2. பரிக்கா²ரவினிச்ச²யகதா²

6. ஏவம் தி³வாஸேய்யவினிச்ச²யம் கதே²த்வா இதா³னி பரிக்கா²ரவினிச்ச²யம் கதே²தும் ‘‘பரிக்கா²ரோதி ஸமணபரிக்கா²ரோ’’திஆதி³மாஹ. தத்த² தி³வாஸேய்யவினிச்ச²யகதா²ய ஆதி³ம்ஹி வுத்தம் ‘‘தத்தா²’’தி பத³ம் ஆனேத்வா தத்த² தேஸு மாதிகாபதே³ஸு ஸமபி⁴னிவிட்ட²ஸ்ஸ ‘‘பரிக்கா²ரோ’’தி பத³ஸ்ஸ ‘‘ஸமணபரிக்கா²ரோ’’தி அத்தோ² த³ட்ட²ப்³போ³தி யோஜனா, ஏஸ நயோ இதோ பரேபி. ஸமணபரிக்கா²ரோ வுத்தோ, ந கி³ஹிபரிக்கா²ரோதி அதி⁴ப்பாயோ. பரிஸமந்ததோ கரியதேதி பரிக்கா²ரோ, ச²த்தாதி³கோ. தத்ராதி ஸமணபரிக்கா²ரே. கப்பதீதி கப்பியோ, ந கப்பியோ அகப்பியோ, கப்பியோ ச அகப்பியோ ச கப்பியாகப்பியோ, ஸமாஹாரத்³வந்தே³பி புல்லிங்க³மிச்ச²ந்தி பண்டி³தா. கப்பியாகப்பியோ ச ஸோ பரிக்கா²ரோ சேதி ததா², தஸ்ஸ வினிச்ச²யோ கப்பியாகப்பியபரிக்கா²ரவினிச்ச²யோ.

கேசி தாலபண்ணச்ச²த்தந்தி இத³ம் உபலக்க²ணமத்தம். ஸப்³ப³ம்பி ஹி ச²த்தம் ததா²கரியமானம் ந வட்டதி. தேனேவாஹ வஜிரபு³த்³தி⁴டீகாயம் (வஜிர. டீ. பாராஜிக 85) ‘‘ஸப்³ப³பரிக்கா²ரேஸு வண்ணமட்ட²விகாரம் கரோந்தஸ்ஸ து³க்கடந்தி தீ³பேந்தேன ந வட்டதீதி வுத்தந்தி வேதி³தப்³ப³’’ந்தி. ந வண்ணமட்ட²த்தா²யாதி இமினா தி²ரகரணத்த²ம் ஏகவண்ணஸுத்தேன வினந்தி⁴யமானம் யதி³ வண்ணமட்ட²ம் ஹோதி, தத்த² ந தோ³ஸோதி த³ஸ்ஸேதி. ஆரக்³கே³னாதி நிகா²த³னமுகே²ன. யதி³ ந வட்டதி, தாதி³ஸம் ச²த்தத³ண்ட³ம் லபி⁴த்வா கிம் காதப்³ப³ந்தி ஆஹ ‘‘க⁴டகம் வா’’திஆதி³. ஸுத்தகேன வா த³ண்டோ³ வேடே²தப்³போ³தி யதா² லேகா² ந பஞ்ஞாயதி, ததா² வேடே²தப்³போ³. த³ண்ட³பு³ந்தே³தி த³ண்ட³மூலே, ச²த்தத³ண்ட³ஸ்ஸ ஹேட்டி²மகோடியந்தி அத்தோ². ச²த்தமண்ட³லிகந்தி ச²த்தஸ்ஸ அந்தோ கு²த்³த³கமண்ட³லம், ச²த்தபஞ்ஜரே மண்ட³லாகாரேன ப³த்³த⁴த³ண்ட³வலயம் வா. உக்கிரித்வாதி நின்னம், உன்னதம் வா கத்வா உட்டா²பேத்வா. ஸா வட்டதீதி ஸா லேகா² ரஜ்ஜுகேஹி ப³ந்த⁴ந்து வா மா வா, ப³ந்தி⁴தும் யுத்தட்டா²னத்தா வட்டதி. தேன வுத்தம் ஆசரியபு³த்³த⁴த³த்தமஹாதே²ரேன –

‘‘ச²த்தம் பண்ணமயம் கிஞ்சி, ப³ஹி அந்தோ ச ஸப்³ப³ஸோ;

பஞ்சவண்ணேன ஸுத்தேன, ஸிப்³பி³தும் ந ச வட்டதி.

‘‘சி²ந்தி³தும் அட்³ட⁴சந்த³ம் வா, பண்ணே மகரத³ந்தகம்;

க⁴டகம் வாளரூபம் வா, லேகா² த³ண்டே³ ந வட்டதி.

‘‘ஸிப்³பி³தும் ஏகவண்ணேன, ச²த்தம் ஸுத்தேன வட்டதி;

தி²ரத்த²ம் பஞ்சவண்ணேன, பஞ்ஜரம் வா வினந்தி⁴தும்.

‘‘க⁴டகம் வாளரூபம் வா, லேகா² வா பன கேவலா;

சி²ந்தி³த்வா வாபி க⁴ம்ஸித்வா, தா⁴ரேதும் பன வட்டதி.

‘‘அஹிச்ச²த்தகஸண்டா²னம், த³ண்ட³பு³ந்த³ம்ஹி வட்டதி;

உக்கிரித்வா கதா லேகா², ப³ந்த⁴னத்தா²ய வட்டதீ’’தி.

தஸ்ஸ வண்ணனாயம்பி ச²த்தம் பண்ணமயம் கிஞ்சீதி தாலபண்ணாதி³பண்ணச்ச²த³னம் யம் கிஞ்சி ச²த்தம். ப³ஹீதி உபரி. அந்தோதி ஹேட்டா². ஸிப்³பி³துந்தி ரூபம் த³ஸ்ஸேத்வா ஸூசிகம்மம் காதும். பண்ணேதி ச²த³னபண்ணே. அட்³ட⁴சந்த³ந்தி அட்³ட⁴சந்தா³காரம். மகரத³ந்தகந்தி மகரத³ந்தாகாரம், யம் ‘‘கி³ரிகூட’’ந்தி வுச்சதி. சி²ந்தி³தும் ந வட்டதீதி ஸம்ப³ந்தோ⁴. முக²வட்டியா நாமேத்வா ப³த்³த⁴பண்ணகோடியா வா மத்த²கமண்ட³லகோடியா வா கி³ரிகூடாதி³ம் கரோந்தி, இமினா தம் படிக்கி²த்தம். த³ண்டே³தி ச²த்தத³ண்டே³. க⁴டகந்தி க⁴டாகாரோ. வாளரூபம் வாதி ப்³யக்³கா⁴தி³வாளானம் ரூபகம் வா. லேகா²தி உக்கிரித்வா வா சி²ந்தி³த்வா வா சித்தகம்மவஸேன வா கதராஜி. பஞ்சவண்ணானம் ஸுத்தானம் அந்தரே நீலாதி³ஏகவண்ணேன ஸுத்தேன தி²ரத்த²ம் ச²த்தம் அந்தோ ச ப³ஹி ச ஸிப்³பி³தும் வா ச²த்தத³ண்ட³க்³கா³ஹகஸலாகபஞ்ஜரம் தி²ரத்த²ம் வினந்தி⁴தும் வா வட்டதீதி யோஜனா. பஞ்சவண்ணானம் ஏகவண்ணேன தி²ரத்த²ந்தி இமினா அனேகவண்ணேஹி ஸுத்தேஹி வண்ணமட்ட²த்தா²ய ஸிப்³பி³துஞ்ச வினந்தி⁴துஞ்ச ந வட்டதீதி தீ³பேதி. போத்த²கேஸு பன ‘‘பஞ்சவண்ணேனா’’தி பாடோ² தி³ஸ்ஸதி, தஸ்ஸ ஏகவண்ணேன பஞ்சவண்ணேன வா ஸுத்தேன தி²ரத்த²ம் ஸிப்³பி³தும் வினந்தி⁴தும் வா வட்டதீதி யோஜனா காதப்³பா³ ஹோதி.

ஏத்த² ச ஹேட்டா² வுத்தேன ‘‘பஞ்சவண்ணேன ஸுத்தேன ஸிப்³பி³தும் ந ச வட்டதீ’’தி பாடே²ன ச ‘‘கேசி தாலபண்ணச்ச²த்தம் அந்தோ வா ப³ஹி வா பஞ்சவண்ணேன ஸுத்தேன ஸிப்³பே³த்வா வண்ணமட்ட²ம் கரோந்தி, தம் ந வட்டதி, ஏகவண்ணே பன நீலேன வா பீதகேன வா யேன கேனசி ஸுத்தேன அந்தோ வா ப³ஹி வா ஸிப்³பி³தும், ச²த்தத³ண்ட³க்³கா³ஹகம் ஸலாகபஞ்ஜரம் வா வினந்தி⁴தும் வட்டதி, தஞ்ச கோ² தி²ரகரணத்த²ம், ந வண்ணமட்ட²த்தா²யா’’தி அட்ட²கதா²பாடே²ன ச விருஜ்ஜ²தி, தஸ்மா ஸோ ந க³ஹேதப்³போ³.

லேகா² வா பன கேவலாதி யதா²வுத்தப்பகாரா ஸகலா லேகா² வா. சி²ந்தி³த்வாதி உக்கிரித்வா கதம் சி²ந்தி³த்வா. க⁴ம்ஸித்வாதி சித்தகம்மாதி³வஸேன கதம் க⁴ம்ஸித்வா. த³ண்ட³பு³ந்த³ம்ஹீதி ச²த்தத³ண்ட³ஸ்ஸ பஞ்ஜரே கா³ஹணத்தா²ய பா²லிதபு³ந்த³ம்ஹி, மூலேதி அத்தோ². அயமேத்த² நிஸ்ஸந்தே³ஹே வுத்தனயோ. கு²த்³த³ஸிக்கா²க³ண்டி²பதே³ பன ‘‘ச²த்தபிண்டி³யா மூலே’’தி வுத்தம். அஹிச்ச²த்தகஸண்டா²னந்தி பு²ல்லஅஹிச்ச²த்தகாகாரம். ரஜ்ஜுகேஹி கா³ஹாபேத்வா த³ண்டே³ ப³ந்த⁴ந்தி, தஸ்மிம் ப³ந்த⁴னட்டா²னே வலயமிவ உக்கிரித்வாதி வலயம் விய உபட்டா²பேத்வா. ப³ந்த⁴னத்தா²யாதி வாதேன யதா² ந சலதி, ஏவம் ரஜ்ஜூஹி த³ண்டே³ பஞ்ஜரஸ்ஸ ப³ந்த⁴னத்தா²ய. உக்கிரித்வா கதா லேகா² வட்டதீதி யோஜனா. யதா² வாதப்பஹாரேன அசலனத்த²ம் ச²த்தமண்ட³லிகம் ரஜ்ஜுகேஹி கா³ஹாபேத்வா த³ண்டே³ ப³ந்த⁴ந்தி, தஸ்மிம் ப³ந்த⁴னட்டா²னே வலயமிவ உக்கிரித்வா லேக²ம் ட²பேந்தி, ஸா வட்டதீதி. ஸசேபி ந ப³ந்த⁴தி, ப³ந்த⁴னாரஹட்டா²னத்தா வலயம் உக்கிரித்வா வட்டதீதி க³ண்டி²பதே³ வத்தந்தீதி ஆக³தம், தஸ்மா பக்க²ரணேஸு ஆக³தனயேனேவ ச²த்தே படிபஜ்ஜிதப்³ப³ந்தி.

7. சீவரே பன நானாஸுத்தகேஹீதி (ஸாரத்த². டீ. 2.85; வி. வி. டீ. 1.85) நானாவண்ணேஹி ஸுத்தேஹி. இத³ஞ்ச ததா² கரோந்தானம் வஸேன வுத்தம், ஏகவண்ணஸுத்தகேனபி ந வட்டதியேவ. ‘‘பகதிஸூசிகம்மமேவ வட்டதீ’’தி ஹி வுத்தம். பட்டமுகே²தி த்³வின்னம் பட்டானம் ஸங்க⁴டிதட்டா²னம் ஸந்தா⁴யேதம் வுத்தம். பரியந்தேதி சீவரபரியந்தே. அனுவாதம் ஸந்தா⁴யேதம் வுத்தம். வேணீதி வரகஸீஸாகாரேன ஸிப்³ப³னம். ஸங்க²லிகந்தி த்³விகு³ணஸங்க²லிகாகாரேன ஸிப்³ப³னம், பி³ளாலஸங்க²லிகாகாரேன ஸிப்³ப³னம் வா. வேணிம் வா ஸங்க²லிகம் வா கரோந்தீதி கரணகிரியாய ஸம்ப³ந்தோ⁴. அக்³கி⁴யம் நாம சேதியஸண்டா²னம், யம் ‘‘அக்³கி⁴யத்த²ம்போ⁴’’தி வத³ந்தி. க³யா நாம மூலே தனுகம் அக்³கே³ மஹந்தம் கத்வா க³தா³காரேன ஸிப்³ப³னம். முக்³க³ரோ நாம மூலே ச அக்³கே³ ச ஏகஸதி³ஸம் கத்வா முக்³க³ராகாரேன ஸிப்³ப³னம். கக்கடக்கீ²னி உக்கிரந்தீதி க³ண்டி²கபட்டபாஸகபட்டானம் அந்தே பாளிப³த்³த⁴ம் கத்வா கக்கடகானம் அக்கி²ஸண்டா²னம் பட்ட²பேந்தி, கரோந்தீதி அத்தோ². ‘‘கோணஸுத்தபிளகாதி க³ண்டி²கபாஸகபட்டானம் கோணேஹி நீஹடஸுத்தானம் கோடியோ’’தி தீஸுபி க³ண்டி²பதே³ஸு வுத்தம். கத²ம் பன தா பிளகா து³விஞ்ஞேய்யரூபா காதப்³பா³தி? கோணேஹி நீஹடஸுத்தானம் அந்தேஸு ஏகவாரம் க³ண்டி²ககரணேன வா புன நிவத்தேத்வா ஸிப்³ப³னேன வா து³விஞ்ஞேய்யஸபா⁴வம் கத்வா ஸுத்தகோடியோ ரஸ்ஸம் கத்வா சி²ந்தி³தப்³பா³. த⁴ம்மஸிரித்தே²ரேன பன ‘‘கோணஸுத்தா ச பிளகா, து³விஞ்ஞேய்யாவ கப்பரே’’தி வுத்தம், ததா² ஆசரியபு³த்³த⁴த³த்தத்தே²ரேனபி ‘‘ஸுத்தா ச பிளகா தத்த², து³விஞ்ஞேய்யாவ தீ³பிதா’’தி வுத்தம், தஸ்மா தேஸம் மதேன கோணஸுத்தா ச பிளகா ச கோணஸுத்தபிளகாதி ஏவமேத்த² அத்தோ² த³ட்ட²ப்³போ³.

விமதிவினோத³னியம்பி (வி. வி. டீ. 1.85) கோணஸுத்தபிளகாதி க³ண்டி²கபாஸகபட்டானம் கோணேஹி ப³ஹி நிக்³க³தஸுத்தானம் பிளகாகாரேன ட²பிதகோடியோதி கேசி வத³ந்தி, தே பிளகே சி²ந்தி³த்வா து³விஞ்ஞேய்யா காதப்³பா³தி தேஸம் அதி⁴ப்பாயோ. கேசி பன ‘‘கோணஸுத்தா ச பிளகா சாதி த்³வேயேவா’’தி வத³ந்தி, தேஸம் மதேன க³ண்டி²கபாஸகபட்டானம் கோணதோ கோணம் நீஹடஸுத்தா கோணஸுத்தா நாம. ஸமந்ததோ பன பரியந்தேன க³தா சதுரஸ்ஸஸுத்தா பிளகா நாம. தம் து³வித⁴ம்பி கேசி சீவரதோ விஸும் பஞ்ஞானத்தா²ய விகாரயுத்தம் கரோந்தி, தம் நிஸேதா⁴ய ‘‘து³விஞ்ஞேய்யரூபா வட்டதீ’’தி வுத்தம், ந பன ஸப்³ப³தா² அசக்கு²கோ³சரபா⁴வேன ஸிப்³ப³னத்தா²ய ததா²ஸிப்³ப³னஸ்ஸ அஸக்குணேய்யத்தா, யதா² பகதிசீவரதோ விகாரோ ந பஞ்ஞாயதி, ஏவம் ஸிப்³பி³தப்³ப³ந்தி அதி⁴ப்பாயோ. ரஜனகம்மதோ புப்³பே³ பஞ்ஞாயமானோபி விஸேஸோ சீவரே ரத்தே ஏகவண்ணதோ ந பஞ்ஞாயதீதி ஆஹ ‘‘சீவரே ரத்தே’’தி.

8. மணினாதி நீலமணிஆதி³பாஸாணேன, அம்ஸப³த்³த⁴ககாயப³ந்த⁴னாதி³கம் அசீவரத்தா ஸங்கா²தீ³ஹி க⁴ம்ஸிதும் வட்டதீதி வத³ந்தி. கண்ணஸுத்தகந்தி சீவரஸ்ஸ தீ³க⁴தோ திரியஞ்ச ஸிப்³பி³தானம் சதூஸு கண்ணேஸு கோணேஸு ச நிக்க²ந்தானம் ஸுத்தஸீஸானமேதம் நாமம், தம் சி²ந்தி³த்வாவ பாருபிதப்³ப³ம். தேனாஹ ‘‘ரஜிதகாலே சி²ந்தி³தப்³ப³’’ந்தி. ப⁴க³வதா அனுஞ்ஞாதம் ஏகம் கண்ணஸுத்தம்பி அத்தி², தம் பன நாமேன ஸதி³ஸம்பி இதோ அஞ்ஞமேவாதி த³ஸ்ஸேதும் ‘‘யம் பனா’’திஆதி³ வுத்தம். லக்³க³னத்தா²யாதி சீவரரஜ்ஜுயம் சீவரப³ந்த⁴னத்தா²ய. விமதிவினோத³னியம் (வி. வி. டீ. 1.85) ஏத்தகமேவ வுத்தம்.

ஸாரத்த²தீ³பனியம் (ஸாரத்த². டீ. 2.85) பன ‘‘பாஸகம் கத்வா ப³ந்தி⁴தப்³ப³ந்தி ரஜனகாலே ப³ந்தி⁴தப்³ப³ம், ஸேஸகாலே மோசேத்வா ட²பேதப்³ப³’’ந்தி வுத்தம். வினயஸங்க³ஹப்பகரணஸ்ஸ போராணடீகாயம்பி இத³மேவ க³ஹேத்வா வுத்தம், தம் பன சீவரக்க²ந்த⁴கே (மஹாவ. 344) ‘‘மஜ்ஜே²ன லக்³கே³ந்தி, உப⁴தோ க³லதி, ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கண்ணே ப³ந்தி⁴துந்தி. கண்ணோ ஜீரதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கண்ணஸுத்தக’’ந்தி ஏவம் அனுஞ்ஞாதசீவரரஜ்ஜுயம் ரஜித்வா பஸாரிதசீவரஸ்ஸ ஓலம்ப³கஸுத்தம் ஸந்தா⁴ய வுத்தந்தி த³ட்ட²ப்³ப³ம்.

க³ண்டி²கேதி சீவரபாருபனகாலே பாஸகே லக்³கா³பனத்த²ம் கதே த³ந்தாதி³மயே க³ண்டி²கே. பிளகாதி பி³ந்து³ம் பி³ந்து³ம் கத்வா உட்டா²பேதப்³ப³பிளகா. வுத்தஞ்ஹேதம் வினயவினிச்ச²யப்பகரணே –

‘‘நானாவண்ணேஹி ஸுத்தேஹி, மண்ட³னத்தா²ய சீவரம்;

ஸமம் ஸதபதா³தீ³னம், ஸிப்³பி³தும் ந ச வட்டதி.

‘‘பத்தஸ்ஸ பரியந்தே வா, ததா² பத்தமுகே²பி ச;

வேணிம் ஸங்க²லிகம் வாபி, கரோதோ ஹோதி து³க்கடம்.

‘‘பட்டம்பி க³ண்டி²பாஸானம், அட்ட²கோணாதி³கம் விதி⁴ம்;

தத்த²க்³கி⁴யக³தா³ரூபம், முக்³க³ராதி³ம் கரோந்தி ச.

‘‘தத்த² கக்கடகக்கீ²னி, உட்டா²பேந்தி ந வட்டதி;

ஸுத்தா ச பிளகா தத்த², து³விஞ்ஞேய்யாவ தீ³பிதா.

‘‘சதுகோணாவ வட்டந்தி, க³ண்டி²பாஸகபட்டகா;

கண்ணகோணேஸு ஸுத்தானி, ரத்தே சி²ந்தே³ய்ய சீவரே.

‘‘ஸூசிகம்மவிகாரம் வா, அஞ்ஞம் வா பன கிஞ்சிபி;

சீவரே பி⁴க்கு²னா காதும், காராபேதும் ந வட்டதி.

‘‘யோ ச பக்கி²பதி பி⁴க்கு² சீவரம்,

கஞ்ஜிபிட்ட²க²லிஅல்லிகாதி³ஸு;

வண்ணமட்ட²மபி⁴பத்த²யம் பரம்;

தஸ்ஸ நத்தி² பன முத்தி து³க்கடா.

‘‘ஸூசிஹத்த²மலாதீ³னம், கரணே சீவரஸ்ஸ ச;

ததா² கிலிட்ட²காலே ச, தோ⁴வனத்த²ம் து வட்டதி.

‘‘ரஜனே பன க³ந்த⁴ம் வா, தேலம் வா லாக²மேவ வா;

கிஞ்சி பக்கி²பிதும் தத்த², பி⁴க்கு²னோ ந ச வட்டதி.

‘‘ஸங்கே²ன மணினா வாபி, அஞ்ஞேனபி ச கேனசி;

சீவரம் ந ச க⁴ட்டேய்ய, க⁴ம்ஸிதப்³ப³ம் ந தோ³ணியா.

‘‘சீவரம் தோ³ணியம் கத்வா, நாதிக⁴ட்டேய்ய முட்டி²னா;

ரத்தம் பஹரிதும் கிஞ்சி, ஹத்தே²ஹேவ ச வட்டதி.

‘‘க³ண்டி²கே பன லேகா² வா, பிளகா வா ந வட்டதி;

கப்பபி³ந்து³விகாரோ வா, பாளிகண்ணிகபே⁴த³தோ’’தி.

வினயஸாரத்த²ஸந்தீ³பனியம்பி ஸமம் ஸதபதா³தீ³னந்தி ஸதபதா³தீ³ஹி ஸதி³ஸம். துல்யத்தே² கரணவசனப்பஸங்கே³ ஸாமிவசனம். பட்டஸ்ஸ பரியந்தே வாதி அனுவாதஸ்ஸ உப⁴யபரியந்தே வா. பட்டமுகே²பி வாதி த்³வின்னம் ஆயாமவித்தா²ரபட்டானம் ஸங்க⁴டிதட்டா²னே, கண்ணேபி வா ஏகஸ்ஸேவ வா பட்டஸ்ஸ ஊனபூரணத்த²ம் க⁴டிதட்டா²னேபி வா. வேணீதி குத்³ரூஸஸீஸாகாரேன ஸிப்³ப³னம். கேசி ‘‘வரகஸீஸாகாரேனா’’தி வத³ந்தி. ஸங்க²லிகந்தி பி³ளாலதா³மஸதி³ஸஸிப்³ப³னம். கேசி ‘‘ஸதபதி³ஸதி³ஸ’’ந்தி வத³ந்தி.

பட்டம்பீதி பத்தம்பி. அட்ட²கோணாதி³கோ விதி⁴ பகாரோ ஏதஸ்ஸாதி அட்ட²கோணாதி³கவிதி⁴, தம். அட்ட²கோணாதி³கந்தி வா கா³தா²ப³ந்த⁴வஸேன நிக்³க³ஹிதாக³மோ. ‘‘அட்ட²கோணாதி³கம் விதி⁴’’ந்தி ஏதம் ‘‘பட்ட’’ந்தி ஏதஸ்ஸ ஸமானாதி⁴கரணவிஸேஸனம், கிரியாவிஸேஸனம் வா. ‘‘கரோந்தீ’’தி இமினா ஸம்ப³ந்தோ⁴. அத² வா பட்டந்தி ஏத்த² பு⁴ம்மத்தே² உபயோக³வசனம், பட்டேதி அத்தோ². இமஸ்மிம் பக்கே² அட்ட²கோணாதி³கந்தி உபயோக³வசனம். விதி⁴ந்தி ஏதஸ்ஸ விஸேஸனம். இத⁴ வக்க²மானசதுகோணஸண்டா²னதோ அஞ்ஞம் அட்ட²கோணாதி³கம் நாம. தத்தா²தி தஸ்மிம் பட்டத்³வயே. அக்³கி⁴யக³தா³ரூபந்தி அக்³கி⁴யஸண்டா²னஞ்சேவ க³தா³ஸண்டா²னஞ்ச ஸிப்³ப³னம். முக்³க³ரந்தி லகு³ளஸண்டா²னஸிப்³ப³னம். ஆதி³-ஸத்³தே³ன சேதியாதி³ஸண்டா²னானம் க³ஹணம்.

தத்தா²தி பட்டத்³வயே தஸ்மிம் டா²னே. கக்கடகக்கீ²னீதி குளீரகச்சி²ஸதி³ஸானி ஸிப்³ப³னவிகாரானி. உட்டா²பேந்தீதி கரோந்தி. தத்தா²தி தஸ்மிம் க³ண்டி²கபாஸகபட்டகே. ஸுத்தாதி கோணதோ கோணம் ஸிப்³பி³தஸுத்தா சேவ சதுரஸ்ஸே ஸிப்³பி³தஸுத்தா ச. பிளகாதி தேஸமேவ ஸுத்தானம் நிவத்தேத்வா ஸிப்³பி³தகோடியோ ச. து³விஞ்ஞேய்யாவாதி ரஜனகாலே து³விஞ்ஞேய்யரூபா அனோளாரிகா தீ³பிதா வட்டந்தீதி. யதா²ஹ ‘‘கோணஸுத்தபிளகா ச சீவரே ரத்தே து³விஞ்ஞேய்யரூபா வட்டந்தீ’’தி (பாரா. அட்ட². 1.85).

க³ண்டி²கபட்டிகா பாஸபட்டிகாதி யோஜனா. கண்ணகோணேஸு ஸுத்தானீதி சீவரகண்ணே ஸுத்தா சேவ பாஸகபட்டானம் கோணேஸு ஸுத்தானி ச அச்சி²ந்த³தி. ஏத்த² ச சீவரே ஆயாமதோ வித்தா²ரதோ ச ஸிப்³பி³த்வா அனுவாததோ ப³ஹி நிக்க²மிதஸுத்தம் சீவரம் ரஜித்வா ஸுக்கா²பனகாலே ரஜ்ஜுயா வா சீவரவம்ஸே வா ப³ந்தி⁴த்வா ஓலம்பி³தும் அனுவாதே ப³ந்த⁴ஸுத்தானி ச கண்ணஸுத்தானி நாம. யதா²ஹ ‘‘சீவரஸ்ஸ கண்ணஸுத்தகம் ந ச வட்டதி, ரஜிதகாலே சி²ந்தி³தப்³ப³ம், யம் பன ‘அனுஜானாமி பி⁴க்க²வே கண்ணஸுத்தக’ந்தி ஏவம் அனுஞ்ஞாதம், தம் அனுவாதே பாஸகம் கத்வா ப³ந்தி⁴தப்³ப³ம் ரஜனகாலே லக்³க³னத்தா²யா’’தி (பாரா. அட்ட². 1.85).

ஸூசிகம்மவிகாரம் வாதி சீவரமண்ட³னத்தா²ய நானாஸுத்தகேஹி ஸதபதி³ஸதி³ஸம் ஸிப்³ப³ந்தா ஆக³ந்துகபட்டம் ட²பேந்தி, ஏவரூபம் ஸூசிகம்மவிகாரம் வா. அஞ்ஞம் வா பன கிஞ்சிபீதி அஞ்ஞம்பி யம் கிஞ்சி மாலாகம்மமிக³பக்கி²பதா³தி³கம் ஸிப்³ப³னவிகாரம். காதுந்தி ஸயம் காதும். காராபேதுந்தி அஞ்ஞேன வா காராபேதும்.

யோ பி⁴க்கு² பரம் உத்தமம் வண்ணமட்ட²மபி⁴பத்த²யந்தோ கஞ்ஜிகபிட்ட²க²லிஅல்லிகாதீ³ஸு சீவரம் பக்கி²பதி, தஸ்ஸ பன பி⁴க்கு²னோ து³க்கடா மோக்கோ² ந விஜ்ஜதீதி யோஜனா. கஞ்ஜிகந்தி வாயனதந்தமக்க²னம் கஞ்ஜிகஸதி³ஸா ஸுலாகஞ்ஜிகம். பிட்ட²ந்தி தண்டு³லபிட்ட²ம். தண்டு³லபிட்டே²ஹி பக்கா க²லி. அல்லிகாதி நிய்யாஸோ. ஆதி³-ஸத்³தே³ன லாகா²தீ³னம் க³ஹணம். சீவரஸ்ஸ கரணே கரணகாலே ஸமுட்டி²தானம் ஸூசிஹத்த²மலாதீ³னம் கிலிட்ட²காலே தோ⁴வனத்த²ஞ்ச கஞ்ஜிகபிட்ட²க²லிஅல்லிகாதீ³ஸு பக்கி²பதி, வட்டதீதி யோஜனா.

தத்தா²தி யேன கஸாவேன சீவரம் ரஜதி, தஸ்மிம் ரஜனே சீவரஸ்ஸ ஸுக³ந்த⁴பா⁴வத்தா²ய க³ந்த⁴ம் வா உஜ்ஜலபா⁴வத்தா²ய தேலம் வா வண்ணத்தா²ய லாக²ம் வா. கிஞ்சீதி ஏவரூபம் யம் கிஞ்சி. மணினாதி பாஸாணேன. அஞ்ஞேனபி ச கேனசீதி யேன உஜ்ஜலம் ஹோதி, ஏவரூபேன முக்³க³ராதி³னா அஞ்ஞேனபி கேனசி வத்து²னா. தோ³ணியாதி ரஜனம்ப³ணே ந க⁴ம்ஸிதப்³ப³ம் ஹத்தே²ன கா³ஹாபேத்வா ந க³ஹேதப்³ப³ம். ரத்தம் சீவரம் ஹத்தே²ஹி கிஞ்சி தோ²கம் பஹரிதும் வட்டதீதி யோஜனா. யத்த² பக்கரஜனம் பக்கி²பந்தி, ஸா ரஜனதோ³ணீ. தத்த² அம்ஸப³த்³த⁴ககாயப³ந்த⁴னாதி³ம் க⁴ட்டேதும் வட்டதீதி க³ண்டி²பதே³ வுத்தம்.

க³ண்டி²கேதி வேளுத³ந்தவிஸாணாதி³மயக³ண்டி²கே. லேகா² வாதி வட்டாதி³பே⁴தா³ லேகா² வா. பிளகாதி ஸாஸபபீ³ஜஸதி³ஸா கு²த்³த³கபு³ப்³பு³ளா. பாளிகண்ணிகபே⁴த³தோதி மணிகாவளிரூபபுப்ப²கண்ணிகரூபபே⁴த³தோ. ‘‘கப்பபி³ந்து³விகாரோ வா ந வட்டதீதி யோஜனா’’தி வுத்தம், தஸ்மா ததே²வ சீவரே படிபஜ்ஜிதப்³ப³ம்.

9. பத்தே வா தா²லகே வாதிஆதீ³ஸு தா²லகேதி தம்பா³தி³மயே புக்³க³லிகே திவிதே⁴பி கப்பியதா²லகே. ந வட்டதீதி மணிவண்ணகரணபயோகோ³ ந வட்டதி, தேலவண்ணபயோகோ³ பன வட்டதி. தேலவண்ணோதி ஸமணஸாருப்பவண்ணம் ஸந்தா⁴ய வுத்தம், மணிவண்ணம் பன பத்தம் அஞ்ஞேன கதம் லபி⁴த்வா பரிபு⁴ஞ்ஜிதும் வட்டதீதி வத³ந்தி. பத்தமண்ட³லேதி திபுஸீஸாதி³மயே பத்தட்ட²பனகமண்ட³லே. ‘‘ந பி⁴க்க²வே விசித்ரானி பத்தமண்ட³லானி தா⁴ரேதப்³பா³னி ரூபகாகிண்ணானி பி⁴த்திகம்மகதானீ’’தி (சூளவ. 253) வுத்தத்தா ‘‘பி⁴த்திகம்மம் ந வட்டதீ’’தி வுத்தம். ‘‘அனுஜானாமி, பி⁴க்க²வே, மகரத³ந்தகம் சி²ந்தி³து’’ந்தி (சூளவ. 253) வுத்தத்தா ‘‘மகரத³ந்தகம் பன வட்டதீ’’தி வுத்தம். தேனாஹு போராணா –

‘‘தா²லகஸ்ஸ ச பத்தஸ்ஸ, ப³ஹி அந்தோபி வா பன;

ஆரக்³கே³ன கதா லேகா², ந ச வட்டதி காசிபி.

‘‘ஆரோபேத்வா ப⁴மம் பத்தம், மஜ்ஜித்வா சே பசந்தி ச;

‘மணிவண்ணம் கரிஸ்ஸாம’, இதி காதும் ந வட்டதி.

‘‘பத்தமண்ட³லகே கிஞ்சி;

பி⁴த்திகம்மம் ந வட்டதி;

ந தோ³ஸோ கோசி தத்த²ஸ்ஸ;

காதும் மகரத³ந்தக’’ந்தி.

வினயஸாரத்த²ஸந்தீ³பனியம்பி ஆரக்³கே³னாதி ஆரகண்டகக்³கே³ன, ஸூசிமுகே²ன வா. காசிபி லேகா²தி வட்டககோ³முத்தாதி³ஸண்டா²னா யா காசிபி ராஜி. ப⁴மம் ஆரோபேத்வாதி ப⁴மே அல்லீயாபேத்வா. பத்தமண்ட³லகேதி பத்தே ச²விரக்க²ணத்தா²ய திபுஸீஸாதீ³ஹி கதே பத்தஸ்ஸ ஹேட்டா² ஆதா⁴ராதீ³னம் உபரி காதப்³பே³ பத்தமண்ட³லகே. பி⁴த்திகம்மந்தி நானாகாரரூபககம்மவிசித்தம். யதா²ஹ ‘‘ந, பி⁴க்க²வே, விசித்ரானி பத்தமண்ட³லானி தா⁴ரேதப்³பா³னி ரூபகாகிண்ணானி பி⁴த்திகம்மகதானீ’’தி. தத்தா²தி தஸ்மிம் பத்தமண்ட³லே. அஸ்ஸாதி பி⁴க்கு²ஸ்ஸ. மகரத³ந்தகந்தி கி³ரிகூடந்தி வுத்தம், தஸ்மா ஏவம் பத்ததா²லகாதீ³ஸு படிபஜ்ஜிதப்³ப³ம்.

த⁴மகரண…பே… லேகா² ந வட்டதீதி ஆரக்³கே³ன தி³ன்னலேகா² ந வட்டதி, ஜாதிஹிங்கு³லிகாதி³வண்ணேஹி கதலேகா² பன வட்டதி. ச²த்தமுக²வட்டியந்தி த⁴மகரணஸ்ஸ ஹத்தே²ன க³ஹணத்த²ம் கதஸ்ஸ ச²த்தாகாரஸ்ஸ முக²வட்டியம். ‘‘பரிஸ்ஸாவனப³ந்த⁴ட்டா²னே’’தி கேசி. வினயவினிச்ச²யேபி –

‘‘ந த⁴ம்மகரணச்ச²த்தே, லேகா² காசிபி வட்டதி;

குச்சி²யம் வா ட²பேத்வா தம், லேக²ம் து முக²வட்டிய’’ந்தி. –

வுத்தம். தட்டீகாயம் பன ‘‘முக²வட்டியா யா லேகா² பரிஸ்ஸாவனப³ந்த⁴னத்தா²ய அனுஞ்ஞாதா, தம் லேக²ம் ட²பேத்வா த⁴மகரணச்ச²த்தே வா குச்சி²யம் வா காசி லேகா² ந வட்டதீதி யோஜனா’’தி வுத்தம், தஸ்மா தத்த² வுத்தனயேனேவ த⁴மகரணே படிபஜ்ஜிதப்³ப³ம்.

10. காயப³ந்த⁴னே பன கக்கடக்கீ²னீதி கக்கடகஸ்ஸ அக்கி²ஸதி³ஸானி. மகரமுக²ந்தி மகரமுக²ஸண்டா²னம். தே³ட்³டு³ப⁴ஸீஸந்தி உத³கஸப்பஸீஸஸதி³ஸஸண்டா²னானி. அச்சீ²னீதி குஞ்ஜரச்சி²ஸண்டா²னானி. ஏகமேவ வட்டதீதி ஏத்த² ஏகரஜ்ஜுகம் த்³விகு³ணதிகு³ணம் கத்வா ப³ந்தி⁴தும் ந வட்டதி, ஏகமேவ பன ஸதவாரம்பி ஸரீரம் பரிக்கி²பித்வா ப³ந்தி⁴தும் வட்டதி. ‘‘ப³ஹுரஜ்ஜுகே ஏகதோ கத்வா ஏகேன நிரந்தரம் வேடே²த்வா கதம் ப³ஹுரஜ்ஜுகந்தி ந வத்தப்³ப³ம், தம் வட்டதீ’’தி வுத்தத்தா தம் முரஜஸங்க²ம் ந க³ச்ச²தீதி வேதி³தப்³ப³ம். முரஜஞ்ஹி நானாவண்ணேஹி ஸுத்தேஹி முரஜவட்டிஸண்டா²னம் வேடே²த்வா கரோந்தி. இத³ம் பன முரஜம் மத்³த³வீணஸங்கா²தம் பாமங்க³ஸண்டா²னஞ்ச த³ஸாஸு வட்டதி ‘‘காயப³ந்த⁴னஸ்ஸ த³ஸா ஜீரந்தி. அனுஜானாமி, பி⁴க்க²வே, முரஜம் மத்³த³வீண’’ந்தி (சூளவ. 278) வுத்தத்தா.

விதே⁴தி த³ஸாபரியோஸானே தி²ரபா⁴வாய த³ந்தவிஸாணஸுத்தாதீ³ஹி கதே விதே⁴. ஸாரத்த²தீ³பனியம் (ஸாரத்த². டீ. 2.85) பன ‘‘காயப³ந்த⁴னஸ்ஸ பாஸந்தே த³ஸாமூலே தஸ்ஸ தி²ரபா⁴வத்த²ம் கத்தப்³பே³ த³ந்தவிஸாணாதி³மயே விதே⁴’’தி வுத்தம். அட்ட²மங்க³லானி நாம ஸங்கோ², சக்கம், புண்ணகும்போ⁴, க³யா, ஸிரீவச்சோ², அங்குஸோ, த⁴ஜம், ஸோவத்தி²கந்தி. மச்ச²யுக³ளச²த்தனந்தி³யாவட்டாதி³வஸேனபி வத³ந்தி. பரிச்சே²த³லேகா²மத்தந்தி த³ந்தாதீ³ஹி கதஸ்ஸ வித⁴ஸ்ஸ உபோ⁴ஸு கோடீஸு காதப்³ப³பரிச்சே²த³ராஜிமத்தம். வினயவினிச்ச²யப்பகரணேபி –

‘‘ஸுத்தம் வா தி³கு³ணம் கத்வா, கோட்டேந்தி ச தஹிம் தஹிம்;

காயப³ந்த⁴னஸோப⁴த்த²ம், தம் ந வட்டதி பி⁴க்கு²னோ.

‘‘த³ஸாமுகே² த³ள்ஹத்தா²ய, த்³வீஸு அந்தேஸு வட்டதி;

மாலாகம்மலதாகம்ம-சித்திகம்பி ந வட்டதி.

‘‘அக்கீ²னி தத்த² த³ஸ்ஸேத்வா;

கோட்டிதே பன கா கதா².

கக்கடக்கீ²னி வா தத்த²;

உட்டா²பேதும் ந வட்டதி.

‘‘க⁴டம் தே³ட்³டு³ப⁴ஸீஸம் வா, மகரஸ்ஸ முக²ம்பி வா;

விகாரரூபம் யம் கிஞ்சி, ந வட்டதி த³ஸாமுகே².

‘‘உஜுகம் மச்ச²கண்டம் வா, மட்ட²ம் வா பன பட்டிகம்;

க²ஜ்ஜூரிபத்தகாகாரம், கத்வா வட்டதி கோட்டிதம்.

‘‘பட்டிகா ஸூகரந்தந்தி, து³வித⁴ம் காயப³ந்த⁴னம்;

ரஜ்ஜுகா து³ஸ்ஸபட்டாதி³, ஸப்³ப³ம் தஸ்ஸானுலோமிகம்.

‘‘முரஜம் மத்³த³வீணஞ்ச, தே³ட்³டு³ப⁴ஞ்ச கலாபு³கம்;

ரஜ்ஜுயோ ச ந வட்டந்தி, புரிமா த்³வேத³ஸா ஸியும்.

‘‘த³ஸா பாமங்க³ஸண்டா²னா, நித்³தி³ட்டா² காயப³ந்த⁴னே;

ஏகா த்³விதிசதஸ்ஸோ வா, வட்டந்தி ந ததோ பரம்.

‘‘ஏகரஜ்ஜுமயம் வுத்தம், முனினா காயப³ந்த⁴னம்;

தஞ்ச பாமங்க³ஸண்டா²னம், ஏகம்பி ச ந வட்டதி.

‘‘ரஜ்ஜுகே ஏகதோ கத்வா, ப³ஹூ ஏகாய ரஜ்ஜுயா;

நிரந்தரஞ்ஹி வேடே²த்வா, கதம் வட்டதி ப³ந்தி⁴தும்.

‘‘த³ந்தகட்ட²விஸாணட்டி²-லோஹவேளுனளப்³ப⁴வா;

ஜதுஸங்க²மயா ஸுத்த-ப²லஜா வித⁴கா மதா.

‘‘காயப³ந்த⁴னவிதே⁴பி, விகாரோ ந ச வட்டதி;

தத்த² தத்த² பரிச்சே²த³-லேகா²மத்தம் து வட்டதீ’’தி. –

வுத்தம்.

வினயஸாரத்த²ஸந்தீ³பனியம்பி தஹிம் தஹிந்தி பட்டிகாய தத்த² தத்த². தந்தி ததா²கோட்டிததி³கு³ணஸுத்தகாயப³ந்த⁴னம். அந்தேஸு த³ள்ஹத்தா²ய த³ஸாமுகே² தி³கு³ணம் கத்வா கோட்டேந்தி, வட்டதீதி யோஜனா. சித்தகம்பீதி மாலாகம்மலதாகம்மசித்தயுத்தம்பி காயப³ந்த⁴னம். அக்கீ²னீதி குஞ்ஜரக்கீ²னி. தத்தா²தி காயப³ந்த⁴னே ந வட்டதீதி கா கதா². உட்டா²பேதுந்தி உக்கிரிதும்.

க⁴டந்தி க⁴டஸண்டா²னம். தே³ட்³டு³ப⁴ஸீஸம் வாதி உத³கஸப்பஸீஸம் முக²ஸண்டா²னம் வா. யம் கிஞ்சி விகாரரூபம் த³ஸாமுகே² ந வட்டதீதி யோஜனா. ஏத்த² ச உப⁴யபஸ்ஸேஸு மச்ச²கண்டகயுத்தம் மச்ச²ஸ்ஸ பிட்டி²கண்டகம் விய யஸ்ஸா பட்டிகாய வாயனம் ஹோதி, இத³ம் காயப³ந்த⁴னம் மச்ச²கண்டகம் நாம. யஸ்ஸ க²ஜ்ஜூரிபத்தஸண்டா²னமிவ வாயனம் ஹோதி, தம் க²ஜ்ஜூரிபத்தகாகாரம் நாம.

பகதிவிகாரா பட்டிகா ஸூகரந்தம் நாம குஞ்சிகாகோஸஸண்டா²னம். தஸ்ஸ து³வித⁴ஸ்ஸ காயப³ந்த⁴னஸ்ஸ. தத்த² ரஜ்ஜுகா ஸூகரந்தானுலோமிகா, து³ஸ்ஸபட்டம் பட்டிகானுலோமிகம். ஆதி³-ஸத்³தே³ன முத்³தி³ககாயப³ந்த⁴னம் க³ஹிதம், தஞ்ச ஸூகரந்தானுலோமிகம். யதா²ஹ ‘‘ஏகரஜ்ஜுகம் பன முத்³தி³ககாயப³ந்த⁴னஞ்ச ஸூகரந்தம் அனுலோமேதீ’’தி (சூளவ. அட்ட². 278). தத்த² ரஜ்ஜுகா நாம ஏகாவட்டா, ப³ஹுரஜ்ஜுகஸ்ஸ அகப்பியபா⁴வம் வக்க²தி. முத்³தி³ககாயப³ந்த⁴னம் நாம சதுரஸ்ஸம் அகத்வா ஸஜ்ஜிதந்தி க³ண்டி²பதே³ வுத்தம்.

முரஜம் நாம முரஜவட்டிஸண்டா²னம் வேடே²த்வா கதம். வேடே²த்வாதி நானாஸுத்தேஹி வேடே²த்வா. ஸிக்கா²பா⁴ஜனவினிச்ச²யே பன ‘‘ப³ஹுகா ரஜ்ஜுயோ ஏகதோ கத்வா ஏகாய ரஜ்ஜுயா வேடி²த’’ந்தி வுத்தம். மத்³த³வீணம் நாம பாமங்க³ஸண்டா²னம். தே³ட்³டு³ப⁴கம் நாம உத³கஸப்பஸதி³ஸம். கலாபு³கம் நாம ப³ஹுரஜ்ஜுகம். ரஜ்ஜுயோதி உப⁴யகோடியம் ஏகதோ அப³ந்தா⁴ ப³ஹுரஜ்ஜுயோ, ததா²ப³ந்தா⁴ கலாபு³கம் நாம ஹோதி. ந வட்டந்தீதி முரஜாதீ³னி இமானி ஸப்³பா³னி காயப³ந்த⁴னானி ந வட்டந்தி. புரிமா த்³வேதி முரஜம் மத்³த³வீணனாமஞ்சாதி த்³வே. ‘‘த³ஸாஸு ஸியு’’ந்தி வத்தப்³பே³ கா³தா²ப³ந்த⁴வஸேன வண்ணலோபேன ‘‘த³ஸா ஸியு’’ந்தி வுத்தம். யதா²ஹ ‘‘முரஜம் மத்³த³வீணந்தி இத³ம் த³ஸாஸுயேவ அனுஞ்ஞாத’’ந்தி.

பாமங்க³ஸண்டா²னாதி பாமங்க³தா³மம் விய சதுரஸ்ஸஸண்டா²னா. ஏகரஜ்ஜுமயந்தி நானாவட்டே ஏகதோ வட்டேத்வா கதம் ரஜ்ஜுமயம் காயப³ந்த⁴னம் வத்தும் வட்டதீதி ‘‘ரஜ்ஜுகா து³ஸ்ஸபட்டாதீ³’’தி ஏத்த² ஏகவட்டரஜ்ஜுகா க³ஹிதா. இத⁴ பன நானாவட்டே ஏகதோ வட்டேத்வா கதா ஏகாவ ரஜ்ஜு க³ஹிதா. தஞ்சாதி தம் வா நயம்பி ஏகரஜ்ஜுககாயப³ந்த⁴னம் பாமங்க³ஸண்டா²னேன க³ந்தி²தம். ஏகம்பி ச ந வட்டதீதி கேவலம்பி ந வட்டதி.

ப³ஹூ ரஜ்ஜுகே ஏகதோ கத்வாதி யோஜனா. வட்டதி ப³ந்தி⁴துந்தி முரஜம் கலாபு³கஞ்ச ந ஹோதி, ரஜ்ஜுககாயப³ந்த⁴னமேவ ஹோதீதி அதி⁴ப்பாயோ. அயம் பன வினிச்ச²யோ ‘‘ப³ஹுரஜ்ஜுகே ஏகதோ கத்வா ஏகேன நிரந்தரம் வேடே²த்வா கதம் ப³ஹுரஜ்ஜுகந்தி ந வத்தப்³ப³ம், தம் வட்டதீ’’தி அட்ட²கதா²க³தோ இத⁴ வுத்தோ. ஸிக்கா²பா⁴ஜனவினிச்ச²யே ‘‘ப³ஹுரஜ்ஜுயோ ஏகதோ கத்வா ஏகாய வேடி²தம் முரஜம் நாமா’’தி யம் வுத்தம், தம் இமினா விருஜ்ஜ²னதோ ந க³ஹேதப்³ப³ம்.

த³ந்த-ஸத்³தே³ன ஹத்தி²த³ந்தா வுத்தா. ஜதூதி லாகா². ஸங்க²மயந்தி ஸங்க²னாபி⁴மயம். வித⁴கா மதாதி ஏத்த² வேதி⁴காதிபி பாடோ², வித⁴பரியாயோ. காயப³ந்த⁴னவிதே⁴தி காயப³ந்த⁴னஸ்ஸ த³ஸாய தி²ரபா⁴வத்த²ம் கட்ட²த³ந்தாதீ³ஹி கதே விதே⁴. விகாரோ அட்ட²மங்க³லாதி³கோ. தத்த² தத்தா²தி தஸ்மிம் தஸ்மிம் டா²னே. து-ஸத்³தே³ன க⁴டாகாரோபி வட்டதீதி தீ³பேதீதி அத்தோ² பகாஸிதோ, தஸ்மா தேன நயேன காயப³ந்த⁴னவிசாரோ காதப்³போ³தி.

11. அஞ்ஜனியம் ‘‘உஜுகமேவா’’தி வுத்தத்தா சதுரஸ்ஸாதி³ஸண்டா²னாபி வங்கக³திகா ந வட்டதி. ஸிபாடிகாயாதி வாஸிஆதி³ப⁴ண்ட³பக்கி²பனே. வினயவினிச்ச²யப்பகரணே பன –

‘‘மாலாகம்மலதாகம்ம-நானாரூபவிசித்திதா;

ந ச வட்டதி பி⁴க்கூ²னம், அஞ்ஜனீ ஜனரஞ்ஜனீ.

‘‘தாதி³ஸம் பன க⁴ம்ஸித்வா, வேடே²த்வா ஸுத்தகேன வா;

வளஞ்ஜந்தஸ்ஸ பி⁴க்கு²ஸ்ஸ, ந தோ³ஸோ கோசி விஜ்ஜதி.

‘‘வட்டா வா சதுரஸ்ஸா வா, அட்ட²ம்ஸா வாபி அஞ்ஜனீ;

வட்டதேவாதி நித்³தி³ட்டா², வண்ணமட்டா² ந வட்டதி.

‘‘ததா²ஞ்ஜனிஸலாகாபி, அஞ்ஜனித²விகாய ச;

நானாவண்ணேஹி ஸுத்தேஹி, சித்தகம்மம் ந வட்டதி.

‘‘ஏகவண்ணேன ஸுத்தேன, ஸிபாடிம் யேன கேனசி;

யம் கிஞ்சி பன ஸிப்³பே³த்வா, வளஞ்ஜந்தஸ்ஸ வட்டதீ’’தி. –

ஆக³தம்.

தட்டீகாயம்பி மாலா…பே… சித்திதாதி மாலாகம்மலதாகம்மேஹி ச மிக³பக்கி²ரூபாதி³னானாரூபேஹி ச விசித்திதா. ஜனரஞ்ஜனீதி பா³லஜனபலோபி⁴னீ. அட்ட²ம்ஸா வாபீதி ஏத்த² அபி-ஸத்³தே³ன ஸோளஸம்ஸாதீ³னம் க³ஹணம். வண்ணமட்டா²தி மாலாகம்மாதி³வண்ணமட்டா². அஞ்ஜனீஸலாகாபி ததா² வண்ணமட்டா² ந வட்டதீதி யோஜனா. அஞ்ஜனீத²விகாய ச நானாவண்ணேஹி ஸுத்தேஹி சித்தகம்மம் ந வட்டதீதி பாடோ² யுஜ்ஜதி, ‘‘த²விகாபி வா’’தி பாடோ² தி³ஸ்ஸதி, ஸோ ந க³ஹேதப்³போ³. ‘‘பீதாதி³னா யேன கேனசி ஏகவண்ணேன ஸுத்தேன பிலோதிகாதி³மயம் கிஞ்சிபி ஸிபாடிகம் ஸிப்³பே³த்வா வளஞ்ஜந்தஸ்ஸ வட்டதீதி யோஜனா’’தி ஆக³தம்.

12. ஆரகண்டகாதீ³ஸு ஆரகண்டகேதி போத்த²காதி³அபி⁴ஸங்க²ரணத்த²ம் கதே தீ³க⁴முக²ஸத்த²கே. ப⁴மகாரானம் தா³ருஆதி³லிக²னஸத்த²கந்தி கேசி. வட்டமணிகந்தி வட்டம் கத்வா உட்டா²பேதப்³ப³பு³ப்³பு³ளகம். அஞ்ஞந்தி இமினா பிளகாதி³ம் ஸங்க³ண்ஹாதி. பிப்ப²லிகேதி யம் கிஞ்சி சே²த³னகே கு²த்³த³கஸத்தே². மணிகந்தி ஏகவட்டமணி. பிளகந்தி ஸாஸபமத்திகாமுத்தராஜிஸதி³ஸா ப³ஹுவட்டலேகா². இமஸ்மிம் அதி⁴காரே அவுத்தத்தா லேக²னியம் யம் கிஞ்சி வண்ணமட்ட²ம் வட்டதீதி வத³ந்தி. வஜிரபு³த்³தி⁴டீகாயம் பன ‘‘குஞ்சிகாய ஸேனாஸனபரிக்கா²ரத்தா ஸுவண்ணரூபியமயாபி வட்டதீதி சா²யா தி³ஸ்ஸதி. ‘குஞ்சிகாய வண்ணமட்ட²கம்மம் ந வட்டதீ’தி (பாரா. அட்ட². 1.85) வசனதோ அஞ்ஞே கப்பியலோஹாதி³மயாவ குஞ்சிகா கப்பந்தி பரிஹரணீயபரிக்கா²ரத்தா’’தி வுத்தம். ஆரகண்டகோ போத்த²காதி³கரணஸத்த²கஜாதி, ஆமண்ட³ஸாரகோ ஆமலகப²லமயோதி வத³ந்தி.

வலிதகந்தி நக²ச்சே²த³னகாலே த³ள்ஹக்³க³ஹணத்த²ம் வலியுத்தமேவ கரோந்தி. தஸ்மா தம் வட்டதீதி இமினா அஞ்ஞம்பி விகாரம் த³ள்ஹீகம்மாதி³அத்தா²ய கரோந்தி, ந வண்ணமட்ட²த்தா²ய, தம் வட்டதீதி தீ³பிதம், தேன ச கத்தரத³ண்ட³கோடியம் அஞ்ஞமஞ்ஞம் ஸங்க⁴ட்டனேன ஸத்³த³னிச்ச²ரணத்தா²ய கதவலயாதி³கம் அவுத்தம்பி யதோ உபபன்னம் ஹோதி. ஏத்த² ச த³ள்ஹீகம்மாதீ³தி ஆதி³-ஸத்³தே³ன பரிஸ்ஸயவினோத³னாதி³ம் ஸங்க³ண்ஹாதி, தேன கத்தரயட்டி²கோடியம் கதவலயானம் அஞ்ஞமஞ்ஞஸங்க⁴ட்டனேன ஸத்³த³னிச்ச²ரணம் தீ³க⁴ஜாதிகாதி³பரிஸ்ஸயவினோத³னத்த²ம் ஹோதி, தஸ்மா வட்டதீதி தீ³பேதி. தேனாஹ ஆசரியவரோ –

‘‘மணிகம் பிளகம் வாபி, பிப்ப²லே ஆரகண்டகே;

ட²பேதும் பன யம் கிஞ்சி, ந ச வட்டதி பி⁴க்கு²னோ.

‘‘த³ண்ட³கேபி பரிச்சே²த³-லேகா²மத்தம் து வட்டதி;

வலித்வா ச நக²ச்சே²த³ம், கரோந்தீதி ஹி வட்டதீ’’தி.

தஸ்ஸ வண்ணனாயம்பி மணிகந்தி தூ²லபு³ப்³பு³ளம். பீளகந்தி ஸுகு²மபு³ப்³பு³ளம். பிப்ப²லேதி வத்த²ச்சே²த³னஸத்தே². ஆரகண்டகேதி பத்ததா⁴ரவலயானம் விஜ்ஜ²னகண்டகே. ட²பேதுந்தி உட்டா²பேதும். யம் கிஞ்சீதி ஸேஸவண்ணமட்ட²ம்பி ச. த³ண்ட³கேதி பிப்ப²லித³ண்ட³கே. யதா²ஹ ‘‘பிப்ப²லிகேபி மணிகம் வா பிளகம் வா யம் கிஞ்சி ட²பேதும் ந வட்டதி, த³ண்ட³கே பன பரிச்சே²த³லேகா² வட்டதீ’’தி. பரிச்சே²த³லேகா²மத்தந்தி ஆணிப³ந்த⁴னட்டா²னம் பத்வா பரிச்சி²ந்த³னத்த²ம் ஏகாவ லேகா² வட்டதீதி. வலித்வாதி உப⁴யகோடிமுக²ம் கத்வா மஜ்ஜே² வலியோ கா³ஹேத்வா நக²ச்சே²த³ம் யஸ்மா கரோந்தி, தஸ்மா வட்டதீதி யோஜனாதி ஆக³தா.

உத்தராரணியம் மண்ட³லந்தி உத்தராரணியா பவேஸனத்த²ம் ஆவாடமண்ட³லம் ஹோதி. த³ந்தகட்ட²ச்சே²த³னவாஸியம் உஜுகமேவ ப³ந்தி⁴துந்தி ஸம்ப³ந்தோ⁴. ஏத்த² ச உஜுகமேவாதி இமினா வங்கம் கத்வா ப³ந்தி⁴தும் ந வட்டதீதி த³ஸ்ஸேதி, தேனேவ அஞ்ஜனியம்பி ததா² த³ஸ்ஸிதம். உபோ⁴ஸு பஸ்ஸேஸு ஏகபஸ்ஸே வாதி வசனஸேஸோ, வாஸித³ண்ட³ஸ்ஸ உபோ⁴ஸு பஸ்ஸேஸு த³ண்ட³கோடீனம் அசலனத்த²ம் ப³ந்தி⁴துந்தி அத்தோ². கப்பியலோஹேன சதுரஸ்ஸம் வா அட்ட²ம்ஸம் வா காதும் வட்டதீதி யோஜனா.

13. ஆமண்ட³ஸாரகேதி ஆமலகப²லானி பிஸித்வா தேன கக்கேன கததேலபா⁴ஜனே. தத்த² கிர பக்கி²த்தம் தேலம் ஸீதம் ஹோதி. ததா² ஹி வுத்தம் ஆசரியேன –

‘‘உத்தராரணியம் வாபி, த⁴னுகே பேல்லத³ண்ட³கே;

மாலாகம்மாதி³ யம் கிஞ்சி, வண்ணமட்ட²ம் ந வட்டதி.

‘‘ஸண்டா³ஸே த³ந்தகட்டா²னம், ததா² சே²த³னவாஸியா;

த்³வீஸு பஸ்ஸேஸு லோஹேன, ப³ந்தி⁴தும் பன வட்டதி.

‘‘ததா² கத்தரத³ண்டே³பி, சித்தகம்மம் ந வட்டதி;

வட்டலேகா²வ வட்டந்தி, ஏகா வா த்³வேபி ஹேட்ட²தோ.

‘‘விஸாணே நாளியம் வாபி, ததே²வாமண்ட³ஸாரகே;

தேலபா⁴ஜனகே ஸப்³ப³ம், வண்ணமட்ட²ம் து வட்டதீ’’தி.

டீகாயம்பி அரணிஸஹிதே ப⁴ந்தகிச்சகரோ த³ண்டோ³ உத்தராரணீ நாம. வாபீதி பி-ஸத்³தே³ன அத⁴ராரணிம் ஸங்க³ண்ஹாதி. உது³க்க²லத³ண்ட³ஸ்ஸேதம் அதி⁴வசனம். அஞ்ச²னகயந்தத⁴னு த⁴னுகம் நாம. முஸலமத்த²கபீளனத³ண்ட³கோ பேல்லத³ண்ட³கோ நாம. ஸண்டா³ஸேதி அக்³கி³ஸண்டா³ஸே. த³ந்தகட்டா²னம் சே²த³னவாஸியா ததா² யம் கிஞ்சி வண்ணமட்ட²ம் ந வட்டதீதி ஸம்ப³ந்தோ⁴. த்³வீஸு பஸ்ஸேஸூதி வாஸியா உபோ⁴ஸு பஸ்ஸேஸு. லோஹேனாதி கப்பியலோஹேன. ப³ந்தி⁴தும் வட்டதீதி உஜுகமேவ வா சதுரஸ்ஸம் வா அட்ட²ம்ஸம் வா ப³ந்தி⁴தும் வட்டதி. ஸண்டா³ஸேதி அக்³கி³ஸண்டா³ஸேதி நிஸ்ஸந்தே³ஹே வுத்தம். அட்ட²கதா²யம் பனேத்த² ஸூசிஸண்டா³ஸோ த³ஸ்ஸிதோ. ஹேட்டா²தி ஹேட்டா² அயோபட்டவலயே. ‘‘உபரி அஹிச்ச²த்தகமகுளமத்த’’ந்தி அட்ட²கதா²யம் வுத்தம். விஸாணேதி தேலாஸிஞ்சனகக³வயமஹிம்ஸாதி³ஸிங்கே³. நாளியம் வாபீதி வேளுனாளிகாதி³னாளியம். அபி-ஸத்³தே³ன அலாபு³ம் ஸங்க³ண்ஹாதி. ஆமண்ட³ஸாரகேதி ஆமலகசுண்ணமயதேலக⁴டே. தேலபா⁴ஜனகேதி வுத்தப்பகாரேயேவ தேலபா⁴ஜனே. ஸப்³ப³ம் வண்ணமட்ட²ம் வட்டதீதி புமித்தி²ரூபரஹிதம் மாலாகம்மாதி³ ஸப்³ப³ம் வண்ணமட்ட²ம் வட்டதீதி ஆக³தம்.

பூ⁴மத்த²ரணேதி கடஸாராதி³மயே பரிகம்மகதாய பூ⁴மியா அத்த²ரிதப்³ப³அத்த²ரணே. பானீயக⁴டேதி இமினா ஸப்³ப³பா⁴ஜனே ஸங்க³ண்ஹாதி. ஸப்³ப³ம்…பே… வட்டதீதி யதா²வுத்தேஸு மஞ்சாதீ³ஸு இத்தி²புரிஸரூபம்பி வட்டதி. தேலபா⁴ஜனேஸுயேவ இத்தி²புரிஸரூபானம் படிக்கி²பிதத்தா தேலபா⁴ஜனேன ஸஹ அக³ணேத்வா விஸும் மஞ்சாதீ³னம் க³ஹிதத்தா சாதி வத³ந்தி. கிஞ்சாபி வத³ந்தி, ஏதேஸம் பன மஞ்சாதீ³னம் ஹத்தே²ன ஆமஸிதப்³ப³ப⁴ண்ட³த்தா இத்தி²ரூபமேத்த² ந வட்டதீதி க³ஹேதப்³ப³ம். வஜிரபு³த்³தி⁴டீகாயம் (வஜிர. டீ. பாராஜிக 85) பன ‘‘தாலவண்டபீ³ஜனிஆதீ³ஸு வண்ணமட்ட²கம்மம் வட்டதீ’’தி வுத்தம். கிஞ்சாபி தானி குஞ்சிகா விய பரிஹரணீயானி, அத² கோ² உச்சாவசானி ந தா⁴ரேதப்³பா³னீதி படிக்கே²பாபா⁴வதோ வுத்தம். கேவலஞ்ஹி தானி ‘‘அனுஜானாமி பி⁴க்க²வே விதூ⁴பனஞ்ச தாலவண்டஞ்சா’’திஆதி³னா வுத்தானி. க³ண்டி²பதே³ பன ‘‘தேலபா⁴ஜனேஸு வண்ணமட்ட²கம்மம் வட்டதி, ஸேனாஸனபரிக்கா²ரத்தா வுத்த’’ந்தி வுத்தம். ஆசரியபு³த்³த⁴த³த்தத்தே²ரேனபி வுத்தமேவ –

‘‘பானீயஸ்ஸ உளுங்கேபி, தோ³ணியம் ரஜனஸ்ஸபி;

க⁴டே ப²லகபீடே²பி, வலயாதா⁴ரகாதி³கே.

‘‘ததா² பத்தபிதா⁴னே ச, தாலவண்டே ச பீ³ஜனே;

பாத³புஞ்ச²னியம் வாபி, ஸம்முஞ்ஜனியமேவ ச.

‘‘மஞ்சே பூ⁴மத்த²ரே பீடே², பி⁴ஸிபி³ம்போ³ஹனேஸு ச;

மாலாகம்மாதி³கம் சித்தம், ஸப்³ப³மேவ ச வட்டதீ’’தி.

14. ஏவம் ஸமணபரிக்கா²ரேஸு கப்பியாகப்பியம் கதே²த்வா இதா³னி ஸேனாஸனே கதே²தும் ‘‘ஸேனாஸனே பனா’’த்யாதி³மாஹ. ஏத்த² பன-ஸத்³தோ³ விஸேஸஜோதகோ. தேன ஸப்³ப³ரதனமயம்பி வண்ணமட்ட²கம்மம் வட்டதி, கிமங்க³ம் பன அஞ்ஞவண்ணமட்ட²கம்மந்தி அத்த²ம் ஜோதேதி. யதி³ ஏவம் கிஸ்மிஞ்சி படிஸேதே⁴தப்³பே³ ஸந்தேபி ததா² வத்தப்³ப³ம் ஸியாதி ஆஹ ‘‘ஸேனாஸனே கிஞ்சி படிஸேதே⁴தப்³ப³ம் நத்தீ²’’தி. வுத்தம்பி சேதம் ஆசரியபு³த்³த⁴த³த்தத்தே²ரேன –

‘‘நானாமணிமயத்த²ம்ப⁴-கவாடத்³வாரபி⁴த்திகம்;

ஸேனாஸனமனுஞ்ஞாதம், கா கதா² வண்ணமட்ட²கே.

‘‘ஸோவண்ணியம் த்³வாரகவாடப³த்³த⁴ம்;

ஸுவண்ணனானாமணிபி⁴த்திபூ⁴மிம்;

ந கிஞ்சி ஏகம்பி நிஸேத⁴னீயம்;

ஸேனாஸனம் வட்டதி ஸப்³ப³மேவா’’தி.