21. பவாரணாவினிச்ச²யகதா²

116. ஏவம் படிக்³க³ஹணவினிச்ச²யம் கதே²த்வா இதா³னி பவாரணாவினிச்ச²யம் கதே²தும் ‘‘படிக்கே²பபவாரணா’’திஆதி³மாஹ. தத்த² படிக்கி²பனம் படிக்கே²போ, அஸம்படிச்ச²னந்தி அத்தோ². பவாரியதே பவாரணா, படிஸேத⁴னந்த்யத்தோ². படிக்கே²பஸங்கா²தா பவாரணா படிக்கே²பபவாரணா. அத² வா படிக்கே²பவஸேன பவாரணா படிக்கே²பபவாரணா. பஞ்சன்னம் போ⁴ஜனானம் அஞ்ஞதரம் பு⁴ஞ்ஜந்தஸ்ஸ அஞ்ஞஸ்மிம் போ⁴ஜனே அபி⁴ஹடே படிக்கே²பஸங்கா²தா பவாரணாதி ஸம்ப³ந்தோ⁴.

117. யம் அஸ்னாதீதி யம் பு⁴ஞ்ஜதி. அம்பி³லபாயாஸாதீ³ஸூதி ஆதி³-ஸத்³தே³ன கீ²ரபாயாஸாதி³ம் ஸங்க³ண்ஹாதி. தத்த² அம்பி³லபாயாஸக்³க³ஹணேன தக்காதி³அம்பி³லஸம்யுத்தா க⁴னயாகு³ வுத்தா. கீ²ரபாயாஸக்³க³ஹணேன கீ²ரஸம்யுத்தா யாகு³ ஸங்க³ய்ஹதி. பவாரணம் ஜனேதீதி அனதிரித்தபோ⁴ஜனாபத்தினிப³ந்த⁴னம் படிக்கே²பம் ஸாதே⁴தி. கதோபி படிக்கே²போ அனதிரித்தபோ⁴ஜனாபத்தினிப³ந்த⁴னோ ந ஹோதி, அகதட்டா²னேயேவ திட்ட²தீதி ஆஹ ‘‘பவாரணம் ந ஜனேதீ’’தி.

‘‘யாகு³-ஸத்³த³ஸ்ஸ பவாரணஜனகயாகு³யாபி ஸாதா⁴ரணத்தா ‘யாகு³ம் க³ண்ஹதா²’தி வுத்தேபி பவாரணா ஹோதீதி பவாரணம் ஜனேதியேவாதி வுத்த’’ந்தி தீஸுபி க³ண்டி²பதே³ஸு வுத்தம். தம் பரதோ தத்தே²வ ‘‘ப⁴த்தமிஸ்ஸகம் யாகு³ம் ஆஹரித்வா’’தி ஏத்த² வுத்தகாரணேன ந ஸமேதி. வுத்தஞ்ஹி தத்த² – ஹேட்டா² அயாகு³கே நிமந்தனே உத³ககஞ்ஜிககீ²ராதீ³ஹி ஸத்³தி⁴ம் மத்³தி³தம் ப⁴த்தமேவ ஸந்தா⁴ய ‘‘யாகு³ம் க³ண்ஹதா²’’தி வுத்தத்தா பவாரணா ஹோதி. ‘‘ப⁴த்தமிஸ்ஸகம் யாகு³ம் ஆஹரித்வா’’தி ஏத்த² பன விஸும் யாகு³யா விஜ்ஜமானத்தா பவாரணா ந ஹோதீதி. தஸ்மா தத்த² வுத்தனயேனேவ கீ²ராதீ³ஹி ஸத்³தி⁴ம் மத்³தி³தம் ப⁴த்தமேவ ஸந்தா⁴ய ‘‘யாகு³ம் க³ண்ஹதா²’’தி வுத்தத்தா யாகு³யாவ தத்த² அபா⁴வதோ பவாரணா ஹோதீதி ஏவமேத்த² காரணம் வத்தப்³ப³ம். ஏவஞ்ஹி ஸதி பரதோ ‘‘யேனாபுச்சி²தோ, தஸ்ஸ அத்தி²தாயா’’தி அட்ட²கதா²ய வுத்தகாரணேனபி ஸம்ஸந்த³தி, அஞ்ஞதா² க³ண்டி²பதே³ஸுயேவ புப்³பா³பரவிரோதோ⁴ ஆபஜ்ஜதி, அட்ட²கதா²ய ச ந ஸமேதீதி. ஸசே…பே… பஞ்ஞாயதீதி இமினா வுத்தப்பமாணஸ்ஸ மச்ச²மம்ஸக²ண்ட³ஸ்ஸ நஹாருனோ வா ஸப்³பா⁴வமத்தம் த³ஸ்ஸேதி. தாஹீதி புது²காஹி.

ஸாலிவீஹியவேஹி கதஸத்தூதி யேபு⁴ய்யனயேன வுத்தம், ஸத்த த⁴ஞ்ஞானி பன ப⁴ஜ்ஜித்வா கதோபி ஸத்துயேவ. தேனேவாஹ ‘‘கங்கு³வரக…பே… ஸத்துஸங்க³ஹமேவ க³ச்ச²தீ’’தி. ஸத்துமோத³கோதி ஸத்துயோ பிண்டே³த்வா கதோ அபக்கோ ஸத்துகு³ளோ. விமதிவினோத³னியம் (வி. வி. டீ. பாசித்திய 2.238-239) பன ‘‘ஸத்துமோத³கோதி ஸத்தும் தேமேத்வா கதோ அபக்கோ, ஸத்தும் பன பிஸித்வா பிட்ட²ம் கத்வா தேமேத்வா பூவம் கத்வா பசந்தி, தம் ந பவாரேதீ’’தி வுத்தம்.

பஞ்சன்னம் போ⁴ஜனானம் அஞ்ஞதரவஸேன விப்பகதபோ⁴ஜனபா⁴வஸ்ஸ உபச்சி²ன்னத்தா ‘‘முகே² ஸாஸபமத்தம்பி…பே… ந பவாரேதீ’’தி வுத்தம். ‘‘அகப்பியமம்ஸம் படிக்கி²பதி, ந பவாரேதீ’’தி வசனதோ ஸசே ஸங்கி⁴கம் லாப⁴ம் அத்தனோ அபாபுணந்தம் ஜானித்வா வா அஜானித்வா வா படிக்கி²பதி, ந பவாரேதி படிக்கி²பிதப்³ப³ஸ்ஸேவ படிக்கி²த்தத்தா, அலஜ்ஜிஸந்தகம் படிக்கி²பந்தோபி ந பவாரேதி. அவத்து²தாயாதி அனதிரித்தாபத்திஸாதி⁴காய பவாரணாய அவத்து²பா⁴வதோ. ஏதேன படிக்கி²பிதப்³ப³ஸ்ஸேவ படிக்கி²த்தபா⁴வம் தீ³பேதி. யஞ்ஹி படிக்கி²பிதப்³ப³ம் ஹோதி, தஸ்ஸ படிக்கே²போ ஆபத்தியா அங்க³ம் ந ஹோதீதி தம் பவாரணாய அவத்தூ²தி வுச்சதி.

118. ஆஸன்னதரம் அங்க³ந்தி ஹத்த²பாஸதோ ப³ஹி ட²த்வா ஓனமித்வா தே³ந்தஸ்ஸ ஸீஸம் ஆஸன்னதரம் ஹோதி, தஸ்ஸ ஓரிமந்தேன பரிச்சி²ந்தி³தப்³ப³ம்.

உபனாமேதீதி இமினா காயாபி⁴ஹாரம் த³ஸ்ஸேதி. அபனாமேத்வாதி அபி⁴முக²ம் ஹரித்வா. இத³ம் ப⁴த்தம் க³ண்ஹாதி வத³தீதி கிஞ்சி அபனாமேத்வா வத³தி. கேவலம் வாசாபி⁴ஹாரஸ்ஸ அனதி⁴ப்பேதத்தா க³ண்ஹதா²தி க³ஹேதும் ஆரத்³த⁴ம். ஹத்த²பாஸதோ ப³ஹி டி²தஸ்ஸ ஸதிபி தா³துகாமதாபி⁴ஹாரே படிக்கி²பந்தஸ்ஸ தூ³ரபா⁴வேனேவ பவாரணாய அபா⁴வதோ தே²ரஸ்ஸபி தூ³ரபா⁴வமத்தம் க³ஹேத்வா பவாரணாய அபா⁴வம் த³ஸ்ஸேந்தோ ‘‘தே²ரஸ்ஸ தூ³ரபா⁴வதோ’’திஆதி³மாஹ, ந பன தே²ரஸ்ஸ அபி⁴ஹாரஸம்ப⁴வதோ. ஸசேபி க³ஹேத்வா க³தோ ஹத்த²பாஸே டி²தோ ஹோதி, கிஞ்சி பன அவத்வா ஆதா⁴ரட்டா²னே டி²தத்தா அபி⁴ஹாரோ நாம ந ஹோதீதி ‘‘தூ³தஸ்ஸ ச அனபி⁴ஹரணதோ’’தி வுத்தம். ‘‘க³ஹேத்வா ஆக³தேன ‘ப⁴த்தம் க³ண்ஹதா²’தி வுத்தே அபி⁴ஹாரோ நாம ஹோதீதி ‘ஸசே பன க³ஹேத்வா ஆக³தோ பி⁴க்கு²…பே… பவாரணா ஹோதீ’தி வுத்த’’ந்தி தீஸுபி க³ண்டி²பதே³ஸு வுத்தம். கேசி பன ‘‘பத்தம் கிஞ்சிபி உபனாமேத்வா ‘இமம் ப⁴த்தம் க³ண்ஹதா²’தி வுத்தந்தி க³ஹேதப்³ப³’’ந்தி வத³ந்தி, தம் யுத்தம் விய தி³ஸ்ஸதி வாசாபி⁴ஹாரஸ்ஸ இத⁴ அனதி⁴ப்பேதத்தா.

பரிவேஸனாயாதி ப⁴த்தக்³கே³. அபி⁴ஹடாவ ஹோதீதி பரிவேஸகேனேவ அபி⁴ஹடா ஹோதி. ததோ தா³துகாமதாய க³ண்ஹந்தம் படிக்கி²பந்தஸ்ஸ பவாரணா ஹோதீதி ஏத்த² அக்³க³ண்ஹந்தம்பி படிக்கி²பதோ பவாரணா ஹோதியேவ. கஸ்மா? தா³துகாமதாய அபி⁴ஹடத்தா, ‘‘தஸ்மா ஸா அபி⁴ஹடாவ ஹோதீ’’தி ஹி வுத்தம். தேனேவ தீஸுபி க³ண்டி²பதே³ஸு ‘‘தா³துகாமாபி⁴ஹாரே ஸதி கேவலம் ‘த³ஸ்ஸாமீ’தி க³ஹணமேவ அபி⁴ஹாரோ ந ஹோதி, ‘த³ஸ்ஸாமீ’தி க³ண்ஹந்தேபி அக³ண்ஹந்தேபி தா³துகாமதாபி⁴ஹாரோவ அபி⁴ஹாரோ ஹோதி, தஸ்மா க³ஹணஸமயே வா அக்³க³ஹணஸமயே வா தம் படிக்கி²பதோ பவாரணா ஹோதீ’’தி வுத்தம். இதா³னி தஸ்ஸ அஸதி தா³துகாமதாபி⁴ஹாரே க³ஹணஸமயேபி படிக்கி²பதோ பவாரணா ந ஹோதீதி த³ஸ்ஸேதும் ‘‘ஸசே பனா’’திஆதி³ வுத்தம். கடச்சு²னா அனுக்கி²த்தம்பி புப்³பே³ ஏவ அபி⁴ஹடத்தா பவாரணா ஹோதீதி ‘‘அபி⁴ஹடாவ ஹோதீ’’தி வுத்தம். உத்³த⁴டமத்தேதி பா⁴ஜனதோ வியோஜிதமத்தே. த்³வின்னம் ஸமபா⁴ரேபீதி பரிவேஸகஸ்ஸ ச அஞ்ஞஸ்ஸ ச ப⁴த்தபச்சி²பா⁴ரக்³க³ஹணே ஸம்பூ⁴தேபீதி அத்தோ².

119. ரஸம் க³ண்ஹதா²தி ஏத்த² கேவலம் மம்ஸரஸஸ்ஸ அபவாரணாஜனகஸ்ஸ நாமேன வுத்தத்தா படிக்கி²பதோ பவாரணா ந ஹோதி. மச்ச²ரஸந்திஆதீ³ஸு மச்சோ² ச ரஸஞ்சாதி அத்த²ஸம்ப⁴வதோ, வத்து²னோபி தாதி³ஸத்தா பவாரணா ஹோதி. ‘‘இத³ம் க³ண்ஹதா²’’திபி அவத்வா துண்ஹீபூ⁴தேன அபி⁴ஹடம் படிக்கி²பதோபி ஹோதி ஏவ.

கரம்ப³கோதி மிஸ்ஸகாதி⁴வசனமேதம். யஞ்ஹி ப³ஹூஹி மிஸ்ஸேத்வா கரோந்தி, ஸோ ‘‘கரம்ப³கோ’’தி வுச்சதி, ஸோ ஸசேபி மம்ஸேன மிஸ்ஸேத்வா கதோ ஹோதி, ‘‘கரம்ப³கம் க³ண்ஹதா²’’தி அபவாரணாரஹஸ்ஸ நாமேன வுத்தத்தா படிக்கி²பதோ பவாரணா ந ஹோதி. ‘‘மம்ஸகரம்ப³கம் க³ண்ஹதா²’’தி வுத்தே பன ‘‘மம்ஸமிஸ்ஸகம் க³ண்ஹதா²’’தி வுத்தம் ஹோதி, தஸ்மா பவாரணாவ ஹோதி.

120. ‘‘உத்³தி³ஸ்ஸகத’’ந்தி மஞ்ஞமானோதி ஏத்த² ‘‘வத்து²னோ கப்பியத்தா அகப்பியஸஞ்ஞாய படிக்கே²பதோபி அசித்தகத்தா இமஸ்ஸ ஸிக்கா²பத³ஸ்ஸ பவாரணா ஹோதீ’’தி வத³ந்தி. ‘‘ஹேட்டா² அயாகு³கே நிமந்தனே உத³ககஞ்ஜிககீ²ராதீ³ஹி ஸத்³தி⁴ம் மத்³தி³தம் ப⁴த்தமேவ ஸந்தா⁴ய ‘யாகு³ம் க³ண்ஹதா²’தி வுத்தத்தா பவாரணா ஹோதி, ‘ப⁴த்தமிஸ்ஸகம் யாகு³ம் ஆஹரித்வா’தி ஏத்த² பன விஸும் யாகு³யா விஜ்ஜமானத்தா பவாரணா ந ஹோதீ’’தி வத³ந்தி. அயமேத்த² அதி⁴ப்பாயோதி ‘‘யேனாபுச்சி²தோ’’திஆதி³னா வுத்தமேவத்த²ம் ஸந்தா⁴ய வத³தி. காரணம் பனேத்த² து³த்³த³ஸந்தி ஏத்த² ஏகே தாவ வத³ந்தி ‘‘யஸ்மா யாகு³மிஸ்ஸகம் நாம ப⁴த்தமேவ ந ஹோதி, கீ²ராதி³கம்பி ஹோதியேவ, தஸ்மா கரம்ப³கே விய பவாரணாய ந ப⁴விதப்³ப³ம், ஏவஞ்ச ஸதி ‘யாகு³ ப³ஹுதரா வா ஹோதி ஸமஸமா வா, ந பவாரேதி, யாகு³ மந்தா³, ப⁴த்தம் ப³ஹுதரம், பவாரேதீ’தி ஏத்த² காரணம் து³த்³த³ஸ’’ந்தி. கேசி பன வத³ந்தி ‘‘யாகு³மிஸ்ஸகம் நாம ப⁴த்தம், தஸ்மா தம் படிக்கி²பதோ பவாரணாய ஏவ ப⁴விதப்³ப³ம், ஏவஞ்ச ஸதி ‘இத⁴ பவாரணா ஹோதி, ந ஹோதீ’தி ஏத்த² காரணம் து³த்³த³ஸ’’ந்தி.

யதா² சேத்த² காரணம் து³த்³த³ஸம், ஏவம் பரதோ ‘‘மிஸ்ஸகம் க³ண்ஹதா²’’தி ஏத்தா²பி காரணம் து³த்³த³ஸமேவாதி வேதி³தப்³ப³ம். ந ஹி பவாரணப்பஹோனகஸ்ஸ அப்பப³ஹுபா⁴வோ பவாரணாய பா⁴வாபா⁴வனிமித்தம், கிஞ்சரஹி பவாரணாஜனகஸ்ஸ நாம க³ஹணமேவேத்த² பமாணம், தஸ்மா ‘‘இத³ஞ்ச கரம்ப³கேன ந ஸமானேதப்³ப³’’ந்திஆதி³னா யம்பி காரணம் வுத்தம், தம்பி புப்³பே³ வுத்தேன ஸம்ஸந்தி³யமானம் ந ஸமேதி. யதி³ ஹி மிஸ்ஸகந்தி ப⁴த்தமிஸ்ஸகேயேவ ருள்ஹம் ஸியா, ஏவம் ஸதி யதா² ‘‘ப⁴த்தமிஸ்ஸகம் க³ண்ஹதா²’’தி வுத்தே ப⁴த்தம் ப³ஹுதரம் வா ஸமம் வா அப்பதரம் வா ஹோதி, பவாரேதியேவ, ஏவம் ‘‘மிஸ்ஸகம் க³ண்ஹதா²’’தி வுத்தேபி அப்பதரேபி ப⁴த்தே பவாரணாய ப⁴விதப்³ப³ம் ‘‘மிஸ்ஸக’’ந்தி ப⁴த்தமிஸ்ஸகேயேவ ருள்ஹத்தா. ததா² ஹி ‘‘மிஸ்ஸகந்தி ப⁴த்தமிஸ்ஸகேயேவ ருள்ஹவோஹாரத்தா இத³ம் பன ப⁴த்தமிஸ்ஸகமேவாதி வுத்த’’ந்தி தீஸுபி க³ண்டி²பதே³ஸு வுத்தம். அத² மிஸ்ஸகந்தி ப⁴த்தமிஸ்ஸகே ருள்ஹம் ந ஹோதி, மிஸ்ஸகப⁴த்தம் பன ஸந்தா⁴ய ‘‘மிஸ்ஸகம் க³ண்ஹதா²’’தி வுத்தந்தி. ஏவம்பி யதா² அயாகு³கே நிமந்தனே கீ²ராதீ³ஹி ஸம்மத்³தி³தம் ப⁴த்தமேவ ஸந்தா⁴ய ‘‘யாகு³ம் க³ண்ஹதா²’’தி வுத்தே பவாரணா ஹோதி, ஏவமிதா⁴பி மிஸ்ஸகப⁴த்தமேவ ஸந்தா⁴ய ‘‘மிஸ்ஸகம் க³ண்ஹதா²’’தி வுத்தே ப⁴த்தம் அப்பம் வா ஹோது, ப³ஹு வா, பவாரணா ஏவ ஸியா, தஸ்மா மிஸ்ஸகந்தி ப⁴த்தமிஸ்ஸகே ருள்ஹம் வா ஹோது, மிஸ்ஸகம் ஸந்தா⁴ய பா⁴ஸிதம் வா, உப⁴யதா²பி புப்³பே³னாபரம் ந ஸமேதீதி கிமேத்த² காரணசிந்தாய. ஈதி³ஸேஸு பன டா²னேஸு அட்ட²கதா²பமாணேனேவ க³ந்தப்³ப³ந்தி அயம் அம்ஹாகம் க²ந்தி.

விமதிவினோத³னியம் (வி. வி. டீ. பாசித்திய 2.238-239) பன ‘‘உத்³தி³ஸ்ஸகதந்தி மஞ்ஞமானோதி ஏத்த² வத்து²னோ கப்பியத்தா ‘பவாரிதோவ ஹோதீ’தி வுத்தம். தஞ்சே உத்³தி³ஸ்ஸகதமேவ ஹோதி, படிக்கே²போ நத்தி². அயமேத்தா²தி⁴ப்பாயோதி ‘யேனாபுச்சி²தோ’திஆதி³னா வுத்தமேவத்த²ம் ஸந்தா⁴ய வத³தி. காரணம் பனேத்த² து³த்³த³ஸந்தி ப⁴த்தஸ்ஸ ப³ஹுதரபா⁴வே பவாரணாய ஸம்ப⁴வகாரணம் து³த்³த³ஸம், அஞ்ஞதா² கரம்ப³கேபி மச்சா²தி³ப³ஹுபா⁴வே பவாரணா ப⁴வேய்யாதி அதி⁴ப்பாயோ. யதா² சேத்த² காரணம் து³த்³த³ஸம், ஏவம் பரதோ ‘மிஸ்ஸகம் க³ண்ஹதா²’தி ஏத்தா²பி காரணம் து³த்³த³ஸமேவாதி த³ட்ட²ப்³ப³ம். யஞ்ச ‘இத³ம் பன ப⁴த்தமிஸ்ஸகமேவா’திஆதி³ காரணம் வுத்தம், தம்பி ‘அப்பதரம் ந பவாரேதீ’தி வசனேன ந ஸமேதீ’’தி ஏத்தகமேவ வுத்தம்.

‘‘விஸும் கத்வா தே³தீதி ப⁴த்தஸ்ஸ உபரி டி²தம் ரஸாதி³ம் விஸும் க³ஹேத்வா தே³தீ’’தி தீஸுபி க³ண்டி²பதே³ஸு வுத்தம். கேஹிசி பன ‘‘யதா² ப⁴த்தஸித்த²ம் ந பததி, ததா² கா³ள்ஹம் ஹத்தே²ன பீளேத்வா பரிஸ்ஸாவேத்வா தே³தீ’’தி வுத்தம். தத்தா²பி காரணம் ந தி³ஸ்ஸதி. யதா² ஹி ப⁴த்தமிஸ்ஸகம் யாகு³ம் ஆஹரித்வா ‘‘யாகு³ம் க³ண்ஹதா²’’தி வத்வா யாகு³மிஸ்ஸகம் ப⁴த்தம்பி தே³ந்தம் படிக்கி²பதோ பவாரணா ந ஹோதி, ஏவமிதா⁴பி ப³ஹுகீ²ரரஸாதீ³ஸு ப⁴த்தேஸு ‘‘கீ²ரம் க³ண்ஹதா²’’திஆதீ³னி வத்வா தி³ன்னானி கீ²ராதீ³னி வா தே³து கீ²ராதி³மிஸ்ஸகம் ப⁴த்தம் வா, உப⁴யதா²பி பவாரணாய ந ப⁴விதப்³ப³ம், தஸ்மா ‘‘விஸும் கத்வா தே³தீ’’தி தேனாகாரேன தே³ந்தம் ஸந்தா⁴ய வுத்தம், ந பன ப⁴த்தமிஸ்ஸகம் கத்வா தீ³யமானம் படிக்கி²பதோ பவாரணா ஹோதீதி த³ஸ்ஸனத்த²ந்தி க³ஹேதப்³ப³ம். யதி³ பன ப⁴த்தமிஸ்ஸகம் கத்வா தீ³யமானே பவாரணா ஹோதீதி அதி⁴ப்பாயேன அட்ட²கதா²யம் ‘‘விஸும் கத்வா தே³தீ’’தி வுத்தம், ஏவம் ஸதி அட்ட²கதா²யேவேத்த² பமாணந்தி க³ஹேதப்³ப³ம், ந பன காரணந்தரம் க³வேஸிதப்³ப³ம். விமதிவினோத³னியம் (வி. வி. டீ. பாசித்திய 2.238-239) பன ‘‘விஸும் கத்வா தே³தீதி ‘ரஸம் க³ண்ஹதா²’திஆதி³னா வாசாய விஸும் கத்வா தே³தீதி அத்தோ² க³ஹேதப்³போ³, ந பன காயேன ரஸாதி³ம் வியோஜேத்வாதி ததா² அவியோஜிதேபி படிக்கி²பதோ பவாரணாய அஸம்ப⁴வதோ அபவாரணாபஹோனகஸ்ஸ நாமேன வுத்தத்தா ப⁴த்தமிஸ்ஸகயாகு³ம் ஆஹரித்வா ‘யாகு³ம் க³ண்ஹதா²’தி வுத்தட்டா²னாதீ³ஸு விய, அஞ்ஞதா² ஏத்த² யதா² புப்³பா³பரம் ந விருஜ்ஜ²தி, ததா² அதி⁴ப்பாயோ க³ஹேதப்³போ³’’தி வுத்தம்.

நாவா வா ஸேது வாதிஆதி³ம்ஹி நாவாதி³அபி⁴ருஹனாதி³க்க²ணே கிஞ்சி ட²த்வாபி அபி⁴ருஹனாதி³காதப்³ப³த்தேபி க³மனதப்பரதாய டா²னம் நாம ந ஹோதி, ஜனஸம்மத்³தே³ன பன அனோகாஸாதி³பா⁴வேன டா²தும் ந வட்டதி. அசாலேத்வாதி வுத்தட்டா²னதோ அஞ்ஞஸ்மிம் பீட²ப்பதே³ஸே வா உத்³த⁴ம் வா அபேல்லேத்வா, தஸ்மிம் ஏவ பன டா²னே பரிவத்தேதும் லப⁴தி. தேனாஹ ‘‘யேன பஸ்ஸேனா’’திஆதி³. ஸசே உக்குடிகம் நிஸின்னோ பாதே³ அமுஞ்சித்வாபி பூ⁴மியம் நிஸீத³தி, இரியாபத²ம் விகோபேந்தோ நாம ஹோதீதி உக்குடிகாஸனம் அவிகோபேத்வா ஸுகே²ன நிஸீதி³தும் ‘‘தஸ்ஸ பன ஹேட்டா²…பே… நிஸீத³னகம் தா³தப்³ப³’’ந்தி வுத்தம். ‘‘ஆஸனம் அசாலேத்வாதி பீடே² பு²ட்டோ²காஸதோ ஆனிஸத³மம்ஸம் அமோசேத்வா அனுட்ட²ஹித்வாதி வுத்தம் ஹோதி. அதி³ன்னாதா³னே விய டா²னாசாவனம் ந க³ஹேதப்³ப³’’ந்தி தீஸுபி க³ண்டி²பதே³ஸு வுத்தம்.

121. அகப்பியகதந்தி ஏத்த² அகப்பியகதஸ்ஸேவ அனதிரித்தபா⁴வதோ கப்பியம் அகாராபேத்வா தஸ்மிம் பத்தே பக்கி²த்தம் மூலப²லாதி³யேவ அதிரித்தம் ந ஹோதி, அகப்பியபோ⁴ஜனம் வா குலதூ³ஸனாதி³னா உப்பன்னம். ஸேஸம் பன பத்தபரியாபன்னம் அதிரித்தமேவ ஹோதி, பரிபு⁴ஞ்ஜிதும் வட்டதி, தம் பன மூலப²லாதி³ம் பரிபு⁴ஞ்ஜிதுகாமேன ததோ நீஹரித்வா கப்பியம் காராபேத்வா அஞ்ஞஸ்மிம் பா⁴ஜனே ட²பேத்வா அதிரித்தம் காராபேத்வா பரிபு⁴ஞ்ஜிதப்³ப³ம்.

122. ஸோ புன காதும் ந லப⁴தீதி தஸ்மிம்யேவ பா⁴ஜனே கரியமானம் பட²மம் கதேன ஸத்³தி⁴ம் கதம் ஹோதீதி புன ஸோயேவ காதும் ந லப⁴தி, அஞ்ஞோ லப⁴தி. அஞ்ஞஸ்மிம் பன பா⁴ஜனே தேன வா அஞ்ஞேன வா காதும் வட்டதி. தேனாஹ ‘‘யேன அகதம், தேன காதப்³ப³ம், யஞ்ச அகதம், தம் காதப்³ப³’’ந்தி. தேனாபீதி ஏத்த² பி-ஸத்³தோ³ ந கேவலம் அஞ்ஞேனேவாதி இமமத்த²ம் தீ³பேதி. ஏவம் கதந்தி அஞ்ஞஸ்மிம் பா⁴ஜனே கதம்.

பேஸேத்வாதி அனுபஸம்பன்னஸ்ஸ ஹத்தே² பேஸேத்வா. இமஸ்ஸ வினயகம்மபா⁴வதோ ‘‘அனுபஸம்பன்னஸ்ஸ ஹத்தே² டி²தம் ந காதப்³ப³’’ந்தி வுத்தம்.

ஸசே பன ஆமிஸஸம்ஸட்டா²னீதி ஏத்த² ஸசே முக²க³தேனாபி அனதிரித்தேன ஆமிஸேன ஸம்ஸட்டா²னி ஹோந்தி, பாசித்தியமேவாதி வேதி³தப்³ப³ம், தஸ்மா பவாரிதேன போ⁴ஜனம் அதிரித்தம் காராபேத்வா பு⁴ஞ்ஜந்தேனபி யதா² அகதேன மிஸ்ஸம் ந ஹோதி, ஏவம் முக²ஞ்ச ஹத்த²ஞ்ச ஸுத்³த⁴ம் கத்வா பு⁴ஞ்ஜிதப்³ப³ம். கிஞ்சாபி அபவாரிதஸ்ஸ புரேப⁴த்தம் யாமகாலிகாதீ³னி ஆஹாரத்தா²ய பரிபு⁴ஞ்ஜதோபி அனாபத்தி, பவாரிதஸ்ஸ பன பவாரணமூலகம் து³க்கடம் ஹோதியேவாதி ‘‘யாமகாலிகம்…பே… அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸா’’தி பாளியம் (பாசி. 240) வுத்தம்.

இதி வினயஸங்க³ஹஸம்வண்ணனாபூ⁴தே வினயாலங்காரே

படிக்கே²பபவாரணாவினிச்ச²யகதா²லங்காரோ நாம

ஏகவீஸதிமோ பரிச்சே²தோ³.