்தஸ்ஸ லக்க²ணந்தி வுத்த’’ந்தி. இத³ஞ்ச வத்தம் அனிக்கி²பித்வா வஸந்தஸ்ஸ அந்தோவிஹாரேயேவ ரத்திபரிக்³க³ஹஸ்ஸ ச நிக்கி²பித்வா வஸந்தஸ்ஸ உபசாரஸீமம் அதிக்கமித்வா வத்தஸமாதா³னஸ்ஸ ச அட்ட²கதா²யம் வுத்தத்தா வுத்தம். உபசாரோ பன அந்தோஸீமாய டி²தானம் ஸகலஉபசாரஸீமா ஹோதி, ப³ஹிஉபசாரஸீமாய டி²தானம் த்³வாத³ஸஹத்த²மத்தம். தேனேவ ஹி உத்³தே³ஸப⁴த்தாதி³ஸங்க⁴லாபோ⁴ யதி³ அந்தோஸீமாய உப்பஜ்ஜதி, ஸீமட்ட²கஸங்க⁴ஸ்ஸ ஹோதி. யதி³ ப³ஹிஸீமாயம், த்³வாத³ஸஹத்த²ப்³ப⁴ந்தரே பத்தபி⁴க்கூ²னம், தஸ்மா உபசாரவஸேனபி ஏஸ அத்தோ² விஞ்ஞாயதி. ததா² ஹி வுத்தம் வஜிரபு³த்³தி⁴டீகாயம் (வஜிர. டீ. சூளவக்³க³ 97) ‘‘அத்தி²பா⁴வம் ஸல்லக்கே²த்வாதி த்³வாத³ஸஹத்தே² உபசாரே ஸல்லக்கே²த்வா அனிக்கி²த்தவத்தானம் உபசாரஸீமாய ஆக³தபா⁴வம் ஸல்லக்கே²த்வா ஸஹவாஸாதி³கம் வேதி³தப்³ப³ந்தி ச வுத்த’’ந்தி.

ஏவம் அனிக்கி²த்தவத்தானம் ஹுத்வா பரிவஸந்தானம் அந்தோவிஹாரேயேவ வஸனஸ்ஸ, நிக்கி²த்தவத்தானம் ஹுத்வா பரிவஸந்தானம் விஹாரதோ ப³ஹி த்³வே லேட்³டு³பாதே அதிக்கமித்வா வஸனஸ்ஸ ச அட்ட²கதா²தீ³ஸு பகரணேஸு ஆக³தத்தா ததா²க³தனயோ பகரணாக³தனயோ ஹோதி. இதா³னி பன ஆசரியா அனிக்கி²த்தவத்தஸ்ஸ ச ரத்திச்சே²த³வத்தபே⁴த³தோ³ஸே பரிஹரிதும் அதிது³க்கரத்தா, நிக்கி²த்தவத்தஸ்ஸ ச தே³வஸிகம் பச்சூஸஸமயே ப³ஹிஸீமக³மனஸ்ஸ து³க்க²த்தா, வாளஸரீஸபாதி³பரிஸயஸ்ஸ ச ஆஸங்கிதப்³ப³பா⁴வதோ ரத்திச்சே²த³வத்தபே⁴த³பரிஹரணவஸேன லக்க²ணபாரிபூரிமேவ மனஸி கரோந்தா நிக்கி²த்தவத்தாபி ஸமானா அந்தோவிஹாரேயேவ பரிவாஸவஸனஞ்ச மானத்தசரணஞ்ச கரோந்தி.

ஏகச்சே ஆசரியா ப³ஹிஉபசாரஸீமாயம் பதிரூபட்டா²னே பகதத்தானம் பி⁴க்கூ²னம் வஸனஸாலம் காராபேத்வா பாரிவாஸிகபி⁴க்கூ²னம் நிபஜ்ஜனமஞ்சம் ஸப்³ப³தோ ச²ன்னபரிச்சி²ன்னம் ஸத்³வாரப³ந்த⁴னம் ஸுகு³த்தம் காராபேத்வா தம் பதே³ஸம் வதியா பரிக்கி²பாபேத்வா ஸாயன்ஹஸமயே தத்த² க³ந்த்வா உபட்டா²கஸாமணேராத³யோ நிவத்தாபேத்வா புரிமயாமே வா மஜ்ஜி²மயாமே வா ஸமந்ததோ ஸத்³த³சி²ஜ்ஜனகாலே பகதத்தபி⁴க்கூ² ஸாலாயம் நிபஜ்ஜாபேத்வா பாரிவாஸிகபி⁴க்கூ² வத்தம் ஸமாதா³பேத்வா ஆரோசாபேத்வா அத்தனோ அத்தனோ மஞ்சகேஸு நிபஜ்ஜாபேத்வா பச்சி²மயாமகாலே உட்டா²பேத்வா அருணே உட்டி²தே ஆரோசாபேத்வா வத்தம் நிக்கி²பாபேந்தி. ஏஸ நயோ பகரணேஸு அனாக³தத்தா ஆசரியானம் மதேன கதத்தா ஆசரியனயோ நாம. ஏஸ நயோபி யதா²ருததோ பகரணேஸு அனாக³தோபி பகரணானுலோமவஸேன ரத்திச்சே²த³வத்தபே⁴த³தோ³ஸே பரிஹரித்வா லஜ்ஜிபேஸலேஹி ப³ஹுஸ்ஸுதேஹி ஸிக்கா²காமேஹி வினயே பகதஞ்ஞூஹி விசாரிதோ ஸமானோ ஸுந்த³ரோ பஸத்தோ²வ ஹோதி, தஸ்மா ‘‘அனுலோமனயோ’’திபி வத்தும் வட்டதி.

நனு ச அனிக்கி²த்தவத்தானம்யேவ அந்தோவிஹாரே வஸனம் அட்ட²கதா²யம் வுத்தம், அத² கஸ்மா நிக்கி²த்தவத்தாபி ஸமானா வஸந்தீதி? ஸச்சம், தத்த² பன அப்பபி⁴க்கு²கத்தா ஸபா⁴க³பி⁴க்கூ²னம் வஸனட்டா²னத்தா ச ரத்திச்சே²த³வத்தபே⁴த³தோ³ஸே ச பரிஹரிதும் ஸக்குணேய்யபா⁴வதோ ஸகலரத்திந்தி³வம்பி வத்தம் அனிக்கி²பித்வா வஸனம் வுத்தம், இத⁴ பன ததா² அஸக்குணேய்யபா⁴வதோ தி³வா வத்தம் நிக்கி²பித்வா ரத்தியம் ஸமாதி³யந்தோ ஆக³ந்துகானம் அனாக³மனகாலபா⁴வதோ, ஸத்³த³சி²ஜ்ஜனகாலபா⁴வதோ ச ரத்திச்சே²தா³தி³தோ³ஸே பரிஹரிதும் ஸக்குணேய்யத்தா தத³னுலோமோயேவ ஹோதீதி மந்த்வா ஆசரியா ஏவம் கரோந்தீதி த³ட்ட²ப்³ப³ம்.

ஏவம் ஹோது, ப³ஹிஉபசாரஸீமாய வஸந்தானம் படிச்ச²ன்னட்டா²னே நிஸீத³னமேவ அட்ட²கதா²யம் வுத்தம், ந பகதத்தஸாலாகரணமஞ்சகரணாதீ³னி, அத² கஸ்மா ஏதானி கரோந்தீதி? ஸச்சம், ததா²பி பகதத்தஸாலாகரணம் பாரிவாஸிகானம் பி⁴க்கூ²னம் பகதத்தேஹி பி⁴க்கூ²ஹி விப்பவாஸரத்திச்சே²த³வத்தபே⁴த³தோ³ஸபரிஹரணத்த²ம், தம் ‘‘தயோ கோ², உபாலி, பாரிவாஸிகஸ்ஸ பி⁴க்கு²னோ ரத்திச்சே²தா³ ஸஹவாஸோ, விப்பவாஸோ, அனாரோசனா’’தி வுத்தபாட²ம் (சூளவ. 83) அனுலோமேதி. மஞ்சகரணம் ஸஹவாஸரத்திச்சே²த³வத்தபே⁴த³தோ³ஸபரிஹரணத்த²ம், தம் ‘‘ந, பி⁴க்க²வே, பாரிவாஸிகேன பி⁴க்கு²னா பகதத்தேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³ம், ந ஏகச்ச²ன்னே அனாவாஸே வத்த²ப்³ப³ம், ந ஏகச்ச²ன்னே ஆவாஸே வா அனாவாஸே வா வத்த²ப்³ப³’’ந்தி வுத்தபாட²ஞ்ச (சூளவ. 81) யதா²வுத்தபாட²ஞ்ச அனுலோமேதி. ஆதி³-ஸத்³தே³ன ஸாயன்ஹஸமயே க³மனாதீ³னி ஸங்க³ண்ஹாதி. தேஸு அட்ட²கதா²யம் பச்சூஸஸமயே க³மனே ஏவ வுத்தேபி ஸாயன்ஹஸமயே க³மனம் ரத்திக³மனஸ்ஸ ப³ஹுபரிஸ்ஸயத்தா பரிஸ்ஸயவினோத³னத்த²ம், தம் ‘‘அந்தராயதோ பரிமுச்சனத்தா²ய க³ந்தப்³ப³மேவா’’தி வுத்தம் அட்ட²கதா²பாட²ம் (சூளவ. அட்ட². 76) அனுலோமேதி. உபட்டா²கஸாமணேராதீ³னம் நிவத்தாபனம் அனுபஸம்பன்னேன ஸஹஸேய்யஸங்கானிவத்தனத்த²ம், தம் ‘‘யோ பன பி⁴க்கு² அனுபஸம்பன்னேன ஸஹஸேய்யம் கப்பேய்ய, பாசித்திய’’ந்தி வுத்தம் மாதிகாபாட²ம் (பாசி. 49) அனுலோமேதி. புரிமயாமே வா மஜ்ஜி²மயாமே வா ஸமந்ததோ ஸத்³த³சி²ஜ்ஜனகாலே பகதத்தபி⁴க்கூ² ஸாலாயம் நிபஜ்ஜாபேத்வா பாரிவாஸிகபி⁴க்கூ²னம் வத்தஸமாதா³பனம் அஞ்ஞபி⁴க்கூ²னம் ஸத்³த³ஸவனவிவஜ்ஜனத்த²ம், தம் அனாரோசனரத்திச்சே²த³தோ³ஸபரிஹரணத்த²ம், தம் யதா²வுத்தரத்திச்சே²த³பாட²ம் அனுலோமேதி.

நனு ச அட்ட²கதா²யம் அந்தோஅருணேயேவ வத்தஸமாதா³பனம் வுத்தம், அத² கஸ்மா ‘‘புரிமயாமமஜ்ஜி²மயாமேஸூ’’தி வுத்தந்தி? நாயம் தோ³ஸோ, ஹிய்யோஅருணுக்³க³மனதோ பட்டா²ய ஹி யாவ அஜ்ஜஅருணுக்³க³மனா ஏகோ ரத்திந்தி³வோ அஜ்ஜஅருணஸ்ஸ அந்தோ நாம, அஜ்ஜஅருணதோ பட்டா²ய பச்சா²காலோ அருணஸ்ஸ ப³ஹி நாம, தஸ்மா புரிமமஜ்ஜி²மயாமேஸு கதவத்தஸமாதா³னம்பி அருணோத³யதோ புரே கதத்தா அந்தோஅருணே கதம்யேவ ஹோதி. வத்தம் அஸமாதி³யித்வா நிபஜ்ஜனே ச ஸதி நித்³தா³வஸேன அருணுக்³க³மனகாலம் அஜானித்வா வத்தஸமாதா³னம் அதிக்கந்தம் ப⁴வேய்ய, தஸ்மா புரேதரமேவ ஸமாதா³னம் கத்வா நிபஜ்ஜனம் ஞாயாக³தம் ஹோதி, ‘‘அந்தோஅருணேயேவ வுத்தனயேனேவ வத்தம் ஸமாதி³யித்வா’’தி வுத்தஅட்ட²கதா²பாட²ஞ்ச (சூளவ. அட்ட². 102) அனுலோமேதி.

ஏவம் ஹோது, ஏவம் ஸந்தேபி கஸ்மா ‘‘ஆரோசாபேத்வா’’தி வுத்தம், நனு மாளகஸீமாயம் ஸமாதி³ன்னகாலேயேவ வத்தமாரோசிதந்தி? ஸச்சம் ஆரோசிதம், அயம் பன பி⁴க்கு² தி³வா வத்தம் நிக்கி²பித்வா நிஸின்னோ, இதா³னி ஸமாதி³ன்னோ, தஸ்மா மாளகஸீமாய ஆரோசிதம்பி புன ஆரோசேதப்³ப³ம் ஹோதி. இத³ம்பி ‘‘அந்தோஅருணேயேவ வுத்தனயேனேவ வத்தம் ஸமாதி³யித்வா தஸ்ஸ பி⁴க்கு²னோ பரிவாஸோ ஆரோசேதப்³போ³’’தி பாட²ம் (சூளவ. அட்ட². 102) அனுலோமேதி. அத² ‘‘அத்தனோ அத்தனோ மஞ்சகேஸு நிபஜ்ஜாபேத்வா’’தி கஸ்மா வுத்தம், நனு அஞ்ஞமஞ்ஞஸ்ஸ மஞ்சேஸு நிபஜ்ஜமானாபி பகதத்தஸாலதோ நிப்³போ³த³கபதனட்டா²னதோ ப³ஹி நிபஜ்ஜமானா ஸஹவாஸரத்திச்சே²த³தோ³ஸதோ முத்தாயேவாதி? ந பனேவம் த³ட்ட²ப்³ப³ம். ந ஹி பாரிவாஸிகோ பகதத்தபி⁴க்கூ²ஹேவ ஏகச்ச²ன்னே நிபன்னோ ஸஹவாஸரத்திச்சே²த³ப்பத்தோ ஹோதி, அத² கோ² அஞ்ஞமஞ்ஞம்பி ஹோதியேவ. வுத்தஞ்சேதம் ஸமந்தபாஸாதி³காயம் (சூளவ. அட்ட². 81) ‘‘ஸசே ஹி த்³வே பாரிவாஸிகா ஏகதோ வஸேய்யும், தே அஞ்ஞமஞ்ஞஸ்ஸ அஜ்ஜா²சாரம் ஞத்வா அகா³ரவா வா விப்படிஸாரினோ வா ஹுத்வா பாபிட்ட²தரம் வா ஆபத்திம் ஆபஜ்ஜேய்யும் விப்³ப⁴மேய்யும் வா, தஸ்மா நேஸம் ஸஹஸேய்யா ஸப்³ப³ப்பகாரேன படிக்கி²த்தா’’தி. ‘‘பச்சி²மயாமகாலே உட்டா²பேத்வா அருணே உட்டி²தே ஆரோசாபேத்வா வத்தம் நிக்கி²பாபேந்தீ’’தி ஏத்த² அருணே அனுட்டி²தேயேவ வத்தனிக்கி²பனே கரியமானே ரத்திச்சே²தோ³ ஹோதி, ஸா ரத்தி க³ணனூபகா³ ந ஹோதி, தஸ்மா பட²மபரிச்சே²தே³ வுத்தம் அருணகதா²வினிச்ச²யம் ஓலோகேத்வா அருணுக்³க³மனபா⁴வோ ஸுட்டு² ஜானிதப்³போ³.

‘‘ஆரோசாபேத்வா வத்தம் நிக்கி²பாபேதப்³ப³’’ந்தி வுத்தம். கஸ்மா ஆரோசாபேதி, நனு ஸமாதி³ன்னகாலேயேவ ஆரோசிதந்தி? ஸச்சம், ததா²பி பாரிவாஸிகவத்தஸமாதா³னகாலே ஆரோசிதேஸு பி⁴க்கூ²ஸு ஏகச்சே நிக்கி²பனகாலே க³ச்ச²ந்தி, அஞ்ஞே ஆக³ச்ச²ந்தி, ஏவம் பரிஸஸங்கமனம்பி ஸியா, ததா² ச ஸதி அபி⁴னவாக³தானம் ஸப்³பா⁴வா ஆரோசேதப்³ப³ம் ஹோதி, அஸதி பன அபி⁴னவாக³தபி⁴க்கு²ம்ஹி ஆரோசனகிச்சம் நத்தி². ஏவம் ஸந்தேபி ஆரோசனே தோ³ஸாபா⁴வதோ புன ஆரோசனம் ஞாயாக³தம் ஹோதி, மானத்தசரணகாலே பன ஸமாதா³னே ஆரோசிதேபி நிக்கி²பனே அவஸ்ஸம் ஆரோசேதப்³ப³மேவ. கஸ்மா? தி³வஸந்தரபா⁴வதோ. ‘‘தே³வஸிகம் ஆரோசேதப்³ப³’’ந்தி (சூளவ. அட்ட². 90) ஹி வுத்தம். ஏவம் ஸந்தேபி ஸாயம் ஸமாதா³னகாலே ஆரோசேஸ்ஸதி, தஸ்மா நிக்கி²பனே ஆரோசனகிச்சம் நத்தீ²தி சே? ந, ஸாயம் ஸமாதா³னகாலே ஏதே பி⁴க்கூ² ஆக³ச்சி²ஸ்ஸந்திபி, ந ஆக³ச்சி²ஸ்ஸந்திபி, அனாக³தானம் கத²ம் ஆரோசேதும் லபி⁴ஸ்ஸதி, அனாரோசனே ச ஸதி ரத்திச்சே²தோ³ ஸியா, தஸ்மா தஸ்மிம் தி³வஸே அருணே உட்டி²தே வத்தனிக்கி²பனதோ புரேயேவ ஆரோசேதப்³ப³ந்தி நோ மதி, ஸுட்டு²தரம் உபதா⁴ரேத்வா க³ஹேதப்³ப³ம். ஏவம் பகரணாக³தனயேன வா பகரணானுலோமஆசரியனயேன வா ஸம்மாஸம்பு³த்³த⁴ஸ்ஸ ஆணம் பதிட்டா²பேந்தேன வினயகோவிதே³ன ப³ஹுஸ்ஸுதேன லஜ்ஜீபேஸலபூ⁴தேன வினயத⁴ரேன விஸுத்³தி⁴காமானம் பேஸலானம் பி⁴க்கூ²னம் ஸீலவிஸுத்³த⁴த்தா²ய ஸுட்டு² விசாரேத்வா பரிவாஸவத்தாமானத்தசரணவத்தானி ஆசிக்கி²தப்³பா³னீதி.

இமஸ்மிம் டா²னே லஜ்ஜீபி⁴க்கூ²னம் பரிவாஸாதி³கதா²ய குஸலத்த²ம் நானாவாத³னயோ வுச்சதே – கேசி பி⁴க்கூ² ‘‘பகதத்தஸாலம் குருமானேன தஸ்ஸா ஸாலாய மஜ்ஜே² த²ம்ப⁴ம் நிமித்தம் கத்வா ததோ த்³வாத³ஸஹத்த²மத்தம் பதே³ஸம் ஸல்லக்கே²த்வா யதா² பஞ்ஞத்தே பாரிவாஸிகானம் மஞ்சே நிபன்னஸ்ஸ பி⁴க்கு²ஸ்ஸ கீ³வா தஸ்ஸ பதே³ஸஸ்ஸ உபரி ஹோதி, ததா² பஞ்ஞாபேதப்³போ³. ஏவம் கதே ஸுகதம் ஹோதீ’’தி வத³ந்தி கரோந்தி ச. ஏகச்சே ‘‘மஞ்சே நிபன்னஸ்ஸ பி⁴க்கு²ஸ்ஸ கடி தஸ்ஸ பதே³ஸஸ்ஸ உபரி ஹோதி, யதா² பஞ்ஞாபேதப்³போ³, ஏவம் கதே ஸுகதம் ஹோதீ’’தி வத³ந்தி கரோந்தி ச, தம் வசனம் நேவ பாளியம், ந அட்ட²கதா²டீகாதீ³ஸு விஜ்ஜதி, கேவலம் தேஸம் பரிகப்பமேவ. அயம் பன நேஸம் அதி⁴ப்பாயோ ஸியா – ‘‘த்³வாத³ஸஹத்த²ம் பன உபசாரம் முஞ்சித்வா நிஸீதி³தும் வட்டதீ’’தி அட்ட²கதா²யம் வுத்தவசனஞ்ச ‘‘அத² த்³வாத³ஸஹத்த²ம் உபசாரம் ஓக்கமித்வா அஜானந்தஸ்ஸேவ க³ச்ச²தி, ரத்திச்சே²தோ³ ஹோதி ஏவ, வத்தபே⁴தோ³ பன நத்தீ²’’தி அட்ட²கதா²வசனஞ்ச (சூளவ. அட்ட². 97) ‘‘அதி³ட்ட²அஸ்ஸுதானம்பி அந்தோத்³வாத³ஸஹத்த²க³தானம் ஆரோசேதப்³ப³’’ந்தி வுத்தடீகாவசனஞ்ச (ஸாரத்த². டீ. சூளவக்³க³ 3.97) ‘‘அதி³ட்ட²அஸ்ஸுதானம்பி அந்தோத்³வாத³ஸஹத்த²க³தானம் ஆரோசேதப்³ப³ம், ‘இத³ம் வத்தம் நிக்கி²பித்வா வஸந்தஸ்ஸ லக்க²ண’ந்தி வுத்த’’ந்தி வுத்தவஜிரபு³த்³தி⁴டீகாவசனஞ்ச (வஜிர. டீ. சூளவக்³க³ 97) ‘‘அத்தி²பா⁴வம் ஸல்லக்கே²த்வாதி த்³வாத³ஸஹத்தே² உபசாரே ஸல்லக்கே²த்வா, அனிக்கி²த்தவத்தானம் உபசாரஸீமாய ஆக³தபா⁴வம் ஸல்லக்கே²த்வா ஸஹவாஸாதி³கம் வேதி³தப்³ப³’’ந்தி வுத்தம் வஜிரபு³த்³தி⁴டீகாவசனஞ்ச பஸ்ஸித்வா அயோனிஸோ அத்த²ம் க³ஹேத்வா ஸப்³ப³த்த² த்³வாத³ஸஹத்த²மேவ பமாணம், ததோ ஊனம்பி அதி⁴கம்பி ந வட்டதி, தஸ்மா யதா²வுத்தனயேன மஜ்ஜே² த²ம்ப⁴தோ த்³வாத³ஸஹத்த²மத்தே பதே³ஸே நிபன்னஸ்ஸ பி⁴க்கு²ஸ்ஸ கீ³வா வா கடி வா ஹோது, ஏவம் ஸந்தே த்³வாத³ஸஹத்த²ப்பதே³ஸே பாரிவாஸிகபி⁴க்கு² ஹோதி, ததோ ஸஹவாஸதோ வா விப்பவாஸதோ வா ரத்திச்சே²த³வத்தபே⁴த³தோ³ஸா ந ஹோந்தீதி.

தத்ரேவம் யுத்தாயுத்தவிசாரணா காதப்³பா³. யதா²வுத்தபாடே²ஸு பட²மபாட²ஸ்ஸ அயமதி⁴ப்பாயோ – பகதத்தபி⁴க்கு²ம்ஹி ச²மாய நிஸின்னே யதி³ பாரிவாஸிகபி⁴க்கு² ஆஸனே நிஸீதி³துகாமோ, பகதத்தஸ்ஸ பி⁴க்கு²னோ நிஸின்னட்டா²னதோ த்³வாத³ஸஹத்த²ம் உபசாரம் முஞ்சித்வாவ நிஸீதி³தும் வட்டதி, ந த்³வாத³ஸஹத்த²ப்³ப⁴ந்தரேதி. ஏதேன த்³வீஸுபி ச²மாய நிஸின்னேஸு த்³வாத³ஸஹத்த²ப்³ப⁴ந்தரேபி வட்டதி, த்³வாத³ஸஹத்த²ப்பதே³ஸதோ ப³ஹி நிஸீத³ந்தோ ஆஸனேபி நிஸீதி³தும் வட்டதீதி த³ஸ்ஸேதி. தேனாஹ ‘‘ந ச²மாய நிஸின்னேதி பகதத்தே பூ⁴மியம் நிஸின்னே இதரேன அந்தமஸோ திணஸந்த²ரேபி உச்சதரே வாலிகதலேபி வா ந நிஸீதி³தப்³ப³ம், த்³வாத³ஸஹத்த²ம் பன உபசாரம் முஞ்சித்வா நிஸீதி³தும் வட்டதீ’’தி (சூளவ. அட்ட². 81). இதி பகதத்தே ச²மாய நிஸின்னே பாரிவாஸிகேன நிஸீதி³தப்³ப³ட்டா²னதீ³பகோ அயம் பாடோ², ந மஞ்சபஞ்ஞாபனட்டா²னஸயனட்டா²னதீ³பகோ, தம் புப்³பா³பரபரிபுண்ணம் ஸகலம் பாட²ம் அனோலோகேத்வா ஏகதே³ஸமத்தமேவ பஸ்ஸித்வா பரிகப்பவஸேன அயோனிஸோ அதி⁴ப்பாயம் க³ண்ஹந்தி.

து³தியபாட²ஸ்ஸ பன அயமதி⁴ப்பாயோ – ப³ஹி உபசாரஸீமாய படிச்ச²ன்னட்டா²னே வத்தம் ஸமாதி³யித்வா நிஸின்னே பி⁴க்கு²ஸ்மிம் தஸ்ஸ நிஸின்னட்டா²னதோ த்³வாத³ஸஹத்த²ம் உபசாரம் ஓக்கமித்வா தஸ்ஸ அஜானந்தஸ்ஸேவ அஞ்ஞோ பி⁴க்கு² க³ச்ச²தி, தஸ்ஸ பாரிவாஸிகஸ்ஸ பி⁴க்கு²னோ ரத்திச்சே²தோ³ ஹோதி, வத்தபே⁴தோ³ பன நத்தி². கஸ்மா ரத்திச்சே²தோ³ ஹோதி? உபசாரம் ஓக்கமிதத்தா. கஸ்மா ந வத்தபே⁴தோ³? அஜானந்தத்தாதி. ஏதேன ப³ஹிஉபசாரஸீமாய உபசாரோ த்³வாத³ஸஹத்த²ப்பமாணோ ஹோதி ஆரோசனக்கே²த்தபூ⁴தோதி த³ஸ்ஸேதி. தேனாஹ ‘‘கு³ம்பே³ன வா வதியா வா படிச்ச²ன்னட்டா²னே நிஸீதி³தப்³ப³ம், அந்தோஅருணேயேவ வுத்தனயேன வத்தம் ஸமாதி³யித்வா ஆரோசேதப்³ப³ம். ஸசே அஞ்ஞோ கோசி பி⁴க்கு² கேனசிதே³வ கரணீயேன தம் டா²னம் ஆக³ச்ச²தி, ஸசே ஏஸ தம் பஸ்ஸதி, ஸத்³த³ம் வாஸ்ஸ ஸுணாதி, ஆரோசேதப்³ப³ம். அனாரோசேந்தஸ்ஸ ரத்திச்சே²தோ³ சேவ வத்தபே⁴தோ³ ச. அத² த்³வாத³ஸஹத்த²ம் உபசாரம் ஓக்கமித்வா அஜானந்தஸ்ஸேவ க³ச்ச²தி, ரத்திச்சே²தோ³ ஹோதி ஏவ, வத்தபே⁴தோ³ பன நத்தீ²’’தி (சூளவ. அட்ட². 97). இதி அயம்பி பாடோ² ஆரோசனக்கே²த்ததீ³பகோ ஹோதி, ந மஞ்சபஞ்ஞாபனாதி³தீ³பகோதி த³ட்ட²ப்³ப³ம்.

ததியபாட²ஸ்ஸ பன அயமதி⁴ப்பாயோ – கிம் ப³ஹிஉபசாரஸீமாய வத்தஸமாதா³னட்டா²னம் ஆக³தபி⁴க்கூ²னம் தி³ட்ட²ரூபானம் ஸுதஸத்³தா³னம்யேவ ஆரோசேதப்³ப³ந்தி புச்சா²ய ஸதி அதி³ட்ட²அஸ்ஸுதானம்பி அந்தோத்³வாத³ஸஹத்த²க³தானம் ஆரோசேதப்³ப³ந்தி விஸ்ஸஜ்ஜேதப்³ப³ந்தி. ஏதேன அதி³ட்ட²அஸ்ஸுதானம் பன அந்தோத்³வாத³ஸஹத்த²க³தானம்யேவ ஆரோசேதப்³ப³ம், ந ப³ஹித்³வாத³ஸஹத்த²க³தானம், தி³ட்ட²ஸுதானம் பன அந்தோத்³வாத³ஸஹத்த²க³தானம்பி ப³ஹித்³வாத³ஸஹத்த²க³தானம்பி ஆகாஸாதி³க³தானம்பி ஆரோசேதப்³ப³மேவாதி த³ஸ்ஸேதி. தேனாஹ ‘‘அயம் பனேத்த² தே²ரஸ்ஸ அதி⁴ப்பாயோ – வத்தம் நிக்கி²பித்வா பரிவஸந்தஸ்ஸ உபசாரக³தானம் ஸப்³பே³ஸம் ஆரோசனகிச்சம் நத்தி², தி³ட்ட²ரூபானம் ஸுதஸத்³தா³னம் ஆரோசேதப்³ப³ம், அதி³ட்ட²அஸ்ஸுதானம்பி அந்தோத்³வாத³ஸஹத்த²க³தானம் ஆரோசேதப்³ப³ம். இத³ம் வத்தம் நிக்கி²பித்வா பரிவஸந்தஸ்ஸ லக்க²ண’’ந்தி (ஸாரத்த². டீ. சூளவக்³க³ 3.97). இதி அயம்பி பாடோ² ஆரோசேதப்³ப³லக்க²ணதீ³பகோ ஹோதி, ந மஞ்சபஞ்ஞாபனாதி³தீ³பகோதி. சதுத்த²பாட²ஸ்ஸ அதி⁴ப்பாயோபி ததியபாட²ஸ்ஸ அதி⁴ப்பாயஸதி³ஸோவ.

பஞ்சமபாட²ஸ்ஸ பன அயமதி⁴ப்பாயோ – அத்தி²பா⁴வம் ஸல்லக்கே²த்வாதி ஏத்த² ஏதஸ்மிம் அட்ட²கதா²வசனே நிக்கி²த்தவத்தானம் பி⁴க்கூ²னம் அத்தனோ நிஸின்னட்டா²னதோ த்³வாத³ஸஹத்தே² உபசாரே அஞ்ஞேஸம் பி⁴க்கூ²னம் அத்தி²பா⁴வம் ஸல்லக்கே²த்வா அனிக்கி²த்தவத்தானம் உபசாரஸீமாய அஞ்ஞேஸம் பி⁴க்கூ²னம் ஆக³தபா⁴வம் ஸல்லக்கே²த்வா ஸஹவாஸாதி³கம் வேதி³தப்³ப³ம். ஆதி³-ஸத்³தே³ன விப்பவாஸஅனாரோசனஊனேக³ணேசரணானி ஸங்க³ண்ஹாதி. அயஞ்ச யஸ்மா க³ணஸ்ஸ ஆரோசேத்வா பி⁴க்கூ²னஞ்ச அத்தி²பா⁴வம் ஸல்லக்கே²த்வா வஸி, தஸ்மா நிக்கி²த்தவத்தானம் ப³ஹிஉபசாரஸீமாய ஸமாதி³ன்னத்தா அத்தனோ நிஸின்னட்டா²னதோ த்³வாத³ஸஹத்தே² உபசாரே அஞ்ஞேஸம் பி⁴க்கூ²னம் அத்தி²பா⁴வம் ஸல்லக்கே²த்வா அனிக்கி²த்தவத்தானம் அந்தோவிஹாரே ஸமாதி³ன்னத்தா உபசாரஸீமாய அஞ்ஞேஸம் பி⁴க்கூ²னம் ஆக³தபா⁴வம் ஸல்லக்கே²த்வா ஸஹவாஸவிப்பவாஸஅனாரோசனஊனேக³ணேசரணஸங்கா²தானி வத்தச்சே²த³காரணானி வேதி³தப்³பா³னீதி. வுத்தஞ்ஹி அட்ட²கதா²யம் (சூளவ. அட்ட². 97) ‘‘அயஞ்ச யஸ்மா க³ணஸ்ஸ ஆரோசேத்வா பி⁴க்கூ²னஞ்ச அத்தி²பா⁴வம் ஸல்லக்கே²த்வாவ வஸி, தேனஸ்ஸ ஊனேக³ணேசரணதோ³ஸோ வா விப்பவாஸோ வா ந ஹோதீ’’தி. இதி அயஞ்ச பாடோ² பகதத்தபி⁴க்கூ²ஸு க³தேஸுபி வத்தம் ஆரோசேத்வா பி⁴க்கூ²னம் அத்தி²பா⁴வம் ஸல்லக்கே²த்வா வஸிதத்தா தோ³ஸாபா⁴வமேவ தீ³பேதி, ந மஞ்சபஞ்ஞாபனாதீ³னி. இதி இமேஸம் பாடா²னம் அயோனிஸோ அதி⁴ப்பாயம் க³ஹேத்வா ‘‘ஸப்³ப³த்த² த்³வாத³ஸஹத்த²மேவ பமாண’’ந்தி மஞ்ஞமானா விசாரிம்ஸு, தேஸம் தி³ட்டா²னுக³திம் ஆபஜ்ஜமானா ஸிஸ்ஸானுஸிஸ்ஸாத³யோபி ததே²வ கரோந்தி, ததே³தம் அப்பமாணம்.

கத²ம்? யம் தத்த² பகதத்தஸாலாய மஜ்ஜே² த²ம்ப⁴ம் நிமித்தம் கத்வா த்³வாத³ஸஹத்த²ம் மினிம்ஸு, தத³ப்பமாணம். ந ஹி த²ம்பே⁴ன வா ஸாலாய வா ஸஹவாஸோ வா விப்பவாஸோ வா வுத்தோ, அத² கோ² பகதத்தபி⁴க்கு²னாவ. வுத்தஞ்ஹி ஸமந்தபாஸாதி³காயம் (சூளவ. அட்ட². 83) ‘‘தத்த² ஸஹவாஸோதி ய்வாயம் பகதத்தேன பி⁴க்கு²னா ஸத்³தி⁴ம் ஏகச்ச²ன்னேதிஆதி³னா நயேன வுத்தோ ஏகதோ வாஸோ. விப்பவாஸோதி ஏககஸ்ஸேவ வாஸோ’’தி. யஞ்ஹி ததோ த்³வாத³ஸஹத்த²மத்தட்டா²னே பி⁴க்கு²ஸ்ஸ கீ³வாட்ட²பனம் வா கடிட்ட²பனம் வா வத³ந்தி, தத³பி அப்பமாணம். ப³ஹிஉபசாரஸீமாய ஹி பரிவஸந்தஸ்ஸ பி⁴க்கு²ஸ்ஸ ஸகலஸரீரம் பகதத்தபி⁴க்கூ²னம் அந்தோத்³வாத³ஸஹத்தே² உபசாரே ட²பேதப்³ப³ம் ஹோதி, ந ஏகதே³ஸமத்தம்.

தேஸம் பன அயமதி⁴ப்பாயோ ஸியா – த்³வாத³ஸஹத்த²ப்பதே³ஸதோ ஸகலஸரீரஸ்ஸ அந்தோகரணே ஸதி ஸஹவாஸோ ப⁴வேய்ய, ப³ஹிகரணே ஸதி விப்பவாஸோ, தேன உபட்³ட⁴ம் அந்தோ உபட்³ட⁴ம் ப³ஹி ஹோதூதி, தம் மிச்சா²ஞாணவஸேன ஹோதி. ந ஹி ஸஹவாஸதோ³ஸோ த்³வாத³ஸஹத்தே²ன கதி²தோ, அத² கோ² ஏகச்ச²ன்னே ஸயனேன. வுத்தஞ்ஹேதம் ப⁴க³வதா பாரிவாஸிகக்க²ந்த⁴கே (சூளவ. 81) ‘‘ந, பி⁴க்க²வே, பாரிவாஸிகேன பி⁴க்கு²னா பகதத்தேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³ம், ந ஏகச்ச²ன்னே அனாவாஸே வத்த²ப்³ப³ம், ந ஏகச்ச²ன்னே ஆவாஸே வா அனாவாஸே வா வத்த²ப்³ப³’’ந்தி. அட்ட²கதா²யம்பி (சூளவ. அட்ட². 81) வுத்தம் ‘‘ஏகச்ச²ன்னே ஆவாஸே’’திஆதீ³ஸு ஆவாஸோ நாம வஸனத்தா²ய கதஸேனாஸனம். அனாவாஸோ நாம சேதியக⁴ரம் போ³தி⁴க⁴ரம் ஸம்முஞ்ஜனிஅட்டகோ தா³ருஅட்டகோ பானீயமாளோ வச்சகுடி த்³வாரகோட்ட²கோதி ஏவமாதி³. ததியபதே³ன தது³ப⁴யம்பி க³ஹிதம், ‘ஏதேஸு யத்த² கத்த²சி ஏகச்ச²ன்னே ச²த³னதோ உத³கபதனட்டா²னபரிச்சி²ன்னே ஓகாஸே உக்கி²த்தகோ வஸிதும் ந லப⁴தி, பாரிவாஸிகோ பன அந்தோஆவாஸேயேவ ந லப⁴தீ’தி மஹாபச்சரியம் வுத்தம். மஹாஅட்ட²கதா²யம் பன ‘அவிஸேஸேன உத³கபாதேன வாரித’ந்தி வுத்தம். குருந்தி³யம் ‘ஏதேஸு ஏத்தகேஸு பஞ்சவண்ணச²த³னப³த்³த⁴ட்டா²னேஸு பாரிவாஸிகஸ்ஸ ச உக்கி²த்தகஸ்ஸ ச பகதத்தேன ஸத்³தி⁴ம் உத³கபாதேன வாரித’ந்தி வுத்தம், தஸ்மா நானூபசாரேபி ஏகச்ச²ன்னே ந வட்டதி. ஸசே பனேத்த² தத³ஹுபஸம்பன்னேபி பகதத்தே பட²மம் பவிஸித்வா நிபன்னே ஸட்டி²வஸ்ஸோபி பாரிவாஸிகோ பச்சா² பவிஸித்வா ஜானந்தோ நிபஜ்ஜதி, ரத்திச்சே²தோ³ சேவ வத்தபே⁴த³து³க்கடஞ்ச, அஜானந்தஸ்ஸ ரத்திச்சே²தோ³வ, ந வத்தபே⁴த³து³க்கடம். ஸசே பன தஸ்மிம் பட²மம் நிபன்னே பச்சா² பகதத்தோ பவிஸித்வா நிபஜ்ஜதி, பாரிவாஸிகோ ச ஜானாதி, ரத்திச்சே²தோ³ சேவ வத்தபே⁴த³து³க்கடஞ்ச. நோ சே ஜானாதி, ரத்திச்சே²தோ³வ, ந வத்தபே⁴த³து³க்கடந்தி, தஸ்மா ஸாலாயபி விஹாரேபி ச²த³னதோ உத³கபதனட்டா²னதோ முத்தமத்தேயேவ ஸஹவாஸதோ³ஸோ ந விஜ்ஜதீதி த³ட்ட²ப்³ப³ம்.

ஏகச்சே பன மஜ்ஜி²மத்த²ம்ப⁴தோ த்³வாத³ஸஹத்தா²யாமேன த³ண்ட³கேன சக்கம் ப⁴மித்வா ஸமந்ததோ பா³ஹிரே லேக²ம் கரோந்தி, ஏவம் கதே ஸா பா³ஹிரலேகா² ஆவட்டதோ த்³வாஸத்ததிஹத்த²மத்தா ஹோதி, ததோ தம் பதே³ஸம் த்³வாத³ஸஹத்தே²ன த³ண்ட³கேன மினித்வா பா⁴ஜியமானம் ச²பா⁴க³மேவ ஹோதி, ததோ தேஸம் ச²பா⁴கா³னம் ஸீமாய ஏகேகஸ்மிம் மஞ்சே பஞ்ஞபியமானே ச²ளேவ மஞ்சட்டா²னானி ஹோந்தி, தஸ்மா ஏகஸ்மிம் வட்டமண்ட³லே ச² பி⁴க்கூ²யேவ அபுப்³ப³ம் அசரிமம் வஸிதும் லப⁴ந்தி, ந ததோ உத்³த⁴ந்தி வத³ந்தி. கஸ்மா பன ஏவம் கரோந்தீதி? புப்³பே³ வுத்தனயேன ‘‘ஸப்³ப³த்த² த்³வாத³ஸஹத்த²மத்தமேவ பமாண’’ந்தி க³ஹிதத்தா. ஏவம் கிர நேஸமதி⁴ப்பாயோ – பாரிவாஸிகோ பகதத்தஸ்ஸ பி⁴க்கு²னோ த்³வாத³ஸஹத்த²ப்³ப⁴ந்தரே ஸயமானோ ஸஹவாஸோ ஸியா, பா³ஹிரே ஸயமானோ விப்பவாஸோ, ததா² அஞ்ஞமஞ்ஞஸ்ஸபீதி. ஏவம் கரோந்தானம் பன நேஸம் ஸகஅதி⁴ப்பாயோபி ந ஸிஜ்ஜ²தி, குதோ ப⁴க³வதோ அதி⁴ப்பாயோ.

கத²ம்? பாரிவாஸிகோ பி⁴க்கு² பகதத்தபி⁴க்கூ²னஞ்ச அஞ்ஞமஞ்ஞஸ்ஸ ச த்³வாத³ஸஹத்த²மத்தே பதே³ஸே ஹோதூதி நேஸமதி⁴ப்பாயோ. அத² பன மஜ்ஜி²மத்த²ம்ப⁴ம் நிமித்தம் கத்வா மினியமானா ஸமந்ததோ பா³ஹிரலேகா² த²ம்ப⁴தோயேவ த்³வாத³ஸஹத்த²மத்தா ஹோதி, ந பகதத்தபி⁴க்கூ²ஹி. தே ஹி த²ம்ப⁴தோ ப³ஹி ஏகரதனத்³விதிரதனாதி³ட்டா²னே டி²தா, பா³ஹிரதோபி லேகா²யேவ த²ம்ப⁴தோ த்³வாத³ஸஹத்த²மத்தா ஹோதி, ந தஸ்ஸூபரி நிபன்னபி⁴க்கு². ஸோ ஹி த்³விரதனமத்தேனபி திரதனமத்தேனபி லேகா²ய அந்தோபி ஹோதி ப³ஹிபி. அஞ்ஞமஞ்ஞஸ்ஸபி ச²பா⁴க³ஸீமாயேவ அஞ்ஞமஞ்ஞஸ்ஸ த்³வாத³ஸஹத்த²மத்தா ஹோதி, ந தஸ்ஸூபரி பஞ்ஞத்தமஞ்சோ வா தத்த² நிபன்னபி⁴க்கு² வா. மஞ்சோ ஹி ஏகரதனமத்தேன வா த்³விரதனமத்தேன வா ஸீமம் அதிக்கமித்வா டி²தோ, பி⁴க்கூ²பி ஸயமானா ந ஸீமாய உபரியேவ ஸயந்தி, வித³த்தி²மத்தேன வா ரதனமத்தேன வா ஸீமம் அதிக்கமித்வா வா அப்பத்வா வா ஸயந்தி, தஸ்மா தே பாரிவாஸிகா பி⁴க்கூ² பகதத்தபி⁴க்கூ²னம்பி அஞ்ஞமஞ்ஞஸ்ஸபி த்³வாத³ஸஹத்த²மத்தட்டா²யினோ ந ஹோந்தி, ததோ ஊனாவ ஹோந்தி, தஸ்மா ஸகஅதி⁴ப்பாயோபி ந ஸிஜ்ஜ²தி.

ப⁴க³வதோ பன அதி⁴ப்பாயோ – யதி³ அப்பபி⁴க்கு²காதி³அங்க³ஸம்பன்னத்தா விஹாரஸ்ஸ வத்தம் அனிக்கி²பித்வா அந்தோவிஹாரேயேவ பரிவஸதி, ஏவம் ஸதி பகதத்தேன பி⁴க்கு²னா ந ஏகச்ச²ன்னே ஆவாஸே வஸிதப்³ப³ம். யதி³ தாதி³ஸஆவாஸே வா அனாவாஸே வா ச²த³னதோ உத³கபதனட்டா²னஸ்ஸ அந்தோ ஸயேய்ய, ஸஹவாஸோ நாம, ரத்திச்சே²தோ³ ஹோதீதி அயமத்தோ² யதா²வுத்த-பாளியா ச அட்ட²கதா²ய ச பகாஸேதப்³போ³. ந ஏகச்ச²ன்னே ஆவாஸே த்³வீஹி வத்த²ப்³ப³ம். யதி³ வஸேய்ய, வுட்³ட⁴ஸ்ஸ ரத்திச்சே²தோ³யேவ, நவகஸ்ஸ ரத்திச்சே²தோ³ சேவ வத்தபே⁴த³து³க்கடஞ்ச ஹோதி. ஸமவஸ்ஸா சே, அஜானந்தஸ்ஸ ரத்திச்சே²தோ³யேவ, ஜானந்தஸ்ஸ உப⁴யம்பீதி அயமத்தோ² ‘‘தயோ கோ², உபாலி, பாரிவாஸிகஸ்ஸ பி⁴க்கு²னோ ரத்திச்சே²தா³ ஸஹவாஸோ விப்பவாஸோ அனாரோசனா’’தி ச ‘‘ந, பி⁴க்க²வே, பாரிவாஸிகேன பி⁴க்கு²னா பாரிவாஸிகேன வுட்³ட⁴தரேன ஸத்³தி⁴ம் ந ஏகச்ச²ன்னே ஆவாஸே வத்த²ப்³ப³’’ந்தி (சூளவ. 82) ச ‘‘வுட்³ட⁴தரேனாதி ஏத்த²…பே… ஸசே ஹி த்³வே பாரிவாஸிகா ஏகதோ வஸேய்யும், தே அஞ்ஞமஞ்ஞஸ்ஸ அஜ்ஜா²சாரம் ஞத்வா அகா³ரவா வா விப்படிஸாரினோ வா ஹுத்வா பாபிட்ட²தரம் வா ஆபத்திம் ஆபஜ்ஜேய்யும் விப்³ப⁴மேய்யும் வா, தஸ்மா நேஸம் ஸஹஸேய்யா ஸப்³ப³ப்பகாரேன படிக்கி²த்தா’’தி (சூளவ. அட்ட². 81) ச இமேஹி பாளிஅட்ட²கதா²பாடே²ஹி பகாஸேதப்³போ³. விப்பவாஸேபி பாரிவாஸிகேன அபி⁴க்கு²கே ஆவாஸே ந வத்த²ப்³ப³ம், பகதத்தேன வினா அபி⁴க்கு²கோ ஆவாஸோ ந க³ந்தப்³போ³, ப³ஹிஸீமாயம் பி⁴க்கூ²னம் வஸனட்டா²னதோ த்³வாத³ஸஹத்த²ப்பமாணஸ்ஸ உபசாரஸ்ஸ அந்தோ நிஸீதி³தப்³ப³ந்தி ப⁴க³வதோ அதி⁴ப்பாயோ.

அயமத்தோ² ‘‘ந, பி⁴க்க²வே, பாரிவாஸிகேன பி⁴க்கு²னா ஸபி⁴க்கு²கா ஆவாஸா அபி⁴க்கு²கோ ஆவாஸோ க³ந்தப்³போ³ அஞ்ஞத்ர பகதத்தேன அஞ்ஞத்ர அந்தராயா’’திஆதி³ (சூளவ. 76) ச ‘‘தயோ கோ², உபாலி…பே… அனாரோசனா’’தி ச ‘‘சத்தாரோ கோ², உபாலி, மானத்தசாரிகஸ்ஸ பி⁴க்கு²னோ ரத்திச்சே²தா³ ஸஹவாஸோ, விப்பவாஸோ, அனாரோசனா, ஊனேக³ணேசரண’’ந்தி (சூளவ. 92) ச ‘‘விப்பவாஸோதி ஏககஸ்ஸேவ வாஸோ’’தி ச ‘‘அயஞ்ச யஸ்மா க³ணஸ்ஸ ஆரோசேத்வா பி⁴க்கூ²னஞ்ச அத்தி²பா⁴வம் ஸல்லக்கே²த்வாவ வஸி, தேனஸ்ஸ ஊனேக³ணேசரணதோ³ஸோ வா விப்பவாஸோ வா ந ஹோதீ’’தி ச ‘‘அத்தி²பா⁴வம் ஸல்லக்கே²த்வாதி த்³வாத³ஸஹத்தே² உபசாரே ஸல்லக்கே²த்வா, அனிக்கி²த்தவத்தானம் உபசாரஸீமாய ஆக³தபா⁴வம் ஸல்லக்கே²த்வா ஸஹவாஸாதி³கம் வேதி³தப்³ப³’’ந்தி ச ஆக³தேஹி பாளியட்ட²கதா²-வஜிரபு³த்³தி⁴டீகாபாடே²ஹி பகாஸேதப்³போ³, தஸ்மா விஹாரே பரிவஸந்தஸ்ஸ உபசாரஸீமாய அப்³ப⁴ந்தரே யத்த² கத்த²சி வஸந்தஸ்ஸ நத்தி² விப்பவாஸோ, ப³ஹிஉபசாரஸீமாயம் பரிவஸந்தஸ்ஸ பி⁴க்கூ²னம் நிஸின்னபரியந்ததோ த்³வாத³ஸஹத்த²ப்³ப⁴ந்தரே வஸந்தஸ்ஸ ச நத்தி² விப்பவாஸோதி, தஞ்ச பரிவாஸகாலே ‘‘ஏகேன பி⁴க்கு²னா ஸத்³தி⁴’’ந்தி வசனதோ ஏகஸ்ஸபி பி⁴க்கு²னோ, மானத்தசரணகாலே ‘‘சதூஹி பஞ்சஹி வா பி⁴க்கூ²ஹி ஸத்³தி⁴’’ந்தி (சூளவ. அட்ட². 102) வசனதோ ச சதுன்னம் பஞ்சன்னம்பி பி⁴க்கூ²னம் ஹத்த²பாஸபூ⁴தே த்³வாத³ஸஹத்த²ப்³ப⁴ந்தரேபி வஸிதும் லப⁴தி, நத்தி² விப்பவாஸோதி த³ட்ட²ப்³ப³ம்.

வத்தம் ஸமாதி³யித்வா தேஸம் பி⁴க்கூ²னம் ஆரோசிதகாலதோ பன பட்டா²ய கேனசி கரணீயேன தேஸு பி⁴க்கூ²ஸு க³தேஸுபி யதா²வுத்தஅட்ட²கதா²பாட²னயேன விப்பவாஸோ ந ஹோதி. ததா² ஹி வுத்தம் விமதிவினோத³னியம் (வி. வி. டீ. சூளவக்³க³ 2.97) ‘‘ஸோபி கேனசி கம்மேன புரேஅருணே ஏவ க³ச்ச²தீதி இமினா ஆரோசனாய கதாய ஸப்³பே³ஸுபி பி⁴க்கூ²ஸு ப³ஹிவிஹாரம் க³தேஸு ஊனேக³ணேசரணதோ³ஸோ வா விப்பவாஸதோ³ஸோ வா ந ஹோதி ஆரோசிதத்தா ஸஹவாஸஸ்ஸாதி த³ஸ்ஸேதி. தேனாஹ ‘அயஞ்சா’திஆதீ³’’தி. அபரே பன ஆசரியா ‘‘ப³ஹிஸீமாய வத்தஸமாதா³னட்டா²னே வதிபரிக்கே²போபி பகதத்தபி⁴க்கூ²ஹேவ காதப்³போ³, ந கம்மாரஹபி⁴க்கூ²ஹி. யதா² லோகே ப³ந்த⁴னாகா³ராதி³ த³ண்ட³காரகேஹி ஏவ கத்தப்³ப³ம், ந த³ண்டா³ரஹேஹி, ஏவமிதா⁴பீ’’தி வத³ந்தி, தம்பி அட்ட²கதா²தீ³ஸு ந தி³ஸ்ஸதி. ந ஹி வதிபரிக்கே²போ த³ண்ட³கம்மத்தா²ய காரிதோ, அத² கோ² த³ஸ்ஸனூபசாரவிஜஹனத்த²மேவ. ததா² ஹி வுத்தம் ஸாரத்த²தீ³பனியம் (ஸாரத்த². டீ. சூளவக்³க³ 3.97) ‘‘கு³ம்பே³ன வா வதியா வா படிச்ச²ன்னட்டா²னேதி த³ஸ்ஸனூபசாரவிஜஹனத்த²’’ந்தி. ததா² விமதிவினோத³னியம்பி (வி. வி. டீ. சூளவக்³க³ 2.97) ‘‘கு³ம்பே³ன வாதிஆதி³ த³ஸ்ஸனூபசாரவிஜஹனத்த²’’ந்தி. இதோ பரம் அட்ட²கதா²யம் வுத்தனயேனேவ பரிவாஸதா³னஞ்ச மானத்ததா³னஞ்ச வேதி³தப்³ப³ம். யத்த² பன ஸம்ஸயிதப்³ப³ம் அத்தி², தத்த² ஸம்ஸயவினோத³னத்தா²ய கதே²தப்³ப³ம் கத²யாம.

ஏகச்சே பி⁴க்கூ² ஏவம் வத³ந்தி – பாரிவாஸிகோ பி⁴க்கு² வுட்³ட⁴தரோபி ஸமானோ வத்தே ஸமாதி³ன்னே நவகட்டா²னே டி²தோ. ததா² ஹி வுத்தம் ‘‘யத்த² பன நிஸீதா³பேத்வா பரிவிஸந்தி, தத்த² ஸாமணேரானம் ஜேட்ட²கேன, பி⁴க்கூ²னம் ஸங்க⁴னவகேன ஹுத்வா நிஸீதி³தப்³ப³’’ந்தி (சூளவ. அட்ட². 75) தஸ்மா ஆரோசிதகாலாதீ³ஸு ‘‘அஹம் ப⁴ந்தே’’இச்சேவ வத்தப்³ப³ம், ந ‘‘அஹம் ஆவுஸோ’’தி. தத்ரேவம் விசாரணா காதப்³பா³ – பாரிவாஸிகாத³யோ பி⁴க்கூ² ஸேய்யாபரியந்தஆஸனபரியந்தபா⁴கி³தாய நவகட்டா²னே டி²தா, ந ஏகந்தேன நவகபூ⁴தத்தா. ததா² ஹி வுத்தம் ப⁴க³வதா ‘‘அனுஜானாமி, பி⁴க்க²வே, பாரிவாஸிகானம் பி⁴க்கூ²னம் பஞ்ச யதா²வுட்³ட⁴ம் உபோஸத²ம் பவாரணம் வஸ்ஸிகஸாடிகம் ஓணோஜனம் ப⁴த்த’’ந்தி (சூளவ. 75). அட்ட²கதா²யஞ்ச (சூளவ. அட்ட². 81) ‘‘பகதத்தம் பி⁴க்கு²ம் தி³ஸ்வா ஆஸனா வுட்டா²தப்³ப³ம், பகதத்தோ பி⁴க்கு² ஆஸனேன நிமந்தேதப்³போ³’’தி ஏதிஸ்ஸா பாளியா ஸம்வண்ணனாய ‘‘வுட்டா²தப்³ப³ம், நிமந்தேதப்³போ³தி தத³ஹுபஸம்பன்னம்பி தி³ஸ்வா வுட்டா²தப்³ப³மேவ, வுட்டா²ய ச ‘அஹம் இமினா ஸுக²னிஸின்னோ வுட்டா²பிதோ’தி பரம்முகே²ன ந க³ந்தப்³ப³ம், ‘இத³ம் ஆசரிய ஆஸனம், ஏத்த² நிஸீத³தா²’தி ஏவம் நிமந்தேதப்³போ³யேவா’’தி ஏத்தே²வ ‘‘ஆசரியா’’தி ஆலபனவிஸேஸோ வுத்தோ, ந அஞ்ஞத்த². யதி³ வுட்³ட⁴தரேனபி ‘‘ப⁴ந்தே’’இச்சேவ வத்தப்³போ³ ஸியா, இதா⁴பி ‘‘இத³ம், ப⁴ந்தே, ஆஸன’’ந்தி வத்தப்³ப³ம் ப⁴வேய்ய, ந பன வுத்தம், தஸ்மா ந தேஸம் தம் வசனம் ஸாரதோ பச்சேதப்³ப³ம். இமஸ்மிம் பன வினயஸங்க³ஹப்பகரணே (வி. ஸங்க³. அட்ட². 237) ‘‘ஆரோசேந்தேன ஸசே நவகதரோ ஹோதி, ‘ஆவுஸோ’தி வத்தப்³ப³ம். ஸசே வுட்³ட⁴தரோ, ‘ப⁴ந்தே’தி வத்தப்³ப³’’ந்தி வுத்தம், இத³ஞ்ச ‘‘ஏகேன பி⁴க்கு²னா ஸத்³தி⁴’’ந்தி ஹேட்டா² வுத்தத்தா தம் படிக்³கா³ஹகபூ⁴தம் பகதத்தம் பி⁴க்கு²ம் ஸந்தா⁴ய வுத்தந்தி த³ட்ட²ப்³ப³ம்.

ப³ஹவோ பன பி⁴க்கூ² பாரிவாஸிகம் பி⁴க்கு²ம் ஸங்க⁴மஜ்ஜே² நிஸீதா³பேத்வா வத்தம் யாசாபேத்வா கம்மவாசாபரியோஸானே ஸமாதா³பேத்வா ஆரோசனமகாரேத்வா ஸங்க⁴மஜ்ஜ²தோ நிக்க²மாபேத்வா பரிஸபரியந்தே நிஸீதா³பேத்வா தத்த² நிஸின்னேன ஆரோசாபேத்வா வத்தம் நிக்கி²பாபேந்தி, ஏவம் கரோந்தானஞ்ச நேஸம் அயமதி⁴ப்பாயோ – அயம் பி⁴க்கு² வத்தே அஸமாதி³ன்னே வுட்³ட⁴ட்டா²னியோபி ஹோதி, தஸ்மா யாசனகாலே ச கம்மவாசாஸவனகாலே ச வத்தஸமாதா³னகாலே ச ஸங்க⁴மஜ்ஜே² நிஸீத³னாரஹோ ஹோதி, வத்தே பன ஸமாதி³ன்னே நவகட்டா²னியோ, தஸ்மா ந ஸங்க⁴மஜ்ஜே² நிஸீத³னாரஹோ, ஆஸனபரியந்தபா⁴கி³தாய பரிஸபரியந்தேயேவ நிஸீத³னாரஹோதி, ததே³தம் ஏவம் விசாரேதப்³ப³ம் – அயம் பி⁴க்கு² ஸங்க⁴மஜ்ஜே² நிஸீத³மானோ ஆஸனம் க³ஹேத்வா யதா²வுட்³ட⁴ம் நிஸின்னோ ந ஹோதி, அத² கோ² கம்மாரஹபா⁴வேன ஆஸனம் அக்³க³ஹேத்வா அஞ்ஜலிம் பக்³க³ஹேத்வா உக்குடிகமேவ நிஸின்னோ ஹோதி, கம்மாரஹோ ச நாம ஸங்க⁴மஜ்ஜே²யேவ ட²பேதப்³போ³ ஹோதி, நோ ப³ஹி, தஸ்மா ‘‘ஸங்க⁴மஜ்ஜே² நிஸீத³னாரஹோ ந ஹோதீ’’தி ந ஸக்கா வத்தும் தஸ்மிம் காலே, நிக்க²மாபிதே ச வத்தாரோசனவத்தனிக்கி²பனானம் அனிட்டி²தத்தா அஞ்ஞமஞ்ஞம் ஆஹச்ச ஸுட்டு² நிஸின்னம் பி⁴க்கு²ஸங்க⁴ம் பரிஹரிதுமஸக்குணேய்யத்தா, சீவரகண்ணபாத³பிட்டி²ஆதீ³ஹி பா³தி⁴தத்தா அகா³ரவகிரியா விய தி³ஸ்ஸதி, ஆரோசனகிரியஞ்ச வத்தனிக்கி²பனஞ்ச ஸங்க⁴மஜ்ஜே²யேவ கத்தப்³ப³ம் பரியந்தே நிஸீதி³த்வா கரோந்தோ அட்ட²கதா²விரோதோ⁴ ஹோதி. வுத்தஞ்ஹி அட்ட²கதா²யம் (சூளவ. அட்ட². 97) ‘‘வத்தம் ஸமாதி³யித்வா தத்தே²வ ஸங்க⁴ஸ்ஸ ஆரோசேதப்³ப³ம்…பே… ஆரோசேத்வா ஸசே நிக்கி²பிதுகாமோ, வுத்தனயேனேவ ஸங்க⁴மஜ்ஜே² நிக்கி²பிதப்³ப³’’ந்தி. கஸ்மா? ஸமாதா³னட்டா²னேயேவ ஆரோசாபேத்வா தத்தே²வ நிக்கி²பாபேத்வா நிட்டி²தஸப்³ப³கிச்சமேவ நிக்க²மாபேத்வா அத்தனோ ஆஸனே நிஸீதா³பேந்தோ ஞாயாக³தோதி அம்ஹாகம் க²ந்தி.

ததா² ஸாயம் வத்தாரோசனகாலே ப³ஹூஸு பாரிவாஸிகேஸு வுட்³ட⁴தரம் பட²மம் ஸமாதா³பேத்வா ஆரோசாபேத்வா அனுக்கமேன ஸப்³ப³பச்சா² நவகதரம் ஸமாதா³பேந்தி ஆரோசாபேந்தி, பாதோ நிக்கி²பனகாலே பன நவகதரம் பட²மம் ஆரோசாபேத்வா நிக்கி²பாபேந்தி, ததோ அனுக்கமேன வுட்³ட⁴தரம் ஸப்³ப³பச்சா² ஆரோசாபேத்வா நிக்கி²பாபேந்தி. தேஸம் அயமதி⁴ப்பாயோ ஸியா – யதா³ த³ஸ பி⁴க்கூ² பகதத்தா த³ஸ பி⁴க்கூ² பாரிவாஸிகா ஹோந்தி, ததா³ வுட்³ட⁴தரேன பட²மம் ஸமாதி³யித்வா ஆரோசிதே தஸ்ஸ ஆரோசனம் அவஸேஸா ஏகூனவீஸதி பி⁴க்கூ² ஸுணந்தி, து³தியஸ்ஸ அட்டா²ரஸ, ததியஸ்ஸ ஸத்தரஸாதி அனுக்கமேன ஹாயித்வா ஸப்³ப³னவகஸ்ஸ ஆரோசனம் த³ஸ பகதத்தா ஸுணந்தி ஸேஸானம் அபகதத்தபா⁴வதோ. ததோ நிக்கி²பனகாலே ஸப்³ப³னவகோ புப்³பே³ அத்தனா ஆரோசிதானம் த³ஸன்னம் பி⁴க்கூ²னம் ஆரோசேத்வா நிக்கி²பதி, ததோ படிலோமேன து³தியோ ஏகாத³ஸன்னம், ததியோ த்³வாத³ஸன்னந்தி அனுக்கமேன வட்³டி⁴த்வா ஸப்³ப³ஜேட்ட²கோ அத்தனா புப்³பே³ ஆரோசிதானம் ஏகூனவீஸதிபி⁴க்கூ²னம் ஆரோசேத்வா நிக்கி²பதி, ஏவம் யதா²னுக்கமேன நிக்கி²பனம் ஹோதி. ஸப்³ப³ஜேட்ட²கே பன பட²மம் நிக்கி²த்தே ஸதி புப்³பே³ அத்தனா ஆரோசிதானம் நவன்னம் பி⁴க்கூ²னம் ததா³ அபகதத்தபா⁴வதோ ஆரோசிதானம் ஸந்திகே நிக்கி²பனம் ந ஹோதி, ததா² ஸேஸானம். தேஸம் பன ஏகச்சானம் ஊனம் ஹோதி, ஏகச்சானம் அதி⁴கம், தஸ்மா யதா²வுத்தனயேன ஸப்³ப³னவகதோ பட்டா²ய அனுக்கமேன நிக்கி²பிதப்³ப³ந்தி.

ஏவம்வாதீ³னம் பன தேஸமாயஸ்மந்தானம் வாதே³ பகதத்தாயேவ பி⁴க்கூ² ஆரோசேதப்³பா³ ஹோந்தி, நோ அபகதத்தா. புப்³பே³ ஆரோசிதானம்யேவ ஸந்திகே வத்தம் நிக்கி²பிதப்³ப³ம் ஹோதி, நோ அனாரோசிதானம். ஏவம் பன பகதத்தாயேவ பி⁴க்கூ² ஆரோசேதப்³பா³ ந ஹோந்தி, அத² கோ² அபகதத்தாபி ‘‘ஸசே த்³வே பாரிவாஸிகா க³தட்டா²னே அஞ்ஞமஞ்ஞம் பஸ்ஸந்தி, உபோ⁴ஹி அஞ்ஞமஞ்ஞஸ்ஸ ஆரோசேதப்³ப³’’ந்தி அட்ட²கதா²யம் வுத்தத்தா. புப்³பே³ ஆரோசிதானம்பி அனாரோசிதானம்பி ஸந்திகே ஆரோசேத்வா நிக்கி²பிதப்³ப³மேவ ‘‘ஸசே ஸோ பி⁴க்கு² கேனசிதே³வ கரணீயேன பக்கந்தோ ஹோதி, யம் அஞ்ஞம் ஸப்³ப³பட²மம் பஸ்ஸதி, தஸ்ஸ ஆரோசேத்வா நிக்கி²பிதப்³ப³’’ந்தி (சூளவ. அட்ட². 102) வுத்தத்தா, தஸ்மா ததா² அகரோந்தேபி ஸப்³பே³ஸம் ஆரோசிதத்தா நத்தி² தோ³ஸோ. அப்பேகச்சே பி⁴க்கூ² ‘‘பகதத்தஸ்ஸேவாயம் ஆரோசனா’’தி மஞ்ஞமானா ஸாயம் வுட்³ட⁴படிபாடியா வத்தம் ஸமாதி³யித்வா ஆரோசேத்வா அத்தனோ ஸயனம் பவிஸித்வா த்³வாரஜக்³க³னஸயனஸோத⁴னாதீ³னி கரோந்தா அஞ்ஞேஸம் ஆரோசிதம் ந ஸுணந்தி. அப்பேகச்சே பாதோ ஸயம் ஆரோசேத்வா நிக்கி²பித்வா அஞ்ஞேஸம் ஆரோசனம் வா நிக்கி²பனம் வா அனாக³மேத்வா பி⁴க்கா²சாராதீ³னம் அத்தா²ய க³ச்ச²ந்தி, ஏவம் கரோந்தானம் தேஸம் ஆரோசனம் ஏகச்சானம் அஸுதபா⁴வஸம்ப⁴வதோ ஸாஸங்கோ ஹோதி பாரிவாஸிகானம் அஞ்ஞமஞ்ஞாரோசனஸ்ஸ பகரணேஸு ஆக³தத்தா. ந கேவலம் ஸாரத்த²தீ³பனியம்யேவ, அத² கோ² வஜிரபு³த்³தி⁴டீகாயம்பி (வஜிர. டீ. சூளவக்³க³ 76) ‘‘ஸசே த்³வே பாரிவாஸிகா க³தட்டா²னே அஞ்ஞமஞ்ஞம் பஸ்ஸந்தி, உபோ⁴ஹிபி அஞ்ஞமஞ்ஞஸ்ஸ ஆரோசேதப்³ப³ம் அவிஸேஸேன ‘ஆக³ந்துகேன ஆரோசேதப்³ப³ம், ஆக³ந்துகஸ்ஸ ஆரோசேதப்³ப³’ந்தி வுத்தத்தா’’தி வுத்தம்.

ததா² அப்பேகச்சே பகதத்தா பி⁴க்கூ² பாரிவாஸிகேஸு பி⁴க்கூ²ஸு ஸாயம் வத்தஸமாதா³னத்த²ம் பகதத்தஸாலதோ நிக்க²மித்வா அத்தனோ அத்தனோ ஸயனஸமீபம் க³தேஸு அத்தனோ ஸயனபஞ்ஞாபனபஅக்கா²ரட²பனஅஞ்ஞமஞ்ஞஆலாபஸல்லாபகரணாதி³வஸேன ஆளோலேந்தா பாரிவாஸிகானம் வத்தாரோசனம் ந ஸுணந்தி, ந மனஸி கரோந்தி. அப்பேகச்சே பாதோ வத்தனிக்கி²பனகாலே பாரிவாஸிகபி⁴க்கூ²ஸு வத்தாரோசனவத்தனிக்கி²பனானி கரோந்தேஸுபி நித்³தா³பஸுதா ஹுத்வா ந ஸுணந்தி. ஏவம் கரோந்தானம்பி தேஸம் ஏகச்சானம் அஸ்ஸுதஸம்ப⁴வதோ வத்தாரோசனம் ஸாஸங்கம் ஹோதீதி. ஹோது ஸாஸங்கம், ஸுணந்தானம் அஸ்ஸுதஸம்ப⁴வேபி ஆரோசகானம் ஸம்மாஆரோசனேன வத்தஸ்ஸ பரிபுண்ணத்தா கோ தோ³ஸோதி சே? ஆரோசகானம் ஸம்மா ஆரோசிதத்தா வத்தே பரிபுண்ணேபி வத்தபே⁴த³து³க்கடதோவ விமுத்தோ ஸியா, ந ரத்திச்சே²த³தோ. வுத்தஞ்ஹி ஸமந்தபாஸாதி³காயம் (சூளவ. அட்ட². 76) ‘‘ஸசே வாயமந்தோபி ஸம்பாபுணிதும் வா ஸாவேதும் வா ந ஸக்கோதி, ரத்திச்சே²தோ³வ ஹோதி, ந வத்தபே⁴த³து³க்கட’’ந்தி.

அத²ஞ்ஞே பி⁴க்கூ² வத்தம் ஸமாதி³யித்வா ரத்திம் நிபன்னா நித்³தா³பா⁴வேன மனுஸ்ஸஸத்³த³ம்பி ஸுணந்தி, பே⁴ரிஆதி³ஸத்³த³ம்பி ஸுணந்தி, ஸகடனாவாதி³யானஸத்³த³ம்பி ஸுணந்தி, தே தேன ஸத்³தே³ன ஆஸங்கந்தி ‘‘பி⁴க்கூ²னம் நு கோ² அய’’ந்தி, தே தேன காரணேன ரத்திச்சே²த³ம் மஞ்ஞந்தி. கஸ்மா? ‘‘அயஞ்ச நேஸம் ச²த்தஸத்³த³ம் வா உக்காஸிதஸத்³த³ம் வா கி²பிதஸத்³த³ம் வா ஸுத்வா ஆக³ந்துகபா⁴வம் ஜானாதி, க³ந்த்வா ஆரோசேதப்³ப³ம். க³தகாலே ஜானந்தேனபி அனுப³ந்தி⁴த்வா ஆரோசேதப்³ப³மேவ. ஸம்பாபுணிதும் அஸக்கோந்தஸ்ஸ ரத்திச்சே²தோ³வ ஹோதி, ந வத்தபே⁴த³து³க்கட’’ந்தி (சூளவ. அட்ட². 76) வுத்தத்தாதி. தே ஏவம் ஸஞ்ஞாபேதப்³பா³ – மாயஸ்மந்தோ ஏவம் மஞ்ஞித்த², நாயம் பாடோ² ப³ஹிஸீமட்ட²வஸேன வுத்தோ, அத² கோ² உபசாரஸீமட்ட²வஸேன வுத்தோ. வுத்தஞ்ஹி தத்தே²வ ‘‘யேபி அந்தோவிஹாரம் அப்பவிஸித்வா உபசாரஸீமம் ஓக்கமித்வா க³ச்ச²ந்தீ’’தி. தத்த²பி ஆக³ந்துகபா⁴வஸ்ஸ ஜானிதத்தா ரத்திச்சே²தோ³ ஹோதி, தஸ்மா தூ³ரேஸத்³த³ஸவனமத்தேன ரத்திச்சே²தோ³ நத்தி², ‘‘அயம் பி⁴க்கூ²னம் ஸத்³தோ³, அயம் பி⁴க்கூ²ஹி வாதி³தபே⁴ரிக⁴ண்டாதி³ஸத்³தோ³, அயம் பி⁴க்கூ²ஹி பாஜிதஸகடனாவாதி³ஸத்³தோ³’’தி நிஸின்னட்டா²னதோ ஜானந்தோயேவ ரத்திச்சே²த³கரோ ஹோதி. தேனாஹ ‘‘ஆயஸ்மா கரவீகதிஸ்ஸத்தே²ரோ ‘ஸமணோ அய’ந்தி வவத்தா²னமேவ பமாண’’ந்தி.

தி³வா தூ³ரே க³ச்ச²ந்தம் ஜனகாயம் தி³ஸ்வாபி ‘‘இமே பி⁴க்கூ² நு கோ²’’தி பரிகப்பேந்தா ரத்திச்சே²த³ம் மஞ்ஞந்தி, தம்பி அகாரணம். கஸ்மா? ‘‘பி⁴க்கூ²’’தி வவத்தா²னஸ்ஸ அபா⁴வா. வுத்தஞ்ஹி அட்ட²கதா²யம் ‘‘நதீ³ஆதீ³ஸு நாவாய க³ச்ச²ந்தம்பி பரதீரே டி²தம்பி ஆகாஸே க³ச்ச²ந்தம்பி பப்³ப³தத²லஅரஞ்ஞாதீ³ஸு தூ³ரே டி²தம்பி பி⁴க்கு²ம் தி³ஸ்வா ஸசே ‘பி⁴க்கூ²’தி வவத்தா²னம் அத்தி², நாவாதீ³ஹி வா க³ந்த்வா மஹாஸத்³த³ம் கத்வா வா வேகே³ன அனுப³ந்தி⁴த்வா வா ஆரோசேதப்³ப³’’ந்தி. இதி பி⁴க்கு²ம் தி³ஸ்வாபி ‘‘பி⁴க்கூ²’’தி வவத்தா²னமேவ பமாணம். அபி⁴க்கு²ம் பன ‘‘பி⁴க்கூ²’’தி வவத்தா²னே ஸந்தேபி வா அஸந்தேபி வா கிம் வத்தப்³ப³ம் அத்தி², ப³ஹவோ பன பி⁴க்கூ² இத³ம் ரூபத³ஸ்ஸனம் ஸத்³த³ஸவனஞ்ச ஆஸங்கந்தா ‘‘பபா⁴தே ஸதி தம் த்³வயம் ப⁴வேய்ய, தஸ்மா மனுஸ்ஸானம் க³மனகாலஸத்³த³கரணகாலதோ புப்³பே³யேவ வத்தம் நிக்கி²பிதப்³ப³’’ந்தி மஞ்ஞமானா அனுக்³க³தேயேவ அருணே வத்தம் நிக்கி²பந்தி, தத³யுத்தம் ரத்திச்சே²த³த்தாதி.

அத² பன வினயத⁴ரேன ‘‘கித்தகா தே ஆபத்தியோ, சா²தே³ஸி, கீவதீஹம் படிச்சா²தே³ஸீ’’தி புட்டோ² ஸமானோ ‘‘அஹம், ப⁴ந்தே, ஆபத்திபரியந்தம் ந ஜானாமி, ரத்திபரியந்தம் ந ஜானாமி, ஆபத்திபரியந்தம் நஸ்ஸராமி, ரத்திபரியந்தம் நஸ்ஸராமி, ஆபத்திபரியந்தே வேமதிகோ, ரத்திபரியந்தே வேமதிகோ’’தி வுத்தே ‘‘அயம் பி⁴க்கு² ஸுத்³த⁴ந்தபரிவாஸாரஹோ’’தி ஞத்வா தஸ்ஸபி து³வித⁴த்தா சூளஸுத்³த⁴ந்தமஹாஸுத்³த⁴ந்தவஸேன ‘‘தேஸு அயம் பி⁴க்கு² இமஸ்ஸ அரஹோ’’தி ஞாபனத்த²ம் உபஸம்பத³தோ பட்டா²ய அனுலோமக்கமேன வா ஆரோசிததி³வஸதோ பட்டா²ய படிலோமக்கமேன வா ‘‘கித்தகம் காலம் த்வம் ஆரோசனஆவிகரணாதி³வஸேன ஸுத்³தோ⁴’’தி புச்சி²த்வா ‘‘ஆம ப⁴ந்தே, ஏத்தகம் காலம் அஹம் ஸுத்³தோ⁴ம்ஹீ’’தி வுத்தே ‘‘அயம் பி⁴க்கு² ஏகச்சம் ரத்திபரியந்தம் ஜானாதி, தஸ்மா சூளஸுத்³த⁴ந்தாரஹோ’’தி ஞத்வா தஸ்ஸ ஸுத்³த⁴காலம் அபனேத்வா அஸுத்³த⁴காலவஸேன பரியந்தம் கத்வா சூளஸுத்³த⁴ந்தபரிவாஸோ தா³தப்³போ³. அயம் உத்³த⁴ம்பி ஆரோஹதி, அதோ⁴பி ஓரோஹதி. யோ பன அனுலோமவஸேன வா படிலோமவஸேன வா புச்சி²யமானோ ‘‘ஸகலம்பி ரத்திபரியந்தம் அஹம் ந ஜானாமி நஸ்ஸராமி, வேமதிகோ ஹோமீ’’தி வுத்தே ‘‘அயம் பி⁴க்கு² ஸகலம்பி ரத்திபரியந்தம் ந ஜானாதி, தஸ்மா மஹாஸுத்³த⁴ந்தாரஹோ’’தி ஞத்வா தஸ்ஸ உபஸம்பத³தோ பட்டா²ய யாவ வத்தஸமாதா³னா ஏத்தகம் காலம் பரியந்தம் கத்வா மஹாஸுத்³த⁴ந்தபரிவாஸோ தா³தப்³போ³. உத்³த⁴ம்ஆரோஹனஅதோ⁴ஓரோஹனபா⁴வோ பனேஸம் அட்ட²கதா²யம் (சூளவ. அட்ட². 102) வுத்தோயேவ. இதோ பரம்பி விதா⁴னம் அட்ட²கதா²யம் ஆக³தனயேனேவ த³ட்ட²ப்³ப³ம்.

இதா³னி பன ப³ஹவோ பி⁴க்கூ² ‘‘அயம் சூளஸுத்³த⁴ந்தாரஹோ, அயம் மஹாஸுத்³த⁴ந்தாரஹோ’’தி அவிசினந்தா அந்தோகம்மவாசாயம் ‘‘ஆபத்திபரியந்தம் ந ஜானாதி, ரத்திபரியந்தம் ந ஜானாதி, ஆபத்திபரியந்தம் நஸ்ஸரதி, ரத்திபரியந்தம் நஸ்ஸரதி, ஆபத்திபரியந்தே வேமதிகோ, ரத்திபரியந்தே வேமதிகோ’’தி அவிஸேஸவசனமேவ மனஸி கரோந்தா ‘‘இமாய கம்மவாசாய தி³ன்னம் ஸுத்³த⁴ந்தபரிவாஸம் க³ஹேத்வா பஞ்சாஹமத்தம் வா த³ஸாஹமத்தம் வா பரிவஸித்வா அபரியந்தரத்திபடிச்சா²தி³தாஹி அபரியந்தாஹி ஆபத்தீஹி மோக்கோ² ஹோதீ’’தி மஞ்ஞந்தா பஞ்சாஹமத்தம் வா த³ஸாஹமத்தம் வா பரிவஸித்வா மானத்தம் யாசந்தி, ஏவம் கரோந்தா தே பி⁴க்கூ² ஸஹஸ்ஸக்க²த்தும் பரிவஸந்தாபி ஆபத்திதோ ந முச்சேய்யும். கஸ்மாதி சே? பாளியா ச அட்ட²கதா²ய ச விருஜ்ஜ²னதோ. வுத்தஞ்ஹி பாளியம் (பாரா. 442) ‘‘யாவதீஹம் ஜானம் படிச்சா²தே³தி, தாவதீஹம் தேன பி⁴க்கு²னா அகாமா பரிவத்த²ப்³ப³ம். பரிவுத்த²பரிவாஸேன பி⁴க்கு²னா உத்தரி சா²ரத்தம் பி⁴க்கு²மானத்தாய படிபஜ்ஜிதப்³ப³ம். சிண்ணமானத்தோ பி⁴க்கு² யத்த² ஸியா வீஸதிக³ணோ பி⁴க்கு²ஸங்கோ⁴, தத்த² ஸோ பி⁴க்கு² அப்³பே⁴தப்³போ³’’தி, தஸ்மா படிச்ச²ன்னதி³வஸமத்தம் அபரிவஸித்வா மானத்தாரஹோ நாம ந ஹோதி, அமானத்தாரஹஸ்ஸ மானத்ததா³னம் ந ருஹதி, அசிண்ணமானத்தோ அப்³பா⁴னாரஹோ ந ஹோதி, அனப்³பா⁴னாரஹஸ்ஸ அப்³பா⁴னம் ந ருஹதி, அனப்³பி⁴தோ பி⁴க்கு² ஆபத்திமுத்தோ பகதத்தோ ந ஹோதீதி அயமேத்த² ப⁴க³வதோ அதி⁴ப்பாயோ.

அட்ட²கதா²யம் (சூளவ. அட்ட². 102) பன சூளஸுத்³த⁴ந்தே ‘‘தம் க³ஹேத்வா பரிவஸந்தேன யத்தகம் காலம் அத்தனோ ஸுத்³தி⁴ம் ஜானாதி, தத்தகம் அபனேத்வா அவஸேஸம் மாஸம் வா த்³விமாஸம் வா பரிவஸிதப்³ப³’’ந்தி, மஹாஸுத்³த⁴ந்தே ‘‘தம் க³ஹேத்வா க³ஹிததி³வஸதோ யாவ உபஸம்பத³தி³வஸோ, தாவ ரத்தியோ க³ணேத்வா பரிவஸிதப்³ப³’’ந்தி வுத்தம், தஸ்மா படிச்ச²ன்னரத்திப்பமாணம் பரிவஸந்தோயேவ மானத்தாரஹோ ஹோதி, ந பஞ்சாஹத³ஸாஹரத்திப்பமாணமத்தம் பரிவஸந்தோதி அயம் அட்ட²கதா²சரியானம் அதி⁴ப்பாயோ. தேனேவ ச காரணேன தே³ஸனாஆரோசனாதீ³ஹி ஸப்³ப³காலம் ஆபத்திம் ஸோதே⁴த்வா வஸந்தானம் லஜ்ஜீபேஸலானம் ஸிக்கா²காமானம் பி⁴க்கூ²னம் ஸுத்³த⁴ந்தபரிவாஸம் தா³தும் அயுத்தரூபோ, தே³ஸனாஆரோசனாதீ³ஹி ஆபத்திம் அஸோதே⁴த்வா பமாத³வஸேன சிரகாலம் வஸந்தானம் ஜனபத³வாஸிகாதீ³னம் தா³தும் யுத்தரூபோதி வேதி³தப்³ப³ம். ஏத்தா²பி அவஸேஸவினிச்ச²யோ அட்ட²கதா²யம் வுத்தனயேனேவ வேதி³தப்³போ³.

அத² பன வினயத⁴ரேன ‘‘த்வம், ஆவுஸோ, கதரஆபத்திம் ஆபன்னோ, கதி ரத்தியோ தே சா²தி³தா’’தி புட்டோ² ‘‘அஹம், ப⁴ந்தே, ஸங்கா⁴தி³ஸேஸம் ஆபத்திம் ஆபஜ்ஜித்வா பக்க²மத்தம் படிச்சா²தி³தா, தேனாஹம் ஸங்க⁴ம் பக்க²பரிவாஸம் யாசித்வா ஸங்கே⁴ன தி³ன்னே பக்க²பரிவாஸே பரிவஸித்வா அனிக்கி²த்தவத்தோவ ஹுத்வா அந்தரா ஸங்கா⁴தி³ஸேஸாபத்திம் ஆபஜ்ஜித்வா பஞ்சாஹமத்தம் சா²தி³தா’’தி வுத்தே ‘‘அயம் பி⁴க்கு² ஸமோதா⁴னபரிவாஸாரஹோ, தீஸு ச ஸமோதா⁴னபரிவாஸேஸு ஓதா⁴னஸமோதா⁴னாரஹோ’’தி ஞத்வா ‘‘தேன ஹி பி⁴க்கு² த்வம் மூலாயபடிகஸ்ஸனாரஹோ’’தி வத்வா தம் மூலாய படிகஸ்ஸித்வா பரிவுத்த²தி³வஸே அதி³வஸே கத்வா அந்தரா படிச்ச²ன்னே பஞ்ச தி³வஸே மூலாபத்தியா படிச்ச²ன்னேஸு தி³வஸேஸு ஸமோதா⁴னேத்வா ஓதா⁴னஸமோதா⁴னோ தா³தப்³போ³. இதோ பரானி ஓதா⁴னஸமோதா⁴னே வத்தப்³ப³வசனானி பாளியம் அட்ட²கதா²யஞ்ச வுத்தனயேனேவ வேதி³தப்³பா³னி.

அத² பன வினயத⁴ரேன புட்டோ² ‘‘அஹம், ப⁴ந்தே, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிம், ஸம்ப³ஹுலா ஆபத்தியோ ஏகாஹப்படிச்ச²ன்னாயோ…பே… ஸம்ப³ஹுலா ஆபத்தியோ த³ஸாஹப்படிச்ச²ன்னாயோ’’தி வுத்தே ‘‘அயம் பி⁴க்கு² அக்³க⁴ஸமோதா⁴னாரஹோ’’தி ஞத்வா தாஸம் ஆபத்தீனம் யா ஆபத்தியோ சிரதரப்படிச்ச²ன்னாயோ, தாஸம் அக்³கே⁴ன ஸமோதா⁴னபரிவாஸோ தா³தப்³போ³. தத்ரேவம் வத³ந்தி – ‘‘யா ஆபத்தியோ சிரதரப்படிச்ச²ன்னாயோ, தாஸம் அக்³கே⁴ன ஸமோதா⁴னபரிவாஸோ தா³தப்³போ³’’தி வுத்தோ, ஏவம் ஸந்தே பக்க²ப்படிச்ச²ன்னமாஸப்படிச்ச²ன்னாதீ³ஸு கத²ந்தி? தேஸுபி ‘‘யா ஆபத்தியோ பக்க²ப்படிச்ச²ன்னாயோ, யா ஆபத்தியோ மாஸப்படிச்ச²ன்னாயோ’’தி வத்தப்³போ³தி. யதி³ ஏவம் பாளிவிரோதோ⁴ ஆபஜ்ஜதி. பாளியஞ்ஹி த³ஸாஹப்படிச்ச²ன்னபரியோஸானா ஏவ ஆபத்தி த³ஸ்ஸிதா, ந பக்க²ப்படிச்ச²ன்னமாஸப்படிச்ச²ன்னாத³யோதி? ஸச்சம், பாளியம் ததா²த³ஸ்ஸனம் பன நயத³ஸ்ஸனமத்தம். ததா² ஹி வுத்தம் அட்ட²கதா²யம் (சூளவ. அட்ட². 102) ‘‘பஞ்சத³ஸ தி³வஸானி படிச்ச²ன்னாய ‘பக்க²ப்படிச்ச²ன்ன’ந்தி வத்வா யோஜனா காதப்³பா³…பே… ஏவம் யாவ ஸட்டி²ஸம்வச்ச²ரம், அதிரேகஸட்டி²ஸம்வச்ச²ரப்படிச்ச²ன்னந்தி வா ததோ வா பி⁴ய்யோபி வத்வா யோஜனா காதப்³பா³’’தி. மஹாபது³மத்தே²ரேனபி வுத்தம் ‘‘அயம் ஸமுச்சயக்க²ந்த⁴கோ நாம பு³த்³தா⁴னம் டி²தகாலஸதி³ஸோ, ஆபத்தி நாம படிச்ச²ன்னா வா ஹோது அப்படிச்ச²ன்னா வா ஸமகஊனதரஅதிரேகப்படிச்ச²ன்னா வா, வினயத⁴ரஸ்ஸ கம்மவாசம் யோஜேதும் ஸமத்த²பா⁴வோயேவேத்த² பமாண’’ந்தி, தஸ்மா பக்க²ப்படிச்ச²ன்னாதீ³னம் கம்மவாசாகரணே குக்குச்சம் ந காதப்³ப³ந்தி.

ஹோது, ஏவம்பி பக்க²ப்படிச்ச²ன்னம் பரியந்தம் கத்வா கதாய கம்மவாசாய ததோ உத்³த⁴ம் ஆபத்தி நத்தீ²தி கத²ம் ஜானேய்யாதி? இதா³னி ஸிக்கா²காமா பி⁴க்கூ² தே³வஸிகம்பி தே³ஸனாரோசனாவிகரணானி கரோந்தி ஏகாஹிகத்³வீஹிகாதி³வஸேனபி, கிச்சபஸுதா ஹுத்வா ததா² அஸக்கோந்தாபி உபோஸத²தி³வஸம் நாதிக்கமந்தி, கி³லானாதி³வஸேன தத³திக்கந்தாபி அதிக்கந்தபா⁴வம் ஜானந்தி, தஸ்மா தத³திக்கந்தபா⁴வே ஸதி அதிரேகபக்க²ப்படிச்ச²ன்னமாஸப்படிச்ச²ன்னாதி³வஸேன வட்³டே⁴த்வா கம்மவாசம் கரேய்ய, தத³திக்கந்தபா⁴வே பன அஸதி பக்க²ப்படிச்ச²ன்னபரியந்தா ஹோதி, தஸ்மா பக்க²பரியந்தகம்மவாசாகரணம் ஞாயாக³தம் ஹோதீதி த³ட்ட²ப்³ப³ம்.

ஏவம் ஹோது, ததா²பி யதே³தம் ‘‘ஸம்ப³ஹுலா ஆபத்தியோ ஏகாஹப்படிச்ச²ன்னாயோ…பே… ஸம்ப³ஹுலா ஆபத்தியோ பக்க²ப்படிச்ச²ன்னாயோ’’தி வுத்தம், தத்த² இமினாயேவ அனுக்கமேன மயா படிச்சா²தி³தா ஆபத்தியோ ஹோந்தீதி கத²ம் ஜானேய்ய, அஜானனே ச ஸதி ‘‘யா ச க்²வாயம், ஆவுஸோ, ஆபத்தி அஜானப்படிச்ச²ன்னா, அத⁴ம்மிகம் தஸ்ஸா ஆபத்தியா பரிவாஸதா³னம், அத⁴ம்மத்தா ந ருஹதீ’’தி இத³ம் ஆபஜ்ஜதீதி? நாபஜ்ஜதி. தத்த² ஹி ஆபத்தியா ஆபன்னபா⁴வம் அஜானந்தோ ஹுத்வா படிச்சா²தே³தி, தஸ்மா ‘‘ஆபத்தி ச ஹோதி ஆபத்திஸஞ்ஞீ சா’’தி வுத்தஆபத்திஸஞ்ஞிதாபா⁴வா அப்படிச்ச²ன்னமேவ ஹோதி, தஸ்மா அப்படிச்ச²ன்னாய ஆபத்தியா பரிவாஸதா³னம் அத⁴ம்மிகம் ஹோதி. இத⁴ பன ‘‘ஏத்தகா ரத்தியோ மயா சா²தி³தா’’தி ச²ன்னகாலமேவ ந ஜானாதி, தத³ஜானபா⁴வே ஸதிபி பரிவாஸதா³னம் ருஹதி. தேனேவ ச காரணேன ஸுத்³த⁴ந்தபரிவாஸே (சூளவ. 156-157) ‘‘ஆபத்திபரியந்தம் ந ஜானாதி, ரத்திபரியந்தம் ந ஜானாதி, ஆபத்திபரியந்தம் நஸ்ஸரதி, ரத்திபரியந்தம் நஸ்ஸரதி, ஆபத்திபரியந்தே வேமதிகோ, ரத்திபரியந்தே வேமதிகோ’’தி ரத்திபரியந்தஸ்ஸ அஜானனஅஸரணவேமதிகபா⁴வே ஸதிபி பரிவாஸதா³னம் வுத்தம், தஸ்மா சா²தி³தகாலம் தத²தோ அஜானந்தோபி ‘‘ஸம்ப³ஹுலா ஆபத்தியோ ஏகாஹப்படிச்ச²ன்னாயோ…பே… ஸம்ப³ஹுலா ஆபத்தியோ பக்க²ப்படிச்ச²ன்னாயோ’’தி ஏத்த² அப்பவிட்ட²ஸ்ஸ அபா⁴வா ஸம்பஜ்ஜதியேவாதி த³ட்ட²ப்³ப³ம்.

அதா²பி ஏவம் வதே³ய்யும் – ‘‘ஸம்ப³ஹுலா ஆபத்தியோ ஏகாஹப்படிச்ச²ன்னாயோ…பே… ஸம்ப³ஹுலா ஆபத்தியோ பக்க²ப்படிச்ச²ன்னாயோ’’தி வுத்தே தேஸு தி³வஸேஸு ஆபத்தியோ அத்தி² படிச்ச²ன்னாயோபி, அத்தி² அப்படிச்ச²ன்னாயோபி, அத்தி² சிரப்படிச்ச²ன்னாயோபி, அத்தி² அசிரப்படிச்ச²ன்னாயோபி, அத்தி² ஏகாபி, அத்தி² ஸம்ப³ஹுலாபி, ஸப்³பா³ தா ஆபத்தியோ ஏதேனேவ பதே³ன ஸங்க³ஹிதா ஸியுந்தி? ஸங்க³ஹிதா ஏவ. ந ஹேத்த² ஸம்ஸயோ காதப்³போ³. வுத்தஞ்ஹேதம் அட்ட²கதா²யம் (சூளவ. அட்ட². 102) ‘‘அஞ்ஞஸ்மிம் பன ஆபத்திவுட்டா²னே இத³ம் லக்க²ணம் – யோ அப்படிச்ச²ன்னம் ஆபத்திம் ‘படிச்ச²ன்னா’தி வினயகம்மம் கரோதி, தஸ்ஸ ஆபத்தி வுட்டா²தி. யோ படிச்ச²ன்னம் ‘அப்படிச்ச²ன்னா’தி வினயகம்மம் கரோதி, தஸ்ஸ ந வுட்டா²தி. அசிரப்படிச்ச²ன்னம் ‘சிரப்படிச்ச²ன்னா’தி கரோந்தஸ்ஸபி வுட்டா²தி, சிரப்படிச்ச²ன்னம் ‘அசிரப்படிச்ச²ன்னா’தி கரோந்தஸ்ஸ ந வுட்டா²தி. ஏகம் ஆபத்திம் ஆபஜ்ஜித்வா ‘ஸம்ப³ஹுலா’தி கரோந்தஸ்ஸபி வுட்டா²தி ஏகம் வினா ஸம்ப³ஹுலானம் அபா⁴வதோ. ஸம்ப³ஹுலா பன ஆபஜ்ஜித்வா ‘ஏகம் ஆபஜ்ஜி’ந்தி கரோந்தஸ்ஸ ந வுட்டா²தீ’’தி, தஸ்மா ஏதேஹி பதே³ஹி ஸப்³பா³ஸம் படிச்ச²ன்னாபத்தீனம் ஸங்க³ஹிதத்தா தாஹி ஆபத்தீஹி வுட்டா²னம் ஸம்ப⁴வதீதி த³ட்ட²ப்³ப³ம்.

அத² பன வினயத⁴ரேன புட்டோ² ‘‘அஹம், ப⁴ந்தே, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிம் ஏகம் ஸுக்கவிஸ்ஸட்டி²ம், ஏகம் காயஸம்ஸக்³க³ம், ஏகம் து³ட்டு²ல்லவாசம், ஏகம் அத்தகாமம், ஏகம் ஸஞ்சரித்தம், ஏகம் குடிகாரம், ஏகம் விஹாரகாரம், ஏகம் து³ட்ட²தோ³ஸம், ஏகம் அஞ்ஞபா⁴கி³யம், ஏகம் ஸங்க⁴பே⁴த³ம், ஏகம் பே⁴தா³னுவத்தகம், ஏகம் து³ப்³ப³சம், ஏகம் குலதூ³ஸக’’ந்தி வுத்தே ‘‘அயம் பி⁴க்கு² மிஸ்ஸகஸமோதா⁴னபரிவாஸாரஹோ’’தி ஞத்வா அட்ட²கதா²யம் (சூளவ. அட்ட². 102) ஆக³தனயேன பரிவாஸோ தா³தப்³போ³. ஏத்தா²ஹ – அக்³க⁴ஸமோதா⁴னமிஸ்ஸகஸமோதா⁴னானம் கோ விஸேஸோ, கிம் நானாகரணந்தி? வுச்சதே – அக்³க⁴ஸமோதா⁴னபரிவாஸோ அசிரப்படிச்ச²ன்னா ஆபத்தியோ சிரப்படிச்ச²ன்னாயம் ஆபத்தியம் ஸமோதா⁴னேத்வா தஸ்ஸா சிரப்படிச்ச²ன்னாய ஆபத்தியா அக்³க⁴வஸேன தீ³யதி, மிஸ்ஸகஸமோதா⁴னபரிவாஸோ நானாவத்து²கா ஆபத்தியோ ஸமோதா⁴னேத்வா தாஸம் மிஸ்ஸகவஸேன தீ³யதி, அயமேதேஸம் விஸேஸோ. அத² வா அக்³க⁴ஸமோதா⁴னோ ஸபா⁴க³வத்தூ²னம் ஆபத்தீனம் ஸமோதா⁴னவஸேன ஹோதி, இதரோ விஸபா⁴க³வத்தூ²னந்தி ஆசரியா. தேனேவாஹ ஆசரியவஜிரபு³த்³தி⁴த்தே²ரோ (வஜிர. டீ. சூளவக்³க³ 102) ‘‘அக்³க⁴ஸமோதா⁴னோ நாம ஸபா⁴க³வத்து²காயோ ஸம்ப³ஹுலா ஆபத்தியோ ஆபன்னஸ்ஸ ப³ஹுரத்திம் படிச்சா²தி³தாபத்தியம் நிக்கி²பித்வா தா³தப்³போ³, இதரோ நானாவத்து²கானம் வஸேனாதி அயமேதேஸம் விஸேஸோ’’தி.

அத² ஸியா ‘‘ஏவம் சிரப்படிச்ச²ன்னாயோ ச அசிரப்படிச்ச²ன்னாயோ ச நானாவத்து²காயோ ஆபத்தியோ ஆபஜ்ஜந்தஸ்ஸ கோ பரிவாஸோ தா³தப்³போ³ அக்³க⁴ஸமோதா⁴னோ வா மிஸ்ஸகஸமோதா⁴னோ வா, அத² தது³ப⁴யா வா’’தி. கிஞ்சேத்த² – யதி³ அக்³க⁴ஸமோதா⁴னம் த³தே³ய்ய, சிரப்படிச்ச²ன்னாஹி ச அசிரப்படிச்ச²ன்னாஹி ச ஸபா⁴க³வத்து²காஹி ஆபத்தீஹி வுட்டி²தோ ப⁴வேய்ய, சிரப்படிச்ச²ன்னாஹி ச அசிரப்படிச்ச²ன்னாஹி ச நோ விஸபா⁴க³வத்து²காஹி. யதி³ ச மிஸ்ஸகஸமோதா⁴னம் த³தே³ய்ய, ஸமானகாலப்படிச்ச²ன்னாஹி விஸபா⁴க³வத்தூ²ஹி ஆபத்தீஹி வுட்டி²தோ ப⁴வேய்ய, நோ அஸமானகஆலப்படிச்ச²ன்னாஹி ஸபா⁴க³வத்து²காஹி ச, அத² தது³ப⁴யம்பி த³தே³ய்ய, ‘‘ஏகஸ்மிம் கம்மே த்³வே பரிவாஸா தா³தப்³பா³’’தி நேவ பாளியம், ந அட்ட²கதா²யம் வுத்தந்தி? வுச்சதே – இத³ஞ்ஹி ஸப்³ப³ம்பி பரிவாஸாதி³கம் வினயகம்மம் வத்து²வஸேன வா கோ³த்தவஸேன வா நாமவஸேன வா ஆபத்திவஸேன வா காதும் வட்டதியேவ.

தத்த² ஸுக்கவிஸ்ஸட்டீ²தி வத்து² சேவ கோ³த்தஞ்ச. ஸங்கா⁴தி³ஸேஸோதி நாமஞ்சேவ ஆபத்தி ச. தத்த² ‘‘ஸுக்கவிஸ்ஸட்டி²ம் காயஸம்ஸக்³க³’’ந்திஆதி³வசனேனாபி ‘‘நானாவத்து²காயோ’’தி வசனேனபி வத்து² சேவ கோ³த்தஞ்ச க³ஹிதம் ஹோதி, ‘‘ஸங்கா⁴தி³ஸேஸோ’’தி வசனேனபி ‘‘ஆபத்தியோ’’தி வசனேனபி நாமஞ்சேவ ஆபத்தி ச க³ஹிதா ஹோதி, தஸ்மா அக்³க⁴ஸமோதா⁴னவஸேன பரிவாஸே தி³ன்னே ‘‘அஹம், ப⁴ந்தே, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜி’’ந்திஆதி³வசனேனேவ வத்து²ஸ்ஸ ச கோ³த்தஸ்ஸ ச நாமஸ்ஸ ச ஆபத்தியா ச க³ஹிதத்தா சிரப்படிச்ச²ன்னாஹி அசிரப்படிச்ச²ன்னாஹி ச ஸபா⁴க³வத்து²காஹி ச விஸபா⁴க³வத்து²காஹி ச ஸப்³பா³ஹி ஆபத்தீஹி வுட்டா²தீதி த³ட்ட²ப்³ப³ம். வுத்தஞ்ஹேதம் ஸமந்தபாஸாதி³காயம் ‘‘ஏத்த² ச ‘ஸங்கா⁴தி³ஸேஸா ஆபத்தியோ ஆபஜ்ஜிம் நானாவத்து²காயோ’திபி ‘ஸங்கா⁴தி³ஸேஸா ஆபத்தியோ ஆபஜ்ஜி’ந்திபி ஏவம் புப்³பே³ வுத்தனயேன வத்து²வஸேனபி கோ³த்தவஸேனபி நாமவஸேனபி ஆபத்திவஸேனபி யோஜேத்வா கம்மவாசம் காதும் வட்டதியேவாதி அயம் மிஸ்ஸகஸமோதா⁴னோ’’தி, இமஸ்மிஞ்ச வினயஸங்க³ஹப்பகரணே (வி. ஸங்க³. அட்ட². 245) ததே²வ வத்வா ‘‘தஸ்மா ந இத⁴ விஸும் கம்மவாசம் யோஜேத்வா த³ஸ்ஸயிஸ்ஸாம, புப்³பே³ ஸப்³பா³பத்திஸாதா⁴ரணம் கத்வா யோஜேத்வா த³ஸ்ஸிதாய ஏவ கம்மவாசாய நானாவத்து²காஹிபி ஆபத்தீஹி வுட்டா²னஸம்ப⁴வதோ ஸாயேவேத்த² கம்மவாசா அல’’ந்தி.

யதி³ ஏவம் ஆசரியவஜிரபு³த்³தி⁴த்தே²ரேன த்³வின்னம் விஸேஸோ ந வத்தப்³போ³, அத² கஸ்மா வுத்தோதி? தீஸு ஸமோதா⁴னபரிவாஸேஸு ஓதா⁴னஸமோதா⁴னோ மூலாயபடிகஸ்ஸனாய ஓதூ⁴னிதகாலேயேவ தா³தப்³போ³, அக்³க⁴ஸமோதா⁴னமிஸ்ஸகஸமோதா⁴னபரிவாஸா பன விஸும்யேவ தா³தப்³பா³. ‘‘ஏவம் தி³ன்னே ஏதேஸம் கோ விஸேஸோ’’தி சிந்தாயம் விஸேஸஸம்ப⁴வமத்தத³ஸ்ஸனத்த²ம் வுத்தோ. அட்ட²கதா²யம் பன பரிவாஸாதி³கம்மஸ்ஸ லக்க²ணம் த³ஸ்ஸேதும் ‘‘வத்து²வஸேன வா’’திஆதி³மாஹ, தஸ்மா லக்க²ணவஸேனேவ ஸபா⁴க³வத்து²காஹிபி ஆபத்தீஹி வுட்டா²னம் ஸம்ப⁴வதி. தேனேவ ச காரணேன ஸாரத்த²தீ³பனினாமிகாயம் வினயடீகாயஞ்ச விமதிவினோத³னினாமிகாயம் வினயடீகாயஞ்ச ந கோசி விஸேஸோ வுத்தோதி த³ட்ட²ப்³போ³.

யதி³ ஏவம் மிஸ்ஸகஸமோதா⁴னகம்மவாசாயபி சிரப்படிச்ச²ன்னாஹி அசிரப்படிச்ச²ன்னாஹிபி ஆபத்தீஹி வுட்டா²னம் ஸம்ப⁴வேய்ய. தத்த²பி ஹி ‘‘அஹம், ப⁴ந்தே, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிம் நானாவத்து²காயோ’’திபி ‘‘ஏகா ஸுக்கவிஸ்ஸட்டி²…பே… ஏகா குலதூ³ஸகா’’திபி வத்தப்³ப³ம். ஏவம் ஸதி ‘‘ஸம்ப³ஹுலா’’திபி ‘‘ஸங்கா⁴தி³ஸேஸா ஆபத்தியோ’’திபி வத்து²கோ³த்தனாமாபத்தீஹி கித்தனஸம்ப⁴வதோ சிரப்படிச்ச²ன்னாஹிபி அசிரப்படிச்ச²ன்னாஹிபி ஆபத்தீஹி வுட்டா²னம் ஸம்ப⁴வேய்யாதி? ந பனேவம் த³ட்ட²ப்³ப³ம். வத்தா²தி³கித்தனஞ்ஹி ஸப்³பா³பத்தீனம் க³ண்ஹனத்த²ம் ஹோதி. ஏவம் க³ண்ஹந்தேபி படிச்ச²ன்னகாலஸ்ஸ அகதி²தத்தா ‘‘ஏத்தகம் நாம காலம் பரிவஸிதப்³ப³’’ந்தி ந பஞ்ஞாயதி, தஸ்மிம் அபஞ்ஞாயமானே தேன பமாணேன பரிவாஸோ ந ஹோதி, தஸ்மிம் அஸதி ஆபத்திதோ வுட்டா²னம் ந ஸம்ப⁴வதி, தஸ்மா மிஸ்ஸகஸமோதா⁴னகம்மவாசாய சிரப்படிச்ச²ன்னாஹிபி அசிரப்படிச்ச²ன்னாஹிபி ஆபத்தீஹி வுட்டா²னம் ந ஸம்ப⁴வதீதி த³ட்ட²ப்³ப³ம்.

பரிவாஸவினிச்ச²யகதா² நிட்டி²தா.

மானத்தவினிச்ச²யகதா²

மானத்தகதா²யம்பி மானத்தம் நாம அப்படிச்ச²ன்னமானத்தம் படிச்ச²ன்னமானத்தம் பக்க²மானத்தம் ஸமோதா⁴னமானத்தந்தி சதுப்³பி³த⁴ம் ஹோதி. தத்த² யோ பி⁴க்கு² ஸங்கா⁴தி³ஸேஸம் ஆபத்திம் ஆபஜ்ஜித்வா தம் தி³வஸமேவ ஆரோசேதி, ஏகரத்திமத்தம்பி ந படிச்சா²தே³தி, தஸ்ஸ பரிவாஸம் அத³த்வாவ தி³ன்னம் மானத்தம் அப்படிச்ச²ன்னமானத்தம் நாம. யோ ஆபஜ்ஜித்வா த³ஸஹி ஆகாரேஹி வினா தம் தி³வஸம் நாரோசேதி, ஏகரத்தாதி³வஸேன படிச்சா²தே³தி, தத்த² யதா²படிச்ச²ன்னதி³வஸம் பரிவாஸம் த³த்வா பரிவுத்த²பரிவாஸஸ்ஸ தி³ன்னம் மானத்தம் படிச்ச²ன்னமானத்தம் நாம. ஆபத்திம் ஆபஜ்ஜித்வா படிச்ச²ன்னாய வா அப்படிச்ச²ன்னாய வா பி⁴க்கு²னியா பக்க²மத்தமேவ தி³ன்னம் மானத்தம் பக்க²மானத்தம் நாம. பி⁴க்கு² பன படிச்ச²ன்னாய ஆபத்தியா பரிவஸித்வா அனிக்கி²த்தவத்தகாலேயேவ புன ஆபஜ்ஜித்வா ந படிச்சா²தே³தி, தஸ்ஸ மூலாய படிகஸ்ஸித்வா பரிவுத்த²தி³வஸே அதி³வஸே கத்வா அப்படிச்சா²தி³தத்தா ஸமோதா⁴னபரிவாஸம் அத³த்வா தி³ன்னம் மானத்தம் ஸமோதா⁴னமானத்தம் நாம. மானத்தாரஹகாலேபி மானத்தசரணகாலேபி அப்³பா⁴னாரஹகாலேபி ஏஸேவ நயோ. தேஸு தீணி மானத்தானி அட்ட²கதா²யம் வுத்தனயேன ஸுவிஞ்ஞேய்யத்தா ந வுத்தானி. பக்க²மானத்தம் பச்சா² ஆக³மிஸ்ஸதி.

யானி பன பரிவாஸமானத்தானி அனவட்டி²தத்தா புது²ஜ்ஜனஸ்ஸ கி³ஹிஆதி³வஸேன பரிவத்தனே ஸதி புன தா³தப்³பா³தா³தப்³ப³பா⁴வே ஸங்கிதப்³பா³னி, தானி த³ஸ்ஸேதும் பாளியம் அனேகேஹி பகாரேஹி வித்தா²ரதோ வுத்தானி. தேஸு பி⁴க்கூ²னம் ஸம்ஸயவினோத³னத்தா²ய ஏகதே³ஸம் த³ஸ்ஸேதும் ‘‘ஸசே கோசீ’’திஆதி³மாஹ. தத்த² விப்³ப⁴மதீதி விரூபோ ஹுத்வா ப⁴மதி, ஹீனாயாவத்ததி கி³ஹீ ஹோதீதி அத்தோ². ஸாமணேரோ ஹோதீதி உபஸம்பன்னபா⁴வம் ஜஹித்வா ஸாமணேரபா⁴வம் உபக³ச்ச²தி. தத்த² பாராஜிகப்பத்தபா⁴வேன வா ‘‘கி³ஹீதி மம் தா⁴ரேதா²’’திஆதி³னா ஸிக்கா²பச்சக்கா²னேன வா கி³ஹீ ஹோதி. தேஸு பட²மேன புன உபஸம்பதா³ய அப⁴ப்³ப³த்தா புன பரிவாஸோ ந ருஹதியேவ, து³தியேன பன புன உபஸம்பதா³ய ப⁴ப்³ப³த்தா ‘‘ஸோ சே புன உபஸம்பஜ்ஜதீ’’தி வுத்தம். இதரோ பன பாராஜிகப்பத்தபா⁴வேன ஸாமணேரோ ந ஹோதி. கஸ்மா? ஸரணக³மனாதீ³னம் வினஸ்ஸனதோ. வுத்தஞ்ஹி விமதிவினோத³னியம் (வி. வி. டீ. மஹாவக்³க³ 2.108) ‘‘உபஸம்பன்னானம்பி பாராஜிகஸமஆபத்தியா ஸரணக³மனாதி³ஸாமணேரபா⁴வஸ்ஸபி வினஸ்ஸனதோ ஸேனாஸனக்³கா³ஹோ ச படிப்பஸ்ஸம்ப⁴தி, ஸங்க⁴லாப⁴ம்பி தேன லப⁴ந்தீதி வேதி³தப்³ப³’’ந்தி, கி³ஹீ பன ஹுத்வா புன ஸாமணேரபா⁴வமத்தம் லத்³த⁴ப்³ப³ம் ஹோதி. ‘‘ஸாமணேரோதி மம் தா⁴ரேதா²’’திஆதி³னா பன ஸிக்கா²பச்சக்கா²னே கதே ஸியா ஸாமணேரபா⁴வோ, ததோபி புன உபஸம்பஜ்ஜிதுகாமதாய ஸதி ஸியா உபஸம்பன்னபா⁴வோ. ‘‘கி³ஹீதி மம் தா⁴ரேதா²’’திஆதி³னா ஸிக்கா²பச்சக்கா²னம் கத்வா கி³ஹிபா⁴வம் உபக³தேபி புன ஸாமணேரபப்³ப³ஜ்ஜம் பப்³ப³ஜித்வா ஸாமணேரோ ஹோதி. ததோ புன உபஸம்பஜ்ஜிதும் லத்³த⁴ப்³ப³த்தா ‘‘புன உபஸம்பஜ்ஜதீ’’தி வுத்தோ. தேஸம் பி⁴க்கு²பா⁴வே பரிவாஸே அனிட்டி²தேபி கி³ஹிஸாமணேரபா⁴வம் பத்தத்தா பரிவாஸோ ந ருஹதி உபஸம்பன்னானமேவ பரிவாஸஸ்ஸ ப⁴க³வதா பஞ்ஞத்தத்தாதி அத்தோ².

ஏவம் ஸந்தே புன உபஸம்பஜ்ஜந்தஸ்ஸ கிம் பரிவாஸோ புன தா³தப்³போ³தி ஆஹ ‘‘ஸோ சே புன உபஸம்பஜ்ஜதீ’’திஆதி³. தஸ்ஸத்தோ² – ஸோ விப்³ப⁴ந்தகோ ஸோ வா ஸாமணேரோ புன உபஸம்பன்னபா⁴வம் உபக³ச்ச²தி, புரிமம் புப்³பே³ பி⁴க்கு²பூ⁴தகாலே தி³ன்னம் பரிவாஸதா³னம் ஏவ இதா³னி பரிவாஸதா³னம் ஹோதி. யோ பரிவாஸோ புப்³பே³ பி⁴க்கு²பூ⁴தகாலே தி³ன்னோ, ஸோ பரிவாஸோ ஸுதி³ன்னோ, து³தி³ன்னோ ந ஹோதி. யோ யத்தகோ காலோ பரிவுத்தோ², ஸோ தத்தகோ காலோ ஸுபரிவுத்தோ²யேவ ஹோதி, ந து³பரிவுத்தோ², தஸ்மா அவஸேஸோ காலோ பரிவஸிதப்³போ³தி. இத³ம் வுத்தம் ஹோதி – புப்³பே³ பி⁴க்கு²காலே பக்க²ப்படிச்ச²ன்னாய ஆபத்தியா பரிவாஸம் க³ஹேத்வா த³ஸதி³வஸமத்தம் பரிவஸித்வா அனிட்டி²தேயேவ பரிவாஸே விப்³ப⁴மித்வா ஸாமணேரோ வா ஹுத்வா புன உபஸம்பன்னேன அவஸேஸபஞ்சதி³வஸே பரிவஸித்வா பரிவாஸோ நிட்டா²பேதப்³போ³தி. மானத்தாரஹாதீ³ஸுபி ஏஸேவ நயோ. உம்மத்தகாதீ³ஸுபி தஸ்மிம் காலே அஜானந்தத்தா ‘‘பரிவாஸோ ந ருஹதீ’’தி வுத்தம். திண்ணம்பி உக்கி²த்தகானம் கம்மனானாஸம்வாஸகத்தா தேஹி ஸஹஸம்வாஸோயேவ நத்தீ²தி உக்கி²த்தகானம் பரிவாஸோ ந ருஹதீதி வுத்தம்.

ஸசே புன ஓஸாரீயதீதி உக்கே²பனீயகம்மம் படிப்பஸ்ஸம்ப⁴னவஸேன ஸமானஸம்வாஸகபா⁴வம் பவேஸீயதி. ‘‘ஸசே கஸ்ஸசி பி⁴க்கு²னோ இத்தி²லிங்க³ம் பாதுப⁴வதீ’’திஆதீ³ஸு அட்ட²கதா²யம் வுத்தனயேனேவ அத்தோ² ஸுவிஞ்ஞேய்யோ ஹோதி. யம் பன வுத்தம் ‘‘பக்க²மானத்தம் பச்சா² ஆக³மிஸ்ஸதீ’’தி, தத்ரேவம் ஜானிதப்³ப³ம் – பக்க²மானத்தந்தி பி⁴க்கு²னியா தா³தப்³ப³மானத்தம். தம் பன படிச்ச²ன்னாயபி அப்படிச்ச²ன்னாயபி ஆபத்தியா அட்³ட⁴மாஸமத்தமேவ தா³தப்³ப³ம். வுத்தஞ்ஹேதம் ‘‘க³ருத⁴ம்மம் அஜ்ஜா²பன்னாய பி⁴க்கு²னியா உப⁴தோஸங்கே⁴ பக்க²மானத்தம் சரிதப்³ப³’’ந்தி (பாசி. 149; சூளவ. 403; அ. நி. 8.51). தம் பன பி⁴க்கு²னீஹி அத்தனோ ஸீமம் ஸோதே⁴த்வா விஹாரஸீமாய வா விஹாரஸீமம் ஸோதே⁴தும் அஸக்கோந்தீஹி க²ண்ட³ஸீமாய வா ஸப்³ப³ந்திமேன பரிச்சே²தே³ன சதுவக்³க³க³ணம் ஸன்னிபாதாபேத்வா தா³தப்³ப³ம். ஸசே ஏகா ஆபத்தி ஹோதி, ஏகிஸ்ஸா வஸேன, ஸசே த்³வே வா திஸ்ஸோ வா ஸம்ப³ஹுலா வா ஏகவத்து²கா வா நானாவத்து²கா வா, தாஸம் தாஸம் வஸேன வத்து²கோ³த்தனாமஆபத்தீஸு யம் யம் இச்ச²தி, தம் தம் ஆதா³ய யோஜனா காதப்³பா³.

தத்ரித³ம் ஏகாபத்திவஸேன முக²மத்தனித³ஸ்ஸனம் – தாய ஆபன்னாய பி⁴க்கு²னியா பி⁴க்கு²னிஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கு²னீனம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ ‘‘அஹம், அய்யே, ஏகம் ஆபத்திம் ஆபஜ்ஜிம் கா³மந்தரம், ஸாஹம், அய்ய,ஏ ஏகிஸ்ஸா ஆபத்தியா கா³மந்தராய பக்க²மானத்தம் யாசாமீ’’தி. ஏவம் திக்க²த்தும் யாசாபேத்வா ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ ‘‘ஸுணாது மே, அய்யே, ஸங்கோ⁴, அயம் இத்த²ன்னாமா பி⁴க்கு²னீ ஏகம் ஆபத்திம் ஆபஜ்ஜி கா³மந்தரம், ஸா ஸங்க⁴ம் ஏகிஸ்ஸா ஆபத்தியா கா³மந்தராய பக்க²மானத்தம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமாய பி⁴க்கு²னியா ஏகிஸ்ஸா ஆபத்தியா கா³மந்தராய பக்க²மானத்தம் த³தே³ய்ய, ஏஸா ஞத்தி. ஸுணாது மே, அய்யே, ஸங்கோ⁴…பே… து³தியம்பி. ததியம்பி ஏதமத்த²ம் வதா³மி. ஸுணாது மே, அய்யே, ஸங்கோ⁴…பே… பா⁴ஸேய்ய. தி³ன்னம் ஸங்கே⁴ன இத்த²ன்னாமாய பி⁴க்கு²னியா ஏகிஸ்ஸா ஆபத்தியா கா³மந்தராய பக்க²மானத்தம், க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

கம்மவாசாபரியோஸானே வத்தம் ஸமாதி³யித்வா பி⁴க்கு²மானத்தகதா²யம் வுத்தனயேனேவ ஸங்க⁴ஸ்ஸ ஆரோசேத்வா நிக்கி²த்தவத்தம் வஸிதுகாமாய ததே²வ ஸங்க⁴ஸ்ஸ மஜ்ஜே² வா பக்கந்தாஸு பி⁴க்கு²னீஸு ஏகபி⁴க்கு²னியா வா து³தியிகாய வா ஸந்திகே வுத்தனயேனேவ நிக்கி²பிதப்³ப³ம். அஞ்ஞிஸ்ஸா பன ஆக³ந்துகாய ஸந்திகே ஆரோசேத்வா நிக்கி²பிதப்³ப³ம், நிக்கி²த்தகாலதோ பட்டா²ய பகதத்தட்டா²னே திட்ட²தி.

புன ஸமாதி³யித்வா அருணம் உட்ட²பேந்தியா பன பி⁴க்கு²னீனம்யேவ ஸந்திகே வஸிதும் ந லப்³ப⁴தி. ‘‘உப⁴தோஸங்கே⁴ பக்க²மானத்தம் சரிதப்³ப³’’ந்தி ஹி வுத்தம், தஸ்மா அஸ்ஸா ஆசரியுபஜ்ஜா²யாஹி விஹாரம் க³ந்த்வா ஸங்கா³ஹகபக்கே² டி²தோ ஏகோ மஹாதே²ரோ வா த⁴ம்மகதி²கோ வா பி⁴க்கு² வத்தப்³போ³ ‘‘ஏகிஸ்ஸா பி⁴க்கு²னியா வினயகம்மம் கத்தப்³ப³மத்தி², தத்ர நோ அய்யா சத்தாரோ பி⁴க்கூ² பேஸேதா²’’தி. ஸங்க³ஹம் அகாதும் ந லப்³ப⁴தி, ‘‘பேஸேஸ்ஸாமா’’தி வத்தப்³ப³ம். சதூஹி பகதத்தபி⁴க்கு²னீஹி மானத்தசாரினிம் பி⁴க்கு²னிம் க³ஹேத்வா அந்தோஅருணேயேவ நிக்கி²பித்வா கா³மூபசாரதோ த்³வே லேட்³டு³பாதே அதிக்கமித்வா மக்³கா³ ஓக்கம்ம கு³ம்ப³வதிஆதீ³ஹி படிச்ச²ன்னே டா²னே நிஸீதி³தப்³ப³ம், விஹாரூபசாரதோபி த்³வே லேட்³டு³பாதா அதிக்கமிதப்³பா³. சதூஹி பகதத்தபி⁴க்கூ²ஹிபி தத்த² க³ந்தப்³ப³ம், க³ந்த்வா பன பி⁴க்கு²னீஹி ஸத்³தி⁴ம் ந ஏகட்டா²னே நிஸீதி³தப்³ப³ம், படிக்கமித்வா அவிதூ³ரே டா²னே நிஸீதி³தப்³ப³ம். குருந்தி³மஹாபச்சரீஸு பன ‘‘பி⁴க்கு²னீஹி ப்³யத்தம் ஏகம் வா த்³வே வா உபாஸிகாயோ பி⁴க்கூ²ஹிபி ஏகம் வா த்³வே வா உபாஸகே அத்தரக்க²ணத்தா²ய க³ஹேத்வா க³ந்தப்³ப³’’ந்தி வுத்தம். குருந்தி³யம்யேவ ச ‘‘பி⁴க்கு²னுபஸ்ஸயஸ்ஸ ச விஹாரஸ்ஸ ச உபசாரம் முஞ்சிதும் வட்டதீ’’தி வுத்தம், ‘‘கா³மஸ்ஸா’’தி ந வுத்தம்.

ஏவம் நிஸின்னேஸு பன பி⁴க்கு²னீஸு ச பி⁴க்கூ²ஸு ச தாய பி⁴க்கு²னியா ‘‘மானத்தம் ஸமாதி³யாமி, வத்தம் ஸமாதி³யாமீ’’தி வத்தம் ஸமாதி³யித்வா பி⁴க்கு²னிஸங்க⁴ஸ்ஸ தாவ ஏவம் ஆரோசேதப்³ப³ம் ‘‘அஹம், அய்யே, ஏகம் ஆபத்திம் ஆபஜ்ஜிம் கா³மந்தரம், ஸாஹம் ஸங்க⁴ம் ஏகிஸ்ஸா ஆபத்தியா கா³மந்தராய பக்க²மானத்தம் யாசிம், தஸ்ஸா மே ஸங்கோ⁴ ஏகிஸ்ஸா ஆபத்தியா கா³மந்தராய பக்க²மானத்தம் அதா³ஸி, ஸாஹம் மானத்தம் சராமி, வேதி³யாமஹம் அய்யே, வேதி³யதீதி மம் ஸங்கோ⁴ தா⁴ரேதூ’’தி.

ததோ பி⁴க்கு²ஸங்க⁴ஸ்ஸ ஸந்திகம் க³ந்த்வா ஏவம் ஆரோசேதப்³ப³ம் ‘‘அஹம், அய்யா, ஏகம் ஆபத்திம் ஆபஜ்ஜிம்…பே… வேதி³யாமஹம் அய்யா, வேதி³யதீதி மம் ஸங்கோ⁴ தா⁴ரேதூ’’தி. இதா⁴பி யாய காயசி பா⁴ஸாய ஆரோசேதும் வட்டதி. ஆரோசேத்வா ச பி⁴க்கு²னிஸங்க⁴ஸ்ஸேவ ஸந்திகே நிஸீதி³தப்³ப³ம், ஆரோசிதகாலதோ பட்டா²ய பி⁴க்கூ²னம் க³ந்தும் வட்டதி. ஸசே ஸாஸங்கா ஹோதி, பி⁴க்கு²னியோ தத்தே²வ டா²னம் பச்சாஸீஸந்தி, டா²தப்³ப³ம். ஸசே அஞ்ஞோ பி⁴க்கு² வா பி⁴க்கு²னீ வா தம் டா²னம் ஏதி, பஸ்ஸந்தியா ஆரோசேதப்³ப³ம். நோ சே ஆரோசேதி, ரத்திச்சே²தோ³ சேவ வத்தபே⁴த³து³க்கடஞ்ச. ஸசே அஜானந்தியா ஏவ உபசாரம் ஓக்கமித்வா க³ச்ச²தி, ரத்திச்சே²தோ³வ ஹோதி, ந வத்தபே⁴த³து³க்கடம். ஸசே பி⁴க்கு²னியோ உபஜ்ஜா²யாதீ³னம் வத்தகரணத்த²ம் பகே³வ க³ந்துகாமா ஹோந்தி, ரத்திவிப்பவாஸக³ணஓஹீயனகா³மந்தராபத்திரக்க²ணத்த²ம் ஏகம் பி⁴க்கு²னிம் ட²பேத்வா க³ந்தப்³ப³ம், தாய அருணே உட்டி²தே தஸ்ஸா ஸந்திகே வத்தம் நிக்கி²பிதப்³ப³ம். ஏதேனுபாயேன அக²ண்டா³ பஞ்சத³ஸ ரத்தியோ மானத்தம் சரிதப்³ப³ம்.

அனிக்கி²த்தவத்தாய பன பாரிவாஸிகக்க²ந்த⁴கே வுத்தனயேனேவ ஸம்மா வத்திதப்³ப³ம். அயம் பன விஸேஸோ – ‘‘ஆக³ந்துகஸ்ஸ ஆரோசேதப்³ப³’’ந்தி ஏத்த² யத்தகா புரேப⁴த்தம் வா பச்சா²ப⁴த்தம் வா தம் கா³மம் பி⁴க்கூ² வா பி⁴க்கு²னியோ வா ஆக³ச்ச²ந்தி, ஸப்³பே³ஸம் ஆரோசேதப்³ப³ம். அனாரோசேந்தியா ரத்திச்சே²தோ³ சேவ வத்தபே⁴த³து³க்கடஞ்ச. ஸசேபி ரத்திம் கோசி பி⁴க்கு² தம் கா³மூபசாரம் ஓக்கமித்வா க³ச்ச²தி, ரத்திச்சே²தோ³ ஹோதியேவ, அஜானனபச்சயா பன வத்தபே⁴த³தோ முச்சதி. குருந்தீ³ஆதீ³ஸு பன ‘‘அனிக்கி²த்தவத்தபி⁴க்கூ²னம் வுத்தனயேனேவ கதே²தப்³ப³’’ந்தி வுத்தம், தம் பாரிவாஸிகவத்தாதீ³னம் உபசாரஸீமாய பரிச்சி²ன்னத்தா யுத்ததரம் தி³ஸ்ஸதி. உபோஸதே² ஆரோசேதப்³ப³ம், பவாரணாய ஆரோசேதப்³ப³ம், சதுன்னம் பி⁴க்கூ²னஞ்ச பி⁴க்கு²னீனஞ்ச தே³வஸிகம் ஆரோசேதப்³ப³ம். ஸசே பி⁴க்கூ²னம் தஸ்மிம் கா³மே பி⁴க்கா²சாரோ ஸம்பஜ்ஜதி, தத்தே²வ க³ந்தப்³ப³ம். நோ சே ஸம்பஜ்ஜதி, அஞ்ஞத்ர சரித்வாபி தத்ர ஆக³ந்த்வா அத்தானம் த³ஸ்ஸேத்வா க³ந்தப்³ப³ம், ப³ஹிகா³மே வா ஸங்கேதட்டா²னம் காதப்³ப³ம் ‘‘அஸுகஸ்மிம் நாம டா²னே அம்ஹே பஸ்ஸிஸ்ஸதீ’’தி. தாய ஸங்கேதட்டா²னம் க³ந்த்வா ஆரோசேதப்³ப³ம், ஸங்கேதட்டா²னே அதி³ஸ்வா விஹாரம் க³ந்த்வா ஆரோசேதப்³ப³ம். விஹாரே ஸப்³ப³பி⁴க்கூ²னம் ஆரோசேதப்³ப³ம். ஸசே ஸப்³பே³ஸம் ஸக்கா ந ஹோதி ஆரோசேதும், ப³ஹி உபசாரஸீமாய ட²த்வா பி⁴க்கு²னியோ பேஸேதப்³பா³, தாஹி ஆனீதானம் சதுன்னம் பி⁴க்கூ²னம் ஆரோசேதப்³ப³ம். ஸசே விஹாரோ தூ³ரோ ஹோதி ஸாஸங்கோ, உபாஸகே ச உபாஸிகாயோ ச க³ஹேத்வா க³ந்தப்³ப³ம். ஸசே பன அயம் ஏகா வஸதி, ரத்திவிப்பவாஸம் ஆபஜ்ஜதி, தஸ்மாஸ்ஸா ஏகா பகதத்தா பி⁴க்கு²னீ ஸம்மன்னித்வா தா³தப்³பா³ ஏகச்ச²ன்னே வஸனத்தா²ய.

ஏவம் அக²ண்ட³ம் மானத்தம் சரித்வா வீஸதிக³ணே பி⁴க்கு²னிஸங்கே⁴ வுத்தனயேனேவ அப்³பா⁴னம் காதப்³ப³ம். ‘‘ஸசே மானத்தம் சரமானா அந்தராபத்திம் ஆபஜ்ஜதி, மூலாய படிகஸ்ஸித்வா தஸ்ஸா ஆபத்தியா மானத்தம் தா³தப்³ப³’’ந்தி குருந்தி³யம் வுத்தம், இத³ம் பக்க²மானத்தம் நாம. இத³ம் பன பக்க²மானத்தம் ஸமந்தபாஸாதி³காயம் (சூளவ. அட்ட². 102) பாளிமுத்தவினயவினிச்ச²யபா⁴வேன ஆக³தம்பி இமஸ்மிம் வினயஸங்க³ஹப்பகரணே ஆசரியேன அனுத்³த⁴டம். அயம் பனாசரியஸ்ஸ அதி⁴ப்பாயோ ஸியா – இத³ம் பக்க²மானத்தம் பி⁴க்கு²னியோயேவ ஸந்தா⁴ய ப⁴க³வதா விஸும் பஞ்ஞத்தம், பி⁴க்கூ²ஹி அஸாதா⁴ரணம், இமஸ்மிஞ்ச காலே பி⁴க்கு²னிஸங்கோ⁴ நத்தி², தஸ்மா க³ந்த²ஸ்ஸ லஹுபா⁴வத்த²ம் இத³ம்பி அஞ்ஞம்பி ஈதி³ஸம் அஜ்ஜு²பேக்கி²தப்³ப³ந்தி. அம்ஹேஹி பன பி⁴க்கு²னிஸங்கே⁴ அவிஜ்ஜமானேபி ‘‘பி⁴க்கு²ஸங்கோ⁴ பி⁴க்கு²னீஹி ஸமாதா³தப்³ப³வத்தம் ஜானிஸ்ஸதி. ‘து³ப்³ப³லஜாதிகா ஹி பீ⁴ருகஜாதிகா பி⁴க்கு²னியோ ப⁴க³வதோ ஆணம் பதிட்டா²பேந்தியோ ஏவரூபம் து³க்கரம் து³ரபி⁴ஸம்ப⁴வம் வத்தம் ஸமாத³யிம்ஸு, கிமங்க³ம் பன மய’ந்தி மனஸி கரோந்தா ப⁴க³வதோ ஆணம் பதிட்டா²பேந்தா பரிவாஸாதி³வத்தம் ஸமாதி³யிஸ்ஸந்தீ’’தி மந்த்வா ஆசரியேன அனுத்³த⁴டம்பி இமஸ்மிம் வினயாலங்காரப்பகரணே உத்³த⁴டம், தஸ்மா ஸம்மாஸம்பு³த்³தே⁴ ஸஞ்ஜாதஸத்³தா⁴பேமகா³ரவாதி³யுத்தேஹி ஸத்து²ஸாஸனகரேஹி பி⁴க்கூ²ஹி ஸம்மா ஸிக்கி²தப்³ப³ம். இதோ பரானி அட்ட²கதா²யம் ஆக³தனயேனேவ வேதி³தப்³பா³னி.

மானத்தவினிச்ச²யகதா² நிட்டி²தா.

248. பாரிவாஸிகவத்தகதா²யம் நவகதரம் பாரிவாஸிகந்தி அத்தனா நவகதரம் பாரிவாஸிகம். பாரிவாஸிகஸ்ஸ ஹி அத்தனா நவகதரம் பாரிவாஸிகம் ட²பேத்வா அஞ்ஞே மூலாயபடிகஸ்ஸனாரஹ மானத்தாரஹ மானத்தசாரிக அப்³பா⁴னாரஹாபி பகதத்தட்டா²னேயேவ திட்ட²ந்தி. தேனாஹ ‘‘அந்தமஸோ மூலாயபடிகஸ்ஸனாரஹாதீ³னம்பீ’’தி. அந்தமஸோ மூலாயபடிகஸ்ஸனாரஹாதீ³னம்பீதி ஆதி³-ஸத்³தே³ன மானத்தாரஹமானத்தசாரிகஅப்³பா⁴னாரஹே ஸங்க³ண்ஹாதி. தே ஹி பாரிவாஸிகானம், பாரிவாஸிகா ச தேஸம் பகதத்தட்டா²னே ஏவ திட்ட²ந்தி. அதோ⁴தபாத³ட்ட²பனகந்தி யத்த² ட²த்வா பாதே³ தோ⁴வந்தி, தாதி³ஸம் தா³ருப²லகக²ண்டா³தி³ம். பாத³க⁴ம்ஸனந்தி ஸக்க²ரகத²லாதி³ம். பாதே³ க⁴ம்ஸந்தி ஏதேனாதி பாத³க⁴ம்ஸனம், ஸக்க²ரகத²லாதி³. வுத்தஞ்ஹி ப⁴க³வதா ‘‘அனுஜானாமி, பி⁴க்க²வே, திஸ்ஸோ பாத³க⁴ம்ஸனியோ ஸக்க²ரம் கத²லம் ஸமுத்³த³பே²ண’’ந்தி (சூளவ. 269). ஸத்³தி⁴விஹாரிகானம்பி ஸாதி³யந்தஸ்ஸாதி ஸத்³தி⁴விஹாரிகானம்பி அபி⁴வாத³னாதி³ம் ஸாதி³யந்தஸ்ஸ. வத்தம் கரோந்தீதி ஏத்தகமத்தஸ்ஸேவ வுத்தத்தா ஸத்³தி⁴விஹாரிகாதீ³ஹிபி அபி⁴வாத³னாதி³ம் காதும் ந வட்டதி. ‘‘மா மம் கா³மப்பவேஸனம் ஆபுச்ச²தா²’’தி வுத்தே அனாபுச்சா²பி கா³மம் பவிஸிதும் வட்டதி.

யோ யோ வுட்³டோ⁴தி பாரிவாஸிகேஸு பி⁴க்கூ²ஸு யோ யோ வுட்³டோ⁴. நவகதரஸ்ஸ ஸாதி³துந்தி பாரிவாஸிகனவகதரஸ்ஸ அபி⁴வாத³னாதி³ம் ஸாதி³தும். ‘‘பாரிஸுத்³தி⁴உபோஸதே² கரியமானே’’தி இத³ம் பவாரணதி³வஸேஸு ஸங்கே⁴ பவாரேந்தே அனுபக³தசி²ன்னவஸ்ஸாதீ³ஹி கரியமானம் பாரிஸுத்³தி⁴உபோஸத²ம்பி ஸந்தா⁴ய வுத்தம். தத்தே²வாதி ஸங்க⁴னவகட்டா²னேயேவ. அத்தனோ பாளியா பவாரேதப்³ப³ந்தி அத்தனோ வஸ்ஸக்³கே³ன பத்தபாளியா பவாரேதப்³ப³ம், ந பன ஸப்³பே³ஸு பவாரிதேஸூதி அத்தோ².

ஓணோஜனம் நாம விஸ்ஸஜ்ஜனம், தம் பன பாரிவாஸிகேன பாபிதஸ்ஸ அத்தனா ஸம்படிச்சி²தஸ்ஸேவ புனதி³வஸாதி³அத்தா²ய விஸ்ஸஜ்ஜனம் காதப்³ப³ம். அஸம்படிச்சி²த்வா சே விஸ்ஸஜ்ஜேதி, ந லப⁴தீதி வுத்தம். யதி³ பன ந க³ண்ஹாதி ந விஸ்ஸஜ்ஜேதீதி யதி³ புரிமதி³வஸே அத்தனோ ந க³ண்ஹாதி, க³ஹேத்வா ச ந விஸ்ஸஜ்ஜேதி.

சதுஸ்ஸாலப⁴த்தந்தி போ⁴ஜனஸாலாய படிபாடியா தீ³யமானம் ப⁴த்தம். ஹத்த²பாஸே டி²தேனாதி தா³யகஸ்ஸ ஹத்த²பாஸே டி²தேன, படிக்³க³ஹணருஹனட்டா²னேதி அதி⁴ப்பாயோ. மஹாபேளப⁴த்தேபீதி மஹந்தேஸு ப⁴த்தபச்சி²ஆதி³பா⁴ஜனேஸு ட²பேத்வா தீ³யமானப⁴த்தேஸுபி. இதோ பரம்பி பாரிவாஸிகவத்தம் பாளியம் (சூளவ. 75) ஆக³தனயேனேவ வேதி³தப்³ப³ம். தத்த² பன அட்ட²கதா²யம் ஆக³தனயேனேவ அத்தோ² ஸுவிஞ்ஞேய்யோ ஹோதி, தஸ்மா து³ப்³பி³ஞ்ஞேய்யட்டா²னேயேவ கத²யிஸ்ஸாம.

‘‘ந ஸாமணேரோ உபட்டா²பேதப்³போ³’’தி ஏத்த² து³ப்³பி³த⁴ம் ஸாமணேரம் த³ஸ்ஸேதும் ‘‘அஞ்ஞோ’’திஆதி³மாஹ. ‘‘ந பி⁴க்கு²னியோ ஓவதி³தப்³பா³’’தி ஏத்த² லத்³த⁴ஸம்முதிகேன ஆணத்தோபி க³ருத⁴ம்மேஹி அஞ்ஞேஹி வா ஓவதி³தும் ந லப⁴தீதி ஆஹ ‘‘படிப³லஸ்ஸ வா பி⁴க்கு²ஸ்ஸ பா⁴ரோ காதப்³போ³’’தி. ஆக³தா பி⁴க்கு²னியோ வத்தப்³பா³தி ஸம்ப³ந்தோ⁴. ஸவசனீயந்தி ஸதோ³ஸம். ஜேட்ட²கட்டா²னம் ந காதப்³ப³ந்தி பதா⁴னட்டா²னம் ந காதப்³ப³ம். கிம் தந்தி ஆஹ ‘‘பாதிமோக்கு²த்³தே³ஸகேனா’’திஆதி³.

ரஜேஹி ஹதா உபஹதா பூ⁴மி ஏதிஸ்ஸாதி ரஜோஹதபூ⁴மி, ரஜோகிண்ணபூ⁴மீதி அத்தோ². பச்சயந்தி வஸ்ஸாவாஸிகலாப⁴ம் ஸந்தா⁴ய வுத்தம். ஏகபஸ்ஸே ட²த்வாதி பாளிம் விஹாய பி⁴க்கூ²னம் பச்ச²தோ ட²த்வா. ஸேனாஸனம் ந லப⁴தீதி ஸேய்யபரியந்தபா⁴கி³தாய வஸ்ஸக்³கே³ன க³ண்ஹிதும் ந லப⁴தி. அஸ்ஸாதி ப⁴வேய்ய. ‘‘ஆக³ந்துகேன ஆரோசேதப்³ப³ம், ஆக³ந்துகஸ்ஸ ஆரோசேதப்³ப³’’ந்தி அவிஸேஸேன வுத்தத்தா ஸசே த்³வே பாரிவாஸிகா க³தட்டா²னே அஞ்ஞமஞ்ஞம் பஸ்ஸந்தி, உபோ⁴ஹிபி அஞ்ஞமஞ்ஞஸ்ஸ ஆரோசேதப்³ப³ம். யதா² ப³ஹி தி³ஸ்வா ஆரோசிதஸ்ஸ பி⁴க்கு²னோ விஹாரம் ஆக³தேன புன ஆரோசனகிச்சம் நத்தி², ஏவம் அஞ்ஞவிஹாரம் க³தேனபி தத்த² புப்³பே³ ஆரோசிதஸ்ஸ புன ஆரோசனகிச்சம் நத்தீ²தி வத³ந்தி. அவிஸேஸேனாதி பாரிவாஸிகஸ்ஸ ச உக்கி²த்தகஸ்ஸ ச அவிஸேஸேன.

ஓப³த்³த⁴ந்தி பலிபு³த்³த⁴ம். ஸஹவாஸோதி வுத்தப்பகாரே ச²ன்னே பி⁴க்கு²னா ஸத்³தி⁴ம் ஸயனமேவ அதி⁴ப்பேதம், ந ஸேஸஇரியாபத²கப்பனம். ஸேஸமேத்த² ஸுவிஞ்ஞேய்யமேவ.

பாபிட்ட²தராதி பாராஜிகாபத்தீதி உக்கம்ஸவஸேன வுத்தம். ஸஞ்சரித்தாதி³பண்ணத்திவஜ்ஜதோ பன ஸுக்கவிஸ்ஸட்டா²தி³கா லோகவஜ்ஜாவ. தத்த²பி ஸங்க⁴பே⁴தா³தி³கா பாபிட்ட²தரா ஏவ. கம்மந்தி பாரிவாஸிககம்மவாசாதி ஏதேன ‘‘கம்மபூ⁴தா வாசா கம்மவாசா’’தி கம்மவாசாஸத்³த³ஸ்ஸ அத்தோ²பி ஸித்³தோ⁴தி வேதி³தப்³போ³. ஸவசனீயந்தி ஏத்த² ஸ-ஸத்³தோ³ ‘‘ஸந்தி’’அத்த²ம் வத³தி, அத்தனோ வசனேன அத்தனோ பவத்தனகம்மந்தி ஏவமேத்த² அத்தோ² த³ட்ட²ப்³போ³, ‘‘மா பக்கமாஹீ’’தி வா ‘‘ஏஹி வினயத⁴ரானம் ஸம்முகீ²பா⁴வ’’ந்தி வா ஏவம் அத்தனோ ஆணாய பவத்தனககம்மம் ந காதப்³ப³ந்தி அதி⁴ப்பாயோ. ஏவஞ்ஹி கேனசி ஸவசனீயே கதே அனாத³ரேன அதிக்கமிதும் ந வட்டதி, பு³த்³த⁴ஸ்ஸ ஸங்க⁴ஸ்ஸ ஆணா அதிக்கந்தா நாம ஹோதி. ரஜோஹதபூ⁴மீதி பண்ணஸாலாவிஸேஸனம். பச்சயந்தி வஸ்ஸாவாஸிகசீவரம். ஸேனாஸனம் ந லப⁴தீதி வஸ்ஸக்³கே³ன ந லப⁴தி. அபண்ணகபடிபதா³தி அவிரத்³த⁴படிபதா³. ஸசே வாயமந்தோபீதி ஏத்த² அவிஸயபா⁴வம் ஞத்வா அவாயமந்தோபி ஸங்க³ய்ஹதி. அவிஸேஸேனாதி பாரிவாஸிகுக்கி²த்தகானம் ஸாமஞ்ஞேன. பஞ்சவண்ணச²த³னப³ந்த⁴னட்டா²னேஸூதி பஞ்சப்பகாரச²த³னேஹி ச²ன்னட்டா²னேஸு. ஓப³த்³த⁴ந்தி உட்டா²னாதி³ப்³யாபாரபடிப³த்³த⁴ம், பீளிதந்தி அத்தோ². மஞ்சே வா பீடே² வாதி ஏத்த² வாஸத்³தோ³ ஸமுச்சயத்தோ². தேன தட்டிகாசம்மக²ண்டா³தீ³ஸு தீ³கா⁴ஸனேஸுபி நிஸீதி³தும் ந வட்டதீதி தீ³பிதம் ஹோதி. ந வத்தபே⁴த³து³க்கடந்தி வுட்³ட⁴தரஸ்ஸ ஜானந்தஸ்ஸபி வத்தபே⁴தே³ து³க்கடம் நத்தீ²தி த³ஸ்ஸேதி. வத்தம் நிக்கி²பாபேத்வாதி இத³ம்பி பரிவாஸாதி³மேவ ஸந்தா⁴ய வுத்தம், ந ஸேஸகம்மானி.

‘‘ஸேனாஸனம் ந லப⁴தி ஸேய்யபரியந்தபா⁴கி³தாய. உத்³தே³ஸாதீ³னி தா³தும்பி ந லப⁴தீதி வத³ந்தி. ‘தத³ஹுபஸம்பன்னேபி பகதத்தே’தி வசனதோ அனுபஸம்பன்னேஹி வஸிதும் வட்டதி. ஸமவஸ்ஸாதி ஏதேன அபச்சா² அபுரிமம் நிபஜ்ஜனே த்³வின்னம்பி வத்தபே⁴தா³பத்திபா⁴வம் தீ³பேதி. அத்தனோ அத்தனோ நவகதரந்தி பாரிவாஸிகாதி³னவகதரம். பட²மம் ஸங்க⁴மஜ்ஜே² பரிவாஸம் க³ஹேத்வா நிக்கி²த்தவத்தேன புன ஏகஸ்ஸபி ஸந்திகே ஸமாதி³யிதும் நிக்கி²பிதுஞ்ச வட்டதி, மானத்தே பன நிக்கி²பிதும் வட்டதி. ஊனேக³ணேசரணதோ³ஸத்தா ந க³ஹேதுந்தி ஏகே. பட²மம் ஆதி³ன்னவத்தம் ஏகஸ்ஸ ஸந்திகே யதா² நிக்கி²பிதும் வட்டதி, ததா² ஸமாதி³யிதும்பி வட்டதீதி போராணக³ண்டி²பதே³’’தி வஜிரபு³த்³தி⁴டீகாயம் (வஜிர. டீ. சூளவக்³க³ 76) வுத்தந்தி.

இத³ம் ஏத்த² யம் வத்தம் ‘‘சதுனவுதிபாரிவாஸிகவத்த’’ந்தி பாரிவாஸிகக்க²ந்த⁴கபாளியம் (சூளவ. 75) ஆக³தம், ஸமந்தபாஸாதி³காயம்பி ஏத்தகாய பாளியா (சூளவ. அட்ட². 75-84) வண்ணனம் வத்வா ‘‘பாரிவாஸிகவத்தகதா² நிட்டி²தா’’தி ஆஹ. இமஸ்மிம் வினயஸங்க³ஹபகரணே (வி. ஸங்க³. அட்ட². 248) பன ‘‘ந ச²மாயம் சங்கமந்தே சங்கமே சங்கமிதப்³ப³’’ந்தி இமஸ்ஸானந்தரம் ‘‘பாரிவாஸிகசதுத்தோ² சே, பி⁴க்க²வே’’திஆதீ³னி அக்³க³ஹேத்வா ‘‘ந, பி⁴க்க²வே, பாரிவாஸிகேன பி⁴க்கு²னா ஸாதி³தப்³ப³’’ந்திஆதீ³னி பட²மம் பஞ்ஞத்தபதா³னி க³ஹேத்வா தேஸம் பதா³னம் ஸம்வண்ணனம் கத்வா ‘‘இத³ம் பாரிவாஸிகவத்த’’ந்தி அஞ்ஞதா² அனுக்கமோ வுத்தோ, ஸோ பாளியா ச அட்ட²கதா²ய ச ந ஸமேதி. ஆசரியஸ்ஸ பன அயமதி⁴ப்பாயோ ஸியா – ‘‘பாரிவாஸிகசதுத்தோ² சே, பி⁴க்க²வே’’திஆதீ³னி பாரிவாஸிகபி⁴க்கூ²னம் ஸமாதி³யிதப்³பா³னி ந ஹோந்தி, அத² கோ² கம்மகாரகானம் பி⁴க்கூ²னம் கத்தப்³பா³கத்தப்³ப³கம்மத³ஸ்ஸனமேதம், தஸ்மா பாரிவாஸிகவத்தே ந பவேஸேதப்³ப³ம். ‘‘ந, பி⁴க்க²வே, பாரிவாஸிகேன பி⁴க்கு²னா ஸாதி³தப்³ப³’’ந்திஆதீ³னி பன பாரிவாஸிகபி⁴க்கூ²னம் ஸம்மாவத்திதப்³ப³வத்தானியேவ ஹோந்தி, தஸ்மா இமானியேவ பாரிவாஸிகவத்தே பவேஸேதப்³பா³னீதி. அம்ஹேஹி பன பாளிஅட்ட²கதா²டீகாஸு ஆக³தானுக்கமேன பட²மம் பஞ்ஞத்தவத்தானம் அத்த²ம் பட²மம் த³ஸ்ஸேத்வா பச்சா² பஞ்ஞத்தபதா³னம் அத்தோ² பச்சா² வுத்தோதி த³ட்ட²ப்³போ³.

இதி வினயஸங்க³ஹஸம்வண்ணனாபூ⁴தே வினயாலங்காரே

க³ருகாபத்திவுட்டா²னவினிச்ச²யகதா²லங்காரோ நாம

த்³வத்திம்ஸதிமோ பரிச்சே²தோ³.