29. கதி²னத்தா²ரவினிச்ச²யகதா²

226. ஏவம் சதுபச்சயபா⁴ஜனவினிச்ச²யம் கதே²த்வா இதா³னி கதி²னவினிச்ச²யம் கதே²துமாஹ ‘‘கதி²னந்தி ஏத்த² பனா’’திஆதி³. தத்த² கதி²னந்தி கதமம் கதி²னம்? ஸமூஹபஞ்ஞத்தி. ந ஹி பரமத்த²தோ கதி²னம் நாம ஏகோ த⁴ம்மோ அத்தி², புரிமவஸ்ஸம்வுத்தா² பி⁴க்கூ², அனூனபஞ்சவக்³க³ஸங்கோ⁴, சீவரமாஸோ, த⁴ம்மேன ஸமேன உப்பன்னசீவரந்திஆதீ³ஸு யேஸு நாமரூபேஸு ஸமுப்பஜ்ஜமானேஸு தேஸம் நாமரூபத⁴ம்மானம் ஸமூஹஸமவாயஸங்கா²தம் ஸமூஹபஞ்ஞத்திமத்தமேவ கதி²னம். அயமத்தோ² கத²ம் ஜானிதப்³போ³தி? ‘‘தேஸஞ்ஞேவ த⁴ம்மானம் ஸங்க³ஹோ ஸமவாயோ நாமம் நாமகம்மம் நாமதே⁴ய்யம் நிருத்தி ப்³யஞ்ஜனம் அபி⁴லாபோ, யதி³த³ம் கதி²ன’’ந்தி பரிவாரபாளியம் (பரி. 412) ஆக³தத்தா ச, ‘‘தேஸஞ்ஞேவ த⁴ம்மானந்தி யேஸு ரூபாதி³த⁴ம்மேஸு ஸதி கதி²னம் நாம ஹோதி, தேஸம் ஸமோதா⁴னம் மிஸ்ஸீபா⁴வோ. நாமம் நாமகம்மந்திஆதி³னா பன ‘கதி²ன’ந்தி இத³ம் ப³ஹூஸு த⁴ம்மேஸு நாமமத்தம், ந பரமத்த²தோ ஏகோ த⁴ம்மோ அத்தீ²தி த³ஸ்ஸேதீ’’தி அட்ட²கதா²யம் (பரி. அட்ட². 412) ஆக³தத்தா ச, ‘‘யேஸு ரூபாதி³த⁴ம்மேஸூதி புரிமவஸ்ஸம்வுத்தா² பி⁴க்கூ², பஞ்சஹி அனூனோ ஸங்கோ⁴, சீவரமாஸோ, த⁴ம்மேன ஸமேன ஸமுப்பன்னம் சீவரந்தி ஏவமாதீ³ஸு யேஸு ரூபாரூபத⁴ம்மேஸு. ஸதீதி ஸந்தேஸு. மிஸ்ஸீபா⁴வோதி ஸம்ஸக்³க³தா ஸமூஹபஞ்ஞத்திமத்தம். தேனாஹ ந பரமத்த²தோ ஏகோ த⁴ம்மோ அத்தீ²தி த³ஸ்ஸேதீ’’தி விமதிவினோத³னியம் (வி. வி. டீ. பரிவார 2.412) ஆக³தத்தா ச ஜானிதப்³போ³தி.

கேனட்டே²ன கதி²னந்தி? தி²ரட்டே²ன. கஸ்மா தி²ரந்தி? அனாமந்தசாரஅஸமாதா³னசாரக³ணபோ⁴ஜனயாவத³த்த²சீவரயோசதத்த²சீவருப்பாத³ஸங்கா²தே பஞ்சானிஸம்ஸே அந்தோகரணஸமத்த²தாய. வுத்தஞ்ஹி ஸாரத்த²தீ³பனியம் (ஸாரத்த². டீ. மஹாவக்³க³ 3.306) ‘‘பஞ்சானிஸம்ஸே அந்தோகரணஸமத்த²தாய தி²ரந்தி அத்தோ²’’தி, ததா² விமதிவினோத³னியம் (வி. வி. டீ. மஹாவக்³க³ 2.306) வஜிரபு³த்³தி⁴டீகாயஞ்ச (வஜிர. டீ. மஹாவக்³க³ 306). அத² வா கேனட்டே²ன கதி²னந்தி? ஸங்க³ண்ஹனட்டே²ன. கத²ம் ஸங்க³ண்ஹாதீதி? பஞ்சானிஸம்ஸே அஞ்ஞத்த² க³ந்தும் அத³த்வா ஸங்க³ண்ஹாதி ஸங்கி²பித்வா க³ண்ஹாதி. வுத்தஞ்ஹி வினயத்த²மஞ்ஜூஸாயம் (கங்கா². அபி⁴. டீ. கதி²னஸிக்கா²பத³வண்ணனா) ‘‘பஞ்சானிஸம்ஸே அஞ்ஞத்த² க³ந்தும் அத³த்வா ஸங்க³ண்ஹனட்டே²ன கதி²ன’’ந்தி.

கதி²ன-ஸத்³தோ³ காய தா⁴துயா கேன பச்சயேன ஸிஜ்ஜ²தீதி? டீகாசரியா தா⁴துபச்சயே அசிந்தேத்வா அனிப்ப²ன்னபாடிபதி³கவஸேனேவ வண்ணேந்தி, தஸ்மா அயம் ஸத்³தோ³ ருள்ஹீஸுத்³த⁴னாமபூ⁴தோ அனிப்ப²ன்னபாடிபதி³கஸத்³தோ³தி வுச்சதி. கத²ம் விஞ்ஞாயதீதி சே? தீஸுபி வினயடீகாஸு (ஸாரத்த². டீ. மஹாவக்³க³ 3.306; வி. வி. டீ. மஹாவக்³க³ 2.306; வஜிர. டீ. மஹாவக்³க³ 306; கங்கா². அபி⁴. டீ. கதி²னஸிக்கா²பத³வண்ணனா) ‘‘தி²ரந்தி அத்தோ²’’ இச்சேவ வண்ணிதத்தா. பஞ்சானிஸம்ஸே அந்தோகரணஸமத்த²தாயாதி பன தி²ரதா சஸ்ஸ ஹேதுபத³மேவ. அத² வா கதி²ன-ஸத்³தோ³ கத²தா⁴துயா இனபச்சயேன ஸிஜ்ஜ²தி. கத²ம்? கத² ஸங்க³ஹணேதிமஸ்ஸ லத்³த⁴தா⁴துஸஞ்ஞாதி³ஸ்ஸ பஞ்சானிஸம்ஸே அஞ்ஞத்த² க³ந்தும் அத³த்வா ஸங்க³ண்ஹாதீதி அத்தே² ‘‘இன ஸப்³ப³த்தா²’’தி யோக³விபா⁴கே³ன வா ‘‘ஸுபதோ சா’’தி ஏத்த² ச-ஸத்³தே³ன வா இனபச்சயம் கத்வா பரக்க²ரம் நேத்வா கதி²னஸத்³த³தோ ஸ்யுப்பத்தாதி³ம்ஹி கதே ரூபம். கத²ம் விஞ்ஞாயதீதி சே? ‘‘ஸங்க³ண்ஹனட்டே²னா’’தி வுத்தம் கங்கா²விதரணீடீகாபாட²ம் நிஸ்ஸாய விஞ்ஞாயதி. அத² வா கட² கிச்ச²ஜீவனேதி தா⁴துதோ இனபச்சயம் கத்வா ஸிஜ்ஜ²தி. அயமத்தோ² ‘‘கட² கிச்ச²ஜீவனே, முத்³த⁴ஜது³தியந்தோ தா⁴து, இனோ’’தி அபி⁴தா⁴னப்பதீ³பிகாடீகாயம் வுத்தத்தா விஞ்ஞாயதி.

ப³ஹூ பன பண்டி³தா இமம் பாட²ம்யேவ க³ஹேத்வா ‘‘கதி²ன-ஸத்³தோ³ முத்³த⁴ஜது³தியந்தோயேவ ஹோதி, ந த³ந்தஜோ’’தி வத³ந்தி சேவ லிக²ந்தி ச, ந பனேவம் ஏகந்ததோ வத்தப்³ப³ம். கஸ்மா? அபி⁴தா⁴னப்பதீ³பிகாடீகாயம் கக்க²ளபரியாயம் கு³ணஸத்³த³பூ⁴தம் கடி²னஸத்³த³ம் ஸந்தா⁴ய வுத்தம், ந ஸாஸனவோஹாரதோ நாமஸத்³த³பூ⁴தம். தேனேவாஹ ‘‘பஞ்சகம் கக்க²ளே’’தி. அனேகேஸு பன பாளிஅட்ட²கதா²தி³போத்த²கேஸு ஜினஸாஸனவோஹாரதோ நாமஸத்³த³பூ⁴தோ கதி²ன-ஸத்³தோ³ த³ந்தஜோயேவ யேபு⁴ய்யேன பஞ்ஞாயதி, தேனேவ ச காரணேன அபி⁴தா⁴னப்பதீ³பிகாடீகாயம்பி வண்ணவிபரியாயே கதி²னந்திபி வுத்தம். அத² வா கத்த² ஸிலாகா⁴யந்தி தா⁴துதோ இனபச்சயம் கத்வா ஸஸம்யோக³த்த²காரம் நிஸம்யோக³ம் கத்வா ஸிஜ்ஜ²தி. அயமத்தோ² ஸிலாகா⁴தி³ஸுத்தஸ்ஸ வுத்தியம் ‘‘ஸிலாக⁴ கத்த²னே’’தி வசனதோ, ஸத்³த³னீதியஞ்ச ‘‘கத்த²னம் பஸம்ஸன’’ந்தி வண்ணிதத்தா ச விஞ்ஞாயதி. இத³ஞ்ச வசனம் ‘‘இத³ஞ்ஹி கதி²னவத்தம் நாம பு³த்³த⁴ப்பஸத்த²’’ந்தி அட்ட²கதா²வசனேன (மஹாவ. அட்ட². 306) ஸமேதி. ஆசரியா பன ‘‘கட²தா⁴து இனபச்சயோ’’தி விகப்பேத்வா ‘‘கட² ஸமத்த²னே’’தி அத்த²ம் வத³ந்தி, தம் டீகாஸு (ஸாரத்த². டீ. மஹாவக்³க³ 3.306; வி. வி. டீ. மஹாவக்³க³ 2.306; வஜிர. டீ. மஹாவக்³க³ 306; கங்கா². அபி⁴. டீ. கதி²னஸிக்கா²பத³வண்ணனா) ‘‘தி²ரந்தி அத்தோ²’’தி வசனம் அனபேக்கி²த்வா ‘‘பஞ்சானிஸம்ஸே அந்தோகரணஸமத்த²தாயா’’தி ஹேதுமேவ அத்த²பா⁴வேன க³ஹேத்வா வுத்தம் ஸியா, தம் பன தி²ரபா⁴வஸ்ஸ ஹேதுயேவ.

கத²ம் விக்³க³ஹோ காதப்³போ³தி? அயம் கதி²ன-ஸத்³தோ³ சதூஸு பதே³ஸு நாமபத³ம், பஞ்சஸு நாமேஸு ஸுத்³த⁴னாமம், சதூஸு ஸுத்³த⁴னாமேஸு ருள்ஹீஸுத்³த⁴னாமம், த்³வீஸு பாடிபதி³கஸத்³தே³ஸு அனிப்ப²ன்னபாடிபதி³கஸத்³தோ³, தஸ்மா விக்³க³ஹோ ந காதப்³போ³. வுத்தஞ்ஹி –

‘‘ருள்ஹீக்²யாதம் நிபாதஞ்சு-பஸக்³கா³லபனம் ததா²;

ஸப்³ப³னாமிகமேதேஸு, ந கதோ விக்³க³ஹோ ச²ஸூ’’தி.

அயமத்தோ² ‘‘கதி²னந்தி…பே… தி²ரந்தி அத்தோ²’’தி டீகாஸு (ஸாரத்த². டீ. மஹாவக்³க³ 3.306; வி. வி. டீ. மஹாவக்³க³ 2.306; வஜிர. டீ. மஹாவக்³க³ 306; கங்கா². அபி⁴. டீ. கதி²னஸிக்கா²பத³வண்ணனா) வசனதோ விஞ்ஞாயதி. அத² வா பஞ்சானிஸம்ஸே அஞ்ஞத்த² க³ந்தும் அத³த்வா கத²தி ஸங்க³ண்ஹாதீதி கதி²னம், அயம் வசனத்தோ² யதா²வுத்தவினயத்த²மஞ்ஜூஸாபாட²வஸேன (கங்கா². அபி⁴. டீ. கதி²னஸிக்கா²பத³வண்ணனா) விஞ்ஞாயதி. அத² வா கட²தி கிச்சே²ன ஜீவதீதி கதி²னோ, ருக்கோ², தஸ்ஸ ஏஸோதி கதி²னோ, தி²ரபா⁴வோ, ஸோ ஏதஸ்ஸ அத்தீ²தி கதி²னம், பஞ்ஞத்திஜாதம் ட²-காரஸ்ஸ த²-காரம் கத்வா கதி²னந்தி வுத்தம். அயம் நயோ ‘‘கட² கிச்ச²ஜீவனே’’தி தா⁴த்வத்த²ஸம்வண்ணனாய ச ‘‘பஞ்சானிஸம்ஸே அந்தோகரணஸமத்த²தாய தி²ரந்தி அத்தோ²’’தி டீகாவசனேன (ஸாரத்த². டீ. மஹாவக்³க³ 3.306; வி. வி. டீ. மஹாவக்³க³ 2.306; வஜிர. டீ. மஹாவக்³க³ 306; கங்கா². அபி⁴. கதி²னஸிக்கா²பத³வண்ணனா) ச ஸமேதீதி த³ட்ட²ப்³போ³. அத² வா கதீ²யதே ஸிலாக⁴தே பஸம்ஸீயதே பு³த்³தா⁴தீ³ஹீதி கதி²னம், அயம் நயோ ‘‘கத்த² ஸிலாகா⁴ய’’ந்தி தா⁴த்வத்த²ஸம்வண்ணனாய ச ‘‘இத³ஞ்ஹி கதி²னவத்தம் நாம பு³த்³த⁴ப்பஸத்த²’’ந்தி (மஹாவ. அட்ட². 306) அட்ட²கதா²வசனேன ச ஸமேதீதி த³ட்ட²ப்³போ³.

ஏத்த² பன ஸங்கே²பருசித்தா ஆசரியஸ்ஸ ஸத்³த³லக்க²ணம் அவிசாரேத்வா அத்த²மேவ புச்ச²ம் கத்வா விஸ்ஸஜ்ஜேதும் ‘‘கதி²னம் அத்த²ரிதும் கே லப⁴ந்தி, கே ந லப⁴ந்தீ’’திஆதி³மாஹ. தத்த² கே லப⁴ந்தீதி கே ஸாதே⁴ந்தீதி அத்தோ². பஞ்ச ஜனா லப⁴ந்தீதி பஞ்ச ஜனா ஸாதே⁴ந்தி. கதி²னது³ஸ்ஸஸ்ஸ ஹி தா³யகா பச்சி²மகோடியா சத்தாரோ ஹோந்தி, ஏகோ படிக்³கா³ஹகோதி. ‘‘தத்ர, பி⁴க்க²வே, ய்வாயம் சதுவக்³கோ³ பி⁴க்கு²ஸங்கோ⁴ ட²பேத்வா தீணி கம்மானி உபஸம்பத³ம் பவாரணம் அப்³பா⁴ன’’ந்தி சம்பேய்யக்க²ந்த⁴கே (மஹாவ. 388) வுத்தத்தா ந பஞ்சவக்³க³கரணீயந்தி க³ஹேதப்³ப³ம். பட²மப்பவாரணாய பவாரிதாதி இத³ம் வஸ்ஸச்சே²த³ம் அகத்வா வஸ்ஸம்வுத்த²பா⁴வஸந்த³ஸ்ஸனத்த²ம் வுத்தம் அந்தராயேன அபவாரிதானம்பி வுத்த²வஸ்ஸானம் கதி²னத்தா²ரஸம்ப⁴வதோ. தேனேவ ‘‘அப்பவாரிதா வா’’தி அவத்வா ‘‘சி²ன்னவஸ்ஸா வா பச்சி²மிகாய உபக³தா வா ந லப⁴ந்தீ’’தி ஏத்தகமேவ வுத்தம். அஞ்ஞஸ்மிம் விஹாரே வுத்த²வஸ்ஸாபி நலப⁴ந்தீதி நானாஸீமாய அஞ்ஞஸ்மிம் விஹாரே வுத்த²வஸ்ஸா இமஸ்மிம் விஹாரே கதி²னத்தா²ரம் ந லப⁴ந்தீதி அத்தோ². ஸப்³பே³தி சி²ன்னவஸ்ஸாத³யோ, அனுபக³தாபி தத்தே²வ ஸங்க³ஹிதா. ஆனிஸம்ஸந்தி கதி²னானிஸம்ஸசீவரம். ஏகம் அத்த²தசீவரம்யேவ ஹி கதி²னசீவரம் நாம ஹோதி, அவஸேஸானி சீவரானி வா ஸாடகா வா கதி²னானிஸம்ஸாயேவ நாம. வக்க²தி ஹி ‘‘அவஸேஸகதி²னானிஸம்ஸே ப³லவவத்தா²னி வஸ்ஸாவாஸிகடி²திகாய தா³தப்³பா³னீ’’தி. (வி. ஸங்க³. அட்ட². 226) இதரேஸந்தி புரிமிகாய உபக³தானம்.

ஸோ சே பச்சி²மிகாய உபஸம்பஜ்ஜதி, க³ணபூரகோ சேவ ஹோதி, ஆனிஸம்ஸஞ்ச லப⁴தீதி இமினா ஸாமணேரானம் வஸ்ஸூபக³மனம் அனுஞ்ஞாதம் ஹோதி. ஸோ ஹி புரிமிகாய வஸ்ஸூபக³தத்தா ஆனிஸம்ஸம் லப⁴தி, பச்சி²மிகாய பன உபஸம்பஜ்ஜிதத்தா க³ணபூரகோ ஹோதீதி. ஸசே புரிமிகாய உபக³தா கதி²னத்தா²ரகுஸலா ந ஹோந்தீதிஆதி³னா ‘‘அட்ட²த⁴ம்மகோவிதோ³ பி⁴க்கு², கதி²னத்தா²ரமரஹதீ’’தி வினயவினிச்ச²யே (வி. வி. 2704) ஆக³தத்தா ஸயம் சே அட்ட²த⁴ம்மகுஸலோ, ஸயமேவ அத்த²ரிதப்³ப³ம். நோ சே, அஞ்ஞே அட்ட²த⁴ம்மகுஸலே பரியேஸித்வா நேதப்³பா³, ஏவம் அகத்வா கதி²னம் அத்த²ரிதும் ந வட்டதீதி த³ஸ்ஸேதி. கதி²னம் அத்த²ராபேத்வாதி ஸகாரிதவசனேன தேஹி பா³ஹிரதோ ஆக³தத்தே²ரேஹி ஸயம் கதி²னம் ந அத்த²ரிதப்³ப³ம், ஸப்³ப³புப்³ப³கிச்சாதி³கம் ஸம்வித³ஹித்வா தே புரிமிகாய வஸ்ஸூபக³தா அந்தோஸீமட்ட²பி⁴க்கூ²யேவ அத்த²ராபேதப்³பா³தி த³ஸ்ஸேதி, அஞ்ஞதா² அஞ்ஞோ கதி²னம் அத்த²ரதி, அஞ்ஞோ ஆனிஸம்ஸம் லப⁴தீதி ஆபஜ்ஜதி, ந பனேவம் யுஜ்ஜதி. வக்க²தி ஹி ‘‘ஆனிஸம்ஸோ பன இதரேஸம்யேவ ஹோதீ’’தி. தா³னஞ்ச பு⁴ஞ்ஜித்வாதி கா²த³னீயபோ⁴ஜனீயபூ⁴தம் அன்னபானாதி³தா³னம் பு⁴ஞ்ஜித்வா. ந ஹி தே வத்து²தா³னம் லப⁴ந்தி.

கதி²னசீவரம் தே³மாதி தா³தும் வட்டதீதி ஏத்த² ‘‘ஸங்க⁴ஸ்ஸ கதி²னசீவரம் தே³மா’’தி வத்தப்³ப³ம். ஏவஞ்ஹி ஸதி ‘‘இத³ம் ஸங்க⁴ஸ்ஸ கதி²னது³ஸ்ஸம் உப்பன்ன’’ந்தி (மஹாவ. 307) கம்மவாசாய ஸமேதி. அத² ச பன புப்³பே³ கதபரிசயத்தா ‘‘ஸங்க⁴ஸ்ஸா’’தி அவுத்தேபி ஸம்பதா³னம் பாகடந்தி கத்வா அவுத்தம் ஸியாதி. ஏத்தே²கே ஆசரியா வத³ந்தி ‘‘ஸங்க⁴ஸ்ஸாதி அவுத்தேபி காலே தி³ன்னம் ஸங்கி⁴கம் ஹோதீ’’தி, தத்ரேவம் வத்தப்³ப³ம் ‘‘ந காலே தி³ன்னம் ஸப்³ப³ம் ஸங்கி⁴கம் ஹோதீ’’தி. கத²ம் விஞ்ஞாயதீதி சே? ‘‘யஞ்ச காலேபி ஸங்க⁴ஸ்ஸ வா இத³ம் அகாலசீவரந்தி, புக்³க³லஸ்ஸ வா இத³ம் துய்ஹம் த³ம்மீதிஆதி³னா நயேன தி³ன்னம், ஏதம் அகாலசீவரம் நாமா’’தி கங்கா²விதரணியம் (கங்கா². அட்ட². அகாலசிவரஸிக்கா²பத³வண்ணனா) ஆக³தத்தா புக்³க³லிகம்பி ஹோதீதி விஞ்ஞாயதி, தஸ்மா பரம்முகா²பி நாமம் வத்வா ஸம்முகா²பி பாத³மூலே ட²பேத்வா தி³ன்னம் புக்³க³லிகமேவ ஹோதி, ந ஸங்கி⁴கம். வுத்தஞ்ஹேதம் அட்ட²கதா²யம் (மஹாவ. அட்ட². 379) ‘‘புக்³க³லஸ்ஸ தே³தீதி ‘இமம் சீவரம் இத்த²ன்னாமஸ்ஸ த³ம்மீ’தி ஏவம் பரம்முகா² வா, பாத³மூலே ட²பேத்வா ‘இமம், ப⁴ந்தே, தும்ஹாகம் த³ம்மீ’தி ஏவம் ஸம்முகா² வா தே³தீ’’தி. ஏவம் புக்³க³லிகே ஸதி தம் சீவரம் ஸங்க⁴ஸ்ஸ பா⁴ஜேதப்³ப³ம் ஹோதி வா ந ஹோதி வாதி? ஸோ புக்³க³லோ அத்தனோ ஸத்³தி⁴விஹாரிகஅந்தேவாஸிகபூ⁴தஸ்ஸ ஸங்க⁴ஸ்ஸ வா அஞ்ஞஸ்ஸ ஸஹத⁴ம்மிகஸங்க⁴ஸ்ஸ வா பா⁴ஜேதுகாமோ பா⁴ஜேய்ய, அபா⁴ஜேதுகாமோ ‘‘பா⁴ஜேதூ’’தி ந கேனசி வசனீயோ. கத²ம் விஞ்ஞாயதீதி சே? ‘‘ந ஹி புக்³க³லஸ்ஸ ஆதி³ஸ்ஸ தி³ன்னம் கேனசி பா⁴ஜனீயம் ஹோதீ’’தி டீகாஸு ஆக³மனதோ விஞ்ஞாயதி. அதே²கே ஆசரியா ஏவம் வத³ந்தி ‘‘கதி²னஸ்ஸ ஏகம் மூலம் ஸங்கோ⁴தி (பரி. 408) வுத்தத்தா புக்³க³லம் உத்³தி³ஸ்ஸ தி³ன்னேபி ஸங்கா⁴யத்தம் ஸங்கி⁴கம் ஹோதி. யதா² கிம் ‘ஸீமாய த³ம்மி, ஸேனாஸனஸ்ஸ த³ம்மீ’தி வுத்தேபி தம் தா³னம் ஸங்கி⁴கம் ஹோதி, யதா² ச ‘கதி²னசீவரம் த³ம்மீ’தி வுத்தே ஸங்கி⁴கம் ஹோதீ’’தி.

தத்ரேவம் விசாரேதப்³ப³ம் – ‘‘கதி²னஸ்ஸ ஏகம் மூலம் ஸங்கோ⁴’’தி வசனம் (பரி. 408) கதி²னஸ்ஸ மூலம் கதி²னஸ்ஸ காரணம் த³ஸ்ஸேதி. யதா² ஹி மூலே விஜ்ஜமானே ருக்கோ² திட்ட²தி, அவிஜ்ஜமானே ந திட்ட²தி, தஸ்மா மூலம் ருக்க²ஸ்ஸ காரணம் ஹோதி, பதிட்ட²ம் ஹோதி, ஏவம் ஸங்கே⁴ விஜ்ஜமானே கதி²னம் ஹோதி, நோ அவிஜ்ஜமானே, தஸ்மா ஸங்கோ⁴ கதி²னஸ்ஸ மூலம் கதி²னஸ்ஸ காரணம் நாம ஹோதி. கத²ம் ஸங்கே⁴ விஜ்ஜமானே கதி²னம் ஹோதி? ஸப்³ப³ந்திமேன பரிச்சே²தே³ன சதுவக்³க³பூ⁴தேன ஸங்கே⁴ன அத்தா²ராரஹஸ்ஸ பி⁴க்கு²னோ ஞத்திது³தியகம்மவாசாய கதி²னசீவரே தி³ன்னேயேவ தேன சீவரேன அத்த²தம் கதி²னம் நாம ஹோதி, நோ அதி³ன்னே, தஸ்மா சதுவக்³க³ஸங்கே⁴ அலப்³ப⁴மானே ஸஹஸ்ஸக்க²த்தும் ‘‘கதி²னம் த³ம்மீ’’தி வுத்தேபி கதி²னம் நாம ந ஹோதி, தஸ்மா உபசாரஸீமாய பரிச்சி²ன்னே விஹாரே ஏகோ வா த்³வே வா தயோ வா சத்தாரோ வா பி⁴க்கூ² விஹரந்தி, தத்த² கதி²னசீவரே உப்பன்னே அஞ்ஞதோ பரியேஸித்வா சதுவக்³க³ஸங்கோ⁴ ஏகோ படிக்³கா³ஹகோதி பஞ்சன்னம் பி⁴க்கூ²னம் பூரணே ஸதி கதி²னம் அத்த²ரிதும் லப⁴தி, நாஸதி, ஏவம் ஸங்கே⁴ விஜ்ஜமானேயேவ கதி²னம் நாம ஹோதி, நோ அவிஜ்ஜமானே, தஸ்மா ஸங்க⁴ஸ்ஸ கதி²னஸ்ஸ மூலபூ⁴ததம் காரணபூ⁴ததம் ஸந்தா⁴ய ‘‘கதி²னஸ்ஸ ஏகம் மூலம் ஸங்கோ⁴’’தி வுத்தம். ‘‘கதி²ன’’ந்தி வுத்தே ஸங்கி⁴கம்யேவ ஹோதி, நோ புக்³க³லிகந்தி அதி⁴ப்பாயோ ஏதஸ்மிம் பாடே² ந லப்³ப⁴தி. யதா² கிம் ‘‘கிச்சாதி⁴கரணஸ்ஸ ஏகம் மூலம் ஸங்கோ⁴’’தி (சூளவ. 219) ஏத்த² அபலோகனகம்மஞத்திகம்மஞத்திது³தியகம்மஞத்திசதுத்த²கம்மஸங்கா²தம் கிச்சாதி⁴கரணம் சதுவக்³கா³தி³கே ஸங்கே⁴ விஜ்ஜமானேயேவ ஹோதி, நோ அவிஜ்ஜமானே, தஸ்மா ஸங்க⁴ஸ்ஸ கிச்சாதி⁴கரணஸ்ஸ மூலபூ⁴ததம் காரணபூ⁴ததம் ஸந்தா⁴ய ‘‘கிச்சாதி⁴கரணஸ்ஸ ஏகம் மூலம் ஸங்கோ⁴’’தி வுச்சதி, ஏவம்ஸம்பத³மித³ம் த³ட்ட²ப்³ப³ம்.

யதி³பி வுத்தம் ‘‘யதா² ‘ஸீமாய த³ம்மி, ஸேனாஸனஸ்ஸ த³ம்மீ’திஆதீ³ஸு தம் தா³னம் ஸங்கா⁴யத்தமேவ ஹோதி, ததா² ‘கதி²ன த³ம்மீ’தி வுத்தே புக்³க³லம் உத்³தி³ஸ்ஸ தி³ன்னேபி ஸங்கா⁴யத்தமேவ ஸங்கி⁴கமேவ ஹோதீ’’தி, ததா²பி ஏவம் விசாரணா காதப்³பா³ – ‘‘ஸீமாய த³ம்மி, ஸேனாஸனஸ்ஸ த³ம்மீ’’திஆதீ³ஸு ஸீமா ச ஸேனாஸனஞ்ச தா³னபடிக்³கா³ஹகா ந ஹோந்தி, தஸ்மா ஸீமட்ட²ஸ்ஸ ச ஸேனாஸனட்ட²ஸ்ஸ ச ஸங்க⁴ஸ்ஸ ஆயத்தம் ஹோதி, புக்³க³லோ பன தா³னபடிக்³கா³ஹகோவ, தஸ்மா ‘‘இமம் கதி²னசீவரம் இத்த²ன்னாமஸ்ஸ பி⁴க்கு²னோ த³ம்மீ’’தி பரம்முகா² வா தஸ்ஸ பி⁴க்கு²னோ பாத³மூலே ட²பேத்வா ஸம்முகா² வா தி³ன்னம் கத²ம் ஸங்கா⁴யத்தம் ஸங்க⁴ஸந்தகம் ப⁴வேய்ய, ஏவம் ஸங்க⁴ஸ்ஸ அபரிணதம் புக்³க³லிகசீவரம் ஸங்க⁴ஸ்ஸ பரிணாமேய்ய, நவஸு அத⁴ம்மிகதா³னேஸு ஏகம் ப⁴வேய்ய, தஸ்ஸ சீவரஸ்ஸ படிக்³க³ஹோபி நவஸு அத⁴ம்மிகபடிக்³க³ஹேஸு ஏகோ ப⁴வேய்ய, தஸ்ஸ சீவரஸ்ஸ பரிபோ⁴கோ³பி நவஸு அத⁴ம்மிகபரிபோ⁴கே³ஸு ஏகோ ப⁴வேய்ய. கத²ம் விஞ்ஞாயதீதி சே? நவ அத⁴ம்மிகானி தா³னானீதி ஸங்க⁴ஸ்ஸ பரிணதம் அஞ்ஞஸங்க⁴ஸ்ஸ வா சேதியஸ்ஸ வா புக்³க³லஸ்ஸ வா பரிணாமேதி, சேதியஸ்ஸ பரிணதம் அஞ்ஞசேதியஸ்ஸ வா ஸங்க⁴ஸ்ஸ வா புக்³க³லஸ்ஸ வா பரிணாமேதி, புக்³க³லஸ்ஸ பரிணதம் அஞ்ஞபுக்³க³லஸ்ஸ வா ஸங்க⁴ஸ்ஸ வா சேதியஸ்ஸ வா பரிணாமேதி, ‘‘நவ அத⁴ம்மிகா பரிபோ⁴கா³’’தி ஆக³தம் பரிவாரபாளிஞ்ச (பரி. 329) ‘‘நவ படிக்³க³ஹபரிபோ⁴கா³தி ஏதேஸம்யேவ தா³னானம் படிக்³க³ஹா ச பரிபோ⁴கா³ சா’’தி ஆக³தம் அட்ட²கத²ஞ்ச (பரி. அட்ட². 329) ஓலோகேத்வா விஞ்ஞாயதீதி.

அதா²பி ஏவம் வத³ந்தி – தா³யகோ ஸங்க⁴த்தே²ரஸ்ஸ வா க³ந்த²து⁴தங்க³வஸேன அபி⁴ஞ்ஞாதஸ்ஸ வா ப⁴த்துத்³தே³ஸகஸ்ஸ வா பஹிணதி ‘‘அம்ஹாகம் ப⁴த்தக்³க³ஹணத்தா²ய அட்ட² பி⁴க்கூ² க³ஹேத்வா ஆக³ச்ச²தா²’’தி, ஸசேபி ஞாதிஉபட்டா²கேஹி பேஸிதம் ஹோதி, இமே தயோ ஜனா புச்சி²தும் ந லப⁴ந்தி. ஆருள்ஹாயேவ மாதிகம், ஸங்க⁴தோ அட்ட² பி⁴க்கூ² உத்³தி³ஸாபேத்வா அத்தனவமேஹி க³ந்தப்³ப³ம். கஸ்மா? பி⁴க்கு²ஸங்க⁴ஸ்ஸ ஹி ஏதே பி⁴க்கூ² நிஸ்ஸாய லாபோ⁴ உப்பஜ்ஜதீதி. க³ந்த²து⁴தங்கா³தீ³ஹி பன அனபி⁴ஞ்ஞாதோ ஆவாஸிகபி⁴க்கு² புச்சி²தும் லப⁴தி, தஸ்மா தேன ‘‘கிம் ஸங்க⁴தோ க³ண்ஹாமி, உதா³ஹு யே ஜானாமி, தேஹி ஸத்³தி⁴ம் ஆக³ச்சா²மீ’’தி மாதிகம் ஆரோபேத்வா யதா² தா³யகா வத³ந்தி, ததா² படிபஜ்ஜிதப்³ப³ந்தி (சூளவ. அட்ட². 325), ஈதி³ஸேஸு டா²னேஸு ‘‘ஸங்க⁴ஸ்ஸ லாபோ⁴ புக்³க³லம் உபனிஸ்ஸாய உப்பஜ்ஜதீ’’தி வசனம் உபனிதா⁴ய ‘‘ஸங்க⁴ஸ்ஸ லாபோ⁴ புக்³க³லம் நிஸ்ஸாய உப்பஜ்ஜதி, புக்³க³லஸ்ஸ பத்தலாபோ⁴ ஸங்க⁴ம் ஆமஸித்வா தே³ந்தோ ஸங்கா⁴யத்தோ ஹோதீ’’தி விஞ்ஞாயதீதி.

இமஸ்மிம்பி வசனே ஏவம் விசாரணா காதப்³பா³ – தஸ்மிம் து நிமந்தனே ந புக்³க³லம்யேவ நிமந்தேதி, அத² கோ² ஸஸங்க⁴ம் புக்³க³லம் நிமந்தேதி. தத்த² து ‘‘ஸங்க⁴’’ந்தி அவத்வா ‘‘அட்ட² பி⁴க்கூ²’’தி வுத்தத்தா ‘‘கிம் ஸங்க⁴தோ க³ண்ஹாமி, உதா³ஹு யே ஜானாமி, தேஹி ஸத்³தி⁴ம் ஆக³ச்சா²மீ’’தி அனபி⁴ஞ்ஞாதோ புக்³க³லோ புச்சி²தும் லப⁴தி. ஸங்க⁴த்தே²ரஸ்ஸ பன ஸங்க⁴ம் பரிஹரித்வா வஸிதத்தா ‘‘அட்ட² பி⁴க்கூ²’’தி வுத்தே ஸங்க⁴ம் ட²பேத்வா அஞ்ஞேஸம் க³ஹணகாரணம் நத்தி², க³ந்த²து⁴தங்க³வஸேன அபி⁴ஞ்ஞாதபுக்³க³லோபி ஸங்க⁴ஸ்ஸ புஞ்ஞனிஸ்ஸிதத்தா ‘‘அட்ட² பி⁴க்கூ²’’தி வுத்தே ஸங்க⁴தோயேவ க³ண்ஹாதி, ப⁴த்துத்³தே³ஸகஸ்ஸபி தே³வஸிகம் ஸங்க⁴ஸ்ஸேவ ப⁴த்தவிசாரணத்தா ‘‘அட்ட² பி⁴க்கூ²’’தி வுத்தே ஸங்க⁴ம் ட²பேத்வா அஞ்ஞேஸம் க³ஹணகாரணம் நத்தி². ஏவம் ‘‘அட்ட² பி⁴க்கூ² க³ஹேத்வா ஆக³ச்ச²தா²’’தி ஸஹ ஸங்கே⁴ன நிமந்திதத்தா ‘‘இமே தயோ ஜனா புச்சி²தும் ந லப⁴ந்தீ’’தி வுத்தம், ந ‘‘த்வம் ஆக³ச்சா²ஹீ’’தி புக்³க³லஸ்ஸேவ நிமந்தனே ஸதிபி ஸங்க⁴ம் க³ஹேத்வா ஆக³ந்தப்³ப³தோதி. ஏவம் ‘‘அட்ட² பி⁴க்கூ² க³ஹேத்வா ஆக³ச்ச²தா²’’தி ஸஸங்க⁴ஸ்ஸேவ புக்³க³லஸ்ஸ நிமந்திதத்தா ஸங்கோ⁴ க³ஹேதப்³போ³ ஹோதி, ந ‘‘தும்ஹே ஆக³ச்ச²தா²’’தி புக்³க³லஸ்ஸேவ நிமந்திதத்தா, தஸ்மா ‘‘புக்³க³லஸ்ஸ லாபோ⁴ ஸங்கா⁴யத்தோ’’தி ந ஸக்கா வத்தும், அட்ட²கதா²தீ³ஸு பகரணேஸுபி ‘‘புக்³க³லம் நிஸ்ஸாய ஸங்க⁴ஸ்ஸ லாபோ⁴ உப்பஜ்ஜதி’’ இச்சேவ வுத்தோ, ந ‘‘புக்³க³லஸ்ஸ லாபோ⁴ ஸங்கா⁴யத்தோ’’தி. சீவரலாப⁴கே²த்தபூ⁴தாஸு அட்ட²ஸு மாதிகாஸு ச ‘‘ஸங்க⁴ஸ்ஸ தே³தீ’’தி ச விஸும், ‘‘புக்³க³லஸ்ஸ தே³தீ’’தி ச விஸும் ஆக³தம். புக்³க³லஸ்ஸ தே³தீதி ‘‘இமம் சீவரம் இத்த²ன்னாமஸ்ஸ த³ம்மீ’’தி ஏவம் பரம்முகா² வா, பாத³மூலே ட²பேத்வா ‘‘இமம் ப⁴ந்தே தும்ஹாகம் த³ம்மீ’’தி ஏவம் ஸம்முகா² வா தே³தீதி.

இதா³னி பன சீவரம் தா³துகாமா உபாஸகா வா உபாஸிகாயோ வா ஸயம் அனாக³ந்த்வா புத்ததா³ஸாத³யோ ஆணாபேந்தாபி ‘‘இமம் சீவரம் இத்த²ன்னாமஸ்ஸ தே²ரஸ்ஸ தே³தா²’’தி வத்வா புக்³க³லஸ்ஸேவ தா³பேந்தி, ஸாமம் க³ந்த்வா த³த³ந்தாபி பாத³மூலே ட²பேத்வா வா ஹத்தே² ட²பேத்வா வா ஹத்தே²ன பு²ஸாபேத்வா வா த³த³ந்தி ‘‘இமம், ப⁴ந்தே, சீவரம் தும்ஹே உத்³தி³ஸ்ஸ ஏத்தகம் த⁴னம் பரிச்சஜித்வா கதம், ஏவஞ்ச ஏவஞ்ச ஹத்த²கம்மம் கத்வா ஸம்பாதி³தம், தஸ்மா தும்ஹே நிவாஸத² பாருபத² பரிபு⁴ஞ்ஜதா²’’திஆதீ³னி வத³ந்தி, தஸ்ஸ புக்³க³லஸ்ஸ பரிபோ⁴க³கரணமேவ இச்ச²ந்தி, ந ஸங்க⁴ஸ்ஸ தா³னம். கேசி அதுட்ட²கத²ம்பி கதே²ந்தி. ஏவம் புக்³க³லமேவ உத்³தி³ஸ்ஸ தி³ன்னசீவரஸ்ஸ ஸங்கே⁴ன ஆயத்தகாரணம் நத்தி². ‘‘ஸசே பன ‘இத³ம் தும்ஹாகஞ்ச தும்ஹாகம் அந்தேவாஸிகானஞ்ச த³ம்மீ’தி ஏவம் வத³தி, தே²ரஸ்ஸ ச அந்தேவாஸிகானஞ்ச பாபுணாதீ’’தி (மஹாவ. அட்ட². 379) ஆக³மனதோ ஏவம் வத்வா தே³ந்தே பன ஆசரியந்தேவாஸிகானம் பாபுணாதி, அனந்தேவாஸிகஸ்ஸ பன ந பாபுணாதி. ‘‘உத்³தே³ஸம் க³ஹேதும் ஆக³தோ க³ஹேத்வா க³ச்ச²ந்தோ ச அத்தி², தஸ்ஸபி பாபுணாதீ’’தி ஆக³மனதோ ப³ஹிஸீமட்ட²ஸ்ஸ த⁴ம்மந்தேவாஸிகஸ்ஸபி பாபுணாதி. ‘‘தும்ஹேஹி ஸத்³தி⁴ம் நிப³த்³த⁴சாரிகபி⁴க்கூ²னம் த³ம்மீதி வுத்தே உத்³தே³ஸந்தேவாஸிகானம் வத்தம் கத்வா உத்³தே³ஸபரிபுச்சா²தீ³னி க³ஹேத்வா விசரந்தானம் ஸப்³பே³ஸம் பாபுணாதீ’’தி (மஹாவ. அட்ட². 379) ஆக³மனதோ ஏவம் வத்வா தே³ந்தே த⁴ம்மந்தேவாஸிகானம் வத்தபடிபத்திகாரகானஞ்ச அந்தேவாஸிகானம் பாபுணாதி. ஏவம் தா³யகானம் வசனானுரூபமேவ தா³னஸ்ஸ பவத்தனதோ ‘‘யதா² தா³யகா வத³ந்தி, ததா² படிபஜ்ஜிதப்³ப³’’ந்தி (சூளவ. அட்ட². 325) அட்ட²கதா²சரியா வத³ந்தி.

ஏவம் இதா³னி தா³யகா யேபு⁴ய்யேன புக்³க³லஸ்ஸேவ தே³ந்தி, ஸதேஸு ஸஹஸ்ஸேஸு ஏகோயேவ பண்டி³தோ ப³ஹுஸ்ஸுதோ தா³யகோ ஸங்க⁴ஸ்ஸ த³தே³ய்ய, புக்³க³லிகசீவரஞ்ச ஸங்கி⁴கப⁴வனத்தா²ய அகரியமானம் ந ஞத்தியா கம்மவாசாய ச அரஹம் ஹோதி. கத²ம் விஞ்ஞாயதீதி சே? ஞத்திகம்மவாசாவிரோத⁴தோ. கத²ம் விரோதோ⁴தி சே? ஞத்தியா கம்மவாசாய ச ‘‘இத³ம் ஸங்க⁴ஸ்ஸ கதி²னது³ஸ்ஸம் உப்பன்ன’’ந்தி கதி²னசீவரஸ்ஸ ஸங்கி⁴கபா⁴வோ வுத்தோ, இதா³னி பன தம் சீவரம் ‘‘புக்³க³லஸ்ஸ தி³ன்னம் புக்³க³லிக’’ந்தி வசனத்தா²னுரூபதோ புக்³க³லிகம் ஹோதி, ஏவம்பி விரோதோ⁴. ‘‘ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ த³தே³ய்ய கதி²னம் அத்த²ரிது’’ந்தி ஏத்த² ச ஸங்கோ⁴தி தா⁴துயா கத்தா ஹோதி, பி⁴க்கு²னோதி ஸம்பதா³னம், இத⁴ பன ஸங்க⁴ஸ்ஸ தஸ்மிம் கதி²னசீவரே அனிஸ்ஸரபா⁴வதோ ஸங்கோ⁴ கத்தா ந ஹோதி, பி⁴க்கு² படிக்³கா³ஹலக்க²ணாபா⁴வதோ ஸம்பதா³னம் ந ஹோதி, ஏவம்பி விரோதோ⁴. தா³யகேன பன ஸங்க⁴ஸ்ஸ பரிச்சத்தத்தா ஸங்கி⁴கபூ⁴தம் கதி²னசீவரம் யஸ்மிம் காலே ஸங்கோ⁴ கதி²னம் அத்த²ரிதும் அட்ட²ங்க³ஸமன்னாக³தஸ்ஸ பி⁴க்கு²னோ தே³தி, தஸ்மிம் காலே ஞத்திது³தியகம்மவாசம் இதா³னி மனுஸ்ஸா ‘‘ஞத்தீ’’தி வோஹரந்தி, தஞ்ச சீவரம் ‘‘ஞத்திலத்³த⁴சீவர’’ந்தி, தம் சீவரதா³யகஞ்ச ‘‘ஞத்திலத்³த⁴தா³யகோ’’தி, தஸ்மா ஸங்கி⁴கசீவரமேவ ஞத்திலத்³த⁴ம் ஹோதி, நோ புக்³க³லிகசீவரம். ஞத்திலத்³த⁴காலதோ பன பட்டா²ய தம் சீவரம் புக்³க³லிகம் ஹோதி. கஸ்மா? அத்தா²ரகபுக்³க³லஸ்ஸ சீவரபா⁴வதோதி.

அதா²பி வத³ந்தி ‘‘தி³ன்னந்தி பாட²ஞ்ச ‘ஸாதே⁴ந்தீ’தி பாட²ஞ்ச ‘ஆனிஸம்ஸம் லப⁴ந்தீ’தி பாட²ஞ்ச உபனிதா⁴ய அயமத்தோ² விஞ்ஞாயதீ’’தி, தத்தா²யமாசரியானமதி⁴ப்பாயோ – ‘‘தி³ன்னம் இத³ம் ஸங்கே⁴னா’’தி ஏத்த² தா³-தா⁴துயா ஸங்கே⁴னாதி கத்தா, இத³ந்தி கம்மம், இமஸ்ஸ கதி²னசீவரஸ்ஸ ஸங்கி⁴கத்தா ஸங்கே⁴ன தி³ன்னம் ஹோதி, தேன விஞ்ஞாயதி ‘‘கதி²ன’’ந்தி வுத்தே ஸங்கி⁴கம் ஹோதீதி. ‘‘கதி²னத்தா²ரம் கே லப⁴ந்தீதி ஏத்த² கே லப⁴ந்தீதி கே ஸாதே⁴ந்தீதி அத்தோ². பஞ்ச ஜனா ஸாதே⁴ந்தீ’’தி வஜிரபு³த்³தி⁴டீகாயம் (வஜிர. டீ. மஹாவக்³க³ 306) வுத்தம். தத்த² பஞ்ச ஜனாதி ஸங்கோ⁴ வுத்தோ, இமினாபி விஞ்ஞாயதி ‘‘கதி²னந்தி வுத்தே ஸங்கி⁴கம் ஹோதீ’’தி. ஆனிஸம்ஸம் லப⁴ந்தீதி ஏத்த² ச ஸங்கி⁴கத்தா ஸப்³பே³ ஸீமட்ட²கபி⁴க்கூ² ஆனிஸம்ஸம் லப⁴ந்தி, இமினாபி விஞ்ஞாயதி ‘‘கதி²னந்தி வுத்தே ஸங்கி⁴கம் ஹோதீ’’தி.

தத்ராப்யேவம் விசாரணா காதப்³பா³ – புப்³பே³தா³யகா சத்தாரோபி பச்சயே யேபு⁴ய்யேன ஸங்க⁴ஸ்ஸேவ தே³ந்தி, தஸ்மா ஸங்க⁴ஸ்ஸ சதுபச்சயபா⁴ஜனகதா² அதிவித்தா²ரா ஹோதி. அப்பகதோ பன புக்³க³லஸ்ஸ தே³ந்தி, தஸ்மா ஸங்க⁴ஸ்ஸ தி³ன்னம் கதி²னசீவரம் ஸங்கே⁴ன அத்தா²ரகஸ்ஸ புக்³க³லஸ்ஸ தி³ன்னம் ஸந்தா⁴ய வுத்தம். ஸாதே⁴ந்தீதி ச கதி²னது³ஸ்ஸஸ்ஸ தா³யகா சத்தாரோ, படிக்³கா³ஹகோ ஏகோதி பஞ்ச ஜனா கதி²னதா³னகம்மம் ஸாதே⁴ந்தீதி வுத்தம். ஆனிஸம்ஸம் லப⁴ந்தீதி இத³ஞ்ச அத்தா²ரகஸ்ஸ ச அனுமோத³னானஞ்ச பி⁴க்கூ²னம் ஆனிஸம்ஸலாப⁴மேவ வுத்தம், ந ஏதேஹி பாடே²ஹி ‘‘கதி²ன’’ந்தி வுத்தே ஸங்கி⁴கம் ஹோதீதி அத்தோ² விஞ்ஞாதப்³போ³ ஹோதீதி த³ட்ட²ப்³போ³. ஸங்க⁴ஸ்ஸ உப்பன்னசீவரம் ஸங்கே⁴ன அத்தா²ரகஸ்ஸ தி³ன்னபா⁴வோ கத²ம் விஞ்ஞாயதீதி? ‘‘இத³ம் ஸங்க⁴ஸ்ஸ கதி²னது³ஸ்ஸம் உப்பன்னம், ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ தே³தி கதி²னம் அத்த²ரிது’’ந்தி வுத்தம் பாளிபாட²ஞ்ச (மஹாவ. 307) ‘‘ஸங்கோ⁴ அஜ்ஜ கதி²னது³ஸ்ஸம் லபி⁴த்வா புனதி³வஸே தே³தி, அயம் நிசயஸன்னிதீ⁴’’தி வுத்தம் அட்ட²கதா²பாட²ஞ்ச தி³ஸ்வா விஞ்ஞாயதீதி. ஸங்க⁴ஸந்தகபூ⁴தம் சீவரமேவ தா³னகிரியாய கம்மம், ஸங்கோ⁴ கத்தா, புக்³க³லோ ஸம்பதா³னம் ப⁴விதும் அரஹபா⁴வோ ச யதா²வுத்தபாளிபாட²மேவ உபனிதா⁴ய விஞ்ஞாயதீதி.

ஏவம் ஸந்தே புக்³க³லஸ்ஸ தி³ன்னம் புக்³க³லிகசீவரம் ஸங்கி⁴கம் காதும் கத²ம் படிபஜ்ஜிதப்³ப³ந்தி? ஸசே ஸோ படிக்³கா³ஹகபுக்³க³லோ தா³யகானம் ஏவம் வத³தி ‘‘உபாஸக தா³னம் நாம புக்³க³லஸ்ஸ தி³ன்னதோ ஸங்க⁴ஸ்ஸ தி³ன்னம் மஹப்ப²லதரம் ஹோதி, தஸ்மா ஸங்க⁴ஸ்ஸ தே³ஹி, ஸங்க⁴ஸ்ஸ த³த்வா புன ஸங்கே⁴ன அத்தா²ராரஹஸ்ஸ பி⁴க்கு²னோ கம்மவாசாய த³த்வா தேன புக்³க³லேன யதா²வினயம் அத்த²தேயேவ கதி²னம் நாம ஹோதி, ந புக்³க³லஸ்ஸ த³த்வா புக்³க³லேன ஸாமம்யேவ அத்த²தே, தஸ்மா ஸங்க⁴ஸ்ஸ தே³ஹீ’’தி உய்யோஜேத்வா ஸங்க⁴ஸ்ஸ தா³பிதேபி தம் சீவரம் ஸங்கி⁴கம் ஹோதி கதி²னத்தா²ராரஹம். யதி³ பன தா³யகோ அப்பஸ்ஸுததாய ‘‘நாஹம், ப⁴ந்தே, கிஞ்சி ஜானாமி, இமம் சீவரம் தும்ஹாகமேவ த³ம்மீ’’தி வக்க²தி, ஏவம் ஸதி புக்³க³லிகவஸேனேவ ஸம்படிச்சி²த்வா தேன புக்³க³லேன தம் சீவரம் ஸங்க⁴ஸ்ஸ தி³ன்னம்பி ஸங்கி⁴கம் ஹோதி.

யதி³ ஏவம் ஸமணேனேவ ஸமணஸ்ஸ தி³ன்னம் சீவரம் கத²ம் கதி²னத்தா²ராரஹம் ப⁴வேய்யாதி? நோ ந ப⁴வேய்ய. வுத்தஞ்ஹேதம் அட்ட²கதா²யம் (மஹாவ. அட்ட². 306) ‘‘கதி²னம் கேன தி³ன்னம் வட்டதி? யேன கேனசி தே³வேன வா மனுஸ்ஸேன வா பஞ்சன்னம் வா ஸஹத⁴ம்மிகானம் அஞ்ஞதரேன தி³ன்னம் வட்டதீ’’தி. அத² கஸ்மா பரம்பரபூ⁴தேஹி ஆசரியேஹி ஞத்திலத்³த⁴சீவரதோ அவஸேஸானி சீவரானி ஸங்க⁴ஸ்ஸ பா⁴ஜேத்வா ஏவ பரிபு⁴ஞ்ஜிதானீதி? வுச்சதே – ஏகச்சே பி⁴க்கூ² ஆசரியபரம்பராக³தஅனஉஸாரேனேவ படிபஜ்ஜந்தி, கேசி ப³ஹூனம் கிரியம் தி³ஸ்வா தி³ட்டா²னுக³திவஸேன படிபஜ்ஜந்தி, ப³ஹுஸ்ஸுதாபி கேசி தே²ரா அருச்சந்தாபி பவேணிபே⁴த³ப⁴யேன படிபஜ்ஜந்தி, அபரே ருசிவஸேன அத்த²ஞ்ச அதி⁴ப்பாயஞ்ச பரிணாமேத்வா க³ண்ஹந்தி, பகரணமேவானுக³தபி⁴க்கூ² பன யதா²பகரணாக³தமேவ அத்த²ம் க³ஹேத்வா ஸங்கி⁴கஞ்ச புக்³க³லிகஞ்ச அமிஸ்ஸம் கத்வா, காலசீவரஞ்ச அகாலசீவரஞ்ச அமிஸ்ஸம் கத்வா க³ண்ஹந்தி. பி⁴க்கு²னிவிப⁴ங்கே³ (பாசி. 738) ‘‘தூ²லனந்தா³ பி⁴க்கு²னீ அகாலசீவரம் ‘காலசீவர’ந்தி அதி⁴ட்ட²ஹித்வா பா⁴ஜாபேஸ்ஸதி, அத² ப⁴க³வா நிஸ்ஸக்³கி³யபாசித்தியாபத்திம் பஞ்ஞபேஸீ’’தி ஆக³தம், தஸ்மா லஜ்ஜீபேஸலப³ஹுஸ்ஸுதஸிக்கா²காமபூ⁴தேன பி⁴க்கு²னா அனேக-பாளிஅட்ட²கதா²த³யோ பகரணே ஓலோகேத்வா ஸம்ஸந்தி³த்வா பகரணமேவானுக³ந்தப்³ப³ம், ந அஞ்ஞேஸம் கிரியம் ஸத்³த³ஹிதப்³ப³ம், ந ச அனுக³ந்தப்³ப³ம். ப⁴க³வதோ ஹி த⁴ரமானகாலே வா ததோ பச்சா² வா புப்³பே³ தா³யகா யேபு⁴ய்யேன சத்தாரோ பச்சயே ஸங்க⁴ஸ்ஸேவ தே³ந்தி, தஸ்மா ஸங்கி⁴கஸேனாஸனஸ்ஸ ஸங்கி⁴கசீவரஸ்ஸ ச பா³ஹுல்லதோ புப்³பா³சரியா ஸங்க⁴ஸ்ஸ பா⁴ஜேத்வா ஏவ பரிபு⁴ஞ்ஜிம்ஸு.

இதா³னி பன தா³யகா யேபு⁴ய்யேன சத்தாரோ பச்சயே புக்³க³லஸ்ஸேவ தே³ந்தி, தஸ்மா ஸேனாஸனம்பி அபி⁴னவபூ⁴தம் புக்³க³லிகமேவ ப³ஹுலம் ஹோதி, சீவரம்பி புக்³க³லிகமேவ ப³ஹுலம். த³லித்³தா³பி ஸுத்தகந்தனகாலதோ பட்டா²ய ‘‘இமம் சீவரம் கதி²னகாலே இத்த²ன்னாமஸ்ஸ பி⁴க்கு²னோ த³ஸ்ஸாமீ’’தி சிந்தேத்வா ச ததே²வ வத்வா ச ஸப்³ப³கிச்சானி கரோந்தி, மஹத்³த⁴னா ச ஸாடகஸ்ஸ கீணிதகாலதோ பட்டா²ய ததே²வ சிந்தேத்வா கதே²த்வா கரோந்தி, தா³னகாலே ச ‘‘இமம் சீவரம் இத்த²ன்னாமஸ்ஸ தே³ஹீ’’தி புத்ததா³ஸாத³யோ வா பேஸேந்தி, ஸாமம் வா க³ந்த்வா சீவரம் தஸ்ஸ பி⁴க்கு²ஸ்ஸ பாத³மூலே வா ஹத்தே² வா ட²பேத்வா ‘‘இமம் சீவரம் துய்ஹம் த³ம்மீ’’தி வத்வா வா சிந்தேத்வா வா தே³ந்தி, ஸதேஸு வா ஸஹஸ்ஸேஸு வா ஏகோ பண்டி³தபுரிஸோ ‘‘புக்³க³லஸ்ஸ தி³ன்னதா³னதோ ஸங்க⁴ஸ்ஸ தி³ன்னம் மஹப்ப²ல’’ந்தி ஞத்வா ‘‘இமம் கதி²னசீவரம் ஸங்க⁴ஸ்ஸ த³ம்மீ’’தி வத்வா வா சிந்தேத்வா வா தே³தி, தஸ்ஸ ஸா த³க்கி²ணா ஸங்க⁴க³தா ஹோதி. ஸசே பன தா³யகோ புக்³க³லஸ்ஸ தா³துகாமோ ஹோதி, புக்³க³லோ பன தஸ்ஸ மஹப்ப²லபா⁴வமிச்ச²ந்தோ த³க்கி²ணா-விப⁴ங்க³ஸுத்தாதி³த⁴ம்மதே³ஸனாய (ம. நி. 3.376 ஆத³யோ) புக்³க³லிகதா³னதோ ஸங்கி⁴கதா³னஸ்ஸ மஹப்ப²லபா⁴வம் ஜானாபேத்வா ‘‘இமம் தவ சீவரம் ஸங்க⁴ஸ்ஸ தே³ஹீ’’தி உய்யோஜேதி, தா³யகோபி தஸ்ஸ வசனம் ஸம்படிச்சி²த்வா ‘‘இமம் கதி²னசீவரம் ஸங்க⁴ஸ்ஸ த³ம்மீ’’தி வத்வா வா சிந்தேத்வா வா தே³தி, ஏவம்பி ஸா த³க்கி²ணா ஸங்க⁴க³தா ஹோதி.

யதி³ பன பி⁴க்கு²னா உய்யோஜிதோபி து³ப்பஞ்ஞோ தா³யகோ தஸ்ஸ வசனம் அனாதி³யித்வா புக்³க³லஸ்ஸேவ தே³தி, தஸ்ஸ ஸா த³க்கி²ணா புக்³க³லக³தா ஹோதி. அத² பன ஸோ புக்³க³லோ ஸயம் ஸம்படிச்சி²த்வா புன ஸங்க⁴ஸ்ஸ பரிச்சஜதி, ஏவம்பி தம் சீவரம் ஸங்கி⁴கம் ஹோதி, தம் ஸங்கி⁴கவஸேன பா⁴ஜேதப்³ப³ம். யதி³ பன தா³யகோபி புக்³க³லஸ்ஸேவ தே³தி, புக்³க³லோபி ஸம்படிச்சி²த்வா ந பரிச்சஜதி, ஏவம் ஸந்தே தம் சீவரம் புக்³க³லிகம் ஹோதி, ந கதி²னகாலமத்தேன வா கதி²னவசனமத்தேன வா ஸங்கி⁴கம் ஹோதி. இதா³னி பன இமினா நயேன புக்³க³லிகசீவரம்யேவ ப³ஹுலம் ஹோதி. ஏவம் ஸந்தேபி ஆசரியபரம்பரா பவேணிம் அபி⁴ந்தி³துகாமா ஸங்கி⁴கம் விய கத்வா பா⁴ஜேத்வா பரிபு⁴ஞ்ஜிம்ஸு. யதி³ முக்²யதோ ஸங்கி⁴கம் ஸியா, ஸங்கே⁴ன தி³ன்னதோ பரம் ஏகஸூசிமத்தம்பி புக்³க³லோ அதி⁴கம் க³ண்ஹிதும் ந லபே⁴ய்ய.

ஏகச்சே தே²ரா ஸங்கி⁴கந்தி பன வத³ந்தி, பா⁴ஜனகாலே பன இஸ்ஸரவதாய யதா²ருசி விசாரேந்தி, ஏகச்சே பி⁴க்கூ² முக்²யஸங்கி⁴கந்தி மஞ்ஞமானா அபா⁴ஜேதுகாமம்பி புக்³க³லம் அபி⁴ப⁴வித்வா பா⁴ஜாபேந்தி, தஸ்ஸ புக்³க³லஸ்ஸ மாதா பிதா ஞாதகா உபாஸகாத³யோ ‘‘அம்ஹாகம் புத்தஸ்ஸ தே³ம, அம்ஹாகம் ஞாதகபி⁴க்கு²ஸ்ஸ தே³ம, அம்ஹாகம் குலூபகஸ்ஸ தே³மா’’தி, அஞ்ஞேபி ஸத்³தா⁴ பஸன்னா தா³யகா ‘‘இத்த²ன்னாமஸ்ஸ புக்³க³லஸ்ஸ தே³மா’’தி விசாரேத்வா பரம்முகா²பி ‘‘இமம் சீவரம் இத்த²ன்னாமஸ்ஸ த³ம்மீ’’தி வத்வா ஸம்முகா²பி பாத³மூலே வா ஹத்தே² வா ட²பேத்வா தே³ந்தி, ஏவரூபம் சீவரம் புக்³க³லிகம் ஹோதி, ஸங்க⁴ம் ஆமஸித்வா அவுத்தத்தா ஸங்கா⁴யத்தம் ந ஹோதி, ‘‘கதி²னம் த³ஸ்ஸாமீ’’தி வா ‘‘கதி²னம் தா³தும் க³தோ’’தி வா ‘‘கதி²னசீவர’’ந்தி வா புப்³பா³பரகாலேஸு வசனம் பன முக்²யகதி²னபூ⁴தஸ்ஸ ஸங்கி⁴கசீவரஸ்ஸ காலே தி³ன்னத்தா தது³பசாரதோ வோஹாரமத்தம் ஹோதி. யதா² கிம்? ‘‘உபோஸதி²க’’ந்தி வுத்தம் ப⁴த்தம் சுத்³த³ஸஸு ஸங்கி⁴கப⁴த்தேஸு அந்தோக³த⁴ம் முக்²யஸங்கி⁴கம் ஹோதி, ஸமாதி³ன்னஉபோஸதா² தா³யகா ஸாயம் பு⁴ஞ்ஜிதப்³ப³ப⁴த்தபா⁴க³ம் ஸங்க⁴ஸ்ஸ தே³ந்தி, தம் ஸங்கோ⁴ ஸலாகப⁴த்தம் விய டி²திகம் கத்வா பு⁴ஞ்ஜதி, இதி ஸங்க⁴ஸ்ஸ தி³ன்னத்தா ஸங்கி⁴கம் ஹோதி. இதா³னி பன தா³யகா அத்தனோ அத்தனோ குலூபகஸ்ஸ வா ஞாதிபி⁴க்கு²ஸ்ஸ வா உபோஸத²தி³வஸேஸு ப⁴த்தம் தே³ந்தி, தம் ஸங்க⁴ஸ்ஸ அதி³ன்னத்தா ஸங்கி⁴கம் ந ஹோதி. ஏவம் ஸந்தேபி உபோஸத²தி³வஸே தி³ன்னத்தா முக்²யவஸேன பவத்தஉபோஸத²ப⁴த்தம் விய தது³பசாரேன ‘‘உபோஸத²ப⁴த்த’’ந்தி வோஹரீயதி, ஏவம்ஸம்பத³மித³ம் த³ட்ட²ப்³ப³ம்.

ஏவம் இமஸ்மிம் காலே யேபு⁴ய்யேன புக்³க³லஸ்ஸேவ தி³ன்னத்தா புக்³க³லிகபூ⁴தம் சீவரம் ஞத்திகம்மவாசாரஹம் ந ஹோதி, ஸங்கி⁴கமேவ ஞத்திகம்மவாசாரஹம் ஹோதி, ததே³வ ச பஞ்சானிஸம்ஸகாரணம் ஹோதி, தஸ்மா பண்டி³தேன புக்³க³லேன ‘‘உபாஸகா ஸங்கே⁴ தே³த², ஸங்கே⁴ தி³ன்னம் மஹப்ப²லம் ஹோதீ’’திஆதி³னா நியோஜேத்வா தா³பேதப்³ப³ம், ஸயம் வா ஸம்படிச்சி²த்வா ஸங்க⁴ஸ்ஸ பரிச்சஜிதப்³ப³ம். ஏவம் பரிச்சஜிதத்தா ஸங்கி⁴கபூ⁴தம் சீவரம் ஞத்திகம்மவாசாரஹஞ்ச ஹோதி பஞ்சானிஸம்ஸனிப்பா²த³கஞ்ச. ஏவம் நியோஜனஞ்ச ‘‘ஸங்கே⁴ கோ³தமி தே³ஹி, ஸங்கே⁴ தே தி³ன்னே அஹஞ்சேவ பூஜிதோ ப⁴விஸ்ஸாமி ஸங்கோ⁴ சா’’தி (ம. நி. 3.376) ப⁴க³வதா வுத்தவசனம் அனுக³தம் ஹோதீதி த³ட்ட²ப்³ப³ம்.

பரிகம்மம் கரோந்தானம் பி⁴க்கூ²னம் யாகு³ப⁴த்தஞ்ச தா³தும் வட்டதீதி இத³ம் புச்சி²தத்தா தோ³ஸோ நத்தீ²தி கத்வா வுத்தம், அபுச்சி²தே பன ஏவம் கதே²தும் ந வட்டதி. க²லிமக்கி²தஸாடகோதி அஹதவத்த²ம் ஸந்தா⁴ய வுத்தம். ஸுட்டு² தோ⁴வித்வாதிஆதி³னா ஸபுப்³ப³கரணம் அத்தா²ரம் த³ஸ்ஸேதி. தோ⁴வனஸிப்³ப³னரஜனகப்பகரணேன ஹி விசாரணசே²த³னப³ந்த⁴னானிபி த³ஸ்ஸிதானியேவ ஹோந்தி, அத்தா²ரத³ஸ்ஸனேன பச்சுத்³தா⁴ரஅதி⁴ட்டா²னானிபி த³ஸ்ஸேதி. ஸூசிஆதீ³னி சீவரகம்முபகரணானி ஸஜ்ஜேத்வா ப³ஹூஹி பி⁴க்கூ²ஹி ஸத்³தி⁴ந்தி இத³ம் பன ஸிப்³ப³னஸ்ஸ உபகரணனித³ஸ்ஸனம். தத³ஹேவாதி இத³ம் பன கரணஸன்னிதி⁴மோசனத்த²ம் வுத்தம். தா³யகஸ்ஸ ஹத்த²தோ ஸாடகம் லத்³த⁴தி³வஸேயேவ ஸங்கே⁴ன அத்தா²ரகஸ்ஸ பி⁴க்கு²னோ தா³தப்³ப³ம், ஏவம் அதே³ந்தே நிசயஸன்னிதி⁴ ஹோதி. அத்தா²ரகேனபி ஸங்க⁴தோ லத்³த⁴தி³வஸேயேவ கதி²னம் அத்த²ரிதப்³ப³ம், ஏவம் அகரோந்தே கரணஸன்னிதி⁴ ஹோதி.

அஞ்ஞானி ச ப³ஹூனி ஆனிஸம்ஸவத்தா²னி தே³தீதி இமினா அத்த²ரிதப்³ப³ஸாடகோயேவ கதி²னஸாடகோ நாம, ததோ அஞ்ஞே ஸாடகா ப³ஹவோபி கதி²னானிஸம்ஸாயேவ நாமாதி த³ஸ்ஸேதி. ஏதேன ச ‘‘கதி²னானிஸம்ஸோ’’தி வத்தா²னியேவ வுத்தானி ந அக்³கோ⁴தி தீ³பேதி. யதி³ அக்³கோ⁴ வுத்தோ ஸியா, ஏவம் ஸதி ‘‘ப³ஹ்வானிஸம்ஸானி கதி²னவத்தா²னி தே³தீ’’தி வத்தப்³ப³ம், ஏவம் பன அவத்வா ‘‘ப³ஹூனி கதி²னானிஸம்ஸவத்தா²னி தே³தீ’’தி வுத்தம், தேன ஞாயதி ‘‘ந அக்³கோ⁴ வுத்தோ’’தி, தஸ்மா ப³ஹ்வானிஸம்ஸபா⁴வோ அக்³க⁴வஸேன ந க³ஹேதப்³போ³, அத² கோ² வத்த²வஸேனேவ க³ஹேதப்³போ³தி. இதரோதி அஞ்ஞோ தா³யகோ. ததா² ததா² ஓவதி³த்வா ஸஞ்ஞாபேதப்³போ³தி ‘‘உபாஸக தா³னம் நாம ஸங்க⁴ஸ்ஸ தி³ன்னகாலதோ பட்டா²ய மஹப்ப²லம் ஹோதி மஹானிஸம்ஸம், அத்தா²ரோ பன பி⁴க்கூ²னம் உபகாரத்தா²ய ப⁴க³வதா அனுஞ்ஞாதோ, தஸ்மா ஞத்திலத்³த⁴ம்பி அலத்³த⁴ம்பி மஹப்ப²லமேவா’’தி வா ‘‘உபாஸக அயம்பி தா³யகோ ஸங்க⁴ஸ்ஸேவ தே³தி, த்வம்பி ஸங்க⁴ஸ்ஸேவ தே³ஸி, ப⁴க³வதா ச –

‘யோ ஸீலவா ஸீலவந்தேஸு த³தா³தி தா³னம்;

த⁴ம்மேன லத்³த⁴ம் ஸுபஸன்னசித்தோ;

அபி⁴ஸத்³த³ஹம் கம்மப²லம் உளாரம்;

தம் வே தா³னம் விபுலப²லந்தி ப்³ரூமீ’தி. (ம. நி. 3.382) –

வுத்தம், தஸ்மா ஸங்க⁴ஸ்ஸ தி³ன்னகாலதோ பட்டா²ய மஹப்ப²லமேவா’’தி வா இதிஆதீ³னி வத்வா ஸஞ்ஞாபேதப்³போ³.

யஸ்ஸ ஸங்கோ⁴ கதி²னசீவரம் தே³தி, தேன பி⁴க்கு²னா கதி²னம் அத்த²ரிதப்³ப³ந்தி யோஜனா. யோ ஜிண்ணசீவரோ ஹோதி பி⁴க்கு², தஸ்ஸ தா³தப்³ப³ந்தி ஸம்ப³ந்தோ⁴. இமஸ்மிம் டா²னே இதா³னி பி⁴க்கூ² –

‘‘படிக்³க³ஹணஞ்ச ஸப்பாயம், ஞத்தி ச அனுஸாவனம்;

கப்பபி³ந்து³ பச்சுத்³தா⁴ரோ, அதி⁴ட்டா²னத்த²ரானி ச;

நியோஜனானுமோதா³ ச, இச்சயம் கதி²னே விதீ⁴’’தி. –

இமம் கா³த²ம் ஆஹரித்வா கதி²னதா³னகம்மவாசாய பட²மம் கதி²னசீவரஸ்ஸ படிக்³க³ஹணஞ்ச ஸப்பாயபுச்ச²னஞ்ச கரோந்தி, தத³யுத்தம் விய தி³ஸ்ஸதி. கஸ்மாதி சே? ‘‘அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிதும்…பே… புப்³ப³கரணம் ஜானாதி, பச்சுத்³தா⁴ரம் ஜானாதி, அதி⁴ட்டா²னம் ஜானாதி, அத்தா²ரம் ஜானாதி, மாதிகம் ஜானாதி, பலிபோ³த⁴ம் ஜானாதி, உத்³தா⁴ரம் ஜானாதி, ஆனிஸம்ஸம் ஜானாதீ’’தி பரிவாரபாளியஞ்ச (பரி. 409),

‘‘அட்ட²த⁴ம்மவிதோ³ பி⁴க்கு², கதி²னத்தா²ரமரஹதி;

புப்³ப³பச்சுத்³தா⁴ராதி⁴ட்டா²-நத்தா²ரோ மாதிகாதி ச;

பலிபோ³தோ⁴ ச உத்³தா⁴ரோ, ஆனிஸம்ஸா பனட்டி²மே’’தி. (வி. வி. 2704, 2706) –

வினயவினிச்ச²யப்பகரணே ச ஆக³தேஸு அட்ட²ஸு அங்கே³ஸு அனாக³தத்தா ச ‘‘புப்³ப³கரணம் ஸத்தஹி த⁴ம்மேஹி ஸங்க³ஹிதம் தோ⁴வனேன விசாரணேன சே²த³னேன ப³ந்த⁴னேன ஸிப்³ப³னேன ரஜனேன கப்பகரணேனா’’தி பரிவாரபாளியஞ்ச (பரி. 408),

‘‘தோ⁴வனஞ்ச விசாரோ ச, சே²த³னம் ப³ந்த⁴னம்பி ச;

ஸிப்³ப³னம் ரஜனம் கப்பம், புப்³ப³கிச்சந்தி வுச்சதீ’’தி. (வி. வி. 2707) –

வினயவினிச்ச²யப்பகரணே ச வுத்தேஸு ஸத்தஸு புப்³ப³கரணேஸு அனாக³தத்தா ச.

ந கேவலஞ்ச பகரணேஸு அனாக³தமேவ, அத² கோ² யுத்திபி ந தி³ஸ்ஸதி. கத²ம்? படிக்³க³ஹணம் நாம ‘‘யோ பன பி⁴க்கு² அதி³ன்னம் முக²த்³வாரம் ஆஹாரம் ஆஹாரேய்ய அஞ்ஞத்ர உத³கத³ந்தபோனா, பாசித்திய’’ந்தி (பாசி. 265) யாவகாலிகாதீ³ஸு அஜ்ஜோ²ஹரிதப்³பே³ஸு சதூஸு காலிகவத்தூ²ஸு ப⁴க³வதா வுத்தம், ந சீவரே, தம் பன பாத³மூலே ட²பேத்வா தி³ன்னம்பி பரம்முகா² தி³ன்னம்பி லப்³ப⁴தேவ. வுத்தஞ்ஹி அட்ட²கதா²யம் (மஹாவ. அட்ட². 379) ‘‘இமம் சீவரம் இத்த²ன்னாமஸ்ஸ த³ம்மீதி ஏவம் பரம்முகா² வா பாத³மூலே ட²பேத்வா ‘இமம் தும்ஹாக’ந்தி ஏவம் ஸம்முகா² வா தே³தீ’’தி, தஸ்மா படிக்³க³ஹணகிச்சம் நத்தி², தா³யகேன சீவரே தி³ன்னே ஸங்க⁴ஸ்ஸ சித்தேன ஸம்படிச்ச²னமத்தமேவ பமாணம் ஹோதி.

ஸப்பாயபுச்ச²னஞ்ச ஏவம் கரோந்தி – ஏகேன பி⁴க்கு²னா ‘‘போ⁴ந்தோ ஸங்கா⁴ ஸங்க⁴ஸ்ஸ கதி²னே ஸம்பத்தே கஸ்ஸ புக்³க³லஸ்ஸ ஸப்பாயாரஹம் ஹோதீ’’தி புச்சி²தே ஏகோ பி⁴க்கு² நாமம் வத்வா ‘‘இத்த²ன்னாமஸ்ஸ தே²ரஸ்ஸ ஸப்பாயாரஹம் ஹோதீ’’தி வத³தி, ஸப்பாயஇதி ச நிவாஸனபாருபனத்த²ம் க³ஹேத்வா வத³ந்தி. ஏதஸ்மிம் வசனே ஸத்³த³தோ ச அத்த²தோ ச அதி⁴ப்பாயதோ ச யுத்தி க³வேஸிதப்³பா³ ஹோதி. கத²ம்? ஸத்³த³தோ வக்³க³பே⁴தே³ ஸதியேவ ப³ஹுவசனம் கத்தப்³ப³ம், ந அபே⁴தே³, ஏவம் ஸத்³த³தோ. ஸப்பாயஇதிவசனஞ்ச அனுரூபத்தே²யேவ வத்தப்³ப³ம், ந நிவாஸனபாருபனத்தே², ஏவம் அத்த²தோ. இத³ஞ்ச சீவரம் ஸங்கோ⁴ கதி²னம் அத்த²ரிதும் புக்³க³லஸ்ஸ தே³தி, ந நிவாஸனபாருபனத்த²ம். வுத்தஞ்ஹி பாளியம் (மஹாவ. 307) ‘‘ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ தே³தி கதி²னம் அத்த²ரிது’’ந்தி, தஸ்மா யுத்தி க³வேஸிதப்³பா³ ஹோதி. ‘‘படிக்³க³ஹணஞ்ச ஸப்பாய’’ந்திஆதி³கா³தா²பி கத்த²சி பாளியம் அட்ட²கதா²டீகாதீ³ஸு ச ந தி³ஸ்ஸதி, தஸ்மா இத⁴ வுத்தனயேனேவ படிபஜ்ஜிதப்³ப³ம்.

ஸசே ப³ஹூ ஜிண்ணசீவரா, வுட்³ட⁴ஸ்ஸ தா³தப்³ப³ந்தி இத³ம் கதி²னசீவரஸ்ஸ ஸங்கி⁴கத்தா ‘‘ந ச, பி⁴க்க²வே, ஸங்கி⁴கம் யதா²வுட்³ட⁴ம் படிபா³ஹிதப்³ப³ம், யோ படிபா³ஹேய்ய, ஆபத்தி து³க்கடஸ்ஸா’’தி இமினா பாளினயேன (சூளவ. 311) வுத்தம். ஏதேனேவ நயேன ஸப்³பே³ஸு ப³லவசீவரேஸு ஸந்தேஸுபி வுட்³ட⁴ஸ்ஸேவ தா³தப்³ப³ந்தி ஸித்³த⁴ம். வுட்³டே⁴ஸு…பே… தா³தப்³ப³ந்தி கரணஸன்னிதி⁴மோசனத்த²ம் வுத்தம். தேனேவாஹ ‘‘ஸசே வுட்³டோ⁴’’த்யாதி³. நவகதரேனபி ஹி கரணஸன்னிதி⁴ம் மோசேத்வா கதி²னே அத்த²தே அனுமோத³னம் கரோந்தஸ்ஸ ஸங்க⁴ஸ்ஸ பஞ்சானிஸம்ஸலாபோ⁴ ஹோதீதி. அபிசாதிஆதி³னா ஸங்கே⁴ன கத்தப்³ப³வத்தம் த³ஸ்ஸேதி. வசனக்கமோ பன ஏவம் காதப்³போ³ – கதி²னது³ஸ்ஸம் லபி⁴த்வா ஸங்கே⁴ ஸீமாய ஸன்னிபதிதே ஏகேன பி⁴க்கு²னா ‘‘ப⁴ந்தே, ஸங்க⁴ஸ்ஸ இத³ம் கதி²னது³ஸ்ஸம் உப்பன்னம், ஸங்கோ⁴ இமம் கதி²னது³ஸ்ஸம் கத²ன்னாமஸ்ஸ பி⁴க்கு²னோ த³தே³ய்ய கதி²னம் அத்த²ரிது’’ந்தி வுத்தே அஞ்ஞேன ‘‘யோ ஜிண்ணசீவரோ, தஸ்ஸா’’தி வத்தப்³ப³ம், ததோ புரிமேன ‘‘ப³ஹூ ஜிண்ணசீவரா’’தி வா ‘‘நத்தி² இத⁴ ஜிண்ணசீவரா’’தி வா வுத்தே அபரேன ‘‘தேன ஹி வுட்³ட⁴ஸ்ஸா’’தி வத்தப்³ப³ம், புன புரிமேன ‘‘கோ ஏத்த² வுட்³டோ⁴’’தி வுத்தே இதரேன ‘‘இத்த²ன்னாமோ பி⁴க்கூ²’’தி வத்தப்³ப³ம், புன புரிமேன ‘‘ஸோ பி⁴க்கு² தத³ஹேவ சீவரம் கத்வா அத்த²ரிதும் ஸக்கோதீ’’தி வுத்தே இதரேன ‘‘ஸோ ஸக்கோதீ’’தி வா ‘‘ஸங்கோ⁴ மஹாதே²ரஸ்ஸ ஸங்க³ஹம் கரிஸ்ஸதீ’’தி வா வத்தப்³ப³ம், புன புரிமேன ‘‘ஸோ மஹாதே²ரோ அட்ட²ஹி அங்கே³ஹி ஸமன்னாக³தோ’’தி வுத்தே இதரேன ‘‘ஆம ஸமன்னாக³தோ’’தி வத்தப்³ப³ம், ததோ ‘‘ஸாது⁴ ஸுட்டு² தஸ்ஸ தா³தப்³ப³’’ந்தி வுத்தே ப்³யத்தேன பி⁴க்கு²னா படிப³லேன ஸங்கோ⁴ ஞாதப்³போ³.

ஏத்த² ச ‘‘ப⁴ந்தே, ஸங்க⁴ஸ்ஸா’’திஆதி³வசனம் ‘‘ஸுணாது மே, ப⁴ந்தே, ஸங்கோ⁴, இத³ம் ஸங்க⁴ஸ்ஸ கதி²னது³ஸ்ஸம் உப்பன்னம், யதி³ ஸங்க⁴ஸ்ஸ பத்தகல்லம், ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ த³தே³ய்ய கதி²னம் அத்த²ரிது’’ந்தி இமாய ஞத்திபாளியா ஸமேதி. ‘‘யோ ஜிண்ணசீவரோ, தஸ்ஸா’’திஆதி³ ‘‘ஸங்கே⁴ன கஸ்ஸா’’திஆதி³ ‘‘ஸங்கே⁴ன கஸ்ஸ தா³தப்³ப³ம், யோ ஜிண்ணசீவரோ ஹோதீ’’திஆதி³னா அட்ட²கதா²வசனேன (மஹாவ. அட்ட². 306) ஸமேதி. ‘‘ஸோ மஹாதே²ரோ அட்ட²ஹங்கே³ஹி ஸமன்னாக³தோ’’திஆதி³ ‘‘அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிது’’ந்திஆதி³காய பரிவாரபாளியா (பரி. 409) ஸமேதீதி த³ட்ட²ப்³ப³ம். யஸ்ஸ பன தீ³யதி, தஸ்ஸ ஞத்திது³தியகம்மவாசாய தா³தப்³ப³ந்தி ஸம்ப³ந்தோ⁴. இமினா இமஸ்ஸ கதி²னதா³னகம்மஸ்ஸ க³ருகத்தா ந அபலோகனமத்தேன தா³தப்³ப³ந்தி இமமத்த²ம் பகாஸேதி. க³ருகலஹுகானம் பே⁴தோ³ கம்மாகம்மவினிச்ச²யகதா²யம் ஆவி ப⁴விஸ்ஸதி.

ஏவம் தி³ன்னே பன கதி²னே பச்சுத்³த⁴ரிதப்³பா³ அதி⁴ட்டா²தப்³பா³ வாசா பி⁴ந்தி³தப்³பா³தி ஸம்ப³ந்தோ⁴. ஸசே தம் கதி²னது³ஸ்ஸம் நிட்டி²தபரிகம்மமேவ ஹோதீதி இமினா கதி²னது³ஸ்ஸம் நாம ந கேவலம் பகதிஸாடகமேவ ஹோதி, அத² கோ² பரினிட்டி²தஸத்தவித⁴புப்³ப³கிச்சசீவரம்பி ஹோதீதி த³ஸ்ஸேதி, தஸ்மா நிட்டி²தசீவரஸ்மிம் தி³ன்னே ஸத்தவித⁴புப்³ப³கிச்சகரணேன அத்தோ² நத்தி², கேவலம் பச்சுத்³த⁴ரணாதீ³னியேவ காதப்³பா³னி. ஸசே பன கிஞ்சி அபரினிட்டி²தம் ஹோதி, அந்தமஸோ கப்பபி³ந்து³மத்தம்பி, தம் நிட்டா²பேத்வாயேவ பச்சுத்³த⁴ரணாதீ³னி காதப்³பா³னி. க³ண்டி²கபட்டபாஸகபட்டானி பன ஸிப்³ப³னந்தோக³தா⁴னி, தானிபி நிட்டா²பேத்வாயேவ காதப்³பா³னி. அனிட்டா²பேந்தோ அனிட்டி²தஸிப்³ப³னகிச்சமேவ ஹோதி. வுத்தஞ்ஹி அட்ட²கதா²யம் (பாரா. அட்ட². 2.462-463) ‘‘தத்த² கதந்தி ஸூசிகம்மபரியோஸானேன கதம், ஸூசிகம்மபரியோஸானம் நாம யம் கிஞ்சி ஸூசியா கத்தப்³ப³ம். பாஸகபட்டக³ண்டி²கபட்டபரியோஸானம் கத்வா ஸூசியா படிஸாமன’’ந்தி. இத³ஞ்ஹி கதி²னவத்தம் நாம பு³த்³த⁴ப்பஸத்த²ந்தி ‘‘அத்த²தகதி²னானம் வோ பி⁴க்க²வே பஞ்ச கப்பிஸ்ஸந்தீ’’திஆதி³னா பஸத்த²ம்.

கதபரியோஸிதம் பன கதி²னம் க³ஹேத்வாதி –

‘‘தோ⁴வனஞ்ச விசாரோ ச, சே²த³னம் ப³ந்த⁴னம்பி ச;

ஸிப்³ப³னம் ரஜனம் கப்பம், புப்³ப³கிச்சந்தி வுச்சதீ’’தி. (வி. வி. 2707) –

வுத்தானி ஸத்தவித⁴புப்³ப³கரணானி கத்வா பரியோஸாபிதம் கதி²னசீவரம் க³ஹேத்வா. அத்தா²ரகேன பி⁴க்கு²னா பச்சுத்³த⁴ரிதப்³பா³ அதி⁴ட்டா²தப்³பா³ வாசா பி⁴ந்தி³தப்³பா³தி ஸம்ப³ந்தோ⁴. ஸங்கா⁴டியா கதி²னம் அத்த²ரிதுகாமோ பி⁴க்கு² புப்³பே³ திசீவராதி⁴ட்டா²னேன அதி⁴ட்டி²தம் போராணிகம் ஸங்கா⁴டிம் ‘‘இமம் ஸங்கா⁴டிம் பச்சுத்³த⁴ராமீ’’தி வத்வா பச்சுத்³த⁴ரிதப்³பா³, ததோ அனதி⁴ட்டி²தம் நவம் ஸங்கா⁴டிம் ‘‘இமம் ஸங்கா⁴டிம் அதி⁴ட்டா²மீ’’தி வத்வா அதி⁴ட்டா²தப்³பா³, ததோ அத்த²ரணகாலே தமேவ அதி⁴ட்டி²தஸங்கா⁴டிம் ‘‘இமாய ஸங்கா⁴டியா கதி²னம் அத்த²ராமீ’’தி வாசா பி⁴ந்தி³தப்³பா³தி அத்தோ². ஏஸ நயோ இதரேஸு. ஏதேன கதி²னத்தா²ரணம் நாம வசீபே⁴த³கரணமேவ ஹோதி, ந கிஞ்சி காயவிகாரகரணந்தி இமமத்த²ம் தீ³பேதி. ததா² ஹி வுத்தம் வினயத்த²மஞ்ஜூஸாயம் (கங்கா². அபி⁴. டீ. கதி²னஸிக்கா²பத³வண்ணனா) ‘‘அத்த²ரிதப்³ப³ந்தி அத்த²ரணம் காதப்³ப³ம், தஞ்ச கோ² ததா²வசீபே⁴த³கரணமேவாதி த³ட்ட²ப்³ப³’’ந்தி.

தத்த² பச்சுத்³தா⁴ரோ திவிதோ⁴ ‘‘இமம் ஸங்கா⁴டிம் பச்சுத்³த⁴ராமீ’’தி ஸங்கா⁴டியா பச்சுத்³தா⁴ரோ, ‘‘இமம் உத்தராஸங்க³ம் பச்சுத்³த⁴ராமீ’’தி உத்தராஸங்க³ஸ்ஸ பச்சுத்³தா⁴ரோ, ‘‘இமம் அந்தரவாஸகம் பச்சுத்³த⁴ராமீ’’தி அந்தரவாஸகஸ்ஸ பச்சுத்³தா⁴ரோதி. வுத்தஞ்ஹேதம் பரிவாரே (பரி. 408) ‘‘பச்சுத்³தா⁴ரோ தீஹி த⁴ம்மேஹி ஸங்க³ஹிதோ ஸங்கா⁴டியா உத்தராஸங்கே³ன அந்தரவாஸகேனா’’தி. அதி⁴ட்டா²னம் திவித⁴ம் ‘‘இமம் ஸங்கா⁴டிம் அதி⁴ட்டா²மீ’’தி ஸங்கா⁴டியா அதி⁴ட்டா²னம், ‘‘இமம் உத்தராஸங்க³ம் அதி⁴ட்டா²மீ’’தி உத்தராஸங்க³ஸ்ஸ அதி⁴ட்டா²னம், ‘‘இமம் அந்தரவாஸகம் அதி⁴ட்டா²மீ’’தி அந்தரவாஸகஸ்ஸ அதி⁴ட்டா²னந்தி. வுத்தஞ்ஹேதம் பரிவாரே (பரி. 408) ‘‘அதி⁴ட்டா²னம் தீஹி த⁴ம்மேஹி ஸங்க³ஹிதம் ஸங்கா⁴டியா உத்தராஸங்கே³ன அந்தரவாஸகேனா’’தி.

அத² வா அதி⁴ட்டா²னம் து³வித⁴ம் காயேன அதி⁴ட்டா²னம், வாசாய அதி⁴ட்டா²னந்தி. தத்த² போராணிகம் ஸங்கா⁴டிம் ‘‘இமம் ஸங்கா⁴டிம் பச்சுத்³த⁴ராமீ’’தி பச்சுத்³த⁴ரித்வா நவம் ஸங்கா⁴டிம் ஹத்தே²ன க³ஹேத்வா ‘‘இமம் ஸங்கா⁴டிம் அதி⁴ட்டா²மீ’’தி சித்தேன ஆபோ⁴க³ம் கத்வா காயவிகாரகரணேன காயேன வா அதி⁴ட்டா²தப்³ப³ம், வசீபே⁴த³ம் கத்வா வாசாய வா அதி⁴ட்டா²தப்³ப³ம். வுத்தஞ்ஹி அட்ட²கதா²யம் (பாரா. அட்ட². 2.469; கங்கா². அட்ட². கதி²னஸிக்கா²பத³வண்ணனா) ‘‘தத்த² யஸ்மா த்³வே சீவரஸ்ஸ அதி⁴ட்டா²னானி காயேன வா அதி⁴ட்டே²தி, வாசாய வா அதி⁴ட்டே²தீதி வுத்தம், தஸ்மா…பே… அதி⁴ட்டா²தப்³பா³’’தி. அத² வா அதி⁴ட்டா²னம் து³வித⁴ம் ஸம்முகா²தி⁴ட்டா²னபரம்முகா²தி⁴ட்டா²னவஸேன. தத்த² யதி³ சீவரம் ஹத்த²பாஸே டி²தம் ஹோதி, ‘‘இமம் ஸங்கா⁴டிம் அதி⁴ட்டா²மீ’’தி வசீபே⁴த³ம் கத்வா அதி⁴ட்டா²தப்³ப³ம், அத² அந்தோக³ப்³பே⁴ வா ஸாமந்தவிஹாரே வா ஹோதி, ட²பிதட்டா²னம் ஸல்லக்கே²த்வா ‘‘ஏதம் ஸங்கா⁴டிம் அதி⁴ட்டா²மீ’’தி வசீபே⁴த³ம் கத்வா அதி⁴ட்டா²தப்³ப³ம். வுத்தஞ்ஹி அட்ட²கதா²யம் (பாரா. அட்ட². 2.469; கங்கா². அட்ட². கதி²னஸிக்கா²பத³வண்ணனா) ‘‘தத்ர து³வித⁴ம் அதி⁴ட்டா²னம் ஸசே ஹத்த²பாஸே ஹோதீ’’திஆதி³, வினயத்த²மஞ்ஜூஸாயஞ்ச (கங்கா². அபி⁴. டீ. கதி²னஸிக்கா²பத³வண்ணனா) ‘‘து³வித⁴ந்தி ஸம்முகா²பரம்முகா²பே⁴தே³ன து³வித⁴’’ந்தி.

அத்தா²ரோ கதிவிதோ⁴? அத்தா²ரோ ஏகவிதோ⁴. வசீபே⁴த³கரணேனேவ ஹி அத்தா²ரோ ஸம்பஜ்ஜதி, ந காயவிகாரகரணேன. அயமத்தோ² யதா²வுத்த-பரிவாரபாளியா ச ‘‘அத்த²ரிதப்³ப³ந்தி அத்த²ரணம் காதப்³ப³ம், தஞ்ச கோ² ததா²வசீபே⁴த³கரணமேவாதி த³ட்ட²ப்³ப³’’ந்தி வினயத்த²மஞ்ஜூஸாவசனேன ச விஞ்ஞாயதி. அத² வா அத்தா²ரோ திவிதோ⁴ வத்து²ப்பபே⁴தே³ன. தத்த² யதி³ ஸங்கா⁴டியா கதி²னம் அத்த²ரிதுகாமோ ஹோதி, போராணிகா ஸங்கா⁴டி பச்சுத்³த⁴ரிதப்³பா³, நவா ஸங்கா⁴டி அதி⁴ட்டா²தப்³பா³, ‘‘இமாய ஸங்கா⁴டியா கதி²னம் அத்த²ராமீ’’தி வாசா பி⁴ந்தி³தப்³பா³. அத² உத்தராஸங்கே³ன கதி²னம் அத்த²ரிதுகாமோ ஹோதி, போராணகோ உத்தராஸங்கோ³ பச்சுத்³த⁴ரிதப்³போ³, நவோ உத்தராஸங்கோ³ அதி⁴ட்டா²தப்³போ³, ‘‘இமினா உத்தராஸங்கே³ன கதி²னம் அத்த²ராமீ’’தி வாசா பி⁴ந்தி³தப்³பா³. அத² அந்தரவாஸகேன கதி²னம் அத்த²ரிதுகாமோ ஹோதி, போராணகோ அந்தரவாஸகோ பச்சுத்³த⁴ரிதப்³போ³, நவோ அந்தரவாஸகோ அதி⁴ட்டா²தப்³போ³, ‘‘இமினா அந்தரவாஸகேன கதி²னம் அத்த²ராமீ’’தி வாசா பி⁴ந்தி³தப்³பா³. வுத்தஞ்ஹேதம் பரிவாரே (பரி. 413) ‘‘ஸசே ஸங்கா⁴டியா’’திஆதி³.

ஏத்த² ஸியா – கிம் பன ‘‘இமம் ஸங்கா⁴டிம் பச்சுத்³த⁴ராமீ’’தி விஸேஸம் கத்வாவ பச்சுத்³த⁴ரிதப்³பா³, உதா³ஹு ‘‘இமம் பச்சுத்³த⁴ராமீ’’தி ஸாமஞ்ஞதோபி பச்சுத்³த⁴ரிதப்³பா³தி? பரிக்கா²ரசோளாதி⁴ட்டா²னேன அதி⁴ட்டி²தம் சீவரம் ‘‘இமம் பச்சுத்³த⁴ராமீ’’தி ஸாமஞ்ஞதோ பச்சுத்³த⁴ரிதப்³ப³ம், ந ‘‘இமம் ஸங்கா⁴டிம் பச்சுத்³த⁴ராமீ’’தி விஸேஸதோ பச்சுத்³த⁴ரிதப்³ப³ம். கஸ்மா? புப்³பே³ அலத்³த⁴னாமத்தா. திசீவராதி⁴ட்டா²னேன அதி⁴ட்டி²தம் பன சீவரம் விஸேஸதோயேவ பச்சுத்³த⁴ரிதப்³ப³ம், ந ஸாமஞ்ஞதோ. கஸ்மா? படிலத்³த⁴விஸேஸனாமத்தா. இத⁴ பன கதி²னாதி⁴காரே புப்³பே³வ திசீவராதி⁴ட்டா²னேன அதி⁴ட்டி²தத்தா விஸேஸதோயேவ பச்சுத்³த⁴ரிதப்³ப³ந்தி த³ட்ட²ப்³ப³ம். வுத்தஞ்ஹேதம் பரிவாரே (பரி. 408) கதி²னாதி⁴காரே ‘‘பச்சுத்³தா⁴ரோ தீஹி த⁴ம்மேஹி ஸங்க³ஹிதோ ஸங்கா⁴டியா உத்தராஸங்கே³ன அந்தரவாஸகேனா’’தி. கிம் பன நிச்சதேசீவரிகோயேவ கதி²னம் அத்த²ரிதும் லப⁴தி, உதா³ஹு அவத்தா²தேசீவரிகோபீதி? தேசீவரிகோ து³விதோ⁴ து⁴தங்க³தேசீவரிகவினயதேசீவரிகவஸேன. தத்த² து⁴தங்க³தேசீவரிகோ ‘‘அதிரேகசீவரம் படிக்கி²பாமி, தேசீவரிகங்க³ம் ஸமாதி³யாமீ’’தி அதி⁴ட்ட²ஹித்வா தா⁴ரணதோ ஸப்³ப³காலமேவ தா⁴ரேதி. வினயதேசீவரிகோ பன யதா³ திசீவராதி⁴ட்டா²னேன அதி⁴ட்ட²ஹித்வா தா⁴ரேதுகாமோ ஹோதி, ததா³ ததா² அதி⁴ட்ட²ஹித்வா தா⁴ரேதி. யதா³ பன பரிக்கா²ரசோளாதி⁴ட்டா²னேன அதி⁴ட்ட²ஹித்வா தா⁴ரேதுகாமோ ஹோதி, ததா³ ததா² அதி⁴ட்ட²ஹித்வா தா⁴ரேதி, தஸ்மா திசீவராதி⁴ட்டா²னஸ்ஸ து³ப்பரிஹாரத்தா ஸப்³ப³தா³ தா⁴ரேதும் அஸக்கோந்தோ ஹுத்வா பரிக்கா²ரசோளவஸேன தா⁴ரேந்தோபி தம் பச்சுத்³த⁴ரித்வா ஆஸன்னே காலே திசீவராதி⁴ட்டா²னேன அதி⁴ட்ட²ஹந்தோபி கதி²னம் அத்த²ரிதும் லப⁴தியேவாதி த³ட்ட²ப்³ப³ம்.

கச்சி நு போ⁴ கதி²னதா³னகம்மவாசாப⁴ணனஸீமாயமேவ கதி²னம் அத்த²ரிதப்³ப³ம், உதா³ஹு அஞ்ஞஸீமாயாதி? யதி³ கதி²னதா³னகம்மவாசாப⁴ணனப³த்³த⁴ஸீமா வஸ்ஸூபனாயிககே²த்தபூ⁴தஉபசாரஸீமாய அந்தோ டி²தா, ஏவம் ஸதி தஸ்மிம்யேவ ஸீமமண்ட³லே அத்த²ரணம் காதப்³ப³ம். கத²ம் விஞ்ஞாயதீதி சே? ‘‘பரினிட்டி²தபுப்³ப³கரணமேவ சே தா³யகோ ஸங்க⁴ஸ்ஸ தே³தி, ஸம்படிச்சி²த்வா கம்மவாசாய தா³தப்³ப³ம். தேன ச தஸ்மிம்யேவ ஸீமமண்ட³லே அதி⁴ட்ட²ஹித்வா அத்த²ரித்வா ஸங்கோ⁴ அனுமோதா³பேதப்³போ³’’தி வஜிரபு³த்³தி⁴டீகாயம் (வஜிர. டீ. மஹாவக்³க³ 308) ஆக³தத்தா விஞ்ஞாயதீதி. யதி³ ஏவம் ‘‘தஸ்மிம்யேவ ஸீமமண்ட³லே’’இச்சேவ டீகாயம் வுத்தத்தா ‘‘யஸ்மிம் கிஸ்மிஞ்சி ஸீமமண்ட³லே கம்மவாசம் ப⁴ணித்வா தஸ்மிம்யேவ ஸீமமண்ட³லே அத்த²ரிதப்³ப³’’ந்தி வத்தப்³ப³ம், ந ‘‘கதி²னதா³னகம்மவாசாப⁴ணனப³த்³த⁴ஸீமா வஸ்ஸூபனாயிககே²த்தபூ⁴தஉபசாரஸீமாய அந்தோ டி²தா’’தி விஸேஸம் கத்வா வத்தப்³ப³ந்தி? ந ந வத்தப்³ப³ம். கம்மவாசாப⁴ணனஸீமா ஹி ப³த்³த⁴ஸீமாபூ⁴தா, கதி²னத்தா²ரஸீமா பன உபசாரஸீமாபூ⁴தா, உபசாரஸீமா ச நாம ப³த்³த⁴ஸீமம் அவத்த²ரித்வாபி க³ச்ச²தி, தஸ்மா ஸா ஸீமா ப³த்³த⁴ஸீமா ச ஹோதி உபசாரஸீமா சாதி தஸ்மிம்யேவ ஸீமமண்ட³லே கதி²னதா³னகம்மவாசம் ப⁴ணித்வா தத்தே²வ அத்த²ரணம் காதப்³ப³ம், ந யஸ்மிம் கிஸ்மிஞ்சி ஸீமமண்ட³லே கம்மவாசம் ப⁴ணித்வா தத்தே²வ அத்த²ரணம் கத்தப்³ப³ந்தி த³ட்ட²ப்³ப³ம். ஏவம்பி ‘‘உபசாரஸீமாய’’இச்சேவ வத்தப்³ப³ம், ந ‘‘வஸ்ஸூபனாயிககே²த்தபூ⁴தஉபசாரஸீமாயா’’தி, தம்பி வத்தப்³ப³மேவ. தேஸம் பி⁴க்கூ²னம் வஸ்ஸூபனாயிககே²த்தபூ⁴தாய ஏவ உபசாரஸீமாய கதி²னத்தா²ரம் காதும் லப⁴தி, ந அஞ்ஞஉபசாரஸீமாய. வுத்தஞ்ஹி அட்ட²கதா²யம் (மஹாவ. அட்ட². 306) ‘‘அஞ்ஞஸ்மிம் விஹாரே வுத்த²வஸ்ஸாபி ந லப⁴ந்தீதி மஹாபச்சரியம் வுத்த’’ந்தி.

யதி²ச்ச²ஸி, ததா² ப⁴வது, அபி து க²லு ‘‘கம்மவாசாப⁴ணனஸீமா ப³த்³த⁴ஸீமாபூ⁴தா, கதி²னத்தா²ரஸீமா உபசாரஸீமாபூ⁴தா’’தி தும்ஹேஹி வுத்தம், ததா²பூ⁴தபா⁴வோ கத²ம் ஜானிதப்³போ³தி? வுச்சதே – கதி²னத்தா²ரஸீமாயம் தாவ உபசாரஸீமாபூ⁴தபா⁴வோ ‘‘ஸசே பன ஏகஸீமாய ப³ஹூ விஹாரா ஹோந்தி, ஸப்³பே³ பி⁴க்கூ² ஸன்னிபாதேத்வா ஏகத்த² கதி²னம் அத்த²ரிதப்³ப³’’ந்தி இமிஸ்ஸா அட்ட²கதா²ய (மஹாவ. அட்ட². 306) அத்த²ம் ஸம்வண்ணேதும் ‘‘ஏகஸீமாயாதி ஏகஉபசாரஸீமாயாதி அத்தோ² யுஜ்ஜதீ’’தி வஜிரபு³த்³தி⁴டீகாயம் (வஜிர. டீ. மஹாவக்³க³ 306) ஆக³தத்தா விஞ்ஞாயதி. கம்மவாசாப⁴ணனஸீமாய ப³த்³த⁴ஸீமாபூ⁴தபா⁴வோ பன ‘‘தே ச கோ² ஹத்த²பாஸம் அவிஜஹித்வா ஏகஸீமாயம் டி²தா. ஸீமா ச நாமேஸா ப³த்³த⁴ஸீமா அப³த்³த⁴ஸீமாதி து³விதா⁴ ஹோதீ’’தி கங்கா²விதரணியம் (கங்கா². அட்ட². நிதா³னவண்ணனா) ஆக³தத்தா ச ‘‘ஸீமா ச நாமேஸா கதமா, யத்த² ஹத்த²பாஸம் அவிஜஹித்வா டி²தா கம்மப்பத்தா நாம ஹோந்தீதி அனுயோக³ம் ஸந்தா⁴ய ஸீமம் த³ஸ்ஸேந்தோ விபா⁴க³வந்தானம் ஸபா⁴வவிபா⁴வனம் விபா⁴க³த³ஸ்ஸனமுகே²னேவ ஹோதீதி ‘ஸீமா ச நாமேஸா’திஆதி³மாஹா’’தி வினயத்த²மஞ்ஜூஸாயம் (கங்கா². அபி⁴. டீ. நிதா³னவண்ணனா) ஆக³தத்தா ச விஞ்ஞாயதி.

தத்த² கதிவிதா⁴ ப³த்³த⁴ஸீமா, கதிவிதா⁴ அப³த்³த⁴ஸீமாதி? திவிதா⁴ ப³த்³த⁴ஸீமா க²ண்ட³ஸீமாஸமானஸம்வாஸஸீமாஅவிப்பவாஸஸீமாவஸேன. திவிதா⁴ அப³த்³த⁴ஸீமா கா³மஸீமாஉத³குக்கே²பஸீமாஸத்தப்³ப⁴ந்தரஸீமாவஸேனாதி த³ட்ட²ப்³பா³. கத²ம் விஞ்ஞாயதீதி சே? ‘‘ஏவம் ஏகாத³ஸ விபத்திஸீமாயோ அதிக்கமித்வா திவித⁴ஸம்பத்தியுத்தா நிமித்தேன நிமித்தம் ஸம்ப³ந்தி⁴த்வா ஸம்மதா ஸீமா ப³த்³த⁴ஸீமாதி வேதி³தப்³பா³. க²ண்ட³ஸீமா ஸமானஸம்வாஸஸீமா அவிப்பவாஸஸீமாதி தஸ்ஸாயேவ பே⁴தோ³. அப³த்³த⁴ஸீமா பன கா³மஸீமா ஸத்தப்³ப⁴ந்தரஸீமா உத³குக்கே²பஸீமாதி திவிதா⁴’’தி கங்கா²விதரணியம் (கங்கா². அட்ட². நிதா³னவண்ணனா) ஆக³தத்தா விஞ்ஞாயதி. ஏவம் தீஸு ப³த்³த⁴ஸீமாஸு, தீஸு அப³த்³த⁴ஸீமாஸூதி ச²ஸுயேவ ஸீமாஸு கம்மப்பத்தஸங்க⁴ஸ்ஸ சதுவக்³க³கரணீயாதி³கம்மஸ்ஸ கத்தப்³ப³பா⁴வவசனதோ ஸுத்³தா⁴ய உபசாரஸீமாய கம்மவாசாய அப⁴ணிதப்³ப³பா⁴வோ விஞ்ஞாயதி. அந்தோஉபசாரஸீமாய ப³த்³த⁴ஸீமாய ஸதி தம் ப³த்³த⁴ஸீமம் அவத்த²ரித்வாபி உபசாரஸீமாய க³மனதோ ஸா ப³த்³த⁴ஸீமா கம்மவாசாப⁴ணனாரஹா ச ஹோதி கதி²னத்தா²ராரஹா சாதி வேதி³தப்³ப³ம்.

நனு ச பன்னரஸவிதா⁴ ஸீமா அட்ட²கதா²ஸு (மஹாவ. அட்ட². 379; கங்கா². அட்ட². அகாலசீவரஸிக்கா²பத³வண்ணனா) ஆக³தா, அத² கஸ்மா ச²ளேவ வுத்தாதி? ஸச்சம், தாஸு பன பன்னரஸஸு ஸீமாஸு உபசாரஸீமா ஸங்க⁴லாப⁴விப⁴ஜனாதி³ட்டா²னமேவ ஹோதி, லாப⁴ஸீமா தத்ருப்பாத³க³ஹணட்டா²னமேவ ஹோதீதி இமா த்³வே ஸீமாயோ ஸங்க⁴கம்மகரணட்டா²னம் ந ஹோந்தி, நிக³மஸீமா நக³ரஸீமா ஜனபத³ஸீமா ரட்ட²ஸீமா ரஜ்ஜஸீமா தீ³பஸீமா சக்கவாளஸீமாதி இமா பன ஸீமாயோ கா³மஸீமாய ஸமானக³திகா கா³மஸீமாயமேவ அந்தோக³தா⁴தி ந விஸும் வுத்தாதி த³ட்ட²ப்³ப³ம். ஏத்த² ச உபசாரஸீமாய ப³த்³த⁴ஸீமம் அவத்த²ரித்வா க³தபா⁴வோ கத²ம் ஜானிதப்³போ³தி? ‘‘உபசாரஸீமா பரிக்கி²த்தஸ்ஸ விஹாரஸ்ஸ பரிக்கே²பேன, அபரிக்கி²த்தஸ்ஸ பரிக்கே²பாரஹட்டா²னேன பரிச்சி²ன்னா’’தி அட்ட²கதா²யம் (மஹாவ. அட்ட². 379) வுத்தத்தா பரிக்கே²பபரிக்கே²பாரஹட்டா²னானம் அந்தோ ப³த்³த⁴ஸீமாய விஜ்ஜமானாய தம் அவத்த²ரித்வா உபசாரஸீமா க³தா. ததா² ஹி ‘‘இமிஸ்ஸா உபசாரஸீமாய ‘ஸங்க⁴ஸ்ஸ த³ம்மீ’தி தி³ன்னம் பன க²ண்ட³ஸீமஸீமந்தரிகாஸு டி²தானம்பி பாபுணாதீ’’தி (மஹாவ. அட்ட². 379) வுத்தம். தேன ஞாயதி ‘‘உபசாரஸீமாய அந்தோ டி²தா ப³த்³த⁴ஸீமா உபசாரஸீமாபி நாம ஹோதீ’’தி. ஹோது, ஏவம் ஸதி அந்தோஉபசாரஸீமாயம் ப³த்³த⁴ஸீமாய ஸதி தத்தே²வ கதி²னதா³னகம்மவாசம் வாசாபேத்வா தத்தே²வ கதி²னம் அத்த²ரிதப்³ப³ம் ப⁴வேய்ய, அந்தோஉபசாரஸீமாயம் ப³த்³த⁴ஸீமாய அவிஜ்ஜமானாய கத²ம் கரிஸ்ஸந்தீதி? அந்தோஉபசாரஸீமாயம் ப³த்³த⁴ஸீமாய அவிஜ்ஜமானாய ப³ஹிஉபசாரஸீமாயம் விஜ்ஜமானப³த்³த⁴ஸீமம் வா உத³குக்கே²பலப⁴னட்டா²னம் வா க³ந்த்வா கம்மவாசம் வாசாபேத்வா புன விஹாரம் ஆக³ந்த்வா வஸ்ஸூபனாயிககே²த்தபூ⁴தாய உபசாரஸீமாயம் ட²த்வா கதி²னம் அத்த²ரிதப்³ப³ந்தி த³ட்ட²ப்³ப³ம்.

நனு ச போ⁴ ஏவம் ஸந்தே அஞ்ஞிஸ்ஸா ஸீமாய ஞத்தி, அஞ்ஞிஸ்ஸா அத்தா²ரோ ஹோதி, ஏவம் ஸந்தே ‘‘பரினிட்டி²தபுப்³ப³கரணமேவ சே தா³யகோ ஸங்க⁴ஸ்ஸ தே³தி, ஸம்படிச்சி²த்வா கம்மவாசாய தா³தப்³ப³ம். தேன ச தஸ்மிம்யேவ ஸீமமண்ட³லே அதி⁴ட்ட²ஹித்வா அத்த²ரித்வா ஸங்கோ⁴ அனுமோதா³பேதப்³போ³’’தி வுத்தேன வஜிரபு³த்³தி⁴டீகாவசனேன (வஜிர. டீ. மஹாவக்³க³ 308) விருஜ்ஜ²தீதி? நனு அவோசும்ஹ ‘‘கம்மவாசாப⁴ணனஸீமா ப³த்³த⁴ஸீமாபூ⁴தா, கதி²னத்தா²ரஸீமா உபசாரஸீமாபூ⁴தா’’தி. தஸ்மா வஜிரபு³த்³தி⁴டீகாவசனேன ந விருஜ்ஜ²தி. தத்த² புப்³பே³ யேபு⁴ய்யேன ப³த்³த⁴ஸீமவிஹாரத்தா ஸமக்³க³ம் ஸங்க⁴ம் ஸன்னிபாதேத்வா கம்மவாசம் வாசாபேத்வா உபசாரஸீமப³த்³த⁴ஸீமபூ⁴தே தஸ்மிம்யேவ விஹாரே அத்த²ரணம் ஸந்தா⁴ய வுத்தம். ப³த்³த⁴ஸீமவிஹாரே அஹோந்தேபி அந்தோஉபசாரஸீமாயம் ப³த்³த⁴ஸீமாய விஜ்ஜமானாய தத்தே²வ ஸீமமண்ட³லே கம்மவாசம் வாசாபேத்வா தத்தே²வ அத்த²ரிதப்³ப³பா⁴வோ அம்ஹேஹிபி வுத்தோயேவ. யதி³ பன ந சேவ ப³த்³த⁴ஸீமவிஹாரோ ஹோதி, ந ச அந்தோஉபசாரஸீமாயம் ப³த்³த⁴ஸீமா அத்தி², ஏவரூபே விஹாரே கம்மவாசம் வாசாபேதும் ந லப⁴தி, அஞ்ஞம் ப³த்³த⁴ஸீமம் வா உத³குக்கே²பம் வா க³ந்த்வா கம்மவாசம் வாசாபேத்வா அத்தனோ விஹாரம் ஆக³ந்த்வா வஸ்ஸூபனாயிககே²த்தபூ⁴தாய உபசாரஸீமாய ட²த்வா கதி²னம் அத்த²ரிதப்³ப³ம். ஏவமேவ பரம்பரபூ⁴தா ப³ஹவோ ஆசரியவரா கரோந்தீதி த³ட்ட²ப்³ப³ம்.

அபரே பன ஆசரியா ‘‘ப³த்³த⁴ஸீமவிரஹாய ஸுத்³த⁴உபசாரஸீமாய ஸதி தஸ்ஸம்யேவ உபசாரஸீமாயம் ஞத்திகம்மவாசாபி வாசேதப்³பா³, கதி²னம் அத்த²ரிதப்³ப³ம், ந அஞ்ஞிஸ்ஸா ஸீமாய ஞத்தி, அஞ்ஞிஸ்ஸா அத்த²ரணம் காதப்³ப³’’ந்தி வத³ந்தி. அயம் பன நேஸமதி⁴ப்பாயோ – ‘‘கதி²னத்த²தஸீமாயந்தி உபசாரஸீமம் ஸந்தா⁴ய வுத்த’’ந்தி வஜிரபு³த்³தி⁴டீகாயம் (வஜிர. டீ. மஹாவக்³க³ 306) கதி²னத்தா²ரட்டா²னபூ⁴தாய ஸீமாய உபசாரஸீமாபா⁴வோ வுத்தோ, தஸ்ஸம்யேவ டீகாயம் (வஜிர. டீ. மஹாவக்³க³ 308) புப்³பே³ நித்³தி³ட்ட²பாடே² ‘‘தஸ்மிம்யேவ ஸீமமண்ட³லே அதி⁴ட்ட²ஹித்வா அத்த²ரித்வா ஸங்கோ⁴ அனுமோதா³பேதப்³போ³’’தி கம்மவாசாப⁴ணனஸீமாயமேவ அத்த²ரிதப்³ப³பா⁴வோ ச வுத்தோ, தஸ்மா அஞ்ஞிஸ்ஸா ஸீமாய ஞத்தி, அஞ்ஞிஸ்ஸா அத்த²ரணம் ந காதப்³ப³ம், தஸ்ஸம்யேவ உபசாரஸீமாயம் கம்மவாசம் ஸாவேத்வா தஸ்மிம்யேவ அத்தா²ரோ காதப்³போ³, உபசாரஸீமதோ ப³ஹி டி²தம் ப³த்³த⁴ஸீமம் க³ந்த்வா அத்த²ரணகிச்சம் நத்தீ²தி.

தத்ரேவம் விசாரணா காதப்³பா³ – இத³ம் பா⁴ஸந்தரேஸு ‘‘ஞத்தீ’’தி கதி²தம் கதி²னதா³னகம்மம் சதூஸு ஸங்க⁴கம்மேஸு ஞத்திது³தியகம்மம் ஹோதி, ஞத்திது³தியகம்மஸ்ஸ நவஸு டா²னேஸு கதி²னதா³னம், க³ருகலஹுகேஸு க³ருகம், யதி³ ‘‘உபசாரஸீமாயம் சத்தாரி ஸங்க⁴கம்மானி காதப்³பா³னீ’’தி பகரணேஸு ஆக³தம் அப⁴விஸ்ஸா, ஏவம் ஸந்தே தேஸம் ஆசரியானம் வசனானுரூபதோ உபசாரஸீமாயம் கதி²னதா³னஞத்திகம்மவாசம் வாசேதப்³ப³ம் அப⁴விஸ்ஸா, ந பன பகரணேஸு ‘‘உபசாரஸீமாயம் சத்தாரி ஸங்க⁴கம்மானி காதப்³பா³னீ’’தி ஆக³தம், அத² கோ² ‘‘ஸங்க⁴லாப⁴விப⁴ஜனம், ஆக³ந்துகவத்தம் கத்வா ஆராமப்பவிஸனம், க³மிகஸ்ஸ பி⁴க்கு²னோ ஸேனாஸனஆபுச்ச²னம், நிஸ்ஸயபஅப்பஸ்ஸம்ப⁴னம், பாரிவாஸிகமானத்தசாரிகபி⁴க்கூ²னம் அருணுட்டா²பனம், பி⁴க்கு²னீனம் ஆராமப்பவிஸனஆபுச்ச²னம் இச்சேவமாதீ³னி ஏவ உபசாரஸீமாய கத்தப்³பா³னீ’’தி ஆக³தம், தஸ்மா கதி²னதா³னஞத்திது³தியகம்மவாசா கேவலாயம் உபசாரஸீமாயம் ந வாசேதப்³பா³தி ஸித்³தா⁴. கத²ம் விஞ்ஞாயதீதி சே? ‘‘அவிப்பவாஸஸீமா நாம தியோஜனாபி ஹோதி, ஏவம் ஸந்தே தியோஜனே டி²தா லாப⁴ம் க³ண்ஹிஸ்ஸந்தி, தியோஜனே ட²த்வா ஆக³ந்துகவத்தம் பூரேத்வா ஆராமம் பவிஸிதப்³ப³ம் ப⁴விஸ்ஸதி, க³மிகோ தியோஜனம் க³ந்த்வா ஸேனாஸனம் ஆபுச்சி²ஸ்ஸதி, நிஸ்ஸயபடிபன்னஸ்ஸ பி⁴க்கு²னோ தியோஜனாதிக்கமே நிஸ்ஸயோ படிப்பஸ்ஸம்பி⁴ஸ்ஸதி, பாரிவாஸிகேன தியோஜனம் அதிக்கமித்வா அருணம் உட்ட²பேதப்³ப³ம் ப⁴விஸ்ஸதி, பி⁴க்கு²னியா தியோஜனே ட²த்வா ஆராமப்பவிஸனம் ஆபுச்சி²தப்³ப³ம் ப⁴விஸ்ஸதி, ஸப்³ப³ம்பேதம் உபசாரஸீமாய பரிச்சே²த³வஸேனேவ காதும் வட்டதி, தஸ்மா உபசாரஸீமாயமேவ பா⁴ஜேதப்³ப³’’ந்தி ஏவமாதி³அட்ட²கதா²பாட²தோ (மஹாவ. அட்ட². 379) விஞ்ஞாயதீதி.

அதே²வம் வதே³ய்யும் – ‘‘உபசாரஸீமா ஞத்திது³தியகம்மவாசாய டா²னம் ந ஹோதீ’’தி தும்ஹேஹி வுத்தம், அத² ச பன கதபுப்³ப³ம் அத்தி². ததா² ஹி சீவரபடிக்³கா³ஹகஸம்முதிசீவரனித³ஹகஸம்முதிசீவரபா⁴ஜகஸம்முதீனம் ‘‘ஸுணாது மே…பே… தா⁴ரயாமீதி இமாய கம்மவாசாய வா அபலோகனேன வா அந்தோவிஹாரே ஸப்³ப³ஸங்க⁴மஜ்ஜே²பி க²ண்ட³ஸீமாயபி ஸம்மன்னிதும் வட்டதியேவா’’தி உபசாரஸீமாயம் ஞத்திது³தியகம்மவாசாய நிப்பா²தே³தப்³ப³பா⁴வோ அட்ட²கதா²யம் (வி. ஸங்க³. அட்ட². 194) ஆக³தோ. ப⁴ண்டா³கா³ரஸ்ஸ பன ‘‘இமம் பன ப⁴ண்டா³கா³ரம் க²ண்ட³ஸீமம் க³ந்த்வா க²ண்ட³ஸீமாய நிஸின்னேஹி ஸம்மன்னிதும் ந வட்டதி, விஹாரமஜ்ஜே²யேவ ‘ஸுணாது மே, ப⁴ந்தே, ஸங்கோ⁴, யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் விஹாரம் ப⁴ண்டா³கா³ரம் ஸம்மன்னேய்யா’திஆதி³னா நயேன கம்மவாசாய வா அபலோகனேன வா ஸம்மன்னிதப்³ப³’’ந்தி அட்ட²கதா²யம் (வி. ஸங்க³. அட்ட². 197) உபசாரஸீமாயமேவ ஞத்திது³தியகம்மவாசாய ஸம்மன்னிதப்³ப³பா⁴வோ ஆக³தோதி.

தே ஏவம் வத்தப்³பா³ – ஸசேபி அட்ட²கதா²யம் ஆக³தம் ‘‘அந்தோவிஹாரே’’தி பாடோ² ‘‘விஹாரமஜ்ஜே²’’தி பாடோ² ச உபசாரஸீமம் ஸந்தா⁴ய வுத்தோதி மஞ்ஞமானா தும்ஹே ஆயஸ்மந்தோ ஏவம் அவசுத்த², தே பன பாடா² உபசாரஸீமம் ஸந்தா⁴ய அட்ட²கதா²சரியேஹி ந வுத்தா, அத² கோ² அவிப்பவாஸஸீமாஸங்கா²தம் மஹாஸீமம் ஸந்தா⁴ய வுத்தா. கத²ம் விஞ்ஞாயதீதி சே? க²ண்ட³ஸீமாய வக்க²மானத்தா. க²ண்ட³ஸீமாய ஹி மஹாஸீமா ஏவ படியோகீ³ ஹோதி. உபசாரஸீமாதி அயமத்தோ² கத²ம் ஜானிதப்³போ³தி சே? ‘‘இமம் பன ஸமானஸம்வாஸகஸீமம் ஸம்மன்னந்தேஹி பப்³ப³ஜ்ஜூபஸம்பதா³தீ³னம் ஸங்க⁴கம்மானம் ஸுக²கரணத்த²ம் பட²மம் க²ண்ட³ஸீமா ஸம்மன்னிதப்³பா³…பே… ஏவம் ப³த்³தா⁴ஸு பன ஸீமாஸு க²ண்ட³ஸீமாய டி²தா பி⁴க்கூ² மஹாஸீமாய கம்மம் கரோந்தானம் ந கோபேந்தி, மஹாஸீமாய வா டி²தா க²ண்ட³ஸீமாய கம்மம் கரோந்தானம். ஸீமந்தரிகாய பன டி²தா உபி⁴ன்னம்பி ந கோபேந்தீ’’தி வுத்தஅட்ட²கதா²பாட²வஸேன (மஹாவ. அட்ட². 138) ஜானிதப்³போ³தி. அத² வா தேஹி ஆயஸ்மந்தேஹி ஆப⁴தப⁴ண்டா³கா³ரஸம்முதிபாட²வஸேனபி அயமத்தோ² விஞ்ஞாயதி. கத²ம்? சீவரபடிக்³கா³ஹகாதி³புக்³க³லஸம்முதியோ பன அந்தோவிஹாரே ஸப்³ப³ஸங்க⁴மஜ்ஜே²பி க²ண்ட³ஸீமாயம்பி ஸம்மன்னிதும் வட்டதி, ப⁴ண்டா³கா³ரஸங்கா²தவிஹாரஸம்முதி பன விஹாரமஜ்ஜே²யேவாதி அட்ட²கதா²யம் வுத்தம், தத்த² விஸேஸகாரணம் பரியேஸிதப்³ப³ம்.

தத்ரேவம் விஸேஸகாரணம் பஞ்ஞாயதி – ‘‘அஞ்ஞிஸ்ஸா ஸீமாய வத்து² அஞ்ஞிஸ்ஸா கம்மவாசா’’தி வத்தப்³ப³தோ³ஸபரிஹாரத்த²ம் வுத்தம். புக்³க³லஸம்முதியோ ஹி புக்³க³லஸ்ஸ வத்து²த்தா யதி³ மஹாஸீமபூ⁴தே அந்தோவிஹாரே கத்துகாமா ஹோந்தி, ஸப்³ப³ஸங்க⁴மஜ்ஜே² தம் வத்து²பூ⁴தம் புக்³க³லம் ஹத்த²பாஸே கத்வா கரேய்யும். யதி³ க²ண்ட³ஸீமாய கத்துகாமா, தம் வத்து²பூ⁴தம் புக்³க³லம் க²ண்ட³ஸீமம் ஆனேத்வா தத்த² ஸன்னிபதிதகம்மப்பத்தஸங்க⁴ஸ்ஸ ஹத்த²பாஸே கத்வா கரேய்யும். உப⁴யதா²பி யதா²வுத்ததோ³ஸோ நத்தி², ப⁴ண்டா³கா³ரஸம்முதி பன ப⁴ண்டா³கா³ரஸ்ஸ விஹாரத்தா க²ண்ட³ஸீமம் ஆனேதும் ந ஸக்கா, தஸ்மா யதி³ தம் ஸம்முதிம் க²ண்ட³ஸீமாயம் ட²த்வா கரேய்யும், வத்து² மஹாஸீமாயம் ஹோதி, கம்மவாசா க²ண்ட³ஸீமாயந்தி யதா²வுத்ததோ³ஸோ ஹோதி, தஸ்மிஞ்ச தோ³ஸே ஸதி வத்து²விபன்னத்தா கம்மம் விபஜ்ஜதி, தஸ்மா மஹாஸீமபூ⁴தவிஹாரமஜ்ஜே²யேவ ஸா ஸம்முதி காதப்³பா³தி அட்ட²கதா²சரியானம் மதி, ந உபசாரஸீமாய ஞத்திது³தியகம்மம் காதப்³ப³ந்தி.

அதா²பி ஏவம் வதே³ய்யும் ‘‘விஹாரஸத்³தே³ன அவிப்பவாஸஸீமபூ⁴தா மஹாஸீமாவ வுத்தா, ந உபசாரஸீமா’’தி இத³ம் வசனம் கத²ம் பச்சேதப்³ப³ந்தி? இமினாயேவ அட்ட²கதா²வசனேன. யதி³ ஹி உபசாரஸீமா வுத்தா ப⁴வேய்ய, உபசாரஸீமா நாம ப³த்³த⁴ஸீமம் அவத்த²ரித்வாபி பவத்தா ஆவாஸேஸு வா பி⁴க்கூ²ஸு வா வட்³ட⁴ந்தேஸு அனியமவஸேன வட்³ட⁴தி, தஸ்மா க²ண்ட³ஸீமம் அவத்த²ரித்வா பவத்தனதோ விஹாரேன ஸஹ க²ண்ட³ஸீமா ஏகஸீமாயேவ ஹோதி, ஏவம் ஸதி விஹாரே டி²தம் ப⁴ண்டா³கா³ரம் க²ண்ட³ஸீமாய ட²த்வா ஸம்மன்னிதும் ஸக்கா ப⁴வேய்ய, ந பன ஸக்கா ‘‘க²ண்ட³ஸீமாய நிஸின்னேஹி ஸம்மன்னிதும் ந வட்டதீ’’தி அட்ட²கதா²யம் (மஹாவ. அட்ட². 343) படிஸித்³த⁴த்தா. தேன ஞாயதி ‘‘இமஸ்மிம் டா²னே விஹாரஸத்³தே³ன அவிப்பவாஸஸீமபூ⁴தா மஹாஸீமா வுத்தா, ந உபசாரஸீமா’’தி. உபசாரஸீமாய அனியமவஸேன வட்³ட⁴னபா⁴வோ கத²ம் ஜானிதப்³போ³தி? ‘‘உபசாரஸீமா பரிக்கி²த்தஸ்ஸ விஹாரஸ்ஸ பரிக்கே²பேன, அபரிக்கி²த்தஸ்ஸ பரிக்கே²பாரஹட்டா²னேன பரிச்சி²ன்னா ஹோதி. அபிச பி⁴க்கூ²னம் து⁴வஸன்னிபாதட்டா²னதோ வா பரியந்தே டி²தபோ⁴ஜனஸாலதோ வா நிப³த்³த⁴வஸனகஆவாஸதோ வா தா²மமஜ்ஜி²மஸ்ஸ புரிஸஸ்ஸ த்³வின்னம் லேட்³டு³பாதானம் அந்தோ உபசாரஸீமா வேதி³தப்³பா³, ஸா பன ஆவாஸேஸு வட்³ட⁴ந்தேஸு வட்³ட⁴தி, பரிஹாயந்தேஸு பரிஹாயதி. மஹாபச்சரியம் பன ‘பி⁴க்கூ²ஸுபி வட்³ட⁴ந்தேஸு வட்³ட⁴தீ’தி வுத்தம், தஸ்மா ஸசே விஹாரே ஸன்னிபதிதபி⁴க்கூ²ஹி ஸத்³தி⁴ம் ஏகாப³த்³தா⁴ ஹுத்வா யோஜனஸதம்பி பூரேத்வா நிஸீத³ந்தி, யோஜனஸதம்பி உபசாரஸீமாவ ஹோதி, ஸப்³பே³ஸம் லாபோ⁴ பாபுணாதீ’’தி அட்ட²கதா²யம் (மஹாவ. அட்ட². 379) வசனதோதி.

யதி³ ஏவம் உபசாரஸீமாய கதி²னத்த²தபா⁴வோ கஸ்மா வுத்தோதி? கதி²னத்த²ரணம் நாம ந ஸங்க⁴கம்மம், புக்³க³லகம்மமேவ ஹோதி, தஸ்மா வஸ்ஸூபனாயிககே²த்தபூ⁴தாய உபசாரஸீமாய காதப்³பா³ ஹோதி. ஞத்திகம்மவாசா பன ஸங்க⁴கம்மபூ⁴தா, தஸ்மா உபசாரஸீமாய காதும் ந வட்டதி, ஸுவிஸோதி⁴தபரிஸாய ப³த்³தா⁴ப³த்³த⁴ஸீமாயமேவ வட்டதீதி த³ட்ட²ப்³ப³ம். நனு ச போ⁴ ‘‘கதி²னம் அத்த²ரிதும் கே லப⁴ந்தி, கே ந லப⁴ந்தி? க³ணனவஸேன தாவ பச்சி²மகோடியா பஞ்ச ஜனா லப⁴ந்தி, உத்³த⁴ம் ஸதஸஹஸ்ஸம்பி, பஞ்சன்னம் ஹேட்டா² ந லப⁴ந்தீ’’தி அட்ட²கதா²யம் வுத்தம், அத² கஸ்மா ‘‘கதி²னத்த²ரணம் நாம ந ஸங்க⁴கம்மம், புக்³க³லகம்மமேவ ஹோதீ’’தி வுத்தந்தி? ‘‘ந ஸங்கோ⁴ கதி²னம் அத்த²ரதி, ந க³ணோ கதி²னம் அத்த²ரதி, புக்³க³லோ கதி²னம் அத்த²ரதீ’’தி பரிவாரே (பரி. 414) வுத்தத்தா ச அபலோகனகம்மாதீ³னம் சதுன்னம் ஸங்க⁴கம்மானம் டா²னேஸு அபவிட்ட²த்தா ச. அட்ட²கதா²யம் பன கதி²னத்தா²ரஸ்ஸ உபசாரபூ⁴தம் கதி²னதா³னகம்மவாசாப⁴ணனகாலம் ஸந்தா⁴ய வுத்தம். தஸ்மிஞ்ஹி காலே கதி²னதா³யகா சத்தாரோ, படிக்³கா³ஹகோ ஏகோதி பச்சி²மகோடியா பஞ்ச ஹோந்தி, ததோ ஹேட்டா² ந லப⁴தீதி. ஞத்திகம்மவாசாய ஸங்க⁴கம்மபா⁴வோ கத²ம் ஜானிதப்³போ³தி? ‘‘சதுன்னம் ஸங்க⁴கம்மானம் ஞத்திது³தியகம்மஸ்ஸ நவஸு டா²னேஸு கதி²னதா³ன’’ந்தி ஆக³தத்தா, ‘‘ஸுணாது மே, ப⁴ந்தே, ஸங்கோ⁴, இத³ம் ஸங்க⁴ஸ்ஸ கதி²னது³ஸ்ஸம் உப்பன்ன’’ந்திஆதி³னா வுத்தத்தா சாதி.

அபரே பன ஆசரியா ‘‘பா⁴ஸந்தரேஸு ஞத்தீதி வுத்தா கதி²னதா³னகம்மவாசா அத்தா²ரகிரியாய பவிஸதி, அத்தா²ரகிரியா ச உபசாரஸீமாயம் காதப்³பா³, தஸ்மா கதி²னதா³னகம்மவாசாபி உபசாரஸீமாயம் காதப்³பா³யேவா’’தி வத³ந்தி, தேஸம் அயமதி⁴ப்பாயோ – மஹாவக்³க³பாளியம் (மஹாவ. 306) ‘‘ஏவஞ்ச பன, பி⁴க்க²வே, கதி²னம் அத்த²ரிதப்³ப³’’ந்தி ஆரபி⁴த்வா ‘‘ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³…பே… ஏவம் கோ², பி⁴க்க²வே, அத்த²தம் ஹோதி கதி²ன’’ந்தி கதி²னதா³னஞத்திகம்மவாசாதோ பட்டா²ய யாவ அனுமோத³னா பாடோ² ஆக³தோ, பரிவாரபாளியஞ்ச (பரி. 412) ‘‘கதி²னத்தா²ரோ ஜானிதப்³போ³’’தி உத்³தே³ஸஸ்ஸ நித்³தே³ஸே ‘‘ஸசே ஸங்க⁴ஸ்ஸ கதி²னது³ஸ்ஸம் உப்பன்னம் ஹோதி, ஸங்கே⁴ன கத²ம் படிபஜ்ஜிதப்³ப³ம், அத்தா²ரகேன கத²ம் படிபஜ்ஜிதப்³ப³ம், அனுமோத³கேன கத²ம் படிபஜ்ஜிதப்³ப³’’ந்தி புச்ச²ம் நீஹரித்வா ‘‘ஸங்கே⁴ன ஞத்திது³தியேன கம்மேன கதி²னத்தா²ரகஸ்ஸ பி⁴க்கு²னோ தா³தப்³ப³ம்…பே… அனுமோதா³மா’’தி ஞத்திதோ பட்டா²ய யாவ அனுமோத³னா பாடோ² ஆக³தோ, தஸ்மா ஞத்திதோ பட்டா²ய யாவ அனுமோத³னா ஸப்³போ³ விதி⁴ கதி²னத்தா²ரகிரியாயம் பவிஸதி, ததோ கதி²னத்தா²ரகிரியாய உபசாரஸீமாயம் கத்தப்³பா³ய ஸதி ஞத்திஸங்கா²தகதி²னதா³னகம்மவாசாபி உபசாரஸீமாயம் கத்தப்³பா³யேவாதி.

தத்ரேவம் விசாரணா காதப்³பா³ – அத்தா²ரகிரியாய விஸும் அனாக³தாய ஸதி ‘‘ஸப்³போ³ விதி⁴ அத்தா²ரகிரியாயம் பவிஸதீ’’தி வத்தப்³ப³ம் ப⁴வேய்ய, அத² ச பன மஹாவக்³க³பாளியஞ்ச பரிவாரபாளியஞ்ச அத்தா²ரகிரியா விஸும் ஆக³தாயேவ, தஸ்மா ஞத்திஸங்கா²தா கதி²னதா³னகம்மவாசா அத்தா²ரகிரியாயம் ந பவிஸதி, கேவலம் அத்தா²ரகிரியாய உபசாரபூ⁴தத்தா பன ததோ பட்டா²ய அனுக்கமேன வுத்தம். யதா² ‘‘அனுஜானாமி, பி⁴க்க²வே, ஸீமம் ஸம்மன்னிது’’ந்தி ஸீமாஸம்முதிம் அனுஜானித்வா ‘‘ஏவஞ்ச பன, பி⁴க்க²வே, ஸம்மன்னிதப்³பா³’’தி ஸீமாஸம்முதிவிதி⁴ம் த³ஸ்ஸேந்தோ ‘‘பட²மம் நிமித்தா கித்தேதப்³பா³…பே… ஏவமேதம் தா⁴ரயாமீ’’தி நிமித்தகித்தனேன ஸஹ ஸீமாஸம்முதிகம்மவாசா தே³ஸிதா, தத்த² நிமித்தகித்தனம் ஸீமாஸம்முதிகம்மம் ந ஹோதி, கம்மவாசாயேவ ஸீமாஸம்முதிகம்மம் ஹோதி, ததா²பி ஸீமாஸம்முதிகம்மவாசாய உபசாரபா⁴வதோ ஸஹ நிமித்தகித்தனேன ஸீமாஸம்முதிகம்மவாசா தே³ஸிதா. யதா² ச உபஸம்பதா³கம்மவிதி⁴ம் தே³ஸேந்தோ ‘‘பட²மம் உபஜ்ஜ²ம் கா³ஹாபேதப்³போ³…பே… ஏவமேதம் தா⁴ரயாமீ’’தி உபஜ்ஜா²யகா³ஹாபனாதி³னா ஸஹ உபஸம்பதா³கம்மம் தே³ஸிதம், தத்த² உபஜ்ஜா²யகா³ஹாபனாதி³ உபஸம்பதா³கம்மம் ந ஹோதி, ஞத்திசதுத்த²கம்மவாசாயேவ உபஸம்பதா³கம்மம் ஹோதி, ததா²பி உபஸம்பதா³கம்மஸ்ஸ ஸமீபே பூ⁴தத்தா உபஜ்ஜா²யகா³ஹாபனாதி³னா ஸஹ ஞத்திசதுத்த²கம்மவாசா தே³ஸிதா, ஏவமேத்த² கதி²னதா³னகம்மவாசா அத்தா²ரகிரியா ந ஹோதி, ததா²பி அத்தா²ரகிரியாய உபசாரபூ⁴தத்தா கதி²னதா³னஞத்திது³தியகம்மவாசாய ஸஹ கதி²னத்தா²ரகிரியா தே³ஸிதா, தஸ்மா கதி²னதா³னகம்மவாசா அத்தா²ரகிரியாயம் ந பவிஸதீதி த³ட்ட²ப்³ப³ம்.

அத² வா ஞத்திது³தியகம்மவாசா ச அத்தா²ரோ சாதி இமே த்³வே த⁴ம்மா அதுல்யகிரியா அதுல்யகத்தாரோ அதுல்யகம்மா அதுல்யகாலா ச ஹோந்தி, தேன விஞ்ஞாயதி ‘‘பா⁴ஸந்தரேஸு ஞத்தீதி வுத்தா ஞத்திது³தியகம்மவாசா அத்தா²ரகிரியாயம் ந பவிஸதீ’’தி. தத்த² கத²ம் அதுல்யகிரியா ஹோந்தி? கம்மவாசா தா³னகிரியா ஹோதி, அத்தா²ரோ பன்னரஸத⁴ம்மானம் காரணபூ⁴தா அத்தா²ரகிரியா, ஏவம் அதுல்யகிரியா. கத²ம் அதுல்யகத்தாரோதி? கம்மவாசாய கத்தா ஸங்கோ⁴ ஹோதி, அத்தா²ரஸ்ஸ கத்தா புக்³க³லோ, ஏவம் அதுல்யகத்தாரோ ஹோந்தி. கத²ம் அதுல்யகம்மா ஹோந்தி? கம்மவாசாய கம்மம் கதி²னது³ஸ்ஸம் ஹோதி, அத்தா²ரஸ்ஸ கம்மம் கதி²னஸங்கா²தா ஸமூஹபஞ்ஞத்தி, ஏவம் அதுல்யகம்மா ஹோந்தி. கத²ம் அதுல்யகாலா ஹோந்தி? கதி²னதா³னகம்மவாசா புப்³ப³கரணபச்சுத்³தா⁴ரஅதி⁴ட்டா²னானம் புப்³பே³ ஹோதி, அத்தா²ரோ தேஸம் பச்சா², ஏவம் அதுல்யகாலா ஹோந்தீதி. அத² வா அத்தா²ரோ ‘‘இமாய ஸங்கா⁴டியா கதி²னம் அத்த²ராமீ’’திஆதி³னா வசீபே⁴த³ஸங்கா²தேன ஏகேன த⁴ம்மேன ஸங்க³ஹிதோ, ந ஞத்திஅனுஸ்ஸாவனாதி³னா அனேகேஹி த⁴ம்மேஹி ஸங்க³ஹிதோ. வுத்தஞ்ஹேதம் பரிவாரே (பரி. 408) ‘‘அத்தா²ரோ ஏகேன த⁴ம்மேன ஸங்க³ஹிதோ வசீபே⁴தே³னா’’தி. இமினாபி காரணேன ஜானிதப்³ப³ம் ‘‘ந ஞத்தி அத்தா²ரே பவிட்டா²’’தி.

அஞ்ஞே பன ஆசரியா ஏவம் வத³ந்தி – ‘‘கதி²னத்தா²ரம் கே லப⁴ந்தி, கே ந லப⁴ந்தீதி? க³ணனவஸேன தாவ பச்சி²மகோடியா பஞ்ச ஜனா லப⁴ந்தி, உத்³த⁴ம் ஸதஸஹஸ்ஸம்பி, பஞ்சன்னம் ஹேட்டா² ந லப⁴ந்தீ’’தி அட்ட²கதா²யம் (மஹாவ. அட்ட². 306) ஆக³தத்தா ‘‘ஹேட்டி²மந்ததோ பஞ்ச பி⁴க்கூ² கதி²னத்தா²ரம் லப⁴ந்தி, ததோ அப்பகதரா ந லப⁴ந்தீ’’தி விஞ்ஞாயதி. ‘‘பஞ்சன்னம் ஜனானம் வட்டதீதி பச்சி²மகோடியா சத்தாரோ கதி²னது³ஸ்ஸஸ்ஸ தா³யகா, ஏகோ படிக்³கா³ஹகோதி பஞ்சன்னம் ஜனானம் வட்டதீ’’தி கங்கா²விதரணீடீகாயம் (கங்கா². அபி⁴. டீ. கதி²னஸிக்கா²பத³வண்ணனா) ஆக³தத்தா தஸ்மிம் வாக்யே ‘‘வட்டதீ’’தி கிரியாய கத்தா ‘‘ஸோ கதி²னத்தா²ரோ’’தி வுச்சதி, தஸ்மா அத்தா²ரோதி இமினா ‘‘இமாய ஸங்கா⁴டியா கதி²னம் அத்த²ராமீ’’தி வுத்தஅத்த²ரணகிரியா ந அதி⁴ப்பேதா, சதூஹி பி⁴க்கூ²ஹி அத்தா²ரகஸ்ஸ பி⁴க்கு²னோ ஞத்தியா தா³னம் அதி⁴ப்பேதந்தி விஞ்ஞாயதி. ‘‘கதி²னத்தா²ரம் கே லப⁴ந்தி…பே… உத்³த⁴ம் ஸதஸஹஸ்ஸந்தி இத³ம் அத்தா²ரகஸ்ஸ பி⁴க்கு²னோ ஸங்க⁴ஸ்ஸ கதி²னது³ஸ்ஸதா³னகம்மம் ஸந்தா⁴ய வுத்த’’ந்தி வினயவினிச்ச²யடீகாயம் வுத்தம். தஸ்மிம்பி பாடே² ஞத்தியா தி³ன்னம்யேவ ஸந்தா⁴ய ‘‘பஞ்ச ஜனா அத்தா²ரம் லப⁴ந்தீ’’தி இத³ம் வசனம் அட்ட²கதா²சரியேஹி வுத்தம், ‘‘இமாய ஸங்கா⁴டியா கதி²னம் அத்த²ராமீ’’திஆதி³ புக்³க³லஸ்ஸ அத்த²ரணம் ஸந்தா⁴ய ந வுத்தந்தி டீகாசரியஸ்ஸ அதி⁴ப்பாயோ. ஏவம் கங்கா²விதரணீடீகா-வினயவினிச்ச²யடீகாகாரகேஹி ஆசரியேஹி ‘‘ஞத்திது³தியகம்மம் அத்தா²ரோ நாமா’’தி வினிச்சி²தத்தா உபசாரஸீமாயம் கதி²னதா³னஞத்திகம்மவாசாகரணம் யுத்தந்தி விஞ்ஞாயதீதி வத³ந்தி.

தத்ரேவம் விசாரணா காதப்³பா³ – ‘‘ஞத்திது³தியகம்மம்யேவ அத்தா²ரோ நாமா’’தி டீகாசரியா ந வதே³ய்யும். வதே³ய்யும் சே, அட்ட²கதா²ய விருத்³தோ⁴ ஸியா. கத²ம் விருத்³தோ⁴தி சே? ‘‘சி²ன்னவஸ்ஸா வா பச்சி²மிகாய உபக³தா வா ந லப⁴ந்தி, அஞ்ஞஸ்மிம் விஹாரே வுத்த²வஸ்ஸாபி ந லப⁴ந்தீதி மஹாபச்சரியம் வுத்த’’ந்தி அட்ட²கதா²யம் (மஹாவ. அட்ட². 306) ஆக³தத்தா ‘‘தே சி²ன்னவஸ்ஸாத³யோ கதி²னத்தா²ரம் ந லப⁴ந்தீ’’தி விஞ்ஞாயதி. யதி³ ஞத்திது³தியகம்மம் அத்தா²ரோ நாம ஸியா, ஏவம் ஸதி தே பி⁴க்கூ² ஞத்திது³தியகம்மேபி க³ணபூரகபா⁴வேன அப்பவிட்டா² ஸியும். அத² ச பன ‘‘புரிமிகாய உபக³தானம் பன ஸப்³பே³ க³ணபூரகா ஹோந்தீ’’தி அட்ட²கதா²ய (மஹாவ. அட்ட². 306) வுத்தத்தா தே ஞத்திது³தியகம்மே பவிட்டா²வ ஹோந்தி, தஸ்மா அட்ட²கதா²சரியோ பஞ்சானிஸம்ஸஹேதுபூ⁴தம் ‘‘இமாய ஸங்கா⁴டியா கதி²னம் அத்த²ராமீ’’திஆதி³கம் வசீபே⁴த³ம்யேவ ‘‘அத்தா²ரோ’’தி வத³தி, ந ஞத்திது³தியகம்மம், தஸ்மா தே சி²ன்னவஸ்ஸாத³யோ பஞ்சானிஸம்ஸஹேதுபூ⁴தம் கதி²னத்தா²ரம் ந லப⁴ந்தி, ஞத்திது³தியகம்மே பன சதுவக்³க³ஸங்க⁴பூரகபா⁴வம் லப⁴ந்தீதி விஞ்ஞாயதி. புனபி வுத்தம் அட்ட²கதா²யம் ‘‘ஸசே புரிமிகாய உபக³தா சத்தாரோ வா ஹோந்தி தயோ வா த்³வே வா ஏகோ வா, இதரே க³ணபூரகே கத்வா கதி²னம் அத்த²ரிதப்³ப³’’ந்தி. ஏவம் அலப்³ப⁴மானகதி²னத்தா²ரேயேவ சி²ன்னவஸ்ஸாத³யோ க³ணபூரகே கத்வா ஞத்திது³தியகம்மவாசாய கதி²னது³ஸ்ஸம் தா³பேத்வா புரிமிகாய உபக³தேஹி கதி²னஸ்ஸ அத்த²ரிதப்³ப³பா⁴வதோ ‘‘ஞத்திது³தியகம்மம்யேவ அத்தா²ரோ நாமாதி டீகாசரியா ந வதே³ய்யு’’ந்தி அவசிம்ஹாதி.

நனு ச போ⁴ இமஸ்மிம்பி அட்ட²கதா²வசனே ‘‘இதரே க³ணபூரகே கத்வா கதி²னம் அத்த²ரிதப்³ப³’’ந்தி வசனேன சதுவக்³க³ஸங்கே⁴ன கத்தப்³ப³ம் ஞத்திது³தியகம்மம்யேவ ‘‘அத்தா²ரோ’’தி வுத்தந்தி? ந, புப்³பா³பரவிரோத⁴தோ. புப்³பே³ ஹி சி²ன்னவஸ்ஸாதீ³னம் கதி²னம் அத்த²ரிதும் அலப்³ப⁴மானபா⁴வோ வுத்தோ, இத⁴ ‘‘ஞத்திது³தியகம்மம் அத்தா²ரோ’’தி வுத்தே தேஸம்பி லப்³ப⁴மானபா⁴வோ வுத்தோ ப⁴வேய்ய, ந அட்ட²கதா²சரியா புப்³பா³பரவிருத்³த⁴ம் கதே²ய்யும், தஸ்மா ‘‘கத்வா’’தி பத³ம் ‘‘அத்த²ரிதப்³ப³’’ந்தி பதே³ன ஸம்ப³ஜ்ஜ²ந்தேன ஸமானகாலவிஸேஸனம் அகத்வா புப்³ப³காலவிஸேஸனமேவ கத்வா ஸம்ப³ந்தி⁴தப்³ப³ம், ஏவம் ஸதி புப்³ப³வசனேனாபரவசனம் க³ங்கோ³த³கேன யமுனோத³கம் விய ஸம்ஸந்த³தி, பச்சா²பி ச ‘‘கம்மவாசம் ஸாவேத்வா கதி²னம் அத்த²ராபேத்வா தா³னஞ்ச பு⁴ஞ்ஜித்வா க³மிஸ்ஸந்தீ’’தி விஸும் கம்மவாசாஸாவனம் விஸும் கதி²னத்த²ரணம் புப்³பா³பரானுக்கமதோ வுத்தம், தஸ்மா ஞத்திது³தியகம்மம் அத்தா²ரோ நாம ந ஹோதி, கேவலம் அத்தா²ரஸ்ஸ காரணமேவ உபசாரமேவ ஹோதீதி த³ட்ட²ப்³ப³ம். கிஞ்ச பி⁴ய்யோ – ‘‘ந ஸங்கோ⁴ கதி²னம் அத்த²ரதி, ந க³ணோ கதி²னம் அத்த²ரதி, புக்³க³லோ கதி²னம் அத்த²ரதீ’’தி பரிவாரவசனேன (பரி. 414) அயமத்தோ² ஜானிதப்³போ³தி.

யதி³ ஏவம் கங்கா²விதரணீடீகா-வினயவினிச்ச²யடீகாஸு ஆக³தபாடா²னம் அதி⁴ப்பாயோ கத²ம் பா⁴ஸிதப்³போ³ ப⁴வேய்ய. நனு கங்கா²விதரணீடீகாயம் ‘‘வட்டதீ’’தி இமிஸ்ஸா கிரியாய கத்தா ‘‘ஸோ கதி²னத்தா²ரோ’’தி வுத்தோ, வினயவினிச்ச²யடீகாயஞ்ச ‘‘கதி²னது³ஸ்ஸதா³னகம்ம’’ந்தி பத³ம் ‘‘ஸந்தா⁴யா’’தி கிரியாய கம்மம், கதி²னத்தா²ரோ…பே… இத³ம் ‘‘வுத்த’’ந்தி கிரியாய கம்மம் ஹோதி. ஏவம் டீகாஸு நீதத்த²தோ ஆக³தபாடே²ஸு ஸந்தேஸு ‘‘ஞத்திது³தியகம்மம்யேவ அத்தா²ரோ நாமாதி டீகாசரியா ந வதே³ய்யு’’ந்தி ந வத்தப்³ப³ந்தி? யேனாகாரேன அட்ட²கதா²வசனேன டீகாவசனஞ்ச புப்³பா³பரஅட்ட²கதா²வசனஞ்ச அவிருத்³த⁴ம் ப⁴வேய்ய, தேனாகாரேன டீகாபாடா²னம் அதி⁴ப்பாயோ க³ஹேதப்³போ³. கத²ம்? கங்கா²விதரணீஅட்ட²கதா²யம் (கங்கா². அட்ட². கதி²னஸிக்கா²பத³வண்ணனா) ‘‘ஸோ ஸப்³ப³ந்திமேன பரிச்சே²தே³ன பஞ்சன்னம் ஜனானம் வட்டதீ’’தி ஆக³தோ, தஸ்மிம் அட்ட²கதா²வசனே சோத³கேன சோதே³தப்³ப³ஸ்ஸ அத்தி²தாய தம் பரிஹரிதும் ‘‘பஞ்சன்னம் ஜனானம் வட்டதீதி பச்சி²மகோடியா சத்தாரோ கதி²னது³ஸ்ஸஸ்ஸ தா³யகா, ஏகோ படிக்³கா³ஹகோதி பஞ்சன்னம் ஜனானம் வட்டதீ’’தி பாடோ² டீகாசரியேன வுத்தோ, கத²ம் சோதே³தப்³ப³ம் அத்தீ²தி? போ⁴ அட்ட²கதா²சரிய ‘‘ஸோ ஸப்³ப³ந்திமேன பரிச்சே²தே³ன பஞ்சன்னம் ஜனானம் வட்டதீ’’தி வுத்தோ, ஏவம் ஸதி பஞ்சன்னம் கதி²னத்தா²ரகானம் ஏவ ஸோ கதி²னத்தா²ரோ வட்டதி, ந ஏகத்³விதிசதுபுக்³க³லானந்தி அத்தோ² ஆபஜ்ஜதி, ஏவம் ஸதி ‘‘ந ஸங்கோ⁴ கதி²னம் அத்த²ரதி, ந க³ணோ கதி²னம் அத்த²ரதி, புக்³க³லோ கதி²னம் அத்த²ரதீ’’தி ஆக³தபாளியா விருஜ்ஜ²னதோ ஆக³மவிரோதோ⁴ ஆபஜ்ஜதி, தம் சோத³னம் பரிஹரந்தோ ‘‘பஞ்சன்னம் ஜனானம் வட்டதீதி பச்சி²மகோடியா சத்தாரோ கதி²னது³ஸ்ஸஸ்ஸ தா³யகா, ஏகோ படிக்³கா³ஹகோதி பஞ்சன்னம் ஜனானம் வட்டதீ’’தி பாடோ² டீகாசரியேன வுத்தோ. தத்தா²யமதி⁴ப்பாயோ – போ⁴ சோத³காசரிய அட்ட²கதா²சரியேன கதி²னத்தா²ரகாலே பஞ்சன்னம் அத்தா²ரகானம் பி⁴க்கூ²னம் வஸேன ‘‘ஸோ ஸப்³ப³ந்திமேன பரிச்சே²தே³ன பஞ்சன்னம் ஜனானம் வட்டதீ’’தி பாடோ² ந வுத்தோ, அத² கோ² ஸங்கே⁴ன அத்தா²ரகஸ்ஸ கதி²னது³ஸ்ஸதா³னகாலே பச்சி²மகோடியா சத்தாரோ கதி²னது³ஸ்ஸஸ்ஸ தா³யகா, ஏகோ படிக்³கா³ஹகோதி பஞ்சன்னம் தா³யகபடிக்³கா³ஹகபுக்³க³லானம் அத்தி²தாய ஸோ பச்சா² கத்தப்³போ³ அத்தா²ரோ வட்டதி, காரணஸம்பத்தியா ப²லஸம்பத்தி ஹோதி, தஸ்மா தஸ்மிம் அட்ட²கதா²வசனே ஆக³மவிரோதோ⁴ நாபஜ்ஜதீதி.

வினயவினிச்ச²யடீகாயம்பி ‘‘கதி²னத்தா²ரம் கே லப⁴ந்தி, கே ந லப⁴ந்தீதி? க³ணனவஸேன தாவ பச்சி²மகோடியா பஞ்ச ஜனா லப⁴ந்தி, உத்³த⁴ம் ஸதஸஹஸ்ஸம்பி, பஞ்சன்னம் ஹேட்டா² ந லப⁴ந்தீ’’தி அட்ட²கதா²வசனே பரேஹி புச்சி²தப்³ப³ஸ்ஸ அத்தி²தாய தம் புச்ச²ம் விஸ்ஸஜ்ஜேதும் ‘‘இத³ம் அத்தா²ரகஸ்ஸ பி⁴க்கு²னோ ஸங்க⁴ஸ்ஸ கதி²னது³ஸ்ஸதா³னகம்மம் ஸந்தா⁴ய வுத்த’’ந்தி பாடோ² டீகாசரியேன வுத்தோ. கத²ம் புச்சி²தப்³ப³ந்தி சே? போ⁴ அட்ட²கதா²சரிய ‘‘ஹேட்டி²மகோடியா பஞ்சன்னம் ஜனானம் வட்டதீ’’தி இத³ம் வசனம் கிம் பஞ்சானிஸம்ஸஸ்ஸ காரணபூ⁴தம் ‘‘இமாய ஸங்கா⁴டியா கதி²னம் அத்த²ராமீ’’திஆதி³அத்தா²ரகிரியம் ஸந்தா⁴ய வுத்தம், உதா³ஹு அத்தா²ரஸ்ஸ காரணபூ⁴தம் கதி²னது³ஸ்ஸதா³னகம்மந்தி. கத²ம் விஸ்ஸஜ்ஜனாதி? போ⁴ ப⁴த்³ரமுக² ‘‘ஹேட்டி²மகோடியா பஞ்சன்னம் ஜனானம் வட்டதீ’’தி இத³ம் பஞ்சானிஸம்ஸஸ்ஸ காரணபூ⁴தம் ‘‘இமாய ஸங்கா⁴டியா கதி²னம் அத்த²ராமீ’’திஆதி³கம் அத்தா²ரகிரியம் ஸந்தா⁴ய அட்ட²கதா²சரியேன ந வுத்தம், அத² கோ² அத்தா²ரஸ்ஸ காரணபூ⁴தம் கதி²னதா³னகம்மம் ஸந்தா⁴ய வுத்தந்தி. தத்ராயமதி⁴ப்பாயோ – ஸங்கே⁴ன அத்தா²ரகஸ்ஸ தி³ன்னது³ஸ்ஸேன ஏவ கதி²னத்தா²ரோ ஸம்ப⁴வதி, ந டி²திகாய லத்³த⁴சீவரேன வா புக்³க³லிகசீவரேன வா ஸம்ப⁴வதி, தஞ்ச கதி²னது³ஸ்ஸதா³னகம்மம் சத்தாரோ கதி²னது³ஸ்ஸதா³யகா, ஏகோ படிக்³கா³ஹகோதி பஞ்சஸு பி⁴க்கூ²ஸு விஜ்ஜமானேஸுயேவ ஸம்பஜ்ஜதி, ந ததோ ஊனேஸூதி பச்சி²மகோடியா பஞ்சன்னம் வட்டதி, காரணஸித்³தி⁴யா ப²லஸித்³தி⁴ ஹோதி, தேனேவ ச காரணேன ‘‘கதி²னது³ஸ்ஸதா³னகம்மம் வுத்த’’ந்தி முக்²யவஸேன அவத்வா ‘‘ஸந்தா⁴ய வுத்த’’ந்தி உபசாரவஸேனாஹ. ஏவம் வுத்தேயேவ அட்ட²கதா²வசனஸ்ஸ புப்³பா³பரவிரோதோ⁴ நத்தி², அட்ட²கதா²வசனேன ச டீகாவசனம் விருத்³த⁴ம் ந ஹோதீதி த³ட்ட²ப்³ப³ம், ‘‘அபலோகனாதி³ஸங்க⁴கம்மகரணத்த²ம் ப³த்³த⁴ஸீமா ப⁴க³வதா அனுஞ்ஞாதா’’தி இமினா வினயலக்க²ணேன ச ஸமேதி.

‘‘இமாய ஸங்கா⁴டியா கதி²னம் அத்த²ராமீ’’திஆதி³கா பன அத்தா²ரகிரியா அபலோகனாதீ³ஸு சதூஸு ஸங்க⁴கம்மேஸு அப்பவிட்டா², அதி⁴ட்டா²னாத³யோ விய பஞ்சானிஸம்ஸலாப⁴காரணபூ⁴தா புக்³க³லகிரியாவ ஹோதீதி வஸ்ஸூபனாயிககே²த்தபூ⁴தாய அந்தோஉபசாரஸீமாய காதப்³பா³, தஸ்மா அந்தோஉபசாரஸீமாயம் ப³த்³த⁴ஸீமாய அவிஜ்ஜமானாய ப³ஹிஉபசாரஸீமாயம் ப³த்³த⁴ஸீமம் வா உத³குக்கே²பஸத்தப்³ப⁴ந்தரலப⁴மானட்டா²னம் வா க³ந்த்வா ஞத்திது³தியகம்மேன கதி²னது³ஸ்ஸம் தா³பேத்வா புன விஹாரம் ஆக³ந்த்வா அந்தோஉபசாரஸீமாயமேவ கதி²னத்த²ரணம் புப்³பா³சரியேஹி கதம், தம் ஸுகதமேவ ஹோதீதி த³ட்ட²ப்³ப³ம். ஏவம் அக்³க³ஹேத்வா ஸுத்³த⁴உபசாரஸீமாயமேவ ஞத்திது³தியகம்மம் காதப்³ப³ந்தி க³ய்ஹமானே ஸதி தேஸம் ஆயஸ்மந்தானம் தி³ட்டா²னுக³திம் ஆபஜ்ஜமானா ஸிஸ்ஸானுஸிஸ்ஸா து⁴வவாஸத்தா²ய விஹாரதா³னாதி³அபலோகனகம்மம் வா உபோஸத²பவாரணாதி³ஞத்திகம்மம் வா ஸீமாஸம்மன்னனாதி³ஞத்திது³தியகம்மம் வா உபஸம்பதா³தி³ஞத்திசதுத்த²கம்மம் வா உபசாரஸீமாயமேவ கரேய்யும், ஏவம் கரோந்தா ப⁴க³வதோ ஸாஸனே மஹந்தம் ஜடம் மஹந்தம் கு³ம்ப³ம் மஹந்தம் விஸமம் கரேய்யும், தஸ்மா தமகரணத்த²ம் யுத்திதோ ச ஆக³மதோ ச அனேகானி காரணானி ஆஹரித்வா கத²யிம்ஹாதி.

ஸாஸனே கா³ரவம் கத்வா, ஸத்³த⁴ம்மஸ்ஸானுலோமதோ;

மயா கதம் வினிச்ச²யம், ஸம்மா சிந்தேந்து ஸாத⁴வோ.

புனப்புனம் விசிந்தேத்வா, யுத்தம் சே ஹோதி க³ண்ஹந்து;

நோ சே யுத்தம் மா க³ண்ஹந்து, ஸம்மாஸம்பு³த்³த⁴ஸாவகாதி.

இதோ பரானிபி காரணஸாத⁴கானி ஆஹரந்தி ஆசரியா, தேஸம் படிவசனேன அதிவித்தா²ரோ ப⁴விஸ்ஸதி, உபசாரஸீமாய சதுன்னம் ஸங்க⁴கம்மானம் கதட்டா²னபா⁴வோ புப்³பே³ வுத்தோவ, தஸ்மா தம் வசனம் மனஸி கத்வா ஸம்ஸயம் அகத்வா தா⁴ரேதப்³போ³தி.

‘‘இமாய ஸங்கா⁴டியா கதி²னம் அத்த²ராமீ’’தி வாசா பி⁴ந்தி³தப்³பா³தி கிம் ஏத்தகேன வசீபே⁴தே³ன கதி²னம் அத்த²தம் ஹோதி, உதா³ஹு அஞ்ஞோ கோசி காயவிகாரோ காதப்³போ³? ந காதப்³போ³. ஏத்தகேனேவ ஹி வசீபே⁴தே³ன அத்த²தம் ஹோதி, கதி²னம். வுத்தஞ்ஹேதம் பரிவாரே (பரி. 408) ‘‘அத்தா²ரோ ஏகேன த⁴ம்மேன ஸங்க³ஹிதோ வசீபே⁴தே³னா’’தி.

ஏவம் கதி²னத்தா²ரம் த³ஸ்ஸேத்வா அனுமோதா³பனஅனுமோத³னே த³ஸ்ஸேந்தோ ‘‘தேன கதி²னத்தா²ரகேனா’’திஆதி³மாஹ. தத்த² யேன பி⁴க்கு²னா ‘‘இமாய ஸங்கா⁴டியா கதி²னம் அத்த²ராமீ’’திஆதி³னா வசீபே⁴தே³ன கதி²னம் அத்த²தம், தேன ‘‘கதி²னஸ்ஸ அத்தா²ரா பன்னரஸ த⁴ம்மா ஜாயந்தீ’’தி பரிவாரே (பரி. 403) ஆக³தத்தா கதி²னத்தா²ரேன ஸஹேவ பஞ்ச ஆனிஸம்ஸா ஆக³தா, அத² கஸ்மா ஸங்க⁴ம் அனுமோதா³பேதீதி? கிஞ்சாபி அத்தா²ரகஸ்ஸ பி⁴க்கு²னோ பஞ்ச ஆனிஸம்ஸா ஆக³தா, ஸங்க⁴ஸ்ஸ பன அனாக³தா, தஸ்மா ஸங்க⁴ஸ்ஸ ச ஆக³மனத்த²ம் ஸங்க⁴ம் அனுமோதா³பேதி, ஸங்கோ⁴ ச அனுமோத³னம் கரோதி, ஏவம் கதே உபி⁴ன்னம்பி ஆனிஸம்ஸா ஆக³தா ஹோந்தி. வுத்தஞ்ஹேதம் பரிவாரே (பரி. 403) ‘‘த்³வின்னம் புக்³க³லானம் அத்த²தம் ஹோதி கதி²னம் அத்தா²ரகஸ்ஸ ச அனுமோத³கஸ்ஸ சா’’தி. ஏத்த² ச கதி²னத்தா²ரகபி⁴க்கு²தோ வுட்³ட⁴தரோ பி⁴க்கு² தஸ்மிம் ஸங்கே⁴ அத்தி², இத⁴ வுத்தனயேன அத்தா²ரகேன ‘‘ப⁴ந்தே’’தி வத்தப்³ப³ம், அனுமோத³கேன ‘‘ஆவுஸோ’’தி. யதி³ பன கதி²னத்தா²ரகோ பி⁴க்கு² ஸப்³பே³ஸம் வுட்³ட⁴தரோ ஹோதி, தேன ‘‘ஆவுஸோ’’தி வத்தப்³ப³ம், இதரேஹி ‘‘ப⁴ந்தே’’தி, ஏவம் ஸேஸனயத்³வயேபி. ஏவம் ஸப்³பே³ஸம் அத்த²தம் ஹோதி கதி²னந்தி. இமேஸு பன ஸங்க⁴புக்³க³லேஸு யே தஸ்மிம் விஹாரே புரிமிகாய வஸ்ஸம் உபக³ந்த்வா பட²மபவாரணாய பவாரிதா, தேயேவ அனுமோதி³தும் லப⁴ந்தி, சி²ன்னவஸ்ஸா வா பச்சி²மிகாய உபக³தா வா அஞ்ஞஸ்மிம் விஹாரே வுத்த²வஸ்ஸா வா ந லப⁴ந்தி, அனனுமோத³ந்தாபி ஆனிஸம்ஸம் ந லப⁴ந்தி.

ஏவம் கதி²னத்தா²ரம் த³ஸ்ஸேத்வா இதா³னி சீவரவிபா⁴க³ம் த³ஸ்ஸேதும் ‘‘ஏவம் அத்த²தே பன கதி²னே’’திஆதி³மாஹ. தத்த² ஸசே கதி²னசீவரேன ஸத்³தி⁴ம் ஆப⁴தம் ஆனிஸம்ஸந்தி இமினா ஏகம் அத்த²தசீவரமேவ கதி²னசீவரம் நாம, ததோ அஞ்ஞம் தேன ஸத்³தி⁴ம் ஆப⁴தம் ஸப்³ப³ம் சீவரம் கதி²னானிஸம்ஸசீவரம் நாமாதி த³ஸ்ஸேதி. வக்க²தி ஹி ‘‘அவஸேஸகதி²னானிஸம்ஸே ப³லவவத்தா²னீ’’திஆதி³. தேன ஞாயதி ‘‘வத்த²மேவ இத⁴ ஆனிஸம்ஸோ நாம, ந அக்³கோ⁴, கதி²னஸாடகேன ஸத்³தி⁴ம் ஆப⁴தானம் அஞ்ஞஸாடகானம் ப³ஹுலவஸேன அத்த²ரிதப்³ப³ம், ந கதி²னஸாடகஸ்ஸ மஹக்³க⁴வஸேனா’’தி. பி⁴க்கு²ஸங்கோ⁴ அனிஸ்ஸரோ, அத்த²தகதி²னோ பி⁴க்கு²யேவ இஸ்ஸரோ. கஸ்மா? தா³யகேஹி விசாரிதத்தா. பி⁴க்கு²ஸங்கோ⁴ இஸ்ஸரோ, கஸ்மா? தா³யகேஹி அவிசாரிதத்தா, மூலகதி²னஸ்ஸ ச ஸங்கே⁴ தி³ன்னத்தா. அவஸேஸகதி²னானிஸம்ஸேதி தஸ்ஸ தி³ன்னவத்தே²ஹி அவஸேஸகதி²னானிஸம்ஸவத்தே². ப³லவவத்தா²னீதி அத்த²ரிதப்³ப³கதி²னஸாடகம்யேவ அஹதம் வா அஹதகப்பம் வா தா³தும் வட்டதி, ஆனிஸம்ஸசீவரம் பன யதா²ஸத்தி யதா²ப³லம் புராணம் வா அபி⁴னவம் வா து³ப்³ப³லம் வா ப³லவம் வா தா³தும் வட்டதி, தஸ்மா தேஸு து³ப்³ப³லவத்தே² டி²திகாய தி³ன்னே லத்³த⁴பி⁴க்கு²ஸ்ஸ உபகாரகம் ந ஹோதி, தஸ்மா உபகாரணயோக்³கா³னி ப³லவவத்தா²னி தா³தப்³பா³னீதி அதி⁴ப்பாயோ. வஸ்ஸாவாஸிகடி²திகாய தா³தப்³பா³னீதி யத்தகா பி⁴க்கூ² வஸ்ஸாவாஸிகசீவரம் லபி⁴ம்ஸு, தே ட²பேத்வா தேஸம் ஹேட்ட²தோ பட்டா²ய யதா²க்கமம் தா³தப்³பா³னி. தே²ராஸனதோ பட்டா²யாதி யத்தகா பி⁴க்கூ² திஸ்ஸம் கதி²னத்த²தஸீமாயம் ஸந்தி, தேஸு ஜேட்ட²கபி⁴க்கு²தோ பட்டா²ய தா³தப்³பா³னி. ஆஸனக்³க³ஹணம் பன யதா²வுட்³ட⁴ம் நிஸின்னே ஸந்தா⁴ய கதம். ஏதேன வஸ்ஸாவாஸிககதி²னானிஸம்ஸானம் ஸமானக³திகதம் தீ³பேதி. க³ருப⁴ண்ட³ம் ந பா⁴ஜேதப்³ப³ந்தி கதி²னஸாடகேன ஸத்³தி⁴ம் ஆப⁴தேஸு மஞ்சபீடா²தி³கம் க³ருப⁴ண்ட³ம் ந பா⁴ஜேதப்³ப³ம், ஸங்கி⁴கவஸேனேவ பரிபு⁴ஞ்ஜிதப்³ப³ந்தி அத்தோ². தத்த² க³ருப⁴ண்ட³வினிச்ச²யோ அனந்தரகதா²யம் ஆவி ப⁴விஸ்ஸதி.

இமஸ்மிம் பன டா²னே வத்தப்³ப³ம் அத்தி². கத²ம்? இதா³னி பி⁴க்கூ² கதி²னானிஸம்ஸசீவரம் குஸபாதம் கத்வா விப⁴ஜந்தி, தம் யுத்தம் விய ந தி³ஸ்ஸதீதி. கஸ்மாதி சே? ‘‘அவஸேஸகதி²னானிஸம்ஸே ப³லவவத்தா²னி வஸ்ஸாவாஸிகடி²திகாய தா³தப்³பா³னி, டி²திகாய அபா⁴வே தே²ராஸனதோ பட்டா²ய தா³தப்³பா³னீ’’தி வசனதோதி. ஏவம் ஸந்தே கத்த² குஸபாதோ காதப்³போ³தி? ப⁴ண்டா³கா³ரே ட²பிதசீவரேதி. கத²ம் விஞ்ஞாயதீதி சே? ‘‘உஸ்ஸன்னம் ஹோதீதி ப³ஹு ராஸிகதம் ஹோதி, ப⁴ண்டா³கா³ரம் ந க³ண்ஹாதி. ஸம்முகீ²பூ⁴தேனாதி அந்தோஉபசாரஸீமாயம் டி²தேன. பா⁴ஜேதுந்தி காலம் கோ⁴ஸாபேத்வா படிபாடியா பா⁴ஜேதும்…பே… ஏவம் ட²பிதேஸு சீவரபடிவீஸேஸு குஸோ பாதேதப்³போ³’’தி அட்ட²கதா²யம் (மஹாவ. அட்ட². 343) வுத்தத்தா, தஸ்மா இமிஸ்ஸம் அட்ட²கதா²யம் வுத்தனயேனேவ பா⁴ஜேதப்³ப³ந்தி அம்ஹாகம் க²ந்தி.

ஏகச்சே பன பி⁴க்கூ² ஏகேகஸ்ஸ ஏகேகஸ்மிம் சீவரே அப்பஹோந்தே சீவரம் பரிவத்தேத்வா அகப்பியவத்து²ம் க³ஹேத்வா பா⁴ஜேந்தி, தம் அதிஓளாரிகமேவ. அஞ்ஞேபி ஏகச்சானம் சீவரானம் மஹக்³க⁴தாய ஏகச்சானம் அப்பக்³க⁴தாய ஸமக்³க⁴ம் காதும் ந ஸக்காதி ததே²வ கரோந்தி, தம்பி ஓளாரிகமேவ. தத்த² ஹி அகப்பியவத்து²னா பரிவத்தனேபி தஸ்ஸ விசாரணேபி பா⁴க³க்³க³ஹணேபி ஆபத்தியேவ ஹோதி. ஏகே ‘‘கதி²னம் நாம து³ப்³பி³சாரணீய’’ந்தி வத்வா அத்த²ரணம் ந கரோந்தி, புக்³க³லிகவஸேனேவ யதா²ஜ்ஜா²ஸயம் விசாரேந்தி, தம் பன யதி³ தா³யகேஹி புக்³க³லஸ்ஸேவ தி³ன்னம், புக்³க³லேன ச ஸங்க⁴ஸ்ஸ அபரிச்சஜிதம், ஏவம் ஸதி அத்தனோ ஸந்தகத்தா யுத்தம் விய தி³ஸ்ஸதி. யதி³ பன ஸங்க⁴ஸ்ஸ வா க³ணஸ்ஸ வா தி³ன்னம், புக்³க³லஸ்ஸ தி³ன்னேபி ஸங்க⁴ஸ்ஸ வா க³ணஸ்ஸ வா பரிச்சஜிதம், ஏவம் ஸந்தே ஸங்க⁴க³ணானம் ஸந்தகத்தா அயுத்தம் ப⁴வேய்ய. அபரே பன கதி²னவஸேன படிக்³க³ஹிதே விசாரேதும் து³க்கரந்தி மஞ்ஞமானா ‘‘ந மயம் கதி²னவஸேன படிக்³க³ண்ஹாம, வஸ்ஸாவாஸிகபா⁴வேனேவ படிக்³க³ண்ஹாமா’’தி வத்வா யதா²ருசி விசாரேந்தி, தம்பி அயுத்தம். வஸ்ஸாவாஸிகம்பி ஹி ஸங்க⁴ஸ்ஸ தி³ன்னம் ஸங்கி⁴கம் ஹோதியேவ, புக்³க³லஸ்ஸ தி³ன்னம் புக்³க³லிகம். கத²ம் விஞ்ஞாயதீதி சே? ‘‘ஸசே பன தேஸம் ஸேனாஸனே பம்ஸுகூலிகோ வஸதி, ஆக³தஞ்ச தம் தி³ஸ்வா ‘தும்ஹாகம் வஸ்ஸாவாஸிகம் தே³மா’தி வத³ந்தி, தேன ஸங்க⁴ஸ்ஸ ஆசிக்கி²தப்³ப³ம். ஸசே தானி குலானி ஸங்க⁴ஸ்ஸ தா³தும் ந இச்ச²ந்தி, ‘தும்ஹாகம்யேவ தே³மா’தி வத³ந்தி, ஸபா⁴கோ³ பி⁴க்கு² ‘வத்தம் கத்வா க³ண்ஹாஹீ’தி வத்தப்³போ³, பம்ஸுகூலிகஸ்ஸ பனேதம் ந வட்டதீ’’தி அட்ட²கதா²யம் (சூளவ. அட்ட². 318; வி. ஸங்க³. அட்ட². 219) வுத்தத்தா.

வஸ்ஸாவாஸிகம் து³வித⁴ம் ஸத்³தா⁴தே³ய்யதத்ருப்பாத³வஸேன. வுத்தஞ்ஹி அட்ட²கதா²யம் (சூளவ. அட்ட². 318) ‘‘இதி ஸத்³தா⁴தே³ய்யே தா³யகமனுஸ்ஸா புச்சி²தப்³பா³, தத்ருப்பாதே³ பன கப்பியகாரகா புச்சி²தப்³பா³’’தி. ஸத்³தா⁴தே³ய்யவஸ்ஸாவாஸிகம்பி ஸவிஹாராவிஹாரவஸேன து³வித⁴ம். வுத்தஞ்ஹேதம் அட்ட²கதா²யம் (சூளவ. அட்ட². 318) ‘‘மஹாபது³மத்தே²ரோ பனாஹ ந ஏவம் காதப்³ப³ம். மனுஸ்ஸா ஹி அத்தனோ ஆவாஸபடிஜக்³க³னத்தா²ய பச்சயம் தே³ந்தி, தஸ்மா அஞ்ஞேஹி பி⁴க்கூ²ஹி தத்த² பவிஸிதப்³ப³’’ந்தி, ‘‘யேஸம் பன ஸேனாஸனம் நத்தி², கேவலம் பச்சயமேவ தே³ந்தி, தேஸம் பச்சயம் அவஸ்ஸாவாஸிகே ஸேனாஸனே கா³ஹேதும் வட்டதீ’’தி ச. தத்ருப்பாத³வஸ்ஸாவாஸிகம் நாம கப்பியகாரகானம் ஹத்தே² கப்பியவத்து²பஅபு⁴ஞ்ஜனத்தா²ய தி³ன்னவத்து²தோ நிப்³ப³த்தம். வுத்தம்பி சேதம் அட்ட²கதா²யம் (சூளவ. அட்ட². 318) ‘‘கப்பியகாரகானஞ்ஹி ஹத்தே² ‘கப்பியப⁴ண்ட³ம் பரிபு⁴ஞ்ஜதா²’தி தி³ன்னவத்து²தோ யம் யம் கப்பியம், தம் ஸப்³ப³ம் பரிபு⁴ஞ்ஜிதும் அனுஞ்ஞாத’’ந்தி. ஏவம் வஸ்ஸாவாஸிகசீவரம்பி புப்³பே³ யேபு⁴ய்யேன ஸங்க⁴ஸ்ஸேவ தே³ந்தி, தஸ்மா ‘‘கதி²னசீவரம் தே³மா’’தி வுத்தே கதி²னசீவரபா⁴வேன படிக்³க³ஹேதப்³ப³ம், ‘‘வஸ்ஸாவாஸிகம் தே³மா’’தி வுத்தே வஸ்ஸாவாஸிகசீவரபா⁴வேனேவ படிக்³க³ஹேதப்³ப³ம். கஸ்மா? ‘‘யதா² தா³யகா வத³ந்தி, ததா² படிபஜ்ஜிதப்³ப³’’ந்தி (சூளவ. அட்ட². 325) வசனதோ.

கிஞ்சி அவத்வா ஹத்தே² வா பாத³மூலே வா ட²பேத்வா க³தே கிம் காதப்³ப³ந்தி? தத்த² ஸசே ‘‘இத³ம் வத்து² சேதியஸ்ஸ வா ஸங்க⁴ஸ்ஸ வா பரபுக்³க³லஸ்ஸ வா அத்தா²ய பரிணத’’ந்தி ஜானேய்ய, தேஸம் அத்தா²ய படிக்³க³ஹேதப்³ப³ம். அத² ‘‘மமத்தா²ய பரிணத’’ந்தி ஜானேய்ய, அத்தனோ அத்தா²ய படிக்³க³ஹேதப்³ப³ம். வுத்தஞ்ஹேதம் பரிவாரே (பரி. 329) ‘‘நவ அத⁴ம்மிகதா³னானீ’’திஆதி³. அத² ந கிஞ்சி ஜானேய்ய, அத்தனோ ஹத்தே² வா பாத³மூலே வா கிஞ்சி அவத்வா ட²பிதம் தஸ்ஸேவ புக்³க³லிகம் ஹோதி. ந ஹி சேதியாதீ³னம் அத்தா²ய பரிணதம் கிஞ்சி அவத்வா பி⁴க்கு²ஸ்ஸ ஹத்தே² வா பாத³மூலே வா ட²பேதீதி. வுத்தஞ்ஹேதம் ஸமந்தபாஸாதி³காயம் (மஹாவ. அட்ட². 379) ‘‘புக்³க³லஸ்ஸ தே³தீதி ‘இமம் சீவரம் இத்த²ன்னாமஸ்ஸ த³ம்மீ’தி ஏவம் பரம்முகா² வா பாத³மூலே ட²பேத்வா ‘இமம், ப⁴ந்தே, தும்ஹாகம் த³ம்மீ’தி ஏவம் ஸம்முகா² வா தே³தீ’’திஆதி³.

‘‘இமிஸ்ஸம் அட்ட²கதா²யம் வுத்தனயேனேவ பா⁴ஜேதப்³ப³’’ந்தி வுத்தம், கத²ம் பா⁴ஜேதப்³ப³ந்தி? ‘‘அவஸேஸகதி²னானிஸம்ஸே ப³லவவத்தா²னி வஸ்ஸாவாஸிகடி²திகாய தா³தப்³பா³னீ’’தி வுத்தத்தா யே பி⁴க்கூ² இமஸ்மிம் வஸ்ஸே வஸ்ஸாவாஸிகம் ந லபி⁴ம்ஸு, தேஸம் ஹேட்ட²தோ பட்டா²ய ஏகேகம் சீவரம் வா ஸாடகம் வா தா³தப்³ப³ம். அத² சீவரானம் வா ஸாடகானம் வா அவஸிட்டே²ஸு ஸந்தேஸு புன தே²ராஸனதோ பட்டா²ய து³தியபா⁴கோ³ தா³தப்³போ³. ததோ சீவரேஸு வா ஸாடகேஸு வா கீ²ணேஸு யே லப⁴ந்தி, தேஸு பச்சி²மஸ்ஸ வஸ்ஸாதீ³னி ஸல்லக்கே²தப்³பா³னி. ந கேவலம் தஸ்மிம் கதி²னத்த²ததி³வஸே தி³ன்னது³ஸ்ஸானி ஏவ கதி²னானிஸம்ஸானி நாம ஹோந்தி, அத² கோ² யாவ கதி²னஸ்ஸ உப்³பா⁴ரா ஸங்க⁴ம் உத்³தி³ஸ்ஸ தி³ன்னசீவரானிபி ஸங்கி⁴கேன தத்ருப்பாதே³ன ஆராமிகேஹி ஆப⁴தசீவரானிபி கதி²னானிஸம்ஸானியேவ ஹோந்தி. தஸ்மா தாதி³ஸேஸு சீவரேஸு உப்பஜ்ஜமானேஸு யதா²வுத்தஸல்லக்கி²தவஸ்ஸஸ்ஸ பி⁴க்கு²னோ ஹேட்ட²தோ பட்டா²ய புனப்புனம் கா³ஹேதப்³ப³ம். ‘‘டி²திகாய அபா⁴வே தே²ராஸனதோ பட்டா²ய தா³தப்³பா³னீ’’தி (மஹாவ. அட்ட². 306) வசனதோ தஸ்மிம் வஸ்ஸே வஸ்ஸாவாஸிகசீவரானம் அனுப்பஜ்ஜனதோ வா உப்பஜ்ஜமானேஸுபி டி²திகாய அகா³ஹாபனதோ வா வஸ்ஸாவாஸிகடி²திகாய அபா⁴வே ஸதி லத்³த⁴ப்³ப³கதி²னானிஸம்ஸே தஸ்ஸம் உபசாரஸீமாயம் ஸப்³பே³ பி⁴க்கூ² படிபாடியா நிஸீதா³பேத்வா தே²ராஸனதோ பட்டா²ய டி²திகம் கத்வா ஏகேகஸ்ஸ பி⁴க்கு²னோ ஏகேகம் சீவரம் வா ஸாடகம் வா தா³தப்³ப³ம். ஸங்க⁴னவகஸ்ஸ தா³னகாலேபி மஹாதே²ரா ஆக³ச்ச²ந்தி, ‘‘ப⁴ந்தே, வீஸதிவஸ்ஸானம் தீ³யதி, தும்ஹாகம் டி²திகா அதிக்கந்தா’’தி ந வத்தப்³பா³, டி²திகம் ட²பேத்வா தேஸம் த³த்வா பச்சா² டி²திகாய தா³தப்³ப³ம். து³தியபா⁴கே³ பன தே²ராஸனம் ஆருள்ஹே பச்சா² ஆக³தானம் பட²மபா⁴கோ³ ந பாபுணாதி, து³தியபா⁴க³தோ வஸ்ஸக்³கே³ன தா³தப்³போ³. அயம் டி²திகாவிசாரோ சதுபச்சயபா⁴ஜனகதா²தோ (வி. ஸங்க³. அட்ட². 202) க³ஹேதப்³போ³தி.

நனு ச போ⁴ ஏகச்சானி கதி²னானிஸம்ஸசீவரானி மஹக்³கா⁴னி, ஏகச்சானி அப்பக்³கா⁴னி ஹோந்தி, கத²ம் ஏகேகஸ்ஸ ஏகேகஸ்மிம் தி³ன்னே அக்³க⁴ஸமத்தம் ப⁴வேய்யாதி? வுச்சதே – ப⁴ண்டா³கா³ரசீவரபா⁴ஜனே அக்³க⁴ஸமத்தம் இச்சி²தப்³ப³ம். ததா² ஹி வுத்தம் சீவரக்க²ந்த⁴கே (மஹாவ. 343) ‘‘தேன கோ² பன ஸமயேன ஸங்க⁴ஸ்ஸ ப⁴ண்டா³கா³ரே சீவரம் உஸ்ஸன்னம் ஹோதி. ப⁴க³வதோ ஏதமத்த²ம் ஆரோசேஸும் – அனுஜானாமி, பி⁴க்க²வே, ஸம்முகீ²பூ⁴தேன ஸங்கே⁴ன பா⁴ஜேதும்…பே… அத² கோ² சீவரபா⁴ஜகானம் பி⁴க்கூ²னம் ஏதத³ஹோஸி ‘கத²ம் நு கோ² சீவரம் பா⁴ஜேதப்³ப³’ந்தி. ப⁴க³வதோ ஏதமத்த²ம் ஆரோசேஸும் – அனுஜானாமி, பி⁴க்க²வே, பட²மம் உச்சினித்வா துலயித்வா வண்ணாவண்ணம் கத்வா பி⁴க்கூ² க³ணேத்வா வக்³க³ம் ப³ந்தி⁴த்வா சீவரபடிவீஸம் ட²பேது’’ந்தி. அட்ட²கதா²யஞ்ச (மஹாவ. அட்ட². 343) ‘‘உச்சினித்வாதி ‘இத³ம் தூ²லம், இத³ம் ஸண்ஹம், இத³ம் க⁴னம், இத³ம் தனுகம், இத³ம் பரிபு⁴த்தம், இத³ம் அபரிபு⁴த்தம், இத³ம் தீ³க⁴தோ ஏத்தகம், புது²லதோ ஏத்தக’ந்தி ஏவம் வத்தா²னி விசினித்வா. துலயித்வாதி ‘இத³ம் ஏத்தகம் அக்³க⁴தி, இத³ம் ஏத்தக’ந்தி ஏவம் அக்³க⁴பரிச்சே²த³ம் கத்வா. வண்ணாவண்ணம் கத்வாதி ஸசே ஸப்³பே³ஸம் ஏகேகமேவ த³ஸத³ஸஅக்³க⁴னகம் பாபுணாதி, இச்சேதம் குஸலம். நோ சே பாபுணாதி, யம் நவ வா அட்ட² வா அக்³க⁴தி, தம் அஞ்ஞேன ஏகஅக்³க⁴னகேன ச த்³விஅக்³க⁴னகேன ச ஸத்³தி⁴ம் ப³ந்தி⁴த்வா ஏதேன உபாயேன ஸமே படிவீஸே ட²பேத்வாதி அத்தோ². பி⁴க்கூ² க³ணேத்வா வக்³க³ம் ப³ந்தி⁴த்வாதி ஸசே ஏகேகஸ்ஸ தீ³யமானே தி³வஸோ ந பஹோதி, த³ஸ த³ஸ பி⁴க்கூ² க³ணேத்வா த³ஸ த³ஸ சீவரபடிவீஸே ஏகவக்³க³ம் ப³ந்தி⁴த்வா ஏகம் ப⁴ண்டி³கம் கத்வா ஏவம் சீவரபடிவீஸம் ட²பேதும் அனுஜானாமீதி அத்தோ². ஏவம் ட²பிதேஸு சீவரபடிவீஸேஸு குஸோ பாதேதப்³போ³’’தி வுத்தம். தேன ஞாயதி ‘‘ப⁴ண்டா³கா³ரசீவரபா⁴ஜனே அக்³க⁴ஸமத்தம் இச்சி²தப்³ப³ம், குஸபாதோ ச காதப்³போ³’’தி.

இமஸ்மிம் பன கதி²னானிஸம்ஸசீவரபா⁴ஜனே அக்³க⁴ஸமத்தம் ந இச்சி²தப்³ப³ம், குஸபாதோ ச ந காதப்³போ³. ததா² ஹி வுத்தம் கதி²னக்க²ந்த⁴கட்ட²கதா²யம் (மஹாவ. அட்ட². 306) ‘‘ஏவம் அத்த²தே பன கதி²னே ஸசே கதி²னசீவரேன ஸத்³தி⁴ம் ஆப⁴தம் ஆனிஸம்ஸம் தா³யகா ‘யேன அம்ஹாகம் கதி²னம் க³ஹிதம், தஸ்ஸேவ தே³மா’தி தே³ந்தி, பி⁴க்கு²ஸங்கோ⁴ அனிஸ்ஸரோ. அத² அவிசாரேத்வாவ த³த்வா க³ச்ச²ந்தி, பி⁴க்கு²ஸங்கோ⁴ இஸ்ஸரோ, தஸ்மா ஸசே கதி²னத்தா²ரகஸ்ஸ ஸேஸசீவரானிபி து³ப்³ப³லானி ஹோந்தி, ஸங்கே⁴ன அபலோகேத்வா தேஸம்பி அத்தா²ய வத்தா²னி தா³தப்³பா³னி, கம்மவாசா பன ஏகாயேவ வட்டதி. அவஸேஸகதி²னானிஸம்ஸே ப³லவவத்தா²னி வஸ்ஸாவாஸிகடி²திகாய தா³தப்³பா³னி. டி²திகாய அபா⁴வே தே²ராஸனதோ பட்டா²ய தா³தப்³பா³னி’’இச்சேவ வுத்தம், ந வுத்தம் ‘‘அக்³க⁴பரிச்சே²த³ம் கத்வா’’தி வா ‘‘குஸபாதோ காதப்³போ³’’தி வா. தேன ஞாயதி ‘‘கதி²னானிஸம்ஸசீவரானி வஸ்ஸாவாஸிகடி²திகாய வா வுட்³ட⁴தரதோ வா பட்டா²யேவ தா³தப்³பா³னி, நேவ அக்³க⁴ஸமத்தம் காதப்³ப³ம், ந குஸோ பாதேதப்³போ³’’தி.

இதா³னி பன வஸ்ஸாவாஸிகபா⁴வேன அதி³ன்னத்தா வஸ்ஸாவாஸிகடி²திகாய அகதத்தா ச கதி²னத்த²தசீவரதோ ச கதி²னத்தா²ரகஸ்ஸ அவஸேஸசீவரத்தா²ய தி³ன்னவத்த²தோ ச அவஸேஸகதி²னானிஸம்ஸே ப³லவவத்தா²னி வுட்³ட⁴தரதோ பட்டா²ய ஏகஸ்ஸ பி⁴க்கு²ஸ்ஸ ஏகம் வத்த²ம் தா³தப்³ப³ம், தேஸு பன வரம் வரம் வுட்³ட⁴ஸ்ஸ தா³தப்³ப³ம். கத²ம் விஞ்ஞாயதீதி சே? ‘‘பச்சி²மவஸ்ஸூபனாயிகதி³வஸே பன ஸசே காலம் கோ⁴ஸேத்வா ஸன்னிபதிதே ஸங்கே⁴ கோசி த³ஸஹத்த²ம் வத்த²ம் ஆஹரித்வா வஸ்ஸாவாஸிகம் தே³தி, ஆக³ந்துகோ ஸசே பி⁴க்கு²ஸங்க⁴த்தே²ரோ ஹோதி, தஸ்ஸ தா³தப்³ப³ம். நவகோ சே ஹோதி, ஸம்மதேன பி⁴க்கு²னா ஸங்க⁴த்தே²ரோ வத்தப்³போ³ ‘ஸசே, ப⁴ந்தே, இச்ச²த², பட²மபா⁴க³ம் முஞ்சித்வா இத³ம் வத்த²ம் க³ண்ஹதா²’தி. அமுஞ்சந்தஸ்ஸ ந தா³தப்³ப³ம். ஸசே பன புப்³பே³ கா³ஹிதம் முஞ்சித்வா க³ண்ஹாதி, தா³தப்³ப³ம். ஏதேனேவ உபாயேன து³தியத்தே²ரதோ பட்டா²ய பரிவத்தேத்வா பத்தட்டா²னே ஆக³ந்துகஸ்ஸ தா³தப்³ப³ம். ஸசே பட²மவஸ்ஸூபக³தா த்³வே தீணி சத்தாரி பஞ்ச வா வத்தா²னி அலத்து²ம், லத்³த⁴ம் லத்³த⁴ம் ஏதேனேவ உபாயேன விஸ்ஸஜ்ஜாபேத்வா யாவ ஆக³ந்துகஸ்ஸ ஸமகம் ஹோதி, தாவ தா³தப்³ப³ம். தேன பன ஸமகே லத்³தே⁴ அவஸிட்டோ² அனுபா⁴கோ³ தே²ராஸனே தா³தப்³போ³’’தி ஸேனாஸனக்க²ந்த⁴கட்ட²கதா²யம் (சூளவ. அட்ட². 318) வசனதோ தம்ஸம்வண்ணனாபூ⁴தாயம் விமதிவினோத³னியஞ்ச (வி. வி. டீ. சூளவக்³க³ 2.318) ‘‘ஆக³ந்துகோ ஸசே பி⁴க்கூ²தி சீவரே கா³ஹிதே பச்சா² ஆக³தோ ஆக³ந்துகோ பி⁴க்கு². பத்தட்டா²னேதி வஸ்ஸக்³கே³ன பத்தட்டா²னே. பட²மவஸ்ஸூபக³தாதி ஆக³ந்துகஸ்ஸ ஆக³மனதோ புரேதரமேவ பச்சி²மிகாய வஸ்ஸூபனாயிகாய வஸ்ஸூபக³தா. லத்³த⁴ம் லத்³த⁴ந்தி தா³யகானம் ஸந்திகா ஆக³தாக³தஸாடக’’ந்தி வசனதோ, வஜிரபு³த்³தி⁴டீகாயஞ்ச (வஜிர. டீ. சூளவக்³க³ 318) ‘‘பட²மபா⁴க³ம் முஞ்சித்வாதி இத³ம் சே பட²மகா³ஹிதவத்து²தோ மஹக்³க⁴ம் ஹோதீதி லிகி²த’’ந்தி வசனதோ ச விஞ்ஞாயதி. ஏவம் அட்ட²கதா²யம் டீகாஸு ச வஸ்ஸாவாஸிகதா³னே பச்சா² ஆப⁴தம் மஹக்³க⁴வத்த²ம் மஹாதே²ரதோ பட்டா²ய பரிவத்தேத்வா தேஹி அனிச்சி²தம்யேவ வஸ்ஸக்³கே³ன பத்தஸ்ஸ பச்சா² ஆக³தஸ்ஸ பி⁴க்கு²னோ தா³தப்³ப³பா⁴வஸ்ஸ வுத்தத்தா வரம் வரம் வுட்³ட⁴ஸ்ஸ தா³தப்³ப³ந்தி விஞ்ஞாயதி.

‘‘ஸசே பட²மவஸ்ஸூபக³தா த்³வே தீணி சத்தாரி பஞ்ச வா வத்தா²னி அலத்து²’’ந்தி வத்த²க³ணனாய ஏவ வுத்தத்தா, அக்³க⁴க³ணனாய அவுத்தத்தா ச கதி²னானிஸம்ஸவத்த²ஸ்ஸ ச வஸ்ஸாவாஸிகக³திகபா⁴வஸ்ஸ வசனதோ கதி²னானிஸம்ஸவத்தா²னி வத்த²க³ணனாவஸேனேவ பா⁴ஜேதப்³பா³னி, ந அக்³க⁴ஸமபா⁴வேனாதி ச த³ட்ட²ப்³பா³னி, தேனேவ ச காரணேன ‘‘யோ ப³ஹூனி கதி²னானிஸம்ஸவத்தா²னி தே³தி, தஸ்ஸ ஸந்தகேனேவ அத்த²ரிதப்³ப³’’ந்தி (மஹாவ. அட்ட². 306) வுத்தம். ப³ஹூனி ஹி கதி²னானிஸம்ஸவத்தா²னி விப⁴ஜனகாலே ஸங்க⁴ஸ்ஸ உபகாரகானி ஹோந்தீதி.

பாளிஅட்ட²கதா²தீ³ஹி, நேத்வா வுத்தம் வினிச்ச²யம்;

கதி²னே சீவரே மய்ஹம், சிந்தயந்து விசக்க²ணா.

சிந்தயித்வா புனப்புனம், யுத்தம் சே தா⁴ரயந்து தம்;

அயுத்தஞ்சே இதோ அஞ்ஞம், பரியேஸந்து காரணந்தி.

‘‘யோ ச தத்த² சீவருப்பாதோ³, ஸோ நேஸம் ப⁴விஸ்ஸதீ’’தி சீவரஸ்ஸேவ அத்த²தகதி²னானம் பி⁴க்கூ²னம் ஸந்தகபா⁴வஸ்ஸ ப⁴க³வதா வுத்தத்தா சீவரதோ அஞ்ஞானி ஸங்க⁴ம் உத்³தி³ஸ்ஸ தி³ன்னானி பிண்ட³பாதாதீ³னி வத்தூ²னி உபசாரஸீமம் பவிட்ட²ஸ்ஸ ஆக³தாக³தஸ்ஸ ஸங்க⁴ஸ்ஸ ஸந்தகம் ஹோந்தி. ததா² ஹி வுத்தம் அட்ட²கதா²யம் (மஹாவ. அட்ட². 306) ‘‘கதி²னம் அத்த²ராபேத்வா தா³னஞ்ச பு⁴ஞ்ஜித்வா க³மிஸ்ஸந்தி, ஆனிஸம்ஸோ பன இதரேஸம்யேவ ஹோதீ’’தி. ‘‘அனுஜானாமி, பி⁴க்க²வே, ஸாமணேரானம் உபட்³ட⁴படிவீஸம் தா³து’’ந்தி (மஹாவ. 343) பாட²ம் உபனிஸ்ஸாய கதி²னானிஸம்ஸசீவரம்பி ஸாமணேரானம் உபட்³ட⁴படிவீஸம்யேவ தே³ந்தி, ந பனேவம் காதப்³ப³ம். ப⁴ண்டா³கா³ரே ட²பிதஞ்ஹி அகாலசீவரமேவ ஸாமணேரானம் உபட்³ட⁴படிவீஸம் கத்வா தா³தப்³ப³ம். வஸ்ஸாவாஸிககதி²னானிஸம்ஸாதி³காலசீவரம் பன ஸமகமேவ தா³தப்³ப³ம். வுத்தஞ்ஹேதம் சீவரக்க²ந்த⁴கட்ட²கதா²யம் (மஹாவ. அட்ட². 343) ‘‘ஸாமணேரானம் உபட்³ட⁴படிவீஸந்தி ஏத்த² யே ஸாமணேரா அத்திஸ்ஸரா பி⁴க்கு²ஸங்க⁴ஸ்ஸ கத்தப்³ப³கம்மம் ந கரோந்தி, உத்³தே³ஸபரிபுச்சா²ஸு யுத்தா ஆசரியுபஜ்ஜா²யானம்யேவ வத்தபடிபத்திம் கரோந்தி, அஞ்ஞேஸம் ந கரோந்தி, ஏதேஸம்யேவ உபட்³ட⁴பா⁴கோ³ தா³தப்³போ³. யே பன புரேப⁴த்தஞ்ச பச்சா²ப⁴த்தஞ்ச பி⁴க்கு²ஸங்க⁴ஸ்ஸேவ கத்தப்³ப³கிச்சம் கரோந்தி, தேஸம் ஸமகோ தா³தப்³போ³. இத³ஞ்ச பிட்டி²ஸமயே உப்பன்னேன ப⁴ண்டா³கா³ரே ட²பிதேன அகாலசீவரேனேவ கதி²தம், காலசீவரம் பன ஸமகமேவ தா³தப்³ப³’’ந்தி.

கச்சி நு கோ² ஸாமணேரா வஸ்ஸம் உபக³தா, யேன ஆனிஸம்ஸம் லபே⁴ய்யுந்தி? ஆம உபக³தாதி. கத²ம் விஞ்ஞாயதீதி? ‘‘அத² சத்தாரோ பி⁴க்கூ² உபக³தா, ஏகோ பரிபுண்ணவஸ்ஸோ ஸாமணேரோ, ஸோ சே பச்சி²மிகாய உபஸம்பஜ்ஜதி, க³ணபூரகோ சேவ ஹோதி, ஆனிஸம்ஸஞ்ச லப⁴தீ’’தி அட்ட²கதா²யம் (மஹாவ. அட்ட². 306) வசனதோ வஜிரபு³த்³தி⁴டீகாயஞ்ச (வஜிர. டீ. மஹாவக்³க³ 306) ‘‘பச்சி²மிகாய உபஸம்பன்னோ பட²மபவாரணாய பவாரேதும்பி லப⁴தி, வஸ்ஸிகோ ச ஹோதி, ஆனிஸம்ஸஞ்ச லப⁴தீதி ஸாமணேரானம் வஸ்ஸூபக³மனம் அனுஞ்ஞாதம் ஹோதி. ஸாமணேரா கதி²னானிஸம்ஸம் லப⁴ந்தீதி வத³ந்தீ’’தி வசனதோதி.

தத்ருப்பாதே³ஸு கதி²னானிஸம்ஸேஸு யதி³ ஆராமிகா தண்டு³லாதீ³ஹி வத்தா²னி சேதாபேந்தி, வத்தே²ஹிபி தண்டு³லாதீ³னி சேதாபேந்தி, தத்த² கத²ம் படிபஜ்ஜிதப்³ப³ந்தி? விப⁴ஜனகாலே விஜ்ஜமானவத்து²வஸேன காதப்³ப³ம். ததா² ஹி வுத்தம் வஜிரபு³த்³தி⁴டீகாயம் (வஜிர. டீ. மஹாவக்³க³ 306) ‘‘தத்ருப்பாதே³ன தண்டு³லாதி³னா வத்தூ²ஸு சேதாபிதேஸு அத்த²தகதி²னானமேவ தானி வத்தா²னி பாபுணந்தி. வத்தே²ஹி பன தண்டு³லாதீ³ஸு சேதாபிதேஸு ஸப்³பே³ஸம் தானி பாபுணந்தீதி வுத்த’’ந்தி. ‘‘ஸசே பன ஏகஸீமாயம் ப³ஹூ விஹாரா ஹோந்தீ’’தி ஏத்த² கதரஸீமா அதி⁴ப்பேதாதி? உபசாரஸீமா. உபசாரஸீமாயம்யேவ ஹி ஸங்க⁴லாப⁴விப⁴ஜனாதி³கம் ஸிஜ்ஜ²தி. வுத்தஞ்ஹேதம் வஜிரபு³த்³தி⁴டீகாயம் (வஜிர. டீ. மஹாவக்³க³ 306) ‘‘கதி²னத்த²தஸீமாயந்தி உபசாரஸீமம் ஸந்தா⁴ய வுத்தம், உபசாரஸீமட்ட²ஸ்ஸ மதகசீவராதி³பா⁴கி³யதாய ப³த்³த⁴ஸீமாய தத்ருப்பாதா³பா⁴வதோ விஞ்ஞேய்யமேதம் ‘உபசாரஸீமாவ அதி⁴ப்பேதா’தி’’.

ஏவம் கதி²னத்தா²ரம் த³ஸ்ஸேத்வா ஸங்கே⁴ ருசிதாய மாதிகாபலிபோ³த⁴உப்³பா⁴ரே அத³ஸ்ஸேத்வாவ அந்தே ஆனிஸம்ஸம் த³ஸ்ஸேதும் ‘‘அத்த²தகதி²னானம் வோ பி⁴க்க²வே’’திஆதி³மாஹ. தத்த² அட்ட²விதா⁴ மாதிகா பக்கமனந்திகா, நிட்டா²னந்திகா, ஸன்னிட்டா²னந்திகா, நாஸனந்திகா, ஸவனந்திகா, ஆஸாவச்சே²தி³கா, ஸீமாதிக்கந்திகா, ஸஹுப்³பா⁴ராதி. தத்த² அத்த²தகதி²னோ பி⁴க்கு² கதபரியோஸிதம் சீவரம் ஆதா³ய ‘‘இமம் விஹாரம் ந பச்சேஸ்ஸாமீ’’தி பக்கமதி, தஸ்ஸ பி⁴க்கு²னோ உபசாரஸீமாதிக்கமேனேவ கதி²னுப்³பா⁴ரோ ப⁴வதி, பஞ்சானிஸம்ஸானி அலப⁴னேய்யோ ஹோதி. அயம் கதி²னுப்³பா⁴ரோ பக்கமனமேவஸ்ஸ அந்தபூ⁴தத்தா பக்கமனந்திகோ நாம ஹோதி.

அத்த²தகதி²னோ பி⁴க்கு² அனிட்டி²தமேவ அத்தனோ பா⁴க³பூ⁴தம் சீவரம் ஆதா³ய அஞ்ஞம் விஹாரம் க³தோ, தஸ்ஸ ப³ஹிஉபசாரஸீமக³தஸ்ஸ ஏவம் ஹோதி ‘‘இமஸ்மிம்யேவ விஹாரே இமம் சீவரம் காரேஸ்ஸாமி, ந புராணவிஹாரம் பச்சேஸ்ஸாமீ’’தி, ஸோ ப³ஹிஸீமாயமேவ தம் சீவரம் காரேதி, தஸ்ஸ பி⁴க்கு²னோ தஸ்மிம் சீவரே நிட்டி²தே கதி²னுப்³பா⁴ரோ ஹோதி. அயம் கதி²னுப்³பா⁴ரோ சீவரனிட்டா²னமேவஸ்ஸ அந்தோதி நிட்டா²னந்திகோ நாம.

பி⁴க்கு² அத்த²தகதி²னோ அகதசீவரமாதா³ய பக்கமதி, தஸ்ஸ ப³ஹிஉபசாரஸீமக³தஸ்ஸ ஏவம் ஹோதி ‘‘இமம் சீவரம் நேவ காரேஸ்ஸாமி, போராணவிஹாரஞ்ச ந பச்சேஸ்ஸாமீ’’தி, தஸ்ஸ பி⁴க்கு²னோ தேன ஸன்னிட்டா²னேன கதி²னுப்³பா⁴ரோ ஹோதி. அயம் கதி²னுப்³பா⁴ரோ ஸன்னிட்டா²னமேவஸ்ஸ அந்தோதி ஸன்னிட்டா²னந்திகோ நாம.

அத்த²தகதி²னோ பி⁴க்கு² அகதமேவ சீவரம் ஆதா³ய பக்கமதி, ப³ஹிஸீமக³தஸ்ஸ தஸ்ஸ ஏவம் ஹோதி ‘‘இதே⁴விமம் சீவரம் காரேஸ்ஸாமி, ந ச போராணவிஹாரம் பச்சேஸ்ஸாமீ’’தி, தஸ்ஸ சீவரம் குருமானம் சோராதீ³ஹி நஸ்ஸதி, அக்³யாதீ³ஹி வினஸ்ஸதி, கதி²னுப்³பா⁴ரோ ஹோதி. அயம் கதி²னுப்³பா⁴ரோ நாஸனமேவஸ்ஸ அந்தோதி நாஸனந்திகோ நாம.

அத்த²தகதி²னோ பி⁴க்கு² அகதசீவரமாதா³ய ‘‘இமம் விஹாரம் பச்சேஸ்ஸாமீ’’தி சிந்தேத்வா பக்கமதி, தஸ்ஸ ப³ஹிஸீமக³தஸ்ஸ ஏவம் ஹோதி ‘‘இதே⁴விமம் சீவரம் காரேஸ்ஸாமீ’’தி, ஸோ கதசீவரோ ஸுணாதி ‘‘விஹாரே கிர ஸங்கே⁴ன கதி²னம் உப்³ப⁴த’’ந்தி, தேன ஸவனமத்தேனஸ்ஸ கதி²னம் உப்³ப⁴தம் ஹோதி. அயம் கதி²னப்³பா⁴ரோ ஸவனமேவஸ்ஸ அந்தோதி ஸவனந்திகோ நாம.

அத்த²தகதி²னோ பி⁴க்கு² அஞ்ஞத்த² பச்சாஸாசீவரகாரணா பக்கமதி, தஸ்ஸ ப³ஹிஸீமக³தஸ்ஸ ஏவம் ஹோதி ‘‘இத⁴ ப³ஹிஸீமாயமேவ சீவரபச்சாஸம் பயிருபாஸாமி, ந விஹாரம் பச்சேஸ்ஸாமீ’’தி, ஸோ தத்தே²வ தம் சீவரபச்சாஸம் பயிருபாஸதி, ஸோ தம் சீவரபச்சாஸம் அலப⁴மானோ சீவராஸா பச்சி²ஜ்ஜதி, தேனேவ தஸ்ஸ பி⁴க்கு²னோ கதி²னுப்³பா⁴ரோ ப⁴வதி. அயம் கதி²னுப்³பா⁴ரோ ஆஸாவச்சே²த³ஸஹிதத்தா ஆஸாவச்சே²தி³கோ நாம.

அத்த²தகதி²னோ பி⁴க்கு² அகதசீவரம் ஆதா³ய ‘‘இமம் விஹாரம் பச்சேஸ்ஸாமீ’’தி சிந்தேத்வா பக்கமதி, ஸோ ப³ஹிஸீமக³தோ தம் சீவரம் காரேதி, ஸோ கதசீவரோ ‘‘விஹாரம் பச்சேஸ்ஸாமீ’’தி சிந்தேந்தோ ப³ஹிஉபசாரஸீமாயமேவ கதி²னுப்³பா⁴ரகாலம் வீதினாமேதி, தஸ்ஸ கதி²னுப்³பா⁴ரோ ப⁴வதி. அயம் கதி²னுப்³பா⁴ரோ சீவரகாலஸ்ஸ அந்திமதி³வஸஸங்கா²தாய ஸீமாய அதிக்கந்தத்தா ஸீமாதிக்கந்திகோ நாம.

அத்த²தகதி²னோ பி⁴க்கு² சீவரம் ஆதா³ய ‘‘இமம் விஹாரம் பச்சேஸ்ஸாமீ’’தி சிந்தேத்வா பக்கமதி, ஸோ கதசீவரோ ‘‘விஹாரம் பச்சேஸ்ஸாமீ’’தி சிந்தேந்தோ பச்சாக³ந்த்வா விஹாரே கதி²னுப்³பா⁴ரம் பப்போதி, தஸ்ஸ பி⁴க்கு²னோ விஹாரே பி⁴க்கூ²ஹி ஸஹ கதி²னுப்³பா⁴ரோ ப⁴வதி. அயம் கதி²னுப்³பா⁴ரோ விஹாரே பி⁴க்கூ²ஹி ஸஹ கதத்தா ஸஹுப்³பா⁴ரோ நாம. அயம் அட்ட²விதோ⁴ கதி²னுப்³பா⁴ரோ அட்ட² மாதிகா நாம. வுத்தஞ்ஹேதம் கதி²னக்க²ந்த⁴கபாளியம் (மஹாவ. 310) ‘‘அட்டி²மா, பி⁴க்க²வே, மாதிகா கதி²னஸ்ஸ உப்³பா⁴ராய பக்கமனந்திகா நிட்டா²னந்திகா ஸன்னிட்டா²னந்திகா நாஸனந்திகா ஸவனந்திகா ஆஸாவச்சே²தி³கா ஸீமாதிக்கந்திகா ஸஹுப்³பா⁴ராதி. பி⁴க்கு² அத்த²தகதி²னோ கதசீவரமாதா³ய பக்கமதி ‘ந பச்சேஸ்ஸ’ந்தி, தஸ்ஸ பி⁴க்கு²னோ பக்கமனந்திகோ கதி²னுப்³பா⁴ரோ’’திஆதி³, வினயவினிச்ச²யப்பகரணே ச –

‘‘பக்கமனஞ்ச நிட்டா²னம், ஸன்னிட்டா²னஞ்ச நாஸனம்;

ஸவனமாஸா ச ஸீமா ச, ஸஹுப்³பா⁴ரோதி அட்டி²மா’’தி. (வி. வி. 2709);

பலிபோ³தோ⁴ து³விதோ⁴ ஆவாஸபலிபோ³தோ⁴, சீவரபலிபோ³தோ⁴தி. தத்த² ‘‘யஸ்மிம் விஹாரே கதி²னம் அத்த²தம் ஹோதி, தஸ்மிம் வஸிஸ்ஸாமீ’’தி அஞ்ஞத்த² க³ச்ச²ந்தோபி ‘‘புன தம் விஹாரம் ஆக³ச்சி²ஸ்ஸாமீ’’தி ஸாபேக்கோ² ஹோதி. அயம் ஆவாஸபலிபோ³தோ⁴ நாம. தஸ்ஸ பி⁴க்கு²னோ சீவரம் அகதம் வா ஹோதி அபரியோஸிதம் வா, ‘‘அஞ்ஞதோ சீவரம் லச்சா²மீ’’தி ஆஸா வா அனுபச்சி²ன்னா ஹோதி. அயம் சீவரபலிபோ³தோ⁴ நாம. வுத்தஞ்ஹேதம் கதி²னக்க²ந்த⁴கே (மஹாவ. 325) ‘‘கதமே ச, பி⁴க்க²வே, த்³வே கதி²னஸ்ஸ பலிபோ³தா⁴? ஆவாஸபலிபோ³தோ⁴ ச சீவரபலிபோ³தோ⁴ ச. கத²ஞ்ச, பி⁴க்க²வே, ஆவாஸபலிபோ³தோ⁴ ஹோதி? இத⁴, பி⁴க்க²வே, பி⁴க்கு² வஸதி வா தஸ்மிம் ஆவாஸே, ஸாபேக்கோ² வா பக்கமதி ‘பச்சேஸ்ஸ’ந்தி, ஏவம் கோ², பி⁴க்க²வே, ஆவாஸபலிபோ³தோ⁴ ஹோதி. கத²ஞ்ச, பி⁴க்க²வே, சீவரபலிபோ³தோ⁴ ஹோதி? இத⁴, பி⁴க்க²வே, பி⁴க்கு²னோ சீவரம் அகதம் வா ஹோதி விப்பகதம் வா, சீவராஸா வா அனுபச்சி²ன்னா, ஏவம் கோ², பி⁴க்க²வே, சீவரபலிபோ³தோ⁴ ஹோதீ’’தி.

உப்³பா⁴ரோ து³விதோ⁴ அட்ட²மாதிகாஉப்³பா⁴ரஅந்தருப்³பா⁴ரவஸேன. தத்த² ப³ஹிஉபசாரஸீமக³தானம் பி⁴க்கூ²னம் வஸேன வுத்தா ஸத்த கதி²னுப்³பா⁴ரா ச ப³ஹிஉபசாரஸீமம் க³ந்த்வா நிவத்தேத்வா கதி²னத்த²தவிஹாரே அந்தருப்³பா⁴ரம் பத்வா பி⁴க்கூ²ஹி ஸஹ அந்தருப்³பா⁴ரஸ்ஸ கதத்தா ஸஹுப்³பா⁴ரஸங்கா²தோ ஏகோ கதி²னுப்³பா⁴ரோ சாதி இமே அட்ட² கதி²னுப்³பா⁴ரா அட்ட²மாதிகாய பவிட்ட²த்தா அட்ட²மாதிகாஉப்³பா⁴ரோ நாம. ப³ஹிஸீமம் அக³ந்த்வா தஸ்மிம்யேவ விஹாரே நிஸீதி³த்வா கதி²னுப்³பா⁴ரம் ஞத்திது³தியகம்மவாசாய கதி²னுப்³பா⁴ரோ அட்ட²மாதிகாய அப்பவிட்டோ² ஹுத்வா காலபரிச்சே²த³ம் அப்பத்வா அந்தராயேவ கதத்தா அந்தருப்³பா⁴ரோ நாம.

அந்தருப்³பா⁴ரஸஹுப்³பா⁴ரா ஞத்திது³தியகம்மவாசாயேவ கதா, ஏவம் ஸந்தே கோ தேஸம் விஸேஸோதி? அந்தருப்³பா⁴ரோ ப³ஹிஸீமம் அக³ந்த்வா அந்தோஸீமாயமேவ டி²தேஹி பி⁴க்கூ²ஹி கதோ. ஸஹுப்³பா⁴ரோ ப³ஹிஸீமம் க³தேன பி⁴க்கு²னா பச்சாக³ந்த்வா தம் அந்தருப்³பா⁴ரம் பத்வா தேஹி அந்தோஸீமட்டே²ஹி பி⁴க்கூ²ஹி ஸஹ கதோதி அயமேதேஸம் விஸேஸோ. பக்கமனந்திகாத³யோ ஸத்த கதி²னுப்³பா⁴ரா ந கம்மவாசாய கதா, கேவலம் த்³வின்னம் பலிபோ³தா⁴னம் உபச்சே²தே³ன பஞ்சஹி ஆனிஸம்ஸேஹி விக³தத்தா கதி²னுப்³பா⁴ரா நாம ஹோந்தி. வுத்தஞ்ஹேதம் ஆசரியபு³த்³த⁴த³த்தத்தே²ரேன வினயவினிச்ச²யே –

‘‘அட்ட²ன்னம் மாதிகானம் வா, அந்தருப்³பா⁴ரதோபி வா;

உப்³பா⁴ராபி து³வே வுத்தா, கதி²னஸ்ஸ மஹேஸினா’’தி.

தட்டீகாயம்பி ‘‘அட்ட²ன்னம் மாதிகானந்தி ப³ஹிஸீமக³தானம் வஸேன வுத்தா. பக்கமனந்திகாத³யோ ஸத்த மாதிகா ப³ஹிஸீமம் க³ந்த்வா அந்தருப்³பா⁴ரம் ஸம்பத்தஸ்ஸ வஸேன வுத்தா, ஸஹுப்³பா⁴ரோ இமாஸம் அட்ட²ன்னம் மாதிகானம் வஸேன ச. அந்தருப்³பா⁴ரதோபி வாதி ப³ஹிஸீமம் அக³ந்த்வா தத்தே²வ வஸித்வா கதி²னுப்³பா⁴ரகம்மேன உப்³ப⁴தகதி²னானம் வஸேன லப்³ப⁴னதோ அந்தருப்³பா⁴ரோதி மஹேஸினா கதி²னஸ்ஸ உப்³பா⁴ரா து³வே வுத்தாதி யோஜனா. ப³ஹிஸீமம் க³ந்த்வா ஆக³தஸ்ஸ வஸேன ஸஉப்³பா⁴ரோ, ப³ஹிஸீமம் அக³தானம் வஸேன அந்தருப்³பா⁴ரோதி ஏகோயேவ உப்³பா⁴ரோ த்³விதா⁴ வுத்தோ’’தி வுத்தம்.

கஸ்மா பன அந்தருப்³பா⁴ரவஸேன கம்மவாசாய கதி²னம் உப்³ப⁴தந்தி? மஹாதா³னம் தா³துகாமேஹி உபாஸகேஹி ஆக³தஸ்ஸ ஸங்க⁴ஸ்ஸ அகாலசீவரம் தா³துகாமேஹி யாசிதத்தா. வுத்தஞ்ஹி பி⁴க்கு²னீவிப⁴ங்க³பாளியம் (பாசி. 925) ‘‘தேன கோ² பன ஸமயேன அஞ்ஞதரேன உபாஸகேன ஸங்க⁴ம் உத்³தி³ஸ்ஸ விஹாரோ காராபிதோ ஹோதி, ஸோ தஸ்ஸ விஹாரஸ்ஸ மஹே உப⁴தோஸங்க⁴ஸ்ஸ அகாலசீவரம் தா³துகாமோ ஹோதி. தேன கோ² பன ஸமயேன உப⁴தோஸங்க⁴ஸ்ஸ கதி²னம் அத்த²தம் ஹோதி. அத² கோ² ஸோ உபாஸகோ ஸங்க⁴ம் உபஸங்கமித்வா கதி²னுத்³தா⁴ரம் யாசீ’’திஆதி³. கத²ம் பன கம்மவாசா காதப்³பா³தி? ‘‘ஸுணாது மே, ப⁴ந்தே, ஸங்கோ⁴, யதி³ ஸங்க⁴ஸ்ஸ பத்தகல்லம், ஸங்கோ⁴ கதி²னம் உத்³த⁴ரேய்ய, ஏஸா ஞத்தி. ஸுணாது மே, ப⁴ந்தே, ஸங்கோ⁴, ஸங்கோ⁴ கதி²னம் உத்³த⁴ரதி. யஸ்ஸாயஸ்மதோ க²மதி கதி²னஸ்ஸ உத்³தா⁴ரோ, ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸேய்ய. உப்³ப⁴தம் ஸங்கே⁴ன கதி²னம், க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி ஏவம் காதப்³பா³தி. வுத்தஞ்ஹி பி⁴க்கு²னீவிப⁴ங்கே³ ‘‘அனுஜானாமி, பி⁴க்க²வே, கதி²னம் உத்³த⁴ரிதும், ஏவஞ்ச பன, பி⁴க்க²வே, கதி²னம் உத்³த⁴ரிதப்³ப³ம். ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ – ஸுணாது மே…பே… தா⁴ரயாமீ’’தி.

ஏதேன ச கதி²னுப்³பா⁴ரேன புப்³பே³ கதம் கதி²னது³ஸ்ஸதா³னஞத்திது³தியகம்மவாசம் உப்³ப⁴தந்தி வத³ந்தி, ந பன கதி²னது³ஸ்ஸதா³னஞத்திது³தியகம்மம் உப்³ப⁴தம், அத² கோ² அத்தா²ரகம்மமேவாதி த³ட்ட²ப்³ப³ம். யதி³ ஹி கதி²னது³ஸ்ஸதா³னஞத்திது³தியகம்மம் உப்³ப⁴தம் ப⁴வேய்ய, தாய கம்மவாசாய கதி²னது³ஸ்ஸதா³னஸ்ஸ ஸிஜ்ஜ²னதோ இமாய கதி²னுப்³பா⁴ரகம்மவாசாய தம் புப்³பே³ தி³ன்னது³ஸ்ஸம் புன ஆஹராபேதப்³ப³ம் ஸியா, ந பஞ்சானிஸம்ஸவிக³மனம். யஸ்மா பன இமாய கதி²னுப்³பா⁴ரகம்மவாசாய பஞ்சானிஸம்ஸவிக³மனமேவ ஹோதி, ந புப்³பே³ தி³ன்னகதி²னது³ஸ்ஸஸ்ஸ புன ஆஹராபனம். தேன விஞ்ஞாயதி ‘‘பஞ்சானிஸம்ஸலாப⁴காரணம் அத்த²ரணகம்மமேவ இமாய கதி²னப்³பா⁴ரகம்மவாசாய உத்³த⁴ரீயதி, ந கதி²னது³ஸ்ஸதா³னஞத்திது³தியகம்மவாசாதி, தஸ்மா கதி²னுப்³பா⁴ரகம்மவாசாகரணதோ பச்சா² ஸங்க⁴ஸ்ஸ உப்பன்னம் சீவரம் அகாலசீவரம் ஹோதி, ஸங்கோ⁴ பஞ்சானிஸம்ஸே ந லப⁴தி, சீவரம் ஸப்³ப³ஸங்கி⁴கம் ஹுத்வா ஆக³தாக³தஸ்ஸ ஸங்க⁴ஸ்ஸ பா⁴ஜனீயம் ஹோதீதி த³ட்ட²ப்³ப³ம். அயமத்தோ² கதி²னது³ஸ்ஸதா³னஞத்திது³தியகம்மவாசாய ச கதி²னுப்³பா⁴ரகம்மவாசாய ச அத்த²ஞ்ச அதி⁴ப்பாயஞ்ச ஸுட்டு² வினிச்சி²னித்வா புப்³பா³பரம் ஸம்ஸந்தி³த்வா பச்சேதப்³போ³தி.

ஏத்த² ஸியா – கதி²னுப்³பா⁴ரம் யாசந்தானம் ஸப்³பே³ஸம் கதி²னுப்³பா⁴ரோ தா³தப்³போ³, உதா³ஹு ஏகச்சானந்தி, கிஞ்சேத்த² – யதி³ தாவ ஸப்³பே³ஸம் தா³தப்³போ³, கதி²னுப்³பா⁴ரகம்மேன பஞ்சானிஸம்ஸவிக³மனதோ ஸங்க⁴ஸ்ஸ லாப⁴ந்தராயோ ப⁴வேய்ய, அத² ஏகச்சானம் முகோ²லோகனம் விய ஸியாதி? யதி³ கதி²னத்தா²ரமூலகலாப⁴தோ கதி²னுப்³பா⁴ரமூலகலாபோ⁴ மஹந்தோ ப⁴வேய்ய, தேஸம் யாசந்தானம் கதி²னுப்³பா⁴ரோ தா³தப்³போ³. யதி³ அப்பகோ, ந தா³தப்³போ³. யதி³ ஸமோ, குலப்பஸாத³த்தா²ய தா³தப்³போ³தி. ததா² ஹி வுத்தம் அட்ட²கதா²யம் (பாசி. அட்ட². 927) ‘‘கீதி³ஸோ கதி²னுத்³தா⁴ரோ தா³தப்³போ³, கீதி³ஸோ ந தா³தப்³போ³தி? யஸ்ஸ அத்தா²ரமூலகோ ஆனிஸம்ஸோ மஹா, உப்³பா⁴ரமூலகோ அப்போ, ஏவரூபோ ந தா³தப்³போ³. யஸ்ஸ பன அத்தா²ரமூலகோ ஆனிஸம்ஸோ அப்போ, உப்³பா⁴ரமூலகோ மஹா, ஏவரூபோ தா³தப்³போ³. ஸமானிஸம்ஸோபி ஸத்³தா⁴பரிபாலனத்த²ம் தா³தப்³போ³வா’’தி. இமினாபி விஞ்ஞாயதி ‘‘பஞ்சானிஸம்ஸானம் காரணபூ⁴தம் அத்தா²ரகம்மமேவ உத்³த⁴ரீயதி, ந கதி²னது³ஸ்ஸதா³னபூ⁴தம் ஞத்திது³தியகம்ம’’ந்தி.

ஆனிஸம்ஸகதா²யம் பஞ்சாதி இதா³னி வுச்சமானா அனாமந்தசாராத³யோ பஞ்ச கிரியா. கப்பிஸ்ஸந்தீதி கப்பா ப⁴விஸ்ஸந்தி, அனாபத்திகாரணா ப⁴விஸ்ஸந்தீதி அத்தோ². அனாமந்தசாரோதி அனாமந்தேத்வா சரணம். யோ ஹி தா³யகேஹி ப⁴த்தேன நிமந்திதோ ஹுத்வா ஸப⁴த்தோ ஸமானோ விஹாரே ஸந்தம் பி⁴க்கு²ம் அனாமந்தேத்வா குலேஸு சாரித்தம் ஆபஜ்ஜதி, தஸ்ஸ பி⁴க்கு²னோ சாரித்தஸிக்கா²பதே³ன பாசித்தியாபத்தி ஹோதி, ஸா ஆபத்தி அத்த²தகதி²னஸ்ஸ ந ஹோதீதி அத்தோ². தத்த² சாரித்தஸிக்கா²பத³ம் நாம ‘‘யோ பன பி⁴க்கு² நிமந்திதோ ஸப⁴த்தோ ஸமானோ ஸந்தம் பி⁴க்கு²ம் அனாபுச்சா² புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜேய்ய அஞ்ஞத்ர ஸமயா, பாசித்தியம். தத்தா²யம் ஸமயோ சீவரதா³னஸமயோ சீவரகாரஸமயோ, அயம் தத்த² ஸமயோ’’தி அசேலகவக்³கே³ பஞ்சமஸிக்கா²பத³ம் (பாசி. 299-300). சீவரவிப்பவாஸோதி திண்ணம் சீவரானம் அஞ்ஞதரேன வா ஸப்³பே³ன வா வினா ஹத்த²பாஸே அகத்வா அருணுட்டா²பனம், ஏவம் கரோதோபி து³தியகதி²னஸிக்கா²பதே³ன ஆபத்தி ந ஹோதீதி அதி⁴ப்பாயோ. தத்த² ச து³தியகதி²னஸிக்கா²பத³ம் நாம ‘‘நிட்டி²தசீவரஸ்மிம் பன பி⁴க்கு²னா உப்³ப⁴தஸ்மிம் கதி²னே ஏகரத்தம்பி சே பி⁴க்கு² திசீவரேன விப்பவஸேய்ய அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்திய’’ந்தி ஆக³தம் நிஸ்ஸக்³கி³யேஸு து³தியஸிக்கா²பத³ம் (பாரா. 472).

க³ணபோ⁴ஜனந்தி ஏதேன க³ணபோ⁴ஜனஸிக்கா²பதே³ன அனாபத்தி வுத்தாதி ஸம்ப³ந்தோ⁴. தத்த² க³ணபோ⁴ஜனம் நாம ‘‘அம்ஹாகம் ப⁴த்தம் தே³தா²’’தி பி⁴க்கூ²னம் விஞ்ஞத்தியா வா ‘‘அம்ஹாகம் ப⁴த்தம் க³ண்ஹதா²’’தி தா³யகானம் நிமந்தனேன வா அகப்பியவோஹாரேன சத்தாரோ வா அதிரேகா வா பி⁴க்கூ² ஏகதோ படிக்³க³ண்ஹித்வா ஏகதோ பு⁴ஞ்ஜனம். க³ணபோ⁴ஜனஸிக்கா²பத³ம் நாம ‘‘க³ணபோ⁴ஜனே அஞ்ஞத்ர ஸமயா பாசித்தியம். தத்தா²யம் ஸமயோ கி³லானஸமயோ சீவரதா³னஸமயோ சீவரகாரஸமயோ அத்³தா⁴னக³மனஸமயோ நாவாபி⁴ருஹனஸமயோ மஹாஸமயோ ஸமணப⁴த்தஸமயோ, அயம் தத்த² ஸமயோ’’தி ஆக³தம் போ⁴ஜனவக்³கே³ து³தியஸிக்கா²பத³ம் (பாசி. 215). அனதி⁴ட்டி²தம் அவிகப்பிதம் வட்டதீதி பட²மகதி²னஸிக்கா²பதே³ன ஆபத்தி ந ஹோதீதி அதி⁴ப்பாயோ. தத்த² பட²மகதி²னஸிக்கா²பத³ம் நாம ‘‘நிட்டி²தசீவரஸ்மிம் பன பி⁴க்கு²னா உப்³ப⁴தஸ்மிம் கதி²னே த³ஸாஹபரமம் அதிரேகசீவரம் தா⁴ரேதப்³ப³ம், தம் அதிக்காமயதோ நிஸ்ஸக்³கி³யம் பாசித்திய’’ந்தி ஆக³தம் நிஸ்ஸக்³கி³யேஸு பட²மஸிக்கா²பத³ம் (பாரா. 472). கதி²னத்த²தஸீமாயாதி உபசாரஸீமம் ஸந்தா⁴ய வுத்தம். மதகசீவரந்தி மதஸ்ஸ சீவரம். தத்ருப்பாதே³னாதி ஸங்க⁴ஸந்தகேன ஆராமுய்யானகே²த்தவத்து²ஆதி³னா. யம் ஸங்கி⁴கம் சீவரம் உப்பஜ்ஜதி, தம் தேஸம் ப⁴விஸ்ஸதீதி இமினா சீவரமேவ கதி²னத்தா²ரகானம் பி⁴க்கூ²னம் ஸந்தகம் ஹோதி, ததோ அஞ்ஞம் பிண்ட³பாதபே⁴ஸஜ்ஜாதி³கம் ஆக³தாக³தஸ்ஸ ஸங்க⁴ஸ்ஸ ஸந்தகம் ஹோதீதி த³ஸ்ஸேதி.

ஏவம் அட்ட²ங்க³ஸம்பன்னோ, லஜ்ஜீ பி⁴க்கு² ஸுபேஸலோ;

கரேய்ய கதி²னத்தா²ரம், உப்³பா⁴ரஞ்சாபி ஸாது⁴கந்தி.

இதி வினயஸங்க³ஹஸம்வண்ணனாபூ⁴தே வினயாலங்காரே

கதி²னத்தா²ரவினிச்ச²யகதா²லங்காரோ நாம

ஏகூனதிம்ஸதிமோ பரிச்சே²தோ³.