22. பப்³ப³ஜ்ஜாவினிச்ச²யகதா²

123. ஏவம் படிக்கே²பபவாரணாவினிச்ச²யம் கதே²த்வா இதா³னி பப்³ப³ஜ்ஜாவினிச்ச²யம் கதே²தும் ‘‘பப்³ப³ஜ்ஜாதி ஏத்த² பனா’’த்யாதி³மாஹ. தத்த² பட²மம் வஜிதப்³பா³தி பப்³ப³ஜ்ஜா, உபஸம்பதா³தோ பட²மம் உபக³ச்சி²தப்³பா³தி அத்தோ². ப-புப்³ப³ வஜ க³திம்ஹீதி தா⁴து. குலபுத்தந்தி ஆசாரகுலபுத்தம் ஸந்தா⁴ய வத³தி. யே புக்³க³லா படிக்கி²த்தா, தே வஜ்ஜேத்வாதி ஸம்ப³ந்தோ⁴. பப்³ப³ஜ்ஜாதோ³ஸவிரஹிதோதி பப்³ப³ஜ்ஜாய அந்தராயகரேஹி பஞ்சாபா³தா⁴தி³தோ³ஸேஹி விரஹிதோ. நக²பிட்டி²ப்பமாணந்தி ஏத்த² கனிட்ட²ங்கு³லினக²பிட்டி² அதி⁴ப்பேதா. ‘‘தஞ்சே நக²பிட்டி²ப்பமாணம்பி வட்³ட⁴னபக்கே² டி²தம் ஹோதி, ந பப்³பா³ஜேதப்³போ³தி இமினா ஸாமஞ்ஞலக்க²ணம் த³ஸ்ஸிதம், தஸ்மா யத்த² கத்த²சி ஸரீராவயவேஸு நக²பிட்டி²ப்பமாணம் வட்³ட⁴னகபக்கே² டி²தம் சே, ந வட்டதீதி ஸித்³த⁴ம். ஏவஞ்ச ஸதி நக²பிட்டி²ப்பமாணம்பி அவட்³ட⁴னகபக்கே² டி²தம் சே, ஸப்³ப³த்த² வட்டதீதி ஆபன்னம், தஞ்ச ந ஸாமஞ்ஞதோ அதி⁴ப்பேதந்தி பதே³ஸவிஸேஸேயேவ நியமேத்வா த³ஸ்ஸேந்தோ ‘ஸசே பனா’திஆதி³மாஹ. ஸசே ஹி அவிஸேஸேன நக²பிட்டி²ப்பமாணம் அவட்³ட⁴னகபக்கே² டி²தம் வட்டேய்ய, ‘நிவாஸனபாருபனேஹி பகதிபடிச்ச²ன்னட்டா²னே’தி பதே³ஸனியமம் ந கரேய்ய, தஸ்மா நிவாஸனபாருபனேஹி பகதிபடிச்ச²ன்னட்டா²னதோ அஞ்ஞத்த² நக²பிட்டி²ப்பமாணம் அவட்³ட⁴னகபக்கே² டி²தம்பி ந வட்டதீதி ஸித்³த⁴ம். நக²பிட்டி²ப்பமாணதோ கு²த்³த³கதரம் பன அவட்³ட⁴னகபக்கே² வா வட்³ட⁴னகபக்கே² வா டி²தம் ஹோது, வட்டதி நக²பிட்டி²ப்பமாணதோ கு²த்³த³கதரஸ்ஸ வட்³ட⁴னகபக்கே² அவட்³ட⁴னகபக்கே² வா டி²தஸ்ஸ முகா²தீ³ஸுயேவ படிக்கி²த்தத்தா’’தி ஸாரத்த²தீ³பனியம் (ஸாரத்த². டீ. மஹாவக்³க³ 3.88) வுத்தம்.

விமதிவினோத³னியம் (வி. வி. டீ. மஹாவக்³க³ 88-89) பன ‘‘படிச்ச²ன்னட்டா²னே நக²பிட்டி²ப்பமாணம் அவட்³ட⁴னகபக்கே² டி²தம் ஹோதி, வட்டதீதி வுத்தத்தா அப்படிச்ச²ன்னட்டா²னே தாதி³ஸம்பி ந வட்டதி, படிச்ச²ன்னட்டா²னேபி ச வட்³ட⁴னகபக்கே² டி²தம் ந வட்டதீதி ஸித்³த⁴மேவ ஹோதி. பாகடட்டா²னேபி பன நக²பிட்டி²ப்பமாணதோ ஊனதரம் அவட்³ட⁴னகம் வட்டதீதி யே க³ண்ஹேய்யும், தேஸம் தம் க³ஹணம் படிஸேதே⁴தும் ‘முகே² பனா’திஆதி³ வுத்த’’ந்தி வுத்தம். கோ³தா⁴…பே… ந வட்டதீதி இமினா தாதி³ஸோபி ரோகோ³ குட்டே²யேவ அந்தோக³தோ⁴தி த³ஸ்ஸேதி. க³ண்டே³பி இமினா நயேன வினிச்ச²யோ வேதி³தப்³போ³. தத்த² பன முகா²தீ³ஸு கோலட்டி²மத்ததோ கு²த்³த³கதரோபி க³ண்டோ³ ந வட்டதீதி விஸும் ந த³ஸ்ஸிதோ. ‘‘அப்படிச்ச²ன்னட்டா²னே அவட்³ட⁴னகபக்கே² டி²தேபி ந வட்டதீ’’தி ஏத்தகமேவ ஹி தத்த² வுத்தம், ததா²பி குட்டே² வுத்தனயேன முகா²தீ³ஸு கோலட்டி²ப்பமாணதோ கு²த்³த³கதரோபி க³ண்டோ³ ந வட்டதீதி விஞ்ஞாயதி, தஸ்மா அவட்³ட⁴னகபக்கே² டி²தேபீதி ஏத்த² பி-ஸத்³தோ³ அவுத்தஸம்பிண்ட³னத்தோ², தேன கோலட்டி²மத்ததோ கு²த்³த³கதரோபி ந வட்டதீதி அயமத்தோ² த³ஸ்ஸிதோயேவாதி அம்ஹாகம் க²ந்தி. பகதிவண்ணே ஜாதேதி ரோக³ஹேதுகஸ்ஸ விகாரவண்ணஸ்ஸ அபா⁴வம் ஸந்தா⁴ய வுத்தம்.

கோலட்டி²மத்தகோதி ப³த³ரட்டி²ப்பமாணோ. ‘‘ஸஞ்ஜாதச²விம் காரேத்வா’’தி பாடோ², விஜ்ஜமானச²விம் காரேத்வாதி அத்தோ². விமதிவினோத³னியம் (வி. வி. டீ. மஹாவக்³க³ 2.88-89) பன ‘‘ஸச்ச²விம் காரேத்வாதி விஜ்ஜமானச²விம் காரேத்வாதி அத்தோ², ஸஞ்ச²விந்தி வா பாடோ², ஸஞ்ஜாதச²அந்தி அத்தோ². க³ண்டா³தீ³ஸு வூபஸந்தேஸுபி தம் டா²னம் விவண்ணம்பி ஹோதி, தம் வட்டதீ’’தி வுத்தம்.

பது³மபுண்ட³ரீகபத்தவண்ணந்தி ரத்தபது³மஸேதபது³மபுப்ப²த³லவண்ணம். குட்டே² வுத்தனயேனேவாதி ‘‘படிச்ச²ன்னட்டா²னே அவட்³ட⁴னகம் வட்டதி, அஞ்ஞத்த² ந கிஞ்சி வட்டதீ’’தி வுத்தனயம் த³ஸ்ஸேதி. ஸோஸப்³யாதீ⁴தி க²யரோகோ³. யக்கு²ம்மாதோ³தி கதா³சி ஆக³ந்த்வா பூ⁴மியம் பாதேத்வா ஹத்த²முகா²தி³கம் அவயவம் பூ⁴மியம் க⁴ம்ஸனகோ யக்கோ²வ ரோகோ³.

124. மஹாமத்தோதி மஹதியா இஸ்ஸரியமத்தாய ஸமன்னாக³தோ. ‘‘ந தா³னாஹம் தே³வஸ்ஸ ப⁴டோ’’தி ஆபுச்ச²தீதி ரஞ்ஞா ஏவ தி³ன்னம் டா²னந்தரம் ஸந்தா⁴ய வுத்தம். யோ பன ராஜகம்மிகேஹி அமச்சாதீ³ஹி ட²பிதோ, அமச்சாதீ³னம் ஏவ வா ப⁴டோ ஹோதி, தேன தம் தம் அமச்சாதி³ம்பி ஆபுச்சி²தும் வட்டதீதி.

125. ‘‘த⁴ஜப³ந்தோ⁴’’தி வுத்தத்தா அபாகடசோரோ பப்³பா³ஜேதப்³போ³தி விஞ்ஞாயதி. தேன வக்க²தி ‘‘யே பன அம்ப³லபு³ஜாதி³சோரகா’’திஆதி³. ஏவம் ஜானந்தீதி ‘‘ஸீலவா ஜாதோ’’தி ஜானந்தி.

126. பி⁴ந்தி³த்வாதி அந்து³ப³ந்த⁴னம் பி⁴ந்தி³த்வா. சி²ந்தி³த்வாதி ஸங்க²லிகப³ந்த⁴னம் சி²ந்தி³த்வா. முஞ்சித்வாதி ரஜ்ஜுப³ந்த⁴னம் முஞ்சித்வா. விவரித்வாதி கா³மப³ந்த⁴னாதீ³ஸு கா³மத்³வாராதீ³னி விவரித்வா. அபஸ்ஸமானானம் வா பலாயதீதி புரிஸகு³த்தியம் புரிஸானம் கோ³பகானம் அபஸ்ஸமானானம் பலாயதி.

129. புரிமனயேனேவாதி ‘‘கஸாஹதோ கதத³ண்ட³கம்மோ’’தி ஏத்த² வுத்தனயேனேவ.

130. பலாதோபீதி இணஸ்ஸாமிகானம் ஆக³மனம் ஞத்வா ப⁴யேன பலாதோபி இணாயிகோ. கீ³வா ஹோதி இணாயிகபா⁴வம் ஞத்வா அனாத³ரேன இணமுத்தகே பி⁴க்கு²பா⁴வே பவேஸிதத்தா.

உபட்³டு⁴பட்³ட⁴ந்தி தோ²கம் தோ²கம். தா³தப்³ப³மேவாதி இணாயிகேன த⁴னம் ஸம்பஜ்ஜது வா, மா வா, தா³னே ஸஉஸ்ஸாஹேனேவ ப⁴விதப்³ப³ம், அஞ்ஞேஹி ச பி⁴க்கூ²ஹி ‘‘மா து⁴ரம் நிக்கி²பாஹீ’’தி வத்வா ஸஹாயகேஹி ப⁴விதப்³ப³ந்தி த³ஸ்ஸேதி. து⁴ரனிக்கே²பேன ஹிஸ்ஸ ப⁴ண்ட³க்³கே⁴ன காரேதப்³ப³தா ஸியாதி.

131. தா³ஸசாரித்தம் ஆரோபேத்வா கீதோதி இமினா தா³ஸபா⁴வபரிமோசனத்தா²ய கீதம் நிவத்தேதி. தாதி³ஸோ ஹி த⁴னக்கீதோபி அதா³ஸோ ஏவ. வஜிரபு³த்³தி⁴டீகாயம் (வஜிர. டீ. மஹாவக்³க³ 97) பன ‘‘தே³ஸசாரித்தந்தி ஸாவனபண்ணாரோபனாதி³கம் தம் தம் தே³ஸசாரித்த’’ந்தி வுத்தம். தத்த² தத்த² சாரித்தவஸேனாதி தஸ்மிம் தஸ்மிம் ஜனபதே³ தா³ஸபண்ணஜ்ஜா²பனாதி³னா அதா³ஸகரணனியாமேன. அபி⁴ஸேகாதீ³ஸு ஸப்³ப³ப³ந்த⁴னானி மோசாபேந்தி, தம் ஸந்தா⁴ய ‘‘ஸப்³ப³ஸாதா⁴ரணேனா’’தி வுத்தம்.

ஸசே ஸயமேவ பண்ணம் ஆரோபேந்தி, ந வட்டதீதி தா பு⁴ஜிஸ்ஸித்தி²யோ ‘‘மயம்பி வண்ணதா³ஸியோ ஹோமா’’தி அத்தனோ ரக்க²ணத்தா²ய ஸயமேவ ராஜூனம் தா³ஸிபண்ணே அத்தனோ நாமம் லிகா²பேந்தி, தாஸம் புத்தாபி ராஜதா³ஸாவ ஹோந்தி, தஸ்மா தே பப்³பா³ஜேதும் ந வட்டதி. தேஹி அதி³ன்னா ந பப்³பா³ஜேதப்³பா³தி யத்தகா தேஸம் ஸாமினோ, தேஸு ஏகேன அதி³ன்னேபி ந பப்³பா³ஜேதப்³பா³. பு⁴ஜிஸ்ஸே கத்வா பன பப்³பா³ஜேதும் வட்டதீதி யஸ்ஸ விஹாரஸ்ஸ தே ஆராமிகா தி³ன்னா, தஸ்மிம் விஹாரே ஸங்க⁴ம் ஞாபேத்வா பா²திகம்மேன த⁴னாதி³ம் கத்வா பு⁴ஜிஸ்ஸே கத்வா பப்³பா³ஜேதும் வட்டதி. வஜிரபு³த்³தி⁴டீகாயம் (வஜிர. டீ. மஹாவக்³க³ 97) பன ‘‘தே³வதா³ஸிபுத்தே வட்டதீதி லிகி²தம். ‘ஆராமிகஞ்சே பப்³பா³ஜேதுகாமோ, அஞ்ஞமேகம் த³த்வா பப்³பா³ஜேதப்³ப³’ந்தி வுத்தம். மஹாபச்சரிவாத³ஸ்ஸ அயமித⁴ அதி⁴ப்பாயோ, ‘பி⁴க்கு²ஸங்க⁴ஸ்ஸ ஆராமிகே தே³மா’தி தி³ன்னத்தா ந தே தேஸம் தா³ஸா, ‘ஆராமிகோ ச நேவ தா³ஸோ ந பு⁴ஜிஸ்ஸோ’தி வத்தப்³ப³தோ ந தா³ஸோதி லிகி²தம். தக்காஸிஞ்சனம் ஸீஹளதீ³பே சாரித்தம், தே ச பப்³பா³ஜேதப்³பா³ ஸங்க⁴ஸ்ஸாராமிகத்தா. நிஸ்ஸாமிகம் தா³ஸம் அத்தனாபி பு⁴ஜிஸ்ஸம் காதும் லப⁴தீ’’தி வுத்தம்.

ஸாரத்த²தீ³பனியம் (ஸாரத்த². டீ. மஹாவக்³க³ 3.97) பன ‘‘தக்கம் ஸீஸே ஆஸித்தகஸதி³ஸாவ ஹோந்தீதி யதா² அதா³ஸே கரோந்தா தக்கேன ஸீஸம் தோ⁴வித்வா அதா³ஸம் கரோந்தி, ஏவம் ஆராமிகவசனேன தி³ன்னத்தா அதா³ஸாவ தேதி அதி⁴ப்பாயோ. ‘தக்காஸிஞ்சனம் பன ஸீஹளதீ³பே சாரித்த’ந்தி வத³ந்தி. நேவ பப்³பா³ஜேதப்³போ³தி வுத்தந்தி கப்பியவசனேன தி³ன்னேபி ஸங்க⁴ஸ்ஸ ஆராமிகதா³ஸத்தா ஏவம் வுத்த’’ந்தி வுத்தம். விமதிவினோத³னியம்பி (வி. வி. டீ. மஹாவக்³க³ 2.97) ‘‘தக்கம் ஸீஸே ஆஸித்தகஸதி³ஸாவ ஹோந்தீதி கேஸுசி ஜனபதே³ஸு அதா³ஸே கரோந்தா தக்கம் ஸீஸே ஆஸிஞ்சந்தி, தேன கிர தே அதா³ஸா ஹோந்தி, ஏவமித³ம்பி ஆராமிகவசனேன தி³ன்னம்பீதி அதி⁴ப்பாயோ. ததா² தி³ன்னேபி ஸங்க⁴ஸ்ஸ ஆராமிகதா³ஸோ ஏவாதி ‘நேவ பப்³பா³ஜேதப்³போ³’தி வுத்தம். ‘தாவகாலிகோ நாம’தி வுத்தத்தா காலபரிச்சே²த³ம் கத்வா வா பச்சா²பி க³ஹேதுகாமதாய வா தி³ன்னம் ஸப்³ப³ம் தாவகாலிகமேவாதி க³ஹேதப்³ப³ம். நிஸ்ஸாமிகதா³ஸோ நாம யஸ்ஸ ஸாமிகுலம் அஞ்ஞாதிகம் மரணேன பரிக்கீ²ணம், ந கோசி தஸ்ஸ தா³யாதோ³, ஸோ பன ஸமானஜாதிகேஹி வா நிவாஸகா³மவாஸீஹி வா இஸ்ஸரேஹி வா பு⁴ஜிஸ்ஸோ கதோவ பப்³பா³ஜேதப்³போ³. தே³வதா³ஸாபி தா³ஸா ஏவ. தே ஹி கத்த²சி தே³ஸே ராஜதா³ஸா ஹோந்தி, கத்த²சி விஹாரதா³ஸா வா, தஸ்மா பப்³பா³ஜேதும் ந வட்டதீ’’தி வுத்தம்.

ஸாரத்த²தீ³பனியம் (ஸாரத்த². டீ. மஹாவக்³க³ 3.97) பன ‘‘நிஸ்ஸாமிகதா³ஸோ நாம யஸ்ஸ ஸாமிகா ஸபுத்ததா³ரா மதா ஹோந்தி, ந கோசி தஸ்ஸ பரிக்³கா³ஹகோ, ஸோபி பப்³பா³ஜேதும் ந வட்டதி, தம் பன அத்தனாபி பு⁴ஜிஸ்ஸம் காதும் வட்டதி. யே வா பன தஸ்மிம் ரட்டே² ஸாமினோ, தேஹிபி காராபேதும் வட்டதி, ‘தே³வதா³ஸிபுத்தம் பப்³பா³ஜேதும் வட்டதீ’தி தீஸுபி க³ண்டி²பதே³ஸு வுத்தம். ‘தா³ஸஸ்ஸ பப்³ப³ஜித்வா அத்தனோ ஸாமிகே தி³ஸ்வா பலாயந்தஸ்ஸ ஆபத்தி நத்தீ²’தி வத³ந்தீ’’தி வுத்தம். விமதிவினோத³னியம் பன ‘‘தா³ஸம்பி பப்³பா³ஜேத்வா ஸாமிகே தி³ஸ்வா படிச்சா²த³னத்த²ம் அபனேந்தோ பத³வாரேன அதி³ன்னாதா³னாபத்தியா காரேதப்³போ³, தா³ஸஸ்ஸ பன பலாயதோ அனாபத்தீ’’தி வுத்தம்.

132. ஹத்த²ச்சி²ன்னகாதி³வத்தூ²ஸு கண்ணமூலேதி ஸகலஸ்ஸ கண்ணஸ்ஸ சே²த³ம் ஸந்தா⁴யாஹ. கண்ணஸக்க²லிகாயாதி கண்ணசூளிகாய. யஸ்ஸ பன கண்ணாவட்டேதி ஹேட்டா² குண்ட³லாதி³ட²பனசி²த்³த³ம் ஸந்தா⁴ய வுத்தம். ‘‘தஞ்ஹி ஸங்க⁴ட்டனக்க²மம். அஜபத³கேதி அஜபத³னாஸிகட்டி²கோடியம். ததோ ஹி உத்³த⁴ம் ந விச்சி²ந்தி³தும் ஸக்கா ஹோதி. ஸந்தே⁴துந்தி அவிரூபஸண்டா²னம் ஸந்தா⁴ய வுத்தம், விரூபம் பன பரிஸதூ³ஸகம் ஆபாதே³தி.

கு²ஜ்ஜஸரீரோதி வங்கஸரீரோ. ப்³ரஹ்முனோ விய உஜுகம் க³த்தம் ஸரீரம் யஸ்ஸ ஸோ ப்³ரஹ்முஜுக³த்தோ, ப⁴க³வா. அவஸேஸோ ஸத்தோதி இமினா லக்க²ணேன ரஹிதஸத்தோ. ஏதேன ட²பேத்வா மஹாபுரிஸம் சக்கவத்திஞ்ச இதரே ஸத்தா கு²ஜ்ஜபக்கி²காதி த³ஸ்ஸேதி. யேபு⁴ய்யேன ஹி ஸத்தா க²ந்தே⁴ கடியம் ஜாணூஸூதி தீஸு டா²னேஸு நமந்தி, தே கடியம் நமந்தா பச்ச²தோ நமந்தி, த்³வீஸு டா²னேஸு நமந்தா புரதோ நமந்தி, தீ³க⁴ஸரீரா பன ஏகேன பஸ்ஸேன வங்கா ஹோந்தி, ஏகே முக²ம் உன்னாமேத்வா நக்க²த்தானி க³ணயந்தா விய சரந்தி, ஏகே அப்பமம்ஸலோஹிதா ஸூலஸதி³ஸா ஹோந்தி, ஏகே புரதோ பப்³பா⁴ரா ஹோந்தி, பவேத⁴மானா க³ச்ச²ந்தி. பரிவடுமோதி ஸமந்ததோ வட்டகாயோ. ஏதேன ஏவரூபா ஏவ வாமனகா ந வட்டந்தீதி த³ஸ்ஸேதி.

133. அட்டி²ஸிராசம்மஸரீரோதி அட்டி²ஸிராசம்மமத்தஸரீரோ. கூடகூடஸீஸோதி அனேகேஸு டா²னேஸு பிண்டி³தமம்ஸதம் த³ஸ்ஸேதும் ஆமேடி³தம் கதம். தேனாஹ ‘‘தாலப²லபிண்டி³ஸதி³ஸேனா’’தி. தாலப²லானம் மஞ்ஜரீ பிண்டி³ நாம. அனுபுப்³ப³தனுகேன ஸீஸேனாதி சேதியதூ²பிகா விய கமேன கிஸேன ஸீஸேன. மஹாவேளுபப்³ப³ம் விய ஆதி³தோ பட்டா²ய யாவ பரியோஸானா அவிஸமதூ²லேன ஸீஸேன ஸமன்னாக³தோ நாளிஸீஸோ நாம. கப்பஸீஸோதி க³ஜமத்த²கம் விய த்³விதா⁴ பி⁴ன்னஸீஸோ. ‘‘கண்ணிககேஸோ வா’’தி இமஸ்ஸ விவரணம் ‘‘பாணகேஹீ’’திஆதி³. மக்கடஸ்ஸேவ நலாடேபி கேஸானம் உட்டி²தபா⁴வம் ஸந்தா⁴யாஹ ‘‘ஸீஸலோமேஹீ’’திஆதி³.

மக்கடப⁴முகோதி நலாடலோமேஹி அவிப⁴த்தலோமப⁴முகோ. அக்கி²சக்கேஹீதி அக்கி²மண்ட³லேஹி. கேகரோதி திரியம் பஸ்ஸனகோ. உத³கதாரகாதி ஓலோகேந்தானம் உத³கே படிபி³ம்பி³கச்சா²யா. உத³கபு³ப்³பு³ளந்தி கேசி. அக்கி²தாரகாதி அபி⁴முகே² டி²தானம் சா²யா. அக்கி²ப⁴ண்ட³காதிபி வத³ந்தி. அதிபிங்க³லக்கி² மஜ்ஜாரக்கி². மது⁴பிங்க³லந்தி மது⁴வண்ணபிங்க³லம். நிப்பகு²மக்கீ²தி ஏத்த² பகு²ம-ஸத்³தோ³ அக்கி²த³லலோமேஸு நிருள்ஹோ, தத³பா⁴வா நிப்பகு²மக்கி². அக்கி²பாகேனாதி அக்கி²த³லபரியந்தேஸு பூதிதாபஜ்ஜனரோகே³ன.

சிபிடனாஸிகோதி அனுன்னதனாஸிகோ. படங்க³மண்டூ³கோ நாம மஹாமுக²மண்டூ³கோ. பி⁴ன்னமுகோ²தி உபக்கமுக²பரியோஸானோ, ஸப்³ப³தா³ விவடமுகோ² வா. வங்கமுகோ²தி ஏகபஸ்ஸே அபக்கம்ம டி²தஹேட்டி²மஹனுகட்டி²கோ. ஓட்ட²ச்சி²ன்னகோதி உபோ⁴ஸு ஓட்டே²ஸு யத்த² கத்த²சி ஜாதியா வா பச்சா² வா ஸத்தா²தி³னா அபனீதமம்ஸேன ஓட்டே²ன ஸமன்னாக³தோ. ஏளமுகோ²தி நிச்சபக்³க⁴ரிதலாலாமுகோ².

பி⁴ன்னக³லோதி அவனதக³லோ. பி⁴ன்னஉரோதி அதினின்னஉரமஜ்ஜோ². ஏவம் பி⁴ன்னபிட்டீ²தி. ஸப்³ப³ஞ்சேதந்தி ‘‘கச்சு²க³த்தோ’’திஆதி³ம் ஸந்தா⁴ய வுத்தம். ஏத்த² ச வினிச்ச²யோ குட்டா²தீ³ஸு வுத்தோ ஏவாதி ஆஹ ‘‘வினிச்ச²யோ’’திஆதி³.

வாதண்டி³கோதி அண்ட³கேஸு வுத்³தி⁴ரோகே³ன ஸமன்னாக³தோ, அண்ட³வாதரோகே³ன உத்³து⁴தபீ³ஜண்ட³கோஸேன ஸமன்னாக³தோ வா. யஸ்ஸ நிவாஸனேன படிச்ச²ன்னம்பி உண்ணதம் பகாஸதி, ஸோவ ந பப்³பா³ஜேதப்³போ³. விகடோதி திரியம் க³மனபாதே³ஹி ஸமன்னாக³தோ, யஸ்ஸ சங்கமதோ ஜாணுகா ப³ஹி நிக³ச்ச²ந்தி. ஸங்க⁴ட்டோதி க³ச்ச²தோ பரிவத்தனபாதே³ஹி ஸமன்னாக³தோ, யஸ்ஸ சங்கமதோ ஜாணுகா அந்தோ பவிஸந்தி. மஹாஜங்கோ⁴தி தூ²லஜங்கோ⁴. மஹாபாதோ³தி மஹந்தேன பாத³தலேன யுத்தோ. பாத³வேமஜ்ஜே²தி பிட்டி²பாத³வேமஜ்ஜே². ஏதேன அக்³க³பாதோ³ ச பண்ஹி ச ஸதி³ஸாவாதி த³ஸ்ஸேதி.

134. மஜ்ஜே² ஸம்குடிதபாத³த்தாதி குண்ட²பாத³தாய காரணம் த³ஸ்ஸேதி, அக்³கே³ ஸம்குடிதபாத³த்தாதி குண்ட²பாத³தாய. குண்ட²பாத³ஸ்ஸேவ சங்கமனவிபா⁴வனம் ‘‘பிட்டி²பாத³க்³கே³ன சங்கமந்தோ’’தி. ‘‘பாத³ஸ்ஸ பா³ஹிரந்தேனா’’தி ச ‘‘அப்³ப⁴ந்தரந்தேனா’’தி ச இத³ம் பாத³தலஸ்ஸ உபோ⁴ஹி பரியந்தேஹி சங்கமனம் ஸந்தா⁴ய வுத்தம்.

மம்மனந்தி க²லிதவசனம், யோ ஏகமேவக்க²ரம் சதுபஞ்சக்க²த்தும் வத³தி, தஸ்ஸேதம் அதி⁴வசனம், டா²னகரணவிஸுத்³தி⁴யா அபா⁴வேன அபு²ட்ட²க்க²ரவசனம். வசனானுகரணேன ஹி ஸோ ‘‘மம்மனோ’’தி வுத்தோ. யோ ச கரணஸம்பன்னோபி ஏகமேவக்க²ரம் ஹிக்காரப³ஹுஸோ வத³தி, ஸோபி இதே⁴வ ஸங்க³ய்ஹதி. யோ வா பன தம் நிக்³க³ஹேத்வாபி அனாமேடி³தக்க²ரமேவ ஸிதி²லம் ஸிலிட்ட²வசனம் வத்தும் ஸமத்தோ², ஸோ பப்³பா³ஜேதப்³போ³. ஆபத்திதோ ந முச்சந்தீதி ஞத்வா கரோந்தாவ ந முச்சந்தி. ஜீவிதந்தராயாதி³ஆபதா³ஸு அருசியா காயஸாமக்³கி³ம் தே³ந்தஸ்ஸ அனாபத்தி.

135. அப⁴ப்³ப³புக்³க³லகதா²ஸு ‘‘யோ காளபக்கே² இத்தீ² ஹோதி, ஜுண்ஹபக்கே² புரிஸோ, அயம் பக்க²பண்ட³கோ’’தி கேசி வத³ந்தி. அட்ட²கதா²யம் பன ‘‘காளபக்கே² பண்ட³கோ ஹோதி, ஜுண்ஹபக்கே² பனஸ்ஸ பரிளாஹோ வூபஸம்மதீ’’தி அபண்ட³கபக்கே² பரிளாஹவூபஸமஸ்ஸேவ வுத்தத்தா பண்ட³கபக்கே² உஸ்ஸன்னபரிளாஹதா பண்ட³கபா⁴வாபத்தீதி விஞ்ஞாயதீதி வீமம்ஸித்வா யுத்ததரம் க³ஹேதப்³ப³ம். இத்தி²பா⁴வோ பும்பா⁴வோ வா நத்தி² ஏதஸ்ஸாதி அபா⁴வகோ. ‘‘தஸ்மிம்யேவஸ்ஸ பக்கே² பப்³ப³ஜ்ஜா வாரிதாதி ஏத்த² அபண்ட³கபக்கே² பப்³பா³ஜேத்வா பண்ட³கபக்கே² நாஸேதப்³போ³’’தி தீஸுபி க³ண்டி²பதே³ஸு வுத்தம். கேசி பன ‘‘அபண்ட³கபக்கே² பப்³ப³ஜிதோ ஸசே கிலேஸக்க²யம் பாபுணாதி, ந நாஸேதப்³போ³’’தி வத³ந்தி, தம் தேஸம் மதிமத்தம். பண்ட³கஸ்ஸ ஹி கிலேஸக்க²யாஸம்ப⁴வதோ, கீ²ணகிலேஸஸ்ஸ ச பண்ட³கபா⁴வானாபத்திதோ. அஹேதுகபடிஸந்தி⁴கதா²யஞ்ஹி அவிஸேஸேன பண்ட³கஸ்ஸ அஹேதுகபடிஸந்தி⁴தா வுத்தா, ஆஸித்தஉஸூயபக்க²பண்ட³கானஞ்ச படிஸந்தி⁴தோ பட்டா²யேவ பண்ட³கபா⁴வோ, ந பவத்தியம்யேவாதி வத³ந்தி. தேனேவ அஹேதுகபடிஸந்தி⁴னித்³தே³ஸே ஜச்சந்த⁴ப³தி⁴ராத³யோ விய பண்ட³கோ ஜாதிஸத்³தே³ன விஸேஸேத்வா ந நித்³தி³ட்டோ². சதுத்த²பாராஜிகஸம்வண்ணனாயஞ்ச (பாரா. அட்ட². 2.233) அப⁴ப்³ப³புக்³க³லே த³ஸ்ஸேந்தேன பண்ட³கதிரச்சா²னக³தஉப⁴தோப்³யஞ்ஜனகா தயோ வத்து²விபன்னா அஹேதுகபடிஸந்தி⁴கா, தேஸம் ஸக்³கோ³ அவாரிதோ, மக்³கோ³ பன வாரிதோதி அவிஸேஸதோ வுத்தந்தி ஸாரத்த²தீ³பனியம் (ஸாரத்த². டீ. மஹாவக்³க³ 3.109) ஆக³தம்.

விமதிவினோத³னியம் (வி. வி. டீ. மஹாவக்³க³ 2.109) பன பண்ட³கவத்து²ஸ்மிம் ஆஸித்தஉஸூயபக்க²பண்ட³கா தயோபி புரிஸபா⁴வலிங்கா³தி³யுத்தா அஹேதுகபடிஸந்தி⁴கா, தே ச கிலேஸபரியுட்டா²னஸ்ஸ ப³லவதாய நபும்ஸகபண்ட³கஸதி³ஸத்தா ‘‘பண்ட³கா’’தி வுத்தா, தேஸு ஆஸித்தஉஸூயபண்ட³கானம் த்³வின்னம் கிலேஸபரியுட்டா²னம் யோனிஸோமனஸிகாராதீ³ஹி வீதிக்கமதோ நிவாரேதும்பி ஸக்கா, தேன தே பப்³பா³ஜேதப்³பா³தி வுத்தா. பக்க²பண்ட³கஸ்ஸ பன காளபக்கே² உம்மாதோ³ விய கிலேஸபரிளாஹோ அவத்த²ரந்தோ ஆக³ச்ச²தி, வீதிக்கமம் பத்வா ஏவ ச நிவத்ததி, தஸ்மா தஸ்மிம் பக்கே² ஸோ ந பப்³பா³ஜேதப்³போ³தி வுத்தோ, ததே³தம் விபா⁴க³ம் த³ஸ்ஸேதும் ‘‘யஸ்ஸ பரேஸ’’ந்தி வுத்தம். தத்த² ஆஸித்தஸ்ஸாதி முகே² ஆஸித்தஸ்ஸ அத்தனோபி அஸுசிமுச்சனேன பரிளாஹோ வூபஸம்மதி. உஸூயாய உப்பன்னாயாதி உஸூயாய வஸேன அத்தனோ ஸேவேதுகாமதாராகே³ உப்பன்னே அஸுசிமுத்தியா பரிளாஹோ வூபஸம்மதி.

‘‘பீ³ஜானி அபனீதானீ’’தி வுத்தத்தா பீ³ஜேஸு டி²தேஸு நிமித்தமத்தே அபனீதே பண்ட³கோ ந ஹோதி. பி⁴க்கு²னோபி அனாபா³த⁴பச்சயா தத³பனயனே து²ல்லச்சயமேவ, ந பண்ட³கத்தம். பீ³ஜேஸு பன அபனீதேஸு அங்க³ஜாதம்பி ராகே³ன கம்மனியம் ந ஹோதி, புமபா⁴வோ விக³ச்ச²தி, மஸ்ஸுஆதி³புரிஸலிங்க³ம்பி உபஸம்பதா³பி விக³ச்ச²தி, கிலேஸபரிளாஹோபி து³ன்னிவாரவீதிக்கமோ ஹோதி நபும்ஸகபண்ட³கஸ்ஸ விய, தஸ்மா ஈதி³ஸோ உபஸம்பன்னோபி நாஸேதப்³போ³தி வத³ந்தி. யதி³ ஏவம் கஸ்மா பீ³ஜுத்³த⁴ரணே பாராஜிகம் ந பஞ்ஞத்தந்தி? ஏத்த² தாவ கேசி வத³ந்தி ‘‘பஞ்ஞத்தமேவேதம் ப⁴க³வதா ‘பண்ட³கோ பி⁴க்க²வே அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’தி வுத்தத்தா’’தி. கேசி பன ‘‘யஸ்மா பீ³ஜுத்³த⁴ரணக்க²ணே பண்ட³கோ ந ஹோதி, தஸ்மா தஸ்மிம் க²ணே பாராஜிகம் ந பஞ்ஞத்தம். யஸ்மா பன ஸோ உத்³த⁴டபீ³ஜோ பி⁴க்கு² அபரேன ஸமயேன வுத்தனயேன பண்ட³கத்தம் ஆபஜ்ஜதி, அபா⁴வகோ ஹோதி, உபஸம்பதா³ய அவத்து², ததோ ஏவ சஸ்ஸ உபஸம்பதா³ விக³ச்ச²தி, தஸ்மா ஏஸ பண்ட³கத்துபக³மனகாலதோ பட்டா²ய ஜாதியா நபும்ஸகபண்ட³கேன ஸத்³தி⁴ம் யோஜேத்வா ‘உபஸம்பன்னோ நாஸேதப்³போ³’தி அப⁴ப்³போ³தி வுத்தோ, ந ததோ புப்³பே³. அயஞ்ச கிஞ்சாபி ஸஹேதுகோ, பா⁴வக்க²யேன பனஸ்ஸ அஹேதுகஸதி³ஸதாய மக்³கோ³பி ந உப்பஜ்ஜதீ’’தி வத³ந்தி. அபரே பன ‘‘பப்³ப³ஜ்ஜதோ புப்³பே³ உபக்கமேன பண்ட³கபா⁴வமாபன்னம் ஸந்தா⁴ய ‘உபஸம்பன்னோ நாஸேதப்³போ³’தி வுத்தம், உபஸம்பன்னஸ்ஸ பன பச்சா² உபக்கமேன உபஸம்பதா³பி ந விக³ச்ச²தீ’’தி, தம் ந யுத்தம். யத³க்³கே³ன ஹி பப்³ப³ஜ்ஜதோ புப்³பே³ உபக்கமேன அப⁴ப்³போ³ ஹோதி, தத³க்³கே³ன பச்சா²பி ஹோதீதி வீமம்ஸித்வா க³ஹேதப்³ப³ம்.

இத்த²த்தாதி³ பா⁴வோ நத்தி² ஏதஸ்ஸாதி அபா⁴வகோ. பப்³ப³ஜ்ஜா ந வாரிதாதி ஏத்த² பப்³ப³ஜ்ஜாக்³க³ஹணேனேவ உபஸம்பதா³பி க³ஹிதா. தேனாஹ ‘‘யஸ்ஸ சேத்த² பப்³ப³ஜ்ஜா வாரிதா’’திஆதி³. தஸ்மிம் யேவஸ்ஸ பக்கே² பப்³ப³ஜ்ஜா வாரிதாதி ஏத்த² பன அபண்ட³கபக்கே²பி பப்³ப³ஜ்ஜாமத்தமேவ லப⁴தி, உபஸம்பதா³ பன ததா³பி ந வட்டதி, பண்ட³கபக்கே² பன ஆக³தோ லிங்க³னாஸனாய நாஸேதப்³போ³தி வேதி³தப்³ப³ந்தி வுத்தம்.

136. உப⁴தோப்³யஞ்ஜனமஸ்ஸ அத்தீ²தி உப⁴தோப்³யஞ்ஜனகோதி இமினா அஸமானாதி⁴கரணவிஸயோ பா³ஹிரத்த²ஸமாஸோயம், புரிமபதே³ ச விப⁴த்திஅலோபோதி த³ஸ்ஸேதி. ப்³யஞ்ஜனந்தி சேத்த² புரிஸனிமித்தம் இத்தி²னிமித்தஞ்ச அதி⁴ப்பேதம். அத² உப⁴தோப்³யஞ்ஜனகஸ்ஸ ஏகமேவ இந்த்³ரியம் ஹோதி, உதா³ஹு த்³வேதி? ஏகமேவ ஹோதி, ந த்³வே. கத²ம் விஞ்ஞாயதீதி சே? ‘‘யஸ்ஸ இத்தி²ந்த்³ரியம் உப்பஜ்ஜதி, தஸ்ஸ புரிஸிந்த்³ரியம் உப்பஜ்ஜதீதி, நோ. யஸ்ஸ வா பன புரிஸிந்த்³ரியம் உப்பஜ்ஜதி, தஸ்ஸ இத்தி²ந்த்³ரியம் உப்பஜ்ஜதீதி, நோ’’தி (யம. 3.இந்த்³ரியயமக.188) ஏகஸ்மிம் ஸந்தானே இந்த்³ரியபூ⁴தபா⁴வத்³வயஸ்ஸ உப்பத்தியா அபி⁴த⁴ம்மே படிஸேதி⁴தத்தா, தஞ்ச கோ² இத்தி²உப⁴தோப்³யஞ்ஜனகஸ்ஸ இத்தி²ந்த்³ரியம், புரிஸஉப⁴தோப்³யஞ்ஜனகஸ்ஸ புரிஸிந்த்³ரியந்தி. யதி³ ஏவம் து³தியப்³யஞ்ஜனஸ்ஸ அபா⁴வோ ஆபஜ்ஜதி இந்த்³ரியஞ்ஹி ப்³யஞ்ஜனஸ்ஸ காரணம் வுத்தம், தஞ்ச தஸ்ஸ நத்தீ²தி? வுச்சதே – ந தஸ்ஸ இந்த்³ரியம் து³தியப்³யஞ்ஜனகாரணம். கஸ்மா? ஸதா³ அபா⁴வதோ. இத்தி²உப⁴தோப்³யஞ்ஜனகஸ்ஸ ஹி யதா³ இத்தி²யா ராக³சித்தம் உப்பஜ்ஜதி, ததா³ புரிஸப்³யஞ்ஜனம் பாகடம் ஹோதி, இத்தி²ப்³யஞ்ஜனம் படிச்ச²ன்னம் கு³ள்ஹம் ஹோதி, ததா² இதரஸ்ஸ இதரம். யதி³ ச தேஸம் இந்த்³ரியம் து³தியப்³யஞ்ஜனகாரணம் ப⁴வேய்ய, ஸதா³பி ப்³யஞ்ஜனத்³வயம் திட்டே²ய்ய, ந பன திட்ட²தி, தஸ்மா வேதி³தப்³ப³மேதம் ‘‘ந தஸ்ஸ தம் ப்³யஞ்ஜனகாரணம், கம்மஸஹாயம் பன ராக³சித்தமேவேத்த² காரண’’ந்தி. யஸ்மா சஸ்ஸ ஏகமேவ இந்த்³ரியம் ஹோதி, தஸ்மா இத்தி²உப⁴தோப்³யஞ்ஜனகோ ஸயம்பி க³ப்³ப⁴ம் க³ண்ஹாதி, பரம்பி க³ண்ஹாபேதி. புரிஸஉப⁴தோப்³யஞ்ஜனகோ பரம் க³ண்ஹாபேதி, ஸயம் பன ந க³ண்ஹாதீதி ஸாரத்த²தீ³பனியம் (ஸாரத்த². டீ. மஹாவக்³க³ 3.116) ஆக³தம்.

விமதிவினோத³னியம் (வி. வி. டீ. மஹாவக்³க³ 2.116) பன – இத்தி²உப⁴தோப்³யஞ்ஜனகோதி இத்தி²ந்த்³ரியயுத்தோ, இதரோ பன புரிஸிந்த்³ரியயுத்தோ. ஏகஸ்ஸ ஹி பா⁴வத்³வயம் ஸஹ ந உப்பஜ்ஜதி யமகே (யம. 3.இந்த்³ரியயமக.188) படிக்கி²த்தத்தா. து³தியப்³யஞ்ஜனம் பன கம்மஸஹாயேன அகுஸலசித்தேனேவ பா⁴வரஹிதம் உப்பஜ்ஜதி. பகதித்தி²புரிஸானம்பி கம்மமேவ ப்³யஞ்ஜனலிங்கா³னம் காரணம், ந பா⁴வோ தஸ்ஸ கேனசி பச்சயேன பச்சயத்தஸ்ஸ பட்டா²னே அவுத்தத்தா. கேவலம் பா⁴வஸஹிதானம்யேவ ப்³யஞ்ஜனலிங்கா³னம் பவத்தத³ஸ்ஸனத்த²ம் அட்ட²கதா²ஸு (த⁴. ஸ. அட்ட². 632-633) ‘‘இத்தி²ந்த்³ரியம் படிச்ச இத்தி²லிங்கா³தீ³னீ’’திஆதி³னா இந்த்³ரியஸ்ஸ ப்³யஞ்ஜனகாரணத்தேன வுத்தம். இத⁴ பன அகுஸலப³லேன இந்த்³ரியம் வினாபி ப்³யஞ்ஜனம் உப்பஜ்ஜதீதி வேதி³தப்³ப³ம். உபி⁴ன்னம்பி சே தேஸம் உப⁴தோப்³யஞ்ஜனகானம். யதா³ இத்தி²யா ராகோ³ உப்பஜ்ஜதி, ததா³ புரிஸப்³யஞ்ஜனம் பாகடம் ஹோதி, இதரம் படிச்ச²ன்னம். யதா³ புரிஸே ராகோ³ உப்பஜ்ஜதி, ததா³ இத்தி²ப்³யஞ்ஜனம் பாகடம் ஹோதி, இதரம் படிச்ச²ன்னந்தி ஆக³தம்.

137. தே²ய்யாய ஸம்வாஸோ ஏதஸ்ஸாதி தே²ய்யஸம்வாஸகோ. ஸோ ச ந ஸம்வாஸமத்தஸ்ஸேவ தே²னகோ இதா⁴தி⁴ப்பேதோ, அத² கோ² லிங்க³ஸ்ஸ தது³ப⁴யஸ்ஸ ச தே²னகோபீதி ஆஹ ‘‘தயோ தே²ய்யஸம்வாஸகா’’திஆதி³. ந யதா²வுட்³ட⁴ம் வந்த³னம் ஸாதி³யதீதி யதா²வுட்³ட⁴ம் பி⁴க்கூ²னம் வா ஸாமணேரானம் வா வந்த³னம் ந ஸாதி³யதி. யதா²வுட்³ட⁴ம் வந்த³னம் ஸாதி³யதீதி அத்தனா முஸாவாத³ம் கத்வா த³ஸ்ஸிதவஸ்ஸானுரூபம் யதா²வுட்³ட⁴ம் வந்த³னம் ஸாதி³யதி. பி⁴க்கு²வஸ்ஸக³ணனாதி³கோதி இமினா ந ஏககம்மாதி³கோவ இத⁴ ஸம்வாஸோ நாமாதி த³ஸ்ஸேதி.

138. ராஜ…பே… ப⁴யேனாதி ஏத்த² ப⁴ய-ஸத்³தோ³ பச்சேகம் யோஜேதப்³போ³ ‘‘ராஜப⁴யேன து³ப்³பி⁴க்க²ப⁴யேனா’’திஆதி³னா. ஸம்வாஸம் நாதி⁴வாஸேதி, யாவ ஸோ ஸுத்³த⁴மானஸோதி ராஜப⁴யாதீ³ஹி க³ஹிதலிங்க³தாய ஸோ ஸுத்³த⁴மானஸோ யாவ ஸம்வாஸம் நாதி⁴வாஸேதீதி அத்தோ². யோ ஹி ராஜப⁴யாதி³ம் வினா கேவலம் பி⁴க்கூ² வஞ்சேத்வா தேஹி ஸத்³தி⁴ம் ஸம்வஸிதுகாமதாய லிங்க³ம் க³ண்ஹாதி, ஸோ அஸுத்³த⁴சித்ததாய லிங்க³க்³க³ஹணேனேவ தே²ய்யஸம்வாஸகோ நாம ஹோதி. அயம் பன தாதி³ஸேன அஸுத்³த⁴சித்தேன பி⁴க்கூ² வஞ்சேதுகாமதாய அபா⁴வதோ யாவ ஸம்வாஸம் நாதி⁴வாஸேதி, தாவ தே²ய்யஸம்வாஸகோ நாம ந ஹோதி. தேனேவ ‘‘ராஜப⁴யாதீ³ஹி க³ஹிதலிங்கா³னம் ‘கி³ஹீ மம் ஸமணோதி ஜானந்தூ’தி வஞ்சனசித்தே ஸதிபி பி⁴க்கூ²னம் வஞ்சேதுகாமதாய அபா⁴வா தோ³ஸோ ந ஜாதோ’’தி தீஸுபி க³ண்டி²பதே³ஸு வுத்தம். கேசி பன ‘‘வூபஸந்தப⁴யதா இத⁴ ஸுத்³த⁴சித்ததா’’தி வத³ந்தி, ஏவஞ்ச ஸதி ஸோ வூபஸந்தப⁴யோ யாவ ஸம்வாஸம் நாதி⁴வாஸேதி, தாவ தே²ய்யஸம்வாஸகோ ந ஹோதீதி அயமத்தோ² விஞ்ஞாயதி. இமஸ்மிஞ்ச அத்தே² விஞ்ஞாயமானே அவூபஸந்தப⁴யஸ்ஸ ஸம்வாஸஸாதி³யனேபி தே²ய்யஸம்வாஸகோ ந ஹோதீதி ஆபஜ்ஜேய்ய, ந ச அட்ட²கதா²யம் அவூபஸந்தப⁴யஸ்ஸ ஸம்வாஸஸாதி³யனேபி அதே²ய்யஸம்வாஸகதா த³ஸ்ஸிதா. ஸப்³ப³பாஸண்டி³யப⁴த்தானி பு⁴ஞ்ஜந்தோதி ச இமினா அவூபஸந்தப⁴யேனபி ஸம்வாஸம் அஸாதி³யந்தேனேவ ப⁴விதப்³ப³ந்தி தீ³பேதி. தேனேவ தீஸுபி க³ண்டி²பதே³ஸு வுத்தம் ‘‘யஸ்மா விஹாரம் ஆக³ந்த்வா ஸங்கி⁴கம் க³ண்ஹந்தஸ்ஸ ஸம்வாஸம் பரிஹரிதும் து³க்கரம், தஸ்மா ‘ஸப்³ப³பாஸண்டி³யப⁴த்தானி பு⁴ஞ்ஜந்தோ’தி இத³ம் வுத்த’’ந்தி. தஸ்மா ராஜப⁴யாதீ³ஹி க³ஹிதலிங்க³தாயேவேத்த² ஸுத்³த⁴சித்ததாதி க³ஹேதப்³ப³ம்.

ஸப்³ப³பாஸண்டி³யப⁴த்தானீதி ஸப்³ப³ஸாமயிகானம் ஸாதா⁴ரணம் கத்வா வீதி²சதுக்காதீ³ஸு ட²பேத்வா தா³தப்³ப³ப⁴த்தானி. காயபரிஹாரியானீதி காயேன பரிஹரிதப்³பா³னி. அப்³பு⁴க்³க³ச்ச²ந்தீதி அபி⁴முக²ம் க³ச்ச²ந்தி. கம்மந்தானுட்டா²னேனாதி கஸிகோ³ரக்கா²தி³கம்மாகரணேன. ததே³வ பத்தசீவரம் ஆதா³ய விஹாரம் க³ச்ச²தீதி சீவரானி நிவாஸனபாருபனவஸேன ஆதா³ய, பத்தஞ்ச அம்ஸகூடே லக்³கே³த்வா விஹாரம் க³ச்ச²தி.

நாபி ஸயம் ஜானாதீதி ‘‘யோ ஏவம் பப்³ப³ஜதி, ஸோ தே²ய்யஸம்வாஸகோ நாம ஹோதீ’’தி வா ‘‘ஏவம் காதும் ந லப⁴தீ’’தி வா ‘‘ஏவம் பப்³ப³ஜிதோ ஸமணோ நாம ந ஹோதீ’’தி வா ந ஜானாதி. யோ ஏவம் பப்³ப³ஜதி, ஸோ தே²ய்யஸம்வாஸகோ நாம ஹோதீதி இத³ம் பன நித³ஸ்ஸனமத்தம். அனுபஸம்பன்னகாலேயேவாதி இமினா உபஸம்பன்னகாலே ஸுத்வா ஸசேபி நாரோசேதி, தே²ய்யஸம்வாஸகோ ந ஹோதீதி தீ³பேதி.

ஸிக்க²ம் அப்பச்சக்கா²ய…பே… தே²ய்யஸம்வாஸகோ ந ஹோதீதி இத³ம் பி⁴க்கூ²ஹி தி³ன்னலிங்க³ஸ்ஸ அபரிச்சத்தத்தா ந லிங்க³த்தே²னகோ ஹோதி, லிங்கா³னுரூபஸ்ஸ ஸம்வாஸஸ்ஸ ஸாதி³தத்தா நாபி ஸம்வாஸத்தே²னகோ ஹோதீதி வுத்தம். ஏகோ பி⁴க்கு² காஸாயே ஸஉஸ்ஸாஹோவ ஓதா³தம் நிவாஸேத்வாதி ஏத்தா²பி இத³மேவ காரணம் த³ட்ட²ப்³ப³ம். பரதோ ‘‘ஸாமணேரோ ஸலிங்கே³ டி²தோ’’திஆதி³னா ஸாமணேரஸ்ஸ வுத்தவிதா⁴னேஸுபி அதே²ய்யஸம்வாஸபக்கே² அயமேவ நயோ. ‘‘பி⁴க்கு²னியாபி ஏஸேவ நயோ’’தி வுத்தமேவத்த²ம் ‘‘ஸாபி கி³ஹிபா⁴வம் பத்த²யமானா’’திஆதி³னா விபா⁴வேதி.

ஸசே கோசி வுட்³ட⁴பப்³ப³ஜிதோதி ஸாமணேரம் ஸந்தா⁴ய வுத்தம். மஹாபேளாதீ³ஸூதி ஏதேன கி³ஹிஸந்தகம் த³ஸ்ஸிதம். ஸாமணேரபடிபாடியா…பே… தே²ய்யஸம்வாஸகோ ந ஹோதீதி ஏத்த² கிஞ்சாபி தே²ய்யஸம்வாஸகோ ந ஹோதி, பாராஜிகம் பன ஆபஜ்ஜதியேவ. ஸேஸமேத்த² உத்தானமேவாதி ஸாரத்த²தீ³பனியம் (ஸாரத்த². டீ. மஹாவக்³க³ 3.110) வுத்தம்.

விமதிவினோத³னியம் (வி. வி. டீ. மஹாவக்³க³ 2.110) பன – தே²ய்யாய லிங்க³க்³க³ஹணமத்தம்பி இத⁴ ஸம்வாஸோ ஏவாதி ஆஹ ‘‘தயோ தே²ய்யஸம்வாஸகா’’தி. ந யதா²வுட்³ட⁴ம் வந்த³னந்தி பி⁴க்கூ²னம் ஸாமணேரானம் வா வந்த³னம் ந ஸாதி³யதி. யதா²வுட்³ட⁴ம் வந்த³னந்தி அத்தனா முஸாவாதே³ன த³ஸ்ஸிதவஸ்ஸக்கமேன பி⁴க்கூ²னம் வந்த³னம் ஸாதி³யதி. த³ஹரஸாமணேரோ பன வுட்³ட⁴ஸாமணேரானம், த³ஹரபி⁴க்கூ² ச வுட்³டா⁴னம் வந்த³னம் ஸாதி³யந்தோபி தே²ய்யஸம்வாஸகோ ந ஹோதி. இமஸ்மிம் அத்தே²தி ஸம்வாஸத்தே²னகத்தே². பி⁴க்கு²வஸ்ஸானீதி இத³ம் ஸம்வாஸத்தே²னகே வுத்தபாட²வஸேன வுத்தம், ஸயமேவ பன பப்³ப³ஜித்வா ஸாமணேரவஸ்ஸானி க³ணேந்தோபி உப⁴யத்தே²னகோ ஏவ. ந கேவலஞ்ச புரிஸோவ, இத்தீ²பி பி⁴க்கூ²னீஸு ஏவம் படிபஜ்ஜதி, தே²ய்யஸம்வாஸிகாவ. ஆதி³கம்மிகாபி சேத்த² ந முச்சந்தி. உபஸம்பன்னேஸு ஏவ பஞ்ஞத்தாபத்திம் படிச்ச ஆதி³கம்மிகா வுத்தா, தேனேவேத்த² ஆதி³கம்மிகோபி ந முத்தோ.

ராஜ…பே… ப⁴யேனாதி ஏத்த² ப⁴ய-ஸத்³தோ³ பச்சேகம் யோஜேதப்³போ³. யாவ ஸோ ஸுத்³த⁴மானஸோதி ‘‘இமினா லிங்கே³ன பி⁴க்கூ² வஞ்சேத்வா தேஹி ஸம்வஸிஸ்ஸாமீ’’தி அஸுத்³த⁴சித்தாபா⁴வேன ஸுத்³த⁴சித்தோ. தேன ஹி அஸுத்³த⁴சித்தேன லிங்கே³ க³ஹிதமத்தே பச்சா² பி⁴க்கூ²ஹி ஸஹ ஸம்வஸது வா மா வா, லிங்க³த்தே²னகோ ஹோதி. பச்சா² ஸம்வஸந்தோபி அப⁴ப்³போ³ ஹுத்வா ஸம்வஸதி, தஸ்மா உப⁴யத்தே²னகோபி லிங்க³த்தே²னகே ஏவ பவிஸதீதி வேதி³தப்³ப³ம். யோ பன ராஜாதி³ப⁴யேன ஸுத்³த⁴சித்தோவ லிங்க³ம் க³ஹேத்வா விசரந்தோ பச்சா² ‘‘பி⁴க்கு²வஸ்ஸானி க³ணேத்வா ஜீவஸ்ஸாமீ’’தி அஸுத்³த⁴சித்தம் உப்பாதே³தி, ஸோ சித்துப்பாத³மத்தேன தே²ய்யஸம்வாஸகோ ந ஹோதி ஸுத்³த⁴சித்தேன க³ஹிதலிங்க³த்தா. ஸசே பன ஸோ பி⁴க்கூ²னம் ஸந்திகம் க³ந்த்வா ஸாமணேரவஸ்ஸக³ணனாதி³ம் கரோதி, ததா³ ஸம்வாஸத்தே²னகோ, உப⁴யத்தே²னகோ வா ஹோதீதி த³ட்ட²ப்³ப³ம். யம் பன பரதோ ‘‘ஸஹ து⁴ரனிக்கே²பேன அயம்பி தே²ய்யஸம்வாஸகோவா’’தி வுத்தம், தம் பி⁴க்கூ²ஹி ஸங்க³ம்ம ஸம்வாஸாதி⁴வாஸனவஸேன து⁴ரனிக்கே²பம் ஸந்தா⁴ய வுத்தம். தேன வுத்தம் ‘‘ஸம்வாஸம் நாதி⁴வாஸேதி, யாவா’’தி, தஸ்ஸ தாவ தே²ய்யஸம்வாஸகோ நாம ந வுச்சதீதி ஸம்ப³ந்தோ⁴ த³ட்ட²ப்³போ³. ஏத்த² ச சோராதி³ப⁴யம் வினாபி கீளாதி⁴ப்பாயேன லிங்க³ம் க³ஹேத்வா பி⁴க்கூ²னம்பி ஸந்திகே பப்³ப³ஜிதாலயம் த³ஸ்ஸேத்வா வந்த³னாதி³ம் அஸாதி³யந்தோபி ‘‘ஸோப⁴தி நு கோ² மே பப்³ப³ஜிதலிங்க³’’ந்திஆதி³னா ஸுத்³த⁴சித்தேன க³ண்ஹந்தோபி தே²ய்யஸம்வாஸகோ ந ஹோதீதி த³ட்ட²ப்³ப³ம்.

ஸப்³ப³பாஸண்டி³யப⁴த்தானீதி ஸப்³ப³ஸாமயிகானம் ஸாதா⁴ரணம் கத்வா பஞ்ஞத்தானி ப⁴த்தானி. இத³ஞ்ச பி⁴க்கூ²னஞ்ஞேவ நியமிதப⁴த்தக்³க³ஹணே ஸம்வாஸோபி ஸம்ப⁴வேய்யாதி ஸப்³ப³ஸாதா⁴ரணப⁴த்தம் வுத்தம். ஸம்வாஸம் பன அஸாதி³யித்வா அபி⁴க்கு²கவிஹாராதீ³ஸு விஹாரப⁴த்தாதீ³னி பு⁴ஞ்ஜந்தோபி தே²ய்யஸம்வாஸகோ ந ஹோதி ஏவ. கம்மந்தானுட்டா²னேனாதி கஸிஆதி³கம்மாகரணேன. பத்தசீவரம் ஆதா³யாதி பி⁴க்கு²லிங்க³வஸேன ஸரீரேன தா⁴ரேத்வா.

யோ ஏவம் பப்³ப³ஜதி, ஸோ தே²ய்யஸம்வாஸகோ நாம ஹோதீதி இத³ம் நித³ஸ்ஸனமத்தம். ‘‘தே²ய்யஸம்வாஸகோ’’தி பன நாமம் அஜானந்தோபி ‘‘ஏவம் காதும் ந வட்டதீ’’தி வா ‘‘கரோந்தோ ஸமணோ நாம ந ஹோதீ’’தி வா ‘‘யதி³ ஆரோசேஸ்ஸாமி, ச²ட்³ட³யிஸ்ஸந்தி ம’’ந்தி வா ‘‘யேன கேனசி பப்³ப³ஜ்ஜா மே ந ருஹதீ’’தி ஜானாதி, தே²ய்யஸம்வாஸகோ ஹோதி. யோ பன பட²மம் ‘‘பப்³ப³ஜ்ஜா ஏவம் மே க³ஹிதா’’தி ஸஞ்ஞீ கேவலம் அந்தரா அத்தனோ ஸேதவத்த²னிவாஸனாதி³விப்பகாரம் பகாஸேதும் லஜ்ஜந்தோ ந கதே²தி, ஸோ தே²ய்யஸம்வாஸகோ ந ஹோதி. அனுபஸம்பன்னகாலேயேவாதி ஏத்த² அவதா⁴ரணேன உபஸம்பன்னகாலே தே²ய்யஸம்வாஸகலக்க²ணம் ஞத்வா வஞ்சனாயபி நாரோசேதி, தே²ய்யஸம்வாஸகோ ந ஹோதீதி தீ³பேதி. ஸோ ஹி ஸுத்³த⁴சித்தேன க³ஹிதலிங்க³த்தா லிங்க³த்தே²னகோ ந ஹோதி, லத்³தூ⁴பஸம்பத³த்தா தத³னுகு³ணஸ்ஸேவ ஸம்வாஸஸ்ஸ ஸாதி³தத்தா ஸம்வாஸத்தே²னகோபி ந ஹோதி. அனுபஸம்பன்னோ பன லிங்க³த்தே²னகோ ஹோதி, ஸம்வாஸாரஹஸ்ஸ லிங்க³ஸ்ஸ க³ஹிதத்தா ஸம்வாஸஸாதி³யனமத்தேன ஸம்வாஸத்தே²னகோ ஹோதி.

ஸலிங்கே³ டி²தோதி ஸலிங்க³பா⁴வே டி²தோ. தே²ய்யஸம்வாஸகோ ந ஹோதீதி பி⁴க்கூ²ஹி தி³ன்னலிங்க³ஸ்ஸ அபரிச்சத்தத்தா லிங்க³த்தே²னகோ ந ஹோதி. பி⁴க்கு²படிஞ்ஞாய அபரிச்சத்தத்தா ஸம்வாஸத்தே²னகோ ந ஹோதி. யம் பன மாதிகாட்ட²கதா²யம் (கங்கா². அட்ட². பட²மபாராஜிகவண்ணனா) ‘‘லிங்கா³னுரூபஸ்ஸ ஸம்வாஸஸ்ஸ ஸாதி³தத்தா நாபி ஸம்வாஸத்தே²னகோ’’தி காரணம் வுத்தம், தம்பி இத³மேவ காரணம் ஸந்தா⁴ய வுத்தம். இதரதா² ஸாமணேரஸ்ஸாபி பி⁴க்கு²வஸ்ஸக³ணனாதீ³ஸு லிங்கா³னுரூபஸம்வாஸோ ஏவ ஸாதி³தோதி ஸம்வாஸத்தே²னகதா ந ஸியா பி⁴க்கூ²ஹி தி³ன்னலிங்க³ஸ்ஸ உபி⁴ன்னம்பி ஸாதா⁴ரணத்தா. யதா² சேத்த² பி⁴க்கு², ஏவம் ஸாமணேரோபி பாராஜிகம் ஸமாபன்னோ ஸாமணேரபடிஞ்ஞாய அபரிச்சத்தத்தா ஸம்வாஸத்தே²னகோ ந ஹோதீதி வேதி³தப்³போ³. ஸோப⁴தீதி ஸம்படிச்சி²த்வாதி காஸாவதா⁴ரணே து⁴ரம் நிக்கி²பித்வா கி³ஹிபா⁴வம் ஸம்படிச்சி²த்வா.

ஸசே கோசி வுட்³ட⁴பப்³ப³ஜிதோதி ஸாமணேரம் ஸந்தா⁴ய வுத்தம். மஹாபேளாதீ³ஸூதி விலீவாதி³மயேஸு க⁴ரத்³வாரேஸு ட²பிதேஸு ப⁴த்தபா⁴ஜனவிஸேஸேஸு. ஏதேன விஹாரே பி⁴க்கூ²ஹி ஸத்³தி⁴ம் வஸ்ஸக³ணனாதீ³னம் அகரணம் த³ஸ்ஸேதீதி வுத்தம்.

139. தித்தி²யபக்கந்தககதா²யம் தேஸம் லிங்கே³ ஆதி³ன்னமத்தே தித்தி²யபக்கந்தகோ ஹோதீதி ‘‘தித்தி²யோ ப⁴விஸ்ஸாமீ’’தி க³தஸ்ஸ லிங்க³க்³க³ஹணேனேவ தேஸம் லத்³தி⁴பி க³ஹிதாயேவ ஹோதீதி கத்வா வுத்தம். கேனசி பன ‘‘தேஸம் லிங்கே³ ஆதி³ன்னமத்தே லத்³தி⁴யா க³ஹிதாயபி அக்³க³ஹிதாயபி தித்தி²யபக்கந்தகோ ஹோதீ’’தி வுத்தம், தம் ந க³ஹேதப்³ப³ம். ந ஹி ‘‘தித்தி²யோ ப⁴விஸ்ஸாமீ’’தி க³தஸ்ஸ லிங்க³ஸம்படிச்ச²னதோ அஞ்ஞம் லத்³தி⁴க்³க³ஹணம் நாம அத்தி². லிங்க³ஸம்படிச்ச²னேனேவ ஹி ஸோ க³ஹிதலத்³தி⁴கோ ஹோதி. தேனேவ ‘‘வீமம்ஸனத்த²ம் குஸசீராதீ³னி…பே… யாவ ந ஸம்படிச்ச²தி, தாவ தம் லத்³தி⁴ ரக்க²தி, ஸம்படிச்சி²தமத்தே தித்தி²யபக்கந்தகோ ஹோதீ’’தி வுத்தம். நக்³கோ³வ ஆஜீவகானம் உபஸ்ஸயம் க³ச்ச²தி, பத³வாரே பத³வாரே து³க்கடந்தி ‘‘ஆஜீவகோ ப⁴விஸ்ஸ’’ந்தி அஸுத்³த⁴சித்தேன க³மனபச்சயா து³க்கடம் வுத்தம். நக்³கே³ன ஹுத்வா க³மனபச்சயாபி பத³வாரே து³க்கடா ந முச்சதியேவாதி ஸாரத்த²தீ³பனியம் (ஸாரத்த². டீ. மஹாவக்³க³ 3.110) வுத்தம்.

விமதிவினோத³னியம் (வி. வி. டீ. மஹாவக்³க³ 2.110) பன – தித்தி²யபக்கந்தகாதி³கதா²ஸு தேஸம் லிங்கே³ ஆதி³ன்னமத்தேதி வீமம்ஸாதி³அதி⁴ப்பாயம் வினா ‘‘தித்தி²யோ ப⁴விஸ்ஸாமீ’’தி ஸன்னிட்டா²னவஸேன லிங்கே³ காயேன தா⁴ரிதமத்தே. ஸயமேவாதி தித்தி²யானம் ஸந்திகம் அக³ந்த்வா ஸயமேவ ஸங்கா⁴ராமேபி குஸசீராதீ³னி நிவாஸேதி. ஆஜீவகோ ப⁴விஸ்ஸந்தி…பே… க³ச்ச²தீதி ஆஜீவகானம் ஸந்திகே தேஸம் பப்³ப³ஜனவிதி⁴னா ‘‘ஆஜீவகோ ப⁴விஸ்ஸாமீ’’தி க³ச்ச²தி. தஸ்ஸ ஹி தித்தி²யபா⁴வூபக³மனம் பதி ஸன்னிட்டா²னே விஜ்ஜமானேபி ‘‘க³ந்த்வா ப⁴விஸ்ஸாமீ’’தி பரிகப்பிதத்தா பத³வாரே து³க்கடமேவ வுத்தம். து³க்கடந்தி பாளியா அவுத்தேபி மேது²னாதீ³ஸு வுத்தபுப்³ப³பயோக³து³க்கடானுலோமதோ வுத்தம். ஏதேன ச ஸன்னிட்டா²னவஸேன லிங்கே³ ஸம்படிச்சி²தே பாராஜிகம், ததோ புரிமபயோகே³ து²ல்லச்சயஞ்ச வத்தப்³ப³மேவ. து²ல்லச்சயக்க²ணே நிவத்தந்தோபி ஆபத்திம் தே³ஸாபேத்வா முச்சதி ஏவாதி த³ட்ட²ப்³ப³ம். யதா² சேத்த², ஏவம் ஸங்க⁴பே⁴தே³பி லோஹிதுப்பாதே³பி பி⁴க்கூ²னம் புப்³ப³பயோகா³தீ³ஸு து³க்கடது²ல்லச்சயபாராஜிகாஹி முச்சனஸீமா ச வேதி³தப்³பா³. ஸாஸனவிருத்³த⁴தாயேத்த² ஆதி³கம்மிகானம்பி அனாபத்தி ந வுத்தா. பப்³ப³ஜ்ஜாயபி அப⁴ப்³ப³தாத³ஸ்ஸனத்த²ம் பனேதே அஞ்ஞே ச பாராஜிககண்டே³ விஸும் ஸிக்கா²பதே³ன பாராஜிகாதி³ம் அத³ஸ்ஸேத்வா இத⁴ அப⁴ப்³பே³ஸு ஏவ வுத்தாதி வேதி³தப்³ப³ம்.

தம் லத்³தீ⁴தி தித்தி²யவேஸே ஸேட்ட²பா⁴வக்³க³ஹணமேவ ஸந்தா⁴ய வுத்தம். தேஸஞ்ஹி தித்தி²யானம் ஸஸ்ஸதாதி³க்³கா³ஹம் க³ண்ஹந்தோபி லிங்கே³ அஸம்படிச்சி²தே தித்தி²யபக்கந்தகோ ந ஹோதி, தம் லத்³தி⁴ம் அக்³க³ஹேத்வாபி ‘‘ஏதேஸம் வதசரியா ஸுந்த³ரா’’தி லிங்க³ம் ஸம்படிச்ச²ந்தோ தித்தி²யபக்கந்தகோ ஹோதி ஏவ. லத்³தி⁴யா அபா⁴வேனாதி பி⁴க்கு²பா⁴வே ஸாலயதாய தித்தி²யபா⁴வூபக³மனலத்³தி⁴யா அபா⁴வேன. ஏதேன ச ஆபதா³ஸு குஸசீராதி³ம் பாருபந்தஸ்ஸபி நக்³க³ஸ்ஸ விய அனாபத்தீதி த³ஸ்ஸேதி. உபஸம்பன்னபி⁴க்கு²னா கதி²தோதி ஏத்த² ஸங்க⁴பே⁴த³கோபி உபஸம்பன்னபி⁴க்கு²னாவ கதி²தோ, மாதுகா⁴தகாத³யோ பன அனுபஸம்பன்னேனாதிபி த³ட்ட²ப்³ப³ந்தி ஆக³தம்.

140. திரச்சா²னகதா²யம் ‘‘யோ கோசி அமனுஸ்ஸஜாதியோ, ஸப்³போ³வ இமஸ்மிம் அத்தே² திரச்சா²னக³தோதி வேதி³தப்³போ³’’தி ஏதேன ஏஸோ மனுஸ்ஸஜாதியோ ஏவ ப⁴க³வதோ ஸாஸனே பப்³ப³ஜிதும் வா உபஸம்பஜ்ஜிதும் வா லப⁴தி, ந ததோ அஞ்ஞேதி தீ³பேதி. தேனாஹ ப⁴க³வா ‘‘தும்ஹே கோ²த்த² நாகா³ அவிருள்ஹித⁴ம்மா இமஸ்மிம் த⁴ம்மவினயே’’தி (மஹாவ. 111).

141. ஆனந்தரியகதா²யம் திரச்சா²னாதி³அமனுஸ்ஸஜாதிதோ மனுஸ்ஸஜாதிகானஞ்ஞேவ புத்தேஸு மேத்தாத³யோபி திக்க²விஸதா³ ஹோந்தி லோகுத்தரகு³ணா வியாதி ஆஹ ‘‘மனுஸ்ஸித்தி²பூ⁴தா ஜனிகா மாதா’’தி. யதா² மனுஸ்ஸானஞ்ஞேவ குஸலபவத்தி திக்க²விஸதா³, ஏவம் அகுஸலபவத்திபீதி ஆஹ ‘‘ஸயம்பி மனுஸ்ஸஜாதிகேனேவா’’திஆதி³. அத² வா யதா² ஸமானஜாதியஸ்ஸ விகோபனே கம்மம் க³ருதரம், ந ததா² விஜாதியஸ்ஸாதி ஆஹ ‘‘மனுஸ்ஸித்தி²பூ⁴தா’’தி. புத்தஸம்ப³ந்தே⁴ன மாதுபிதுஸமஞ்ஞா, த³த்தகித்திமாதி³வஸேனபி புத்தவோஹாரோ லோகே தி³ஸ்ஸதி, ஸோ ச கோ² பரியாயதோதி நிப்பரியாயஸித்³த⁴தம் த³ஸ்ஸேதும் ‘‘ஜனிகா மாதா’’தி வுத்தம். யதா² மனுஸ்ஸத்தபா⁴வே டி²தஸ்ஸேவ குஸலத⁴ம்மானம் திக்க²விஸத³ஸூரபா⁴வாபத்தி யதா² தம் திண்ணம்பி போ³தி⁴ஸத்தானம் போ³தி⁴த்தயனிப்³ப³த்தியம், ஏவம் மனுஸ்ஸத்தபா⁴வே டி²தஸ்ஸேவ அகுஸலத⁴ம்மானம்பி திக்க²விஸத³ஸூரபா⁴வாபத்தீதி ஆஹ ‘‘ஸயம்பி மனுஸ்ஸஜாதிகேனேவா’’தி. ஆனந்தரியேனாதி ஏத்த² சுதிஅனந்தரம் நிரயே படிஸந்தி⁴ப²லம் அனந்தரம் நாம, தஸ்மிம் அனந்தரே ஜனகத்தேன நியுத்தம் ஆனந்தரியம், தேன. அத² வா சுதிஅனந்தரம் ப²லம் அனந்தரம் நாம, தஸ்மிம் அனந்தரே நியுத்தம், தன்னிப்³ப³த்தனேன அனந்தரகரணஸீலம், அனந்தரப்பயோஜனம் வா ஆனந்தரியம், தேன ஆனந்தரியேன மாதுகா⁴தககம்மேன. பிதுகா⁴தகேபி ‘‘யேன மனுஸ்ஸபூ⁴தோ ஜனகோ பிதா ஸயம்பி மனுஸ்ஸஜாதிகேனேவ ஸதா ஸஞ்சிச்ச ஜீவிதா வோரோபிதோ, அயம் ஆனந்தரியேன பிதுகா⁴தககம்மேன பிதுகா⁴தகோ’’திஆதி³னா ஸப்³ப³ம் வேதி³தப்³ப³ந்தி ஆஹ ‘‘பிதுகா⁴தகேபி ஏஸேவ நயோ’’தி.

பரிவத்திதலிங்க³ம்பி மாதரம் வா பிதரம் வா ஜீவிதா வோரோபேந்தஸ்ஸ ஆனந்தரியகம்மம் ஹோதியேவ. ஸதிபி ஹி லிங்க³பரிவத்தே ஸோ ஏவ ஏககம்மனிப்³ப³த்தோ ப⁴வங்க³ப்பப³ந்தோ⁴ ஜீவிதப்பப³ந்தோ⁴, ந அஞ்ஞோதி. யோ பன ஸயம் மனுஸ்ஸோ திரச்சா²னபூ⁴தம் பிதரம் வா மாதரம் வா, ஸயம் வா திரச்சா²னபூ⁴தோ மனுஸ்ஸபூ⁴தம், திரச்சா²னோயேவ வா திரச்சா²னபூ⁴தம் ஜீவிதா வோரோபேதி, தஸ்ஸ கம்மம் ஆனந்தரியம் ந ஹோதி, பா⁴ரியம் பன ஹோதி, ஆனந்தரியம் ஆஹச்சேவ திட்ட²தி. ஏளகசதுக்கம் ஸங்கா³மசதுக்கம் சோரசதுக்கஞ்சேத்த² கதே²தப்³ப³ம். ‘‘ஏளகம் மாரேமீ’’தி அபி⁴ஸந்தி⁴னாபி ஹி ஏளகட்டா²னே டி²தம் மனுஸ்ஸோ மனுஸ்ஸபூ⁴தம் மாதரம் வா பிதரம் வா மாரேந்தோ ஆனந்தரியம் பு²ஸதி மரணாதி⁴ப்பாயேனேவ ஆனந்தரியவத்து²னோ விகோபிதத்தா. ஏளகாபி⁴ஸந்தி⁴னா, பன மாதாபிதிஅபி⁴ஸந்தி⁴னா வா ஏளகம் மாரேந்தோ ஆனந்தரியம் ந பு²ஸதி ஆனந்தரியவத்து²னோ அபா⁴வதோ. மாதாபிதிஅபி⁴ஸந்தி⁴னா மாதாபிதரோ மாரேந்தோ பு²ஸ்ஸதேவ. ஏஸ நயோ இதரஸ்மிம்பி சதுக்கத்³வயே. யதா² ச மாதாபிதூஸு, ஏவம் அரஹந்தேஸு ஏதானி சதுக்கானி வேதி³தப்³பா³னி. ஸப்³ப³த்த² ஹி புரிமம் அபி⁴ஸந்தி⁴சித்தம் அப்பமாணம், வத⁴கசித்தம், பன ததா³ரம்மணஜீவிதிந்த்³ரியஞ்ச பமாணம். கதானந்தரியகம்மோ ச ‘‘தஸ்ஸ கம்மஸ்ஸ விபாகம் படிபா³ஹேஸ்ஸாமீ’’தி ஸகலசக்கவாளம் மஹாசேதியப்பமாணேஹி கஞ்சனதூ²பேஹி பூரேத்வாபி ஸகலசக்கவாளம் பூரேத்வா நிஸின்னஸ்ஸ பி⁴க்கு²ஸங்க⁴ஸ்ஸ மஹாதா³னம் த³த்வாபி பு³த்³த⁴ஸ்ஸ ப⁴க³வதோ ஸங்கா⁴டிகண்ணம் அமுஞ்சந்தோ விசரித்வாபி காயஸ்ஸ பே⁴தா³ நிரயமேவ உபபஜ்ஜதி, பப்³ப³ஜ்ஜஞ்ச ந லப⁴தி. பிதுகா⁴தகே வேஸியா புத்தோதி உபலக்க²ணமத்தம், குலித்தி²யா அதிசாரினியா புத்தோபி அத்தனோ பிதரம் அஜானித்வா கா⁴ந்தேந்தோபி பிதுகா⁴தகோவ ஹோதி.

அரஹந்தகா⁴தககம்மே அவஸேஸந்தி அனாகா³மிஆதி³கம். அயமேத்த² ஸங்கே²போ, வித்தா²ரோ பன ததியபாராஜிகவண்ணனாதோ க³ஹேதப்³போ³.

‘‘து³ட்ட²சித்தேனா’’தி வுத்தமேவத்த²ம் விபா⁴வேதி ‘‘வத⁴கசித்தேனா’’தி. வத⁴கசேதனாய ஹி தூ³ஸிதம் சித்தம் இத⁴ து³ட்ட²சித்தம் நாம. லோஹிதம் உப்பாதே³தீதி ஏத்த² ததா²க³தஸ்ஸ அபே⁴ஜ்ஜகாயதாய பரூபக்கமேன சம்மச்சே²த³ம் கத்வா லோஹிதபக்³க⁴ரணம் நாம நத்தி², ஸரீரஸ்ஸ பன அந்தோயேவ ஏகஸ்மிம் டா²னே லோஹிதம் ஸமோஸரதி, ஆகா⁴தேன பகுப்பமானம் ஸஞ்சிதம் ஹோதி. தே³வத³த்தேன பவித்³த⁴ஸிலதோ பி⁴ஜ்ஜித்வா க³தா ஸக்க²லிகாபி ததா²க³தஸ்ஸ பாத³ந்தம் பஹரி, ப²ரஸுனா பஹடோ விய பாதோ³ அந்தோலோஹிதோயேவ அஹோஸி. ஜீவகோ பன ததா²க³தஸ்ஸ ருசியா ஸத்த²கேன சம்மம் சி²ந்தி³த்வா தம்ஹா டா²னா து³ட்ட²லோஹிதம் நீஹரித்வா பா²ஸுமகாஸி, தேனஸ்ஸ புஞ்ஞகம்மமேவ அஹோஸி. தேனாஹ ‘‘ஜீவகோ வியா’’திஆதி³.

அத² யே பரினிப்³பு³தே ததா²க³தே சேதியம் பி⁴ந்த³ந்தி, போ³தி⁴ம் சி²ந்த³ந்தி, தா⁴தும்ஹி உபக்கமந்தி, தேஸம் கிம் ஹோதீதி? பா⁴ரியம் கம்மம் ஹோதி ஆனந்தரியஸதி³ஸம். ஸதா⁴துகம் பன தூ²பம் வா படிமம் வா பா³த⁴மானம் போ³தி⁴ஸாக²ம் சி²ந்தி³தும் வட்டதி. ஸசேபி தத்த² நிலீனா ஸகுணா சேதியே வச்சம் பாதேந்தி, சி²ந்தி³தும் வட்டதியேவ. பரிபோ⁴க³சேதியதோ ஹி ஸரீரசேதியம் க³ருதரம். சேதியவத்து²ம் பி⁴ந்தி³த்வா க³ச்ச²ந்தே போ³தி⁴மூலேபி சி²ந்தி³த்வா ஹரிதும் வட்டதி. யா பன போ³தி⁴ஸாகா² போ³தி⁴க⁴ரம் பா³த⁴தி, தம் கே³ஹரக்க²ணத்த²ம் சி²ந்தி³தும் ந லப⁴தி. போ³தி⁴அத்தா²ய ஹி கே³ஹம், ந கே³ஹத்தா²ய போ³தி⁴. ஆஸனக⁴ரேபி ஏஸேவ நயோ. யஸ்மிம் பன ஆஸனக⁴ரே தா⁴து நிஹிதா ஹோதி, தஸ்ஸ ரக்க²ணத்தா²ய தம் ஸாக²ம் சி²ந்தி³தும் வட்டதி. போ³தி⁴ஜக்³க³னத்த²ம் ஓஜோஹரணஸாக²ம் வா பூதிட்டா²னம் வா சி²ந்தி³தும் வட்டதியேவ, ஸத்து² ரூபகாயபடிஜக்³க³னே விய புஞ்ஞம்பி ஹோதி.

ஸங்க⁴பே⁴தே³ சதுன்னம் கம்மானந்தி அபலோகனாதீ³னம் சதுன்னம் கம்மானம். அயம் ஸங்க⁴பே⁴த³கோதி பகதத்தம் பி⁴க்கு²ம் ஸந்தா⁴ய வுத்தம். புப்³பே³ ஏவ பாராஜிகம் ஸமாபன்னோ வா வத்தா²தி³தோ³ஸேன விபன்னுபஸம்பதோ³ வா ஸங்க⁴ம் பி⁴ந்த³ந்தோபி ஆனந்தரியம் ந பு²ஸதி, ஸங்கோ⁴ பன பி⁴ன்னோவ ஹோதி, பப்³ப³ஜ்ஜா சஸ்ஸ ந வாரிதாதி த³ட்ட²ப்³ப³ம்.

பி⁴க்கு²னீதூ³ஸனே இச்ச²மானந்தி ஓதா³தவத்த²வஸனம் இச்ச²மானம். தேனேவாஹ ‘‘கி³ஹிபா⁴வே ஸம்படிச்சி²தமத்தேயேவா’’தி. நேவ பப்³ப³ஜ்ஜா அத்தீ²தி யோஜனா. யோ ச படிக்கி²த்தே அப⁴ப்³பே³ ச புக்³க³லே ஞத்வா பப்³பா³ஜேதி, உபஸம்பாதே³தி வா, து³க்கடம். அஜானந்தஸ்ஸ ஸப்³ப³த்த² அனாபத்தீதி வேதி³தப்³ப³ம்.

142. க³ப்³ப⁴மாஸேஹி ஸத்³தி⁴ம் வீஸதி வஸ்ஸானி அஸ்ஸாதி க³ப்³ப⁴வீஸோ. ஹாயனவட்³ட⁴னந்தி க³ப்³ப⁴மாஸேஸு அதி⁴கேஸு உத்தரி ஹாயனம், ஊனேஸு வட்³ட⁴னந்தி வேதி³தப்³ப³ம். ஏகூனவீஸதிவஸ்ஸந்தி த்³வாத³ஸ மாஸே மாதுகுச்சி²ஸ்மிம் வஸித்வா மஹாபவாரணாய ஜாதகாலதோ பட்டா²ய ஏகூனவீஸதிவஸ்ஸம். பாடிபத³தி³வஸேதி பச்சி²மிகாய வஸ்ஸூபக³மனதி³வஸே. ‘‘திம்ஸரத்திதி³வோ மாஸோ’’தி (அ. நி. 3.71; 8.43; விப⁴. 1023) வசனதோ ‘‘சத்தாரோ மாஸா பரிஹாயந்தீ’’தி வுத்தம். வஸ்ஸம் உக்கட்³ட⁴ந்தீதி வஸ்ஸம் உத்³த⁴ம் கட்³ட⁴ந்தி, ததியஸம்வச்ச²ரே ஏகமாஸஸ்ஸ அதி⁴கத்தா மாஸபரிச்சஜனவஸேன வஸ்ஸம் உத்³த⁴ம் கட்³ட⁴ந்தீதி அத்தோ², தஸ்மா ததியோ ஸம்வச்ச²ரோ தேரஸமாஸிகோ ஹோதி. ஸம்வச்ச²ரஸ்ஸ பன த்³வாத³ஸமாஸிகத்தா அட்டா²ரஸஸு வஸ்ஸேஸு அதி⁴கமாஸே விஸும் க³ஹேத்வா ‘‘ச² மாஸா வட்³ட⁴ந்தீ’’தி வுத்தம். ததோதி ச²மாஸதோ. நிக்கங்கா² ஹுத்வாதி அதி⁴கமாஸேஹி ஸத்³தி⁴ம் பரிபுண்ணவீஸதிவஸ்ஸத்தா நிப்³பே³மதிகா ஹுத்வா. யம் பன வுத்தம் தீஸுபி க³ண்டி²பதே³ஸு ‘‘அட்டா²ரஸன்னம்யேவ வஸ்ஸானம் அதி⁴கமாஸே க³ஹேத்வா க³ணிதத்தா ஸேஸவஸ்ஸத்³வயஸ்ஸபி அதி⁴கதி³வஸானி ஹோந்தி, தானி அதி⁴கதி³வஸானி ஸந்தா⁴ய ‘நிக்கங்கா² ஹுத்வா’தி வுத்த’’ந்தி, தம் ந க³ஹேதப்³ப³ம். ந ஹி த்³வீஸு வஸ்ஸேஸு அதி⁴கதி³வஸானி நாம விஸும் உபலப்³ப⁴ந்தி ததியே வஸ்ஸே வஸ்ஸுக்கட்³ட⁴னவஸேன அதி⁴கமாஸே பரிச்சத்தேயேவ அதிரேகமாஸஸம்ப⁴வதோ, தஸ்மா த்³வீஸு வஸ்ஸேஸு அதிரேகதி³வஸானி விஸும் ந ஸம்ப⁴வந்தி.

‘‘தே த்³வே மாஸே க³ஹேத்வா வீஸதி வஸ்ஸானி பரிபுண்ணானி ஹோந்தீ’’தி கஸ்மா வுத்தம், ஏகூனவீஸதிவஸ்ஸம்ஹி ச புன அபரஸ்மிம் வஸ்ஸே பக்கி²த்தே வீஸதி வஸ்ஸானி பரிபுண்ணானி ஹோந்தீதி ஆஹ ‘‘ஏத்த² பன…பே… வுத்த’’ந்தி. அனேகத்த²த்தா நிபாதானம் பன-ஸத்³தோ³ ஹிஸத்³த³த்தோ², ஏத்த² ஹீதி வுத்தம் ஹோதி. இத³ஞ்ஹி வுத்தஸ்ஸேவத்த²ஸ்ஸ ஸமத்த²னவஸேன வுத்தம். இமினா ச இமம் தீ³பேதி – யம் வுத்தம் ‘‘ஏகூனவீஸதிவஸ்ஸம் ஸாமணேரம் நிக்க²மனீயபுண்ணமாஸிம் அதிக்கம்ம பாடிபத³தி³வஸே உபஸம்பாதே³ந்தீ’’தி, தத்த² க³ப்³ப⁴மாஸேபி க³ஹேத்வா த்³வீஹி மாஸேஹி அபரிபுண்ணவீஸதிவஸ்ஸம் ஸந்தா⁴ய ‘‘ஏகூனவீஸதிவஸ்ஸ’’ந்தி வுத்தம், தஸ்மா அதி⁴கமாஸேஸு த்³வீஸு க³ஹிதேஸு ஏவ வீஸதி வஸ்ஸானி பரிபுண்ணானி நாம ஹோந்தீதி. தஸ்மாதி யஸ்மா க³ப்³ப⁴மாஸாபி க³ணனூபகா³ ஹோந்தி, தஸ்மா. ஏகவீஸதிவஸ்ஸோ ஹோதீதி ஜாததி³வஸதோ பட்டா²ய வீஸதிவஸ்ஸோ ஸமானோ க³ப்³ப⁴மாஸேஹி ஸத்³தி⁴ம் ஏகவீஸதிவஸ்ஸோ ஹோதி. அஞ்ஞம் உபஸம்பாதே³தீதி உபஜ்ஜா²யோ, கம்மவாசாசரியோ வா ஹுத்வா உபஸம்பாதே³தீதி ஸாரத்த²தீ³பனியம் (ஸாரத்த². டீ. பாசித்திய 3.406) ஆக³தம்.

க³ப்³பே⁴ ஸயிதகாலேன ஸத்³தி⁴ம் வீஸதிமம் வஸ்ஸம் பரிபுண்ணமஸ்ஸாதி க³ப்³ப⁴வீஸோ. நிக்க²மனீயபுண்ணமாஸீதி ஸாவணமாஸஸ்ஸ புண்ணமியா ஆஸாள்ஹீபுண்ணமியா அனந்தரபுண்ணமீ. பாடிபத³தி³வஸேதி பச்சி²மிகாய வஸ்ஸூபனாயிகாய, த்³வாத³ஸ மாஸே மாதுகுச்சி²ஸ்மிம் வஸித்வா மஹாபவாரணாய ஜாதம் உபஸம்பாதே³ந்தீதி அத்தோ². ‘‘திம்ஸரத்திதி³வோ மாஸோ, த்³வாத³ஸமாஸிகோ ஸம்வச்ச²ரோ’’தி வசனதோ ‘‘சத்தாரோ மாஸா பரிஹாயந்தீ’’தி வுத்தம். வஸ்ஸம் உக்கட்³ட⁴ந்தீதி வஸ்ஸம் உத்³த⁴ம் கட்³ட⁴ந்தி, ‘‘ஏகமாஸம் அதி⁴கமாஸோ’’தி ச²ட்³டே³த்வா வஸ்ஸம் உபக³ச்ச²ந்தீதி அத்தோ², தஸ்மா ததியோ ததியோ ஸம்வச்ச²ரோ தேரஸமாஸிகோ ஹோதி. தே த்³வே மாஸே க³ஹேத்வாதி நிக்க²மனீயபுண்ணமாஸதோ யாவ ஜாததி³வஸபூ⁴தா மஹாபவாரணா, தாவ யே த்³வே மாஸா அனாக³தா, தேஸம் அத்தா²ய அதி⁴கமாஸதோ லத்³தே⁴ த்³வே மாஸே க³ஹேத்வா. தேனாஹ ‘‘யோ பவாரேத்வா வீஸதிவஸ்ஸோ ப⁴விஸ்ஸதீ’’திஆதி³. ‘‘நிக்கங்கா² ஹுத்வா’’தி இத³ம் அட்டா²ரஸன்னம் வஸ்ஸானம் ஏவ அதி⁴கமாஸே க³ஹேத்வா ததோ வீஸதியா வஸ்ஸேஸுபி சாதுத்³த³ஸீனம் அத்தா²ய சதுன்னம் மாஸானம் பரிஹாபனேன ஸப்³ப³தா² பரிபுண்ணவீஸதிவஸ்ஸதம் ஸந்தா⁴ய வுத்தம்.

பவாரேத்வா வீஸதிவஸ்ஸோ ப⁴விஸ்ஸதீதி மஹாபவாரணாதி³வஸே அதிக்கந்தே க³ப்³ப⁴வஸ்ஸேன ஸஹ வீஸதிவஸ்ஸோ ப⁴விஸ்ஸதீதி அத்தோ². தஸ்மாதி யஸ்மா க³ப்³ப⁴மாஸாபி க³ணனூபகா³ ஹோந்தி, தஸ்மா. ஏகவீஸதிவஸ்ஸோதி ஜாதியா வீஸதிவஸ்ஸம் ஸந்தா⁴ய வுத்தம். அஞ்ஞம் உபஸம்பாதே³தீதி உபஜ்ஜா²யோ, ஆசரியோ வா ஹுத்வா உபஸம்பாதே³தி. ஸோபீதி உபஸம்பாதே³ந்தோபி அனுபஸம்பன்னோதி விமதிவினோத³னியம் (வி. வி. டீ. பாசித்திய 2.406) ஆக³தம்.

ஏத்த² ஸியா – அட்ட²கதா²டீகாஸு ‘‘அட்டா²ரஸஸு வஸ்ஸேஸு ச² மாஸா வட்³ட⁴ந்தீ’’தி வுத்தம், இதா³னி பன ‘‘ஏகூனவீஸதியா வஸ்ஸேஸு ஸத்த மாஸா அதி⁴கா’’தி வத³ந்தி, கத²மேத்த² விஞ்ஞாதப்³ப³ந்தி? வுச்சதே – அட்ட²கதா²டீகாஸு ஸாஸனவோஹாரேன லோகியக³திம் அனுபக³ம்ம தீஸு தீஸு ஸம்வச்ச²ரேஸு மாஸச²ட்³ட³னம் க³ஹேத்வா ‘‘அட்டா²ரஸஸு வஸ்ஸேஸு ச² மாஸா வட்³ட⁴ந்தீ’’தி வுத்தம், இதா³னி பன வேத³வோஹாரேன சந்த³ஸூரியக³திஸங்கா²தம் திதி²ம் க³ஹேத்வா க³ணேந்தோ ‘‘ஏகூனவீஸதியா வஸ்ஸேஸு ஸத்த மாஸா அதி⁴கா’’தி வத³ந்தீதி, தம் வஸ்ஸூபனாயிககதா²யம் ஆவி ப⁴விஸ்ஸதி.

143. மாதா வா மதா ஹோதீதி ஸம்ப³ந்தோ⁴. ஸோயேவாதி பப்³ப³ஜ்ஜாபேக்கோ² ஏவ.

144. ‘‘ஏகஸீமாயஞ்ச அஞ்ஞேபி பி⁴க்கூ² அத்தீ²தி இமினா ஏகஸீமாயம் பி⁴க்கு²ம்ஹி அஸதி ப⁴ண்டு³கம்மாரோசனகிச்சம் நத்தீ²தி த³ஸ்ஸேதி. க²ண்ட³ஸீமாய வா ட²த்வா நதீ³ஸமுத்³தா³தீ³னி வா க³ந்த்வா பப்³பா³ஜேதப்³போ³தி ஏதேன ஸப்³பே³ ஸீமட்ட²கபி⁴க்கூ² ஆபுச்சி²தப்³பா³, அனாபுச்சா² பப்³பா³ஜேதும் ந வட்டதீதி தீ³பேதி.

145. அனாமட்ட²பிண்ட³பாதந்தி அக்³க³ஹிதஅக்³க³ம் பிண்ட³பாதம். ஸாமணேரபா⁴க³ஸமகோ ஆமிஸபா⁴கோ³தி ஏத்த² கிஞ்சாபி ஸாமணேரானம் ஆமிஸபா⁴க³ஸ்ஸ ஸமகமேவ தீ³யமானத்தா விஸும் ஸாமணேரபா⁴கோ³ நாம நத்தி², ஹேட்டா² க³ச்ச²ந்தம் பன ப⁴த்தம் கதா³சி மந்த³ம் ப⁴வேய்ய, தஸ்மா உபரி அக்³க³ஹேத்வா ஸாமணேரபாளியாவ க³ஹேத்வா தா³தப்³போ³தி அதி⁴ப்பாயோ. நியதபப்³ப³ஜ்ஜஸ்ஸேவ சாயம் பா⁴கோ³ தீ³யதி. தேனேவ ‘‘அபக்கம் பத்த’’ந்திஆதி³ வுத்தம். அஞ்ஞே வா பி⁴க்கூ² தா³துகாமா ஹோந்தீதி ஸம்ப³ந்தோ⁴.

146. ஸயம் பப்³பா³ஜேதப்³போ³தி கேஸச்சே²த³னாதீ³னி ஸயம் கரோந்தேன பப்³பா³ஜேதப்³போ³. கேஸச்சே²த³னம் காஸாயச்சா²த³னம் ஸரணதா³னந்தி ஹி இமானி தீணி கரோந்தோ ‘‘பப்³பா³ஜேதீ’’தி வுச்சதி, தேஸு ஏகம் த்³வே வாபி கரோந்தோ ததா² வோஹரீயதியேவ, தஸ்மா ஏதம் பப்³பா³ஜேஹீதி கேஸச்சே²த³னம் காஸாயச்சா²த³னஞ்ச ஸந்தா⁴ய வுத்தம். உபஜ்ஜா²யம் உத்³தி³ஸ்ஸ பப்³பா³ஜேதீதி ஏத்தா²பி ஏஸேவ நயோ. க²ண்ட³ஸீமம் நேத்வாதி ப⁴ண்டு³கம்மாரோசனபரிஹரணத்த²ம் வுத்தம். தேன ஸபி⁴க்கு²கே விஹாரே அஞ்ஞம்பி ‘‘ஏதஸ்ஸ கேஸே சி²ந்தா³’’தி வத்தும் ந வட்டதி. பப்³பா³ஜேத்வாதி கேஸச்சே²த³னம் ஸந்தா⁴ய வத³தி. பி⁴க்கு²தோ அஞ்ஞோ பப்³பா³ஜேதும் ந லப⁴தீதி ஸரணதா³னம் ஸந்தா⁴ய வுத்தம். தேனேவாஹ ‘‘ஸாமணேரோ பனா’’திஆதீ³தி ஸாரத்த²தீ³பனியம் (ஸாரத்த² டீ. மஹாவக்³க³ 3.34) ஆக³தம். விமதிவினோத³னியம் (வி. வி. டீ. மஹாவக்³க³ 2.34) பன – ஸயம் பப்³பா³ஜேதப்³போ³தி ஏத்த² ‘‘கேஸமஸ்ஸும் ஓஹாரேத்வா’’திஆதி³வசனதோ கேஸச்சே²த³னகாஸாயச்சா²த³னஸரணதா³னானி பப்³ப³ஜனம் நாம, தேஸு பச்சி²மத்³வயம் பி⁴க்கூ²ஹி ஏவ காதப்³ப³ம், காரேதப்³ப³ம் வா. பப்³பா³ஜேஹீதி இத³ம் திவித⁴ம்பி ஸந்தா⁴ய வுத்தம். க²ண்ட³ஸீமம் நேத்வாதி ப⁴ண்டு³கம்மாரோசனபரிஹரணத்த²ம். பி⁴க்கூ²னஞ்ஹி அனாரோசேத்வா ஏகஸீமாய ‘‘ஏதஸ்ஸ கேஸே சி²ந்தா³’’தி அஞ்ஞம் ஆணாபேதும்பி ந வட்டதி. பப்³பா³ஜேத்வாதி கேஸாதி³ச்சே²த³னமேவ ஸந்தா⁴ய வுத்தம் ‘‘காஸாயானி அச்சா²தே³த்வா’’தி விஸும் வுத்தத்தா. பப்³பா³ஜேதும் ந லப⁴தீதி ஸரணதா³னம் ஸந்தா⁴ய வுத்தம். அனுபஸம்பன்னேன பி⁴க்கு²ஆணத்தியா தி³ன்னம்பி ஸரணம் ந ருஹதீதி வுத்தம்.

வஜிரபு³த்³தி⁴டீகாயம்பி (வஜிர டீ. மஹாவக்³க³ 34) – க²ண்ட³ஸீமம் நேத்வாதி ப⁴ண்டு³கம்மாரோசனபரிஹரணத்த²ம் வுத்தம், தேன ஸபி⁴க்கு²கே விஹாரே அஞ்ஞம்பி ‘‘ஏதஸ்ஸ கேஸே சி²ந்தா³’’தி வத்தும் ந வட்டதி. ‘‘பப்³பா³ஜேத்வா’’தி இமஸ்ஸ அதி⁴ப்பாயபகாஸனத்த²ம் ‘‘காஸாயானி அச்சா²தே³த்வா ஏஹீ’’தி வுத்தம். உபஜ்ஜா²யோ சே கேஸமஸ்ஸுஓரோபனாதீ³னி அகத்வா பப்³ப³ஜ்ஜத்த²ம் ஸரணானி தே³தி, ந ருஹதி பப்³ப³ஜ்ஜா. கம்மவாசாய ஸாவேத்வா உபஸம்பாதே³தி, ருஹதி உபஸம்பதா³. அபத்தசீவரானம் உபஸம்பதா³ஸித்³தி⁴த³ஸ்ஸனதோ, கம்மவிபத்தியா அபா⁴வதோ சேதம் யுஜ்ஜதேவாதி ஏகே. ஹோதி சேத்த² –

‘‘ஸலிங்க³ஸ்ஸேவ பப்³ப³ஜ்ஜா, விலிங்க³ஸ்ஸாபி சேதரா;

அபேதபுப்³ப³வேஸஸ்ஸ, தம்த்³வயா இதி சாபரே’’தி.

பி⁴க்கு²னா ஹி ஸஹத்தே²ன வா ஆணத்தியா வா தி³ன்னமேவ காஸாவம் வட்டதி, அதி³ன்னம் ந வட்டதீதி பன ஸந்தேஸ்வேவ காஸாவேஸு, நாஸந்தேஸு அஸம்ப⁴வதோதி தேஸம் அதி⁴ப்பாயோதி ஆக³தோ.

ப⁴ப்³ப³ரூபோதி ப⁴ப்³ப³ஸபா⁴வோ. தமேவத்த²ம் பரியாயந்தரேன விபா⁴வேதி ‘‘ஸஹேதுகோ’’தி. ஞாதோதி பாகடோ. யஸஸ்ஸீதி பரிவாரஸம்பத்தியா ஸமன்னாக³தோ.

வண்ணஸண்டா²னக³ந்தா⁴ஸயோகாஸவஸேன அஸுசிஜேகு³ச்ச²படிகூலபா⁴வம் பாகடம் கரோந்தேனாதி ஸம்ப³ந்தோ⁴. தத்த² கேஸா நாமேதே வண்ணதோபி படிகூலா, ஸண்டா²னதோபி க³ந்த⁴தோபி ஆஸயதோபி ஓகாஸதோபி படிகூலா. மனுஞ்ஞேபி ஹி யாகு³பத்தே வா ப⁴த்தபத்தே வா கேஸவண்ணம் கிஞ்சி தி³ஸ்வா ‘‘கேஸமிஸ்ஸகமித³ம், ஹரத² ந’’ந்தி ஜிகு³ச்ச²ந்தி, ஏவம் கேஸா வண்ணதோ படிகூலா. ரத்திம் பு⁴ஞ்ஜந்தாபி கேஸஸண்டா²னம் அக்கவாகம் வா மகசிவாகம் வா சு²பித்வா ததே²வ ஜிகு³ச்ச²ந்தி, ஏவம் ஸண்டா²னதோபி படிகூலா. தேலமக்க²னபுப்ப²தூ⁴மாதி³ஸங்கா²ரவிரஹிதானஞ்ச கேஸானம் க³ந்தோ⁴ பரமஜேகு³ச்சோ² ஹோதி. ததோ ஜேகு³ச்ச²தரோ அக்³கி³ம்ஹி பக்கி²த்தானம். கேஸா ஹி வண்ணஸண்டா²னதோ அப்படிகூலாபி ஸியும், க³ந்தே⁴ன பன படிகூலாயேவ. யதா² ஹி த³ஹரஸ்ஸ குமாரகஸ்ஸ வச்சம் வண்ணதோ ஹலித்³தி³வண்ணம், ஸண்டா²னதோ ஹலித்³தி³பிண்டி³ஸண்டா²னம். ஸங்கரட்டா²னே ச²ட்³டி³தஞ்ச உத்³து⁴மாதககாளஸுனக²ஸரீரம் வண்ணதோ தாலபக்கவண்ணம், ஸண்டா²னதோ வட்டேத்வா விஸ்ஸட்ட²முதி³ங்க³ஸண்டா²னம், தா³டா²பிஸ்ஸ ஸுமனமகுளஸதி³ஸா, தம் உப⁴யம்பி வண்ணஸண்டா²னதோ ஸியா அப்படிகூலம், க³ந்தே⁴ன பன படிகூலமேவ, ஏவம் கேஸாபி ஸியும் வண்ணஸண்டா²னதோ அப்படிகூலா, க³ந்தே⁴ன பன படிகூலாயேவாதி.

யதா² பன அஸுசிட்டா²னே கா³மனிஸ்ஸந்தே³ன ஜாதானி ஸூபேய்யபண்ணானி நாக³ரிகமனுஸ்ஸானம் ஜேகு³ச்சா²னி ஹோந்தி அபரிபோ⁴கா³னி, ஏவம் கேஸாபி புப்³ப³லோஹிதமுத்தகரீஸபித்தஸேம்ஹாதி³னிஸ்ஸந்தே³ன ஜாதத்தா பரமஜேகு³ச்சா²தி. ஏவம் ஆஸயதோபி படிகூலா. இமே ச கேஸா நாம கூ³த²ராஸிம்ஹி உட்டி²தகண்ணகா விய ஏகதிம்ஸகோட்டா²ஸராஸிம்ஹி ஜாதா, தே ஸுஸானஸங்காரட்டா²னாதீ³ஸு ஜாதஸாகம் விய, பரிகா²தீ³ஸு ஜாதகமலகுவலயாதி³புப்ப²ம் விய ச அஸுசிட்டா²னே ஜாதத்தா பரமஜேகு³ச்சா²தி ஏவம் ஓகாஸதோ படிகூலாதிஆதி³னா நயேன தசபஞ்சகஸ்ஸ வண்ணாதி³வஸேன படிகூலபா⁴வம் பகாஸேந்தேனாதி அத்தோ².

நிஜ்ஜீவனிஸ்ஸத்தபா⁴வம் வா பாகடம் கரோந்தேனாதி இமே கேஸா நாம ஸீஸகடாஹபலிவேட²னசம்மே ஜாதா, தத்த² யதா² வம்மிகமத்த²கே ஜாதேஸு குண்ட²திணேஸு ந வம்மிகமத்த²கோ ஜானாதி ‘‘மயி குண்ட²திணானி ஜாதானீ’’தி, நாபி குண்ட²திணானி ஜானந்தி ‘‘மயம் வம்மிகமத்த²கே ஜாதானீ’’தி. ஏவமேவ ந ஸீஸகடாஹபலிவேட²னசம்மம் ஜானாதி ‘‘மயி கேஸா ஜாதா’’தி, நாபி கேஸா ஜானந்தி ‘‘மயம் ஸீஸகடாஹபலிவேட²னசம்மே ஜாதா’’தி, அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி ‘‘கேஸா நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூ’’திஆதி³னா நயேன நிஜ்ஜீவனிஸ்ஸத்தபா⁴வம் பகாஸேந்தேன. புப்³பே³தி புரிமபு³த்³தா⁴னம் ஸந்திகே. மத்³தி³தஸங்கா²ரோதி நாமரூபவவத்தா²னேன சேவ பச்சயபரிக்³க³ஹவஸேன ச ஞாணேன பரிமத்³தி³தஸங்கா²ரோ. பா⁴விதபா⁴வனோதி கலாபஸம்மஸனாதி³னா ஸப்³ப³ஸோ குஸலபா⁴வனாய பூரணேன பா⁴விதபா⁴வனோ. அதி³ன்னம் ந வட்டதீதி ஏத்த² ‘‘பப்³ப³ஜ்ஜா ந ருஹதீதி வத³ந்தீ’’தி ஸாரத்த²தீ³பனியம் (ஸாரத்த². டீ. மஹாவக்³க³ 3.34) வுத்தம்.

விமதிவினோத³னியம் (வி. வி. டீ. மஹாவக்³க³ 2.34) பன – யஸஸ்ஸீதி பரிவாரஸம்பன்னோ. நிஜ்ஜீவனிஸ்ஸத்தபா⁴வந்தி ‘‘கேஸா நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூ’’திஆதி³னயம் ஸங்க³ண்ஹாதி, ஸப்³ப³ம் விஸுத்³தி⁴மக்³கே³ (விஸுத்³தி⁴. 1.311) ஆக³தனயேன க³ஹேதப்³ப³ம். புப்³பே³தி புப்³ப³பு³த்³து⁴ப்பாதே³ஸு. மத்³தி³தஸங்கா²ரோதி விபஸ்ஸனாவஸேன வுத்தம். பா⁴விதபா⁴வனோதி ஸமத²வஸேனபி.

காஸாயானி திக்க²த்தும் வா…பே… படிக்³கா³ஹாபேதப்³போ³தி ஏத்த² ‘‘ஸப்³ப³து³க்க²னிஸ்ஸரணத்தா²ய இமம் காஸாவம் க³ஹேத்வா’’தி வா ‘‘தம் காஸாவம் த³த்வா’’தி வா வத்வா ‘‘பப்³பா³ஜேத² மம், ப⁴ந்தே, அனுகம்பம் உபாதா³யா’’தி ஏவம் யாசனபுப்³ப³கம் சீவரம் படிச்சா²பேதி. அதா²பீதிஆதி³ திக்க²த்தும் படிக்³கா³ஹாபனதோ பரம் கத்தப்³ப³விதி⁴த³ஸ்ஸனம், அதா²பீதி ததோ பரம்பீதி அத்தோ². கேசி பன ‘‘சீவரம் அப்படிக்³கா³ஹாபேத்வா பப்³பா³ஜனப்பகாரபே⁴த³த³ஸ்ஸனத்த²ம் ‘அதா²பீ’தி வுத்தம். அதா²பீதி அத² வாதி அத்தோ²’’தி வத³ந்தி. அதி³ன்னம் ந வட்டதீதி இமினா பப்³ப³ஜ்ஜா ந ருஹதீதி த³ஸ்ஸேதி.

147. பாதே³ வந்தா³பேத்வாதி பாதா³பி⁴முக²ம் நமாபேத்வா. தூ³ரே வந்த³ந்தோபி ஹி பாதே³ வந்த³தீதி வுச்சதீதி. உபஜ்ஜா²யேன வாதி ஏத்த² யஸ்ஸ ஸந்திகே உபஜ்ஜ²ம் க³ண்ஹாதி, அயம் உபஜ்ஜா²யோ. யம் ஆபி⁴ஸமாசாரிகேஸு வினயனத்தா²ய ஆசரியம் கத்வா நிய்யாதேந்தி, அயம் ஆசரியோ. ஸசே பன உபஜ்ஜா²யோ ஸயமேவ ஸப்³ப³ம் ஸிக்கா²பேதி, அஞ்ஞம்பி ந நிய்யாதேதி, உபஜ்ஜா²யோவஸ்ஸ ஆசரியோபி ஹோதி. யதா² உபஸம்பதா³காலே ஸயமேவ கம்மவாசம் வாசேந்தோ உபஜ்ஜா²யோவ கம்மவாசாசரியோபி ஹோதீதி வுத்தம்.

அனுஞ்ஞாதஉபஸம்பதா³தி ஞத்திசதுத்த²கம்மேன அனுஞ்ஞாதஉபஸம்பதா³. டா²னகரணஸம்பத³ந்தி ஏத்த² உரஆதீ³னி டா²னானி, ஸம்வுதாதீ³னி கரணானீதி வேதி³தப்³பா³னி. அனுனாஸிகந்தம் கத்வா தா³னகாலே அந்தராவிச்சே²த³ம் அகத்வா தா³தப்³பா³னீதி த³ஸ்ஸேதும் ‘‘ஏகஸம்ப³ந்தா⁴னீ’’தி வுத்தம். விச்சி²ந்தி³த்வாதி ம-காரந்தம் கத்வா தா³னஸமயே விச்சே²த³ம் கத்வா.

148. ஸப்³ப³மஸ்ஸ கப்பியாகப்பியம் ஆசிக்கி²தப்³ப³ந்தி த³ஸஸிக்கா²பத³வினிமுத்தம் பராமாஸாபராமாஸாதி³பே⁴த³ம் கப்பியாகப்பியம் ஆசிக்கி²தப்³ப³ம். ஆபி⁴ஸமாசாரிகேஸு வினேதப்³போ³தி இமினா ‘‘ஸேகி²யஉபஜ்ஜா²யவத்தாதி³ஆபி⁴ஸமாசாரிகஸீலமனேன பூரேதப்³ப³ம். தத்த² ச கத்தப்³ப³ஸ்ஸ அகரணே, அகத்தப்³ப³ஸ்ஸ ச கரணே த³ண்ட³கம்மாரஹோ ஹோதீதி தீ³பேதீதி ஸாரத்த²தீ³பனியம் (ஸாரத்த². டீ. மஹாவக்³க³ 3.34) வுத்தம். அனுனாஸிகந்தம் கத்வா தா³னகாலே அந்தராவிச்சே²தோ³ ந காதப்³போ³தி ஆஹ ‘‘ஏகஸம்ப³ந்தா⁴னீ’’தி. ஆபி⁴ஸமாசாரிகேஸு வினேதப்³போ³தி இமினா ஸேகி²யவத்தாக்க²ந்த⁴கவத்தேஸு, அஞ்ஞேஸு ச ஸுக்கவிஸ்ஸட்டி²ஆதி³லோகவஜ்ஜஸிக்கா²பதே³ஸு ச ஸாமணேரேஹி வத்திதப்³ப³ம், தத்த² அவத்தமானோ அலஜ்ஜீ த³ண்ட³கம்மாரஹோ ச ஹோதீதி த³ஸ்ஸேதீதி விமதிவினோத³னியம் (வி. வி. டீ. மஹாவக்³க³ 2.34).

உராதீ³னி டா²னானி நாம, ஸம்வுதாதீ³னி கரணானி நாம. அனுனாஸிகந்தம் கத்வா ஏகஸம்ப³ந்த⁴ம் கத்வா தா³னகாலே அந்தரா அட்ட²த்வா வத்தப்³ப³ம், விச்சி²ந்தி³த்வா தா³னகாலேபி யதா²வுத்தட்டா²னே ஏவ விச்சே²தோ³, அஞ்ஞத்ர ந வட்டதீதி லிகி²தம், அனுனாஸிகந்தே தீ³யமானே க²லித்வா ‘‘பு³த்³த⁴ம் ஸரணம் க³ச்சா²மீ’’தி ம-காரேன மிஸ்ஸீபூ⁴தே கே²த்தே ஓதிண்ணத்தா வட்டதீதி உபதிஸ்ஸத்தே²ரோ. மிஸ்ஸம் கத்வா வத்தும் வட்டதி, வசனகாலே பன அனுனாஸிகட்டா²னே விச்சே²த³ம் அகத்வா வத்தப்³ப³ந்தி த⁴ம்மஸிரித்தே²ரோ. ‘‘ஏவம் கம்மவாசாயம்பீ’’தி வுத்தம். உப⁴தோஸுத்³தி⁴யாவ வட்டதீதி ஏத்த² மஹாதே²ரோ பதிதத³ந்தாதி³காரணதாய அசதுரஸ்ஸம் கத்வா வத³தி, ப்³யத்தஸாமணேரோ ஸமீபே டி²தோ பப்³ப³ஜ்ஜாபேக்க²ம் ப்³யத்தம் வதா³பேதி, மஹாதே²ரேன அவுத்தம் வதா³பேதீதி ந வட்டதி. கம்மவாசாய இதரோ பி⁴க்கு² சே வத³தி, வட்டதீதி. ஸங்கோ⁴ ஹி கம்மம் கரோதி, ந புக்³க³லோதி. ந, நானாஸீமபவத்தகம்மவாசாஸாமஞ்ஞனயேன படிக்கி²பிதப்³ப³த்தா. அத² தே²ரேன சதுரஸ்ஸம் வுத்தம் பப்³ப³ஜ்ஜாபேக்க²ம் வத்தும் அஸக்கோந்தம் ஸாமணேரோ ஸயம் வத்வா வதா³பேதி, உப⁴தோஸுத்³தி⁴ ஏவ ஹோதி தே²ரேன வுத்தஸ்ஸேவ வுத்தத்தா. ‘‘பு³த்³த⁴ம் ஸரணம் க³ச்ச²ந்தோ அஸாதா⁴ரணே பு³த்³த⁴கு³ணம், த⁴ம்மம் ஸரணம் க³ச்ச²ந்தோ நிப்³பா³னம், ஸங்க⁴ம் ஸரணம் க³ச்ச²ந்தோ ஸேக்க²த⁴ம்மம் அஸேக்க²த⁴ம்மஞ்ச ஸரணம் க³ச்ச²தீ’’தி அக்³க³ஹிதக்³க³ஹணவஸேன யோஜனா காதப்³பா³. அஞ்ஞதா² ஸரணத்தயஸங்கரதோ³ஸோ. ஸப்³ப³மஸ்ஸ கப்பியாகப்பியந்தி த³ஸஸிக்கா²பத³வினிமுத்தம் பராமாஸாபராமாஸாதி³பே⁴த³ம். ‘‘ஆபி⁴ஸமாசாரிகேஸு வினேதப்³போ³’’தி வசனதோ ஸேகி²யஉபஜ்ஜா²யவத்தாதி³ஆபி⁴ஸமாசாரிகஸீலமனேன பூரேதப்³ப³ம். தத்த² சாரித்தஸ்ஸ அகரணே, வாரித்தஸ்ஸ கரணே த³ண்ட³கம்மாரஹோ ஹோதீ’’தி தீ³பேதீதி வஜிரபு³த்³தி⁴டீகாயம் (வஜிர. டீ. மஹாவக்³க³ 34) ஆக³தோ.

அனுஜானாமி பி⁴க்க²வே ஸாமணேரானம் த³ஸ ஸிக்கா²பதா³னீதிஆதீ³ஸு ஸிக்கி²தப்³பா³னி பதா³னி ஸிக்கா²பதா³னி, ஸிக்கா²கோட்டா²ஸாதி அத்தோ². ஸிக்கா²ய வா பதா³னி ஸிக்கா²பதா³னி, அதி⁴ஸீலஅதி⁴சித்தஅதி⁴பஞ்ஞாஸிக்கா²னம் அதி⁴க³முபாயோதி அத்தோ². அத்த²தோ பன காமாவசரகுஸலசித்தஸம்பயுத்தா விரதியோ, தம்ஸம்பயுத்தத⁴ம்மா பனேத்த² தக்³க³ஹணேனேவ க³ஹேதப்³பா³. பாணோதி பரமத்த²தோ ஜீவிதிந்த்³ரியம், தஸ்ஸ அதிபாதனம் பப³ந்த⁴வஸேன பவத்திதும் அத³த்வா ஸத்தா²தீ³ஹி அதிக்கம்ம அபி⁴ப⁴வித்வா பாதனம் பாணாதிபாதோ, பாணவதோ⁴தி அத்தோ². ஸோ பன அத்த²தோ பாணே பாணஸஞ்ஞினோ ஜீவிதிந்த்³ரியுபச்சே²த³கஉபக்கமஸமுட்டா²பிகா வத⁴கசேதனாவ, தஸ்மா பாணாதிபாதா வேரமணி, வேரஹேதுதாய வேரஸங்கா²தம் பாணாதிபாதாதி³பாபத⁴ம்மம் மணதி நீஹரதீதி விரதி ‘‘வேரமணீ’’தி வுச்சதி. விரமதி ஏதாயாதி வா ‘‘விரமதீ’’தி வத்தப்³பே³ நிருத்தினயேன ‘‘வேரமணீ’’தி ஸமாதா³னவிரதி வுத்தா. ஏஸ நயோ ஸேஸேஸுபி.

அதி³ன்னஸ்ஸ ஆதா³னம் அதி³ன்னாதா³னம், தே²ய்யசேதனா. அப்³ரம்ஹசரியந்தி அஸேட்ட²சரியம், மக்³கே³னமக்³க³படிபத்திஸமுட்டா²பிகா மேது²னசேதனா. முஸாதி அபூ⁴தவத்து², தஸ்ஸ வாதோ³ அபூ⁴தம் ஞத்வாவ பூ⁴ததோ விஞ்ஞாபனசேதனா முஸாவாதோ³. பிட்ட²பூவாதி³னிப்³ப³த்தா ஸுரா சேவ புப்பா²ஸவாதி³பே⁴த³ம் மேரயஞ்ச ஸுராமேரயம். ததே³வ மத³னீயட்டே²ன மஜ்ஜஞ்சேவ பமாத³காரணட்டே²ன பமாத³ட்டா²னஞ்ச, தம் யாய சேதனாய பிவதி, தஸ்ஸா ஏவம் அதி⁴வசனம்.

அருணுக்³க³மனதோ பட்டா²ய யாவ மஜ்ஜ²ன்ஹிகா, அயம் அரியானம் போ⁴ஜனஸ்ஸ காலோ நாம, தத³ஞ்ஞோ விகாலோ. பு⁴ஞ்ஜிதப்³ப³ட்டே²ன போ⁴ஜனந்தி இத⁴ ஸப்³ப³ம் யாவகாலிகம் வுச்சதி, தஸ்ஸ அஜ்ஜோ²ஹரணம் இத⁴ உத்தரபத³லோபேன போ⁴ஜனந்தி அதி⁴ப்பேதம். விகாலே போ⁴ஜனம் அஜ்ஜோ²ஹரணம் விகாலபோ⁴ஜனம், விகாலே வாயாவகாலிகஸ்ஸ போ⁴ஜனம் அஜ்ஜோ²ஹரணம் விகாலபோ⁴ஜனந்திபி அத்தோ² க³ஹேதப்³போ³, தம் அத்த²தோ விகாலே யாவகாலிகஅஜ்ஜோ²ஹரணசேதனாவ.

ஸாஸனஸ்ஸ அனனுலோமத்தா விஸூகம் படாணீபூ⁴தம் த³ஸ்ஸனம் ‘‘விஸூகத³ஸ்ஸனம், நச்சகீ³தாதி³த³ஸ்ஸனஸவனானஞ்சேவ வட்டகயுத்³த⁴ஜூதகீளாதி³ஸப்³ப³கீளானஞ்ச நாமம். த³ஸ்ஸனந்தி சேத்த² பஞ்சன்னம்பி விஞ்ஞாணானம் யதா²ஸகம் விஸயஸ்ஸ ஆலோசனஸபா⁴வதாய த³ஸ்ஸனஸத்³தே³ன ஸங்க³ஹேதப்³ப³த்தா ஸவனம்பி ஸங்க³ஹிதம். நச்சகீ³தவாதி³தஸத்³தே³ஹி சேத்த² அத்தனோ நச்சனகா³யனாதீ³னிபி ஸங்க³ஹிதானீதி த³ட்ட²ப்³ப³ம்.

மாலாதி ப³த்³த⁴மப³த்³த⁴ம் வா புப்ப²ம், அந்தமஸோ ஸுத்தாதி³மயம்பி அலங்காரத்தா²ய பிளந்தி⁴யமானம் மாலாத்வேவ வுச்சதி. க³ந்த⁴ந்தி வாஸசுண்ணாதி³விலேபனதோ அஞ்ஞம் யம் கிஞ்சி க³ந்த⁴ஜாதம். விலேபனந்தி பிஸித்வா க³ஹிதம் ச²விராக³கரணஞ்சேவ க³ந்த⁴ஜாதஞ்ச. தா⁴ரணம் நாம பிளந்த⁴னம். மண்ட³னம் நாம ஊனட்டா²னபூரணம். க³ந்த⁴வஸேன, ச²விராக³வஸேன வா ஸாதி³யனம் விபூ⁴ஸனம் நாம, மாலாதீ³ஸு வா தா⁴ரணாதீ³னி யதா²க்கமம் யோஜேதப்³பா³னி. தேஸம் தா⁴ரணாதீ³னம் டா²னம் காரணம் வீதிக்கமசேதனா.

உச்சாதி உச்ச-ஸத்³தே³ன ஸமானத்தோ² நிபாதோ. உச்சாஸயனம் வுச்சதி பமாணாதிக்கந்தம் ஆஸந்தா³தி³. மஹாஸயனம் அகப்பியத்த²ரணேஹி அத்த²தம் ஸலோஹிதவிதானஞ்ச. ஏதேஸு ஹி ஆஸனம் ஸயனஞ்ச உச்சாஸயனமஹாஸயனஸத்³தே³ஹி க³ஹிதானி உத்தரபத³லோபேன. ஜாதரூபரஜதபடிக்³க³ஹணாதி ஏத்த² ரஜதஸத்³தே³ன தா³ருமாஸகாதி³ ஸப்³ப³ம் ரூபியம் ஸங்க³ஹிதம். முத்தாமணிஆத³யோபேத்த² த⁴ஞ்ஞக்கே²த்தவத்தா²த³யோ ச ஸங்க³ஹிதாதி த³ட்ட²ப்³பா³. படிக்³க³ஹண-ஸத்³தே³ன பன படிக்³கா³ஹாபனஸாதி³யனானிபி ஸங்க³ஹிதானி.

149. ஸேனாஸனக்³கா³ஹோ ச படிப்பஸ்ஸம்ப⁴ந்தீதி இமினா வஸ்ஸச்சே²த³ம் த³ஸ்ஸேதி. உபஸம்பன்னானம்பி பாராஜிகஸமாபத்தியா ஸரணக³மனாதி³ஸாமணேரபா⁴வஸ்ஸபி வினஸ்ஸனதோ ஸேனாஸனக்³கா³ஹோ ச படிப்பஸ்ஸம்ப⁴தி, ஸங்க⁴லாப⁴ம்பி தே ந லப⁴ந்தீதி வேதி³தப்³ப³ம். புரிமிகாய புன ஸரணானி க³ஹிதானீதி ஸரணக³ஹணேன ஸஹ தத³ஹேவஸ்ஸ வஸ்ஸூபக³மனம்பி த³ஸ்ஸேதி. பச்சி²மிகாய வஸ்ஸாவாஸிகந்தி வஸ்ஸாவாஸிகலாப⁴க்³க³ஹணத³ஸ்ஸனமத்தமேவேதம், ததோ புரேபி வா பச்சா²பி வா வஸ்ஸாவாஸிகஞ்ச சீவரமாஸேஸு ஸங்கே⁴ உப்பன்னகாலசீவரஞ்ச புரிமிகாய உபக³ந்த்வா அவிபன்னஸீலோ ஸாமணேரோ லப⁴தி ஏவ. ஸசே பச்சி²மிகாய க³ஹிதானீதி பச்சி²மிகாய வஸ்ஸூபக³மனஞ்ச சி²ன்னவஸ்ஸதஞ்ச த³ஸ்ஸேதி. தஸ்ஸ ஹி காலசீவரலாபோ⁴ ந பாபுணாதி, தஸ்மா ‘‘அபலோகேத்வா லாபோ⁴ தா³தப்³போ³’’தி வுத்தம். வஸ்ஸாவாஸிகலாபோ⁴ பன யதி³ ஸேனாஸனஸ்ஸாமிகா தா³யகா ஸேனாஸனகு³த்தத்தா²ய பச்சி²மிகாய உபக³ந்த்வா வத்தம் கத்வா அத்தனோ ஸேனாஸனே வஸந்தஸ்ஸபி வஸ்ஸாவாஸிகம் தா³தப்³ப³ந்தி வத³ந்தி, அனபலோகேத்வாபி தா³தப்³போ³வ. யம் பன ஸாரத்த²தீ³பனியம் (ஸாரத்த². டீ. மஹாவக்³க³ 3.108) ‘‘பச்சி²மிகாய வஸ்ஸாவாஸிகம் லச்ச²தீதி பச்சி²மிகாய புன வஸ்ஸம் உபக³தத்தா லச்ச²தீ’’தி வுத்தம், தம்பி வஸ்ஸாவாஸிகே தா³யகானம் இமம் அதி⁴ப்பாயம் நிஸ்ஸாய வுத்தஞ்சே, ஸுந்த³ரம், ஸங்கி⁴கம், காலசீவரம்பி ஸந்தா⁴ய வுத்தஞ்சே, ந யுஜ்ஜதீதி வேதி³தப்³ப³ம்.

ந அஜானித்வாதி ‘‘ஸுரா’’தி அஜானித்வா பிவதோ பாணாதிபாதாவேரமணிஆதி³ஸப்³ப³ஸீலபே⁴த³ம் ஸரணபே⁴த³ஞ்ச ந ஆபஜ்ஜதி. அகுஸலம் பன ஸுராபானாவேரமணிஸீலபே⁴தோ³ ச ஹோதி மாலாதி³தா⁴ரணாதீ³ஸு வியாதி த³ட்ட²ப்³ப³ம். இதரானீதி விகாலபோ⁴ஜனாவேரமணிஆதீ³னி. தானிபி ஹி ஸஞ்சிச்ச வீதிக்கமந்தஸ்ஸ தம் தம் பி⁴ஜ்ஜதி ஏவ, இதரீதரேஸம் பன அபி⁴ஜ்ஜனேன நாஸனங்கா³னி ந ஹோந்தி. தேனேவ ‘‘ஏதேஸு பி⁴ன்னேஸூ’’தி பே⁴த³வசனம் வுத்தம்.

அச்சயம் தே³ஸாபேதப்³போ³தி ‘‘அச்சயோ மம் ப⁴ந்தே அச்சாக³மா’’திஆதி³னா ஸங்க⁴மஜ்ஜே² தே³ஸாபேத்வா ஸரணஸீலம் தா³தப்³ப³ந்தி அதி⁴ப்பாயோ பாராஜிகத்தா தேஸம். தேனாஹ ‘‘லிங்க³னாஸனாய நாஸேதப்³போ³’’தி. அயமேவ ஹி நாஸனா இதா⁴தி⁴ப்பேதாதி லிங்க³னாஸனாகாரணேஹி பாணாதிபாதாதீ³ஹி அவண்ணபா⁴ஸனாதீ³னம் ஸஹ பதிதத்தா வுத்தம். நனு ச கண்டகஸாமணேரோபி மிச்சா²தி³ட்டி²கோ ஏவ, தஸ்ஸ ச ஹேட்டா² த³ண்ட³கம்மனாஸனாவ வுத்தா, இத⁴ பன மிச்சா²தி³ட்டி²கஸ்ஸ லிங்க³னாஸனா வுச்சதி, கோ இமேஸம் பே⁴தோ³தி சோத³னம் மனஸி நிதா⁴யாஹ ‘‘ஸஸ்ஸதுச்சே²தா³னஞ்ஹி அஞ்ஞதரதி³ட்டி²கோ’’தி. ஏத்த² சாயம் அதி⁴ப்பாயோ – யோ ஹி ‘‘அத்தா இஸ்ஸரோ’’தி வா ‘‘நிச்சோ து⁴வோ’’திஆதி³னா வா ‘‘அத்தா உச்சி²ஜ்ஜிஸ்ஸதி வினஸ்ஸிஸ்ஸதீ’’திஆதி³னா வா தித்தி²யபரிகப்பிதம் யம் கிஞ்சி ஸஸ்ஸதுச்சே²த³தி³ட்டி²ம் த³ள்ஹம் க³ஹேத்வா வோஹரதி, தஸ்ஸ ஸா பாராஜிகட்டா²னம் ஹோதி, ஸோ ச லிங்க³னாஸனாய நாஸேதப்³போ³. யோ பன ஈதி³ஸம் தி³ட்டி²ம் அக்³க³ஹேத்வா ஸாஸனிகோவ ஹுத்வா கேவலம் பு³த்³த⁴வசனாதி⁴ப்பாயம் விபரீததோ க³ஹேத்வா பி⁴க்கூ²ஹி ஓவதி³யமானோபி அப்படினிஸ்ஸஜ்ஜித்வா வோஹரதி, தஸ்ஸ ஸா தி³ட்டி² பாராஜிகம் ந ஹோதி, ஸோ பன கண்டகனாஸனாய ஏவ நாஸேதப்³போ³தி விமதிவினோத³னியம். இமஸ்மிம் டா²னே ஸாரத்த²தீ³பனியம் த³ஸஸிக்கா²பத³தோ பட்டா²ய வித்தா²ரதோ வண்ணனா ஆக³தா, ஸா போராணடீகாயம் ஸப்³ப³ஸோ போத்த²கம் ஆருள்ஹா, தஸ்மா இத⁴ ந வித்தா²ரயிம்ஹ.

150. ‘‘அத்தனோ பரிவேணந்தி இத³ம் புக்³க³லிகம் ஸந்தா⁴ய வுத்த’’ந்தி க³ண்டி²பதே³ஸு வுத்தம். அயம் பனேத்த² க³ண்டி²பத³காரானம் அதி⁴ப்பாயோ – வஸ்ஸக்³கே³ன பத்தஸேனாஸனந்தி இமினா தஸ்ஸ வஸ்ஸக்³கே³ன பத்தம் ஸங்கி⁴கஸேனாஸனம் வுத்தம். அத்தனோ பரிவேணந்தி இமினாபி தஸ்ஸேவ புக்³க³லிகஸேனாஸனம் வுத்தந்தி. அயம் பனேத்த² அம்ஹாகம் க²ந்தி – யத்த² வா வஸதீதி இமினா ஸங்கி⁴கம் வா ஹோது புக்³க³லிகம் வா, தஸ்ஸ நிப³த்³த⁴வஸனகஸேனாஸனம் வுத்தம். யத்த² வா படிக்கமதீதி இமினா பன யம் ஆசரியுபஜ்ஜா²யஸ்ஸ வஸனட்டா²னம் உபட்டா²னாதி³னிமித்தம் நிப³த்³த⁴ம் பவிஸதி, தம் ஆசரியுபஜ்ஜா²யானம் பவிஸனட்டா²னம் வுத்தம், தஸ்மா தது³ப⁴யம் த³ஸ்ஸேதும் ‘‘உப⁴யேனபி அத்தனோ பரிவேணஞ்ச வஸ்ஸக்³கே³ன பத்தஸேனாஸனஞ்ச வுத்த’’ந்தி ஆஹ. தத்த² அத்தனோ பரிவேணந்தி இமினா ஆசரியுபஜ்ஜா²யானம் நிவாஸனட்டா²னம் த³ஸ்ஸிதம், வஸ்ஸக்³கே³ன பத்தஸேனாஸனந்தி இமினா பன தஸ்ஸ வஸனட்டா²னம், தஸ்மா தது³ப⁴யம்பி ஸங்கி⁴கம் வா ஹோது புக்³க³லிகம் வா, ஆவரணம் காதப்³ப³மேவாதி. முக²த்³வாரிகந்தி முக²த்³வாரேன பு⁴ஞ்ஜிதப்³ப³ம். த³ண்ட³கம்மம் கத்வாதி த³ண்ட³கம்மம் யோஜேத்வா. த³ண்டே³ந்தி வினேந்தி ஏதேனாதி த³ண்டோ³, ஸோயேவ கத்தப்³ப³த்தா கம்மந்தி த³ண்ட³கம்மம், ஆவரணாதி³. த³ண்ட³கம்மமஸ்ஸ கரோதா²தி அஸ்ஸ த³ண்ட³கம்மம் யோஜேத² ஆணாபேத². த³ண்ட³கம்மந்தி வா நிக்³க³ஹகம்மம், தஸ்மா நிக்³க³ஹமஸ்ஸ கரோதா²தி வுத்தம் ஹோதி. ஏஸ நயோ ஸப்³ப³த்த² ஈதி³ஸேஸு டா²னேஸு.

ஸேனாஸனக்³கா³ஹோ ச படிப்பஸ்ஸம்ப⁴ந்தீதி இமினா சி²ன்னவஸ்ஸோ ஹோதீதி தீ³பேதி. ஸசே ஆகிண்ணதோ³ஸோவ ஹோதி, ஆயதிம் ஸம்வரே ந திட்ட²தி, நிக்கட்³டி⁴தப்³போ³தி ஏத்த² ஸசே யாவததியம் வுச்சமானோ ந ஓரமதி, ஸங்க⁴ம் அபலோகேத்வா நாஸேதப்³போ³, புன பப்³ப³ஜ்ஜம் யாசமானோபி அபலோகேத்வா பப்³பா³ஜேதப்³போ³தி வத³ந்தி. பச்சி²மிகாய வஸ்ஸாவாஸிகம் லச்ச²தீதி பச்சி²மிகாய புன வஸ்ஸம் உபக³தத்தா லச்ச²தி. அபலோகேத்வா லாபோ⁴ தா³தப்³போ³தி சி²ன்னவஸ்ஸதாய வுத்தம். இதரானி பஞ்ச ஸிக்கா²பதா³னீதி விகாலபோ⁴ஜனாதீ³னி பஞ்ச. அச்சயம் தே³ஸாபேதப்³போ³தி ‘‘அச்சயோ மம் ப⁴ந்தே அச்சாக³மா’’திஆதி³னா நயேன தே³ஸாபேதப்³போ³தி ஸாரத்த²தீ³பனியம் (ஸாரத்த². டீ. மஹாவக்³க³ 3.108) வுத்தம்.

இதி வினயஸங்க³ஹஸம்வண்ணனாபூ⁴தே வினயாலங்காரே

பப்³ப³ஜ்ஜாவினிச்ச²யகதா²லங்காரோ நாம

த்³வாவீஸதிமோ பரிச்சே²தோ³.

உபஸம்பதா³வினிச்ச²யகதா²

ஏவம் பப்³ப³ஜ்ஜாவினிச்ச²யம் கதே²த்வா தத³னந்தரம் உபஸம்பதா³வினிச்ச²யோ கதே²தப்³போ³, ஏவம் ஸந்தேபி அட்ட²கதா²யம் உபஸம்பதா³வினிச்ச²யகதா² பாளிவண்ணனாவஸேனேவ ஆக³தா, நோ பாளிமுத்தகவினிச்ச²யவஸேன, இமஸ்ஸ பன பகரணஸ்ஸ பாளிமுத்தகவினிச்ச²யகதா²பூ⁴தத்தா தமகதே²த்வா நிஸ்ஸயவினிச்ச²யோ ஏவ ஆசரியேன கதி²தோ, மயம் பன உபஸம்பதா³வினிச்ச²யஸ்ஸ அதிஸுகு²மத்தா அதிக³ம்பீ⁴ரத்தா ஸுது³ல்லப⁴த்தா ஸாஸனானுக்³க³ஹத்த²ம் ஆசரியேன அவுத்தம்பி ஸமந்தபாஸாதி³கதோ நீஹரித்வா விமதிவினோத³னீஆதி³ப்பகரணேஸு ஆக³தவினிச்ச²யேன அலங்கரித்வா தம் வினிச்ச²யம் கத²யிஸ்ஸாம.

தேன கோ² பன ஸமயேனாதி யேன ஸமயேன ப⁴க³வதா ‘‘ந பி⁴க்க²வே அனுபஜ்ஜா²யகோ’’திஆதி³ஸிக்கா²பத³ம் அபஞ்ஞத்தம் ஹோதி, தேன ஸமயேன. அனுபஜ்ஜா²யகந்தி உபஜ்ஜ²ம் அகா³ஹாபேத்வா ஸப்³பே³ன ஸப்³ப³ம் உபஜ்ஜா²யவிரஹிதம், ஏவம் உபஸம்பன்னா நேவ த⁴ம்மதோ ந ஆமிஸதோ ஸங்க³ஹம் லப⁴ந்தி, தே பரிஹாயந்தியேவ, ந வட்³ட⁴ந்தி. ந பி⁴க்க²வே அனுபஜ்ஜா²யகோதி உபஜ்ஜ²ம் அகா³ஹாபேத்வா நிருபஜ்ஜா²யகோ ந உபஸம்பாதே³தப்³போ³, யோ உபஸம்பாதே³ய்ய, ஆபத்தி து³க்கடஸ்ஸாதி ஸிக்கா²பத³பஞ்ஞத்திதோ பட்டா²ய ஏவம் உபஸம்பாதே³ந்தஸ்ஸ ஆபத்தி ஹோதி, கம்மம் பன ந குப்பதி. கேசி ‘‘குப்பதீ’’தி வத³ந்தி, தம் ந க³ஹேதப்³ப³ம். ‘‘ஸங்கே⁴ன உபஜ்ஜா²யேனா’’திஆதீ³ஸுபி உப⁴தோப்³யஞ்ஜனகுபஜ்ஜா²யபரியோஸானேஸு ஏஸேவ நயோ.

அபத்தகா ஹத்தே²ஸு பிண்டா³ய சரந்தீதி யோ ஹத்தே²ஸு பிண்டோ³ லப்³ப⁴தி, தத³த்தா²ய சரந்தி. ஸேய்யதா²பி தித்தி²யாதி யதா² ஆஜீவகனாமகா தித்தி²யா. ஸூபப்³யஞ்ஜனேஹி மிஸ்ஸேத்வா ஹத்தே²ஸு ட²பிதபிண்ட³மேவ ஹி தே பு⁴ஞ்ஜந்தி. ஆபத்தி து³க்கடஸ்ஸாதி ஏவம் உபஸம்பாதே³ந்தஸ்ஸேவ ஆபத்தி ஹோதி, கம்மம் பன ந குப்பதி, அசீவரகாதி³வத்தூ²ஸுபி ஏஸேவ நயோ.

யாசிதகேனாதி ‘‘யாவ உபஸம்பத³ம் கரோம, தாவ தே³தா²’’தி யாசித்வா க³ஹிதேன, தாவகாலிகேனாதி அத்தோ². ஈதி³ஸேன ஹி பத்தேன வா சீவரேன வா பத்தசீவரேன வா உபஸம்பாதே³ந்தஸ்ஸேவ ஆபத்தி ஹோதி, கம்மம் பன ந குப்பதி, தஸ்மா பரிபுண்ணபத்தசீவரோவ உபஸம்பாதே³தப்³போ³. ஸசே தஸ்ஸ நத்தி², ஆசரியுபஜ்ஜா²யா சஸ்ஸ தா³துகாமா ஹோந்தி, அஞ்ஞே வா பி⁴க்கூ², நிரபேக்கே²ஹி விஸ்ஸஜ்ஜேத்வா அதி⁴ட்டா²னூபக³ம் பத்தசீவரம் தா³தப்³ப³ம்.

கோ³த்தேனபி அனுஸ்ஸாவேதுந்தி ‘‘மஹாகஸ்ஸபஸ்ஸ உபஸம்பதா³பேக்கோ²’’தி ஏவம் கோ³த்தம் வத்வா அனுஸ்ஸாவேதும் அனுஜானாமீதி அத்தோ². த்³வே ஏகானுஸ்ஸாவனேதி த்³வே ஏகதோ அனுஸ்ஸாவனே, ஏகேன ஏகஸ்ஸ, அஞ்ஞேன இதரஸ்ஸாதி ஏவம் த்³வீஹி வா ஆசரியேஹி ஏகேன வா ஏகக்க²ணே கம்மவாசம் அனுஸ்ஸாவேந்தேஹி உபஸம்பாதே³தும் அனுஜானாமீதி அத்தோ². த்³வே தயோ ஏகானுஸ்ஸாவனே காதும், தஞ்ச கோ² ஏகேன உபஜ்ஜா²யேனாதி த்³வே வா தயோ வா ஜனே புரிமனயேனேவ ஏகதோ அனுஸ்ஸாவனே காதும் அனுஜானாமி, தஞ்ச கோ² அனுஸ்ஸாவனகிரியம் ஏகேன உபஜ்ஜா²யேன அனுஜானாமீதி அத்தோ². தஸ்மா ஏகேன ஆசரியேன த்³வே வா தயோ வா அனுஸ்ஸாவேதப்³பா³. த்³வீஹி வா தீஹி வா ஆசரியேஹி விஸும் விஸும் ஏகேன ஏகஸ்ஸாதி ஏவம் ஏகப்பஹாரேனேவ த்³வே திஸ்ஸோ வா கம்மவாசா காதப்³பா³. ஸசே பன நானாசரியா நானுபஜ்ஜா²யா ஹோந்தி, திஸ்ஸத்தே²ரோ ஸுமனத்தே²ரஸ்ஸ ஸத்³தி⁴விஹாரிகம், ஸுமனத்தே²ரோ திஸ்ஸத்தே²ரஸ்ஸ ஸத்³தி⁴விஹாரிகம் அனுஸ்ஸாவேதி, அஞ்ஞமஞ்ஞஞ்ச க³ணபூரகா ஹோந்தி, வட்டதி. ஸசே நானுபஜ்ஜா²யா ஹோந்தி, ஏகோ ஆசரியோ ஹோதி, ‘‘ந த்வேவ நானுபஜ்ஜா²யேனா’’தி படிக்கி²த்தத்தா ந வட்டதி. இத³ம் ஸந்தா⁴ய ஹி ஏஸ படிக்கே²போ.

பட²மம் உபஜ்ஜ²ம் கா³ஹாபேதப்³போ³தி ஏத்த² வஜ்ஜாவஜ்ஜம் உபனிஜ்ஜா²யதீதி உபஜ்ஜா², தம் உபஜ்ஜ²ம் ‘‘உபஜ்ஜா²யோ மே, ப⁴ந்தே, ஹோஹீ’’தி ஏவம் வதா³பேத்வா கா³ஹாபேதப்³போ³. வித்தா²யந்தீதி வித்த²த்³த⁴க³த்தா ஹோந்தி. யம் ஜாதந்தி யம் தவ ஸரீரே ஜாதம் நிப்³ப³த்தம் விஜ்ஜமானம், தம் ஸங்க⁴மஜ்ஜே² புச்ச²ந்தே ஸந்தம் அத்தீ²தி வத்தப்³ப³ந்திஆதி³. உல்லும்பது மந்தி உத்³த⁴ரது மம்.

தாவதே³வாதி உபஸம்பன்னஸமனந்தரமேவ. சா²யா மேதப்³பா³தி ஏகபோரிஸா வா த்³விபோரிஸா வாதி சா²யா மேதப்³பா³. உதுப்பமாணம் ஆசிக்கி²தப்³ப³ந்தி ‘‘வஸ்ஸானோ ஹேமந்தோ கி³ம்ஹோ’’தி உதுப்பமாணம் ஆசிக்கி²தப்³ப³ம். ஏத்த² ச உதுயேவ உதுப்பமாணம். ஸசே வஸ்ஸானாத³யோ அபரிபுண்ணா ஹோந்தி, யத்தகேஹி தி³வஸேஹி யஸ்ஸ யோ உது அபரிபுண்ணோ, தே தி³வஸே ஸல்லக்கே²த்வா ஸோ தி³வஸபா⁴கோ³ ஆசிக்கி²தப்³போ³. அத² வா ‘‘அயம் நாம உது, ஸோ ச கோ² பரிபுண்ணோ அபரிபுண்ணோ வா’’தி ஏவம் உதுப்பமாணம் ஆசிக்கி²தப்³ப³ம், ‘‘புப்³ப³ண்ஹோ வா ஸாயன்ஹோ வா’’தி ஏவம் தி³வஸபா⁴கோ³ ஆசிக்கி²தப்³போ³. ஸங்கீ³தீதி இத³மேவ ஸப்³ப³ம் ஏகதோ கத்வா ‘‘த்வம் கிம் லப⁴ஸி, கா தே சா²யா, கிம் உதுப்பமாணம், கோ தி³வஸபா⁴கோ³’’தி புட்டோ² ‘‘இத³ம் நாம லபா⁴மி வஸ்ஸம் வா ஹேமந்தம் வா கி³ம்ஹம் வா, அயம் மே சா²யா, இத³ம் உதுப்பமாணம், அயம் தி³வஸபா⁴கோ³தி வதே³ய்யாஸீ’’தி ஏவம் ஆசிக்கி²தப்³ப³ம்.

ஓஹாயாதி ச²ட்³டே³த்வா. து³தியம் தா³துந்தி உபஸம்பத³மாளகதோ பரிவேணம் க³ச்ச²ந்தஸ்ஸ து³தியகம் தா³தும் அனுஜானாமி, சத்தாரி ச அகரணீயானி ஆசிக்கி²துந்தி அத்தோ². பண்டு³பலாஸோதி பண்டு³வண்ணோ பத்தோ. ப³ந்த⁴னா பவுத்தோதி வண்டதோ பதிதோ. அப⁴ப்³போ³ ஹரிதத்தா²யாதி புன ஹரிதோ ப⁴விதும் அப⁴ப்³போ³. புது²ஸிலாதி மஹாஸிலா. அயம் ஸமந்தபாஸாதி³கதோ நீஹரித்வா ஆப⁴தோ உபஸம்பதா³வினிச்ச²யோ.

அனுபஜ்ஜா²யாதி³வத்தூ²ஸு ஸிக்கா²பத³ம் அபஞ்ஞத்தந்தி ‘‘ந அனுபஜ்ஜா²யகோ உபஸம்பாதே³தப்³போ³’’தி (மஹாவ. 117) இதே⁴வ பஞ்ஞாபியமானம் ஸிக்கா²பத³ம் ஸந்தா⁴ய வுத்தம். கம்மம் பன ந குப்பதீதி இத³ம் உபஜ்ஜா²யாபா⁴வேபி ‘‘இத்த²ன்னாமஸ்ஸ உபஸம்பதா³பேக்கா² இத்த²ன்னாமேன உபஜ்ஜா²யேனா’’தி மதஸ்ஸ வா விப்³ப⁴ந்தஸ்ஸ வா புராணஉபஜ்ஜா²யஸ்ஸ, அஞ்ஞஸ்ஸ வா யஸ்ஸ கஸ்ஸசி அவிஜ்ஜமானஸ்ஸபி நாமேன ஸப்³ப³த்த² உபஜ்ஜா²யகித்தனஸ்ஸ கதத்தா வுத்தம். யதி³ ஹி உபஜ்ஜா²யகித்தனம் ந கரேய்ய, ‘‘புக்³க³லம் ந பராமஸதீ’’தி வுத்தகம்மவிபத்தி ஏவ ஸியா. தேனேவ பாளியம் (மஹாவ. 117) ‘‘அனுபஜ்ஜா²யக’’ந்தி வுத்தம், அட்ட²கதா²யம்பி (மஹாவ. அட்ட². 117) அஸ்ஸ ‘‘உபஜ்ஜா²யம் அகித்தேத்வா’’தி அவத்வா ‘‘உபஜ்ஜா²யம் அகா³ஹாபேத்வா ஸப்³பே³ன ஸப்³ப³ம் உபஜ்ஜா²யவிரஹிதம்’’ இச்சேவ அத்தோ² வுத்தோ. பாளியம் ஸங்கே⁴ன உபஜ்ஜா²யேனாதி ‘‘அயம் இத்த²ன்னாமோ ஸங்க⁴ஸ்ஸ உபஸம்பதா³பேக்கோ², இத்த²ன்னாமோ ஸங்க⁴ம் உபஸம்பத³ம் யாசதி ஸங்கே⁴ன உபஜ்ஜா²யேனா’’தி ஏவம் கம்மவாசாய ஸங்க⁴மேவ உபஜ்ஜா²யம் கித்தேத்வாதி அத்தோ². ஏவம் க³ணேன உபஜ்ஜா²யேனாதி ஏத்தா²பி ‘‘அயம் இத்த²ன்னாமோ க³ணஸ்ஸ உபஸம்பதா³பேக்கோ²’’திஆதி³னா யோஜனா வேதி³தப்³பா³. ஏவம் வுத்தேபி கம்மம் ந குப்பதி ஏவ து³க்கடஸ்ஸேவ வுத்தத்தா, அஞ்ஞதா² ‘‘ஸோ ச புக்³க³லோ அனுபஸம்பன்னோ’’தி வதே³ய்ய. தேனாஹ ‘‘ஸங்கே⁴னா’’திஆதி³. தத்த² பண்ட³காதி³உபஜ்ஜா²யேஹி கரியமானேஸு கம்மேஸு பண்ட³காதி³கே வினாவ யதி³ பஞ்சவக்³கா³தி³க³ணோ பூரதி, கம்மம் ந குப்பதி, இதரதா² குப்பதீதி வேதி³தப்³ப³ம்.

அபத்தசீவரவத்தூ²ஸுபி பத்தசீவரானம் அபா⁴வேபி ‘‘பரிபுண்ணஸ்ஸ பத்தசீவர’’ந்தி கம்மவாசாய ஸாவிதத்தா கம்மகோபம் அவத்வா து³க்கடமேவ வுத்தம். இதரதா² ஸாவனாய ஹாபனதோ கம்மகோபோ ஏவ ஸியா. கேசி பன ‘‘பட²மம் அனுஞ்ஞாதகம்மவாசாயம் உபஸம்பன்னா விய இதா³னிபி ‘பரிபுண்ணஸ்ஸ பத்தசீவர’ந்தி அவத்வா கம்மவாசாய உபஸம்பன்னாபி ஸூபஸம்பன்னா ஏவா’’தி வத³ந்தி, தம் ந யுத்தம். அனுஞ்ஞாதகாலதோ பட்டா²ய ஹி அபராமஸனம் ஸாவனாய ஹாபனவிபத்தி ஏவ ஹோதி ‘‘இத்த²ன்னாமோ ஸங்க⁴ம் உபஸம்பத³ம் யாசதீ’’தி பத³ஸ்ஸ ஹாபனே விய. தம்பி ஹி பச்சா² அனுஞ்ஞாதம், ‘‘ஸங்க⁴ம், ப⁴ந்தே, உபஸம்பத³ம் யாசாமீ’’திஆதி³வாக்யேன அயாசேத்வா தம்பி உபஸம்பாதே³ந்தோ ‘‘அயம் இத்த²ன்னாமோ ஸங்க⁴ம் உபஸம்பத³ம் யாசதீ’’தி வத்வாவ யதி³ கம்மவாசம் கரோதி, கம்மம் ஸுகதமேவ ஹோதி. நோ சே, விபன்னம். ஸப்³ப³பச்சா² ஹி அனுஞ்ஞாதகம்மவாசதோ கிஞ்சிபி பரிஹாபேதும் ந வட்டதி, ஸாவனாய ஹாபனமேவ ஹோதி, அஞ்ஞே வா பி⁴க்கூ² தா³துகாமா ஹோந்தீதி ஸம்ப³ந்தோ⁴, அயமேத்த² விமதிவினோத³னியா (வி. வி. டீ. மஹாவக்³க³ 2.117) ஆப⁴தோ வினிச்ச²யோ. ஸாரத்த²தீ³பனீவினிச்ச²யோ பன இதே⁴வ அந்தோக³தா⁴ ஹோதி அப்பதரத்தா அவிஸேஸத்தா ச.

வஜிரபு³த்³தி⁴டீகாயம் (வஜிர. டீ. மஹாவக்³க³ 117) பன ‘‘கேசி குப்பதீதி வத³ந்தி, தம் ந க³ஹேதப்³ப³’’ந்தி யம் வுத்தம், தம் ‘‘பஞ்சவக்³க³கரணீயஞ்சே, பி⁴க்க²வே, கம்மம், பி⁴க்கு²னிபஞ்சமோ கம்மம் கரேய்ய, அகம்மம் ந ச கரணீய’’ந்திஆதி³னா (மஹாவ. 390) நயேன வுத்தத்தா பண்ட³கானம் க³ணபூரணபா⁴வே ஏவ கம்மம் குப்பதி, ந ஸப்³ப³ந்தி கத்வா ஸுவுத்தம், இதரதா² ‘‘பண்ட³குபஜ்ஜா²யேன கம்மம் கரேய்ய, அகம்மம் ந ச கரணீய’’ந்திஆதி³காய பாளியா ப⁴விதப்³ப³ம் ஸியா. யதா² அபரிபுண்ணபத்தசீவரஸ்ஸ உபஸம்பாத³னகாலே கம்மவாசாயம் ‘‘பரிபுண்ணஸ்ஸ பத்தசீவர’’ந்தி அஸந்தம் வத்து²ம் கித்தேத்வா உபஸம்பதா³ய கதாய தஸ்மிம் அஸந்தேபி உபஸம்பதா³ ருஹதி, ஏவம் ‘‘அயம் பு³த்³த⁴ரக்கி²தோ ஆயஸ்மதோ த⁴ம்மரக்கி²தஸ்ஸ உபஸம்பதா³பேக்கோ²’’தி அவத்து²ம் பண்ட³குபஜ்ஜா²யாதி³ம், அஸந்தம் வா வத்து²ம் கித்தேத்வா கதாயபி க³ணபூரகானமத்தி²தாய உபஸம்பதா³ ருஹதேவ. ‘‘ந, பி⁴க்க²வே, பண்ட³குபஜ்ஜா²யேன உபஸம்பாதே³தப்³போ³, யோ உபஸம்பாதே³ய்ய, ஆபத்தி து³க்கடஸ்ஸ, ஸோ ச புக்³க³லோ அனுபஸம்பன்னோ’’திஆதி³வசனஸ்ஸ அபா⁴வா அயமத்தோ² ஸித்³தோ⁴வ ஹோதி. ந ஹி பு³த்³தா⁴ வத்தப்³ப³யுத்தம் ந வத³ந்தி. தேன வுத்தம் ‘‘யோ பன பி⁴க்கு² ஜானம் ஊனவீஸதிவஸ்ஸம் …பே… ஸோ ச புக்³க³லோ அனுபஸம்பன்னோ’’திஆதி³ (பாசி. 403). ததா² ‘‘ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³’’தி (மஹாவ. 71) வசனதோ தே²ய்யஸம்வாஸகாதி³ஆசரியேஹி அனுஸ்ஸாவனாய கதாய உபஸம்பதா³ ந ருஹதி தேஸம் அபி⁴க்கு²த்தாதி வசனம்பி ந க³ஹேதப்³ப³ம்.

கிஞ்ச பி⁴ய்யோ – ‘‘இமானி சத்தாரி கம்மானி பஞ்சஹாகாரேஹி விபஜ்ஜந்தீ’’திஆதி³னா (பரி. 482) நயேன கம்மானம் ஸம்பத்திவிபத்தியா கதி²யமானாய ‘‘ஸத்தஹி ஆகாரேஹி கம்மானி விபஜ்ஜந்தி வத்து²தோ வா ஞத்திதோ வா அனுஸ்ஸாவனதோ வா ஸீமதோ வா பரிஸதோ வா உபஜ்ஜா²யதோ வா ஆசரியதோ வா’’தி அகதி²தத்தா ந க³ஹேதப்³ப³ம். ‘‘பரிஸதோ வா’’தி வசனேன ஆசரியுபஜ்ஜா²யானம் வா ஸங்க³ஹோ கதோதி சே? ந, ‘‘த்³வாத³ஸஹி ஆகாரேஹி பரிஸதோ கம்மானி விபஜ்ஜந்தீ’’தி ஏதஸ்ஸ விப⁴ங்கே³ தேஸமனாமட்ட²த்தா, அயமத்தோ² யஸ்மா தத்த² தத்த² ஸரூபேன வுத்தபாளிவஸேனேவ ஸக்கா ஜானிதும், தஸ்மா நயமுக²ம் த³ஸ்ஸேத்வா ஸம்கி²த்தோதி அயமஸ்ஸ யுத்திக³வேஸனாதி வுத்தம்.

தத்ரித³ம் விசாரேதப்³ப³ம் – அனுபஜ்ஜா²யகம் உபஸம்பாதே³ந்தா தே பி⁴க்கூ² யதா²வுத்தனயேன அபூ⁴தம் வத்து²ம் கித்தயிம்ஸு, உதா³ஹு முஸாவாத³ப⁴யா தானேவ பதா³னி ந ஸாவேஸுந்தி. கிஞ்சேத்த² – யதி³ தாவ உபஜ்ஜா²யாபா⁴வதோ ந ஸாவேஸும், ‘‘புக்³க³லம் ந பராமஸதீ’’தி வுத்தவிபத்திப்பஸங்கோ³ ஹோதி, அத² ஸாவேஸும், முஸாவாதோ³ நேஸம் ப⁴வதீதி? வுச்சதே – ஸாவேஸும்யேவ யதா²வுத்தவிபத்திப்பஸங்க³ப⁴யா, ‘‘கம்மம் பன ந குப்பதீ’’தி அட்ட²கதா²யம் வுத்தத்தா ச. ந, முஸாவாத³ஸ்ஸ அஸம்ப⁴வதோ, முஸாவாதே³னபி கம்மஸம்ப⁴வதோ ச. ந ஹி ஸக்கா முஸாவாதே³ன கம்மவிபத்திஸம்பத்திம் காதுந்தி. தஸ்மா ‘‘அனுபஜ்ஜா²யகம் உபஸம்பாதே³ந்தீ’’தி வசனஸ்ஸ ச உப⁴யதோ³ஸவினிமுத்தோ அத்தோ² பரியேஸிதப்³போ³.

அயஞ்சேத்த² யுத்தி – யதா² புப்³பே³ பப்³ப³ஜ்ஜுபஸம்பது³பஜ்ஜா²யேஸு விஜ்ஜமானேஸுபி உபஜ்ஜா²யக்³க³ஹணக்கமேன அக்³க³ஹிதத்தா ‘‘தேன கோ² பன ஸமயேன பி⁴க்கூ² அனுபஜ்ஜா²யக’’ந்திஆதி³ வுத்தம், ததா² இதா⁴பி உபஜ்ஜா²யஸ்ஸ விஜ்ஜமானஸ்ஸேவ ஸதோ அக்³க³ஹிதத்தா ‘‘அனுபஜ்ஜா²யகம் உபஸம்பாதே³ந்தீ’’தி வுத்தம். கம்மவாசாசரியேன பன ‘‘க³ஹிதோ தேன உபஜ்ஜா²யோ’’தி ஸஞ்ஞாய உபஜ்ஜா²யம் கித்தேத்வா கம்மவாசம் ஸாவேதப்³ப³ம். கேனசி வா காரணேன காயஸாமக்³கி³ம் அதே³ந்தஸ்ஸ உபஜ்ஜா²யஸ்ஸ ச²ந்த³ம் க³ஹேத்வா கம்மவாசம் ஸாவேதி, உபஜ்ஜா²யோ வா உபஸம்பதா³பேக்க²ஸ்ஸ உபஜ்ஜ²ம் த³த்வா பச்சா² உபஸம்பன்னே தஸ்மிம் தாதி³ஸே வத்து²ஸ்மிம் ஸமனுயுஞ்ஜியமானோ வா அஸமனுயுஞ்ஜியமானோ வா உபஜ்ஜா²யதா³னதோ புப்³பே³ ஏவ ஸாமணேரோ படிஜானாதி, ஸிக்கா²பச்சக்கா²தகோ வா அந்திமவத்து²அஜ்ஜா²பன்னகோ வா படிஜானாதி, ச²ந்த³ஹாரகாத³யோ விய உபஜ்ஜா²யோ வா அஞ்ஞஸீமாக³தோ ஹோதி. கம்மவாசா ருஹதீதி வத்வா ‘‘அனுஜானாமி பி⁴க்க²வே பச்சந்திமேஸு ஜனபதே³ஸு வினயத⁴ரபஞ்சமேன க³ணேன உபஸம்பத³’’ந்தி வுத்தத்தா. கேசி ‘‘வினயத⁴ரபஞ்சமேன உபஜ்ஜா²யேன ஸன்னிஹிதேனேவ ப⁴விதப்³ப³’’ந்தி வத³ந்தீதி போராணக³ண்டி²பதே³ வுத்தம். ஸோ ச பாடோ² அப்பமாணோ மஜ்ஜி²மேஸு ஜனபதே³ஸு தஸ்ஸ வசனஸ்ஸாபா⁴வதோ. அஸன்னிஹிதேபி உபஜ்ஜா²யே கம்மவாசா ருஹதீதி ஆபஜ்ஜதீதி சே? ந. கஸ்மா? கம்மஸம்பத்தியம் ‘‘புக்³க³லம் பராமஸதீ’’தி வுத்தபாடோ²வ நோ பமாணம். ந ஹி தத்த² அஸன்னிஹிதோ உபஜ்ஜா²யஸங்கா²தோ புக்³க³லோ பராமஸனம் அரஹதி, தஸ்மா தத்த² ஸங்க⁴பராமஸனம் விய புக்³க³லபராமஸனம் வேதி³தப்³ப³ம். ஸங்கே⁴ன க³ணேன உபஜ்ஜா²யேன உபஸம்பாதே³ந்தி தேஸம் அத்த²தோ புக்³க³லத்தா, பண்ட³காதி³உபஜ்ஜா²யேன உபஸம்பாதே³ந்தி உபஸம்பாத³னகாலே அவிதி³தத்தாதி போராணா.

அபத்தசீவரம் உபஸம்பாதே³ந்தீதி கம்மவாசாசரியோ ‘‘பரிபுண்ணஸ்ஸ பத்தசீவர’’ந்தி ஸஞ்ஞாய, கேவலம் அத்த²ஸம்பத்திம் அனபேக்கி²த்வா ஸந்தபத³னீஹாரேன வா ‘‘பரிபுண்ணஸ்ஸ பத்தசீவர’’ந்தி கம்மவாசம் ஸாவேதி. யதா² ஏதரஹி மதவிப்பவுத்தமாதாபிதிகோபி ‘‘அனுஞ்ஞாதோஸி மாதாபிதூஹீ’’தி புட்டோ² ‘‘ஆம ப⁴ந்தே’’தி வத³தி, கிம் ப³ஹுனா? அயம் பனேத்த² ஸாரோ – ‘‘தஸ்மிம் ஸமயே சத்தாரி கம்மானி பஞ்சஹாகாரேஹி விபஜ்ஜந்தீ’’தி லக்க²ணஸ்ஸ ந தாவ பஞ்ஞத்தத்தா அனுபஜ்ஜா²யகாதி³ம் உபஸம்பாதே³ந்தி. வஜ்ஜனீயபுக்³க³லானம் அவுத்தத்தா பண்ட³குபஜ்ஜா²யாதி³ம் உபஸம்பாதே³ந்தி, தேரஸந்தராயபுச்சா²ய அத³ஸ்ஸனத்தா அபத்தசீவரகம் உபஸம்பாதே³ந்தி, ‘‘அனுஜானாமி பி⁴க்க²வே ஞத்திசதுத்தே²ன கம்மேன உபஸம்பாதே³து’’ந்தி (மஹாவ. 69) ஏவம் ஸப்³ப³பட²மம் அனுஞ்ஞாதாய கம்மவாசாய ‘‘பரிபுண்ணஸ்ஸ பத்தசீவர’’ந்தி அவசனமேத்த² ஸாத⁴கந்தி வேதி³தப்³ப³ம். தஞ்ஹி வசனம் அனுக்கமேனானுஞ்ஞாதந்தி.

இத³ம் தாவ ஸப்³ப³தா² ஹோது, ‘‘மூக³ம் பப்³பா³ஜேந்தி ப³தி⁴ரம் பப்³பா³ஜேந்தீ’’தி இத³ம் கத²ம் ஸம்ப⁴விதுமரஹதி ஆதி³தோ பட்டா²ய ‘‘அனுஜானாமி பி⁴க்க²வே இமேஹி தீஹி ஸரணக³மனேஹி பப்³ப³ஜ்ஜ’’ந்திஆதி³னா அனுஞ்ஞாதத்தாதி? வுச்சதே – ‘‘ஏவஞ்ச பன, பி⁴க்க²வே, பப்³பா³ஜேதப்³போ³தி, ஏவம் வதே³ஹீதி வத்தப்³போ³…பே… ததியம்பி ஸங்க⁴ம் ஸரணம் க³ச்சா²மீ’’தி ஏத்த² ‘‘ஏவம் வதே³ஹீதி வத்தப்³போ³’’தி இமஸ்ஸ வசனஸ்ஸ மிச்சா² அத்த²ம் க³ஹேத்வா மூக³ம் பப்³பா³ஜேஸும். ‘‘ஏவம் வதே³ஹீ’’தி தம் பப்³ப³ஜ்ஜாபேக்க²ம் ஆணாபேத்வா ஸயம் உபஜ்ஜா²யேன வத்தப்³போ³ ‘‘ததியம்பி ஸங்க⁴ம் ஸரணம் க³ச்சா²மீ’’தி, ஸோ பப்³ப³ஜ்ஜாபேக்கா² ததா² ஆணத்தோ உபஜ்ஜா²யவசனஸ்ஸ அனு அனு வத³து வா மா வா, தத்த² தத்த² ப⁴க³வா ‘‘காயேன விஞ்ஞாபேதி, வாசாய விஞ்ஞாபேதி, காயேன வாசாய விஞ்ஞாபேதி, க³ஹிதோ ஹோதி உபஜ்ஜா²யோ. தி³ன்னோ ஹோதி ச²ந்தோ³, தி³ன்னா ஹோதி பாரிஸுத்³தி⁴, தி³ன்னா ஹோதி பவாரணா’’தி வத³தி. தத³னுமானேன வா காயேன தேன பப்³ப³ஜ்ஜாபேக்கே²ன விஞ்ஞத்தம் ஹோதி ஸரணக³மனந்தி வா லோகேபி காயேன விஞ்ஞாபேந்தோ ஏவம் வத³தீதி வுச்சதி, தம் பரியாயம் க³ஹேத்வா மூக³ம் பப்³பா³ஜேந்தீதி வேதி³தப்³ப³ம். போராணக³ண்டி²பதே³ ‘‘மூக³ம் கத²ம் பப்³பா³ஜேந்தீதி புச்ச²ம் கத்வா தஸ்ஸ காயபஸாத³ஸம்ப⁴வதோ காயேன பஹாரம் த³த்வா ஹத்த²முத்³தா³ய விஞ்ஞாபேத்வா பப்³பா³ஜேஸு’’ந்தி வுத்தம். கிம் ப³ஹுனா?

அயம் பனேத்த² ஸாரோ – யதா² புப்³பே³ பப்³ப³ஜ்ஜாதி⁴காரே வத்தமானே பப்³ப³ஜ்ஜாபி⁴லாபம் உபச்சி²ந்தி³த்வா ‘‘பண்ட³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³’’திஆதி³னா (மஹாவ. 109) நயேன உபஸம்பத³வஸேனேவ அபி⁴லாபோ கதோ. தே²ய்யஸம்வாஸகபதே³ அஸம்ப⁴வதோ கிஞ்சாபி ஸோ ந கதோ, பப்³ப³ஜ்ஜாவ தத்த² கதா, ஸப்³ப³த்த² பன உபஸம்பதா³பி⁴லாபேன அதி⁴ப்பேதா தத³னுபா⁴வதோ உபஸம்பதா³ய, பப்³ப³ஜ்ஜாய வாரிதாய உபஸம்பதா³ வாரிதா ஹோதீதி கத்வா, ததா² இத⁴ உபஸம்பதா³தி⁴காரே வத்தமானே உபஸம்பதா³பி⁴லாபம் உபச்சி²ந்தி³த்வா உபஸம்பத³மேவ ஸந்தா⁴ய பப்³ப³ஜ்ஜாபி⁴லாபோ கதோதி வேதி³தப்³போ³. காமம் ஸோ ந கத்தப்³போ³, மூக³பதே³ அஸம்ப⁴வதோ தஸ்ஸ வஸேன ஆதி³தோ பட்டா²ய உபஸம்பதா³பி⁴லாபோவ கத்தப்³போ³ விய தி³ஸ்ஸதி, ததா²பி தஸ்ஸேவ மூக³பத³ஸ்ஸ வஸேன ஆதி³தோ பட்டா²ய பப்³ப³ஜ்ஜாபி⁴லாபோவ கதோ மிச்சா²க³ஹணனிவாரணத்த²ம். கத²ம்? ‘‘மூகோ³, பி⁴க்க²வே, அபத்தோ ஓஸாரணம், தஞ்சே ஸங்கோ⁴ ஓஸாரேதி, ஸோஸாரிதோ’’தி (மஹாவ. 396) வசனதோ ஹி மூகோ³ உபஸம்பன்னோ ஹோதீதி ஸித்³த⁴ம், ஸோ கேவலம் உபஸம்பன்னோவ ஹோதி, ந பன பப்³ப³ஜிதோ தஸ்ஸ பப்³ப³ஜ்ஜாய அஸம்ப⁴வதோதி மிச்சா²கா³ஹோ ஹோதி, தம் பரிவஜ்ஜாபேத்வா யோ உபஸம்பன்னோ, ஸோ பப்³ப³ஜிதோவ ஹோதி. பப்³ப³ஜிதோ பன அத்தி² கோசி உபஸம்பன்னோ, அத்தி² கோசி அனுபஸம்பன்னோதி இமம் ஸம்மாகா³ஹம் உப்பாதே³தி ப⁴க³வாதி வேதி³தப்³ப³ம்.

அபிச தேஸம் ஹத்த²ச்சி²ன்னாதீ³னம் பப்³ப³ஜிதானம் ஸுபப்³ப³ஜிதபா⁴வதீ³பனத்த²ம், பப்³ப³ஜ்ஜாபா⁴வஸங்கானிவாரணத்த²ஞ்சேத்த² பப்³ப³ஜ்ஜாபி⁴லாபோ கதோ. கத²ம்? ‘‘ந, பி⁴க்க²வே, ஹத்த²ச்சி²ன்னோ பப்³பா³ஜேதப்³போ³’’திஆதி³னா (மஹாவ. 119) படிக்கே²பேன, ‘‘பப்³ப³ஜிதா ஸுபப்³ப³ஜிதா’’தி வுத்தட்டா²னாபா⁴வேன ச தேஸம் பப்³ப³ஜ்ஜாபா⁴வஸங்கா ப⁴வேய்ய, யதா² பஸங்கா ப⁴வே, ததா² பஸங்கம் ட²பேய்ய. க²ந்த⁴கே உபஸம்பத³ம் ஸந்தா⁴ய ‘‘ஹத்த²ச்சி²ன்னோ, பி⁴க்க²வே, அபத்தோ ஓஸாரணம், தஞ்சே ஸங்கோ⁴ ஓஸாரேதி, ஸோஸாரிதோ’’திஆதி³னா (மஹாவ. 396) நயேன ப⁴க³வா நிவாரேதி. தேனேவ நயேன பப்³ப³ஜிதா பனேதே ஸப்³பே³பி ஸுபப்³ப³ஜிதா ஏவாதி தீ³பேதி. அஞ்ஞதா² ஸப்³பே³பேதே உபஸம்பன்னாவ ஹோந்தி, ந பப்³ப³ஜிதாதி அயமனிட்ட²ப்பஸங்கோ³ ஆபஜ்ஜதி. கத²ம்? ‘‘ஹத்த²ச்சி²ன்னோ, பி⁴க்க²வே, ந பப்³பா³ஜேதப்³போ³, பப்³ப³ஜிதோ நாஸேதப்³போ³’’தி வா ‘‘ந, பி⁴க்க²வே, ஹத்த²ச்சி²ன்னோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸ, ஸோ ச அபப்³ப³ஜிதோ’’தி (மஹாவ. 119) வா தந்தியா ட²பிதாய சம்பேய்யக்க²ந்த⁴கே ‘‘ஸோஸாரிதோ’’தி வுத்தத்தா கேவலம் ‘‘இமே ஹத்த²ச்சி²ன்னாத³யோ உபஸம்பன்னாவ ஹோந்தி, ந பப்³ப³ஜிதா’’தி வா ‘‘உபஸம்பன்னாபி சே பப்³ப³ஜிதா, நாஸேதப்³பா³’’தி வா அனிட்ட²கோட்டா²ஸோ ஆபஜ்ஜதீதி அதி⁴ப்பாயோ.

இத³ம் பனேத்த² விசாரேதப்³ப³ம் – ‘‘ஸோ ச அபப்³ப³ஜிதோ’’தி வசனாபா⁴வதோ மூக³ஸ்ஸ பப்³ப³ஜ்ஜாஸித்³தி⁴பஸங்க³தோ பப்³ப³ஜ்ஜாபி ஏகதோஸுத்³தி⁴யா ஹோதீதி அயமனிட்ட²கோட்டா²ஸோ கத²ம் நாபஜ்ஜதீதி? பப்³ப³ஜ்ஜாபி⁴லாபேன உபஸம்பதா³ இதா⁴தி⁴ப்பேதாதி ஸம்மாகா³ஹேன நாபஜ்ஜதீதி, அஞ்ஞதா² யதா²ப்³யஞ்ஜனம் அத்தே² க³ஹிதே யதா²பஞ்ஞத்தது³க்கடாபா⁴வஸங்கா²தோ அபரோ அனிட்ட²கோட்டா²ஸோ ஆபஜ்ஜதி. கத²ம்? ‘‘ந, பி⁴க்க²வே, மூகோ³ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’தி வுத்தது³க்கடம் பப்³ப³ஜ்ஜாபரியோஸானே ஹோதி, ந தஸ்ஸாவிப்பகதாய. புப்³ப³பயோக³து³க்கடமேவ ஹி பட²மம் ஆபஜ்ஜதி, தஸ்மா மூக³ஸ்ஸ பப்³ப³ஜ்ஜாபரியோஸானஸ்ஸேவ அபா⁴வதோ இமஸ்ஸ து³க்கடஸ்ஸ ஓகாஸோ ச ந ஸப்³ப³காலம் ஸம்ப⁴வேய்ய, உபஸம்பதா³வஸேன பன அத்தே² க³ஹிதே ஸம்ப⁴வதி கம்மனிப்³ப³த்திதோ. தேனேவ பாளியம் ‘‘ந, பி⁴க்க²வே, பண்ட³கோ உபஸம்பாதே³தப்³போ³, யோ உபஸம்பாதே³ய்ய, ஆபத்தி து³க்கடஸ்ஸா’’தி து³க்கடம் ந பஞ்ஞத்தம். அபஞ்ஞத்தத்தா புப்³ப³பயோக³து³க்கடமேவ சேத்த² ஸம்ப⁴வதி, நேதரம். ஏத்தாவதா ஸித்³த⁴மேதம் பப்³ப³ஜ்ஜாபி⁴லாபேன உபஸம்பதா³வ தத்த² அதி⁴ப்பேதா, ந பப்³ப³ஜ்ஜாதி. ஏத்தா²ஹ ஸாமணேரபப்³ப³ஜ்ஜா ந காயபயோக³தோ ஹோதீதி கத²ம் பஞ்ஞாயதீதி? வுச்சதே – காயேன விஞ்ஞாபேதீதிஆதி³த்திகா த³ஸ்ஸனதோதி ஆக³தோ.

‘‘கோ³த்தேனபி அனுஸ்ஸாவேது’’ந்தி (மஹாவ. 122) வசனதோ யேன வோஹாரேன வோஹரதி, தேன வட்டதீதி ஸித்³த⁴ம், தஸ்மா ‘‘கோ நாமோ தே உபஜ்ஜா²யோ’’தி புட்டே²னபி கோ³த்தமேவ நாமம் கத்வா வத்தப்³ப³ந்தி ஸித்³த⁴ம் ஹோதி, தஸ்மா சதுப்³பி³தே⁴ஸு நாமேஸு யேன கேனசி நாமேன அனுஸ்ஸாவனா காதப்³பா³தி வத³ந்தி. ஏகஸ்ஸ ப³ஹூனி நாமானி ஹோந்தி, தத்த² ஏகம் நாமம் ஞத்தியா, ஏகம் அனுஸ்ஸாவனாய காதும் ந வட்டதி, அத்த²தோ ப்³யஞ்ஜனதோ ச அபி⁴ன்னாஹி அனுஸ்ஸாவனாஹி ப⁴விதப்³ப³ந்தி. கிஞ்சாபி ‘‘இத்த²ன்னாமோ இத்த²ன்னாமஸ்ஸ ஆயஸ்மதோ’’தி பாளியம் ‘‘ஆயஸ்மதோ’’தி பத³ம் பச்சா² வுத்தம், கம்மவாசாபாளியம் பன ‘‘அயம் பு³த்³த⁴ரக்கி²தோ ஆயஸ்மதோ த⁴ம்மரக்கி²தஸ்ஸா’’தி பட²மம் லிக²ந்தி, தம் உப்படிபாடியா வுத்தந்தி ந பச்சேதப்³ப³ம். பாளியஞ்ஹி ‘‘இத்த²ன்னாமோ இத்த²ன்னாமஸ்ஸா’’தி அத்த²மத்தம் த³ஸ்ஸிதம், தஸ்மா பாளியம் அவுத்தோபி ‘‘அயம் பு³த்³த⁴ரக்கி²தோ ஆயஸ்மதோ த⁴ம்மரக்கி²தஸ்ஸா’’தி கம்மவாசாபாளியம் பயோகோ³ த³ஸ்ஸிதோ. ‘‘ந மே தி³ட்டோ² இதோ புப்³பே³ இச்சாயஸ்மா ஸாரிபுத்தோ’’தி ச ‘‘ஆயஸ்மா ஸாரிபுத்தோ அத்த²குஸலோ’’தி ச பட²மம் ‘‘ஆயஸ்மா’’தி பயோக³ஸ்ஸ த³ஸ்ஸனதோதி வத³ந்தி. கத்த²சி ‘‘ஆயஸ்மதோ பு³த்³த⁴ரக்கி²தஸ்ஸா’’தி வத்வா கத்த²சி கேவலம் ‘‘பு³த்³த⁴ரக்கி²தஸ்ஸா’’தி ஸாவேதி, ஸாவனம் ஹாபேதீதி ந வுச்சதி நாமஸ்ஸ அஹாபிதத்தாதி ஏகே. ஸசே கத்த²சி ‘‘ஆயஸ்மதோ பு³த்³த⁴ரக்கி²தஸ்ஸா’’தி வத்வா கத்த²சி ‘‘பு³த்³த⁴ரக்கி²தஸ்ஸாயஸ்மதோ’’தி ஸாவேதி, பாடா²னுரூபத்தா கே²த்தமேவ ஓதிண்ணந்திபி ஏகே. ப்³யஞ்ஜனபே⁴த³ப்பஸங்க³தோ அனுஸ்ஸாவனானம் தம் ந வட்டதீதி வத³ந்தி. ஸசே பன ஸப்³ப³ட்டா²னேபி ஏகேனேவ பகாரேன வத³தி, வட்டதி.

ஏகானுஸ்ஸாவனேதி ஏத்த² ஏகதோ அனுஸ்ஸாவனம் ஏதேஸந்தி ஏகானுஸ்ஸாவனாதி அஸமானாதி⁴கரணவிஸயோ பா³ஹிரத்த²ஸமாஸோதி த³ட்ட²ப்³ப³ம். தேனேவாஹ ‘‘த்³வே ஏகதோ அனுஸ்ஸாவனே’’தி. தத்த² ஏகதோதி ஏகக்க²ணேதி அத்தோ², விப⁴த்திஅலோபேன சாயம் நித்³தே³ஸோ. புரிமனயேனேவ ஏகதோ அனுஸ்ஸாவனே காதுந்தி ‘‘ஏகேன ஏகஸ்ஸ, அஞ்ஞேன இதரஸ்ஸா’’திஆதி³னா புப்³பே³ வுத்தனயேன த்³வீஹி வா தீஹி வா ஆசரியேஹி ஏகேன வா ஏகதோ அனுஸ்ஸாவனே காதும். வஜ்ஜாவஜ்ஜம் உபனிஜ்ஜா²யதீதி உபஜ்ஜா²தி இமினா உபஜ்ஜா²யஸத்³த³ஸமானத்தோ² உபஜ்ஜா²ஸத்³தோ³பீதி அத்த²ம் த³ஸ்ஸேதீதி ஸாரத்த²தீ³பனியம் (ஸாரத்த². டீ. மஹாவக்³க³ 3.123).

கோ³த்தேனாபீதி ‘‘ஆயஸ்மதோ பிப்பலிஸ்ஸ உபஸம்பதா³பேக்கோ²’’தி ஏவம் நாமம் அவத்வா கோ³த்தனாமேனபீதி அத்தோ², தேன ‘‘கோ நாமோ தே உபஜ்ஜா²யோ’’தி புட்டே²ன கோ³த்தனாமேன ‘‘ஆயஸ்மா கஸ்ஸபோ’’தி வத்தப்³ப³ந்தி ஸித்³த⁴ம் ஹோதி. தஸ்மா அஞ்ஞம்பி யம் கிஞ்சி தஸ்ஸ நாமம் பஸித்³த⁴ம், தஸ்மிம் வா க²ணே ஸுக²க்³க³ஹணத்த²ம் நாமம் பஞ்ஞாபிதம், தம் ஸப்³ப³ம் க³ஹேத்வாபி அனுஸ்ஸாவனா காதப்³பா³. யதா² உபஜ்ஜா²யஸ்ஸ, ஏவம் உபஸம்பதா³பேக்க²ஸ்ஸாபி கோ³த்தாதி³னாமேன தங்க²ணிகனாமேன ச அனுஸ்ஸாவனம் காதும் வட்டதி, தஸ்மிம்பி க²ணே ‘‘அயம் திஸ்ஸோ’’தி வா ‘‘நாகோ³’’தி வா நாமம் கரோந்தேஹி அனுஸாஸகஸம்முதிதோ பட²மமேவ காதப்³ப³ம். ஏவம் அகத்வாபி அந்தராயிகத⁴ம்மானுஸாஸனபுச்ச²னகாலேஸு ‘‘கின்னாமோஸி, அஹம் ப⁴ந்தே நாகோ³ நாம, கோ நாமோ தே உபஜ்ஜா²யோ, உபஜ்ஜா²யோ மே ப⁴ந்தே திஸ்ஸோ நாமா’’திஆதி³னா விஞ்ஞாபேந்தேன உபி⁴ன்னம்பி சித்தே ‘‘மமேதம் நாம’’ந்தி யதா² ஸஞ்ஞம் உப்பஜ்ஜதி, ஏவம் விஞ்ஞாபேதப்³ப³ம். ஸசே பன தஸ்மிம் க²ணே பகதினாமேன வத்வா பச்சா² ‘‘திஸ்ஸோ நாமா’’தி அபுப்³ப³னாமேன அனுஸ்ஸாவேதி, ந வட்டதி.

தத்த² ச கிஞ்சாபி உபஜ்ஜா²யஸ்ஸேவ நாமம் அக்³க³ஹேத்வா யேன கேனசி நாமேன ‘‘திஸ்ஸஸ்ஸ உபஸம்பதா³பேக்கோ²’’திஆதி³னாபி புக்³க³லே பராமட்டே² கம்மம் ஸுகதமேவ ஹோதி அனுபஜ்ஜா²யகாதீ³னம் உபஸம்பதா³கம்மம் விய உபஜ்ஜா²யஸ்ஸ அபா⁴வேபி அப⁴ப்³ப³த்தேபி கம்மவாசாய புக்³க³லே பராமட்டே² கம்மஸ்ஸ ஸிஜ்ஜ²னதோ. உபஸம்பதா³பேக்க²ஸ்ஸ பன யதா²ஸகம் நாமம் வினா அஞ்ஞேன நாமேன அனுஸ்ஸாவிதே கம்மம் குப்பதி, ஸோ அனுபஸம்பன்னோவ ஹோதி. தத்த² டி²தோ அஞ்ஞோ அனுபஸம்பன்னோ விய க³ஹிதனாமஸ்ஸ வத்து²புக்³க³லஸ்ஸ தத்த² அபா⁴வா, ஏதஸ்ஸ ச நாமஸ்ஸ அனுஸ்ஸாவனாய அவுத்தத்தா. தஸ்மா உபஸம்பதா³பேக்க²ஸ்ஸ பகதினாமம் பரிவத்தேத்வா அபுப்³பே³ன நாகா³தி³னாமேன அனுஸ்ஸாவிதுகாமேன படிகச்சேவ ‘‘த்வம் நாகோ³’’திஆதி³னா விஞ்ஞாபேத்வா அனுஸாஸனஅந்தராயிகத⁴ம்மாபுச்ச²னக்க²ணேஸுபி தஸ்ஸ ச ஸங்க⁴ஸ்ஸ ச யதா² பாகடம் ஹோதி, ததா² பகாஸேத்வாவ நாகா³தி³னாமேன அனுஸ்ஸாவேதப்³ப³ம். ஏகஸ்ஸ ப³ஹூனி நாமானி ஹோந்தி, தேஸு ஏகம் க³ஹேதும் வட்டதி.

யம் பன உபஸம்பதா³பேக்க²உபஜ்ஜா²யானம் ஏகத்த² க³ஹிதம் நாமம் ததே³வ ஞத்தியா, ஸப்³ப³த்த² அனுஸ்ஸாவனாஸு ச க³ஹேதப்³ப³ம். க³ஹிததோ ஹி அஞ்ஞஸ்மிம் க³ஹிதே ப்³யஞ்ஜனம் பி⁴ன்னம் நாம ஹோதி, கம்மம் விபஜ்ஜதி. அத்த²தோ ஹி ப்³யஞ்ஜனதோ ச அபி⁴ன்னா ஏவ ஞத்தி அனுஸ்ஸாவனா ச வட்டந்தி. உபஜ்ஜா²யனாமஸ்ஸ பன புரதோ ‘‘ஆயஸ்மதோ திஸ்ஸஸ்ஸா’’திஆதி³னா ஆயஸ்மந்தபத³ம் ஸப்³ப³த்த² யோஜேத்வாபி அனுஸ்ஸாவேதி. ததா² அயோஜிதேபி தோ³ஸோ நத்தி².

பாளியம் (மஹாவ. 126) பன கிஞ்சாபி ‘‘இத்த²ன்னாமஸ்ஸ ஆயஸ்மதோ’’தி பச்ச²தோ ‘‘ஆயஸ்மதோ’’தி பத³ம் வுத்தம், ததா²பி ‘‘ஆயஸ்மா ஸாரிபுத்தோ அத்த²குஸலோ’’திஆதி³னா நாமஸ்ஸ புரதோ ‘ஆயஸ்மந்தபத³’யோக³ஸ்ஸ த³ஸ்ஸனதோ புரதோவ பயோகோ³ யுத்ததரோ, தஞ்ச ஏகத்த² யோஜேத்வா அஞ்ஞத்த² அயோஜிதேபி ஏகத்த² புரதோ யோஜேத்வா அஞ்ஞத்த² பச்ச²தோ யோஜனேபி ஸாவனாய ஹாபனம் நாம ந ஹோதி நாமஸ்ஸ அஹாபிதத்தா. தேனேவ பாளியம்பி ‘‘இத்த²ன்னாமஸ்ஸ ஆயஸ்மதோ’’தி ஏகத்த² யோஜேத்வா ‘‘இத்த²ன்னாமேன உபஜ்ஜா²யேனா’’திஆதீ³ஸு ‘‘ஆயஸ்மதோ’’தி ந யோஜிதந்தி வத³ந்தி. தஞ்ச கிஞ்சாபி ஏவம், ததா²பி ஸப்³ப³ட்டா²னேபி ஏகேனேவ பகாரேன யோஜேத்வா ஏவ வா அயோஜேத்வா வா அனுஸ்ஸாவனம் பஸத்த²தரந்தி க³ஹேதப்³ப³ம்.

ஏகதோ ஸஹேவ ஏகஸ்மிம் க²ணே அனுஸ்ஸாவனம் ஏதேஸந்தி ஏகானுஸ்ஸாவனா, உபஸம்பதா³பேக்கா², ஏதே ஏகானுஸ்ஸாவனே காதும். தேனாஹ ‘‘ஏகதோஅனுஸாவனே’’தி. இத³ஞ்ச ஏகம் பத³ம் விப⁴த்திஅலோபேன த³ட்ட²ப்³ப³ம். ஏகேன வாதி த்³வின்னம்பி ஏகஸ்மிம் க²ணே ஏகாய ஏவ கம்மவாசாய அனுஸ்ஸாவனே ஏகேன ஆசரியேனாதி அத்தோ². ‘‘அயம் பு³த்³த⁴ரக்கி²தோ ச அயம் த⁴ம்மரக்கி²தோ ச ஆயஸ்மதோ ஸங்க⁴ரக்கி²தஸ்ஸ உபஸம்பதா³பேக்கோ²’’திஆதி³னா நயேன ஏகேன ஆசரியேன த்³வின்னமேகஸ்மிம் க²ணே அனுஸ்ஸாவனனயோ த³ட்ட²ப்³போ³, இமினாவ நயேன திண்ணம்பி ஏகேன ஆசரியேன ஏகக்க²ணே அனுஸ்ஸாவனம் வேதி³தப்³ப³ம்.

புரிமனயேனேவ ஏகதோ அனுஸ்ஸாவனே காதுந்தி ‘‘ஏகேன ஏகஸ்ஸ, அஞ்ஞேன இதரஸ்ஸா’’திஆதி³னா புப்³பே³ வுத்தனயேன த்³வின்னம் த்³வீஹி வா திண்ணம் தீஹி வா ஆசரியேஹி, ஏகேன வா ஆசரியேன தயோபி ஏகதோஅனுஸ்ஸாவனே காதுந்தி அத்தோ². ‘‘தஞ்ச கோ² ஏகேன உபஜ்ஜா²யேன, ந த்வேவ நானுபஜ்ஜா²யேனா’’தி இத³ம் ஏகேன ஆசரியேன த்³வீஹி வா தீஹி வா உபஜ்ஜா²யேஹி த்³வே வா தயோ வா உபஸம்பதா³பேக்கே² ஏகக்க²ணே ஏகாய அனுஸ்ஸாவனாய ஏகானுஸ்ஸாவனே காதும் ந வட்டதீதி படிக்கே²பபத³ம், ந பன நானாசரியேஹி நானுபஜ்ஜா²யேஹி தயோ ஏகானுஸ்ஸாவனே காதும் ந வட்டதீதி ஆஹ ‘‘ஸசே பன நானாசரியா நானுபஜ்ஜா²யா…பே… வட்டதீ’’தி. யஞ்சேத்த² ‘‘திஸ்ஸத்தே²ரோ ஸுமனத்தே²ரஸ்ஸ ஸத்³தி⁴விஹாரிகம், ஸுமனத்தே²ரோ திஸ்ஸத்தே²ரஸ்ஸ ஸத்³தி⁴விஹாரிக’’ந்தி ஏவம் உபஜ்ஜா²யேஹி அஞ்ஞமஞ்ஞம் ஸத்³தி⁴விஹாரிகானம் அனுஸ்ஸாவனகரணம் வுத்தம், தம் உபலக்க²ணமத்தம். தஸ்மா ஸசே திஸ்ஸத்தே²ரோ ஸுமனத்தே²ரஸ்ஸ ஸத்³தி⁴விஹாரிகம், ஸுமனத்தே²ரோ நந்த³த்தே²ரஸ்ஸ ஸத்³தி⁴விஹாரிகம் அனுஸ்ஸாவேதி, அஞ்ஞமஞ்ஞஞ்ச க³ணபூரகா ஹோந்தி, வட்டதி ஏவ. ஸசே பன உபஜ்ஜா²யோ ஸயமேவ அத்தனோ ஸத்³தி⁴விஹாரிகம் அனுஸ்ஸாவேதி, ஏத்த² வத்தப்³ப³மேவ நத்தி², கம்மம் ஸுகதமேவ ஹோதி, அனுபஜ்ஜா²யகஸ்ஸபி யேன கேனசி அனுஸ்ஸாவிதே உபஸம்பதா³ ஹோதி, கிமங்க³ம் பன ஸஉபஜ்ஜா²யகஸ்ஸ உபஜ்ஜா²யேனேவ அனுஸ்ஸாவனேதி த³ட்ட²ப்³ப³ம். தேனேவ நவட்டனபக்க²ம் த³ஸ்ஸேதும் ‘‘ஸசே பனா’’திஆதி³மாஹ.

உபஜ்ஜா²தி உபஜ்ஜா²யஸத்³த³ஸமானத்தோ² ஆகாரந்தோ உபஜ்ஜா²ஸத்³தோ³தி த³ஸ்ஸேதி. உபஜ்ஜா²ய-ஸத்³தோ³ ஏவ வா உபஜ்ஜா², உபயோக³பச்சத்தவசனேஸு ய-கார லோபம் கத்வா ஏவம் வுத்தோ கரணவசனாதீ³ஸு உபஜ்ஜா²ஸத்³த³ஸ்ஸ பயோகா³பா⁴வாதி த³ட்ட²ப்³ப³ம். பாளியம் அத்தனாவ அத்தானம் ஸம்மன்னிதப்³ப³ந்தி அத்தனாவ கத்துபூ⁴தேன கரணபூ⁴தேன அத்தானமேவ கம்மபூ⁴தம் பதி ஸம்மன்னனகிச்சம் காதப்³ப³ம், அத்தானந்தி வா பச்சத்தே உபயோக³வசனம், அத்தனாவ அத்தா ஸம்மன்னிதப்³போ³தி அத்தோ². ந கேவலஞ்ச ஏத்தே²வ, அஞ்ஞத்ராபி தேரஸஸம்முதிஆதீ³ஸு இமினாவ லக்க²ணேன அத்தனாவ அத்தா ஸம்மன்னிதப்³போ³வ. அபிச ஸயம் கம்மாரஹத்தா அத்தானம் முஞ்சித்வா சதுவக்³கா³தி³கோ க³ணோ ஸப்³ப³த்த² இச்சி²தப்³போ³.

ஸச்சகாலோதி ‘‘நிகூ³ஹிஸ்ஸாமீ’’தி வஞ்சனம் பஹாய ஸச்சஸ்ஸேவ தே இச்சி²தப்³ப³காலோ. பூ⁴தகாலோதி வஞ்சனாய அபா⁴வேபி மனுஸ்ஸத்தாதி³வத்து²னோ பூ⁴ததாய அவஸ்ஸம் இச்சி²தப்³ப³காலோ, இதரதா² கம்மகோபாதி³அந்தராயோ ஹோதீதி அதி⁴ப்பாயோ. மங்கூதி அதோ⁴முகோ². உத்³த⁴ரதூதி அனுபஸம்பன்னபா⁴வதோ உபஸம்பத்தியம் பதிட்ட²பேதூதி அத்தோ².

ஸப்³ப³கம்மவாசாஸு அத்த²கோஸல்லத்த²ம் பனேத்த² உபஸம்பத³கம்மவாசாய ஏவமத்தோ² த³ட்ட²ப்³போ³ – ஸுணாதூதி ஸவனாணத்தியம் பட²மபுரிஸேகவசனம். தஞ்ச கிஞ்சாபி யோ ஸோ ஸங்கோ⁴ ஸவனகிரியாயம் நியோஜீயதி, தஸ்ஸ ஸம்முக²த்தா ‘‘ஸுணாஹீ’’தி மஜ்ஜி²மபுரிஸவசனேன வத்தப்³ப³ம், ததா²பி யஸ்மா ஸங்க⁴ஸத்³த³ஸன்னிதா⁴னே பட²மபுரிஸப்பயோகோ³வ ஸத்³த³விதூ³ஹி ஸமாசிண்ணோ ப⁴வந்தப⁴க³வந்தஆயஸ்மாதி³ஸத்³த³ஸன்னிதா⁴னேஸு விய ‘‘அதி⁴வாஸேது மே ப⁴வம் கோ³தமோ (பாரா. 22), ஏதஸ்ஸ ஸுக³த காலோ, யம் ப⁴க³வா ஸாவகானம் ஸிக்கா²பத³ம் பஞ்ஞபேய்ய (பாரா. 21), பக்கமதாயஸ்மா (பாரா. 436), ஸுணந்து மே ஆயஸ்மந்தோ’’திஆதீ³ஸு (மஹாவ. 168). தஸ்மா இத⁴ பட²மபுரிஸப்பயோகோ³ கதோ. அத² வா கா³ரவவஸேனேதம் வுத்தம். க³ருட்டா²னியேஸு ஹி கா³ரவவஸேன மஜ்ஜி²மபுரிஸபயோகு³ப்பத்தியம்பி பட²மபுரிஸப்பயோக³ம் பயுஜ்ஜந்தி ‘‘தே³ஸேது ஸுக³தோ த⁴ம்ம’’ந்திஆதீ³ஸு (தீ³. நி. 2.66; ம. நி. 2.338; மஹாவ. 8) வியாதி த³ட்ட²ப்³ப³ம். கேசி பன ‘‘ப⁴ந்தே ஆவுஸோதி பதே³ அபேக்கி²த்வா இத⁴ பட²மபுரிஸப்பயோகோ³’’தி வத³ந்தி, தம் ந ஸுந்த³ரம் ‘‘ஆசரியோ மே, ப⁴ந்தே, ஹோஹி (மஹாவ. 77), இங்கா⁴வுஸோ உபாலி, இமம் பப்³ப³ஜிதம் அனுயுஞ்ஜாஹீ’’திஆதீ³ஸு (பாரா. 517) தப்பயோகே³பி மஜ்ஜி²மபுரிஸப்பயோக³ஸ்ஸேவ த³ஸ்ஸனதோ.

மேதி யோ ஸாவேதி, தஸ்ஸ அத்தனித்³தே³ஸே ஸாமிவசனம். ப⁴ந்தேதி ஆலபனத்தே² வுட்³டே⁴ஸு ஸகா³ரவவசனம், ‘‘ஆவுஸோ’’தி பத³ம் பன நவகேஸு. தது³ப⁴யம்பி நிபாதோ ‘‘தும்ஹே ப⁴ந்தே தும்ஹே ஆவுஸோ’’தி ப³ஹூஸுபி ஸமானரூபத்தா. ஸங்கோ⁴தி அவிஸேஸதோ சதுவக்³கா³தி³கே பகதத்தபுக்³க³லஸமூஹே வத்ததி. இத⁴ பன பச்சந்திமேஸு ஜனபதே³ஸு பஞ்சவக்³க³தோ பட்டா²ய, மஜ்ஜி²மேஸு ஜனபதே³ஸு த³ஸவக்³க³தோ பட்டா²ய ஸங்கோ⁴தி க³ஹேதப்³போ³. தத்ராயம் பிண்ட³த்தோ² – ப⁴ந்தே, ஸங்கோ⁴ மம வசனம் ஸுணாதூதி. இத³ஞ்ச நவகதரேன வத்தப்³ப³வசனம். ஸசே பன அனுஸ்ஸாவகோ ஸப்³பே³ஹி பி⁴க்கூ²ஹி வுட்³ட⁴தரோ ஹோதி, ‘‘ஸுணாது மே, ஆவுஸோ ஸங்கோ⁴’’தி வத்தப்³ப³ம். ஸோபி சே ‘‘ப⁴ந்தே’’தி வதே³ய்ய, நவகதரோ வா ‘‘ஆவுஸோ’’தி, கம்மகோபோ நத்தி². கேசி பன ‘‘ஏகத்த² ‘ஆவுஸோ’தி வத்வா அஞ்ஞத்த² ‘ப⁴ந்தே’தி வுத்தேபி நத்தி² தோ³ஸோ உப⁴யேனபி ஆலபனஸ்ஸ ஸிஜ்ஜ²னதோ’’தி வத³ந்தி.

இதா³னி யமத்த²ம் ஞாபேதுகாமோ ‘‘ஸுணாதூ’’தி ஸங்க⁴ம் ஸவனே நியோஜேதி, தம் ஞாபேந்தோ ‘‘அயம் இத்த²ன்னாமோ’’திஆதி³மாஹ. தத்த² அயந்தி உபஸம்பதா³பேக்க²ஸ்ஸ ஹத்த²பாஸே ஸன்னிஹிதபா⁴வத³ஸ்ஸனம், தேன ச ஹத்த²பாஸே டி²தஸ்ஸேவ உபஸம்பதா³ ருஹதீதி ஸிஜ்ஜ²தி ஹத்த²பாஸதோ ப³ஹி டி²தஸ்ஸ ‘‘அய’’ந்தி ந வத்தப்³ப³தோ. தேனேவ அனுஸாஸகஸம்முதியம் ஸோ ஹத்த²பாஸதோ ப³ஹி டி²தத்தா ‘‘அய’’ந்தி ந வுத்தோ, தஸ்மா உபஸம்பதா³பேக்கோ² அனுபஸம்பன்னோ ஹத்த²பாஸே ட²பேதப்³போ³. அயம் இத்த²ன்னாமோதி அயம்-ஸத்³தோ³ ச அவஸ்ஸம் பயுஜ்ஜிதப்³போ³, ஸோ ச இமஸ்மிம் பட²மனாமபயோகே³ ஏவாதி க³ஹேதப்³ப³ம். ‘‘இத்த²ன்னாமோ’’தி இத³ம் அனியமதோ தஸ்ஸ நாமத³ஸ்ஸனம், உப⁴யேனபி அயம் பு³த்³த⁴ரக்கி²தோதிஆதி³னாமம் த³ஸ்ஸேதி. ‘‘உபஸம்பதா³பேக்கோ²’’தி பி⁴ன்னாதி⁴கரணவிஸயே ப³ஹுப்³பீ³ஹிஸமாஸோ, உபஸம்பத³ம் மே ஸங்கோ⁴ அபேக்க²மானோதி அத்தோ². தஸ்ஸ ச உபஜ்ஜா²யதம் ஸமங்கி³பா⁴வேன த³ஸ்ஸேதும் ‘‘இத்த²ன்னாமஸ்ஸ ஆயஸ்மதோ’’தி வுத்தம். ஏதேன ‘‘அயம் பு³த்³த⁴ரக்கி²தோ ஆயஸ்மதோ த⁴ம்மரக்கி²தஸ்ஸ ஸத்³தி⁴விஹாரிகபூ⁴தோ உபஸம்பதா³பேக்கோ²’’தி ஏவமாதி³னா நயேன நாமயோஜனாய ஸஹ அத்தோ² த³ஸ்ஸிதோ. ஏத்த² ச ‘‘ஆயஸ்மதோ’’தி பத³ம் அவத்வாபி ‘‘அயம் பு³த்³த⁴ரக்கி²தோ த⁴ம்மரக்கி²தஸ்ஸ உபஸம்பதா³பேக்கோ²’’தி வத்தும் வட்டதி. தேனேவ பாளியம் ‘‘இத்த²ன்னாமேன உபஜ்ஜா²யேனா’’தி ஏத்த² ‘‘ஆயஸ்மதோ’’தி பத³ம் ந வுத்தம். யஞ்சேத்த² வத்தப்³ப³ம், தம் ஹேட்டா² வுத்தமேவ.

நனு சேத்த² உபஜ்ஜா²யோபி உபஸம்பதா³பேக்கோ² விய ஹத்த²பாஸே டி²தோ ஏவ இச்சி²தப்³போ³, அத² கஸ்மா ‘‘அயம் இத்த²ன்னாமோ இமஸ்ஸ இத்த²ன்னாமஸ்ஸ உபஸம்பதா³பேக்கோ²’’தி ஏவம் உபஜ்ஜா²யஸ்ஸ நாமபராமஸனேபி இத³ம்-ஸத்³த³ப்பயோகோ³ ந கதோதி? நாயம் விரோதோ⁴ உபஜ்ஜா²யஸ்ஸ அபா⁴வேபி கம்மகோபாபா⁴வதோ. கேவலஞ்ஹி கம்மனிப்³ப³த்தியா ஸந்தபத³வஸேன அவிஜ்ஜமானஸ்ஸபி உபஜ்ஜா²யஸ்ஸ நாமகித்தனம் அனுபஜ்ஜா²யஸ்ஸ உபஸம்பதா³தீ³ஸுபி கரீயதி, தஸ்மா உபஜ்ஜா²யஸ்ஸ அஸன்னிஹிதாயபி தப்பராமஸனமத்தேனேவ கம்மஸித்³தி⁴தோ ‘‘இமஸ்ஸா’’தி நித்³தி³ஸிதும் ந வட்டதீதி.

பரிஸுத்³தோ⁴ அந்தராயிகேஹி த⁴ம்மேஹீதி அப⁴ப்³ப³த்தாதி³கேஹி உபஸம்பதா³ய அவத்து²கரேஹி சேவ பஞ்சாபா³த⁴ஹத்த²ச்சி²ன்னாதீ³ஹி ஆபத்திகரேஹி ச அந்தராயிகஸபா⁴வேஹி பரிமுத்தோ. ஏவம் வுத்தே ஏவ ஆபத்திமத்தகரேஹி பஞ்சாபா³தா⁴தீ³ஹி அபரிமுத்தஸ்ஸபி உபஸம்பதா³ ருஹதி, நாஞ்ஞதா². பரிபுண்ணஸ்ஸ பத்தசீவரந்தி பரிபுண்ணமஸ்ஸ உபஸம்பதா³பேக்க²ஸ்ஸ பத்தசீவரம். ஏவம் வுத்தே ஏவ அபத்தசீவரஸ்ஸபி உபஸம்பதா³ ருஹதி, நாஞ்ஞதா². உபஸம்பத³ம் யாசதீதி ‘‘ஸங்க⁴ம், ப⁴ந்தே, உபஸம்பத³ம் யாசாமீ’’திஆதி³னா (மஹாவ. 126) யாசாபிதபா⁴வம் ஸந்தா⁴ய வுத்தம். ஏவம் தேன ஸங்கே⁴ அயாசிதேபி ‘‘இத்த²ன்னாமோ ஸங்க⁴ம் உபஸம்பத³ம் யாசதீ’’தி வுத்தே ஏவ கம்மம் அவிபன்னம் ஹோதி, நாஞ்ஞதா². உபஜ்ஜா²யேனாதி உபஜ்ஜா²யேன கரணபூ⁴தேன, இத்த²ன்னாமம் உபஜ்ஜா²யம் கத்வா கம்மபூ⁴தம் உபஸம்பத³ம் தா³தும் நிப்பா²தே³தும் கத்துபூ⁴தம் ஸங்க⁴ம் யாசதீதி அத்தோ². யாசதா⁴துனோ பன த்³விகம்மகத்தா ‘‘ஸங்க⁴ம் உபஸம்பத³’’ந்தி த்³வே கம்மபதா³னி வுத்தானி.

யதி³ ஸங்க⁴ஸ்ஸ பத்தகல்லந்தி ஏத்த² பத்தோ காலோ இமஸ்ஸ கம்மஸ்ஸாதி பத்தகாலம், அபலோகனாதி³சதுப்³பி³த⁴ம் ஸங்க⁴க³ணகம்மம், ததே³வ ஸகத்தே² ய-பச்சயேன ‘‘பத்தகல்ல’’ந்தி வுச்சதி. இத⁴ பன ஞத்திசதுத்த²உபஸம்பதா³கம்மம் அதி⁴ப்பேதம், தம் காதும் ஸங்க⁴ஸ்ஸ பத்தகல்லம் ஜாதம். யதீ³தி அனுமதிக³ஹணவஸேன கம்மஸ்ஸ பத்தகல்லதம் ஞாபேதி, யோ ஹி கோசி தத்த² அபத்தகல்லதம் மஞ்ஞிஸ்ஸதி, ஸோ வக்க²தி. இமமேவ ஹி அத்த²ம் ஸந்தா⁴ய அனுஸ்ஸாவனாஸு ‘‘யஸ்ஸாயஸ்மதோ க²மதி…பே… ஸோ பா⁴ஸேய்யா’’தி (மஹாவ. 127) வுத்தம். ததே³தம் பத்தகல்லம் வத்து²ஸம்பதா³, அந்தராயிகேஹி த⁴ம்மேஹி சஸ்ஸ பரிஸுத்³த⁴தா, ஸீமாஸம்பதா³, பரிஸாஸம்பதா³, புப்³ப³கிச்சனிட்டா²னந்தி இமேஹி பஞ்சஹி அங்கே³ஹி ஸங்க³ஹிதம்.

தத்த² வத்து²ஸம்பதா³ நாம யதா²வுத்தேஹி ஏகாத³ஸஅப⁴ப்³ப³புக்³க³லேஹி சேவ அந்திமவத்து²அஜ்ஜா²பன்னேஹி ச அஞ்ஞோ பரிபுண்ணவீஸதிவஸ்ஸோ அனுபஸம்பன்னபூ⁴தோ மனுஸ்ஸபுரிஸோ. ஏதஸ்மிஞ்ஹி புக்³க³லே ஸதி ஏவ இத³ம் ஸங்க⁴ஸ்ஸ உபஸம்பதா³கம்மம் பத்தகல்லம் நாம ஹோதி, நாஸதி, கதஞ்ச குப்பமேவ ஹோதி.

அந்தராயிகேஹி த⁴ம்மேஹி சஸ்ஸ பரிஸுத்³த⁴தா நாம யதா²வுத்தஸ்ஸேவ உபஸம்பதா³வத்து²பூ⁴தஸ்ஸ புக்³க³லஸ்ஸ யே இமே ப⁴க³வதா படிக்கி²த்தா பஞ்சாபா³த⁴பு²ட்ட²தாத³யோ மாதாபிதூஹி அனனுஞ்ஞாததாபஅயோஸானா சேவ ஹத்த²ச்சி²ன்னாத³யோ ச தோ³ஸத⁴ம்மா காரகஸங்க⁴ஸ்ஸ ஆபத்தாதி³அந்தராயஹேதுதாய ‘‘அந்தராயிகா’’தி வுச்சந்தி, தேஹி அந்தராயிகேஹி தோ³ஸத⁴ம்மேஹி பரிமுத்ததா, இமிஸ்ஸா ச ஸதி ஏவ இத³ம் கம்மம் பத்தகல்லம் நாம ஹோதி, நாஸதி, கதம் பன கம்மம் ஸுகதமேவ ஹோதி ட²பேத்வா ஊனவீஸதிவஸ்ஸம் புக்³க³லம்.

ஸீமாஸம்பதா³ பன உபோஸத²க்க²ந்த⁴கே (மஹாவ. 138 ஆத³யோ) வக்க²மானனயேன ஸப்³ப³தோ³ஸரஹிதாய ப³த்³தா⁴ப³த்³த⁴வஸேனேவ து³விதா⁴ய ஸீமாய வஸேன வேதி³தப்³பா³. தாதி³ஸாய ஹி ஸீமாய ஸதி ஏவ இத³ம் கம்மம் பத்தகல்லம் நாம ஹோதி, நாஸதி, கதஞ்ச கம்மம் விபஜ்ஜதி.

பரிஸாஸம்பதா³ பன யே இமே உபஸம்பதா³கம்மஸ்ஸ ஸப்³ப³ந்திமேன பரிச்சே²தே³ன கம்மப்பத்தா த³ஸஹி வா பஞ்சஹி வா அனூனாபாராஜிகம் அனாபன்னா அனுக்கி²த்தா ச ஸமானஸம்வாஸகா பி⁴க்கூ², தேஸம் ஏகஸீமாய ஹத்த²பாஸம் அவிஜஹித்வா டா²னம், ச²ந்தா³ரஹானஞ்ச ச²ந்த³ஸ்ஸ ஆனயனம், ஸம்முகீ²பூ⁴தானஞ்ச அப்படிகோஸனம், உபஸம்பதா³பேக்க²ரஹிதானம் உபோஸத²க்க²ந்த⁴கே படிக்கி²த்தானம் க³ஹட்டா²தி³அனுபஸம்பன்னானஞ்சேவ பாராஜிகுக்கி²த்தகனானாஸம்வாஸகபி⁴க்கு²னீனஞ்ச வஜ்ஜனீயபுக்³க³லானம் ஸங்க⁴ஸ்ஸ ஹத்த²பாஸே அபா⁴வோ சாதி இமேஹி சதூஹி அங்கே³ஹி ஸங்க³ஹிதா. ஏவரூபாய ச பரிஸாஸம்பதா³ய ஸதி ஏவ இத³ம் பத்தகல்லம் நாம ஹோதி, நாஸதி. தத்த² புரிமானம் திண்ணம் அங்கா³னம் அஞ்ஞதரஸ்ஸபி அபா⁴வே கதம் கம்மம் விபஜ்ஜதி, ந பச்சி²மஸ்ஸ.

புப்³ப³கிச்சனிட்டா²னம் நாம யானிமானி ‘‘பட²மம் உபஜ்ஜ²ம் கா³ஹாபேதப்³போ³’’திஆதி³னா பாளியம் (மஹாவ. 126) வுத்தானி ‘‘உபஜ்ஜா²கா³ஹாபனம், பத்தசீவராசிக்க²ணம், ததோ தம் ஹத்த²பாஸதோ ப³ஹி பேஸேத்வா அனுஸாஸகஸம்முதிகம்மகரணம், ஸம்மதேன ச க³ந்த்வா அனுஸாஸனம், தேன ச பட²மதரம் ஆக³ந்த்வா ஸங்க⁴ஸ்ஸ ஞத்திம் ஞாபேத்வா உபஸம்பதா³பேக்க²ம் ‘ஆக³ச்சா²ஹீ’தி ஹத்த²பாஸே ஏவ அப்³பா⁴னம், தேன பி⁴க்கூ²னம் பாதே³ வந்தா³பேத்வா உபஸம்பதா³யாசாபனம், ததோ அந்தராயிகத⁴ம்மபுச்ச²கஸம்முதிகம்மகரணம், ஸம்மதேன ச புச்ச²ன’’ந்தி இமானி அட்ட² புப்³ப³கிச்சானி, தேஸம் ஸப்³பே³ஸம் யாதா²வதோ கரணேன நிட்டா²னம். ஏதஸ்மிஞ்ச புப்³ப³கிச்சனிட்டா²பனே ஸதி ஏவ இத³ம் ஸங்க⁴ஸ்ஸ உபஸம்பதா³கம்மம் பத்தகல்லம் நாம ஹோதி, நாஸதி. ஏதேஸு பன புப்³ப³கம்மேஸு அகதேஸுபி கதம் கம்மம் யதா²வுத்தேஸு வத்து²ஸம்பத்திஆதீ³ஸு விஜ்ஜமானேஸு அகுப்பமேவ ஹோதி. ததே³வமேத்த² பத்தகல்லம் இமேஹி பஞ்சஹி அங்கே³ஹி ஸங்க³ஹிதந்தி வேதி³தப்³ப³ம். இமினாவ நயேன ஹேட்டா² வுத்தேஸு, வக்க²மானேஸு ச ஸப்³பே³ஸு கம்மேஸு பத்தகல்லதா யதா²ரஹம் யோஜேத்வா ஞாதப்³பா³.

இத்த²ன்னாமம் உபஸம்பாதே³ய்யாதி உபஸம்பதா³னிப்பா²த³னேன தம்ஸமங்கி³ம் கரேய்ய கரோதூதி பத்த²னாயம், விதி⁴ம்ஹி வா இத³ம் த³ட்ட²ப்³ப³ம். யதா² ஹி ‘‘தே³வத³த்தம் ஸுகா²பேய்யா’’தி வுத்தே ஸுக²மஸ்ஸ நிப்பா²தே³த்வா தம் ஸுக²ஸமங்கி³னம் கரேய்யாதி அத்தோ² ஹோதி, ஏவமிதா⁴பி உபஸம்பத³மஸ்ஸ நிப்பா²தே³த்வா தம் உபஸம்பதா³ஸமங்கி³னம் கரேய்யாதி அத்தோ². பயோஜகப்³யாபாரே சேதம். யதா² ஸுக²யந்தம் கிஞ்சி ஸுத்³த⁴கத்தாரம் கோசி ஹேதுகத்தா ஸுக²ஹேதுனிப்பா²த³னேன ஸுகா²பேய்யாதி வுச்சதி, ஏவமிதா⁴பி உபஸம்பஜ்ஜந்தம் ஸுத்³த⁴கத்தாரம் புக்³க³லம் ஹேதுகத்துபூ⁴தோ ஸங்கோ⁴ உபஸம்பதா³ஹேதுனிப்பா²த³னேன உபஸம்பாதே³ய்யாதி வுத்தோ. ஏதேன ச ஸுக²ம் விய ஸுக²தா³யகேன ஸங்கே⁴ன புக்³க³லஸ்ஸ தீ³யமானா ததா²பவத்தபரமத்த²த⁴ம்மே உபாதா³ய அரியஜனபஞ்ஞத்தா உபஸம்பதா³ நாம ஸம்முதிஸச்சதா அத்தீ²தி ஸமத்தி²தம் ஹோதி. ஏத்த² ச ‘‘இத்த²ன்னாமோ ஸங்க⁴ம் உபஸம்பத³ம் யாசதீ’’தி (மஹாவ. 127) வுத்தத்தா பரிவாஸாதீ³ஸு விய யாசனானுகு³ணம் ‘‘இத்த²ன்னாமஸ்ஸ உபஸம்பத³ம் த³தே³ய்யா’’தி அவத்வா ‘‘இத்த²ன்னாமம் உபஸம்பாதே³ய்யா’’தி வுத்தத்தா இத³ம் உபஸம்பதா³கம்மம் தா³னே அஸங்க³ஹேத்வா கம்மலக்க²ணே ஏவ ஸங்க³ஹிதந்தி த³ட்ட²ப்³ப³ம். இமினா நயேன ‘‘இத்த²ன்னாமம் உபஸம்பாதே³தி, உபஸம்பன்னோ ஸங்கே⁴னா’’தி ஏத்தா²பி அத்தோ² வேதி³தப்³போ³. கேவலஞ்ஹி தத்த² வத்தமானகாலஅதீதகாலவஸேன, இத⁴ பன அனாமட்ட²காலவஸேனாதி ஏத்தகமேவ விஸேஸோ.

ஏஸா ஞத்தீதி ‘‘ஸங்கோ⁴ ஞாபேதப்³போ³’’தி வுத்தஞாபனா ஏஸா. இத³ஞ்ச அனுஸ்ஸாவனானம்பி ஸப்³பா⁴வஸூசனத்த²ம் வுச்சதி. அவஸ்ஸஞ்சேதம் வத்தப்³ப³மேவ. ஞத்திகம்மே ஏவ தம் ந வத்தப்³ப³ம். தத்த² பன ய்ய-காரே வுத்தமத்தே ஏவ ஞத்திகம்மம் நிட்டி²தம் ஹோதீதி த³ட்ட²ப்³ப³ம். க²மதீதி ருச்சதி. உபஸம்பதா³தி ஸங்கே⁴ன தீ³யமானா நிப்பா²தி³யமானா உபஸம்பதா³, யஸ்ஸ க²மதி, ஸோ துண்ஹஸ்ஸாதி யோஜனா. துண்ஹீதி ச அகத²னத்தே² நிபாதோ, அகத²னகோ அஸ்ஸ ப⁴வேய்யாதி அத்தோ². க²மதி ஸங்க⁴ஸ்ஸ இத்த²ன்னாமஸ்ஸ உபஸம்பதா³தி பகதேன ஸம்ப³ந்தோ⁴. தத்த² காரணமாஹ ‘‘தஸ்மா துண்ஹீ’’தி. தத்த² ‘‘ஆஸீ’’தி ஸேஸோ. யஸ்மா ‘‘யஸ்ஸ நக்க²மதி, ஸோ பா⁴ஸேய்யா’’தி திக்க²த்தும் வுச்சமானோபி ஸங்கோ⁴ துண்ஹீ நிரவோ அஹோஸி, தஸ்மா க²மதி ஸங்க⁴ஸ்ஸாதி அத்தோ². ஏவந்தி இமினா பகாரேன. துண்ஹீபா⁴வேனேவேதம் ஸங்க⁴ஸ்ஸ ருச்சனபா⁴வம் தா⁴ரயாமி, பு³ஜ்ஜா²மி ஜானாமீதி அத்தோ². இதி-ஸத்³தோ³ பரிஸமாபனத்தே² கதோ, ஸோ ச கம்மவாசாய அனங்க³ம், தஸ்மா அனுஸ்ஸாவகேன ‘‘தா⁴ரயாமீ’’தி ஏத்த² மி-காரபரியோஸானமேவ வத்வா நிட்ட²பேதப்³ப³ம், இதி-ஸத்³தோ³ ந பயுஜ்ஜிதப்³போ³தி த³ட்ட²ப்³ப³ம். இமினா நயேன ஸப்³ப³கம்மவாசானமத்தோ² வேதி³தப்³போ³.

ஏகபோரிஸா வாதிஆதி³ ஸத்தானம் ஸரீரசா²யம் பாதே³ஹி மினித்வா ஜானனப்பகாரத³ஸ்ஸனம். ச²ஸத்தபத³பரிமிதா ஹி சா²யா ‘‘போரிஸா’’தி வுச்சதி, இத³ஞ்ச உதுப்பமாணாசிக்க²ணாதி³ ச ஆக³ந்துகேஹி ஸத்³தி⁴ம் வீமம்ஸித்வா வுட்³ட⁴னவபா⁴வம் ஞத்வா வந்த³னவந்தா³பனாதி³கரணத்த²ம் வுத்தம். ஏதி ஆக³ச்ச²தி, க³ச்ச²தி சாதி உது, ஸோவ பமீயதே அனேன ஸம்வச்ச²ரந்தி பமாணந்தி ஆஹ ‘‘உதுயேவ உதுப்பமாண’’ந்தி. அபரிபுண்ணாதி உபஸம்பதா³தி³வஸேன அபரிபுண்ணா. யதி³ உதுவேமஜ்ஜே² உபஸம்பாதி³தோ, ததா³ தஸ்மிம் உதும்ஹி அவஸிட்ட²தி³வஸாசிக்க²ணம் தி³வஸபா⁴கா³சிக்க²ணந்தி த³ஸ்ஸேதி. தேனாஹ ‘‘யத்தகேஹி தி³வஸேஹி யஸ்ஸ யோ உது அபரிபுண்ணோ, தே தி³வஸே’’தி. தத்த² யஸ்ஸ தங்க²ணம் லத்³தூ⁴பஸம்பத³ஸ்ஸ புக்³க³லஸ்ஸ ஸம்ப³ந்தீ⁴ யோ உது யத்தகேஹி தி³வஸேஹி அபரிபுண்ணோ, தே தி³வஸேதி யோஜனா.

சா²யாதி³கமேவ ஸப்³ப³ம் ஸங்க³ஹேத்வா கா³யிதப்³ப³தோ கதே²தப்³ப³தோ ஸங்கீ³தீதி ஆஹ ‘‘இத³மேவா’’திஆதி³. தத்த² ஏகதோ கத்வா ஆசிக்கி²தப்³ப³ம். த்வம் கிம் லப⁴ஸீதி த்வம் உபஸம்பாத³னகாலே கதரவஸ்ஸம், கதரஉதுஞ்ச லப⁴ஸி, கதரஸ்மிம் தே உபஸம்பதா³ லத்³தா⁴தி அத்தோ². வஸ்ஸந்தி வஸ்ஸானஉது, இத³ஞ்ச ஸம்வச்ச²ராசிக்க²ணம் வினா வுத்தம்பி ந விஞ்ஞாயதீதி இமினா உதுஆசிக்க²ணேனேவ ஸாஸனவஸ்ஸேஸு வா கலியுக³வஸ்ஸாதீ³ஸு வா ஸஹஸ்ஸிமே வா ஸதிமே வா அஸுகஉதும் லபா⁴மீதி த³ஸ்ஸிதந்தி த³ட்ட²ப்³ப³ம். சா²யாதி இத³ம் பாளியம் ஆக³தபடிபாடிம் ஸந்தா⁴ய வுத்தம், வத்தப்³ப³கம்மதோ பன கலியுக³வஸ்ஸாதீ³ஸு ஸப்³ப³தே³ஸபஸித்³தே⁴ஸு அஸுகவஸ்ஸே அஸுகஉதும்ஹி அஸுகமாஸே அஸுககண்ஹே வா ஸுக்கே வா பக்கே² அஸுகே திதி²வாரவிஸேஸயுத்தே புப்³ப³ண்ஹாதி³தி³வஸபா⁴கே³ ஏத்தகே சா²யாபமாணே, நாடி³காபமாணே வா மயா உபஸம்பதா³ லத்³தா⁴தி வதே³ய்யாஸீதி ஏவம் ஆசிக்கி²தப்³ப³ம். இத³ம் ஸுட்டு² உக்³க³ஹேத்வா ஆக³ந்துகேஹி வுட்³ட⁴படிபாடிம் ஞத்வா படிபஜ்ஜாஹீதி வத்தப்³ப³ம். இதி ஏத்தகோ கதா²மக்³கோ³ விமதிவினோத³னியம் ஆக³தோ. வஜிரபு³த்³தி⁴டீகானயோ பன ஏகச்சோ இதே⁴வ ஸங்க³ஹம் க³தோ, ஏகச்சோ அஸன்னிட்டா²னவினிச்ச²யத்தா ஸம்ஸயஹேதுகோ ஹோதி, தஸ்மா இத⁴ ந க³ஹிதோதி.

இதி வினயஸங்க³ஹஸம்வண்ணனாபூ⁴தே வினயாலங்காரே

உபஸம்பதா³வினிச்ச²யகதா²லங்காரோ.