30. க³ருப⁴ண்ட³வினிச்ச²யகதா²

227. ஏவம் கதி²னவினிச்ச²யம் கதே²த்வா இதா³னி க³ருப⁴ண்டா³தி³வினிச்ச²யம் த³ஸ்ஸேதும் ‘‘க³ருப⁴ண்டா³னீதி ஏத்தா²’’திஆதி³மாஹ. தத்த² க³ரூதி –

‘‘புமே ஆசரியாதி³ம்ஹி, க³ரு மாதாபிதூஸுபி;

க³ரு தீஸு மஹந்தே ச, து³ஜ்ஜராலஹுகேஸு சா’’தி. –

வுத்தேஸு அனேகத்தே²ஸு அலஹுகவாசகோ. ப⁴ண்ட³-ஸத்³தோ³ ‘‘பா⁴ஜனாதி³பரிக்கா²ரே, ப⁴ண்ட³ம் மூலத⁴னேபி சா’’தி ஏத்த² பா⁴ஜனாதி³பரிக்கா²ரத்தோ² ஹோதி. வசனத்தோ² பன க³ரந்தி உக்³க³ச்ச²ந்தி உக்³க³தா பாகடா ஹோந்தீதி க³ரூனி, ப⁴டி³தப்³பா³னி இச்சி²தப்³பா³னீதி ப⁴ண்டா³னி, க³ரூனி ச தானி ப⁴ண்டா³னி சாதி க³ருப⁴ண்டா³னி, ஆராமாதீ³னி வத்தூ²னி. இதி ஆதி³னா நயேன ஸேனாஸனக்க²ந்த⁴கே ப⁴க³வதா த³ஸ்ஸிதானி இமானி பஞ்ச வத்தூ²னி க³ருப⁴ண்டா³னி நாமாதி யோஜேதப்³ப³ம்.

மஞ்சேஸு மஸாரகோதி மஞ்சபாதே³ விஜ்ஜி²த்வா தத்த² அடனியோ பவேஸேத்வா கதோ. பு³ந்தி³காப³த்³தோ⁴தி அடனீஹி மஞ்சபாதே³ ட³ம்ஸாபேத்வா பல்லங்கஸங்கே²பேன கதோ. குளீரபாத³கோதி அஸ்ஸமேண்ட³காதீ³னம் பாத³ஸதி³ஸேஹி பாதே³ஹி கதோ. யோ வா பன கோசி வங்கபாத³கோ, அயம் வுச்சதி ‘‘குளீரபாத³கோ’’தி. ஆஹச்சபாத³கோதி அயம் பன ‘‘ஆஹச்சபாத³கோ நாம மஞ்சோ அங்கே³ விஜ்ஜி²த்வா கதோ ஹோதீ’’தி ஏவம் பரதோ பாளியம்யேவ (பாசி. 131) வுத்தோ, தஸ்மா அடனியோ விஜ்ஜி²த்வா தத்த² பாத³ஸிக²ம் பவேஸேத்வா உபரி ஆணிம் த³த்வா கதமஞ்சோ ஆஹச்சபாத³கோதி வேதி³தப்³போ³. பீடே²பி ஏஸேவ நயோ.

உண்ணபி⁴ஸிஆதீ³னம் பஞ்சன்னம் அஞ்ஞதராதி உண்ணபி⁴ஸி சோளபி⁴ஸி வாகபி⁴ஸி திணபி⁴ஸி பண்ணபி⁴ஸீதி இமேஸம் பஞ்சன்னம் பி⁴ஸீனம் அஞ்ஞதரா. பஞ்ச பி⁴ஸியோதி பஞ்சஹி உண்ணாதீ³ஹி பூரிதபி⁴ஸியோ. தூலக³ணனாய ஹி ஏதாஸம் க³ணனா. தத்த² உண்ணக்³க³ஹணேன ந கேவலம் ஏளகலோமமேவ க³ஹிதம், ட²பேத்வா பன மனுஸ்ஸலோமம் யம் கிஞ்சி கப்பியாகப்பியமம்ஸஜாதீனம் பக்கி²சதுப்பதா³னம் லோமம், ஸப்³ப³ம் இத⁴ உண்ணக்³க³ஹணேனேவ க³ஹிதம், தஸ்மா ச²ன்னம் சீவரானம், ச²ன்னம் அனுலோமசீவரானஞ்ச அஞ்ஞதரேன பி⁴ஸிச்ச²விம் கத்வா தம் ஸப்³ப³ம் பக்கி²பித்வா பி⁴ஸிம் காதும் வட்டதி. ஏளகலோமானி பன அபக்கி²பித்வா கம்ப³லமேவ சதுக்³கு³ணம் வா பஞ்சகு³ணம் வா பக்கி²பித்வா கதாபி உண்ணபி⁴ஸிஸங்க²மேவ க³ச்ச²தி. சோளபி⁴ஸிஆதீ³ஸு யம் கிஞ்சி நவசோளம் வா புராணசோளம் வா ஸம்ஹரித்வா வா அந்தோ பக்கி²பித்வா வா கதா சோளபி⁴ஸி, யம் கிஞ்சி வாகம் பக்கி²பித்வா கதா வாகபி⁴ஸி, யம் கிஞ்சி திணம் பக்கி²பித்வா கதா திணபி⁴ஸி, அஞ்ஞத்ர ஸுத்³த⁴தமாலபத்தம் யம் கிஞ்சி பண்ணம் பக்கி²பித்வா கதா பண்ணபி⁴ஸீதி வேதி³தப்³பா³. தமாலபத்தம் பன அஞ்ஞேன மிஸ்ஸமேவ வட்டதி, ஸுத்³த⁴ம் ந வட்டதி. பி⁴ஸியா பமாணனியமோ நத்தி², மஞ்சபி⁴ஸி பீட²பி⁴ஸி பூ⁴மத்த²ரணபி⁴ஸி சங்கமனபி⁴ஸி பாத³புஞ்ச²னபி⁴ஸீதி ஏதாஸம் அனுரூபதோ ஸல்லக்கே²த்வா அத்தனோ ருசிவஸேன பமாணம் காதப்³ப³ம். யம் பனேதம் உண்ணாதி³பஞ்சவித⁴தூலம்பி பி⁴ஸியம் வட்டதி, தம் மஸூரகேபி வட்டதீதி குருந்தி³யம் வுத்தம். தத்த² மஸூரகேதி சம்மமயபி⁴ஸியம். ஏதேன மஸூரகம் பரிபு⁴ஞ்ஜிதும் வட்டதீதி ஸித்³த⁴ம் ஹோதி.

பி³ம்போ³ஹனே தீணி தூலானி ருக்க²தூலம் லதாதூலம் போடகீதூலந்தி. தத்த² ருக்க²தூலந்தி ஸிம்ப³லிருக்கா²தீ³னம் யேஸம் கேஸஞ்சி ருக்கா²னம் தூலம். லதாதூலந்தி கீ²ரவல்லிஆதீ³னம் யாஸம் காஸஞ்சி லதானம் தூலம். போடகீதூலந்தி போடகீதிணாதீ³னம் யேஸம் கேஸஞ்சி திணஜாதிகானம் அந்தமஸோ உச்சு²னளாதீ³னம்பி தூலம். ஸாரத்த²தீ³பனியம் (ஸாரத்த². டீ. சூளவக்³க³ 3.297) பன ‘‘போடகீதூலந்தி ஏரகதிணதூல’’ந்தி வுத்தம், ஏதேஹி தீஹி ஸப்³ப³பூ⁴தகா³மா ஸங்க³ஹிதா ஹோந்தி. ருக்க²வல்லிதிணஜாதியோ ஹி முஞ்சித்வா அஞ்ஞோ பூ⁴தகா³மோ நாம நத்தி², தஸ்மா யஸ்ஸ கஸ்ஸசி பூ⁴தகா³மஸ்ஸ தூலம் பி³ம்போ³ஹனே வட்டதி, பி⁴ஸிம் பன பாபுணித்வா ஸப்³ப³ம்பேதம் ‘‘அகப்பியதூல’’ந்தி வுச்சதி ந கேவலஞ்ச பி³ம்போ³ஹனே ஏதம் தூலமேவ, ஹம்ஸமோராதீ³னம் ஸப்³ப³ஸகுணானம், ஸீஹாதீ³னம் ஸப்³ப³சதுப்பதா³னஞ்ச லோமம்பி வட்டதி. பியங்கு³புப்ப²ப³குளபுப்பா²தி³ பன யம் கிஞ்சி புப்ப²ம் ந வட்டதி. தமாலபத்தம் ஸுத்³த⁴மேவ ந வட்டதி, மிஸ்ஸகம் பன வட்டதி, பி⁴ஸீனம் அனுஞ்ஞாதம் பஞ்சவித⁴ம் உண்ணாதி³தூலம்பி வட்டதி. அத்³த⁴காயிகானி பன பி³ம்போ³ஹனானி ந வட்டந்தி. அத்³த⁴காயிகானீதி உபட்³ட⁴காயப்பமாணானி, யேஸு கடிதோ பட்டா²ய யாவ ஸீஸம் உபத³ஹந்தி ட²பேந்தி. ஸீஸப்பமாணம் பன வட்டதி, ஸீஸப்பமாணம் நாம யஸ்ஸ வித்தா²ரதோ தீஸு கண்ணேஸு த்³வின்னம் கண்ணானம் அந்தரம் மினியமானம் வித³த்தி² சேவ சதுரங்கு³லஞ்ச ஹோதி, மஜ்ஜ²ட்டா²னம் முட்டி²ரதனம் ஹோதி, தீ³க⁴தோ பன தி³யட்³ட⁴ரதனம் வா த்³விரதனம் வாதி குருந்தி³யம் வுத்தம், அயம் ஸீஸப்பமாணஸ்ஸ உக்கட்ட²பரிச்சே²தோ³, இதோ உத்³த⁴ம் ந வட்டதி, ஹேட்டா² பன வட்டதீதி அட்ட²கதா²யம் (சூளவ. அட்ட². 297) வுத்தம். தத்த² ‘‘தீஸு கண்ணேஸு த்³வின்னம் கண்ணான’’ந்தி பாட²ம் உபனிதா⁴ய பி³ம்போ³ஹனஸ்ஸ உபோ⁴ஸு அந்தேஸு ட²பேதப்³ப³சோளகம் திகோணமேவ கரோந்தி ஏகச்சே. ‘‘இத³ஞ்ச டா²னம் க³ண்டி²ட்டா²ன’’ந்தி வத³ந்தி.

விமதிவினோத³னியம் (வி. வி. டீ. சூளவக்³க³ 2.297) பன ‘‘ஸீஸப்பமாணம் நாம யத்த² கீ³வாய ஸஹ ஸகலம் ஸீஸம் ட²பேதும் ஸக்கா, தஸ்ஸ ச முட்டி²ரதனம் வித்தா²ரப்பமாணந்தி த³ஸ்ஸேந்தோ ‘வித்தா²ரதோ’திஆதி³மாஹ. இத³ஞ்ச பி³ம்போ³ஹனஸ்ஸ உபோ⁴ஸு அந்தேஸு ட²பேதப்³ப³சோளப்பமாணத³ஸ்ஸனம், தஸ்ஸ வஸேன பி³ம்போ³ஹனஸ்ஸ வித்தா²ரப்பமாணம் பரிச்சி²ஜ்ஜதி, தம் வட்டம் வா சதுரஸ்ஸம் வா கத்வா ஸிப்³பி³தம் யதா² கோடிதோ கோடி வித்தா²ரதோ புது²லட்டா²னம் முட்டி²ரதனப்பமாணம் ஹோதி, ஏவம் ஸிப்³பி³தப்³ப³ம், இதோ அதி⁴கம் ந வட்டதி. தம் பன அந்தேஸு ட²பிதசோளம் கோடியா கோடிம் ஆஹச்ச தி³கு³ணம் கதம் திகண்ணம் ஹோதி, தேஸு தீஸு கண்ணேஸு த்³வின்னம் கண்ணானம் அந்தரம் வித³த்தி²சதுரங்கு³லம் ஹோதி, மஜ்ஜ²ட்டா²னம் கோடிதோ கோடிம் ஆஹச்ச முட்டி²ரதனம் ஹோதி, இத³மஸ்ஸ உக்கட்ட²ப்பமாண’’ந்தி வுத்தத்தா பி³ம்போ³ஹனஸ்ஸ உபோ⁴ஸு அந்தேஸு ட²பேதப்³ப³சோளகம் பகதியாயேவ திகண்ணம் ந ஹோதி, அத² கோ² கோடியா கோடிம் ஆஹச்ச தி³கு³ணகதகாலேயேவ ஹோதி, தஸ்மா தம் சோளகம் வட்டம் வா ஹோது சதுரஸ்ஸம் வா, தி³கு³ணம் கத்வா மினியமானம் திகண்ணமேவ ஹோதி, த்³வின்னஞ்ச கண்ணானம் அந்தரம் சதுரங்கு³லாதி⁴கவித³த்தி²மத்தம் ஹோதி, தஸ்ஸ ச சோளகஸ்ஸ மஜ்ஜ²ட்டா²னம் முட்டி²ரதனம் ஹோதி, தஸ்ஸேவ சோளகஸ்ஸ பமாணேன பி³ம்போ³ஹனஸ்ஸ மஜ்ஜ²ட்டா²னம்பி முட்டி²ரதனம் ஹோதீதி விஞ்ஞாயதீதி.

‘‘கம்ப³லமேவ…பே… உண்ணபி⁴ஸிஸங்க²மேவ க³ச்ச²தீதி ஸாமஞ்ஞதோ வுத்தத்தா கோ³னகாதி³அகப்பியம்பி உண்ணமயத்த²ரணம் பி⁴ஸியம் பக்கி²பித்வா ஸயிதும் வட்டதீதி த³ட்ட²ப்³ப³ம். மஸூரகேதி சம்மமயபி⁴ஸியம், சம்மமயம் பன பி³ம்போ³ஹனம் தூலபுண்ணம்பி ந வட்டதீ’’தி ச விமதிவினோத³னியம் (வி. வி. டீ. சூளவக்³க³ 2.297) வுத்தம். ஸாரத்த²தீ³பனியம் (ஸாரத்த². டீ. சூளவக்³க³ 3.297) பன ‘‘ஸீஸப்பமாணந்தி யத்த² க³லவாடகதோ பட்டா²ய ஸப்³ப³ஸீஸம் உபத³ஹந்தி, தம் ஸீஸப்பமாணம் ஹோதி, தஞ்ச உக்கட்ட²பரிச்சே²த³தோ திரியம் முட்டி²ரதனம் ஹோதீதி த³ஸ்ஸேதும் ‘யத்த² வித்தா²ரதோ தீஸு கண்ணேஸூ’திஆதி³மாஹ. மஜ்ஜ²ட்டா²னம் முட்டி²ரதனம் ஹோதீதி பி³ம்போ³ஹனஸ்ஸ மஜ்ஜ²ட்டா²னம் திரியதோ முட்டி²ரதனப்பமாணம் ஹோதீ’’தி வுத்தம். அரஞ்ஜரோதி ப³ஹுஉத³கக³ண்ஹனகா மஹாசாடி. ஜலம் க³ண்ஹிதும் அலந்தி அரஞ்ஜரோ, வட்டசாடி விய ஹுத்வா தோ²கம் தீ³க⁴முகோ² மஜ்ஜே² பரிச்சே²த³ம் த³ஸ்ஸேத்வா கதோதி க³ண்டி²பதே³ஸு வுத்தம். வுத்தஞ்ஹேதம் அட்ட²கதா²யந்தி அஜ்ஜா²ஹாரஸம்ப³ந்தோ⁴.

த்³விஸங்க³ஹானி த்³வே ஹோந்தீதி த்³வே பட²மது³தியஅவிஸ்ஸஜ்ஜியானி ‘‘ஆராமோ ஆராமவத்தூ²’’தி ச ‘‘விஹாரோ விஹாரவத்தூ²’’தி ச வுத்தத்³வேத்³வேவத்து²ஸங்க³ஹானி ஹோந்தி. ததியம் அவிஸ்ஸஜ்ஜியம் ‘‘மஞ்சோ பீட²ம் பி⁴ஸி பி³ம்போ³ஹன’’ந்தி வுத்தசதுவத்து²ஸங்க³ஹம் ஹோதி. சதுத்த²ம் அவிஸ்ஸஜ்ஜியம் ‘‘லோஹகும்பீ⁴ லோஹபா⁴ணகம் லோஹவாரகோ லோஹகடாஹம் வாஸி ப²ரஸு குடா²ரீ குதா³லோ நிகா²த³ன’’ந்தி வுத்தனவகோட்டா²ஸவந்தம் ஹோதி. பஞ்சமம் அவிஸ்ஸஜ்ஜியம் ‘‘வல்லி வேளு முஞ்ஜம் பப்³ப³ஜம் திணம் மத்திகா தா³ருப⁴ண்ட³ம் மத்திகாப⁴ண்ட³’’ந்தி வுத்தஅட்ட²பே⁴த³னம் அட்ட²பபே⁴த³வந்தம் ஹோதீதி யோஜனா. பஞ்சனிம்மலலோசனோதி மம்ஸசக்கு²தி³ப்³ப³சக்கு²த⁴ம்மசக்கு²பு³த்³த⁴சக்கு²ஸமந்தசக்கூ²னம் வஸேன நிம்மலபஞ்சலோசனோ.

ஸேனாஸனக்க²ந்த⁴கே அவிஸ்ஸஜ்ஜியம் கீடாகி³ரிவத்து²ஸ்மிம் அவேப⁴ங்கி³யந்தி ஏத்த² ‘‘ஸேனாஸனக்க²ந்த⁴கே கா³மகாவாஸவத்து²ஸ்மிம் அவிஸ்ஸஜ்ஜியம் கீடாகி³ரிவத்து²ஸ்மிம் அவேப⁴ங்கி³ய’’ந்தி வத்தப்³ப³ம். கஸ்மா? த்³வின்னம்பி வத்தூ²னம் ஸேனாஸனக்க²ந்த⁴கே ஆக³தத்தா. ஸேனாஸனக்க²ந்த⁴கேதி அயம் ஸாமஞ்ஞாதா⁴ரோ. கா³மகாவாஸவத்து²ஸ்மிம் கீடாகி³ரிவத்து²ஸ்மிந்தி விஸேஸாதா⁴ரோ. அயமத்தோ² பாளிம் ஓலோகேத்வா பச்சேதப்³போ³. தேனேவ ஹி ஸமந்தபாஸாதி³காயம் (சூளவ. அட்ட². 321) ‘‘ஸேனாஸனக்க²ந்த⁴கே’’தி அவத்வா ‘‘இத⁴’’இச்சேவ வுத்தம், இதா⁴தி இமினா கா³மகாவாஸவத்து²ம் த³ஸ்ஸேதி, கீடாகி³ரிவத்து² பன ஸரூபதோ த³ஸ்ஸிதமேவ. ஸாமஞ்ஞாதா⁴ரோ பன தம்ஸம்வண்ணனாபா⁴வதோ அவுத்தோபி ஸிஜ்ஜ²தீதி ந வுத்தோதி விஞ்ஞாயதி.

228. தா²வரேன ச தா²வரம், க³ருப⁴ண்டே³ன ச க³ருப⁴ண்ட³ந்தி ஏத்த² பஞ்சஸு கோட்டா²ஸேஸு புரிமத்³வயம் தா²வரம், பச்சி²மத்தயம் க³ருப⁴ண்ட³ந்தி வேதி³தப்³ப³ம். ஸமகமேவ தே³தீதி ஏத்த² ஊனகம் தே³ந்தம்பி விஹாரவத்து²ஸாமந்தம் க³ஹேத்வா தூ³ரதரம் து³க்க²கோ³பம் விஸ்ஸஜ்ஜேதும் வட்டதீதி த³ட்ட²ப்³ப³ம். வக்க²தி ஹி ‘‘பி⁴க்கூ²னஞ்சே மஹக்³க⁴தரம்…பே… ஸம்படிச்சி²தும் வட்டதீ’’தி. ஜானாபேத்வாதி பி⁴க்கு²ஸங்க⁴ஸ்ஸ ஜானாபேத்வா, அபலோகேத்வாதி அத்தோ². நனு தும்ஹாகம் ப³ஹுதரம் ருக்கா²தி வத்தப்³ப³ந்தி இத³ம் ஸாமிகேஸு அத்தனோ ப⁴ண்ட³ஸ்ஸ மஹக்³க⁴தம் அஜானித்வா தே³ந்தேஸு தம் ஞத்வா தே²ய்யசித்தேன க³ண்ஹதோ அவஹாரோ ஹோதீதி வுத்தம். விஹாரேன விஹாரோ பரிவத்தேதப்³போ³தி ஸவத்து²கேன அஞ்ஞேஸம் பூ⁴மியம் கதபாஸாதா³தி³னா, அவத்து²கேன வா ஸவத்து²கம் பரிவத்தேதப்³ப³ம், அவத்து²கம் பன அவத்து²கேனேவ பரிவத்தேதப்³ப³ம் கேவலம் பாஸாத³ஸ்ஸ பூ⁴மிதோ அதா²வரத்தா. ஏவம் தா²வரேஸுபி தா²வரவிபா⁴க³ம் ஞத்வாவ பரிவத்தேதப்³ப³ம்.

‘‘கப்பியமஞ்சா ஸம்படிச்சி²தப்³பா³தி இமினா ஸுவண்ணாதி³விசித்தம் அகப்பியமஞ்சம் ‘ஸங்க⁴ஸ்ஸா’தி வுத்தேபி ஸம்படிச்சி²தும் ந வட்டதீதி த³ஸ்ஸேதி. ‘விஹாரஸ்ஸ தே³மா’தி வுத்தே ஸங்க⁴ஸ்ஸ வட்டதி, ந புக்³க³லஸ்ஸ கே²த்தாதி³ வியாதி த³ட்ட²ப்³ப³’’ந்தி விமதிவினோத³னியம் (வி. வி. டீ. சூளவக்³க³ 2.321) வுத்தம். ஸாரத்த²தீ³பனியம் (ஸாரத்த². டீ. சூள்வக்³க³ 3.321) பன ‘‘கப்பியமஞ்சா ஸம்படிச்சி²தப்³பா³தி ‘ஸங்க⁴ஸ்ஸ தே³மா’தி தி³ன்னம் ஸந்தா⁴ய வுத்தம். ஸசே பன ‘விஹாரஸ்ஸ தே³மா’தி வத³ந்தி, ஸுவண்ணரஜதமயாதி³அகப்பியமஞ்சேபி ஸம்படிச்சி²தும் வட்டதீ’’தி வுத்தம். ந கேவலம்…பே… பரிவத்தேதும் வட்டந்தீதி இமினா அதா²வரேன தா²வரம்பி அதா²வரம்பி பரிவத்தேதும் வட்டதீதி த³ஸ்ஸேதி. தா²வரேன அதா²வரமேவ ஹி பரிவத்தேதும் ந வட்டதி. ‘‘அகப்பியம் வா மஹக்³க⁴ம் கப்பியம் வாதி ஏத்த² அகப்பியம் நாம ஸுவண்ணமயமஞ்சாதி³ அகப்பியபி⁴ஸிபி³ம்போ³ஹனானி ச. மஹக்³க⁴ம் கப்பியம் நாம த³ந்தமயமஞ்சாதி³, பாவாராதி³கப்பியஅத்த²ரணாதீ³னி சா’’தி ஸாரத்த²தீ³பனியம் வுத்தம், விமதிவினோத³னியம் பன ‘‘அகப்பியம் வாதி ஆஸந்தி³ஆதி³, பமாணாதிக்கந்தம் பி³ம்போ³ஹனாதி³ ச. மஹக்³க⁴ம் கப்பியம் வாதி ஸுவண்ணாதி³விசித்தம் கப்பியவோஹாரேன தி³ன்ன’’ந்தி வுத்தம்.

229. ‘‘காளலோஹ …பே… பா⁴ஜேதப்³போ³’’தி வுத்தத்தா வட்டகம்ஸலோஹமயம்பி பா⁴ஜனம் புக்³க³லிகம்பி ஸம்படிச்சி²தும்பி பரிஹரிதும்பி வட்டதி புக்³க³லானம் பரிஹரிதப்³ப³ஸ்ஸேவ பா⁴ஜேதப்³ப³த்தாதி வத³ந்தி, தம் உபரி ‘‘கம்ஸலோஹவட்டலோஹபா⁴ஜனவிகதி ஸங்கி⁴கபரிபோ⁴கே³ன வா கி³ஹிவிகடா வா வட்டதீ’’திஆதி³கேன மஹாபச்சரிவசனேன விருஜ்ஜ²தி. இமஸ்ஸ ஹி ‘‘வட்டலோஹகம்ஸலோஹானம் யேன கேனசி கதோ ஸீஹளதீ³பே பாத³க்³க³ண்ஹனகோ பா⁴ஜேதப்³போ³’’தி வுத்தஸ்ஸ மஹாஅட்ட²கதா²வசனஸ்ஸ படிக்கே²பாய தம் மஹாபச்சரிவசனம் பச்சா² த³ஸ்ஸிதம், தஸ்மா வட்டலோஹகம்ஸலோஹமயம் யம் கிஞ்சி பாத³க்³க³ண்ஹனகவாரகம்பி உபாதா³ய அபா⁴ஜனீயமேவ, கி³ஹீஹி தீ³யமானம்பி புக்³க³லஸ்ஸ ஸம்படிச்சி²தும்பி ந வட்டதி. பாரிஹாரியம் ந வட்டதீதி பத்தாதி³பரிக்கா²ரம் விய ஸயமேவ படிஸாமேத்வா பரிபு⁴ஞ்ஜிதும் ந வட்டதி. கி³ஹிஸந்தகம் விய ஆராமிகாத³யோ சே ஸயமேவ கோ³பேத்வா வினியோக³காலே ஆனேத்வா படிதே³ந்தி, பரிபு⁴ஞ்ஜிதும் வட்டதி, ‘‘படிஸாமேத்வா பி⁴க்கூ²னம் தே³தா²’’தி வத்தும்பி வட்டதீதி.

பண்ணஸூசி நாம லேக²னீதி வத³ந்தி. அத்தனா லத்³தா⁴னிபீதிஆதி³னா படிக்³க³ஹணே தோ³ஸோ நத்தி², பரிஹரித்வா பரிபோ⁴கோ³வ ஆபத்திகரோதி த³ஸ்ஸேதி. யதா² சேத்த², ஏவம் உபரி பா⁴ஜனீயவாஸிஆதீ³ஸு அத்தனோ ஸந்தகேஸுபி.

அனாமாஸம்பீதி ஸுவண்ணாதி³மயம்பி, ஸப்³ப³ம் தம் ஆமஸித்வா பரிபு⁴ஞ்ஜிதும் வட்டதி.

உபக்க²ரேதி உபகரணே. ஸிக²ரம் நாம யேன பரிப்³ப⁴மந்தா சி²ந்த³ந்தி. பத்தப³ந்த⁴கோ நாம பத்தஸ்ஸ க³ண்டி²ஆதி³காரகோ. ‘‘படிமானம் ஸுவண்ணாதி³பத்தகாரகோ’’திபி வத³ந்தி.

‘‘அட்³ட⁴பா³ஹூதி கப்பரதோ பட்டா²ய யாவ அம்ஸகூட’’ந்தி க³ண்டி²பதே³ஸு வுத்தம். ‘‘அட்³ட⁴பா³ஹு நாம வித³த்தி²சதுரங்கு³லந்திபி வத³ந்தீ’’தி ஸாரத்த²தீ³பனியம் (ஸாரத்த². டீ. சூளவக்³க³ 2.321) வுத்தம். வஜிரபு³த்³தி⁴டீகாயம்பி (வஜிர. டீ. சூளவக்³க³ 321) ‘‘அட்³ட⁴பா³ஹூதி கப்பரதோ பட்டா²ய யாவ அம்ஸகூடந்தி லிகி²த’’ந்தி வுத்தம். விமதிவினோத³னியம் (வி. வி. டீ. சூளவக்³க³ 2.321) பன ‘‘அட்³ட⁴பா³ஹுப்பமாணா நாம அட்³ட⁴பா³ஹுமத்தா, அட்³ட⁴ப்³யாமமத்தாதிபி வத³ந்தீ’’தி வுத்தம். யோத்தானீதி சம்மரஜ்ஜுகா. தத்த²ஜாதகாதி ஸங்கி⁴கபூ⁴மியம் ஜாதா.

‘‘அட்ட²ங்கு³லஸூசித³ண்ட³மத்தோதி தீ³க⁴ஸோ அட்ட²ங்கு³லமத்தோ பரிணாஹதோ பண்ணஸூசித³ண்ட³மத்தோ’’தி ஸாரத்த²தீ³பனியம் (ஸாரத்த². டீ.. சூளவக்³க³ 3.321) விமதிவினோத³னியம் பன (வி. வி. டீ. சூளவக்³க³ 2.321) ‘‘அட்ட²ங்கு³லஸூசித³ண்ட³மத்தோதி ஸரத³ண்டா³தி³ஸூசிஆகாரதனுத³ண்ட³கமத்தோபீ’’தி வுத்தம். அட்ட²ங்கு³லப்பமாணோதி தீ³க⁴தோ அட்ட²ங்கு³லப்பமாணோ. ரித்தபோத்த²கோபீதி அலிகி²தபோத்த²கோபி, இத³ஞ்ச பண்ணப்பஸங்கே³ன வுத்தம்.

ஆஸந்தி³கோதி சதுரஸ்ஸபீட²ம் வுச்சதி ‘‘உச்சகம்பி ஆஸந்தி³க’’ந்தி (சூளவ. 297) வசனதோ. ஏகதோபா⁴கே³ன தீ³க⁴பீட²மேவ ஹி அட்ட²ங்கு³லபாத³கம் வட்டதி, சதுரஸ்ஸாஸந்தி³கோ பன பமாணாதிக்கந்தோபி வட்டதீதி வேதி³தப்³போ³. ஸத்தங்கோ³ நாம தீஸு தி³ஸாஸு அபஸ்ஸயம் கத்வா கதமஞ்சோ, அயம்பி பமாணாதிக்கந்தோபி வட்டதி. ப⁴த்³த³பீட²ந்தி வேத்தமயம் பீட²ம் வுச்சதி. பீடி²காதி பிலோதிகப³ந்த⁴ம் பீட²மேவ. ஏளகபாத³பீட²ம் நாம தா³ருபடிகாய உபரிபாதே³ ட²பேத்வா போ⁴ஜனப²லகம் விய கதபீட²ம் வுச்சதி. ஆமண்ட³கவண்டகபீட²ம் நாம ஆமலகாகாரேன யோஜிதப³ஹஉபாத³பீட²ம். இமானி தாவ பாளியம் ஆக³தபீடா²னி. தா³ருமயம் பன ஸப்³ப³ம்பி பீட²ம் வட்டதி.

‘‘க⁴ட்டனப²லகம் நாம யத்த² ட²பேத்வா ரஜிதசீவரம் ஹத்தே²ன க⁴ட்டேந்தி. க⁴ட்டனமுக்³க³ரோ நாம அனுவாதாதி³க⁴ட்டனத்த²ம் கதோதி வத³ந்தீ’’தி ஸாரத்த²தீ³பனியம் (ஸாரத்த². டீ. சூளவக்³க³ 3.321) வுத்தம். விமதிவினோத³னியம் (வி. வி. டீ. சூளவக்³க³ 2.321) ‘‘க⁴ட்டனப²லகம் க⁴ட்டனமுக்³க³ரோதி இத³ம் ரஜிதசீவரம் ஏகஸ்மிம் மட்டே² த³ண்ட³முக்³க³ரே வேடே²த்வா ஏகஸ்ஸ மட்ட²ப²லகஸ்ஸ உபரி ட²பேத்வா உபரி அபரேன மட்ட²ப²லகேன நிக்குஜ்ஜித்வா ஏகோ உபரி அக்கமித்வா திட்ட²தி, த்³வே ஜனா உபரிப²லகம் த்³வீஸு கோடீஸு க³ஹேத்வா அபராபரம் ஆகட்³ட⁴னவிகட்³ட⁴னம் கரோந்தி, ஏதம் ஸந்தா⁴ய வுத்தம். ஹத்தே² ட²பாபேத்வா ஹத்தே²ன பஹரணம் பன நிட்டி²தரஜனஸ்ஸ சீவரஸ்ஸ அல்லகாலே காதப்³ப³ம், இத³ம் பன ப²லகமுக்³க³ரேஹி க⁴ட்டனம் ஸுக்க²காலே த²த்³த⁴பா⁴வவிமோசனத்த²ந்தி த³ட்ட²ப்³ப³’’ந்தி வுத்தம். ‘‘அம்ப³ணந்தி ப²லகேஹி போக்க²ரணீஸதி³ஸகதபானீயபா⁴ஜனம். ரஜனதோ³ணீதி யத்த² பக்கரஜனம் ஆகிரித்வா ட²பேந்தீ’’தி ஸாரத்த²தீ³பனியம். விமதிவினோத³னியம் பன ‘‘அம்ப³ணந்தி ஏகதோ³ணிகனாவாப²லகேஹி போக்க²ரணீஸதி³ஸம் கதம். பானீயபா⁴ஜனந்திபி வத³ந்தி. ரஜனதோ³ணீதி ஏகதா³ருனாவ கதம் ரஜனபா⁴ஜனம். உத³கதோ³ணீதி ஏகதா³ருனாவ கதம் உத³கபா⁴ஜன’’ந்தி வுத்தம்.

‘‘பூ⁴மத்த²ரணம் காதும் வட்டதீதி அகப்பியசம்மம் ஸந்தா⁴ய வுத்தம். பச்சத்த²ரணக³திகந்தி இமினா மஞ்சபீடே²பி அத்த²ரிதும் வட்டதீதி தீ³பேதி. பாவாராதி³பச்சத்த²ரணம்பி க³ருப⁴ண்ட³ந்தி ஏகே. நோதி அபரே, வீமம்ஸித்வா க³ஹேதப்³ப³’’ந்தி ஸாரத்த²தீ³பனியம் (ஸாரத்த². டீ. சூளவக்³க³ 3.321) வுத்தம். வஜிரபு³த்³தி⁴டீகாயம் (வஜிர. டீ. சூளவக்³க³ 321) பன ‘‘த³ண்ட³முக்³க³ரோ நாம ‘யேன ரஜிதசீவரம் போதே²ந்தி, தம்பி க³ருப⁴ண்ட³மேவா’தி வுத்தத்தா, ‘பச்சத்த²ரணக³திக’ந்தி வுத்தத்தா ச அபி-ஸத்³தே³ன பாவாராதி³பச்சத்த²ரணம் ஸப்³ப³ம் க³ருப⁴ண்ட³மேவாதி வத³ந்தி. ஏதேனேவ ஸுத்தேன அஞ்ஞதா² அத்த²ம் வத்வா பாவாராதி³பச்சத்த²ரணம் ந க³ருப⁴ண்ட³ம், பா⁴ஜனீயமேவ, ஸேனாஸனத்தா²ய தி³ன்னபச்சத்த²ரணமேவ க³ருப⁴ண்ட³ந்தி வத³ந்தி. உபபரிக்கி²தப்³ப³’’ந்தி வுத்தம். விமதிவினோத³னியம் (வி. வி. டீ. சூளவக்³க³ 2.321) பன ‘‘பூ⁴மத்த²ரணம் காதும் வட்டதீதி அகப்பியசம்மம் ஸந்தா⁴ய வுத்தம். தத்த² பூ⁴மத்த²ரணஸங்கே²பேன ஸயிதும்பி வட்டதியேவ. பச்சத்த²ரணக³திகந்தி இமினா மஞ்சாதீ³ஸு அத்த²ரிதப்³ப³ம் மஹாசம்மம் ஏளகசம்மம் நாமாதி த³ஸ்ஸேதீ’’தி வுத்தம். ச²த்தமுட்டி²பண்ணந்தி தாலபண்ணம் ஸந்தா⁴ய வுத்தம். பத்தகடாஹந்தி பத்தபசனகடாஹம். க³ண்டி²காதி சீவரக³ண்டி²கா. விதோ⁴தி காயப³ந்த⁴னவிதோ⁴.

இதா³னி வினயத்த²மஞ்ஜூஸாயம் (கங்கா². அபி⁴. டீ. து³ப்³ப³லஸிக்கா²பத³வண்ணனா) ஆக³தனயோ வுச்சதே – ஆராமோ நாம புப்பா²ராமோ வா ப²லாராமோ வா. ஆராமவத்து² நாம தேஸம்யேவ ஆராமானம் அத்தா²ய பரிச்சி²ந்தி³த்வா ட²பிதோகாஸோ. தேஸு வா ஆராமேஸு வினட்டே²ஸு தேஸம் போராணகபூ⁴மிபா⁴கோ³. விஹாரோ நாம யம் கிஞ்சி பாஸாதா³தி³ஸேனாஸனம். விஹாரவத்து² நாம தஸ்ஸ பதிட்டா²னோகாஸோ. மஞ்சோ நாம மஸாரகோ பு³ந்தி³காப³த்³தோ⁴ குளீரபாத³கோ ஆஹச்சபாத³கோதி இமேஸம் புப்³பே³ வுத்தானம் சதுன்னம் மஞ்சானம் அஞ்ஞதரோ. பீட²ம் நாம மஸாரகாதீ³னம்யேவ சதுன்னம் பீடா²னம் அஞ்ஞதரம். பி⁴ஸி நாம உண்ணபி⁴ஸிஆதீ³னம் பஞ்சன்னம் பி⁴ஸீனம் அஞ்ஞதரம். பி³ம்போ³ஹனம் நாம ருக்க²தூலலதாதூலபோடகீதூலானம் அஞ்ஞதரேன புண்ணம். லோஹகும்பீ⁴ நாம காளலோஹேன வா தம்ப³லோஹேன வா யேன கேனசி கதகும்பீ⁴. லோஹபா⁴ணகாதீ³ஸுபி ஏஸேவ நயோ. ஏத்த² பன பா⁴ணகந்தி அரஞ்ஜரோ வுச்சதி. வாரகோதி க⁴டோ. கடாஹம் கடாஹமேவ. வாஸிஆதீ³ஸு வல்லிஆதீ³ஸு ச து³விஞ்ஞேய்யம் நாம நத்தி²…பே….

தத்த² தா²வரேன தா²வரந்தி விஹாரவிஹாரவத்து²னா ஆராமஆராமவத்து²ம் விஹாரவிஹாரவத்து²ம். இதரேனாதி அதா²வரேன, பச்சி²மராஸித்தயேனாதி வுத்தம் ஹோதி. அகப்பியேனாதி ஸுவண்ணமயமஞ்சாதி³னா சேவ அகப்பியபி⁴ஸிபி³ம்போ³ஹனேஹி ச. மஹக்³க⁴கப்பியேனாதி த³ந்தமயமஞ்சாதி³னா சேவ பாவாராதி³னா ச. இதரந்தி அதா²வரம். கப்பியபரிவத்தனேன பரிவத்தேதுந்தி யதா² அகப்பியம் ந ஹோதி, ஏவம் பரிவத்தேதும்…பே… ஏவம் தாவ தா²வரேன தா²வரபரிவத்தனம் வேதி³தப்³ப³ம். இதரேன இதரபரிவத்தனே பன மஞ்சபீட²ம் மஹந்தம் வா ஹோது, கு²த்³த³கம் வா, அந்தமஸோ சதுரங்கு³லபாத³கம் கா³மதா³ரகேஹி பம்ஸ்வாகா³ரகேஸு கீளந்தேஹி கதம்பி ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ம் ஹோதி…பே… ஸதக்³க⁴னகேன வா ஸஹஸ்ஸக்³க⁴னகேன வா மஞ்சேன அஞ்ஞம் மஞ்சஸதம்பி லப⁴தி, பரிவத்தேத்வா க³ஹேதப்³ப³ம். ந கேவலம் மஞ்சேன மஞ்சோயேவ, ஆராமஆராமவத்து²விஹாரவிஹாரவத்து²பீட²பி⁴ஸிபி³ம்போ³ஹனானிபி பரிவத்தேதும் வட்டந்தி. ஏஸ நயோ பீட²பி⁴ஸிபி³ம்போ³ஹனேஸுபி.

காளலோஹதம்ப³லோஹகம்ஸலோஹவட்டலோஹானந்தி ஏத்த² கம்ஸலோஹம் வட்டலோஹஞ்ச கித்திமலோஹம். தீணி ஹி கித்திமலோஹானி கம்ஸலோஹம் வட்டலோஹம் ஹாரகூடந்தி. தத்த² திபுதம்பே³ மிஸ்ஸேத்வா கதம் கம்ஸலோஹம். ஸீஸதம்பே³ மிஸ்ஸேத்வா கதம் வட்டலோஹம். ரஸதம்பே³ மிஸ்ஸேத்வா கதம் ஹாரகூடம். தேன வுத்தம் ‘‘கம்ஸலோஹம் வட்டலோஹஞ்ச கித்திமலோஹ’’ந்தி. ததோ அதிரேகந்தி ததோ அதிரேகக³ண்ஹனகோ. ஸாரகோதி மஜ்ஜே² மகுளம் த³ஸ்ஸேத்வா முக²வட்டிவித்த²தம் கத்வா பிட்டி²தோ நாமேத்வா காதப்³ப³ம் ஏகம் பா⁴ஜனம். ஸராவந்திபி வத³ந்தி. ஆதி³-ஸத்³தே³ன கஞ்சனகாதீ³னம் கி³ஹிஉபகரணானம் க³ஹணம். தானி ஹி கு²த்³த³கானிபி க³ருப⁴ண்டா³னேவ கி³ஹிஉபகரணத்தா. பி-ஸத்³தே³ன பகே³வ மஹந்தானீதி த³ஸ்ஸேதி, இமானி பன பா⁴ஜனீயானி பி⁴க்கு²பகரணத்தாதி அதி⁴ப்பாயோ. யதா² ச ஏதானி, ஏவம் குண்டி³காபி பா⁴ஜனீயா. வக்க²தி ஹி ‘‘யதா² ச மத்திகாப⁴ண்டே³, ஏவம் லோஹப⁴ண்டே³பி குண்டி³கா பா⁴ஜனீயகோட்டா²ஸமேவ ப⁴ஜதீ’’தி. ஸங்கி⁴கபரிபோ⁴கே³னாதி ஆக³ந்துகானம் வுட்³ட⁴தரானம் த³த்வா பரிபோ⁴கே³ன. கி³ஹிவிகடாதி கி³ஹீஹி விகதா பஞ்ஞத்தா, அத்தனோ வா ஸந்தககரணேன விரூபம் கதா. புக்³க³லிகபரிபோ⁴கே³ன ந வட்டதீதி ஆக³ந்துகானம் அத³த்வா அத்தனோ ஸந்தகம் விய க³ஹேத்வா பரிபு⁴ஞ்ஜிதும் ந வட்டதி. பிப்ப²லிகோதி கத்தரி. ஆரகண்டகம் ஸூசிவேத⁴கம். தாளம் யந்தம். கத்தரயட்டி²வேத⁴கோ கத்தரயட்டி²வலயம். யதா² ததா² க⁴னகதம் லோஹந்தி லோஹவட்டி லோஹகு³ளோ லோஹபிண்டி³ லோஹசக்கலிகந்தி ஏவம் க⁴னகதம் லோஹம். கீ²ரபாஸாணமயானீதி முது³ககீ²ரவண்ணபாஸாணமயானி.

கி³ஹிவிகடானிபி ந வட்டந்தி அனாமாஸத்தா. பி-ஸத்³தே³ன பகே³வ ஸங்கி⁴கபரிபோ⁴கே³ன வா புக்³க³லிகபரிபோ⁴கே³ன வாதி த³ஸ்ஸேதி. ஸேனாஸனபரிபோ⁴கோ³ பன ஸப்³ப³கப்பியோ, தஸ்மா ஜாதரூபாதி³மயா ஸப்³பா³பி ஸேனாஸனபரிக்கா²ரா ஆமாஸா. தேனாஹ ‘‘ஸேனாஸனபரிபோ⁴கே³ பனா’’திஆதி³.

ஸேஸாதி ததோ மஹத்தரீ வாஸி. யா பனாதி யா குடா²ரீ பன. குதா³லோ அந்தமஸோ சதுரங்கு³லமத்தோபி க³ருப⁴ண்ட³மேவ. நிகா²த³னம் சதுரஸ்ஸமுக²ம் வா ஹோது தோ³ணிமுக²ம் வா வங்கம் வா உஜுகம் வா, அந்தமஸோ ஸம்முஞ்ஜனீத³ண்ட³வேத⁴னம்பி, த³ண்ட³ப³ந்த⁴ஞ்சே, க³ருப⁴ண்ட³மேவ. தேனாஹ ‘‘குதா³லோ த³ண்ட³ப³ந்த⁴னிகா²த³னம் வா அக³ருப⁴ண்ட³ம் நாம நத்தீ²’’தி. ஸிபாடிகா நாம கு²ரகோஸோ, ஸிக²ரம் பன த³ண்ட³ப³ந்த⁴னிகா²த³னம் அனுலோமேதீதி ஆஹ ‘‘ஸிக²ரம்பி நிகா²த³னேனேவ ஸங்க³ஹித’’ந்தி. ஸசே பன வாஸி அத³ண்ட³கம் ப²லமத்தம், பா⁴ஜனீயம். உபக்க²ரேதி வாஸிஆதி³ப⁴ண்டே³.

பத்தப³ந்த⁴கோ நாம பத்தஸ்ஸ க³ண்டி²காதி³காரகோ. ‘‘படிமானம் ஸுவண்ணாதி³பத்தகாரகோ’’திபி வத³ந்தி. திபுச்சே²த³னகஸத்த²ம் ஸுவண்ணச்சே²த³னகஸத்த²ம் கதபரிகம்மசம்மச்சி²ந்த³னககு²த்³த³கஸத்த²ந்தி இமானி சேத்த² தீணி பிப்ப²லிகம் அனுலோமந்தீதி ஆஹ ‘‘அயம் பன விஸேஸோ’’திஆதி³. இதரானீதி மஹாகத்தரிஆதீ³னி.

அட்³ட⁴பா³ஹுப்பமாணாதி கப்பரதோ பட்டா²ய யாவ அம்ஸகூடப்பமாணா, வித³த்தி²சதுரங்கு³லப்பமாணாதி வுத்தம் ஹோதி. தத்த²ஜாதகாதி ஸங்கி⁴கபூ⁴மியம் ஜாதா, ஆரக்க²ஸம்விதா⁴னேன ரக்கி²தத்தா ரக்கி²தா ச ஸா மஞ்ஜூஸாதீ³ஸு பக்கி²த்தம் விய யதா² தம் ந நஸ்ஸதி, ஏவம் கோ³பனதோ கோ³பிதா சாதி ரக்கி²தகோ³பிதா. தத்த²ஜாதகாபி பன அரக்கி²தா க³ருப⁴ண்ட³மேவ ந ஹோதி. ஸங்க⁴கம்மே ச சேதியகம்மே ச கதேதி இமினா ஸங்க⁴ஸந்தகேன சேதியஸந்தகம் ரக்கி²தும் பரிவத்திதுஞ்ச வட்டதீதி தீ³பேதி. ஸுத்தம் பனாதி வட்டிதஞ்சேவ அவட்டிதஞ்ச ஸுத்தம்.

அட்ட²ங்கு³லஸூசித³ண்ட³மத்தோதி அந்தமஸோ தீ³க⁴ஸோ அட்ட²ங்கு³லமத்தோ பரிணாஹதோ ஸீஹள-பண்ணஸூசித³ண்ட³மத்தோ. ஏத்தா²தி வேளுப⁴ண்டே³. த³ட்³ட⁴ம் கே³ஹம் யேஸம் தேதி த³ட்³ட⁴கே³ஹா. ந வாரேதப்³பா³தி ‘‘மா க³ண்ஹித்வா க³ச்ச²தா²’’தி ந நிஸேதே⁴தப்³பா³. தே³ஸந்தரக³தேன ஸம்பத்தவிஹாரே ஸங்கி⁴காவாஸே ட²பேதப்³பா³.

அவஸேஸஞ்ச ச²த³னதிணந்தி முஞ்ஜபப்³ப³ஜேஹி அவஸேஸம் யம் கிஞ்சி ச²த³னதிணம். அட்ட²ங்கு³லப்பமாணோபீதி வித்தா²ரதோ அட்ட²ங்கு³லப்பமாணோ. லிகி²தபோத்த²கோ பன க³ருப⁴ண்ட³ம் ந ஹோதி. கப்பியசம்மானீதி மிகா³தீ³னம் சம்மானி. ஸப்³ப³ம் சக்கயுத்தயானந்தி ரத²ஸகடாதி³கம் ஸப்³ப³ம் சக்கயுத்தயானம். விஸங்க²தசக்கம் பன யானம் பா⁴ஜனீயம். அனுஞ்ஞாதவாஸி நாம யா ஸிபாடிகாய பக்கி²பித்வா பரிஹரிதும் ஸக்காதி வுத்தா. முட்டி²பண்ணம் தாலபத்தம். தஞ்ஹி முட்டி²னா க³ஹேத்வா பரிஹரந்தீதி ‘‘முட்டி²பண்ண’’ந்தி வுச்சதி. ‘‘முட்டி²பண்ணந்தி ச²த்தச்ச²த³பண்ணமேவா’’தி கேசி. அரணீஸஹிதந்தி அரணீயுக³ளம், உத்தராரணீ அத⁴ராரணீதி அரணீத்³வயந்தி அத்தோ². பா²திகம்மம் கத்வாதி அந்தமஸோ தம்அக்³க⁴னகவாலிகாயபி தா²வரம் வட்³டி⁴கம்மம் கத்வா. குண்டி³காதி அயகுண்டி³கா சேவ தம்ப³லோஹகுண்டி³கா ச. பா⁴ஜனீயகோட்டா²ஸமேவ ப⁴ஜதீதி பா⁴ஜனீயபக்க²மேவ ஸேவதி, ந து க³ருப⁴ண்ட³ந்தி அத்தோ². கஞ்சனகோ பன க³ருப⁴ண்ட³மேவாதி அதி⁴ப்பாயோ.

இதி வினயஸங்க³ஹஸம்வண்ணனாபூ⁴தே வினயாலங்காரே

க³ருப⁴ண்ட³வினிச்ச²யகதா²லங்காரோ நாம

திம்ஸதிமோ பரிச்சே²தோ³.