23. நிஸ்ஸயவினிச்ச²யகதா²

151. ஏவம் உபஸம்பதா³வினிச்ச²யம் கதே²த்வா இதா³னி நிஸ்ஸயவினிச்ச²யம் கதே²தும் ‘‘நிஸ்ஸயோதி ஏத்த² பனா’’திஆதி³மாஹ. தத்த² நிஸ்ஸயனம் நிஸ்ஸயோ, ஸேவனம் ப⁴ஜனந்த்யத்தோ². நிபுப்³ப³ஸி ஸேவாயந்தி தா⁴து பா⁴வஸாத⁴னோ, ந ‘‘நிஸ்ஸாய நம் வஸதீதி நிஸ்ஸயோ’’தி இத⁴ விய அவுத்தகம்மஸாத⁴னோ. தத்த² ஹி ஸேவிதப்³போ³ புக்³க³லோ லப்³ப⁴தி, இத⁴ பன ஸேவனகிரியாதி. இதா³னி தம் நிஸ்ஸயம் புச்சா²புப்³ப³ங்க³மாய விஸ்ஸஜ்ஜனாய வித்தா²ரதோ ட²பேதும் ‘‘கேன தா³தப்³போ³’’திஆதி³மாஹ. தத்த² கேன தா³தப்³போ³, கேன ந தா³தப்³போ³தி நிஸ்ஸயதா³யகம் கத்தாரம் புச்ச²தி, கஸ்ஸ தா³தப்³போ³, கஸ்ஸ ந தா³தப்³போ³தி நிஸ்ஸயபடிக்³கா³ஹகம் ஸம்பதா³னம், கத²ம் க³ஹிதோ ஹோதி, கத²ம் படிப்பஸ்ஸம்ப⁴தீதி காரணம், நிஸ்ஸாய கேன வஸிதப்³ப³ம், கேன ந வஸிதப்³ப³ந்தி நிஸ்ஸயபடிபன்னகம். ததோ புச்சா²னுக்கமேன விஸ்ஸஜ்ஜேதும் ‘‘தத்த²’’த்யாதி³மாஹ. ந கேவலம் ஏத்தே²வ, அத² கோ² நிஸ்ஸயமுச்சனங்கே³பி ‘‘ப்³யத்தேனா’’தி ஆக³தோ.

தத்த² ஏத்த² ச கோ விஸேஸோதி ஆஹ ‘‘ஏத்த² ச ‘ப்³யத்தோ’தி இமினா பரிஸுபட்டா²பகோ ப³ஹுஸ்ஸுதோ வேதி³தப்³போ³’’தி. இதா³னி பரிஸுபட்டா²பகலக்க²ணம் த³ஸ்ஸேதும் ‘‘பரிஸுபட்டா²பகேன ஹீ’’திஆதி³மாஹ. தத்த² அபி⁴வினயேதி ஸகலே வினயபிடகே. வினேதுந்தி ஸிக்கா²பேதும். த்³வே விப⁴ங்கா³ பகு³ணா வாசுக்³க³தா காதப்³பா³தி இத³ம் பரிபுச்சா²வஸேன உக்³க³ண்ஹனம் ஸந்தா⁴ய வுத்தந்தி வத³ந்தி. ஏகஸ்ஸ பமுட்ட²ம், இதரேஸம் பகு³ணம் ப⁴வேய்யாதி ஆஹ ‘‘தீஹி ஜனேஹி ஸத்³தி⁴ம் பரிவத்தனக்க²மா காதப்³பா³’’தி. அபி⁴த⁴ம்மேதி நாமரூபபரிச்சே²தே³. ஹேட்டி²மா வா தயோ வக்³கா³தி மஹாவக்³க³தோ ஹேட்டா² ஸகா³தா²வக்³கோ³ நிதா³னவக்³கோ³ க²ந்த⁴வக்³கோ³தி இமே தயோ வக்³கா³. ‘‘த⁴ம்மபத³ம்பி ஸஹ வத்து²னா உக்³க³ஹேதும் வட்டதீ’’தி மஹாபச்சரியம் வுத்தத்தா ஜாதகபா⁴ணகேன ஸாட்ட²கத²ம் ஜாதகம் உக்³க³ஹேத்வாபி த⁴ம்மபத³ம் ஸஹ வத்து²னா உக்³க³ஹேதப்³ப³மேவ.

பஞ்சஹி பி⁴க்க²வே அங்கே³ஹி ஸமன்னாக³தேனாதிஆதீ³ஸு ந ஸாமணேரோ உபட்டா²பேதப்³போ³தி உபஜ்ஜா²யேன ஹுத்வா ஸாமணேரோ ந உபட்டா²பேதப்³போ³. அஸேக்கே²ன ஸீலக்க²ந்தே⁴னாதி அஸேக்க²ஸ்ஸ ஸீலக்க²ந்தோ⁴பி அஸேக்கோ² ஸீலக்க²ந்தோ⁴ நாம. அஸேக்க²ஸ்ஸ அயந்தி ஹி அஸேக்கோ², ஸீலக்க²ந்தோ⁴. ஏவம் ஸப்³ப³த்த². ஏவஞ்ச கத்வா விமுத்திஞாணத³ஸ்ஸனஸங்கா²தஸ்ஸ பச்சவேக்க²ணஞாணஸ்ஸபி வஸேன அபேக்கி²த்வா உப்பன்னா அயம் கதா². அஸேக்க²ஸீலந்தி ச ந அக்³க³ப²லஸீலமேவ அதி⁴ப்பேதம், அத² கோ² யம் கிஞ்சி அஸேக்க²ஸந்தானே பவத்தஸீலம் லோகியலோகுத்தரமிஸ்ஸகஸ்ஸ ஸீலஸ்ஸ இதா⁴தி⁴ப்பேதத்தா. ஸமாதி⁴க்க²ந்தா⁴தீ³ஸுபி விமுத்திக்க²ந்த⁴பரியோஸானேஸு அயமேவ நயோ, தஸ்மா யதா² ஸீலஸமாதி⁴பஞ்ஞாக்க²ந்தா⁴ லோகியமிஸ்ஸகா கதி²தா, ஏவம் விமுத்திக்க²ந்தோ⁴பீதி தத³ங்க³விமுத்திஆத³யோபி வேதி³தப்³பா³, ந படிப்பஸ்ஸத்³தி⁴விமுத்தி ஏவ. விமுத்திஞாணத³ஸ்ஸனம் பன லோகியமேவ. தேனேவ ஸம்யுத்தனிகாயட்ட²கதா²யம் (ஸம்.நி. அட்ட². 1.1.135) வுத்தம் ‘‘புரிமேஹி சதூஹி பதே³ஹி லோகியலோகுத்தரஸீலஸமாதி⁴பஞ்ஞாவிமுத்தியோ கதி²தா, விமுத்திஞாணத³ஸ்ஸனம் பச்சவேக்க²ணஞாணம் ஹோதி, தம் லோகியமேவா’’தி.

அஸ்ஸத்³தோ⁴திஆதீ³ஸு தீஸு வத்தூ²ஸு ஸத்³தா⁴ ஏதஸ்ஸ நத்தீ²தி அஸ்ஸத்³தோ⁴. நத்தி² ஏதஸ்ஸ ஹிரீதி அஹிரிகோ, அகுஸலஸமாபத்தியா அஜிகு³ச்ச²மானஸ்ஸேதம் அதி⁴வசனம். ந ஓத்தப்பதீதி அனோத்தப்பீ, அகுஸலஸமாபத்தியா ந பா⁴யதீதி வுத்தம் ஹோதி. குச்சி²தம் ஸீத³தீதி குஸீதோ, ஹீனவீரியஸ்ஸேதம் அதி⁴வசனம். ஆரத்³த⁴ம் வீரியம் ஏதஸ்ஸாதி ஆரத்³த⁴வீரியோ, ஸம்மப்பதா⁴னயுத்தஸ்ஸேதம் அதி⁴வசனம். முட்டா² ஸதி ஏதஸ்ஸாதி முட்ட²ஸ்ஸதீ, நட்ட²ஸ்ஸதீதி வுத்தம் ஹோதி. உபட்டி²தா ஸதி ஏதஸ்ஸாதி உபட்டி²தஸ்ஸதீ, நிச்சம் ஆரம்மணாபி⁴முக²பவத்தஸதிஸ்ஸேதம் அதி⁴வசனம்.

அதி⁴ஸீலே ஸீலவிபன்னோ ச அஜ்ஜா²சாரே ஆசாரவிபன்னோ ச ஆபஜ்ஜித்வா அவுட்டி²தோ அதி⁴ப்பேதோ. ஸஸ்ஸதுச்சே²த³ஸங்கா²தம் அந்தம் க³ண்ஹாதி, கா³ஹயதீதி வா அந்தக்³கா³ஹிகா, மிச்சா²தி³ட்டி². புரிமானி த்³வே பதா³னீதி ‘‘ந படிப³லோ ஹோதி அந்தேவாஸிம் வா ஸத்³தி⁴விஹாரிம் வா கி³லானம் உபட்டா²தும் வா உபட்டா²பேதும் வா, அனபி⁴ரதம் வூபகாஸேதும் வா வூபகாஸாபேதும் வா’’தி இமானி த்³வே பதா³னி.

அபி⁴ விஸிட்டோ² உத்தமோ ஸமாசாரோ அபி⁴ஸமாசாரோ, அபி⁴ஸமாசாரோவ ஆபி⁴ஸமாசாரிகோதி ச ஸிக்கி²தப்³ப³தோ ஸிக்கா²தி ச ஆபி⁴ஸமாசாரிகஸிக்கா². அபி⁴ஸமாசாரம் வா ஆரப்³ப⁴ பஞ்ஞத்தா ஸிக்கா² ஆபி⁴ஸமாசாரிகஸிக்கா², க²ந்த⁴கவத்தபரியாபன்னஸிக்கா²யேதம் அதி⁴வசனம். மக்³க³ப்³ரஹ்மசரியஸ்ஸ ஆதி³பூ⁴தாதி ஆதி³ப்³ரஹ்மசரியகா, உப⁴தோவிப⁴ங்க³பரியாபன்னஸிக்கா²யேதம் அதி⁴வசனம். தேனேவ ‘‘உப⁴தோவிப⁴ங்க³பரியாபன்னம் வா ஆதி³ப்³ரஹ்மசரியகம், க²ந்த⁴கவத்தபரியாபன்னம் ஆபி⁴ஸமாசாரிக’’ந்தி விஸுத்³தி⁴மக்³கே³ (விஸுத்³தி⁴. 1.11) வுத்தம், தஸ்மா ஸேக்க²பண்ணத்தியந்தி ஏத்த² ஸிக்கி²தப்³ப³தோ ஸேக்கா², ப⁴க³வதா பஞ்ஞத்தத்தா பண்ணத்தி, ஸப்³பா³பி உப⁴தோவிப⁴ங்க³பரியாபன்னா ஸிக்கா²பத³பண்ணத்தி ‘‘ஸேக்க²பண்ணத்தீ’’தி வுத்தாதி க³ஹேதப்³ப³ம். தேனேவ க³ண்டி²பதே³பி வுத்தம் ‘‘ஸேக்க²பண்ணத்தியந்தி பாராஜிகமாதி³ம் கத்வா ஸிக்கி²தப்³ப³ஸிக்கா²பத³பஞ்ஞத்திய’’ந்தி. ஸேஸமேத்த² உத்தானத்த²மேவாதி ஸாரத்த²தீ³பனியம் (ஸாரத்த². டீ. மஹாவக்³க³ 3.84).

உபஜ்ஜா²யாசரியகதா²யம் ந ஸாமணேரோ உபட்டா²பேதப்³போ³தி உபஜ்ஜா²யேன ஹுத்வா ந பப்³பா³ஜேதப்³போ³. அஸேக்க²ஸ்ஸ அயந்தி அஸேக்கோ², லோகியலோகுத்தரோ ஸீலக்க²ந்தோ⁴. அந்தக்³கா³ஹிகாயாதி ஸஸ்ஸதுச்சே²த³கோட்டா²ஸக்³கா³ஹிகாய. பச்சி²மானி த்³வேதி அப்பஸ்ஸுதோ ஹோதி, து³ப்பஞ்ஞோ ஹோதீதி இமானி த்³வே அங்கா³னி. பச்சி²மானி தீணீதி ந படிப³லோ உப்பன்னம் குக்குச்சம் த⁴ம்மதோ வினோதே³தும், ஆபத்திம் ந ஜானாதி, ஆபத்திவுட்டா²னம் ந ஜானாதீதி இமானி தீணி. குக்குச்சஸ்ஸ ஹி பாளிஅட்ட²கதா²னயஸங்கா²தத⁴ம்மதோ வினோதே³தும் அப்படிப³லதா நாம அப்³யத்தத்தா ஏவ ஹோதீதி ஸாபி ஆபத்திஅங்க³மேவ வுத்தா.

அபி⁴ விஸிட்டோ² உத்தமோ ஸமாசாரோ அபி⁴ஸமாசாரோ, வத்தப்படிபத்திஸீலம், தம் ஆரப்³ப⁴ பஞ்ஞத்தா க²ந்த⁴கஸிக்கா²பத³ஸங்கா²தா ஸிக்கா² ஆபி⁴ஸமாசாரிகா. ஸிக்கா²பத³ம்பி ஹி தத³த்த²பரிபூரணத்தி²கேஹி உக்³க³ஹணாதி³வஸேன ஸிக்கி²தப்³ப³தோ ஸிக்கா²தி வுச்சதி. மக்³க³ப்³ரஹ்மசரியஸ்ஸ ஆதி³பூ⁴தா காரணபூ⁴தா ஆதி³ப்³ரஹ்மசரியகா, உப⁴தோவிப⁴ங்க³பரியாபன்னஸிக்கா²பத³ம். தேனேவேத்த² விஸுத்³தி⁴மக்³கே³பி (விஸுத்³தி⁴. 1.11) ‘‘உப⁴தோவிப⁴ங்க³பரியாபன்னம் ஸிக்கா²பத³ம் ஆதி³ப்³ரஹ்மசரியகம், க²ந்த⁴கவத்தபரியாபன்னம் ஆபி⁴ஸமாசாரிக’’ந்தி வுத்தம், தஸ்மா ஸேக்க²பண்ணத்தியந்தி ஏத்த² ஸிக்கி²தப்³ப³தோ ஸேக்கா², ப⁴க³வதாவ பஞ்ஞத்தத்தா பஞ்ஞத்தி. ஸப்³பா³பி உப⁴தோவிப⁴ங்க³பரியாபன்னா ஸிக்கா²பத³பண்ணத்தி ‘‘ஸேக்க²பண்ணத்தீ’’தி வுத்தாதி க³ஹேதப்³ப³ம். நாமரூபபரிச்சே²தே³தி ஏத்த² குஸலத்திகாதீ³ஹி வுத்தம் ஜாதிபூ⁴மிபுக்³க³லஸம்பயோக³வத்தா²ரம்மணகம்மத்³வாரலக்க²ணரஸாதி³பே⁴தே³ஹி வேத³னாக்க²ந்தா⁴தி³சதுப்³பி³த⁴ம் ஸனிப்³பா³னம் நாமம், பூ⁴தோபாதா³யபே⁴த³ம் ரூபஞ்ச பரிச்சி²ந்தி³த்வா ஜானனபஞ்ஞா, தப்பகாஸகோ ச க³ந்தோ² நாமரூபபரிச்சே²தோ³ நாம. இமினா அபி⁴த⁴ம்மத்த²குஸலேன ப⁴விதப்³ப³ந்தி த³ஸ்ஸேதி. ஸிக்கா²பேதுந்தி உக்³க³ண்ஹாபேதுந்தி விமதிவினோத³னியம் (வி. வி. டீ. மஹாவக்³க³ 2.84) வுத்தம்.

153. ஆயஸ்மதோ நிஸ்ஸாய வச்சா²மீதி ஏத்த² ஆயஸ்மதோதி உபயோக³த்தே² ஸாமிவசனம், ஆயஸ்மந்தம் நிஸ்ஸாய வஸிஸ்ஸாமீதி அத்தோ². யம் பன வுத்தம் ஸமந்தபாஸாதி³காயம் (மஹாவ. அட்ட². 76) ‘‘ப்³யத்தோ…பே… வுத்தலக்க²ணோயேவா’’தி, தம் பரிஸூபட்டா²கப³ஹுஸ்ஸுதம் ஸந்தா⁴ய வத³தி. பப்³ப³ஜ்ஜாஉபஸம்பத³த⁴ம்மந்தேவாஸிகேஹி பன…பே… தாவ வத்தம் காதப்³ப³ந்தி பப்³ப³ஜ்ஜாசரியஉபஸம்பதா³சரியத⁴ம்மாசரியானம் ஏதேஹி யதா²வுத்தவத்தம் காதப்³ப³ம். தத்த² யேன ஸிக்கா²பதா³னி தி³ன்னானி, அயம் பப்³ப³ஜ்ஜாசரியோ. யேன உபஸம்பத³கம்மவாசா வுத்தா, அயம் உபஸம்பதா³சரியோ. யோ உத்³தே³ஸம் வா பரிபுச்ச²ம் வா தே³தி, அயம் த⁴ம்மாசரியோதி வேதி³தப்³ப³ம். ஸேஸமேத்த² உத்தானத்த²மேவ.

154. நிஸ்ஸயபடிப்பஸ்ஸத்³தி⁴கதா²யம் தி³ஸம் க³தோதி புன ஆக³ந்துகாமோ, அனாக³ந்துகாமோ வா ஹுத்வா வாஸத்தா²ய கஞ்சி தி³ஸம் க³தோ. பி⁴க்கு²ஸ்ஸ ஸபா⁴க³தந்தி பேஸலபா⁴வம். ஓலோகேத்வாதி உபபரிக்கி²த்வா. விப்³ப⁴ந்தே…பே… தத்த² க³ந்தப்³ப³ந்தி ஏத்த² ‘‘ஸசே கேனசி கரணீயேன தத³ஹேவ க³ந்தும் அஸக்கோந்தோ ‘கதிபாஹேன க³மிஸ்ஸாமீ’தி க³மனே ஸஉஸ்ஸாஹோ ஹோதி, ரக்க²தீ’’தி வத³ந்தி. மா இத⁴ படிக்கமீதி மா இத⁴ பவிஸி. தத்ரேவ வஸிதப்³ப³ந்தி தத்தே²வ நிஸ்ஸயம் க³ஹேத்வா வஸிதப்³ப³ம். தம்யேவ விஹாரம்…பே… வஸிதும் வட்டதீதி ஏத்த² உபஜ்ஜா²யேன பரிச்சத்தத்தா உபஜ்ஜா²யஸமோதா⁴னபரிஹாரோ நத்தி², தஸ்மா உபஜ்ஜா²யஸமோதா⁴னக³தஸ்ஸபி ஆசரியஸ்ஸ ஸந்திகே க³ஹிதனிஸ்ஸயோ ந படிப்பஸ்ஸம்ப⁴தி.

ஆசரியம்ஹா நிஸ்ஸயபடிப்பஸ்ஸத்³தீ⁴ஸு ஆசரியோ பக்கந்தோ வா ஹோதீதி ஏத்த² ‘‘பக்கந்தோதி தி³ஸம் க³தோ’’திஆதி³னா உபஜ்ஜா²யஸ்ஸ பக்கமனே யோ வினிச்ச²யோ வுத்தோ, ஸோ தத்த² வுத்தனயேனேவ இதா⁴பி ஸக்கா விஞ்ஞாதுந்தி தம் அவத்வா ‘‘கோசி ஆசரியோ ஆபுச்சி²த்வா பக்கமதீ’’திஆதி³னா அஞ்ஞோயேவ நயோ ஆரத்³தோ⁴. அயஞ்ச நயோ உபஜ்ஜா²யபக்கமனேபி வேதி³தப்³போ³யேவ. ஈதி³ஸேஸு ஹி டா²னேஸு ஏகத்த²வுத்தலக்க²ணம் அஞ்ஞத்தா²பி த³ட்ட²ப்³ப³ம். ஸசே த்³வே லேட்³டு³பாதே அதிக்கமித்வா நிவத்ததி, படிப்பஸ்ஸத்³தோ⁴ ஹோதீதி ஏத்த² ஏத்தாவதா தி³ஸாபக்கந்தோ நாம ஹோதீதி அந்தேவாஸிகே அனிக்கி²த்தது⁴ரேபி நிஸ்ஸயோ படிப்பஸ்ஸம்ப⁴தி. ஆசரியுபஜ்ஜா²யா த்³வே லேட்³டு³பாதே அதிக்கம்ம அஞ்ஞஸ்மிம் விஹாரே வஸந்தீதி ப³ஹிஉபசாரஸீமாயம் அந்தேவாஸிகஸத்³தி⁴விஹாரிகானம் வஸனட்டா²னதோ த்³வே லேட்³டு³பாதே அதிக்கம்ம அஞ்ஞஸ்மிம் ஸேனாஸனே வஸந்தி, அந்தோஉபசாரஸீமாயம் பன த்³வே லேட்³டு³பாதே அதிக்கமித்வாபி வஸதோ நிஸ்ஸயோ ந படிப்பஸ்ஸம்ப⁴தி. ‘‘ஸசேபி ஆசரியோ முஞ்சிதுகாமோவ ஹுத்வா நிஸ்ஸயபணாமனாய பணாமேதீ’’திஆதி³ ஸப்³ப³ம் உபஜ்ஜா²யஸ்ஸ ஆணத்தியம்பி வேதி³தப்³ப³ந்தி ஸாரத்த²தீ³பனியம் (ஸாரத்த². டீ. மஹாவக்³க³ 3.83) வுத்தம்.

153. ஸாஹூதி ஸாது⁴ ஸுந்த³ரம். லஹூதி அக³ரு, ஸுப⁴ரதாதி அத்தோ². ஓபாயிகந்தி உபாயபடிஸம்யுத்தம், ஏவம் படிபஜ்ஜனம் நித்த²ரணுபாயோதி அத்தோ². பதிரூபந்தி ஸாமீசிகம்மமித³ந்தி அத்தோ². பாஸாதி³கேனாதி பஸாதா³வஹேன, காயவசீபயோகே³ன ஸம்பாதே³ஹீதி அத்தோ². காயேனாதி ஏதத³த்த²விஞ்ஞாபகம் ஹத்த²முத்³தா³தி³ம் த³ஸ்ஸேந்தோ காயேன விஞ்ஞாபேதி. ‘‘ஸாதூ⁴’’தி ஸம்படிச்ச²னம் ஸந்தா⁴யாதி உபஜ்ஜா²யேன ‘‘ஸாஹூ’’திஆதீ³ஸு வுத்தேஸு ஸத்³தி⁴விஹாரிகஸ்ஸ ‘‘ஸாதூ⁴’’தி ஸம்படிச்ச²னவசனம் ஸந்தா⁴ய ‘‘காயேன விஞ்ஞாபேதீ’’திஆதி³ வுத்தந்தி அதி⁴ப்பாயோ. ஆயாசனதா³னமத்தேனாதி ஸத்³தி⁴விஹாரிகஸ்ஸ பட²மம் ஆயாசனமத்தேன, ததோ உபஜ்ஜா²யஸ்ஸ ச ‘‘ஸாஹூ’’திஆதி³னா வசனமத்தேனாதி அத்தோ². ஆசரியஸ்ஸ ஸந்திகே நிஸ்ஸயக்³க³ஹணே ஆயஸ்மதோ நிஸ்ஸாய வச்சா²மீதி ஆயஸ்மந்தம் நிஸ்ஸாய வஸிஸ்ஸாமீதி அத்தோ².

154. நிஸ்ஸயபடிப்பஸ்ஸத்³தி⁴கதா²யம் யோ வா ஏகஸம்போ⁴க³பரிபோ⁴கோ³, தஸ்ஸ ஸந்திகே நிஸ்ஸயோ க³ஹேதப்³போ³தி இமினா லஜ்ஜீஸு ஏவ நிஸ்ஸயக்³க³ஹணம் நியோஜேதி அலஜ்ஜீஸு படிக்கி²த்தத்தா. ஏத்த² ச பரிபோ⁴க³ஸத்³தே³ன ஏககம்மாதி³கோ ஸம்வாஸோ க³ஹிதோ பச்சயபரிபோ⁴க³ஸ்ஸ ஸம்போ⁴க³ஸத்³தே³ன க³ஹிதத்தா. ஏதேன ச ஸம்போ⁴க³ஸம்வாஸானம் அலஜ்ஜீஹி ஸத்³தி⁴ம் ந கத்தப்³ப³தம் த³ஸ்ஸேதி. பரிஹாரோ நத்தீ²தி ஆபத்திபரிஹாரோ நத்தி². தாதி³ஸோதி யத்த² நிஸ்ஸயோ க³ஹிதபுப்³போ³, யோ ச ஏகஸம்போ⁴க³பரிபோ⁴கோ³, தாதி³ஸோ. ததா² வுத்தந்தி ‘‘லஹும் ஆக³மிஸ்ஸதீ’’தி வுத்தஞ்சேதி அத்தோ². சத்தாரி பஞ்ச தி³வஸானீதி இத³ம் உபலக்க²ணமத்தம். யதி³ ஏகாஹத்³வீஹேன ஸபா⁴க³தா பஞ்ஞாயதி, ஞாததி³வஸே க³ஹேதப்³போ³வ. அதா²பி சதுபஞ்சாஹேனபி ந பஞ்ஞாயதி, யத்தகேஹி தி³வஸேஹி பஞ்ஞாயதி, தத்தகானி அதிக்காமேதப்³பா³னி. ஸபா⁴க³தம் ஓலோகேமீதி பன லேஸோ ந காதப்³போ³. த³ஹரா ஸுணந்தீதி ஏத்த² அஸுத்வாபி ‘‘ஆக³மிஸ்ஸதி, கேனசி அந்தராயேன சிராயந்தீ’’தி ஸஞ்ஞாய ஸதிபி லப்³ப⁴தேவ பரிஹாரோ. தேனாஹ ‘‘இதே⁴வாஹம் வஸிஸ்ஸாமீதி பஹிணதி, பரிஹாரோ நத்தீ²’’தி. ஏகதி³வஸம்பி பரிஹாரோ நத்தீ²தி க³மனே நிருஸ்ஸாஹம் ஸந்தா⁴ய வுத்தம், ஸஉஸ்ஸாஹஸ்ஸ பன ஸேனாஸனபடிஸாமனாதி³வஸேன கதிபாஹே க³தேபி ந தோ³ஸோ.

தத்ரேவ வஸிதப்³ப³ந்தி தத்ர ஸபா⁴க³ட்டா²னே ஏவ நிஸ்ஸயம் க³ஹேத்வா வஸிதப்³ப³ம். தம்யேவ விஹாரம்…பே… வஸிதும் வட்டதீதி இமினா உபஜ்ஜா²யே ஸங்க³ண்ஹந்தேயேவ தம்ஸமோதா⁴னே நிஸ்ஸயபடிப்பஸ்ஸத்³தி⁴ வுத்தா, தஸ்மிம் பன கோதே⁴ன வா க³ணனிரபேக்க²தாய வா அஸங்க³ண்ஹந்தே அஞ்ஞேஸு க³ஹிதோ நிஸ்ஸயோ ந படிப்பஸ்ஸம்ப⁴தீதி த³ஸ்ஸேதி.

ஆசரியம்ஹா நிஸ்ஸயபடிப்பஸ்ஸத்³தி⁴யம் வுத்தோ ‘‘கோசி ஆசரியோ’’திஆதி³கோ நயோ உபஜ்ஜா²யபக்கமனாதீ³ஸுபி நேத்வா தத்த² ச வுத்தோ இதா⁴பி நேத்வா யதா²ரஹம் யோஜேதப்³போ³. த்³வே லேட்³டு³பாதே அதிக்கம்ம அஞ்ஞஸ்மிம் விஹாரே வஸந்தீதி உபசாரஸீமதோ ப³ஹி அஞ்ஞஸ்மிம் விஹாரே அந்தேவாஸிகாதீ³னம் வஸனட்டா²னதோ த்³வே லேட்³டு³பாதே அதிக்கமித்வா வஸந்தி. தேன ப³ஹிஉபசாரேபி அந்தேவாஸிகாதீ³னம் வஸனட்டா²னதோ த்³வின்னம் லேட்³டு³பாதானம் அந்தரே ஆஸன்னே பதே³ஸே வஸதி, நிஸ்ஸயோ ந படிப்பஸ்ஸம்ப⁴தீதி த³ஸ்ஸேதி. அந்தோஉபசாரஸீமாயம் பன த்³வே லேட்³டு³பாதே அதிக்கமித்வா வஸதோ நிஸ்ஸயோ ந படிப்பஸ்ஸம்ப⁴தேவாதி விமதிவினோத³னியம் (வி. வி. டீ. மஹாவக்³க³ 2.83) வுத்தம்.

இதி வினயஸங்க³ஹஸம்வண்ணனாபூ⁴தே வினயாலங்காரே

நிஸ்ஸயவினிச்ச²யகதா²லங்காரோ நாம

தேவீஸதிமோ பரிச்சே²தோ³.