3. பே⁴ஸஜ்ஜாதி³கரணவினிச்ச²யகதா²

15. ஏவம் பரிக்கா²ரவினிச்ச²யம் கதே²த்வா இதா³னி பே⁴ஸஜ்ஜகரணபரித்தபடிஸந்தா²ரானம் வினிச்ச²யம் கதே²தும் ‘‘பே⁴ஸஜ்ஜா’’திஆதி³மாஹ. தத்த² பி⁴ஸக்கஸ்ஸ இத³ம் கம்மம் பே⁴ஸஜ்ஜம். கிம் தம்? திகிச்ச²னம். கரியதே கரணம், பே⁴ஸஜ்ஜஸ்ஸ கரணம் பே⁴ஸஜ்ஜகரணம், வேஜ்ஜகம்மகரணந்தி வுத்தம் ஹோதி. பரிஸமந்ததோ தாயதி ரக்க²தீதி பரித்தம், ஆரக்கா²தி அத்தோ². படிஸந்த²ரணம் படிஸந்தா²ரோ, அத்தனா ஸத்³தி⁴ம் அஞ்ஞேஸம் ஸம்ப³ந்த⁴கரணந்தி அத்தோ². தத்த² யோ வினிச்ச²யோ மாதிகாயம் ‘‘பே⁴ஸஜ்ஜகரணம்பி ச பரித்தம், படிஸந்தா²ரோ’’தி (வி. ஸங்க³. அட்ட². க³ந்தா²ரம்ப⁴கதா²) மயா வுத்தோ, தஸ்மிம் ஸமபி⁴னிவிட்டே² பே⁴ஸஜ்ஜகரணவினிச்ச²யே. ஸஹத⁴ம்மோ ஏதேஸந்தி ஸஹத⁴ம்மிகா, தேஸம், ஏகஸ்ஸ ஸத்து²னோ ஸாஸனே ஸஹஸிக்க²மானத⁴ம்மானந்தி அத்தோ². அத² வா ஸஹத⁴ம்மே நியுத்தா ஸஹத⁴ம்மிகா, தேஸம், ஸஹத⁴ம்மஸங்கா²தே ஸிக்கா²பதே³ ஸிக்க²மானபா⁴வேன நியுத்தானந்தி அத்தோ². விவட்டனிஸ்ஸிதஸீலாதி³யுத்தபா⁴வேன ஸமத்தா ஸமஸீலஸத்³தா⁴பஞ்ஞானம். ஏதேன து³ஸ்ஸீலானம் பி⁴ன்னலத்³தி⁴கானஞ்ச அகாதும்பி லப்³ப⁴தீதி த³ஸ்ஸேதி.

ஞாதகபவாரிதட்டா²னதோ வாதி அத்தனோ வா தேஸம் வா ஞாதகபவாரிதட்டா²னதோ. ந கரியித்தா²தி அகதா, அயுத்தவஸேன அகதபுப்³பா³ விஞ்ஞத்தி அகதவிஞ்ஞத்தி. வஜிரபு³த்³தி⁴டீகாயம் (வஜிர. டீ. பாராஜிக 186) பன ‘‘அகதவிஞ்ஞத்தியாதி ந விஞ்ஞத்தியா. ஸா ஹி அனனுஞ்ஞாதத்தா கதாபி அகதா வியாதி அகதவிஞ்ஞத்தி, ‘வதே³ய்யாத² ப⁴ந்தே யேனத்தோ²’தி ஏவம் அகதட்டா²னே விஞ்ஞத்தி அகதவிஞ்ஞத்தீதி லிகி²த’’ந்தி வுத்தம். ஸாரத்த²தீ³பனியம் (ஸாரத்த². டீ. 2.185) ‘‘கி³லானஸ்ஸ அத்தா²ய அப்பவாரிதட்டா²னதோ விஞ்ஞத்தியா அனுஞ்ஞாதத்தா கதாபி அகதா வியாதி அகதவிஞ்ஞத்தி, ‘வத³ ப⁴ந்தே பச்சயேனா’தி ஏவம் அகதபவாரணட்டா²னே ச விஞ்ஞத்தி அகதவிஞ்ஞத்தீ’’தி.

16. படியாதி³யதீதி ஸம்பாதே³தி. அகாதும் ந வட்டதீதி ஏத்த² து³க்கடந்தி வத³ந்தி, அயுத்ததாவஸேன பனேத்த² அகரணப்படிக்கே²போ வுத்தோ, ந ஆபத்திவஸேனாதி க³ஹேதப்³ப³ம். ஸப்³ப³ம் பரிகம்மம் அனாமஸந்தேனாதி மாதுகா³மஸரீராதீ³னம் அனாமாஸத்தா வுத்தம். யாவ ஞாதகா ந பஸ்ஸந்தீதி யாவ தஸ்ஸ ஞாதகா ந பஸ்ஸந்தி. ‘‘தித்தி²யபூ⁴தானம் மாதாபிதூனம் ஸஹத்தா² தா³தும் ந வட்டதீ’’தி வஜிரபு³த்³தி⁴டீகாயம் (வஜிர. டீ. பாராஜிக 186) வுத்தம்.

17. பிது ப⁴கி³னீ பிதுச்சா². மாது பா⁴தா மாதுலோ. நப்பஹோந்தீதி காதும் ந ஸக்கோந்தீதி டீகாஸு வுத்தம். ‘‘தேஸம்யேவ ஸந்தகம் பே⁴ஸஜ்ஜம் க³ஹேத்வா கேவலம் யோஜேத்வா தா³தப்³ப³’’ந்தி வத்வா ‘‘ஸசே பன நப்பஹோந்தி யாசந்தி ச, தே³த² நோ ப⁴ந்தே, தும்ஹாகம் படித³ஸ்ஸாமா’’தி வுத்தத்தா பன தேஸம் பே⁴ஸஜ்ஜஸ்ஸ அப்பஹோனகத்தா பே⁴ஸஜ்ஜமேவ யாசந்தீதி அட்ட²கதா²தி⁴ப்பாயோ தி³ஸ்ஸதி, வீமம்ஸிதப்³போ³. ந யாசந்தீதி லஜ்ஜாய ந யாசந்தி, கா³ரவேன வா. ‘‘ஆபோ⁴க³ம் கத்வா’’தி வுத்தத்தா அஞ்ஞதா² தே³ந்தஸ்ஸ ஆபத்தியேவ. ஸாரத்த²தீ³பனியம் (ஸாரத்த². டீ. 2.18) பன ‘‘ஆபோ⁴க³ம் கத்வாதி இத³ம் கத்தப்³ப³கரணத³ஸ்ஸனவஸேன வுத்தம், ஆபோ⁴க³ம் பன அகத்வாபி தா³தும் வட்டதீதி தீஸு க³ண்டி²பதே³ஸு லிகி²த’’ந்தி வுத்தம். போராணடீகாயம்பி ததே³வ க³ஹேத்வா லிகி²தம். விமதிவினோத³னியம் (வி. வி. டீ. 1.185) பன தம் வசனம் படிக்கி²த்தம். வுத்தஞ்ஹி தத்த² கேசி பன ‘‘ஆபோ⁴க³ம் அகத்வாபி தா³தும் வட்டதீதி வத³ந்தி, தம் ந யுத்தம் பே⁴ஸஜ்ஜகரணஸ்ஸ, பாளியம் ‘அனாபத்தி பி⁴க்கு² பாராஜிகஸ்ஸ, ஆபத்தி து³க்கடஸ்ஸா’தி ஏவம் அந்தராபத்தித³ஸ்ஸனவஸேன ஸாமஞ்ஞதோ படிக்கி²த்தத்தா, அட்ட²கதா²யம் அவுத்தப்பகாரேன கரோந்தஸ்ஸ ஸுத்தேனேவ ஆபத்திஸித்³தா⁴தி த³ட்ட²ப்³பா³. தேனேவ அட்ட²கதா²யம்பி ‘தேஸஞ்ஞேவ ஸந்தக’ந்திஆதி³ வுத்த’’ந்தி.

ஏதே த³ஸ ஞாதகே ட²பேத்வாதி தேஸம் புத்தனத்தாத³யோபி தப்படிப³த்³த⁴த்தா ஞாதகா ஏவாதி தேபி ஏத்தே²வ ஸங்க³ஹிதா. தேன அஞ்ஞேஸந்தி இமினா அஞ்ஞாதகானம் க³ஹணம் வேதி³தப்³ப³ம். தேனேவாஹ ‘‘ஏதேஸம் புத்தபரம்பராயா’’திஆதி³. குலபரிவட்டாதி குலானம் படிபாடி, குலபரம்பராதி வுத்தம் ஹோதி. பே⁴ஸஜ்ஜம் கரோந்தஸ்ஸாதி யதா²வுத்தவிதி⁴னா கரோந்தஸ்ஸ, ‘‘தாவகாலிகம் த³ஸ்ஸாமீ’’தி ஆபோ⁴க³ம் அகத்வா தே³ந்தஸ்ஸபி பன அந்தராபத்திது³க்கடம் வினா மிச்சா²ஜீவனம் வா குலதூ³ஸனம் வா ந ஹோதியேவ. தேனாஹ ‘‘வேஜ்ஜகம்மம் வா குலதூ³ஸகாபத்தி வா ந ஹோதீ’’தி. ஞாதகானஞ்ஹி ஸந்தகம் யாசித்வாபி க³ஹேதும் வட்டதி, தஸ்மா தத்த² குலதூ³ஸனாதி³ ந ஸியா. ஸாரத்த²தீ³பனியம்பி (ஸாரத்த². டீ. 2.185) ‘‘மய்ஹம் த³ஸ்ஸந்தி கரிஸ்ஸந்தீதி பச்சாஸாய கரோந்தஸ்ஸபி யாசித்வா க³ஹேதப்³ப³ட்டா²னதாய ஞாதகேஸு வேஜ்ஜகம்மம் வா குலதூ³ஸகாபத்தி வா ந ஹோதீதி வத³ந்தீ’’தி வுத்தம். வஜிரபு³த்³தி⁴டீகாயம் (வஜிர. டீ. பாராஜிக 186) பன ‘‘வேஜ்ஜகம்மம் வா குலதூ³ஸகாபத்தி வா ந ஹோதீதி வசனதோ யாவ ஸத்தமோ குலபரிவட்டோ, தாவ பே⁴ஸஜ்ஜம் காதும் வட்டதீதி வத³ந்தீ’’தி ஏத்தகமேவ வுத்தம். ஸப்³ப³பதே³ஸு வினிச்ச²யோ வேதி³தப்³போ³தி ‘‘சூளமாதுயா’’திஆதீ³ஸு ஸப்³ப³பதே³ஸு சூளமாதுயா ஸாமிகோதிஆதி³னா யோஜேத்வா ஹேட்டா² வுத்தனயேனேவ வினிச்ச²யோ வேதி³தப்³போ³.

உபஜ்ஜா²யஸ்ஸ ஆஹராமாதி இத³ம் உபஜ்ஜா²யேன மம ஞாதகானம் பே⁴ஸஜ்ஜம் ஆஹரதா²தி ஆணத்தேஹி கத்தப்³ப³விதி⁴த³ஸ்ஸனத்த²ம் வுத்தம். இமினா ச ஸாமணேராதீ³னம் அபச்சாஸாயபி பரஜனஸ்ஸ பே⁴ஸஜ்ஜகரணம் ந வட்டதீதி த³ஸ்ஸேதி. வுத்தனயேனேவ பரியேஸித்வாதி இமினா ‘‘பி⁴க்கா²சாரவத்தேன வா’’திஆதி³னா, ‘‘ஞாதிஸாமணேரேஹி வா’’திஆதி³னா ச வுத்தமத்த²ம் அதிதி³ஸதி. அபச்சாஸீஸந்தேனாதி (வி. வி. டீ. 1.185) ஆக³ந்துகசோராதீ³னம் கரோந்தேனபி மனுஸ்ஸா நாம உபகாரகா ஹோந்தீதி அத்தனோ தேஹி லாப⁴ம் அபத்த²யந்தேன, பச்சாஸாய கரோந்தஸ்ஸ பன வேஜ்ஜகம்மகுலதூ³ஸனாதி³னா தோ³ஸோ ஹோதீதி அதி⁴ப்பாயோ. ஏவஞ்ஹி உபகாரே கதே ஸாஸனஸ்ஸ கு³ணம் ஞத்வா பஸீத³ந்தி, ஸங்க⁴ஸ்ஸ வா உபகாரகா ஹோந்தீதி கரணே பன தோ³ஸோ நத்தி². கேசி பன ‘‘அபச்சாஸீஸந்தேன ஆக³ந்துகாதீ³னம் படிக்கி²த்தபுக்³க³லானம்பி தா³தும் வட்டதீ’’தி வத³ந்தி, தம் ந யுத்தம் கத்தப்³பா³கத்தப்³ப³ட்டா²னவிபா⁴க³ஸ்ஸ நிரத்த²கத்தப்பஸங்க³தோ அபச்சாஸீஸந்தேன ‘‘ஸப்³பே³ஸம்பி தா³தும் காதுஞ்ச வட்டதீ’’தி ஏத்தகமத்தஸ்ஸேவ வத்தப்³ப³தோ. அபச்சாஸீஸனஞ்ச மிச்சா²ஜீவகுலதூ³ஸனாதி³தோ³ஸனிஸேத⁴னத்த²மேவ வுத்தம் ந பே⁴ஸஜ்ஜகரணஸங்கா²தாய இமிஸ்ஸா அந்தராபத்தியா முச்சனத்த²ம் ஆக³ந்துகசோராதீ³னம் அனுஞ்ஞாதானம் தா³னேனேவ தாய ஆபத்தியா முச்சனதோதி க³ஹேதப்³ப³ம்.

18. தேனேவ அபச்சாஸீஸந்தேனபி அகாதப்³ப³ட்டா²னம் த³ஸ்ஸேதும் ‘‘ஸத்³த⁴ம் குல’’ந்திஆதி³ வுத்தம். ‘‘பே⁴ஸஜ்ஜம் ஆசிக்க²தா²’’தி வுத்தேபி ‘‘அஞ்ஞமஞ்ஞம் பன கதா² காதப்³பா³’’தி இத³ம் பரியாயத்தா வட்டதி. ஏவம் ஹேட்டா² வுத்தனயேன இத³ஞ்சித³ஞ்ச க³ஹேத்வா கரோந்தீதி இமினா பரியாயேன கதே²ந்தஸ்ஸபி நேவத்தி² தோ³ஸோதி ஆசரியா. புச்ச²ந்தீதி இமினா தி³ட்ட²தி³ட்ட²ரோகீ³னம் பரியாயேனபி வத்வா விசரணம் அயுத்தந்தி த³ஸ்ஸேதி. புச்சி²தஸ்ஸபி பன பச்சாஸீஸந்தஸ்ஸ பரியாயகதா²பி ந வட்டதீதி வத³ந்தி. ஸமுல்லபேஸீதி அபச்சாஸீஸந்தோ ஏவ அஞ்ஞமஞ்ஞம் கத²ம் ஸமுட்டா²பேஸி. ஆசரியபா⁴கோ³தி வினயாசாரம் அகோபேத்வா பே⁴ஸஜ்ஜாசிக்க²ணேன வேஜ்ஜாசரியபா⁴கோ³ அயந்தி அத்தோ²தி விமதிவினோத³னியம் (வி. வி. டீ. 1.185) வுத்தம்.

ஸாரத்த²தீ³பனியம் (ஸாரத்த². டீ. 2.185) பன ‘‘வினயலக்க²ணம் அஜானந்தஸ்ஸ அனாசரியஸ்ஸ தத³னுரூபவோஹாராஸம்ப⁴வதோ ஈதி³ஸஸ்ஸ லாப⁴ஸ்ஸ உப்பத்தி நாம நத்தீ²தி ‘ஆசரியபா⁴கோ³ நாம அய’ந்தி வுத்தம். வினயே பகதஞ்ஞுனா ஆசரியேன லபி⁴தப்³ப³பா⁴கோ³ அயந்தி வுத்தம் ஹோதீ’’தி வுத்தம். ‘‘புப்ப²பூஜனத்தா²ய தி³ன்னேபி அகப்பியவோஹாரேன விதா⁴னஸ்ஸ அயுத்தத்தா ‘கப்பியவஸேனா’தி வுத்தம், ‘புப்ப²ம் ஆஹரதா²’திஆதி³னா கப்பியவோஹாரவஸேனாதி அத்தோ²’’தி ஸாரத்த²தீ³பனியம் (ஸாரத்த². டீ. 2.185) வுத்தம். விமதிவினோத³னியம் (வி. வி. டீ. 1.185) பன ‘‘புப்ப²பூஜனத்தா²யபி ஸம்படிச்சி²யமானம் ரூபியம் அத்தனோ ஸந்தகத்தப⁴ஜனேன நிஸ்ஸக்³கி³யமேவாதி ஆஹ ‘கப்பியவஸேன கா³ஹாபேத்வா’தி. ‘அம்ஹாகம் ரூபியம் ந வட்டதி, புப்ப²பூஜனத்த²ம் புப்ப²ம் வட்டதீ’திஆதி³னா படிக்கி²பித்வா கப்பியேன கம்மேன கா³ஹாபேத்வாதி அத்தோ²’’தி வுத்தம். வஜிரபு³த்³தி⁴டீகாயம் (வஜிர. டீ. பாராஜிக 186) பன ‘‘கப்பியவஸேனாதி அம்ஹாகம் புப்ப²ம் ஆனேதா²திஆதி³னா. ‘பூஜம் அகாஸீ’தி வுத்தத்தா ஸயம் க³ஹேதும் ந வட்டதீதி வத³ந்தீ’’தி ஏத்தகமேவ வுத்தம். அயமேத்த² பே⁴ஸஜ்ஜகரணவினிச்ச²யகதா²லங்காரோ.

19. ஏவம் பே⁴ஸஜ்ஜகரணவினிச்ச²யம் கதே²த்வா இதா³னி பரித்தகரணவினிச்ச²யம் கதே²துமாஹ ‘‘பரித்தே பனா’’திஆதி³. தத்த² யதி³ ‘‘பரித்தம் கரோதா²’’தி வுத்தே கரோந்தி, பே⁴ஸஜ்ஜகரணம் விய கி³ஹிகம்மம் விய ச ஹோதீதி ‘‘ந காதப்³ப³’’ந்தி வுத்தம். ‘‘பரித்தம் ப⁴ணதா²’’தி வுத்தே பன த⁴ம்மஜ்ஜே²ஸனத்தா அனஜ்ஜி²ட்டே²னபி ப⁴ணிதப்³போ³ த⁴ம்மோ, பகே³வ அஜ்ஜி²ட்டே²னாதி ‘‘காதப்³ப³’’ந்தி வுத்தம், சாலேத்வா ஸுத்தம் பரிமஜ்ஜித்வாதி பரித்தம் கரோந்தேன காதப்³ப³விதி⁴ம் த³ஸ்ஸேதி. சாலேத்வா ஸுத்தம் பரிமஜ்ஜித்வாதி இத³ம் வா ‘‘பரித்தாணம் ஏத்த² பவேஸேமீ’’தி சித்தேன ஏவம் கதே பரித்தாணா ஏத்த² பவேஸிதா நாம ஹோதீதி வுத்தம். விஹாரதோ…பே… து³க்கடந்தி இத³ம் அஞ்ஞாதகே க³ஹட்டே² ஸந்தா⁴ய வுத்தந்தி வத³ந்தி. பாதே³ஸு உத³கம் ஆகிரித்வாதி இத³ம் தஸ்மிம் தே³ஸே சாரித்தவஸேன வுத்தம். தத்த² ஹி பாளியா நிஸின்னானம் பி⁴க்கூ²னம் பாதே³ஸு ரோக³வூபஸமனாதி³அத்தா²ய உத³கம் ஸிஞ்சித்வா பரித்தம் காதும் ஸுத்தஞ்ச ட²பேத்வா ‘‘பரித்தம் ப⁴ணதா²’’தி வத்வா க³ச்ச²ந்தி. ஏவஞ்ஹி கரியமானே யதி³ பாதே³ அபனேந்தி, மனுஸ்ஸா தம் ‘‘அவமங்க³ல’’ந்தி மஞ்ஞந்தி ‘‘ரோகோ³ ந வூபஸமேஸ்ஸதீ’’தி. தேனாஹ ‘‘ந பாதா³ அபனேதப்³பா³’’தி.

மதஸரீரத³ஸ்ஸனே விய கேவலே ஸுஸானத³ஸ்ஸனேபி இத³ம் ஜாதானம் ஸத்தானம் வயக³மனட்டா²னந்தி மரணஸஞ்ஞா உப்பஜ்ஜதீதி ஆஹ ‘‘ஸீவதி²கத³ஸ்ஸனே…பே… மரணஸ்ஸதிம் படிலபி⁴ஸ்ஸாமாதி க³ந்தும் வட்டதீ’’தி. லேஸகப்பம் அகத்வா ஸமுப்பன்னஸுத்³த⁴சித்தேன ‘‘பரிவாரத்தா²ய ஆக³ச்ச²ந்தூ’’தி வுத்தேபி க³ந்தும் வட்டதீதி விமதிவினோத³னியம் (வி. வி. டீ. 1.185) வுத்தம். ஏதேன அஸுப⁴த³ஸ்ஸனந்தி வசனமத்தேன லேஸகப்பம் கத்வா ஏவம் க³தே மதஸ்ஸ ஞாதகா பஸீதி³ஸ்ஸந்தி, தா³னம் த³ஸ்ஸந்தி, மயம் லாப⁴ம் லபி⁴ஸ்ஸாம, உபட்டா²கம் லபி⁴ஸ்ஸாமாதி அஸுத்³த⁴சித்தேன க³ந்தும் ந வட்டதீதி த³ஸ்ஸேதி. கம்மட்டா²னஸீஸேன பன ‘‘மரணஸ்ஸதிம் லபி⁴ஸ்ஸாமா’’திஆதி³னா ஸுத்³த⁴சித்தேன பக்கோஸிதேபி அபக்கோஸிதேபி க³ந்தும் வட்டதீதி தீ³பேதி. தாலபண்ணஸ்ஸ பரித்தலேக²னட்டா²னத்தா பரித்தஸுத்தஸ்ஸ பரித்தகரணஸஞ்ஞாணத்தா தானி தி³ஸ்வா அமனுஸ்ஸா பரித்தஸஞ்ஞாய அபக்கமந்தீதி ஆஹ ‘‘தாலபண்ணம் பன பரித்தஸுத்தம் வா ஹத்தே² வா பாதே³ வா ப³ந்தி⁴தப்³ப³’’ந்தி.

ஏத்த² ச ஆதி³தோ பட்டா²ய யாவ ‘‘ஆடானாடியபரித்தம் (தீ³. நி. 3.275 ஆத³யோ) வா ப⁴ணிதப்³ப³’’ந்தி ஏத்தகோயேவ வினயட்ட²கதா²ப⁴தோ பாளிமுத்தபரித்தகரணவினிச்ச²யோ, ந பன ததோ பரம் வுத்தோ, தஸ்மா ‘‘இத⁴ பனா’’திஆதி³கோ கதா²மக்³கோ³ ஸமந்தபாஸாதி³காயம் நத்தி², தீஸு டீகாஸுபி தம்ஸம்வண்ணனானயோ நத்தி², ததா²பி ஸோ ஸுத்தட்ட²கதா²யம் ஆக³தோவாதி தம் த³ஸ்ஸேதும் ‘‘இத⁴ பன ஆடானாடியஸுத்தஸ்ஸ பரிகம்மம் வேதி³தப்³ப³’’ந்திஆதி³மாஹ. தத்த² இதா⁴தி ‘‘ஆடானாடியபரித்தம் வா ப⁴ணிதப்³ப³’’ந்தி வசனே. பனாதி விஸேஸத்தே² நிபாதோ. தீ³க⁴னிகாயே பாதி²கவக்³கே³ ஆக³தஸ்ஸ ஆடானாடியபரித்தஸ்ஸ பரிகம்மம் ஏவம் வேதி³தப்³ப³ந்தி யோஜனா. யதி³ பட²மமேவ ந வத்தப்³ப³ம், அத² கிம் காதப்³ப³ந்தி ஆஹ ‘‘மேத்தஸுத்த’’ந்திஆதி³. ஏவஞ்ஹி லத்³தா⁴ஸேவனம் ஹுத்வா அதிஓஜவந்தம் ஹோதி.

பிட்ட²ம் வா மம்ஸம் வாதி வா-ஸத்³தோ³ அனியமத்தோ², தேன மச்ச²க²ண்ட³பூவக²ஜ்ஜகாத³யோ ஸங்க³ண்ஹாதி. ஓதாரம் லப⁴ந்தீதி அத்தனா பியாயிதகா²த³னீயனிப³த்³த⁴வஸனட்டா²னலாப⁴தாய அவதாரணம் லப⁴ந்தி. ஹரிதூபலித்தந்தி அல்லகோ³மயலித்தம். இத³ஞ்ஹி போராணகசாரித்தம் பூ⁴மிவிஸுத்³த⁴கரணம். பரிஸுத்³த⁴ம்…பே… நிஸீதி³தப்³ப³ந்தி இமினா பரித்தகாரகஸ்ஸ பி⁴க்கு²னோ மேத்தாகருணாவஸேன சித்தவிஸுத்³தி⁴பி இச்சி²தப்³பா³தி த³ஸ்ஸேதி. ஏவஞ்ஹி ஸதி உபரி வக்க²மானஉப⁴யதோ ரக்கா²ஸம்விதா⁴னேன ஸமேதி. டீகாயம் (தீ³. நி. டீ. 3.282) பன ‘‘ஸரீரஸுத்³தி⁴பி இச்சி²தப்³பா³தி த³ஸ்ஸேதீ’’தி வுத்தம். ததே³தம் விசாரேதப்³ப³ம். ந ஹி ‘‘காயஸுத்³தி⁴மத்தேன அமனுஸ்ஸானம் பியோ ஹோதீ’’தி வுத்தம், மேத்தாவஸேனேவ பன வுத்தம். வுத்தஞ்ஹேதம் ப⁴க³வதா ‘‘மேத்தாய, பி⁴க்க²வே, சேதோவிமுத்தியா…பே… ஏகாத³ஸானிஸம்ஸா பாடிகங்கா². கதமே ஏகாத³ஸ? ஸுக²ம் ஸுபதி, ஸுக²ம் படிபு³ஜ்ஜ²தி, ந பாபகம் ஸுபினம் பஸ்ஸதி, மனுஸ்ஸானம் பியோ ஹோதி, அமனுஸ்ஸானம் பியோ ஹோதீ’’திஆதி³ (அ. நி. 11.15; பரி. 331; மி. ப. 4.4.6).

பரித்தகாரகோ…பே… ஸம்பரிவாரிதேனாதி இத³ம் பரித்தகரணோ பா³ஹிரதோ ஆரக்கா²ஸம்விதா⁴னம், ‘‘மேத்த…பே… வத்தப்³ப³’’ந்தி அப்³ப⁴ந்தரதோ ஆரக்கா²ஸம்விதா⁴னம், ஏவம் உப⁴யதோ ரக்கா²ஸம்விதா⁴னம் ஹோதி. ஏவஞ்ஹி அமனுஸ்ஸா பரித்தகாரகஸ்ஸ அந்தராயம் காதும் ந விஸஹந்தி. மங்க³லகதா² வத்தப்³பா³தி அமனுஸ்ஸானம் தோஸனத்தா²ய பண்ணாகாரம் கத்வா மஹாமங்க³லகதா² கதே²தப்³பா³. ஏவம் உபரி வக்க²மானேன ‘‘துய்ஹம் பண்ணாகாரத்தா²ய மஹாமங்க³லகதா² வுத்தா’’தி வசனேன ஸமேதி. டீகாயம் பன ‘‘புப்³பு³பசாரவஸேன வத்தப்³பா³’’தி வுத்தம். ஸப்³ப³ஸன்னிபாதோதி தஸ்மிம் விஹாரே தஸ்மிம் கா³மக்கே²த்தே ஸப்³பே³ஸம் பி⁴க்கூ²னம் ஸன்னிபாதோ கோ⁴ஸேதப்³போ³ ‘‘சேதியங்க³ணே ஸப்³பே³ஹி ஸன்னிபதிதப்³ப³’’ந்தி. அனாக³ந்தும்னாம ந லப⁴தீதி அமனுஸ்ஸோ பு³த்³தா⁴ணாப⁴யேன ராஜாணாப⁴யேன அனாக³ந்தும் ந லப⁴தி சதுன்னம் மஹாராஜூனம் ஆணாட்டா²னியத்தா. க³ஹிதகாபதே³ஸேன அமனுஸ்ஸோவ புச்சி²தோ ஹோதீதி ‘‘அமனுஸ்ஸக³ஹிதகோ ‘த்வம் கோ நாமோ’தி புச்சி²தப்³போ³’’தி வுத்தம். மாலாக³ந்தா⁴தீ³ஸூதி மாலாக³ந்தா⁴தி³பூஜாஸு. ஆஸனபூஜாயாதி சேதியே பு³த்³தா⁴ஸனபூஜாய. பிண்ட³பாதேதி பி⁴க்கு²ஸங்க⁴ஸ்ஸ பிண்ட³பாததா³னே. ஏவம் வத்து²ப்பதே³ஸேன சேதனா வுத்தா, தஸ்மா பத்திதா³னம் ஸம்ப⁴வதி.

தே³வதானந்தி யக்க²ஸேனாபதீனம். வுத்தஞ்ஹி ஆடானாடியஸுத்தே (தீ³. நி. 3.283, 293) ‘‘இமேஸம் யக்கா²னம் மஹாயக்கா²னம் ஸேனாபதீனம் மஹாஸேனாபதீனம் உஜ்ஜா²பேதப்³ப³’’ந்திஆதி³. ஆடாதி த³ப்³பி³முக²ஸகுணா. தே ஆடா நத³ந்தி ஏத்தா²தி ஆடானாத³ம், தே³வனக³ரம், ஆடானாதே³ கதம் ஆடானாதி³யம், ஸுத்தம். டீகாயம் (தீ³. நி. டீ. 3.282) ‘‘பரித்தம் ப⁴ணிதப்³ப³ந்தி ஏத்தா²பி ‘மேத்தசித்தம் புரேசாரிகம் கத்வா’தி ச ‘மங்க³லகதா² வத்தப்³பா³’தி ச ‘விஹாரஸ்ஸ உபவனே’தி ச ஏவமாதி³ ஸப்³ப³ம் கி³ஹீனம் பரித்தகரணே வுத்தம் பரிகம்மம் காதப்³ப³மேவா’’தி வுத்தம், ஏவம் ஸதி அட்ட²கதா²யம் (தீ³. நி. அட்ட². 3.282) ‘‘ஏதம் தாவ கி³ஹீனம் பரிகம்ம’’ந்தி வத்வா ‘‘ஸசே பன பி⁴க்கூ²’’திஆதி³னா விஸேஸத்த²ஜோதகேன பன-ஸத்³தே³ன ஸஹ வுச்சமானம் ‘‘இத³ம் பி⁴க்கூ²னம் பரிகம்ம’’ந்தி வசனம் நிரத்த²கம் விய ஹோதி. அவிஸேஸே ஹி ஸதி பே⁴தோ³ காதப்³போ³ ந ஸியா. பி⁴க்கூ²னஞ்ச யதா²வுத்தாவ பா³ஹிராரக்கா² து³க்கரா ஹோதி, தஸ்மா கி³ஹீனம் பரித்தகரணே வுத்தபரிகம்மே அஸம்பஜ்ஜமானேபி அட்ட²கதா²யம் வுத்தனயேனேவ காதும் வட்டதீதி நோ மதி.

இத³ம் பன இத⁴ ஆக³தம் ஆடானாடியஸுத்தபரிகம்மம் ஸுத்வா ‘‘இத³ம் ஸுத்தம் அமனுஸ்ஸானம் அமனாபம், ஸஜ்ஜா²யந்தஸ்ஸ பரித்தம் கரோந்தஸ்ஸ அமனுஸ்ஸா அந்தராயம் கரேய்யு’’ந்தி மஞ்ஞமானா போராணா சதூஹி மஹாராஜேஹி ஆரோசிதம் ஸப்³ப³ஞ்ஞுபு³த்³தே⁴ன தே³ஸிதம் மூலபூ⁴தம் தீ³க⁴னிகாயே ஆக³தம் ஆடானாடியஸுத்தம் (தீ³. நி. 3.275 ஆத³யோ) பஹாய மூலஸுத்ததோ கா³தா²ச²க்கமேவ க³ஹேத்வா அவஸேஸம் ஸப்³ப³ம் ஸுத்தம் ட²பேத்வா அஞ்ஞகா³தா²யோ பக்கி²பித்வா ‘‘ஆடானாடியபரித்த’’ந்தி ட²பேஸும், தம்பி பரித்தம் அமூலபூ⁴தத்தா ஏகேனாகாரேன தா⁴ரேதும் அஸக்கோந்தா கேசி ஸம்கி²த்தேன தா⁴ரேந்தி, கேசி வித்தா²ரேன, கேசி ஏகச்சா கா³தா²யோ பக்கி²பந்தி, கேசி நிக்கி²பந்தி, கேசி பி⁴க்கூ² தம்மிஸ்ஸகபரித்தம்பி மங்க³லகரணகாலாதீ³ஸு வத்துமவிஸஹந்தா தம் ட²பேத்வா அஞ்ஞஸுத்தானியேவ ப⁴ணந்தி, ஸப்³ப³மேதம் அயுத்தம் விய தி³ஸ்ஸதி. கஸ்மா? சத்தாரோபி மஹாராஜானோ இமம் ஆடானாடியம் ரக்க²ம் ஸம்வித³ஹமானா பு³த்³த⁴ஸாஸனே அமனுஸ்ஸானம் பஸாதா³ய, சதஸ்ஸன்னம் பரிஸானம் அவிஹேட²னாய ஏவ ஸம்வித³ஹிம்ஸு, ந அஞ்ஞேன காரணேன. வுத்தஞ்ஹி தத்த² ‘‘தத்த² ஸந்தி உளாரா யக்கா²னிவாஸினோ, யே இமஸ்மிம் ப⁴க³வதோ பாவசனே அப்பஸன்னா, தேஸம் பஸாதா³ய உக்³க³ண்ஹாது ப⁴ந்தே ப⁴க³வா ஆடானாடியம் ரக்க²ம் பி⁴க்கூ²னம் பி⁴க்கு²னீனம் உபாஸகானம் உபாஸிகானம் கு³த்தியா ரக்கா²ய அவிஹிம்ஸாய பா²ஸுவிஹாராயா’’தி (தீ³. நி. 3.276).

ஸம்மாஸம்பு³த்³தே⁴னபி இமஸ்ஸ ஸுத்தஸ்ஸ நிக³மனே ‘‘உக்³க³ண்ஹாத² பி⁴க்க²வே ஆடானாடியம் ரக்க²ம், பரியாபுணாத² பி⁴க்க²வே ஆடானாடியம் ரக்க²ம், தா⁴ரேத² பி⁴க்க²வே ஆடானாடியம் ரக்க²ம், அத்த²ஸம்ஹிதா பி⁴க்க²வே ஆடானாடியா ரக்கா² பி⁴க்கூ²னம் பி⁴க்கு²னீனம் உபாஸகானம் உபாஸிகானம் கு³த்தியா ரக்கா²ய அவிஹிம்ஸாய பா²ஸுவிஹாராயா’’தி (தீ³. நி. 3.295) பி⁴க்கூ²னம் தா⁴ரணம் உய்யோஜிதம் ஆனிஸம்ஸஞ்ச பகாஸிதம். அட்ட²கதா²சரியேஹி ச ‘‘பு³த்³த⁴பா⁴ஸிதே ஏகக்க²ரம்பி ஏகபத³ம்பி அபனேதப்³ப³ம் நாம நத்தீ²’’தி வுத்தம், தஸ்மா சதூஹி மஹாராஜேஹி ஸம்வித³ஹிதம் ஸம்மாஸம்பு³த்³தே⁴ன ஆஹச்சபா⁴ஸிதம் திஸ்ஸோ ஸங்கீ³தியோ ஆருள்ஹம் பகதிஆடானாடியஸுத்தமேவ தா⁴ரேதும் ஸஜ்ஜா²யிதுஞ்ச யுத்தம், ந ப⁴க³வதா அபா⁴ஸிதம் திஸ்ஸோ ஸங்கீ³தியோ அனாருள்ஹம் மிஸ்ஸகஸுத்தந்தி. தீ³க⁴னிகாயட்ட²கதா²யம் (தீ³. நி. அட்ட². 3.282) ஆக³தம் இத³ம் ஆடானாடியபரித்தபரிகம்மம் பன பகதிஸஜ்ஜா²யனவாசனாதி³ம் ஸந்தா⁴ய அட்ட²கதா²சரியேஹி ந வுத்தம், அத² கோ² க³ஹட்ட²ம் வா பப்³ப³ஜிதம் வா அமனுஸ்ஸேஹி க³ஹிதகாலே மோசாபனத்தா²ய லோகியேஹி மந்தம் விய ப⁴ணனம் ஸந்தா⁴ய வுத்தம். வுத்தஞ்ஹி தத்த² ‘‘அமனுஸ்ஸக³ஹிதகோ த்வம் கோ நாமோஸீதி புச்சி²தப்³போ³’’திஆதி³ (தீ³. நி. அட்ட². 3.282).

ஆடானாடியா ரக்கா² ச நாம ந ஸகலஸுத்தம், அத² கோ² ‘‘விபஸ்ஸிஸ்ஸ ச நமத்தூ²’’தி பத³ம் ஆதி³ம் கத்வா சதுன்னம் மஹாராஜூனம் வஸேன சதுக்க²த்தும் ஆக³தம் ‘‘ஜினம் வந்தா³ம கோ³தம’’ந்தி பத³ம் பரியோஸானம் கத்வா வுத்தஸுத்தேகதே³ஸோயேவ. கத²ம் விஞ்ஞாயதீதி சே? ‘‘அத² கோ² வேஸ்ஸவணோ மஹாராஜா ப⁴க³வதோ அதி⁴வாஸனம் விதி³த்வா இமம் ஆடானாடியம் ரக்க²ம் அபா⁴ஸீ’’தி ஆரபி⁴த்வா யதா²வுத்தஸுத்தேகதே³ஸஸ்ஸ அவஸானே ‘‘அயம் கோ² மாரிஸா ஆடானாடியா ரக்கா²’’தி நிய்யாதிதத்தா. தஸ்மா யதா² நாம ப்³யக்³கா⁴த³யோ அத்தனோ ப⁴க்க²ம் விலும்பந்தானம் ப³லவது³ட்ட²சித்தா ப⁴வந்தி, ஏவம் அத்தனா க³ஹிதமனுஸ்ஸம் மோசாபேந்தானம் அமனுஸ்ஸா பது³ட்ட²சித்தா ஹோந்தி. இதி ததா² மோசாபேதும் ஆரத்³த⁴காலே பி⁴க்கூ²னம் பரிஸ்ஸயவினோத³னத்த²ம் இமம் ஆடானாடியபரித்தபரிகம்மம் அட்ட²கதா²சரியேஹி வுத்தந்தி த³ட்ட²ப்³ப³ம். அயம் பரித்தகரணவினிச்ச²யகதா²லங்காரோ.

20. அனாமட்ட²பிண்ட³பாதோதி (வி. வி. டீ. 1.185) ஏத்த² அமஸியித்தா²தி ஆமட்டோ², ந ஆமட்டோ² அனாமட்டோ². பிண்ட³ம் பிண்ட³ம் ஹுத்வா பததீதி பிண்ட³பாதோ. அனாமட்டோ² ச ஸோ பிண்ட³பாதோ சாதி ததா², அக்³க³ஹிதஅக்³கோ³, அபரிபு⁴த்தோ பிண்ட³பாதோதி அத்தோ². ஸசேபி கஹாபணக்³க⁴னகோ ஹோதீதி இமினா தா³யகேஹி ப³ஹுப்³யஞ்ஜனேன ஸம்பாதே³த்வா ஸக்கச்சம் தி³ன்னபா⁴வம் தீ³பேதி. தேன வுத்தம் ‘‘ஸத்³தா⁴தே³ய்யவினிபாதனம் நத்தீ²’’தி, ஏவம் ஸக்கச்சம் ஸத்³தா⁴ய தி³ன்னம் மஹக்³க⁴போ⁴ஜனம்பி மாதாபிதூனம் த³த்வா ஸத்³தா⁴தே³ய்யவினிபாதனம் நாம ந ஹோதி, பகே³வ அப்பக்³க⁴போ⁴ஜனேதி அதி⁴ப்பாயோ. மாதாதி³பஞ்சகம்யேவ வத்வா பே⁴ஸஜ்ஜகரணே விய அபரேஸம்பி த³ஸன்னம் தா³தும் வட்டதீதி அவுத்தத்தா அஞ்ஞேஸம் ஞாதகானம்பி பேஸேத்வா தா³தும் ந வட்டதீதி ஸித்³த⁴ம், ‘‘விஹாரம் ஸம்பத்தஸ்ஸ பன யஸ்ஸ கஸ்ஸசி ஆக³ந்துகஸ்ஸ வா’’இச்சாதி³வக்க²மானத்தா விஹாரம் ஸம்பத்தானம் ஞாதகானம்பி ஆக³ந்துகஸாமஞ்ஞேன தா³தும் வட்டதீதி ச. தா²லகேதி ஸங்கி⁴கே கம்ஸாதி³மயே தா²லகே. பத்தோபி ஏத்த² ஸங்க³ய்ஹதி. ந வட்டதீதி இமினா து³க்கடந்தி த³ஸ்ஸேதி. தா³மரிகசோரஸ்ஸாதி ரஜ்ஜம் பத்தே²ந்தஸ்ஸ பாகடசோரஸ்ஸ. அதீ³யமானேபி ‘‘ந தே³ந்தீ’’தி குஜ்ஜ²ந்தீதி ஸம்ப³ந்தோ⁴.

ஆமிஸஸ்ஸ த⁴ம்மஸ்ஸ ச அலாபே⁴ன அத்தனோ பரஸ்ஸ ச அந்தரே ஸம்ப⁴வந்தஸ்ஸ சி²த்³த³ஸ்ஸ விவரஸ்ஸ படிஸந்த²ரணம் பித³ஹனம் படிஸந்தா²ரோ. ஸோ பன த⁴ம்மாமிஸவஸேன து³விதோ⁴. தத்த² ஆமிஸபடிஸந்தா²ரம் ஸந்தா⁴ய ‘‘கஸ்ஸ காதப்³போ³, கஸ்ஸ ந காதப்³போ³’’தி வுத்தம். ஆக³ந்துகஸ்ஸ வா…பே… காதப்³போ³யேவாதி வுத்தமத்த²ம் பாகடம் காதும் ‘‘ஆக³ந்துகம் தாவா’’திஆதி³மாஹ. கீ²ணபரிப்³ப³யந்தி இமினா அக³திபா⁴வம் கருணாட்டா²னதஞ்ச த³ஸ்ஸேதி. தேன ச தப்³பி³து⁴ரானம் ஸமித்³தா⁴னம் ஆக³ந்துகத்தேபி தா³தும் ந வட்டதீதி ஸித்³த⁴ம் ஹோதி. ‘‘அபச்சாஸீஸந்தேனா’’தி வத்வா பச்சாஸீஸனப்பகாரம் த³ஸ்ஸேதும் ‘‘மனுஸ்ஸா நாமா’’திஆதி³ வுத்தம். அனனுஞ்ஞாதானம் பன அபச்சாஸீஸந்தேனபி தா³தும் ந வட்டதி ஸத்³தா⁴தே³ய்யவினிபாதத்தா, பச்சாஸாய பன ஸதி குலதூ³ஸனம்பி ஹோதி. உப்³பா³ஸேத்வாதி ஸமந்ததோ தியோஜனம் விலும்பந்தே மனுஸ்ஸே பலாபேத்வா. வரபோத்த²கசித்தத்த²ரணந்தி அனேகப்பகாரம் இத்தி²புரிஸாதி³உத்தமரூபவிசித்தம் அத்த²ரணம். அயம் படிஸந்தா²ரவினிச்ச²யகதா²லங்காரோ.

இதி வினயஸங்க³ஹஸம்வண்ணனாபூ⁴தே வினயாலங்காரே

பே⁴ஸஜ்ஜாதி³வினிச்ச²யகதா²லங்காரோ நாம

ததியோ பரிச்சே²தோ³.