27. உபஜ்ஜா²யாதி³வத்தவினிச்ச²யகதா²

உபஜ்ஜா²யவத்தகதா²வணனா

183. ஏவம் வஸ்ஸூபனாயிகவினிச்ச²யம் கதே²த்வா இதா³னி உபஜ்ஜா²யவத்தாதி³வத்தகத²ம் கதே²தும் ‘‘வத்தந்தி ஏத்தா²’’திஆதி³மாஹ. தத்த² வத்தேதப்³ப³ம் பவத்தேதப்³ப³ந்தி வத்தம், ஸத்³தி⁴விஹாரிகாதீ³ஹி உபஜ்ஜா²யாதீ³ஸு பவத்தேதப்³ப³ம் ஆபி⁴ஸமாசாரிகஸீலம். தம் கதிவித⁴ந்தி ஆஹ ‘‘வத்தம் நாமேதம்…பே… ப³ஹுவித⁴’’ந்தி. வச்சகுடிவத்தந்தி ஏத்த² இதி-ஸத்³தோ³ ஆத்³யத்தோ². தேன ஸத்³தி⁴விஹாரிகவத்தஅந்தேவாஸிகவத்தஅனுமோத³னவத்தானி ஸங்க³ய்ஹந்தி. வுத்தஞ்ஹி தத்த² தத்த² அட்ட²கதா²ஸு ‘‘சுத்³த³ஸ க²ந்த⁴கவத்தானீ’’தி. வத்தக்க²ந்த⁴கே (சூளவ. 356) ச பாளியம் ஆக³தமேவ, தத்த² பன ஆக³ந்துகவத்ததோ பட்டா²ய ஆக³தம், இத⁴ உபஜ்ஜா²யவத்ததோ. இதோ அஞ்ஞானிபி பஞ்சஸத்ததி ஸேகி²யவத்தானி த்³வேஅஸீதி மஹாவத்தானி ச வத்தமேவ. தேஸு பன ஸேகி²யவத்தானி மஹாவிப⁴ங்கே³ ஆக³தானி, மஹாவத்தானி கம்மக்க²ந்த⁴கபாரிவாஸிகக்க²ந்த⁴கேஸு (சூளவ. 75 ஆத³யோ), தஸ்மா இத⁴ சுத்³த³ஸ க²ந்த⁴கவத்தானியேவ த³ஸ்ஸிதானி. தேஸு உபஜ்ஜா²யவத்தம் பட²மம் த³ஸ்ஸேந்தோ ‘‘தத்த² உபஜ்ஜா²யவத்தம் தாவ ஏவம் வேதி³தப்³ப³’’ந்த்யாதி³மாஹ.

தத்த² கோ உபஜ்ஜா²யோ, கேனட்டே²ன உபஜ்ஜா²யோ, கத²ம் க³ஹிதோ உபஜ்ஜா²யோ, கேன வத்திதப்³ப³ம் உபஜ்ஜா²யவத்தம், கதமம் தம் வத்தந்தி? தத்த² கோ உபஜ்ஜா²யோதி ‘‘அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன த³ஸவஸ்ஸேன வா அதிரேகத³ஸவஸ்ஸேன வா உபஸம்பாதே³து’’ந்திஆதி³வசனதோ (மஹாவ. 76) ப்³யத்திப³லஸம்பன்னோ உபஸம்பத³தோ பட்டா²ய த³ஸவஸ்ஸோ வா அதிரேகத³ஸவஸ்ஸோ வா பி⁴க்கு² உபஜ்ஜா²யோ. கேனட்டே²ன உபஜ்ஜா²யோதி வஜ்ஜாவஜ்ஜம் உபனிஜ்ஜா²யதீதி உபஜ்ஜா²யோ, ஸத்³தி⁴விஹாரிகானம் கு²த்³த³கம் வஜ்ஜம் வா மஹந்தம் வஜ்ஜம் வா பு⁴ஸோ சிந்தேதீதி அத்தோ². கத²ம் க³ஹிதோ ஹோதி உபஜ்ஜா²யோதி ஸத்³தி⁴விஹாரிகேன ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ‘‘உபஜ்ஜா²யோ மே, ப⁴ந்தே, ஹோஹீ’’தி திக்க²த்தும் வுத்தே ஸசே உபஜ்ஜா²யோ ‘‘ஸாஹூ’’தி வா ‘‘லஹூ’’தி வா ‘‘ஓபாயிக’’ந்தி வா ‘‘பதிரூப’’ந்தி வா ‘‘பாஸாதி³கேன ஸம்பாதே³ஹீ’’தி வா இமேஸு பஞ்சஸு பதே³ஸு யஸ்ஸ கஸ்ஸசி பத³ஸ்ஸ வஸேன காயேன வா வாசாய வா காயவாசாஹி வா ‘‘க³ஹிதோ தயா உபஜ்ஜா²யோ’’தி உபஜ்ஜா²யக்³க³ஹணம் விஞ்ஞாபேதி, க³ஹிதோ ஹோதி உபஜ்ஜா²யோ. தத்த² ஸாஹூதி ஸாது⁴. லஹூதி அக³ரு, ஸுப⁴ரதாதி அத்தோ². ஓபாயிகந்தி உபாயபடிஸம்யுத்தம், ஏவம் படிபஜ்ஜனம் நித்த²ரணுபாயோதி அத்தோ². பதிரூபந்தி ஸாமீசிகம்மமித³ந்தி அத்தோ². பாஸாதி³கேனாதி பஸாதா³வஹேன காயவசீபயோகே³ன ஸம்பாதே³ஹீதி அத்தோ².

கேன வத்திதப்³ப³ம் உபஜ்ஜா²யவத்தந்தி க³ஹிதஉபஜ்ஜா²யேன ஸத்³தி⁴விஹாரிகேன வத்திதப்³ப³ம். கதமம் தம் வத்தந்தி இத³ம் ஆக³தமேவ, தத்த² காலஸ்ஸேவ உட்டா²ய உபாஹனா ஓமுஞ்சித்வாதி ஸசஸ்ஸ பச்சூஸகாலே சங்கமனத்தா²ய வா தோ⁴தபாத³பரிஹரணத்தா²ய வா படிமுக்கா உபாஹனா பாத³க³தா ஹோந்தி, தா காலஸ்ஸேவ உட்டா²ய அபனேத்வா. தாதி³ஸமேவ முக²தோ⁴வனோத³கம் தா³தப்³ப³ந்தி உதும்பி ஸரீரஸபா⁴வே ச ஏகாகாரே தாதி³ஸமேவ தா³தப்³ப³ம்.

ஸகு³ணம் கத்வாதி உத்தராஸங்க³ம் ஸங்கா⁴டிஞ்சாதி த்³வே சீவரானி ஏகதோ கத்வா தா த்³வேபி ஸங்கா⁴டியோ தா³தப்³பா³. ஸப்³ப³ஞ்ஹி சீவரம் ஸங்க⁴டிதத்தா ஸங்கா⁴டீதி வுச்சதி. தேன வுத்தம் ‘‘ஸங்கா⁴டியோ தா³தப்³பா³’’தி. பத³வீதிஹாரேஹீதி ஏத்த² பத³ம் வீதிஹரதி ஏத்தா²தி பத³வீதிஹாரோ, பத³வீதிஹாரட்டா²னம். து³தவிலம்பி³தம் அகத்வா ஸமக³மனேன த்³வின்னம் பதா³னம் அந்தரே முட்டி²ரதனமத்தம். பதா³னம் வா வீதிஹரணம் அபி⁴முக²ம் ஹரித்வா நிக்கே²போ பத³வீதிஹாரோதி ஏவமேத்த² அத்தோ² த³ட்ட²ப்³போ³. ந உபஜ்ஜா²யஸ்ஸ ப⁴ணமானஸ்ஸ அந்தரந்தரா கதா² ஓபாதேதப்³பா³தி அந்தரக⁴ரே வா அஞ்ஞத்ர வா ப⁴ணமானஸ்ஸ அனிட்டி²தே தஸ்ஸ வசனே அஞ்ஞா கதா² ந ஸமுட்டா²பேதப்³பா³. இதோ பட்டா²யாதி ‘‘ந உபஜ்ஜா²யஸ்ஸ ப⁴ணமானஸ்ஸா’’தி ஏத்த² ந-காரதோ பட்டா²ய. தேன நாதிதூ³ரேதிஆதீ³ஸு ந-காரபடிஸித்³தே⁴ஸு ஆபத்தி நத்தீ²தி த³ஸ்ஸேதி. ஸப்³ப³த்த² து³க்கடாபத்தீதி ஆபதா³உம்மத்தகி²த்தசித்தவேத³னாட்டதாதீ³ஹி வினா பண்ணத்திம் அஜானித்வாபி வத³ந்தஸ்ஸ கி³லானஸ்ஸ ச து³க்கடமேவ. ஆபதா³ஸு ஹி அந்தரந்தரா கதா² வத்தும் வட்டதி, ஏவமஞ்ஞேஸு ந-காரபடிஸித்³தே⁴ஸு ஈதி³ஸேஸு, இதரேஸு பன கி³லானோபி ந முச்சதி. ஸப்³ப³த்த² து³க்கடாபத்தி வேதி³தப்³பா³தி ‘‘ஈதி³ஸேஸு கி³லானோபி ந முச்சதீ’’தி த³ஸ்ஸனத்த²ம் வுத்தம். அஞ்ஞம்பி ஹி யதா²வுத்தம் உபஜ்ஜா²யவத்தம் அனாத³ரியேன அகரோந்தஸ்ஸ அகி³லானஸ்ஸ வத்தபே⁴தே³ ஸப்³ப³த்த² து³க்கடமேவ, தேனேவ வக்க²தி ‘‘அகி³லானேன ஹி ஸத்³தி⁴விஹாரிகேன ஸட்டி²வஸ்ஸேனபி ஸப்³ப³ம் உபஜ்ஜா²யவத்தம் காதப்³ப³ம், அனாத³ரியேன அகரோந்தஸ்ஸ வத்தபே⁴தே³ து³க்கடம். ந-காரபடிஸம்யுத்தேஸு பன பதே³ஸு கி³லானஸ்ஸபி படிக்கி²த்தகிரியம் கரோந்தஸ்ஸ து³க்கடமேவா’’தி. ஆபத்திஸாமந்தா ப⁴ணமானோதி பத³ஸோத⁴ம்ம(பாசி. 44 ஆத³யோ)-து³ட்டு²ல்லாதி³வஸேன (பாரா. 283) ஆபத்தியா ஆஸன்னவாசம் ப⁴ணமானோ. ஆபத்தியா ஆஸன்னவாசந்தி ச ஆபத்திஜனகமேவ வசனம் ஸந்தா⁴ய வத³தி. யாய ஹி வாசாய ஆபத்திம் ஆபஜ்ஜதி, ஸா வாசா ஆபத்தியா ஆஸன்னாதி வுச்சதி.

சீவரேன பத்தம் வேடே²த்வாதி ஏத்த² ‘‘உத்தராஸங்க³ஸ்ஸ ஏகேன கண்ணேன வேடே²த்வா’’தி க³ண்டி²பதே³ஸு வுத்தம். ஹேட்டா²பீட²ம் வா பராமஸித்வாதி இத³ம் புப்³பே³ தத்த² ட²பிதபத்தாதி³னா அஸங்க⁴ட்டனத்தா²ய வுத்தம். சக்கு²னா ஓலோகேத்வாபி அஞ்ஞேஸம் அபா⁴வம் ஞத்வாபி ட²பேதும் வட்டதி ஏவ. சதுரங்கு³லம் கண்ணம் உஸ்ஸாரேத்வாதி கண்ணம் சதுரங்கு³லப்பமாணம் அதிரேகம் கத்வா ஏவம் சீவரம் ஸங்க⁴ரிதப்³ப³ம். ஓபோ⁴கே³ காயப³ந்த⁴னம் காதப்³ப³ந்தி காயப³ந்த⁴னம் ஸங்க⁴ரித்வா சீவரபோ⁴கே³ பக்கி²பித்வா ட²பேதப்³ப³ம். ஸசே பிண்ட³பாதோ ஹோதீதி ஏத்த² யோ கா³மேயேவ வா அந்தரக⁴ரே வா படிக்கமனே வா பு⁴ஞ்ஜித்வா ஆக³ச்ச²தி, பிண்ட³ம் வா ந லப⁴தி, தஸ்ஸ பிண்ட³பாதோ ந ஹோதி, கா³மே அபு⁴த்தஸ்ஸ பன லத்³த⁴பி⁴க்க²ஸ்ஸ வா ஹோதி, தஸ்மா ‘‘ஸசே பிண்ட³பாதோ ஹோதீ’’திஆதி³ வுத்தம். தத்த² கா³மேதி கா³மபரியாபன்னே தாதி³ஸே கிஸ்மிஞ்சி பதே³ஸே. அந்தரக⁴ரேதி அந்தோகே³ஹே. படிக்கமனேதி ஆஸனஸாலாயம். ஸசேபி தஸ்ஸ ந ஹோதி, பு⁴ஞ்ஜிதுகாமோ ச ஹோதி, உத³கம் த³த்வா அத்தனா லத்³த⁴தோபி பிண்ட³பாதோ உபனேதப்³போ³. திக்க²த்தும் பானீயேன புச்சி²தப்³போ³தி ஸம்ப³ந்தோ⁴, ஆதி³ம்ஹி மஜ்ஜே² அந்தேதி ஏவம் திக்க²த்தும் புச்சி²தப்³போ³தி அத்தோ². உபகட்டோ²தி ஆஸன்னோ. தோ⁴தவாலிகாயாதி உத³கேன க³தட்டா²னே நிரஜாய பரிஸுத்³த⁴வாலிகாய.

நித்³தூ⁴மேதி ஜந்தாக⁴ரே ஜலமானஅக்³கி³தூ⁴மரஹிதே. ஜந்தாக⁴ரஞ்ஹி நாம ஹிமபாதப³ஹுகேஸு தே³ஸேஸு தப்பச்சயரோக³பீளாதி³னிவாரணத்த²ம் ஸரீரஸேத³தாபனட்டா²னம். தத்த² கிர அந்த⁴காரபடிச்ச²ன்னதாய ப³ஹூபி ஏகதோ பவிஸித்வா சீவரம் நிக்கி²பித்வா அக்³கி³தாபபரிஹாராய மத்திகாய முக²ம் லிம்பித்வா ஸரீரம் யாவத³த்த²ம் ஸேதே³த்வா சுண்ணாதீ³ஹி உப்³ப³ட்டேத்வா நஹாயந்தி. தேனேவ பாளியம் (மஹாவ. 66) ‘‘சுண்ணம் ஸன்னேதப்³ப³’’ந்திஆதி³ வுத்தம். ஸசே உஸ்ஸஹதீதி ஸசே பஹோதி. வுத்தமேவத்த²ம் விபா⁴வேதி ‘‘கேனசி கே³லஞ்ஞேன அனபி⁴பூ⁴தோ ஹோதீ’’தி. அபடிக⁴ம்ஸந்தேனாதி பூ⁴மியம் அபடிக⁴ம்ஸந்தேன. கவாடபீட²ந்தி கவாடபீட²ஞ்ச பிட்ட²ஸங்கா⁴தஞ்ச அச்சு²பந்தேன. ஸந்தானகந்தி யம் கிஞ்சி கீடகுலாவகமக்கடகஸுத்தாதி³. உல்லோகா பட²மம் ஓஹாரேதப்³ப³ந்தி உல்லோகதோ பட²மம் உல்லோகம் ஆதி³ம் கத்வா அவஹரிதப்³ப³ந்தி அத்தோ². உல்லோகந்தி ச உத்³த⁴ம் ஓலோகனட்டா²னம், உபரிபா⁴க³ந்தி அத்தோ². ஆலோகஸந்தி⁴கண்ணபா⁴கா³தி ஆலோகஸந்தி⁴பா⁴கா³ ச கண்ணபா⁴கா³ ச, அப்³ப⁴ந்தரபா³ஹிரவாதபானகவாடகானி ச க³ப்³ப⁴ஸ்ஸ ச சத்தாரோ கோணா ஸம்மஜ்ஜிதப்³பா³தி அத்தோ².

அஞ்ஞத்த² நேதப்³போ³தி யத்த² விஹாரதோ ஸாஸனே அனபி⁴ரதி உப்பன்னா, ததோ அஞ்ஞத்த² கல்யாணமித்தாதி³ஸம்பத்தியுத்தட்டா²னே நேதப்³போ³. ந ச அச்சி²ன்னே தே²வே பக்கமிதப்³ப³ந்தி ரஜிதசீவரதோ யாவ அப்பமத்தகம்பி ரஜனம் க³ளதி, ந தாவ பக்கமிதப்³ப³ம். ந உபஜ்ஜா²யம் அனாபுச்சா² ஏகச்சஸ்ஸ பத்தோ தா³தப்³போ³திஆதி³ ஸப்³ப³ம் உபஜ்ஜா²யஸ்ஸ விஸபா⁴க³புக்³க³லானம் வஸேன கதி²தம். ஏத்த² ச விஸபா⁴க³புக்³க³லானந்தி லஜ்ஜினோ வா அலஜ்ஜினோ வா உபஜ்ஜா²யஸ்ஸ அவட்³டி⁴காமே ஸந்தா⁴ய வுத்தம். ஸசே பன உபஜ்ஜா²யோ அலஜ்ஜீ ஓவாத³ம்பி ந க³ண்ஹாதி, லஜ்ஜினோ ச ஏதஸ்ஸ விஸபா⁴கா³ ஹோந்தி, தத்த² உபஜ்ஜா²யம் விஹாய லஜ்ஜீஹேவ ஸத்³தி⁴ம் ஆமிஸாதி³பரிபோ⁴கோ³ காதப்³போ³. உபஜ்ஜா²யாதி³பா⁴வோ ஹேத்த² நப்பமாணந்தி த³ட்ட²ப்³ப³ம். பரிவேணம் க³ந்த்வாதி உபஜ்ஜா²யஸ்ஸ பரிவேணம் க³ந்த்வா. ஸுஸானந்தி இத³ம் உபலக்க²ணம். உபசாரஸீமதோ ப³ஹி க³ந்துகாமேன அனாபுச்சா² க³ந்தும் ந வட்டதி. வுட்டா²னமஸ்ஸ ஆக³மேதப்³ப³ந்தி கே³லஞ்ஞதோ வுட்டா²னம் அஸ்ஸ ஆக³மேதப்³ப³ம்.

உபஜ்ஜா²யவத்தகதா²வண்ணனா நிட்டி²தா.

ஆசரியவத்தகதா²வண்ணனா

184. ஆசரியவத்தகதா²யம் கோ ஆசரியோ, கேனட்டே²ன ஆசரியோ, கதிவிதோ⁴ ஆசரியோ, கத²ம் க³ஹிதோ ஆசரியோ, கேன வத்திதப்³ப³ம் ஆசரியவத்தம், கதமம் தம் வத்தந்தி? தத்த² கோ ஆசரியோதி ‘‘அனுஜானாமி, பி⁴க்க²வே, த³ஸவஸ்ஸம் நிஸ்ஸாய வத்து²ம் த³ஸவஸ்ஸேன நிஸ்ஸயம் தா³து’’ந்திஆதி³வசனதோ (மஹாவ. 77) ப்³யத்திப³லஸம்பன்னோ த³ஸவஸ்ஸோ வா அதிரேகத³ஸவஸ்ஸோ வா பி⁴க்கு² ஆசரியோ. கேனட்டே²ன ஆசரியோதி அந்தேவாஸிகேன ஆபு⁴ஸோ சரிதப்³போ³தி ஆசரியோ, உபட்டா²தப்³போ³தி அத்தோ². கதிவிதோ⁴ ஆசரியோதி நிஸ்ஸயாசரியபப்³ப³ஜ்ஜாசரியஉபஸம்பதா³சரியத⁴ம்மாசரியவஸேன சதுப்³பி³தோ⁴. தத்த² நிஸ்ஸயம் க³ஹேத்வா தம் நிஸ்ஸாய வத்த²ப்³போ³ நிஸ்ஸயாசரியோ. பப்³ப³ஜிதகாலே ஸிக்கி²தப்³ப³ஸிக்கா²பகோ பப்³ப³ஜ்ஜாசரியோ. உபஸம்பத³காலே கம்மவாசானுஸ்ஸாவகோ உபஸம்பதா³சரியோ. பு³த்³த⁴வசனஸிக்கா²பகோ த⁴ம்மாசரியோ நாம. கத²ம் க³ஹிதோ ஹோதி ஆசரியோதி அந்தேவாஸிகேன ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ‘‘ஆசரியோ மே, ப⁴ந்தே, ஹோஹி, ஆயஸ்மதோ நிஸ்ஸாய வச்சா²மீ’’தி திக்க²த்தும் வுத்தே ஆசரியோ ‘‘ஸாஹூ’’தி வா ‘‘லஹூ’’தி வா ‘‘ஓபாயிக’’ந்தி வா ‘‘பதிரூப’’ந்தி வா ‘‘பாஸாதி³கேன ஸம்பாதே³ஹீ’’தி வா காயேன விஞ்ஞாபேதி, வாசாய விஞ்ஞாபேதி, காயவாசாஹி விஞ்ஞாபேதி, க³ஹிதோ ஹோதி ஆசரியோ.

கேன வத்திதப்³ப³ம் ஆசரியவத்தந்தி அந்தேவாஸிகேன வத்திதப்³ப³ம் ஆசரியவத்தம். ப்³யத்தேன பி⁴க்கு²னா பஞ்ச வஸ்ஸானி நிஸ்ஸாய வத்த²ப்³ப³ம், அப்³யத்தேன யாவஜீவம். ஏத்த² ஸசாயம் பி⁴க்கு² வுட்³ட⁴தரம் ஆசரியம் ந லப⁴தி, உபஸம்பதா³ய ஸட்டி²வஸ்ஸோ வா ஸத்ததிவஸ்ஸோ வா ஹோதி, நவகதரஸ்ஸபி ப்³யத்தஸ்ஸ ஸந்திகே உக்குடிகம் நிஸீதி³த்வா அஞ்ஜலிம் பக்³க³ஹேத்வா ‘‘ஆசரியோ மே, ஆவுஸோ, ஹோஹி, ஆயஸ்மதோ நிஸ்ஸாய வச்சா²மீ’’தி ஏவம் திக்க²த்தும் வத்வா நிஸ்ஸயோ க³ஹேதப்³போ³. கா³மப்பவேஸனம் ஆபுச்ச²ந்தேனபி உக்குடிகம் நிஸீதி³த்வா அஞ்ஜலிம் பக்³க³ஹேத்வா ‘‘கா³மப்பவேஸனம் ஆபுச்சா²மி ஆசரியா’’தி வத்தப்³ப³ம். ஏஸ நயோ ஸப்³ப³ஆபுச்ச²னேஸு. கதமம் தம் வத்தந்தி ஏத்த² உபஜ்ஜா²யவத்ததோ அஞ்ஞம் நத்தீ²தி ஆஹ ‘‘இத³மேவ ச…பே… ஆசரியவத்தந்தி வுச்சதீ’’தி. நனு உபஜ்ஜா²சரியா பி⁴ன்னபத³த்தா², அத² கஸ்மா இத³மேவ ‘‘ஆசரியவத்த’’ந்தி வுச்சதீதி ஆஹ ‘‘ஆசரியஸ்ஸ கத்தப்³ப³த்தா’’தி. யதா² ஏகோபி பி⁴க்கு² மாதுபா⁴தாபூ⁴தத்தா ‘‘மாதுலோ’’தி ச த⁴ம்மே ஸிக்கா²பகத்தா ‘‘ஆசரியோ’’தி ச வுச்சதி, ஏவம் ஏகமேவ வத்தம் உபஜ்ஜா²யஸ்ஸ கத்தப்³ப³த்தா ‘‘உபஜ்ஜா²யவத்த’’ந்தி ச ஆசரியஸ்ஸ கத்தப்³ப³த்தா ‘‘ஆசரியவத்த’’ந்தி ச வுச்சதீதி அதி⁴ப்பாயோ. ஏவம் ஸந்தேபி நாமே பி⁴ன்னே அத்தோ² பி⁴ன்னோ ஸியாதி ஆஹ ‘‘நாமமத்தமேவ ஹேத்த² நான’’ந்தி. யதா² ‘‘இந்தோ³ ஸக்கோ’’திஆதீ³ஸு நாமமத்தமேவ பி⁴ன்னம், ந அத்தோ², ஏவமேத்தா²பீதி த³ட்ட²ப்³போ³தி.

இதா³னி தஸ்மிம் வத்தே ஸத்³தி⁴விஹாரிகஅந்தேவாஸிகானம் வஸேன லப்³ப⁴மானம் கஞ்சி விஸேஸம் த³ஸ்ஸேந்தோ ‘‘தத்த² யாவ சீவரரஜன’’ந்த்யாதி³மாஹ. ததோ உபஜ்ஜா²யாசரியானம் வஸேன விஸேஸம் த³ஸ்ஸேதும் ‘‘உபஜ்ஜா²யே’’த்யாதி³மாஹ. தேஸு வத்தம் ஸாதி³யந்தேஸு ஆபத்தி, அஸாதி³யந்தேஸு அனாபத்தி, தேஸு அஜானந்தேஸு, ஏகஸ்ஸ பா⁴ரகரணேபி அனாபத்தீதி அயமேத்த² பிண்ட³த்தோ². இதா³னி அந்தேவாஸிகவிஸேஸவஸேன லப்³ப⁴மானவிஸேஸம் த³ஸ்ஸேதுமாஹ ‘‘ஏத்த² சா’’திஆதி³.

ஆசரியவத்தகதா²வண்ணனா நிட்டி²தா.

ஸத்³தி⁴விஹாரிகவத்தகதா²வண்ணனா

ஸத்³தி⁴விஹாரிகவத்தே கோ ஸத்³தி⁴விஹாரிகோ, கேனட்டே²ன ஸத்³தி⁴விஹாரிகோ, கேன வத்திதப்³ப³ம் ஸத்³தி⁴விஹாரிகவத்தம், கதமம் தம் வத்தந்தி? தத்த² கோ ஸத்³தி⁴விஹாரிகோதி உபஸம்பன்னோ வா ஹோது ஸாமணேரோ வா, யோ உபஜ்ஜ²ம் க³ண்ஹாதி, ஸோ ஸத்³தி⁴விஹாரிகோ நாம. கேனட்டே²ன ஸத்³தி⁴விஹாரிகோதி உபஜ்ஜா²யேன ஸத்³தி⁴ம் விஹாரோ ஏதஸ்ஸ அத்தீ²தி ஸத்³தி⁴விஹாரிகோதி அத்தே²ன. கேன வத்திதப்³ப³ம் ஸத்³தி⁴விஹாரிகவத்தந்தி உபஜ்ஜா²யேன வத்திதப்³ப³ம். தேன வுத்தம் வத்தக்க²ந்த⁴கே (மஹாவ. 378) ‘‘தேன ஹி, பி⁴க்க²வே, உபஜ்ஜா²யானம் ஸத்³தி⁴விஹாரிகேஸு வத்தம் பஞ்ஞபேஸ்ஸாமி, யதா² உபஜ்ஜா²யேஹி ஸத்³தி⁴விஹாரிகேஸு வத்திதப்³ப³’’ந்தி. கதமம் தம் வத்தந்தி இதா³னி பகரணாக³தம். இமஸ்மிம் பன பகரணே ஸங்கே²பருசித்தா, ஆசரியஸத்³தி⁴விஹாரிகஅந்தேவாஸிகவத்தானஞ்ச ஸமானத்தா த்³வேபி ஏகதோ வுத்தா, ததா²பி வத்தக்க²ந்த⁴கே விஸும் விஸும் ஆக³தத்தா விஸும் விஸும்யேவ கத²யாம.

ஸங்க³ஹேதப்³போ³ அனுக்³க³ஹேதப்³போ³தி உத்³தே³ஸாதீ³ஹிஸ்ஸ ஸங்க³ஹோ ச அனுக்³க³ஹோ ச காதப்³போ³. தத்த² உத்³தே³ஸோதி பாளிவசனம். பரிபுச்சா²தி பாளியா அத்த²வண்ணனா. ஓவாதோ³தி அனோதிண்ணே வத்து²ஸ்மிம் ‘‘இத³ம் கரோஹி, இத³ம் மா கரித்தா²’’தி வசனம். அனுஸாஸனீதி ஓதிண்ணே வத்து²ஸ்மிம். அபிச ஓதிண்ணே வா அனோதிண்ணே வா பட²மம் வசனம் ஓவாதோ³, புனப்புனம் வசனம் அனுஸாஸனீதி த³ட்ட²ப்³ப³ம். ஸசே உபஜ்ஜா²யஸ்ஸ பத்தோ ஹோதீதி ஸசே அதிரேகபத்தோ ஹோதி. ஏஸ நயோ ஸப்³ப³த்த². பரிக்கா²ரோதி அஞ்ஞோபி ஸமணபரிக்கா²ரோ. இத⁴ உஸ்ஸுக்கம் நாம த⁴ம்மியேன நயேன உப்பஜ்ஜமானஉபாயபரியேஸனம். இதோ பரம் த³ந்தகட்ட²தா³னம் ஆதி³ம் கத்வா ஆசமனகும்பி⁴யா உத³கஸிஞ்சனபரியோஸானம் வத்தம் கி³லானஸ்ஸேவ ஸத்³தி⁴விஹாரிகஸ்ஸ காதப்³ப³ம். அனபி⁴ரதிவூபகாஸனாதி³ பன அகி³லானஸ்ஸபி கத்தப்³ப³மேவ. சீவரம் ரஜந்தேனாதி ‘‘ஏவம் ரஜேய்யாஸீ’’தி உபஜ்ஜா²யதோ உபாயம் ஸுத்வா ரஜந்தேன. ஸேஸம் வுத்தனயேனேவ வேதி³தப்³ப³ம். ஸங்க³ஹேதப்³போ³ அனுக்³க³ஹேதப்³போ³திஆதீ³ஸு அனாத³ரியம் படிச்ச த⁴ம்மாமிஸேஹி அஸங்க³ண்ஹந்தானம் ஆசரியுபஜ்ஜா²யானம் து³க்கடம் வத்தபே⁴த³த்தா. தேனேவ பரிவாரேபி (பரி. 322) ‘‘ந தே³ந்தோ ஆபஜ்ஜதீ’’தி வுத்தம். ஸேஸம் ஸுவிஞ்ஞேய்யமேவ.

ஸத்³தி⁴விஹாரிகவத்தகதா²வண்ணனா நிட்டி²தா.

அந்தேவாஸிகவத்தகதா²வண்ணனா

அந்தேவாஸிகவத்தே கோ அந்தேவாஸிகோ, கேனட்டே²ன அந்தேவாஸிகோ, கதிவிதா⁴ அந்தேவாஸிகா, கேன வத்திதப்³ப³ம் அந்தேவாஸிகவத்தம், கதமம் தம் வத்தந்தி? தத்த² கோ அந்தேவாஸிகோதி உபஸம்பன்னோ வா ஹோது ஸாமணேரோ வா, யோ ஆசரியஸ்ஸ ஸந்திகே நிஸ்ஸயம் க³ண்ஹாதி, யோ வா ஆசரியஸ்ஸ ஓவாத³ம் க³ஹேத்வா பப்³ப³ஜதி, யோ வா தேனானுஸ்ஸாவிதோ ஹுத்வா உபஸம்பஜ்ஜதி, யோ வா தஸ்ஸ ஸந்திகே த⁴ம்மம் பரியாபுணாதி, ஸோ ஸப்³போ³ அந்தேவாஸிகோதி வேதி³தப்³போ³. தத்த² பட²மோ நிஸ்ஸயந்தேவாஸிகோ நாம, து³தியோ பப்³ப³ஜ்ஜந்தேவாஸிகோ நாம, ததியோ உபஸம்பத³ந்தேவாஸிகோ நாம, சதுத்தோ² த⁴ம்மந்தேவாஸிகோ நாம. அஞ்ஞத்த² பன ஸிப்பந்தேவாஸிகோபி ஆக³தோ, ஸோ இத⁴ நாதி⁴ப்பேதோ. கேனட்டே²ன அந்தேவாஸிகோதி அந்தே வஸதீதி அந்தேவாஸிகோ அலுத்தஸமாஸவஸேன. கதிவிதா⁴ அந்தேவாஸிகாதி யதா²வுத்தனயேன சதுப்³பி³தா⁴ அந்தேவாஸிகா.

கேன வத்திதப்³ப³ம் அந்தேவாஸிகவத்தந்தி சதுப்³பி³தே⁴ஹி ஆசரியேஹி அந்தேவாஸிகேஸு வத்திதப்³ப³ம். யதா²ஹ வத்தக்க²ந்த⁴கே (சூளவ. 382) ‘‘தேன ஹி, பி⁴க்க²வே, ஆசரியானம் அந்தேவாஸிகேஸு வத்தம் பஞ்ஞபேஸ்ஸாமி, யதா² ஆசரியேஹி அந்தேவாஸிகேஸு வத்திதப்³ப³’’ந்தி. கதமம் தம் வத்தந்தி யம் ப⁴க³வதா வத்தக்க²ந்த⁴கே வுத்தம், இத⁴ ச ஸங்கே²பேன த³ஸ்ஸிதம், தம் வத்தந்தி. இத⁴ பன அத்தோ² ஸத்³தி⁴விஹாரிகவத்தே வுத்தனயேனேவ வேதி³தப்³போ³. அயம் பன விஸேஸோ – ஏதேஸு பப்³ப³ஜ்ஜந்தேவாஸிகோ ச உபஸம்பத³ந்தேவாஸிகோ ச ஆசரியஸ்ஸ யாவஜீவம் பா⁴ரோ, நிஸ்ஸயந்தேவாஸிகோ ச த⁴ம்மந்தேவாஸிகோ ச யாவ ஸமீபே வஸந்தி, தாவதே³வ, தஸ்மா ஆசரியேஹிபி தேஸு ஸம்மா வத்திதப்³ப³ம். ஆசரியந்தேவாஸிகேஸு ஹி யோ யோ ந ஸம்மா வத்ததி, தஸ்ஸ தஸ்ஸ ஆபத்தி வேதி³தப்³பா³.

அந்தேவாஸிகவத்தகதா²வண்ணனா நிட்டி²தா.

ஆக³ந்துகவத்தகதா²வண்ணனா

185. ஆக³ந்துகவத்தே ஆக³ச்ச²தீதி ஆக³ந்துகோ, தேன வத்திதப்³ப³ந்தி ஆக³ந்துகவத்தம். ‘‘இதா³னி ஆராமம் பவிஸிஸ்ஸாமீ’’தி இமினா உபசாரஸீமாஸமீபம் த³ஸ்ஸேதி, தஸ்மா உபசாரஸீமாஸமீபம் பத்வா உபாஹனாஓமுஞ்சனாதி³ ஸப்³ப³ம் காதப்³ப³ம். க³ஹேத்வாதி உபாஹனத³ண்ட³கேன க³ஹேத்வா. உபாஹனபுஞ்ச²னசோளகம் புச்சி²த்வா உபாஹனா புஞ்சி²தப்³பா³தி ‘‘கதரஸ்மிம் டா²னே உபாஹனபுஞ்ச²னசோளக’’ந்தி ஆவாஸிகே பி⁴க்கூ² புச்சி²த்வா. பத்த²ரிதப்³ப³ந்தி ஸுக்கா²பனத்தா²ய ஆதபே பத்த²ரிதப்³ப³ம். ஸசே நவகோ ஹோதி, அபி⁴வாதா³பேதப்³போ³தி தஸ்ஸ வஸ்ஸே புச்சி²தே யதி³ த³ஹரோ ஹோதி, ஸயமேவ வந்தி³ஸ்ஸதி, ததா³ இமினா வந்தா³பிதோ ஹோதி. நில்லோகேதப்³போ³தி ஓலோகேதப்³போ³. ப³ஹி டி²தேனாதி ப³ஹி நிக்க²மந்தஸ்ஸ அஹினோ வா அமனுஸ்ஸஸ்ஸ வா மக்³க³ம் ட²த்வா டி²தேன நில்லோகேதப்³போ³. ஸேஸம் புப்³பே³ வுத்தனயேனேவ வேதி³தப்³ப³ம்.

ஆக³ந்துகவத்தகதா²வண்ணனா நிட்டி²தா.

ஆவாஸிகவத்தகதா²வண்ணனா

186. ஆவாஸிகவத்தே ஆவஸதீதி ஆவாஸிகோ, தேன வத்திதப்³ப³ந்தி ஆவாஸிகவத்தம். தத்த² ஆவாஸிகேன பி⁴க்கு²னா ஆக³ந்துகம் பி⁴க்கு²ம் வுட்³ட⁴தரம் தி³ஸ்வா ஆஸனம் பஞ்ஞபேதப்³ப³ந்திஆதி³ பாளியம் (சூளவ. 359) ஆக³தஞ்ச அட்ட²கதா²யம் ஆக³தஞ்ச (சூளவ. அட்ட². 359) க³ஹேதப்³ப³ம், க³ஹேத்வா வுத்தத்தா பாகடமேவ, உபாஹனபுஞ்ச²னம் பன அத்தனோ ருசிவஸேன காதப்³ப³ம். தேனேவ ஹேத்த² ‘‘ஸசே உஸ்ஸஹதீ’’தி வுத்தம், தஸ்மா உபாஹனா அபுஞ்ச²ந்தஸ்ஸபி அனாபத்தி. ஸேனாஸனம் பஞ்ஞபேதப்³ப³ந்தி ஏத்த² ‘‘கத்த² மய்ஹம் ஸேனாஸனம் பாபுணாதீ’’தி புச்சி²தேன ஸேனாஸனம் பஞ்ஞபேதப்³ப³ம், ‘‘ஏதம் ஸேனாஸனம் தும்ஹாகம் பாபுணாதீ’’தி ஏவம் ஆசிக்கி²தப்³ப³ந்தி அத்தோ². பப்போ²டேத்வா பத்த²ரிதும் பன வட்டதியேவ. ஏதேன மஞ்சபீடா²தி³ம் பப்போ²டேத்வா பத்த²ரித்வா உபரி பச்சத்த²ரணம் த³த்வா தா³னம்பி ஸேனாஸனபஞ்ஞாபனமேவாதி த³ஸ்ஸேதி. மஹாஆவாஸேபி அத்தனோ ஸந்திகம் ஸம்பத்தஸ்ஸ ஆக³ந்துகஸ்ஸ வத்தம் அகாதும் ந லப்³ப⁴தி. ஸேஸம் புரிமஸதி³ஸமேவ.

ஆவாஸிகவத்தகதா²வண்ணனா நிட்டி²தா.

க³மிகவத்தகதா²வண்ணனா

187. க³மிகவத்தே க³ந்தும் ப⁴ப்³போ³தி க³மிகோ, தேன வத்திதப்³ப³ந்தி க³மிகவத்தம். தத்ராயம் அனுத்தானபத³வண்ணனா – தா³ருப⁴ண்ட³ந்தி ஸேனாஸனக்க²ந்த⁴கே (சூளவ. 322) வுத்தம் மஞ்சபீடா²தி³. மத்திகாப⁴ண்ட³ம்பி ரஜனபா⁴ஜனாதி³ ஸப்³ப³ம் தத்த² வுத்தப்பபே⁴த³மேவ. தம் ஸப்³ப³ம் அக்³கி³ஸாலாயம் வா அஞ்ஞதரஸ்மிம் வா கு³த்தட்டா²னே படிஸாமேத்வா க³ந்தப்³ப³ம், அனோவஸ்ஸகே பப்³பா⁴ரேபி ட²பேதும் வட்டதி. ஸேனாஸனம் ஆபுச்சி²த்வா பக்கமிதப்³ப³ந்தி ஏத்த² யம் பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம், யத்த² உபசிகா நாரோஹந்தி, தம் அனாபுச்ச²ந்தஸ்ஸபி அனாபத்தி. சதூஸு பாஸாணேஸூதிஆதி³ உபசிகானம் உப்பத்திட்டா²னே பண்ணஸாலாதி³ஸேனாஸனே கத்தப்³பா³காரத³ஸ்ஸனத்த²ம் வுத்தம். அப்பேவ நாம அங்கா³னிபி ஸேஸேய்யுந்தி அயம் அஜ்ஜோ²காஸே ட²பிதம்ஹி ஆனிஸம்ஸோ. ஓவஸ்ஸககே³ஹே பன திணேஸு ச மத்திகாபிண்டே³ஸு ச உபரி பதந்தேஸு மஞ்சபீடா²னம் அங்கா³னிபி வினஸ்ஸந்தி.

க³மிகவத்தகதா²வண்ணனா நிட்டி²தா.

ப⁴த்தக்³க³வத்தகதா²வண்ணனா

188. வத்தக்க²ந்த⁴கே இமஸ்மிம் டா²னே அனுமோத³னவத்தம் ஆக³தம், ததோ ப⁴த்தக்³க³வத்தம். ஸாரத்த²தீ³பனியஞ்ச (ஸாரத்த². டீ. சூளவக்³க³ 3.373-374) ‘‘இமஸ்மிம் வத்தக்க²ந்த⁴கே (சூளவ. 356) ஆக³தானி ஆக³ந்துகாவாஸிகக³மியானுமோத³னப⁴த்தக்³க³பிண்ட³சாரிகாரஞ்ஞிகஸேனாஸனஜந்தாக⁴ரவச்சகுடிஉபஜ்ஜா²யாசரியஸத்³தி⁴விஹாரிகஅந்தேவாஸிகவத்தானி சுத்³த³ஸ மஹாவத்தானி நாமா’’தி அனுக்கமோ வுத்தோ, இத⁴ பன வினயஸங்க³ஹப்பகரணே க³மிகவத்ததோ ப⁴த்தக்³க³வத்தம் ஆக³தம், அனுமோத³னவத்தம் பன விஸும் அவத்வா ப⁴த்தக்³க³வத்தேயேவ அந்தோக³த⁴ம் கத்வா பச்சா² வுத்தம் ப⁴த்தக்³க³ம் க³ந்த்வா ப⁴த்தே பு⁴த்தேயேவ அனுமோத³னாகரணதோ, பாளியஞ்ச அஞ்ஞேஸு வத்தேஸு விய ‘‘தேன ஹி, பி⁴க்க²வே, பி⁴க்கு²னா அனுமோத³னவத்தம் பஞ்ஞாபேஸ்ஸாமீ’’தி விஸும் வத்தபா⁴வேன அனாக³தத்தா ப⁴த்தக்³க³வத்தேயேவ அந்தோக³த⁴ந்தி ஆசரியஸ்ஸ அதி⁴ப்பாயோ ஸியா. இமஸ்ஸ ச வினயாலங்காரபகரணஸ்ஸ தஸ்ஸா வண்ணனாபூ⁴தத்தா ஸம்வண்ணேதப்³ப³க்கமேனேவ ஸம்வண்ணனம் கத²யிஸ்ஸாம.

பு⁴ஞ்ஜிதப்³ப³ந்தி ப⁴த்தம். அஜதி க³ச்ச²தி பவத்ததி ஏத்தா²தி அக்³க³ம். ‘‘ஆதி³கோட்டா²ஸகோடீஸு, புரதோக்³க³ம் வரே தீஸூ’’தி அபி⁴தா⁴னப்பதீ³பிகாயம் ஆக³தேபி ‘‘ராஜக்³க³ந்தி ராஜாரஹம், ஸலாகக்³க³ந்தி ஸலாகக்³க³ஹணட்டா²ன’’ந்திஆதீ³ஸு அஞ்ஞத்தே²ஸுபி பவத்தனதோ ப⁴த்தஸ்ஸ அக்³க³ம் ப⁴த்தக்³க³ம், ப⁴த்தபரிவிஸனட்டா²னம், ப⁴த்தக்³கே³ வத்திதப்³ப³ம் வத்தம் ப⁴த்தக்³க³வத்தந்தி விக்³க³ஹோ. தத்த² ஆராமே காலோ ஆரோசிதோ ஹோதீதி ‘‘காலோ ப⁴ந்தே, நிட்டி²தம் ப⁴த்த’’ந்தி ஆரோசிதோ ஹோதி. திமண்ட³லம் படிச்சா²தே³ந்தேனாதி த்³வே ஜாணுமண்ட³லானி நாபி⁴மண்ட³லஞ்ச படிச்சா²தே³ந்தேன. பரிமண்ட³லம் நிவாஸேத்வாதி ஸமந்ததோ மண்ட³லம் நிவாஸேத்வா. உத்³த⁴ம் நாபி⁴மண்ட³லம், அதோ⁴ ஜாணுமண்ட³லம் படிச்சா²தே³ந்தேன ஜாணுமண்ட³லஸ்ஸ ஹேட்டா² ஜங்க⁴ட்டி²தோ பட்டா²ய அட்ட²ங்கு³லமத்தம் நிவாஸனம் ஓதாரேத்வா நிவாஸேதப்³ப³ம், ததோ பரம் ஓதாரேந்தஸ்ஸ து³க்கடந்தி வுத்தம், யதா²னிஸின்னஸ்ஸ ஜாணுமண்ட³லதோ ஹேட்டா² சதுரங்கு³லமத்தம் படிச்ச²ன்னம் ஹோதீதி மஹாபச்சரியம் வுத்தம். காயப³ந்த⁴னம் ப³ந்தி⁴த்வாதி தஸ்ஸ நிவாஸனஸ்ஸ உபரி காயப³ந்த⁴னம் ப³ந்தி⁴த்வா ‘‘ந, பி⁴க்க²வே, அகாயப³ந்த⁴னேன கா³மோ பவிஸிதப்³போ³, யோ பவிஸேய்ய, ஆபத்தி து³க்கடஸ்ஸா’’தி (சூளவ. 278) வுத்தத்தா. ஸகு³ணம் கத்வாதி இத³ம் உபஜ்ஜா²யவத்தே வுத்தமேவ. ‘‘க³ண்டி²கம் படிமுஞ்சித்வாதி பாஸகே க³ண்டி²கம் பவேஸேத்வா அந்தோகா³மோ வா ஹோது விஹாரோ வா, மனுஸ்ஸானம் பரிவிஸனட்டா²னம் க³ச்ச²ந்தேன சீவரம் பாருபித்வா காயப³ந்த⁴னம் ப³ந்தி⁴த்வா க³மனமேவ வட்டதீ’’தி மஹாஅட்ட²கதா²ஸு வுத்தம். ஏத்த² ச மனுஸ்ஸானம் பரிவிஸனட்டா²னந்தி யத்த² அந்தோவிஹாரேபி மனுஸ்ஸா ஸபுத்ததா³ரா ஆவஸித்வா பி⁴க்கூ² நேத்வா போ⁴ஜேந்தி.

ஸுப்படிச்ச²ன்னேனாதி ந ஸஸீஸம் பாருதேன, அத² கோ² க³ண்டி²கம் படிமுஞ்சித்வா அனுவாதந்தேன கீ³வம் படிச்சா²தே³த்வா உபோ⁴ கண்ணே ஸமம் கத்வா படிஸம்ஹரித்வா யாவ மணிப³ந்தா⁴ படிச்சா²தே³ந்தேன. ஸுஸம்வுதேனாதி ஹத்த²ம் வா பாத³ம் வா அகீளாபேந்தேன, ஸுவினீதேனாதி அத்தோ². ஓக்கி²த்தசக்கு²னாதி ஹேட்டா²கி²த்தசக்கு²னா. யோ அனாத³ரியம் படிச்ச தஹம் தஹம் ஓலோகேந்தோ பி⁴ய்யோ தம் தம் தி³ஸாபா⁴க³ம் பாஸாத³ம் கூடாகா³ரம் வீதி²ம் ஓலோகேந்தோ க³ச்ச²தி, ஆபத்தி து³க்கடஸ்ஸ. ஏகஸ்மிம் பன டா²னே ட²த்வா ஹத்தி²அஸ்ஸாதி³பரிஸ்ஸயாபா⁴வம் ஓலோகேதும் வட்டதி. அப்பஸத்³தே³னாதி ஏத்த² கித்தாவதா அப்பஸத்³தோ³ ஹோதி? த்³வாத³ஸஹத்தே² கே³ஹே ஆதி³ம்ஹி ஸங்க⁴த்தே²ரோ மஜ்ஜே² து³தியத்தே²ரோ அந்தே ததியத்தே²ரோதி ஏவம் நிஸின்னேஸு ஸங்க⁴த்தே²ரோ து³தியேன ஸத்³தி⁴ம் மந்தேதி, து³தியத்தே²ரோ தஸ்ஸ ஸத்³த³ஞ்சேவ ஸுணாதி, கத²ஞ்ச வவத்த²பேதி, ததியத்தே²ரோ பன ஸத்³த³மேவ ஸுணாதி, கத²ம் ந வவத்த²பேதி, ஏத்தாவதா அப்பஸத்³தோ³ ஹோதி. ஸசே பன ததியத்தே²ரோ கத²ம் வவத்த²பேதி, மஹாஸத்³தோ³ நாம ஹோதி.

ந உக்கி²த்தகாயாதி ந உக்கே²பேன, இத்த²ம்பூ⁴தலக்க²ணே கரணவசனம், ஏகதோ வா உப⁴தோ வா உக்கி²த்தசீவரோ ஹுத்வாதி அத்தோ². அந்தோஇந்த³கீ²லதோ பட்டா²ய ந ஏவம் க³ந்தப்³ப³ம். நிஸின்னகாலே பன த⁴மகரணம் நீஹரந்தேனபி சீவரம் அனுக்கி²பித்வாவ நீஹரிதப்³ப³ம். ந உஜ்ஜக்³கி⁴காயாதி ந மஹாஹஸிதம் ஹஸந்தோ, வுத்தனயேனேவேத்த² கரணவசனம். ந காயப்பசாலகந்தி காயம் அசாலேத்வா காயம் பக்³க³ஹேத்வா நிச்சலம் கத்வா உஜுகேன காயேன ஸமேன இரியாபதே²ன. ந பா³ஹுப்பசாலகந்தி பா³ஹும் அசாலேத்வா பா³ஹும் பக்³க³ஹேத்வா நிச்சலம் கத்வா. ந ஸீஸப்பசாலகந்தி ஸீஸம் அசாலேத்வா ஸீஸம் பக்³க³ஹேத்வா நிச்சலம் உஜும் ட²பேத்வா. ந க²ம்ப⁴கதோதி க²ம்ப⁴கதோ நாம கடியம் ஹத்த²ம் ட²பேத்வா கதக²ம்போ⁴. ந உக்குடிகாயாதி ஏத்த² உக்குடிகா வுச்சதி பண்ஹியோ உக்கி²பித்வா அக்³க³பாதே³ஹி வா அக்³க³பாதே³ உக்கி²பித்வா பண்ஹேஹியேவ வா பூ⁴மிம் பு²ஸந்தஸ்ஸ க³மனம். கரணவசனம் பனேத்த² வுத்தலக்க²ணமேவ. ந ஓகு³ண்டி²தேனாதி ஸஸீஸம் பாருதேன. ந பல்லத்தி²காயாதி ந து³ஸ்ஸபல்லத்தி²காய. ஏத்த² ஆயோக³பல்லத்தி²காபி து³ஸ்ஸபல்லத்தி²கா ஏவ. ந தே²ரே பி⁴க்கூ² அனுபக²ஜ்ஜாதி தே²ரே பி⁴க்கூ² அதிஅல்லீயித்வா ந நிஸீதி³தப்³ப³ம். ந ஸங்கா⁴டிம் ஓத்த²ரித்வாதி ந ஸங்கா⁴டிம் அத்த²ரித்வா நிஸீதி³தப்³ப³ம்.

ஸக்கச்சந்தி ஸதிம் உபட்டா²பேத்வா. பத்தஸஞ்ஞீதி பத்தே ஸஞ்ஞம் கத்வா. ஸமஸூபகோ நாம யத்த² ப⁴த்தஸ்ஸ சதுத்த²பா⁴க³ப்பமாணோ ஸூபோ ஹோதி. ஸமதித்தி²கந்தி ஸமபுண்ணம் ஸமப⁴ரிதம். தூ²பீகதம் பிண்ட³பாதம் படிக்³க³ண்ஹாதி, ஆபத்தி து³க்கடஸ்ஸாதி ஏத்த² தூ²பீகதோ நாம பத்தஸ்ஸ அந்தோமுக²வட்டிலேக²ம் அதிக்கமித்வா கதோ, பத்தே பக்கி²த்தோ ப⁴ரிதோ பூரிதோதி அத்தோ². ஏவம் கதம் அக்³க³ஹேத்வா அந்தோமுக²வட்டிலேகா²ஸமப்பமாணோ க³ஹேதப்³போ³. ‘‘யம் கஞ்சி யாகு³ம் வா ப⁴த்தம் வா ப²லாப²லம் வா ஆமிஸஜாதிகம் ஸமதித்தி²கமேவ க³ஹேதப்³ப³ம், தஞ்ச கோ² அதி⁴ட்டா²னுபகே³ன பத்தேன, இதரேன பன தூ²பீகதம்பி வட்டதி. யாமகாலிகஸத்தாஹகாலிகயாவஜீவிகானி பன அதி⁴ட்டா²னுபக³பத்தே தூ²பீகதானிபி வட்டந்தி. யம் பன த்³வீஸு பத்தேஸு ப⁴த்தம் க³ஹேத்வா ஏகஸ்மிம் பூரேத்வா விஹாரம் பேஸேதும் வட்டதீ’’தி மஹாபச்சரியம் வுத்தம். யம் பத்தே பக்கி²பியமானம் பூவஉச்சு²க²ண்ட³ப²லாப²லாதி³ ஹேட்டா² ஓரோஹதி, தம் தூ²பீகதம் நாம ந ஹோதி. பூவவடம்ஸகம் ட²பேத்வா பிண்ட³பாதம் தே³ந்தி, தூ²பீகதமேவ ஹோதி. புப்ப²வடம்ஸகதக்கோலகடுகப²லாதி³வடம்ஸகே பன ட²பேத்வா தி³ன்னம் தூ²பீகதம் ந ஹோதி. ப⁴த்தஸ்ஸ உபரி தா²லகம் வா பத்தம் வா ட²பேத்வா பூரேத்வா க³ண்ஹாதி, தூ²பீகதம் நாம ந ஹோதி. குருந்தி³யம்பி வுத்தம் ‘‘தா²லகே வா பத்தே வா பக்கி²பித்வா தம் பத்தமத்த²கே ட²பேத்வா தே³ந்தி, பாடேக்கபா⁴ஜனம் வட்டதி. இத⁴ அனாபத்தியம் கி³லானோ ந ஆக³தோ, தஸ்மா கி³லானஸ்ஸபி தூ²பீகதம் ந வட்டதி, ஸப்³ப³த்த² பன படிக்³க³ஹேதுமேவ ந வட்டதி, படிக்³க³ஹிதம் பன பு⁴ஞ்ஜிதும் வட்டதீ’’தி.

‘‘ஸக்கச்ச’’ந்தி ச ‘‘பத்தஸஞ்ஞீ’’தி ச உப⁴யம் வுத்தனயமேவ. ஸபதா³னந்தி தத்த² தத்த² ஓதி⁴ம் அகத்வா அனுபடிபாடியா. ஸமஸூபகே வத்தப்³ப³ம் வுத்தமேவ. தூ²பகதோதி மத்த²கதோ, வேமஜ்ஜ²தோதி அத்தோ². ந ஸூபம் வா ப்³யஞ்ஜனம் வாதிஆதி³ பாகடமேவ. விஞ்ஞத்தியம் வத்தப்³ப³ம் நத்தி². உஜ்ஜா²னஸஞ்ஞீஸிக்கா²பதே³பி கி³லானோ ந முஞ்சதி. நாதிமஹந்தோ கப³ளோதி மயூரண்ட³ம் அதிமஹந்தம், குக்குடண்ட³ம் அதிகு²த்³த³கம், தேஸம் வேமஜ்ஜ²ப்பமாணோ. பரிமண்ட³லம் ஆலோபோதி நாதிதீ³கோ⁴ ஆலோபோ. அனாஹடேதி அனாஹரிதே, முக²த்³வாரம் அஸம்பாபிதேதி அத்தோ². ஸப்³போ³ ஹத்தோ²தி ஏத்த² ஹத்த²ஸத்³தோ³ ததே³கதே³ஸேஸு அங்கு³லீஸு த³ட்ட²ப்³போ³ ‘‘ஹத்த²முத்³தோ³’’திஆதீ³ஸு விய ஸமுதா³யே பவத்தவோஹாரஸ்ஸ அவயவே பவத்தனதோ. ஏகங்கு³லிம்பி முகே² பக்கி²பிதும் ந வட்டதி. ந ஸகப³ளேனாதி ஏத்த² த⁴ம்மம் கதே²ந்தோ ஹரீதகம் வா லட்டி²மது⁴கம் வா முகே² பக்கி²பித்வா கதே²தி, யத்தகேன வசனம் பரிபுண்ணம் ஹோதி, தத்தகே முக²ம்ஹி ஸந்தே கதே²தும் வட்டதி.

பிண்டு³க்கே²பகந்தி பிண்ட³ம் உக்கி²பித்வா உக்கி²பித்வா. கப³ளாவச்சே²த³கந்தி கப³ளம் அவசி²ந்தி³த்வா அவசி²ந்தி³த்வா. அவக³ண்ட³காரகந்தி மக்கடோ விய க³ண்டே³ கத்வா கத்வா. ஹத்த²னித்³து⁴னகந்தி ஹத்த²ம் நித்³து⁴னித்வா நித்³து⁴னித்வா. ஸித்தா²வகாரகந்தி ஸித்தா²னி அவகிரித்வா அவகிரித்வா. ஜிவ்ஹானிச்சா²ரகந்தி ஜிவ்ஹம் நிச்சா²ரேத்வா நிச்சா²ரேத்வா. சபுசபுகாரகந்தி ‘‘சபுசபூ’’தி ஏவம் ஸத்³த³ம் கத்வா கத்வா. ஸுருஸுருகாரகந்தி ‘‘ஸுருஸுரூ’’தி ஏவம் ஸத்³த³ம் கத்வா கத்வா. ஹத்த²னில்லேஹகந்தி ஹத்த²ம் நில்லேஹித்வா நில்லேஹித்வா. பு⁴ஞ்ஜந்தேன ஹி அங்கு³லிமத்தம்பி நில்லேஹிதும் ந வட்டதி, க⁴னயாகு³பா²ணிதபாயாஸாதி³கே பன அங்கு³லீஹி க³ஹேத்வா அங்கு³லியோ முகே² பவேஸேத்வா பு⁴ஞ்ஜிதும் வட்டதி. பத்தனில்லேஹகஓட்ட²னில்லேஹகேஸுபி ஏஸேவ நயோ, தஸ்மா அங்கு³லியாபி பத்தோ ந நில்லேஹிதப்³போ³, ஏகஓட்டோ²பி ஜிவ்ஹாய ந நில்லேஹிதப்³போ³, ஓட்ட²மம்ஸேஹி ஏவ பன க³ஹேத்வா அந்தோ பவேஸேதும் வட்டதி.

ந ஸாமிஸேன ஹத்தே²ன பானீயதா²லகோதி ஏதம் படிகூலவஸேன படிக்கி²த்தம், தஸ்மா ஸங்கி⁴கம்பி புக்³க³லிகம்பி கி³ஹிஸந்தகம்பி அத்தனோ ஸந்தகம்பி ஸங்க²ம்பி ஸராவம்பி ஆமிஸமக்கி²தம் ந க³ஹேதப்³ப³மேவ, க³ண்ஹந்தஸ்ஸ து³க்கடம். ஸசே பன ஹத்த²ஸ்ஸ ஏகதே³ஸோ ஆமிஸமக்கி²தோ ந ஹோதி, தேன பதே³ஸேன க³ஹேதும் வட்டதி. ந ஸஸித்த²கம் பத்ததோ⁴வனம் அந்தரக⁴ரே ச²ட்³டே³தப்³ப³ந்தி ஏத்த² உத்³த⁴ரித்வா வாதி ஸித்தா²னி ஏகதோ உத்³த⁴ரித்வா ஏகஸ்மிம் டா²னே ராஸிம் கத்வா உத³கம் ச²ட்³டே³தி. பி⁴ந்தி³த்வா வா உத³கக³திகானி கத்வா ச²ட்³டே³தி, படிக்³க³ஹேன ஸம்படிச்ச²ந்தோ நம் படிக்³க³ஹே ச²ட்³டே³தி, ப³ஹி நீஹரித்வா வா ச²ட்³டே³தி, ஏவம் ச²ட்³டே³ந்தஸ்ஸ அனாபத்தி. ந தாவ தே²ரேன உத³கந்தி இத³ம் ஹத்த²தோ⁴வனஉத³கம் ஸந்தா⁴ய வுத்தம். அந்தரா பிபாஸிதேன, பன க³லே விலக்³கா³மிஸேன வா பானீயம் பிவித்வா ந தோ⁴விதப்³பா³தி.

ப⁴த்தக்³க³வத்தகதா²வண்ணனா நிட்டி²தா.

அனுமோத³னவத்தகதா²வண்ணனா

அனுமோத³னவத்தே அனு புனப்புனம் மோதி³யதே பமோதி³யதேதி அனுமோத³னா. கா ஸா? த⁴ம்மகதா². அனுமோத³னாய கத்தப்³ப³ம் வத்தம் அனுமோத³னவத்தம். பஞ்சமே நிஸின்னேதி அனுமோத³னத்தா²ய நிஸின்னே. உபனிஸின்னகதா² நாம ப³ஹூஸு ஸன்னிபதிதேஸு பரிகதா²கத²னம். ஸேஸம் ஸுவிஞ்ஞேய்யமேவ.

அனுமோத³னவத்தகதா²வண்ணனா நிட்டி²தா.

பிண்ட³சாரிகவத்தகதா²வண்ணனா

189. பிண்ட³சாரிகவத்தே பிண்டி³தப்³போ³ ஸங்க⁴ரிதப்³போ³தி பிண்டோ³, பிண்ட³பாதோ. பிண்டா³ய சரணம் ஸீலமஸ்ஸாதி பிண்ட³சாரீ, ஸோ ஏவ பிண்ட³சாரிகோ ஸகத்தே² கபச்சயவஸேன. பிண்ட³சாரிகேன வத்திதப்³ப³ம் வத்தம் பிண்ட³சாரிகவத்தம். தத்ராயமனுத்தானபத³வண்ணனா – நிவேஸனம் நாம இத்தி²குமாரிகாதீ³னம் வஸனட்டா²னம். யஸ்மா பவிஸனனிக்க²மனத்³வாரம் அஸல்லக்கே²த்வா ஸஹஸா பவிஸந்தோ விஸபா⁴கா³ரம்மணம் வா பஸ்ஸேய்ய, பரிஸ்ஸயோ வா ப⁴வேய்ய, தஸ்மா ‘‘நிவேஸனம்…பே… பவிஸிதப்³ப³’’ந்தி வுத்தம். அதிதூ³ரே திட்ட²ந்தோ அபஸ்ஸந்தோ வா ப⁴வேய்ய, ‘‘அஞ்ஞஸ்ஸ கே³ஹே திட்ட²தீ’’தி வா மஞ்ஞேய்ய. அச்சாஸன்னே திட்ட²ந்தோ அபஸ்ஸிதப்³ப³ம் வா பஸ்ஸேய்ய, அஸுணிதப்³ப³ம் வா ஸுணேய்ய, தேன மனுஸ்ஸானம் அகா³ரவோ வா அப்பஸாதோ³ வா ப⁴வேய்ய, தஸ்மா ‘‘நாதிதூ³ரே நாச்சாஸன்னே டா²தப்³ப³’’ந்தி வுத்தம். அதிசிரம் திட்ட²ந்தோ அதா³துகாமானம் மனோபதோ³ஸோ ப⁴வேய்ய, அஞ்ஞத்த² பி⁴க்கா² ச பரிக்க²யேய்ய, அதிலஹுகம் நிவத்தந்தோ தா³துகாமானம் புஞ்ஞஹானி ச ப⁴வேய்ய, பி⁴க்கு²னோ ச பி⁴க்கா²ய அஸம்பஜ்ஜனம், தஸ்மா ‘‘நாதிசிரம் டா²தப்³ப³ம், நாதிலஹுகம் நிவத்திதப்³ப³ம், டி²தேன ஸல்லக்கே²தப்³ப³’’ந்தி வுத்தம். ஸல்லக்க²ணாகாரம் த³ஸ்ஸேதி ‘‘ஸசே கம்மம் வா நிக்கி²பதீ’’திஆதி³னா. தத்த² கம்மம் வா நிக்கி²பதீதி கப்பாஸம் வா ஸுப்பம் வா முஸலம் வா யஞ்ச க³ஹேத்வா கம்மம் கரோந்தி, டி²தா வா நிஸின்னா வா ஹோந்தி, தம் நிக்கி²பதி. பராமஸதீதி க³ண்ஹாதி. ட²பேதி வாதி ‘‘திட்ட²த² ப⁴ந்தே’’தி வத³ந்தீ ட²பேதி நாம. அவக்காரபாதீதி அதிரேகபிண்ட³பாதம் அபனேத்வா ட²பனத்தா²ய ஏகா ஸமுக்³க³பாதி. ஏத்த² ச ஸமுக்³க³பாதி நாம ஸமுக்³க³புடஸதி³ஸா பாதி. ஸேஸம் வுத்தனயமேவ.

பிண்ட³சாரிகவத்தகதா²வண்ணனா நிட்டி²தா.

ஆரஞ்ஞிகவத்தகதா²வண்ணனா

190. ஆரஞ்ஞிகவத்தே ந ரமந்தி ஜனா ஏத்தா²தி அரஞ்ஞம். வுத்தஞ்ஹி –

‘‘ரமணீயானி அரஞ்ஞானி, யத்த² ந ரமதீ ஜனோ;

வீதராகா³ ரமிஸ்ஸந்தி, ந தே காமக³வேஸினோ’’தி. (த⁴. ப. 99);

அரஞ்ஞே வஸதீதி ஆரஞ்ஞிகோ, தேன வத்திதப்³ப³ம் வத்தம் ஆரஞ்ஞிகவத்தம். தத்ராயம் விஸேஸபதா³னமத்தோ² – காலஸ்ஸேவ உட்டா²யாதி அரஞ்ஞஸேனாஸனஸ்ஸ கா³மதோ தூ³ரத்தா வுத்தம், தேனேவ காரணேன ‘‘பத்தம் க³ஹேத்வா சீவரம் பாருபித்வா க³ச்ச²ந்தோ பரிஸ்ஸமோ ஹோதீ’’தி வுத்தம். பத்தம் த²விகாய பக்கி²பித்வா அம்ஸே லக்³கே³த்வா சீவரம் க²ந்தே⁴ கரித்வா அரஞ்ஞமக்³கோ³ ந து³ஸ்ஸோத⁴னோ ஹோதி, தஸ்மா கண்டகஸரீஸபாதி³பரிஸ்ஸயவிமோசனத்த²ம் உபாஹனா ஆரோஹித்வா. அரஞ்ஞம் நாம யஸ்மா சோராதீ³னம் விசரட்டா²னம் ஹோதி, தஸ்மா ‘‘தா³ருப⁴ண்ட³ம் மத்திகாப⁴ண்ட³ம் படிஸாமேத்வா த்³வாரவாதபானம் த²கேத்வா வஸனட்டா²னதோ நிக்க²மிதப்³ப³’’ந்தி வுத்தம். இதோ பரானி ப⁴த்தக்³க³வத்தபிண்ட³சாரிகவத்தேஸு வுத்தஸதி³ஸானேவ. கா³மதோ நிக்க²மித்வா ஸசே ப³ஹிகா³மே உத³கம் நத்தி², அந்தோகா³மேயேவ ப⁴த்தகிச்சம் கத்வா, அத² ப³ஹிகா³மே அத்தி², ப⁴த்தகிச்சம் கத்வா பத்தம் தோ⁴வித்வா வோத³கம் கத்வா த²விகாய பக்கி²பித்வா சீவரம் ஸங்க⁴ரித்வா அம்ஸே கரித்வா உபாஹனா ஆரோஹித்வா க³ந்தப்³ப³ம்.

பா⁴ஜனம் அலப⁴ந்தேனாதிஆதி³ அரஞ்ஞஸேனாஸனஸ்ஸ து³ல்லப⁴த³ப்³ப³ஸம்பா⁴ரத்தா வுத்தம், அக்³கி³ உபட்டா²பேதப்³போ³திஆதி³ வாளமிக³ஸரீஸபாதி³பா³ஹிரபரிஸ்ஸயகாலே ச வாதபித்தாதி³அஜ்ஜ²த்தபஅஸ்ஸயகாலே ச இச்சி²தப்³ப³த்தா. ப³ஹூனம் பன வஸனட்டா²னே தாதி³ஸானி ஸுலபா⁴னி ஹோந்தீதி ஆஹ ‘‘க³ணவாஸினோ பன தேன வினாபி வட்டதீ’’தி. கத்தரத³ண்டோ³ நாம பரிஸ்ஸயவினோத³னோ ஹோதி, தஸ்மா அரஞ்ஞே விஹரந்தேன அவஸ்ஸம் இச்சி²தப்³போ³தி வுத்தம் ‘‘கத்தரத³ண்டோ³ உபட்டா²பேதப்³போ³’’தி. நக்க²த்தானேவ நக்க²த்தபதா³னி. சோராதீ³ஸு ஆக³ந்த்வா ‘‘அஜ்ஜ, ப⁴ந்தே, கேன நக்க²த்தேன சந்தோ³ யுத்தோ’’தி புச்சி²தேஸு ‘‘ந ஜானாமா’’தி வுத்தே குஜ்ஜ²ந்தி, தஸ்மா வுத்தம் ‘‘நக்க²த்தபதா³னி உக்³க³ஹேதப்³பா³னி ஸகலானி வா ஏகதே³ஸானி வா’’தி, ததா² தி³ஸாமூள்ஹேஸு ‘‘கதமாயம், ப⁴ந்தே, தி³ஸா’’தி புச்சி²தேஸு, தஸ்மா ‘‘தி³ஸாகுஸலேன ப⁴விதப்³ப³’’ந்தி.

ஆரஞ்ஞிகவத்தகதா²வண்ணனா நிட்டி²தா.

ஸேனாஸனவத்தகதா²வண்ணனா

191. ஸேனாஸனவத்தே ஸயந்தி ஏத்தா²தி ஸேனம், ஸயனந்தி அத்தோ². ஆவஸந்தி ஏத்தா²தி ஆஸனம். ஸேனஞ்ச ஆஸனஞ்ச ஸேனாஸனம். ஸேனாஸனேஸு கத்தப்³ப³ம் வத்தம் ஸேனாஸனவத்தம். இத⁴ பன யம் வத்தப்³ப³ம், தம் உபஜ்ஜா²யவத்தகதா²யம் (வி. ஸங்க³. அட்ட². 183 ) வுத்தமேவ. தத்த² பன உபஜ்ஜா²யேன வுத்த²விஹாரோ வுத்தோ, இத⁴ பன அத்தனா வுத்த²விஹாரோதி அயமேவ விஸேஸோ. ந வுட்³ட⁴ம் அனாபுச்சா²தி ஏத்த² தஸ்ஸ ஓவரகே தது³பசாரே ச ஆபுச்சி²தப்³ப³ந்தி வத³ந்தி. போ⁴ஜனஸாலாதீ³ஸுபி ஏவமேவ படிபஜ்ஜிதப்³ப³ந்தி போ⁴ஜனஸாலாதீ³ஸுபி உத்³தே³ஸதா³னாதி³ ஆபுச்சி²த்வாவ காதப்³ப³ந்தி அத்தோ².

ஸேனாஸனவத்தகதா²வண்ணனா நிட்டி²தா.

ஜந்தாக⁴ரவத்தகதா²வண்ணனா

192. ஜந்தாக⁴ரவத்தே ஜாயதீதி ஜம், கிம் தம்? ஸரீரம். ஜம் தாயதி ரக்க²தீதி ஜந்தா, கா ஸா? திகிச்சா². க³ய்ஹதேதி க⁴ரம், கிம் தம்? நிவேஸனம், ஜந்தாய ஸரீரதிகிச்சா²ய கதம் க⁴ரம் ஜந்தாக⁴ரம், ஜந்தாக⁴ரே கத்தப்³ப³ம் வத்தம் ஜந்தாக⁴ரவத்தம். தத்த² பரிப⁴ண்ட³ந்தி ப³ஹிஜக³தி. ஸேஸம் உபஜ்ஜா²யவத்தே வுத்தனயத்தா ஸுவிஞ்ஞேய்யமேவ.

ஜந்தாக⁴ரவத்தகதா²வண்ணனா நிட்டி²தா.

வச்சகுடிவத்தகதா²வண்ணனா

193. வச்சகுடிவத்தே வச்சயதே ஊஹத³யதேதி வச்சம், கரீஸம். குடீயதி சி²ந்தீ³யதி ஆதபோ ஏதாயாதி குடி, வச்சத்தா²ய கதா குடி வச்சகுடி, வச்சகுடியா வத்திதப்³ப³ம் வத்தம் வச்சகுடிவத்தம், இத⁴ ச வத்தக்க²ந்த⁴கே ஆசமனவத்தம் பட²மம் ஆக³தம், பச்சா² வச்சகுடிவத்தம். இமஸ்மிம் பன பகரணே பட²மம் வச்சம் கத்வா பச்சா² ஆசமதீதி அதி⁴ப்பாயேன வச்சகுடிவத்தம் பட²மம் ஆக³தம், தஸ்மா தத³னுக்கமேன கத²யிஸ்ஸாம. த³ந்தகட்ட²ம் கா²த³ந்தேனாதி அயம் வச்சகுடியாபி ஸப்³ப³த்தே²வ படிக்கே²போ. நிப³த்³த⁴க³மனத்தா²யாதி அத்தனா நிப³த்³த⁴க³மனத்தா²ய. புக்³க³லிகட்டா²னம் வாதி அத்தனோ விஹாரம் ஸந்தா⁴ய வுத்தம். ஸேஸம் ஸுவிஞ்ஞேய்யமேவாதி.

வச்சகுடிவத்தகதா²வண்ணனா நிட்டி²தா.

இதி வினயஸங்க³ஹஸம்வண்ணனாபூ⁴தே வினயாலங்காரே

உபஜ்ஜா²யவத்தாதி³வத்தவினிச்ச²யகதா²லங்காரோ நாம

ஸத்தவீஸதிமோ பரிச்சே²தோ³.